Letter 2: To the assembly of solitaries on zeal for faith - ܠܟܢܫܐ ܕܝܚܝܕ̈ܝܐ ܡܛܠ ܛܢܢܐ ܕܗܝܡܢܘܬܐ

ܠܩܕܝܫ ܒܟܠ ܐܒܘܢ ܡܒܪܟܐ ܡܪܝ ܒܒܝ ܒܪܟ ܝܫܘܥܝܗܒ ܒܡܪܢ ܫܠܡ. ܐܠܘ ܒܫܘܒܗܪܐ ܕܘܠܐ ܡܬܢܨܚ ܗܘ̣ܐ ܒܟܠ ܕܪ ܤܘܥܪܢܗ̇ ܕܛܒܬܐ ܐܘ ܐܒܘܢ: ܕܠܝܠ ܗܘ̣ܐ ܥܠܡܐ ܕܥܠ ܐܦܘ̈ܗܝ ܐܦ ܠܐܝܠܝܢ ܕܒܚܝܠܐ ܟܪܝܗܐ ܡܬܚܫܚܝܢ ܒܐܓܘܢܐ ܕܩܪ̈ܒܐ. ܕܗ̣ܝ ܬܫܒܘܚܬܐ ܕܡ̣ܢ ܤܓܝ̈ܐܐ ܬܘܤܦܬܐ ܕܥܘܫܢܐ ܝ̇ܗܒܐ ܗܘ̣ܬ ܠܡܚܝܠܘܬܐ ܕܛܢܢܗܘܢ: ܘܓܘܪ̈ܓܐ ܕܕܐܝܟ ܗܠܝܢ: ܬܪܒܝܬܐ ܕܦܪܗܤܝܐ ܗ̇ܘܝܢ ܗ̣ܘܘ ܠܡܠܬܐ ܕܚܠܦ ܩܘܫܬܐ. ܘܕܝܠܗ ܒܠܚܘܕ ܕܫܪܪܐ ܐܝܬܘܗܝ ܗܘ̣ܐ ܢܨܚܢܐ ܕܙܟܘܬܐ. ܘܠܐ ܗܘ̣ܐ ܕܡܫܡܫܢܘ̈ܗܝ. ܗܫܐ ܕܝܢ ܕܠܟܠ ܩܘܢܕܝܢܘܣ ܕܡ̣ܢ ܒܥܠܕܒ̈ܒܐ ܕܠܒܪ: ܢܩܝܦ ܗ̣ܘ ܡ̣ܢ ܟܕܘ ܐܦ ܪܛܢܐ ܕܡ̣ܢ ܒܝܬ̈ܝܐ: ܘܕܬܠܬ ܥܡ ܗܠܝܢ ܟܪܝܗܘܬܗ ܕܡܕܥܐ ܐܢܫܝܐ ܒܥܤܩܘܬ ܙܒ̈ܢܐ ܕܐܤܬܩܒܠܘ ܠܐܘܠܨܢܐ ܕܓܘܐ: ܐܟܚܕ ܕܝܢ ܘܒܝܫܬܐ ܕܕܠܐ ܡܬܛܦܝܣܢܘܬܐ ܕܫܠܛܬ̤ ܒܣܓܝ̈ܐܐ. ܘܢܤܒܬ ܡ̣ܢ ܟܕܘ ܒܪܬ ܩܠܗ ܕܫܠܝܚܐ. ܫܠܘܡܐ ܕܙܕܩ: ܕܒܙܒ̈ܢܐ ܠܡ ܐܚܪ̈ܝܐ ܢܗܘܘܢ ܒܢ̈ܝܢܫܐ ܪ̈ܚܡܝ ܢܦܫܗܘܢ ܘܫܪܟܢܗ̇ ܕܡܠܬܐ: ܘܤܘܓܐܐ ܕܐܚܪ̈ܢܝܬܐ ܐܝܠܝܢ ܕܒܪܘܚܐ ܕܩܘܕܫܐ ܐܬܩܕܡ ܐܬܟܪܝ pb. 3 ܩܕܡ ܕܪ̈ܐ ܤܓܝ̈ܐܐ: ܡܬܓܡܪ̈ܢ ܕܝܢ ܗܫܐ ܒܥܒ̇ܕܐ ܡ̣ܢ ܒܢܝ̈ܗ̇ ܕܠܐ ܡܬܛܦܝܤܢܘܬܐ: ܘܥܤܩܬ̤ ܠܩܘܝܡܐ ܡܬܚ̇ܘܝܐ ܒܝܪ ܗܠܝܢ ܡܨܠܚܘܬܐ ܕܗܝܡܢܘܬܢ. ܠܐܝ̇ܕܐ ܟܝ ܬܫܒܘܚܬܐ ܕܩܘܠܤ̈ܐ ܠܐ ܐܝܬܘܗܝ ܡܪܐ: ܗܘ̇ ܕܒܡܚܫ̈ܘܠܐ ܕܦܤܩ ܤܒܪܐ ܡܕܒ̇ܪ ܠܐܠܦܐ ܕܗܝܡܢܘܬܐ ܒܤܘ̈ܟܢܐ ܕܟܪܘܙܘܬܗ: ܘܬܘܪܤܝܐ ܫܦܝܥܐ ܡ̇ܠܐ ܠܡܕܝܢ̇ܬܗ ܡ̣ܢ ܬܐܓܘܪܬܐ ܕܚܝ̈ܐ ܪ̈ܘܚܢܝܐ. ܠܕܐܝܟ ܗܢܐ ܓܝܪ ܩܘܢܕܝܢܘܣ ܕܟܝܡ̈ܘܢܐ ܒܪܒܪ̈ܝܐ: ܟܕ ܚ̇ܤܢܐ ܚܦܝܛܘܬܐ ܕܛܢܢܟ ܢܘܓܪܐ ܕܫܢܝ̈ܐ ܐܘ ܐܒܘܢ ܩܕܝܫ ܒܟܠ: ܕܠܐ ܚܝܠ ܐܬܡܨܝ̣ܬ ܠܡܚܘܝܘ ܐܢܘܢ ܠܟܠܗܘܢ ܦܘܪ̈ܤܐ ܤܛ̈ܢܝ̈ܐ ܕܫܐܕ̈ܐ ܦܓܪ̈ܢܝܐ. ܒܗܢܐ ܓܝܪ ܫܘܡܗܐ ܡܤܬܒ̣ܪܐ ܠܝ ܠܡܩܪܐ ܐܢܘܢ ܠܪ̈ܫܝܥܐ: ܐܦ ܓܝܪ ܗܘ̇ ܫܠܝܛܐ ܕܐܐܪ: ܟܕ ܟܝܢܐ ܡܝܬܪܐ ܩ̇ܢܐ ܗܘ̣ܐ ܒܒܪܝܬܗ ܡ̣ܢ ܒܪܘܝܐ ܛܒܐ: ܐܠܐ ܪܘܫܥܐ ܕܠܘܩܒܠ ܐܠܗܐ ܫܡܐ ܗܢܐ ܐܬܬܓܪ ܠܗ. ܘܒܪܓܘܢ ܐܦ ܝܪ̈ܬܐ ܕܡܪܘܬܗ ܝܪܬܘܬܐ ܕܫܡܗ ܚ̇ܛܦܝܢ ܠܘܬܗܘܢ ܡ̣ܢ ܟܠ ܦܪܘܣ. ܠܕܐܝܟ ܗܠܝܢ ܤܟܝܠ ܫܐܕ̈ܐ ܪ̈ܫܝܐ ܒܥܠܕܒܒܘ̈ܗܝ ܕܫܫܪܐ: ܘܠܛ̈ܠܐ ܘܠܐ ܡܬܛܦܝ̈ܤܢܐ ܫܘܬ̈ܦܐ ܕܒܝܫܘܬܗܘܢ: ܥܡ ܟܠܗ ܚܐܦܐ ܕܫܢܝܘܬܗܘܢ ܕܠܝܠܐܝܬ ܡ̇ܘܩܕܐ ܗܘ̣ܬ ܢܘܪܐ ܕܛܢܢܟ ܐܠܗܝܐ. ܘܟܕ ܠܙܗܪܐ ܕܫܠܗܒܝܬܗ̇ ܡܤܝܦܐ ܐܝܟ ܕܠܚܒܬܐ ܠܪܘܫܥܐ ܕܡܪܚܘܬܗܘܢ: ܕܠܐ ܬܘܩܠܐ ܥܒܕܐ ܠܡܪܕܐ ܒܐܘܪܚܗ ܕܫܪܪܐ ܠܐܝܠܝܢ ܕܗܢܝ ܠܗܘܢ ܠܡܬܒܤܡܘ ܒܢܘܗܪܐ ܕܐܘܢܓܠܝܘܢ ܕܫܘܒܚܗ ܕܡܫܝܚܐ: ܡ̣ܢ ܡܨܥ̣ܬ ܟܬܝܼܫܘܬܐ ܕܒܥܠܕ̈ܒܒܐ: ܘܡ̣ܢ ܪܛܢܐ ܕܒܝܬ̈ܝܐ ܘܟܠܗ̇ ܐܢܢܩܐ ܕܙܒܢܐ ܫܘܒܗܪܐ ܕܛܢܢܟ ܡܬܢܨܚ ܒܬܫܒܘܚܬܐ ܕܡ̣ܢ ܐܠܗܐ: ܕܗ̣ܘ ܒܛܒܝܘܬܗ ܢܪܡܪܡ ܐܝܩܪܟ ܒܛܝܒܘܗ ܠܒܘܝܐܐ ܕܫܪܝܼܪ̈ܘܗܝ ܠܢܘܓܪܐ ܕܫܢܝ̈ܐ ܐܡܝܢ܀