Against the Jews - ܠܘܼܩܒܲܠ ܝܗ̄ܘܼܕܼܵܝܹ̈ܐ

1 :ܬܵܐ ܝܗ̄ܘܼܕܼܵܝܵܐ ܚܬܼܝܼܪ ܒܲܫܡܵܗܹ̈ܐ ܦܲܓܼܪ̈ܵܢܵܝܹܐ 2 ܓܠܝܼ ܘܒܲܕܸܿܩ ܠܝܼ ܕܡ̇ܢܲܐ ܗ̄ܝܼ ܥܸܠܬܼܵܐ ܕܓܼܒܼܝܘܼܬܼ ܥܲܡܵܟ ܀ 3 :ܡܸܛܠ ܡ̇ܢܵܐ ܓܒܹܝܬܿ ܡ̣ܢ ܟܠܵܐ ܠܐܲܠܵܗ ܟܠܵܐ 4 ܘܲܡܝܲܩܲܪ ܐܲܢ̄ܬܿ ܒܲܫܡܵܐ ܘܕܿܪܓܼܵܐ ܠܥܸܠ ܡ̣ܢ ܥܲܡܡܹ̈ܐ ܀ 5 :ܠܡܵܢܵܐ ܦܪܝܼܫܲܬܿ ܡ̣ܢ ܫܲܪ̈ܒܼܵܬܼܵܐ ܕܟܼܠܵܗ̇ ܬܹܒܹܝܠ 6 ܘܠܵܐ ܡܸܬܼܚܲܠܛܲܬܿ ܥܲܡ ܐܸܡ̈ܘܵܬܼܵܐ ܕܝܲܠܕܼܵܘ̈ܗܝ ܕܐܵܕܼܵܡ ܀ 7 :ܠܡܵܢ ܡܸܬܼܢܲܟܼܪܹܝܬܿ ܐܲܝܟ ܢܘܼܟܼܪܵܝܵܐ ܠܲܒܼܢܲܝ̈ ܓܸܢܣܵܝܟ 8 ܕܗܵܐ ܡܸܢܹܗ ܐܲܢ̄ܬܿ ܕܡܸܕܼܪܵܐ ܕܐ̄ܢܵܫܵܐ ܓܒܼܝܼܠ ܡ̣ܢ ܥܲܦܪܵܐ ܀ 9 :ܚܲܕܼܘܼ ܟܝܵܢܵܐ ܕܐܵܕܼܵܡ̇ܝܹ̈ܐ ܐܘܿ ܒܲܪ ܐܵܕܼܵܡ 10 ܘܚܲܕܼܘܼ ܚܲܝܠܵܐ ܕܐܲܬܼܩܸܢ ܠܐܵܕܼܵܡ ܘܲܠܝܲܠ̈ܕܵܬܹܗ ܀ 11 :ܟܝܵܢܵܐ ܣܵܗܹ̇ܕܼ ܕܚܲܕܼܘܼ ܟܝܵܢܵܐ ܘܚܲܕܼ ܒܵܪܘܿܝܵܐ 12 ܘܐܸܢ ܚܲܕܼ ܐܸܢܘܿܢ ܠܡܵܢ ܦܘܼܪܫܵܢܵܐ ܕܥܲܡܵܐ ܘܥܲܡܡܹ̈ܐ ܀ 13 ܐܸܢ ܚܲܕܼ ܪܸܡܙܵܐ ܒܪ݂ܵܐ ܟܠܡܼܕܹܿܡ ܡ̣ܢ ܠܵܐ ܡܼܕܸܿܡ: pb. 300 14 ܠܡܵܢ ܣܵܕܹ̇ܩ ܐܲܢ̄ܬܿ ܒܪܝܼܬܼܵܐ ܫܘܼܝܼܬܼܵܐ ܒܠܵܐ ܫܲܘܝܘܼܬܼܵܟ ܀ 15 :ܐܸܢܗܘ̤ ܕܟܹܐܢܵܐ ܗ̄ܘ̣ ܚܲܝܠܵܐ ܕܲܒܼܪܵܐ ܡܠܝܼܠܹ̈ܐ ܘܚܲܪ̈ܫܹܐ 16 ܠܡܵܢ ܠܵܐ ܫܲܘܝܵܐ ܣܵܥܘܿܪܘܼܬܹܗ ܠܘܵܬܼ ܬܘܼܩܵܢܵܘ̈ܗܝ ܀ 17 :ܠܡܵܢܵܐ ܓ̣ܒܼܵܟ ܠܵܟ ܡ̣ܢ ܟܠ ܥܲܡܡܝܼ̈ܢ ܘܐܲܣܠܝܼ ܠܫܲܪܟܵܐ 18 ܘܥܲܠ ܡ̇ܢ ܨܹܐܕܲܝܟ ܥܒ݂ܲܕܼ ܡܘܼܠܟܵܢܵܐ ܘܠܵܐ ܨܹܝܕܼ ܟܠܢܵܫ ܀ 19 :ܠܡܵܢܵܐ ܒܥܲܡܵܟ ܐܲܣܪܹܗ ܠܪܲܗܛܵܐ ܕܪܘܼܚ ܓܸܠܝܵܢܵܘ̈ܗܝ 20 ܘܬܲܚܸܡ ܘܲܟܼܠ̣ܵܗ̇ ܠܲܢܒܼܝܘܼܬܼܵܐ ܠܓܼܵܘ ܡ̣ܢ ܫܲܒܼܛܲܝ̈ܟ ܀ 21 :ܠܡܵܢ ܠܵܟ ܒܲܠܚܘܿܕܼ ܝܲܗ̣̄ܒܼ ܢܵܡܘܿܣܵܐ ܚܲܝܹ̈ܐ 22 ܘܢܲܟܼܪܝܼ ܠܥܲܡܡܹ̈ܐ ܡ̣ܢ ܚܲܠܝܘܼܬܼܵܐ ܕܢܸܒܼܥܹܗ ܪܲܒܵܐ ܀ 23 :ܠܡܵܢ ܒܵܟ ܚܹܝܠ ܐܵܬܼܘܵܬܹ̈ܗ ܘܲܓܼܒܲܪ̈ܘܵܬܹܗ 24 ܘܲܪܸܕܼܵܐ ܠܥܲܡܡܹ̈ܐ ܘܐܲܟܸܿܣ ܠܡܲܠ̈ܟܹܿܐ ܡܸܛܠܵܬܼܵܟ ܀ 25 :ܠܡܵܐ ܟܲܝ ܚܘܼܒܵܟ ܫܦܝܼܥ ܨܹܝܕܼ ܚܘܼܒܹܿܗ ܝܲܬܿܪܝܼ ܡ̣ܢ ܟܠ 26 ܘܡܸܛܠ ܗܵܕܹܐ ܦܲܪ̣ܥܵܟ ܐܲܓܼܪܵܐ ܕܫܵܘܹ̇ܐ ܠܚܘܼܒܵܟ ܀ 27 :ܐܵܘ ܕܲܠܡܵܐ ܟܲܝ ܠܚܘܼܒܹܿܗ ܕܐܲܒܼܪܵܡ ܝܲܩܲܪ ܚܘܼܒܹܿܗ 28 ܘܡܸܛܠ ܗܵܕܹܐ ܥܲܒܼ݂ܕܼܵܟ ܝܵܪܬܵܐ ܕܚܘܼܒܹܿܗ ܪܲܒܵܐ ܀ 29 :ܡ̇ܕܹܝܢ ܢܸܒܼܥܸܐ ܕܡܸܛܠ ܡ̇ܢܵܐ ܓܒܼ݂ܵܝܗܝ ܠܐܲܒܼܪܵܗܵܡ 30 ܘܐܲܝܕܼܵܐ ܗ̄ܝܼ ܥܸܠܬܼܵܐ ܕܲܩܪ̣ܵܝܗܝ ܪܵܚܡܵܐ ܕܒܲܣܝܼܡܘܼܬܹܗ ܀ 31 :ܐܸܢ ܐܵܡܲ݁ܪ ܐܲܢ̄ܬܿ ܕܚܘܼܒܹܿܗ ܥܲܒܼ݂ܕܹܿܗ ܪܵܚܡܵܐ ܠܟܲܣܝܵܐ 32 ܗܵܐ ܩܲܕܿܝܼܡܵܐ ܓܒܼܝܼܬܹܗ ܠܚܘܼܒܹܿܗ ܘܣܵܗܹ̇ܕ ܡܘܼܫܹܐ ܀ 33 :ܪܘܼܚ ܓܸܠܝܵܢܵܐ ܩܪ̣ܵܝܗܝ ܡ̣ܢ ܒܵܒܹܠ ܩܕܼܵܡ ܕܲܢܗܲܝܡܸܢ 34 ܘܒܼܵܬܲܪ ܕܲܦܪܵܝܗܝ ܫܒ݂ܲܩ ܚܲܢܦܘܼܬܼܵܐ ܘܝܲܩܲܪ ܩܘܼܫܬܵܐ ܀ 35 :ܡ̇ܕܹܝܢ ܠܵܐ ܠܵܟ ܠܡܸܫܬܲܒܼܗܵܪܘܼ ܘܠܵܐ ܠܐܲܒܼܵܗܲܝ̈ܟ 36 ܕܗܵܐ ܓܼܒܼܝܘܼܬܼܵܟ ܗ̄ܝܼ ܕܲܐ̄ܚܪܹܝܢ ܕܓܼܵܒܹ̇ܐ ܘܡܲܣܠܸܐ ܀ 37 :ܘܢܸܗܘܸܐ ܕܚܘܼܒܹܿܗ ܠܐܲܒܼܪܵܡ ܕܢܸܗܘܸܐ ܓܼܒܼܝܵܐ 38 ܗܵܐ ܐܝܼܬܼ ܕܐܲܚܸܒܼ ܩܕܼܵܡ ܓܲܒܼܝܘܼܬܹܗ ܝܲܬܿܝܼܪ ܡܸܢܹܗ ܀ 39 :ܐܲܚܸܒܼ ܗܵܒܹܝܠ ܘܚܵܘܝܼ ܚܘܼܒܹܿܗ ܒܝܲܕܼ ܣܘܼܥܪܵܢܵܐ 40 ܘܣܵܗܹ̇ܕܼ ܩܸܛܠܹܿܗ ܚܘܼܒܵܐ ܩܲܛ̣ܠܹܗ ܚܣܵܡܵܐ ܀ 41 :ܫܦ݂ܲܪ ܗ̄ܘ̣ܵܐ ܐܵܦ ܢܘܿܚ ܒܕܼܵܪܵܐ ܣܲܢܝܵܐ ܡܚܲܒܸܿܠ ܐܘܼܪܚܹܗ 42 ܘܗܵܐ ܣܵܗܕܿܘܼܬܼܵܐ ܕܕܲܟܼܝܘܼܬܼ ܢܲܦܫܹܗ ܒܣܸܦܪܹܗ ܕܡܘܼܫܹܐ ܀ 43 :ܟܲܗܸܢ ܘܝܼܪܸ݂ܒܼ ܐܵܦ ܡܲܠܟܿܝܼܙܕܹܿܩ ܩܕܼܵܡ ܐܲܠܵܗܹܗ 44 ܘܢܹܐܡܲܪ ܐܲܒ̣ܪܵܡ ܕܐܲܪܟܸܿܢ ܪܹܫܹܗ ܩܕܼܵܡ ܒܘܼܪ̈ܟܵܬܹܗ ܀ pb. 301 45 :ܗܵܐ ܗܘ̤ܵܘ ܟܹܐܢܹ̈ܐ ܒܲܪ ܐܲܒܼܪܵܗܵܡ ܕܕܼܵܡܹ̇ܝܢ ܠܐܲܒܼܘܼܟ 46 ܠܡܵܢ ܨܹܝܕ ܐܲܒܼܘܼܟ ܗܘ̤ܵܐ ܡܘܼܠܟܵܢܵܐ ܘܠܵܐ ܨܹܐܕܲܝܗܘܿܢ ܀ 47 :ܠܡܵܢܵܐ ܡ̣ܠܲܟ ܠܹܗ ܕܒܼܵܟ ܢܸܬܼܒܲܪܟܼܘܼܟ ܥܲܡܡܹ̈ܐ ܕܐܲܪܥܵܐ 48 ܘܠܵܐ ܨܒܼܵܐ ܫܲܠܸܡ ܫܘܘܼܕܵܝ ܡܸܠܵܘ̈ܗܝ ܐܲܝܟ ܐܲܢ̄ܬܿ ܀ 49 :ܠܦܘܼܬܼ ܪܸܥܝܵܢܵܟ ܐܸܡ̇ܪܹܬܼ ܗܵܕܹܐ ܕܠܵܐ ܨܒܼ݂ܵܐ ܫܲܠܸܡ 50 ܠܝܼ ܫܲܪܝܼܪܵܐ ܕܫܸܠܡܲܬ̤ ܗܵܕܹܐ ܒܝܲܕܼ ܣܘܼܥܪ݁ܵܢܹܐ ܀ 51 :ܠܡܵܢܵܐ ܫܲܚܠܸܦ ܫܡܹܗ ܖܲܕܼܡ̇ܝܵܐ ܘܲܩ̣ܪܵܝܗܝ ܒܲܐ̄ܚܪܹܝܢ 52 ܘܥܲܠ ܡ̇ܢ ܝܲܗ̣̄ܒܼ ܠܹܗ ܐܲܒܼܵܗܘܼܬܼܵܐ ܕܥܲܠ ܟܠ ܥܲܡܡ̈ܝܼܢ ܀ 53 :ܐܲܒܼܪܵܡ ܐܲܒܼܵܐ ܗ̄ܘ̣ ܕܥܲܠ ܚܲܕܼ ܥܲܡܵܐ ܫܲܠܝܼܛ ܒܲܠܚܘܿܕܼ 54 ܘܫܸܡ ܐܲܒܼܪܵܗܵܡ ܐܲܒܼܵܗܘܼܬܼܵܐ ܗ̄ܝܼ ܕܥܲܠ ܣܲܓܿܝܼ̈ܐܹܐ ܀ 55 :ܫܡܹܗ ܩܲܕܼܡܵܝܵܐ ܠܵܐ ܐܝܼܬܼ ܗ̄ܘ̣ܵܐ ܒܹܗ ܗܲܝܡܵܢܘܼܬܼܵܐ 56 :ܘܡ̣ܢ ܕܐܸܫܬܲܪܲܪ ܒܗܲܝܡܵܢܘܼܬܼܵܐ ܗܘ̤ܵܐ ܐܲܒܼܪܵܗܵܡ 57 :ܚܕܼܵܐ ܐܝܼܬܼܘܼܬܼܵܐ ܓܠܵܬ̤ ܦܲܫܸܩܬܹܗ ܠܚܲܝܠܵܐ ܕܲܫܡܹܗ 58 ܘܕܼܪܫܲܬ̤ ܐܘܼܪܚܵܐ ܒܝܲܕܼ ܗܸܓܼܝܵܢܵܗ̇ ܕܢܸܪܕܿܘܿܢ ܥܲܡܡܹ̈ܐ ܀ 59 :ܗܲܝܡܵܢܘܼܬܹܗ ܥܒܲܕܼܬܹܗ ܕܢܸܗܘܸܐ ܐܲܒܼܵܐ ܕܥܲܡܡܹ̈ܐ 60 ܘܡ̇ܢܵܐ ܢܸܥܒܸܿܕܼ ܕܗܵܐ ܩܲܕܿܡܵܐ ܓܒܼܝܼܬܹܗ ܒܲܫܡܹܗ ܀ 61 :ܓܒܼܝܼܬܹܗ ܕܐܲܒܼܘܼܟ ܬܵܒܲܥ̇ ܐ̄ܢܵܐ ܠܵܟ ܒܲܪ ܐܲܒܼܪܵܗܵܡ 62 ܕܡܵܢܲܐ ܗ̄ܝܼ ܘܥܲܠ ܡ̇ܢ ܡܝܲܩܲܪ ܓܸܢܣܵܟ ܝܲܬܿܝܼܪ ܡ̣ܢ ܟܠ ܀ 63 :ܓܠܝܼ ܘܒܲܕܼܿܩ ܠܝܼ ܐܲܝܟ ܒܲܝܬܵܝܵܐ ܓܒܼܝܼܬܹܗ ܘܲܫܡܹܗ 64 ܘܫܵܠܹ̇ܡ ܐ̄ܢܵܐ ܠܵܟ ܕܫܲܦܝܼܪ ܪܵܕܹܝܬܿ ܒܗܲܝܡܵܢܘܼܬܹܗ ܀ 65 :ܐܸܢ ܠܹܗ ܒܲܠܚܘܿܕܼ ܓܒܼ݂ܵܐ ܒܵܪܘܿܝܵܐ ܡ̣ܢ ܟܠ ܕܲܗܘ̤ܵܘ 66 ܠܵܐ ܟܹܐܝܢ ܚܘܼܒܹܿܗ ܕܲܠܚܲܕܼ ܓܵܒܹܿܐ ܘܠܲܐ̄ܚܪܹܝܢ ܡܲܣܠܸܐ ܀ 67 :ܠܡܵܢ ܠܵܐ ܓܒܼ݂ܵܐ ܠܹܗ ܟܹܐܢܵܐ ܐ̄ܚܪܹܢܵܐ ܒܕܼܘܼܡܝܵܐ ܕܝܼܠܹܗ 68 ܕܕܼܵܡ ܣܵܓܹܿܐ ܗ̄ܘ̣ܵܐ ܓܲܒܵܐ ܕܟܹܐܢܹ̈ܐ ܘܙܵܥܲ݁ ܥܵܘ̣ܠܵܐ ܀ 69 :ܘܗܵܐ ܠܵܘ ܟܹܐܢܹ̈ܐ ܗܘ̤ܵܘ ܡ̣ܢ ܟܹܐܢܵܐ ܕܬܲܫܲܪ ܗܵܕܹܐ 70 ܘܣܵܗܹ̇ܕܼ ܥܵܘ̣ܠܵܐ ܕܲܒܼܢܵܘ̈ܗܝ ܕܐܲܒܼܪܵܡ ܕܢܘܼܟܼܪܵܝ ܠܐܲܒܼܪܵܡ ܀ 71 :ܘܢܸܗܘܸܐ ܕܲܓܼܒܼ݂ܵܝܗܝ ܐܲܝܟܲܢ ܕܲܓܼܒܼ݂ܵܝܗܝ ܕܫܲܠܝܼܛ ܗ̄ܘ̣ ܠܹܗ 72 ܫܡܹܗ ܡܸܛܠ ܡ̇ܢ ܫܲܚܠܸܦ ܘܲܩ̣ܪܵܝܗܝ ܐܲܒܼܵܐ ܕܥܲܡܡܹ̈ܐ ܀ 73 :ܘܐܸܢ ܫܲܪܝܼܪܵܐ ܕܐܲܒܼܵܐ ܗܵܘܹ̇ܐ ܠܘܵܬܼ ܟܘܼܢܵܝܹܗ 74 ܓܒܼܝܼܬܹܗ ܘܲܫܡܹܗ ܥܸܠܬܼܵܐ ܐܸܢܹܝܢ ܕܐܲܒܼܵܗܘܼܬܹܗ ܀ pb. 302 75 :ܡ̇ܢ ܐܵܡܲ݁ܪ ܐܲܢܬܿ ܒܲܪ ܐܲܒܼܪܵܗܵܡ ܥܲܠ ܐܲܒܼܪܵܗܵܡ 76 ܐܲܝܟܲܢ ܗܵܘܹ̇ܐ ܐܲܒܼܘܼܟ ܐܲܒܼܵܐ ܠܵܟ ܘܲܠܥܲܡܡܹ̈ܐ ܀ 77 :ܡ̇ܕܹܝܢ ܠܲܝܬܿ ܠܵܟ ܡܸܕܸܿܡ ܝܲܬܼܝܼܪ ܫܸܡ ܐܲܒܼܪܵܗܵܡ 78 ܕܗܵܐ ܐܵܦ ܥܲܡܡܹ̈ܐ ܒܢܲܝܵ̈ܐ ܐܸܢܘܿܢ ܐܲܟܼܡܵܐ ܕܲܟܼܬܼܝܼܒܼ ܀ 79 :ܒܥܸܠܲܬܼ ܥܲܡܡܹ̈ܐ ܣܠ̣ܩ ܐܲܒܼܪܵܗܵܡ ܠܕܲܪܓܼܵܐ ܪܵܡ̇ܐ 80 ܡܵܕܹܝܢ ܓܲܠܝܵܐ ܗ̄ܝܼ ܕܥܲܡܡܹ̈ܐ ܗܘ̤ܵܘ ܠܹܗ ܥܸܠܬܼܵܐ ܕܢܹܐܪܲܒܼ ܀ 81 :ܬܵܐ ܟܹܝܬܼ ܩܲܠܸܣ ܒܲܪ ܐܲܒܼܪܵܗܵܡ ܠܥܲܡܡܹ̈ܐ ܐ̄ܚܝܵܢܲܝ̈ܟ 82 ܕܐܸܠܘܼ ܠܵܐ ܗܘ̤ܵܘ ܒܢܲܝ̈ܵܐ ܠܐܲܒܼܘܼܟ ܠܵܐ ܝܵܪܹܒܼ ܗ̄ܘ̣ܵܐ ܀ 83 :ܙܥܘܿܪ ܗ̄ܘ̣ ܐܲܒܼܪܵܐ ܡ̣ܢ ܐܲܒܼܪܵܗܵܡ ܟܡܵܐ ܐܸܢ ܬܹܐܡܲܪ 84 ܐܲܟܼܡܵܐ ܕܲܙܥܘܿܪ ܥܲܡܵܐ ܕܝܼܠܹܗ ܡ̣ܢ ܟܠ ܥܲܡܡ̈ܝܼܢ ܀ 85 :ܐܸܠܘܼ ܩܵܘܝܲܬ̤ ܐܲܒܼܵܗܘܼܬܹܗ ܒܥܲܡܵܐ ܒܲܠܚܘܿܕܼ 86 ܠܵܐ ܫܵܠܹ̇ܐ ܗ̄ܘ̣ܵܐ ܫܡܹܗ ܒܲܥܒܼܵܕܼܵܐ ܠܗܵܝ̇ ܕܐܸܬܼܟܲܢܝܼ ܀ 87 :ܙܵܥܲܪ̇ ܗ̄ܘ̣ܵܐ ܠܹܗ ܐܵܦ ܫܘܼܠܛܵܢܵܐ ܕܡ̇ܪܵܐ ܕܲܓܼܒܼ݂ܵܝܗܝ 88 ܘܡܸܫܬܲܠܛܝܼܢ ܗ̄ܘ̣ܵܘ ܐܵܦ ܐܲܠܵܗܹ̈ܐ ܝܲܬܼܝܼܪ ܡܸܢܹܗ ܀ 89 :ܘܐܸܢܗܘ̤ ܕܲܒܼܢܵܘ̈ܗܝ ܗܵܘܹ̇ܝܢ ܗ̄ܘ̣ܵܘ ܠܹܗ ܒܢܲܝ̈ܵܐ ܒܲܠܚܘܿܕܼ 90 ܠܥܲܡܡܹ̈ܐ ܚܲܢܦܹ̈ܐ ܡܸܬܼܦܲܢܝܵܐ ܗ̄ܘ̣ܵܬܼ ܐܲܒܼܵܗܘܼܬܼܵܐ ܀ 91 :ܐܸܢ ܒܵܪܘܿܝܵܐ ܥܲܠ ܝܲܠܕܵܬܹ̈ܗ ܡܸܫܬܲܠܲܛ ܗ̄ܘ̣ܵܐ 92 ܒܵܙ̇ܝܼܢ ܗ̄ܘ̣ܵܘ ܠܵܗ̇ ܦܬܲܟܼܪܹ̈ܐ ܚܲܪ̈ܫܹܐ ܠܥܵܒܼܘܿܕܘܼܬܹܗ ܀ 93 :ܡܢܵܬܼܵܐ ܙܥܘܿܪܬܵܐ ܡܸܬܼܝܲܗ̄ܒܵܐ ܗ̄ܘ̣ܵܬܼ ܠܹܗ ܡ̣ܢ ܕܝܼܠܹܗ 94 ܘܲܕܼܠܵܐ ܩܵܠܵܐ ܡܸܬܼܟܲܢܹܝܢ ܗ̄ܘ̣ܵܘ ܡ̇ܪ̈ܵܘܵܬܼܵܐ ܀ 95 :ܠܠܵܐ ܐܲܠܵܗܹ̈ܐ ܣܘܿܓܼܐܵܐ ܕܥܲܡܡܹ̈ܐ ܕܠܵܐ ܡܸܢܝܵܢܵܐ 96 ܘܠܲܐܠܵܗ ܟܠܵܐ ܥܲܡܵܐ ܙܥܘܿܪܵܐ ܕܫܝܼܛ ܘܲܡܫܲܥܒܲܕ ܀ 97 :ܠܵܐ ܒܲܪ ܐܲܒܼܪܵܡ ܠܵܐ ܬܲܙܥܲܪܲܝܗܝ ܠܡܲܬܼܩܸܢ ܟܠܵܐ 98 ܕܕܝܼܠܹܗ ܐܸܢܘܿܢ ܥܲܡܡܹ̈ܐ ܕܡܲܣܠܹܝܢ ܠܣܵܪܘܿܒܼܘܼܬܼܵܟ ܀ 99 :ܓܒܝܼܬܹܗ ܕܐܲܒܼܘܼܟ ܐܵܚ̇ܕܵܐ ܬܲܪܥܵܐ ܒܐܲܦܲܝ̈ ܡܸܠܲܝ̈ܟ 100 ܕܟܼܠܡܲܢ ܕܐܝܼܬܼܵܘܗܝ ܒܲܪ ܐܲܒܼܪܵܗܵܡ ܒܪܵܐ ܗ̄ܘ̣ ܕܐܲܠܵܗܵܐ ܀ 101 :ܠܵܐ ܩܢܹܝܬܿ ܡܸܕܹܿܡ ܝܲܬܿܝܼܪ ܡ̣ܢ ܟܠ ܫܸܡ ܒܵܪܘܿܝܵܐ 102 ܘܠܵܐ ܫܲܠܝܼܛ ܐܲܢ̄ܬܿ ܠܡܹܐܚܲܕܼ ܬܲܪܥܵܐ ܒܐܲܦܲܝ̈ ܥܲܡܡܹ̈ܐ ܀ 103 :ܐ̄ܚܝܵܢܲܝ̈ܟ ܐܸܢܘܿܢ ܓܙܝܼܪܵܐ ܕܲܚܬܼܝܼܪ ܒܛܲܒܼܥܵܐ ܕܒܸܣܪܵܐ 104 ܠܡܵܢ ܠܵܐ ܫܵܠ̇ܡܲܬܿ ܠܲܐ̄ܚܝܵܢܘܼܬܼܵܐ ܕܒܹܝܬܼ ܐܲܒܼܪܵܗܵܡ ܀ 105 :ܒܫܸܡ ܐܝܼܬܼܘܼܬܹܗ ܝ̣̄ܡܵܐ ܒܵܪܘܿܝܵܐ ܠܐܲܒܼܘܼܟ ܘܐܲܒܼܘܼܢ 106 ܕܒܼܵܟ ܢܸܬܼܒܲܪܟܼܘܼܢ ܥܲܡܡܹ̈ܐ ܘܢܸܗܘܘܿܢ ܒܢܲܝ̈ ܝܵܪܬܿܘܼܬܼܵܟ ܀ 107 :ܫܲܪܝܼܪ ܩܵܠܵܐ ܕܝܼ̣ܡܵܐ ܒܢܲܦܫܹܗ ܐܵܘ ܠܵܐ ܫܲܪܝܼܪ 108 ܗܘ̤ܵܘ ܘܐܸܬܼܒܲܪܲܟܼܘ ܐܵܘ ܕܲܠܡܵܐ ܟܲܝ ܥܬܼܝܼܕܼܵܐ ܀ 109 :ܐܸܢܗܘ̤ ܕܲܗܘ̤ܵܬܼ ܗܵܐ ܗܘ̤ܵܘ ܥܲܡܡܹ̈ܐ ܒܢܲܝ̈ ܝܵܪܬܿܘܼܬܹܗ 110 ܘܐܸܢ ܬܘܼܒܼ ܠܵܐ ܗܘ̤ܵܬܼ ܡܸܗܘܵܐ ܗܵܘ̇ܝܵܐ ܘܡ̇ܢܵܐ ܬܸܥܒܸܿܕܼ ܀ 111 ܕܲܗܘ̤ܵܬܼ ܐܲܫܲܪ ܘܣܵܗ̇ܕܿܝܼܢ ܣܸܦܪܹ̈ܐ ܕܫܲܪ݂ ܡܸܠܲܝ̈ܗܘܿܢ: pb. 303 112 ܘܐܸܢ ܗܘ̤ ܕܠܵܐ ܗܘ̤ܵܬܼ ܕܲܓܵܠ ܡܵܕܹܝܢ ܫܪܵܪܵܐ ܕܲܒܼܗܘܿܢ ܀ 113 :ܠܵܐ ܗܘ̤ܵܘ ܥܲܡܡܹ̈ܐ ܒܢܲܝ̈ ܐܲܒܼܪܵܗܵܡ ܐܲܝܟ ܕܐܵܡܲ݁ܪ ܐܲܢ̄ܬܿ 114 ܘܥܲܠ ܡ̇ܢ ܡܵܕܹܝܢ ܪܚܝܼܡ ܐܲܒܼܪܵܗܵܡ ܠܗܘܿܢ ܛܵܒ̣ ܡܸܢܵܟ ܀ 115 :ܠܵܐ ܐܸܬܼܒܲܪܲܟܼܘ ܒܗܵܝ̇ ܒܲܪ̄̈ܬܼ ܩܵܠܵܐ ܕܒܼܵܟ ܢܸܬܼܒܲܪܟܼܘܼܢ 116 ܘܡܸܛܠ ܡ̇ܢܵܐ ܥܠܝܼܠܝܼܢ ܗܸܢ̣ܘܿܢ ܘܐܲܢ̄ܬܿ ܢܲܦܝܼܩ ܐܲܢ̄ܬܿ ܀ 117 :ܡܲܢ̣ܘܼ ܐܲܦܢܝܼ ܥܲܛܠܘܼܬܼ ܠܸܒܿܗܘܿܢ ܡ̣ܢ ܨܹܝܕܼ ܛܘܼܥܝܲܝ 118 ܘܐܵܘܕܲܥ ܐܸܢܘܿܢ ܫܪܵܪܵܐ ܓܲܠܝܵܐ ܕܫܸܡ ܒܵܪܘܿܝܵܐ ܀ 119 :ܡܲܢ̣ܘܼ ܐܲܪܡܝܼ ܒܲܟܼܬܼܝܼܫܘܼܬܼܗܘܿܢ ܢܝܼܪܵܐ ܕܫܲܝܢܵܐ 120 ܘܲܟܼܕܿܢ ܐܸܢܘܿܢ ܬܚܹܝܬܼ ܡ̇ܪܘܼܬܼܵܐ ܕܡ̇ܪܹܗ ܕܐܲܒܼܪܵܡ ܀ 121 :ܡܲܢ̣ܘܼ ܗܘ̤ܵܐ ܠܗܘܿܢ ܡܵܠܹ̇ܟ ܡܸܠܟܵܐ ܠܡܸܣܢܵܐ ܠܒܼܝܼܫܵܐ 122 ܘܐܲܪܡܝܼ ܒܠܸܒܿܗܘܿܢ ܗܸܪܓܵܐ ܛܵܒܼܵܐ ܕܗܲܝܡܵܢܘܼܬܼܵܐ ܀ 123 :ܡܲܢ̣ܘܼ ܐܲܥܢܝܼ ܠܪܸ̈ܥܝܵܢܲܝܗܘܿܢ ܒܗܸܪܓܵܐ ܕܚܘܼܒܵܐ 124 ܘܦܲܟܲܗ ܡܸܢܗܘܿܢ ܡܸܪܬܼܵܐ ܣܢܝܼܬܼܵܐ ܕܲܦܬܲܟܼܪܘܼܬܼܵܐ ܀ 125 :ܡܲܢ̣ܘܼ ܕܪܲܫ ܠܗܘܿܢ ܐܘܼܪܚܵܐ ܫܦܝܼܬܼܵܐ ܕܢܘܼܚܵܡ ܦܲܓܼܪܵܐ 126 ܘܐܲܠܸܦ ܐܸܢܘܿܢ ܠܡܸܪܕܵܐ ܒܣܲܒܼܪܵܐ ܕܡܲܠܟܿܘܼܬܼ ܪܵܘܡ̇ܐ ܀ 127 :ܡܲܢ̣ܘܼ ܥܲܩ̣ܪܹܗ ܠܒܸܢܝܵܢ ܙܹܐܦܵܐ ܕܲܒܼܢܲܬ̤ ܛܘܼܥܝܲܝ 128 ܘܣܲܚܸܦ ܢܲܘܣܹ̈ܐ ܕܨܲܒܸܿܬܼܘ ܫܹܐܪܹ̈ܐ ܠܲܢܝܵܚܲܝ̈ܗܘܿܢ ܀ 129 :ܡܲܢ̣ܘܼ ܓܠ̣ܵܐ ܠܗܘܿܢ ܕܚܲܕܼ ܒܵܪܘܿܝܵܐ ܒܪ̣ܵܐ ܟܠܡܸܕܹܿܡ 130 ܘܩܲܒܸܿܠ ܘܲܫܠܸܡ ܠܲܟܼܢܼܝܼ̈ܒܼܵܬܼܵܐ ܕܡܸܠܲܝ̈ ܦܘܼܡܹܗ ܀ 131 :ܡܲܢ̣ܘܼ ܟܬ݂ܲܒܼ ܠܗܘܿܢ ܣܸܦܪܵܐ ܚܲܕܼܬܼܵܐ ܕܠܵܐ ܝܵ̇ܕܼܥܝܼܢ ܗ̄ܘ̣ܵܘ 132 ܘܗܵܐ ܡܸܬܼܗܲܓܹܿܝܢ ܠܹܠܲܝ ܐܝܼܡܵܡ ܒܪ̈ܘܼܚܵܢܝܵܬܼܵܐ ܀ 133 :ܐܲܝܢܵܐ ܚܲܝܠܵܐ ܚܲܣܢ݂ܹܗ ܠܥܵܠܡܵܐ ܒܲܥܪܝܼܪܵܝܵܐ 134 ܘܐܲܥܸܠ ܚܲܒܼܫܹ݂ܗ ܠܓܼܵܘ ܡ̣ܢ ܚܸܣܢܹ̈ܐ ܕܡܸܠܲܬܼ ܫܲܝܢܵܐ ܀ 135 :ܡܲܢ̣ܘܼ ܟܲܒܸܿܫ ܠܐܲܪܒܲܥܦܸܢ̈ܝܵܢ ܒܫܸܡ ܚܲܕܼ ܓܲܒܼܪܵܐ 136 ܘܗܵܐ ܡܲܣܩܝܼܢ ܠܹܗ ܚܠܵܦ ܡܲܕܲܐܬܼܵܐ ܩܵܠ ܬܵܘܕܲܝܼܬܼܵܐ ܀ 137 :ܡܲܢ̣ܘܼ ܟܲܕܼܢܵܗ̇ ܠܡܲܥ̄ܪܒܼܵܐ ܒܢܝܼܪܵܐ ܕܲܫܡܹܗ ܕܝܼܫܘܿܥ 138 ܘܗܵܐ ܝܵܗ̇ܒܵܐ ܠܹܗ ܦܹܐܪܹ̈ܐ ܕܫܘܼܒܼܚܵܐ ܕܠܵܐ ܣܲܒܼܥܘܼܬܼܵܐ ܀ 139 :ܡܲܢ ܐܲܡܪܝܼ ܒܵܗ̇ ܒܡܲܕܢܚܵܐ ܦܓܼܘܼܕܹ̈ܐ ܕܗܲܝܡܵܢܘܼܬܼܵܐ 140 ܕܠܵܐ ܬܘܼܒܼ ܬܸܪܗܲܛ ܒܲܥܪܝܼܪܵܐܝܼܬܼ ܨܼܝܕܼ ܚܲܢܦܘܼܬܼܵܐ ܀ 141 :ܡܲܢ̣ܘܼ ܚܲܒܼܫ̣ܵܗ̇ ܠܓܲܪܒܿܝܵܐ ܩܫܝܼܬܼܵܐ ܒܚܸܣܢܹ̈ܐ ܕܚܘܼܒܵܐ 142 ܕܠܵܐ ܬܘܼܒܼ ܬܸܥܒܸܿܕܼ ܩܹܐܪܣܵܐ ܕܥܵܘ̣ܠܵܐ ܥܲܡ ܟܹܐܢܘܼܬܼܵܐ ܀ 143 :ܡܲܢ̣ܘܼ ܙܪܲܥ ܒܵܗ̇ ܒܬܲܝܡܢܵܐ ܥܩܲܪܬܼܵܐ ܙܲܪܥܵܐ ܛܵܒܼܵܐ 144 ܘܗܵܐ ܛܥܝܼܢ ܥܘܼܒܵܗ̇ ܦܹܐܪܹ̈ܐ ܕܫܘܼܒܼܚܵܐ ܠܲܡܬܲܩܢܵܢܵܗ̇ ܀ pb. 304 145 :ܡܲܢ̣ܘܼ ܒܲܛܸܠ ܫܡܵܗܹ̈ܐ ܫܐܝܼ̈ܠܹܐ ܕܠܵܐ ܐܲܠܵܗܹ̈ܐ 146 ܘܫܲܪܲܪ ܒܐܲܪܥܵܐ ܫܡܵܐ ܝܲܩܝܼܪܵܐ ܕܫܸܡ ܐܝܼܬܼܘܼܬܼܵܐ ܀ 147 :ܐܲܝܟܵܐ ܐܸܢܘܿܢ ܦܬܲܟܼܪܹ̈ܐ ܚܲܪ̈ܫܹܐ ܕܬܲܩܸܢܘ ܫܹܐܪܹ̈ܐ 148 ܕܗܵܐ ܛܠܸܩ̣ܘ ܘܐܵܘܦܝܼܘ ܥܘܼܗܕܵܢܲܝ̈ܗܘܿܢ ܡ̣ܢ ܦܘܼܡ ܐ̄ܢܵܫܵܐ ܀ 149 :ܠܡܵܢܵܐ ܐܵܦ ܐܲܢ̄ܬܿ ܟ̣ܠܲܝܬܿ ܥܸܢܝܵܢܵܟ ܡ̣ܢ ܨܹܐܕܲܝܗܘܿܢ 150 ܘܠܵܐ ܕܵܒܲܚ̇ ܐܲܢ̄ܬܿ ܒܢܲܝ̈ܟ ܘܲܒܼ̈ܢܵܬܼܵܟ ܐܲܝܟ ܕܲܒܼܩܲܕܼܡܵܐ ܀ 151 :ܠܡܵܢ ܒܲܛܝܼܠ ܐܲܢ̄ܬܿ ܘܠܵܐ ܡܢܲܩܸܐ ܐܲܢ̄ܬܿ ܥܲܠ ܪ̈ܡ̇ܬܼܵܐ 152 ܕܗܵܐ ܠܲܝܬܿ ܙܲܒܼܢܵܐ ܕܠܵܘ ܩܘܼܛܪ̈ܵܓܲܝܟ ܬܵܢܹ̇ܝܢ ܟܹܐܢܹ̈ܐ ܀ 153 :ܒܐܲܝܢܵܐ ܙܲܒܼܢܵܐ ܦܵܫ̣ܬܿ ܡ̣ܢ ܕܸܒܼܚܹ̈ܐ ܕܲܦܬܿܟܼܪܘܼܬܼܵܐ 154 ܐܲܟܼܡܵܐ ܕܗܵܫܵܐ ܟܠܹܝܬܿ ܒܲܛܢܵܢܵܐ ܕܠܘܼܩܒܲܠ ܥܲܡܡܹ̈ܐ ܀ 155 :ܛܢܵܢܵܟ ܣܲܟܼܠܵܐ ܗ̄ܘ̣ ܘܠܵܘ ܡ̣ܢ ܛܲܝܒܿܘܼ ܟܠܹܝܬܿ ܡ̣ܢ ܕܸܒܿܚܹ̈ܐ 156 :ܘܐܸܠܵܐ ܚܵܘܵܐ ܐܸܡܲܬܼܝ ܩܵܘܝܼܬܿ ܕܠܵܐ ܢܘܼܩܵܝܹ̈ܐ 157 :ܩܸܛܠܵܐ ܕܲܩ̣ܛܲܠܬܿ ܟܠ̣ܵܟ ܡ̣ܢ ܛܘܼܥܝܲܝ ܟܲܕܼ ܠܵܐ ܨܵܒܹ̇ܝܬܿ 158 ܘܗܵܐ ܬܘܼܒܼ ܐܲܦܢܝܼ ܠܥܲܡܡܹ̈ܐ ܥܘܼܪ̈ܠܹܐ ܠܒܸܗܬܲܬܼ ܐܲܦܲܝ̈ܟ ܀ 159 :ܘܐܸܠܵܐ ܐܸܡܲܪ ܐܸܢܗܘ̤ ܕܐܝܼܬܼ ܒܵܟ ܚܲܝܠܵܐ ܠܡܹܐܡܲܪ 160 ܕܡ̇ܢܲܐ ܗ̄ܝܼ ܗܵܕܹܐ ܕܒܸܛܠܲܬ̤ ܛܘܼܥܝܲܝ ܘܗܘ̤ ܡܸܬܼܢܲܨܲܚ ܀ 161 :ܡܲܢ̣ܘܼ ܐܲܪܡܝܼ ܛܢܵܢܵܐ ܒܐܲܪܥܵܐ ܠܲܒܼܢܲܝ̈ܢܵܫܵܐ 162 ܕܢܸܓܼܒܿܘܿܢ ܡ̇ܘܬܵܐ ܘܢܸܣܢܘܿܢ ܚܲܝܹ̈ܐ ܚܠܵܦ ܗܵܘ̇ ܕܲܩܛ݂ܲܠܬܿ ܀ 163 :ܐܲܝܟܲܢ ܐܸܫܟܲܚ ܓܲܒܼܪܵܐ ܙܩܝܼܦܵܐ ܙܟܼܵܗ̇ ܠܲܒܼܪܝܼܬܼܵܐ 164 ܘܠܵܗ̇ ܠܲܒܼܪܝܼܬܼܵܐ ܡܲܢ̣ܘܼ ܐܲܠܦܵܗܗ̇ ܕܲܬܼܨܘܼܬܼ ܡܸܠܵܘ̈ܗܝ ܀ 165 :ܐܲܝܟܲܢ ܚܲܣܢܹܗ ܠܥܵܠܡܵܐ ܘܚܲܝܠܹܗ ܒܡܲܟܿܝܼܟܼܘܼܬܼܵܐ 166 ܘܗܘ̤ ܬܘܼܒܼ ܥܵܠܡܵܐ ܡܲܢ ܐܲܦܝܼܣܹܗ ܕܠܵܐ ܢܸܬܼܣܲܩ ܀ 167 :ܒܐܲܝܢܵܐ ܙܲܝܢܵܐ ܥ̣ܒܲܕ ܬܲܟܼܬܿܘܼܫܵܐ ܥܲܡ ܟܠ ܚܲܝ̈ܠܝܼܢ 168 ܕܗܵܐ ܠܵܐ ܩܢܹܐ ܗ̄ܘ̣ܵܐ ܙܲܝܢܵܐ ܓܲܠܝܵܐ ܐܲܝܟ ܐܲܪ̈ܥܵܢܹܐ ܀ 169 :ܐܲܝܟܲܢ ܐܸܫܟܲܚܘ ܦܵܠܚܹ̈ܐ ܫܝܼܛܹ̈ܐ ܕܲܠܘܹܝܢ ܗ̄ܘ̣ܵܘ ܠܹܗ 170 ܠܡܸܥܒܲܕܼ ܩܹܐܪܣܵܐ ܥܲܡ ܚܲܢܦܘܼܬܼܵܐ ܘܝܗ̄ܘܼܕܵܝܘܼܬܼܵܐ ܀ 171 :ܠܵܟ ܐܵܡܲ݁ܪ ܐ̄ܢܵܐ ܒܲܪ ܐܲܒܼܪܵܗܵܡ ܥܲܠ ܒܲܪ ܓܸܢܣܵܟ 172 ܐܲܝܟܲܢ ܐܲܩܪܸܒܼ ܥܲܡ ܡܚܝܼ̈ܠܵܬܼܵܐ ܘܥܲܡ ܥܲܣ̈ܩܵܬܼܵܐ ܀ 173 :ܒܲܪ ܓܸܢܣܵܟ ܗ̄ܘ̣ ܕܲܣܥ݂ܲܪ ܗܵܠܹܝܢ ܕܬܼܵܢܹ̇ܐ ܐ̄ܢܵܐ ܠܵܟ 174 ܘܣܵܗ̈ܕܵܢ ܡܸܠܹ̈ܐ ܕܲܢܒܼܝܼܘܼܬܼܵܐ ܕܲܫܠܸ݂ܡ ܨܹܐܕܼܵܘܗܝ ܀ 175 :ܐܝܼܬܼܵܘܗܝ ܓܸܢܣܵܟ ܐܵܘ ܠܵܐ ܐܝܼܬܼܵܘܗܝ ܐܘܿ ܝܗ̄ܘܼܕܼܵܝܵܐ 176 ܙܩܲܦ̣ܬܵܝܗܝ ܒܲܝܗܘܼܕܼ ܐܵܘ ܠܵܐ ܙܩܲܦܬܼܵܝܗܝ ܓܠܝܼ ܘܒܲܕܸܿܩ ܠܝܼ ܀ 177 :ܘܐܸܢܗܘ̤ ܕܐܝܼܬܼܵܘܗܝ ܡ̣ܢ ܡܲܢ ܐܝܼܬܼܵܘܗܝ ܘܐܲܝܢܵܘ ܛܘܿܣܡܹܗ 178 ܘܡ̇ܢܲܐ ܗ̄ܝܼ ܥܸܠܬܼܵܐ ܕܲܙܩܝܼܦܘܼܬܹܗ ܘܟܼܵܪܘܙܿܘܬܹܗ ܀ 179 :ܕܐܝܼܬܼܵܘܗܝ ܣܵܗ̇ܕܲܝܢ ܫܡܲܝܵܐ ܘܐܲܪܥܵܐ ܕܬܼܵܢܹ̇ܝܢ ܫܘܼܒܼܚܹܗ 180 ܕܠܵܐ ܡܨܹܝܬܿ ܕܬܼܟܼܦܘܿܪ ܕܠܵܐ ܫܲܪܝܼܪܵܐ ܟܵܪܘܿܙܘܼܬܹܗ ܀ pb. 305 181 :ܐܸܢܗܘ̤ ܕܐܝܼܬܼܵܘܗܝ ܗܵܕܹܐ ܬܒܲܥܬܼܵܟ ܘܬܼܘܼܒܼ ܬܵܒܲܥ ܐ̄ܢܵܐ 182 ܒܚܹܝܠ ܡܲܢ ܐܸܫܟ݂ܲܚ ܚ̣ܣܲܢ ܠܲܒܼܪܝܼܬܼܵܐ ܟܲܕܼ ܗܘ̤ ܒܪܝܼܬܼܵܐ ܗ̄ܘ̣ ܀ 183 :ܘܐܸܢ ܬܘܼܒܼ ܠܲܝܬܵܘܗܝ ܐܵܦ ܗܝ̤ ܗܵܕܹܐ ܡܫܲܐܸܠ ܐ̄ܢܵܐ ܠܵܟ 184 ܕܐܲܝܟܲܢ ܢܲܨܲܚ ܫܡܹܗ ܒܲܒܼܪܝܼܬܼܵܐ ܟܲܕܼ ܠܵܐ ܐܝܼܬܼܵܘܗܝ ܀ 185 :ܐܲܝܟܲܢ ܢܹܐܡܲܪ ܟܲܕܼ ܠܲܝܬܿ ܡܸܕܹܿܡ ܟܠ ܡܸܢܹܗ 186 ܘܐܲܝܟܲܢ ܢܲܫܲܪ ܕܲܒܼܠܵܐ ܡܸܕܹܿܡ ܡܗܲܝܡܸܢ ܟܠܢܵܫ ܀ 187 :ܡܵܢܲܐ ܗ̄ܝܼ ܗܵܕܹܐ ܕܲܫܒܲܩ̣ܘ ܥܲܡܡܹ̈ܐ ܐܲܠܵܗܲܝ̈ܗܘܿܢ 188 ܘܝܵܡܹ̇ܝܢ ܒܲܫܡܵܐ ܕܓܲܒܼܪܵܐ ܕܠܲܝܬܵܘܗܝ ܐܲܝܟ ܕܐܵܡܲܪ ܐܲܢ̄ܬܿ ܀ 189 :ܐܸܢ ܗܘ̤ ܕܛܵܥܝܵܐ ܗ̄ܘ̣ ܘܐܲܝܟ ܕܲܠܛܵܥ̇ܝܵܐ ܕܲܛܥ̣ܵܐ ܙܩܲܦܬܼܵܝܗܝ 190 ܐܲܝܟܲܢ ܟܲܕܼ ܡ̣ܝܼܬܼ ܐܲܛܥܝܼ ܒܡܵܘܬܹܿܗ ܠܲܕܿܥܹ̇ܝܢ ܒܹܗ ܀ 191 :ܘܢܸܗܘܸܐ ܕܲܛܥ̣ܵܐ ܐܲܝܟ ܕܐܵܡܲ݁ܪ ܐܲܢ̄ܬܿ ܟܲܕܼ ܚܵܣ ܕܲܛܥ̣ܵܐ 192 ܡܲܢ̣ܘܼ ܢܗܲܝܡܸܢ ܕܛܵܥ̇ܝܵܐ ܘܡܝܼܬܼܵܐ ܡܨܸܐ ܡܲܛܥܸܐ ܟܠ ܀ 193 :ܛܥ̣ܵܘ ܣܲܓܝܼ̈ܐܹܐ ܘܐܲܛܥܝܼܘ ܣܲܓܿܝܼ ܒܲܫܡܵܗܲܝ̈ܗܘܿܢ 194 ܘܒܼܵܬܲܪ ܙܲܒܼܢܵܐ ܒܛܸܠܘ ܪ̈ܲܒܵܢܹܐ ܘܬܲܠܡܝܼܕܲܝ̈ܗܘܿܢ ܀ 195 :ܛܘܼܥܝܲܝ ܕܝܼܠܹܗ ܝܲܬܿܝܼܪ ܚܲܣܝܼܪ ܫܢܝܼ̈ܢ ܚܲܡܫܸܡܐܵܐ 196 ܡܹܐܪܲܒܼ ܝܵܪܒܵܐ ܘܐܵܚ̇ܕܼܵܐ ܢܘܼܡܹܐ ܒܟܼܠ ܐܲܬܼܪ̈ܵܘܵܢ ܀ 197 :ܡܲܢ̣ܘܼ ܕܐܲܛܥܝܼ ܘܩܵܘܝܼ ܙܹܐܦܹܗ ܒܕܼܘܼܡܝܵܐ ܕܝܼܠܹܗ 198 ܘܐܲܝܢܵܘ ܕܲܚܛܲܦ̣ ܫܸܡ ܒܵܪܘܿܝܵܐ ܘܠܵܐ ܐܸܬܼܦܲܪܣܝܼ ܀ 199 :ܠܲܝܬܿ ܝܘܼܠܦܵܢܵܐ ܕܩܵܘܝܝܼ ܒܐܲܪܥܵܐ ܐܲܝܟ ܝܘܼܠܦܵܢܹܗ 200 ܘܠܵܐ ܬܘܼܠܡܵܕܼܵܐ ܕܝܲܗ̣̄ܒܼ ܬܲܪܒܿܝܼܬܼܵܐ ܐܲܝܟ ܬܘܼܠܡܵܕܹܗ ܀ 201 :ܐܵܦܠܵܐ ܡܘܼܫܹܐ ܕܣܵܡ̣ ܢܵܡܘܿܣܵܐ ܡ̣ܢ ܦܘܼܡ ܟܲܣܝܵܐ 202 ܠܵܐ ܣܦܲܩ̣ ܟܲܒܸܿܫ ܥܲܡܡܹ̈ܐ ܡܪ̈ܝܼܕܹܐ ܬܚܹܝܬܼ ܦܘܼܩܕܼܵܢܵܘ̈ܗܝ ܀ 203 :ܠܵܐ ܣܓܼܕܼܘ ܐ̄ܢܵܫܵܐ ܠܲܫܡܹܗ ܕܡܘܼܫܹܐ ܐܵܘ ܠܲܟܼܬܼܵܒܼܵܘ̈ܗܝ 204 ܘܠܵܐ ܨܲܒܸܿܬܼܘ ܠܹܗ ܢܵܘܣܹ̈ܐ ܒܐܲܪܥܵܐ ܐܲܝܟ ܕܲܠܝܼܫܘܿܥ ܀ 205 :ܘܗܵܐ ܐܲܠܵܗܵܐ ܟܲܢܝܹܗ ܡ̇ܪܝܵܐ ܒܹܝܬܼ ܐܲܪ̈ܥܵܢܹܐ 206 ܘܠܲܝܬܿ ܒܲܥܒܼܝܼܕܹ̈ܐ ܕܲܩܪ̣ܵܝܗܝ ܒܲܫܡܵܐ ܕܐܸܬܼܟܲܢܝܼ ܒܹܗ ܀ 207 :ܘܗܵܐ ܐܸܙܕܲܗܝܼ ܘܠܵܐ ܣܦܲܩܘ ܐ̄ܢܵܫܵܐ ܕܲܢܚܘܼܪܘܼܢ ܒܹܗ 208 ܘܟܲܕܼ ܛܵܒܼ ܝܼܪܸܒܼ ܠܲܝܬܿ ܐ̄ܢܵܫ ܕܐܵܡܲ݁ܪ ܫܘܼܒܼܚܵܐ ܠܡܘܼܫܹܐ ܀ 209 :ܒܛܸܠ ܠܹܗ ܫܘܼܒܼܚܹܗ ܕܡܘܼܫܹܐ ܪܲܒܵܐ ܒܲܪ ܐܲܒܼܪܵܗܵܡ 210 ܘܠܲܝܬܿ ܕܲܡܫܲܒܲܚ ܠܲܢܛܘܼܪ̈ܵܬܼܵܐ ܒܸܣܪ̈ܵܢܝܵܬܼܵܐ ܀ 211 :ܘܐܸܠܵܐ ܢܹܐܡܲܪ ܟܠ ܝܗ̄ܘܼܕܼܵܝܵܐ ܕܐܝܼܬܼ ܠܹܗ ܕܢܹܐܡܲܪ 212 ܐܲܝܟܵܐ ܡܘܼܫܹܐ ܘܡܲܢ ܡ̣ܢ ܐ̄ܢܵܫܵܐ ܓ̣ܡܲܪ ܦܘܼܩܕܵܢܵܘ̈ܗܝ ܀ 213 ܚܵܘܵܐ ܒܓܸܠܝܵܐ ܝܼܣܲܪܠܵܝܵܐ ܫܘܼܒܼܚܹܗ ܕܡܘܼܫܹܐ: pb. 306 214 ܐܲܝܟ ܕܲܡܚܵܘܹܝܢ ܥܲܡܡܹ̈ܐ ܫܘܼܒܼܚܹܗ ܕܓܼܒܼܪܵܐ ܕܲܙܩܲܦ̣ܬܿ ܀ 215 :ܕܪܲܒܿܘܼ ܡܘܼܫܹܐ ܐ̄ܢܵܐ ܡܵܘܕܹܿܐ ܐ̄ܢܵܐ ܝܲܬܿܝܼܪ ܡܸܢܵܟ 216 ܐܸܠܵܐ ܒܨܝܼܪ ܗ̄ܘ̣ ܕܠܵܐ ܡܘܼܫ̈ܚܵܬܼܵܐ ܡ̣ܢ ܫܸܡ ܝܼܫܘܿܥ ܀ 217 :ܒܨܝܼܪ ܡ̣ܢ ܝܼܫܘܿܥ ܘܬܼܘܼܒܼ ܐܵܡܲ݁ܪ ܐ̄ܢܵܐ ܕܲܒܼܨܝܼܪ ܣܲܓܿܝܼ 218 ܠܵܘ ܒܲܟܼܝܵܢܵܐ ܐܸܠܵܐ ܒܕܲܪܓܼܵܐ ܐܲܠܵܗܝܵܐ ܀ 219 :ܕܪܲܒܼ ܡ̣ܢ ܡܘܼܫܹܐ ܣܵܗܹ̇ܕܼ ܪܲܗܛܵܐ ܕܟܼܵܪܘܿܙܘܼܬܹܗ 220 ܕܥܸܒܼܪܲܬ̤ ܐܸܢܘܿܢ ܠܫܸܡܫܵܐ ܘܣܲܗܪܵܐ ܒܩܲܠܝܼܠܘܼܬܼܵܗ̇ ܀ 221 :ܗܵܐ ܒܟܼܠ ܦܸܢ̈ܝܵܢ ܪܵܥܹ̇ܡ ܩܵܠܵܐ ܕܟܼܵܪܘܿܙܘܼܬܹܗ 222 ܘܟܼܠ ܠܸܫܢܝܼ̈ܢ ܓܵܕܼ̇ܠܝܼܢ ܟܠܢܵܫ ܟܠܝܼܠ ܙܵܟܼܘܼܬܹܗ ܀ 223 :ܗܵܐ ܝܵܘܢܵܝܹ̈ܐ ܡܙܲܚܝܼܢ ܠܢܝܼܫܵܐ ܕܲܨܠܝܼܒܼܘܼܬܹܗ 224 ܐܵܦ ܒܲܪܒܿܪ̈ܵܝܹܐ ܛܥܝܼܢܝܼܢ ܢܝܼܪܵܐ ܕܗܲܝܡܵܢܘܼܬܹܗ ܀ 225 :ܘܐܸܢ ܠܵܐ ܨܵܒܹ̇ܝܬܿ ܕܬܸܚܙܼܐ ܒܪܸ̈ܓܼܫܹܐ ܡܸܬܼܚܲܙܝܵܢܹ̈ܐ 226 ܡܬܼܘܿܚ ܪܸܥܝܵܢܵܟ ܠܐܲܪܒܲܥܦܸܢ̈ܝܵܢ ܘܲܚܙܝܼ ܚܲܝܠܹܗ ܀ 227 :ܚܙܝܼ ܟܲܕܼ ܩܵܥܹ̇ܝܢ ܟܠ ܠܸܫܵܢܝܼ̈ܢ ܫܘܼܒܼܚܵܐ ܠܲܫܡܹܗ 228 ܘܲܡܩܲܪܒܼܝܼܢ ܠܹܗ ܕܵܫܢܹ̈ܐ ܕܚܘܼܒܵܐ ܕܪܹ̈ܥܝܵܢܲܗܘܿܢ ܀ 229 :ܬܵܐ ܟܹܝܬܼ ܦܲܚܸܡ ܐܘܿ ܝܗ̄ܘܼܕܼܵܝܵܐ ܕܝܼܠܝ ܥܲܡ ܕܝܼܠܵܟ 230 ܘܚܵܘܵܐ ܐܸܢ ܐܝܼܬܼ ܚܲܝܹ̈ܠܹܐ ܒܡܸܠܲܝ̈ܟ ܐܲܝܟ ܕܲܒܼܟܼܠܲܝ̈ ܀ 231 :ܕܠܵܐ ܚܸܪܝܵܢܵܐ ܢܸܒܼܥܸܐ ܒܥܵܬܼܵܐ ܕܐܝܼܬܼ ܒܲܝܢܵܬܲܢ 232 ܘܐܲܝܢܵܐ ܕܚܵܐܹ̇ܒܼ ܢܸܬܸܠ ܐܝܼܕܼܵܐ ܠܐܲܝܢܵܐ ܕܙܵܟܹ̇ܐ ܀ 233 :ܐܲܝܢܵܐ ܣܸܦܪ̈ܲܝܟ ܘܡܸܢܗܘܿܢ ܢܹܐܡܲܪ ܚܲܕܼ ܠܘܼܩܒܲܠ ܚܲܕܼ 234 ܘܥܲܠ ܡܸܠܲܝܗܘܿܢ ܬܩܘܼܡ ܟܠ ܡܸܠܵܐ ܕܝܼܠܝ ܐܵܦ ܕܝܼܠܵܟ ܀ 235 :ܫܵܠܹ̇ܡ ܐ̄ܢܵܐ ܠܵܟ ܐܸܢ ܐܵܡܲ݁ܪ ܐܲܢ̄ܬܿ ܡ̣ܢ ܕܲܟܼܬܼܝܼ̈ܒܼܵܢ 236 ܘܠܵܐ ܡܲܣܠܸܐ ܐ̄ܢܵܐ ܡܼܠܲܝ̈ ܪܘܼܚܵܐ ܕܲܢܒܼܝܼܘܼܬܼܵܐ ܀ 237 :ܢܹܐܬܼܐ ܡܘܼܫܹܐ ܒܘܼܟܼܪܵܐ ܕܣܵܦܪܹ̈ܐ ܐܲܠܵܗܵܝܹ̈ܐ 238 ܘܒܹܝܬܼ ܐܵܬܼܘܵܬܹ̈ܗ ܢܸܒܼܥܸܐ ܒܥܵܬܼܵܐ ܕܗܵܢܵܐ ܕܐܸܬܼܵܐ ܀ 239 :ܡܵܢ ܐܵܡܲ݁ܪ ܐܲܢ̄ܬܿ ܡܘܼܫܹܐ ܪܲܒܵܐ ܕܪ̈ܘܼܚܵܢܝܵܬܼܵܐ 240 ܓܠܝܼ ܘܦܲܫܸܩ ܠܝܼ ܚܹܝܠ ܣܘܼܟܵܠܵܐ ܕܲܒܼܓܼܵܘ ܣܸܦܪ̈ܲܝܟ ܀ 241 :ܢܒܼܝܼܵܐ ܪܲܒܵܐ ܩܵܐܹ̇ܡ ܐܲܟܼܘܵܬܼܝ ܡ̣ܢ ܡܵܝܘܿܬܹ̈ܐ 242 ܘܪܲܒܿ ܡܹܢܼܝ ܣܲܓܿܝܼ ܐܲܟܼܡܵܐ ܕܪܵܡ̇ܐ ܫܡܲܝܵܐ ܡܸܢܲܢ ܀ 243 :ܢܒܼܝܼܵܐ ܗ̄ܘ̣ ܪܲܒܵܐ ܘܪܲܒܿܘܼ ܕܲܪܓܹܗ ܡ̣ܢ ܕܲܢܒܼܝܹ̈ܐ 244 ܘܚܲܝܵܒܼ ܟܠܢܵܫ ܕܠܹܗ ܢܸܫܬܲܥܒܲܕܼ ܐܲܝܟ ܕܲܠܡܵܪܵܐ ܀ 245 :ܫܲܪܝܼܪ ܡܘܼܫܹܐ ܐܵܘ ܠܵܐ ܫܲܪܝܼܪ ܒܲܪ ܐܲܒܼܪܵܗܵܡ 246 ܫܸܠܡܲܬ̤ ܡܸܠܬܹܗ ܐܵܘ ܩܲܝܵܡ ܠܵܗ̇ ܙܲܒܼܢܵܐ ܕܬܸܫܠܲܡ ܀ 247 :ܩܵܡ̣ ܡ̣ܢ ܥܲܡܵܟ ܢܒܼܝܼܵܐ ܕܲܟܼܬܼܝܼܒܼ ܐܵܘ ܠܵܐ ܥܕܲܟܹܿܝܠ 248 :ܗܘ̤ܵܬܼ ܒܲܥ̇ܒܼܵܕܵܐ ܐܵܘ ܐܵܡܲ݁ܪ ܐܲܢ̄ܬܿ ܕܡܸܗܘܵܐ ܗܵܘ̇ܝܵܐ 249 ܐܸܢܗܘ̤ ܕܠܵܐ ܗܘ̤ܵܬܼ ܐܲܝܟ ܕܐܲܢ̄ܬܿ ܪܵܢܹ̇ܝܬܿ ܕܡܸܗܘܵܐ: pb. 307 250 :ܡܲܢ̣ܘܼ ܗܵܢܵܐ ܕܐܸܬܼܬܼܵܐ ܘܐܲܛܥܝܼ ܒܵܟ ܘܲܒܼܥܲܡܡܹ̈ܐ 251 ܕܠܵܐ ܗ̄ܘ̣ܵܐ ܒܲܠܚܘܿܕܼ ܥܲܡܡܹ̈ܐ ܐܲܛܥܝܼ ܐܸܠܵܐ ܐܵܦ ܒܵܟ ܀ 252 :ܒܵܟ ܩܲܕܼܡܵܝܑܬܼ ܐܲܛܥܝܼ ܗܵܢܵܐ ܕܐܸܬܼܵܐ ܘܲܩܛ݂ܲܠܬܿ 253 ܘܣܵܗ̇ܕܿܝܼܢ ܩܵܠܹ̈ܐ ܬܸܪܥܣܲܪ ܕܐܲܦܢܝܼܘ ܕܡܸܢܵܟ ܐܸܢܘܿܢ ܀ 254 :ܡܘܼܫܹܐ ܐܲܟܼܬܸܿܒܼ ܕܡܸܢܵܟ ܩܵܐܹ̇ܡ ܢܒܼܝܼܵܐ ܪܲܒܵܐ 255 ܘܒܹܗ ܡܸܬܼܒܲܪܟܼܝܼܢ ܥܲܡܡܹ̈ܐ ܘܗܵܘܹ̇ܝܢ ܒܢܲܝ̈ ܐܲܒܼܪܵܗܵܡ ܀ 256 :ܒܝܼ ܠܲܡ ܝܼܡ̇ܝܼܬܼ ܐܸܡ݂ܲܪ ܡ̇ܪܝܵܐ ܠܐܲܒܼܪܵܡ ܟܹܐܢܵܐ 257 ܕܒܼܵܟ ܢܸܬܼܒܲܪܟܼܘܢ ܥܲܡܡܹ̈ܐ ܥܘܼܪ̈ܠܹܐ ܘܢܸܗܘܘܿܢ ܙܲܪܥܵܟ ܀ 258 :ܡܲܢ̣ܘܼ ܗܵܢܵܐ ܕܒܲܪܸܟ ܥܲܡܡܹ̈ܐ ܒܫܸܡ ܐܲܒܼܪܵܗܵܡ 259 ܘܐܲܝܟܲܢ ܓܸܕܼܫܲܬ̤ ܘܲܢܦܲܩ̣ ܡܸܠܹ̈ܐ ܠܘܵܬܼ ܣܘܼܥܪ̈ܵܢܹܐ ܀ 260 :ܐܸܢ ܠܵܘ ܗܘ̤ܝܘܼ ܕܐܲܟܼܬܸܿܒܼ ܫܲܪܒܹܿܗ ܡܘܼܫܹܐ ܪܲܒܵܐ 261 ܐܲܝܟܲܢ ܕܵܡܹ̇ܐ ܡܸܕܸܿܡ ܕܲܣܥ݂ܲܪ ܠܡܸܕܹܿܡ ܕܲܟܼܬܼܝܼܒܼ ܀ 262 :ܟܠܗܘܿܢ ܥܲܡܡܹ̈ܐ ܩܵܥܹ̇ܝܢ ܐܲܟܲܚ̄ܕܼ ܕܗܵܢܵܘ̇ ܕܐܸܬܼܵܐ 263 ܘܲܠܡܲܢ ܢܸܫܡܲܥ ܠܵܟ ܒܲܠܚܘܿܕܲܝܟ ܐܵܘ ܠܲܒܼܪܝܼܬܼܵܐ ܀ 264 :ܒܪܝܼܬܼܵܐ ܟܠܵܗ̇ ܣܵܗ̇ܕܵܐ ܕܐܸܬܼܵܐ ܒܲܕܿܩܲܒܸܿܠܬܹܗ 265 ܘܐܲܢ̄ܬܿܘܼ ܒܲܠܚܘܿܕܼ ܠܵܐ ܫܵܠܹ̇ܡ ܐܲܢ̄ܬܿ ܠܡܸܠܹ̈ܐ ܕܣܸܦܪ̈ܲܝܟ ܀ 266 :ܘܐܸܠܵܐ ܓܠܝܼ ܠܝܼ ܐܲܝܟ ܒܲܝܬܵܝܵܐ ܕܠܸܐܡܲܬܼܝ ܐܵܬܹܿܐ 267 ܘܐܲܝܢܵܘ ܙܲܒܼܢܵܐ ܕܗܵܘܹ̇ܿܝܢ ܥܲܡܡܹ̈ܐ ܐ̄ܚܝܵܢܵܘ̈ܗܝ ܕܐܲܒܼܪܵܡ ܀ 268 :ܘܢܸܗܘܸܐ ܕܐܸܬܹܿܐ ܠܐܸܡܲܬܼܝ ܕܐܵܬܹ̇ܐ ܘܥܵܐܠܝܼܢ ܥܲܡܡܹ̈ܐ 269 ܐܲܢ̄ܬܿ ܕܒܲܝܬܵܝܵܐ ܐܢ̄ܬܿ ܠܡܵܢ ܢܲܦܝܼܩܲܬܿ ܡ̣ܢ ܝܵܪܬܿܘܼܬܼܵܟ ܀ 270 :ܠܡܵܢܵܐ ܡܲܣܠܹܝܬܿ ܐܲܝܟ ܣܵܪܘܿܚܵܐ ܗܵܐ ܡ̣ܢ ܢܘܼܓܼܪܵܐ 271 ܘܒܲܛܝܼܠ ܡܸܢܵܟ ܟܵܗܢܵܐ ܘܡܲܠܟܵܐ ܘܲܡܒܲܕܿܩܵܢܵܐ ܀ 272 :ܠܡܵܢܵܐ ܙܪܝܼܩܲܬܿ ܒܐܲܪܒܲܥ ܦܸܢ̈ܝܵܢ ܐܲܝܟ ܕܲܒܼܪܘܼܓܼܙܵܐ 273 ܘܲܡܕܲܩܪܝܼܢ ܠܵܟ ܥܲܡܡܹ̈ܐ ܒܥܲܡܠܵܐ ܘܡܲܠ̈ܟܹܿܐ ܒܫܸܩܠܹ̈ܐ ܀ 274 :ܠܡܵܢ ܠܵܐ ܩܵܐܹ̇ܡ ܢܒܼܝܼܵܐ ܡܸܢܵܟ ܐܲܝܟ ܕܲܒܼܩܲܕܼܡ̇ܐ 275 ܘܲܡܒܲܕܸܿܩ ܠܵܟ ܕܡ̇ܢܲܐ ܗ̄ܝܼ ܥܸܠܬܼܵܐ ܕܗܵܢ ܫܘܼܥܒܵܕܼܵܐ ܀ 276 :ܠܵܐ ܗ̄ܘ̣ܵܐ ܙܲܒܼܢܵܐ ܕܲܒܼܛܸܠ ܡܸܢܵܟ ܩܵܠ ܒܘܼܕܵܩܵܐ 277 ܠܵܐ ܟܲܕܼ ܒܐܲܪܥܵܟ ܘܠܵܐ ܟܲܕܼ ܕܲܒܼܪܘܼܟ ܥܲܡܡܹ̈ܐ ܒܫܸܒܼܝܵܐ ܀ 278 :ܒܡܸܨܪܹܝܢ ܡܘܼܫܹܐ ܒܐܲܪܥܵܐ ܕܲܟܼܢܲܥ̄ܢ ܝܼܫܘܿܥ ܒܲܪܢܘܿܢ 279 ܘܒܹܝܬܼ ܒܵܒܼܠܵܝܹ̈ܐ ܚܲܕܼ ܒܲܪ ܡܲܠܟܵܐ ܘܚܲܕܼ ܒܲܪ ܟܵܗܵܢܵܐ ܀ 280 :ܘܠܵܐ ܪ̈ܘܼܚܵܢܹܐ ܠܵܐ ܦܵܫ̣ܘ ܘܐܲܗܡܝܼܘ ܡ̣ܢ ܥܘܼܕܼܪܵܢܵܟ 281 ܥܕܲܡ̇ܐ ܕܐܸܬܼܵܐ ܗܵܢܵܐ ܕܲܩܛܲܠܬܿ ܘܲܟܼܠܵܐ ܐܸܢܘܿܢ ܀ 282 :ܠܡܵܢ ܠܵܐ ܛܵܐܹ̇ܢ ܗܵܘ̇ ܡܲܠܲܐܟܼܵܐ ܒܘܼܟܼܪܹ̈ܐ 283 ܘܬܼܵܒܲܥ̇ ܨܲܥܪܵܟ ܐܲܟܼܡܵܐ ܕܲܣܥ݂ܲܪ ܒܐܲܪܥܵܐ ܕܡܸܨܪܹܝܢ ܀ 284 ܠܡܵܢ ܠܵܐ ܡܲܩܪܸܒܼ ܐܵܦ ܡܝܼܟܼܵܐܝܹܠ ܥܲܡ ܣܵܩܘܿܪ̈ܲܝܟ: pb. 308 285 ܐܲܟܼܡܵܐ ܕܐܲܩܪܸܒܼ ܥܲܡ ܫܲܠܝܼܛܵܐ ܕܡܲܠܟܿܘܼܬܼ ܦܵܪܹܣ ܀ 286 :ܐܲܝܟܵܘ ܚܘܼܒܿܗܘܿܢ ܕܲܫܡܲܝܵܢܹ̈ܐ ܕܨܹܝܕܼ ܐܲܒܼܵܗܲܝ̈ܟ 287 ܕܠܵܐ ܡܣܲܝܥܝܼܢ ܠܵܟ ܐܲܟܼܡܵܐ ܕܣܲܝܲܥܘ ܒܕܵܪ̈ܝܼܢ ܕܵܪ̈ܝܼܢ ܀ 288 :ܠܵܐ ܗ̄ܘ̣ܵܐ ܙܲܒܼܢܵܐ ܕܐܲܗܡܝܼܘ ܘܲܫܬܼ݂ܩܘ ܐܲܝܟ ܗܵܢ ܙܲܒܼܢܵܐ 289 ܘܠܵܐ ܒܘܼܕܵܪܵܟ ܕܲܒܼܒܹܝܬܼ ܥܲܡܡܹ̈ܐ ܕܐܲܓܲܪ ܗܵܟܲܢ ܀ 290 :ܗܵܐ ܒܨܝܼܪ ܩܲܠܝܼܠ ܫܢܝܼ̈ܢ ܚܲܡܸܫܡܐܵܐ ܕܡܲܣܠܹܝܬܿ ܘܲܫܕܹܝܬܿ 291 ܘܲܟܼܡܵܐ ܕܬܲܓܲܪ ܝܲܬܿܝܼܪ ܡ̇ܬܿܚ ܢܸܓܼܪܵܐ ܕܲܥܠܲܝܟ ܀ 292 :ܘܐܸܢܗܘ̤ ܕܬܹܐܡܲܪ ܕܡܸܛܠ ܥܵܘ̣ܠܵܟ ܡܲܓܲܪ ܢܸܓܼܕܵܟ 293 ܗܵܐ ܠܵܐ ܣܲܓܿܝܼ ܥܲܘ̣ܠܵܟ ܗܵܫܵܐ ܡ̣ܢ ܕܲܒܼܩܲܕܿܡ̇ܐ ܀ 294 :ܦܲܚܸܡ ܘܲܚܙܝܼ ܕܲܒܼܨܝܼܪ ܥܵܘ̣ܠܵܟ ܡ̣ܢ ܕܲܒܼܩܲܕܼܡ̇ܐ 295 ܘܡ̇ܟܵܐ ܚܛܝܼܬܼܵܟ ܡ̣ܢ ܗܵܝ̇ ܕܲܣܥ݂ܲܪܬܿ ܒܕܼܵܪܹ̈ܐ ܩܲܕܼܡܹ̈ܐ ܀ 296 :ܒܡܲܕܼܒܿܪܵܐ ܐܲܪܓܸܙܬܿ ܒܣܸܓܼܕܲܬܼ ܥܸܓܼܠܵܐ ܘܒܲܒܼ̈ܢܵܬܼ ܡܘܼܐܵܒܼ 297 ܘܒܲܐܪܥܵܐ ܕܲܟܼܢܲܥ̄ܢ ܛܥܲܝ̣ܬܿ ܘܐܸܫܬܲܛܝܼܬܿ ܒܟܹܐܦܹ̈ܐ ܘܩܲܝܣܹ̈ܐ ܀ 298 :ܠܟܼܠܗܘܿܢ ܟܹܐܒܲܝ̈ܟ ܗܘ̤ܵܐ ܚܘܼܠܡܵܢܵܐ ܘܚܵܢ̣ܘܼܟ ܪ̈ܲܚܡܹܐ 299 ܘܗܵܢܵܐ ܟܹܐܒܼܵܐ ܐܲܓܲܪ ܨܹܐܕܲܝܟ ܠܒܲܪ ܡ̣ܢ ܛܲܟܼܣܵܐ ܀ 300 :ܘܗܵܐ ܠܵܐ ܟܪܝܼܗ ܐܲܢ̄ܬܿ ܒܕܸܚܠܲܬܼ ܫܹܐܕܹ̈ܐ ܐܲܝܟ ܕܲܒܼܩܲܕܼܡ̇ܐ 301 ܘܠܵܐ ܡܕܲܒܲܚ ܐܲܢ̄ܬܿ ܦܹܐܪܹ̈ܐ ܕܟܲܪܣܵܟ ܠܫܹܐܕܹ̈ܐ ܛܲܡ̈ܠܹܐ ܀ 302 :ܢܓܲܪ ܠܹܗ ܟܹܐܒܼܵܟ ܘܛܵܟ ܠܲܝܬܿ ܣܲܡܵܐ ܠܲܚܒܼܵܪ̈ܵܬܼܵܟ 303 ܘܐܸܠܵܐ ܚܵܘܵܐ ܕܐܸܡܲܬܼܝ ܩܵܘܝܼܬܿ ܕܠܵܐ ܚܘܼܠܡܵܢܵܐ ܀ 304 :ܒܡܸܨܪܹܝܢ ܡܲܐܬܹܿܝܢ ܥܲܡ ܬܵܘܣܲܦܬܵܐ ܢܦ݂ܲܠܬܿ ܒܐܸܫܬܼܵܐ 305 ܘܐܸܬܼܵܐ ܡܘܼܫܵܐ ܘܲܪܕܲܦ ܡܸܢܵܟ ܥܲܡܠܵܐ ܘܥܵܘ̣ܠܵܐ ܀ 306 :ܒܒܼܵܒܹܠ ܫܲܒܼܥܝܼܢ ܟܲܕܼ ܛܲܒܿܝܼܥܲܬܿ ܐܲܝܟ ܕܲܒܼܗܵܘܬܼܵܐ 307 ܘܩܵܡ̣ ܕܵܢܝܼܐܹܝܠ ܘܨܲܠܝܼ ܘܲܣܠܸܩ̣ܬܿ ܠܦܘܼܬܼ ܡܘܼܠܟܵܢܵܐ ܀ 308 :ܒܟܼܠ ܐܲܬܼܪ̈ܵܘܵܢ ܥܲܡܵܟ ܗܲܠܸܟܼܘ ܐܵܣ̈ܘܵܬܼܵܐ 309 ܘܠܵܐ ܐܸܬܼܓܲܪܕܿܝܼ ܣܲܡܵܐ ܕܪܘܼܚܵܐ ܡ̣ܢ ܓܵܘ ܥܲܡܵܟ ܀ 310 :ܒܗܵܢܵܐ ܙܲܒܼܢܵܐ ܠܡܵܢ ܠܲܝܬܿ ܐܵܣܝܵܐ ܕܥܵܨܹ̇ܒܼ ܟܹܐܒܲܝ̈ܟ 311 ܘܠܵܐ ܡܒܲܕܿܩܵܢܵܐ ܕܲܡܒܲܝܲܐ ܠܵܟ ܡ̣ܢ ܟܲܪܝܘܼܬܼܵܟ ܀ 312 :ܘܲܟܼܒܲܪ ܬܲܝܬܸܿܐ ܗܵܝ̇ ܕܲܟܼܬܼܝܼܒܼܵܐ ܕܲܥܒ݂ܲܪ ܙܲܒܼܢܵܗ̇ 313 ܕܒܼܵܛܹ̇ܠ ܡܸܢܵܟ ܟܵܗܢܵܐ ܘܡܲܠܟܵܐ ܘܣܵܐܹ̇ܡ ܒܸܣܡܹ̈ܐ ܀ 314 :ܘܗܵܐ ܫܸܠܡܲܬ̤ ܠܵܗ̇ ܗܵܕܹܐ ܒܒܼܵܒܹܠ ܘܲܒܼܛܸܠܘ ܛܲܟܼܣܲܝ̈ܟ 315 ܘܲܦܢ̣݂ܲܝܬܿ ܘܲܣܠܸܩ̣ܬ ܒܝܵܘ̈ܡܲܝ ܟܘܼܪܹܫ ܒܙܵܘܚܵܐ ܪܲܒܵܐ ܀ 316 :ܒܝܵܘ̈ܡܲܝ ܟܘܼܪܹܫ ܘܲܒܼܙܘܼܪܒܵܒܹܠ ܣܠܸܩ̣ܬܿ ܐܲܝܟ ܕܲܟܼܬܼܝܼܒܼ 317 ܐܵܘ ܣܵܪܹܒܼ ܐܲܢ̄ܬܿ ܐܵܦ ܥܲܠ ܗܵܕܹܐ ܐܲܝܟ ܕܲܡܥܵܕܲܬܿ ܀ 318 ܡ̇ܕܹܝܢ ܕܲܓܸܿܠܘ ܙܟܲܪܝܵܐ ܘܚܲܓܿܝܼ ܐܵܦ ܡܲܠܲܐܟܼܝܼ: pb. 309 319 :ܘܲܟܼܒܲܪ ܒܸܕܼܝܵܐ ܗ̄ܘ̣ ܕܪܲܟܸܿܒܼ ܐܵܦ ܐܹܪܲܡܝܵܐ 320 ܘܛܸܠܵܢ̈ܝܵܬܼܵܐ ܕܠܵܐ ܫܲܪܝܼܪ̈ܵܢ ܚ̣ܙܵܐ ܚܲܙܩܝܼܐܹܝܠ ܀ 321 :ܡ̇ܕܹܝܢ ܘܠܵܐ ܢ̣ܚܸܬܼ ܘܠܵܐ ܕܵܢܝܼܐܹܝܠ ܠܒܹܝܬܼ ܒܵܒܼܠܵܝܹ̈ܐ 322 ܘܠܵܐ ܒܥ̣ܵܐ ܘܐܲܦܝܼܣ ܒܫܘܼܠܵܡ ܫܲܒܼܥܝܼܢ ܥܲܠ ܦܘܼܢܵܝܵܐ ܀ 323 :ܦܢ݂ܲܝܬܿ ܐܵܘ ܠܵܐ ܦ̣ܢܲܬܿ ܦܲܢܵܐ ܠܘܼܩܒܲܠܝ ܐܲܝܟ ܕܲܬܼܒܲܥܬܼܵܟ 324 ܐܵܘܣܸܦ ܡ̇ܪܝܵܐ ܬܸܢܝܵܐ ܕܐܝܼܕܹܗ ܐܵܘ ܬܘܼܒܼ ܡ̇ܘܣܸܦ ܀ 325 :ܬܸܢܝܵܐ ܟܬܼܝܼܒܼܵܐ ܕܡ̇ܘܣܸܦ ܡ̇ܪܝܵܐ ܠܵܐ ܗ̄ܘ̣ܵܐ ܬܘܼܠܬܼܵܐ 326 ܠܡܲܢ̣ܘܼ ܢܲܫܲܪ ܠܲܢܒܼܝܼܘܼܬܼܵܐ ܐܵܘ ܠܲܟܼܬܼܝܼ̈ܫܹܐ ܀ 327 :ܥܝܵܕܼܵܐ ܗ̄ܘ̣ ܗܵܢܵܐ ܕܝܗ̄ܘܼܕܼܵܝܘܼܬܼܵܐ ܕܗܵܟܲܢ ܬܸܣܪܘܿܒܼ 328 ܘܬܸܛܠܘܿܡ ܩܵܠܹ̈ܐ ܕܲܢܒܼܝܼܘܼܬܼܵܐ ܒܚܸܪܝܵܝܘܼܬܼܵܐ ܀ 329 :ܡܥܵܕܼ ܐܲܢ̄ܬܿ ܕܬܸܣܪܘܿܒܼ ܒܲܪ ܐܲܒܼܪܵܗܵܡ ܐܲܡܝܼܢܵܐܝܼܬܼ 330 ܘܣܵܗܹ̇ܕܼ ܥܸܓܼܠܵܐ ܕܟܲܕܼ ܢܲܩܸܢܬܵܝܗܝ ܩܪܲܝܬܵܝܗܝ ܐܲܠܵܗ ܀ 331 :ܒܚܹܝܠ ܐܲܠܵܗܵܐ ܦܲܪ̣ܩܵܟ ܡܘܼܫܹܐ ܡ̣ܢ ܓܵܘ ܡܸܨܪܹܝܢ 332 ܘܐܲܢ̄ܬܿ ܐܲܩܸܨܬܵܝܗܝ ܠܗܵܘ̇ ܦܘܼܪܩܵܢܵܐ ܠܕܲܗܒܼܵܐ ܚܫܘܼܠܵܐ ܀ 333 :ܘܲܟܼܒܲܬܿ ܕܠܵܐ ܢܲܩܝܼܬܿ ܠܹܗ ܐܲܝܟ ܕܠܲܐܠܵܗܵܐ 334 ܘܥܲܠ ܡ̇ܢ ܡ̇ܕܹܝܢ ܒܲܚ̣ܪܵܟ ܡܘܼܫܹܐ ܒܟܼܘܼܪܵܐ ܕܡܲܝ̈ܵܐ ܀ 335 :ܘܲܟܼܒܲܪ ܬܹܐܡܲܪ ܕܗܵܐ ܐܵܦ ܥܲܡܡܹ̈ܐ ܣܵܥ̇ܪܝܼܢ ܗܵܕܹܐ 336 ܘܲܡܨܲܚܹܝܢ ܠܹܗ ܠܲܫܡܵܐ ܕܝܼܫܘܿܥ ܒܣܘܼܥܪ̈ܵܢܲܗܘܿܢ ܀ 337 :ܡܩܲܒܸܿܠ ܐ̄ܢܵܐ ܠܵܟ ܡ̇ܐ ܕܡܲܗܦܸܟ ܐܲܢ̄ܬܿ ܚܲܟܿܝܼܡܵܐܝܼܬܼ 338 ܘܡ̇ܠܹ̇ܟ ܐܲܢܵܐ ܠܵܟ ܕܲܬܼܨܘܼܬܼ ܡܸܠܲܝ̈ ܦܵܪܘܿܫܵܐܝܼܬܼ ܀ 339 :ܠܵܘ ܥܲܠ ܕܲܚܛܲܝܬܿ ܐܸܡ̇ܪܹܬܼ ܥܲܡܵܟ ܐܵܘ ܐܵܡܲ݁ܪ ܐ̄ܢܵܐ 340 ܐܸܠܵܐ ܕܣܵܪܒܲܬܿ ܠܘܼܩܒܲܠ ܢܘܼܗܪܵܐ ܕܠܵܐ ܢܲܗܝܼܪܵܐ ܗ̄ܘ̣ ܀ 341 :ܘܐܸܠܵܐ ܚܵܘܵܢܝ ܡ̇ܢܵܘ ܕܲܓܼܠܸܐ ܡ̣ܢ ܝܘܼܠܦܵܢܲܢ 342 ܕܲܡܙܲܕܿܩܝܼܢ ܠܹܗ ܫܡܲܝܵܐ ܘܐܲܪܥܵܐ ܘܐܲܢ̄ܬܿ ܟܵܦܲ̄݁ܪ ܐܲܢ̄ܬܿ ܀ 343 :ܒܗܵܕܹܐ ܬܸܢܘܲܝ ܬܢܹ̇ܝܬܼ ܣܘܼܪ̈ܚܵܢܲܝܟ ܡ̣ܢ ܕܲܟܼܬܼܝܼ̈ܒܼܵܢ 344 ܕܐܹܚܵܘܸܐ ܠܵܟ ܚܸܪܚܘܼܬܼܵܟ ܕܠܘܼܩܒܲܠ ܩܘܼܫܬܵܐ ܀ 345 :ܚܸܪܝܵܝܵܐ ܐܲܢ̄ܬܿ ܘܠܵܐ ܡܸܬܿܛܦܝܼܣ ܐܲܢ̄ܬܿ ܠܲܡܚܲܟܿܡܵܢܲܝ̈ܟ 346 ܘܣܵܗ̇ܕܿܝܼܢ ܟܹܐܢܹ̈ܐ ܕܲܢܟܲܣܬܿ ܐܸܢܘܿܢ ܥܲܠ ܕܲܟܼܐܵܘ ܒܵܟ ܀ 347 :ܥܲܡ ܓܲܠ̈ܝܵܬܼܵܐ ܕܲܒܼܓܼܵܘ ܣܸܦܪܹ̈ܐ ܡܸܬܼܟܲܬܲܫ ܐܲܢ̄ܬܿ 348 ܘܠܵܐ ܨܵܒܹ̇ܐ ܐܲܢ̄ܬܿ ܠܲܡܩܲܒܵܠܘܼ ܫܪܵܪܵܐ ܕܲܒܼܗܹܝܢ ܀ 349 :ܦܢ݂ܲܝܬܿ ܡ̣ܢ ܒܵܒܹܠ ܘܗܵܕܹܐ ܓܼܠܝܵܐ ܗ̄ܝܼ ܛܵܒܼ ܡ̣ܢ ܫܸܡܫܵܐ 350 ܘܡ̇ܐ ܕܡܲܟܿܣܝܼܢ ܠܵܟ ܡ̇ܚܹ̇ܝܬܿ ܟܪܘܿܡ̇ܐ ܕܠܵܐ ܠܲܡ ܣܸܠܩܹ̇ܬܼ ܀ 351 :ܐܵܪܵܐ ܦܢܲܝܬܿ ܠܵܟ ܡܵܢ ܣܵܪܹܒܼ ܐܲܢ̄ܬܿ ܓܘܼܡܕܵܢܵܐܝܼܬܼ 352 ܘܐܸܠܵܐ ܡܲܢ̣ܘܼ ܒܼܢܵܐ ܠܵܟ ܒܲܝܬܵܐ ܒܐܲܪܥܵܐ ܕܲܝܗܘܼܕܼ ܀ 353 ܙܟܲܪܝܵܐ ܘܚܲܓܿܝܼ ܢܲܟܿܣܘܼܢ ܓܘܼܡܕܼܵܐ ܕܚܸܪܚܵܘܼܬܼܵܟ: pb. 310 354 ܕܐܲܪܡܝܼܘ ܐܝܼܕܼܵܐ ܒܲܟܼܬܼܝܼ̈ܒܼܵܬܼܵܐ ܕܝܘܿܡ ܦܘܼܢܵܝܵܟ ܀ 355 :ܒܕܼܝܼܢܵܐ ܟܹܐܢܵܐ ܢܸܥܘܿܠ ܥܲܡܵܟ ܐܵܦ ܕܵܢܝܐܹܝܠ 356 ܕܩܲܕܹܿܡ ܚܵܘܝܵܟ ܐ̄ܪܵܙ ܡܹܐܬܼܝܼܬܹܗ ܕܡܲܠܟܵܐ ܕܐܲܣܠܝܼܬܿ ܀ 357 :ܒܪܘܼܚ ܓܸܠܝܵܢܵܐ ܡܢ̣ܵܐ ܫܵܒܼܘܿܥܹ̈ܐ ܘܛܲܟܸܿܣ ܐܸܢܘܿܢ 358 ܘܲܒܼܫܘܼܠܵܡܗܘܿܢ ܨܵܪܹܗ ܠܚܲܫܹܗ ܒܲܕܼܡܘܼܬܼ ܨܲܠܡܵܐ ܀ 359 :ܬܢܵܐ ܕܲܒܼܩܸܛܠܹܗ ܚܵܪܒܵܐ ܡܕܼܝܼܢ̄ܬܵܟ ܐܵܘ ܠܵܐ ܟܬܼܝܼܒܼܵܐ 360 ܡ̇ܕܹܝܢ ܓܲܠܝܵܐ ܗ̄ܝܼ ܕܐܸܢ ܠܵܐ ܚܪܝܼܒܼܵܐ ܥܬܼܝܼܕܼܵܐ ܕܬܸܚܪܘܿܒܼ ܀ 361 :ܐܸܢ ܠܵܐ ܩܛܲܠܬܵܝܗܝ ܠܗܵܘ̇ ܕܲܩܛ݂ܲܠܬܵܝܗܝ ܩܲܝܵܡ ܩܸܛܠܹܗ 362 ܘܐܲܢ̄ܬܿ ܩܵܛ̇ܠܲܬܿ ܠܹܗ ܘܗܘ̤ ܡܲܚܪܸܒܼ ܠܹܗ ܠܗܲܝܟܲܠ ܩܘܼܕܼܫܵܟ ܀ 363 :ܠܵܐ ܗ̄ܘ̣ܵܐ ܩܛܝܼܪܵܐ ܕܲܢܒܼܝܼܘܼܬܼܵܐ ܥܵܨܹ̇ܐ ܠܝܲܨܪܵܐ 364 ܕܐܸܢ ܨܵܒܹ̇ܐ ܐܲܢ̄ܬܿ ܘܐܸܢ ܠܵܐ ܨܵܒܹ̇ܝܬܿ ܬܸܩܛܘܼܠ ܡܲܠܟܵܟ ܀ 365 :ܠܵܐ ܗ̄ܘ̣ܵܐ ܕܬܸܩܛܘܿܠ ܠܲܡܚܲܪܪܵܢܵܟ ܩܪܹܝܬܼ ܚܲܦܸܛܬܵܟ 366 ܐܸܠܵܐ ܕܐܸܓܼܠܹܐ ܠܒܼܝܼܫܘܼܬܼ ܠܸܒܵܟ ܕܣܵܥܹ̇ܝܬܿ ܠܲܕܡ̇ܐ ܐܢ̄ܬܿ ܀ 367 :ܡܸܚܙܵܐ ܚܙܹ̇ܝܬܼܵܟ ܒܥܲܝܢܵܐ ܟܣܝܼܬܼܵܐ ܕܠܲܕܼܡ̇ܐ ܐܲܢ̄ܬܿ 368 ܘܩܲܕܿܡܹ̇ܐܼ ܨܵܪܬܹܿܗ ܠܢܸܟܼܠܵܐ ܒܝܼܫܵܐ ܒܕܲܦܵܐ ܕܣܸܦܪܹ̈ܐ ܀ 369 :ܠܵܘ ܐ̄ܢܵܐ ܩܪܹܝܬܼܵܟ ܩܵܛܹ̇ܠ ܡܲܠܟܹܿܗ ܒܲܪ ܐܲܒܼܪܵܗܵܡ 370 ܢܒܼܝܼܝ̈ܟ ܩܵܥܹ̇ܝܢ ܐܲܝܟ ܫܝܼܦܘܼܪܹ̈ܐ ܥܲܠ ܝܘܿܡ ܩܸܛܠܹܗ ܀ 371 :ܝܲܥܩܘܿܒܼ ܐܲܒܼܘܼܟ ܚ̣ܙܵܝܗܝ ܝܲܗܘܼܕܼܵܐ ܠܚܲܫܵܐ ܕܡ̇ܘܬܹܿܗ 372 ܘܕܲܡܝܹܗ ܠܚܲܡܪܵܐ ܕܙܵܪܓܵܐ ܚܙܵܬܹܗ ܠܥܹܝܢ ܚܲܙܝܹ̈ܐ ܀ 373 :ܐܵܦ ܒܲܪ ܐܝܼܫܲܝ ܚ̣ܙܵܝܗܝ ܠܲܟܼܢܘܼܫܝܵܐ ܫܓܼܝܼܫܵܐ ܕܲܥܠܵܘܗܝ 374 ܘܲܦܣ݂ܲܩ ܕܝܼܢܵܐ ܕܲܡܠܸܐ ܪܘܼܓܼܙܵܐ ܥܲܠ ܩܵܛܘܿܠܵܘ̈ܗܝ ܀ 375 :ܒܡܲܟܿܝܼܟܼܘܼܬܹܗ ܘܲܕܒܼܚܘܼܬܹܗ ܬܗܲܪ ܐܹܫܲܥܝܵܐ 376 ܕܣܲܝܒܲܪ ܘܲܫ̣ܬܸܩ ܘܠܵܐ ܦܬ݂ܲܚ ܦܘܼܡܹܗ ܒܥܸܕܵܢ ܚܲܫܵܐ ܀ 377 :ܙܟܲܪܝܵܐ ܒܲܕܡܵܐ ܕܕܲܝܵܬܹܩܵܘ̈ܗܝ ܚܙ̣ܵܝܗܝ ܕܲܡܨܲܒܲܥ 378 ܘܫܲܪ̣ܵܐ ܚܒܼܝܼܫܹ̈ܐ ܡ̣ܢ ܓܵܘ ܓܘܼܒܵܐ ܕܠܵܐ ܚܲܝܘܼܬܼܵܐ ܀ 379 :ܢܒܼܝܲܝ̈ܟ ܐܸܢܘܿܢ ܗܵܠܹܝܢ ܕܲܬܼܢܹ̇ܝܬܼ ܐܵܘ ܕܲܠܡܵܐ ܠܵܐ 380 ܒܪܘܼܚܵܐ ܡܲܠܸܠܘ ܐܵܘ ܡ̣ܢ ܒܸܕܼܝܵܐ ܕܪ̈ܥܝܵܢܲܝܗܘܿܢ ܀ 381 :ܐܸܢ ܫܲܪܝܼܪܝܼܢ ܫܠܲܡ ܠܲܫܪܵܪܵܐ ܕܦܸܬܼܓܼܵܡܲܝ̈ܗܘܿܢ 382 ܘܐܸܠܵܐ ܐܸܡܲܪ ܕܠܵܐ ܫܲܪܝܼܪܝܼܢ ܘܢܸܫܠܸܐ ܕܪܵܫܵܐ ܀ 383 :ܐܵܘ ܐܸܡܲܪ ܥܲܡܝܼ ܡ̣ܢ ܣܸܦܪ̈ܲܝܗܘܿܢ ܘܐܹܦܲܢܸܐ ܠܵܟ 384 ܐܵܘ ܚܵܘܵܐ ܠܝܼ ܘܐ̄ܢܵܐ ܝܵܗܹ̇ܒܼ ܐ̄ܢܵܐ ܐܲܬܼܪܵܐ ܠܸܡܠܲܝ̈ܟ ܀ 385 :ܐ̄ܢܵܐ ܫܵܠܹ̇ܡ ܐ̄ܢܵܐ ܠܟܼܠܗܘܿܢ ܩܵܠܹ̈ܐ ܕܲܢܒܼܝܼܘܼܬܼܵܐ 386 ܘܠܵܐ ܥܵܪܹܡ ܐ̄ܢܵܐ ܡ̣ܢ ܣܘܼܟܵܠܵܐ ܕܦܸܬܼܓܼܵܡܲܝ̈ܗܘܿܢ ܀ 387 ܡܸܢܗܘܿܢ ܝܸܠܦܹ̇ܬܼ ܕܐܵܘܕܹܿܐ ܒܡܲܠܟܵܐ ܕܲܕܼܢܲܚ̣ ܡܸܢܵܟ: pb. 311 388 ܘܗܸܢܘ̣ܿܢ ܚܵܘܝܘܼܢܝ ܕܐܸܪܕܹܿܐ ܒܐܘܼܪܚܵܐ ܕܗܲܝܡܵܢܘܼܬܹܗ ܀ 389 :ܐܸܢ ܟܵܪ̈ܘܿܙܲܝܟ ܓܠ̣ܵܘ ܠܝܼ ܐ̄ܪܵܙܵܐ ܕܲܒܼܓܼܵܘ ܥܡܵܟ 390 ܠܡܵܢ ܚܵܣܹ̇ܡ ܐܲܢ̄ܬܿ ܕܲܗܘܹ̇ܝܬܼ ܚܲܒܼܪܵܐ ܠܒܲܝܬܵܝܘܼܬܼܵܟ ܀ 391 :ܠܵܘ ܐ̄ܢܵܐ ܓܒܹ̇ܝܬܼ ܠܝܼ ܕܐܸܗܘܸܐ ܥܲܡܵܟ ܒܲܪ ܝܵܪܬܿܘܼܬܼܵܐ 392 ܗܸܢܘ̣ܿܢ ܝܲܗ̣̄ܒܼܘ ܠܝܼ ܡܢܵܬܼܵܐ ܥܲܡܵܟ ܡܵܢ ܟܲܪܝܵܐ ܠܵܟ ܀ 393 :ܡܲܠܟܵܟ ܦܲܪ̣ܩܲܢܝ ܡ̣ܢ ܫܘܼܥܒܵܕܼܵܐ ܕܒܼܝܼܫܵܐ ܘܡ̇ܘܬܵܐ 394 ܘܚܘܼܒܹܿܗ ܟܲܕܼܢܲܢܝ ܬܚܹܝܬܼ ܡܵܪܘܼܬܹܗ ܡ̇ܢ ܢܵܨܹ̇ܐ ܐܲܢ̄ܬܿ ܀ 395 :ܠܕܼܝܼܠܹܗ ܐܸܬܼܵܐ ܘܠܵܐ ܨܒܼܵܘ ܕܝܼܠܹܗ ܕܲܢܩܲܒܿܠܘܼܢܵܝܗܝ 396 ܘܕܲܚ̣ܙܵܐ ܕܣܲܩ̣ܪܘܼܗܝ ܓ̣ܒܼܵܐ ܠܹܗ ܥܲܡܵܟ ܘܐܲܣܠܝܼ ܠܕܝܼܠܹܗ ܀ 397 :ܐܸܬܼܵܐ ܨܹܐܕܲܝܟ ܐܵܘ ܠܵܐ ܐܸܬܼܵܐ ܐܸܡܲܪ ܩܘܼܫܬܵܐ 398 ܓܒܼ݂ܵܐ ܠܹܗ ܥܲܡܡܹ̈ܐ ܐܵܘ ܠܵܐ ܓܒܼܵܐ ܠܹܗ ܬܢܝܼ ܐܲܝܟ ܕܐܝܼܬܹܝܗ̇ ܀ 399 :ܐܸܢ ܠܵܘ ܗܘ̤ܝܘܼ ܕܐܸܬܼܵܐ ܨܹܐܕܲܝܟ ܡܲܢ̣ܘܼ ܕܲܒܼܛܲܠ݂ܬܿ 400 ܘܐܸܢ ܠܵܐ ܓܒܼ݂ܵܐ ܠܹܗ ܥܲܡܡܹ̈ܐ ܚܠܵܦܲܝܟ ܠܡܵܢ ܡ̇ܘܕܹܿܝܢ ܒܹܗ ܀ 401 :ܕܐܸܬܼܵܐ ܓܲܠܝܵܐ ܗ̄ܝܼ ܘܠܲܝܬܿ ܢܲܗܝܼܪܵܐ ܕܢܲܗܝܼܪ ܡܸܢܵܗ̇ 402 ܘܕܲܓܼܒܼܵܐ ܠܥܲܡܡܹ̈ܐ ܣܵܗ̇ܕܿܝܼܢ ܥܲܡܡܹ̈ܐ ܘܐܲܠܵܗܲܝ̈ܗܘܿܢ ܀ 403 :ܥܲܡܡܹ̈ܐ ܕܩܲܒܿܠܘܼܗܝ ܡܵܘܕܹܿܝܢ ܕܐܸܬܼܵܐ ܘܐܲܢ̄ܬܿ ܟܵܦܲ݁ܪ ܐܲܢ̄ܬܿ 404 ܘܐܲܠܵܗܲܝ̈ܗܘܿܢ ܝܲܗ̣̄ܒܼܘ ܠܹܗ ܐܝܼܕܼܵܐ ܘܐܲܢ̄ܬܿ ܥܵܪܹܩ ܐܲܢ̄ܬܿ ܀ 405 :ܡ̇ܢ ܐܵܡܲ݁ܪ ܐܲܢ̄ܬܿ ܥܲܠ ܣܵܓܼܘܿܕܹ̈ܐ ܘܡܸܣܬܲܓܼܕܵܢܹ̈ܐ 406 ܕܗܵܐ ܐܵܦ ܟܸܢܫܹ̈ܐ ܕܲܫܡܲܝܵܢܹ̈ܐ ܫܘܼܒܼܚܹܗ ܬܵܢܹ̇ܝܢ ܀ 407 :ܡܠܝܼܠܹ̈ܐ ܘܚܲܪ̈ܫܹܐ ܥܠܵܘܗܝ ܡܸܫܬܲܥܹܝܢ ܒܩܵܠܵܐ ܘܫܸܬܼܩܵܐ 408 ܘܐܲܢ̄ܬܿ ܒܲܠܚܘܿܕܲܝܟ ܫܲܬܿܝܼܩ ܦܘܼܡ̇ܟ ܡ̣ܢ ܬܸܫܒܿܘܿܚܬܹܿܗ ܀ 409 :ܚܣܵܡܵܐ ܒܝܼܫܵܐ ܥܵܘܪܵܗ̇ ܠܥܲܝܢܵܐ ܕܦܵܪܘܿܫܘܼܬܼܵܟ 410 ܘܠܵܐ ܨܵܒܹ̇ܐ ܐܲܢ̄ܬܿ ܠܡܸܚܙܵܐ ܢܘܼܗܪܵܐ ܕܪܲܒܿܘܼܬܼ ܫܘܼܒܼܚܹܗ ܀ 411 :ܒܝܼܫܘܼܬܼ ܝܲܨܪܵܟ ܥܒ݂ܲܕܼܬܵܟ ܣܲܡܝܵܐ ܕܠܵܐ ܒܘܼܝܵܢܵܐ 412 ܘܟܲܕܼ ܚܵܙܹ̇ܐ ܐܲܢ̄ܬܿ ܠܵܐ ܚܵܙܹ̇ܐ ܐܲܢ̄ܬܿ ܡܸܕܸܿܡ ܪܓܼܠܸܐ ܀ 413 :ܐܸܠܘܼ ܪܓܼܝܼܫ ܗܼ̄ܘܲܝܬܿ ܕܠܲܐܝܠܹܝܢ ܛܘܼܒܹ̈ܐ ܢܘܼܟܼܪܵܝܵܐ 414 ܟܒܲܪ ܩܵܪܹܐ ܗܼ̄ܘܲܝܬܿ ܫܡܲܝܵܐ ܘܐܲܪܥܵܐ ܕܲܢܒܲܟܿܘܿܢܵܟ ܀ 415 :ܐܸܠܘܼ ܡܦܵܣ ܗܼ̄ܘܲܝܬܿ ܒܕܼܝܼܢܵܐ ܕܲܢܛܝܼܪ ܠܡܲܪܵܚܘܼܬܼܵܟ 416 ܟܒܲܪ ܒܵܟܹ̇ܐ ܗ̤ܘܲܝܬܿ ܠܹܠܲܝ ܐܝܼܡܵܡ ܘܠܵܐ ܫܵܠܹ̇ܐ ܗܼ̄ܘܲܝܬܿ ܀ 417 :ܐܸܬܼܟܲܣܝܼܘ ܠܗܘܿܢ ܛܘܼܒܹ̈ܐ ܘܢܸܓܼܕܹܿܐ ܡ̣ܢ ܪܸܥܝܵܢܵܟ 418 ܘܠܵܐ ܚܵܙܹ̇ܐ ܐܲܢ̄ܬܿ ܠܵܐ ܠܲܕܼܩܵܝ̈ܡܵܢ ܘܠܵܐ ܠܕܲܥܬܼܝܼ̈ܕܼܵܢ ܀ 419 :ܘܐܸܠܵܐ ܡܲܢ̣ܘܼ ܕܲܣܡܸܐ ܘܲܚܪܸܫ ܒܕܼܘܼܡܚܵܐ ܕܝܼܠܵܟ 420 ܕܡܲܣܠܹܝܬܿ ܘܲܫܠܹܝܬܿ ܘܠܵܐ ܦܵܪܹܫ ܐܲܢ̄ܬܿ ܡܸܛܠ ܡ̇ܢܵܐ ܀ 421 ܗ̤ܘܲܝܬܿ ܢܘܼܟܼܪܵܝܵܐ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ: pb. 312 422 ܘܢܵܕܿ݁ܝܼܢ ܡܸܢܵܟ ܥܝܼܪܹ̈ܐ ܘܐ̄ܢܵܫܵܐ ܘܠܵܐ ܒܵܗܹ̇ܬܼ ܐܲܢ̄ܬܿ ܀ 423 :ܫܕܹܝܬܿ ܐܲܝܟ ܙܸܒܼܠܵܐ ܘܕܼܵܐܹ̇ܫ ܟܠܢܵܫ ܠܥܸܠ ܡ̣ܢ ܪܹܫܵܟ 424 ܘܠܵܐ ܡܸܬܼܒܲܩܹܝܬܿ ܕܡ̇ܢܲܐ ܗ̄ܝܼ ܥܸܠܬܼܵܐ ܕܫܝܼܛܘܼܬܼ ܢܲܦܫܵܟ ܀ 425 :ܦܸܣܩܲܬ̤ ܐܘܼܪܚܵܐ ܕܲܫܡܲܝܵܢܹ̈ܐ ܡ̣ܢ ܨܹܝܕ ܥܲܡܵܟ 426 ܘܠܵܐ ܡܸܬܼܒܲܝܢܲܬܿ ܕܥܲܠ ܡ̇ܢ ܐܲܗܡܝܼܘ ܡ̣ܢ ܬܸܫܡܸܫܬܵܟ ܀ 427 :ܒܛܸܠܘ̣ ܓܸܠܝܵܢܹ̈ܐ ܐܲܠܵܗܵܝܹܐ ܡ̣ܢ ܟܵܪ̈ܘܿܙܲܝܟ 428 ܘܠܲܝܬܿ ܕܲܡܩܲܪܸܒܼ ܣܲܡܵܐ ܠܟܹܐܒܲܝ̈ܟ ܐܵܦܠܵܐ ܒܠܲܚܡܵܐ ܀ 429 :ܠܘܲܝ ܝܵܕܲ݁ܥ ܗܼ̄ܘܲܝܬܿ ܠܡܸܬܼܒܲܩܵܝܘܼ ܒܪܲܒܿܘܼܬܼ ܫܸܦܠܵܟ 430 ܘܡܸܬܿܬܲܢܲܚ ܗܼ̄ܘܲܝܬܿ ܥܲܠ ܡܝܼܬܼܘܼܬܼܵܟ ܕܲܕܠܵܐ ܢܵܡܘܿܣ ܀ 431 :ܠܘܲܝ ܚܵܙܹ̇ܐ ܗܼ̄ܘܲܝܬܿ ܣܲܢܝܼܘܼܬܼ ܢܲܦܫܵܟ ܫܟܼܝܼܪ ܐܲܢ̄ܬܿ 432 ܘܡܸܬܼܢܲܟܲܦ ܗܼ̄ܘܲܝܬܿ ܐܵܦܸܢ ܩܲܠܝܼܠ ܡ̣ܢ ܣܲܢ̈ܝܵܬܼܵܟ ܀ 433 :ܠܘܲܝ ܨܵܐܹ̇ܬܼ ܗܼ̄ܘܲܝܬܿ ܩܵܠ ܟܘܼܘܵܢܵܐ ܕܲܡܚܲܟܿܡܵܢܲܝ̈ܟ 434 ܘܦܵܬܼ̇ܚܲܬܿ ܗܵܘܢܵܟ ܕܬܸܥܘܿܠ ܨܹܐܕܲܝܟ ܡܸܠܲܬܼ ܚܲܝܹ̈ܐ ܀ 435 :ܠܘܲܝ ܡܸܣܬܲܟܿܠܲܬܿ ܒܲܣܬܼܝܼܪ̈ܵܬܼܵܐ ܕܲܒܼܓܼܵܘ ܣܸܦܪܹ̈ܐ 436 ܘܚܵܙܹ̇ܝܬܿ ܕܲܫܠܸܡ̣ ܚܲܝܠܵܐ ܕܲܒܼܗܹܝܢ ܒܗܵܢܵܐ ܕܲܙܩܲܦ̣ܬܿ ܀ 437 :ܙܩܝܼܦܹܗ ܣܲܚܦܵܟ ܡ̣ܢ ܫܘܼܠܛܵܢܵܐ ܕܪܲܒܿܘܼܬܼ ܕܲܪܓܼܵܟ 438 ܘܐܲܣܠܝܼ ܘܲܫܕܵܟ ܡ̣ܢ ܝܵܪܬܿܘܼܬܼܵܐ ܕܒܹܝܬܼ ܐܲܒܼܵܗܲܝ̈ܟ ܀ 439 :ܡܵܘܬܹܿܗ ܕܲܗ̤ܵܐ ܥܸܠܲܬܼ ܚܲܝܹ̈ܐ ܠܡܝܼ̈ܬܹܐ ܘܚܲܝܹ̈ܐ 440 ܠܵܟ ܥܲܬܼܕܼ ܠܵܟ ܡܲܚܢܘܿܩܝܼܬܼܵܐ ܘܢܸܓܼ̈ܕܹܿܐ ܥܦܝܼܦܹ̈ܐ ܀ 441 :ܠܢܓܼ̈ܕܹܿܐ ܥܦܝܼܦܹ̈ܐ ܥܬܼܝܼܕܲܬܿ ܕܬܸܥܘܿܠ ܠܝܘܿܡ ܒܘܼܚܪܵܢܵܐ 442 ܩܕܼܵܡ ܗܵܘ̇ ܡܲܠܟܵܐ ܕܕܼܵܢܬܵܝܗܝ ܒܐܲܪܥܵܐ ܚܲܪܡ̇ܢܵܐܝܼܬܼ ܀ 443 :ܕܠܵܐ ܚܵܘܣܵܢܵܐ ܡܲܣܪܲܚ ܢܸܓܼ̈ܕܹܿܐ ܥܲܠ ܒܝܼܫܘܼܬܼܵܟ 444 ܠܵܘ ܥܲܠ ܕܲܩ̣ܛܲܠܬܿ ܐܸܠܵܐ ܕܲܛܠܲܡ̣ܬܿ ܠܟܼܵܪܘܿܙܘܼܬܹܗ ܀ 445 :ܥܝܵܪܬܵܐ ܕܥܲܒܼܕܵܘ̈ܗܝ ܒܐܝܼܕܲܝ̈ܟ ܬܵܒܲܥ̇ ܒܕܼܝܼܢܵܐ ܟܹܐܢܵܐ 446 ܕܫܲܕܿܪ ܨܹܐܕܲܝܟ ܒܵܬܲܪ ܩܸܛܠܹܗ ܘܠܵܐ ܨܵܬܿܬܿ ܐܸܢܘܿܢ ܀ 447 :ܒܗܘܿܢ ܪܵܕܹܐ ܠܵܗ̇ ܠܛܵܠܘܿܡܘܼܬܼܵܟ ܕܲܛܠܲܡ̣ܬܿ ܣܲܓܿܝܼ 448 ܘܲܡܦܲܪܣܸܐ ܠܵܟ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ ܥܘܼܢܵܝܵܐ: ܒܪܝܼܟܼܘܼ ܕܥܲܩ̣ܪܵܗ̇ ܠܨܸܗܝܘܿܢ ܨܵܠܘܿܒܼܬܵܐ: ܘܲܢܨ݂ܲܒܼ ܥܹܕܿܬܵܐ ܡܗܲܝܡܲܢܬܵܐ ܒܲܬܼܚܘܼܡܹܝܗ̇ ܀