On the Mysteries - ܥܲܠ ܦܘܼܫܵܩ ܐ̄ܪ̈ܵܙܹܐ

1 :ܒܐ̄ܪ̈ܙܲܝ ܥܹܕܿܬܵܐ ܗܪܲܓܼܘ ܚܘܼܫܵܒܲܝ̈ ܐ̄ܪܵܙܵܢܵܐܝܼܬܼ 2 ܘܲܨܒܹ̇ܝܬܼ ܕܐܸܓܼܠܸܐ ܗܸܪܓܵܐ ܕܠܸܒܵܐ ܒܡܸܠܬܼܵܐ ܕܦܘܼܡ̇ܐ ܀ 3 :ܒܡܸܠܬܼܵܐ ܕܦܘܼܡܵܐ ܨܒܹ̇ܝܬܼ ܕܐܸܫܬܲܥܸܐ ܥܲܠ ܪܲܒܘܬܼܗܘܿܢ 4 ܘܲܒܼܦܸܬܼܓܼܵܡܹ̈ܐ ܐܹܨܘܼܪ ܨܲܠܡܵܐ ܕܲܫܒܼܝܼܚܘܼܬܗܘܿܢ ܀ 5 :ܒܲܫܒܼܝܼܚܘܼܬܼܗܘܿܢ ܐܲܨܸܕܼ ܡܲܕܥܝ ܩܲܛܝܼܢܵܐܝܼܬܼ 6 ܘܐܲܚ̣ܕܲܢܝ ܙܵܘܥܵܐ ܘܐܲܪܦܝܼ ܫܲܒܼܩ݂ܲܢܝ ܕܠܵܐ ܣܵܥܘܿܪܘܼ ܀ 7 :ܕܠܵܐ ܣܵܥܘܿܪܘܼ ܦܵܫܹ̇ܬܼ ܩܵܡܹ̇ܬܼ ܡ̣ܢ ܫܘܼܠܗܵܝܵܐ 8 ܘܫܲܪܝܼܬܼ ܕܐܸܩܥܸܐ ܚܲܫܝܼܫܵܐܝܼܬܼ ܥܲܡ ܒܲܪ ܐܵܡܘܿܨ ܀ 9 :ܥܲܡ ܒܲܪ ܐܵܡܘܿܨ ܚܸܗ̇ܒܹܿܬܼ ܘܵܝܵܐ ܠܲܩܢܘܿܡܝ ܛܲܡܐܵܐ 10 ܕܲܒܼܛܲܡܐܘܼܬܹܗ ܐܲܨܸܕ ܡܲܕܿܥܹܗ ܒܐ̄ܪ̈ܵܙܲܝ ܡ̇ܪܹܗ ܀ 11 :ܒܗܵܠܹܝܢ ܗܸܪܓܹܿܬܼ ܘܲܒܼܕܼܚܠܬܼܵܐ ܠܒܸܣܬܲܪܝ ܗܸܦܟܹܿܬܼ 12 ܘܪܘܼܚܵܐ ܒܪܸܡܙܹܗ ܠܲܒܼܢܝ ܕܐܸܥܘܿܠ ܠܲܩܕܼܘܿܫ ܩܘܼܕܼܫܹ̈ܐ ܀ 13 :ܠܲܩܕܼܘܿܫ ܩܘܼܕܫܹ̈ܐ ܕܐ̄ܪ̈ܵܙܹܐ ܫܒܼܝܼܚܹ̈ܐ ܝܲܗ̣̄ܒܼ ܠܝܼ ܕܐܸܥܘܿܠ 14 ܘܐܸܓܼܠܸܐ ܫܘܼܦܪܵܐ ܕܲܫܒܼܝܼܚܘܼܬܼܗܘܿܢ ܠܲܒܼܢܲܝ̈ ܐ̄ܪܵܙܵܐ ܀ 15 :ܬܵܘ ܟܹܝܬܼ ܡܸܟܹܿܝܠ ܐܘܿ ܒܲܪ ܐ̄ܪܵܙܵܐ ܐܲܠܵܗܵܝܵܐ 16 ܫܡܲܥ ܬܲܫܥܝܼܬܼܵܐ ܬܗܝܼܪܲܬܼ ܡܸܠܹ̈ܐ ܕܐ̄ܪ̈ܵܙܲܝ ܥܹܕܿܬܵܐ ܀ 17 ܐ̄ܪܵܙ ܠܝܼ ܐ̄ܪܵܙ ܠܝܼ ܐ̄ܪܵܙ ܠܝܼ ܘܲܠܕܼܝܼܠܝ ܢܒܼܝܼܵܐ ܩܵܥܹ̇ܐ: pb. 271 18 ܒܗܵܘܢܵܐ ܡܸܟܹܿܝܠ ܫܡܲܥܲܝܗܝ ܠܐ̄ܪܵܙܵܐ ܕܡܸܬܼܒܲܕܲܩ ܠܵܟ ܀ 19 :ܫܲܪܝܼܪܵܐܝܼܬܼ ܪܵܡ ܘܲܡܥܲܠܲܝ ܐ̄ܪܵܙܵܠ ܗܵܢܵܐ 20 ܕܓܼܵܡܲ݁ܪ ܟܵܗܢܵܐ ܒܓܼܵܘ ܒܹܝܬܼ ܩܘܼܕܫܵܐ ܐ̄ܪܵܙܵܢܵܐܝܼܬܼ ܀ 21 :ܐ̄ܪܵܙܵܢܵܐܝܼܬܼ ܨܵܝ̇ܪܵܐ ܥܹܕܿܬܵܐ ܐ̄ܪ̈ܙܹܐ ܫܒܼܝܼܚܹ̈ܐ 22 ܘܐܲܝܟ ܕܲܒܼܝܘܼܩܢܵܐ ܡܚܵܘܝܵ ܠܟܼܠܢܵܫ ܗܵܢܹ̇ܝܢ ܕܲܗ̤ܘܲܝ̈ ܀ 23 :ܗܵܢܹ̇ܝܢ ܕܲܗܘܲܝ̈ ܒܡܵܘܬܹܿܗ ܕܲܒܼܪܵܐ ܒܐ̄ܪ̈ܵܙܹܐ ܡܥܲܗܕܼܵܐ 24 ܘܐܵܦ ܠܲܩܝܵܡܬܹܿܗ ܕܡ̣ܢ ܒܹܝܬܼ ܡܝܼ̈ܬܹܐ ܠܥܹܝܢ ܟܠ ܓܵܠ̇ܝܵܐ ܀ 25 :ܐ̄ܪܵܙܵܐ ܘܪܲܙܸܙ ܗܵܘ̇ ܡ̇ܐ ܕܲܗܘ̤ܵܐ ܘܗܵܘ̇ ܡ̇ܐ ܕܗܵܘܹ̇ܐ 26 ܘܥܹܕܬܵܐ ܠܗܵܘ̇ ܡ̇ܐ ܕܲܗܘ̤ܵܐ ܡܪܲܙܙܵܐ ܒܐ̄ܪ̈ܵܙܹܝܗ̇ ܒܲܠܚܘܿܕܼ ܀ 27 :ܥܹܕܿܬܵܐ ܡܪܲܙܙܵܐ ܐ̄ܪ̈ܵܙܹܝܗ̇ ܒܣܸܬܼܪܵܐ ܡ̣ܢ ܒܲܪ̈ܵܝܹܐ 28 ܘܓܼܵܡܲ݁ܪ ܟܵܗܢܵܐ ܐ̄ܪܵܙܵܢܵܐܝܼܬܼ ܒܓܼܵܘ ܒܹܝܬܼ ܩܘܼܕܼܫܵܐ ܀ 29 :ܠܝܲܠܕܿܝܹ̈ܗ̇ ܥܡܝܼ̈ܕܹܐ ܪ̈ܫܝܼܡܹܐ ܡܒܲܣܡܵܐ ܒܲܠܚܘܿܕܼ 30 ܠܡܸܫܬܵܘܬܵܦܘܼ ܒ̄ܪ̈ܵܙܹܐ ܗܵܠܹܝܢ ܣܓܼܝܼ̈ܕܹܐ ܕܓܼܵܡ̇ܪܵܐ ܀ 31 :ܒܲܕܓ̣ܘܿܢ ܩܵܥ̇ܝܵܐ ܨܹܝܕܼ ܫܵܡܘܿܥܹ̈ܐ ܒܝܲܕܼ ܡܫܲܡܫܵܢܹ̈ܐ 32 ܕܢܲܪܟܿܢܘܼܢ ܪܹܫܵܐ ܘܢܸܣܒܼܘܼܢ ܒܘܼܪܟܿܬܼܵܐ ܡ̣ܢ ܟܵܗܢܘܼܬܼܵܐ ܀ 33 :ܐܲܪܟܸܿܢܘ ܪܹܫܟܼܘܿܢ ܐܘܿ ܫܵܡܘܿܥܹ̈ܐ ܡܗܲܝܡܢܹ̈ܐ ܥܡܝܼ̈ܕܹܐ 34 ܘܩܲܒܸܿܠܘ ܒܘܼܪܟܿܬܼܵܐ ܡ̣ܢ ܣܝܵܡܝܼܕܹܗ ܕܟܼܵܗܢܵܐ ܙܲܗܝܵܐ ܀ 35 :ܘܡ̣ܢ ܕܐܸܬܼܒܲܪܲܟܼܘ ܗܵܘܹ̇ܐ ܠܘܵܬܼܗܘܿܢ ܩܵܠܵܐ ܐ̄ܚܪܹܢܵܐ 36 ܕܟܼܠ ܕܠܵܐ ܫܩܝܼܠ ܠܵܗ̇ ܡܲܥܡܘܿܕܝܼܬܼܵܐ ܢܹܐܙܲܠ ܡܸܟܵܐ ܀ 37 :ܙܸܠܘ ܠܵܐ ܥܡܝܼ̈ܕܹܐ ܠܵܐ ܬܸܫܬܵܘܬܿܦܘܼܢ ܒܐ̄ܪ̈ܵܙܹܐ ܕܥܹܕܿܬܵܐ 38 ܕܲܠܒܲܝܬܵܝܼ̈ܐ ܦܣܝܼܣ ܠܲܡ ܒܲܠܚܘܿܕܼ ܠܡܸܫܬܵܘܬܵܦܘܼ ܀ 39 :ܬܘܼܒܼ ܒܲܪܬܼ ܩܵܠܵܐ ܐ̄ܚܪܹܬܼܵܐ ܗܵܘ̇ܝܵܐ ܒܲܙܢܵܐ ܐ̄ܚܪܹܢܵܐ 40 ܕܟܼܠ ܕܠܵܐ ܩܲܒܸܿܠ ܪܘܼܫܡܵܐ ܕܚܲܝܹ̈ܐ ܢܹܐܙܲܠ ܡܸܟܵܐ ܀ 41 :ܘܟܼܠ ܕܬܼܵܒܼ ܘܲܦܢ̣ܵܐ ܡ̣ܢ ܗܹܪܣܝܼܣ ܙܠܝܼܡܲܬܼ ܫܘܼܒܼܚܵܐ 42 ܥܲܕܼ ܡܸܬܼܪܫܸܡ ܠܵܐ ܢܸܫܬܵܘܬܹܿܦ ܒܐ̄ܪ̈ܵܙܲܝ ܥܹܕܿܬܵܐ ܀ 43 :ܟܠ ܬܘܼܒܼ ܕܲܟܼܦܲܪ̣ ܒܗܲܝܡܵܢܘܼܬܹܗ ܘܲܦܢ̣ܵܐ ܠܫܸܕܿܬܹܗ 44 ܥܲܕܼ ܡܸܬܼܚܲܣܸܐ ܒܪܘܼܫܡܵܐ ܕܥܹܕܿܬܵܐ ܠܵܐ ܢܸܫܬܵܘܬܲܦ ܀ 45 :ܬܘܼܒܼ ܒܲܪܬܼ ܩܵܠܵܐ ܐ̄ܚܪܹܬܼܵܐ ܗܵܘ̇ܝܵܐ ܒܛܲܟܼܣܵܐ ܐ̄ܚܪܹܢܵܐ 46 ܕܟܼܠ ܕܠܵܐ ܢܵܣܹ̇ܒܼ ܦܲܓܼܪܵܐ ܘܲܕܼܡ̇ܐ ܢܹܐܙܲܠ ܡܸܟܵܐ ܀ 47 :ܟܠ ܕܐܸܬܿܬܲܚܲܡ ܡ̣ܢ ܟܵܗܢܘܼܬܼܵܐ ܘܲܟܼܠܸܐ ܕܢܸܣܲܒܼ 48 ܘܠܵܐ ܒܥܸܕܵܢܵܐ ܕܒܹܗ ܡܸܬܼܩܲܪܒܹܝܼܢ ܐܝܼܬܼ ܠܹܗ ܕܲܢܦܘܼܫ ܀ 49 :ܐܲܝܢܵܐ ܕܲܟܼܠܸܐ ܡ̣ܢ ܩܵܢܘܿܢܵܐ ܕܩܘܼܕܫܵܐ ܢܸܣܲܒܼ 50 ܘܐܵܦܠܵܐ ܒܕܼܘܼܟܿܬܼܵܐ ܕܒܼܵܗ̇ ܡܸܬܼܩܲܪܒܼܝܼܢ ܦܣܝܼܣ ܠܹܗ ܕܲܢܩܘܼܡ ܀ 51 :ܟܪܝܼܗܵܐ ܕܠܵܐ ܚܠܝܼܡ ܘܡ̣ܢ ܐܵܢܲܢܩܹܐ ܠܵܐ ܡܨܸܐ ܠܡܸܣܲܒܼ 52 ܐܵܦܠܵܐ ܒܗܲܝܟܿܠܵܐ ܕܒܹܗ ܡܸܬܼܩܲܕܿܫܝܼܢ ܐܝܼܬܼ ܠܹܗ ܕܲܢܩܘܼܡ ܀ pb. 272 53 :ܢܵܦܩܝܼܢ ܟܠܗܘܿܢ ܡ̣ܢ ܓܵܘ ܗܲܝܟܿܠܵܐ ܚܲܫܝܼܫܵܐܝܼܬܼ 54 ܘܐܵܠܹ̇ܝܢ ܩܵܝ̇ܡܝܼܢ ܒܐܸܒܼܠܵܐ ܪܲܒܵܐ ܒܕܼܵܪܬܵܐ ܕܥܹܕܿܬܵܐ ܀ 55 :ܛܘܼܒܼܲܐ ܝܵܗ̇ܒܼܝܼܢ ܕܦܝ̇ܫܝܼܢ ܒܗܵܘ̇ ܒܘܼܣܵܡܵܐ 56 ܘܝܵܗ̇ܒܿܝܼܢ ܘܵܝܵܐ ܠܲܩܢܘܿܡܲܝ̈ܗܘܿܢ ܥܲܠ ܦܘܼܪܫܵܢܗܘܿܢ ܀ 57 :ܛܘܼܦܣܵܐ ܨܵܝ̇ܪܵܐ ܥܹܕܲܬܼ ܩܘܼܕܼܫܵܐ ܒܝܲܕܼ ܡܲܦܲܩܬܵܗ̇ 58 ܠܗܵܢ̇ܘܿܢ ܕܢܵܦ̇ܩܝܼܢ ܠܗܵܘ̇ ܚܸܫܘܿܟܼܵܐ ܕܲܒܼܓܼܗܲܢܵܐ ܀ 59 :ܚܼܙܵܐ ܗܼ̄ܘܵܐ ܡܲܠܟܵܐ ܓܲܒܼܪܵܐ ܕܠܵܐ ܒܝܼܫ ܢܲܚ̈ܬܹܿܐ 60 ܘܲܦܩ݂ܲܕܼ ܘܐܲܣܪܘܼܗܝ ܘܐܲܦܩܘܼܗܝ ܠܚܸܫܟܵܐ ܗܵܘ̇ ܒܲܪܵܝܵܐ ܀ 61 :ܐܵܦ ܗ̤ܝ ܥܹܕܿܬܵܐ ܒܵܨ̇ܝܵܐ ܟܸܢܫܹ̈ܝܗ̇ ܒܥܸܕܼܵܢ ܐ̄ܪ̈ܵܙܹܐ 62 ܘܟܼܠ ܕܠܵܐ ܡܨܲܒܲܬܼ ܒܢܲܚ̈ܬܹܿܐ ܕܟܲܝܵ̈ܐ ܠܒܲܪ ܫܵܝ̇ܕܼܝܵܐ ܠܹܗ ܀ 63 :ܒܵܬܲܪ ܗܵܠܹܝܢ ܗܵܘ̇ܝܵܐ ܩܥܵܬܼܵܐ ܨܹܝܕܼ ܫܵܡܘܿܥܹ̈ܐ 64 ܕܢܹܐܙ̄ܠܘܼܢ ܢܵܚܙܘܿܢ ܬܲܪ̈ܥܲܝ ܥܹܕܿܬܵܐ ܘܢܸܙܕܲܗܪܘܼܢ ܒܗܘܿܢ ܀ 65 :ܙܸܠܘ ܫܵܡܘܿܥܹ̈ܐ ܚܙܵܘ ܒܲܚܦܝܼܛܘܼ ܬܲܪ̈ܥܹܐ ܕܲܠܒܲܪ 66 ܟܲܕܼ ܠܵܐ ܡܫܵܘܬܿܦܝܼܢ ܒܐ̄ܪ̈ܵܙܲܝ ܥܹܕܿܬܵܐ ܐܲܝܟ ܒܲܝܬܵܝܹ̈ܐ ܀ 67 :ܠܗܵܠܹܝܢ ܐܸܬܿܕܲܟܲܪ ܒܪܵܐ ܐܵܣܘܿܛܵܐ ܕܦܲܪܲܚ ܢܸܟܼܣܵܘ̈ܗܝ 68 ܘܲܫܐܸܠ ܕܢܸܗܘ̤ܐ ܐܲܝܟ ܐܲܓܼܝܸܪܹ̈ܐ ܡܲܟܿܝܼܟܼܵܐܝܼܬܼ ܀ 69 :ܪܘܼܓܼܙܵܐ ܘܐܲܟܿܬܼܵܐ ܢܲܥܒܲܪ ܡܸܢܲܢ ܒܗܵܘ̇ ܥܸܕܼܵܢܵܐ 70 ܘܢܸܚܙܹܝܘܗܝ ܠܝܼܫܘܿܥ ܕܡܸܬܿܕܿܒܲܪ ܠܡܵܘܬܵܐ ܡܸܛܠܵܬܲܢ ܀ 71 :ܠܚܲܫܵܐ ܢܵܦܹ̇ܩ ܒܦܝܼܢܟܼܵܐ ܘܟܼܵܣܵܐ ܥܲܡ ܡܫܲܡܫܵܢܵܐ 72 ܒܦܝܢܟܼܵܐ ܠܲܚܡܵܐ ܒܟܼܵܣܵܐ ܚܲܡܪܵܐ ܐ̄ܪܵܙܵܐ ܕܡ̇ܘܬܹܿܗ ܀ 73 :ܐ̄ܪܵܙܵܐ ܡ̇ܘܬܹܿܗ ܗܠܹܝܢ ܛܵܥ̇ܢܝܼܢ ܥܲܠ ܐܝܼܕܲܝ̈ܗܘܿܢ 74 ܘܡ̇ܐ ܕܥܲܠ ܡܲܕܼܒܿܚܵܐ ܣܵܡܼܘܼܗܝ ܘܚܲܦܝܘܼܗܝ ܛܲܦܸܣܘ ܩܒܼܘܼܪܬܹܿܗ ܀ 75 :ܠܵܐ ܗ̄ܘܼܵܐ ܨܲܠܡܵܐ ܕܲܝܗܘܼܕܼܵܝܹ̈ܐ ܫܩܝܼܠܝܼܢ ܗܵܠܹܝܢ 76 ܐܸܠܵܐ ܕܥܝܼܪܹ̈ܐ ܕܲܡܫܲܡܫܝܼܢ ܗ̄ܘ̣ܵܐ ܠܚܲܫܹܗ ܕܲܒܼܪܵܐ ܀ 77 :ܡܼܢ ܡܲܠܲܐܟܹ̈ܐ ܐܸܫܬܲܡܲܫ ܗܼ̄ܘܵܐ ܒܥܸܕܼܵܢ ܚܲܫܹܗ 78 ܘܲܡܫܲܡܫܵܢܹ̈ܐ ܡܙܲܝܚܝܼܢ ܠܦܲܓܼܪܹܗ ܓܚܵܐܹ̇ܫ ܒܐ̄ܪܵܙܵܐ ܀ 79 :ܥܵܐ̇ܠܝܼܢ ܡܸܟܹܿܝܠ ܟܵܗܢܹ̈ܐ ܒܙܵܘܚܵܐ ܠܓܼܵܘ ܒܹܝܬܼ ܩܘܼܕܸܫܵܐ 80 ܘܩܵܝܡ̇ܝܼܢ ܬܲܡ̇ܢ ܒܪܲܒܿܘܼܬܼ ܫܘܼܒܼܚܵܐ ܘܦܲܐܝܘܼܬܼ ܗܸܕܼܪܵܐ ܀ pb. 273 81 :ܟܵܗܢܵܐ ܕܲܦܪܝܼܫ ܕܢܸܗܘܸܐ ܓܵܡܲ݁ܪ ܗܵܝ̇ ܕܸܒܼܚܬܼܵܐ 82 ܝܘܼܩܢܹܗ ܕܡ̇ܪܲܢ ܛܥܝܼܢ ܒܲܩܢܘܿܡܹܗ ܒܗܵܘ̇ ܥܸܕܵܢܵܐ ܀ 83 :ܫܲܡܸܫ ܡܸܨܥܵܝܘܼܬܼܵܐ ܒܹܝܬܼ ܠܲܢ ܘܠܲܐܒܼܘܼܗܝ 84 ܘܒܹܗ ܒܐܸܣܟܹܿܡܵܐ ܡܫܲܡܸܫ ܟܵܗܢܵܐ ܡܸܨܥܵܝܘܼܬܼܵܐ ܀ 85 :ܫܡܲܥ ܐܘܿ ܟܵܗܢܵܐ ܠܐܲܝܟܵܐ ܡܲܛܝܼܬܿ ܡܵܛܠ ܕܲܪܓܼܵܟ 86 ܘܙܘܼܥ ܡܼܢ ܡ̇ܪܵܢ ܘܝܲܩܲܪ ܕܲܪܓܼܵܟ ܐܲܝܟ ܕܲܦܠܸܐ ܠܹܗ ܀ 87 :ܚܙܝܼ ܕܐܸܢܼܥܲܠܝܼܬܿ ܠܥܸܠ ܡܼܢ ܟܪ̈ܘܿܒܹܐ ܠܥܸܠ ܡܼܢ ܣܪ̈ܵܦܹܐ 88 ܠܥܸܠ ܡܼܢ ܟܝܵܢܵܐ ܗܘ̤ܝ ܒܕܼܘܼܒܵܪ̈ܲܝܟ ܐܲܝܟ ܕܲܦܐܸܐ ܠܵܟ ܀ 89 :ܚܙܝܼ ܕܐܸܬܼܗܲܝܡܲܢܬܿ ܠܲܡܦܲܪܢܵܣܘܼ ܓܲܙܲܝ̈ ܡ̇ܪܵܟ 90 ܗܘ̤ܝ ܕܠܵܐ ܡܘܼܡ̇ܐ ܘܲܕܼܠܵܐ ܪܸܫܝܵܢ ܐܲܝܟ ܕܲܦܩܝܼܕܼ ܐܲܢ̄ܬܿ ܀ 91 :ܒܗܵܢ ܐܸܣܟܹܿܡܵܐ ܩܵܐܹ̇ܡ ܟܵܗܢܵܐ ܒܗܵܘ̇ ܥܸܕܵܢܵܐ 92 ܘܠܲܝܬܿ ܠܵܗ̇ ܦܸܚܡܵܐ ܠܗܵܝ̇ ܪܲܒܿܘܼܬܼܵܐ ܕܠܵܗ̇ ܡܸܬܼܩܲܪܲܒܼ ܀ 93 :ܟܵܗܢܹ̈ܐ ܟܠܗܘܿܢ ܕܲܒܼܒܹܝܬܼ ܩܘܼܕܼܫܵܐ ܨܲܠܡܵܐ ܫܩܝܼܠܝܼܢ 94 ܕܗܵܢ̇ܘܿܢ ܫܠܝܼܚܹ̈ܐ ܕܲܠܒܹܝܢܼ ܩܒܼܘܼܪܬܵܐ ܐܸܬܼܘܲܥܲܕܼܘ ܗ̄ܘܼܵܘ ܀ 95 :ܡܲܕܼܒܿܚܵܐ ܐ̄ܪܵܙܵܐ ܗ̄ܘ̣ ܕܩܲܒܼܪܹܗ ܕܡ̇ܪܲܢ ܕܠܵܐ ܦܘܼܠܵܓܼܵܐ 96 ܘܠܲܚܡܵܐ ܘܚܲܡܪܵܐ ܦܲܓܼܪܹܗ ܕܡ̇ܪܲܢ ܕܲܚܢܝܼܛ ܘܲܩܒܼܝܼܪ ܀ 97 :ܐܵܦ ܫܘܿܫܸܦܵܐ ܕܲܠܥܸܠ ܡܸܢܗܘܿܢ ܛܘܼܦܣܵܐ ܡܛܲܦܸܣ 98 ܕܟܹܐܦܵܐ ܚܬܝܼܡܲܬܿ ܒܥܸܙܩܲܬܼ ܡܵܗܢܹ̈ܐ ܘܩܲܣܛܘܼܢܵܪܹ̈ܐ ܀ 99 :ܘܲܡܫܲܡܫܵܢܹ̈ܐ ܕܡܸܟܵܐ ܘܡܸܟܵܐ ܩܵܝ̇ܡܝܼܢ ܘܡܲܟܿܫܝܼܢ 100 ܐ̄ܪܵܙ ܡܲܠܲܐܟܹ̈ܐ ܕܡܼܢ ܐܸܣܵܕܵܘ̈ܗܝ ܐܵܦ ܡܼܢ ܪܸ̈ܓܼܠܵܘܗܝ ܀ 101 :ܘܟܼܠ ܡܫܲܡܫܵܢܹ̈ܐ ܕܲܩܕܼܵܡ ܡܲܕܼܒܿܚܵܐ ܡܕܲܝܠܝܼܢ ܩܵܝ̇ܡܝܼܢ 102 ܕܡܘܼܬܼܵܐ ܨܵܝ̇ܪܝܼܢ ܕܥܝܼܪܹ̈ܐ ܕܚܲܕܼܪܘܼܗܝ ܠܩܲܒܼܪܹܗ ܕܡ̇ܪܲܢ ܀ 103 :ܐܵܦ ܒܹܝܬܼ ܩܘܼܕܼܫܵܐ ܛܘܼܦܣܵܐ ܨܵܐܲܪ ܕܓܼܢܲܬܼ ܝܵܘܣܸܦ 104 ܕܲܪܕܼܵܘ ܡܸܢܵܗ̇ ܚܲܝܹ̈ܐ ܠܐ̄ܢܵܫܵܐ ܘܲܠܡܲܠܲܐܟܹ̈ܐ ܀ 105 :ܒܛܲܟܼܣܵܐ ܐ̄ܚܪܹܢܵܐ ܐܝܼܬܼܵܘܗܝ ܛܘܼܦܣܵܗ̇ ܕܗܵܝ̇ ܡܲܠܟܿܘܼܬܼܵܐ 106 ܘܥܲܠ݂ ܠܵܗ̇ ܡ̇ܪܲܢ ܘܡܲܥܸܠ ܥܲܡܹܗ ܠܟܼܠܗܘܿܢ ܪ̈ܵܚܡܵܘܗܝ ܀ 107 :ܡܲܕܼܒܿܚܹܗ ܣܓܼܝܼܕܼܵܐ ܐ̄ܪܲܙ ܗܵܘ̇ ܬܪܘܼܢܘܿܣ ܕܪܲܒܿܘܼܬܼ ܫܘܼܒܼܚܹܗ 108 :ܕܲܥܠܵܘܗܝ ܡܸܬܼܚܙܹܐ ܠܥܝܼܪܹ̈ܐ ܘܐ̄ܢܵܫܵܐ ܒܝܘܿܡ ܓܸܠܝܵܢܹܗ 109 :ܗܵܠܹܝܢ ܕܲܠܬܲܚܬܿ ܘܗܵܠܹܝܢ ܕܲܠܥܸܠ ܩܲܢܟܹܿܐ ܡܪܲܙܙܵܐ 110 ܘܥܲܗܸܕܼ ܕܲܗ̤ܘܲܝ ܡܛܲܦܸܣ ܕܗܵܘ̈ܝܵܢ ܪܘܼܚܢܵܐܝܼܬܼ ܀ 111 :ܘܡܼܢ ܟܲܕܼܪ ܩܵܝ̇ܡܝܼܢ ܟܵܗܢܹ̈ܐ ܐܲܟܲܚ̄ܕܼ ܘܲܡܫܲܡܫܵܢܹ̈ܐ 112 ܡܫܲܪܹܝܢ ܘܐܵܡ̇ܪܝܼܢ ܗܲܝܡܵܢܘܼܬܼܵܐ ܕܐܲܒܼܵܗ̈ܬܼܵܐ ܀ pb. 274 113 :ܡܗܲܝܡܢܝܼܢܲܢ ܕܹܝܢ ܒܚܲܕܼ ܐܵܠܵܗܵܐ ܐܵܒܼܵܐ ܕܡܸܡܬܼܘܿܡ 114 ܕܐܲܚܝܼܕܼ ܟܠܵܐ ܒܪܸܡܙܵܐ ܟܲܣܝܵܐ ܕܐܲܠܵܗܘܼܬܹܗ ܀ 115 :ܕܲܥܼܒܲܕܼ ܘܐܲܬܼܩܸܢ ܟܠ ܕܡܸܬܼܚܲܙ̈ܝܵܢ ܘܠܵܐ ܡܸܬܼܚܲܙ̈ܝܵܢ 116 ܘܐܲܝܬܿܝܼ ܒܪܝܼܬܼܵܐ ܕܪܵܘܡ̇ܐ ܘܥܘܼܡܩܵܐ ܡܼܢ ܠܵܐ ܡܸܕܸܿܡ ܀ 117 ܘܲܒܼܚܲܕܼ ܡ̇ܪܝܵܐ ܝܼܫܘܿܥ ܡܫܝܼܚܵܐ ܒܪܹܗ ܕܐܲܠܵܗܐ ܀ 118 :ܝܼܚܝܼܕܼܵܝܵܐ ܗ̄ܘ̣ ܒܐܲܠܵܗܘܼܬܹܗ ܘܒܼܘܼܟܼܪܵܐ ܒܦܲܓܼܪܹܗ 119 ܕܐܸܬܼܒܲܟܲܪ ܗ̄ܘܼܵܐ ܠܟܼܠ ܒܸܪ̈ܝܵܬܼܵܐ ܡܼܢ ܒܹܝܬܼ ܡܝܼܬܹ̈ܐ ܀ 120 :ܗܵܘ̇ ܕܡܼܢ ܐܲܒܼܘܼܗܝ ܝܼܠܝܼܕܼ ܘܐܝܼܬܼܵܘܗܝ ܕܠܵܐ ܫܘܼܪܵܝܵܐ 121 ܘܠܵܐ ܗ̄ܘܼܵܐ ܡܸܗܘܵܐ ܗܘ̤ܵܐ ܘܐܸܬܼܥܒܸܕܼ ܥܲܡ ܒܸܪ̈ܝܵܬܼܵܐ ܀ 122 :ܒܗܵܝ̇ ܕܐܲܠܵܗܵܐ ܗ̄ܘ̣ ܕܡܼܢ ܐܲܠܵܗܵܐ ܒܪܵܐ ܕܡܼܢ ܐܲܒܼܵܐ 123 ܘܡܼܢ ܟܝܵܢ ܐܲܒܼܘܼܗܝ ܘܲܫܘܸܐ ܥܲܡܹܗ ܒܟܼܠܗܹܝܢ ܕܝܼܠܹܗ ܀ 124 :ܘܒܹܗ ܐܸܬܼܚܵܘܝܼܘ ܥܲܠܡܹ̈ܐ ܘܐܸܬܼܒܿܪܝܼ ܟܠܡܵܐ ܕܵܗܘ̤ܵܐ 125 ܘܲܒܼܫܘܼܠܛܵܢܵܐ ܘܣܸܓܼܕܿܬܼܵܐ ܫܘܼܒܼܚܵܐ ܫܘܸܐ ܥܲܡ ܐܲܒܼܘܼܗܝ ܀ 126 :ܕܡܸܛܠܵܬܲܢ ܢܚܸܬܼ ܡܼܢ ܫܡܲܝܵܐ ܕܠܵܐ ܫܘܼܢܵܝܵܐ 127 ܕܢܸܦܪܘܿܩ ܠܓܸܢܣܲܢ ܡܼܢ ܥܲܒܼܕܿܘܼܬܼܵܐ ܕܒܼܝܼܫܵܐ ܘܡ̇ܘܬܵܐ ܀ 128 :ܘܓܲܫܸܡ ܗܲܝܟܿܠܵܐ ܒܚܹܝܠ ܪܘܼܚܩܘܼܕܫܵܐ ܡܼܢ ܒܲܪܬܼ ܕܵܘܝܼܕܼ 129 ܘܲܗܘ̤ܵܐ ܐ̄ܢܵܫܵܐ ܘܐܲܠܲܗ ܠܗܲܝܟܿܠܹܗ ܒܲܚܕܼܵܝܘܼܬܼܵܐ ܀ 130 :ܘܐܸܬܼܒܿܛܸܢ ܦܲܓܼܪܹܗ ܒܗܲܝܟܲܠ ܡܲܪܝܲܡ ܕܠܵܐ ܙܘܼܘܵܓܼܵܐ 131 ܘܐܸܬܼܝܼܠܸܕܼ ܗ̄ܘܼܵܐ ܠܥܸܠ ܡܼܢ ܛܲܟܼܣܹ̈ܐ ܐܵܕܵܡ̇ܝܹ̈ܐ ܀ 132 :ܘܚܲܫ̣ ܗ̄ܘܼܵܐ ܘܐܸܙܕܩܸܦ ܘܩܲܒܸܿܠ ܡ̇ܘܬܵܐ ܒܚܲܕܼ ܐ̄ܢܵܫܘܼܬܹܗ 133 ܟܲܕܼ ܦܝܼܠܵܛܘܿܣ ܐܲܚܝܼܕܼ ܗ̄ܘܼܵܐ ܠܵܗ̇ ܠܗܸܕܼܡܘܿܢܘܼܬܼܵܐ ܀ 134 :ܘܗܲܘ̤ܵܐ ܒܩܲܒܼܪܵܐ ܬܵܠܵܬܼܵܐ ܝܵܘ̈ܡܝܼܢ ܐܲܝܟ ܟܠ ܡܝܼܬܼܵܐ 135 ܘܩܵܡ ܘܐܸܬܼܢܲܚܲܡ ܐܲܟܼܡܵܐ ܕܲܟܼܬܼܝܼܒܼ ܒܲܢܒܼܝܼܘܼܬܼܵܐ ܀ 136 :ܘܲܣܼܠܸܩ ܠܪܵܘܡ̇ܐ ܠܲܫܡܲܝ̈ ܫܡܲܝܵܐ ܕܢܲܫܠܸܡ ܟܠ 137 ܘܝܼܬܸܒܼ ܒܫܘܼܒܼܚܵܐ ܡܼܢ ܝܲܡܝܼܢܵܐ ܕܐܲܒܼܵܐ ܕܫܲܠܼܚܹܗ ܀ 138 :ܘܲܥܬܼܝܼܕܼ ܕܢܹܐܬܸܐ ܒܫܘܼܠܵܡ ܙܲܒܼܢܹ̈ܐ ܠܚܘܼܕܵܬܼ ܟܠܵܐ 139 ܘܠܲܡܕܼܵܢ ܠܚܲܝܹ̈ܐ ܘܲܠܡܝܼ̈ܬܹܐ ܬܘܼܒܼ ܕܡܝܼܬܼܘ ܒܲܚܛܝܼܬܼܵܐ ܀ 140 :ܘܡ̇ܘܕܹܿܝܢܲܢ ܬܘܼܒܼ ܘܲܒܼܪܘܼܚ ܩܘܼܕܫܵܐ ܐܝܼܬܼܝܵܐ ܕܡܼܢ ܡܬܼܘܿܡ 141 ܫܘܸܐ ܒܐܘܼܣܝܵܐ ܘܒܲܐܠܵܗܘܼܬܼܵܐ ܠܐܲܒܼܵܐ ܘܠܲܒܼܪܵܐ ܀ 142 :ܗܵܘ̇ ܕܡܼܢ ܐܵܒܼܵܐ ܢܵܦܹ̇ܿܩ ܒܲܙܢܵܐ ܕܠܵܐ ܡܸܬܼܥܲܩܲܒܼ 143 ܘܝܵܗܹ̇ܒܼ ܚܲܝܹ̈ܐ ܠܟܼܠܗܘܿܢ ܡܠܝܼ̈ܠܹܐ ܕܡܸܢܹܗ ܐܸܬܼܒܿܪܝܼܘ ܀ 144 :ܘܡ̇ܘܕܹܿܝܢܲܢ ܬܘܼܒܼ ܘܒܲܚܕܼܵܐ ܥܹܕܿܬܵܐ ܩܵܬܼܠܝܼܩܝܼ 145 ܐܲܒܼܵܗܵܝܬܵܐ ܘܲܫܠܝܼܚܵܝܬܵܐ ܡܩܲܕܿܫܲܬܼ ܒܪܘܼܚܵܐ ܀ 146 ܘܬܼܘܼܒܼ ܡ̇ܘܕܹܿܝܢܲܢ ܒܲܚܕܼܵܐ ܣܚܵܬܼܵܐ ܘܡܲܥܡܘܿܕܼܝܼܬܼܵܐ: pb. 275 147 ܕܒܼܵܗ̇ ܥܵܡ̇ܕܲܝܢܲܢ ܠܚܘܼܣܵܝ ܚܵܘ̈ܒܹܿܐ ܣܝܼܡܲܬܼ ܒܢܲܝ̈ܵܐ ܀ 148 :ܘܡ̇ܘܕܹܿܝܢܲܢ ܬܘܼܒܼ ܐܵܦ ܒܲܩܝܵܡܬܼܵܐ ܕܡܼܢ ܒܹܝܬܼ ܡܝܼ̈ܬܹܐ 149 ܘܲܕܼܗܵܘܹ̇ܝܢܲܢ ܒܚܲܝܹ̈ܐ ܚܲܕܼܬܹ̈ܐ ܠܥܵܠܲܡ ܥܵܠܡܝܼܢ ܀ 150 :ܠܗܵܕܹܐ ܚܲܬܸܿܡܘ ܬܠܵܬܼܡܐܵܐ ܟܵܗܢܹ̈ܐ ܘܲܬܼܡܵܢܬܿܥܣܲܪ 151 ܘܬܲܚܸܡܘ ܘܐܲܚܪܸܡܘ ܠܟܼܠ ܕܠܵܐ ܡ̇ܘܕܹܿܐ ܐܲܝܟ ܬܵܘܕܲܝܬܼܗܘܿܢ ܀ 152 :ܥܹܕܼܬܵܐ ܡ̇ܘܕܿܝܵܐ ܐܲܝܟ ܬܵܘܕܲܝܼܬܼܗܘܿܢ ܕܐܲܒܼܗ̈ܬܼܵܐ 153 ܘܬܵܦ ܡܫܲܡܫܵܐ ܬܘܼܒܼ ܠܗܲܝܡܵܢܘܼܬܼܗܘܿܢ ܒܥܸܕܵܢ ܐ̄̈ܪ̈ܙܹܐ ܀ 154 :ܒܥܸܕܵܢ ܐ̄ܪ̈ܵܙܹܐ ܪܵܥܡ̇ܝܼܢ ܝܲܠܕܹܿܝ̈ܗ̇ ܒܗܲܝܡܵܢܘܼܬܼܗܘܿܢ 155 ܟܲܕܼ ܬܵܢܹ̇ܝܢ ܠܵܗ̇ ܒܦܘܼܡ̇ܐ ܘܠܸܒܵܐ ܕܠܵܐ ܦܘܼܠܵܓܼܵܐ ܀ 156 :ܘܡܼܢ ܕܐܸܬܿܬܲܢܝܲܬ̤ ܗܲܝܡܵܢܘܼܬܼܵܐ ܒܛܲܟܼܣܵܐ ܕܲܦܐܹܐ 157 ܦܵܩܹ̇ܕܼ ܡܸܟܹܿܝܠ ܟܵܪܘܿܙ ܥܹܕܿܬܵܐ ܠܲܡܨܲܠܵܝܘܼ ܀ 158 :ܨܲܠܵܘ ܐܵܡܲ̈ܪ ܥܲܠ ܕܘܼܟܼܪܵܢܵܐ ܕܐܲܒܼܵܗ̈ܬܼܵܐ 159 ܩܵܬܼܘܿܠܝܼܩܹ̈ܐ ܘܐܲܦܸܣܩܘܼܦܹ̈ܐ ܥܲܡ ܡܲܠܦܵܢܹ̈ܐ ܀ 160 :ܘܥܲܡܗܘܿܢ ܟܵܗܢܹ̈ܐ ܐܵܦ ܡܫܲܡܫܵܢܹ̈ܐ ܘܼܟܼܠܗܘܿܢ ܛܲܟܼܣܹ̈ܐ 161 ܘܟܼܠܡܲܢ ܕܲܥܢܲܕܼ ܡܼܢ ܗܵܢ ܥܵܠܡܵܐ ܒܗܲܝܡܵܢܘܼܬܼܵܐ ܀ 162 :ܕܢܸܗܘܘܿܢ ܡܟܲܠܠܹ̈ܐ ܒܝܵܘܡ̇ܐ ܡܼܢ ܒܹܝܬܼ ܡܝܼ̈ܬܹܐ 163 ܘܲܚܢܲܢ ܥܲܡܗܘܿܢ ܢܹܐܪܲܬܼ ܚܲܝܹ̈ܐ ܒܗܵܝ̇ ܡܲܠܟܿܘܼܬܼܵܐ ܀ 164 :ܨܲܠܵܘ ܐܲܚܲܝ̈ ܥܲܠ ܩܘܼܪܒܵܢܵܐ ܕܲܡܩܲܪܒܼܝܼܢܲܢ 165 ܕܢܸܗܘܸܐ ܡܩܲܒܿܠܵܐ ܩܕܼܵܡ ܐܲܠܵܗܵܐ ܕܠܹܗ ܡܸܬܼܩܲܪܲܒܼ ܀ 166 :ܘܲܒܼܪܘܼܚܵܦܵܐ ܕܪܘܼܚܵܐ ܕܩܘܼܫܵܐ ܢܗܘܸܐ ܡܩܲܕܿܫܵܐ 167 ܐܲܝܟ ܕܢܸܗܘܸܐ ܠܲܢ ܥܸܠܲܬܼ ܚܲܝܹ̈ܐ ܒܡܲܠܟܿܘܼܬܼ ܪܵܘܡ̇ܐ ܀ 168 :ܒܗܵܠܹܝܢ ܡܚܲܦܸܛ ܟܵܪܘܿܙ ܥܹܕܼܬܵܐ ܠܥܲܡܵܐ ܘܐܵܡܲ݁ܪ 169 ܠܲܡܨܲܠܵܝܘܼ ܩܕܼܵܡ ܐܲܠܵܗܵܐ ܒܠܸܒܵܐ ܕܲܟܼܝܵܐ ܀ 170 :ܡܩܲܪܸܒܼ ܡܸܟܹܿܝܠ ܟܵܗܢܵܐ ܐ̄ܪܵܙܵܐ ܕܦܘܼܪܩܵܢ ܚܲܝܲܝ̈ܢ 171 ܟܲܕܼ ܡܠܸܐ ܙܵܘܥܵܐ ܘܲܥܛܝܼܦ ܕܼܚܠܵܐ ܘܩܸܢܛܵܐ ܀ 172 :ܙܵܐܲܥ ܟܵܗܢܵܐ ܘܲܕܼܚܝܼܠ ܪܲܒܲܬܼ ܘܪܲܬܿܝܼܬܼ ܣܲܓܿܝܼ 173 ܡܸܛܠ ܚܵܘܒܵܘ̈ܗܝ ܘܚܵܘ̈ܒܹܿܗ ܕܟܼܠܗܘܿܢ ܝܲܠܕܹܿܝ̈ܗ̇ ܕܥܹܕܿܬܵܐ ܀ 174 :ܥܲܝܢܵܐ ܐܝܼܬܼܵܘܗܝ ܕܟܼܠܹܗ ܓܘܼܫܡܵܐ ܥܹܕܿܬܵܢܵܝܵܐ 175 ܘܥܵܗܹ̇ܕܼ ܒܡܲܕܿܥܹܗ ܟܠ ܣܘܼܥܪ̈ܵܢܹܐ ܕܲܟܼܢܵܘܵܬܹ̈ܐ ܀ 176 :ܐܵܦ ܠܸܫܵܢܵܐ ܗ̄ܘ̣ ܕܟܼܠܹܗ ܓܘܼܫܡܵܐ ܝܼܫܘܿܥܵܝܵܐ 177 ܐܲܦܸܛܪܘܿܦܵܐ ܗ̄ܘ̣ ܘܲܣܢܹܐ ܓܪܘܼܬܼܵܐ ܡܡܲܠܸܐ ܚܠܵܦܵܘܗܝ ܀ 178 :ܪܬܹܝܬܼܵܐ ܘܕܸܚܠܵܐ ܕܲܚܠܵܦ ܢܲܦܫܹܗ ܘܲܚܠܵܦ ܥܲܡܹܗ 179 ܪܡܸܐ ܥܲܠ ܟܵܗܢܵܐ ܒܗܵܘ̇ ܥܸܕܼܵܢܵܐ ܡܠܸܐ ܕܸܚܠܬܼܵܐ ܀ pb. 276 180 :ܒܛܘܼܦܣܵܐ ܕܚܝܼܠܵܐ ܒܛܲܟܼܣܵܐ ܕܚܝܼܠܵܐ ܥܲܠ ܣܪ̈ܵܦܹܐ 181 ܡܡܲܨܲܥ ܩܵܐܹ̇ܡ ܒܲܪ ܕܲܚܝܼܚܵܐ ܒܕܸܚܠܵܐ ܪܲܒܵܐ ܀ 182 :ܡܲܠܟܵܐ ܕܚܝܼܠܵܐ ܕܲܩܛܝܼܠ ܘܲܩܒܼܝܼܪ ܐ̄ܪܵܙܵܢܵܐܝܼܬܼ 183 ܘܥܝܼܪܹ̈ܐ ܕܚܝܼܠܹ̈ܐ ܕܦܵܝ̇ܫܝܼܢ ܒܕܸܚܠܵܐ ܠܐܝܼܩܵܪ ܡ̇ܪܗܘܿܢ ܀ 184 :ܣܸܕܼܪܹ̈ܐ ܕܥܝܼܪܹ̈ܐ ܚܕܝܼܪܝܼܢ ܠܡܲܕܒܿܚܵܐ ܒܗܵܘ̇ ܥܸܕܵܢܵܐ 185 ܐܲܟܼܡܵܐ ܕܐܲܣܗܸܕܼ ܟܪܘܿܣܘܿܣܛܘܿܡܘܿܣ ܕܲܚܼܙܵܐ ܐܸܢܘܿܢ ܀ 186 :ܒܗܵܢܵܐ ܗܸܪܓܵܐ ܩܵܐܹ̇ܡ ܟܵܗܢܵܐ ܠܲܡܟܼܗܵܢܘܼ 187 ܚܲܫܝܼܫܵܐܝܼܬܼ ܒܕܼܚܠܵܐ ܪܲܒܵܐ ܐܵܦ ܒܲܪܬܹܝܬܵܐ ܀ 188 :ܒܲܕܡܘܼܬܼ ܝܲܥܩܘܿܒܼ ܬܠܵܬܼ ܙܲܒܼ̈ܢܵܬܼܵܐ ܘܲܬܼܠܵܬܼ ܣܵܓܹܿܕ 189 ܘܗܵܝܕܲܝܢ ܩܵ݁ܪܸܒܼ ܠܲܡܢܲܫܵܩܘܼ ܠܩܲܒܼܪܹܗ ܕܡ̇ܪܲܢ ܀ 190 :ܠܥܹܥܣܘܿ ܐܲܚܘܼܗܝ ܝܲܩܲܪ ܝܲܥܩܘܿܒܼ ܒܝܲܕܼ ܣܸܓܼ̈ܕܵܬܼܵܐ 191 ܘܟܼܵܗܢܵܐ ܡܝܲܩܲܪ ܒܝܲܕܼ ܣܸܓܼ̈ܕܬܼܵܐ ܠܡܵܪܹܗ ܕܝܲܥܩܘܿܒܼ ܀ 192 :ܡܢܲܫܸܩ ܒܚܘܼܒܵܐ ܘܲܒܼܪܚܡܬܼܵܐ ܠܡܲܕܼܒܲܚ ܩܘܼܕܼܫܵܐ 193 ܘܡܸܬܿܬܿܟܼܠ ܕܢܸܣܲܒܼ ܩܲܕܿܝܼܫܘܼܬܼܵܐ ܒܝܲܕܼ ܣܸܦ̈ܘܵܬܹ̈ܗ ܀ 194 :ܫܵܐܹ̇ܠ ܨܠܘܿܬܼܵܐ ܡܼܢ ܡܫܲܡܫܵܢܹ̈ܐ ܕܚܲܕܼܝܼܪܝܼܢ ܠܹܗ 195 ܕܲܒܼܡܘܼܟܵܟܹܗ ܢܸܣܲܒܼ ܪ̈ܲܚܡܹܐ ܡܼܢ ܚܲܢܵܢܵܐ ܀ 196 :ܡܨܲܠܸܐ ܡܸܟܹܿܝܠ ܒܠܸܒܵܐ ܟܵܝܒܵܐ ܩܕܼܵܡ ܐܲܠܵܗܵܐ 197 ܘܡ̇ܘܕܹܿܐ ܒܚܵܘ̈ܒܵܘܗܝ ܘܚܵܘ̈ܒܹܿܐ ܕܓܼܘܼܫܡܵܐ ܥܹܕܿܬܵܢܵܝܵܐ ܀ 198 :ܫܵܐܹ̇ܠ ܟܵܗܢܵܐ ܚܲܝܠܵܐ ܟܲܣܝܵܐ ܥܲܡ ܥܘܼܕܼܪܵܢܵܐ 199 ܕܲܠܡܵܘܗܲܒܼܬܹܗ ܢܸܗܘܸܐ ܓܵܡܲ݁ܪ ܐܲܝܟ ܨܸܒܼܝܵܢܹܗ ܀ 200 :ܘܲܠܟܼܠܡܸܕܹܿܡ ܕܐܵܡܲ݁ܪ ܟܵܗܢܵܐ ܩܕܼܵܡ ܐܲܠܵܗܵܐ 201 ܫܵܠܹ̇ܡ ܥܲܡܵܐ ܘܲܠܬܸܫܡܸܫܬܹܿܗ ܡܚܲܬܲܡ ܒܐܵܡܹܝܢ ܀ 202 :ܒܐܵܡܹܝܢ ܡܲܪܡܸܐ ܥܲܡܵܐ ܐܝܼܕܼܵܐ ܥܲܡܹܗ ܕܟܼܵܗܢܵܐ 203 ܘܲܡܫܵܘܬܸܿܦ ܠܹܗ ܒܝܲܕܼ ܨ̈ܠܵܘܵܬܹܗ ܒܝܲܕܼ ܒܲܪܬܼ ܩܵܠܹܗ ܀ 204 :ܗܵܝܕܹܿܝܢ ܟܵܗܢܵܐ ܡܒܲܪܸܟ ܠܥܲܡܵܐ ܒܗܵܘ̇ ܥܸܕܵܢܵܐ 205 ܒܗܵܝ̇ ܒܲܪܬܼ ܩܵܠܵܐ ܕܐܲܣܪܲܚ ܦܘܼܡܵܐ ܝܲܗܹ̇ܒܼ ܚܲܝܹ̈ܐ ܀ 206 :ܫܠܵܡܵܐ ܥܲܡܟܼܘܿܢ ܐܸܡܲ݁ܪ ܟܵܗܢܵܐ ܠܝܲܠܕܲܝ̈ ܥܹܕܿܬܵܐ 207 ܕܲܣܓܼܝܼ ܫܠܵܡܵܐ ܒܝܼܫܘܿܥ ܡ̇ܪܲܢ ܕܗܘ̤ܝܘܼ ܫܲܝܢܲܢ ܀ 208 :ܫܠܵܡܵܐ ܥܲܡܟܼܘܿܢ ܕܲܒܼܛܸܠ ܡ̇ܘܬܵܐ ܘܐܸܫܬܿܪܝܼ ܚܒܼܵܠܵܐ 209 ܒܲܒܼܝܲܕܼ ܒܲܪ ܓܸܢܣܲܢ ܕܚܲܫ ܥܲܠ ܐܲܦܲܝ̈ܢ ܘܐܲܚܝܼ ܠܟܼܠܲܢ ܀ 210 :ܫܠܵܡܵܐ ܥܲܡܟܼܘܿܢ ܕܥܸܒܼܪܲܬ̤ ܚܛܝܼܬܼܵܐ ܘܚܵܒܼ ܣܵܛܵܢܵܐ 211 ܒܝܲܕܼ ܒܲܪ ܐܵܕܼܵܡ ܕܲܙܟܼܵܐ ܘܙܲܟܿܝܼ ܠܝܲܠܕܵܘ̈ܗܝ ܕܐܵܕܼܵܡ ܀ pb. 277 212 :ܫܠܵܡܵܐ ܥܲܡܟܼܘܿܢ ܕܐܸܬܼܪܲܥܝܼ ܠܟܼܘܿܢ ܡ̇ܪܵܐ ܛܵܒܼܵܐ 213 ܒܡܵܘܬܵܐ ܕܲܒܼܪܹܗ ܕܚܲܫ̣ ܒܲܙܩܝܼܦܵܐ ܡܸܛܠܵܬܲܢ ܀ 214 :ܫܠܵܡܵܐ ܥܲܡܟܼܘܿܢ ܕܐܸܫܬܲܝܲܢܬܿܘܿܢ ܥܲܡ ܡܲܠܲܐܟܹ̈ܐ 215 ܒܗܵܘ̇ ܕܐܸܫܬܲܠܲܛ ܥܲܠ ܡܲܠܲܐܟܹ̈ܐ ܘܐܲܡܠܸܟ ܥܲܠ ܟܠ ܀ 216 :ܫܠܵܡܵܐ ܥܲܡܟܼܘܿܢ ܕܐܸܬܼܚܲܝܲܕܿܬܿܘܿܢ ܥܲܡܵܐ ܘܥܲܡܡܹ̈ܐ 217 ܘܐܸܫܬܼܪܝܼ ܣܝܵܓܼܵܐ ܒܝܼܫܘܿܥ ܟܠ ܣܲܩܘܼܒܼܠܵܐ ܀ 218 :ܫܠܵܡܵܐ ܥܲܡܟܼܘܿܢ ܕܲܢܛܝܼܪܝܼܢ ܠܟܼܘܿܢ ܚܲܝܹ̈ܐ ܚܲܕܼ̈ܬܬܹܐ 219 ܒܗܵܘ̇ ܕܐܸܬܼܒܲܟܲܪ ܠܟܼܠ ܒܸܪ̈ܝܵܬܼܵܐ ܒܚܲܝܹ̈ܐ ܕܠܵܐ ܚܒܼܵܠ ܀ 220 :ܫܠܵܡܵܐ ܥܲܡܟܼܘܿܢ ܕܐܸܙܕܲܡܲܢܬܿܘܿܢ ܠܡܲܠܟܿܘܼܬܼ ܪܵܘܡܵܐ 221 ܒܗܵܘ̇ ܕܲܒܼܩܲܕܼܡ̇ܐ ܥܲܠ ܕܲܡܛܲܝܸܒܼ ܐܲܬܼܪܵܐ ܠܟܼܠܲܢ ܀ 222 :ܡܦܲܢܸܐ ܥܵܡܲܐ ܚܘܼܒܵܢܵܐܝܼܬܼ ܠܟܼܵܗܢܵܐ ܘܐܵܡܲܪ 223 ܥܲܡܵܟ ܗܵܢܵܐ ܘܥܲܡܵܗ ܕܪܘܼܚܵܟ ܗܵܝ̇ ܟܵܗܢܵܝܬܵܐ ܀ 224 :ܪܘܼܚܵܐ ܩܵܪܹܐ ܠܵܐ ܗ̄ܘܼܵܐ ܠܢܲܦܫܵܐ ܗܵܝ̇ ܕܲܒܼܟܼܵܗܢܵܐ 225 ܐܸܠܵܐ ܠܪܘܼܚܵܐ ܕܩܲܒܸܿܠ ܟܵܗܢܵܐ ܒܲܣܝܵܡ ܐܝܼܕܼܵܐ ܀ 226 :ܒܲܣܝܵܡ ܐܝܼܕܼܵܐ ܡܩܲܒܸܿܠ ܟܵܗܢܵܐ ܚܲܝܠܵܐ ܕܪܘܼܚܵܐ 227 ܕܒܼܵܗ̇ ܢܸܬܼܡܨܸܐ ܠܡܸܓܼܡܲܪ ܐ̄ܪ̈ܵܙܹܐ ܐܲܠܵܗܵܝܹ̈ܐ ܀ 228 :ܠܗܵܝ̇ ܛܲܝܒܿܘܼܬܼܵܐ ܡܫܲܡܲܗ ܥܲܡܵܐ ܪܘܼܚܵܐ ܕܟܼܵܗܢܵܐ 229 ܘܲܡܦܝܼܣ ܕܢܸܩܢܹܐ ܫܠܵܡܵܐ ܥܲܡܵܗ̇ ܘܐܵܦ ܗܝ̤ ܥܲܡܹܗ ܀ 230 :ܡܫܵܘܕܿܥܵܐ ܗܵܕܹܐ ܕܐܵܦ ܗܘ̤ ܟܵܗܢܵܐ ܣܡܝܼܩ ܥܲܠ ܨܠܘܿܬܼܵܐ 231 ܘܐܵܠ̇ܨܵܐ ܕܲܬܼܦܝܼܣ ܟܠܵܗ̇ ܥܹܕܿܬܵܐ ܡܸܛܠܵܬܹܗ ܀ 232 :ܒܲܕܼܓܘܿܢ ܩܵܥܝܵܐ ܕܢܸܩܢܸܐ ܫܠܵܡܵܐ ܗܘ̤ ܥܲܡ ܪܘܼܚܹܗ 233 ܕܲܒܼܚܲܕܼ ܫܠܵܡܹܗ ܢܸܣܓܸܿܐ ܫܠܵܡܵܐ ܕܟܼܠܗܘܿܢ ܝܲܠܕܲܝ̈ܗ̇ ܀ 234 :ܒܗܵܝ̇ ܕܲܒܼܫܘܼܦܪ̈ܵܘܗܝ ܡ̇ܘܬܲܪ ܣܲܓܿܝܼ ܠܟܼܠܵܗ̇ ܥܹܕܿܬܵܐ 235 ܘܲܒܼܣܲܢ̈ܝܵܢܹܗ ܡܣܲܓܸܿܦ ܪܲܒܲܬܼ ܠܟܼܠܹܗ ܓܵܘܵܐ ܀ 236 :ܫܠܵܡܵܐ ܥܲܡܵܟ ܐܵܡܲ݁ܪ ܥܲܡܵܐ ܠܟܼܵܗܢܵܐ ܙܲܗܝܵܐ 237 ܫܠܵܡܵܐ ܬܸܩܢܹܐ ܒܚܲܕܼ ܕܘܼܒܵܪ̈ܲܝܟ ܥܲܡܵܗ̇ ܕܪܘܼܚܵܟ ܀ 238 :ܫܠܵܡܵܟ ܕܒܼܵܟ ܡܸܬܼܓܲܡܪܝܼܢ ܐ̄ܪ̈ܙܲܝ ܥܹܕܿܬܵܐ 239 ܫܠܵܡܵܐ ܢܸܗܘܸܐ ܠܪܘܼܚܵܟ ܥܲܡܵܟ ܒܝܲܕܼ ܗܘܼܦܵܟܲܝ̈ܟ ܀ 240 :ܫܠܵܡܵܐ ܥܲܡܵܟ ܕܪܲܒ ܫܘܼܟܵܢܵܐ ܕܐܸܫܬܲܟܲܢ ܠܵܟ 241 ܫܠܵܡܵܐ ܕܪܘܼܚܵܟ ܢܹܐܪܲܒܼ ܒܟܼܘܼܫܪܲܝܟ ܪ̈ܘܼܚܵܢܝܹܐ ܀ 242 :ܗܵܝܕܲܝܹܢ ܦܵܩܹ̇ܕܼ ܟܵܪܘܿܙ ܥܹܕܿܬܵܐ ܠܟܼܠܹܗ ܥܲܡܵܐ 243 ܕܢܸܬܼܠܘܼܢ ܫܠܵܡܵܐ ܚܲܕܼ ܠܚܲܒܼܪܹܗ ܒܚܘܼܒܹܿܗ ܕܡܵܪܲܢ ܀ 244 :ܒܩܲܕܼܡܵܐ ܟܵܗܢܹ̈ܐ ܝܵܗ̇ܒܿܝܼܢ ܫܠܵܡܵܐ ܒܓܼܵܘ ܒܹܝܬܼ ܩܘܼܕܸܫܵܐ 245 ܘܟܸܢ ܐܵܦ ܥܲܡܵܐ ܝܵܗ̇ܒܿܝܼܢ ܒܗܲܝܟܿܠܵܐ ܒܹܗ ܒܐܸܣܟܹܿܡܵܐ ܀ 246 ܙܵܕܹܩ ܠܐܲܝܢܵܐ ܕܢܸܬܸܿܠ ܫܠܵܡܵܐ ܠܐܲܚܘܼܗܝ ܒܥܹܕܿܬܵܐ: pb. 278 247 ܕܲܢܫܝܼܓܼ ܠܸܒܹܿܗ ܡܼܢ ܟܠ ܐܲܟܿܬܼܵܐ ܘܚܸܡܬܼܵܐ ܘܝܲܨܪܵܐ ܀ 248 :ܗܵܢܵܘ̇ ܫܠܵܡܵܐ ܕܡܸܬܹܐܵܘܹܝܢ ܒܹܗ ܥܝܼܪܹ̈ܐ ܘܐ̄ܢܵܫܵܐ 249 ܒܝܵܘܡ̇ܐ ܕܐܵܬܹܿܐ ܚܲܬܼܢܵܐ ܫܒܼܝܼܚܵܐ ܠܲܡܕܼܵܢ ܟܠܵܐ ܀ 250 :ܗܵܢܵܘ̇ ܫܠܵܡܵܐ ܕܠܲܝܬܿ ܒܹܗ ܢܸܟܼܠܵܐ ܘܠܵܐ ܣܸܢܐܬܼܵܐ 251 ܐܸܠܵܐ ܟܠܹܗ ܢܘܼܗܪܵܐ ܒܢܘܼܗܪܵܐ ܘܚܘܼܒܵܐ ܫܲܠܡܵܐ ܀ 252 :ܛܘܼܒܼܵܘܗܝ ܠܐܲܝܢܵܐ ܕܝܵܗܹ̇ܒܼ ܫܠܵܡܵܐ ܒܚܘܼܒܵܐ ܠܐܲܚܘܼܗܝ 253 ܕܗܘ̤ܝܘܼ ܡܩܲܒܸܿܠ ܫܠܵܡܵܐ ܓܡܝܼܪܵܐ ܒܓܼܵܘ ܪܸܥܝܵܢܹܗ ܀ 254 :ܫܠܵܡܵܐ ܐܝܼܬܼܵܘܗܝ ܫܡܹܗ ܕܲܡܫܝܼܚܵܐ ܡܫܲܝܸܢ ܟܠܵܐ 255 ܕܗܘ̤ܝܘܼ ܕܫܲܝܸܢ ܒܹܝܬܼ ܐܲܪ̈ܥܵܢܹܐ ܠܲܫܡܲܝܵܢܹ̈ܐ ܀ 256 :ܛܘܼܒܼܵܘܗܝ ܠܐܲܝܢܵܐ ܕܫܲܝܸܢ ܠܸܒܹܿܗ ܒܥܸܕܼܵܢ ܐ̄ܪ̈ܵܙܹܐ 257 ܕܡܸܫܬܲܒܼܩܝܼܢ ܠܹܗ ܚܵܘܒܵܘ̈ܗܝ ܟܠܗܘܿܢ ܐܵܦ ܣܲܢ̈ܝܵܬܹܗ ܀ 258 :ܗܵܪܟܵܐ ܙܵܕܹܩ ܠܡܸܥܗܲܕܼ ܡܸܠܬܼܵܐ ܡ̇ܪܵܢܵܝܬܵܐ 259 ܕܲܡܙܲܗܲܪ ܠܲܢ ܣܲܓܿܝܼܵܐܝܼܬܼ ܡܸܛܠ ܐܲܟܿܬܼܵܐ ܀ 260 :ܐܸܢ ܠܲܡ ܬܸܬܿܕܿܟܲܪ ܕܐܲܚܝܼܕܼ ܐܲܚܘܼܟ ܐܲܟܬܼܵܐ ܒܠܸܒܹܿܗ 261 ܫܒܼܘܿܩ ܩܘܼܪܒܵܢܵܟ ܘܙܸܠ ܫܲܝܸܢܲܝܗܝ ܘܗܵܝܕܹܿܝܢ ܩܲܪܸܒܼ ܀ 262 :ܙܸܠ ܫܲܝܸܢܲܝܗܝ ܠܐܲܚܘܼܟ ܠܘܼܩܕܼܵܡ ܡ̇ܪܲܢ ܐܸܡ݂ܲܪ 263 ܘܗܵܝܕܲܝܹܢ ܩܲܪܷܒܼ ܗܵܝ̇ ܕܸܒܼܚܬܼܵܐ ܕܲܡܩܲܪܸܒܼ ܐܲܢ̄ܬܿ ܀ 264 :ܐܵܦܸܢ ܟܵܗܢܵܐ ܥܒܼܝܼܕܼ ܡܸܨܥܵܝܵܐ ܠܲܡܩܲܪܵܒܼܘܼ 265 ܐܸܠܵܐ ܒܫܵܠܡܘܼܬܼ ܟܠܹܗ ܥܲܡܵܐ ܢܸܗܘܸܐ ܡܩܲܪܸܒܼ ܀ 266 :ܚܲܝܵܒܼ ܡܵܕܹܝܢ ܗܵܘ̇ ܕܲܡܩܲܪܸܒܼ ܗܵܢ ܩܘܼܪܒܵܢܵܐ 267 ܕܢܸܫܒܿܘܿܩ ܚܵܘ̈ܒܹܿܐ ܕܲܟܸ̈ܢܵܘܵܬܹܗ ܘܗܵܝܕܲܝܢ ܢܩܲܪܸܒܼ ܀ 268 :ܐܸܢ ܕܹܝܢ ܪܲܚܝܼܩ ܗܵܘ̇ ܕܐܲܚܝܼܕܼ ܥܠܵܘܗܝ ܐܲܟܿܬܼܵܐ ܒܠܸܒܹܿܗ 269 ܢܸܫܒܿܘܿܩ ܚܵܘܒܵܘ̈ܗܝ ܩܕܼܵܡ ܐܲܠܵܗܵܐ ܒܝܲܕܼ ܪܸܥܝܵܢܹܗ ܀ 270 :ܐܸܢ ܢܕܘܼܫ ܟܵܗܢܵܐ ܠܗܵܢ ܦܘܼܩܕܵܢܵܐ ܕܡ̇ܪܵܐ ܕܥܵܠܵܡܹ̈ܐ 271 ܢܸܕܲܥ ܗܵܢܵܐ ܕܠܲܝܬܿ ܠܹܗ ܨܠܘܿܬܹܿܐ ܘܠܵܐ ܩܘܼܪܒܵܢܵܐ ܀ 272 :ܟܲܕܼ ܡܸܬܼܝܼܗܸܒܼ ܫܠܵܡܵܐ ܒܥܹܕܿܬܵܐ ܡܼܢ ܚܲܕܼ ܠܲܐ̄ܚܪܹܝܢ 273 ܩܵܪܹܝܢ ܣܸܦܪܵܐ ܕܲܬܼܪܹܝܢ ܫܡܵܗܹ̈ܐ ܕܚܲܝܹ̈ܐ ܘܡܝܼ̈ܬܹܐ ܀ 274 :ܡܝܼ̈ܬܹܐ ܘܚܲܝܹ̈ܐ ܡܥܲܗܕܼܵܐ ܥܹܕܬܵܐ ܒܗܵܘ̇ ܥܸܕܼܢܵܐ 275 ܕܬܼܵܘܕܲܥ ܕܝܵܬܼܪܝܼܢ ܚܲܝܹ̈ܐ ܘܡܝܼ̈ܬܹܐ ܡܼܢ ܩܘܼܪܒܵܢܵܐ ܀ 276 :ܘܡܲܩܸܦ ܥܲܡܵܐ ܕܲܚܠܵܦ ܟܠܗܘܿܢ ܩܵܬܼܘܿܠܝܼܩܹ̈ܐ 277 ܡܸܠܬܼܵܐ ܕܢܵܩ̇ܦܵܐ ܠܗܵܘ̇ ܕܐܲܟܼܪܸܙ ܣܸܦܪܵܐ ܕܐܸܬܼܩܪܝܼ ܀ 278 :ܚܠܵܦ ܟܠ ܬܸܓܼܡܹ̈ܐ ܪܸܥ̣ܢܲܕܼܘ ܡܸܢܵܗ̇ ܕܥܹܕܲܬܼ ܩܘܼܕܼܫܵܐ 279 ܘܲܚܠܵܦ ܗܵܠܹܝܢ ܕܐܸܫܬܿܝܼܘ ܠܡܲܣܒܼܵܐ ܕܗܵܢ ܩܘܼܪܒܵܢܵܐ ܀ pb. 279 280 :ܕܲܚܠܵܦ ܗܵܠܹܝܢ ܘܲܚܠܵܦ ܥܲܒܼܕܲܝ̈ܟ ܕܲܒܼܟܼܠ ܐܲܬܲܪ 281 ܩܲܒܸܿܠ ܡ̇ܪܝܵܐ ܗܵܢ ܩܘܼܪܒܵܢܵܐ ܕܩܲܪܸܒܼ ܥܲܒܼܕܵܟ ܀ 282 :ܩܵܥܹ̇ܐ ܡܸܟܹܿܝܠ ܟܵܪܘܿܙ ܥܹܕܿܬܵܐ ܘܡܲܪܬܸܿܐ ܠܟܼܠܢܵܫ 283 ܕܢܵܘܕܹܿܐ ܠܡܵܪܝܵܐ ܘܢܸܒܼܥܹܐ ܡܸܢܹܗ ܒܕܿܟܼܝܘܼܬܼ ܠܸܒܵܐ ܀ 284 :ܩܘܼܡܘ ܠܲܡ ܫܲܦܝܼܪ ܚܘܼܪܘ ܒܡܲܕܿܥܲܝ̈ܟܿܘܿܢ ܒܲܕܼܡܸܣܬܲܥܪ̈ܵܢ 285 ܪܲܒܿܘܼ ܐ̄ܪܵܙܵܐ ܕܲܡܫܲܡܫܝܼܬܿܘܿܢ ܐܘܿ ܡ̇ܝ̈ܘܿܬܹܐ ܀ 286 :ܐ̄ܪ̈ܵܙܹܐ ܕܚܝܼܠܹ̈ܐ ܗܵܐ ܡܸܬܼܩܲܕܼܫܝܼܢ ܒܐܝܼ̈ܕܲܝ ܟܵܗܢܵܐ 287 ܒܕܼܚܠܵܐ ܘܩܸܢܛܵܐ ܢܸܗܘܸܐ ܟܠܢܵܫ ܥܲܕܼ ܡܸܬܼܓܲܡܪܝܼܢ ܀ 288 :ܟܵܗܢܵܐ ܒܲܠܚܘܿܕܼ ܩ̣ܪܸܒܼ ܡܼܢ ܟܲܕܿܘܼ ܠܲܡܨܲܠܵܝܘܼ 289 ܨܲܠܵܘ ܥܲܡܹܗ ܕܢܸܣܓܸܿܐ ܫܠܵܡܟܼܘܿܢ ܒܡܸܨܥܵܝܘܼܬܹܗ ܀ 290 :ܐܲܪܟܸܿܢܘ ܠܐܲܪܥܵܐ ܚܝܵܪܵܐ ܕܥܲܝܼܢܹ̈ܐ ܕܠܸܒܵܘܵܬܼ̈ܟܼܘܿܢ 291 ܘܲܡܬܼܘܿܚܘ ܠܪܵܘܡ̇ܐ ܚܝܵܪܑܵܐ ܟܲܣܝܵܐ ܕܪ̈ܥܝܵܢܲܝܟܿܘܿܢ ܀ 292 :ܘܒܲܙܗܝܼܪܘܼܬܼܵܐ ܒܥܵܘ ܘܐܸܬܼܟܲܫܲܦܘ ܠܐܲܠܵܗ ܟܠܵܐ 293 ܒܗܵܢ ܥܸܕܵܢܵܐ ܕܲܡܠܸܐ ܪܬܹܝܬܼܵܐ ܘܕܸܚܠܵܐ ܪܲܒܵܐ ܀ 294 :ܘܐ̄ܢܵܫ ܠܵܐ ܢܲܡܪܲܚ ܠܲܡܡܲܠܵܠܘܼ ܡܸܠܬܼܵܐ ܒܦܘܼܡܹܗ 295 ܕܥܲܠ ܦܘܼܩܕܵܢܵܐ ܦܵܣ݁ܥ ܥܵܒܲ݁ܪ ܗܵܘ̇ ܕܲܡܡܲܠܸܠ ܀ 296 :ܘܡܼܢ ܕܲܡܨܲܠܸܐ ܒܠܸܒܵܐ ܢܨܲܠܸܐ ܘܠܵܐ ܒܣܸܦ̈ܘܵܬܼܵܐ 297 ܘܲܒܼܪܸܥܝܵܢܵܐ ܢܸܒܼܥܸܐ ܪ̈ܲܚܡܹܐ ܘܠܵܐ ܒܠܸܫܵܢܵܐ ܀ 298 :ܘܲܒܫܲܠܝܘܼܬܼܵܐ ܘܲܒܼܕܼܚܠܬܼܵܐ ܗ̤ܘܲܝܬܿܘܿܢ ܩܵܝ̇ܡܝܼܢ 299 ܕܗܵܐ ܥܲܡܲܢ ܗ̄ܘ̣ ܫܠܵܡܵܐ ܗܵܘ̇ ܕܲܪܲܒܿ ܡܼܢ ܟܠ ܡܲܕܲܥ ܀ 300 :ܒܗܵܢ ܥܸܕܵܢܵܐ ܓܵܠܹ̇ܐ ܟܵܗܢܵܐ ܠܐ̄ܪ̈ܵܙܹܐ ܣܓܼܝܼܕܹ̈ܐ 301 ܘܲܠܫܘܿܫܸܦܵܐ ܕܲܠܥܸܠ ܡܸܢܗܘܿܢ ܠܲܣܛܲܪ ܫܵܕܹܐ ܀ 302 :ܠܵܐ ܗܼ̄ܘܵܐ ܩܝܵܡܬܵܐ ܡܪܲܙܙܵܐ ܗܵܕܹܐ ܡܵܐ ܕܡܸܬܼܢܲܣܒܵܐ 303 ܒܕܼܵܐܦܠܵܐ ܟܹܐܦܵܐ ܥܒܸܕܵܢ ܩܝܵܡܬܵܐ ܐܸܬܼܥܲܓܿܠܲܬ̤ ܗ̄ܘܼܵܬܼ ܀ 304 :ܒܵܬܼܵܪ ܩܝܵܡܬܵܐ ܐܲܪܚܼܡ ܥܲܓܸܿܠ ܥܝܼܪܵܐ ܠܟܹܐܦܵܐ 305 ܘܠܫܘܿܫܸܦܵܐ ܡܪܝܼܡܝܼܢ ܟܵܗܢܹ̈ܐ ܡܼܢ ܩܕܼܵܡ ܐ̄ܪܵܙܹܗ ܀ 306 :ܗܵܝܕܲܝܹܢ ܟܵܗܢܵܐ ܩܕܼܵܡ ܟܠܡܸܕܹܿܡ ܠܥܲܡܵܐ ܡܒܲܪܸܟ 307 ܒܗܵܘ̇ ܩܵܢܘܿܢܵܐ ܕܒܹܗ ܠܡܗܲܝܡܢܹ̈ܐ ܡܲܫܡܲܥ ܩܵܠܹܗ ܀ 308 :ܛܲܝܒܿܘܼܬܹܗ ܠܲܡ ܕܝܼܫܘܼܥ ܡܵܪܲܢ ܘܚܘܼܒܹܿܗ ܕܐܲܒܼܵܐ 309 ܘܫܘܬܵܦܘܼܬܼܵܐ ܕܪܘܼܚܵܐ ܕܩܘܼܕܼܫܵܐ ܬܸܗܘܸܐ ܥܲܡܲܢ ܀ 310 :ܗܵܝ̇ ܛܲܝܒܲܘܼܬܼܵܐ ܕܝܲܗܼ̄ܒܼܠܲܢ ܡ̇ܪܲܢ ܒܝܲܕܼ ܡܹܐܬܼܝܼܬܹܗ 311 ܗܝ̤ ܬܸܬܸܿܠ ܠܲܢ ܓܲܠܝܘܼܬܼ ܐܲܦܹ̈ܐ ܩܕܼܵܡ ܪܲܒܿܘܼܬܹܗ ܀ pb. 280 312 :ܚܘܼܒܹܿܗ ܕܐܲܒܼܵܐ ܕܫܲܕܿܪ ܨܹܐܕܲܝܢ ܠܲܒܼܪܵܐ ܕܗܢܹܗ 313 ܗܘ̤ ܢܸܦܬܲܚ ܠܲܢ ܬܲܪܥܵܐ ܕܪ̈ܲܚܡܹܐ ܒܝܘܿܡ ܡܹܐܬܼܝܼܬܹܗ ܀ 314 :ܫܵܘܬܵܦܘܼܬܼܵܐ ܕܪܘܼܚܵܐ ܕܩܘܼܕܼܫܵܐ ܕܠܵܗ̇ ܐܸܫܬܿܘܝܼܢܲܢ 315 ܗܝ̤ ܬܩܲܕܹܿܫ ܠܲܢ ܘܬܸܡܪܘܼܩ ܡܸܢܲܢ ܨܵܐܬܼܵܐ ܕܗܵܘܒܲܝ̈ܢ ܀ 316 :ܗܵܝܕܲܝܹܢ ܡܥܲܬܸܿܕ ܒܲܙܗܝܼܪܘܼܬܼܵܐ ܠܥܲܡܵܐ ܘܐܸܡܲ݁ܪ 317 ܕܲܠܥܸܠ ܢܸܗܘܘܿܢ ܪܸ̈ܥܝܵܢܲܝܟܿܘܿܢ ܒܗܵܕܹܐ ܫܵܥܬܼܵܐ ܀ 318 :ܐܲܝܟܵܐ ܕܝܵ̇ܬܸܒܼ ܡܲܠܟܵܐ ܡܫܝܼܚܵܐ ܡܼܢ ܝܲܡܝܼܢܵܐ 319 ܠܵܐ ܬܸܬܼܥܢܘܿܢ ܒܗܸܪܓܵܐ ܣܪܝܼܩܵܐ ܕܐܲܪ̈ܥܵܢܝܵܬܵܐ ܀ 320 :ܚܘܼܪܘ ܒܗܵܘ̇ ܕܲܩܛܝܼܠ ܗܵܫܵܐ ܒܡܲܕܒܿܚܵܐ ܐ̄ܪܵܙܵܢܵܐܝܼܬܼ 321 ܕܝܵܬܹܿܒܼ ܒܪܵܘܡ̇ܐ ܘܒܼܵܥܹ̇ܐ ܪ̈ܲܚܡܹܐ ܥܲܠ ܚܲܛܝܹ̈ܐ ܀ 322 :ܥܵܢܹ̇ܐ ܥܲܡܵܐ ܠܘܵܬܼܵܟ ܡ̇ܪܝܵܐ ܬܠܹܝܢ ܪܸ̈ܥܝܵܢܲܝܢ 323 ܐܲܠܵܗܵܐ ܐܲܒܼܵܐ ܘܐܝܼܣܚܵܩ ܘܝܲܥܩܘܿܒܼ ܡܲܠܟܵܐ ܡܫܲܒܿܚܵܐ ܀ 324 :ܡܲܠܟܵܐ ܡܫܲܒܿܚܵܐ ܕܫܲܒܿܚܘܼܗܝ ܟܹܐܢܹ̈ܐ ܘܐܲܒܼܵܗܵܬܼܵܐ 325 ܘܐܸܫܬܿܒܲܚܘ ܒܹܗ ܘܒܹܗܘ ܡܫܲܒܿܚܝܼܢ ܕܠܵܐ ܫܘܼܠܵܡܵܐ ܀ 326 :ܡ̇ܘܣܸܦ ܟܵܗܢܵܐ ܕܗܵܢ ܩܘܼܪܒܵܢܵܐ ܡܩܲܒܿܠܵܐ ܘܕܲܟܼܝܵܐ 327 ܗܵܐ ܡܸܬܼܩܲܪܲܒܼ ܠܡܵܪܝܵܐ ܡܵܪܵܐ ܕܪܵܘܡܵܐ ܘܥܘܼܡܩܵܐ ܀ 328 :ܗܵܢܵܘ̇ ܡܵܪܵܐ ܕܫܲܩ݂ܲܠ ܘܫܵܩܹ̇ܠ ܚܛܝܼܬܹܗ ܕܥܵܠܡܵܐ 329 ܡܸܬܿܕܲܒܲܚ ܗܵܫܵܐ ܕܠܲܚܛܵܗܲܝ̈ܟܿܘܿܢ ܢܸܥܛܸܐ ܘܢܸܫܒܿܘܿܩ ܀ 330 :ܗܵܐ ܡܸܬܼܩܲܪܲܒܼ ܚܠܵܦ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ 331 ܕܟܼܠܗܘܿܢ ܒܲܚܕܼܵܐ ܢܸܬܼܒܲܣܡܘܼܢ ܒܹܗ ܒܦܲܓܼܪܵܐ ܘܢܲܦܫܵܐ ܀ 332 :ܗܵܐ ܡܸܬܼܩܲܪܲܒܼ ܚܠܵܦ ܚܲܛܝܹ̈ܐ ܘܲܚܠܵܦ ܟܹܐܢܹ̈ܐ 333 ܕܢܸܬܼܚܲܣܘܿܢ ܒܹܗ ܡܼܢ ܟܘܼ̈ܡܵܬܼܵܐ ܕܲܚܛܵܗܲܝ̈ܗܘܿܢ ܀ 334 :ܗܵܐ ܡܸܬܼܩܲܪܲܒܼ ܚܠܵܦ ܥܲܢܝܼ̈ܕܹܐ ܘܲܚܠܵܦ ܚܲܝܹ̈ܐ 335 ܕܪ̈ܲܚܡܹܐ ܢܸܫܟܿܚܘܼܢ ܒܲܕܼܒܼܝܼܚܘܼܬܹܗ ܟܠܗܘܿܢ ܥܲܡܡܹ̈ܐ ܀ 336 :ܗܵܐ ܡܸܬܼܩܲܪܲܒܼ ܠܐܲܠܵܗ ܟܠܵܐ ܐܲܝܟ ܪܲܗܒܼܘܿܢܵܐ 337 ܕܲܢܫܵܘܙܸܒܼ ܠܲܢ ܡܼܢ ܬܲܫܢܝܼܩܵܐ ܕܲܒܼܓܹܗܲܢܵܐ ܀ 338 :ܥܵܢܹ̇ܐ ܥܲܡܵܐ ܝܵܐܹ̇ܐ ܘܙܵܕܸܩ ܘܫܵܘܹ̇ܐ ܘܲܦܐܹܐ 339 ܠܲܡܩܲܪܵܒܼܘܼ ܗܵܢ ܩܘܼܪܒܵܢܵܐ ܚܠܵܦ ܟܠ ܒܸܪ̈ܝܵܢ ܀ 340 :ܫܵܠܹ̇ܐ ܡܸܟܹܿܝܠ ܡܠܹܗ ܓܘܼܫܡܵܐ ܥܹܕܿܬܵܢܵܝܵܐ 341 ܘܓܼܵܥܹ̇ܐ ܟܠܢܵܫ ܠܲܡܨܲܠܵܝܘܼ ܠܵܒܵܢܵܐܝܼܬܼ ܀ 342 :ܟܵܗܢܹ̈ܐ ܫܵܠܹ̇ܝܢ ܘܲܡܫܲܡܵܢܹ̈ܐ ܒܫܸܬܼܩܵܐ ܩܵܝܡܝܼܢ 343 ܥܲܡܵܐ ܟܠܹܗ ܢܝܼܚ ܘܲܡܫܲܝܲܢ ܫܲܟܿܘܼܬܼ ܘܲܒܼܗܝܼܠ ܀ 344 ܡܲܕܼܒܿܚܵܐ ܒܗܸܕܼܪܵܐ ܡܟܲܠܲܠ ܩܵܐܹ̇ܡ ܘܲܒܼܬܸܫܒܵܘܿܚܬܵܐ: pb. 281 345 ܘܲܠܥܸܠ ܡܸܢܹܗ ܣܒܲܪܬܼܵܐ ܕܚܲܝܹ̈ܐ ܘܩܲܝܣܵܐ ܣܓܼܝܼܕܼܵܐ ܀ 346 :ܐ̄ܪ̈ܵܙܹܐ ܣܕܼܝܼܪܝܼܢ ܦܹܝܪ̈ܡܹܐ ܡܲܥ̄ܛܪܝܼܢ ܫܪ̈ܵܓܹܐ ܡܲܢ̄ܗܪܝܼܢ 347 ܘܲܡܫܲܡܫܵܢܹ̈ܐ ܡܪܲܚܦܝܼܢ ܘܡܲܟܼܫܝܼܢ ܒܲܕܼܡܘܼܬܼ ܥܝܼܪܹ̈ܐ ܀ 348 :ܫܸܠܝܵܐ ܕܥܲܡܝܼܩ ܫܲܝܢܵܐ ܕܲܒܼܗܝܼܠ ܫܪܸܐ ܒܗܵܘ̇ ܐܲܬܼܪܵܐ 349 ܙܝܼܘܵܐ ܘܫܘܼܒܼܚܵܐ ܗܸܕܪܵܐ ܘܥܘܼܫܢܵܐ ܡܠܸܐ ܘܲܡܫܲܦܲܥ ܀ 350 :ܦܵܬܲܚ ܦܘܼܡܹܗ ܠܸܫܵܢ ܥܹܕܿܬܵܐ ܟܵܗܢܵܐ ܙܲܗܝܵܐ 351 ܘܥܲܡ ܐܲܠܵܗܵܐ ܒܐ̄ܪܵܙܵܐ ܡܡܲܠܸܠ ܐܲܝܟ ܒܲܝܬܵܝܵܐ ܀ 352 :ܬܵܢܹ̇ܐ ܫܘܼܒܼܚܵܐ ܕܗܵܝ̇ ܐܝܼܬܼܘܼܬܼܵܐ ܕܠܵܐ ܡܸܬܿܕܲܪܟܵܐ 353 ܕܐܝܼܬܹܝܗ̇ ܥܸܠܬܼܵܐ ܕܡܸܬܼܝܲܕܼܥܵܢܹ̈ܐ ܘܡܸܬܼܪ̈ܲܓܼܫܢܹܐ ܀ 354 :ܕܠܵܐ ܡܸܬܿܕܲܪܟܵܐ ܘܠܵܐ ܡܸܬܼܒܲܨܝܵܐ ܘܠܵܐ ܡܸܬܼܥܲܩܒܼܵܐ 355 ܘܠܵܐ ܡܸܬܼܝܲܕܼܥܵܐ ܡܼܢ ܦܲܓܼܪ̈ܵܢܹܐ ܘܠܵܐ ܡܼܢ ܥܝܼܪܹ̈ܐ ܀ 356 :ܚܕܼܵܐ ܐܘܼܣܝܼܵܐ ܚܕܼܵܐ ܡ̇ܪܘܼܬܼܵܐ ܚܲܕܼ ܫܘܼܠܛܵܢܵܐ 357 ܚܲܕܼ ܨܸܒܼܝܵܢܵܐ ܕܠܵܐ ܡܸܫܬܲܚܠܲܦ ܡܼܢ ܡ̇ܐ ܕܐܝܼܬܼܵܘܗܝ ܀ 358 :ܚܲܕܼ ܒܵܪܘ̇ܝܵܐ ܕܐܲܬܼܩܸܢ ܒܪܸܡܙܹܗ ܪܵܘܡ̇ܐ ܘܥܘܼܡܩܵܐ 359 ܘܠܲܫܡܹܗ ܡܫܲܒܿܚܝܼܢ ܥܝܼܪܹ̈ܐ ܒܪܵܘܡ̇ܐ ܘܐ̄ܢܵܫܵܐ ܒܥܘܼܡܩܵܐ ܀ 360 :ܚܲܕܼ ܐܵܠܵܗܵܐ ܕܲܒܼܝܲܕܼ ܡܘܼܫܹܐ ܫܵܘܕܲܥ ܕܐܝܼܬܼܵܘܗܝ 361 ܘܒܼܝܼܫܘܿܥ ܡ̇ܪܲܢ ܓܼܠܵܐ ܘܚܵܘܝܼ ܠܲܢ ܬܠܝܼܬܼܵܝܘܼܬܹܗ ܀ 362 :ܬܠܵܬܼܵܐ ܩܢܘܿܡܹ̈ܐ ܝܸܠܦܲܬ̤ ܥܹܕܼܬܵܐ ܡܼܢ ܦܵܪܘܿܩܲܢ 363 ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܚܕܼܵܐ ܐܝܼܬܼܘܼܬܼܵܐ ܀ 364 :ܬܠܵܬܼܵܐ ܒܢܘܿܡܹ̈ܐ ܕܠܲܝܬܿ ܒܗܘܿܢ ܕܩܲܕܼܝܼܡ ܘܲܐ̄ܚܪܵܝ ܠܚܲܒܼܪܹܗ 365 ܘܠܲܝܬܿ ܦܘܼܪܫܵܢܵܐ ܐܸܠܵܐ ܒܲܠܚܘܿܕܼ ܒܕܼܝܼ̈ܠܵܝܵܬܼܵܐ ܀ 366 :ܐܲܒܼܵܗܘܼܬܼܵܐ ܘܝܼܠܝܼܕܼܘܼܬܼܵܐ ܘܢܵܦܘܿܩܘܼܬܼܵܐ 367 ܚܲܕܼ ܨܸܒܼܝܵܢܵܐ ܚܕܼܵܐ ܬܸܫܒܿܘܿܚܬܵܐ ܚܕܼܵܐ ܡ̇ܪܘܼܬܼܵܐ ܀ 368 :ܐ̄ܪܵܙܵܐ ܕܟܼܠܹܗ ܓܢܝܼܙ ܘܲܡܣܲܬܲܪ ܘܲܟܼܣܸܐ ܡܼܢ ܟܠ 369 ܘܓܼܵܗ̇ܪܝܼܢ ܥܝܼܪܹ̈ܐ ܠܡܸܬܼܒܲܩܵܝܘܼ ܒܓܼܢܝܼܙܘܼܬܹܗ ܀ 370 :ܡܲܩܸܦ ܟܵܗܢܵܐ ܕܟܼܠܗܘܿܢ ܥܝܼܪܹ̈ܐ ܒܕܼܚܠܵܐ ܩܵܝ̇ܡܝܼܢ 371 ܠܲܡܫܲܒܵܚܘܼ ܠܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܀ 372 :ܡܲܠܲܐܟܹ̈ܐ ܬܘܼܒܼ ܣܸܓܼܕܲܬܼܵܐ ܡܩܲܪܒܼܝܼܢ ܠܗܵܝ̇ ܪܲܒܿܘܼܬܼܵܐ 373 ܘܪܲܒܲܝ ܚܲܝܠܹ̈ܐ ܫܘܼܒܼܚܵܐ ܡܲܣܩܝܼܢ ܐܲܡܝܼܢܵܐܝܼܬܼ ܀ 374 :ܟܪ̈ܘܿܒܹܿܐ ܡܗܲܠܠܝܼܢ ܣܪ̈ܵܦܹܐ ܡܩܲܕܿܫܝܼܢ ܒܩܘܼܕܵܫܲܝ̈ܗܘܿܢ 375 ܘܫܲܠܝܼܛܵܢܹ̈ܐ ܘܡ̇ܪ̈ܵܘܵܬܼܵܐ ܒܗܘܼܠܵܠܲܝ̈ܗܘܿܢ ܀ 376 :ܟܠܗܘܿܢ ܒܲܚܕܼܵܐ ܩܵܥܹ̇ܝܢ ܘܐܵܡ̇ܪܝܼܢ ܗܵܢܵܐ ܠܗܵܢܵܐ 377 ܘܥܵܢܹ̇ܐ ܥܲܡܵܐ ܩܲܕܼܝܼܫ ܡ̇ܪܝܵܐ ܕܲܫܪܸܐ ܒܢܘܼܗܪܵܐ ܀ 378 :ܩܲܕܿܝܼܫ ܩܲܕܼܝܼܫ ܩܲܕܿܝܼܫ ܡ̇ܪܝܵܐ ܥܵܢܹ̇ܐ ܥܲܡܵܐ 379 ܕܲܡܠܹܝܢ ܫܡܲܝܵܐ ܘܐܲܪܥܵܐ ܟܠܵܗ̇ ܡܼܢ ܬܸܫ̈ܒܿܚܵܬܹܗ ܀ 380 ܩܥܵܬܼܵܐ ܕܩܲܕܼܝܼܫ ܬܠܵܬܼ ܙܲܒܼ̈ܢܵܬܼܵܐ ܗܵܕܹܐ ܡܣܲܟܼܠܵܐ: pb. 282 381 ܗܵܝ̇ ܕܹܝܢ ܕܡ̇ܪܝܵܐ ܕܚܲܕܼܘ ܟܝܵܢܵܐ ܕܐܝܼܬܼܝܵܐ ܡܫܵܘܕܿܥܵܐ ܀ 382 :ܩܲܕܼܿܝܼܫ ܐܲܒܼܵܐ ܩܢܸܐ ܕܝܼܠܵܝܬܵܐ ܕܐܲܒܼܵܗܘܼܬܼܵܐ 383 ܕܐܝܼܬܼܵܘܗܝ ܥܸܠܬܼܵܐ ܐܵܦ ܝܵܠܘܿܕܵܐ ܘܠܵܐ ܝܼܠܝܼܕܼܵܐ ܀ 384 :ܩܲܕܿܝܼܫ ܗ̄ܘ̣ ܒܪܵܐ ܩܢܸܐ ܕܝܼܠܵܝܬܵܐ ܕܝܼܠܝܼܕܼܘܼܬܼܵܐ 385 ܕܡܸܢܹܗ ܕܐܲܒܼܵܐ ܝܼܠܝܼܕܼ ܡܸܡܬܼܘܿܡ ܕܠܵܐ ܫܘܼܪܵܝܵܐ ܀ 386 :ܩܲܕܝܼܫ ܪܘܼܚܵܐ ܩܢܸܐ ܕܝܼܠܵܝܬܵܐ ܕܢܵܦܘܿܩܘܼܬܼܵܐ 387 ܕܡܸܢܹܗ ܕܐܲܒܼܵܐ ܢܵܦܹ̇ܩ ܘܐܝܼܬܼܵܘܗܝ ܠܥܸܠ ܡܼܢ ܙܲܒܼܢܹ̈ܐ ܀ 388 :ܒܗܵܠܹܝܢ ܩܵܥ̇ܝܵܐ ܟܠܵܗ̇ ܥܹܕܿܬܵܐ ܘܦܵܢ̇ܝܵܐ ܠܫܸܠܝܵܐ 389 ܘܡܲܩܸܦ ܟܵܗܢܵܐ ܠܡܸܬܼܥܢܵܝܘܼ ܥܲܡ ܐܲܠܵܗܵܐ ܀ 390 :ܡ̇ܘܕܼܵܐ ܠܪ̈ܲܚܡܹܐ ܘܲܠܛܲܝܒܿܘܼܬܼܵܐ ܕܐܸܣܬܲܥܪܲܬ̤ ܒܲܢ 391 ܒܚܲܕܼ ܓܸܠܝܵܢܹܗ ܕܡܸܠܬܼܵܐ ܕܐܸܬܼܓܿܠܝܼ ܒܦܲܓܼܪܵܐ ܕܡܸܢܲܢ ܀ 392 :ܦܲܓܼܪܵܐ ܕܡܸܢܲܢ ܢܸܣܲܒܼ ܒܵܪܘܿܝܵܐ ܣܓܼܝܼܕܼ ܐܝܼܩܵܪܹܗ 393 ܕܲܢܚܲܕܹܿܬܼ ܒܹܗ ܨܲܠܡܹܗ ܕܐܵܕܼܵܡ ܕܲܒܼܠܼܝܼ ܘܐܲܫܚܸܬܼ ܀ 394 :ܗܲܝܟܿܠܵܐ ܡܠܝܼܠܵܐ ܒܼܢܵܐ ܪܘܼܚ ܩܼܕܕܼܫܵܐ ܒܥܘܼܒܵܗ̇ ܕܲܡܪܝܲܡ 395 ܒܝܲܕܼ ܨܸܒܼܝܵܢܵܐ ܬܠܝܼܬܼܵܝܘܼܬܼܵܐ ܟܠܵܗ̇ ܢܸܩܦܲܬ̤ ܀ 396 :ܐܸܬܿܬܿܣܝܼܡ ܒܐܘܿܪܝܵܐ ܘܐܸܬܼܟܿܪܸܟ ܒܪ̈ܘܼܩܥܹܐ ܐܲܝܟ ܒܲܪܢܵܫܵܐ 397 ܘܫܲܒܿܚܘܼܗܝ ܥܝܼܪܹ̈ܐ ܒܗܘܼܠܵܠܲܝ̈ܗܘܿܢ ܐܲܝܟ ܐܲܠܵܗܵܐ ܀ 398 :ܩܲܪܸܒܼ ܕܸܒܼܚܹ̈ܐ ܢܵܡܘܿܣܵܐܝܼܬܼ ܐܲܝܟ ܒܲܪܢܵܫܵܐ 399 ܘܩܲܒܸܿܠ ܣܸܓܼܕܿܬܼܵܐ ܡܼܢ ܦܵܪ̈ܣܵܝܹܐ ܐܲܝܟ ܐܲܠܵܗܵܐ ܀ 400 :ܛܲܥܼܢܹܗ ܫܸܡܥܘܿܢ ܠܥܸܠ ܡܼܢ ܕܪ̈ܵܥܵܘܗܝ ܐܲܝܟ ܒܲܪܢܵܫܵܐ 401 ܘܫܲܡܗܹܗ ܚܢܵܢܵܐ ܕܚܵܐܹ̇ܢ ܟܠܵܐ ܐܲܝܟ ܐܲܠܵܗܵܐ ܀ 402 :ܢܵܡܘܿܣܵܐ ܢܼܛܲܪ ܡܫܲܡܠܝܵܐܝܼܬܼ ܐܲܝܟ ܒܲܪܢܵܫܵܐ 403 ܘܝܲܗ̣̄ܒܼ ܢܵܡܘܿܣܵܐ ܚܲܕܼܬܼܵܐ ܕܝܼܠܹܗ ܐܲܝܟ ܐܲܠܵܗܵܐ ܀ 404 :ܥ̣ܡܲܪ ܗܼ̄ܘܵܐ ܒܝܘܿܪܕܢܵܢ ܡܼܢ ܝܘܿܚܲܢܵܢ ܐܲܝܟ ܒܲܪܢܵܫܵܐ 405 ܘܐܸܬܼܦܬܲܚ ܫܡܲܝܵܐ ܠܐܝܼܩܵܪ ܥܡܵܕܹܗ ܐܲܝܟ ܐܲܠܵܗܵܐ ܀ 406 :ܥܲܠ̣ ܠܡܸܫܬܿܘܼܬܼܵܐ ܕܩܵܛܢܹܐ ܡܕܝܼܢ̄ܬܵܐ ܐܲܝܟ ܒܲܪܢܵܫܵܐ 407 ܘܫܲܚܠܸܦ ܡܲܝܵ̈ܐ ܘܲܗܘ̤ܵܘ ܚܲܡܪܵܐ ܐܲܝܟ ܐܲܠܵܗܵܐ ܀ 408 :ܨܵܡ ܗ̄ܘܼܵܐ ܒܚܘܼܪܒܵܐ ܐܲܪܒܿܥܝܼܢ ܝܵܘܡܝܼ̈ܢ ܐܲܝܟ ܒܲܪܢܵܫܵܐ 409 ܘܲܢܚܸܬܼܘ ܥܝܼܪܹ̈ܐ ܕܲܢܫܲܡܫܘܼܢܵܝܗܝ ܐܲܝܟ ܐܲܠܗܵܐ ܀ 410 :ܕܡܸܟ ܒܲܣܦܝܼܢ̄ܬܵܐ ܥܲܡ ܬܲܠܡܝܼܕܼܵܘ̈ܗܝ ܐܲܝܟ ܒܲܪܢܵܫܵܐ 411 ܘܲܟܼܐܵܐ ܒܪܘܼܚܵܐ ܘܫܵܠܝܼ ܠܝܲܡܵܐ ܐܲܝܟ ܐܲܠܵܗܵܐ ܀ 412 ܚ̣ܙܲܩ ܗ̄ܘ̣ܵܐ ܘܫܲܢܝܼ ܠܐܲܬܼܪܵܐ ܚܘܼܪܒܵܐ ܐܲܝܟ ܒܲܪܢܵܫܵܐ: pb. 283 413 ܘܫܲܪܬܲܚ ܠܲܚܡܵܐ ܘܣܲܒܲܥ ܐܲܠܦܹ̈ܐ ܐܲܝܟ ܐܲܠܵܗܵܐ ܀ 414 :ܐܸܟܸܿܠ̣ ܘܐܸܫܬܿܝܼ ܘܗܲܠܸܟ ܘܲܠܼܐܝܼ ܐܲܝܟ ܒܲܪܢܵܫܵܐ 415 ܘܲܪܕܲܦ ܫܹܐܕܹ̈ܐ ܒܡܸܠܲܬܼ ܦܘܼܡܹܗ ܐܲܝܟ ܐܲܠܵܗܵܐ ܀ 416 :ܨܲܠܝܼ ܘܲܫܗ݂ܲܪ ܘܐܵܘܕܿܝܼ ܘܲܣܓܸܕܼ ܐܲܝܟ ܒܲܪܢܵܫܵܐ 417 ܘܲܫܒ݂ܲܩ ܚܵܘ̈ܒܹܿܐ ܘܚܲܣܝܼ ܚܛܵܗܹ̈ܐ ܐܲܝܟ ܐܲܠܵܗܵܐ ܀ 418 :ܫܐܸ݂ܠ ܗ̄ܘܼܵܐ ܡܲܝܵ̈ܐ ܡܼܢ ܫܵܡܪܵܝܬܵܐ ܐܲܝܟ ܒܲܪܢܵܫܵܐ 419 ܘܲܓܼܠܵܐ ܘܒܲܕܸܿܩ ܠܲܣܬܼܝܼܪ̈ܵܬܼܵܗ̇ ܐܲܝܟ ܐܲܠܵܗܵܐ ܀ 420 :ܐܸܣܬܿܡܸܟ ܒܒܲܝܬܹܿܗ ܕܲܦܪܝܼܫܵܝܵܐ ܐܲܝܟ ܒܲܪܢܵܫܵܐ 421 ܘܲܠܚܲܛܵܝܬܵܐ ܫܒ݂ܲܩ ܠܵܗ̇ ܚܛܗܹ̈ܝܗ̇ ܐܲܝܟ ܐܲܠܵܗܵܐ ܀ 422 :ܣܠܸܩ̣ ܠܛܘܼܪ ܬܵܒܼܘܿܒܼ ܥܲܡ ܬܲܠܡܝܼܕܼܵܘ̈ܗܝ ܐܲܝܟ ܒܲܪܢܵܫܵܐ 423 ܘܲܠܥܹܢܲܝܗܘܿܢ ܓܠܵܐ ܬܸܫܒܿܘܿܚܬܹܿܗ ܐܲܝܟ ܐܲܠܵܗܵܐ ܀ 424 :ܕܲܡܲܥ ܘܲܒܼܟܼܵܐ ܥܲܠ ܠܵܥܵܙܲܪ ܐܲܝܟ ܒܲܪܢܵܫܵܐ 425 ܘܲܩܪ̣ܵܝܗܝ ܘܲܢܦ݂ܲܩ ܒܚܲܝܠܹܗ ܪܲܒܵܐ ܐܲܝܟ ܐܲܠܵܗܵܐ ܀ 426 :ܪܟܸܒܼ ܥܲܠ ܥܝܼܠܵܐ ܘܥܲܠܼ ܠܐܘܿܪܸܫܠܸܡ ܐܲܝܟ ܒܲܪܢܵܫܵܐ 427 ܘܩܲܠܣܘܼܗܝ ܫܲܒܼܪܹ̈ܐ ܒܐܘܿܫܲܥܢܲܝ̈ܗܘܿܢ ܐܲܝܟ ܐܲܠܵܗܵܐ ܀ 428 :ܩ̣ܪܸܒܼ ܨܹܝܕܼ ܬܹܬܵܐ ܘܚܵܘܝܼ ܕܲܟܼܦܸܟ ܐܲܝܟ ܒܲܪܢܵܫܵܐ 429 ܘܐܵܘܒܿܫܵܗ̇ ܡ̣ܢ ܫܹܠܝ ܚܲܝܠܹܗ ܐܲܠܵܗܵܐ ܀ 430 :ܐܲܫܝܼܛ ܪ̈ܓܼܠܹܐ ܕܲܬܼܪܸܥܣܲܪܬܹܿܗ ܐܲܝܟ ܒܲܪܢܵܫܵܐ 431 ܘܫܲܡܲܗ ܢܲܦܫܹܗ ܡ̇ܪܵܐ ܘܪܲܒܵܐ ܐܲܝܟ ܐܲܠܵܗܵܐ ܀ 432 :ܐܸܟܸܿܠܼ ܦܸܨܚܵܐ ܢܵܡܘܿܣܵܝܵܐ ܐܲܝܟ ܒܲܪܢܵܫܵܐ 433 ܘܦܲܪܣܝܼ ܢܸܟܼܠܹܗ ܕܲܣܟܲܪܝܘܿܛܵܐ ܐܲܝܟ ܐܲܠܵܗܵܐ ܀ 434 :ܨܲܠܝܼ ܘܲܕܼܥܸܬܼ ܒܥܸܕܵܢ ܚܲܫܹܗ ܐܲܝܟ ܒܲܪܢܵܫܵܐ 435 ܘܐܲܙܝܼܥ ܘܐܲܪܗܸܒܼ ܠܗܵܢ̇ܘܿܢ ܕܐܲܚܕܿܘܼܗܝ ܐܲܝܟ ܐܲܠܵܗܵܐ ܀ 436 :ܠܲܒܼܟܼܘܼܗܝ ܕܲܚܫܹ̈ܐ ܘܐܸܣܲܪܘ ܐܝܼܕܼܵܘ̈ܗܝ ܐܲܝܟ ܒܲܪܢܵܫܵܐ 437 ܘܐܲܣܝܼ ܠܐܸܕܵܢܵܐ ܕܲܦܣ݂ܲܩ ܫܸܡܥܘܿܢ ܐܲܝܟ ܐܲܠܵܗܵܐ ܀ 438 :ܩܵܡܼ ܒܹܝܬܼ ܕܝܼܢܵܐ ܘܣܲܝܒܲܪ ܒܸܙܚܵܐ ܐܲܝܟ ܒܲܪܢܵܫܵܐ 439 ܘܒܕܹܿܩ ܕܲܥܬܼܝܼܕܼ ܕܢܹܐܬܸܐ ܒܫܘܼܒܼܚܵܐ ܐܲܠܵܗܵܐ ܀ 440 :ܛܥ̣ܢ ܠܲܨܠܝܼܒܹܗ ܠܥܸܠ ܡܼܢ ܟܲܬܼܦܹܐ ܐܲܝܟ ܒܲܪܢܵܫܵܐ 441 ܘܲܓܼܠ̣ܵܐ ܘܒܲܕܸܿܩ ܚܘܼܪܒܵܗ̇ ܕܨܸܗܝܘܿܢ ܐܲܝܟ ܐܲܠܵܗܵܐ ܀ 442 :ܐܸܬܿܬܿܠܝܼ ܒܩܲܝܣܵܐ ܘܣܲܝܒܲܪ ܚܲܫܵܐ ܐܲܝܟ ܒܲܪܢܵܫܵܐ 443 ܘܐܲܙܝܼܥ ܠܐܲܪܥܵܐ ܘܐܲܚܫܸܟ ܠܫܸܡܫܵܐ ܐܲܝܟ ܐܲܠܵܗܵܐ ܀ 444 :ܐܸܬܼܩܲܒܲܥܘ ܒܹܗ ܨܸܨܹ̈ܐ ܒܦܲܓܼܪܹܗ ܐܲܝܟ ܒܲܪܢܵܫܵܐ 445 ܘܲܦܼܬܲܚ ܩܲܒܼܪܹ̈ܐ ܘܐܲܚܝܼ ܠܡܝܼܬܹ̈ܐ ܐܲܝܟ ܐܲܠܵܗܵܐ ܀ 446 :ܩܥܼܵܐ ܒܲܙܩܝܼܦܵܐ ܐܲܠܵܗܝ ܐܲܠܵܗܝ ܐܲܝܟ ܒܲܪܢܵܫܵܐ 447 ܘܲܠܓܲܝܵܣܵܐ ܡܼܠܲܟ ܦܲܪܕܲܝܣܵܐ ܐܲܝܟ ܐܲܠܵܗܵܐ ܀ 448 :ܐܸܬܿܬܿܪܲܥ ܣܸܓܕܹܗ ܒܝܲܕܼ ܠܘܿܟܵܝܬܵܐ ܐܲܝܟ ܒܲܪܢܵܫܵܐ 449 ܘܲܨܪܵܐ ܪܸܡܙܹܗ ܠܐܲܦܲܝ̈ ܬܲܪܥܵܐ ܐܲܝܟ ܐܲܠܵܗܵܐ ܀ 450 :ܚܲܢܛܘܼܗܝ ܠܦܲܓܼܪܹܗ ܘܐܸܬܼܩܒܲܪ ܒܐܲܪܥܵܐ ܐܲܝܟ ܒܲܪܢܵܫܵܐ 451 ܘܐܲܩܝܼܡ ܠܗܲܝܟܿܠܹܗ ܒܚܲܝܠܹܗ ܪܲܒܵܐ ܐܲܝܟ ܐܲܠܵܗܵܐ ܀ pb. 284 452 :ܩܵܝܘܝܼ ܒܩܲܒܼܪܵܐ ܬܠܵܬܼܵܐ ܝܵܘܡܝܼ̈ܢ ܐܲܝܟ ܒܲܪܢܵܫܵܐ 453 ܘܫܲܒܿܚܘܼܗܝ ܥܝܼܪܹ̈ܐ ܒܗܘܼܠܵܠܲܝ̈ܗܘܿܢ ܐܲܝܟ ܐܲܠܵܗܵܐ ܀ 454 :ܐܸܡܲ݁ܪ ܕܩܲܒܸܿܠ ܟܠ ܫܘܼܠܛܵܢܝܼ̈ܢ ܐܲܝܟ ܒܲܪܢܵܫܵܐ 455 ܘܲܡܠܲܟ ܕܥܲܡܲܢ ܐܝܼܬܼܵܘܗܝ ܠܥܵܠܲܡ ܐܲܝܟ ܐܲܠܵܗܵܐ ܀ 456 :ܦܲܩ݂ܲܪ ܠܲܬܼܐܘܿܡ̇ܐ ܠܡܸܓܲܫ ܕܲܦܢܹܗ ܐܲܝܟ ܒܲܪܢܵܫܵܐ 457 ܘܝܲܗ̣̄ܒܼ ܠܗܘܿܢ ܪܘܼܚܵܐ ܪܲܗܒܼܘܢܵܐܝܼܬܼ ܐܲܝܟ ܐܲܠܵܗܵܐ ܀ 458 :ܐܸܟܲܠܼ ܘܐܸܫܬܿܝܼ ܒܵܬܲܪ ܩܝܵܡܬܹܿܗ ܐܲܝܟ ܒܲܪܢܵܫܵܐ 459 ܘܲܣܠܸ݂ܩ ܠܪܵܘܡܵܐ ܘܫܲܕܲܪ ܪܘܼܚܵܐ ܐܲܝܟ ܐܲܠܵܗܵܐ ܀ 460 :ܗܵܕܹܐ ܗ̄ܝܼ ܡܸܟܹܿܝܠ ܬܵܘܕܿܝܼܬܼ ܫܠܝܼܚܹ̈ܐ ܘܐܲܒܼܵܗܗ̈ܬܼܵܐ 461 ܘܟܼܠ ܕܠܵܐ ܫܵܠܹ̇ܡ ܠܗܲܝܡܵܢܘܼܬܼܗܘܿܢ ܠܲܝܬܿ ܠܹܗ ܣܲܒܼܪܵܐ ܀ 462 :ܗܵܢܵܘ̇ ܫܪܵܪܵܐ ܕܐܲܟܼܪܸܙܘ ܘܐܲܠܸܦܘ ܐܲܒܼܵܗ̈ܬܼܵܐ 463 ܐܵܘܕܵܘ ܥܲܡܗܘܿܢ ܕܬܸܣܒܼܘܼܢ ܚܲܝܹ̈ܐ ܠܵܐ ܡ̇ܝܘܿܬܬܹ̈ܐ ܀ 464 :ܚܼܙܲܩ ܡܼܢ ܠܘܵܬܲܢ ܡ̇ܪܲܢܝܼܫܘܿܥ ܠܐܲܬܼܪܵܐ ܕܕܲܠܥܸܠ 465 ܕܲܒܼܡܹܐܬܝܼܬܹܗ ܢܲܣܩܲܢ ܥܲܡܹܗ ܠܡܲܠܟܿܘܼܬܼ ܪܵܘܡ̇ܐ ܀ 466 :ܘܡܸܛܠ ܕܐܸܙܲܠ ܠܐܲܬܼܪܵܐ ܕܪܲܚܝܼܩ ܡܼܢ ܝܼܕܲܥܬܲܢ 467 ܨܒܼܵܐ ܕܲܢܒܲܝܐܲܢ ܒܦܲܓܼܪܹܗ ܘܲܕܿܡܹܗ ܥܲܕܼ ܡܹܐܬܼܝܼܬܹܗ ܀ 468 :ܘܒܲܕܼܠܵܐ ܡܲܨܝܵܐ ܕܦܲܓܼܪܹܗ ܘܲܕܼܡܹܗ ܢܸܬܸܿܠ ܠܥܹܕܿܬܹܿܗ 469 ܦܩ݂ܲܕܼ ܠܲܢ ܕܢܸܥܒܿܕܼܝܼܘܗܝ ܠܐ̄ܪܵܙܵܐ ܗܵܢܵܐ ܒܠܲܚܡܵܐ ܘܚܲܡܪܵܐ ܀ 470 :ܛܘܼܒܼܵܐ ܠܥܲܡܵܐ ܕܲܟܼܪܼ̈ܣܛܝܵܢܹܐ ܡ̇ܢܵܐ ܐܝܼܬܼ ܠܹܗ 471 ܘܐܲܝܢܵܐ ܣܲܒܼܪܵܐ ܢܛܝܼܪ ܠܹܗ ܒܪܵܘܡ̇ܐ ܕܠܵܐ ܫܘܼܠܵܡܵܐ ܀ 472 :ܟܲܕܼ ܓܹܝܪ ܡܲܛܝܼ ܙܲܒܼܢܵܐ ܕܚܲܫܹܗ ܕܡܲܚܸܐ ܟܠܵܐ 473 ܐܸܟܲܠܼ ܦܸܨܚܵܐ ܢܵܡܘܿܣܵܝܵܐ ܥܲܡ ܬܲܠܡܝܸ̈ܕܼܵܘܗܝ ܀ 474 :ܢܣܲܒܼ ܗ̄ܘܼܵܐ ܠܲܚܡܵܐ ܘܒܲܪܸܟ ܘܲܩܨܵܐ ܘܝܲܗ̄ܒܼ ܠܬܲܠܡܝܼ̈ܕܼܵܘܗܝ 475 ܘܐܸܡ݂ܲܪ ܕܗܵܢܵܘ̇ ܦܲܓܼܪܝ ܒܲܫܪܵܪܵܐ ܕܠܵܐ ܦܘܼܠܵܓܼܵܐ ܀ 476 :ܘܲܢܣ݂ܲܒܼ ܟܵܣܵܐ ܘܐܵܘܕܝܘ ܘܒܲܪܸܟ ܘܝܲܗ̣̄ܒܼ ܠܲܫܠܝܼܚܵܘ̈ܗܝ 477 ܘܐܸܡ݂ܲܪ ܕܗܵܢܵܘ̇ ܕܹܡܝ ܫܲܪܝܼܪܵܐ ܕܲܚܠܵܦܲܝܟܿܘܿܢ ܀ 478 :ܘܦܲܩܸܕܼ ܠܗܘܿܢ ܕܢܸܣܒܼܘܼܢ ܢܸܫܬܿܘܿܢ ܡܸܢܹܗ ܟܠܗܘܿܢ 479 ܘܢܸܗܘܸܐ ܡܚܲܣܸܐ ܚܠܵܦ ܚܵܘܲܝ̈ܗܘܿܢ ܥܕܲܡ̇ܐ ܠܥܵܠܲܡ ܀ 480 :ܕܐܵܘܕܿܝܼ ܘܒܲܪܸܟ ܟܬܼܝܼܒܼ ܒܲܣܒܲܪܬܼܵܐ ܡܲܠܝܲܬܼ ܚܲܝܹ̈ܐ 481 ܕܡ̇ܢܵܐ ܐܸܡ݂ܲܪ ܠܵܐ ܐܵܘܕܲܥܘ ܠܲܢ ܫܲܠܝܼܚܹ̈ܐ ܓܒܲܝܵ̈ܐ ܀ 482 :ܪܲܒܿ ܡܲܠܦܵܢܹ̈ܐ ܘܡܲܦܲܫܩܵܢܹ̈ܐ ܬܹܐܵܕܲܘܵܪܘܿܣ 483 ܗܵܟܲܢ ܐܲܫܠܸܡ ܕܐܸܡ݂ܲܪ ܡ̇ܪܲܢ ܟܲܕܼ ܢܣ݂ܲܒܼ ܠܲܚܡܵܐ ܀ 484 :ܠܟܼܠ ܬܸܫ̈ܒܿܚܵܬܼܵܐ ܘܟܼܠ ܬܵܘ̈ܕܿܝܵܬܼܵܐ ܘܟܼܠ ܩܘܼܠܵܣܹ̈ܐ 485 ܫܵܘܹܐ ܟܝܵܢܵܐ ܕܐܲܠܵܗܘܼܬܼܵܟ ܡ̇ܪܵܐ ܕܟܼܠܵܐ ܀ pb. 285 486 :ܕܲܒܼܟܼܠ ܕܵܕܹ̈ܐ ܫܲܡܠܝܼܬܿ ܘܲܓܿܡܲܪܬܿ ܡܕܲܒܿܪܵܢܘܼܬܼܵܟ 487 ܐܲܝܟ ܕܲܠܚܲܝܹ̈ܐ ܘܲܠܦܘܼܪܩܵܢܵܐ ܕܲܒܼܢܲܝ̈ܢܵܫܵܐ ܀ 488 :ܘܟܲܕܼ ܛܵܒܼ ܗܸܢܘܿܢ ܗܘ̤ܵܘ ܛܵܠܵܘܿܡܹ̈ܐ ܒܲܥܒܼܵܕܲܝ̈ܗܘܿܢ 489 ܐܲܢ̄ܬܿ ܒܝܲܕܼ ܪ̈ܲܚܡܲܝܟ ܠܵܐ ܡܲܗܡܸܐ ܗ̣̄ܘܲܝܬܿ ܡܼܢ ܥܘܼܕܼܪܵܢܗܘܿܢ ܀ 490 :ܘܐܲܝܟ ܕܲܬܼܫܲܡܠܸܐ ܦܘܼܪܩܵܢ ܟܠܵܐ ܘܚܘܼܕܵܬܼ ܟܠܵܐ 491 ܢܣܲܒܼ݂ܬܵܢܝ ܡܢܹܗ ܕܲܟܼܝܵܢ ܐܵܕܼܵܡ ܘܠܵܟ ܐܲܩܸܦܬܵܢܝ ܀ 492 :ܘܒܼܝܼ ܢܸܬܼܓܲܡܪܘܼܢ ܟܠ ܫܘܼܘܕܵܝܹ̈ܐ ܘܟܼܠ ܡܘܼܠܟܵܢܹ̈ܐ 493 ܘܒܝܼ ܢܸܵܫܬܲܠܡܘܼܢ ܐ̄ܪ̈ܵܙܹܐ ܘܛܘܿܦܣܹ̈ܐ ܕܲܠܘܵܬܼ ܟܹܐܢܹ̈ܐ ܀ 494 :ܘܕܲܗܘܹ̇ܝܬܼ ܕܠܵܐ ܡܘܼܡ ܘܓܲܡܪܹܬܼ ܟܠܵܗ̇ ܙܲܕܲܝܼܩܘܼܬܼܵܐ 495 ܒܝܼ ܥܵܩܲ݁ܪ ܐܲܢ̄ܬܿ ܠܟܼܠܵܗ̇ ܚܛܝܼܬܼܵܐ ܡܼܢ ܐ̄ܢܵܫܘܼܬܼܵܐ ܀ 496 :ܘܲܕܼܡ̇ܐܹ̇ܬܼ ܐ̄ܢܵܐ ܕܠܵܐ ܚܘܼܝܵܒܼܵܐ ܘܲܕܼܠܵܐ ܣܲܟܼܠܘܼ 497 ܡܲܓܼܙܲܪ ܐܲܢ̄ܬܿ ܒܝܼ ܢܚܵܡܬܵܐ ܕܦܲܓܼܪܵܐ ܠܟܼܠܹܗ ܟܝܵܢܵܐ ܀ 498 :ܒܗܵܢܵܐ ܢܝܼܫܵܐ ܐܵܘܕܲܝܼ ܠܐܲܒܼܘܼܗܝ ܒܪܹܗ ܕܲܡܪܲܝܡܵܐ 499 ܘܗܵܠܹܝܢ ܡܸܠܹ̈ܐ ܐܸܡ݂ܲܪ ܟܲܕܼ ܝܲܗ̣̄ܒܼ ܦܲܓܼܪܹܗ ܘܲܕܼܡܹܗ ܀ 500 :ܗܵܢܵ݁ܘ ܠܲܡ ܦܲܓܼܪܝ ܕܲܚܠܵܦ ܚܵܘ̈ܒܵܘܗܝ ܕܥܵܠܡܵܐ ܝܸܗ̄ܒܹܿܬܼ 501 ܘܗܵܢܵ݁ܘ ܬܘܼܒܼ ܕܸܡܝ ܕܲܚܠܵܦ ܚܛܵܗܹ̈ܐ ܨܒܹ̇ܝܬܼ ܕܢܸܬܼܐܫܸܕܼ ܀ 502 :ܟܠܡܲܢ ܕܐܵܟܼܠ ܒܚܘܼܒܵܐ ܡܼܢ ܦܲܓܼܪܝ ܘܫܵܬܹ̇ܐ ܡܼܢ ܕܸܡܝ 503 ܚܲܝܹ̇ܐ ܠܥܵܠܲܡ ܘܲܡܩܵܘܸܐ ܒܝܼ ܘܐܸܢܵܐ ܠܲܡ ܒܹܗ ܀ 504 :ܗܵܟܲܢ ܗ̣ܘܲܝܬܿܘܿܢ ܥܵܒܼ̇ܕܿܝܼܢ ܠܕܼܘܼܟܼܪܵܢܝ ܒܓܼܵܘ ܥܹܕܼܵܬܼ̈ܟܼܘܿܢ 505 ܘܲܠܦܲܓܼܪܝ ܘܲܠܕܼܡܝ ܗ̤ܘܲܝܬܿܘܿܢ ܢܵܣ̇ܒܿܝܼܢ ܒܗܲܝܡܵܢܘܼܬܼܵܐ ܀ 506 :ܠܲܚܡܵܐ ܘܚܲܡܪܵܐ ܗ̤ܘܲܝܬܿܘܿܢ ܡܩܲܪܒܼܝܼܢ ܐܲܝܟ ܕܐܲܠܸܦܬܿܟܼܘܿܢ: 507 ܘܐܸܢܵܐ ܐܸܓܼܡܘܿܪ ܘܐܸܥܒܸܿܕܼ ܐܸܢܘܿܢ ܦܲܓܼܪܵܐ ܘܲܕܼܡ̇ܐ ܀ 508 :ܦܲܓܼܪܵܐ ܘܲܕܸܡ̇ܐ ܥܵܒܹ̇ܕܼ ܐ̄ܢܵܐ ܠܗܘܿܢ ܠܠܲܚܡܵܐ ܘܚܲܡܪܵܐ 509 ܒܝܲܕܼ ܪܘܼܚܵܦܵܐ ܘܣܵܥܘܼܪܘܼܬܼܵܐ ܕܪܘܼܚܵܐ ܕܩܘܼܕܼܫܵܐ ܀ 510 :ܗܵܟܲܢ ܐܸܡ݂ܲܪ ܡܲܚܸܐ ܥܵܠܡܹ̈ܐ ܠܘܵܬܼ ܬܲܠܡܝܼܕܼܵܘ̈ܗܝ 511 ܘܦܲܓܼܪܹܗ ܘܲܕܼܡܹܗ ܫܲܡܲܗ ܐܸܢܘܿܢ ܠܠܲܚܡܵܐ ܘܚܲܡܪܵܐ ܀ 512 :ܠܵܐ ܗ̄ܘܵܐ ܛܘܼܦܣܵܐ ܐܵܦܠܵܐ ܕܡܘܼܬܼܵܐ ܟܲܢܝܼ ܐܸܢܘܿܢ 513 ܐܸܠܵܐ ܦܲܓܼܪܵܐ ܒܚܲܬܼܝܼܬܼܘܼܬܼܵܐ ܘܲܕܼܡ̇ܐ ܒܩܘܼܫܬܼܵܐ ܀ 514 :ܘܐܵܦܸܢ ܪܲܚܝܼܩ ܟܝܵܢܗܘܿܢ ܡܸܢܹܗ ܕܠܵܐ ܡܘܼܫ̈ܚܵܬܼܵܐ 515 ܐܸܠܵܐ ܒܚܲܝܠܵܐ ܘܒܲܓܕܼܵܝܘܼܬܼܵܐ ܚܕܼ ܗ̄ܘ̣ ܦܲܓܼܪܵܐ ܀ 516 :ܥܝܼܪܹ̈ܐ ܘܐ̄ܢܵܫܵܐ ܢܵܘܕܿܘܿܢ ܠܵܟ ܡܵܪܝ ܒܐܲܡܝܼܢܘܼܬܼܵܐ 517 ܡܫܝܼܚܵܐ ܣܲܒܼܪܲܢ ܕܐܲܫܠܸܡܬܿ ܢܲܦܫܵܟ ܡܸܛܠܵܬܲܢ ܀ pb. 286 518 :ܚܲܕܼ ܗ̄ܘ̣ ܒܚܲܝܠܵܐ ܦܲܓܼܪܵܢ ܕܩܵܨܹ̇ܝܢ ܟܵܗܢܹ̈ܐ ܒܥܹܕܿܬܵܐ 519 ܥܲܡ ܗܵܘ̇ ܦܲܓܼܪܵܐ ܕܝܵܬܹܿܒܼ ܒܫܘܼܒܼܚܵܐ ܡܼܢ ܝܲܡܝܼܢܵܐ ܀ 520 :ܘܐܲܝܟ ܕܲܡܚܲܝܲܕܼ ܐܲܠܵܗ ܠܪܹܫܝܼܬܼ ܓܸܢܣܲܢ 521 ܡܚܲܕܼ ܡܫܝܼܚܵܐ ܠܠܲܚܡܵܐ ܘܚܲܡܪܵܐ ܕܐܝܼܬܼ ܥܲܠ ܡܲܕܼܒܿܚܵܐ ܀ 522 :ܡ̇ܕܹܝܢ ܠܲܚܡܵܐ ܦܲܓܼܪܵܐ ܗ̄ܘ̣ ܕܡ̇ܪܲܢ ܚܲܬܿܝܼܬܼܵܐܝܼܬܼ 523 ܘܚܲܡܪܵܐ ܕܡܹܗ ܗ̄ܘ̣ ܡ̇ܪܵܐܢܵܐܝܼܬܼ ܘܫܲܪܝܼܪܵܐܝܼܬܼ ܀ 524 :ܗܵܟܲܢ ܩܲܦܸܕܼ ܠܲܒܼܢܲܝ̈ ܐ̄ܪܵܙܹܗ ܕܢܹܐܟܼܠܘܼܢ ܦܲܓܼܪܹܗ 525 ܘܗܵܟܲܢ ܙܲܗܲܪ ܠܲܒܼܢܝܼ̈ ܒܲܝܬܹܿܗ ܕܢܸܫܬܿܘܿܢ ܠܲܕܼܡܹܗ ܀ 526 :ܛܘܼܒܼܵܘܗܝ ܠܐܲܝܢܵܐ ܕܲܡܗܲܝܡܸܢ ܒܹܗ ܘܡܲܫܲܪ ܡܸܠܬܹܗ 527 ܕܐܸܢ ܡܝܼܬܼ ܚܲܝܹ̇ܐ ܘܐܸܢ ܚܲܝ ܠܵܐ ܢܡܘܼܬܼ ܒܣܲܟܼ̈ܠܘܵܬܹܗ ܀ 528 :ܩܲܒܿܠܘܼܗܝ ܫܠܝܼܚܹ̈ܐ ܠܦܘܼܩܕܵܢ ܡ̇ܪܗܘܿܢ ܒܲܙܗܝܼܪܘܼܬܼܵܐ 529 ܘܗܸܢܘ̣ܿܢ ܝܲܒܿܠܘܼܗܝ ܒܲܚܦܝܼܛܘܼܬܼܵܐ ܠܲܕܼܒܼܵܬܲܪܗܘܿܢ ܀ 530 :ܥܕܲܡ̇ܐ ܠܗܵܫܵܐ ܢܛܝܼܪ ܗ̄ܘ̣ ܒܥܹܕܿܬܵܐ ܐܵܦ ܡܸܬܼܢܛܲܪ 531 ܥܥܕܲܡ̇ܐ ܕܲܡܢܝܼܚ ܠܐ̄ܪܵܙܹܗ ܒܕܸܢܚܹܗ ܘܲܒܼܓܸܠܝܵܢܹܗ ܀ 532 :ܒܗܵܢܵܐ ܢܝܼܫܵܐ ܡ̇ܘܕܹܿܐ ܟܵܗܢܵܐ ܩܕܼܵܡ ܐܲܠܵܗܵܐ 533 ܘܲܡܪܝܼܡ ܩܵܠܹܗ ܒܫܘܼܠܵܡ ܨܠܘܿܬܹܗ ܕܲܢܫܲܡܲܥ ܠܥܲܡܵܐ ܀ 534 :ܩܵܠܹܗ ܡܲܫܡܲܥ ܘܒܼܐܝܼܕܹܗ ܪܵܫܹ̇ܡ ܠܐ̄ܪ̈ܵܙܹܐ ܕܣܝܼܡܝܼܢ 535 ܘܥܲܡܵܐ ܒܐܵܡܹܝܢ ܢܵܩܹ̇ܦ ܫܵܠܹ̇ܡ ܠܲܨܠܘܿܬܼ ܟܵܗܢܵܐ ܀ 536 :ܗܵܝܕܹܿܝܢ ܦܵܩܹ̇ܕܼ ܟܵܪܘܿܙ ܥܹܕܿܬܵܐ ܠܥܲܡܵܐ ܘܐܵܡܲ݁ܪ 537 ܕܲܒܼܡܲܕܿܥܲܝ̈ܟܿܘܿܢ ܗ̤ܘܲܝܬܿܘܿܢ ܡܨܲܠܹܝܢ ܫܠܵܡܵܐ ܥܲܡܲܢ ܀ 538 :ܒܡܲܕܿܥܵܐ ܨܲܒܵܘ ܒܗܵܢ ܥܸܕܼܢܵܐ ܘܲܒܼܪܸܥܝܵܢܵܐ 539 ܕܗܵܐ ܡܸܫܬܲܡܠܸܐ ܫܠܵܡܵܐ ܪܲܒܵܐ ܒܫܘܼܡܠܵܝ ܐ̄ܪ̈ܵܙܹܐ ܀ 540 :ܡܫܲܪܸܐ ܟܵܗܢܵܐ ܠܡܸܒܼܥܵܐ ܒܚܲܫܵܐ ܩܕܼܵܡ ܐܲܠܵܗܵܐ 541 ܕܢܸܨܛܒܸܐ ܒܚܘܼܒܹܿܗ ܒܕܸܒܚܵܐ ܚܲܝܵܐ ܕܡܸܬܼܩܲܪܲܒܼ ܠܹܗ ܀ 542 :ܣܵܕܿ݁ܪ ܛܲܟܼܣܹ̈ܐ ܥܹܕܿܬܵܢܵܝܹ̈ܐ ܚܲܕܼ ܒܵܬܲܪ ܚܲܕܼ 543 ܕܲܚܠܵܦܲܝܗܘܿܢ ܡܩܲܪܒܼܵܐ ܥܹܕܿܬܵܐ ܐ̄ܪ̈ܵܙܹܐ ܣܓܼܝܼ̈ܕܹܐ ܀ 544 :ܥܵܗܹ̇ܕܼ ܒܩܲܕܼܡ̇ܐ ܠܥܹܕܿܬܵܐ ܫܒܼܝܼܚܬܵܐ ܕܲܒܼܟܼܠ ܐܲܬܲܪ 545 ܘܫܵܐܹ̇ܠ ܕܢܗܘܘܿܢ ܒܚܲܕܼ ܪܸܥܝܵܢܵܐ ܘܗܲܝܡܵܢܘܼܬܼܵܐ ܀ 546 :ܥܵܗܹ̇ܕ ܠܟܼܵܗܢܹ̈ܐ ܘܦܸܪ̈ܝܵܕܼܘܿܛܹܐ ܘܲܡܫܲܡܫܵܢܹ̈ܐ 547 ܘܲܡܦܝܼܣ ܕܢܸܗܘܘܿܢ ܒܩܲܕܼܝܼܫܘܼܬܼܵܐ ܘܲܒܼܕܲܟܿܝܘܼܬܼܵܐ ܀ 548 :ܥܵܗܹ̇ܕܼ ܠܣܵܗ̈ܕܹܿܐ ܘܲܠܡܵܘܕܿܝܵܢܹ̈ܐ ܘܲܠܡܲܠܦܵܢܹ̈ܐ 549 ܕܢܸܗܘܸܐ ܫܸܡܗܘܿܢ ܡܸܬܿܕܿܟܲܪ ܒܥܹܕܿܬܵܐ ܒܥܸܕܼܵܢ ܐ̄ܪ̈ܵܙܹܐ ܀ 550 :ܥܵܗܹ̇ܕܼ ܠܡܲܠ̈ܟܹܿܐ ܘܲܠܕܿܝܵܢܹ̈ܐ ܕܲܒܼܟܼܠ ܐܲܬܼܪ 551 ܕܗܘܘܿܢ ܕܵܝ̇ܢܝܼܢ ܒܼܲܬܼܪܝܼܨܘܼܬܼܵܐ ܒܟܼܠܹܗ ܥܵܠܡܵܐ ܀ 552 :ܥܵܗܹ̇ܕܼ ܒܡܸܠܬܹܗ ܠܟܼܠ ܐܲܒܼܝܼ̈ܠܹܐ ܘܲܠܥܵܢܘܵܝܹ̈ܐ 553 ܕܬܸܗܘܸܐ ܨܠܘܿܬܼܗܘܿܢ ܡܩܲܒܿܠܵܐ ܟܠܝܘܿܡ ܩܕܼܵܡ ܐܲܠܵܗܵܐ ܀ pb. 287 554 :ܥܵܗܹ̇ܕܼ ܠܟܹܐܢܹ̈ܐ ܘܲܠܙܲܕܿܝܼܩܹ̈ܐ ܕܲܒܼܟܼܠ ܐܲܬܲܪ 555 ܘܫܵܐܹ̇ܠ ܕܢܸܛܪܘܼܢ ܩܝܵܡܵܐ ܕܐܲܩܝܼܡܘ ܒܲܓܼܡܝܼܪܘܼܬܼܵܐ ܀ 556 :ܥܵܗܹ̇ܕܼ ܠܲܒܼܢܹܝ̈ܗ̇ ܕܥܹܕܲܬܼ ܩܘܼܕܫܵܐ ܒܟܼܠ ܬܸܓܼܡܲܝ̈ܗܘܿܢ 557 ܘܫܵܐܹ̇ܠ ܕܢܸܛܪܘܼܢ ܗܲܝܡܵܢܘܼܬܿܗܘܿܢ ܒܲܙܗܝܼܪܘܼܬܼܵܐ ܀ 558 :ܥܵܗܹ̇ܿܕܼ ܡܸܟܸܿܝܠ ܐܵܦ ܠܥܲܢܝܼ̈ܕܹܐ ܕܲܒܼܟܼܠ ܐܲܬܲܪ 559 ܕܲܥܢܲܕܘ ܘܫܲܢܝܼܘ ܒܗܲܝܡܵܢܘܼܬܼܵܐ ܕܠܵܐ ܦܠܝܼܓܼܘܼܬܼܵܐ ܀ 560 :ܥܵܗܹ̇ܕܼ ܗܘ̤ ܠܹܗ ܕܐܸܫܬܘܝܼ ܠܗܵܕܹܐ ܡܸܨܥܵܝܘܼܬܼܵܐ 561 ܘܫܵܐܹ̇ܠ ܪ̈ܲܚܡܹܐ ܥܲܠ ܟܠ ܒܸܪ̈ܝܵܢ ܒܲܟܼܢܝܼܫܘܼܬܼܵܐ ܀ 562 :ܥܵܗܹܕܿ ܠܐܲܝܠܹܝܢ ܕܡܲܫܦܥܝܼܢ ܙܸܕܼܩܬܵܐ ܥܲܠ ܡܸܣܟܹܿܢܹ̈ܐ 563 ܘܫܵܐܹ̇ܠ ܕܢܸܣܒܼܘܼܢ ܐܲܓܼܪܵܐ ܥܦܝܼܦܵܐ ܚܠܵܦ ܙܵܕܼܩܵܬܼ̈ܗܘܿܢ ܀ 564 :ܥܵܗܹ̇ܕܼ ܠܢܵܦܠܹ̈ܐ ܘܲܠܚܲܛܵܝܹ̈ܐ ܘܲܠܡܲܣܟܿܠܵܢܹ̈ܐ 565 ܘܫܵܐܹ̇ܠ ܕܢܸܬܼܦܢܘܿܢ ܠܲܬܼܝܵܒܼܘܼܬܼܵܐ ܘܚܝܼܣܵܝ ܚܵܘ̈ܒܹܿܐ ܀ 566 :ܥܵܗܹ̇ܕܼ ܠܐܲܝܠܹܝܢ ܕܡܸܛܠܵܬܼܗܘܿܢ ܡܩܲܪܸܒܼ ܕܸܒܼܚܹ̈ܐ 567 ܕܢܸܫܟܿܚܘܼܢ ܚܢܵܢܵܐ ܘܫܼܒܼܩܵܢ ܚܵܘ̈ܒܹܿܐ ܕܣܲܟܼ̈ܠܘܵܬܼܗܘܿܢ ܀ 568 :ܥܵܗܹ̇ܕܼ ܠܚܲܢܦܹ̈ܐ ܘܲܠܟܼܵܦܘܿܪܹ̈ܐ ܘܲܠܛܵܥܲܝ̈ܵܐ 569 ܘܲܡܦܝܼܣ ܕܢܸܕܿܥܘܼܢ ܠܗܲܝܡܵܢܘܼܬܼܵܐ ܕܥܹܕܲܬܼ ܩܘܼܫܵܐ ܀ 570 :ܥܵܗܹ̇ܕܼ ܠܥܵܠܡܵܐ ܟܠܹܗ ܒܲܚܕܼܵܐ ܘܲܠܥܵܡܘܿܪ̈ܵܘܗܝ 571 ܕܢܸܒܼܛܠܘܼܢ ܡܸܢܹܗ ܩܪ̈ܵܒܹܐ ܘܫܹܐܕܹ̈ܐ ܐܵܦ ܬܲܟܼܬܿܘܼܫܹ̈ܐ ܀ 572 :ܥܵܗܹ̇ܕܼ ܠܐܵܐܲܪ ܐܵܦ ܠܡܵܘ̈ܥܝܵܬܵܐ ܕܟܼܠܵܗ̇ ܫܲܢ̄ܬܵܐ 573 ܘܫܵܐܹ̇ܠ ܕܢܸܗܘܸܐ ܟܲܗܝܼܢ ܘܲܒܼܪܝܼܟ ܟܠܝܼܠܵܐ ܕܫܲܢ̄ܬܵܐ ܀ 574 :ܥܵܗܹ̇ܕܼ ܠܐܲܬܼܪܹܗ ܘܠܲܐܬܼܪ̈ܵܘܬܼܵܐ ܟܠܗܘܿܢ ܒܲܚܕܼܵܐ 575 ܘܫܵܐܹ̇ܠ ܕܢܸܗܘ̤ܐ ܫܠܵܡܵܐ ܘܫܲܝܢܵܐ ܒܓܼܵܘ ܥܘܼܡܪ̈ܲܝܘܿܢ ܀ 576 :ܥܵܗܹ̇ܕܼ ܠܐܲܝܠܹܝܢ ܕܪܵܕܹܝܢ ܒܝܲܡܡܹ̈ܐ ܘܲܒܼܓܼܵܙܪ̈ܬܼܵܐ 577 ܘܫܵܐܹ̇ܠ ܕܢܸܗܘܘܿܢ ܡܫܵܘܙܒܹ̈ܐ ܟܠܗܘܿܢ ܡܼܢ ܟܝܼܡܘܿܢܹ̈ܐ ܀ 578 :ܥܵܗܹ̇ܕܼ ܠܐܲܝܠܹܝܢ ܕܲܒܼܥܵܩ̈ܬܼܵܐ ܪܡܹܝܢ ܘܒܲܪ̈ܕܼܘܼܦܝܹܐ 579 ܘܫܵܐܹ̇ܠ ܕܢܸܗܘܸܐ ܢܦܹܐܫܵܐ ܘܢܵܘܚܵܐ ܠܐܘܼܠܨܵܢܲܝ̈ܗܘܿܢ ܀ 580 :ܥܵܗܹ̇ܕܼ ܠܐܲܝܠܹܝܢ ܕܲܒܼܒܹܝܬܼ ܚܒܼܘܼܫܝܹ̈ܐ ܪܡܹܝܢ ܘܒܲܐܣܘܼܪܹ̈ܐ 581 ܘܫܵܐܹ̇ܠ ܕܢܸܫܬܿܪܘܿܢ ܡܼܢ ܐܲܣܘܼܪܹ̈ܐ ܘܫܸܢ̈ܕܹܿܐ ܩܫܲܝܵ̈ܐ ܀ 582 :ܥܵܗܹ̇ܕܼ ܠܐܲܝܠܹܝܢ ܕܠܸܐܟܿܣܘܿܪܝܼܵܐ ܠܪܘܼܓܩܵܐ ܐܸܫܬܿܕܼܝܼܘ 583 ܘܫܵܐܹ̇ܠ ܕܢܲܓܼܗܘܿܢ ܡܼܢ ܛܘܼܪ̈ܵܦܹܐ ܘܡܼܢ ܢܸܣܝܘܼܢܹ̈ܐ ܀ 584 :ܥܵܗܹ̇ܕܼ ܠܐܲܝܠܹܝܢ ܕܲܒܼܟܼܘܼܪ̈ܗܵܢܹܐ ܘܟܹܐܒܹ̈ܐ ܡܢܵܘܠܝܼܢ 585 ܘܲܡܦܝܼܣ ܕܢܸܩܢܘܿܢ ܚܘܼܠܡܵܢ ܦܲܓܼܪܵܐ ܥܲܡ ܐܵܣܝܘܼܬܼܵܐ ܀ 586 :ܥܵܗܹ̇ܕܼ ܠܐܲܝܠܹܝܢ ܕܲܡܢܲܣܹܝܢ ܠܗܘܿܢ ܫܹܐܕܹ̈ܐ ܠܝܼܛܹ̈ܐ 587 ܘܫܵܐܹ̇ܠ ܕܢܸܫܟܿܚܘܼܢ ܚܢܵܢܵܐ ܘܪ̈ܲܚܡܹܐ ܡ݂ܢ ܠܘܵܬܼ ܡ̇ܪܝܵܐ ܀ 588 :ܥܵܗܹ̇ܕܼ ܒܡܸܠܬܹܗ ܘܲܠܣܵܩܘܿܪܹ̈ܐ ܕܥܹܕܲܬܼ ܩܘܼܕܼܫܵܐ 589 ܕܢܸܗܘܸܐ ܫܪܵܝܵܐ ܠܣܲܟܼܠ̈ܘܵܬܼܗܘܿܢ ܩܕܼܵܡ ܐܲܠܵܗܵܐ ܀ 590 ܥܵܗܹ̇ܕܼ ܠܚܵܘ̈ܒܹܿܐ ܕܟܼܠܹܗ ܓܘܼܫܡܵܐ ܥܹܕܿܬܵܢܵܝܵܐ: pb. 288 591 ܘܫܵܐܹ̇ܠ ܕܢܸܫܬܿܘܘܿܢ ܠܘܼܒܼܩܵܢ ܚܵܘ̈ܒܹܿܐ ܘܣܲܟܼܠܘܵܬܼܵܐ ܀ 592 :ܠܗܵܠܹܝܢ ܟܠܗܘܿܢ ܥܵܗܹ̇ܕܼ ܟܵܗܢܵܐ ܩܕܼܵܡ ܐܲܠܵܗܵܐ 593 ܟܲܕܼ ܡܸܬܿܕܲܡܸܐ ܒܝܲܕܼ ܬܲܟܼܫܲܦܬܹܿܗ ܠܡܵܪܝ ܒܲܪܣܲܡܝܵܐ ܀ 594 :ܒܗܵܢܵܐ ܢܝܼܫܵܐ ܡܨܲܠܸܐ ܟܵܗܢܵܐ ܩܕܼܵܡ ܐܲܠܵܗܵܐ 595 ܘܫܵܐܹ̇ܠ ܡܸܢܹܗ ܕܢܸܨܛܒܸܐ ܒܕܸܒܼܚܵܐ ܕܲܡܩܲܪܸܒܼ ܠܹܗ ܀ 596 :ܚܠܵܦ ܟܠ ܡܸܬܿܕܿܒܲܚ ܕܸܒܼܚܵܐ ܚܲܝܵܐ ܕܲܒܼܓܼܵܘ ܥܹܕܿܬܵܐ 597 ܘܲܠܟܼܠ ܒܸܪ̈ܝܵܢ ܡܥܲܕܿܪܵܐ ܘܡ̇ܘܬܿܪܵܐ ܗܝ̤ ܕܸܒܼܚܬܼܵܐ ܀ 598 :ܒܗܵܝ̇ ܬܲܟܼܫܲܦܬܵܐ ܕܥܵܒܹ̇ܕܼ ܟܵܗܢܵܐ ܚܠܵܦ ܟܠ ܬܼܓܼܡܝܼ̈ܢ 599 ܡܸܫܬܲܒܼܩܝܼܢ ܠܹܗ ܚܛܵܗܵܘ̈ܗܝ ܟܠܗܘܿܢ ܘܣܲܟܼ̈ܠܘܵܬܹܗ ܀ 600 :ܒܵܬܲܪ ܗܸܠܹܝܢ ܡ̇ܘܕܹܿܐ ܟܵܗܢܵܐ ܩܕܼܵܡ ܐܲܠܵܗܵܐ 601 ܐܲܟܼܡܵܐ ܕܐܲܠܸܦ ܡ̇ܪܲܢ ܝܼܫܘܿܥ ܠܲܬܼܪܸܥܣܲܪܬܹܿܗ ܀ 602 :ܗܵܐ ܡܪܲܙܙܝܼܢܲܢ ܐܵܡܲ݁ܪ ܟܵܗܢܵܐ ܘܲܡܥܲܗܕܝܼܢܲܢ 603 ܚܲܫܹܗ ܘܡ̇ܘܬܹܿܗ ܐܵܦ ܢܘܼܚܵܡܹܗ ܕܡ̇ܪܲܢ ܝܼܫܘܿܥ ܀ ܀ 604 :ܗܵܠܹܝܢ ܐܵܡܲ݁ܪ ܟܵܗܢܵܐ ܒܝܼܫܵܐ ܘܲܒܼܬܲܚܢܲܢܬܵܐ 605 ܘܡ̇ܬܲܚ ܩܵܘܡܬܹܗ ܘܦܵܫܹ̇ܛ ܐܝܼܕܼܵܘ̈ܗܝ ܠܐܲܦܲܝ̈ ܪܵܘܡ̇ܐ ܀ 606 :ܠܐܲܦܲܝ̈ ܪܵܘܡܵܐ ܚܲܐܹ̇ܪ ܟܵܗܢܵܐ ܒܦܵܪܹܗ̄ܣܝܼܵܐ 607 ܘܩܵܪܸܐ ܠܪܘܼܚܵܐ ܕܢܹܐܬܸܐ ܢܸܓܼܡܘܿܪ ܐ̄ܪ̈ܙܹܐ ܕܩܲܪܸܒܼ ܀ 608 :ܠܪܘܼܚܵܐ ܫܵܐܹ̇ܠ ܕܢܹܐܬܸܐ ܢܪܲܚܸܦ ܥܲܠ ܩܘܼܪܒܵܢܵܐ 609 ܘܢܲܩܢܹܝܘܗܝ ܚܲܝܠܵܐ ܘܡܲܥܒܿܕܼܵܢܘܼܬܼܵܐ ܐܲܠܵܗܵܐ ܀ 610 :ܢܵܚܹ̇ܬܼ ܪܘܼܚܵܐ ܒܲܦܝܵܣ ܟܵܗܢܵܐ ܟܡܵܐ ܐܸܢ ܚܲܛܵܝ 611 ܘܓܼܵܡܲ݁ܪ ܐ̄ܪ̈ܵܙܹܐ ܒܡܸܨܥܵܝܘܼܬܹܗ ܕܟܼܵܗܢܵܐ ܕܲܩܲܕܹܿܫ ܀ 612 :ܠܵܐ ܫܲܦܝܘܼܬܹܗ ܕܟܼܗܢܵܐ ܓܵܡ̇ܪܵܐ ܠܐ̄ܪ̈ܵܙܹܐ ܣܓܼܝܼܕܹ̈ܐ 613 ܐܸܠܵܐ ܪܘܼܚܵܐ ܕܩܘܼܕܫܵܐ ܓܵܡܲ݁ܪ ܒܝܲܕܼ ܪܘܼܚܵܦܹܗ ܀ 614 :ܡܪܲܚܸܦ ܪܘܼܚܵܐ ܠܵܐ ܗ̄ܘܵܐ ܡܸܛܠ ܫܵܘܝܘܼܬܼ ܟܵܗܢܵܐ 615 ܐܸܠܵܐ ܡܸܛܠ ܐ̄ܪ̈ܵܙܹܐ ܕܣܝܼܡܝܼܢ ܠܥܸܠ ܡܢ ܡܲܕܼܒܿܚܵܐ ܀ 616 :ܡܸܚܕܼܵܐ ܕܡܸܬܿܬܿܣܝܼܡ ܠܲܚܡܵܐ ܘܚܲܡܪܵܐ ܠܥܸܠ ܡܼܢ ܡܲܕܼܒܿܚܵܐ 617 ܐ̄ܪܵܙܵܐ ܡܛܲܦܸܣ ܕܡ̇ܘܬܹܿܗ ܕܲܒܼܪܵܐ ܐܵܦ ܕܲܩܝܵܡܘܬܹܿܗ ܀ 618 :ܒܲܕܼܓܼܘܿܢ ܪܘܼܚܵܐ ܗܵܘ̇ ܕܐܲܩܝܼܡܹܗ ܡܼܢ ܒܹܝܬܼ ܡܝܼܬܹ̈ܐ 619 ܢܵܚܹ̇ܬܼ ܗܵܫܵܐ ܘܓܼܵܡܲ݁ܪ ܐ̄ܪ̈ܵܙܹܐ ܕܢܘܼܚܵܡ ܦܲܓܼܪܹܗ ܀ 620 :ܗܵܟܲܢ ܓܵܡܲ݁ܪ ܪܘܼܚܵܐ ܕܩܘܼܕܼܫܵܐ ܒܐܝܼܕܲܝ̈ ܟܵܗܢܵܐ 621 ܘܲܕܼܠܵܐ ܟܵܗܢܵܐ ܠܥܵܠܲܡ ܥܵܠܡܝܼܢ ܠܵܐ ܡܸܬܼܓܲܡܪܝܼܢ ܀ 622 :ܠܵܐ ܡܸܬܼܓܲܡܪܝܼܢ ܐ̄ܪ̈ܵܙܲܝ ܥܹܕܿܬܵܐ ܒܸܠܥܵܕܼ ܟܵܗܢܵܐ 623 ܒܲܕܼܠܵܐ ܐܲܦܸܣ ܪܘܼܚܵܐ ܕܩܘܼܕܼܫܵܐ ܠܡܸܓܼܡܲܪ ܐܸܢܘܿܢ ܀ 624 :ܚܲܝܠܵܐ ܕܪܘܼܚܵܐ ܩܲܒܸܿܠ ܟܵܗܢܵܐ ܒܲܣܝܵܡ ܐܝܼܕܼܵܐ 625 ܘܒܹܗ ܡܸܫܬܲܡܠܹܝܢ ܐ̄ܪ̈ܵܙܹܐ ܟܠܗܘܿܢ ܕܲܒܼܓܼܵܘ ܥܹܕܬܵܐ ܀ pb. 289 626 :ܟܵܗܢܵܐ ܡܩܲܕܹܿܫ ܥܘܼܒܵܐ ܕܡܲܝܵ̈ܐ ܕܡܲܥܡܘܿܕܼܝܼܬܼܵܐ 627 ܘܪܘܼܚܵܐ ܡܫܲܟܸܿܢ ܣܝܼܡܲܬܼ ܒܢܲܝ̈ܵܐ ܠܐܲܝܠܹܝܢ ܕܥܵܡ̇ܕܿܝܼܢ ܀ 628 :ܒܸܠܥܵܕܼ ܟܵܗܢܵܐ ܠܵܐ ܡܸܬܼܡܲܟܼܪܵܐ ܐܲܢ̄ܬܿܬܼܵܐ ܠܓܼܵܒܼܪܵܐ 629 ܘܡܼܢ ܒܸܠܥܵܕܵܘܗܝ ܠܵܐ ܡܸܫܬܲܡܠܸܐ ܚܠܘܿܠܵܐ ܕܝܼܠܗܘܿܢ ܀ 630 :ܒܸܠܥܵܕܼ ܟܵܗܢܵܐ ܠܵܐ ܡܸܬܼܥܲܦܸܐ ܐܵܦ ܥܲܢܝܼܕܼܵܐ 631 :ܘܠܵܐ ܡܲܚܬܼܝܼܢ ܠܹܗ ܠܩܲܒܼܪܵܐ ܕܝܼܠܹܗ ܒܸܠܥܵܕܼ ܟܵܗܢܵܐ 632 :ܡܲܝܵ̈ܐ ܛܲܡ̈ܐܹܐ ܠܵܐ ܡܸܬܼܩܲܕܿܫܝܼܢ ܒܸܠܥܵܕܼ ܟܵܗܢܵܐ 633 ܘܐܸܢ ܠܲܝܬܿ ܟܵܗܢܵܐ ܗܘ̤ܵܐ ܠܹܗ ܒܲܝܬܵܐ ܟܠܹܗ ܛܲܡܐܵܐ ܀ 634 :ܗܵܠܹܝܢ ܓܵܡܲ݁ܪ ܪܘܼܚܵܐ ܕܩܘܼܕܫܵܐ ܒܐܝܼܕܲܝ̈ ܟܵܗܢܵܐ 635 ܘܐܵܦܸܢ ܢܸܗܘܸܐ ܟܠܹܗ ܒܚܵܘ̈ܒܹܿܐ ܘܣܲܟܼ̈ܠܘܵܬܼܵܐ ܀ 636 :ܘܗܵܘ̇ܡ̇ܐ ܕܟܼܵܗܢܹ̈ܐ ܡܫܲܡܠܹܝܢ ܓܵܡ̇ܪܝܼܢ ܘܐܸܢ ܚܲܛܵܝܝܼܢ 637 ܕܠܵܐ ܩܢܹܝܢ ܕܲܪܓܼܵܐ ܠܵܐ ܡܨܸܝܢ ܓܵܡ̇ܪܝܼܢ ܟܡܵܐ ܐܸܢ ܟܹܐܢܝܼܢ ܀ 638 :ܠܵܐ ܙܲܕܼܝܼܩܹ̈ܐ ܒܝܲܕܼ ܕܲܟܼܝܘܼܬܼܗܘܿܢ ܡܲܚܬܼܝܼܢ ܪܘܼܚܵܐ 639 ܘܠܵܐ ܚܲܛܝܹ̈ܐ ܒܚܲܛܵܝܘܼܬܹܗܘܿܢ ܟܵܠܹ̇ܝܢ ܡܲܚܬܹܿܗ ܀ 640 :ܗܵܪܟܵܐ ܛܵܥܹ̇ܝܢ ܢܲܓܿܝܼܪ ܪܘܼܚܵܐ ܠܟܼܵܗܢܵܐ ܕܚܲܛܵܝ 641 ܘܓܼܵܡܲܪ ܒܐܝܼܕܹܗ ܐ̄ܪ̈ܵܙܹܐ ܫܒܼܝܼܚܵܐ ܕܠܵܐ ܡܸܬܼܡܲܠܠܝܼܢ ܀ 642 :ܒܥܵܠܡܵܐ ܕܲܥܬܼܝܼܕܼ ܕܵܐܹ̇ܢ ܒܐܝܼܕܹܗ ܣܲܓܿܝܼܵܐܝܼܬܼ 643 ܘܢܵܣܹ̇ܒܼ ܡܸܢܹܗ ܗܵܝ̇ ܡܵܘܗܲܒܼܬܼܵܐ ܕܐܸܬܼܝܲܗ̄ܒܲܬ̤ ܠܹܗ ܀ 644 :ܘܲܕܿܠܵܐ ܝܲܩܲܪ ܠܪܲܒܿܘܼܬܼ ܕܲܪܓܹܗ ܐܲܝܟ ܕܿܦܐܹܐ ܠܹܗ 645 ܡܸܬܿܬܿܫܝܼܛ ܬܲܡܵܢ ܘܗܵܘܹ̇ܐ ܒܸܙܚܵܐ ܩܕܼܵܡ ܟܠ ܒܸܪ̈ܝܵܢ ܀ 646 :ܫܡܲܥ ܐܘܿ ܟܵܗܢܵܐ ܕܠܵܐ ܩܢܸܐ ܥܒܼܵܕܹ̈ܐ ܕܦܵܚ̇ܡܝܼܢ ܠܕܲܪܓܹܗ 647 ܘܙܘܼܥ ܘܐܸܣܬܬܲܪܲܕܼ ܡܼܢ ܬܲܫܢܝܼܩܵܐ ܕܲܒܼܓܹܗܲܢܵܐ ܀ 648 :ܡܼܢ ܟܠ ܬܲܒܼܥܵܢ ܩܲܫܝܵܐ ܬܒܲܥܬܼܵܟ ܟܵܗܢܵܐ ܣܲܟܼܠܵܐ 649 ܕܠܵܐ ܫܲܡܸܫܬܵܝܗܝ ܠܕܲܪܓܼܵܐ ܕܲܡܛܵܟ ܐܲܝܟ ܡ̇ܐ ܕܘܵܠܹ̈ܐ ܀ 650 :ܒܥܵܠܡܵܐ ܕܲܥܬܼܝܼܕܼ ܠܵܐ ܐܝܼܬܼ ܕܲܪ̈ܓܹܐ ܘܠܵܐ ܡܘܼܫ̈ܚܵܬܼܵܐ 651 ܐܸܠܵܐ ܡܫܝܼܚܵܐ ܗܘ̤ ܒܲܠܚܘܿܕܼܵܘܗܝ ܗܵܘܹ̇ܐ ܟܠ ܒܟܼܠ ܀ 652 :ܡܙܲܡܸܢ ܟܵܗܢܵܐ ܠܪܘܼܚܵܐ ܘܢܵܚܹܬܼ ܥܲܠ ܩܘܼܪܒܵܢܵܐ 653 ܘܣܵܓܹ̇ܕܼ ܒܪܸܥܠܵܐ ܘܲܒܼܕܼܚܠܬܼܵܐ ܘܙܵܘܥܵܐ ܪܗܝܼܒܼܵܐ ܀ 654 :ܗܵܝܕܹܿܝܢ ܩܵܥܹ̇ܐ ܟܵܪܘܿܙ ܥܹܕܿܬܵܐ ܒܗܵܘ̇ ܥܸܕܵܢܵܐ 655 ܒܫܸܠܝܵܐ ܘܕܼܚܠܵܐ ܗ̤ܘܲܝܬܿܘܿܢ ܩܵܝ̇ܡܝܼܢ ܫܠܵܡܵܐ ܥܲܡܲܢ ܀ 656 :ܒܕܸܚܠܵܐ ܢܸܗܘܸܐ ܟܠܹܗ ܥܵܡܵܐ ܒܗܵܢ ܥܸܕܼܢܵܐ 657 ܕܒܹܗ ܡܸܫܬܬܲܡܠܹܝܢ ܐ̄ܪ̈ܵܙܹܐ ܣܓܼܝܼܕܹ̈ܐ ܒܡܲܚܬܹܗ ܕܪܘܼܚܵܐ ܀ pb. 290 658 :ܗܵܝܕܹܿܝܢ ܟܵܗܢܵܐ ܡܲܫܡܲܥ ܩܵܠܹܗ ܠܟܼܠܹܗ ܥܲܡܵܐ 659 ܘܪܵܫܹ̇ܡ ܒܐܝܼܕܼܗ ܠܥܸܠ ܡܼܢ ܐ̄ܪ̈ܵܙܹܐ ܐܲܝܟ ܕܲܒܼܩܲܕܼܡܵܐ ܀ 660 :ܪܵܫܹ̇ܡ ܗܵܫܵܐ ܠܵܘ ܕܲܣܢܝܼܩܝܼܢ ܐ̄ܪ̈ܵܙܹܐ ܠܪܘܼܫܡܵܐ 661 ܐܸܠܵܐ ܕܢܲܠܸܦ ܒܪܘܼܫܡܵܐ ܐ̄ܚܪܵܝܵܐ ܥܲܠ ܫܘܼܡܠܵܝܗܘܿܢ ܀ 662 :ܬܠܵܬܼܵܐ ܪ̈ܘܼܫܡܹܐ ܪܵܫܹ̇ܡ ܟܵܗܢܵܐ ܥܲܠ ܩܘܼܪܒܵܢܵܐ 663 ܘܲܒܼܗܘܿܢ ܓܵܡܲ݁ܪ ܘܲܡܫܲܡܠܸܐ ܠܹܗ ܐ̄ܪܵܙܵܢܵܐܝܼܬܼ ܀ 664 :ܬܠܵܬܼ ܓܗܵܢܵܬܼ̈ܐ ܓܵܗܹ̇ܢ ܟܵܗܢܵܐ ܩܕܼܵܡ ܐܲܠܵܗܵܐ 665 ܘܲܒܼܗܹܝܢ ܣܵܓܼ̇ܕܼ ܒܦܵܪܹܗ̄ܣܝܼܵܐ ܩܕܼܵܡ ܪܲܒܿܘܼܬܹܗ ܀ 666 :ܒܲܚܕܼܵܐ ܡܫܲܒܲܚ ܘܒܲܚܕܼܵܐ ܡ̇ܘܕܹܿܐ ܘܒܲܚܕܼܵܐ ܡܨܵܠܸܐ 667 ܘܩܵܪܹܐ ܠܪܘܼܚܵܐ ܕܢܸܫܪܸܐ ܘܢܲܓܸܿܢ ܥܲܠ ܩܘܿܪܒܵܢܵܐ ܀ 668 :ܬܠܵܬܼܵܐ ܝܵܘܒܹ̈ܐ ܩܵܘܝܼ ܡܵܪܲܢ ܒܥܘܼܒܵܗ̇ ܕܐܲܪܥܵܐ 669 ܘܒܲܬܼܠܝܼܬܼܵܝܵܐ ܩܵܡ̣ ܘܐܸܬܼܢܲܚܲܡ ܒܫܘܼܒܼܚܵܐ ܪܲܒܵܐ ܀ 670 :ܘܒܼܵܗ̇ ܒܲܕܼܡܘܼܬܼܵܐ ܓܵܗܹ̇ܝܢ ܟܵܗܢܵܐ ܬܠܵܬܼ ܘܲܒܼ̈ܢܵܬܼܵܐ 671 ܘܲܒܼܗܵܝ̇ ܕܲܬܼܠܵܬܼ ܡܪܲܙܸܙ ܩܝܵܡܬܹܿܗ ܕܡ̇ܪܲܢ ܝܼܫܘܿܥ ܀ 672 :ܐܵܦ ܣܝܵܡ ܒܘܼܪ̈ܟܹܐ ܥܵܒܹ̇ܕܼ ܟܵܗܢܵܐ ܬܠܵܬܼ ܙܲܒܼ̈ܢܵܬܼܵܐ 673 ܘܲܡܛܲܦܸܣ ܒܗܹܝܢ ܗܵܘܝܹܗ ܕܡ̇ܪܲܢ ܕܲܒܼܓܼܵܘ ܩܲܒܼܪܵܐ ܀ 674 :ܬܠܵܐ ܙܲܒܼ̈ܢܵܬܼܵܐ ܣܵܐܹ̇ܡ ܒܘܼܪܟܵܐ ܩܕܼܵܡ ܡܲܚܲܬܿܬܵܐ 675 ܘܬܼܘܼܒܼ ܠܵܐ ܣܵܐܹ̇ܡ ܕܐܸܫܬܲܡܠܝܼ ܠܹܗ ܐ̄ܪܵܙ ܢܘܼܚܵܡܵܐ ܀ 676 :ܐ̄ܪܵܙ ܢܘܼܚܵܡܵܐ ܓܵܡܲ݁ܪ ܟܵܗܢܵܐ ܒܫܘܼܡܠܵܝ ܐ̄ܪ̈ܵܙܹܐ 677 ܘܬܼܘܼܒܼ ܠܵܐ ܡܪܲܙܸܙ ܐ̄ܪܵܙܵܐ ܕܡ̇ܘܬܹܿܗ ܒܲܣܝܵܡ ܒܘܼܪܟܵܐ ܀ 678 :ܟܵܗܢܹ̈ܐ ܬܠܵܬܼܡܐܵܐ ܘܲܬܼܡ̇ܢܬܿܥܣܲܪ ܝܲܗ̣̄ܒܼܘ ܦܘܼܩܕܵܢܵܐ 679 ܕܲܒܼܚܲܕܒ̈ܫܲܒܹܿܐ ܘܥܹܐܕܹ̈ܐ ܟܠܗܘܿܢ ܠܲܝܬܿ ܣܝܵܡ ܒܘܼܪܟܵܐ ܀ 680 :ܠܵܐ ܐ̄ܢܵܫ ܡ̇ܕܹܝܢ ܫܲܠܝܼܛ ܠܲܡܣܵܡ ܒܘܼܪܟܵܐ ܒܐ̄ܪ̈ܵܙܹܐ 681 ܣܟܲܪ ܡ̣ܢ ܟܵܗܢܵܐ ܕܒܲܣܝܵܡ ܒܘܼܪ̈ܟܵܘܗܝ ܐ̄ܪܵܙܵܐ ܡܛܲܦܸܣ ܀ 682 :ܐܵܦ ܗܘ̤ ܟܵܗܢܵܐ ܩܕܼܵܡ ܡܲܚܲܬܿܬܼܵܐ ܐܝܼܬܼ ܠܹܗ ܕܲܡܣܝܼܡ 683 ܘܒܼܵܬܲܪ ܡܲܚܬܹܗ ܕܪܘܼܚܵܐ ܕܩܘܼܕܼܫܵܐ ܠܲܝܬܿ ܠܹܗ ܕܢܸܣܓܿܘܿܕܼ ܀ 684 :ܗܵܝܕܹܿܝܢ ܟܵܗܢܵܐ ܫܵܩܹ̇ܠ ܒܐܝܼܕܼܵܘ̈ܗܝ ܠܲܚܡܵܐ ܚܲܝܵܐ 685 ܘܬܼܵܠܹ̇ܐ ܚܝܵܪܹܗ ܠܐܲܦܲܝ̈ ܪܵܘܡ̇ܐ ܘܡ̇ܘܕܹܿܐ ܒܡܵܪܹܗ ܀ 686 :ܩܵܨܹ̇ܐ ܠܠܲܚܡܵܐ ܒܲܫܡܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ 687 ܘܲܡܚܲܝܸܕܼ ܠܹܗ ܠܲܕܼܡ̇ܐ ܒܦܲܓܼܪܵܐ ܘܦܲܓܼܪܵܐ ܒܲܕܼܡ̇ܐ ܀ 688 :ܪܵܫܹ̇ܡ ܠܲܕܼܡ̇ܐ ܒܦܲܓܼܪܵܐ ܘܡܲܕܼܟܲܕܼ ܬܠܝܼܬܵܝܘܼܬܼܵܐ 689 ܘܪܵܫܹ̇ܡ ܠܦܲܓܼܪܵܐ ܒܲܕܼܡ̇ܐ ܚܲܝܵܐ ܒܵܗ̇ ܒܲܩܪܵܝܬܵܐ ܀ 690 :ܘܲܡܚܲܝܸܕܼ ܠܗܘܿܢ ܠܦܲܓܼܪܵܐ ܒܲܕܼܡܵܐ ܘܲܕܼܡ̇ܐ ܒܦܲܓܼܪܵܐ 691 ܕܟܼܠܢܵܫ ܢܵܘܕܹܿܐ ܕܚܲܕܼ ܐܝܼܬܲܝܗܘܿܢ ܦܲܓܼܪܵܐ ܘܲܕܼܡܵܐ ܀ 692 ܗܵܝܕܹܿܝܢ ܟܵܗܢܵܐ ܡ̣ܢ ܕܐܸܫܬܲܡܠܝܼܘ ܛܲܟܼܣܹ̈ܐ ܟܠܗܘܿܢ: pb. 291 693 ܡܒܲܪܸܟ ܠܥܲܡܵܐ ܒܗܵܝ̇ ܒܲܪܬܼ ܩܵܠܵܐ ܕܒܲܪܸܟ ܡ̇ܪܲܢ ܀ 694 :ܡܫܲܪܸܐ ܡܸܟܹܿܝܠ ܠܡܸܩܨܵܐ ܦܲܓܼܪܵܐ ܐܝܼܕܼܵܐ ܒܐܝܼܕܼܵܐ 695 ܕܢܸܗܘܸܐ ܕܠܝܼܠ ܗ̄ܘ̣ ܠܡܸܬܼܦܲܠܵܓܼܵܘ ܠܟܼܠ ܢܵܣܒܹ̈ܐ ܀ 696 :ܩܝܵܡܬܹܿܗ ܕܲܒܼܪܵܐ ܪܲܙܸܙ ܟܵܗܢܵܐ ܒܫܘܼܡܠܵܝ ܐ̄ܪ̈ܵܙܹܐ 697 ܘܛܵܒܼ ܠܲܚ̇ܡܵܐܝܼܬܼ ܩܵܨܹ̇ܐ ܦܲܓܼܪܹܗ ܐܲܝܟ ܕܲܢܦܲܠܓܼܝܼܘܗܝ ܀ 698 :ܒܗܵܝ̇ ܕܐܵܦ ܡ̇ܪܲܢ ܟܲܕܼ ܡ̣ܢ ܩܲܒܼܪܵܐ ܩܵܡ̣ ܗ̄ܘ̣ܵܐ ܒܫܘܼܒܼܚܵܐ 699 ܐܸܬܼܚ̄ܙܝܼ ܠܢܸܫܹ̈ܐ ܘܲܠܬܲܠܡܝܼ̈ܕܹܐ ܥܣܲܪ ܙܲܒܼ̈ܢܵܬܼܵܐ ܀ 700 :ܒܲܙܒܲܢ ܠܡܲܪܝܲܡ ܗܵܝ̇ ܡܲܓܼܕܿܠܵܝܬܵܐ ܗܝ̤ ܒܲܠܚܘܿܕܹܝܗ̇ 701 ܘܒܲܙܒܲܢ ܠܠܘܼܩܵܐ ܘܲܠܩܲܠܚܘܿܦܵܐ ܕܐܵܙ̇ܠ̄ܝܼܢ ܒܐܘܼܪܚܵܐ ܀ 702 :ܘܒܲܙܒܲܢ ܠܓܼܘܼܕܼܵܐ ܚܕܲܥܣܝܼܪܵܝܬܵܐ ܒܓܼܵܘ ܥܸܠܝܼܬܼܵܐ 703 ܙܒܲܢ̄ܬܵܐ ܐ̄ܚܪܹܬܼܵܐ ܥܲܠ ܝܲܕܼ ܝܲܡܵܐ ܕܛܹܒܼܵܪܝܼܘܿܣ ܀ 704 :ܠܟܼܠܗܘܿܢ ܐܸܬܼܚܙܝܼ ܘܫܲܪܲܪ ܐܸܢܘܿܢ ܥܲܠ ܢܘܼܚܵܡܹܐ 705 ܘܐܵܦ ܠܲܬܼܐܘܿܡ̇ܐ ܚܵܘܝܼ ܣܸܛܪܹܗ ܕܘܼܟܲܬܼ ܪܘܼܡܚܵܐ ܀ 706 :ܘܥܲܠ ܛܘܼܪ ܙܲܝ̈ܬܹܿܐ ܒܲܪܸܟ ܡ̇ܪܲܢ ܠܲܬܼܥܣܲܪܬܹܿܗ 707 ܘܐܸܬܼܦܪܸܫ ܡܸܢܗܘܿܢ ܘܲܣܠܸ݂ܩ ܒܫܘܼܒܼܚܵܐ ܠܲܫܡܲܝ̈ ܫܡܲܝܵܐ ܀ 708 :ܘܗܵܫܵܐ ܡܸܬܼܚܙܸܐ ܒܣܲܡܒܼܵܐ ܕܦܲܓܼܪܹܗ ܠܲܒܼܢܲܝ̈ ܥܹܕܿܬܵܐ 709 ܘܲܡܗܲܝܡܢܝܼܢ ܒܹܗ ܘܢܵܣ̇ܒܿܝܼܢ ܡܸܢܹܗ ܪܲܗܒܼܘܿܢ ܚܲܝܹ̈ܐ ܀ 710 :ܗܵܝܕܹܿܝܢ ܩܵܥܹ̇ܐ ܟܵܪܘܿܙ ܥܹܕܿܬܵܐ ܘܲܡܪܝܼܡ ܩܵܠܹܗ 711 ܕܟܼܠܲܢ ܒܕܸܚܠܵܐ ܢܸܩܪܘܿܒܼ ܠܐ̄ܪܙܵܐ ܕܦܲܓܼܪܵܐ ܘܲܕܼܡ̇ܐ ܀ 712 :ܒܗܲܝܡܵܢܘܼܬܼܵܐ ܢܸܬܿܕܲܟܲܪ ܚܲܫܹܗ ܕܝܼܫܘܿܥ ܡ̇ܪܲܢ 713 ܘܢܸܬܼܒܲܝܲܢ ܒܵܗ̇ ܐܵܦ ܒܲܩܝܵܡܬܹܿܗ ܕܡ̣ܢ ܒܹܝܬܼ ܡܝܼ̈ܬܹܐ ܀ 714 :ܡܸܛܠܵܬܲܢ ܝܼܚܝܼܕܼܵܝܹܗ ܕܐܲܠܵܗ ܟܠܵܐ 715 ܢܣ݂ܲܒܼ ܒܲܪܢܵܫܵܐ ܡܫܲܡܠܲܝ ܘܲܓܼ݂ܡܲܪ ܡܕܲܒܿܪܵܢܘܼܬܹܗ ܀ 716 :ܘܚܲܫ̣ ܒܲܙܩܝܼܦܵܐ ܘܡ̣ܝܼܬܼ ܘܐܸܬܼܢܲܚܲܡ ܘܩܵܡ̣ ܘܐܸܣܬܲܠܲܩ 717 ܘܝܲܗ̣̄ܒܼ ܠܲܢ ܒܚܘܼܒܹܿܗ ܐܲܝܟ ܪܲܗܒܼܘܿܢܵܐ ܘܲܕܼܡܹܗ ܀ 718 :ܕܲܒܼܗܘܿܢ ܢܸܬܿܕܲܟܲܪ ܟܠ ܛܲܝ̈ܒܵܘܵܬܼܵܐ ܕܲܣܥ݂ܲܪ ܨܹܐܕܲܝܢ 719 ܢܵܘܕܹܿܐ ܘܢܸܣܓܿܘܿܕ ܘܲܢܫܲܒܲܚ ܠܹܗ ܒܟܼܠ ܥܸܕܵܢܝܼ̈ܢ ܀ 720 :ܚܢܲܢ ܕܹܝܢ ܡܸܟܹܿܝܠ ܒܚܘܼܒܵܐ ܫܲܦܝܵܐ ܘܗܲܝܡܵܢܘܼܬܼܵܐ 721 ܢܸܩܪܘܿܒܼ ܢܸܣܲܒܼ ܣܝܼܡܲܬܼ ܚܲܝܹ̈ܐ ܪ̈ܘܼܚܵܢܵܝܹܐ ܀ 722 :ܘܲܒܼܚܲܕܼ ܨܠܘܿܬܼܵܐ ܕܟܼܝܼܬܼܵܐ ܫܦܝܼܬܼܵܐ ܘܚܲܫܵܐ ܕܠܸܒܵܐ 723 ܢܸܫܬܵܘܬܲܦ ܠܗܘܿܢ ܠܐ̄ܪܵܙܹܐ ܣܓܼܝܼ̈ܕܹܐ ܕܥܹܕܿܬܼ ܩܘܼܕܼܫܵܐ ܀ 724 :ܘܲܢܣܝܼܡ ܬܸܢܘܲܝ ܕܲܬܼܝܵܒܼܘܼܬܼܵܐ ܩܕܼܵܡ ܐܲܠܵܗܵܐ 725 ܘܢܸܬܿܬܿܘܸܐ ܘܢܸܚܲܫ ܥܲܠ ܣܘܼܥܪ̈ܵܢܹܐ ܢܕܼܝܼ̈ܕܹܐ ܕܲܣܥܲܪܢ ܀ pb. 292 726 :ܘܢܸܫܐܲܠ ܪ̈ܲܚܡܹܐ ܘܫܘܼܒܼܩܵܢ ܚܵܘ̈ܒܹܿܐ ܡ̣ܢ ܡ̇ܪܹܟܿܠ 727 ܘܢܸܫܒܿܘܿܩ ܐܵܦ ܚܢܲܢ ܣܲܟܼܠ̈ܘܵܬܼܵܐ ܠܲܟܼ̈ܢܵܘܵܬܲܢ ܀ 728 :ܥܵܢܹ̇ܐ ܥܲܡܵܐ ܡ̇ܪܝܵܐ ܚܲܣܵܐ ܚܛܵܗܹ̈ܐ ܕܥܲܒܼܕܲܝ̈ܟ 729 ܘܕܲܟܵܐ ܬܹܐܪܬܲܢ ܡ̣ܢ ܦܘܼܠܵܓܼܵܐ ܘܡ̣ܢ ܚܸܪ̈ܝܵܢܹܐ ܀ 730 :ܡ̇ܪܝܵܐ ܚܲܣܵܐ ܣܲܟܼܠ̈ܘܵܬܼܵܐ ܕܲܡܫܲܒܿܚܵܢܲܝ̈ܟ 731 ܘܫܲܦܵܐ ܢܲܦܫܲܢ ܡ̣ܢ ܣܸܢܐܵܬܼܵܐ ܘܡܹܐܟܲܠܩܲܪܨܵܐ ܀ 732 :ܡ̇ܪܝܵܐ ܚܲܣܵܐ ܚܛܵܗܹ̈ܐ ܕܥܲܒܼܕܲܝ̈ܟ ܕܐܵܘܕܿܝܼܘ ܒܲܫܡܵܟ 733 ܘܐܲܫܘܵܢ ܕܢܸܣܲܒܼ ܩܘܼܕܼܫܵܐ ܗܵܢܵܐ ܒܗܲܝܡܵܢܘܼܬܼܵܐ ܀ 734 :ܡ̇ܪܝܵܐ ܚܲܣܵܐ ܠܥܲܒܼܕܲܝ̈ܟ ܕܩܵܪܹܝܢ ܠܲܫܡܵܟ ܟܠܝܘܿܡ 735 ܘܗܲܒܼܠܲܢ ܡ̇ܪܝܵܐ ܕܢܸܗܘܸܐ ܕܝܼܠܵܟ ܐܲܝܟ ܨܸܒܼܝܵܢܵܟ ܀ 736 :ܘܢܸܗܘܘܿܢ ܠܲܢ ܡ̇ܪܝ ܐ̄ܪ̈ܙܹܐ ܗܸܠܹܝܢ ܐܲܠܵܗܵܝܹ̈ܐ 737 ܠܦܵܪܹܗ̄ܣܝܼܵܐ ܘܓܲܠܝܘܼܬܼ ܐܲܦܹ̈ܐ ܩܕܼܵܡ ܪܲܒܿܘܼܬܼܵܟ ܀ 738 :ܗܵܝܕܹܝܢ ܟܵܗܢܵܐ ܡܨܲܠܸܐ ܘܒܼܵܥܹ̇ܐ ܡ̣ܢ ܐܲܠܵܗܵܐ 739 ܕܲܢܩܲܕܼܿܫ ܠܲܢ ܘܢܸܥܛܸܐ ܚܛܵܗܲܝ̈ܢ ܒܝܲܕܼ ܛܲܝܒܿܘܼܬܹܗ ܀ 740 :ܘܢܲܫܘܸܐ ܠܟܼܠܲܢ ܕܲܢܩܘܼܡ ܩܘܼܕܼܡ̇ܘܗܝ ܠܵܐ ܡܘܼܡܬܼܵܢܹ̈ܐ 741 ܘܢܸܩܪܹܝܘܗܝ ܟܠܲܢ ܒܦܵܪܹܗ̄ܣܝܼܵܐ ܐܲܒܵܐ ܐܲܒܼܘܼܢ ܀ 742 :ܘܗܵܝܕܹܿܝܢ ܥܲܡܵܐ ܥܵܢܹ̇ܐ ܘܐܵܡܲܪ ܒܲܚܦܝܼܛܘܼܬܼܵܐ 743 ܨܠܘܿܬܼܵܐ ܕܐܸܠܸܦ ܦܘܼܡܹܗ ܚܲܝܵܐ ܠܲܒܼܢܲܝ̈ ܚܘܼܒܹܿܗ ܀ 744 :ܐܲܒܼܘܼܢ ܕܥܵܡܲ݁ܪ ܠܥܸܠ ܒܲܫܡܲܝܵܐ ܘܲܒܼܟܼܠ ܕܘܼܟܵܐ 745 ܢܸܬܼܩܲܕܲܫ ܒܲܢ ܫܡܵܟ ܩܲܕܿܝܼܫܵܐ ܡ̣ܢ ܟܠ ܥܲܡܡܹ̈ܢ ܀ 746 :ܬܹܐܬܸܐ ܨܹܐܕܲܝܢ ܗܵܝ̇ ܡܲܠܟܿܘܼܬܼܵܐ ܕܐܸܫܬܵܘܕܿܝܼܬܿ ܠܲܢ 747 ܘܢܸܬܼܒܲܣܲܡ ܗܵܘ̇ ܒܝܲܕܼ ܪܲܗܒܼܘܿܢܵܐ ܡ̣ܢ ܗܵܐ ܡܸܟܵܐ ܀ 748 :ܢܸܗܘܸܐ ܘܢܼܬܿܬܿܢܝܼܚ ܘܢܸܫܬܲܡܠܹܐ ܒܲܢ ܨܸܒܼܝܵܢ ܚܘܼܒܵܟ 749 ܘܢܸܫܬܿܘܸܐ ܕܢܸܓܼܡܘܿܪ ܟܠ ܣܘܼܥܪ݁ܢܝܼܢ ܐܲܝܟ ܨܸܒܼܝܵܢܵܟ ܀ 750 :ܘܐܲܝܟ ܕܒܲܫܡܲܝܵܐ ܒܵܛ̇ܠܝܼܢ ܡܸܢܲܢ ܟܠ ܨܸܒܼܝܵܢܝܼ̈ܢ 751 ܗܵܟܲܢ ܘܒܲܐܪܥܵܐ ܐܲܝܟ ܨܸܒܼܝܵܢܵܟ ܒܲܠܚܘܿܕܼ ܢܸܨܒܸܿܐ ܀ 752 :ܗܲܒܼܠܲܢ ܠܲܚܡܵܐ ܘܟܼܠ ܣܘܼܢܩܵܢܵܐ ܦܲܓܼܪܵܢܵܝܵܐ 753 ܒܗܵܢܵܐ ܙܲܒܼܢܵܐ ܕܬܼܵܘܬܵܒܼܘܼܬܲܢ ܕܲܒܼܗܵܢ ܥܵܠܡܵܐ ܀ 754 :ܘܲܫܒܼܘܿܩ ܚܵܘ̈ܒܲܝܢ ܘܚܲܣܵܐ ܚܛܵܗܲܝ̈ܢ ܕܲܒܼܗܘܿܢ ܚܵܒܼ݂ܢܲܢ 755 ܒܝܲܕܼ ܪܲܦܝܘܼܬܲܢ ܘܚܵܫܘܿܫܘܼܬܲܢ ܘܲܡܚܝܼܠܘܼܬܲܢ ܀ 756 :ܘܐܵܦܚܢܲܢ ܗܵܟܿܝܠ ܫܒ݂ܲܩ̄ܢ ܡ̣ܢ ܠܸܒܲܢ ܠܟܼܠ ܕܚܲܝܵܒܼ ܠܲܢ 757 ܘܠܵܐ ܢܵܛ̇ܪܝܼܢܲܢ ܐܲܟܿܬܼܵܐ ܒܠܸܒܿܢ ܥܲܠ ܒܲܪܢܵܫܵܐ ܀ 758 :ܘܠܵܐ ܬܲܥܸܠܲܝܢ ܠܵܐ ܠܢܸܣܝܘܿܢܵܐ ܘܠܵܐ ܠܒܼܘܼܚܪܵܢܵܐ 759 ܕܲܡܚܝܼܠܝܼܢܲܢ ܘܒܸܠܥܵܕܼ ܚܲܝܠܵܟ ܠܲܝܬܿܝܼܢ ܡܸܕܸܿܡ ܀ pb. 293 760 :ܐܸܠܵܐ ܦܲܨܵܢ ܡ̣ܢ ܒܝܼܫܘܼܬܹܗ ܕܒܼܝܼܫܵܐ ܢܟܼܝܼܠܵܐ 761 ܘܠܵܐ ܬܲܦܸܣ ܠܹܗ ܠܡܸܩܪܲܒܼ ܨܸܐܕܲܝܢ ܒܝܲܕܼ ܨܸܢ̈ܥܵܬܹܗ ܀ 762 :ܡܸܛܠ ܕܕܝܼܠܵܟ ܐܝܼܬܼܵܘܗܝ ܚܲܝܠܵܐ ܐܵܦ ܡܲܠܟܿܘܼܬܼܵܐ 763 ܘܠܵܟ ܡܸܬܿܬܿܚܝܼܒܼܵܐ ܐܵܦ ܬܸܫܒܿܘܿܚܬܵܐ ܠܥܵܠܲܡ ܥܵܠܡܝܼܢ ܀ 764 :ܗܵܝܕܹܿܝܢ ܐܵܡܲ݁ܪ ܟܵܗܢܵܐ ܠܥܲܡܵܐ ܫܠܵܡܵܐ ܥܲܡܟܼܘܿܢ 765 ܘܥܵܢܹ̇ܐ ܥܲܡܵܐ ܘܥܲܡܵܟ ܟܵܗܢܵܐ ܘܥܲܡܵܗ̇ ܕܪܘܼܚܵܟ ܀ 766 :ܒܲܨܠܘܿܬܼ ܡ̇ܪܲܢ ܫܲܪܝܼ ܟܵܗܢܵܐ ܒܫܘܼܪܝ ܐ̄ܪ̈ܵܙܹܐ 767 ܘܒܼܵܗ̇ ܬܘܼܒܼ ܡܫܲܠܸܡ ܗܵܫܵܐ ܕܐܸܬܼܓܿܡܲܪܘ ܐ̄ܪ̈ܵܙܹܐ ܟܠܗܘܿܢ ܀ 768 :ܫܠܵܡܵܐ ܥܲܡܟܼܘܿܢ ܐܵܡܲ݁ܪ ܟܵܗܢܵܐ ܒܗܵܢ ܥܸܕܼܢܵܐ 769 ܘܲܡܥܲܗܸܕܼ ܠܲܢ ܩܝܵܡܬܹܿܗ ܕܡ̇ܪܲܢ ܕܡ̣ܢ ܒܹܝܬܼ ܡܝܼܬܹ̈ܐ ܀ 770 :ܫܠܵܡܵܐ ܥܲܡܟܼܘܿܢ ܐܸܡܲܪ ܡܵܪܲܢ ܠܲܬܼܪܸܥܣܲܪܬܹܿܗ 771 ܟܲܕܼ ܐܸܬܼܚ̄ܙܝܼ ܠܗܘܿܢ ܘܣܲܒܲܪ ܐܸܢܘܿܢ ܥܲܠ ܢܘܼܚܵܡܹܗ ܀ 772 :ܫܠܵܡܵܐ ܥܲܡܟܼܘܿܢ ܐܸܡ݂ܲܪ ܡ̇ܪܲܢ ܠܲܒܼܢܲܝ̈ ܐ̄ܪܵܙܹܗ 773 ܕܗܵܐ ܐܸܬܼܢܲܚܡܹܬܼ ܘܲܡܢܲܚܸܡ ܐ̄ܢܵܐ ܠܟܼܠܹܗ ܟܝܵܢܵܐ ܀ 774 :ܫܠܵܡܵܐ ܥܲܡܟܼܘܿܢ ܐܸܡ݂ܲܪ ܠܐܲܚܵܘ̈ܗܝ ܒܢܲܝ̈ ܥܸܢܝܵܢܹܗ 775 ܕܗܵܐ ܣܵܠܹ̇ܩ ܐ̄ܢܵܐ ܘܲܡܛܲܝܸܒܼ ܐ̄ܢܵܐ ܐܲܬܼܪܵܐ ܠܟܼܠܟܼܘܿܢ ܀ 776 :ܫܠܵܡܵܐ ܥܲܡܟܼܘܿܢ ܐܼܡܲ݁ܪ ܡ̇ܪܲܢ ܠܲܬܼܪܸܥܣܲܪܬܹܿܐ 777 ܕܥܲܡܟܼܘܿܢ ܐܝܼܬܼܿܝ ܥܕܲܡ̇ܐ ܠܥܵܠܲܡ ܕܠܵܐ ܫܘܼܠܵܡܵܐ ܀ 778 :ܘܗܵܢܵܐ ܫܠܵܡܵܐ ܝܵܗܹ̇ܒܼ ܟܵܗܢܵܐ ܠܲܒܼܢܲܝ̈ ܥܹܕܬܵܐ 779 ܘܲܡܫܲܪܲܪ ܠܗܘܿܢ ܒܚܘܼܒܵܐ ܘܣܲܒܼܪܵܐ ܘܗܲܝܡܵܢܘܼܬܼܵܐ ܀ 780 :ܘܡ̇ܐ ܕܐܸܬܼܥܲܬܲܕܼܘ ܝܲܠܕܲܝ̈ ܥܹܕܿܬܵܐ ܠܡܸܣܲܒܼ ܐ̄ܪ̈ܵܙܹܐ 781 ܩܵܥܹ̇ܐ ܟܵܗܢܵܐ ܕܲܠܩܲܕܿܝܼܫܹ̈ܐ ܝܵܐܹ̇ܠ ܒܘܼܕܼܫܵܐ ܀ 782 :ܠܟܼܠ ܩܲܕܿܝܼܫܹ̈ܐ ܡܩܲܕܿܫܲܝ̈ ܒܪܘܼܚܵܐ ܕܣܝܼܡܲܬܼ ܒܢܲܝ̈ܵܐ 783 ܝܵܐܹ̇ܐ ܩܘܼܕܼܫܵܐ ܒܝܲܕܼ ܫܵܠ̇ܡܘܼܬܼܵܐ ܕܠܲܐܒܼܵܗ̈ܬܼܵܐ ܀ 784 :ܠܟܼܠ ܩܲܕܿܝܼܫܹ̈ܐ ܕܩܲܕܿܫܲܬ̤ ܐܸܢܘܿܢ ܡܲܥܡܘܿܕܼܝܼܬܼܵܐ 785 ܝܵܐܹ̇ܐ ܩܘܼܕܼܫܵܐ ܐܲܝܟ ܢܵܡܘܿܣܵܐ ܥܹܕܿܬܵܢܵܝܵܐ ܀ 786 :ܬܸܓܼܡܹ̈ܐ ܐ̄ܚܪ̈ܵܢܹܐ ܗܵܢ̇ܘܿܢ ܕܐܸܬܿܛܪܸܕܼܘ ܡ̣ܢ ܓܵܘ ܥܹܕܼܬܵܐ 787 ܠܵܐ ܢܸܫܬܵܘܬܿܦܘܼܢ ܒܡܲܣܒܼܵܐ ܕܐ̄ܪ̈ܵܙܹܐ ܐܲܠܵܗܵܐ ܀ 788 :ܥܵܢܹ̇ܐ ܥܲܡܵܐ ܕܚܲܕܼ ܗ̄ܘ̣ ܐܲܒܼܵܐ ܗܵܘ̇ ܩܲܕܿܝܼܫܵܐ 789 ܕܡܸܡܬܼܘܿܡ ܐܝܼܬܼܵܘܗܝ ܕܠܵܐ ܫܘܼܪܵܝܵܐ ܘܠܵܐ ܫܘܼܠܵܡܵܐ ܀ 790 :ܘܗܘ̤ ܐܲܫܘܝܼ ܠܲܢ ܕܢܸܩܢܸܐ ܒܛܲܝܒܿܘܼ ܩܲܕܝܼܫܘܼܬܼܵܐ 791 ܡ̣ܢ ܡ̇ܘܠܵܕܵܐ ܪܘܼܚܵܢܵܝܵܐ ܕܡܲܥܡܘܿܕܼܝܼܬܼܵܐ ܀ 792 :ܘܚܲܕܼ ܗ̄ܘ̣ ܐܲܒܼܵܐ ܘܚܲܕܼ ܗ̄ܘ̣ ܐܵܦ ܒܪܵܐ ܘܪܘܼܚܵܐ ܕܩܘܼܕܼܫܵܐ 793 ܚܲܕܼ ܒܲܬܼܠܵܬܼܵܐ ܘܲܬܼܠܵܬܼܵܐ ܒܝܲܕܼ ܕܠܵܐ ܫܘܼܓܼܢܵܝܵܐ ܀ 794 ܫܘܼܒܼܚܵܐ ܠܐܲܒܼܵܐ ܘܠܲܒܼܪܵܐ ܕܡܸܢܹܗ ܘܲܠܪܘܼܚ ܩܘܼܕܼܫܵܐ: pb. 294 795 ܐܝܼܬܼܝܵܐ ܕܐܝܼܬܼܵܘܗܝ ܠܥܵܠܲܡ ܥܵܠܡܝܼܢ ܕܠܵܐ ܫܘܼܠܵܡܵܐ ܀ 796 :ܗܵܝܕܹܿܝܢ ܟܵܗܢܵܐ ܗܘ̤ ܩܲܕܼܡ̇ܝܑܬܼ ܢܵܣܹ̇ܒܼ ܩܘܼܕܼܫܵܐ 797 ܕܢܲܠܸܦ ܠܥܲܡܵܐ ܕܐܵܦ ܗܘ̤ ܟܵܗܢܵܐ ܣܢܝܼܩ ܥܲܠ ܪ̈ܲܚܡܹܐ ܀ 798 :ܟܵܗܢܵܐ ܕܩܲܕܹܿܫ ܣܢܝܼܩ ܥܲܠ ܡܲܣܒܼܵܐ ܕܐ̄ܪ̈ܵܙܹܐ ܣܓܼܝܼܕܹ̈ܐ 799 ܕܢܸܫܬܿܘܸܐ ܐܵܦ ܗܘ̤ ܠܫܵܘܬܵܦܘܼܬܼܵܐ ܕܪܲܗܒܼܘܿܢ ܚܲܝܹ̈ܐ ܀ 800 :ܩܵܕܹ̇ܡ ܟܵܗܢܵܐ ܠܐܲܦܸܣܩܘܿܦܵܐ ܒܡܲܣܒܼܵܐ ܕܐ̄ܪ̈ܵܙܹܐ 801 ܐܸܢܗܘ̤ ܕܟܼܵܗܢܵܐ ܩܲܕܸܿܫ ܐܸܢܘܿܢ ܘܠܵܘ ܪܲܒܿ ܟܵܗܢܹ̈ܐ ܀ 802 :ܘܐܝܼܕܼܵܐ ܒܐܝܼܕܼܵܐ ܢܵܣܒܿܝܼܢ ܟܵܗܢܹ̈ܐ ܘܡܲܫܲܡܫܵܢܹ̈ܐ 803 ܘܗܵܝܕܹܿܝܢ ܥܲܡܵܐ ܓܲܒܼܪܹ̈ܐ ܘܢܸܫܹ̈ܐ ܙܥܘܿܪܹ̈ܐ ܘܪܵܘܪ̈ܒܹܐ ܀ 804 :ܘܥܲܡ ܡܲܦܲܩܬܹܿܗ ܕܟܼܵܗܢܵܐ ܡܒܲܪܸܟ ܠܥܲܡܵܐ ܘܐܸܡܲ݁ܪ 805 ܛܲܝܒܿܘܼܬܹܗ ܠܲܡ ܕܡ̇ܪܲܢ ܝܼܫܘܿܥ ܬܸܗܘܸܐ ܥܲܡܟܼܘܿܢ ܀ 806 :ܢܵܦܹ̇ܩ ܩܘܼܕܼܫܵܐ ܒܦܝܼܢܟܼܵܐ ܘܟܼܵܣܵܐ ܒܗܸܕܼܪܵܐ ܘܫܘܼܒܼܚܵܐ 807 ܒܲܠܘܼܝܼܬܼ ܟܵܗܢܹ̈ܐ ܘܙܵܘܚܵܐ ܪܲܒܵܐ ܕܲܡܫܲܡܫܵܢܹ̈ܐ ܀ 808 :ܐܲܠܦܹ̈ܐ ܕܥܝܼܪܹ̈ܐ ܘܲܡܫܲܡܫܵܢܹ̈ܐ ܕܢܘܼܪܵܐ ܘܪܘܼܚܵܐ 809 ܢܵܦ̇ܩܝܼܢ ܩܕܼܵܡ̇ܘܗܝ ܕܦܲܓܼܪܹܗ ܕܡ̇ܪܲܢ ܘܲܡܙܲܝܚܝܼܢ ܠܹܗ ܀ 810 :ܚܵܕܹ̇ܝܢ ܟܠܗܘܿܢ ܒܢܲܝܹ̈ܐ ܕܥܹܕܿܬܵܐ ܘܟܼܠܹܗ ܥܲܡܵܐ 811 ܡ̇ܐ ܕܚܵܙܹ̇ܝܢ ܠܹܗ ܠܦܲܓܼܪܵܐ ܕܢܵܦܹ̇ܩ ܡ̣ܢ ܓܵܘ ܡܲܕܼܒܿܚܵܐ ܀ 812 :ܘܐܲܟܼܕܝܼܘ ܫܠܝܼܚܹ̈ܐ ܒܡܵܪܲܢ ܒܵܬܼܪ ܩܝܵܡܬܹܿܗ 813 ܗܵܟܲܢ ܚܵ̇ܕܹܝܢ ܡܗܲܝܡܢܹ̈ܐ ܟܠܗܘܿܢ ܡ̇ܐ ܕܚܵܙܹ̇ܝܢ ܠܹܗ ܀ 814 :ܪܲܒܿܘܼ ܐܲܚܲܝ̈ ܐ̄ܪܵܙܵܐ ܗܵܢܵܐ ܘܠܵܐ ܡܸܬܼܡܲܠܲܠ 815 ܘܐܲܝܢܵܐ ܕܡܸܫܟܲܚ ܕܣܵܦܹ̇ܩ ܢܸܣܦܲܩ ܐܸܢܗܘ̤ ܕܲܡܨܸܐ ܀ 816 :ܐ̄ܪܵܙ ܠܝܼ ܐ̇ܪܵܙ ܠܝܼ ܩ̣ܥܵܐ ܐܹܫܲܥܝܵܐ ܬܗܝܼܪ ܩܲܢܒܼܝܼܢܹ̈ܐ 817 ܥܲܠ ܓܸܠܝܝܵܢܵܐ ܐܲܠܵܗܵܐ ܕܚܲܙ̣ܵܐ ܒܗܲܝܟܠܵܐ ܀ 818 :ܐܸܢܗܘ̤ ܕܐܸܒܼܥܸܐ ܕܐܸܟܼܬܿܘܿܒܼ ܡܸܕܹܿܡ ܥܲܠ ܗܵܢ ܒܲܪܒܵܐ 819 ܠܵܐ ܣܵܦ̇ܩܝܼܢ ܠܝܼ ܟܠ ܩܲܪ̈ܛܲܝܣܹܐ ܕܲܒܼܗܵܢܵܐ ܟܠ ܀ 820 :ܠܲܓܼܡܝܼܪܹ̈ܐ ܬܘܼܒܼ ܘܠܲܡܫܲܡ̈ܠܲܝܵܐ ܚܵܫܲܚ ܒܸܣܪܵܐ 821 ܠܫܲܒܼܪܹ̈ܐ ܚܲܠܒܼܵܐ ܥܕܲܡ̇ܐ ܕܢܸܡܛܘܿܢ ܠܲܓܼܡܝܼܪܘܼܬܼܵܐ ܀ 822 :ܡܲܢ ܕܐܵܟܹ̇ܿܠ ܦܲܓܼܪܝ ܗܘ̤ ܡܩܵܘܸܐ ܒܝܼ ܘܐܸܢܵܐ ܠܲܡ ܒܹܗ 823 ܐܸܢܗܘ̤ ܕܢܸܛܲܪ ܟܠ ܦܘܼܩܕܵܢܲܝ̈ ܒܲܙܗܝܼܪܘܼܬܼܵܐ ܀ 824 :ܡܲܢ ܕܐܸܟܹ̇ܠ ܦܲܓܼܪܝ ܘܫܵܬܹ̇ܐ ܡ̣ܢ ܕܼܡܝ ܟܲܕܼ ܠܵܐ ܫܵܘܹ̇ܐ 825 ܠܚܘܼܝܵܒܹܗ ܓܹܝܪ ܐܵܟܹ̇ܠ ܘܫܵܬܹ̇ܐ ܕܠܵܐ ܝܘܼܬܼܪܵܢܵܐ ܀ pb. 295 826 :ܦܵܫܹ̇ܛ ܐܝܼܕܼܵܘ̈ܗܝ ܐܲܝܢܵܐ ܕܩܵܪܹܒܼ ܠܡܸܣܲܒܼ ܦܲܓܼܪܵܐ 827 ܟܲܕܼ ܠܝܲܡܝܼܢܹܗ ܡܥܲܠܸܐ ܘܣܵܐܹ̇ܡ ܠܥܸܠ ܡ̣ܢ ܚܒܲܪܬܼܵܗ̇ ܀ 828 :ܒܲܕܼܡܘܼܬܼ ܨܠܝܼܒܼܵܐ ܦܵܟܲ݁ܪ ܠܐܝܼܕܼܵܘ̈ܗܝ ܗܘ̤ ܢܵܣܘܿܒܼܵܐ 829 ܘܟܸܢ ܡܩܲܒܸܿܠ ܠܹܗ ܠܦܲܓܼܪܹܗ ܠܥܸܠ ܡ̣ܢ ܨܠܝܼܒܼܵܐ ܀ 830 :ܠܥܸܠ ܡ̣ܢ ܨܠܝܼܒܼܵܐ ܐܸܬܼܒܲܙܲܚ ܗ̄ܘ̣ܵܐ ܡ̇ܪܲܢ ܝܼܫܘܿܥ 831 ܘܒܹܗ ܒܲܨܠܝܼܒܼܵܐ ܦܪ݂ܲܚ ܘܐܸܬܼܥܲܠܝܼ ܠܪܵܘܡܵܐ ܕܲܠܥܸܠ ܀ 832 :ܒܗܵܢܵܐ ܛܘܼܦܣܵܐ ܩܵܪܹ̇ܒܼ ܢܵܣܹ̇ܒܼ ܐܲܝܢܵܐ ܕܢܵܣܹ̇ܒܼ 833 ܘܟܼܵܗܵܢܵܐ ܕܝܵܗܹ̇ܒܼ ܐܵܡܲܪ ܨܹܐܕܼܵܘܗܝ ܦܲܓܼܪܹܗ ܕܡ̇ܪܲܢ ܀ 834 :ܢܵܣܹ̇ܒܼ ܒܐܝܼܕܼܵܘ̈ܗܝ ܦܲܓܼܪܵܐ ܣܓܼܝܼܕܼܵ ܕܡ̇ܪܵܐ ܕܟܼܠܵܐ 835 ܘܲܡܥܲܦܸܩ ܠܹܗ ܘܲܡܢܲܫܸܩ ܠܹܗ ܒܚܘܼܒܵܐ ܘܪ̈ܲܚܡܹܐ ܀ 836 :ܡܲܥܸܠ ܛܵܡܲ݁ܪ ܚܡܝܼܪܵܐ ܕܚܲܝܹ̈ܐ ܒܗܲܝܟܲܠ ܦܲܓܼܪܹܗ 837 ܕܢܸܗܘܸܐ ܦܲܓܼܪܹܗ ܡܩܲܕܿܫܵܐ ܒܡܲܣܒܼܵܐ ܕܦܲܓܼܪܹܗ ܕܡ̇ܪܲܢ ܀ 838 :ܠܚܵܘ̈ܒܹܿܗ ܡܚܲܣܸܐ ܠܡܘܼܡܹ̈ܐ ܡܕܲܟܸܿܐ ܠܟܹܐܒܹ̈ܐ ܡܲܐܣܸܐ 839 ܘܲܠܟܼܘܼ̈ܬܼܡ̇ܐ ܡܚܲܠܸܠ ܡ̇ܪܹܩ ܒܙܘܿܦܵܐ ܕܪ̈ܲܚܡܵܘܗܝ ܀ 840 :ܘܟܲܕܼ ܡܸܬܼܦܲܠܲܓܼ ܦܲܓܼܪܵܐ ܘܲܕܼܡ̇ܐ ܠܟܼܠ ܢܵܣܘܿܒܹ̈ܐ 841 ܩܵܥ̇ܝܵܐ ܥܹܕܿܬܵܐ ܠܐܝܼܩܵܪ ܐ̄ܪ̈ܵܙܹܐ ܘܗܵܠܹܝܢ ܐܵܡ̇ܪܵܐ ܀ 842 :ܗܵܐ ܣܲܡ ܚܲܝܹ̈ܐ ܗܵܐ ܡܸܬܼܦܲܠܲܓܼ ܒܥܹܕܿܬܼ ܩܘܼܕܼܫܵܐ 843 ܬܵܘ ܡ̇ܝܘܿܬܹ̈ܐ ܣܲܒܼܘ ܘܐܸܬܼܚܲܣܵܘ ܡ̣ܢ ܚܵܘܒܲܝ̈ܟܿܘܿܢ ܀ 844 :ܗܵܢ̇ܵܘ ܦܲܓܼܪܹܗ ܘܲܕܼܡܹܗ ܕܡ̇ܪܲܢ ܒܫܲܪܝܼܪܘܼܬܼܵܐ 845 ܕܫܲܩ̣ܠܘܼܗܝ ܥܲܡܡܹ̈ܐ ܘܐܸܬܼܚܲܣܝܼܘ ܒܹܗ ܕܠܵܐ ܦܠܝܼܓܼܘܼܬܼܵܐ ܀ 846 :ܗܵܢܵ̇ܘ ܣܲܡܵܐ ܕܡܲܐܣܸܐ ܟܹܐܒܹ̈ܐ ܘܫܘܼܪ̈ܲܝܵܐ ܣܪ̈ܲܝܵܐ 847 ܣܲܒܼܘ ܡ̇ܝܘܿܬܹ̈ܐ ܘܐܸܬܿܕܼܵܟܵܘ ܒܹܗ ܡ̣ܢ ܚܵܘ̈ܒܲܝܟܿܘܿܢ ܀ 848 :ܬܵܘ ܣܲܒܼܘ ܡܲܓܼܵܢ ܫܘܼܒܼܩܵܢ ܘܣܲܛܼܠ̈ܘܵܬܼܵܐ 849 ܒܦܲܓܼܪܵܐ ܘܲܕܼܡ̇ܐ ܕܫܵܩܹ̇ܠ ܚܛܝܼܬܹܗ ܕܥܵܠܡܵܐ ܟܠܹܗ ܀ 850 :ܘܡ̣ܢ ܕܐܸܫܬܵܘܬܲܦܘ ܒܦܲܓܼܪܵܐ ܘܲܕܼܡ̇ܐ ܟܠܹܗ ܟܸܢܫܵܐ 851 ܡܲܩܦܝܼܢ ܘܐܵܡ̇ܪܝܼܢ ܒܝܲܕܼ ܚܲܕܼܘܼܬܼܵܐ ܘܲܦܨܝܼܚܘܼܬܼܵܐ ܀ 852 :ܡ̇ܪܲܢ ܝܼܫܘܿܥ ܡܲܠܟܵܐ ܣܓܿܝܼܕܼܵܐ ܡ̣ܢ ܟܠ ܒܸܪ̈ܝܵܢ 853 ܒܲܛܸܠ ܡܸܢܲܢ ܒܚܲܝܠܵܐ ܕܐ̄ܪ̈ܵܙܲܝܟ ܟܠ ܢܼܟܼܝܵܢܝܼ̈ܢ ܀ 854 :ܘܡ̇ܐ ܕܕܼܵܢܲܚ ܐܲܢ̄ܬܿ ܒܚܲܪܬܼܵܐ ܕܙܲܒܼܢܹ̈ܐ ܠܦܘܼܪܩܵܢ ܟܠܵܐ 855 ܢܸܦܘܿܩ ܠܐܘܼܪܥܵܟ ܒܦܵܪܹܗ̄ܣܝܼܵܐ ܒܝܲܕܼ ܐܘܿܫܲܥܢܹ̈ܐ ܀ 856 :ܘܢܵܘܕܹܿܐ ܠܲܫܡܵܟ ܥܲܠ ܛܲܝܒܿܘܼܬܼܵܟ ܕܲܠܘܵܬܼ ܓܸܢܣܲܢ 857 ܕܚܲܣܝܼܬܿ ܚܵܘ̈ܒܲܝܢ ܘܲܥ̣ܛܲܝܬܿ ܐܸܢܘܿܢ ܒܦܲܓܼܪܵܟ ܘܲܕܼܡܵܟ ܀ 858 ܘܗܵܪܟܵܐ ܘܬܲܡ̇ܢ ܡܸܫܬܿܘܸܐ ܕܢܲܣܸܩ ܠܐܲܠܵܗܘܼܬܼܵܟ: pb. 296 859 ܫܘܼܒܼܚܵܐ ܦܲܐܝܵܐ ܥܲܡ ܬܵܘܕܿܝܼܬܼܵܐ ܥܠܵܠܲܡ ܥܵܠܡܝܼܢ ܀ 860 :ܗܵܝܕܹܿܝܢ ܩܵܥܹ̇ܐ ܟܵܪܘܿܙ ܥܹܕܿܬܵܐ ܒܟܼܵܪܘܿܘܙܼܬܹܗ 861 ܘܲܡܚܵܦܸܛ ܠܹܗ ܠܥܲܡܵܐ ܕܢܵܘܕܹܿܐ ܘܗܵܟܲܢ ܐܸܡܲ݁ܪ ܀ 862 :ܟܠܲܢ ܐܲܝܠܹܝܢ ܕܲܠܡܵܘܗܲܒܼܬܼܵܐ ܕܐ̄ܪ̈ܵܙܹܐ ܐܸܫܬܿܘܝܼܢ 863 ܢܵܘܕܹܿܐ ܘܢܸܣܓܿܘܿܕܼ ܘܲܢܫܲܒܲܚ ܠܹܗ ܠܐܲܠܵܗ ܟܠܵܐ ܀ 864 :ܘܥܵܢܹ̇ܐ ܥܲܡܵܐ ܠܹܗ ܬܸܫܒܿܘܿܚܬܼܵܐ ܥܲܠ ܡ̇ܘܗܲܒܼܬܹܗ 865 ܕܠܵܐ ܡܸܬܼܦܲܪܥܵܐ ܠܥܵܠܲܡ ܥܵܠܡܝܼܢ ܐܵܡܹܝܢ ܘܐܵܡܹܝܢ ܀ 866 :ܗܵܝܕܹܿܝܢ ܟܵܗܢܵܐ ܡܨܲܠܸܐ ܘܡ̇ܘܕܹܿܐ ܠܐܲܠܵܗ ܟܠܵܐ 867 ܕܐܲܫܘܝܼ ܠܓܸܢܣܲܢ ܠܐ̄ܪ̈ܵܙܹܐ ܫܒܼܝܼܚܹ̈ܐ ܕܠܵܐ ܡܸܬܼܡܲܠܠܝܼܢ ܀ 868 :ܘܒܼܵܥܹ̇ܐ ܘܲܡܦܝܼܣ ܕܲܢܚܲܝܸܠ ܠܲܢ ܕܢܸܫܦܲܪ ܩܘܼܕܼܡ̇ܘܗܝ 869 ܒܝܲܕܼ ܚܘܼܫܵܒܹ̈ܐ ܘܡܸܠܹ̈ܐ ܐܲܟܲܚ̄ܕܼ ܘܲܒܼܣܘܼܥܪ̈ܵܢܹܐ ܀ 870 :ܗܵܝܕܹܿܝܢ ܨܠܘܿܬܼܵܐ ܕܐܲܠܸܦ ܦܘܼܡ̇ܐ ܗܵܘ̇ ܡܲܚܝܢܵܐ 871 ܡܨܲܠܹܝܢ ܟܠܗܘܿܢ ܒܡܲܕܼܒܿܚܵܐ ܘܲܠܒܲܪ ܒܲܟܼܢܝܼܫܘܼܬܼܵܐ ܀ 872 :ܒܵܗ̇ ܗ̄ܘ̣ ܡܫܲܪܹܝܢ ܨܠܘܿܬܼܵܐ ܟܠܵܗ̇ ܒܨܲܦܪܵܐ ܘܪܲܡܫܵܐ 873 ܘܒܼܵܗ̇ ܗ̄ܘ̣ ܡܫܲܠܡܝܼܢ ܐ̄ܪ̈ܵܙܹܐ ܟܠܗܘܿܢ ܕܥܹܕܲܬܼ ܩܘܼܕܼܫܵܐ ܀ 874 :ܗ̤ܝ ܠܲܡ ܐܝܼܬܹܝܗ̇ ܨܠܘܿܬܼܵܐ ܟܠܵܗ̇ ܗܵܝ̇ ܚܵܒܼܘܿܫܬܵܐ 875 ܘܡ̣ܢ ܒܸܠܥܵܕܹܝܗ̇ ܠܵܐ ܡܸܬܼܓܲܟܪܵܐ ܨܠܘܿܬܼܵܐ ܟܠܵܗ̇ ܀ 876 :ܗܵܝܕܹܝܢ ܢܵܦܹ̇ܩ ܩܵܐܹ̇ܡ ܥܲܠ ܬܪܲܥ ܡܲܕܼܒܿܚܵܐ 877 ܘܦܵܫܹ̇ܛ ܐܝܼܕܼܵܘ̈ܗܝ ܘܲܡܒܲܪܸܟ ܠܹܗ ܠܥܲܡܵܐ ܘܐܸܡܲ݁ܪ ܀ 878 :ܠܥܲܡܵܐ ܟܠܹܗ ܡܒܲܪܸܟ ܟܵܗܢܵܐ ܒܗܵܘ̇ ܥܸܕܵܢܵܐ 879 ܒܛܘܼܦܣܵܐ ܕܒܲܪܸܟ ܡ̇ܪܲܢ ܝܼܫܘܿܥ ܠܲܬܼܪܥܣܲܪܬܹܿܗ ܀ 880 :ܒܝܘܿܡ ܣܘܼܠܵܩܹܗ ܐܲܪܝܼܡ ܐܝܼܕܼܵܘ̈ܗܝ ܪܲܒܵܐ ܕܟܼܘܼܡܪܹ̈ܐ 881 ܘܒܲܪܸܟ ܘܟܲܗܹܢ ܠܲܬܼܪܸܥܣܲܪܬܹܿܗ ܘܟܸܢ ܐܸܬܼܥܲܠܝܼ ܀ 882 :ܐ̄ܪܵܙ ܢܘܼܚܵܡܹܗ ܪܲܙܸܙ ܟܵܗܢܵܐ ܒܫܘܼܡܠܵܝ ܐ̄ܪ̈ܵܙܹܐ 883 ܘܐ̄ܪܵܙ ܓܸܠܝܵܢܹܗ ܩܕܼܵܡ ܬܲܠܡܝܼܕܼܵܘ̈ܗܝ ܒܝܲܕܼ ܦܘܼܠܵܓܹܗ ܀ 884 :ܒܲܦܫܵܛ ܐܝܼܕܼܵܘ̈ܗܝ ܕܟܼܵܗܢܵܐ ܙܲܗܝܵܐ ܕܠܲܐܦܲܝ̈ ܪܵܘܡܵܐ 885 ܡܲܣܪܲܚ ܒܘܼܪܟܿܬܼܵܐ ܠܟܼܠܹܗ ܟܸܢܫܵܐ ܘܗܵܟܲܢ ܐܵܡܲ݁ܪ ܀ 886 :ܗܵܘ̇ ܕܒܲܪܸܟ ܠܲܢ ܒܟܼܠ ܒܘܼܪ̈ܟܵܬܼܵܐ ܕܪܘܼܚ ܒܲܫܡܲܝܵܐ 887 ܗܵܫܵܐ ܐܵܦ ܗܘ̤ ܢܒܲܪܸܟ ܠܟܼܠܲܢ ܒܚܲܝܠܵܐ ܕܐ̄ܪ̈ܵܙܵܘܗܝ ܀ 888 :ܒܗܵܕܹܐ ܒܘܼܪܟܿܬܼܵܐ ܕܲܡܒܲܪܸܟ ܠܲܢ ܟܵܗܢܵܐ ܙܲܗܝܵܐ 889 ܨܵܐܲܪ ܐ̄ܪ̈ܵܙܵܐ ܕܗܵܝ̇ ܕܲܥܬܼܝܼܕܼܵܐ ܕܬܸܥܘܼܪ ܨܹܐܕܲܝܢ ܀ 890 :ܡ̇ܐ ܕܐܸܬܼܢܲܚܲܡ̄ܢ ܡ̣ܢ ܒܹܝܬܼ ܡܝܼ̈ܬܹܐ ܘܲܠܒܸܫ̣̄ܢ 891 ܠܥܸܠ ܠܲܫܡܲܝܵܐ ܡܬܼܥܲܠܹܝܢܲܢ ܥܲܡ ܦܵܪܘܿܩܵܐ ܀ 892 ܬܲܡ̇ܢ ܒܵܛ̇ܠܝܼܢ ܚܲܫܹ̈ܐ ܟܠܗܘܿܢ ܡ̣ܢ ܐ̄ܢܵܫܘܼܬܲܢ: pb. 297 893 ܘܡܸܬܼܒܲܣܡܝܼܢܲܢ ܒܛܘܼܒܹ̈ܐ ܪ̇ܓܼܝܼܓܹܐ ܕܠܵܐ ܫܘܼܠܵܡܵܐ ܀ 894 :ܒܗܵܢܵܐ ܥܵܠܡܵܐ ܕܒܹܗ ܡܕܲܝܪܼܝܼܢܲܢ ܒܚܲܫܹ̈ܐ ܟܠܗܘܿܢ 895 ܢܸܛܲܪ ܚܲܝܲܝ̈ܢ ܡ̣ܢ ܢܸܟܼܝܵܢܹ̈ܐ ܕܲܟܼܣܹܝܢ ܘܲܓܼܠܹܝܢ ܀ 896 :ܘܐܲܝܟ ܕܐܲܫܘܝܼ ܠܲܢ ܠܡܲܣܒܼܵܐ ܕܐ̄ܪ̈ܵܙܵܘܗܝ ܒܝܲܕܼ ܛܲܝܒܿܘܼܬܹܗ 897 ܢܲܫܘܸܐ ܠܟܼܠܲܢ ܕܢܸܗܘܸܐ ܗܲܝܟܿܠܹ̈ܐ ܠܐܲܠܵܗܘܼܬܹܗ ܀ 898 :ܘܲܒܼܟܼܠ ܢܸܫܡܵܐ ܢܵܘܕܼܵܐ ܘܢܸܣܓܿܘܿܪ ܘܲܢܫܲܒܲܚ ܠܹܗ 899 ܥܲܠ ܡ̇ܘܗܲܒܼܬܹܗ ܕܠܵܐ ܡܸܬܼܡܲܠܠܵܐ ܒܠܸܫܵܢ ܒܸܣܪܵܐ ܀ 900 :ܥܵܠܹܝܢ ܡܲܣܪܲܚ ܟܵܗܢܵܐ ܙܲܗܝܵܐ ܒܝܲܕܼ ܒܘܼܪ̈ܟܵܬܹܗ 901 ܘܲܒܼܝܲܡܝܼܢܹܗ ܪܵܫܹ̇ܡ ܠܟܸܢܫܵܐ ܒܪܘܼܫܡܵܐ ܚܲܝܵܐ ܀ 902 :ܗܸܠܹܝܢ ܐܸܢܘܿܢ ܐ̄ܪ̈ܵܙܹܐ ܫܒܼܝܼܚܹ̈ܐ ܕܥܹܕܲܬܼ ܩܘܼܕܼܫܵܐ 903 ܘܗܵܢܵܘ̇ ܛܲܟܼܣܵܐ ܕܒܹܗ ܡܸܬܼܓܲܡܪܝܼܢ ܡ̣ܢ ܟܵܗܢܘܼܬܼܵܐ ܀ 904 :ܛܘܼܒܼܵܘܗܝ ܠܐܲܝܢܵܐ ܕܲܕܼܟܸܐ ܠܸܒܹܿܗ ܒܗܵܘ̇ ܥܸܕܼܢܵܐ 905 ܕܒܹܗ ܡܸܬܼܩܲܕܿܫܝܼܢ ܐ̄ܪ̈ܵܙܹܐ ܕܚܝܼܠܹ̈ܐ ܕܦܲܓܼܪܹܗ ܕܡܵܪܲܢ ܀ 906 :ܥܝܼܪܹ̈ܐ ܒܪܵܘܡܵܐ ܝܵܗ̇ܒܿܝܼܢ ܛܘܼܒܼܵܐ ܠܲܒܼܢܲܝ̈̄ ܥܹܕܿܬܵܐ 907 ܕܐܸܫܬܿܘܝܼܘ ܠܡܲܣܒܼܵܐ ܕܦܲܓܼܪܹܗ ܘܲܕܼܡܹܗ ܕܡ̇ܪܲܢ ܝܼܫܘܿܥ ܀ 908 :ܫܘܼܒܼܚܵܐ ܠܲܫܡܵܟ ܥܲܠ ܡܵܘܗܲܒܼܬܼܵܟ ܕܠܵܐ ܡܸܬܼܡܲܠܠܵܐ 909 ܘܡܲܢ̣ܘܼ ܣܵܦܹ̇ܩ ܕܢܸܦܪܘܼܥ ܫܘܼܒܼܚܵܐ ܠܐܲܠܵܗܘܼܬܼܵܟ ܀ 910 :ܬܵܐ ܟܹܝܬܼ ܡܸܟܹܿܝܠ ܐܘܿ ܒܲܪ ܐ̄ܪܵܙܵܐ ܕܲܒܼܢܲܝ̈ ܥܹܕܿܬܵܐ 911 ܝܼܠܲܦ ܛܲܟܼܣܵܐ ܕܒܹܗ ܬܸܬܼܩܲܪܲܒܼ ܨܹܝܕ ܟܵܗܢܘܼܬܼܵܐ ܀ 912 :ܕܠܵܐ ܬܸܬܼܩܲܪܲܒܼ ܐܲܝܟ ܡ̇ܐ ܕܲܓܼܪܲܡ ܫܠܝܼܚܵܐ ܦܵܘܠܘܿܣ 913 :ܒܠܸܒܵܐ ܕܲܟܼܝܵܐ ܩܪܘܿܒܼ ܨܹܝܕ ܦܲܓܼܪܹܗ ܘܲܕܼܡܹܗ ܕܡܪܲܢ 914 ܕܲܡܚܲܣܹܝܢ ܠܵܟ ܡ̣ܢ ܟܘܼ̈ܬܼܡ̇ܬܼܵܐ ܕܚܵܘ̈ܒܹܿܗ ܕܲܣܥܲܪ̣ܬܿ ܀ 915 :ܠܵܐ ܢܵܕܼܵܐ ܠܗܘܿܢ ܡ̣ܢ ܚܲܛܵܝܵܐ ܕܨܵܒܹ̇ܐ ܕܲܢܬܼܘܼܒܼ 916 ܘܠܵܐ ܡ̣ܢ ܛܲܢܦܵܐ ܕܐܲܒܼܝܼܠ ܘܲܡܥܵܩ ܥܲܠ ܛܲܢܦܘܼܬܹܗ ܀ 917 :ܒܗܵܕܹܐ ܬܸܢܘܲܝ ܡܩܲܒܿܠܝܼܢ ܠܛܲܢܦܹ̈ܐ ܘܲܠܚܲܛܵܝܹ̈ܐ 918 ܕܣܵܝ̇ܡܝܼܢ ܩܝܵܡܵܐ ܕܠܵܐ ܢܸܬܼܗܲܦܟܿܘܼܢ ܠܲܥܒܼܵܕܲܝܗܘܿܢ ܀ 919 ܥܲܡܹܗ ܕܟܼܵܗܢܵܐ ܨܲܠܵܐ ܒܚܘܼܒܵܐ ܒܗܵܘ̇ ܥܸܕܼܵܢܵܐ: pb. 298 920 ܕܲܡܩܲܒܸܿܠ ܠܵܟ ܝܵܗܹ̇ܒܼ ܚܲܝܹ̈ܐ ܘܫܵܒܹ̇ܩ ܚܵܘ̈ܒܹܿܐ ܀ 921 :ܐܸܙܕܹܿܗ̄ܪ ܡܸܟܹܿܝܝܠ ܕܠܵܐ ܬܸܦܘܿܩ ܠܵܟ ܠܒܲܪ ܡ̣ܢ ܗܲܝܟܿܠܵܐ 922 ܒܗܵܘ̇ ܥܸܕܼܵܢܵܐ ܕܒܹܗ ܡܸܬܼܩܲܕܿܫܝܼܢ ܐ̄ܪ̈ܵܙܹܐ ܕܚܝܼܠܹ̈ܐ ܀ 923 :ܡܲܢ̣ܘܼ ܗܵܢܵܐ ܕܲܒܼܨܸܒܼܝܵܢܹܗ ܢܢܲܟܼܪܸܐ ܢܲܦܫܹܗ 924 ܠܗܵܝ̇ ܡܸܫܬܿܘܼܬܼܵܐ ܕܐܸܙܕܲܡܲܢܘ ܠܵܗ̇ ܥܝܼܪܹ̈ܐ ܘܐ̄ܢܵܫܵܐ ܀ 925 :ܡܲܢ̣ܘܼ ܗܵܢܵܐ ܕܟܲܕܼ ܒܲܡܢܵܬܼܵܐ ܣܝܼܡ ܕܲܒܼܢܲܝ̈ܵܐ 926 ܥܲܡ ܢܘܼܟܼܪ̈ܵܝܹܐ ܕܛܸܪܕܲܬ̤ ܥܹܕܿܬܵܐ ܩܢܘܿܡܹܗ ܣܵܐܹ̇ܡ ܀ 927 :ܗܵܢ̇ܘܵ ܙܲܒܼܢܵܐ ܕܙܵܕܹܩ ܕܲܢܩܘܼܡ ܡܲܠܲܐܟܼܵܐܝܼܬܼ 928 ܒܗܵܘ̇ ܥܸܕܵܢܵܐ ܕܒܹܗܘ̣ ܡܲܓܿܢܵܐ ܪܘܼܚܵܐ ܕܩܘܼܕܼܫܵܐ ܀ 929 :ܗܵܢ ܥܸܕܼܵܢܵܐ ܚܲܝܹ̈ܐ ܝܵܗܹ̇ܒܼ ܠܲܕܼܩܵܐܹ̇ܡ ܒܹܗ 930 ܗܵܢ ܥܸܕܵܢܵܐ ܕܵܫܢܹ̈ܐ ܡܦܲܠܸܓܼ ܠܲܕܼܢܵܣܹ̇ܒܼ ܠܹܗ ܀ 931 :ܛܘܼܒܼܵܘܗܝ ܠܐܲܝܢܵܐ ܕܲܡܗܲܝܡܸܢ ܒܹܗ ܘܢܵܣܹ̇ܒܼ ܡܸܢܹܗ 932 ܕܐܸܢ ܡܝܼܬܼ ܚܵܝܹ̇ܐ ܘܐܸܢ ܚܲܝ ܠܵܐ ܢܡܘܼܬܼ ܒܣܲܟܼܠܘܵܬܹ̈ܗ ܀ 933 :ܗܵܪܟܵܐ ܐܸܠܦܲܢ ܠܒܹܝܬܼ ܢܵܘܚܵܐ ܡܛܵܬ̤ ܘܲܡܨܝܼܕܿܬܿܢ ܟܠܵܬ̤ 934 ܡ̇ܕܹܝܢ ܢܸܫܬܿܘܿܩ ܢܝܼܫܲܢ ܗ̄ܘ̣ܵܐ ܓܹܝܪ ܗܵܘ̇ ܡ̇ܐ ܕܟܲܢܫܲܬ̤ ܀ 935 :ܐܵܘܕܲܝܼܬܼ ܡ̣ܢ ܩܕܝܼܡ ܕܠܵܐ ܒܙܘܼܛܵܡܹ̈ܐ ܡܚܝܼܠܘܼܬܼܝ ܬܚܲܝܒܼܘܼܢ 936 ܘܗܵܫܵܐ ܒܚܘܼܒܵܐ ܬܪܘܿܨܘ ܒܘܼܨܵܪ̈ܝ ܐܸܢܗܘ̤ ܕܬܸܫܟܿܚܘܼܢ ܀ 937 :ܫܘܼܒܼܚܵܐ ܠܲܫܡܵܟ ܕܫܲܠܸܡܬܿ ܥܲܡܲܢ ܗܵܘ̇ ܕܒܼܵܟ ܫܲܪܝܼܢ 938 ܘܬܼܵܘܕܿܝܼ ܠܐܲܒܼܘܼܟ ܘܲܠܪܘܼܚܩܘܼܕܼܫܵܐ ܠܥܵܠܲܡ ܥܵܠܡܝܼܢ ܀ ܀