Narsai: On the Repentant Thief - ܥܲܠ ܓܲܝܵܣܵܐ

1 :ܒܪܝܼܬܼܵܐ ܚܕܲܬܵܐ ܒܪ̣ܵܐ ܒܵܪܘܿܝܵܐ ܒܪܹܫ ܓܵܓܼܘܼܠܬܵܐ 2 ܘܚܵܘܝܼ ܚܲܝܠܵܐ ܕܐܘܼܡ̇ܢܘܼܬܹܗ ܒܓܲܒܼܪܵܐ ܙܩܝܼܦܵܐ ܀ 3 :ܓܲܒܼܪܵܐ ܙܩܝܼܦܵܐ ܚܙ̣ܵܘ ܐܲܪ̈ܥܵܢܹܐ ܘܲܫܡܲܝܵܢܹ̈ܐ 4 ܘܲܟܼܢܲܫ̣ܘ ܨܹܐܕܼܵܘܗܝ ܕܢܸܚܙܘܿܢ ܬܲܗܪܵܐ ܕܡܸܬܼܡܲܠܲܠ ܒܹܗ ܀ 5 :ܒܪܝܼܬܼܵܐ ܟܠܵܗ̇ ܟܸܢܫܲܬ̤ ܡ̣ܢ ܟܠ ܦܸܢ̈ܝܵܢ 6 ܠܡܸܬܼܒܲܩܵܝܘܼ ܒܐܘܼܡܵܢܘܼܬܼܵܐ ܕܲܒܼܪܹܫ ܩܲܝܣܵܐ ܀ 7 :ܐܘܼܡܵܢܵܐܝܼܬܼ ܨܵܪܹܗ ܠܥܵܠܲܡ ܡܵܪܹܗ ܕܥܵܠܲܡ 8 ܘܐܵܣܸܩ ܣܵܡܹ݂ܗ ܥܲܠ ܪܹܫ ܩܲܝܣܵܐ ܕܢܼܚܙܹܝܗܝ ܟܠܢܵܫ ܀ 9 :ܒܕܲܦܵܐ ܕܦܲܓܼܪܵܐ ܡܲܬܼܚܲܙܝܵܢܵܐ ܨܵܪ ܟܠ ܒܸܪ̈ܝܵܢ 10 ܕܢܸܬܼܒܲܩܘܿܢ ܒܹܗ ܡܠܝܼܠܹ̈ܐ ܘܚܲܪ̈ܫܹܐ ܒܐܘܼܡ̇ܢܘܼܬܹܗ ܀ 11 :ܒܐ̄ܢܵܫܵܐ ܣܲܝܟܹܗ ܠܲܥܒܼܵܕܼ ܐܝܼܕܼܵܘ̈ܗܝ ܒܫܘܼܪܵܝ ܙܲܒܼܢܹ̈ܐ 12 ܘܲܒܼܒܲܪܢܵܫܵܐ ܓܡ݂ܲܪ ܬܘܼܩܵܢܹܗ ܒܫܘܼܠܵܡ ܙܲܒܼܢܹ̈ܐ ܀ pb. 328 13 :ܐ̄ܢܵܫܵܐ ܓܒܼ݂ܵܐ ܠܹܗ ܕܲܢܚܲܕܸܿܬܼ ܒܹܗ ܥܵܠܡܵܐ ܒܲܠܝܵܐ 14 ܘܡܲܪ̣ܩܹܗ ܒܚܲܫܹ̈ܐ ܘܚܵܘܝܼ ܫܘܼܦܪܹܗ ܠܥܹܝܢ ܟܠ ܒܸܪ̈ܝܵܢ ܀ 15 :ܒܩܲܝܣܵܐ ܩܲܒܼܥܹܗ ܐܲܝܟ ܡܲܚܙܝܼܬܼܵܐ ܠܥܹܝܢ ܚܲܙܵܝܹ̈ܐ 16 ܕܲܢܚܘܼܪܘܼܢ ܒܹܗ ܘܢܸܚܙܘܿܢ ܡܘܼܡܹ̈ܐ ܕܲܩܢܘܿܡܲܝ̈ܗܘܿܢ ܀ 17 :ܐܲܝܟ ܕܲܠܚܸܘܝܵܐ ܕܲܙܩܲܦ̣ ܡܘܼܫܹܐ ܙܲܩܦܹܗ ܐܵܦ ܠܹܗ 18 ܕܢܲܐܣܸܐ ܠܐ̄ܢܵܫܵܐ ܡ̣ܢ ܢܘܼܟܼ̈ܬܵܬܼܵܐ ܕܫܹܐܕܹ̈ܐ ܛܪ̈ܘܼܢܹܐ ܀ 19 :ܫܹܐܕܹ̈ܐ ܢܲܟܬܿܘܼܗܝ ܠܓܸܢܣܵܐ ܕܐ̄ܢܵܫܵܐ ܚܲܪܡܵܢܵܐܝܼܬܼ 20 ܘܲܬܼܠܵܐ ܐ̄ܢܵܫܵܐ ܒܪܹܫ ܓܵܓܼܘܼܠܬܵܐ ܕܢܲܚܸܐ ܠܐ̄ܢܵܫܵܐ ܀ 21 :ܨܹܐܕܼܵܘܗܝ ܐܲܦܢܝܼ ܚܝܵܪܵܐ ܕܟܼܠܢܵܫ ܚܘܼܒܵܢܵܐܝܼܬܼ 22 ܕܐܲܝܢܵܐ ܕܚܵܐܲܪ ܒܪܸܚܡܲܬܼ ܚܘܼܒܵܐ ܢܸܘܟܹܿܐ ܠܫܹܐܕܹ̈ܐ ܀ 23 :ܒܚܘܼܒܵܐ ܚܵܪ̣ܘ ܒܹܗ ܡܠܝܼܠܹ̈ܐ ܘܚܲܪ̈ܫܹܐ ܒܦܲܓܼܪܵܐ ܨܠܝܼܒܼܵܐ 24 ܘܚܲܫܘ̣ ܥܲܠ ܚܲܫܹܗ ܘܲܩܢ̣ܵܘ ܣܲܒܼܪܵܐ ܒܦܘܼܪܩܵܢ ܐ̄ܢܵܫܵܐ ܀ 25 :ܚܘܼܒܵܢܵܐܝܼܬܼ ܚܵܪ ܒܹܗ ܥܵܠܡܵܐ ܒܦܘܼܪܩܵܢ ܚܲܝܵܘ̈ܗܝ 26 ܕܲܚܙ̣ܵܐ ܕܡܲܛܝܼ ܙܒܲܢ ܚܘܼܕܵܬܼܵܐ ܕܥܲܬܿܝܼܩܘܼܬܹܗ ܀ 27 :ܒܨܲܥܪܵܐ ܪܲܒܵܐ ܚ̣ܙܵܝܗܝ ܟܲܕܼ ܩܵܐܹ̇ܡ ܒܹܝܬܼ ܓܲܝܵܣܹ̈ܐ 28 ܘܐܲܟܼܪܝܼ ܣܲܓܿܝܼ ܥܲܠ ܡܘܼܟܵܟܹܗ ܕܲܕܠܵܐ ܢܵܡܘܿܣ ܀ 29 :ܒܚܘܼܒܹܿܗ ܬܗܲܪܘ ܗ̄ܘ̣ܵܘ ܟܝܵܢܹ̈ܐ ܚܲܪ̈ܫܹܐ ܐܵܦ ܡܲܠܵܠܹ̈ܐ 30 ܕܩܲܒܸܿܠ ܕܲܢܡܘܼܬܼ ܚܠܵܦ ܚܘܼܕܵܬܼܵܐ ܕܲܟܼܝܵܢܲܝ̈ܗܘܿܢ ܀ 31 :ܪܸܡܙܵܐ ܟܲܣܝܵܐ ܚܲܟܸܿܡ ܐܸܢܘܿܢ ܠܡܸܬܿܕܲܡ̇ܪܘܼ 32 ܒܓܲܒܼܪܵܐ ܙܩܝܼܦܵܐ ܕܲܙܩܝܼܦ ܥܲܡܹܗ ܥܵܠܡܵܐ ܘܥܵܘ̣ܠܹܗ ܀ 33 :ܐܘܿ ܬܸܕܼܡܘܼܪܬܵܐ ܕܚܹܝܠ ܒܵܪܘܿܝܵܐ ܕܠܵܐ ܡܸܬܼܡܲܠܲܠ 34 ܕܙܲܦܹ݂ܗ ܠܥܵܠܡܵܐ ܘܠܲܪ̈ܓܼܝܼܓܼܵܬܹܗ ܒܚܲܕܼ ܒܲܪܢܵܫܵܐ ܀ 35 :ܬܲܗܪܵܐ ܪܲܒܵܐ ܚܙ݂ܲܝ̈ ܒܸܪ̈ܝܵܬܼܵܐ ܒܚܲܕܼ ܒܲܪܢܵܫܵܐ 36 ܕܲܙܩܝܼ̈ܦܵܢ ܗ̣̄ܘܲܝ̈ ܥܲܡ ܡ̇ܝܘܿܬܼܵܐ ܕܲܒܼܪܹܫ ܩܲܝܣܵܐ ܀ 37 :ܒܗܵܢܵܐ ܬܲܗܪܵܐ ܬܗܲܪ ܓܲܝܵܣܵܐ ܕܡ̣ܢ ܝܲܡܝܼܢܵܐ 38 ܘܐܲܚܕܹܿܗ ܓܘܼܢܚܵܐ ܥܲܠ ܣܘܼܥܪܵܢܹܗ ܕܕܲܠܵܐ ܢܵܡܘܿܣ ܀ 39 :ܚܲܫܵܐ ܪܲܒܵܐ ܠܒܸܫ ܣܵܪܘܿܚܵܐ ܥܲܠ ܣܘܼܪ̈ܚܵܢܵܘܗܝ 40 ܕܲܚܙ̣ܵܐ ܒܪܝܼܬܼܵܐ ܕܐܲܒܼܝܼܠܵܐ ܗ̄ܘ̣ܵܬܼ ܚܲܫܝܼܫܵܐܝܼܬܼ ܀ 41 :ܚ̣ܙܵܐ ܠܲܟܼܝܵܢܹ̈ܐ ܕܲܟܼܡܝܼܪܝܼܢ ܗ̄ܘ̣ܵܘ ܒܥܸܕܵܢ ܚܲܫܵܐ 42 ܘܚܲܫ̣ ܘܐܸܬܿܬܲܢܲܚ ܥܲܠ ܣܲܢܝܵܬܹ̈ܗ ܕܲܟܼܠܵܐ ܡܸܢܝܵܢ ܀ 43 :ܚܙ̣ܵܐ ܢܲܗܝܼܪܹ̈ܐ ܕܲܥܛܝܼܦܝܼܢ ܗ̄ܘ̣ܵܘ ܢܲܚ̈ܬܹܿܐ ܕܐܸܝܼܠܵܐ 44 ܘܲܬܼܘܲܪ ܣܲܓܿܝܼ ܥܲܠ ܫܘܼܚܠܵܦܵܐ ܕܛܲܟܼܣܵܐ ܕܲܒܼܗܘܿܢ ܀ 45 ܚܙ̣ܵܐ ܕܲܡܙܲܥܙܲܥ ܙܵܘܥܵܐ ܠܐܲܪܥܵܐ ܐܲܝܟ ܕܲܠܡܸܦܲܠ: pb. 329 46 ܘܙܵܥ ܘܐܸܬܼܒܲܠܗܝܼ ܥܲܠ ܩܲܫܝܘܼܬܼܵܐ ܕܢܸܓܼ̈ܕܹܿܐ ܕܐܸܡܹܗ ܀ 47 :ܚܙ̣ܵܐ ܕܡܸܨܛܲܪܹܝܢ ܫܘܿܥܹ̈ܐ ܩ̈ܫܲܝܵܐ ܘܲܒܼܗܝܼܠ ܥܲܡܵܐ 48 ܘܲܚܠܵܦ ܢܲܚܬܵܐ ܣܲܕܹܿܩ ܢܲܦܫܹܗ ܥܲܠ ܡ̇ܐ ܕܲܗܘ̤ܵܐ ܀ 49 :ܚܙ̣ܸܵܐ ܕܲܡܒܲܙܚܝܼܢ ܚܲܪ̈ܡܹܐ ܒܓܲܒܼܪܵܐ ܕܲܙܩܝܼܦ ܥܲܡܹܗ 50 ܘܲܪܢܵܐ ܕܡ̇ܢܲܐ ܗ̄ܝܼ ܥܸܠܲܬܼ ܡ̇ܘܬܹܿܗ ܘܥܸܠܲܬܼ ܒܸܙܚܹܗ ܀ 51 :ܚܲܟܿܝܼܡܵܐܝܼܬܼ ܪܢ̣ܵܐ ܘܐܸܬܼܚܲܫܲܒܼ ܐܲܝܟ ܦܵܪܘܿܫܵܐ 52 ܕܡܸܛܠܗܵܢܵܐ ܚܫܸܟܼܘ ܢܲܗܝܼܪܹ̈ܐ ܘܙܵܥܲܬ̤ ܐܲܪܥܵܐ ܀ 53 :ܠܡܵܢ ܟܲܝ ܚܸܫܟܵܐ ܘܙܵܥܵܐ ܐܲܟܚ̄ܕܼ ܡܸܬܼܪܲܢܸܐ ܗ̄ܘ̣ܵܐ 54 ܘܥܲܠ ܡ̇ܢ ܬܲܪܬܹܿܝܢ ܕܥܲܣ̈ܩܵܢ ܣܲܓܿܝܼ ܒܲܚܕܼܵܐ ܫܵܥܵܐ ܀ 55 :ܡܲܢ ܟܲܝ ܐܲܘܝܼܥ ܟܝܵܢܹ̈ܐ ܚܲܪ̈ܫܹܐ ܡ̣ܢ ܫܸܪ̈ܫܲܝܗܘܿܢ 56 ܘܗܵܐ ܡܸܬܼܒܲܠܗܝܼܢ ܐܲܝܟ ܝܵܠܹܕܿܬܵܐ ܕܚܲܣ݂ܢܵܗ̇ ܟܹܐܒܼܵܐ ܀ 57 :ܡܲܢ̣ܘܼ ܫܲܚܠܸܦ ܫܲܦܝܘܼܬܼ ܢܘܼܗܪܵܐ ܠܘܵܬܼ ܚܸܫܘܿܟܼܵܐ 58 ܘܡܲܢ̣ܘܼ ܙܲܥܙܲܥ ܐܲܦܹ̈ܐ ܕܐܲܪܥܵܐ ܒܝܲܕܼ ܢܵܘܕܵܢܵܐ ܀ 59 :ܡܲܢ ܐܲܪܡܝܼ ܒܹܗ ܦܓܼܘܼ̈ܕܹܐ ܒܫܸܡܫܵܐ ܩܲܠܝܼܠ ܪܲܗܛܵܐ 60 ܘܡܲܢ̣ܘܼ ܗܲܦܟܹܿܗ ܠܣܲܗܪܵܐ ܦܨܝܼܚܵܐ ܠܲܕܼܡܵܐ ܟܡܝܼܪܵܐ ܀ 61 :ܠܡܲܢ ܐܲܒܼܝܼܠܝܼܢ ܟܝܵܢܹ̈ܐ ܚܲܪ̈ܫܹܐ ܕܠܵܐ ܒܲܥܝܵܕܼܵܐ 62 ܘܥܲܠ ܡ̇ܢ ܒܵܟܹ̇ܝܢ ܐܲܝܟ ܕܥܲܠ ܒܘܼܟܼܪܵܐ ܕܡܲܪܝܼܪ ܐܸܒܼܠܹܗ ܀ 63 :ܠܡܵܢܵܐ ܡܕܲܡܥܵܐ ܐܲܪܥܵܐ ܕܸܡܥܹ̈ܐ ܪܵܥܘܿܡܵܐܝܼܬܼ 64 ܘܥܲܠ ܡ̇ܢ ܡܲܚ̈ܬܼܵܢ ܥܲܝܢܹ̈ܐ ܕܐܲܦܹܝ̈ܗ̇ ܕܸܡܥܹ̈ܐ ܕܢܵܘܕܵܐ ܀ 65 :ܠܡܵܐ ܟܲܝ ܟܹܐܢܵܐ ܗ̄ܘ̣ ܓܲܒܼܪܵܐ ܙܩܝܼܦܵܐ ܕܙܩܝܼܦ ܥܲܡܲܢ 66 ܘܡܸܛܠܵܬܹܗ ܠܒܼܝܼܫܝܼܢ ܐܸܒܼܠܵܐ ܟܝܵܢܹ̈ܐ ܚܲܪ̈ܫܹܐ ܀ 67 :ܕܲܠܡܵܐ ܚܣܵܡܵܐ ܨܲܠܒܹ݂ܗ ܒܥܵܘ̣ܠܵܐ ܟܲܕܼ ܠܵܐ ܚܲܝܵܒܼ 68 ܘܡܹܐܟܲܠܩܲܪܨܵܐ ܩ̣ܒܲܥ ܒܹܗ ܨܹܨܹ̈ܐ ܟܲܕܼ ܠܵܐ ܫܵܘܹ̇ܐ ܀ 69 :ܕܲܠܡܵܐ ܟܵܗܢܹ̈ܐ ܚܣܲܡ̣ܘ ܒܹܗ ܘܣܲܩ̣ܪܘܼܗܝ ܥܵܘ̇ܠܵܐܝܼܬܼ 70 ܡܸܛܠ ܕܲܣܥ݂ܲܪ ܚܲܝܠܹ̈ܐ ܕܪܵܡܝܼܢ ܡ̣ܢ ܕܲܪ̈ܓܲܝܗܘܿܢ ܀ 71 :ܠܡܵܢܵܐ ܠܚܝܼܡܝܼܢ ܘܲܡܨܲܚܹܝܢ ܠܹܗ ܐܲܝܟ ܕܲܠܒܼܝܼܫܵܐ 72 ܕܗܵܐ ܛܵܒܼ ܢܵܨܲ݁ܚ ܫܸܡ ܥܘܼܕܼܪܵܢܵܐ ܕܦܲܠܸܓܼ ܒܐܲܪܥܵܐ ܀ 73 :ܠܡܵܢܵܐ ܫܵܬܹ̇ܐ ܨܲܥܪܵܐ ܘܒܸܙܚܵܐ ܐܲܝܟ ܚܲܝܒܼܵܐ 74 ܕܗܵܐ ܙܵܟܼܘܼܬܹܗ ܛܥܝܼܢܝܼܢ ܡܝܼ̈ܬܹܐ ܕܢܲܚܸܡ ܐܸܢܘܿܢ ܀ 75 :ܐܸܢ ܠܝܼ ܨܲܠܒ݂ܲܢܝ ܥܵܘ̣ܠܵܐ ܕܲܩܢܘܿܡܝ ܠܦܘܼܬܼ ܣܘܼܪ̈ܚܵܢܲܝ 76 ܗܘ̤ ܕܠܵܐ ܐܲܣܟܸܿܠ ܠܡܵܢ ܡܸܬܼܚܲܝܲܒܼ ܥܵܘ̇ܠܵܐܝܼܬܼ ܀ 77 :ܐܸܢ ܠܝܼ ܦܲܟܼܪܘܼܢܝ ܚܵܘ̈ܒܹܿܐ ܕܚܵܒܹ̇ܬܼ ܨܝܕ ܟܹܐܢܘܼܬܼܵܐ 78 :ܗܘ̤ ܕܙܲܟܵܝܵܐ ܗ̄ܘ̣ ܠܡܵܢܵܐ ܡܲܪܟܲܢ ܪܹܫܹܗ ܒܩܲܝܣܵܐ 79 ܐܸܢ ܠܝܼ ܕܲܚܛܹ̇ܝܬܼ ܨܵܕܼܘܼܢܝ ܦܲܚܹ̈ܐ ܕܛܸܡ̇ܪܹܬܼ ܒܐܲܪܥܵܐ: pb. 330 80 ܗܘ̤ ܕܲܒܼܡܸܠܵܘ̈ܗܝ ܚ̣ܝܵܘ ܚܲܛܵܝܹ̈ܐ ܠܡܵܢܵܐ ܡ̇ܐܹ̇ܬܼ ܀ 81 :ܫܡܝܼܥ ܠܝܼ ܛܸܒܹ̈ܐ ܕܚܹܝܠ ܐܵܬܼ̈ܘܵܬܼܵܐ ܕܲܣܥܲܪ ܒܐܲܪܥܵܐ 82 ܕܠܵܘ ܟܹܐܢܵܐܝܼܬܼ ܦܲܪ̣ܥܘܼܗܝ ܐ̄ܢܵܫܵܐ ܚܸܒܼܠܹ̈ܐ ܕܡ̇ܘܬܵܐ ܀ 83 :ܗܵܠܹܝܢ ܗܘ̤ ܒܹܗ ܡܸܬܼܚܲܫܲܒܼ ܗ̄ܘ̣ܵܐ ܒܲܪ ܝܲܡܝܼܢܵܐ 84 ܘܐܲܝܟ ܕܲܝܵ̇ܢܵܐ ܒܚ݂ܲܪ ܣܘܼܥܪܵܢܵܐ ܕܲܚܙ̣ܵܐ ܒܩܲܝܣܵܐ ܀ 85 :ܠܕܼܝܼܢܵܐ ܟܹܐܢܵܐ ܥܲܠ̣ ܥܲܡ ܝܲܨܪܹܗ ܦܵܪܘܿܫܵܐܝܼܬܼ 86 ܘܚܲܝܸܒܼ ܥܵܘ̣ܠܹܗ ܘܙܲܟܝܼ ܠܟܹܐܢܵܐ ܕܲܙܩܲܦ ܥܲܡܹܗ ܀ 87 :ܐܲܝܟ ܕܲܒܼܟܼܘܼܪܵܐ ܒܩܵܝ̣ܗܝ ܠܲܫܪܵܪܵܐ ܘܐܲܣܠܝܼ ܠܙܹܐܦܵܐ 88 ܘܚܵܘܝܼ ܫܘܼܦܪܵܐ ܕܡܸܠܲܬܼ ܩܘܼܫܬܵܐ ܠܥܹܝܢ ܚܲܙܵܝܹ̈ܐ ܀ 89 :ܘܟܲܕܼ ܛܵܒܼ ܚܲܫܵܐ ܕܚܲܫܲܝ̈ ܦܲܓܼܪܵܐ ܙܵܩܹ̇ܬܼ ܗ̄ܘ̣ܵܐ ܠܹܗ 90 ܠܵܐ ܚܵܒܼ݂ ܘܐܲܫܦܸܠ ܡ̣ܢ ܬܲܟܼܬܿܘܼܫܵܐ ܕܠܘܼܩܒܲܠ ܥܵܘ̣ܠܵܐ ܀ 91 :ܙܲܝܢܵܐ ܕܩܘܼܫܬܵܐ ܠܹܗ ܚܲܝܵܒܼ ܗ̄ܘ̣ܵܐ ܒܥܸܕܵܢ ܚܲܫܵܐ 92 ܘܓܲܢ̄ܒܵܪܵܐܝܼܬܼ ܐܲܩܪܸܒܼ ܘܲܙܟܼܵܐ ܕܠܵܐ ܒܲܥܝܵܕܼܵܐ ܀ 93 :ܩܹܐܪܣܵܐ ܩܲܫܝܵܐ ܦܠܲܥ̣ ܒܹܗ ܡ̣ܢ ܫܹܠܝ ܒܪܹܫ ܓܵܓܼܘܼܠܬܵܐ 94 ܘܲܚܠܝܼܨܵܐܝܼܬܼ ܝܲܗ̣̄ܒܼ ܗ̄ܘ̣ܵܐ ܢܲܦܫܹܗ ܠܘܵܬܼ ܬܲܟܼܬܿܘܼܫܵܐ ܀ 95 :ܐܲܝܟ ܕܲܠܡܵܘܬܵܐ ܣܵܡ̣ܗ̇ ܠܢܲܦܫܹܗ ܟܲܕܼ ܛܵܒܼ ܡܝܼܬܼ ܗ̄ܘ̣ܵܐ 96 ܘܐܲܩܠܝܼ ܘܒܲܣܲܪ ܥܲܠ ܟܠ ܚܲܫ̈ܝܼܢ ܐܲܝܟ ܠܵܐ ܚܵܐܹ̇ܫ ܀ 97 :ܬܪܹܝܢ ܬܲܟܼܬܿܘܼܫܹ̈ܐ ܥܒ݂ܲܕܼ ܟܲܕܼ ܩܵܐܹ̇ܡ ܥܲܠ ܪܹܫ ܩܲܝܣܵܐ 98 ܠܘܼܩܒܲܠ ܥܵܘ̣ܠܵܐ ܘܠܘܼܩܒܲܠ ܒܸܙܚܵܐ ܕܡ̣ܢ ܡܲܪ̈ܵܚܹܐ ܀ 99 :ܐܲܝܟ ܐܲܬܼܠܹܝܛܹ̈ܐ ܩܵܡ̣ ܒܲܙܩܝܼܦܵܐ ܡܓܲܝܸܣ ܐ̄ܢܵܫܵܐ 100 ܘܐܸܚܲܕܼ ܕܲܪܵܐ ܥܲܡ ܣܲܢ̈ܝܵܬܹܗ ܘܒܸܙܚܵܐ ܕܥܲܡܵܐ ܀ 101 :ܥܵܘ̣ܠܵܐ ܘܥܲܡܵܐ ܙܩܝܼܦ ܗ̄ܘ̣ܵܐ ܠܩܘܼܒܼܠܹܗ ܐܲܝܟ ܡܲܫܪܝܼܬܼܵܐ 102 ܘܗܘ̤ ܒܲܠܚܘܿܕܼܵܘܗܝ ܙܟܼܵܐ ܠܲܚܛܝܼܬܼܵܐ ܘܲܠܙܵܩܘܿܦܹ̈ܐ ܀ 103 :ܐܘܿ ܟܡܵܐ ܬܡܝܼܗ ܗ̄ܘ̣ܵܐ ܩܪܵܒܼܵܐ ܕܲܥܒ݂ܲܕܼ ܪܦܸܐ ܪܸܥܝܵܢܵܐ 104 ܕܲܒܼܥܸܕܵܢܵܐ ܕܲܦܣܵܩ ܣܲܒܼܪܵܐ ܫܩ݂ܲܠ ܙܵܟܼܘܼܬܼܵܐ ܀ 105 :ܒܥܸܕܵܢ ܡ̇ܘܬܵܐ ܥܲܠ̣ ܠܲܩܪܵܒܼܵܐ ܫܠܝܼܚ ܡ̣ܢ ܙܲܝܢܵܐ 106 ܘܥܲܪܛܸܠܵܐܝܼܬܼ ܙܟܼܵܐ݂ ܠܟܼܠ ܚܲܫܝܼ̈ܢ ܕܲܠܒܲܪ ܘܕܲܠܓܼܵܘ ܀ 107 :ܙܲܝܢܵܐ ܕܒܸܙܚܵܐ ܠܒܼܝܼܫ ܗ̄ܘ̣ܵܐ ܥܲܡܵܐ ܠܘܼܩܒܲܠ ܡ̇ܪܲܢ 108 ܘܲܡܫܲܕܹܿܐ ܗ̄ܘ̣ܵܐ ܡܸܠܹ̈ܐ ܕܨܲܥܪܵܐ ܐܲܝܟ ܠܘܿܠ̈ܝܵܬܼܵܐ ܀ 109 :ܡ̣ܢ ܦܘܼܡ ܛܲܡ̈ܐܹܐ ܡܸܬܼܒܲܙܲܚ ܗ̄ܘ̣ܵܐ ܡܩܲܕܹܿܫ ܟܲܡ̈ܠܹܐ 110 ܘܐܲܝܟ ܣܵܪܘܿܚܵܐ ܡܸܬܼܚܲܣܲܪ ܗ̄ܘ̣ܵܐ ܡ̣ܢ ܡܲܪ̈ܲܚܹܐ ܀ 111 :ܐܵܦ ܓܲܝܵܣܵܐ ܕܡ̣ܢ ܣܸܡܵܠܵܐ ܡܲܗܸܠ ܗ̄ܘ̣ܵܐ ܒܹܗ 112 ܘܛܵܒܼ ܡ̣ܢ ܥܲܡܵܐ ܫܵܕܹ̇ܐ ܗ̄ܘ̣ܵܐ ܒܹܗ ܓܹܐܕ̈ܐ ܕܨܲܥܪܵܐ ܀ pb. 331 113 :ܡܲܪܵܚܵܐܝܼܬܼ ܣܥ݂ܲܪ ܡܲܪܵܚܵܐ ܒܓܼܘܼܡܕܵܐ ܣܲܟܼܠܵܐ 114 ܘܲܚܠܵܦ ܣܲܝܦܵܐ ܫܡ݂ܲܛ ܠܸܫܵܢܹܗ ܠܡܹܐܫܲܕܼ ܨܲܥܪܵܐ ܀ 115 :ܐܸܢ ܐܲܢ̄ܬܿܘܼ ܠܡ ܡܫܝܼܚܵܐ ܕܐܵܬܹܿܐ ܐܸܡ݂ܲܪ ܥܲܛܠܵܐ 116 ܦܲܨܵܐ ܢܲܦܫܵܟ ܘܦܲܨܵܐ ܐܵܦ ܠܲܢ ܡ̣ܢ ܫܘܼܢܵܩܵܐ ܀ 117 :ܐܸܢܗܘ̤ ܕܡܲܠܟܵܐ ܐܲܢ̄ܬܿ ܘܕܝܼܠܵܟ ܐܝܼܬܼܵܘܗܝ ܕܵܘܝܼܕܼ 118 ܦܩܘܿܕܼ ܡܸܙܕܲܝܢܝܼܢ ܚܲܝ̈ܠܵܘܵܬܼܵܟ ܥܲܠ ܨܵܠܘܼܒܲܝ̈ܟ ܀ 119 :ܐܸܢܗܘ̤ ܕܲܒܼܪܵܐ ܐܢ̄ܬܿ ܘܒܲܪ ܐܲܠܵܗܵܐ ܐܢ̄ܬܿ ܐܲܝܟ ܕܐܸܡܲ݁ܪ ܐܲܢ̄ܬܿ 120 ܚܘܿܬܼ ܡ̣ܢ ܙܩܝܼܦܵܐ ܘܗܵܐ ܡܸܫܬܲܪܲܪ ܫܡܵܐ ܕܲܒܼܪܘܼܬܼܵܟ ܀ 121 :ܐܸܢ ܫܲܪܝܼܪܝܼܢ ܚܲܝܠܹ̈ܐ ܕܲܣܥ݂ܲܪܬܿ ܨܹܝܕ ܐ̄ܢܵܫܘܼܬܼܵܐ 122 ܚܵܘܵܐ ܚܲܝܠܵܟ ܒܢܝܼܫܵܐ ܕܢܲܦܫܵܟ ܘܡܸܬܼܗܲܝܡܲܢ ܐܢ̄ܬܿ ܀ 123 :ܐܸܢ ܙܲܟܵܝܵܐ ܐܢ̄ܬܿ ܘܐܝܼܩܹܐ ܨܲܠܒܼ݂ܘܼܟ ܐ̄ܢܵܫܵܐ ܒܩܲܝܣܵܐ 124 ܩܪܝܼ ܠܐܲܠܵܗܵܐ ܘܢܸܬܼܒܲܥ ܨܲܥܪܵܐ ܕܛܵܠܘܿܡܘܼܬܼܵܟ ܀ 125 :ܐܘܿ ܟܡܵܐ ܢܒ݂ܲܚ ܗ̄ܘ̣ܵܐ ܟܲܠܒܵܐ ܦܲܩܪܵܐ ܒܗܵܘ̇ ܒܲܣܝܼܡܵܐ 126 ܘܠܵܐ ܐܸܬܼܟܲܚܲܕܼ ܙܲܠܝܼܠ ܢܲܦܫܵܐ ܡ̣ܢ ܩܲܕܿܝܼܫܵܐ ܀ 127 :ܐܘܿ ܟܡܵܐ ܓܲܕܸܿܦ ܦܘܼܡ ܡܲܪܵܚܵܐ ܥܲܠ ܡܲܟܿܝܼܟܼܵܐ 128 ܘܠܵܐ ܒܗܸܬܼ ܚܲܪܡ̇ܐ ܠܵܐ ܡ̣ܢ ܥܵܘ̣ܠܵܐ ܘܠܵܐ ܡ̣ܢ ܚܲܫܹܗ ܀ 129 :ܐܘܿ ܟܡܵܐ ܣܲܝܒܲܪ ܪܸܡܙܵܐ ܟܲܣܝܵܐ ܠܡܲܪܵܚܘܼܬܹܗ 130 ܘܠܵܐ ܐܲܣܸܦ ܒܹܗ ܢܘܼܪܵܐ ܕܪܘܼܓܼܙܵܐ ܥܲܙܝܼܙܵܐܝܼܬܼ ܀ 131 :ܒܩܵܠ ܨܘܿܚ̈ܝܵܬܹܗ ܛܲܢ ܘܐܸܬܼܥܲܙܲܙ ܒܲܪ ܝܲܡܝܼܢܵܐ 132 ܘܲܛܥ̣ܵܐ ܚܲܫܵܘ̈ܗܝ ܘܫܲܪܝܼ ܡܲܩܪܸܒܼ ܠܘܼܩܒܲܠ ܨܲܥܪܹܗ ܀ 133 :ܩܪܵܒܼܵܐ ܟܹܐܢܵܐ ܥܒ݂ܲܕܼ ܙܲܕܿܝܼܩܵܐ ܥܲܡ ܥܵܘ̇ܠܵܐ 134 ܘܚܲܟܿܝܼܡܵܐܝܼܬܼ ܫܪ̣ܵܐ ܒܹܗ ܓܹܐܪܹ̈ܐ ܕܲܬܼܘܵܬܼ ܢܲܦܫܵܐ ܀ 135 :ܫܸܡ ܐܲܠܵܗܵܐ ܬܢ݂ܵܐ ܚܲܟܿܝܼܡܵܐ ܠܲܕܼܠܵܐ ܐܲܠܵܗ 136 ܕܠܵܐ ܕܵܚܹ̇ܠ ܐܲܢ̄ܬܿ ܡ̣ܢ ܐܲܠܵܗܵܐ ܕܟܹܐܝܢ ܒܘܼܚܪܵܢܹܗ ܀ 137 :ܐܲܝܟ ܕܲܒܼܝܼܢܵܐ ܐܸܡ݂ܲܪ ܥܲܡܹܗ ܕܚܲܝܵܒܼ ܡ̇ܘܬܵܐ 138 ܕܥܲܠ ܡ̇ܢ ܐܵܫ̇ܕܲܬܿ ܥܵܘ̣ܠܵܐ ܕܦܘܼܡ̇ܟ ܥܲܠ ܙܲܟܝܵܐ ܀ pb. 332 139 :ܠܡܵܢ ܡܲܗܸܠ ܐܲܢ̄ܬܿ ܡܲܪܵܚܵܐܝܼܬܼ ܒܲܕܼܠܵܐ ܡܘܼܡ̇ܐ 140 ܘܡܲܣܓܹܿܝܬܿ ܢܸܓܼ̈ܕܹܿܐ ܕܲܓܼܙܵܪ ܕܝܼܢܵܐ ܥܲܠ ܣܲܟܼܠܘܼܬܼܵܟ ܀ 141 :ܠܵܐ ܝܵ̇ܕܲܥ ܐܲܢ̄ܬܿ ܕܥܵܘ̣ܠܵܐ ܕܢܲܦܫܲܢ ܬܠ̣ܵܢ ܒܲܙܩܝܼܦܵܐ 142 ܘܡܲܪܲܚܘܼܬܲܢ ܥܒ݂ܲܕܼܬܿܢ ܕܲܢܡܘܼܬܼ ܕܠܵܐ ܚܵܘܣܵܢܵܐ ܀ 143 :ܠܲܢ ܟܹܐܢܵܐܝܼܬܼ ܬܲܒܼܥ݂ܲܢ ܕܝܼܢܵܐ ܪܸܡܙܵܐ ܟܲܣܝܵܐ 144 ܘܐܲܝܟ ܣܘܼܥܪ̈ܵܢܲܝܢ ܦܲܪ̣ܥܲܢ ܐܲܓܼܪܵܐ ܡ̇ܘܬܵܐ ܨܥܝܼܪܵܐ ܀ 145 :ܗܵܢ ܙܲܟܵܝܵܐ ܗ̄ܘ̣ ܘܩܲܕܲܝܼܫ ܘܲܕܼܟܸܐ ܡ̣ܢ ܟܘܼ̈ܬܼܡ̇ܬܼܵܐ 146 ܘܲܕܼܠܵܐ ܣܲܟܼܠܘܼ ܨܲܠܒܹܗ ܥܲܡܵܐ ܥܘܝܼܪ ܒܲܚܣܵܡܵܐ ܀ 147 :ܠܡܵܢܵܐ ܒܵܥܹ̇ܝܬܿ ܕܬܸܗܘܸܐ ܚܲܒܼܪܵܐ ܒܲܕܼܡ̇ܐ ܛܠܝܼܡܵܐ 148 ܘܬܸܚܒܿܘܿܫ ܢܲܦܫܵܟ ܒܲܓܼܙܵܪ ܕܝܼܢܵܐ ܕܥܲܡ ܩܵܛܘܿܠܹ̈ܐ ܀ 149 :ܠܵܐ ܣܵܦܹ̇ܩ ܠܵܟ ܕܡ̇ܐ ܩܲܕܼܡ̇ܝܵܐ ܕܐܸܫܲܕܲܬܿ ܡܲܓܼܵܢ 150 ܐܸܠܵܐ ܕܬܼܵܘܣܸܦ ܥܵܘ̣ܠܵܐ ܥܦܝܼܦܵܐ ܥܲܠ ܩܲܕܼܡܵܝܵܐ ܀ 151 :ܠܵܐ ܟܲܕܿܘܼ ܠܵܟ ܡ̇ܘܬܵܐ ܕܙܲܒܼܢܵܐ ܕܲܚܠܵܦ ܥܵܘ̣ܠܵܟ 152 ܐܸܠܵܐ ܕܲܬܼܡܘܼܬܼ ܡ̇ܘܬܵܐ ܟܲܣܝܵܐ ܕܠܵܐ ܫܘܼܠܵܡܵܐ ܀ 153 :ܐܘܿ ܡܲܠܦܵܢܵܐ ܚܲܕܼܬܼܵܐ ܕܐܲܟܼܪܸܙ ܫܪܵܪܵܐ ܒܐܲܪܥܵܐ 154 ܘܦܲܪܣܝܼ ܘܐܲܟܸܿܣ ܥܵܘ̣ܠܵܐ ܛܪܘܼܢܵܐ ܒܡܸܠܲܬܼ ܦܘܼܡܗ ܀ 155 :ܐܘܿ ܥܵܘ̇ܠܵܐ ܕܦܲܪܣܝܼ ܥܵܘ̣ܠܵܐ ܕܐܸܬܼܥܲܝܲܕܼ ܒܹܗ 156 ܘܐܲܟܼܪܸܙ ܩܘܼܫܬܵܐ ܕܠܵܐ ܝܵ̇ܕܲܥ ܗ̄ܘ̣ܵܐ ܕܢܸܬܼܗܲܓܸܿܐ ܒܹܗ ܀ 157 :ܐܲܟܸܿܣ ܠܚܲܒܼܪܹܗ ܕܠܵܘ ܟܹܐܢܵܐܝܼܬܼ ܨܲܚܝܼ ܠܟܹܐܢܵܐ 158 ܘܲܦܢ̣ܵܐ ܕܲܢܦܝܼܣ ܥܲܠ ܣܘܼܪ̈ܚܵܢܵܘܗܝ ܪܵܥܘܿܪܡ̇ܐܝܼܬܼ ܀ 159 :ܥܘܼܗܕܵܢ ܥܵܘ̣ܠܹܗ ܣܠܸ̣ܩ ܥܲܠ ܠܸܒܹܿܗ ܒܥܸܕܵܢ ܚܲܫܵܐ 160 ܘܫܲܪܝܼ ܕܵܐܹ̇ܢ ܗܘ̤ ܥܲܡ ܢܲܦܫܹܗ ܒܐܲܝܠܹܝܢ ܕܲܚܛ̣ܵܐ ܀ 161 :ܐܲܝܟ ܕܡ̣ܢ ܫܸܢܬܼܵܐ ܢܵܕܼ݂ ܡ̣ܢ ܚܵܘ̈ܒܵܘܗܝ ܕܲܡܟܵܐ ܕܥܵܘ̣ܠܵܐ 162 ܘܲܚ̣ܙܵܐ ܕܲܫܠܝܼܚ ܡ̣ܢ ܛܵܒܼܵܬܼ̈ܐ ܐܲܝܟ ܕܡ̣ܢ ܢܵܚ̈ܬܹܿܐ ܀ 163 :ܚ̣ܙܵܐ ܕܲܡܦܲܪܣܲܝ ܦܲܓܼܪܹܗ ܘܢܲܦܫܹܗ ܥܲܪܛܸܠܵܐܝܼܬܼ 164 ܘܚܲܫ̣ ܘܐܸܬܿܬܲܢܲܚ ܡܲܪܝܼܪܵܐܝܼܬܼ ܥܲܠ ܣܘܼܪ̈ܚܵܢܵܘܗܝ ܀ 165 :ܒܚܲܫܵܐ ܪܲܒܵܐ ܢܲܓܸܿܕܼ ܗܘ̤ ܠܹܗ ܚܲܫܝܼܫܵܐܝܼܬܼ 166 ܘܲܒܼܚܸܢ̈ܓܼܵܬܼܵܐ ܪ̈ܵܥܘܿܡ̇ܬܼܵܐ ܒ̣ܟܼܵܐ ܥܲܠ ܗܵܘ̣ܠܹܗ ܀ 167 :ܒܹܝܬܼ ܡܲܪܩܘܼܕܿܬܵܐ ܥܒ݂ܲܕܼ ܒܲܙܩܝܼܦܵܐ ܗܘ̤ ܒܲܠܚܘܿܕܼܵܘܗܝ 168 ܘܐܲܠܵܝܵ̈ܬܼܐ ܗܘ̤ܵܘ ܠܹܗ ܙܵܘܥܹ̈ܐ ܘܪܲܟܸܿܒܼ ܩܵܠܹ̈ܐ ܀ 169 :ܐܲܝܟ ܕܲܠܡܝܼܬܼܵܐ ܒܲܟܿܝܼ ܢܲܦܫܹܗ ܥܲܠ ܪܹܫ ܩܲܝܣܵܐ 170 ܘܥܲܦܝܼ ܘܲܩ̣ܒܲܪ ܗܘ̤ ܠܲܩܢܘܿܡܹܗ ܒܲܬܼܘܵܬܼ ܢܲܦܫܵܐ ܀ 171 :ܐܸܒܼܠܵܐ ܥܦܝܼܦܵܐ ܥܒ݂ܲܕܼ ܥܲܠ ܢܲܦܫܹܗ ܘܥܲܠ ܫܘܼܢܵܩܹܗ 172 ܕܲܚ̣ܙܵܐ ܕܡ̇ܐܹܬܼ ܘܬܼܘܼܒܼ ܡܸܬܼܢܲܚܲܡ ܠܲܥܲܙܵܪ ܕܝܼܢܵܐ ܀ 173 :ܬܪܹܝܢ ܚܘܼܫܵܒܹ̈ܐ ܕܲܬܼܪܹܝܢ ܡ̇ܘ̈ܬܹܿܐ ܪܢܵܐ ܟܹܐܢܵܐܝܼܬܼ 174 ܘܐܲܚܕܹܿܗ ܓܘܼܢܚܵܐ ܕܦܲܟܼ݂ܪܘܼܗܝ ܚܵܘ̈ܒܵܘܗܝ ܒܲܬܼܪܹܝܢ ܕܝܼܢܹ̈ܐ ܀ 175 ܕܝܼܢܵܐ ܕܲܠܗܲܠ ܡܣܲܪܸܕܼ ܗ̄ܘ̣ܵܐ ܠܹܗ ܛ̇ܒܼ ܡ̣ܢ ܕܲܬܼܢܵܢ: pb. 333 176 ܘܐܲܝܟ ܠܵܐ ܡܸܕܸܿܡ ܚܲܫ̣ܒܹܿܗ ܠܡܵܘܬܵܐ ܕܲܒܼܪܹܫ ܩܲܝܣܵܐ ܀ 177 :ܠܗܵܘ̇ ܫܘܼܢܵܩܵܐ ܕܠܵܐ ܫܘܼܠܵܡܵܐ ܡܸܬܼܥܲܗܲܕܼ ܗ̄ܘ̣ܵܐ 178 ܘܐܲܝܟ ܕܲܒܼܥܲܝܢܹ̈ܐ ܚܵܙܹ̇ܐ ܗ̄ܘ̣ܵܐ ܒܹܗ ܒܗܵܘܢܵܐ ܟܲܣܝܵܐ ܀ 179 :ܠܗܵܘ̇ ܬܘܼܩܢܵܐ ܕܡܲܠܟܿܘܼܬܼ ܪܵܘܡ̇ܐ ܚ̣ܙܵܐ ܟܲܣܝܵܐܝܼܬܼ 180 ܘܪܲܓܼ ܘܐܸܬܼܚܲܫܲܒܼ ܕܕܲܡ ܢܲܫܘܘܿܢܵܝܗܝ ܪ̈ܲܚܣܸܐ ܠܡܸܥܲܠ ܀ 181 :ܒܛܘܼܒܹ̈ܐ ܡܠܝܼܟܹ̈ܐ ܐܲܕܼܝܼܩ ܗܵܘܢܹܗ ܩܲܛܝܼܢܵܐܝܼܬܼ 182 ܘܲܩ̣ܢܵܐ ܚܘܼܨܦܵܐ ܐܲܝܟ ܡܸܣܟܹܿܢܵܐ ܥܲܠ ܣܘܼܢܩܵܢܹܗ ܀ 183 :ܚܘܼܨܦܵܐ ܪܲܒܵܐ ܩ̣ܢܵܐ ܚܘܼܨܦܵܢܵܐ ܐܲܝܟ ܕܲܒܼܩܲܕܼܡ̇ܐ 184 ܒܗܵܘ̇ ܐܸܣܟܹܿܡܵܐ ܕܲܡܓܲܝܸܣ ܗ̄ܘ̣ܵܐ ܚܘܼܨܦܵܢܵܐܝܼܬܼ ܀ 185 :ܠܵܐ ܟܘܼܚܵܕܼܵܐ ܕܓܲܢܵܒܼܘܼܬܼܵܐ ܦܪ̣ܵܣ ܥܲܠ ܐܲܦܵܘ̈ܗܝ 186 ܘܲܡ̣ܚܵܐ ܟܪܘܿܡ̇ܐ ܘܫܲܪܝܼ ܕܢܸܦܠܘܿܫ ܒܹܝܬܼ ܡܲܠܟܿܘܼܬܼܵܐ ܀ 187 :ܒܗܵܕܹܐ ܬܸܢܘܲܝ ܐܲܚܨܸܦ ܘܲܫܐܸ݂ܠ ܡ̣ܢ ܦܵܪܘܿܩܲܢ 188 ܕܐܸܢܗܘ̤ ܕܡܲܨܝܵܐ ܢܸܒܿܘܿܙ ܓܲܙܵܐ ܪܘܼܚܵܢܝܵܐ ܀ 189 :ܥܝܵܕܼܵܐ ܩܲܕܼܡ̇ܐ ܢܲܬܼܦܹܗ ܝܲܥܢܵܐ ܠܡܸܬܼܝܲܥܵܢܘܼ 190 ܘܕܲܫ ܟܠ ܩܵܠ̈ܝܼܢ ܘܥܲܠ̣ ܕܲܢܚܲܠܸܨ ܐܲܝܟ ܢܵܡܘܿܣܹܗ ܀ 191 :ܐܸܬܿܕܲܟܼܪܲܝܢܝ ܡ̇ܪܝ ܫܲܪܝ ܕܢܹܐܡܲܪ ܠܡܵܪܹܐ ܓܼܙܵܐ 192 ܒܗܵܝ̇ ܡܲܠܟܿܘܼܬܼܵܐ ܕܟܲܣܝܵܐ ܒܪܵܘܡ̇ܐ ܡ̣ܢ ܚܲܙܵܝܹ̈ܐ ܀ 193 :ܚܘܼܢ ܠܲܣܢܝܼܩܘܼܬܼܝ ܚܲܕܼ ܫܵܡܘܿܢܵܐ ܪܘܼܚܵܢܝܵܐ 194 ܘܐܸܚܸܐ ܒܛܲܝܒܿܘܼ ܒܢܸܬܼܪܵܐ ܙܥܘܿܪܵܐ ܕܡ̣ܢ ܡ̇ܘܗܲܒܼܬܼܵܟ ܀ 195 :ܫܒܼܘܿܩ ܣܘܼܪ̈ܚܵܢܲܝ ܘܲܥܛܝܼ ܚܵܘ̈ܒܲܝ ܘܕܿܟܵܐ ܡܘܼܡܲܝ̈ 196 ܘܲܥܛܝܼ ܒܪ̈ܲܚܡܲܝܟ ܫܛܵܪܵܐ ܕܚܵܒܹ̇ܬܼ ܨܹܝܕ ܟܐܢܘܼܬܼܵܟ ܀ 197 :ܦܪܘܿܩ ܠܐܲܒܿܝܼܕܼܘܼܬܼܝ ܘܚܘܼܢ ܠܲܣܢܝܼܩܘܼܬܼܝ ܘܢܲܚܸܡ ܡܝܼܬܼܘܼܬܼܝ 198 ܘܨܘܼܪ ܒܝܼ ܛܘܼܦܣܵܐ ܕܒܼܘܼܛܵܠ ܡ̇ܘܬܵܐ ܘܕܲܫܪܵܝ ܥܵܘ̣ܠܵܐ ܀ 199 :ܕܪܘܿܫ ܒܝܼ ܐܘܼܪܚܵܐ ܕܲܬܝܵܒܼܘܼܬܼܵܐ ܠܕܼܵܪܹ̈ܐ ܕܐܵܬܹ̇ܝܢ 200 ܕܢܸܪܕܿܘܿܢ ܒܵܬܲܪܝ ܒܲܬܼܘܵܬܼ ܢܲܦܫܹܐ ܠܘܵܬܼ ܫܘܼܒܼܩܵܢܵܐ ܀ 201 :ܢܸܕܢܲܚ ܢܘܼܗܪܵܐ ܕܗܲܝܡܵܢܘܼܬܼܵܟ ܒܓܼܵܘ ܚܸܫܘܿܟܼܘܼܬܼܝ 202 ܘܢܸܪܕܿܘܿܦ ܡ̣ܢ ܢܲܦܫܝ ܚܸܫܟܵܐ ܕܥܵܘ̣ܠܵܐ ܕܲܡܕܲܚܲܪ ܒܝܼ ܀ 203 :ܐܲܦܢܵܢܝ ܨܹܐܕܲܝܟ ܡ̣ܢ ܫܲܒܵܝܵܐ ܕܲܫܒܼ݂ܵܢܝ ܡܸܢܵܟ 204 ܘܚܲܪܲܪ ܥܲܒܼܕܿܘܼܬܼܝ ܕܐܸܦܠܘܿܚ ܥܲܡܵܟ ܘܐܸܗܘܸܐ ܕܝܼܠܵܟ ܀ 205 :ܕܝܼܠܵܟ ܐܝܼܬܲܝ ܘܡܸܫܒܵܐ ܫܒܸܐ ܐ̄ܢܵܐ ܡ̣ܢ ܡ̇ܪܘܼܬܼܵܟ 206 ܦܪܘܿܩ ܒܲܪ ܒܲܝܬܵܟ ܘܢܸܕܲܥ ܟܠܢܵܫ ܚܹܝܠ ܡܵܪܘܼܬܼܵܟ ܀ 207 :ܟܲܕܿܘܼ ܦܸܠ̇ܚܹܬܼ ܒܹܝܬܼ ܢܘܼܟܼܪ̈ܵܝܹܐ ܥܕܲܡ̇ܐ ܠܗܵܫܵܐ 208 ܘܲܓܼܡܲܪܘ ܝܵܘ̈ܡܲܝ ܒܦܘܼܠܚܵܢ ܛܘܼܥܝܲܝ ܕܠܵܐ ܝܘܼܬܼܪܵܢܵܐ ܀ 209 :ܫܠܸܡ ܠܹܗ ܝܵܘܡ̇ܐ ܘܲܥܪܲܒܼ ܫܸܡܫܵܐ ܕܫܲܒܲܬܼ ܚܲܝܲܝ̈ 210 ܘܐܸܢ ܥܘܼܕܼܪܵܢܸܵܟ ܠܵܐ ܡܲܕܼܪܸܟ ܠܝܼ ܗܘܹ̇ܝܬܼ ܠܵܐ ܡܸܕܹܿܡ ܀ pb. 334 211 :ܠܵܐ ܡܵܪܝ ܐܹܒܲܕܼ ܡ̣ܢ ܥܸܢܝܵܢܵܐ ܕܥܲܦܪܹܗ ܕܐܵܕܼܵܡ 212 ܘܠܵܐ ܐܸܬܼܢܲܟܼܪܸܐ ܠܫܵܘܬܵܦܘܼܬܼܵܐ ܕܚܵܝܑܬܼ ܡܝܼܬܹ̈ܐ ܀ 213 :ܪܘܿܣ ܥܲܠ ܡܝܼܬܼܘܼܬܼܝ ܛܲܠܵܐ ܕܪ̈ܲܚܡܹܐ ܕܲܟܼܣܸܐ ܒܡܸܠܲܝ̈ܟ 214 ܕܕܲܡ ܐܸܬܼܪܲܓܸܿܐ ܒܝܘܿܡ ܢܘܼܚܵܡܵܐ ܘܐܸܦܪܘܿܥ ܫܘܼܒܼܚܵܐ ܀ 215 :ܐܲܫܘܵܢܝ ܕܐܸܪܕܲܐ ܥܲܡ ܕܲܠܝܼܠܹ̈ܐ ܒܐܘܼܪܚܵܐ ܕܟܹܐܢܹ̈ܐ 216 ܘܐܸܥܘܿܠ ܘܐܸܚܕܹܿܐ ܒܗܵܘ̇ ܒܘܼܣܵܡܵܐ ܕܠܵܐ ܡܸܬܼܚܲܒܲܠ ܀ 217 :ܡܲܢ̣ܘܼ ܓܠ̣ܵܐ ܠܵܟ ܡܝܼܬܼ ܒܲܚܛܵܗܵܘ̈ܗܝ ܕܗܵܠܹܝܢ ܬܸܕܲܥ 218 ܘܡܲܢ ܒܲܕܸܿܩ ܠܵܟ ܕܓܲܒܼܪܵܐ ܙܩܝܼܦܵܐ ܡܲܠܟܵܐ ܗ̄ܘ̣ ܕܥܲܠ ܟܠ ܀ 219 :ܡܲܢ̣ܘܼ ܚܵܘܝܵܟ ܕܐܝܼܬܼ ܫܘܼܠܛܵܢܵܐ ܠܐ̄ܢܵܫܵܐ ܒܪܵܘܡ̇ܐ 220 ܘܐܲܝܟܲܢ ܡܸܫܟܲܚ ܠܡܸܫܬܲܠܵܛܘܼ ܥܲܠ ܕܲܥܬܼܝܼ̈ܕܼܵܢ ܀ 221 :ܡܲܢ̣ܘܼ ܐܲܠܦܵܟ ܕܲܡܨܼܐ ܡܚܲܪܲܪ ܥܵܘ̣ܠܵܐ ܕܐ̄ܢܵܫܵܐ 222 ܘܡ̣ܢ ܐܲܝܟܵܐ ܠܹܗ ܕܢܸܬܸܿܠ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 223 :ܐܵܪܵܐ ܓܼܒܼܪܵܐ ܐܸܡܲܬܼܝ ܢܲܚܸܡ ܐ̄ܢܵܫܵܐ ܠܐ̄ܢܵܫܵܐ 224 ܘܐܸܡܲܬܼܝ ܦܲܠܸܓܼܘ ܐܲܪ̈ܥܵܢܵܝܹܐ ܡܲܠܟܿܘܼܬܼ ܪܵܘܡ̇ܐ ܀ 225 :ܘܢܸܗܘܸܐ ܕܲܢܚܸܡ ܐ̄ܢܵܫܵܐ ܠܐ̄ܢܵܫܵܐ ܗܵܝ̇ ܕܲܟܼܬܼܝܼܒܼܵܐ 226 ܕܡܲܠܟܿܘܼܬܼ ܪܵܘܡ̇ܐ ܦܲܠܸܓܼܘ ܐ̄ܢܵܫܵܐ ܠܵܐ ܫܡܝܼܥܵܐ ܠܲܢ ܀ 227 :ܡܲܢ ܐܲܛܥܝܼ ܒܵܟ ܛܵܥܹ̇ܐ ܒܬܼܵܘܫܵܐ ܕܲܪ̈ܓܼܝܼܓܼܵܬܼܵܐ 228 ܕܓܼܒܼܪܵܐ ܨܠܝܼܒܼܵܐ ܝܵܗܹ̇ܒܼ ܚܲܝܹ̈ܐ ܘܫܵܒܹ̇ܩ ܥܵܘ̣ܠܵܐ ܗ̄ܘ̣ ܀ 229 :ܚܙܝܼ ܒܲܪ ܛܘܼܥܝܲܝ ܕܲܠܡܵܐ ܒܛܘܼܥܝܲܝ ܛܥ̣ܵܐ ܪܸܥܝܵܢܵܟ 230 ܥܲܩܸܒܼ ܫܲܦܝܼܪ ܘܟܸܢ ܫܵܐܹ̇ܠ ܐܲܢ̄ܬܿ ܕܪ̈ܡ̇ܢ ܡܸܢܵܟ ܀ 231 :ܕܲܠܡܵܐ ܒܝܘܼܩܪܵܐ ܕܚܲܫܲܝ̈ ܦܲܓܼܪܵܟ ܛܥ݂ܲܝܬܿ ܘܐܸܬܕܵܘܲܕܿܬܿ 232 ܘܐܲܝܟ ܕܲܒܼܚܸܠܡܵܐ ܦܗ̣ܵܐ ܪܸܥܝܵܢܵܟ ܒܲܕܼܠܵܐ ܓܲܠ̈ܝܵܢ ܀ 233 :ܠܵܐ ܗ̄ܘ̣ܵܐ ܡܸܛܥܵܐ ܛܥ̣ܵܐ ܓܲܝܵܣܵܐ ܒܝܲܕܼ ܒܵܥܘܼܬܹܗ 234 ܡܪܲܟܸܿܒܼ ܡܸܠܹ̈ܐ ܛܥ̣ܵܐ ܘܐܲܗܸܠ ܒܹܗ ܠܦܘܼܬܼ ܣܘܼܥܪ̈ܵܢܵܘܗܝ ܀ 235 :ܪܲܒܿܘܼܬܼ ܥܵܘ̣ܠܹܗ ܘܲܫܟܼܝܼܪ̈ܵܬܹܗ ܥܗ݂ܲܕܼ ܐܵܡܘܿܪܵܐ 236 ܘܲܨܒܼ݂ܵܐ ܕܢܲܗܸܠ ܕܡ̣ܢ ܐܲܝܟܵܐ ܠܹܗ ܠܛܵܥ̇ܝܵܐ ܫܪܵܪܵܐ ܀ 237 :ܡܲܢ ܟܲܝ ܐܲܠܦܹܗ ܠܲܣܟܲܠ ܟܠܹܗ ܠܡܸܕܲܥ ܩܘܼܫܬܵܐ 238 ܘܡܲܢ̣ܘܼ ܕܪܲܫ ܠܹܗ ܐܘܼܪܚܵܐ ܠܡܸܪܕܵܐ ܠܐܲܦܲܝ̈ ܪܵܘܡ̇ܐ ܀ 239 :ܡܲܢ ܐܲܨܲܚ ܠܹܗ ܣܸܦܪܵܐ ܚܲܕܼܬܼܵܐ ܠܬܲܠܡܝܼܕܼ ܙܹܐܦܵܐ 240 ܘܡܲܢ̣ܘܼ ܗܘ̤ܵܐ ܠܹܗ ܪܲܒܵܐ ܒܗܸܪܓܵܐ ܕܲܥܬܼܝܼ̈ܕܼܵܬܼܵܐ ܀ 241 :ܡܲܢ ܦܲܫܸܩ ܠܹܗ ܚܹܝܠ ܒܘܼܕܵܩܵܐ ܕܣܬܼܝܼܪ݁ܵܬܼܵܐ 242 ܘܡܲܢ ܐܸܡ݂ܲܪ ܠܹܗ ܕܐܝܼܬܼ ܡܲܠܟܿܘܼܬܼܵܐ ܕܠܵܐ ܡܸܫܬܲܪܝܵܐ ܀ 243 :ܡܲܢ̣ܘܼ ܗܘ̤ܵܐ ܠܹܗ ܡ̇ܠܹܟ ܡܸܠܟܵܐ ܠܛܵܥܹ̇ܐ ܒܛܘܼܥܝܲܝ 244 ܕܲܒܼܥܸܕܵܢܵܐ ܕܲܪܗܝܼܒܼܘܼܬܼܵܐ ܢܗܵܘܸܢ ܢܲܦܫܹܗ ܀ 245 :ܒܐܲܝܠܹܝܢ ܥܲܝܢܹ̈ܐ ܚܙ̣ܵܐ ܚܲܙܵܝܵܐ ܕܲܣܬܼܝܼܪ̈ܵܬܼܵܐ 246 ܠܗܵܘ̇ ܬܘܼܩܵܢܵܐ ܕܠܵܐ ܚܵܪܲܬ̤ ܒܹܗ ܥܲܝܢܵܐ ܕܒܸܣܪܵܐ ܀ pb. 335 247 :ܒܐܲܝܠܹܝܢ ܐܸܕܼܢܹ̈ܐ ܫܡ݂ܲܥ ܝܲܩܝܼܪܵܐ ܨܵܐܹ̇ܬܼ ܥܵܘ̣ܠܵܐ 248 ܗܵܝ̇ ܒܲܪ̄ܬܼ ܩܵܠܵܐ ܕܠܵܐ ܡܸܫܬܲܡܥܵܐ ܒܪܸ̈ܓܼܫܲܝ ܦܲܚܼܪܵܐ ܀ 249 :ܒܐܲܝܢܵܐ ܦܘܼܡ̇ܐ ܡܲܠܸܠ ܦܹܐܩܵܐ ܠܥܸܓܼ ܡ̣ܢ ܩܘܼܫܬܵܐ 250 ܗܵܘ̇ ܗܘܼܠܵܠܵܐ ܕܠܵܐ ܡܸܬܼܡܲܠܲܠ ܒܠܸܫܵܢ ܒܸܣܪܵܐ ܀ 251 :ܒܐܲܝܢܵܐ ܚܸܟܵܐ ܛܥܸܡ ܦܲܟܿܝܼܗܵܐ ܚܲܠܝܘܼܬܼ ܚܲܝܹ̈ܐ 252 ܘܐܲܝܟܲܢ ܘܲܟܼܡܵܐ ܣܦ݂ܲܩ ܕܲܢܩܲܒܸܿܠ ܐܘܼܟܼܠܵܐ ܕܪܘܼܚܵܐ ܀ 253 :ܘܢܸܗܘܸܐ ܕܲܪܢ̣ܵܐ ܕܐܝܼܬܼ ܡܲܠܟܿܘܼܬܼܵܐ ܕܟܲܣܝܵܐ ܒܪܵܘܡ̇ܐ 254 ܓܲܒܼܪܵܐ ܙܩܝܼܦܵܐ ܡ̇ܢܵܐ ܫܲܠܝܼܛ ܥܲܠ ܒܘܼܣܵܡܵܗ̇ ܀ 255 :ܘܢܸܗܘܸܐ ܕܐܲܣܒܲܪ ܕܚܵܢ̇ܝܼܢ ܪ̈ܲܚܡܹܐ ܠܲܕܼܚܲܛܵܝܝܼܢ 256 ܐ̄ܢܵܫܵܐ ܠܐ̄ܢܵܫܵܐ ܡ̇ܢܵܐ ܣܵܦܹ̇ܩ ܠܲܡܥܲܕܵܪܘܼ ܀ 257 :ܘܢܸܗܘܸܐ ܕܗܲܝܡܸܢ ܕܲܡܨܸܐ ܠܡܸܣܥܲܪ ܗܵܠܹܝܢ ܕܲܪܢ̣ܵܐ 258 ܡܲܢ ܐܲܪܡܝܼ ܒܹܗ ܪܸܢܝܵܐ ܕܗܵܠܹܝܢ ܕܠܵܐ ܚܲܙ̈ܝܵܢ ܠܹܗ ܀ 259 :ܠܵܘ ܚܘܼܫܵܒܹ̈ܐ ܒܸܣܪ̈ܵܢܵܝܹܐ ܪܢ̣ܵܐ ܒܸܣܪܵܢܵܐ 260 ܘܠܵܘ ܕܝܼܠܹܗ ܗ̄ܘ̣ܵܬܼ ܠܡܸܫܐܲܠ ܕܲܠܥܸܠ ܚܘܼܒܵܢܵܐܝܼܬܼ ܀ 261 :ܪܸܡܙܵܐ ܟܲܣܝܵܐ ܢܲܓܼܕܹܿܗ ܒܟܸܣܝܵܐ ܠܡܸܚܙܵܐ ܕܟܲܣ̈ܝܵܢ 262 ܘܗܘ̤ ܐܲܪܝܼܡܹܗ ܠܘܵܬܼ ܒܘܼܕܵܩܵܐ ܕܲܣܬܼܝܼܪ̈ܵܬܼܵܐ ܀ 263 :ܚܲܝܠܵܐ ܕܪܘܼܚܵܐ ܡܲܠܸܠ ܥܲܡܹܗ ܪܘܼܚܢܵܐܝܼܬܼ 264 ܘܗܘ̤ ܦܲܫܸܩ ܠܹܗ ܐ̄ܪ̈ܵܙܹܐ ܟܣܲܝܵ̈ܐ ܕܲܟܼܣܹܝܢ ܡܸܢܹܗ ܀ 265 :ܗܘ̤ ܐܲܫܪܝܼ ܒܹܗ ܚܹܝܠ ܚܸܟܼ̈ܡܵܬܼܵܐ ܕܲܥܬܼܝܼ̈ܕܼܵܬܹ̈ܐ 266 ܘܗܘ̤ ܒܲܕܸܿܩ ܠܹܗ ܕܐܝܼܬܼ ܡܲܠܟܿܘܼܬܼܵܐ ܘܲܓܼܙܵܪ ܕܝܿܢܵܐ ܀ 267 :ܗܘ̤ ܐܸܡ݂ܲܪ ܠܹܗ ܕܓܲܒܼܪܵܐ ܙܩܝܼܦܵܐ ܕܲܙܩܝܼܦ ܥܲܡܵܟ 268 ܕܝܼܠܹܗ ܐܝܼܬܹܝܗ̇ ܡܲܠܟܿܘܼܬܼ ܪܵܘܡ̇ܐ ܘܕܼܝܼܢܵܐ ܥܬܼܝܼܕܼܵܐ ܀ 269 :ܗܘ̤ܝܘܼ ܓܠ̣ܵܐ ܠܹܗ ܕܲܡܨܸܐ ܥܵܛܹ̇ܐ ܥܵܘ̣ܠܵܐ ܕܐ̄ܢܵܫܵܐ 270 ܘܟܼܵܬܹ̇ܒܼ ܒܲܫܡܹܗ ܫܛܵܪ ܚܹܐܪܘܼܬܼܵܐ ܚܠܵܦ ܥܲܒܼܕܿܘܼܬܼܵܐ ܀ 271 :ܫܛܵܪ ܚܲܝܵܒܹ̈ܐ ܨܒܼܵܐ ܕܲܢܬܲܠܲܚ ܒܝܲܕܼ ܬܲܚܘܝܼܬܹܗ 272 ܕܐܸܢ ܚܲܝܵܒܼܵܐ ܫܩ݂ܲܠ ܙܵܟܼܘܼܬܼܵܐ ܡܲܢ ܢܸܬܼܦܲܠܲܓܼ ܀ 273 :ܡܲܠܟܿܘܼܬܼ ܪܵܘܡ̇ܐ ܦܬ݂ܲܚ ܠܐܲܪ̈ܥܵܢܹܐ ܒܝܲܕܼ ܡܲܥܠܬܹܿܗ 274 ܕܐܸܢ ܓܲܝܵܣܵܐ ܥܲܠ̣ ܩܲܕܼܡ̇ܝܑܬܼ ܡܲܢ̣ܘܼ ܕܦܵܐܹ̇ܫ ܀ 275 :ܪܘܼܡܪܵܡ ܓܸܢܣܲܢ ܓܠ̣ܵܐ ܒܫܘܼܘܕܵܝܵܐ ܕܐܸܫܬܵܘܕܲܝܼ ܠܹܗ 276 ܕܐܸܢ ܒܲܪ ܓܸܢܣܲܢ ܠܒܼܝܼܟ ܡܲܠܟܿܘܼܬܼܵܐ ܛܘܼܒܼ ܠܲܟܼܝܵܢܲܢ ܀ 277 :ܫܪܵܝ ܣܲܟܼܠܘܼܬܲܢ ܚܵܘܝܼ ܒܢܲܦܫܹܗ ܕܥܠܲܬ̤ ܠܲܥܕܹܢ 278 ܕܲܥܬܼܝܼܕܼܝܼܢܲܢ ܕܢܸܥܘܿܠ ܥܲܡܹܗ ܠܡܲܠܟܿܘܼܬܼ ܪܵܘܡ̇ܐ ܀ 279 :ܒܲܕܼܡܘܼܬܼ ܨܲܠܡܵܐ ܨܵܪ ܒܹܗ ܥܵܘ̣ܠܲܢ ܘܲܬܼܝܵܒܼܘܼܬܲܢ 280 ܘܐܲܣܸܩ ܩܲܒܼܥܹܗ ܒܪܹܫ ܓܵܓܼܘܼܠܬܵܐ ܠܥܹܝܢ ܚܲܙܝܹ̈ܐ ܀ 281 :ܒܗܵܕܹܐ ܬܸܢܘܲܝ ܫܒ݂ܲܩ ܠܹܗ ܥܵܘ̣ܠܹܗ ܒܥܸܕܵܢ ܚܲܫܵܐ 282 ܕܲܚܢܲܢ ܢܹܐܠܲܦ ܕܡܸܛܠܵܬܲܢ ܚܲܫ̣ ܒܲܙܩܝܼܦܵܐ ܀ 283 :ܒܗܵܢ ܐܸܣܟܹܿܝܡܵܐ ܓܒܼܵܐ ܠܹܗ ܓܼܒܼܪܵܐ ܕܚܲܛܵܝ ܡ̣ܢ ܟܠ 284 ܕܲܒܼܚܲܛܵܝܵܐ ܢܚܵܘܸܐ ܚܲܝܠܹܗ ܕܚܹܝܠ ܟܠ ܡܸܫܟܲܚ ܀ pb. 336 285 :ܒܐܵܫܹ̇ܕܼ ܠܲܕܼܡ̇ܐ ܘܲܡܠܸܐ ܥܵܘ̣ܠܵܐ ܡ̣ܠܲܟ ܡܲܠܟܿܘܼܬܼܵܐ 286 ܕܢܸܕܼܪܘܿܫ ܐܘܼܪܚܵܐ ܕܲܬܼܝܵܒܼܘܼܬܼܵܐ ܠܐܝܠܹܝܢ ܕܲܪܫܲܥܘ ܀ 287 :ܫܛܵܪ ܚܵܘ̈ܒܵܬܼܵܐ ܕܓܸܢܣܹܗ ܕܐܵܕܼܵܡ ܐܸܬܼܵܐ ܕܢܸܦܪܘܿܥ 288 ܘܚܲܪܲܪ ܠܘܼܩܕܲܡ ܚܲܕܼ ܚܲܝܵܒܼܵܐ ܕܚܵܒܼ ܗ̄ܘ̣ܵܐ ܣܲܓܝܼ ܀ 289 :ܟܝܵܢܵܐ ܕܲܒܼܠܝܼ ܒܡܵܝܘܿܬܼܘܼܬܼܵܐ ܨܒܼܵܐ ܕܢܚܲܕܸܿܬܼ 290 ܘܣܲܥܪܵܗ̇ ܒܓܲܒܼܪܵܐ ܕܡܝܼܬܼ ܗ̄ܘ̣ܵܐ ܟܠܹܗ ܒܥܵܘ̣ܠܵܐ ܣܲܢܝܵܐ ܀ 291 :ܪܡܲܙ ܠܲܟܼܝܵܢܹ̈ܐ ܘܐܲܟܼܡܲܪ ܐܸܢܘܿܢ ܥܲܠ ܡܘܼܟܵܟܹܗ 292 ܘܚܵܘܝܼܘ ܕܡܵܪܵܐ ܗ̄ܘ̣ ܘܒܲܪ ܐܲܠܵܗܵܐ ܕܫܲܠܝܼܟ ܥܲܠ ܟܠ ܀ 293 :ܒܝܲܕܼ ܫܲܬܿܝܼܩܹ̈ܐ ܘܲܒܼܡܲܠܵܠܹ̈ܐ ܐܲܟܼܪܸܙ ܚܲܝܠܹܗ 294 ܘܐܲܝܟ ܟܵܪ̈ܘܿܙܹܐ ܩܥܲܝ̈ ܒܸܪ̈ܝܵܬܼܵܐ ܥܲܠ ܫܘܼܠܛܵܢܹܗ ܀ 295 :ܠܵܐ ܪ̈ܵܓܼܘܿܫܹܐ ܐܲܟܼܡܲܪ ܐܸܢܘܿܢ ܐܲܝܟ ܪ̈ܵܓܼܘܿܫܹܐ 296 ܘܲܠܪ̈ܵܓܼܘܿܫܹܐ ܐܲܩܢܝܼ ܐܸܢܘܿܢ ܗܵܘܢܵܐ ܕܪܘܼܚܵܐ ܀ 297 :ܠܫܸܡܫܵܐ ܘܣܲܗܪܵܐ ܐܲܠܒܸܿܫ ܐܸܢܘܿܢ ܢܲܚ̈ܬܹܿܐ ܕܐܸܒܼܠܵܐ 298 ܘܲܠܓܲܝܵܣܵܐ ܥܨܵܝܗܝ ܕܲܢܬܲܪܓܸܿܡ ܪܲܒܿܘܼܬܼ ܚܲܝܠܹܗ ܀ 299 :ܐܲܝܟ ܕܲܒܼܦܘܼܡ̇ܐ ܩܥ̣ܵܘ ܫܲܬܿܝܼܩܹ̈ܐ ܒܫܘܼܚܠܵܦܲܝ̈ܗܘܿܢ 300 ܕܡܸܛܠ ܓܲܒܼܪܵܐ ܕܲܬܼܠܸܐ ܥܲܡܲܢ ܚܲܫܝܼܫܝܼܢܲܢ ܀ 301 :ܐܲܪܥܵܐ ܒܙܵܘܥܵܐ ܡܲܠܠܲܬ̤ ܥܲܡܗܘܿܢ ܕܲܒܼܢܲܝ̈ ܐܲܪܥܵܐ 302 ܕܲܒܼܢܲܝ̈ ܣܲܓܿܝܼ ܣܢܲܝܬܿܘܿܢ ܠܲܕܼܡ̇ܐ ܕܥܵܨܹ̇ܒܼ ܟܹܐܒܲܝ̈ ܀ 303 :ܩܵܠ ܓܲܝܵܣܵܐ ܛܵܒܼ ܡ̣ܢ ܪܲܥܡܵܐ ܪܥܸܡ ܒܲܒܼܪܝܼܬܼܵܐ 304 ܕܚܘܼܪܘ ܡ̇ܝܘܿܬܹ̈ܐ ܒܚܲܝܹ̈ܐ ܕܲܬܼܠܹܝܬ ܥܲܠ ܪܹܫ ܩܲܝܣܵܐ ܀ 305 :ܘܲܟܼܒܲܪ ܨܵܬܼܘܼܗܝ ܫܡܲܝܵܐ ܘܐܲܪܥܵܐ ܠܫܝܼܦܘܿܪ ܩܵܠܹܗ 306 ܘܥܲܡܵܐ ܒܲܠܚܘܿܕܼ ܣܲܟܲܪ ܐܸܕܼܢܵܘ̈ܗܝ ܡ̣ܢ ܕܲܠܡܸܫܡܲܥ ܀ 307 :ܠܡܲܟܿܣܵܢܘܼܬܹܗ ܕܲܥܛܸܠ ܠܸܒܵܐ ܗ̤ܘܲܝ̈ ܐܵܬܼ̈ܘܵܬܼܵܐ 308 ܘܡܸܛܠܬܹܗ ܚܫܟܼܘ ܢܲܗܝܼܪܹ̈ܐ ܘܙܵܥܲܬ̤ ܐܲܪܥܵܐ ܀ 309 :ܡܸܛܠ ܥܵܘ̣ܠܹܗ ܥܨ̣ܵܐ ܠܓܲܝܵܣܵܐ ܘܬܼܵܒܼ ܡ̣ܢ ܥܵܘ̣ܠܹܗ 310 ܕܢܸܚܙܹܐ ܘܲܢܬܼܘܼܒܼ ܘܢܸܒܼܥܸܐ ܘܲܢܦܝܼܣ ܥܲܠ ܣܲܟܼܠܘܼܬܹܗ ܀ 311 :ܐܲܠܵܗܘܼܬܹܗ ܓܠ̣ܵܐ ܒܐ̄ܢܵܫܘܼܬܹܗ ܠܥܹܝܢ ܟܠ ܒܸܪ̈ܝܵܢ 312 ܕܐܵܦܸܢ ܚܵܐܹ̇ܫ ܐܲܝܟ ܒܲܪܢܵܫܵܐ ܒܪܵܐ ܗ̄ܘ̣ ܕܐܲܠܵܗܵܐ ܀ 313 :ܒܲܪ ܐܲܠܵܗܵܐ ܦܲܓܼܪܵܢܵܝܵܐ ܨܠܲܒܼܘܼ ܝܗ̄ܘܼܕܼܵܝܹ̈ܐ 314 ܠܵܘ ܠܐܲܠܵܗܵܐ ܡܸܠܬܹܗ ܕܐܲܒܼܵܐ ܕܝܼܠܝܼܕܼ ܡܸܢܹܗ ܀ 315 :ܒܪܘܼܟܵܒܼ ܦܲܓܼܪܵܐ ܩܲܒܲܥܘ ܨܸܨܹ̈ܐ ܦܲܓܼܪ̈ܵܢܵܝܹܐ 316 ܠܵܘ ܒܐܝܼܬܼܘܼܬܼܵܐ ܕܪܵܡ ܗ̄ܘ̣ ܟܝܵܢܵܗ̇ ܡ̣ܢ ܢܼܟܼܝܵܢܹ̈ܐ ܀ 317 :ܦܲܓܼܪܵܐ ܓܼܠܝܵܐ ܚܙ̣ܵܐ ܓܲܝܵܣܵܐ ܥܲܠ ܪܹܫ ܩܲܝܣܵܐ 318 ܠܵܘ ܟܲܣܝܘܼܬܼܵܐ ܕܠܵܐ ܡܸܬܼܚܲܙܝܵܐ ܐܸܠܵܐ ܒܗܵܘܢܵܐ ܀ 319 :ܒܗܵܘܢܵܐ ܚܵܘܝܹܗ ܪܘܼܚ ܓܸܠܝܵܢܵܐ ܠܒܼܲ ܝܲܡܝܼܢܵܐ 320 ܕܒܲܪ ܐܲܠܵܗܵܐ ܗ̄ܘ̣ ܓܲܒܼܪܵܐ ܕܡܲܗܸܠ ܥܲܡܵܐ ܒܨܲܥܪܹܗ ܀ pb. 337 321 :ܠܒܸܗܬܲܬܼ ܥܲܡܵܐ ܘܚܵܘܒܲܬܼ ܫܹܐܕܹ̈ܐ ܠܥܸ݂ܙ ܒܹܗ ܩܘܼܫܬܵܐ 322 ܕܢܸܒܼܗܲܬܼ ܣܵܢܐܵܐ ܘܲܒܼܢܲܝ̈ ܓܲܒܹܿܗ ܒܟܼܵܪܘܿܙܘܼܬܹܗ ܀ 323 :ܒܩܵܠ ܬܵܘܕܿܝܼܬܹܗ ܒܗܸ݂ܬܼ ܡܵܪܘܕܼܵܐ ܕܲܫܒܼ݂ܵܝܗܝ ܠܐܵܕܼܵܡ 324 ܕܲܒܼܪܹܫ ܩܲܝܣܵܐ ܐܲܥܕܿܝܼ ܡܸܢܗ ܫܒܼܝܼܬܼܵܐ ܕܲܫܒܼ݂ܵܐ ܀ 325 :ܠܹܗܘ̣ ܐܲܒܼܗܸܬܼ ܒܚܲܕܼ ܒܲܪܢܵܫܵܐ ܕܐܲܦܢܝܼ ܨܹܐܕܼܵܘܗܝ 326 ܘܠܵܐ ܐܸܫܟܲܚ ܩܵܡ̣ ܘܲܟܼܠܵܝ̣ܗܝ ܡܸܢܹܗ ܕܠܵܐ ܢܵܘܕܹܿܐ ܒܹܗ ܀ 327 :ܠܹܗܘ̣ ܦܲܪܣܝܼ ܒܝܲܕܼ ܫܘܼܘܕܵܝܵܐ ܕܐܸܫܬܵܘܕܲܝܼ ܠܹܗ 328 ܘܲܠܦܘܼܪܩܵܢܗ ܚܲܬܿܡ̇ܗ̇ ܒܐܵܡܹܝܢ ܠܡܸܠܲܬܼ ܦܘܼܡܗ ܀ 329 :ܒܐܵܡܹܝܢ ܝܼܡ̣ܵܐ ܡܸܠܬܼܵܐ ܕܐܝܼܬܹܝܗ̇ ܛܲܒܼܥܵܐ ܕܩܘܼܫܬܵܐ 330 ܕܝܵܘܡ̇ܢܵܐ ܥܲܡܝܼ ܬܸܗܘܸܐ ܒܲܥܕܹܢ ܒܥܸܢܝܵܢ ܢܲܦܫܵܐ ܀ 331 :ܥܲܡܝܼ ܠܲܡ ܬܸܗܘܸܐ ܒܐܲܬܼܪܵܐ ܕܲܥܕܹܢ ܐܸܡ݂ܲܪ ܨܹܐܘܗܝ 332 ܘܲܠܡܵܢ ܒܲܥܕܹܢ ܘܠܵܐ ܒܲܫܡܲܝܵܐ ܐܲܝܟܵܐ ܕܫܲܐ̣ܠܹܗ ܀ 333 :ܡܲܠܟܿܘܼܬܼ ܪܵܘܡܵܐ ܒܥ̣ܵܐ ܓܲܝܵܣܵܐ ܘܠܵܘ ܦܲܪܕܲܝܣܵܐ 334 ܘܛܘܼܒܹ̈ܐ ܡܠܝܼܟܹ̈ܐ ܫܐܸ̣ܠ ܗ̄ܘ̣ܵܐ ܡܸܢܹܗ ܘܠܵܘ ܐܝܼܠܵܢܹ̈ܐ ܀ 335 :ܡ̇ܢܲܐ ܗ̄ܝܼ ܗܵܕܹܐ ܡܨܸܐ ܗ̄ܘ̣ܵܐ ܕܢܹܐܡܲܪ ܐܵܦ ܓܲܝܵܣܵܐ 336 ܕܐ̄ܢܵܐ ܡܲܠܟܿܘܼܬܼܵܐ ܫܸܐܠܹ̇ܬܼ ܡܸܢܵܟ ܘܠܵܘ ܦܲܪܕܲܝܣܵܐ ܀ 337 :ܐܸܢܗܘ̤ ܕܡܵܪܵܐ ܐܢ̄ܬܿ ܘܕܼܝܼܠܵܟ ܐܸܢܘܿܢ ܪܵܘܡܵܐ ܘܥܘܼܡܩܵܐ 338 ܡܵܢ ܡܸܬܿܬܿܗܸܐ ܐܲܢ̄ܬܿ ܡ̣ܢ ܕܲܠܡܸܓܼܡܲܪ ܫܘܼܘܕܵܝ ܡܸܠܲܝ̈ܟ ܀ 339 :ܐܸܢܵܐ ܕܲܠܥܸܠ ܕܠܵܐ ܡܸܫܬܲܪ̈ܝܵܢ ܒܥ̇ܝܬܼܵܟ ܕܐܹܪܲܬܼ 340 ܡ̇ܢ ܝܵܗ̇ܒܲܬܼ ܠܝܼ ܝܵܪܬܿܘܼܬܼ ܐܲܪܥܵܐ ܕܡܸܣܟܹܿܝܢ ܥܘܼܡܪܵܗ̇ ܀ 341 :ܡܢܵܬܼܵܐ ܗ̄ܘ̣ ܕܐܲܪܥܵܐ ܐܵܦ ܦܲܪܕܵܝܣܵܐ ܟܡܵܐ ܐܸܢ ܫܲܦܝܼܪ 342 ܘܡܸܬܼܚܲܒܿܠܵܢܵܐ ܗ̄ܘ̣ ܐܘܼܟܼܠܵܐ ܕܦܹܐܪ̈ܘܗܝ ܟܡܵܐ ܐܸܢ ܗܲܢܝܼ ܀ 343 :ܠܵܐ ܕܵܢ ܗܵܠܹܝܢ ܕܵܐܹ̇ܢ ܩܘܼܫܬܵܐ ܒܓܼܵܘ ܪܸܥܝܵܢܹܗ 344 ܕܠܵܐ ܐܲܦܸܣ ܠܹܗ ܪܸܡܙܵܐ ܕܚܵܢܹ̣ܗ ܕܢܸܬܼܒܲܥ ܐܸܢܹܝܢ ܀ 345 :ܗܵܘ̇ ܕܲܓܼܠ̣ܵܐ ܠܹܗ ܐ̄ܪܵܙ ܡܲܠܟܿܘܼܬܼܵܐ ܕܠܵܐ ܡܸܬܼܚܲܙܝܵܐ 346 ܗܘ̤ ܐܲܪܡܝܼ ܒܹܗ ܦܓܼܘܼ̈ܕܹܐ ܕܫܸܬܼܩܵܐ ܕܠܵܐ ܢܸܬܼܦܲܠܲܓܼ ܀ 347 :ܒܗܲܝܡܵܢܘܼܬܼܵܐ ܒܥ̣ܵܐ ܡܲܠܟܿܘܼܬܼܵܐ ܡ̣ܢ ܗܵܘ̇ ܕܲܕܼܒܼܵܝܗܝ 348 ܘܲܕܪܲܚܝܼܩܵܐ ܐܲܥܠܹܗ ܠܲܥܕܹܢ ܥܲܕܼ ܡܸܬܼܓܲܒܝܵܐ ܀ 349 :ܠܵܐ ܡܲܨܝܵܐ ܗ̄ܘ̣ܵܐ ܕܢܸܥܘܿܠ ܥܲܡܹܗ ܒܗܵܢܵܐ ܙܲܒܼܢܵܐ 350 ܕܠܵܐ ܢܸܬܿܕܵܘܲܕܼ ܛܲܟܼܣܵܐ ܪܲܒܵܐ ܕܗܵܘ̇ ܬܘܼܩܵܢܵܐ ܀ 351 :ܒܛܲܟܼܣܵܐ ܗܵܘ̇ܝܵܐ ܗܵܝ̇ ܡܲܥܲܠܬܵܐ ܒܫܘܼܠܵܡ ܙܲܒܼܢܹ̈ܐ 352 ܘܐܲܟܲܚ̄ܕܼ ܥܵܐ̇ܠܝܼܢ ܥܝܼܪܹ̈ܐ ܘܐ̄ܢܵܫܵܐ ܟܸܢܫܵܐ ܪܲܒܵܐ ܀ pb. 338 353 :ܘܲܕܼܠܵܐ ܝܲܗ̣̄ܒܼ ܠܹܗ ܕܢܸܥܘܿܠ ܥܲܡܹܗ ܕܠܵܐ ܦܲܐܝܵܐ ܗ̄ܘ̣ܵܬܼ 354 ܐܲܥܠܹܗ ܒܣܲܒܼܪܵܐ ܠܐ̄ܪܵܙ ܡܲܥܠܬܵܐ ܕܲܠܡܲܠܟܿܘܼܬܼܵܐ ܀ 355 :ܒܲܢܦܸܫ ܐܲܥܠܹܗ ܠܐܲܬܼܪܵܐ ܕܲܥܕܹܢ ܠܵܐ ܗ̄ܘ̣ܵܐ ܒܲܦܓܲܪ 356 ܒܗܵܘ̇ ܒܲܪܢܵܫܵܐ ܕܲܡܨܸܐ ܡܩܲܒܸܿܠ ܪ̈ܘܼܚܵܢܝܵܬܼܵܐ ܀ 357 :ܠܲܡܠܝܼܠܘܼܬܹܗ ܝܲܗ̣̄ܒܼ ܪܲܗܒܼܘܿܢܵܐ ܕܲܥܬܼܝܼ̈ܕܼܵܬܼܵܐ 358 ܕܢܸܵܗܘܸܐ ܝܵ̇ܕܲܥ ܕܠܵܐ ܡܸܬܼܕܲܓܲܠ ܣܲܒܼܪܵܐ ܕܥܲܠ̣ ܠܹܗ ܀ 359 :ܪܲܗܒܼܘܿܢ ܚܲܝܹ̈ܐ ܝܲܗ̣̄ܒܼ ܠܹܗ ܒܲܥܕܹܢ ܠܒܲܪ ܡ̇ܝܘܿܬܹ̈ܐ 360 ܕܢܸܫܪܸܐ ܡ̇ܘܬܵܐ ܕܫܲܥܒܸܿܕܼ ܠܐܵܕܼܵܡ ܘܲܠܝܲܠܕܵܬܹ̈ܗ ܀ 361 :ܐܲܝܟܵܐ ܕܲܚܛ̣ܵܐ ܪܹܫ ܐ̄ܢܵܫܘܼܬܼܵܐ ܘܩܲܛܠܹܗ ܡ̇ܘܬܵܐ 362 ܠܬܲܡ̇ܢ ܐܲܥܠܹܗ ܠܪܵܕܹܐ ܒܬܼܵܘܫܵܐ ܕܓܲܢܵܒܼܘܼܬܼܵܐ ܀ 363 :ܒܢܘܼܡܹܐ ܕܐܲܒܼܘܼܗܝ ܥܲܠ̣ ܕܲܢܕܲܝܲܪ ܒܲܪ ܓܲܢܵܒܼܵܐ 364 ܘܲܚܙ̣ܵܝܗܝ ܣܵܢ̇ܐܵܐ ܘܐܲܝܠܸܠ ܘܲܒܼܟܼܵܐ ܕܠܵܐ ܒܸܣܡܲܬ̤ ܠܹܗ ܀ 365 :ܠܐܲܬܼܪܵܐ ܕܣܵܓܹ̇ܗ ܥܒܼܵܪ ܦܘܼܩܕܵܢܵܐ ܒܐܲܦܲܝ̈ ܐܵܕܼܵܡ 366 ܠܹܗ ܥܲܠ̣ ܐܵܕܼܵܡ ܒܝܲܕܼ ܓܵܝܵܣܵܐ ܕܥܲܠ̣ ܥܲܡ ܡܿܪܲܢ ܀ 367 :ܢܲܦܫܹܗ ܕܡܵܪܲܢ ܘܲܕܼܓܲܝܵܣܵܐ ܥܲܠ̣ ܫܲܘܝܵܐܝܼܬܼ 368 ܘܦܲܬܼܚܹܗ ܠܬܲܪܥܵܐ ܩܕܼܵܡ ܢܦܫܵܬܼ̈ܐ ܕܟܹܐܦܹܐ ܀ 369 :ܣܝܵܓܼܵܐ ܕܚܸܡܬܼܵܐ ܣܝܼܓܼ ܗ̄ܘ̣ܵܐ ܒܐܲܦܲܝ̈ܢ ܕܠܵܐ ܢܸܥܘܿܠ ܠܹܗ 370 ܘܬܲܪܥܹܗ ܡ̇ܪܲܢ ܘܐܲܥܠܲܢ ܥܲܡܹܗ ܒܝܲܕܼ ܡܲܥܲܠܬܹܿܗ ܀ 371 :ܠܒܸܗܬܲܬܼ ܫܹܐܕܹ̈ܐ ܦܬܲܚ ܦܲܪܕܿܝܣܵܐ ܩܕܼܵܡ ܡ̇ܝܘܿܬܹ̈ܐ 372 ܕܲܚܕܝܼܘ ܕܲܢܦܲܩ̄ܢ ܢܲܟܼܪܘܼܢ ܗܵܫܵܐ ܒܝܲܕܼ ܡܲܥܲܠܬܲܢ ܀ 373 :ܠܪܹܫܵܐ ܕܐܵܐܲܪ ܦܲܪܣܝܼ ܘܐܲܒܼܗܸܬܼ ܒܗܵܕܹܐ ܕܲܣܥ݂ܲܪ 374 ܕܕܲܚܩܹܗ ܠܐܵܕܼܵܡ ܡ̣ܢ ܝܵܪܬܿܘܼܬܼܵܐ ܕܝܲܗ̣̄ܒܼ ܠܹܗ ܡܵܪܹܗ ܀ 375 :ܪܢܵܐ ܚܵܣܵܡܵܐ ܕܠܵܐ ܬܘܼܒܼ ܦܵܢܹ̇ܐ ܐܵܕܼܵܡ ܠܐܲܬܼܪܹܗ 376 ܘܲܒܼܗܸܬܼ ܡ̣ܢ ܫܹܠܝ ܕܲܚܙ̣ܵܝܗܝ ܒܲܥܕܹܢ ܒܬܲܪܬܹܿܝܢ ܢܲܦܫ̈ܢ ܀ 377 :ܬܪܹܝܢ ܥܲܠ̣ܘ ܠܘܼܩܕܼܵܡ ܚܲܕܼ ܙܲܕܲܝܼܩܵܐ ܘܚܲܕܼ ܚܲܛܵܝܵܐ 378 ܕܢܸܗܘܸܐ ܝܵ̇ܕܲܥ ܕܡܸܥܲܠ ܥܵܐ̇ܠܝܼܢ ܛܵܒܹ̈ܐ ܘܒܼܝܼܫܹ̈ܐ ܀ 379 :ܥܲܠ ܓܲܝܵܣܵܐ ܚܲܫ̣ ܘܐܸܬܿܬܲܢܲܚ ܛܵܒܼ ܡ̣ܢ ܡ̇ܪܲܢ 380 ܕܐܲܝܟܲܢ ܬܲܪܥܹܗ ܐܸܫܹ̇ܕܼ ܠܲܕܼܡ̇ܐ ܠܫܘܼܪܵܐ ܕܒܼܢ̣ܵܐ ܀ 381 :ܒܡܸܠܟܹܿܗ ܣܒ݂ܲܪ ܗ̄ܘ̣ܵܐ ܚܬܼܝܼܪ ܪܸܥܝܵܢܵܐ ܕܣܝܼܓܼ ܦܲܪܕܲܝܣܵܐ 382 ܘܕܲܚܙ̣ܵܐ ܕܦܲܬܼܚܘܼܗܝ ܐܲܚܕܹܿܗ ܓܘܼܢܚܵܐ ܘܲܦܣܵܩ ܣܲܒܼܪܵܐ ܀ 383 ܚܙ̣ܵܐ ܕܐܸܬܿܕܲܪܫܲܬ̤ ܐܘܼܪܚܵܐ ܠܲܥܕܹܢ ܕܢܸܪܕܿܘܿܢ ܐ̄ܢܵܫܵܐ: pb. 339 384 ܘܐܲܝܠܸܠ ܘܲܒܼܟܼܵܐ ܕܦܵܫ̣ ܒܲܠܚܘܿܕܼܵܘܗܝ ܒܲܫܟܼܝܼܪ̈ܵܬܼܵܐ ܀ 385 :ܡܵܢܵܐ ܐܸܥܒܸܿܕܼ ܐܸܡ݂ܲܪ ܗܘ̤ ܠܹܗ ܡܲܪܝܼܪ ܢܲܦܫܵܐ 386 ܕܡܲܠܟܵܐ ܕܲܫܕܹܝܬܼ ܠܐܸܟܿܣܘܿܪܝܵܐ ܦܥ̣ܵܐ ܠܡܲܠܟܿܘܼܬܹܗ ܀ 387 :ܠܐܲܝܟܵܐ ܐܹܙܲܠ ܫܲܐܸܠ ܒܝܼܫܵܐ ܠܝܲܨܪܹܗ ܒܝܼܫܵܐ 388 ܕܐܲܚܕܹܿܗ ܐܵܕܼܵܡ ܠܪܵܘܡܵܐ ܘܥܘܼܡܩܵܐ ܒܝܲܕܼ ܝܲܠܕܵܬܹ̈ܗ ܀ 389 :ܕܚܲܩܬܹܿܗ ܠܘܼܩܬܹܿܗ ܠܘܼܩܕܼܵܡ ܡ̣ܢ ܦܲܪܕܲܝܣܵܐ ܕܕܲܡ ܠܵܐ ܢܹܐܪܲܬܼ 390 ܘܠܵܐ ܦܵܫܲܬ̤ ܕܘܼܟܿܬܼܵܐ ܒܐܲܪܥܵܐ ܕܠܵܘ ܗܘ̤ ܝܲܪܬܵܗ̇ ܀ 391 :ܛܘܼܒܲܝ ܗ̄ܘ̣ܵܐ ܠܝܼ ܒܝܵܪܬܿܘܼܬܼ ܐܲܪܥܵܐ ܕܲܩܢ̣ܵܐ ܒܐܲܪܥܵܐ 392 ܘܠܵܐ ܕܐܸܬܼܵܐ ܠܝܼ ܛܸܒܵܐ ܚܲܕܼܬܼܵܐ ܕܲܠܥܸܠ ܣܵܠܹ̇ܩ ܀ 393 :ܪܵܓܵܐ ܗ̄ܘ̣ܵܬܼ ܠܝܼ ܕܲܥܦܝܼܦܵܐܝܼܬܼ ܢܸܩܢܹܝܗ ܠܐܲܪܥܵܐ 394 ܘܠܵܐ ܢܸܬܼܟܢܸܐ ܝܵܪܬܵܐ ܕܪܵܘܡ̇ܐ ܘܒܲܪ ܡܲܠܟܿܘܼܬܼܵܐ ܀ 395 :ܡܢܝܼܚ ܗ̄ܘܹ̇ܝܬܼ ܐܸܠܘܼ ܝܼܪܸܬܼ ܐܲܟܲܚ̄ܕܼ ܪܵܘܡܵܐ ܘܥܘܼܡܩܵܐ 396 ܘܠܵܐ ܐܸܬܼܥܲܠܝܼ ܠܕܲܪܓܼܵܐ ܪܵܡ̇ܐ ܕܐܲܠܵܗܘܼܬܼܵܐ ܀ 397 :ܒܲܪ ܛܘܿܗܡܹܗ ܗ̄ܘ̣ ܗܵܢܵܐ ܕܙܸܩܦܹ̇ܬܼ ܥܲܠ ܪܹܫ ܩܲܝܣܵܐ 398 ܘܗܵܐ ܡܸܫܬܵܘܕܹܿܐ ܫܡܲܝܵܐ ܘܐܲܪܥܵܐ ܠܲܟܼ̈ܢܵܘܵܬܹܗ ܀ 399 :ܬܠܸܐ ܒܲܨܠܝܼܒܼܵܐ ܘܲܡܩܲܒܿܥܝܼܢ ܒܹܗ ܨܸܨܹ̈ܐ ܒܦܲܓܼܪܹܗ 400 ܘܝܵܡܹ̇ܐ ܒܐܵܡܹܝܢ ܕܲܡܨܸܐ ܠܡܸܬܲܠ ܡܵܠܟܿܘܼܬܼ ܪܵܘܡ̇ܐ ܀ 401 :ܪܡܸܐ ܒܐܵܓܼܘܿܢܵܐ ܕܚܵܫܘܿܫܘܼܬܼܵܐ ܘܩܲܪܝܼܒܼ ܕܲܢܡܘܼܬܼ 402 ܘܩܵܡ̣ ܚܲܕܼ ܫܝܼܛܵܐ ܘܡܸܬܼܟܲܫܲܦ ܠܹܗ ܕܗܲܒܼ ܠܝܼ ܚܲܝܹ̈ܐ ܀ 403 :ܢܸܓܼ̈ܕܹܿܐ ܥܦܝܼܦܹ̈ܐ ܐܸܬܿܬܿܘܣܲܦ ܠܹܗ ܐܵܟܹ̇ܠܩܲܪܨܵܐ 404 ܒܗܵܣ̇ ܒܲܪܬܼ ܩܵܠܵܐ ܕܐܸܬܿܕܲܟܼܪܲܝܢܝ ܡܵܪܝ ܡ̇ܐ ܕܐܵܬܹܿܐ ܐܲܢ̄ܬܿ ܀ 405 :ܟܡܵܐ ܕܓܲܝܵܣܵܐ ܡܸܬܼܟܲܫܲܦ ܗ̄ܘ̣ܵܐ ܥܲܠ ܪܹܫ ܩܲܝܣܵܐ 406 ܗܘ̤ ܡܲܣܓܸܿܐ ܗ̄ܘ̣ܵܐ ܡܸܬܿܬܲܚ ܗ̄ܘ̣ܵܐ ܡܲܪܝܼܪܵܐܝܼܬܼ ܀ 407 :ܟܡܵܐ ܕܡܲܚܸܐ ܟܠ ܡܸܫܬܵܘܕܹܿܐ ܗ̄ܘ̣ܵܐ ܕܥܲܡܝܼ ܠܲܡ ܬܸܗܘܸܐ 408 ܗܘ̤ ܝܵܒܹ̇ܕܼ ܗ̄ܘ̣ܵܐ ܒܢܘܼܪܵܐ ܕܝܲܨܪܹܗ ܥܲܙܝܼܙܵܐܝܼܬܼ ܀ 409 :ܟܡܵܐ ܕܝܵܡܹ̇ܐ ܗ̄ܘ̣ܵܐ ܘܲܡܚܲܬܿܡ ܗ̄ܘ̣ܵܐ ܡܸܠܬܹܗ ܒܐܵܡܹܝܢ 410 ܗܘ̤ ܡܲܝܠܸܠ ܗ̄ܘ̣ܵܐ ܐܲܝܟ ܝܵܠܹܕܿܬܵܐ ܕܚܲܣܢ̣ܵܗ̇ ܟܹܐܒܼܵܐ ܀ 411 :ܐܲܝܟ ܕܲܒܼܓܹܐܪܵܐ ܒܠܲܥ̣ ܚܲܣܵܡܵܐ ܒܗܵܠܹܝܢ ܕܲܗ̤ܘܲܝ̈ 412 ܘܡ̣ܢ ܟܠ ܡܸܕܹܿܡ ܙܵܩܹ̇ܬܼ ܗ̄ܘ̣ܵܐ ܠܹܗ ܩܵܠ ܓܲܝܵܣܵܐ ܀ 413 :ܘܐܸܢ ܓܲܝܵܣܵܐ ܕܬܲܠܡܝܼܕܹܗ ܗ̄ܘ̣ܵܐ ܗܵܟܲܢ ܙܲܩܬ̣ܹܿܗ 414 ܡ̇ܢܵܐ ܢܸܥܒܸܿܕ ܡܵܐ ܕܩܵܥܹ̇ܝܢ ܒܹܗ ܫܡܲܝܵܐ ܘܐܲܪܥܵܐ ܀ 415 ܐܸܢ ܒܲܪ ܐ̄ܪܵܙܹܗ ܦܲܪܣܝܼ ܘܲܓܼܠܵܗ̇ ܠܐܘܼܡ̇ܢܘܼܬܹܗ: pb. 340 416 ܠܐܲܝܟܵܐ ܢܹܐܙܲܠ ܡ̇ܐ ܕܡܲܗܠܝܼܢ ܒܹܗ ܥܝܼܪܹ݁ܐ ܘܐ̄ܢܵܫܵܐ ܀ 417 :ܐܸܢ ܩܵܛ̇ܘܿܠܵܐ ܢܣ݂ܲܒܼ ܫܘܼܘܕܵܝܵܐ ܕܡܲܠܟܿܘܼܬܼ ܪܵܘܡ̇ܐ 418 ܒܐܲܝܠܹܝܢ ܥܲܝܢܹ̈ܐ ܢܚܘܼܪ ܟܲܕܼ ܥܵܐܹ̇ܠ ܟܠܹܗ ܓܸܢܣܲܢ ܀ 419 :ܐܘܿ ܓܲܝܵܣܵܐ ܕܦܲܣܩܹ̣ܗ ܠܣܲܒܼܪܹܗ ܕܲܒܼܥܸܠܕܲܪܵܐ 420 ܘܐܲܩܢܝܼ ܘܲܒܼܪܵܐ ܠܲܕܼܠܵܐ ܣܲܒܼܪܵܐ ܒܫܘܼܒܼܩܵܢ ܥܵܘ̣ܠܹܗ ܀ 421 :ܐܘܿ ܕܐܸܬܼܚܲܝܲܒܼ ܘܡܲܫܟܸܿܢ ܢܲܦܫܹܗ ܒܲܫܟܼܝܼܪ̈ܵܬܼܵܐ 422 ܕܲܢܣ݂ܲܒܼ ܡܲܓܼܵܢ ܫܛܵܪ ܚܵܘ̈ܒܵܬܹܗ ܒܲܚܕܼܵܐ ܡܸܠܬܼܵܐ ܀ 423 :ܐܘܿ ܕܐܸܬܿܛܲܡܲܐ ܟܠܹܗ ܒܟܼܠܹܗ ܒܥܵܘ̣ܠܐ ܢܕܝܼܕܼܵܐ 424 ܕܪܲܣ ܥܲܠ ܟܠܹܗ ܡܲܝܵ̈ܐ ܕܟܼܵܝܵ̈ܐ ܕܲܬܼܝܵܒܼܘܼܬܼܵܐ ܀ 425 :ܐܘܿ ܕܒܲܙ̣ ܘܲܥܠ݂ܲܒܼ ܐܲܪ̈ܥܵܢܝܵܬܼܵܐ ܒܟܼܠܗܘܿܢ ܚܲܝܵܘ̈ܗܝ 426 ܘܲܒܼܝܘܿܡ ܡ̇ܘܬܹܿܗ ܒܲܙ̣ ܛܵܒܼܵܬܼ̈ܐ ܫܡܲܝܵܢ̈ܝܵܬܼܵܐ ܀ 427 :ܐܘܿ ܕܐܸܬܿܛܲܫܝܼܘ ܪ̈ܵܕܝܲܝ ܒܐܘܼܪܚܵܐ ܡ̣ܢ ܒܝܼܫܘܼܬܹܗ 428 ܕܲܕܼܪܲܫ ܐܘܼܪܚܵܐ ܕܲܬܼܝܵܒܼܘܼܬܼܵܐ ܩܕܼܵܡ ܚܲܛܵܝܹ̈ܐ ܀ 429 :ܐܘܿ ܚܒܸܢܵܢܵܐ ܕܓܲܡܲܪ ܝܵܘܡܵܘ̈ܗܝ ܒܲܣܪܝܼܩܘܼܬܼܵܐ 430 ܕܐܸܡ݂ܲܪ ܡܸܠܬܼܵܐ ܘܲܫܩ݂ܲܠ ܐܲܓܼܪܵܐ ܡܲܠܟܿܘܼܬܼ ܪܵܘܡ̇ܐ ܀ 431 :ܐܘܿ ܟܡܵܐ ܘܐܲܝܟܲܢ ܐܹܨܘܼܪ ܨܲܠܡܵܐ ܕܫܘܼܒܼܩܵܢ ܥܵܘ̣ܠܵܟ 432 ܕܒܼܵܐܡܹܝܢ ܚܲܬܿܡܹܗ ܝܵܗܹ̇ܒܼ ܕܲܪ̈ܓܹܐ ܠܕܲܪܓܼܵܟ ܕܲܡ̣ܛܵܟ ܀ 433 :ܒܨܝܼܪ ܗ̄ܘ̣ ܠܸܫܵܢܝ ܕܲܢܨܘܼܪ ܫܲܪܒܵܟ ܦܵܠܹ̇ܫ ܐܸܣܹ̈ܐ 434 ܘܠܵܐ ܝܵ̇ܕܲܥ ܐ̄ܢܵܐ ܕܐܸܓܼܠܸܐ ܟܡܹܐܢܹ̈ܐ ܕܐܘܼܡ̇ܢܘܼܬܼܵܟ ܀ 435 :ܡܕܲܪܡܲܬܿ ܟܠܵܟ ܘܲܨܢܝܼܥܵܝܼܬܼ ܕܲܒܼܪܬܿ ܚܲܝܲܝ̈ܟ 436 ܚ̣ܛܲܝܬܿ ܐܲܝܟ ܕܲܒܼܥ݂ܲܝܬܿ ܘܲܦܢ݂ܲܝܬܿ ܘܐܲܦܝܼܣܬܿ ܐܲܝܟ ܕܲܫܦ݂ܲܪ ܠܵܟ ܀ 437 :ܫܵܒܹ̇ܩ ܥܵܘ̣ܠܵܟ ܝܵ̇ܕܲܥ ܒܲܠܚܘܿܕܼ ܩܸܦ̈ܠܹܐ ܕܠܸܒܵܟ 438 ܘܲܕܼܝܵ̇ܕܲܥ ܠܵܟ ܠܵܐ ܐܲܩܹܨ ܠܵܟ ܪܲܒܿܘܼܬܼ ܥܵܘ̣ܠܵܟ ܀ 439 :ܚܲܟܿܝܼܡܵܐܝܼܬܼ ܨܵܪܹܗ ܠܫܲܪܒܵܟ ܒܕܲܦܵܐ ܕܚܲܫܵܘ̈ܗܝ 440 ܕܢܹܐܠܲܦ ܟܠܢܵܫ ܠܡܸܪܕܼܵܐ ܒܚܲܫܹ̈ܐ ܠܘܵܬܼ ܕܲܥܬܼܝܼ̈ܕܼܵܢ ܀ ܥܘܼܢܵܝܵܐ: ܫܘܼܒܼܚܵܐ ܠܵܟ ܡܲܦܸܢܹܐ ܛܵܥܲܝܵ̈ܐ: ܠܝܼܕܲܥܬܼܵܐ ܕܪܲܒܿܘܼܬܼ ܫܘܼܒܼܚܹܗ ܀