Letter 17: To the brothers in the monastery of Izla who were seperated from their brothers - ܠܘܬ ܐܚ̈ܐ ܕܒܥܘܡܪܐ ܕܐܝܙܠܐ ܕܐܪܬܕܩܘ ܡ̣ܢ ܐܚܝ̈ܗܘܢ ܘܐܒܐܫܘ ܠܗܘܢ

ܠܐܚ̈ܐ ܢܟ̈ܦܐ ܕܒܛܘܪܐ ܕܐܝܙܠܐ ܐܝܠܝܢ ܕܒܝܪܬܘܬܐ ܕܐܒܘܢ ܐܒܪܗܡ ܒܬܫܡܫܬܐ ܕܪܘܚ ܡܬܚ̇ܦܛܝܢ. ܪ̈ܚܡܝ ܐܠܗܐ ܘܦܠܚ̈ܐ ܕܡܝܬܪܘܬܐ ܡܪ̈ܝ ܘܐܚ̈ܝ. ܚܒܝܒܐ ܘܕܙܘܙܝ ܘܓܪܝܓܘܪ ܘܠܘܩܐ ܘܐܪܙܝܫܘܥ ܘܐܤܛܦܢܘܣ ܘܝܙܕܝܢ ܘܒܪܕܘܩ ܘܫܡܥܘܢ ܘܐܚ̈ܐ ܢܟ̈ܦܐ ܕܥܡܗܘܢ. ܝܫܘܥܝܗܒ ܐܚܟܘܢ ܒܡܪܢ ܫܠܡ. ܒܤܘܓܐܐ ܕܤܒܪܐ ܕܓܠܐ ܚܫܬ ܐܝܟ ܕܡܬܚ̇ܙܝܐ ܝܘܓܪܐ ܕܫܢܝ̈ܐ ܐܘ ܓܒܪ̈ܐ ܚܤܢ̈ܐ. ܥܠ ܕܠܬܘܟܠܢܝ ܕܥܠܝܟܘܢ ܠܥܠ ܡ̣ܢ ܟܠܗ ܩܢ̣ܛܐ ܐܪܝܡܬܼ. ܘܠܐ ܡܬܘܡ ܡܤ̇ܒܪ ܗܘ̇ܝܬ ܕܡܡܟ̈ܟܐ ܠܤܩܘܒ̈ܠܐ ܕܥܪܨܝܢ. ܥܬܝܕ ܗܘ̇ܝܬ ܠܡܚܙܝܟܘܢ ܐܝܟ ܡܐ ܕܗܫܐ. ܒܗ̇ܝ ܕܡ̣ܢ ܬܚܘ̈ܝܬܐ ܤܓܝ̈ܐܬܐ ܪܕܩܐ ܗ̣ܘܬ ܠܟܘܢ ܠܐ ܒܙܕܟܝܢܘܬܐ ܕܒܢܤܝ̈ܘܢܐ. ܐܝܠܝܢ ܕܤܛܢܐ ܒܥܠܕܒܒܐ ܕܓܘܐ ܡܥܕ ܠܡܥ̣ܒܕ. ܗܫܐ ܕܝܢ ܡ̣ܢ ܒܬܪ ܬܪܬܝܢ ܙܒܢ̈ܝܢ ܕܐܢܐ ܟܬܒ̇ܬ ܠܟܘܢ܆ ܐܢܬܘܢ ܕܝܢ ܫܬܩܬܘܢ ܡ̣ܢ ܦܘܢܝ ܦܬܓܡܐ. ܡܤܬܟܠ ܗ̇ܘܝܢ ܟܐܡܬ ܠܒܝܼܫܬܐ ܕܡܤܬܟܝܐ. ܗ̇ܝ ܕܐܝܬܝܗ̇ ܐܝܕܐ ܕܗܫܐ ܐܫܬܡܥܬ̤ ܠܝ ܕܓܕܫܬ̤ ܠܟܘܢ ܠܡܚ̣ܫ. ܘܡܛܠ ܗܢܐ ܟܕ ܡܝ̇ܠܠ ܐܢܐ ܡ̣ܢ ܟܐܒܐ: ܒܒ̈ܬܐ ܩܠܵܐ ܕܕܡ̈ܝܢ ܡܬܚܫܚ ܐܢܐ. ܕܡܢ̣ܘ ܟܝ ܠܟܪܡܐ ܗܘ̇ ܪܓܝܓܐ ܕܡܗ̇ܒܒ ܗܘ̣ܐ ܒܦܐܪ̈ܐ ܕܙܕܝܩܘܬܐ: ܟܕ ܬܪܥ ܤܝܓܐ ܕܙܗܝܪܘܬܗ: ܡܬܬܕܝܫܢܐ ܥ̣ܒܕܗ ܠܟܠ ܪ̈ܓܠܐ pb. 23 ܛܡܐ̈ܬܐ ܕܪ̈ܫܝܥܐ. ܡܢ̣ܘ ܟܝ ܠܡܓܕܠܐ ܗܘ̇ ܥܫܝܢܐ ܕܡܚܤܢ ܗܘ̣ܐ ܒܟܠ ܐܝܟ ܕܒܚܠܵܠܐ ܕܡܛܫ̈ܝܬܐ ܙܥ̣ܙܥ. ܘܡܟܟ ܒܐܪܥܐ ܫܘܒܤܪܐ ܕܥܘܫܢܗ. ܡܢ̣ܘ ܟܝ ܗ̇ܘ ܕܠܤܕܪܐ ܕܩܪ̈ܒܬܢܐ ܕܪܘܚ. ܗ̇ܢܘܢ ܕܙܒܢ̈ܝܢ ܤܓܝ̈ܐܢ ܡ̣ܢ ܚܐܦܐ ܕܫܠܝ̈ܛܢܐ ܒܢ̈ܫܐ ܙܟܘܬܐ ܕܫܪܪܐ ܐܥ̣ܕܝܼܘ. ܗܫܐ ܒܡܨܥܬ ܫܝܢܐ ܒܝܬܝܐ ܤܕܩܐ ܒܝܬܝܐ ܐܘܠܕܘ. ܘܐܝܟ ܕܒܚܪܒܐ ܚܪܝܦܬܐ ܠܤܪ̈ܡܐ ܪ̈ܫܝܐ ܡ̣ܢ ܛܟܤܐ ܕܤܝܡܗܘܢ ܐܪܚ̣ܩ. ܡܢ̣ܘ ܟܝ ܗ̇ܘ ܕܠܕܪܬܗ ܕܚܤܝܢܐ ܥ̣ܠ. ܘܟܕ ܡܤܪܩ ܡ̣ܢ ܙܝܢܗ ܐܫܟܚܗ. ܘܠܩܢܝܢܗ ܚܛ̣ܦ. ܘܕܝܬܝܪ ܦܫܝܩܐܝܬ ܐ̣ܡܪ. ܡܢ̣ܘ ܟܝ ܗ̇ܘ ܕܠܒܚ̈ܐ ܚܒܝ̈ܒܐ ܕܐܒܪܗܡ ܟܐܢܐܘ ܘܝܪ̈ܬܐ ܛܒ̈ܐ ܕܕܕܝܫܘܥ ܙܕܝܩܐ ܘܬܘܠܡܕܐ ܢܟܦܐ ܕܒܒܝ ܢܨܝܚܐ. ܗ̇ܢܘܢ ܕܚܕ ܗܘ̣ܐ ܠܗܘܢ ܘܕܓܘܐ ܟܠ ܡܕܡ ܗܝܡܢܘܬܐ ܘܕܘܒܪܐ: ܘܢܦܫܐ ܘܡܠܬܐ ܘܟܠ ܥܢ̈ܕܐ ܛܒ̈ܐ: ܝܘܡܢ ܐܠܨ ܕܘܝܐܝܬ ܕܚܫܩܒܘܠ ܡ̣ܢ ܚܕܕ̈ܐ ܢܚ̣ܫܘܢ ܐܠܐ ܓܠܝܐ ܗܝ̣ ܕܓܒܪܐ ܒܥܠܕܒܒܐ ܥܒܲܕ ܗܕܐ ܗܢ̇ܘ ܕܝܢ ܕܝܘܐ ܒܝܫܐ ܘܤܢܐܐ ܕܒܢܝ̈ܢܫܐ. ܗܘ̇ ܕܡ̣ܢ ܩܕܝܡ ܒܦܪܕܝܤܐ ܙܪܥܐ ܕܠܐ ܡܫܬܡܥܥܘܬܐ ܐܪܡܝ: ܘܒܬܪܟܢ ܒܦܩܥܬܐ ܩܛܘܠܐ ܚܕܬܐ ܚܘܝ. ܘܒܟܠ ܕܪ ܒܡܫܡܫ̈ܢܐ ܒܝܫ̈ܐ ܚܘܒ̈ܠܐ ܒܝܫ̈ܐ ܥܠ ܟܝܢܢ ܐܪܡܝ. ܐܝܟ ܕܐܦ ܗܫܐ ܠܘ ܒܨܝܪ ܐܝܬ ܡܬܪܘܪܒ: ܟܕ ܒܝܢܬܟܘܢ ܐܝܟ ܕܒܫܝܢܐ ܕܪܚܝܡ ܥܠ ܐܠܗܐ ܢܦ̣ܠ: ܘܤܲܕܩ ܐܘܝܘܬܟܘܢ ܒܤܝܦܐ ܕܨܡܬܗ. ܘܡܫܬܩ̇ܠ ܛܟ ܥܠ ܫܪܪܟܘܢ ܒܙܟܘܬܐ ܕܡ̣ܢ ܫܠܝ. ܙܐ̇ܥ ܐܢܐ ܗܝܟܠ ܐܘ ܓܒܪ̈ܐ ܚܤܝ̈ܐ: ܕܒܐܝܙܠܐ ܐܝܟ ܕܒܪܘܬܢ ܐܩ̇ܘܡ܆ ܘܐܚ̇ܙܐ ܠܐܚ̈ܐ ܢܟ̈ܦܐ ܟܕ ܢܟܼܠܐ ܡܬܚܫܒܝܢ ܥܠ ܗܘ̇ ܕܪܚܝܡ ܗܘ̣ܐ ܠܝܤܪܝܠ: ܘܡ̣ܢ ܟܘܪܚܐ ܐܝܟ ܕܡ̣ܢ ܓܘܒܐ ܡܕܠܝܢ. ܘܠܪܘܚܩܐ ܐܝܟ ܕܠܡܨܪܝܢ ܒܚܪܡܐ ܥܘ̇ܠܐ ܡܫ̇ܕܪܝܢ. ܘܐܫܬܘܦ ܕܝܢ ܠܗ ܒܠܚܘܕܘܗܝ. ܐܠܐ ܘܠܗ̇ܘ ܕܐܝܟ ܪܘܒܝܒ ܐܬܪܚ̇ܡ. ܘܠܗ̇ܘ ܕܐܝܟ ܝܗܘܕܐ ܐܨܛܢܥ. ܥܠ ܗܠܝܢ ܐܬܬܒܼܪ ܠܒܝ. pb. 24 ܘܨܘܪ̈ܢܐ ܐܙܝܥܘܗܝ. ܝܬܝܪܐܝܬ ܥܠ ܕܥܕܟܝܠ ܒܬܘܤܦܬܐ ܐܝܬܝܗ̇ ܤܢܐܬܐ. ܘܗ̣ܝ ܒܝܫܬܐ ܗܢܝܐܐ ܗ̣ܝ ܘܕܠܐ ܪܓܫܬܐ ܡܩ̇ܘܝܢ ܒܢ̈ܝ ܝܥܩܘܒ ܒܚܫܐ ܕܚܕܝܒ̈ܝܗܘܢ. ܘܠܐ ܩ̇ܕܡܝܢ ܚ̇ܙܝܢ ܠܡܬܓܠܝܢܘܬܐ ܕܒܡܨܪܝܢ ܩܕܡ ܝܘܡܐ ܕܒܗܬܬܐ: ܗܘ̇ ܕܠܝܬ ܠܡܥܪܩ ܡܢܗ. ܕܥܘ ܗܟܝܠ ܐܘ ܓܒܪ̈ܐ ܐܚ̈ܐ: ܕܝܬܝܪ ܡ̣ܢ ܗܠܝܢ ܝܫܟܝܪ ܠܦܪ̈ܘܫܐ ܦܘܪܤܝܐ ܕܡܦܘܠܬܟܘܢ. ܘܪ̈ܚܡܐ ܡ̇ܢ ܡܬܬܚܝܢ. ܒܥܠܒ̈ܒܐ ܕܝܢ ܡܓܚܟܝܢ. ܘܠܝ ܝܬܝܪ ܡ̣ܢ ܟܠܢܫ ܡܫ̇ܢܩ ܝܬܝܪܐܝܬ: ܤܘܟܝܐ ܕܒܝܫܬܐ ܕܥܠܝܕܐ. ܗ̇ܝ ܕܠܟܘܢ ܘܐܝܟ ܕܤ̇ܒܪ ܗܘ̇ܝܬ: ܩܢܐ ܗܘ̇ܝܬ ܩܝ̈ܘܡܐ ܕܬܘܟܠܢܐ ܒܐܓܘܢܐ ܕܠܩܘܒܠܗ̇. ܘܗܫܐ ܦܘܫܟ ܐܝܕ̈ܝܐ. ܘܪܥܠܐ ܕܚܘܫ̈ܒܐ ܡܚ̈ܝܠܐ. ܘܡܢ̣ܘ ܡܟܝܠ ܢܫܐܠ ܚܘܠܡܢܐ ܡ̣ܢ ܟܪ̈ܝܗܐ. ܘܡܢ̣ܘ ܕܝܢ ܡ̣ܢ ܡܚܝ̈ܠܐ ܢܫ̣ܐܠ ܚܝܠܐ. ܘܡܢ̣ܘ ܬܘܒ ܡ̣ܢ ܦܠܝ̈ܓܐ ܢܫ̣ܐ̇ܠ ܐܘܝܘܬܐ. ܐܘ ܡܢ̣ܘ ܕܠܐ ܝܘܚܠ ܒܤܒܪܗ: ܐܡܠܝ ܕܠܡܕܒܪ̈ܝܐ ܕܩܪܒܐ ܢܚܙܐ ܟܕ ܡܬܬܕܝܫܝܢ ܕܘܝܐܝܬ ܡ̣ܢ ܚܕ̈ܕܐ. ܘܐܫܬܘܦ ܕܝܢ ܟܕ ܦܪܨܘܦܐ ܕܡ̇ܝܐ ܠܥܠܬܐ ܕܫܓܘܫܝܐ ܢ̇ܤܒܝܢ. ܟܒܪ ܕܝܢ ܦܫܝܩܐ ܗ̇ܘܬ ܒܝܫܬܐ. ܐܠܐ ܡܤܝܐܝܬ ܘܐܝܟ ܕܒܚܫܘܟܐ ܠܫܘܦܪܐ ܕܚܕ̈ܕܐ ܡܙ̇ܛܡܝܢ. ܕܠܡܐ ܠܘ ܗ̣ܝ ܟܕ ܗ̣ܝ ܗܝܡܢܘܬܐ ܠܗ̇ܘ ܕܐܬܪܕܦ ܐܝܟ ܕܐܦ ܠܟܘܢ܆ ܟܒܪ ܕܝܢ ܐܦ ܡܝܬܪܐܝܬ: ܠܡܐ ܠܘ ܗ̣ܘ ܟܕ ܗ̣ܘ ܚܘܒܐ ܠܗ̇ܘ ܕܐܬܪܕܦ: ܟܒܪ ܕܝܢ ܐܦ ܡܝܬܪܐܝܬ. ܠܡܐ ܠܐ ܗ̣ܘ ܟܕ ܗ̣ܘ ܛܢܢܐ ܠܗ̇ܘ ܕܐܬܪܕܦ: ܟܒܪ ܕܝܢ ܐܦ ܡܝܬܪܐܝܬ. ܠܡܐ ܠܘ ܗ̣ܢܘܢ ܟܕ ܗ̣ܢܘܢ ܐܓܘ̈ܢܐ ܕܚܠܦ ܗܝܡܢܘܬܐ ܠܗ̇ܘ ܕܐܬܪܕܦ܆ ܟܒܪ ܕܝܢ ܐܦ ܡܝܬܪܐܝܬ. ܠܡܐ ܠܘ ܗ̣ܘ ܟܕ ܗ̣ܘ ܚܝܠܐ ܕܡܠܬܐ ܘܕܘܪܫܐ ܒܦܝ̈ܤܐ ܕܚܠܦ ܩܘܫܬܐ: ܠܘܩܒܠ ܐܝܠܝܢ ܕܐܠܨܘܟܘܢ ܒܙܒܢ ܠܡܦܠ ܡ̣ܢ ܫܪܪܐ: ܟܒܪ ܕܝܢ ܐܦ ܡܝܬܪܐܝܬ. ܘܐܝܟܢ ܡ̇ܪܝܢ ܠܠܝܝܐ ܢܗܘܐ ܬܟܬܘܫܟܘܢ: ܟܡܐ ܕܠܥܠܬܐ ܕܤܕܩܐ ܠܐ ܩܢܝܬܘܢ ܓܠܝܐܝܬ ܒܤܕܩܐ ܕܐܪܡܝܬܘܢ. ܐܠܐ ܟܒܪ pb. 25 ܬܐܡܪܘܢ ܕܡ̣ܢ ܪ̈ܫܢܐ ܕܥܕܬܐ ܐܬܕܚܩ܆ ܘܥܠ ܗܕܐ ܐܦ ܚܢܢ ܢܟܪܝܗܝ. ܐܠܐ ܘܙ̇ܕܩ ܗܘ̣ܐ ܠܟܘܢ ܠܡܥܩܒܘ ܥܠ ܥܠܡܐ. ܚܫ̈ܝ ܓܝܪ ܥܡ ܚܕ̈ܕܐ ܐܝܬܝܟܘܢ ܗ̣ܘܝܬܘܢ ܥܕܡܐ ܠܗܫܐ. ܘܐܝܟ ܗܕ̈ܡܐ ܛܟܤܐ ܕܐܘܝܘܬܐ ܙ̇ܕܡ ܗܘ̣ܐ ܠܟܘܢ ܠܡ̣ܛܪ. ܡܫܟܚܢ ܗܘ̣ܝܬܘܢ ܓܝܪ ܐܠܘ ܨܒ̇ܝܢ ܐܢܬܘܢ ܕܠܡܝܛܪܦܘܠܝܛܣ ܘܠܦܛܪܝܪܟܝܣ ܚܝܠܐ ܕܚܘܒܟܘܢ ܬܚܘܘܢ ܒܦܝܤܐ ܡܫܝܢܐ. ܘܐܠܘ ܐ̇ܠܨܐ ܗ̇ܘܬ ܒܬܝܒܘܬܐ ܥܡ ܐܚܝ̈ܟܘܢ. ܒܟܠ ܐܝ̇ܕܐ ܕܠܡܕܒܪ̈ܢܐ ܕܥܕܬܐ ܡܤܬܒ̇ܪܐ ܗ̇ܘܬ ܕܚ̇ܫܚܐ܆ ܡܛܝ̈ܒܐ ܚܦܝ̈ܛܐ ܙ̇ܕܩ ܠܟܘܢ ܠܡܫܬܟܚܘ ܚܠܦ ܗ̇ܘ ܕܐܫܬܪܝ. ܘܝܬܝܪ ܐܝܬ ܟܕ ܒܗ̇ ܟܕ ܒܗ̇ ܒܥܠܬܐ ܕܪܫܝܢܐ ܐܦ ܐܢܬܘܢ ܚܒܝܫܝܢ ܐܢܬܘܢ. ܗܫܐ ܕܝܢ ܠܘ ܒܠܚܘܕ ܠܐ ܠܤܠܝܡ ܠܐ ܐܤܬܪܗܒܬܘܢ ܠܡܪܤܛ܆ ܐܝܟ ܕܠܡܬܬ ܓܪܘ ܠܟܘܢ ܫܠܡܐ ܡ̣ܢ ܦܛܪܝܪܟܝܣ܆ ܐܠܐ ܐܦܠܐ ܠܡܝܛܪܦܘܠܝܛܣ ܒܦܝܤ̈ܐ ܕܡܛܠܬܗ ܐܠܐܝܬܘܢ. ܤܥ̣ܪܬܘܢ ܕܝܢ ܐܝܕܐ ܕܠܝܨܪܐ ܡܪܝܪܐ ܢܝ̇ܟܐ ܡܓܢ ܠܚܡܐ. ܘܟܪ ܗ̇ܘ ܒܥܠܬܐ ܐܚܪܬܐ ܡܫܬܪܐ ܗܘ̣ܐ ܡ̣ܢ ܡܕܒܪ̈ܢܐ ܕܥܕܬܐ܆ ܐܢܬܘܢ ܐܘܤܦܬܘܢ ܩܘܛܪ̈ܓܐ ܐܚܪ̈ܢܐ ܕܥܘ̣ܠܐ ܠܡܪܡܝܘ ܚܲܠܐ ܥܠ ܝܬܪ̈ܐ. ܠܐ ܝ̇ܕܥܝܢ ܐܢܬܘܢ ܕܢܪܝܪܐܝܬ ܬܗܘܘܢ ܒܐܚܪܝܬܐ. ܐܦܢ ܠܐ ܗܫܐ ܐܠܐ ܒܝܘܡܐ ܕܬܒܥܬܐ. ܡܛܠ ܗܢܐ ܐܬܬܥܝܪܘ ܐܘ̇ ܓܒܪ̈ܐ ܚܤܝ̈ܐ. ܘܐܬܒܩܘ ܕܥܠ ܦܘܡ ܩܘܢܝܢܘܣ ܩܝܡܝܢܢ. ܘܐܝܟ ܡܝ̈ܐ ܚܢܢ ܕܡܬܫ̇ܪܝܢ ܒܐܪܥܐ ܘܠܐ ܡܬܟܢܫܝܢ. ܠܝܬ ܓܝܪ ܡܕܡ ܒܟܠܗܘܢ ܦܪܘܪ̈ܤܐ ܤܛ̈ܢܝܐ: ܕܠܘ ܬܚܝܬ ܚܝܠܟܘܢ ܐܝܬܘܗܝ ܐܢ ܬܨܒܘܢ ܠܡܙܟܐ. ܘܐܦ ܠܐ ܐܝܬ ܡܬܥܒܪܢܘܬܐ ܕܠܝܬ ܠܗ̇ ܬܘܪܨܐ܆ ܐܢ ܬܨܒܘܢ ܠܡܐܨܦ. ܘܐܦܠܐ ܐܝܬ ܟܫܠܐ ܕܠܐ ܡܫܬܥܒܕ ܠܦܝܤܐ: ܐܢ ܬܪܚܡܘܢ ܠܫܝܢܐ. ܐܫܬܿܝܢܘ ܡ̇ܕܝܢ ܥܡ ܚܕ̈ܕܐ ܘܥܩܒܘ ܥܠ ܥܠܬܐ ܕܫܓܘܫܝܐ. ܘܚܙܘ ܐܢ ܡ̣ܢ pb. 26 ܡܥܒܕܢܘܬܐ ܗ̣ܝ ܕܛܘܥܝܝ: ܘܐܢ ܡ̣ܢ ܢܨܪܐ ܐܢܫܝܐ. ܡܫܟܚܝܢ ܐܢܬܘܢ ܓܝܪ ܟܕ ܝܫܦܪܝܪ ܬܬܪܥܘܢ: ܠܡܕܥ ܐܪܐ ܐܝܬܝܗ̇ ܗ̇ܝ ܕܫ̇ܦܪܐ ܐܠܗܐ. ܘܠܗ̇ ܥܒܼܕܘ ܘܚܝܘ. ܘܐܬܬܢܝܩܘ ܡ̣ܢ ܚܡܬܐ ܘܐܬܬܢܝܚܘ ܡ̣ܢ ܪܘܓܙܐ. ܘܠܐ ܬܤܤܡܘܢ ܠܡܥܒܕ ܒܝܫܬܐ. ܡܛܠ ܕܒܝ̈ܫܐ ܤ̇ܝܦܝܢ. ܘܐܝܠܝܢ ܕܡܤ̇ܒܪܝܢ ܒܡܪܝܐ ܝ̇ܪܬܝܢ ܐܪܥܐ. ܕܥܘ ܕܝܢ ܝܬܝܪ ܐܝܬ ܕܐܡܬܝ ܕܕܝܘܬܐ ܕܚܡܬܐ ܥܠ ܡܕܥܐ ܢܫܬܠܛ܆ ܩܕܡܝܬ ܡ̣ܢ ܟܠܗܝܢ ܡܝܬܪ݁ܬܐ ܡܤܪܩ ܠܗ ܠܒܪܢܫܐ܆ ܘܗܝܕܝܢ ܡܫܟܚ ܕܠܟܢܬܗ ܒܙܥܘܪ̈ܝܬܐ ܢܤܓܦ. ܘܠܐ ܡܫܟܚ ܠܡܦܪܫ ܦܐܝܘܬܐ ܡ̣ܢ ܫܟܝܪܘܬܐ: ܘܝܘܬܪܢܐ ܡ̣ܢ ܚܘܤܪܢܐ. ܐܠܐ ܟܠ ܠܡܒܐܫܘ ܒܠܚܘܕ ܡܤܬܪܤܒ ܐܝܟ ܝܫ̇ܢܝܐ. ܐܙܕܗܪܘ ܗܟܝܠ ܐܘ ܓܒܪ̈ܐ ܐܚ̈ܐ. ܕܕܠܡܐ ܒܒܝܫܬܐ ܕܐܝܟ ܗܕܐ ܬܫܬܟܚܘܢ ܐܤܝܪ̈ܐ. ܝܫܡ̇ܥܬܼ ܓܝܪ ܕܐܦ ܤܥ̣ܪܬܘܢ ܡ̣ܢ ܟܕܘ. ܐܝ̇ܕܐ ܕܠܓܥܬܐ ܕܬܒܪܐ ܡܙܝܥܐ ܠܦܪ̈ܘܫܐ. ܒܟܬܒܐ ܓܝܪ ܕܥܘ̣ܠܐ ܐܝܟ ܕܐܡ̇ܪܝܢ ܫܪܪܬܘܢ ܦܤܩܐ ܕܐܚܝ̈ܟܘܢ. ܐܘ̇ܗ̇ ܐܘ̇ܗ̇ ܠܥܘ̣ܠܐ ܥܫܝܢܐ. ܐܘ̇ܗ̇ ܠܛܪܘܢܘܬܐ ܒܪܒܪܝܬܐ. ܐܘ̇ܗ̇ ܠܚܪܡܢܘܬܐ ܕܕܠܐ ܢܡܘܣ. ܡܢ̣ܘ ܟܝ ܕܠܥܘ̣ܠܐ ܗܘ̇ ܐܨܚ. ܐܨܚ ܟܝ ܡ̣ܢ ܩܕܡ ܗܢܐ: ܡܕܡ ܐܚܪܝܢ ܕܠܬܫܒܘܚܬܐ ܕܐܠܗܐ ܚ̇ܫܚ. ܐܙܥ ܟܝ ܚܘܫܒܘ̈ܗܝ ܒܪܢܝܐ ܕܠܘܩܒܠ ܗܪ̈ܤܝܣ ܕܡܬܟܬ̈ܫܢ ܠܘܩܒܠ ܫܪܪܐ. ܙܥܙܥ ܟܝ ܠܩܝ̈ܡܐ ܒܢ̈ܫܐ ܕܡܚܒ̈ܠܢܐ ܕܕܘܒܪ̈ܐ ܡܝܬܪ̈ܐ. ܐܟܝܣ ܟܝ ܒܟܬܒܐ ܘܒܡܠܬܐ ܠܐܝܠܝܢ ܕܒܐܤܟܝ̈ܡܐ ܡܫܚ̈ܠܦܐ ܛܘܥܝܝ ܕܤܪܝܩܘܬܐ ܡܨܛܝܥܝܢ ܠܡܥܠܘ ܠܥܕܬܗ ܕܐܠܗܐ. ܐܘ ܕܠܡܐ ܟܝ ܗܕܐ ܗ̣ܝ ܒܠܚܘܕ ܪܕܝܘܬܗ ܩܕܡܝܬܐ ܘܐܚܪܝܬܐ. ܕܒܐܚܘ̈ܗܝ ܘܒܒܢ̈ܝ ܐܡܗ ܢܬܠ ܬܚܘܝܬܐ ܚܪܡܬܐ ܕܛܢܢܗ. ܗ̇ܢܘܢ ܕܬܫܒܘܚܬܐ ܕܫܪܪܗܘܢ ܐܦ ܦܘ̈ܡܐ ܕܒܥܠܕܒ̈ܒܐ ܡܬܥܨܝܢ ܠܡܟܪܙܘ. ܐܢ ܗܟܝܠ ܟܠܟܘܢ ܐܝܬܝܟܘܢ ܐܘ̇ ܓܒܪ̈ܐ ܡܪ̈ܚܡܢܐ ܐܝܠܝܢ ܕܠܥܘ̣ܠܐ ܗܢܐ ܐܫܬܘܝܬܘܢ ܠܡܤ̣ܥܪ. pb. 27 ܛܝܒܘ ܕܡܘܗܒܬܐ ܐܠܗܐ܆ ܕܠܐ ܐܫܠܛܟܘܢ ܒܥܕܬܗ ܥܠ ܬܡܝ̈ܡܐ ܕܥܢ̈ܐ. ܘܐܠܐ ܕܠܝܠܐܝܬ ܡܤ̇ܓܦܝܢ ܗ̣ܘܝܬܘܢ ܠܐܝܠܝܢ ܕܥܠ ܬܘܪܨܐ ܤܢܝܩܝܢ: ܡܐ ܕܗܕܐ ܗ̣ܝ ܡܓܪܬ ܪܘܚܐ ܕܒܤܝܡܘܬܟܘܢ ܒܬܘܪܨܐ ܕܐܚܝ̈ܟܘܢ. ܘܐܢܕܝܢ ܚܕ ܗ̣ܘ ܗ̇ܘ ܕܐܨܚ. ܘܐܢܬܘܢ ܟܠܟܘܢ ܐܬܛܦܝܣܬܘܢ ܠܡܫܠܡ܆ ܬܚܝܬ ܤܒܪܐ ܒܝܫܐ ܐܝܬܘܗܝ ܠܢ ܤܘܥܪܢܐ ܕܐܦ ܒܐܚܪ̈ܢܝܬܐ ܪܘܪܒܐܝܬ ܥܬܝܕ ܕܢܤܓܦܟܘܢ ܒܫܠܡܘܬܐ ܕܟܠ ܒܝ̈ܫܢ ܘܩܕܡ ܗܠܝܢ ܐܚܪ̈ܢܝܬܐ. ܒܒܤܬܬܐ ܡܚܤܕܬܐ ܕܡ̣ܢ ܒܒܝ ܒܪ ܝܘܝܢ ܗ̇ܝ ܕܐܘ ܚ̣ܫܬܘܢ ܡ̣ܢ ܟܕܘ. ܐܘ ܩܠܝܠܐܝܬ ܥܬܝܕܝܢ ܐܢܬܘܢ ܠܡܚ̣ܫ: ܐܝܟ ܕܤ̇ܒܪ ܐܢܐ. ܗ̣ܘ ܕܝܢ ܗܢܐ ܟܕ ܪܘܪܒܐܝܬ ܒܠܒ̣ܠ ܥܕܡܐ ܠܗܫܐ ܐܘܪ̈ܚܬܗ ܕܡܪܝܐ ܐܦ ܐܘܪ̈ܚܬܟܘܢ ܕܝܠܟܘܢ. ܐܠܐ ܥܬܝܕ ܗ̣ܘ ܗܫܐ ܐܝܟ ܕܡ̣ܢ ܚܦܝܛܘܬܐ ܕܛܢܢܟܘܢ ܕܝܬܝܪ ܬܩܝܦܐܝܬ ܢܒܙܚ ܐܦ ܒܩܕܝ̈ܫܐ ܐܝܠܝܢ ܕܕܡ̣ܟܘ ܒܡܫܝܚܐ. ܗ̇ܢܘܢ ܕܥܠܝܟܘܢ ܐܝܟ ܕܥܠ ܝܪ̈ܬܐ ܟܫܝܪ̈ܐ ܐܪܦܝܘ ܡܪ̈ܗܛܐ ܕܡܝܬܪܘܬܗܘܢ. ܘܗܐ ܥܬܝܕܝܢ ܠܡܚ̣ܫ ܗܫܐ ܡܢܟܘܢ ܒܝܫܐܝܬ ܐܝܟ ܠܒܗ̈ܐ ܚܪ̈ܡܐ. ܥܠ ܕܠܐ ܤ̣ܦܩܘ ܟܐܡܬ ܠܡܕܪܟܘ ܐܟܘܬܟܘܢ ܚܟܡܬܐ ܡܝܬܪܬܐ. ܗ̇ܝ ܕܡܢܟܘܢ ܐܬܕܪܟܬ̤. ܘܡܛܠ ܗܢܐ ܛܘܒ̈ܢܐ ܐܢܘܢ ܒܫܪܪܐ ܘܐܦ ܕܘܝ̈ܐ. ܛܘܒܢ̈ܐ ܡ̇ܢ. ܥܠ ܕܒܟܠܗ ܫܘܒܚܐ ܕܡܝܬܪܘܬܐ ܐܬܓܡܪܘ ܒܐܓܘ̈ܢܐ ܕܙܕܝܩܘܬܐ ܘܫܢܝ̣ܘ ܠܘܬ ܡܪܢ. ܕܘܝ̈ܐ ܕܝܢ. ܥܠ ܕܠܒܢ̈ܝܐ ܕܐܝܟ ܗܠܝܢ ܐܪܦܝܼܘ ܝܪ̈ܘܬܐ ܠܥܘܡܪ̈ܝܗܘܢ. ܗܠܝܢ ܡ̇ܢ ܐܬܥܨܝܼܬ ܠܡܐܡܪ: ܡ̣ܢ ܚܫܐ ܡܟܐܒܢܐ ܕܥ̣ܪܨ ܥܠܝ ܒܫܡܥܐ ܕܐܝܠܝܢ ܕܤܥܪܬܘܢ. ܠܐ ܕܝܢ ܤ̇ܒܪ ܐܢܐ ܕܡ̇ܨܝܐ ܗ̣ܝ ܕܬܗܘܐ ܗܕܐ: ܕܠܟܠܗ ܟܢܫܐ ܕܐܚܘܬܟܘܢ ܬܙܟܐ ܒܝܫܬܐ ܗܕܐ ܐܝܟ ܕܠܚܠܵܫܐ: ܘܠܐ ܢܫܬܟܚܘܢ ܒܟܘܢ ܐܦܢ ܕܠܝ̈ܠܐ ܪ̈ܚܡܝ ܫܝܢܐ ܥܡ ܫܪܪܐ: ܘܡܠܘ̈ܟܐ ܕܫܦܝܪ̈ܬܐ. ܘܐܢ ܚܣ ܘܥܠ ܟܠܟܘܢ. pb. 28 ܝܫܠܛܬ̤ ܒܝܫܬܐ ܗܕܐ ܐܝܟ ܝܫܢܬܐ ܥܠ ܛܒ̈ܝܥܐ܆ ܫܡ̣ܥܘ ܡܢܝ ܒ̇ܥܐ ܐܢܐ ܡܢܟܘܢ܆ ܩܠܐ ܒܠܚܘܕ ܡܥܝܪܢܐ ܕܕܡܟܘܬܟܘܢ. ܘܐܬܬܥܝܪܘ ܗܟܝܠ ܐܬܬܥܝܪܘ ܐܘ ܓܒܪ̈ܐ ܐܚ̈ܐ. ܐܬܬܥܝܪܘ ܚܦܝܛܐܝܬ ܐܝܟ ܕܒܝܘ̈ܡܬܐ ܕܩܡ̈ܝܐ. ܘܠܒܼܫܘ ܥܘܫܢܐ ܕܕܪܥܗ ܕܡܪܝܐ. ܘܠܐ ܬܘܒܕܘܢ ܓܠܝܘܬ ܐܦ̈ܐ ܕܐܝܬ ܠܟܘܢ: ܕܢܛܝܪ ܠܗ̇ ܐܓܪܐ ܤܓܝܐܐ. ܐܢܕܟܪܘ ܗܟܝܠ ܠܝܘ̈ܡܬܐ ܩܕ̈ܡܝܐ: ܗ̇ܢܘܢ ܕܒܗܘܢ ܐܓܘܢܐ ܪܒܐ ܤܝܒܪܬܘܢ ܒܚܫ̈ܐ ܕܚܠܦ ܩܘܫܬܐ. ܒܚܤܕܐ ܘܒܐܘܠܵܨܢܐ. ܘܕܗܘ̤ܝܬܘܢ ܚܙ̈ܘܢܐ. ܘܕܐܦ ܐܫܬܘܬܦܬܘܢ ܠܐܢܫܐ ܕܗܠܝܢ ܤܝܒܪܘ. ܘܫܘܥܠܝܐ ܕܚܝܠܵܬܢܐ ܒܚܕܘܬܐ ܤ̣ܝܒܪܬܘܢ. ܡܛܠ ܕܝܕܥܝܢ ܐܢܬܘܢ ܕܐܝܬ ܠܟܘܢ ܐܓܪܐ ܒܫܡܝܐ ܕܡܝܬܪ ܘܠܐ ܥ̇ܒܪ. ܠܗܕܐ ܤܟܝܠ ܟܠܗ̇ ܬܫܠܒܘܚܬܐ ܕܡܝܬܪܘܬܐ ܡܬܦܪܣ ܠܡܚܠܨܘ ܡ̣ܢܟܘܢ ܤܛܢܐ ܒܥܠܕܒܒܐ ܕܓܘܐ. ܗ̇ܝ ܕܟܕ ܤܓܝ ܐܨܛܢ̣ܥ ܝܘܓܪܐ ܕܫܢܝ̈ܐ: ܠܐ ܐܫܟܚ ܕܒܐܝܕ̈ܝܐ ܢܘܟܪ̈ܝܬܐ ܢܤܓܦܟܘܢ ܐܝܟ ܡܐ ܕܨܒܐ. ܘܗܐ ܠܤܓܝ̈ܐܐ ܐܙܥ ܥܠܝܟܘܢ ܒܟܠܙܒܢ. ܐܝܠܝܢ ܕܥܫܝܢܝܢ ܗܘ̣ܘ ܒܚܝܠܐ ܘܡ̇ܨܠܚܝܢ ܗܘ̣ܘ ܒܥܠܡܐ. ܘܒܛܠܘ ܐܢܘܢ ܐܟܡܐ ܕܒܛܠܘ. ܘܐܢܬܘܢ ܐܝܟ ܕܐܝܬܝܟܘܢ ܩܘܝ̣ܬܘܢ ܒܬܫܒܘܚܬܐ ܝܬܝܪܬܐ ܕܥܕܡܐ ܠܗܫܐ. ܐܦܠܐ ܕܝܢ ܒܢܟܘܢ ܕܝܠܟܘܢ ܐܬܡܨܝܼ ܗܘ̇ ܤܢܐܐ ܕܢܝ̈ܢܫܐ ܠܡܩܡܘ ܠܗ ܡܫܡܫܢܐ ܕܚ̇ܫܚ ܠܨܒܝܢܗ. ܥܕܡܐ ܕܠܪܘܚܩܐ ܡܢܟܘܢ ܝܫܢܝ. ܘܕܝܘܐ ܓܪܒܚܐ ܐܫܢܟܚ ܠܗ ܕܡܫܬܡܗ ܐܝܤܚܩ. ܘܕܠܚܗ ܒܥܛܪܐ ܕܒܝܫܘܬܗ ܘܚܠܛܗ ܒܟܢܫܟܘܢ ܡܫܝܢܐ: ܠܐܒܕܢܐ ܕܩܢܘܡܗ ܘܠܒܝܫܬܐ ܕܝܠܟܘܢ. ܘܒܗܢܐ ܐܝܟ ܕܒܡܫܡܫܢܐ ܚܦܝܛܐ: ܫܘܡܠܝܐ ܕܪܓܬܗ ܤܦܩܐܝܬ ܐܫܟܚ. ܘܡܤܟܐ ܠܡܫܚܘ ܤܛܢܐ ܒܥܠܕܒܒܗ ܕܓܢܤܢ. ܠܐ ܗܟܝܠ ܢܬܠ ܡܪܝܐ ܪܓܬܗ ܠܥܘ̇ܠܐ ܒܐܝܕ̈ܝܟܘܢ ܐܘ ܓܒܪ̈ܐ ܚܤܝ̈ܐ. ܘܬܪܥܝܬܗ ܠܐ ܬܤܩ ܠܪܫ. ܐܠܐ ܢܟܤܝܘܗܝ ܥܘ̣ܠܐ ܕܤܦܘ̈ܬܗ܆ ܕܒܓܘܡܪ̈ܐ pb. 29 ܕܚܛܝܬܗ ܢܐܩܕ. ܐܢܬܘܢ ܓܝܪ ܐܬܢ̇ܦܨܘ ܡ̣ܢ ܥܦܪܐ ܕܤܢܐܬܐ. ܘܐܬܕܟܘ ܡ̣ܢ ܚ̣ܠܐ ܕܒܥܠܕܒܒܘܬܐ. ܘܐܬܬܥܝܪܘ ܡ̣ܢ ܝܫܝܬܐ ܕܡܗܡܝܢܘܬܐ. ܘܐܝܟ ܒܢ̈ܝ ܢܘܤܪܐ ܗܟܝܠ ܗܟܢܐ ܗܠܟܘ. ܘܚܡܤܢܘ ܒܫܪܪܗ ܕܐܠܗܐ ܕܚܡܤܢ ܒܟܘܢ ܐܠܗܐ. ܘܛܪܘ ܓܘܥܠܢܐ ܕܐܒܗ̈ܝܟܘܢ ܙܗܝܪܐܝܬ. ܕܬܗܘܘܢ ܒܢ̈ܝ ܝܪܬܘܬܐ ܕܩܕܝܫܘܬܗܘܢ. ܘܠܐ ܬܒܗܬܘܢ ܡܢܗܘܢ ܒܝܘܡܐ ܕܒܘܚܪܢܐ. ܘܦܘܩܘ ܒܬܪ ܐܚܝ̈ܟܘܢ ܘܟܢܫܘ ܐܢܘܢ. ܘܐܢ ܐܠܨܐ ܠܡܚ̣ܫ ܚܠܦܝܗܘܢ ܢܐ ܬܬܟܟܠܘܢ ܥܕܡܐ ܕܬܥܒܕܘܢ ܐܢܘܢ ܠܟܘܢ ܒܢ̈ܝ ܡܥܡܪܐ. ܘܫܘ̈ܬܦܐ ܕܚܘܒܐ. ܥܬܝܕ ܗܘ̣ ܓܝܪ ܙܒܢܐ ܒܝܫܐ ܕܢܩܘ̣ܡ ܥܠܝܢ ܡ̣ܢ ܒܬܪ ܩܠܝܠ ܗ̇ܘ ܕܒܗ ܥܠ ܡܥܕܪ̈ܢܐ ܤܓܝ̈ܐܐ ܡܤܬܢܩܝܢ ܐܢܬܘܢ: ܐܢܗ̣ܘ ܕܐܝܬܝܟܘܢ ܪ̈ܚܡܝ ܗܝܡܢܘܬܐ ܘܪ̈ܚܡܝ ܫܪܪܐ. ܘܐܢ ܠܘ ܒܚܕܐ ܠܟܠܗܝܢ ܡܝܬܪ̈ܬܐ ܐܘܒܕܬܘܢ. ܐܬܕܟܪܘ ܗܟܝܠ ܐܘ ܒܢ̈ܝ ܠܦܚܘܬܝ ܠܝ ܠܫܘܬܦܐ ܕܚܘܒܟܘܢ ܘܕܘܥܢܢܙ ܝܫܦܝܪ ܐܝܟ ܕܐܦ ܐܢܐ ܠܟܘܢ ܫܦܝܪ. ܘܦܢܘ ܠܝ ܒܟܬܒܐ ܫܪܪܐ ܕܪ̈ܥܝܢܝܟܘܢ ܒܟܠܤܝܢ ܐܝܠܝܢ ܕܟܬܿܒܬ ܠܟܘܢ. ܟܬܘܒܘ ܠܝ ܕܝܢ ܐܝܟ ܕܫܦܪ ܠܟܘܢ. ܐܢ ܟܠܟܘܢ ܐܟܚܕܐ ܘܐܢ ܚܕ ܚܕ ܠܚܘܕܐܝܬ. ܡܛܠ ܕܐܢܐ ܗܘ̇ ܐܝܬܝ ܠܟܘܢ ܥܕ ܗܫܐ܆ ܗܘ̇ ܕܐܦ ܡ̣ܢ ܩܕܝܡ ܐܝܬܝ ܗܘ̇ܝܬ. ܗܢ̇ܘ ܕܝܢ ܒܪܐ ܘܐܚܐ. ܘܡܤܟܢܐ ܡ̣ܢ ܟܠ ܦܪܘܣ ܝܫܘܬܦܐ ܕܤܘܥܪ̈ܚܟܘܢ ܘܕܡܠܝ̈ܟܘܢ܆ ܒܟܠܗܝܢ ܐܝܠܝܢ ܕܫܦܪ̈ܢ ܠܨܒܝܢܗ ܕܐܠܗܐ. ܘܡܦܪ̈ܩܢ ܡ̣ܢ ܥܘ̣ܠܐ ܠܟܠ ܕܩܪܐ ܠܫܡܗ ܕܡܪܝܐ. ܕܗ̣ܘ ܒܛܝܒܘܬܗ ܢܓܡܘܪܟܘܢ ܒܟܠ ܥ̣ܒ̇ܕ ܛܒ ܕܬܥܒܕܘܢ ܨܒܝܢܗ. ܗܘ̤ܘ ܫܪܝܪܝܢ ܒܡܪܢ܀