On Mysteries and Baptism - ܥܲܠ ܐ̄ܪ̈ܙܹܐ ܕܥܹܕܿܬܵܐ ܘܥܲܠ ܡܲܥܡܘܿܕܼܝܼܬܼܵܐ

1 :ܢܸܒܼܥܵܐ ܚܲܠܝܵܐ ܕܡܲܥܡܘܿܕܝܼܬܼܵܐ ܦ̣ܬܲܚ ܠܲܢ ܡ̇ܪܲܢ 2 ܘܐܲܫܩܝܼ ܠܓܸܢܣܲܢ ܚܲܠܝܘܼܬܼ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 3 :ܒܚܘܼܡܵܐ ܕܥܵܘ̣ܠܵܐ ܝ̣̄ܒܸܫ ܪܸܥܝܵܢܵܢ ܘܲܢܬܲܪܘ ܦܹܐܪ̈ܵܘܗܝ 4 ܘܪܲܣ ܡܵܘܗܲܒܼܬܹܗ ܒܲܕܼܡܘܼܬܼ ܛܲܠܵܐ ܘܪܲܓܝܼ ܢܲܦܫܲܢ ܀ 5 :ܨܵܗܝܵܐ ܩܲܫܝܵܐ ܕܡ̇ܝܘܿܬܼܘܼܬܼܵܐ ܩܲܛܠܹ̣ܗ ܠܦܲܓܼܪܲܢ 6 ܘܩܲܒܼ݂ܪܹܗ ܒܡܲܝܵ̈ܐ ܘܲܪܚܸܫܘ ܚܲܝܹ̈ܐ ܒܡܵܝܘܿܬܼܘܼܬܹܗ ܀ 7 :ܫܘܼܚܬܵܐ ܕܚܲܫܹ̈ܐ ܠܚ̣ܵܬܹܗ ܠܫܘܼܦܪܵܐ ܕܦܵܪܘܿܫܘܼܬܲܢ 8 ܘܲܗܦ݂ܲܟ ܨܵܪܲܢ ܒܣܲܡܵܐ ܕܪܘܼܚܵܐ ܕܠܵܐ ܡܸܬܼܚܲܒܲܠ ܀ 9 :ܐܘܼ ܡ̇ܢܵܐܝܼܬܼ ܡܲܕܿܟܹܗ ܠܣܲܡܵܐ ܕܚܘܼܕܵܬܼ ܓܸܢܣܲܢ 10 ܒܡܸܫܚܵܐ ܘܡܲܝ̈ܵܐ ܘܚܲܝܠܵܐ ܕܪܘܼܚܵܐ ܕܚܲܣܝܼܢ ܡ̣ܢ ܟܠ ܀ 11 :ܐܘܼܡ̇ܢܘܼܬܼܵܐ ܚܕܲܬܵܐ ܐܲܦܸܩ ܪܲܒܿ ܐܘܼܡ̇ܢܹ̈ܐ 12 ܕܢܸܗܘܘܿܢ ܨܵܝ̇ܪܝܼܢ ܐ̄ܢܵܫܵܐ ܠܐ̄ܢܵܫܵܐ ܕܠܵܐ ܪܘܼܟܵܒܼܵܐ ܀ 13 :ܫܟܼܵܚܬܵܐ ܕܠܵܐ ܗܘ̤ܵܬܼ ܐܸܫܟܲܚ ܪܸܡܙܵܐ ܐܲܠܵܗܵܝܵܐ 14 ܕܕܲܠܵܐ ܙܲܪܥܵܐ ܢܵܘܠܸܕܼ ܐ̄ܢܵܫܵܐ ܡ̣ܢ ܓܵܘ ܡܲܝܵ̈ܐ ܀ 15 :ܐܲܝܟܵܐ ܡܸܡܬܼܘܿܡ ܗܘ̤ܵܬܼ ܕܐܲܝܟ ܗܵܕܹܐ ܐܵܘ ܐܸܣܬܲܥܪܲܬ̤ 16 ܥܘܼܒܵܐ ܕܡܲܝ̈ܵܐ ܕܡ̇ܘܠܸܕܼ ܥܘܸܠܹ̈ܐ ܕܠܵܐ ܙܘܘܼܵܓܼܵܐ ܀ 17 :ܠܡܲܢ ܐܸܫܬܲܡܥܲܬ̤ ܕܐܵܘܠܕ ܓܸܢܣܵܐ ܠܠܵܐ ܒܲܪ ܓܸܢܣܹܗ 18 ܐܲܟܼܡܵܐ ܕܗܵܫܵܐ ܟܝܵܢܵܐ ܚܲܪܫܵܐ ܠܲܡܠܝܼܠܘܼܬܼܵܐ ܀ 19 :ܐܵܦܸܢ ܐܵܘܠܸܕܼܘ ܡܲܝ̈ܵܐ ܠܪ݁ܲܚܫܵܐ ܘܲܠܦܵܪܲܚܬܼܵܐ 20 ܐ̄ܢܵܫܵܐ ܡ̣ܢ ܡܬܼܘܿܡ ܠܵܐ ܐܸܫܬܲܡܥܲܬ̤ ܕܡܲܝ̈ܵܐ ܐܵܘܠܕܼܘܼܗܝ ܀ 21 :ܬܲܗܪܵܐ ܗ̄ܝܼ ܗܵܕܹܐ ܘܲܟܼܡܵܐ ܕܢܹܐܡܲܪ ܬܲܗܪܵܐ ܡܲܠܝܵܐ 22 ܕܟܲܪܣܵܐ ܕܡܲܝܵ̈ܐ ܬܸܒܼܛܲܢ ܘܬܹܐܠܲܕܼ ܥܘܸܠܹ̈ܐ ܓܡܝܼܪܹ݁ܐ ܀ 23 :ܚܕܲܬܵܐ ܗ̄ܝܼ ܟܠܵܗ̇ ܘܪܲܒܼ ܒܘܼܕܵܩܵܐ ܕܡܸܫܬܲܡܲܫ ܒܵܗ̇ 24 ܕܲܒܼܨܝܼܪ ܫܵܥܵܐ ܗܵܘܹ̇ܐ ܛܵܘܪܵܐ ܕܒܲܛܢܵܐ ܘܝܲܠܕܵܐ ܀ 25 ܠܒܲܪ ܡ̣ܢ ܛܲܟܼܣܵܐ ܕܣܝܼܡ ܒܲܟܼܝܵܢܲܐ ܪܵܕܹܐ ܛܲܟܼܣܵܗ̇: pb. 342 26 ܘܠܵܐ ܡܸܬܼܥܵܘܟܼܵܐ ܒܝܲܕܼ ܬܲܪܒܿܝܼܬܼܵܐ ܕܩܲܠܝܼܠ ܩܲܠܝܼܠ ܀ 27 :ܬܵܐ ܫܵܡܘܿܥܵܐ ܫܡܲܥ ܬܸܕܡܘܼܪܬܵܐ ܕܝܲܠܕܲܐ ܚܲܕܼܬܼܵܐ 28 ܕܒܲܚܕܼܵܐ ܫܵܥܵܐ ܗܵܘܹ̇ܐ ܒܲܛܢܹܗ ܐܵܦ ܡ̇ܘܠܵܕܹܗ ܀ 29 :ܬܵܐ ܚܲܙܵܝܵܐ ܚܙܝܼ ܨܲܝܪܵܐ ܕܨܵܐܲܪ ܥܘܸܠܹ̈ܐ 30 ܘܥܲܕܼ ܡܸܬܼܗܲܦܟܵܐ ܡܸܠܬܼܵܐ ܒܦܘܼܡ̇ܐ ܢܦ݂ܲܩ ܡ̣ܢ ܟܲܪܣܵܐ ܀ 31 :ܬܵܐ ܦܵܪܘܿܫܵܐ ܦܪܘܿܫ ܘܐܸܬܼܒܲܩܵܐ ܦܵܪܘܿܫܵܐܝܼܬܼ 32 ܒܚܹܝܠ ܐܝܼܬܼܘܼܬܼܵܐ ܕܡܲܩܢܹܐ ܚܲܝܠܵܐ ܠܲܡܚܝܼ̈ܠܵܬܼܵܐ ܀ 33 :ܘܬܼܵܘ ܡ̇ܝܘܿܬܹ̈ܐ ܚܘܼܪܘ ܒܲܟܼܝܵܢܵܐ ܡܓܸܐ ܡܝܼܬܼܘܼܬܼܵܐ 34 ܕܫܵܠ̇ܲܚ ܚܲܫܵܘ̈ܗܝ ܒܡܲܥܡܘܿܕܼܝܼܬܼܵܐ ܘܠܵܒܹ̇ܫ ܚܲܝܹ̈ܐ ܀ 35 :ܬܵܘ ܢܸܬܼܒܲܩܸܐ ܚܲܬܿܝܼܬܼܵܐܝܼܬܼ ܒܐ̄̈ܪܵܙ ܚܘܼܕܵܬܲܢ 36 ܘܢܹܐܠܲܦ ܕܲܟܼܣܸܐ ܒܡܲܝܵ̈ܐ ܡܸܬܼܚܲܙܝܵܢܹ̈ܐ ܀ 37 :ܬܵܘ ܢܸܬܼܩܲܪܲܒܼ ܨܹܝܕܼ ܟܵܗܢܘܼܬܼܵܐ ܡܸܠܚܵܗ̇ ܕܐܲܪܥܵܐ 38 ܘܢܸܚܙ̣ܐ ܕܐܲܝܟܲܢ ܡܡܲܕܿܟܼܵܐ ܠܐ̄ܢܵܫܵܐ ܒܪ̈ܘܼܚܵܢܝܼܬܼܵܐ ܀ 39 :ܢܸܥܘܿܠ ܥܲܡܵܗ̇ ܠܐܲܝܟܵܐ ܕܥܵܐܹ̇ܠ ܠܲܡܚܲܣܵܝܘܼ 40 ܘܢܸܨܠܸܐ ܗܵܘܢܲܢ ܠܲܡܨܵܬܼ ܩܵܠܵܐ ܕܡܲܠܸܠ ܥܲܡܵܗ̇ ܀ 41 :ܢܨܘܼܬܼ ܕܐܲܝܟܲܢܵܐ ܠܵܥܹ̇ܙ ܥܲܡܵܗ̇ ܚܲܝܠܵܐ ܕܪܘܼܚܵܐ 42 ܘܲܡܚܲܟܸܿܡ ܠܵܗ̇ ܕܬܲܩܢܸܐ ܚܲܝܠܵܐ ܠܡܲܝ̈ܵܐ ܫܚܝܼܡܹ̈ܐ ܀ 43 :ܪܸܡܙܵܐ ܟܲܣܝܵܐ ܡܬܲܪܓܸܿܡ ܥܲܡܵܗ̇ ܐ̄ܪ̈ܵܙܹܐ ܟܣܲܝܵ̈ܐ 44 ܘܲܡܦܲܫܩܵܐ ܠܗܘܿܢ ܒܩܵܠܵܐ ܓܲܠܝܵܐ ܩܕܼܵܡ ܫܵܡܘܿܥܹ̈ܐ ܀ 45 :ܐܘܼܡ̇ܢܘܼܬܼܵܐ ܕܝܲܠܕܵܐ ܚܲܕܼܬܼܵܐ ܣܵܥܲ݁ܪ ܩܘܼܕܼܡܹܝܗ̇ 46 ܘܲܡܚܵܘܸܐ ܠܵܗ̇ ܕܲܬܨܘܼܪ ܨܲܠܡܵܐ ܪܘܼܚܵܢܝܵܐ ܀ 47 :ܒܲܕܼܡܘܼܬܼ ܩܲܢܝܵܐ ܗܵܘܹ̇ܐ ܟܵܗܢܵܐ ܠܚܹܝܠ ܟܲܣܝܘܼܬܼܵܐ 48 ܘܟܼܵܬܹ̇ܒܼ ܒܐܝܼܕܼܝ̈ܗ̇ ܫܡܵܗܹ̈ܐ ܠܥܸܠ ܡ̣ܢ ܡܲܝܵ̈ܐ ܀ 49 :ܐܘܿ ܟܵܬܼܘܿܒܵܐ ܕܟܼܵܬܹ̇ܒܼ ܪܘܼܚܵܐ ܒܠܘܼܚܵܐ ܪܦܝܼܬܼܵܐ 50 ܘܠܵܐ ܡܸܬܼܠܲܚܝܵܐ ܕܝܘܿܬܼܵܐ ܕܡܸܠܵܘ̈ܗܝ ܒܡܲܝ̈ܵܐ ܫܪ̈ܲܝܵܐ ܀ 51 :ܐܘܿ ܟܡܵܐ ܪܲܒܵܐ ܐܘܼܡ̇ܢܘܼܬܼܵܟ ܒܲܪ ܡ̇ܝ̈ܘܿܬܹܐ 52 ܘܠܵܐ ܐ̄ܢܵܫ ܝܵ̇ܕܲܥ ܕܢܸܬܼܒܲܩܸܐ ܒܵܗ̇ ܠܦܘܼܬܼ ܪܲܒܿܘܼܬܼܵܗ̇ ܀ 53 :ܐܘܿ ܟܡܵܐ ܩܲܛܝܼܢ ܩܲܢܝܵܐ ܕܗܵܘܢܵܟ ܠܲܡܨܵܪ ܐ̄ܪ̈ܵܙܹܐ 54 ܘܠܲܝܬܿ ܨܲܝܵܪܵܐ ܕܲܡܨܸܐ ܡܕܲܡܸܐ ܐܲܝܟ ܨܘܼܪ̈ܬܼܵܟ ܀ 55 :ܐܘܿ ܠܵܟ ܟܵܗܢܵܐ ܡܟܲܗܸܢ ܒܐܲܪܥܵܐ ܪܘܼܚܵܢܵܐܝܼܬܼ 56 ܕܠܵܐ ܫܲܠܝܼܛܝܼܢ ܪ̈ܘܼܚܵܢܝܹܐ ܕܢܼܬܿܕܲܡܘܿܢ ܒܵܟ ܀ 57 :ܐܘܿ ܠܵܟ ܟܵܗܢܵܐ ܟܡܵܐ ܪܲܒܿ ܕܲܪܓܼܵܐ ܕܲܡܫܲܡܸܫ ܐܲܢ̄ܬܿ 58 ܕܲܡܫܲܡܫܵܢܹ̈ܐ ܕܢܘܼܪܵܐ ܘܪܘܼܚܵܐ ܙܵܝ̇ܥܝܼܢ ܡܸܢܹܗ ܀ 59 :ܡܲܢ̣ܘܼ ܣܵܦܹ̇ܩ ܕܢܹܐܡܲܪ ܕܲܟܼܡܵܐ ܗ̄ܝܼ ܪܲܒܿܘܼܬܼ ܕܲܪܓܼܵܟ 60 ܕܲܥܒ݂ܲܪܬܿ ܐܸܢܘܿܢ ܠܲܫܡܲܝܵܢܹ̈ܐ ܒܫܸܡ ܫܘܼܠܛܵܢܵܟ ܀ 61 :ܩܲܛܝܼܢ ܘܲܫܒܼܝܼܚ ܟܝܵܢܵܐ ܕܪܘܼܚܵܐ ܝܲܬܿܝܼܪ ܡܸܢܵܟ 62 ܘܠܵܐ ܡܲܦܲܣ ܠܹܗ ܕܲܢܨܘܼܪ ܐ̄ܪ̈ܵܙܹܐ ܒܕܼܘܡܝܵܐ ܕܝܼܠܵܟ ܀ 63 ܪܲܒܿ ܡܲܠܲܐܟܼܵܐ ܘܲܟܼܡܵܐ ܕܢܹܐܡܲܪ ܪܲܒܿܘܼ ܡܸܢܵܟ: pb. 343 64 ܘܡ̇ܐ ܕܡܸܬܼܦܲܚܲܡ ܥܲܡ ܬܸܫܡܸܫܬܵܟ ܒܨܝܼܪܘܼ ܡܸܢܵܟ ܀ 65 :ܩܲܕܿܝܼܫ ܣܪܵܦܵܐ ܘܲܦܐܹܐ ܟܪܘܿܒܼܵܐ ܘܩܲܠܝܼܠ ܥܝܼܪܵܐ 66 ܘܠܵܐ ܡܨܸܝܢ ܪܵܗ̇ܛܝܼܢ ܥܲܡ ܫܲܪܝܘܼܬܼܵܐ ܕܡܸܠܲܬܿ ܦܘܼܡܟ ܀ 67 :ܫܒܼܝܼܚ ܓܲܒܼܪܝܹܠ ܘܪܲܒܿ ܡܝܼܟܼܵܐܝܹܠ ܘܫܸܡܗܘܿܢ ܣܵܗܹ̇ܕܼ 68 ܘܲܬܼܚܹܝܬܼ ܐ̄ܪܵܙܵܐ ܕܡܲܓܼܥܲܠ ܒܐܝܼܕܼܵܝ̈ܟ ܟܕܝܼܢܝܼܢ ܟܠܢܵܫ ܀ 69 :ܒܵܟ ܡܸܬܼܒܲܩܹܝܢ ܡܵܐ ܕܩܲܪܝܼܒܼ ܐܲܢ̄ܬܿ ܠܲܡܫܲܡܵܫܘܼ 70 ܘܠܵܟ ܗ̄ܘ̣ ܡܣܲܟܹܿܝܢ ܕܬܸܦܬܲܚ ܬܲܪܥܵܐ ܠܩܘܼܕܵܫܲܝ̈ܗܘܿܢ ܀ 71 :ܩܵܠܹ̈ܐ ܕܫܘܼܒܼܚܵܐ ܛܥܝܼܢܝܼܢ ܩܵܝ̇ܡܝܼܢ ܡ̣ܢ ܝܲܡܝܼܢܵܟ 72 ܘܡ̇ܐ ܕܲܓܼܡܪܬܵܝܗܝ ܠܐ̄ܪܵܙ ܦܘܼܪܩܵܢܵܟ ܩܥ̣ܵܘ ܬܸܫܒܿܘܿܚܬܵܐ ܀ 73 :ܒܚܘܼܒܵܐ ܟܕܼܝܼܢܝܼܢ ܬܚܹܝܬܼ ܨܸܒܼܝܵܢܵܐ ܕܲܟܼܣܸܐ ܒܐ̄ܪ̈ܵܙܲܝܟ 74 ܘܲܡܝܲܩܪܝܼܢ ܠܵܟ ܡܸܛܠ ܛܲܟܼܣܵܐ ܕܡܸܫܬܲܡܲܫ ܒܵܟ ܀ 75 :ܘܐܸܢ ܪ̈ܘܼܚܵܢܹܐ ܠܵܐ ܚܵܫܘܿܫܹ̈ܐ ܡܝܲܩܪܝܼܢ ܛܲܟܼܣܵܟ 76 ܡܲܢ ܠܵܐ ܢܸܓܼܕܿܘܿܠ ܟܠܝܼܠ ܩܘܼܠܵܣܹ̈ܐ ܠܪܲܒܿܘܼܬܼ ܕܲܪܓܼܵܟ ܀ 77 :ܢܸܬܼܗܲܪ ܟܠܫܵܥ ܕܲܟܼܡܵܐ ܝܸܪܒܲܬ̤ ܪܲܒܿܘܼܬܼ ܕܲܪܓܼܵܟ 78 ܕܟܸܕܼܢܲܬ̤ ܐܸܢܘܿܢ ܠܪܵܘܡ̇ܐ ܘܥܘܼܡܩܵܐ ܬܚܹܝܬܼ ܫܘܼܠܛܵܢܵܗ̇ ܀ 79 :ܒܪܵܘܡ̇ܐ ܘܥܘܼܡܩܵܐ ܠܒ݂ܲܟܼܘ ܫܘܼܠܛܵܢܵܐ ܟܵܗܢܹ̈ܐ ܕܥܹܕܿܬܵܐ 80 ܘܗܸܢ̣ܘܿܢ ܦܵܩ̇ܕܿܝܼܢ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 81 :ܒܹܝܬܼ ܬܲܠܵܗܵܐ ܠܐ̄ܢܵܫܵܐ ܩܵܝ̇ܡܝܼܢ ܐܲܝܟ ܡܸܨܗܵܝܹ̈ܐ 82 ܘܲܒܼܡܸܠܲܝ̈ܗܘܿܢ ܪܵܟܸܦܝܼܢ ܥܵܘ̣ܠܵܐ ܡ̣ܢ ܐ̄ܢܵܫܘܼܬܼܵܐ ܀ 83 :ܩܠܝܼܕܼܵܐ ܕܪ̈ܲܚܡܹܐ ܐܲܠܵܗܵܝܹ̈ܐ ܣܝܼܡ ܒܐܝܼܕܲܝ̈ܗܘܿܢ 84 ܘܐܲܝܟ ܪܸܓܲܬܼܗܘܿܢ ܡܦܲܠܓܼܝܼܢ ܚܲܝܹ̈ܐ ܠܲܒܼܢܲܝ̈ܢܵܫܵܐ ܀ 85 :ܚܲܝܠܵܐ ܟܲܣܝܵܐ ܚܲܝܸܠ ܐܸܢܘܿܢ ܠܡܸܣܥܲܪܣ ܗܵܕܹܐ 86 ܕܲܒܼܓܲܠ̈ܝܵܬܼܵܐ ܢܚܵܘܘܿܢ ܚܘܼܒܹܿܗ ܠܲܥܒܼܵܕܼ ܐܝܼܕܼܵܘ̈ܗܝ ܀ 87 :ܚܘܼܒܹܿܗ ܚܵܘܝܼ ܒܐ̄ܪܵܙܵܐ ܕܐܲܫܠܸܡ ܠܐܲܪ̈ܥܵܢܵܝܹܐ 88 ܕܢܸܗܘܘܿܢ ܚܵܢ̇ܝܼܢ ܐ̄ܢܵܫܵܐ ܠܐ̄ܢܵܫܵܐ ܡ̣ܢ ܡ̇ܘܗܲܒܼܬܹܗ ܀ 89 :ܚܹܝܠ ܡ̇ܘܿܗܲܒܼܬܹܗ ܐܲܫܠܸܡ ܒܐܝܼܕܼܵܐ ܕܟܼܵܗܢܲܝ̈ ܥܹܕܿܬܵܐ 90 ܕܢܚܲܝܠܘܼܢ ܒܵܗ̇ ܡܚܝܼܠܘܼܬܼ ܐ̄ܢܵܫܵܐ ܕܚܵܝ̣ܒܼܘ ܒܲܚܛܝܼܬܼܵܐ ܀ 91 :ܚܵܘܒܲܬܼ ܐ̄ܢܵܫܵܐ ܦܪܲܥ ܟܵܗܢܵܐ ܒܝܲܕܼ ܬܸܫܡܸܫܬܹ̇ܗ 92 ܘܲܫܛܵܪ ܓܸܢܣܹܗ ܠܵܚܹ̇ܐ ܒܡܲܝܵ̈ܐ ܘܲܡܚܲܕܸܿܬܼ ܠܹܗ ܀ 93 :ܐܲܝܟ ܕܲܒܼܟܼܘܼܪܵܐ ܢܵܣܹ̇ܟ ܦܲܓܼܪܹ̈ܐ ܒܡܲܥܡܘܿܕܝܼܬܼܵܐ 94 ܘܐܲܝܟ ܕܲܒܼܢܘܼܪܵܐ ܡܛܲܠܸܩ ܝܲܥܪܵܐ ܕܡ̇ܝܘܿܬܼܘܼܬܼܵܐ ܀ 95 :ܣܲܡܵܐ ܕܪܘܼܚܵܐ ܡܲܪܡܸܐ ܒܡܲܝܵ̈ܐ ܐܲܝܟ ܕܲܒܼܟܼܘܼܪܵܐ 96 ܘܲܡܕܹܿܟܸܿܐ ܠܹܗ ܠܲܨܠܸܡ ܐ̄ܢܵܫܵܐ ܡ̣ܢ ܨܵܐܘܼܬܼܵܐ ܀ 97 :ܒܪܸܬܼܚܵܐ ܕܪܘܼܚܵܐ ܡ̇ܪܹܩ ܫܘܼܚܬܵܐ ܕܦܲܓܼܪܵܐ ܘܢܲܦܫܵܐ 98 ܘܲܚܠܵܦ ܡܸܕܼܪܵܐ ܩܵܢܹ̇ܝܢ ܓܵܘܢܵܐ ܕܲܫܡܲܝܵܢܹ̈ܐ ܀ pb. 344 99 :ܘܲܙܢܵܐ ܕܡܲܝܵ̈ܐ ܡܛܲܝܸܒܼ ܣܵܐܹ̇ܡ ܒܲܕܼܡܘܼܬܼ ܟܘܼܪܵܐ 100 ܘܐܲܟܸܿܢ ܩܵܪܹܒܼ ܘܓܼܵܠܹ̇ܐ ܚܲܝܠܵܐ ܕܐܘܼܡ̇ܢܘܼܬܹܗ ܀ 101 :ܢܲܚ̈ܬܹܿܐ ܦܐܲܝܵ̈ܐ ܡܟܲܣܸܐ ܦܲܓܼܪܹܗ ܒܲܪܵܢܵܐܝܼܬܼ 102 ܘܐܸܣܛܲܠ ܪܘܼܚܵܐ ܡܨܲܒܿܬܼܵܐ ܢܲܦܫܹܗ ܓܵܘܢܵܐܝܼܬܼ ܀ 103 :ܟܠܹܗ ܒܟܼܠܹܗ ܡܨܲܒܲܬܼ ܩܵܐܹ̇ܡ ܠܥܹܝܢ ܚܲܙܝܹ̈ܐ 104 ܕܲܒܼܝܲܕܼ ܨܸܒܼܬܹܿܗ ܢܸܓܼܠܹܐ ܠܐ̄ܢܵܫܵܐ ܥܲܠ ܕܲܥܬܼܝܼ̈ܕܼܵܢ ܀ 105 :ܐܲܝܟ ܡܲܚܙܝܼܬܼܵܐ ܗܵܘܹ̇ܐ ܠܥܲܝܢܹ̈ܐ ܕܲܟܼܢܵܘܵܬܹ̈ܗ 106 ܕܲܢܚܘܼܪܘܼܢ ܒܹܗ ܘܢܸܩܢܘܿܢ ܣܲܒܼܪܵܐ ܠܡܸܫܬܲܒܵܚܘܼ ܀ 107 :ܢܝܼܫܵܐ ܣܵܐܹ̇ܡ ܩܕܼܵܡ ܥܲܝܢܲܝ̈ܗܘܿܢ ܒܢܲܚ̈ܬܹܿܐ ܕܲܥܠܵܘܗܝ 108 ܕܢܸܗܘܘܿܢ ܚܵܢܹ̇ܝܢ ܠܡܸܨܛܲܒܵܬܼܘܼ ܪܘܼܚܵܢܵܐܝܼܬܼ ܀ 109 :ܗܵܕܹܐ ܡܲܠܸܦ ܒܝܲܕܼ ܬܲܨܒܿܝܼܬܼܵܐ ܕܥܲܠ ܗܲܕܵܡ̇ܘ̈ܗܝ 110 ܕܫܘܼܒܼܚܵܐ ܡܲܠܒܸܿܫ ܐ̄ܪܵܙܵܐ ܕܒܼܐܝܼܕܵܘ̈ܗܝ ܠܲܕܼܩܵܪܹܒܼ ܠܹܗ ܀ 111 :ܒܐܝܼܕܵܘ̈ܗܝ ܣܝܼܡܵܐ ܣܝܼܡܲܬܼ ܚܲܝܹ̈ܐ ܕܟܲܣܝܵܐ ܒܡܲܝܵ̈ܐ 112 ܘܐܸܠܵܐ ܩܵܪܹ̇ܒܼ ܘܲܡܦܲܠܸܓܼ ܠܵܗ̇ ܠܵܐ ܡܸܬܼܝܲܗ̄ܒܵܐ ܀ 113 :ܩܠܝܼܕܼܵܐ ܕܡܸܠ̣ܬܹܗ ܡ̇ܘܫܸܛ ܦܵܬ̇ܲܚ ܬܪܲܥ ܡܵܘܗܲܒܼܬܼܵܐ 114 ܘܲܒܼܒܲܪܬܼ ܩܵܠܹܗ ܡܦܲܠܸܓܼ ܕܵܫܢܹ̈ܐ ܠܥܲܒܼܕܲܝ̇ ܡܲܠܟܿܐ ܀ 115 :ܐܲܝܟ ܕܥܲܠ ܝܲܡܵܐ ܩܵܐܹ̇ܡ ܐܵܦ ܗܘ̤ ܒܲܕܼܡܘܼܬܼ ܡܘܼܫܹܐ 116 ܘܲܚܠܵܦ ܚܘܼܛܪܵܐ ܡܪܝܼܡ ܒܲܪܬܼ ܩܵܠܹܗ ܥܲܠ ܫܲܬܿܝܼܩܹ̈ܐ ܀ 117 :ܒܡܸܠܲܬܼ ܦܘܼܡܹܗ ܡ̇ܚܹ̇ܐ ܠܡܲܝܵ̈ܐ ܐܲܝܟ ܒܲܪ ܥܲܡܪܲܡ 118 ܘܨܵܝ̇ܬܿܝܼܢ ܩܵܠܹܗ ܛܵܒܼ ܡ̣ܢ ܩܵܠܹܗ ܕܒܲܪ ܥܵܒܼܪ̈ܵܝܹܐ ܀ 119 :ܠܡܘܼܫܹܐ ܫܲܡ̣ܥܘܼܗܝ ܟܲܕܼ ܛܵܒܼ ܫܲܡ̣ܥܘܼܗܝ ܠܵܐ ܐܸܬܼܩܲܕܲܫܘ 120 ܠܟܼܵܗܢܵܐ ܕܥܹܕܿܬܵܐ ܡܸܫܬܲܡܝܼܢ ܠܹܗ ܘܩܵܢܹ̇ܝܢ ܘܩܵܕܼܫܵܐ ܀ 121 :ܡܸܦܠܲܓܼ ܒܲܠܚܘܿܕܼ ܦܲܠܓܹܿܗ ܠܝܲܡܵܐ ܝܼܣܲܪܠܵܝܵܐ 122 ܘܥܵܘ̣ܠܵܐ ܕܥܲܡܹܗ ܠܵܐ ܣܦܲܩ̣ ܕܲܟܿܝܼ ܒܚܹܝܠ ܬܸܕܼܡܘܼܪܬܵܐ ܀ 123 :ܕܟܼܵܗܢܵܐ ܪܲܒܵܐ ܗ̄ܝܼ ܘܠܲܝܬܿ ܠܵܗ̇ ܦܸܚܡܵܐ ܒܐܲܝܠܹܝܢ ܕܲܗ̤ܘܲܝ̈ 124 ܕܝܵܗ̇ܒܵܐ ܚܲܝܠܵܐ ܕܫܘܼܒܼܩܵܢ ܥܵܘ̣ܠܵܐ ܠܠܵܐ ܪ̈ܵܓܼܘܿܫܹܐ ܀ 125 :ܨܹܝܕ ܗܵܘ̇ ܪܸܡܙܵܐ ܕܲܒܼܪ̣ܵܐ ܒܪܝܼܬܼܵܐ ܬܵܠܹ̇ܐ ܚܝܵܪܹܗ 126 ܘܡܸܢܹܗ ܝܵܠܹ̇ܦ ܕܠܲܝܟܲܢ ܢܸܒܼܪܸܐ ܒܪܝܼܬܼܵܐ ܚܕܲܬܵܐ ܀ 127 :ܒܗܵܘ̇ ܐܸܣܟܹܿܡܵܐ ܕܐܲܗܘܝܼ ܥܵܠܡܵܐ ܡܕܲܡܸܐ ܐܵܦ ܗܘ̤ 128 ܘܡܲܫܡܲܥ ܩܵܠܵܐ ܐܲܝܟ ܗܵܘ̇ ܕܲܩܥ̣ܵܐ ܒܪܵܫܝܼܬܼ ܒܐܲܪܥܵܐ ܀ 129 :ܐܲܝܟ ܒܵܪܘܿܝܵܐ ܦܲܩܹ̇ܕܼ ܐܵܦ ܗܘ̤ ܠܡܲܝܵ̈ܐ ܫܚܝܼܡܹܐ 130 ܘܲܚܠܵܦ ܢܘܼܗܪܵܐ ܕܵܢܲܚ̇ ܡܸܢܗܘܿܢ ܚܹܝܠ ܚܲܝܘܼܬܼܵܐ ܀ 131 :ܩܵܠ ܒܵܪܘܿܝܵܐ ܒܪ̣ܵܐ ܢܲܗܝܼܪܹ̈ܐ ܡ̣ܢ ܠܵܐ ܡܸܕܼܿܡ 132 ܘܗܘ̤ ܡ̣ܢ ܡܸܕܸܿܡ ܒܵܪܹܐ ܡܸܕܸܿܡ ܒܚܹܝܠ ܒܵܪܘܿܝܵܐ ܀ 133 :ܠܵܐ ܕܝܼܠܹܗ ܗ̄ܝܼ ܒܪܝܼܬܼܵܐ ܕܒܼܵܪܹܐ ܒܥܘܼܒܵܐ ܕܡܲܝ̈ܵܐ 134 ܐܸܠܵܐ ܕܪܸܡܙܵܐ ܕܲܒܼܪܵܐ ܒܪܝܼܬܼܵܐ ܡ̣ܢ ܠܵܐ ܡܸܕܸܿܡ ܀ 135 ܗܵܘ̇ ܦܘܼܩܕܵܢܵܐ ܕܐܸܡ݂ܲܪ ܘܲܗܘ̤ܵܘ ܡܠܝܼܠܹ̈ܐ ܘܚܲܪ̈ܫܹܐ: pb. 345 136 ܗܘ̤ ܦܵܩܹ̇ܕܼ ܒܹܗ ܘܗܵܘܹ̇ܝܢ ܐ̄ܢܵܫܵܐ ܗܘܵܝܵܐ ܚܲܕܼܬܼܵܐ ܀ 137 :ܗܵܝ̇ ܒܲܪܬܼ ܩܵܠܵܐ ܕܲܫܡ݂ܲܥܘ ܡܲܝܵ̈ܐ ܘܐܵܘܠܸܕܼܘ ܪ̈ܲܚܫܵܐ 138 ܗ̤ܝ ܗܵܝ̇ ܫܵܡ̇ܥܝܼܢ ܡ̣ܢ ܦܘܼܡ ܟܵܗܢܵܐ ܘܝܵܠ̇ܕܿܝܼܢ ܐ̄ܢܵܫܵܐ ܀ 139 :ܪܲܒܿܘܼ ܝܲܠܕܵܐ ܕܡܲܦܪܹܝܢ ܗܵܫܵܐ ܝܲܬܿܝܼܪ ܡ̣ܢ ܗܵܘ̇ 140 ܟܡܵܐ ܕܲܡܝܲܬܲܪ ܐ̄ܢܵܫܵܐ ܡܠܝܼܠܵܐ ܡ̣ܢ ܫܲܬܿܝܼܩܵܐ ܀ 141 :ܒܲܕܿܡܘܼܬܼ ܙܲܪܥܵܐ ܡܲܪܡܸܐ ܡܸܠܬܹܗ ܒܥܘܼܒܵܐ ܕܡܲܝܵ̈ܐ 142 ܘܒܼܵܛ̇ܢܝܼܢ ܘܝܵܠ̇ܕܿܝܼܢ ܝܲܠܕܵܐ ܚܲܕܼܬܼܵܐ ܕܠܵܐ ܒܲܥܝܵܕܵܐ ܀ 143 :ܩܵܠܹ̈ܐ ܕܪܘܼܚܵܐ ܡܬܲܪܓܸܿܡ ܦܘܼܡܹܗ ܥܲܡ ܫܲܬܿܝܼܩܵܐ 144 ܘܩܵܢܹ̇ܝܢ ܚܲܝܠܵܐ ܠܡܸܬܲܠ ܚܲܝܹ̈ܐ ܠܲܡܠܝܼܠܘܼܬܼܵܐ ܀ 145 :ܠܸܥܙܵܐ ܚܲܕܼܬܼܵܐ ܨܵܝ̇ܬܿܝܼܢ ܚܲܪ̈ܫܹܐ ܡ̣ܢ ܡܲܠܵܠܹ̈ܐ 146 :ܐܲܝܟ ܗܵܘ̇ ܠܸܥܙܵܐ ܕܫܸܡܥܲܬ̤ ܡܲܪܝܼܡ ܡ̣ܢ ܓܲܒܼܪܝܹܠ 147 :ܘܒܲܪܬܼܵܐ ܛܵܒܼܬܼܵܐ ܡܲܦܸܠ ܐܵܦ ܗܘ̤ ܒܐܸܕܼܢܲܝ̈ ܐ̄ܢܵܫܵܐ 148 ܐܲܝܟ ܗܵܘ̇ ܣܲܒܼܪܵܐ ܕܐܲܟܼܪܸܙ ܥܝܼܪܵܐ ܒܝܲܠܕܹܿܗ ܕܲܒܼܪܵܐ ܀ 149 :ܒܕܼܘܼܟܲܬܼ ܥܝܼܪܵܐ ܡܡܲܠܸܐ ܒܛܲܟܼܣܹܗ ܘܛܵܒܼ ܡ̣ܢ ܥܝܼܪܵܐ 150 ܕܡܲܩܢܹܐ ܣܲܒܼܪܵܐ ܠܲܕܼܠܵܐ ܣܲܒܼܪܵܐ ܒܩܵܠ ܦܸܬܼܓܼܵܡܵܘ̈ܗܝ ܀ 151 :ܒܹܝܬܼ ܐܝܼܬܼܘܼܬܼܵܐ ܠܲܒܼܢܲܝ̈ܢܵܫܵܐ ܡܡܲܨܥ ܩܵܐܹ̇ܡ 152 ܘܲܒܼܝܲܕܼ ܡܸܠܵܘ̈ܗܝ ܡܫܲܪܲܪ ܬܸܢܘܲܝ ܕܲܬܼܪܹܝܢ ܓܲܒܹ̈ܐ ܀ 153 :ܡܦܝܼܣ ܒܲܚܢܲܓܼܬܼܵܐ ܠܟܲܣܝܵܐ ܕܲܟܼܣܸܐ ܘܲܓܼܠܸܐ ܒܚܘܼܒܹܿܗ 154 ܘܢܵܚܹ̇ܝܬܼ ܨܹܐܕܵܘܗܝ ܚܲܝܠܵܐ ܕܡܸܢܹܗ ܘܓܼܵܡܲ݁ܪ ܡܸܠܵܘ̈ܗܝ ܀ 155 :ܒܫܸܡ ܐܝܼܬܼܘܼܬܼܵܐ ܫܡܵܗܹ̈ܐ ܬܠܵܬܼܵܐ ܡܩܲܕܸܿܫ ܡܲܝ̈ܵܐ 156 ܕܢܸܗܘܘܿܢ ܣܵܦ̇ܩܝܼܢ ܠܲܓܼܡܝܼܪܘܼܬܼܵܐ ܕܕܼܘܼܟܵܝ ܛܲܡ̈ܐܹܐ ܀ 157 :ܛܲܡܐܝܼܬܼ ܐ̄ܢܵܫܵܐ ܡܕܲܟܸܿܐ ܒܡܲܝ̈ܵܐ ܠܵܐ ܗ̄ܘ̣ܵܐ ܒܡܲܝ̈ܵܐ 158 ܐܸܠܵܐ ܒܚܲܝܠܵܐ ܕܫܸܡ ܐܝܼܬܼܘܼܬܼܵܐ ܕܡܲܓܸܿܢ ܬܲܡ̇ܢ ܀ 159 :ܚܹܝܠ ܐܝܼܬܼܘܼܬܼܵܐ ܫܵܪܹܐ ܒܡܲܝܵ̈ܐ ܡܸܬܼܚܲܙܝܵܢܹ̈ܐ 160 ܘܲܒܼܚܹܝܠ ܚܲܝܠܹܗ ܡܫܲܗܹܝܢ ܬܘܼܩܦܵܐ ܕܒܼܝܼܫܵܐ ܘܡ̇ܘܬܵܐ ܀ 161 :ܒܝܼܫܵܐ ܘܡ̇ܘܬܵܐ ܡܸܬܼܒܲܛܠܝܼܢ ܒܵܗ̇ ܒܡܲܥܡܘܿܕܼܝܼܬܼܵܐ 162 ܘܢܘܼܚܵܡ ܦܲܓܼܪܵܐ ܘܦܘܼܪܩܵܢ ܢܲܦܫܵܐ ܡܸܬܼܟܲܪܙܝܼܢ ܒܵܗ̇ ܀ 163 :ܐܲܝܟ ܕܲܒܼܩܲܒܼܪܵܐ ܡܸܬܼܩܲܒܼܪܝܼܢ ܒܵܗ̇ ܦܲܓܼܪܵܐ ܘܢܲܦܫܵܐ 164 ܘܡܵܝ̇ܬܿܝܼܢ ܘܚܵܐܹ̇ܝܢ ܒܐ̄̈ܪܵܙ ܢܘܼܚܡܵܐ ܕܗܵܘܹ̇ܐ ܒܚܲܪܬܼܵܐ ܀ 165 :ܛܲܟܼܣܵܐ ܕܩܲܒܼܪܵܐ ܡܡܲܠܝܵܐ ܠܐ̄ܢܵܫܵܐ ܐ̄ܪܵܙܵܢܵܐܝܼܬܼ 166 ܘܩܵܠ ܟܵܗܢܘܼܬܼܵܐ ܐܲܝܟ ܩܵܠ ܩܲܪܢܵܐ ܕܲܒܼܫܘܼܠܵܡܵܐ ܀ 167 :ܒܩܲܒܼܪܵܐ ܕܡܲܝܵ̈ܐ ܩܵܒܲ݁ܪ ܟܵܗܢܵܐ ܠܟܼܠܹܗ ܐ̄ܢܵܫܵܐ 168 ܘܲܡܢܲܚܸܡ ܠܹܗ ܒܚܹܝܠ ܚܲܝܘܼܬܼܵܐ ܟܲܟܼܣܸܐ ܒܡܸܠܵܘ̈ܗܝ ܀ 169 :ܒܲܬܼܪܵܥ ܩܲܒܼܪܵܐ ܕܡܲܥܡܘܿܕܼܝܼܬܼܵܐ ܡܙܲܝܲܢ ܩܵܐܹ̇ܡ 170 ܘܓܼܵܡܲ݁ܪ ܬܲܡܵܢ ܐ̄ܪܵܙܵܐ ܕܡܵܘܬܵܐ ܘܲܕܼܢܘܼܚܵܡܵܐ ܀ 171 ܒܩܵܠܵܐ ܓܼܠܝܵܐ ܡܲܟܼܪܸܙ ܚܲܝܠܵܐ ܕܐܲܝܕܼܵܐ ܕܣܵܥܲ݁ܪ: pb. 346 172 ܕܐܲܝܟܲܢ ܡ̇ܐܹ̇ܬܼ ܐ̄ܢܵܫܵܐ ܒܡܲܝ̈ܵܐ ܘܗܵܦܹ̄ܝܟ ܚܲܝܹ̇ܐ ܀ 173 :ܡܸܓܼܠܵܐ ܓܵܠܹ̇ܐ ܘܲܡܚܵܘܸܐ ܠܹܗ ܠܐܲܝܢܵܐ ܕܥܵܡܹ̇ܕܼ 174 ܕܲܒܼܫܸܡ ܡܲܢ̣ܘܼ ܡ̇ܐܹ̇ܬܼ ܘܚܵܝܹ̇ܐ ܩܲܠܝܼܠܵܐܝܼܬܼ ܀ 175 :ܫܸܡ ܐܝܼܬܼܘܼܬܼܵܐ ܡܲܕܼܟܲܪ ܘܐܵܡܲ݁ܪ ܬܠܵܬܼ ܙܲܒܼ̈ܢܵܬܼܵܐ 176 ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܚܕܼܵܐ ܫܲܘܝܘܼܬܼܵܐ ܀ 177 :ܫܡܵܗܹ̈ܐ ܬܵܢܹ̇ܐ ܩܵܠܵܐ ܓܲܠܝܵܐ ܘܐܵܡܲ݁ܪ ܗܵܟܲܢ 178 ܕܲܦܠܵܢ ܥܵܡܹ̇ܕ ܒܲܫܡܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܀ 179 :ܠܵܐ ܕܹܝܢ ܐܲܡܲ݁ܪ ܕܐ̄ܢܵܐ ܡܲܥܡܸܕܼ ܐ̄ܢܵܐ ܐܸܠܵܐ ܕܥܵܡܹ̇ܕܼ 180 ܕܠܵܘ ܗܘ̤ ܡܲܥܡܸܕܼ ܐܸܝܠܵܐ ܕܣܝܼܡ ܒܲܫܡܵܗܹ̈ܐ ܀ 181 :ܫܡܵܗܹ̈ܐ ܝܵܗ̇ܒܿܝܼܢ ܫܘܼܒܼܩܵܢ ܥܵܘ̣ܠܵܐ ܠܵܘ ܒܲܪܢܵܫܵܐ 182 ܘܗܸܢܘ̣ܿܢ ܙܵܪܥܝܼܢ ܚܲܝܹ̈ܐ ܚܲܕܼ̈ܬܹܐ ܒܡܵܝܘܿܬܼܘܼܬܼܵܐ ܀ 183 :ܒܫܸܡܗܘܿܢ ܥܵܡܹ̇ܕܼ ܐܲܝܢܵܐ ܕܥܵܡܹ̇ܕܼ ܐܲܝܟ ܕܲܒܼܩܲܒܼܪܵܐ 184 ܘܗܸܢܘ̣ܿܢ ܩܵܪܹܝܢ ܘܲܡܩܝܼܡܝܼܢ ܠܹܗ ܡ̣ܢ ܡܝܼܬܼܘܼܬܹܗ ܀ 185 :ܬܠܵܬܼ ܙܲܒܼ̈ܢܵܬܼܵܐ ܡܲܪܟܸܿܢ ܪܹܫܹܗ ܒܲܫܡܵܗܲܝ̈ܗܘܿܢ 186 ܕܢܹܐܠܲܦ ܛܲܟܼܣܵܐ ܕܟܲܕܼ ܐܸܢܘܿܢ ܬܠܵܬܼܵܐ ܐܸܢܘܿܢ ܀ 187 :ܒܐ̄ܪܵܙ ܦܵܪܘܿܩܲܢ ܗܵܘܹ̇ܐ ܥܘܼܒܵܐ ܕܡܲܥܡܘܿܕܝܼܬܼܵܐ 188 ܒܗܵܘ̇ ܐܸܣܟܹܿܝܡܵܐ ܕܝܵܘܡܹ̈ܐ ܬܠܵܬܼܵܐ ܕܲܒܼܓܼܵܘ ܩܲܒܼܪܵܐ ܀ 189 :ܬܠܵܬܼܵܐ ܝܵܘ̈ܡܝܼܢ ܗܘ̤ܵܐ ܦܵܪܘܿܩܲܢ ܒܹܝܬܼ ܥܲܢܝܼ̈ܕܹܐ 190 ܐܵܦ ܥܵܡ̇ܘܿܕܼܵܐ ܬܠܵܬܼ ܙܲܒܼ̈ܢܵܬܼܵܐ ܬܠܵܬܼܵܐ ܝܵܘ̈ܡܝܼܢ ܀ 191 :ܡܡܵܬܼ ܗ̄ܘ̣ ܡ̇ܐܹ̇ܬܼ ܒܐ̄ܪܵܙ ܗܵܘ̇ ܡ̇ܘܬܵܐ ܕܡܝܼܬܼ ܡܲܚܸܐ ܟܠ 192 ܘܡܸܚܵܐ ܚܵܝܹ̇ܐ ܒܐܸܣܟܹܿܝܡ ܚܲܝܹ̈ܐ ܕܠܵܐ ܫܘܼܠܵܡܵܐ ܀ 193 :ܚܛܝܼܬܼܵܐ ܘܡ̇ܘܬܵܐ ܫܵܠܲ݁ܚ ܫܵܕܹ̇ܐ ܒܡܲܥܡܘܿܕܝܼܬܼܵܐ 194 ܒܐܸܣܟܹܿܝܡ ܢܲܚ̈ܬܹܿܐ ܕܐܲܪܦܝܼ ܡ̇ܪܲܢ ܒܩܲܒܼܪܵܐ ܘܲܢܦܲܩ̣ ܀ 195 :ܒܲܕܼܡܘܼܬܼ ܥܘܸܠܵܐ ܡ̣ܢ ܓܵܘ ܟܲܪܣܵܐ ܡܕܼܝܼܩ ܡ̣ܢ ܡܲܝܵ̈ܐ 196 ܘܲܚܠܵܦ ܢܲܚ̈ܬܹܿܐ ܡܩܲܒܸܿܠ ܗܵܟܢܵܐ ܘܲܡܥܲܦܸܩ ܠܹܗ ܀ 197 :ܠܥܘܸܠܵܐ ܕܵܡܹ̇ܐ ܟܲܕܼ ܡܸܬܼܥܲܠܸܐ ܡ̣ܢ ܓܵܘ ܡܲܝ̈ܵܐ 198 ܘܐܲܝܟ ܕܲܠܥܘܸܠܵܐ ܡܥܲܦܸܩ ܟܠܢܵܫ ܠܹܗ ܀ 199 :ܓܠܵܦ ܥܲܙܪܘܼܪܹ̈ܐ ܡܲܪܡܹܝܢ ܢܲܚ̈ܬܹܿܐ ܥܲܠ ܗܲܕܵܡܵܘ̈ܗܝ 200 ܘܲܡܨܲܒܿܬܼܝܼܢ ܠܹܗ ܐܲܝܟ ܕܲܠܚܲܬܼܢܵܐ ܒܝܘܿܡ ܡܸܫܬܿܘܼܬܼܵܐ ܀ 201 :ܙܢܲܝ̈ ܡܸܫܬܿܘܼܬܼܵܐ ܡܡܲܠܸܐ ܐܵܦ ܗܘ̤ ܒܡܲܥܡܘܿܕܼܝܼܬܼܵܐ 202 ܘܲܒܼܬܲܨܒܿܝܼܬܹܗ ܨܵܐܲܪ ܫܘܼܒܼܚܵܐ ܕܲܡܛܲܝܲܒܼ ܠܹܗ ܀ 203 :ܒܦܲܐܝܘܼܬܼ ܢܲܚܬܵܘ̈ܗܝ ܥܲܠ ܦܲܐܝܘܼܬܼܵܐ ܕܲܠܗܲܠ ܡܲܟܼܪܸܙ 204 ܗܵܪܟܵܐ ܐ̄ܪܵܙܵܐ ܘܬܲܡܵܢ ܩܘܼܫܬܵܐ ܕܠܵܐ ܡܸܬܿܕܼܿܓܲܠ ܀ pb. 347 205 :ܠܡܲܠܟܿܘܼܬܼ ܪܵܘܡ̇ܐ ܕܠܵܐ ܡܸܫܬܲܪܝܵܐ ܡܙܲܡܲܢ ܘܲܩܪܸܐ 206 ܘܲܕܫܲܪܝܼܪܵܐ ܡܩܲܕܸܿܡ ܨܵܐܲܪ ܐ̄ܪܵܙ ܒܘܼܕܵܩܵܗ̇ ܀ 207 :ܒܐ̄ܪܵܙ ܗܵܘ̇ ܫܘܼܒܼܚܵܐ ܕܠܵܐ ܡܸܬܼܚܲܒܲܠ ܠܵܒܹ̇ܫ ܢܲܚ̈ܬܹܿܐ 208 ܕܢܸܗܘܸܐ ܡܕܲܡܸܐ ܐ̄ܪܵܙܵܢܵܐܝܼܬܼ ܒܲܥܬܼܝܼ̈ܕܼܵܬܼܵܐ ܀ 209 :ܒܐ̄ܪܵܙܵܐ ܡ̇ܐܹ̇ܬܼ ܐܵܦ ܡܸܬܼܢܲܚܲܡ ܐܵܦ ܡܸܨܛܲܒܲܬܼ 210 ܘܐ̄ܪܵܙܵܢܵܐܝܼܬܼ ܡܕܲܡܸܐ ܒܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 211 :ܐ̄ܪܵܙܵܐ ܗ̄ܘ̣ ܝܲܠܕܹܿܗ ܕܗܵܘ̇ ܡ̇ܘܠܵܕܵܐ ܕܗܵܘܹ̇ܐ ܒܚܲܪܬܵܐ 212 ܘܕܘܼܒܵܪ ܚܲܝܵܘ̈ܗܝ ܕܗܵܘ̇ ܗܘܼܦܵܟܼܵܐ ܕܡܲܠܟܿܘܼܬܼ ܪܵܘܡ̇ܐ ܀ 213 :ܒܐܘܼܪܚܵܐ ܕܚܲܝܹ̈ܐ ܪ̈ܘܼܚܵܢܝܹܐ ܡܫܲܪܸܐ ܕܢܸܪܕܸܿܐ 214 ܘܐܲܝܟ ܪ̈ܘܼܚܵܢܹܐ ܚܵܝܹ̇ܐ ܒܐܘܼܟܼܠܵܐ ܪܘܼܚܵܢܵܝܵܐ ܀ 215 :ܪܘܼܚܵܢܵܐܝܼܬܼ ܗܵܘܹ̇ܐ ܝܲܠܕܹܿܗ ܐ̄ܪܵܙܵܢܵܝܵܐ 216 ܘܠܲܦܘܼܬܼ ܝܲܠܕܹܿܗ ܐܵܦ ܬܘܼܪܣܵܝܵܐ ܕܲܡܛܲܝܲܒܼ ܠܹܗ ܀ 217 :ܚܲܕܬܼܵܐ ܗ̄ܘ̣ ܝܲܠܕܹܿܗ ܘܢܘܼܟܼܪܵܝ ܣܲܓܿܝܼ ܠܐܲܪ̈ܥܵܢܵܝܹܐ 218 ܘܠܲܝܬܿ ܡܲܬܼܩܵܠܵܐ ܠܪܲܒܿܘܼܬܼ ܐܘܼܟܼܠܵܐ ܕܡܸܬܿܬܲܪܣܸܐ ܒܹܗ ܀ 219 :ܒܲܕܼܡܘܼܬܼ ܚܲܠܒܼܵܐ ܝܵܢܹ̇ܩ ܐ̄̈ܪ̈ܵܙܹܐ ܐܲܠܵܗܵܝܹ̈ܐ 220 ܘܲܡܕܲܪܓܼܝܼܢ ܠܹܗ ܐܲܝܟ ܝܲܠܘܼܕܵܐ ܠܘܵܬܼ ܕܲܥܬܼܝܼ̈ܕܼܵܢ ܀ 221 :ܐܸܡ̇ܐ ܕܪܘܼܚܵܐ ܡܛܲܝܼܒܼܵܐ ܠܚܲܝܵܘ̈ܗܝ ܚܲܠܒܼܵܐ ܕܪܘܼܚܵܐ 222 ܘܲܚܠܵܦ ܬܕܲܝܵ̈ܐ ܣܵܝ̇ܡܵܐ ܒܦܘܼܡܹܗ ܦܲܓܼܪܵܐ ܘܲܕܡ̇ܐ ܀ 223 :ܒܦܲܓܼܪܵܐ ܘܲܕܡ̇ܐ ܡܲܚܝܵܐ ܥܹܕܿܬܵܐ ܠܲܒܼܢܲܝ̈ ܟܲܪܣܵܗ̇ 224 ܘܲܡܥܲܗܕܼܵܐ ܠܗܘܿܢ ܚܘܼܒܵܐ ܪܲܒܵܐ ܕܲܡܟܼܝܼܪܘܼܬܼܵܗ̇ ܀ 225 :ܡܟܼܝܼܪܵܗ̇ ܝܲܗ̣̄ܒܼ ܠܵܗ̇ ܦܲܓܼܪܹܗ ܘܲܕܼܡܹܗ ܪܲܗܒܼܘܿܢ ܚܲܝܹ̈ܐ 226 ܕܬܸܩܢܸܐ ܚܲܝܠܵܐ ܠܡܸܬܲܠ ܚܲܝܹ̈ܐ ܡ̣ܢ ܚܲܝܘܼܬܼܵܗ̇ ܀ 227 :ܗܘ̤ ܒܲܕܸܿܩ ܠܵܗ̇ ܕܒܼܐܘܼܟܼܠܵܐ ܕܦܲܓܼܪܹܗ ܡܲܚܸܐ ܠܝܲܠܕܲܝ̈ܗ̇ 228 ܒܝܲܕܼ ܦܸܵܠ̈ܐܵܬܼܵܐ ܕܩܲܕܼܿܡ ܪܲܟܹܒܼ ܐ̈ܪܵܙܵܢܵܐܝܼܬܼ ܀ 229 :ܬܵܘܪܵܐ ܕܦܸܛܡܵܐ ܟܲܢܹܝܗ ܠܕܼܒܼܚܵܐ ܕܦܲܓܼܪܵܢܘܼܬܹܗ 230 ܘܩܲܕܸܿܡ ܕܲܒܼܚܹܗ ܒܝܲܕܼ ܦܘܼܢܵܝܵܐ ܕܚܲܕܼ ܡ̣ܢ ܝܲܠܕܹܿܝ̈ܗ̇ ܀ 231 :ܒܝܲܠܕܹܿܝܹ̈ܗ̇ ܫܸܠܡܲܬ̤ ܗܵܝ̇ ܕܲܟܼܝܼܒܼܵܐ ܒܫܲܪܒܹܿܗ ܕܛܵܥ̇ܝܵܐ 232 ܕܲܢܦܲܩ̣ ܚܘܼܒܹܿܗ ܘܩܲܒܸܿܠ ܐܸܢܘܿܢ ܒܡܲܥܡܘܿܕܝܼܬܼܵܐ ܀ 233 :ܒܚܘܼܒܵܐ ܘܪ̈ܲܚܡܹܐ ܢܦܲܩ̣ ܠܘܼܩܒܲܠܗܘܿܢ ܘܩܲܒܸܿܠ ܐܸܢܘܿܢ 234 ܘܥܲܦܸܩ ܐܸܢܘܿܢ ܐܲܝܟ ܕܲܠܡܝܼܬܹ̈ܐ ܕܲܦܢ̣ܵܘ ܘܲܚ̣ܝܵܘ ܀ 235 :ܚܹܝܠ ܦܸܠ̈ܐܵܬܹܗ ܦܲܫܸܩ ܘܲܓܼܠܵܐ ܩܕܼܵܡ ܥܲܝܢܲܝ̈ܗܘܿܢ 236 ܘܚܲܕܿܝܼ ܐܸܢܘܿܢ ܒܐܘܼܟܼܠܵܐ ܘܫܸܩܝܵܐ ܪܘܼܚܵܢܵܝܵܐ ܀ pb. 348 237 :ܝܲܗ̣̄ܒܼ ܪܲܗܒܼܘܿܢܵܐ ܥܙܲܩܬܼܵܐ ܕܐܸܡ݂ܲܪ ܚܲܝܠܵ ܕܪܘܼܚܵܐ 238 ܘܐܲܠܒܸܿܫ ܐܸܢܘܿܢ ܐܸܣܛܲܠ ܫܘܼܒܼܚܵܐ ܕܡܲܥܡܘܿܕܼܝܼܬܼܵܐ ܀ 239 :ܕܒܲܚ̣ ܠܲܩܢܘܿܡܹܗ ܕܲܡܦܲܛܲܩ ܗ̄ܘ̣ܵܐ ܪܘܚܵܢܵܐܝܼܬܼ 240 ܘܐܵܘܟܸܿܠ ܐܸܢܘܿܢ ܐܘܼܟܼܠܵܐ ܕܲܟܼܣܹܝܢ ܚܲܝܹ̈ܐ ܒܐܘܼܟܠܹܗ ܀ 241 :ܐܲܣܐܸܢ ܐܸܢܘܿܢ ܪܲܗܛܵܐ ܛܵܒܼܵܐ ܕܕܸܘܼܒܵܪ ܚܲܝܹ̈ܐ 242 ܕܠܵܐ ܢܸܬܿܬܲܩܠܘܼܢ ܒܲܫܒܼܝܼܠ ܙܹܐܦܵܐ ܕܡ̇ܝܘܿܬܼܘܼܬܼܵܐ ܀ 243 :ܙܲܡܸܢ ܘܲܩ̣ܪܵܐ ܠܲܫܡܲܝܵܢܹ̈ܐ ܒܝܘܿܡ ܚܘܼܕܵܬܼܗܘܿܢ 244 ܘܐܲܦܨܲܚ ܐܸܢܘܿܢ ܕܲܟܼܡܝܼܪܝܼܢ ܗ̄ܘ̣ܵܐ ܥܲܠ ܚܵܘܒܲܝ̈ܗܘܿܢ ܀ 245 :ܟܲܪܣܵܐ ܕܡܲܝܵ̈ܐ ܝܸܠܕܲܬ̤ ܐܸܢܘܿܢ ܪܘܼܚܵܢܵܐܝܼܬܼ 246 ܘܚܹܝܠ ܛܲܝܒܿܘܼܬܹܗ ܫܲܡܠܝܼ ܘܲܓܼܡܲܪ ܣܘܼܢܩܵܢܲܝ̈ܗܘܿܢ ܀ 247 :ܥܝܼܪܹ̈ܐ ܘܐ̄ܢܵܫܵܐ ܚܕܝܼܘ ܐܵܦ ܚܵ̇ܕܹܝܢ ܒܲܬܼܝܵܒܼܘܼܬܼܗܘܿܢ 248 ܕܲܢܩܸܦܘ ܡܸܠܹ̈ܐ ܕܲܒܼܦܵܠ̈ܐܵܬܼܵܐ ܠܘܵܬܼ ܣܘܼܥܪ݁ܵܢܹܐ ܀ 249 :ܫܡܲܝܵܐ ܘܐܲܪܥܵܐ ܦܨܝܼܚܝܼܢ ܕܲܦܢ̣ܵܘ ܠܵܘܬܼ ܐܲܒܼܗܘܿܢ 250 ܘܐܸܚܲܕܼܘ ܢܘܼܡܹܐ ܕܡܲܪ̈ܵܗܵܛܲܝܗܘܿܢ ܕܲܒܼܙܝܼܙܝܼܢ ܗ̄ܘ̣ܵܐ ܀ 251 :ܫܹܐܕܹ̈ܐ ܒܲܙܘܼܗ̇ ܠܝܵܪܬܿܘܼܬܼ ܐ̄ܢܵܫܵܐ ܥܵܘ̇ܠܵܐܝܼܬܼ 252 ܘܩܵܡ̣ ܚܲܕܼ ܐ̄ܢܵܫܵܐ ܘܐܸܡ݂ܲܪ ܕܝܼܢܵܐ ܘܦܲܪܣܝܼ ܐܸܢܘܿܢ ܀ 253 :ܕܝܼܢܵܐ ܟܹܐܢܵܐ ܐܸܡ݂ܲܪ ܥܲܡܗܘܿܢ ܕܢܲܟܿܘܼܠܬܼܵܢܹ̈ܐ 254 ܘܐܲܥܕܿܝܼ ܡܸܢܗܘܿܢ ܒܸܙܬܼܵܐ ܕܚܲܛ݂ܲܦ ܡ̣ܢ ܒܹܝܬܼ ܐܲܒܼܘܼܗܝ ܀ 255 :ܒܐܵܕܼܵܡ ܐܲܛܥܝܼ ܛܵܥ̇ܝܵܐ ܕܙܵܪܲܥ ܛܘܼܥܝܲܝ ܒܵܥܠܡܵܐ 256 ܘܛܲܢ ܒܲܪ ܐܵܕܼܵܡ ܘܲܬܼܒܲܥ ܨܲܥܪܵܐ ܕܟܼܠܹܗ ܓܸܢܣܹܗ ܀ 257 :ܛܢܵܢܵܐ ܪܲܒܵܐ ܠܒܸܫ̣ ܚܲܡܝܼܡܵܐ ܚܠܵܦ ܐܲܒܼܵܗܘ̈ܗܝ 258 ܘܩܲܒܸܿܠ ܕܢܡܘܼܬܼ ܘܠܵܐ ܕܢܸܬܼܟܲܢܘܿܢ ܥܲܒܼ̈ܕܹܿܐ ܕܒܼܝܼܫܹ̈ܐ ܀ 259 :ܐܲܝܟ ܐܲܬܼܠܹܝܛܵܐ ܢܚܸܬܼ ܠܐܵܓܼܘܿܢܵܐ ܕܲܚܠܵܦ ܥܲܡܹܗ 260 ܘܐܸܚܲܕܼ ܕܲܪܵܐ ܥܲܡ ܣܵܛܵܢܵܐ ܘܚ݂ܲܣܢܹܗ ܘܲܙܟܼܵܝ̣ܗܝ ܀ 261 :ܒܪܹܫ ܓܵܓܼܘܼܠܬܵܐ ܐܲܩܪܸܒܼ ܥܲܡܹܗ ܕܩܵܛܹ̇ܠ ܐ̄ܢܵܫܵܐ 262 ܘܥܲܒܼܕܹܿܗ ܓܘܼܚܟܵܐ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 263 :ܒܢܲܝܙܟܼܵܐ ܕܩܲܝܣܵܐ ܣܲܚܦܹܗ ܘܫܲܕܼܵܝܗܝ ܡ̣ܢ ܬܘܼܟܼܠܵܢܹܗ 264 ܒܗܵܘ̇ ܡܼܢ ܕܣܵܒܲ̇ܪ ܕܥܵܐܹ̇ܠ ܡ̇ܘܬܵܐ ܒܠ݂ܲܥ ܘܐܸܬܼܒܲܣܒܲܣ ܀ 265 :ܒܡܵܘܬܼܵܐ ܕܐ̄ܢܵܫܵܐ ܡܸܫܬܲܒܼܗܲܪ ܗ̄ܘ̣ܵܐ ܚܬܼܝܼܪ ܪܸܥܝܵܢܵܐ 266 ܘܲܒܼܝܲܕܼ ܡ̇ܘܬܵܐ ܕܚܲܕܼ ܒܲܪܢܵܫܵܐ ܒܛܸܠ ܫܘܼܒܼܗܵܪܹܗ ܀ 267 :ܚܲܕܼ ܒܲܪܢܵܫܵܐ ܡ̣ܝܼܬܼ ܒܲܙܩܝܼܦܵܐ ܚܠܵܦ ܡ̇ܝܘܿܬܹ̈ܐ 268 ܘܐܲܠܸܦ ܐܸܢܘܿܢ ܕܢܸܪܕܿܘܿܢ ܒܐܘܼܪܚܵܐ ܕܡ̇ܘܬܹܿܗ ܘܚܲܝܵܘ̈ܗܝ ܀ 269 :ܡ̇ܘܬܹܿܗ ܘܚܲܝܵܘ̈ܗܝ ܨܵܝ̇ܪܝܼܢ ܐ̄ܢܵܫܵܐ ܒܡܲܥܡܘܿܕܼܝܼܬܼܵܐ 270 ܘܡ̇ܐ ܕܡܝܼܬܼܘ ܥܲܡܹܗ ܩܵܡ̣ܘ ܘܐܸܬܼܢܲܚܲܡܘ ܐ̄ܪܵܙܵܢܵܐܝܼܬܼ ܀ 271 ܒܐܘܼܪܚܵܐ ܚܕܲܬܵܐ ܕܚܵܝܑܬܼ ܡܝܼܐܬܹ̈ܐ ܪܵܕܹܝܢ ܥܲܡܹܗ: pb. 349 272 ܘܲܒܼܕܼܘܼܒܵܪܹ̈ܐ ܕܲܫܡܲܝܵܢܹ̈ܐ ܡܕܲܡܹܝܢ ܒܐܲܪܥܵܐ ܀ 273 :ܒܐܘܼܟܼܠܵܐ ܕܦܲܓܼܪܹܗ ܛܵܪܕܿܝܼܢ ܡܵܘܬܵܐ ܡ̣ܢ ܦܲܓܼܪ̈ܲܝܗܘܿܢ 274 ܘܒܲܕܡܹܗ ܚܲܝܵܐ ܡܲܫܩܝܼܢ ܚܲܝܹ̈ܐ ܠܪܸ̈ܥܝܵܢܲܝܗܘܿܢ ܀ 275 :ܠܦܲܓܼܪܵܐ ܘܢܲܦܫܵܐ ܡܬܲܪܣܹܝܢ ܒܐܘܼܟܼܠܵܐ ܕܦܲܓܼܪܹܗ ܘܲܕܼܡܹܗ 276 ܘܲܠܣܵܛܵܢܵܐ ܘܡ̇ܘܬܵܐ ܙܵܟܹ̇ܝܢ ܒܚܹܝܠ ܡ̇ܘܗܲܒܼܬܹܗ ܀ 277 :ܒܚܹܝܠ ܡܵܘܗܲܒܼܬܹܗ ܣܚ̣ܵܘ ܘܐܸܬܼܩܲܕܲܫܘ ܡ̣ܢ ܚܵܘܒܲܝ̈ܗܘܿܢ 278 ܘܲܩ̣ܢܵܘ ܚܲܝܠܵܐ ܠܡܸܬܼܟܲܬܵܫܘܼ ܠܘܼܩܒܲܠ ܚܲܫܹ̈ܐ ܀ 279 :ܚܲܝܠܵܐ ܟܲܣܝܵܐ ܠܒܸܫ̣ܘ ܡ̣ܢ ܡܲܝ̈ܵܐ ܠܒܼܝܼܫܲܝ̈ ܚܲܫܹ̈ܐ 280 ܘܫܲܪܝܼܘ ܡܲܩܠܹܝܢ ܠܲܡܕܼܵܫ ܚܲܝܠܹܗ ܕܲܒܼܥܸܠܕܲܪܵܐ ܀ 281 :ܐܲܝܟ ܐܲܬܼܠܹܝܛܹ̈ܐ ܣܠܸܩ̣ܘ ܡ̣ܢ ܘܲܙܢܵܐ ܕܡܲܥܡܘܿܕܼܝܼܬܼܵܐ 282 ܘܩܲܒܸܿܠܘ ܐܸܢܘܿܢ ܥܝܼܪܹ݁ܐ ܘܐ̄ܢܵܫܵܐ ܚܘܼܒܵܢܵܐܝܼܬܼ ܀ 283 :ܩܵܠ ܙܵܟܼܘܼܬܼܗܘܿܢ ܩ̣ܥܵܘ ܐܲܪ̈ܥܵܢܹܐ ܘܲܫܡܲܝܵܢܹ̈ܐ 284 ܘܫܲܡ݂ܲܥܘ ܫܹܐܕܹ̈ܐ ܘܙܵܥ̣ܘ ܘܐܸܬܼܒܲܠܗܝܼܘ ܒܩܵܠܵܐ ܚܲܕܼܬܼܵܐ ܀ 285 :ܟܠܝܼܠܹ̈ܐ ܓܕܲܠܘ ܠܗܘܿܢ ܪܵܘܡ̇ܐ ܘܥܘܼܡܩܵܐ ܒܐܝܼܕܼܵܐ ܕܐ̄ܢܵܫܵܐ 286 ܕܲܚܙ̣ܵܘ ܕܲܙܟܼܵܘ ܩܪܵܒܼܵܐ ܪܲܒܵܐ ܥܲܡ ܚܲܣܝܼܢܵܐ ܀ 287 :ܕܵܫܢܹ̈ܐ ܕܪܵܡܝܼܢ ܡ̣ܢ ܥܲܡܠܲܝ̈ܗܘܿܢ ܢܣ݂ܲܒܼܘ ܡ̣ܢ ܡܲܠܟܵܐ 288 ܘܲܫܒܼܝܼܚܵܐܝܼܬܼ ܝܲܩܲܪ ܐܸܢܘܿܢ ܠܥܸܠ ܡ̣ܢ ܚܲܝܠܵܐ ܀ 289 :ܒܓܼܵܘ ܦܵܠܵܛܝܼܢ ܕܲܣܬܼܝܼܪ̈ܵܬܹܗ ܐܲܣܡܸܟ ܐܸܢܘܿܢ 290 ܘܦܬܿܘܿܪ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܣܵܡ̣ ܩܘܼܕܼܡܲܝܗܘܿܢ ܀ 291 :ܓܢܘܿܢܵܐ ܦܲܐܝܵܐ ܬܲܩܸܢ ܒܐܲܪܥܵܐ ܒܐ̄ܙܵܪ ܗܵܘ̇ ܕܲܠܥܸܠ 292 ܕܢܸܬܼܒܿܣܡܘܼܢ ܒܹܗ ܐ̄ܪܵܙܵܢܵܐܝܼܬܼ ܥܲܕܼ ܫܘܼܠܵܡܵܐ ܀ 293 :ܩܘܼܕܼܫܵܐ ܒܢ̣ܵܐ ܠܹܗ ܕܲܢܩܲܕܿܫܝܼܢ ܒܹܗ ܠܲܫܡܵܐ ܕܩܘܼܕܼܫܹܗ 294 ܥܲܕܼ ܡܸܬܼܥܵܠܹܝܢ ܠܲܩܕܼܘܿܫ ܕܲܟܣܸܐ ܒܪܵܘܡܵܐ ܀ 295 :ܟܵܗܢܹ̈ܐ ܓܒܼ݂ܵܐ ܠܹܗ ܕܲܢܫܲܡܫܘܼܢ ܒܹܗ ܩܲܕܿܝܼܫܵܐܝܼܬܼ 296 ܘܲܚܠܵܦ ܕܸܒܼܚܹ̈ܐ ܢܩܲܪܒܼܘܼܢ ܕܸܒܼܚܵܐ ܕܐ̄ܪܵܙܵܐ ܕܲܒܼܪܹܗ ܀ 297 :ܐ̄ܪܵܙܵܐ ܕܲܒܼܪܹܗ ܡܩܲܪܒܼܝܼܢ ܟܠܢܵܫ ܩܕܼܵܡ ܨܸܒܼܝܵܢܹܗ 298 ܘܲܡܚܲܣܹܝܢ ܒܹܗ ܥܵܘ̣ܠܵܐ ܕܐ̄ܢܵܫܵܐ ܕܩܵܪܹ̇ܝܢ ܒܲܫܡܹܗ ܀ 299 :ܟܸܣܦܵܐ ܕܡܸܠܬܹܗ ܣܵܡ̣ ܒܐܝܼܕܲܝ̈ܗܘܿܢ ܒܝܲܕܼ ܥܸܠ̈ܠܵܬܼܵܐ 300 ܕܢܸܬܿܬܲܓܲܪܘܼܢ ܒܹܗ ܩܸܢܝܵܢ ܚܲܝܹ̈ܐ ܪ̈ܘܼܚܵܢܵܝܹܐ ܀ 301 :ܐܲܝܟ ܕܲܒܼܟܼܘܼܪܵܐ ܢܵܣ̇ܟܿܝܼܢ ܐ̄ܢܵܫܵܐ ܠܲܒܼܢܲܝ̈ܢܵܫܵܐ 302 ܘܡ̇ܪܩܝܼܢ ܡܸܢܗܘܿܢ ܫܘܼܚܬܵܐ ܣܢܝܼܬܼܵܐ ܕܥܵܘ̣ܠܵܐ ܣܲܢܝܵܐ ܀ 303 :ܓܵܘܢܵܐ ܦܲܐܝܵܐ ܩܵܢܹ̇ܝܢ ܡ̣ܢ ܫܹܠܝ ܡ̣ܢ ܓܵܘ ܡܲܝܵ̈ܐ 304 ܘܛܵܒܼ ܡ̣ܢ ܫܸܡܫܵܐ ܕܵܠܹ̇ܩ ܢܘܼܗܪܵܐ ܕܪ̈ܥܝܵܢܲܝܗܘܿܢ ܀ 305 :ܨܡܚܹ̈ܐ ܕܢܘܼܗܪܵܐ ܗܵܘܹܝܢ ܒܐܲܪܥܵܐ ܒܢܘܼܗܪܵܐ ܕܲܒܼܗܘܿܢ 306 ܘܢܵܗܲܪ ܥܵܠܡܵܐ ܒܕܸܠܩܹ̈ܐ ܦܐܲܝ̈ܵܐ ܕܕܘܼܒܵܪ̈ܲܝܗܘܿܢ ܀ pb. 350 307 :ܪܘܼܚܵܐ ܝܵܢܩ̇ܝܼܢ ܒܵܬܲܪ ܝܲܠܕܵܐ ܕܡܲܥܡܘܿܕܼܝܼܬܼܵܐ 308 ܘܲܠܦܘܼܬܼ ܝܲܠܕܵܐ ܐܵܦ ܬܘܼܪܣܵܝܵܐ ܕܪܵܡ ܘܲܡܥܲܠܲܝ ܀ 309 :ܐܲܝܟ ܦܲܪ̈ܘܼܓܹܐ ܡܪܝܼܡܝܼܢ ܓܸܦܹ̈ܐ ܕܕܘܼܒܵܪ̈ܲܝܗܘܿܢ 310 ܘܥܵܐ̇ܠܝܼܢ ܢܵܚ̇ܝܼܢ ܒܩܸܢܵܐ ܦܐܝܼܬܼܵܐ ܕܥܹܕܲܬܼ ܩܘܼܕܫܵܐ ܀ 311 :ܒܲܕܼܡܘܼܬܼ ܢܸܫܪܵܐ ܡܪܲܚܸܦ ܟܵܗܢܵܐ ܥܲܠ ܐܲܦܲܝ̈ܗܘܿܢ 312 ܘܡܲܬܼܩܸܢ ܐܘܼܟܼܠܵܐ ܕܲܓܼܡܝܼܪܘܼܬܼܵܐ ܕܢܸܬܿܬܲܪܣܘܿܢ ܒܹܗ ܀ 313 :ܕܸܒܼܚܵܐ ܚܲܝܵܐ ܡܛܲܝܸܒܼ ܣܵܐܹ̇ܡ ܩܕܼܵܡ ܥܲܝܢܲܝ̈ܗܘܿܢ 314 ܘܲܡܙܲܡܸܢ ܠܗܘܿܢ ܠܡܸܬܼܒܲܩܵܝܘܼ ܒܪܸܚܡܹܬܼ ܢܲܦܫܵܐ ܀ 315 :ܐ̄ܪܵܙܵܐ ܕܚܝܼܠܵܐ ܡܫܲܪܸܐ ܕܲܢܨܘܼܪ ܪܘܼܚܵܢܵܐܝܼܬܼ 316 ܘܐܲܝܟ ܣܲܡܡܵܢܹ̈ܐ ܡܡܲܕܲܟ ܡܸܠܹ̈ܐ ܩܕܼܵܡ ܚܲܙܝܹ̈ܐ ܀ 317 :ܒܩܲܢܝܵܐ ܕܡܸܠܬܹܗ ܨܵܐܲܪ ܨܲܠܡܵܐ ܕܡܲܠܟܵܐ ܙܩܝܼܦܵܐ 318 ܘܐܲܝܟ ܕܲܒܼܨܸܒܼܥܵܐ ܡܚܵܘܸܐ ܚܲܫܹܗ ܐܵܦ ܪܘܼܡܪܵܡܹܗ ܀ 319 :ܡܵܘܬܵܐ ܘܚܲܝܹ̈ܐ ܡܲܟܼܪܸܙ ܩܵܠܹܗ ܒܐܸܕܼܢܲܝ̈ ܥܲܡܵܐ 320 ܘܫܘܼܒܼܩܵܢ ܥܵܘ̣ܠܵܐ ܡܦܲܠܸܓܼ ܝܵܗܹ̇ܒܼ ܒܠܲܚܡܵܐ ܘܚܲܡܪܵܐ ܀ 321 :ܐ̄ܪܵܙ ܡܝܼܬܼܘܼܬܼܵܐ ܡܚܵܘܸܐ ܠܘܼܩܕܼܵܡ ܠܡܵܝܘܿܬܼܘܼܬܼܵܐ 322 ܘܐܲܟܸܿܢ ܓܵܠܹ̇ܐ ܚܹܝܠ ܚܲܝܘܼܬܼܵܐ ܕܲܟܼܣܸܐ ܒܡܸܠܵܘ̈ܗܝ ܀ 323 :ܐܲܝܟ ܕܲܠܡܝܼܬܼܵܐ ܡܫܵܘܸܐ ܥܲܪܣܵܐ ܒܡܵܐܢܹ̈ܐ ܕܩܘܼܕܼܫܵܐ 324 ܘܡܲܣܸܩ ܣܵܐܹ̇ܡ ܠܲܚܡܵܐ ܘܚܲܡܪܵܐ ܐܲܝܟ ܥܲܢܝܼܕܼܵܐ ܀ 325 :ܝܘܼܡ ܥܘܼܢܕܵܢܵܐ ܕܡܲܠܟܿܐ ܥܵܒܹ̇ܕܼ ܐ̄ܪܵܙܵܢܵܐܝܼܬܼ 326 ܘܲܡܩܝܼܡ ܦܵܠܚܹ̈ܐ ܒܲܘܗܝܼܪܘܼܬܼܵܐ ܠܦܘܼܬܼ ܬܲܚܘܝܼܬܼܵܐ ܀ 327 :ܬܪܹܝܢ ܫܲܡܵܫܹ̈ܐ ܡܩܝܼܡ ܐܲܝܟ ܛܲܟܼܣܵܐ ܡܸܟܵܐ ܘܡܸܟܵܐ 328 ܕܢܼܗܘܘܿܢ ܢܵܛ̇ܪܝܼܢ ܐ̄ܪܵܙܵܐ ܕܲܡܠܸܟ ܡܲܠ̈ܟܹܿܐ ܀ 329 :ܩܸܢܛܵܐ ܘܚܘܼܒܵܐ ܪܡܸܐ ܥܲܠ ܙܵܘܥܹ̈ܐ ܕܪܸ̈ܥܝܵܢܲܝܗܘܿܢ 330 ܟܲܕܼ ܡܸܬܼܒܲܩܹܝܢ ܒܠܲܚܡܵܐ ܘܚܲܡܪܵܐ ܐܲܝܟ ܕܲܒܼܡܲܠܟܵܐ ܀ 331 :ܐ̄ܣܟܹܿܝܡܵܐ ܙܲܗܝܵܐ ܥܛܝܼܦܝܼܢ ܡ̣ܢ ܠܓܼܵܘ ܥܲܠ ܐܲܦܲܝ̈ܗܘܿܢ 332 ܘܲܒܼܢܲܚܬܲܝ̈ܗܘܿܢ ܡܚܵܘܹܝܢ ܫܘܼܦܪܵܐ ܕܪ̈ܥܝܵܢܲܝܗܘܿܢ ܀ 333 :ܒܐܘܼܪܵܪ̈ܲܝܗܘܿܢ ܨܵܝ̇ܪܝܼܢ ܐܵܬ̤ܐ ܕܲܡܫܲܝܢܹ̈ܐ 334 ܕܲܥܛܝܼܦܝܼܢ ܗ̄ܘ̣ܵܐ ܢܲܚ̈ܬܹܿܐ ܦܐܲܝ̈ܵܐ ܒܗܲܝܟܲܠ ܩܲܒܼܪܵܐ ܀ 335 :ܬܪܹܝܢ ܡܲܠܲܐܟܹ̈ܐ ܚܙ̣ܵܘ ܬܲܠܡܝܼܪܹ̈ܐ ܒܩܲܒܼܪܹܗ ܕܡ̇ܪܲܢ 336 ܕܲܡܙܲܚܝܼܢ ܗ̄ܘ̣ܵܐ ܕܘܼܟܲܬܼ ܦܲܓܼܪܹܗ ܐܲܝܟ ܕܠܦܲܓܼܪܹܗ ܀ 337 :ܘܐܸܢ ܪ̈ܘܼܚܵܢܹܐ ܒܕܼܚܠܵܐ ܝܲܩܲܪܘ ܠܕܼܘܼܟܲܬܼ ܦܲܓܼܪܹܗ 338 ܟܡܵܐ ܦܲܓܼܪ̈ܢܹܐ ܢܝܲܩܪܘܼܢ ܐ̄ܪܵܙܵܐ ܕܝܲܩܲܪ ܐܸܢܘܿܢ ܀ 339 :ܒܗܵܘ̇ ܐܸܣܟܹܿܡܵܐ ܕܲܬܼܪܹܝܢ ܥܝܼܪܹ̈ܐ ܬܪܹܝܢ ܫܲܡܵܫܹ̈ܐ 340 ܩܵܝ̇ܡܝܼܢ ܗܵܫܵܐ ܠܲܡܪܲܚܵܦܘܼ ܠܥܸܠ ܡ̣ܢ ܐ̄ܪ̈ܵܙܹܐ ܀ pb. 351 341 :ܟܵܗܢܵܐ ܡܡܲܠܸܐ ܕܘܼܟܲܬܼ ܦܘܼܡܵܐ ܚܠܵܦ ܟܠ ܦܘܼܡܝܼ̈ܢ 342 ܘܐܲܝܟ ܡܸܨܥܵܝܵܐ ܡܬܲܪܓܸܿܡ ܩܵܠܹܗ ܥܲܡ ܟܲܣܝܘܼܬܼܵܐ ܀ 343 :ܠܟܲܣܝܵܐ ܩܵܪܹ̇ܐ ܕܲܢܫܲܕܲܪ ܠܹܗ ܚܲܝܠܵܐ ܟܲܣܝܵܐ 344 ܕܢܸܬܸܿܠ ܚܲܝܠܵܐ ܒܠܲܚܡܵܐ ܘܚܲܡܪܵܐ ܠܡܸܬܲܠ ܚܲܝܹ̈ܐ ܀ 345 :ܨܹܝܕܼ ܟܲܣܝܘܼܬܼܵܐ ܡܲܦܢܸܐ ܚܝܵܪܵܐ ܕܟܼܠ ܪܸ̈ܥܝܵܢܝܼܢ 346 ܕܢܸܗܘܘܿܢ ܚܵܝ̇ܪܝܼܢ ܒܲܣܬܼܝܼܪ̈ܵܬܼܵܐ ܒܝܲܕܼ ܓܲܠ̈ܝܵܬܼܵܐ ܀ 347 :ܠܥܸܠ ܡܲܕܿܥܲܝ̈ܗܘܿܢ ܩܵܥܹ̇ܐ ܘܐܵܡܲ݁ܪ ܠܐܲܪ̈ܥܵܢܵܝܹܐ 348 ܘܥܵܢܹ̇ܝܢ ܗܸܢܘ̣ܿܢ ܠܘܵܬܼܵܟ ܡ̇ܪܝܵܐ ܕܲܟܼܣܸܐ ܒܪܵܘܡܵܐ ܀ 349 :ܬܵܢܹ̇ܐ ܘܐܵܡܲ݁ܪ ܕܡ̇ܢܲܐ ܗ̄ܝܼ ܥܸܠܬܼܵܐ ܕܚܵܘܪܵܐ ܕܲܠܥܸܠ 350 ܘܡ̇ܢܵܐ ܡ̇ܢܵܐ ܩܵܪܹ̇ܐ ܠܐ̄ܢܵܫܵܐ ܠܫܵܘܬܵܦܘܼܬܹܗ ܀ 351 :ܚܘܼܪܘ ܠܲܡ ܐ̄ܢܵܫܵܐ ܒܩܘܼܪܵܒܼ ܕܸܒܼܚܵܐ ܕܲܚܠܵܦܲܝܟܿܘܿܢ 352 ܕܲܡܩܲܒܸܿܠ ܠܹܗ ܐܝܼܬܼܝܵܐ ܒܚܘܼܒܵܐ ܚܠܵܦ ܚܲܝܲܝ̈ܟܿܘܿܢ ܀ 353 :ܚܘܼܪܘ ܬܲܩܢܵܐܝܼܬܼ ܒܠܲܚܡܵܐ ܘܚܲܡܪܵܐ ܕܥܲܠ ܦܵܬܼܘܼܪܵܐ 354 ܕܲܡܫܲܚܠܸܦ ܠܹܗ ܚܲܝܠܵܐ ܕܪܘܼܚܵܐ ܠܦܲܓܼܪܵܐ ܘܲܕܼܡ̇ܐ ܀ 355 :ܚܙܵܘ ܓܲܠ̈ܝܵܬܼܵܐ ܒܪܸ̈ܓܼܫܹܐ ܓܠܲܝ̈ܵܐ ܕܗܲܕܵܡܲܝ̈ܟܿܘܿܢ 356 ܘܨܘܼܪܘ ܟܲܣ̈ܝܵܬܼܵܐ ܒܙܵܘܥܹ̈ܐ ܟܣܲܝܵ̈ܐ ܕܪܸ̈ܥܝܵܢܲܝܟܿܘܿܢ ܀ 357 :ܥܗܲܕܼܘ ܡ̇ܘܬܲܝ̈ܟܿܘܿܢ ܒܐܵܬ̤ܐ ܕܡܲܠܝܵܐ ܡ̇ܘܬܵܐ ܘܚܲܝܹ̈ܐ 358 ܘܩܲܠܸܣܘ ܘܐܵܪܸܒܼܘ ܠܝܵܗܹ̇ܒܼ ܚܲܝܠܵܐ ܒܲܡܚܝܼ̈ܠܵܬܼܵܐ ܀ 359 :ܐܲܝܟ ܕܲܒܼܛܲܒܼܥܵܐ ܡܚܲܬܿܡܝܼܢ ܡܸܠܬܹܗ ܒܝܲܕܼ ܩܵܠܲܝ̈ܗܘܿܢ 360 ܕܝܵܐܹ̇ܐ ܘܙܵܕܹܩ ܘܲܦܐܹܐ ܘܩܲܕܼܝܼܫ ܕܸܒܼܚܵܐ ܕܚܲܝܲܝ̈ܢ ܀ 361 :ܗܘ̤ ܐܲܝܟ ܩܲܢܝܵܐ ܟܵܬܹ̇ܒܼ ܡܸܠܹ̈ܐ ܒܪܹܫ ܠܸܫܵܢܹܗ 362 ܘܗܸܢܘ̣ܿܢ ܡܲܪܡܹܝܢ ܐܝܼܕܼܵܐ ܒܩܵܠܵܐ ܕܐܹܝܢ ܫܲܪܝܼܪ̈ܵܢ ܀ 363 :ܡܸܣܗܲܕܼ ܣܵܗ̇ܕܿܝܼܢ ܠܲܒܼ̈ܢܵܬܼ ܩܵܠܹ̈ܐ ܕܲܚܠܵܦܲܝܗܘܿܢ 364 ܘܲܚܠܵܦ ܛܲܒܼܥܵܐ ܡܚܲܬܿܡܝܼܢ ܒܐܵܡܝܢ ܐ̄ܪܵܙ ܚܲܝܲܝ̈ܗܘܿܢ ܀ 365 :ܫܛܵܪ ܬܵܘܕܿܝܼܬܼܵܐ ܡܲܨܲܚ ܟܵܬܹܿܒܼ ܒܝܲܕܼ ܦܸܬܼܓܼܵܡ̣ܵܘ̈ܗܝ 366 ܘܗܵܢܘ̣ܿܢ ܥܵܪܒܿܝܼܢ ܕܐܹܝܢ ܦܵܪܥܝܼܢܲܢ ܚܵܘܒܲܬܼ ܫܘܼܒܼܚܵܐ ܀ 367 :ܒܩܵܠܵܐ ܦܵܪܥܝܼܢ ܫܘܼܒܼܚܵܐ ܕܒܲܟܼܬܼܝܼ̈ܒܼܵܬܹܗ 368 ܘܗܘ̤ ܡܝܲܒܸܿܠ ܠܹܗ ܠܘܵܬܼ ܨܸܒܼܝܵܢܵܐ ܐܲܠܵܗܵܝܵܐ ܀ 369 :ܥܲܡ ܩܘܼܪܒܵܢܵܐ ܡܲܣܸܩ ܟܵܗܢܵܐ ܨܠܘܿܬܹܗ ܕܥܲܡܵܐ 370 ܘܲܡܩܲܕܹܿܫ ܠܹܗ ܒܫܵܘܬܵܦܘܼܬܼܵܐ ܕܐ̄ܪܵܙܵܐ ܚܲܝܵܐ ܀ 371 :ܒܚܲܫܵܐ ܪܲܒܵܐ ܡܨܲܠܸܐ ܚܠܵܦܘܗܝ ܘܲܚܠܵܦ ܟܠܢܵܫ 372 ܕܬܸܗܘܸܐ ܡܸܠܬܹܗ ܕܸܒܼܚܵܐ ܡܩܲܒܿܠܵܐ ܩܕܼܵܡ ܥܸܠܵܝܵܐ ܀ 373 :ܐܲܝܟ ܪ̈ܘܼܚܵܢܹܐ ܡܕܲܡܸܐ ܒܡܸܠܵܘ̈ܗܝ ܟܲܕܼ ܡܸܬܼܟܲܫܲܦ 374 ܘܩܲܕܿܝܼܫܵܐܝܼܬܼ ܡܲܠܸܦ ܐ̄ܢܵܫܵܐ ܠܡܸܩܥܵܐ ܩܲܕܿܝܼܫ ܀ 375 :ܩܵܠ ܩܘܼܕܵܫܵܐ ܕܲܡܫܲܝܵܢܹ̈ܐ ܬܵܢܹ̇ܐ ܠܐ̄ܢܵܫܵܐ 376 ܕܢܸܗܘܘܿܢ ܩܵܥܹ̇ܝܢ ܩܲܕܿܝܼܫ ܩܲܕܝܼܫ ܩܲܕܝܼܫ ܡ̇ܪܝܵܐ ܀ pb. 352 377 :ܗܵܝ̇ ܒܲܪܬܼ ܩܵܠܵܐ ܕܲܩܥ̣ܵܘ ܣܪ̈ܵܦܹܐ ܬܠܵܬܼ ܙܲܒܼ̈ܢܬܼܵܐ 378 ܗ̤ܝ ܗܵܝ̇ ܡܲܫܡܲܥ ܒܐܸܕܢܲܝ̈ ܥܲܡܵܐ ܒܥܸܕܵܢ ܐ̄̇ܪ̈ܵܙܹܐ ܀ 379 :ܐܲܝܟ ܐܹܫܲܥܝܵܐ ܚܲܫܝܼܫ ܐܵܦ ܗܘ̤ ܡܵܐ ܕܡܲܫܡܲܥ ܠܵܗ̇ 380 ܟܲܕܼ ܡܸܬܼܥܲܗܲܕܼ ܫܝܼܛܘܼܬܼ ܐ̄ܢܵܫܵܐ ܕܲܟܼܡܵܐ ܝܸܪܒܲܬ̤ ܀ 381 :ܗܵܘ̇ ܒܘܼܕܵܩܵܐ ܕܲܚܙ̣ܵܐ ܢܒܼܝܼܵܐ ܐ̄ܪܵܙܵܡܵܐܝܼܬܼ 382 ܗܘ̤ ܒܲܥܒܼܵܕܼܵܐ ܡܸܬܼܒܲܩܸܐ ܒܹܗ ܒܗܲܝܡܵܢܘܼܬܼܵܐ ܀ 383 :ܓܡܘܼܪܬܵܐ ܕܢܘܼܪܵܐ ܚܙ̣ܵܐ ܐܹܫܲܥܝܵܐ ܕܩܸܪܒܲܬ̤ ܨܹܐܕܼܵܘܗܝ 384 ܕܲܠܒܼܝܼܟ ܗ̄ܘ̣ܵܐ ܠܵܗ̇ ܣܪܵܦܵܐ ܕܢܘܼܪܵܐ ܒܐܝܼܕܼܵܐ ܕܢܘܼܪܵܐ ܀ 385 :ܠܦܘܼܡܹܗ ܩܸܪܒܲܬ̤ ܟܲܕܼ ܠܵܐ ܩܸܪܒܲܬ̤ ܫܲܪܝܼܪܐܝܼܬܼ 386 ܘܲܥܛܵܬ̤ ܥܵܘ̣ܠܵܐ ܕܦܲܓܼܪܹܗ ܘܢܲܦܫܹܗ ܫܲܪܝܼܪܐܝܼܬܼ ܀ 387 :ܠܵܐ ܗ̄ܘ̣ܵܐ ܚܸܙܘܵܐ ܡܸܬܼܪܲܓܼܫܵܢܵܐ ܚܙ̣ܵܐ ܚܲܙܵܝܵܐ 388 ܘܠܵܐ ܪܘܼܚܵܢܵܐ ܓܡܘܼܪܬܵܐ ܓܫܝܼܡܢܬܵܐ ܩܲܪܸܒܼ ܨܹܐܕܼܵܘܗܝ ܀ 389 :ܒܘܼܕܼܩ ܐ̄ܪܵܙܵܐ ܕܦܲܓܼܪܵܐ ܘܲܕܼܡܵܐ ܚܙ̣ܵܐ ܒܲܓܼܡܘܼܪܬܵܐ 390 ܕܒܲܕܼܡܘܼܬܼ ܢܘܼܪܵܐ ܡܛܲܠܸܩ ܥܵܘ̣ܠܑܵܐ ܕܡ̇ܝܘܿܬܼܘܼܬܼܵܐ ܀ 391 :ܚܹܝܠ ܗܵܘ̇ ܐ̄ܪܵܙܵܐ ܕܲܚܙ̣ܵܐ ܢܒܼܝܼܵܐ ܡܦܲܫܸܩ ܟܵܗܢܵܐ 392 ܘܐܲܝܟ ܕܲܒܼܟܼܠܒܿܬܼܵܐ ܠܵܒܹ̇ܟ ܒܐܝܼܕܹܗ ܢܘܼܪܵܐ ܒܠܲܚܡܵܐ ܀ 393 :ܕܘܼܟܲܬܼ ܣܪܵܦܵܐ ܡܡܲܠܸܐ ܠܥܲܡܵܐ ܐܲܝܟ ܕܠܹܐܫܲܥܝܵܐ 394 ܘܲܒܼܣܘܼܥܪ̈ܵܢܹܐ ܥܵܛܹ̇ܐ ܥܵܘ̣ܠܵܐ ܘܝܵܗܹ̇ܒܼ ܚܲܝܹ̈ܐ ܀ 395 :ܣܪܵܦܵܐ ܕܪܘܼܚܵܐ ܠܵܐ ܠܒ݂ܲܟ ܒܐܝܼܕܹܗ ܚܸܙܘܵܐ ܪܕܘܼܚܵܐ 396 ܘܗܵܢܵܘ̇ ܬܲܗܪܵܐ ܕܐܝܼܕܼܵܐ ܕܒܸܣܪܵܐ ܠܒܼܝܼܟܼܵܐ ܠܪܘܼܚܵܬܐ ܀ 397 :ܩܲܠܝܼܠ ܓܸܦܹ̈ܐ ܠܵܐ ܣܦ݂ܲܩ ܐܲܥܸܠ ܐܘܼܟܼܠܵܐ ܠܟܲܪܣܵܐ 398 ܘܝܲܩܝܼܪ ܓܘܼܫܡܵܐ ܡ̇ܘܫܸܛ ܐܝܼܕܹܗ ܥܕܲܡ̇ܐ ܠܙܵܥܹ̈ܐ ܀ 399 :ܠܦܲܓܼܪܵܐ ܘܢܲܦܫܵܐ ܡܬܲܪܣܸܐ ܒܐܘܼܟܼܠܵܐ ܕܚܲܝܠܹܗ ܕܐ̄ܪܵܙܵܐ 400 ܘܡ̣ܢ ܡ̇ܝܘܿܬܹ̈ܐ ܥܵܒܹ̇ܕܼ ܐ̄ܢܵܫܵܐ ܠܵܐ ܡ̇ܝܘܿܬܹ̈ܐ ܀ 401 :ܫܘܼܠܛܵܢ ܡ̇ܘܬܵܐ ܡܒܲܛܸܠ ܩܵܠܹܗ ܡ̣ܢ ܡ̇ܝܘܿܬܹ̈ܐ 402 ܘܐܘܼܚܕܵܢ ܒܝܼܫܵܐ ܫܵܪܹܐ ܘܡܲܥܒܲܪ ܡ̣ܢ ܡܵܝܘܿܬܹ̈ܐ ܀ 403 :ܒܐܘܼܟܼܠܵܐ ܩܲܛ̣ܠܲܢ ܒܝܼܫܵܐ ܒܪܵܫܝܼܬܼ ܘܥܲܒܼܕܿܢ ܥܲܒܼ̈ܕܹܿܐ 404 ܘܲܒܼܝܲܕܼ ܐܘܼܟܼܠܵܐ ܨܒܼܵܐ ܒܵܪܘܿܝܵܐ ܕܢܲܚܹܝܢ ܗܵܫܵܐ ܀ 405 :ܒܐܝܼܕܵܐ ܕܩܸܛܦܲܬ̤ ܦܹܐܪܵܐ ܒܲܥܕܹܢ ܥܵܘ̇ܠܵܐܝܼܬܼ 406 ܒܵܗ̇ ܐܸܘܫܸܛ ܠܲܢ ܦܹܐܪܵܐ ܕܚܲܝܹ̈ܐ ܚܲܟܿܝܼܡܵܐܝܼܬܼ ܀ 407 :ܒܵܐܕܼܵܡ ܠܵܛܲܢ ܘܝܲܗ̣̄ܒܲܢ ܐܘܼܟܼܠܵܐ ܠܡܵܘܬܵܐ ܝܲܥܢܵܐ 408 ܘܲܒܼܒܲܪ ܐܵܕܼܵܡ ܦܬܲܚܠܲܢ ܢܸܒܼܥܵܐ ܕܒܲܣܝܼܡܘܼܬܹܗ ܀ 409 :ܒܹܗ ܒܲܟܼܝܵܢܲܢ ܓܡ݂ܲܪ ܨܸܒܼܝܵܢܹܗ ܘܚܵܘܝܼ ܚܘܼܒܹܿܗ 410 ܕܲܬܼܫܲܪܲܪ ܠܲܢ ܗܵܝ̇ ܒܲܪܬܼ ܩܵܠܵܐ ܕܲܩܪ̣ܵܢ ܨܲܠܡܹܗ ܀ 411 :ܠܲܢ ܝܲܗ̣̄ܒܼ ܠܡܸܬܲܠ ܪܲܗܒܼܘܿܢ ܚܲܝܹ̈ܐ ܒܡܵܝܘܿܬܼܘܼܬܲܢ 412 ܕܐܲܝܟ ܨܸܒܼܝܵܢܲܢ ܢܦܲܪܢܸܣ ܢܲܦܫܲܢ ܒܚܹܝܠ ܨܸܒܼܝܵܢܹܗ ܀ pb. 353 413 :ܒܚܹܝܠ ܨܸܒܼܝܵܢܹܗ ܡܦܲܠܸܓܼ ܟܵܗܢܵܐ ܚܲܝܹ̈ܐ ܒܠܲܚܡܵܐ 414 ܘܪܵܕܹܦ ܥܵܘ̣ܠܵܐ ܘܡܲܥܡܲܪ ܪܘܼܚܵܐ ܒܓܼܵܘ ܗܲܕܵܡܹ̈ܐ ܀ 415 :ܚܲܝܠܵܐ ܕܪܘܼܚܵܐ ܢܵܚܹ̇ܬܼ ܨܹܐܕܵܘܗܝ ܕܒܲܪ ܡ̇ܝܘܿܬܹ̈ܐ 416 ܘܫܵܪܹܐ ܒܠܲܚܡܵܐ ܘܲܡܩܲܕܸܿܫ ܠܹܗ ܒܪܲܒܿܘܼܬܼ ܚܲܝܠܹܗ ܀ 417 :ܐܘܿ ܬܸܕܼܡܘܼܪܬܵܐ ܕܟܲܕܼ ܗܘ̤ ܪܘܼܚܵܐ ܡܠܸܐ ܟܠ ܡܸܢܹܗ 418 ܥܕܲܡ̇ܐ ܕܦܵܩܹ̇ܕܼ ܥܲܦܪܵܢܵܝܵܐ ܠܵܐ ܡܸܬܼܩܲܪܲܒܼ ܀ 419 :ܐܘܿ ܡ̇ܘܗܲܒܼܬܼܵܐ ܕܟܲܕܼ ܝܼܗܝܼܒܼܵܐ ܡ̣ܢ ܫܘܼܪܵܝܵܐ 420 ܥܕܲܡ̇ܐ ܕܲܡܦܝܼܣ ܒܲܪ ܕܲܚܝܼܚܵܐ ܠܵܐ ܡܸܬܼܢܲܣܒܵܐ ܀ 421 :ܐܝܼܬܼܵܘܗܝ ܪܘܼܚܵܐ ܨܹܝܕܼ ܟܠ ܘܲܒܼܟܼܠ ܒܪܵܘܡ̇ܐ ܘܥܘܼܡܩܵܐ 422 ܘܲܓܼܢܝܼܙ ܘܲܡܚܵܘܸܐ ܠܹܗ ܟܵܗܢܵܐ ܒܡܸܠܵܘ̈ܗܝ ܀ 423 :ܠܪܵܘܡ̇ܐ ܕܲܠܥܸܠ ܦܵܫܹ̇ܛ ܐܝܼܕܼܵܘ̈ܗܝ ܥܲܡ ܪܸܥܝܵܢܹܗ 424 ܘܲܡܙܲܡܸܢ ܠܹܗ ܕܢܸܚܘܿܬܼ ܢܸܓܼܡܘܿܪ ܫܸܐܠܲܬܼ ܢܲܦܫܹܗ ܀ 425 :ܠܵܘ ܒܲܟܼܝܵܢܵܐ ܢܵܚܹ̇ܬܼ ܪܘܼܚܵܐ ܠܵܐ ܚܵܙܘܿܩܵܐ 426 ܚܝܠܵܐ ܕܡܸܢܹܗ ܢܵܚܹ̇ܬܼ ܣܵܥܲ݁ܪ ܘܲܡܫܲܡܠܸܐ ܟܠ ܀ 427 :ܚܲܝܠܹܗ ܡܲܓܸܿܢ ܥܲܠ ܦܵܬܼܪܵܐ ܡܸܬܼܚܲܙܝܵܢܵܐ 428 ܘܡܲܩܢܹܐ ܚܲܝܠܵܐ ܠܠܲܚܡܵܐ ܘܚܲܡܪܵܐ ܠܡܸܬܲܠ ܚܲܝܹ̈ܐ ܀ 429 :ܚܲܝܠܹܗ ܡܚܲܝܸܠ ܠܐܝܼܕܼܵܐ ܕܟܼܵܗܢܵܐ ܕܬܸܠܒܿܘܿܟ ܚܲܝܠܹܗ 430 ܘܠܵܐ ܡܸܣܬܲܝܲܟ ܒܸܣܪܵܐ ܡܚܝܼܠܵܐ ܡ̣ܢ ܓܵܘܙܲܠܬܹܿܗ ܀ 431 ܪܘܼܚܵܐ ܒܠܲܚܡܵܐ ܠܵܒܹ̇ܟ ܒܐܝܼܕܼܵܘ̈ܗܝ ܦܲܓܼܪܵܢܵܝܵܐ. 432 ܘܬܼܵܠܹ̇ܐ ܚܝܵܪܹܗ ܠܐܲܦܲܝ̈ ܪܵܘܡ̇ܐ ܘܟܸܢ ܦܵܨܹ̇ܐ ܠܹܗ ܀ 433 :ܩܵܨܹ̇ܐ ܠܲܚܡܵܐ ܘܡܲܪܡܸܐ ܒܚܲܡܪܵܐ ܘܪܵܫܹ̇ܡ ܘܐܵܡܲ݁ܪ 434 ܒܲܫܡܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܟܝܵܢܵܐ ܫܲܘܝܵܐ ܀ 435 :ܒܫܸܡ ܐܝܼܬܼܘܼܬܼܵܐ ܩܢܘܿܡܹ̈ܐ ܬܠܵܬܼܵܐ ܡܫܲܠܸܡ ܡܸܠܵܘ̈ܗܝ 436 ܘܐܲܝܟ ܕܲܠܡܝܼܬܼܵܐ ܡܩܝܼܡ ܠܹܗ ܠܐ̄ܪܵܙܵܐ ܒܐܸܣܟܹܿܝܡ ܩܘܼܫܬܵܐ ܀ 437 :ܒܩܘܼܫܬܵܐ ܩܵܡ̣ ܗ̄ܘ̣ܵܐ ܡ̇ܪܹܗ ܕܐ̄ܪܵܙܵܐ ܡ̣ܢ ܓܵܘ ܩܲܒܼܪܵܐ 438 ܘܲܕܼܠܵܐ ܦܘܼܠܵܓܼ ܩܵܢܹ̇ܐ ܐ̄ܪܵܙܵܐ ܚܹܝܠ ܚܲܝܘܼܬܼܵܐ ܀ 439 :ܚܲܝܹ̈ܐ ܚܲܕܼܬܹ̈ܐ ܩܵܢܹ̇ܝܢ ܡ̣ܢ ܫܹܠܝ ܠܲܚܡܵܐ ܘܚܲܡܪܵܐ 440 ܘܫܘܼܒܼܩܵܢ ܥܵܘ̣ܠܵܐ ܝܵܗ̇ܒܿܝܼܢ ܡܸܢܫܹܠܝ ܠܢܵܣܘܼܒܲܝ̈ܗܘܿܢ ܀ 441 :ܚܲܕܼ ܥܵܒܹ̇ܕܼ ܠܹܗ ܒܫܵܘܬܵܦܘܼܬܼܵܐ ܠܠܲܚܡܵܐ ܘܚܲܡܪܵܐ 442 ܠܦܘܼܬܼ ܕܲܡܚܲܠܸܛ ܕܡ̇ܐ ܥܲܡ ܦܲܓܼܪܵܐ ܒܟܼܠܗܘܿܢ ܪܸ̈ܓܼܫܹܐ ܀ 443 ܚܲܡܪܵܐ ܘܡܲܝ̈ܵܐ ܡܲܪܡܸܐ ܒܟܼܵܣܵܐ ܩܕܼܵܡ ܕܲܡܩܲܕܸܿܫ: pb. 354 444 ܠܦܘܼܬܼ ܕܐܵܦ ܒܲܕܼܡ̇ܐ ܡܲܝ̈ܵܐ ܚܵܠ̇ܛܝܼܢ ܥܲܡ ܬܘܼܩܵܢܹ̈ܐ ܀ 445 :ܒܗܵܠܹܝܢ ܓܵܡܲ݁ܪ ܟܵܗܢܵܐ ܠܐ̄ܪ̈ܵܙܹܐ ܕܲܓܼܡܝܼܪܘܼܬܼܵܐ 446 ܘܐܲܟܸܿܢ ܡܲܫܡܲܥ ܩܵܠܵܐ ܕܲܡܠܸܐ ܚܘܼܒܵܐ ܘܪ̈ܲܚܡܹܐ ܀ 447 :ܚܘܼܒܵܐ ܘܪ̈ܲܚܡܹܐ ܟܣܸܐ ܒܹܗ ܒܩܵܠܵܐ ܕܡܸܠܲܬܼ ܦܘܼܡܹܗ 448 ܕܲܠܥܵܒܼܘܿܕܼܵܐ ܢܸܩܪܸܐ ܥܒܼܝܼܕܼܵܐ ܐܲܒܼܵܐ ܕܝܼܠܹܗ ܀ 449 :ܒܐܘܼܪܚܵܐ ܕܩܵܠܹܗ ܪܵܕܹܝܢ ܩܵܠܹ̈ܐ ܕܡܸܫܬܲܡܥܵܢܹ̈ܐ 450 ܟܲܕܼ ܡܸܬܿܛܲܝܒܼܝܼܢ ܕܢܸܩܪܘܿܢ ܠܐܲܒܼܘܼܢ ܐܝܼܬܼܝܵܐ ܓܢܝܼܙܵܐ ܀ 451 :ܐܘܿ ܡ̇ܘܗܲܒܼܬܼܵܐ ܕܲܠܘܵܬܼ ܐ̄ܢܵܫܵܐ ܕܠܵܐ ܡܸܬܿܕܲܪܟܵܐ 452 ܕܲܢ̣ܣܲܒܼ ܡܲܓܵܢ ܫܡܵܐ ܕܠܵܐ ܣܵܦܹ̇ܩ ܥܵܠܡܵܐ ܠܲܫܡܹܗ ܀ 453 :ܐܲܒܼܘܼܢ ܩܵܪܹܝܢ ܒܢܲܝ̈ ܕܲܚܝܼܚܵܐ ܠܡܲܬܼܩܸܢ ܟܠܵܐ 454 ܫܵܐ̇ܠܝܼܢ ܠܹܗ ܩܲܕܿܝܼܫܘܼܬܼܵܐ ܘܡܲܠܟܿܘܼܬܼ ܪܵܘܡ̇ܐ ܀ 455 :ܫܡܵܟ ܩܲܕܿܝܼܫܵܐ ܢܸܬܼܩܲܕܿܫ ܒܲܢ ܡܲܬܼܩܸܢ ܟܠܵܐ 456 ܘܪܲܗܒܼܘܿܢ ܚܲܝܹ̈ܐ ܕܠܵܐ ܫܘܼܠܵܡܵܐ ܢܸܫܬܲܪܲܪ ܒܲܢ ܀ 457 :ܐܲܟܲܚ̄ܕܼ ܫܵܐ̇ܠܝܼܢ ܩܲܕܿܝܼܫܘܼܬܼܵܐ ܘܥܘܼܕܼܪܵܢ ܪܘܼܚܵܐ 458 ܕܨܸܒܼܝܵܢ ܟܲܣܝܵܐ ܘܡܵܙܘܿܢ ܙܲܒܼܢܵܐ ܘܫܘܼܒܼܩܵܢ ܥܵܘ̣ܠܑܵܐ ܀ 459 :ܒܝܲܕܼ ܫܸܐܠܵܬܼܵܗܘܿܢ ܡܚܵܘܹܝܢ ܚܘܼܒܵܐ ܕܪ̈ܥܝܵܢܲܝܗܘܿܢ 460 ܕܲܟܼܡܵܐ ܪܓܼܝܼܓܼܝܼܢ ܠܡܸܫܬܵܘܬܵܦܘܼ ܒܲܥܬܼܝܼ̈ܕܵܬܼܵܐ ܀ 461 :ܒܩܵܠ ܬܵܘܕܿܝܼܬܼܵܐ ܡܚܲܬܿܡܝܼܢ ܡܸܠܹ̈ܐ ܕܫܘܼܡܠܵܝ ܐ̄ܪ̈ܵܙܹܐ 462 ܘܦܵܪܥܝܼܢ ܩܘܼܕܼܫܵܐ ܠܐܲܒܼܵܐ ܘܠܲܒܼܪܵܐ ܘܲܠܪܘܼܚܩܘܼܕܼܫܵܐ ܀ 463 :ܩܲܕܿܝܼܫ ܐܲܒܼܵܐ ܘܩܲܕܼܝܼܫ ܝܲܠܕܹܿܗ ܘܪܘܼܚܵܐ ܕܡܸܢܹܗ 464 ܘܲܠܗܘܿܢ ܙܵܕܹܩ ܩܘܼܕܼܫܵܐ ܘܫܘܼܒܼܚܵܐ ܡ̣ܢ ܟܠ ܦܘܼܡܝܼ̈ܢ ܀ 465 :ܒܵܬܲܪ ܩܵܠܵܐ ܕܩܲܕܼܝܼܫܘܼܬܼܵܐ ܘܦܘܼܪܥܵܢ ܫܘܼܒܼܚܵܐ 466 ܡ̇ܬܼ̇ܚܝܼܢ ܚܵܘܪܵܐ ܕܪ̈ܥܝܵܢܲܝܗܘܿܢ ܠܘܵܬܼ ܡ̇ܘܗܲܒܼܬܼܵܐ ܀ 467 :ܒܪܸܓܼܫܹܐ ܘܙܵܘܥܹ̈ܐ ܚܦܝܼܛܝܼܢ ܐܲܟܲܚ̄ܕܼ ܠܡܸܬܼܩܲܪܵܒܼܘܼ 468 ܠܠܲܚܡܵܐ ܘܚܲܡܪܵܐ ܕܟܼܣܸܐ ܒܓܼܵܘܗܘܿܢ ܫܘܼܒܼܩܵܢ ܥܵܘ̣ܠܵܬܐ ܀ 469 :ܒܗܲܝܡܵܢܘܼܬܼܵܐ ܩܢܹ̇ܝܢ ܚܲܝܠܵܐ ܠܡܸܚܙܵܐ ܕܟܲܣ̈ܝܵܢ 470 ܘܐܲܝܟ ܕܲܠܡܲܠܟܵܐ ܡܙܲܚܝܼܢ ܩܘܼܕܼܫܵܐ ܒܓܼܵܘ ܚܘܼܦܢܲܝ̈ܗܘܿܢ ܀ 471 :ܦܲܓܼܪܵܐ ܕܡܲܠܟܵܐ ܡܲܫܪܝܼܢ ܕܲܫܪܸܐ ܒܠܲܚܡܵܐ ܓܲܒܝܵܐ 472 ܘܚܵܝܑܿܬܼ ܡܝܼ̈ܬܹܐ ܡܸܬܼܟܵܪܙܵܐ ܒܹܗ ܠܕܼܵܐܟܹ̇ܠ ܡܸܢܹܗ ܀ 473 :ܦܲܓܼܪܵܐ ܐܲܡܲ݁ܪ ܐܵܦ ܗܘ̤ ܒܵܗܢܵܐ ܡ̇ܐ ܕܝܵܗܹ̇ܒܼ ܠܹܗ 474 ܘܲܕܼܡ̇ܐ ܡܟܲܢܸܐ ܠܚܲܡܪܵܐ ܡܙܝܼܓܼܵܐ ܕܲܒܼܓܼܵܘ ܟܵܣܵܐ ܀ 475 :ܝܵܗܹ̇ܒܼ ܠܲܚܡܵܐ ܘܐܵܡܲ݁ܪ ܦܲܓܼܪܵܐ ܕܡܲܠܟܵܐ ܡܫܝܼܚܵܐ 476 ܘܡܲܫܩܸܐ ܚܲܡܪܵܐ ܘܒܼܵܗ̇ ܒܲܕܼܡܘܼܬܼ ܕܡ̇ܐ ܕܲܡܫܝܼܚܵܐ ܀ 477 :ܦܲܓܼܪܵܐ ܘܲܕܼܡܵܐ ܡܗܲܝܡܸܢ ܕܐܝܼܬܼܵܘܗܝ ܠܲܚܡܵܐ ܘܚܲܡܪܵܐ 478 ܘܛܵܒܼ ܫܲܪܝܼܪܵܐ ܥܲܠ ܝܵܗܘܿܒܼܵܐ ܘܥܲܠ ܢܵܣܘܼܒܹ̈ܐ ܀ 479 :ܫܘܼܒܼܩܵܢ ܥܵܘ̣ܠܵܐ ܘܚܵܝܑܬܼ ܡܝܼܬܹ̈ܐ ܡܲܟܼܪܸܙ ܥܲܡܹܗ 480 ܘܟܲܕܼ ܠܵܐ ܓܲܠܝܵܢ ܠܗܲܝܡܵܢܘܼܬܼܵܐ ܣܲܓܿܝܼ ܕܢܝܼ̈ܚܵܢ ܀ 481 ܗܲܝܡܵܢܘܼܬܼܵܐ ܡܚܵܘܝܵܐ ܠܢܲܦܫܵܐ ܚܙܵܬܼܵܐ ܟܣܝܼܬܼܵܐ: pb. 355 482 ܘܲܡܚܲܟܿܡܵܐ ܠܵܗ̇ ܕܠܵܐ ܬܸܬܼܦܲܠܲܓܼ ܥܲܠ ܓܲܠ̈ܝܵܬܼܵܐ ܀ 483 :ܠܲܚܡܵܐ ܘܚܲܡܪܵܐ ܚܵܙ̈ܝܵܢ ܥܲܝܢܹ̈ܐ ܕܪ̈ܓܼܿܫܲܝ ܦܲܓܼܪܵܐ 484 ܘܙܵܘܥܲܝ̈ ܢܲܦܫܵܐ ܚܹܝܠ ܟܲܣܝܘܼܬܼܵܐ ܕܚܲܣܝܼܢ ܡ̣ܢ ܟܠ ܀ 485 :ܒܙܵܘܥܲܝ̈ ܬܲܦܫܵܐ ܙܵܕܹܩ ܕܲܢܚܘܼܪ ܒܐ̄ܪܵܙ ܦܘܼܪܩܵܢܲܢ 486 ܘܗܲܝܡܵܢܘܼܬܼܵܐ ܢܣܝܼܡ ܠܲܢ ܢܝܼܫܵܐ ܩܕܼܵܡ ܪܸܥܝܵܢܲܢ ܀ 487 :ܢܸܣܲܒܼ ܠܲܡܚܵܐ ܘܢܲܫܲܪ ܕܲܡܨܸܐ ܠܡܸܫܒܲܩ ܥܵܘ̣ܠܵܐ 488 ܘܢܸܫܬܸܿܐ ܚܲܡܪܵܐ ܘܢܵܘܕܸܿܐ ܕܚܲܝܹ̈ܐ ܡܦܲܠܸܓܼ ܫܸܩܝܹܗ ܀ 489 :ܢܝܲܩܲܪ ܐܸܢܘܼܢ ܐܲܝܟ ܕܲܠܦܲܓܼܪܵܐ ܘܲܕܼܡ̇ܐ ܕܡܲܠܟܵܐ 490 ܕܲܢܡܲܢܥܘܼܢܵܢ ܠܲܫܒܼܝܼ̈ܚܵܬܼܵܐ ܕܒܹܝܬܼ ܡܲܠܟܿܘܼܬܼܵܐ ܀ 491 :ܢܗܲܝܡܸܢ ܕܲܡܨܹܝܢ ܠܡܸܬܲܠ ܚܲܝܹ̈ܐ ܒܡܵܝܘܿܬܼܘܼܬܲܢ 492 ܘܢܸܡܬܿܘܿܚ ܗܵܘܢܲܢ ܠܘܵܬܼ ܣܘܼܟܵܝܵܐ ܕܣܲܒܼܪܵܐ ܕܲܒܼܗܘܿܢ ܀ 493 :ܒܗܵܘܢܵܐ ܟܲܣܝܵܐ ܢܚܘܼܪ ܟܲܣܝܵܐܝܼܬܼ ܒܲܕܼܡܸܬܼܚܲܙ̈ܝܵܢ 494 ܘܠܵܐ ܢܸܬܼܦܲܠܲܓܼ ܥܲܠ ܚܘܼܕܵܬܼܵܐ ܕܲܒܼܓܲܠ̈ܝܵܬܼܵܐ ܀ 495 :ܠܵܐ ܗ̄ܘ̣ܵܐ ܒܠܲܚܡܵܐ ܢܚܘܼܪ ܚܲܙܵܝܵܐ ܐܵܦܠܵܐ ܒܚܲܡܪܵܐ 496 ܐܸܠܵܐ ܒܚܲܝܠܵܐ ܕܲܡܩܲܕܸܿܫ ܠܹܗ ܠܠܲܚܡܵܐ ܘܚܲܡܪܵܐ ܀ 497 :ܠܲܚܡܵܐ ܘܚܲܡܪܵܐ ܠܐܵܬ̤ܐ ܣܝܼܡܝܼܢ ܠܥܲܝܢܲܝ̈ ܦܲܓܼܪܵܐ 498 ܕܢܸܗܘܸܐ ܡܫܵܘܬܲܦ ܥܲܡ ܪܸܥܝܵܢܵܐ ܒܲܕܠܵܐ ܓܲܠ̈ܝܵܢ ܀ 499 :ܠܲܝܬܿ ܠܹܗ ܠܦܲܓܼܪܵܐ ܕܢܸܚܙܐ ܕܟܲܣ̈ܝܵܢ ܥܲܡ ܪܸܥܝܵܢܵܐ 500 ܘܠܵܐ ܕܢܸܬܼܒܲܩܹܐ ܒܲܣܬܼܝܼܪ̈ܵܬܼܵܐ ܐܲܝܟ ܚܘܼܫܵܒܹ̈ܐ ܀ 501 :ܡܸܛܠܵܬܹܗ ܗܘ̤ܵܬܼ ܡܵܘܗܲܒܼܬܼܵܐ ܕܲܒܼܝܲܕܼ ܠܲܚܡܵܐ 502 ܕܲܒܼܓܲܠ̈ܝܵܬܼܵܐ ܢܸܩܢܸܐ ܣܲܒܼܪܵܐ ܠܘܵܬܼ ܟܵܣ̈ܝܵܬܼܵܐ ܀ 503 :ܠܹܗ ܘܲܠܢܲܦܫܵܐ ܡܠܝܼܟ ܒܘܼܣܵܡܵܐ ܕܲܟܼܣܸܐ ܒܐ̄ܪܵܙܵܐ 504 ܘܲܠܒܼܘܼܝܵܐܹܗ ܗ̤ܘܲܝ̈ ܓܲܠ̈ܝܵܬܼܵ ܕܐܘܼܟܼܠܵܐ ܘܫܸܩܝܵܐ ܀ 505 :ܗܵܐ ܒܓܲܠ̈ܝܵܬܼܵܐ ܡܥܵܕܼ ܡܸܬܼܒܲܝܲܐ ܡ̣ܢ ܟܲܪܝܼܘܼܬܹܗ 506 ܘܲܕܼܠܵܐ ܢܲܟܼܪܸܐ ܒܲܝܐܹܗ ܡ̇ܪܹܗ ܒܠܲܚܡܵܐ ܘܚܲܡܪܵܐ ܀ 507 :ܒܠܲܚܡܵܐ ܘܚܲܡܪܵܐ ܬܪܲܨ ܠܹܗ ܢܝܼܫܵܐ ܠܘܵܬܼ ܕܲܥܬܼܝܼ̈ܕܵܢ 508 ܕܢܸܗܘܸܐ ܚܵܢܹ̇ܐ ܠܘܵܬܼ ܚܘܼܕܵܬܼܵܐ ܕܡܲܛܲܝܲܒܼ ܠܹܗ ܀ 509 :ܬܵܘ ܡ̇ܝܘܿܬܹ̈ܐ ܢܸܚܢܹܐ ܠܢܝܼܫܵܐ ܕܲܟܼܣܸܐ ܒܐ̄ܪܵܙܲܢ 510 ܘܠܵܐ ܢܸܬܼܪܵܦܹܐ ܡ̣ܢ ܣܘܼܟܵܝܵܐ ܕܚܲܝܹ̈ܐ ܡܠܝܼܟܼ̈ܐ ܀ 511 :ܬܵܘ ܢܸܬܼܓܵܘܲܣ ܒܚܹܝܠ ܥܘܼܕܪܵܢܹܗ ܪܘܼܚܵܢܝܵܐ 512 ܕܲܢܣܲܝܲܥ ܠܲܢ ܒܩܹܐܪܣܵܐ ܕܚܲܫܹ̈ܐ ܒܲܥܪܝܼܪ̈ܵܝܹܐ ܀ 513 :ܬܵܘ ܢܸܬܼܚܲܦܲܛ ܕܢܸܩܪܘܿܒܼ ܨܹܐܕܼܵܘܗܝ ܩܲܕܿܝܼܫܵܐܝܼܬܼ 514 ܕܢܸܣܲܒܼ ܡܸܢܹܗ ܣܲܡܵܐ ܕܥܵܗܹ̇ܢ ܠܲܚܒܼܵܪ̈ܵܬܲܢ ܀ 515 :ܐܲܝܟ ܕܲܠܣܲܡܵܐ ܢܛܲܦܹܝܘܗܝ ܟܠܫܵܥ ܠܪܸ̈ܓܼܫܹܐ ܘܙܵܘܥܹ̈ܐ 516 ܕܢܸܪܕܿܘܿܦ ܡܸܢܲܢ ܢܣܝܼܣܘܼܬܼ ܦܲܓܼܪܵܐ ܘܪܲܦܝܘܼܬܼ ܢܲܦܫܵܐ ܀ 517 :ܣܲܡܵܐ ܗ̄ܘ̣ ܛܵܒܼܵܐ ܕܲܒܼܛܲܝܒܿܘܼܬܼܵܐ ܡܡܲܕܿܟ ܚܲܝܠܹܗ 518 ܘܠܲܝܬܿ ܟܘܼܪܗܵܢܵܐ ܟܲܣܝܵܐ ܘܓܲܠܝܵܐ ܕܡܵܪܹܕ ܡܸܢܹܗ ܀ 519 :ܐܵܣܝܵܐ ܕܪܵܘܡ̇ܐ ܡܲܕܸܿܟ ܝܲܗ̄ܒܹܿܗ ܠܐܲܪ̈ܥܵܢܵܝܹܐ 520 ܕܲܒܼܥܘܼܕܼܪܵܢܹܗ ܢܲܐܣܘܿܢ ܟܹܐܒܹ̈ܐ ܕܪܸ̈ܥܝܵܢܲܝܗܘܿܢ ܀ pb. 356 521 :ܒܗܲܝܢܵܡܘܼܬܼܵܐ ܢܣܝܼܡܝܼܘܗܝ ܟܠܲܢ ܥܲܠ ܟܘܼ̈ܬܼܡܬܲܢ 522 ܕܢܸܩܢܸܐ ܡܸܢܹܗ ܢܘܼܚܵܡ ܦܲܓܼܪܵܐ ܘܦܘܼܪܩܵܢ ܢܲܦܫܵܐ ܀