Narsai: On Baptism - ܥܲܠ ܡܲܥܡܘܿܕܼܝܼܬܼܵܐ

1 :ܡܲܢ̣ܘ ܣܵܦܹ̇ܩ ܕܢܸܦܪܘܿܥ ܚܘܼܒܵܐ ܠܡܲܬܼܩܸܢ ܟܠܵܐ 2 ܕܐܸܬܼܵܐ ܒܚܘܼܒܹܿܗ ܕܢܵܘܠܸܕܼ ܐ̄ܢܵܫܵܐ ܪܘܼܚܵܢܵܐܝܼܬܼ ܀ 3 :ܙܥܘܿܪ ܗ̄ܘ̣ ܦܘܼܡ̇ܐ ܘܥܘܼܡܩܵܐ ܕܢܵܘܕܸܿܐ ܥܲܡܲܢ 4 ܠܚܹܝܠ ܒܵܪܘܿܝܵܐ ܕܚܲܕܸܿܬܼ ܨܲܠܡܲܢ ܘܲܥ̣ܛܵܐ ܥܵܘ̣ܠܲܢ ܀ 5 :ܐܲܝܟ ܕܲܒܼܟܼܘܼܪܵܐ ܢܲܣܟܹܿܗ ܠܨܲܠܡܲܢ ܒܡܲܥܡܘܿܕܼܝܼܬܼܵܐ 6 ܘܲܚܠܵܦ ܡܸܕܼܪܲܢ ܥܲܒܼܕܲܢ ܕܲܗܒܼܵܐ ܪܘܼܚܵܢܵܝܵܐ ܀ 7 :ܪܘܼܚܵܢܵܐܝܼܬܼ ܨܒܼܵܐ ܕܲܢܨܘܼܪܲܢ ܕܠܵܐ ܣܲܡܡܵܢܹ̈ܐ 8 ܕܠܵܐ ܬܘܼܒܼ ܬܸܫܚܲܬܼ ܦܲܐܝܘܼܬܼ ܨܲܠܡܵܢ ܒܡܵܝܘܿܬܼܘܼܬܼܵܐ ܀ 9 :ܐܘܿ ܨܲܝܵܪܵܐ ܕܨܵܐܲܪ ܨܲܠܡܹ̈ܐ ܒܕܲܦܵܐ ܕܡܲܝܵ̈ܐ 10 ܘܠܵܐ ܡܸܬܼܥܵܘܟܼܵܐ ܐܘܼܡܵܢܘܼܬܹܗ ܡ̣ܢ ܕܲܠܩܘܼܒܼܠܵܐ ܀ 11 :ܐܘܿ ܐܘܼܡ̇ܢܵܐ ܕܢܵܦܲ̄̇ܚ ܪܘܼܚܵܐ ܕܠܵܐ ܒܐܝܼ̈ܕܝܵܐ 12 ܘܙܵܪܲܥ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܒܡܵܝܘܿܬܘܼܬܼܵܐ ܀ 13 :ܐܹܝܘ ܦܘܼܩܕܵܢܵܐ ܕܲܦܫܝܼ̈ܩܵܢ ܠܹܗ ܟܠ ܥܲܣ̈ܩܵܬܼܵܐ 14 ܘܡܲܩܢܸܐ ܚܲܝܠܵܐ ܠܲܡܚܝܼ̈ܠܵܬܼܵܐ ܒܚܹܝܠ ܪܲܒܿܘܼܬܹܗ ܀ 15 :ܐܹܝܘ ܨܸܒܼܝܵܢܵܐ ܕܩܵܕܹ̇ܡ ܪܸܡܙܹܗ ܠܣܵܥܘܿܪܘܼܬܹܗ 16 ܘܥܲܕܼܠܵܐ ܢܸܵܒܼܪܸܐ ܚܙ̣ܵܝܗܝ ܒܝܼܕܲܥܬܹܗ ܠܗܵܘ̇ ܡ̇ܐ ܕܲܒܼܪܵܐ ܀ 17 :ܚܙܸܐ ܗ̄ܘ̣ܵܐ ܠܪܸܡܙܹܗ ܗܵܢ ܨܸܒܼܝܵܢܵܐ ܕܚܵܘܝܼ ܨܹܐܕܲܝܢ 18 ܘܒܹܗ ܚܵܐ̇ܪ ܗ̄ܘ̣ܵܐ ܥܲܕܼܠܐ ܢܸܒܼܪܹܝܢ ܒܪܵܫܝܼܬܼ ܕܲܒܼܪܵܢ ܀ 19 :ܩܕܼܵܡ ܬܘܼܩܵܢܹܗ ܨܝܼܪ ܗ̄ܘ̣ܵܐ ܩܕܼܵܡܘܗܝ ܨܠܸܡ ܚܘܼܕܵܬܲܢ 20 ܘܥܲܡ ܐܝܼܬܼܘܼܬܹܗ ܐܝܼܬܼ ܗ̄ܘ̣ܵܐ ܒܠܸܒܹܿܗ ܕܗܵܕܹܐ ܢܸܥܒܸܿܕܼ ܀ pb. 357 21 :ܒܚܸܟܼܡܵܐ ܣܲܥܪܵܗ̇ ܐܲܝܟ ܡ̇ܐ ܕܲܦܐܹܐ ܠܝܵܕܲܥ ܟܠܵܐ 22 ܘܚܲܟܿܝܼܡܵܐܝܼܬܼ ܓܡ݂ܲܪ ܨܸܒܼܝܵܢܹܗ ܘܚܵܘܝܼ ܚܲܝܠܹܗ ܀ 23 :ܒܪܝܼܬܼܵܐ ܕܬܸܢܝܵܐ ܒܪ̣ܵܐ ܠܲܒܼܪܝܼܬܼܵܐ ܕܲܒܼܪܵܐ ܒܪܵܫܝܼܬܼ 24 ܘܢܲܦܸܨ ܡܸܢܵܗ̇ ܥܲܬܿܝܼ̈ܩܵܬܼܵܐ ܕܡ̇ܝܘܬܼܘܼܬܼܵܐ ܀ 25 :ܫܘܼܚܬܵܐ ܕܥܵܘ̣ܠܵܐ ܨܒܼ݂ܵܐ ܕܲܢܟܲܦܲܪ ܡ̣ܢ ܡ̇ܝܘܿܬܹ̈ܐ 26 ܘܐܵܘܚܸܕܼ ܪܸܡܙܹܗ ܐ̄ܣܦܘܼܓܵܐ ܕܪܘܼܚܵܐ ܒܐܝܼܕܼܵܐ ܕܦܲܓܼܪܲܢ ܀ 27 :ܡܲܢ ܗ̄ܘ̣ ܣܵܡܹ݂ܗ ܠܨܸܒܼܝܵܢ ܚܘܼܒܹܿܗ ܕܲܠܘܵܬܼ ܓܸܢܣܲܢ 28 ܘܲܠܫܝܼܛܘܼܬܲܢ ܥܒ݂ܲܕܼ ܫܲܠܝܼܛܹ̈ܐ ܚܸܟܼ̈ܡܵܬܹܗ ܀ 29 :ܡܸܢܹܗ ܕܡܸܕܼܪܲܢ ܥܒ݂ܲܕܼ ܓܹܐܙܲܒܼܪܹ̈ܐ ܕܲܣܬܼܝܼܪ̈ܵܬܹܗ 30 ܘܡܸܢܹܗ ܐܲܩܝܼܡ ܐܲܦܸܛܪ̈ܘܿܦܹܐ ܠܡܸܬܲܠ ܚܲܝܹ̈ܐ ܀ 31 :ܟܵܡܢܹ̈ܐ ܓܒܼ݂ܵܐ ܠܹܗ ܐܲܝܟ ܡܸܨܥܵܝܹ̈ܐ ܒܹܝܬܼ ܠܹܗ ܠܥܲܡܲܢ 32 ܘܫܲܕܿܪ ܐܸܢܘܿܢ ܒܐܝܼܙܓܲܕܿܘܼܬܼܵܐ ܕܲܠܘܵܬܼ ܐ̄ܢܵܫܵܐ ܀ 33 :ܠܗܘܿܢ ܗ̄ܘ̣ ܝܲܗ̣̄ܒܼ ܗ̄ܘ̣ܵܐ ܛܲܒܼܥܵܐ ܪܲܒܵܐ ܕܐܲܠܵܗܘܼܬܹܗ 34 ܕܲܢܚܲܬܿܡܘܼܢ ܒܹܗ ܣܵܥܘܿܪܘܼܬܼܵܐ ܕܚܘܼܕܵܬܼ ܟܠܵܐ ܀ 35 :ܠܗܘܿܢ ܗ̄ܘ̣ ܐܲܓܼܥܸܠ ܥܘܼܬܼܪܵܐ ܕܪܘܼܚܵܐ ܕܠܵܐ ܡܸܣܬܲܝܒܲܟ 36 ܕܲܢܦܲܠܓܼܘܼܢܵܝܗܝ ܚܘܼܒܵܢܵܐܝܼܬܼ ܠܦܘܼܬܼ ܪܲܒܿܘܼܬܹܗ ܀ 37 :ܐܘܼܡ̇ܢܘܼܬܼܵܐ ܪܘܼܚܵܢܝܵܬܵܐ ܐܲܠܸܦ ܐܸܢܘܿܢ 38 ܕܢܸܗܘܘܿܢ ܨܵܝ̇ܪܝܼܢ ܨܠܸܡ ܚܲܝܘܼܬܼܵܐ ܒܪܲܦܵܐ ܕܡܲܝ̈ܵܐ ܀ 39 :ܐܹܝܘ ܦܲܓܼܪ̈ܵܢܹܐ ܨܵܝܪ̈ܲܝ ܪܘܼܚܵܐ ܕܠܵܐ ܒܐܝܼ̈ܕܲܝܵܐ 40 ܐܹܝܘ ܡ̇ܝܘܿܬܹ̈ܐ ܡܡܲܕܲܟܲܝ̈ ܚܲܝܹ̈ܐ ܒܡܵܝܘܿܬܼܘܼܬܼܵܐ ܀ 41 :ܐܹܝܘ ܟܵܗܢܘܼܬܼܵܐ ܟܡܵܐ ܐܸܬܼܥܲܠܝܲܬ̤ ܠܥܸܠ ܡ̣ܢ ܟܠܵܐ 42 ܘܐܸܚܕܲܬ̤ ܢܘܼܡܹܐ ܒܪܵܘܡ̇ܐ ܘܥܘܼܡܩܵܐ ܒܚܹܝܠ ܗܵܘ̇ ܕܲܓܼܒܼܵܗ̇ ܀ 43 :ܐܹܝܘ ܬܸܕܡܘܼܪܬܵܐ ܕܪܲܒ ܗ̄ܘ̣ ܬܲܗܪܵܗ̇ ܡ̣ܢ ܬܲܫܥܝܼܬܼܵܐ 44 ܕܡ̇ܝܘܿܬܼܘܼܬܼܵܐ ܬܚܸܐ ܗܝ̤ ܠܵܗܿ ܐܲܝܟ ܕܲܒܼܕܼܝܼܠܵܗ̇ ܀ 45 :ܐܹܝܘ ܨܸܒܼܝܵܢܵܐ ܕܬܲܚܬܿܝܼ ܢܲܦܫܵܗ ܨܝܕܼ ܬܘܼܩܵܢܵܘ̈ܗܝ 46 ܘܣܵܡܹ݂ܗ ܠܥܬܼܪܹܗ ܒܐܝܼܕܼܵܐ ܕܒܸܣܪܵܐ ܕܬܲܥܬܲܪ ܗܝ̤ ܠܵܗ̇ ܀ 47 :ܐܹܝܘ ܒܵܪܘܿܝܵܐ ܕܐܸܬܼܵܐ ܘܚܲܪܲܕܼ ܒܵܪܘܿܝܘܼܬܹܗ 48 ܘܐܵܘܚܸܕܼ ܩܲܢܝܵܐ ܠܲܥ̇ܒܼܵܕܼ ܐܝܼܕܼܵܘ̈ܗܝ ܕܲܢܨܘܼܪ ܗܘ̤ ܠܹܗ ܀ 49 :ܡܲܢ ܠܵܐ ܢܸܬܼܗܲܪ ܒܪܲܘܼܬܼ ܚܘܼܒܵܐ ܕܒܲܣܝܼܡܘܼܬܹܗ 50 ܕܥܲܒܼܕܹܿܗ ܠܡܸܕܼܪܲܢ ܒܵܪܹܐ ܒܪܝܼܬܼܵܐ ܒܕܼܘܼܡܝܵܐ ܕܝܼܠܹܗ ܀ 51 :ܡܲܢ ܠܵܐ ܢܵܘܕܸܐ ܠܲܒܼܛܝܼܠܘܼܬܹܗ ܕܲܠܘܵܬܼ ܓܸܢܣܲܢ 52 ܕܪܲܡܪܸܡ ܫܸܦܠܲܢ ܥܲܡ ܐܝܼܬܿܘܼܬܹܗ ܕܠܵܐ ܡܸܬܿܕܵܪܟܵܐ ܀ 53 :ܠܹܗ ܠܲܟܼܝܵܢܲܢ ܝܲܗ̣̄ܒܼ ܫܘܼܠܛܵܢܵܐ ܥܲܡ ܚܘܼܕܵܬܹܗ 54 ܕܗܘ̤ ܠܹܗ ܢܸܒܼܪܵܐ ܒܪܝܼܬܼܵܐ ܚܕܲܬܵܐ ܕܠܠܵܐ ܡܵܝܘܿܬܹ̈ܐ ܀ 55 :ܚܹܝܠ ܚܲܝܘܼܬܼܵܐ ܢܦܲܚ̣ ܒܹܗ ܒܦܲܓܼܪܲܢ ܡ̇ܘܠܸܕܼ ܚܲܫܹ̈ܐ 56 ܘܫܲܪܝܼ ܡܬܲܪܓܸܿܡ ܪ̈ܘܼܚܵܢܝܼܬܼܵܐ ܕܠܵܐ ܚܲܙ̈ܝܵܢ ܠܹܗ ܀ 57 :ܐܘܼܡ̇ܢܘܼܬܼܵܐ ܕܒܼܵܪܘܿܝܘܼܬܹܗ ܚܵܘܝܼ ܠܢܲܦܫܲܢ 58 ܘܲܩܢܵܬ̤ ܚܲܝܠܵܐ ܕܬܸܒܼܪܸܐ ܒܪܝܼܬܼܵܐ ܐܲܝܟ ܒܵܪܘܿܝܵܐ ܀ pb. 358 59 :ܒܡܸܠܬܼܵܐ ܕܡܸܢܹܗ ܨܵܝܪܵܐ ܐ̄ܢܵܫܵܐ ܒܥܘܼܒܵܐ ܕܡܲܝ̈ܵܐ 60 ܘܡܲܪܲܟܿܒܼܵܐ ܠܗܘܿܢ ܪܘܼܚܵܢܵܐܝܼܬܼ ܕܠܵܐ ܒܐܝܼ̈ܕܲܝܵܐ ܀ 61 :ܦܘܼܪܣܵܐ ܗ̄ܘ̣ ܗܵܢܵܐ ܕܪܵܡ ܒܘܼܕܵܩܹܗ ܡ̣ܢ ܬܲܫܥܝܼܬܼܵܐ 62 ܘܨܸܒܼܝܵܢ ܟܲܣܝܵܐ ܡܨܸܐ ܕܲܢܬܲܢܹܝܘܗܝ ܐܲܟܼܡܵܐ ܐܝܼܿܬܼܵܘܗܝ ܀ 63 :ܒܫܲܦܝܘܼܬܼ ܢܵܦܫܵܐ ܡܨܸܐ ܪܸܥܝܵܢܵܐ ܕܢܸܬܼܒܲܩܸܐ ܒܹܗ 64 ܘܲܚܠܵܦ ܥܲܝܢܹ̈ܐ ܒܗܵܘܢܵܐ ܚܵܙܹ̇ܐ ܠܝܲܩܝܼܪܘܼܬܹܗ ܀ 65 :ܝܲܩܝܼܪ ܫܲܪܒܹܿܗ ܘܠܵܐ ܡܸܬܼܡܲܠܲܠ ܦܲܓܼܪܵܢܵܐܝܼܬܼ 66 ܘܪܵܡ̇ܐ ܒܥܵܬܹܐ ܘܠܵܐ ܡܸܬܿܕܲܪܟܵܐ ܐܲܪܥܵܢܵܐܝܼܬܼ ܀ 67 :ܪܘܼܚܵܢܵܐܝܼܬܼ ܡܪܲܟܲܒܼ ܫܲܪܒܵܐ ܕܚܘܼܕܵܬܼ ܨܲܠܡܲܢ 68 ܘܐܸܠܵܐ ܒܪܘܼܚܵܐ ܠܵܐ ܡܨܸܐ ܦܘܼܡ̇ܐ ܡܬܲܓܸܿܡ ܫܲܪ̈ܒܵܘܗܝ ܀ 69 :ܫܡܲܝܵܢܵܐܝܼܬܼ ܡܲܕܸܿܟ ܣܲܡ̇ܐ ܠܟܹܐܒܹܗ ܕܥܵܘ̣ܠܲܢ 70 ܘܐܸܢ ܠܵܐ ܣܵܠܹ̇ܩ ܗܵܘܢܵܐ ܠܪܵܘܡ̇ܐ ܠܵܐ ܚܵܙܹ̇ܐ ܠܹܗ ܀ 71 :ܠܪܲܒܿ ܪ̈ܲܒܵܢܹܐ ܛܬܼܝܼܒܼ ܦܘܼܪܩܵܢܵܐ ܕܗܸܓܼܝܵܢ ܚܲܝܲܝ̈ܢ 72 ܘܐܸܢ ܠܵܐ ܡܕܲܡܸܐ ܐܲܝܢܵܐ ܕܝܵܠܹܦ ܠܵܐ ܡܸܣܬܲܟܲܠ ܀ 73 :ܬܵܘ ܬܲܠܡܝܼ̈ܕܹܐ ܕܪܲܒܵܐ ܡܫܝܼܚܵܐ ܢܚܘܼܪ ܬܲܩܢܵܐܝܼܬܼ 74 ܒܲܟܼܬܼܝܼ̈ܒܼܵܬܼܵܐ ܪ̈ܘܼܚܵܢܝܵܬܼܵܐ ܕܡܲܥܡܘܿܕܼܝܼܬܼܵܐ ܀ 75 :ܬܵܘ ܝܵܪ̈ܘܿܬܹܐ ܕܲܕܝܵܬܹܩܹܐ ܟܬܼܝܼܒܲܬܼ ܒܲܕܼܡ̇ܐ 76 ܚܙܵܘ ܡܲܪ̈ܗܵܛܹܐ ܕܝܘܼܬܼܪ̈ܵܢܲܝܿܘܿܢ ܒܥܲܝܢܵܐ ܕܪܘܼܚܵܐ ܀ 77 :ܬܵܘ ܐܸܬܼܒܲܩܵܘ ܒܪܸܚܡܲܬܼ ܚܘܼܒܵܐ ܕܡܲܪ̈ܗܵܛܲܝܟܿܘܿܢ 78 ܘܩܲܠܸܣܘ ܘܐܵܘܪܸܒܼܘ ܠܡܲܥܬܲܪ ܐ̄ܢܵܫܵܐ ܡ̣ܢ ܣܝܼܡܵܬܹ̈ܐ ܀ 79 :ܬܵܘ ܫܲܘܝܵܐܝܼܬܼ ܒܢܲܝܵ̈ܐ ܕܟܲܝ̈ܵܐ ܕܡܲܥܡܘܿܕܼܝܼܬܼܵܐ 80 ܢܨܘܼܪ ܒܲܪܬܼ ܩܵܠܵܐ ܕܩܵܥ̇ܝܵܐ ܒܡܲܝ̈ܵܐ ܘܩܵܢܹ̇ܝܢ ܚܲܝܠܵܐ ܀ 81 :ܬܵܘ ܢܸܬܼܒܲܩܸܐ ܦܵܪܘܿܫܵܐܝܼܬܼ ܒܐܝܼܕܼܵܐ ܕܒܸܣܪܵܐ 82 ܕܩܵܒܼ̇ܪܵܐ ܦܲܓܼܪܹ̈ܐ ܘܲܡܢܲܚܡܵܐ ܠܗܘܿܢ ܩܲܠܝܼܠܵܐܝܼܬܼ ܀ 83 :ܢܸܬܿܛܲܝܲܒܼ ܢܸܚܙܸܐ ܬܲܗܪܵܐ ܒܗܲܝܟܲܠ ܩܘܼܫܵܐ 84 ܘܚܲܝ̈ܠܲܝ ܪܵܘܡ̇ܐ ܕܲܡܙܲܚܝܼܢ ܠܹܗ ܠܐ̄ܪܵܙ ܦܘܼܪܩܵܢܲܢ ܀ 85 :ܗܵܐ ܥܸܕܼܢܵܐ ܕܬܼܵܒܲܥ̇ ܛܲܟܼܣܵܐ ܡ̣ܢ ܚܲܙܵܝܹ̈ܐ 86 ܢܲܩܸܬܼ ܟܠܢܵܫ ܚܝܵܪܵܐ ܕܗܵܘܢܹܗ ܒܲܕܼܡܸܬܼܡܲܠ̈ܠܵܢ ܀ 87 :ܗܵܐ ܡܸܬܿܛܲܝܲܒܼ ܟܵܗܢܵܐ ܕܢܸܥܘܿܠ ܠܲܩܕܼܘܿܫ ܩܘܼܕܼܫܹ̈ܐ 88 ܕܢܸܦܬܲܚ ܬܲܪܥܵܐ ܕܡܲܠܟܿܘܼܬܼ ܪܵܘܡ̇ܐ ܩܕܼܵܡ ܥܵܠܘܿܠܹ̈ܐ ܀ 89 :ܗܵܐ ܡܸܬܼܩܲܪܲܒܼ ܠܐܲܦܲܝ̈ ܬܲܪܥܵܐ ܕܒܹܝܬܼ ܡܲܠܟܿܘܼܬܼܵܐ 90 ܕܢܸܣܲܒܼ ܚܲܝܠܵܐ ܠܫܘܼܡܠܵܝ ܐ̄ܪ̈ܵܙܹܐ ܕܗܵܘܹ̇ܝܢ ܒܐܼܕܹܗ ܀ 91 :ܗܵܐ ܦܵܫܹ̇ܛ ܠܹܗ ܡܲܠܟܵܐ ܕܪܵܘܡ̇ܐ ܐܝܼܕܼܵܐ ܕܪܘܼܚܵܐ 92 ܘܣܵܐܹ̇ܡ ܒܐܝܼܕܹܗ ܛܲܒܼܥܵܐ ܕܲܫܡܹܗ ܕܢܸܛܒܿܘܿܥ ܥܸܪ̈ܒܵܘܗܝ ܀ 93 ܗܵܐ ܡܲܐܒܸܿܫ ܠܹܗ ܐܸܣܛܲܠ ܫܘܼܒܼܚܵܐ ܕܠܵܐ ܡܵܝܘܿܬܹ̈ܐ: pb. 359 94 ܕܲܢܟܲܣܸܐ ܒܵܗ̇ ܨܲܥܪܵܐ ܕܐ̄ܢܵܫܵܐ ܕܚܵܒܼܘ ܘܐܸܬܼܦܲܪܣܝܼܘ ܀ 95 :ܗܵܐ ܡܲܢܲܥ ܠܹܗ ܠܡܸܣܥܲܪ ܥܵܢ̈ܵܐ ܕܐܸܬܼܓܲܥܠܲܬ̤ ܠܹܗ 96 ܘܲܡܪܝܼܡ ܩܵܠܹܗ ܘܩܵܪܹܐ ܠܥܸܪ̈ܒܵܘܗܝ ܒܲܫܡܵܗܲܝ̈ܗܘܿܢ ܀ 97 :ܗܵܐ ܡܸܬܼܟܲܢܫܝܼܢ ܥܸܪ̈ܒܹܿܐ ܘܐܸܡܪܹ̈ܐ ܘܲܢ̈ܩܵܘܵܬܼܵܐ 98 ܘܡܲܪܡܸܐ ܥܠܲܝܗܘܿܢ ܛܲܒܼܥܵܐ ܕܚܲܝܹ̈ܐ ܕܡܸܠܲܬܼ ܡ̇ܪܹܗ ܀ 99 :ܗܵܐ ܡܲܥܸܠ ܠܗܘܿܢ ܐܲܝܟ ܕܲܠܟܼܘܼܪܵܐ ܒܝܲܕܼ ܡܸܠܲܝ̈ܗܘܿܢ 100 ܘܬܼܵܒܲܥ̇ ܡܸܢܗܘܿܢ ܚܕܼܵܐ ܬܵܘܕܿܝܼܬܼܵܐ ܕܫܸܡ ܒܵܪܘܿܝܵܐ ܀ 101 :ܒܲܕܡܘܼܬܼ ܩܲܢܝܵܐ ܠܒܼܝܼܟ ܠܹܗ ܪܸܡܙܵܐ ܪܘܼܚܵܢܵܐܝܼܬܼ 102 ܘܡܲܨܲܚ ܟܵܬܹ̇ܒ ܦܲܓܼܪܵܐ ܘܢܲܦܫܵܐ ܒܲܣܦܲܪ ܚܲܝܹ̈ܐ ܀ 103 :ܐܲܝܟ ܕܲܒܼܫܲܒܼܛܵܐ ܪܵܕܹܦ ܡܸܢܗܘܿܢ ܒܡܸܠܲܬܼ ܦܘܼܡܹܗ 104 ܚܸܫܟܵܐ ܕܛܘܼܥܝܲܝ ܕܣܲܡܝܼ ܐܸܢܘܿܢ ܡ̣ܢ ܒܘܼܝܵܢܵܐ ܀ 105 :ܡܪܝܼܡ ܒܲܪܬܼ ܩܵܠܹܗ ܘܐܵܡܲ݁ܪ ܕܲܟܼܦܘܿܪ ܒܒܼܝܼܫܵܐ ܘܚܲܝܠܹܗ 106 ܘܲܒܼܡܲܠܲܐܟܼܵܘ̈ܗܝ ܘܲܒܼܬܸܫܡܸܫܬܹܿܗ ܘܲܒܼܛܵܥܝܼܘܼܬܹܗ ܀ 107 :ܟܵܦ̇ܪܝܼܢ ܠܘܼܩܵܕܼܵܡ ܒܡܵܪܘܼܬܼ ܒܝܼܫܵܐ ܕܫܲܥܒܸܿܕܼ ܐܸܢܘܿܢ 108 ܘܐܲܟܸܿܢ ܡ̇ܘܕܹܿܝܢ ܒܚܹܝܠ ܒܵܪܘܿܝܵܐ ܕܚܲܪܲܪ ܐܸܢܘܿܢ ܀ 109 :ܬܲܪܬܹܿܝܢ ܐܵܡܲ݁ܪ ܐܲܝܢܵܐ ܕܩܵܪܸܒܼ ܠܐ̄ܪ̈ܵܙܲܝ ܥܹܕܿܬܵܐ 110 ܟܦܘܼܪܝܵܐ ܕܒܼܝܼܫܵܐ ܘܗܲܝܡܵܢܘܼܬܼܵܐ ܕܲܒܼܥܵܒܼܘܿܕܵܐ ܀ 111 :ܟܦܝܼܪ ܒܹܗ ܒܒܼܝܼܫܵܐ ܘܲܒܼܡܲܠܲܐܟܼܵܘ̈ܗܝ ܩܵܥܹ̇ܐ ܒܩܵܠܵܐ 112 ܘܠܲܝܬܿ ܠܝܼ ܥܲܡܹܗ ܫܵܘܬܵܦܘܼܬܼܵܐ ܘܐܵܦܠܵܐ ܒܡܸܠܬܼܵܐ ܀ 113 :ܐܲܝܟ ܡܸܨܥܵܝܵܐ ܩܵܐܹ̇ܡ ܟܵܗܢܵܐ ܘܲܡܫܲܐܸܠ ܠܹܗ 114 ܕܲܕܡܲܢ ܨܵܒܹ̇ܝܬܿ ܕܬܸܗܘܸܐ ܥܲܒܼܕܵܐ ܡܸܟܹܿܝܠ ܘܲܠܗܲܠ ܀ 115 :ܡܸܢܹܗ ܝܵܠܹ̇ܦ ܕܲܠܡܲܢ ܨܵܒܹ̇ܐ ܕܢܸܩܪܸܐ ܡܵܪܵܐ 116 ܘܟܸܢ ܟܵܬܹ̇ܒ ܠܹܗ ܥܲܡ ܡܸܢܝܵܢܵܐ ܕܒܼܘܼܟܼܪܹ̈ܐ ܕܪܵܘܡܵܐ ܀ 117 :ܡ̣ܢ ܣܵܛܵܢܵܐ ܘܡ̣ܢ ܡܲܠܲܐܟܼܵܘ̈ܗܝ ܡܲܗܦܸܟ ܐܲܦܵܘ̈ܗܝ 118 ܘܟܸܢ ܨܵܐܲܪ ܠܹܗ ܨܠܸܡ ܐܝܼܬܼܘܼܬܼܵܐ ܥܲܠ ܒܹܝܬܼ ܥܲܝܢܵܘ̈ܗܝ ܀ 119 :ܒܒܼܝܼܫܵܐ ܟܵܦܲ݁ܪ ܐܲܝܟ ܕܲܒܼܒܼܝܼܫܵܐ ܕܒܼܝܼܫ ܥܸܢܝܵܢܹܗ 120 ܘܲܒܼܡܲܠܲܐܟܼܵܘ̈ܗܝ ܐܲܝܟ ܕܲܒܼܣܵܢ̈ܐܹܐ ܕܡܸܠܲܬܼ ܩܘܼܫܬܵܐ ܀ 121 :ܠܡܸܠܲܬܼ ܩܘܼܫܬܵܐ ܣܵܢܹ̇ܐ ܒܝܼܫܵܐ ܘܲܒܼܢܲܝ̈ ܓܲܒܹܿܗ 122 ܘܙܵܕܹܩ ܠܐܲܝܢܵܐ ܕܪܵܚܹ̇ܡ ܩܘܼܫܬܵܐ ܕܢܸܣܢܹܐ ܐܸܢܘܿܢ ܀ 123 :ܠܣܵܢ̈ܐܲܝܟ ܡ̇ܪܝܵܐ ܣܢܹ̇ܝܬܼ ܢܸܬܼܢܸܐ ܠܹܗ ܥܲܡ ܒܲܪ ܐܝܼܫܲܝ 124 ܘܢܸܬܼܒܲܥ ܡܸܢܹܗ ܥܝܵܪܬܵܐ ܕܨܲܥܪܹ̈ܐ ܕܫܸܡ ܒܵܪܘܿܝܵܐ ܀ 125 :ܩܪܵܒܼܵܐ ܐܝܼܬܼ ܠܹܗ ܠܐܲܝܢܵܐ ܕܩܵܪܹܒܼ ܠܲܡܥܡܘܿܕܼܝܼܬܼܵܐ 126 ܥܲܡ ܣܵܛܵܢܵܐ ܘܥܲܡ ܡܲܠܲܐܟܼܵܘ̈ܗܝ ܘܥܲܡ ܬܸܫܡܸܫܬܹܿܗ ܀ 127 :ܡܵܠܲܐܟܼܵܘ̈ܗܝ ܕܹܝܢ ܐ̄ܢܵܫܵܐ ܐܸܢܘܿܢ ܠܒܼܝܼܫܲܝ̈ ܙܹܐܦܵܐ 128 ܕܲܡܫܲܡܫܝܼܢ ܠܹܗ ܒܲܫܟܼܝܼܪ̈ܵܬܼܵܐ ܕܡܲܠ̈ܝܼܵܢ ܪܘܼܫܥܵܐ ܀ 129 :ܚܲܕܼ ܡܲܠܲܐܟܹܗ ܐܝܼܬܼܵܘܗܝ ܡ̇ܐܢܝܼ ܕܹܐܒܼܵܐ ܢܟܼܝܼܠܵܐ 130 ܕܲܠܒܼܝܼܫ ܕܘܼܡܝܵܐ ܕܐܸܡܪܹ̈ܐ ܕܥܵܢ̈ܵܐ ܘܡܲܛܥܹܐ ܠܥܵܢ̈ܵܐ ܀ pb. 360 131 :ܐ̄ܚܪܹܝܢ ܡܲܠܲܐܟܹܗ ܘܵܠܲܢܛܝܵܢܘܿܣ ܛܵܠܹܡ ܩܘܼܫܬܵܐ 132 ܕܡܲܚܲܦܸܐ ܠܵܗ̇ ܠܚܵܝܑܬܼ ܡܝܼܬܹ̈ܐ ܒܣܵܪܘܿܒܼܘܼܬܹܗ ܀ 133 :ܡܲܠܲܐܟܹܗ ܗ̄ܘ̣ ܐܵܦ ܐܵܘܪܝܼܘܿܣ ܫܟܼܝܼܪ ܪܸܥܝܵܢܵܐ 134 ܕܲܪܡܸܐ ܒܟܹܐܒܼܵܐ ܕܠܵܐ ܫܲܘܝܘܼܬܼܵܐ ܕܒܼܝܼܫ ܡܼܢ ܐܲܪܝܵܐ܀ 135 :ܡܲܠܲܐܟܹܗ ܗ̄ܘܼ ܐܵܦ ܐܹܘܢܹܡܝܼܣ ܚܸܘܝܵܐ ܨܢܝܼܥܵܐ 136 ܕܲܒܼܢܘܼܟܼ̈ܬܵܬܹܗ ܡܚܲܒܸܿܠ ܢܲܦܫܵܐ ܕܡܸܫܬܲܡܥܵܢܵܘ̈ܗܝ ܀ 137 :ܡ̣ܢ ܡܲܠܲܐܟܼܵܘ̈ܗܝ ܐܝܼܬܼܵܘܗܝ ܣܲܟܼܠܵܐ ܐ̄ܦܘܿܠܝܼܢܵܪܝܼܣ 138 ܕܒܼܵܢܹ̇ܐ ܙܸܐܦܵܐ ܒܒܸܢܝܵܢ ܩܘܼܫܬܵܐ ܘܠܵܐ ܡܸܬܼܟܲܚܲܕܼ ܀ 139 :ܡ̣ܢ ܡܲܠܵܐܟܼܵܘ̈ܗܝ ܐܝܼܬܼܵܘܗܝ ܦܵܘܠܹܐ ܥܛܸܠ ܪܸܥܝܵܢܵܐ 140 ܕܡܲܩܠܸܐ ܒܓܼܘܼܡܕܼܵܐ ܠܘܼܩܒܲܠ ܚܲܝܠܵܐ ܕܡܸܠܬܹܗ ܕܐܲܒܼܵܐ ܀ 141 :ܡ̣ܢ ܡܲܠܲܐܟܼܵܘ̈ܗܝ ܢܸܡܢܹܝܘܗܝ ܐܲܟܲܚ̄ܕܼ ܐܵܦ ܐܹܘܛܹܝܟܹܐ 142 ܫܵܢܝܵܐ ܕܲܫ̣ܢܵܐ ܒܪܸܚܡܲܬܼ ܚܲܫܵܐ ܕܠܵܐ ܚܵܫܘܿܫܵܐ ܀ 143 :ܐܘܼܡ̇ܢܘܼܬܼܵܐ ܕܩܹܐܦܵܠܘܼܬܼܵܐ ܝ̄ܦܸܠ ܩܹܐܦܵܠܲܐ 144 ܕܡܙܹ̇ܓܼ ܟܠܢܵܫ ܟܝܵܢܵܐ ܚܲܝܵܐ ܒܚܲܫܲܝ̈ ܦܲܓܼܪܵܐ ܀ 145 :ܪܲܒܿܘܼ ܪܘܼܫܥܹܗ ܛܵܒܼ ܡ̣ܢ ܪܘܼܫܥܵܐ ܕܲܟܼܢܵܘܵܬܹ̈ܐ 146 ܘܗܘ̤ ܡܣܲܝܲܥ ܠܹܗ ܠܐܵܟܹܠܩܲܪܨܵܐ ܛܵܒܼ ܡ̣ܢ ܚܲܒܼܪ̈ܵܘܗܝ ܀ pb. 361 147 :ܒܗܵܠܹܝܢ ܡܲܛܥܹܐ ܣܵܢ̇ܐܐ ܕܐ̄ܢܵܫܵܐ ܠܲܒܼܢܲܝ̈ܢܵܫܵܐ 148 ܘܲܒܼܗܘܿܢ ܡܲܪܡܸܐ ܡܸܪܲܬܼ ܢܸܟܼܠܹܗ ܒܪܸܥܝܵܢ ܐ̄ܢܵܫܵܐ ܀ 149 :ܗܸܢܘ̣ܿܢ ܓܵܡ̇ܪܝܼܢ ܙܢܲܝ̈ ܬܸܫܡܸܫܬܵܐ ܕܲܫܟܼܝܼܪ݁ܵܬܹܐ 150 ܐܵܦ ܡܪܲܒܹܿܝܢ ܠܵܗ̇ ܒܲܫ̈ܟܼܵܚܵܬܼܵܐ ܕܲܓܵܠܵܬܼܐ ܀ 151 :ܬܸܫܡܸܫܬܹܿܗ ܗ̄ܝܼ ܗܵܝ̇ ܬܸܫܡܸܫܬܵܐ ܕܲܚܬܼܝܼܪܝܼܢ ܒܵܗ̇ 152 ܘܐ̄ܪ̈ܵܙܹܐ ܕܝܼܠܹܗ ܡܸܬܼܡܲܠܠܝܼܢ ܒܵܗ̇ ܘܠܵܘ ܕܲܫܪܵܪܵܐ ܀ 153 :ܠܹܗܘܼ ܡܫܲܟܫܝܼܢ ܗܲܪ̈ܣܝܘܿܛܹܐ ܒܟܼܠ ܐܸܣܟܹܿܡܝܼ̈ܢ 154 ܘܲܒܼܨܸܢ̈ܥܵܬܹܗ ܛܵܥܹ̇ܝܢ ܘܡܲܛܥܹܝܢ ܒܫܵܢܘܿܥܲܝ̈ܗܘܿܢ ܀ 155 :ܙܵܕܹܩ ܗܵܟܹܝܠ ܕܢܸܥܪܘܿܩ ܡܸܢܗܘܿܢ ܐܲܝܟ ܕܡ̣ܢ ܛܲܡ̈ܐܹܐ 156 ܘܠܵܐ ܢܸܬܼܚܲܠܲܛ ܒܲܫܟܼܝܼܪ̈ܵܬܼܵܐ ܕܣܘܼܥܪ̈ܵܢܲܝܗܘܿܢ ܀ 157 :ܛܲܡ̈ܐܹܐ ܘܒܼܝܼܫܹ̈ܐ ܢܸܩܪܸܐ ܐܸܢܘܿܢ ܠܗܘܿܢ ܘܲܠܒܼܝܼܫܵܐ 158 ܘܢܲܗܦܸܟ ܐܲܦܲܝ̈ܢ ܡ̣ܢ ܐ̄ܪ݁ܵܙܲܝܗܘܿܢ ܡܲܠܝܲܝ̈ ܪܘܼܫܥܵܐ ܀ 159 :ܪܘܼܫܥܵܐ ܡܲܠܝܵܐ ܫܟܼܵܚܬܹܿܗ ܕܒܼܝܼܫܵܐ ܘܲܕܼܫܵܡܘܿܥܵܘ̈ܗܝ 160 ܘܟܹܐܒܹ̈ܐ ܕܥܵܘ̣ܠܵܐ ܟܣܹܝܢ ܒܵܗ̇ ܒܛܘܼܥܝܲܝ ܕܐܘܼܡ̇ܢܘܼܬܹܗ ܀ 161 :ܫܟܼܵܚܬܹܿܗ ܩܲܪܩܝܼܣ ܘܐܸܣܛܵܕܝܼܘܿܢ ܘܒܹܝܬܼ ܚܸܙܘܵܢܹ̈ܐ 162 ܘܩܵܠܹ̈ܐ ܫܓܼܝܼܫܹ̈ܐ ܕܲܙܝܼܪ̈ܵܬܼܵܐ ܕܪܲܟܸܿܒܼ ܘܲܟܼܬ݂ܲܒܼ ܀ 163 :ܛܘܼܥܝܲܝ ܕܝܼܠܹܗ ܢܸܚܫܹ̈ܐ ܘܩܸܨܡܹ̈ܐ ܕܟܼܠ ܐܸܣܟܹܿܡܝܼ̈ܢ 164 ܪܦܵܦܵܐ ܕܥܲܝܢܹ̈ܐ ܨܠܵܠܵܐ ܕܐܸܕܢܹ̈ܐ ܦܸܓܼܥܵܐ ܕܐܘܼܪܚܵܐ ܀ 165 :ܒܗܵܠܹܝܢ ܟܵܦ̇ܲܪ ܬܲܠܡܝܼܕܼ ܩܘܼܫܬܵܐ ܡ̇ܐ ܕܡܸܬܿܬܿܠܡܲܪ 166 ܘܟܸܢ ܡܸܬܼܩܲܪܲܒܼ ܠܘܵܬܼ ܬܵܘܕܲܝܼܬܼܵܐ ܕܗܲܝܡܵܢܘܼܬܼܵܐ ܀ 167 :ܫܪܵܪܵܐ ܕܢܲܦܫܹܗ ܓܵܠܹ̇ܐ ܒܩܵܠܵܐ ܡܸܬܼܪܲܓܼܫܵܢܵܐ 168 ܕܗܵܐ ܠܲܡ ܫܲܢܝܼܬܼ ܡ̣ܢ ܨܹܝܕܼ ܒܝܼܫܵܐ ܠܘܵܬܼ ܒܵܪܘܿܝܵܐ ܀ 169 :ܠܫܹܐܕܹ̈ܐ ܡܲܒܼܗܸܬܼ ܒܝܲܕܼ ܒܲܪ̄ܬܼ ܩܵܠܵܐ ܕܡܸܠܲܬܼ ܦܘܼܡܹܗ 170 ܕܨܘܼܬܼܘ ܡ̇ܪ̈ܵܘܿܕܹܐ ܠܲܝܬܿ ܠܝܼ ܥܲܡܟܼܘܿܢ ܫܵܘܬܵܦܘܼܬܼܵܐ ܀ 171 :ܠܟܸܢܫܲܝ̈ ܪܵܘܡ̇ܐ ܡܚܲܕܹܿܐ ܒܩܵܠܹ̈ܐ ܕܗܲܝܡܵܢܘܼܬܹܗ 172 :ܕܬܼܵܘ ܪ̈ܘܼܚܵܢܹܐ ܚܕܼܵܘ ܥܲܡܝܼ ܕܲܚܹ̇ܝܬܼ ܡ̣ܢ ܐܲܒܼܕܵܢܵܐ 173 :ܟܢܵܬܼܟܼܘܿܢ ܐܝܼܬܲܝ ܘܒܲܪ ܦܵܠܚܘܼܬܼܵܐ ܕܣܘܼܥܪ̈ܵܢܲܝܟܿܘܿܢ 174 ܘܲܠܗܵܘ̇ ܡ̇ܪܵܐ ܕܲܡܫܲܡܫܝܼܢ ܐ̄ܢܬܿܘܿܢ ܪܓܼܝܼܓܼ ܐ̄ܢܵܐ ܕܐܸܦܠܘܿܚ ܀ 175 :ܒܲܪ ܦܵܠܚܘܼܬܼܵܐ ܕܡܲܠܟܿܘܼܬܼ ܪܵܘܡ̇ܐ ܡܟܲܢܸܐ ܢܲܦܫܹܗ 176 ܛܵܥ̇ܵܝܵܐ ܕܲܦܢ̣ܵܐ ܠܡܸܬܼܓܵܘܵܣܘܼ ܒܲܡܠܸܟ ܡܲܠ̈ܟܹܿܐ ܀ 177 ܠܪ̈ܲܒܲܝ ܒܵܬܹ̈ܐ ܕܥܹܕܲܬܼ ܩܘܼܕܼܫܵܐ ܡܦܝܼܣ ܩܲܕܼܡ̇ܝܑܬܼ: pb. 362 178 ܕܲܢܩܲܪܒܼܘܼܢܵܝܗܝ ܠܲܬܼܪܲܥ ܡܲܠܟܵܐ ܕܢܹܐܡܲܪ ܡܸܠܵܘ̈ܗܝ ܀ 179 :ܪ̈ܲܒܲܝ ܒܵܬܹܿܐ ܟܵܗܢܹ̈ܐ ܐܸܢܘܿܢ ܡܫܲܡܫܲܝ̈ ܐ̄ܪ̈ܵܙܹܐ 180 ܕܲܠܗܘܿܢ ܓܲܙܵܐ ܕܪܘܼܚܵܐ ܠܲܡܦܲܪܢܵܣܘܼ ܀ 181 :ܨܹܝܕܼ ܚܲܕܼ ܡܸܢܗܘܿܢ ܩܵܪܸܒܼ ܛܵܥ̇ܝܵܐ ܒܲܪ ܓܵܠܘܼܬܼܵܐ 182 ܕܲܢܚܲܪܪܘܼܢܵܝܗܝ ܡ̣ܢ ܫܘܼܥܒܵܕܼܵܐ ܕܒܼܝܼܫܵܐ ܕܲܫܒܼ݂ܵܝܗܝ ܀ 183 :ܐܲܝܟ ܓܲܠܘܵܝܵܐ ܩܵܐܹ̇ܡ ܥܲܪܛܸܠ ܕܠܵܐ ܬܲܟܼܣܝܼܬܼܵܐ 184 ܘܲܡܚܵܘܸܐ ܠܹܗ ܥܬܵܫܹܗ ܘܥܲܡܠܹܗ ܕܒܹܝܬܼ ܫܲܒܵܝܵܘ̈ܗܝ ܀ 185 :ܒܓܼܵܢܲܝܟ ܡܲܠܟܵܐ ܩܵܥܹ̇ܐ ܫܲܒܼܝܵܐ ܠܥܲܒܼܕܲܝ̈ ܡܲܠܟܵܐ 186 ܩܪܘܿܒܼܘ ܨܹܝܕܼ ܡܲܠܟܵܐ ܘܐܲܦܝܼܣܘ ܚܠܵܦܲܝ ܕܢܸܬܼܪܲܥܸܐ ܠܝܼ ܀ 187 :ܥܘܿܠܘ ܘܐܸܡܲܪܘ ܠܹܗ ܕܚܲܕܼ ܡ̣ܢ ܥܲܒܼܕܲܝ̈ܟ ܦܢ̣ܵܐ ܡ̣ܢ ܫܸܒܼܝܵܐ 188 ܘܗܵܐ ܡܸܬܼܟܲܫܲܦ ܕܢܵܚܙ̣ܐ ܐܲܦܲܝ̈ܟ ܚܘܼܒܵܢܵܐܝܼܬܼ ܀ 189 :ܡܸܫܒܵܐ ܫܒܸܐ ܐ̄ܢܵܐ ܠܥܲܒܼܕܵܐ ܕܡܲܪܝܼܕܼ ܡ̣ܢ ܡܵܪܘܼܬܼܵܟ 190 ܚܲܪܲܪ ܚܲܝܲܝ̈ ܡ̣ܢ ܫܘܼܥܒܵܕܹܗ ܕܠܵܐ ܢܲܦܸܠ ܒܝܼ ܀ 191 :ܥܲܒܼܕܵܟ ܐܝܼܬܲܝ ܡ̇ܪܵܐ ܛܵܒܼܵܐ ܘܲܒܼܪܵܗ̇ ܕܐܲܡܬܼܵܟ 192 ܠܡܵܢ ܦܵܠܲܚ ܐ̄ܢܵܐ ܠܥܲܒܼܕܵܐ ܒܝܼܫܵܐ ܕܡܲܪܝܼܪ ܡܸܢܵܟ ܀ 193 :ܡܲܕܿܘܼ ܦܠܲܚ̇ܬܹܿܗ ܥܵܘ̇ܠܵܐܝܼܬܼ ܠܥܵܘ̇ܠ ܟܠܹܗ 194 ܦܪܘܿܩܲܝܢܝ ܡܸܢܹܗ ܕܐܸܗܘܸܐ ܕܝܼܠܵܟ ܕܕܝܼܠܵܟ ܐܝܼܬܲܝ ܀ 195 :ܗܵܠܹܝܢ ܡܸܠܹ̈ܐ ܡܪܲܟܸܿܒܼ ܛܵܥܝܵܐ ܒܝܘܿܡ ܦܘܼܢܵܝܹܗ 196 ܒܗܵܘ̇ ܐܸܣܟܹܿܡܵܐ ܕܗܵܝ̇ ܬܲܫܥܝܼܬܼܵܐ ܕܲܒܼܪܵܐ ܙܥܘܿܪܵܐ ܀ 197 :ܡܸܛܠܵܬܹܗ ܗ̤ܘܲܝ̈ ܦܸܠ̈ܐܬܼܵܐ ܒܝܲܕܼ ܣܘܼܥܪܵܢܵܐ 198 ܘܙܵܕܹܩ ܗ̄ܘ̣ܵܐ ܠܹܗ ܕܢܹܐܡܲܪ ܡܸܠܵܘ̈ܗܝ ܠܦܘܼܬܼ ܕܲܟܼܝܼ̈ܒܼܵܢ ܀ 199 :ܗܘ̤ܝܘܼ ܕܲܟܼܬܼܝܼܒܼ ܕܲܛܥ̣ܵܐ ܘܲܢܦ݂ܲܩ ܘܲܦܢ̣ܵܐ ܘܐܸܬܼܵܐ 200 ܘܝܘܿܡ ܡܲܦܩܬܹܿܗ ܘܲܬܼܝܵܒܼܘܼܬܹܗ ܪܫܝܼܡ ܒܲܣܒܲܪܬܼܵܐ ܀ 201 :ܒܗܵܢܵܐ ܝܵܘܡ̇ܐ ܗܵܘ̇ܝܵܐ ܒܩܘܼܫܬܵܐ ܗܵܝ̇ ܕܲܟܼܬܼܝܼܒܼܵܐ 202 ܘܢܵܦ̇ܩܝܼܢ ܠܐܘܼܪܥܹܗ ܪ̈ܲܚܡܹܐ ܫܦܝܼܥܹ̈ܐ ܕܲܢܩܲܒܿܠܘܼܢܵܝܗܝ ܀ 203 :ܒܲܬܼܝܵܒܼܘܼܬܹܗ ܚܵܟܹ̇ܝܢ ܟܸܢܫܹ̈ܐ ܕܲܫܡܲܝܵܢܹ̈ܐ 204 ܘܲܡܙܲܚܝܼܢ ܠܹܗ ܐܲܝܟ ܕܲܠܡܝܼܬܼܵܐ ܕܵܦܢ̣ܵܐ ܠܚܲܝܹ̈ܐ ܀ 205 :ܐܸܟܹ̇ܠܩܲܪܨܵܐ ܡܲܟܼܪܸܐ ܒܲܠܚܘܿܕܼ ܥܲܠ ܦܘܼܢܵܝܹܗ 206 ܕܲܦܪ݂ܲܩ ܢܸܫܒܵܘ̈ܗܝ ܘܬܲܒܲܪ ܦܲܚܵܘ̈ܗܝ ܘܫܲܒܼܩܹܗ ܘܲܥܪܲܩ̣ ܀ 207 :ܡ̣ܢ ܫܘܼܥܒܵܕܼܵܐ ܕܡܲܪܝܼܪܘܼܬܹܗ ܥܪ݂ܲܩ ܚܲܛܵܝܵܐ 208 ܘܐܸܚܲܕ݂ ܓܵܘܣܵܐ ܒܡܵܪܵ ܛܵܒܼܵܐ ܕܒܲܣܝܼܡ ܚܘܼܒܹܿܗ ܀ 209 :ܡ̣ܢ ܓܵܠܘܼܬܹܗ ܦܢ̣ܵܐ ܓܲܠܘܵܝܵܐ ܠܘܵܬܼ ܓܵܒܼܘܼܠܹܗ 210 ܘܗܵܐ ܡܸܬܼܟܲܫܲܦ ܕܢܸܥܘܿܠ ܢܚܸܙ̣ܐ ܐܲܦܲܝ̈ ܡܲܠܟܵܐ ܀ 211 :ܩܪܘܼܒܼܝܵܐ ܥܵܒܹ̇ܕܼ ܒܝܲܕܼ ܒܵܥܘܼܬܹܗ ܥܲܡ ܫܲܒܵܝܹܗ 212 ܘܲܡܩܲܛܪܸܓܼ ܠܹܗ ܡ̣ܢ ܢܵܡܘܿܣܵܐ ܐܲܠܵܗܵܝܵܐ ܀ 213 :ܠܥܲܒܼܕܲ̈ܝ ܡܲܠܟܵܐ ܝܵܗܹ̇ܒܼ ܩܲܢܝܵܐ ܕܡܸܠܲܬܼ ܦܘܼܡܹܗ 214 ܘܗܸܢܘ̣ܿܢ ܟܵܬܹ̇ܒܿܝܼܢ ܘܲܡܩܲܪܒܼܝܼܢ ܠܹܗ ܩܕܼܵܡ ܕܲܝܢܵܐ ܀ pb. 363 215 :ܠܟܼܵܗܢܹ̈ܐ ܫܵܐܹ̇ܠ ܣܢܹܐܓܼܪܵܐ ܒܕܼܝܼܗܵܐ ܐܘܼܩܒܲܠ ܕܝܼܢܵܐ 216 ܘܗܸܢܘ̣ܿܢ ܐܵܡ̇ܪܝܼܢ ܕܝܼܢܵܐ ܚܠܵܦܵܘܗܝ ܟܲܕܼ ܗܘ̤ ܫܲܬܿܝܼܩ ܀ 217 :ܐܲܝܟ ܕܲܒܼܕܼܝܼܢܵܐ ܩܵܐܹ̇ܡ ܟܵܗܢܵܐ ܒܥܸܕܵܢ ܐ̄ܪ̈ܵܙܹܐ 218 ܘܲܡܩܲܛܪܸܓܼ ܠܹܗ ܠܐܵܟܹ̇ܠܩܲܪܨܵܐ ܚܠܵܦ ܚܲܛܵܝܹ̈ܐ ܀ 219 :ܐܲܝܟ ܡܸܣܟܹܿܢܵܐ ܕܲܛܠܝܼܡ ܩܵܐܹ̇ܡ ܐܵܦ ܚܲܛܵܝܵܐ 220 ܘܒܼܵܥܹ̇ܐ ܘܲܡܦܝܼܣ ܕܲܢܥܲܕܿܪܘܼܢܵܝܗܝ ܪ̈ܲܚܡܹܐ ܒܕܼܝܼܢܵܐ ܀ 221 :ܥܲܪܛܸܠܵܐܝܼܬܼ ܩܵܐܹ̇ܡ ܘܲܫܠܝܼܚ ܩܕܼܵܡ ܕܲܝܵܢܵܐ 222 ܕܒܲܨܥܝܼܪܘܼܬܹܗ ܢܪܲܥܸܐ ܠܪ̈ܲܚܡܹܐ ܕܲܢܟܲܣܘܿܢܵܝܗܝ ܀ 223 :ܕܠܵܐ ܬܲܟܼܣܝܼܬܼܿܐ ܐܵܡܲ݁ܪ ܕܝܼܢܵܐ ܥܲܡ ܣܵܺܩܘܿܪܹܗ 224 ܕܢܸܚܙܹܝܘܗܝ ܡܲܠܟܵܐ ܘܢܸܬܼܒܲܥ ܕܝܼܢܹܗ ܩܲܠܝܼܠܵܐܝܼܬܼ ܀ 225 :ܒܘܼܪ̈ܟܵܘܗܝ ܟܵܐܹ̇ܦ ܘܡܲܪܟܸܿܢ ܪܹܫܹܗ ܡ̣ܢ ܟܘܼܚܵܕܹܗ 226 ܕܒܼܵܗܹ̇ܬܼ ܕܲܢܚܘܼܪ ܠܐܲܦܲܝ̈ ܪܵܘܡܐ ܠܘܵܬܼ ܕܲܝܵܢ̇ܵܐ ܀ 227 :ܣܲܩܵܐ ܡ̇ܐܹ̇ܟ ܘܐܲܟܸܿܢ ܩܵܪܹܒܼ ܠܡܸܫܐܲܠ ܪ̈ܲܚܡܹܐ 228 ܟܲܕܼ ܡܸܬܼܥܲܗܲܕܼ ܥܲܠ ܫܘܼܥܒܵܕܹܗ ܕܲܠܘܵܬܼ ܒܝܼܫܵܐ ܀ 229 :ܬܲܪܬܹܿܝܢ ܨܵܐܲܪ ܒܒܼܘܼܪܟܵܐ ܕܣܵܐܹ̇ܡ ܒܥܸܕܵܢ ܐ̄ܪ̈ܵܙܹܐ 230 ܚܕܼܵܐ ܕܡܲܦܘܼܠܬܹܿܗ ܘܲܚܕܼܵܐ ܕܦܵܪܲܥ̇ ܐܲܝܟ ܚܲܝܵܒܼܵܐ ܀ 231 :ܗܵܝ̇ ܡܲܦܘܼܠܬܵܐ ܕܲܒܼܦܲܪܕܲܝܣܵܐ ܡܥܲܗܸܕܼ ܗܵܫܵܐ 232 ܘܥܲܡ ܣܵܛܵܢܵܐ ܕܐܲܛܥܝܼ ܠܐܲܒܼܘܼܗܝ ܐܵܡܲ݁ܪ ܕܝܼܢܵܐ ܀ 233 :ܡܸܢܹܗ ܩܵܢܹ̇ܛ ܥܲܠ ܗܵܝ̇ ܚܵܝܪ̈ܵܢ ܐܲܦܵܘ̈ܗܝ ܒܐܲܪܥܵܐ 234 ܥܕܲܡܵܐ ܕܫܵܡܲ݁ܥ ܩܵܠ ܫܘܼܒܼܩܵܢܵܐ ܘܟܸܢ ܡܸܬܼܠܲܒܲܒܼ ܀ 235 :ܠܟܼܵܗܢܵܐ ܡܩܵܘܸܐ ܕܢܲܥܸܠ ܡܸܠܵܘ̈ܗܝ ܩܕܼܵܡ ܕܲܝܵ̇ܢܵܐ 236 ܘܲܡܦܲܢܸܐ ܠܹܗ ܫܛܵܪ ܚܹܐܪܘܼܬܼܵܐ ܒܡܸܫܚܵܐ ܘܡܲܝ̈ܵܐ ܀ 237 :ܘܐܵܦ ܥܲܪܵܒܼܵܐ ܕܵܒܲܪ ܥܲܡܹܗ ܠܒܹܝܬܼ ܢܵܡܘܿܣܹ̈ܐ 238 ܕܢܸܥܘܿܠ ܢܲܣܗܸܕܼ ܥܲܠ ܛܘܼܝܵܒܼܵܐ ܕܪܸܚܡܲܬܼ ܢܲܦܫܹܗ ܀ 239 :ܒܪܸܚܡܲܬܼ ܢܲܦܫܵܐ ܡܦܝܼܣ ܕܲܢܩܵܘܸܐ ܒܪܸܚܡܲܬܼ ܩܘܼܫܬܵܐ 240 ܘܥܵܪܹܒܼ ܚܲܒܼܪܹܗ ܕܐܹܝܢ ܫܲܪܝܼܪ ܗ̄ܘ̣ ܒܘܼܩܝܵܐ ܕܢܲܦܫܹܗ ܀ 241 :ܐܲܝܟ ܗܲܕܿܝܼܐܵܐ ܗܵܘܹ̇ܐ ܠܡܸܠܵܘ̈ܗܝ ܘܲܠܣܘܼܥܪ̈ܵܢܵܘܗܝ 242 ܘܲܡܚܵܘܸܐ ܠܹܗ ܕܘܼܒܵܪ ܚܲܝܹ̈ܐ ܪ̈ܘܼܚܵܢܵܝܹܐ ܀ 243 :ܒܲܫܡܹܗ ܩܵܪܹܐ ܘܲܡܩܲܪܸܒܼ ܠܹܗ ܩܕܼܵܡ ܢܵܛܘܼܪܹ̈ܐ 244 ܕܲܢܫܲܡܗܘܼܢܵܝܗܝ ܝܵܪܬܵܐ ܘܲܒܼܪܵܐ ܘܒܲܪ ܡܲܠܟܿܘܼܬܼܵܐ ܀ 245 :ܒܲܟܼܬܼܝܼ̈ܒܼܵܬܼܵܐ ܬܵܒܲ̇ܥ ܟܵܗܢܵܐ ܫܡܹܗ ܕܐܲܒܿܝܼܕܼܵܐ 246 ܘܡܲܥܸܠ ܣܵܐܹ̇ܡ ܒܓܼܵܘ ܒܹܝܬܼ ܐܲܪ̈ܟܹܿܐ ܕܣܸܦܪ̈ܲܝ ܡܲܠܟܿܐ ܀ 247 :ܐܲܝܟ ܕܲܠܥܸܪܒܵܐ ܡܩܝܼܡ ܠܹܗ ܒܬܲܪܥܵܐ ܕܲܛܝܵܪ ܥܵܢ̈ܐ 248 ܘܪܵܫܹ̇ܡ ܦܲܓܼܪܹܗ ܘܲܡܚܲܠܸܛ ܠܹܗ ܥܲܡܟ ܡܲܪܥܝܼܬܼܵܐ ܀ 249 :ܪܘܼܫܡܵܐ ܕܡܸܫܚܵܐ ܠܵܒܹܿܟ ܒܐܝܼܕܹܗ ܩܕܼܵܡ ܚܲܙܵܝܹ̈ܐ 250 ܘܲܒܼܓܲܠ̈ܝܵܬܼܵܐ ܡܲܟܼܪܸܙ ܚܲܝܠܵܐ ܕܸܲܬܼܚܝܼܪ̈ܵܬܼܵܐ ܀ pb. 364 251 :ܘܐܲܝܟ ܕܲܒܼܛܘܼܦܣܵܐ ܡܚܵܘܸܐ ܠܥܲܝܢܹ̈ܐ ܕܪ̈ܓܼܫܲܝܼ ܦܲܓܼܪܵܐ 252 ܚܲܝܠܵܐ ܟܲܣܝܵܐ ܕܲܟܼܣܸܐ ܒܪܘܼܫܡܵܐ ܡܸܬܼܚܲܙܝܵܢܵܐ ܀ 253 :ܐܘܿ ܥܲܦܪܵܐ ܕܪܵܫܹ̇ܡ ܥܵܢܹ̈ܐ ܒܪܘܼܫܡܵܐ ܕܡ̇ܪܹܗ 254 ܘܲܡܚܲܬܸܿܡ ܠܵܗ̇ ܠܫܸܡ ܟܲܣܝܘܼܬܹܗ ܒܐܵܬ̤ܐ ܓܠܝܼܬܼܵܐ ܀ 255 :ܐܹܝܘ ܥܲܦܪܵܢܵܐ ܕܐܲܚܝܼܕܼ ܪܘܼܚܵܐ ܒܪܹܫ ܠܸܫܵܢܹܗ 256 ܘܓܼܵܙܲܪ ܥܵܘ̣ܠܵܐ ܕܢܲܦܫܵܐ ܘܦܲܓܼܪܵܐ ܒܡܸܠܲܬܼ ܦܘܼܡܹܗ ܀ 257 :ܐܹܝܘ ܡ̇ܝܘܿܬܼܵܐ ܕܲܩܒܼܝܼܥ ܒܦܘܼܡܹܗ ܢܸܒܼܥܵܐ ܪܲܒܵܐ 258 ܘܡܲܫܩܸܐ ܚܲܝܹ̈ܐ ܠܵܐ ܡ̇ܝ̈ܘܿܬܹܐ ܠܲܒܼܢܲܝ̈ ܓܸܢܣܹܗ ܀ 259 :ܐܹܝܘ ܡܸܣܟܹܿܢܵܐ ܒܲܪ ܡܸܣܟܹܿܢܹ̈ܐ ܕܲܥ̣ܬܲܪ ܡܸܢܫܹܠܝ 260 ܘܲܫܪܝܼ ܡܦܲܠܸܓܼ ܥܘܼܬܼܪܵܐ ܕܪܘܼܚܵܐ ܕܠܲܝܬܿ ܠܐܲܒܼܵܗܵܘ̈ܗܝ ܀ 261 :ܐܹܝܘ ܥܲܦܪܵܢܵܐ ܕܥܲܦܪܹܗ ܣܵܗܹ̇ܕܼ ܥܲܠ ܫܝܼܛܘܼܬܹܗ 262 ܕܩܲܒܸܿܠ ܚܲܝܠܵܐ ܕܢܸܒܼܪܸܐ ܗܘ̤ ܠܹܗ ܒܪܝܼܬܼܵܐ ܚܕܲܬܵܐ ܀ 263 :ܒܪܝܼܬܼܵܐ ܚܕܲܬܵܐ ܐܲܠܸܦ ܛܵܒܼܵܐ ܠܲܒܼܢܲܝ̈ ܒܲܝܬܹܿܗ 264 ܕܲܢܚܲܕܿܬܼܘܼܢܵܗ̇ ܠܐܘܼܡܵܢܘܼܬܼܵܐ ܕܒܼܵܪܘܿܝܘܼܬܹܗ ܀ 265 :ܥܵܘ̣ܠܵܐ ܕܐ̄ܢܵܫܵܐ ܣܲܬܼܪܹܗ ܠܪܵܘܡܐ ܕܲܥܒ݂ܲܕܼ ܐܝܼܕܼܵܘ̈ܗܝ 266 ܘܝܲܗ̣̄ܒܼ ܫܘܼܠܛܵܢܵܐ ܠܲܒܼܢܲܝ̈ܢܵܫܵܐ ܕܬܼܘܼܒܼ ܢܸܒܼܢܘܿܢܵܝܗܝ ܀ 267 :ܚ̣ܙܵܝܗܝ ܠܲܥܒܼܵܕܹ̈ ܕܲܥܬܸ݂ܩ ܘܲܒܼܠܝܼ ܒܡܵܝܘܿܬܼܘܼܬܼܵܐ 268 ܘܐܸܬܼܦܲܪܲܣ ܠܹܗ ܦܘܼܪܣܵܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 269 :ܚ̣ܙܵܐ ܕܪ̈ܵܥܠܵܢ ܗ̣̄ܘܲܝ̈ ܐܸܣܲܝ̈ ܒܲܝܬܹܿܗ ܒܚܵܫܘܿܫܘܼܬܼܵܐ 270 ܘܣܵܡ̣ ܫܲܬܸܐܣܵܘ̈ܗܝ ܒܥܘܼܡܩܵܐ ܕܡܲܝ̈ܵܐ ܘܫܲܪܲܪ ܐܸܢܹܝܢ ܀ 271 :ܒܡܲܝ̈ܵܐ ܪ̈ܦܲܝܵܐ ܨܒܼܵܐ ܕܲܢܫܲܪܲܪ ܠܓܼܘܼܫܡܹ̈ܐ ܪ̈ܦܲܝܵܐ 272 ܘܲܒܼܚܹܝܠ ܪܘܼܚܵܐ ܢܚܲܝܸܠ ܙܵܘܥܹ̈ܐ ܡܸܨܛܲܠܝܵܢܹ̈ܐ ܀ 273 :ܟܘܼܪܵܐ ܕܡܲܝ̈ܵܐ ܬܲܩܸܢ ܪܸܡܙܹܗ ܐ̄ܪܵܙܵܢܵܐܝܿܬܼ 274 ܘܲܚܠܵܦ ܢܘܼܪܵܐ ܫܲܓܼܪܹܗ ܒܪܘܼܚܵܐ ܕܚܹܝܠ ܨܸܒܼܝܵܢܹܗ ܀ 275 :ܠܹܗ ܠܲܥܲܒܼܵܕܵܐ ܥܒ݂ܲܕܼ ܐܘܼܡ̇ܢܵܐ ܥܲܠ ܬܘܼܩܵܢܹܗ 276 ܕܗܘ̤ ܠܹܗ ܢܸܣܘܿܟ ܒܟܼܘܼܪܵܐ ܕܡܲܝ̈ܵܐ ܘܪܸܬܼܚܵܐ ܕܪܘܼܚܵܐ ܀ 277 :ܬܵܘ ܚܙܵܘ ܬܸܕܼܡܘܼܪܬܵܐ ܒܡܵܝܘܿܬܼܘܼܬܼܵܐ 278 ܘܡ̇ܝ̇ܬܵܐ ܘܚܵܝ̇ܐ ܒܡܸܨܥܵܝܘܼܬܼܵܐ ܕܣܵܥܘܿܪܘܼܬܼܵܗ̇ ܀ 279 :ܬܵܘ ܢܸܬܼܒܲܩܸܐ ܒܐ̄ܪܵܙ ܡܝܼܬܼܘܼܬܲܢ ܕܲܒܼܓܼܵܘ ܡܲܝ̈ܵܐ 280 ܘܢܸܚܙܸܐ ܬܲܗܪܵܐ ܕܡܸܫܬܲܡܲܫ ܒܲܢ ܐ̄ܪܵܙܵܢܵܐܝܼܬܼ ܀ 281 :ܬܵܘ ܢܸܬܼܩܲܪܲܒܼ ܨܹܝܕܼ ܓܹܐܙܲܒܼܪܹ̈ܐ ܕܓܲܙܲܝ̈ ܥܹܕܿܬܵܐ 282 ܘܢܸܫܡܲܥ ܡܸܢܗܘܿܢ ܕܐܲܝܟܲܢ ܝܵܗ̇ܒܿܝܼܢ ܚܲܝܹ̈ܐ ܒܡܲܝ̈ܵܐ ܀ 283 :ܢܸܥܘܿܠ ܥܲܡܗܘܿܢ ܠܲܩܕܼܘܿܫ ܩܘܼܕܼܫܹ̈ܐ ܐ̄ܪܵܙܵܢܵܝܵܐ 284 ܘܢܹܐܠܲܦ ܡܸܢܗܘܿܢ ܦܘܼܫܵܩ ܐ̄ܪ̈ܵܙܹܐ ܕܡ̇ܘܬܵܐ ܘܚܲܝܹ̈ܐ ܀ 285 :ܡܵܘܬܵܐ ܘܚܲܝܹ̈ܐ ܐܝܼܬܼܵܘܗܝ ܐ̄ܪ̈ܵܙܵܐ ܕܡܲܥܡܘܿܕܼܝܼܬܼܵܐ 286 ܘܬܲܪܬܹܿܝܢ ܒܲܚܕܼܵܐ ܡܸܣܬܲܥܪ̈ܵܢ ܒܹܗ ܒܚܲܕܼ ܟܵܗܢܘܼܬܼܵܐ ܀ 287 ܒܝܲܕܼ ܟܵܗܢܘܼܬܼܵܐ ܨܒܼܵܐ ܒܵܪܘܿܝܵܐ ܕܢܸܓܼܠܸܐ ܚܲܝܠܹܗ: pb. 365 288 ܘܠܵܗ̇ ܗ̄ܘ̣ ܐܲܓܼܥܸܠ ܥܘܼܬܼܪܵܐ ܪܲܒܵܐ ܕܒܲܣܝܼܡܘܼܬܹܗ ܀ 289 :ܠܟܼܵܗܢܹ̈ܐ ܐܲܩܝܼܡ ܐܲܦܸܛܪ̈ܵܘܿܦܹܐ ܥܲܠ ܡܲܪ̈ܗܵܛܵܘܗܝ 290 ܕܐܲܝܟ ܫܲܪܝܼܪܹ̈ܐ ܢܦܲܠܓܼܘܼܢ ܥܘܼܬܼܪܵܐ ܠܲܒܼܢܲܝ̈ ܒܲܝܬܹܿܗ ܀ 291 :ܠܗܘܿܢ ܝܲܗ̣̄ܒܼ ܛܲܒܼܥܵܐ ܕܫܸܡ ܐܝܼܬܼܘܼܬܹܗ ܕܠܵܐ ܡܸܬܿܕܲܪܟܵܐ 292 ܕܢܸܗܘܘܿܢ ܛܵܒܼܥ̇ܝܼܢ ܠܲܒܼܢܲܝ̈ܢܵܫܵܐ ܒܲܫܡܵܐ ܕܩܘܼܕܼܫܵܐ ܀ 293 :ܛܲܒܼܥܵܐ ܕܲܫܡܹܗ ܡܲܪܡܹܝܢ ܟܠܢܵܫ ܥܲܠ ܡܲܪܥܝܼܬܹܗ 294 ܘܲܬܼܠܝܼܬܼܵܐܝܼܬܼ ܪܵܡܫ̇ܝܼܢ ܐ̄ܢܵܫܵܐ ܠܲܒܼܢܲܝ̈ܢܵܫܵܐ ܀ 295 :ܦܲܪܙܠܵܐ ܕܡܸܫܚܵܐ ܐܵܚܹ̇ܕܼ ܟܵܗܢܵܐ ܒܪܹܫ ܨܼܒ̈ܥܵܬܹܗ 296 ܘܪܵܫܹ̇ܡ ܦܲܓܼܪܵܐ ܘܪ̈ܓܼܫܹܐ ܕܢܲܦܫܵܐ ܒܚܲܪܝܼܦܘܼܬܹܗ ܀ 297 :ܡܸܫܚܵܐ ܠܵܛܹ̇ܫ ܒܲܪ ܡ̇ܝܘܿܬܹ̈ܐ ܒܡܸܠܲܝ̈ ܦܘܼܡܹܗ 298 ܘܲܡܚܲܪܸܦ ܠܹܗ ܐܲܝܟ ܕܲܠܦܲܪܙܠܵܐ ܠܡܸܓܼܙܲܪ ܥܵܘ̣ܠܵܐ ܀ 299 :ܫܡܵܗܹ̈ܐ ܬܠܵܬܼܵܐ ܬܵܢܹ̇ܐ ܒܛܲܟܼܣܵܐ ܚܲܕܼ ܒܵܬܲܪ ܚܲܕܼ 300 ܘܲܬܼܠܝܼܬܼܵܐܝܼܬܼ ܡܫܲܡܠܸܐ ܘܓܼܵܡܲ݁ܪ ܐ̄ܪܵܙ ܦܘܼܪܩܵܢܲܢ ܀ 301 :ܐܹܝܘ ܚܲܠܵܫܵܐ ܟܡܵܐ ܪܲܒܿ ܬܲܗܪܵܐ ܕܡܸܫܬܲܡܲܫ ܒܵܟ 302 ܘܲܙܥܘܿܪ ܦܘܼܡ̇ܐ ܕܢܹܐܡܲܪ ܕܲܟܼܡܵܐ ܗ̄ܘ̣ ܚܹܝܠ ܒܘܼܕܵܩܹܗ ܀ 303 :ܐܹܘܝ ܬܲܚܬܵܝܵܐ ܟܡܵܐ ܐܸܬܼܥܲܠܲܬ̤ ܬܵܚܘܿܒܼܘܼܬܼܵܟ 304 ܘܠܵܐ ܡܨܸܐ ܗܵܘܢܵܐ ܕܢܸܣ̣ܿܩ ܥܲܡܵܟ ܠܐܲܝܟܵܐ ܕܡܲܛܝܼܬܿ ܀ 305 :ܐܹܝܘ ܒܲܪܢܵܫܵܐ ܠܟܼܵܗܢܵܐ ܗ̄ܘ̣ ܐܸܡ̇ܪܹܬܼ ܗܵܠܹܝܢ ܕܐܸܡ̇ܪܹܬܼ 306 ܟܡܵܐ ܐܸܫܬܼܠܲܛܬܿ ܕܐܝܼܬܼ ܠܵܟ ܕܬܸܗܘܸܐ ܝܵܗܹ̇ܒܼ ܚܲܝܹ̈ܐ ܀ 307 :ܚܲܝܹ̈ܐ ܝܵܗܹ̇ܒܼ ܟܵܗܢܵܐ ܠܚܲܒܼܪ̈ܵܘܗܝ ܒܝܲܕܼ ܬܸܫܡܸܫܬܹܿܗ 308 ܘܐܘܼܪܚܵܐ ܕܵܪܹܫ ܠܲܟܼܢܵܘܵܬܹ̈ܗ ܠܘܵܬܼ ܕܲܥܬܼܝܼ̈ܕܼܵܢ ܀ 309 :ܛܲܟܼܣܵܐ ܕܦܘܼܡ̇ܐ ܡܡܲܠܸܠ ܠܙܵܘܥܹ̈ܐ ܘܲܠܗܲܕܵܡܹ̈ܐ 310 ܘܲܚܠܵܦ ܟܠܢܵܫ ܡܲܬܼܪܓܸܿܡ ܩܵܠܹ̈ܐ ܕܫܘܼܒܼܩܵܢ ܥܵܘ̣ܠܵܐ ܀ 311 :ܡܸܫܚܵܐ ܘܡܲܝܵ̈ܐ ܣܵܐܹ̇ܡ ܠܘܼܩܕܼܵܡ ܐܲܝܟ ܫܲܬܼܐܸܣܹ̈ܐ 312 ܘܲܒܼܦܸܬܼܓܼܵܡܵܘ̈ܗܝ ܡܫܲܟܼܠܸܠ ܒܵܢܹ̇ܐ ܫܸܡ ܐܝܼܬܼܘܼܬܼܵܐ ܀ 313 :ܒܡܸܫܚܵܐ ܫܲܪܝܵܐ ܘܡܲܝ̈ܵܐ ܪ̈ܦܲܝܵܐ ܢܵܣܹ̇ܿܟ ܦܲܓܼܪܵܐ 314 ܘܲܚܠܵܦ ܡܸܕܼܪܵܐ ܡܫܲܚܠܸܦ ܥܵܒܹ̇ܕܼ ܕܲܗܒܼܵܐ ܕܲܟܼܝܵܐ ܀ 315 :ܡܲܡ ܠܵܐ ܢܸܬܼܗܲܪ ܒܚܲܝܠܵܐ ܕܲܩܢܵܬ̤ ܡܸܣܟܹܿܝܢܘܼܬܼܵܢ 316 ܕܗܝ̤ ܠܵܗ̇ ܬܲܥܬܲܪ ܡ̣ܢ ܡ̇ܘܗܲܒܼܬܼܵܐ ܕܠܵܐ ܡܸܬܿܕܿܪܟܵܐ ܀ 317 :ܐܲܝܟ ܓܹܐܙܲܒܼܪܵܐ ܩܵܐܹ̇ܡ ܟܵܗܢܵܐ ܒܲܬܼܪܲܥ ܩܘܼܕܼܫܵܐ 318 ܘܡܲܪܡܸܐ ܩܠܝܼܕܹ̈ܐ ܕܡܸܠܲܬܼ ܦܘܼܡܹܗ ܘܦܵܬܲ̇ܚ ܚܲܝܹ̈ܐ ܀ 319 :ܫܡܵܗܹ̈ܐ ܬܠܵܬܼܵܐ ܡܲܪܡܸܐ ܒܡܸܫܚܵܐ ܘܲܡܩܲܕܹܿܫ ܠܹܗ 320 ܕܢܸܗܘܸܐ ܡܩܲܕܹܿܫ ܛܲܡܐܘܼܬܼ ܐ̄ܢܵܫܵܐ ܒܩܲܕܼܝܼܫܘܼܬܹܗ ܀ 321 :ܒܫܸܡ ܟܲܣܝܘܼܬܹܗ ܪܵܫܹ̇ܡ ܦܲܓܼܪܵܐ ܡܸܬܼܚܲܙܝܵܢܵܐ 322 ܘܥܵܐܹ̇ܠ ܚܲܝܠܵܐ ܕܚܘܼܪܦܹܗ ܕܲܫܡܵܐ ܥܕܲܡ̇ܐ ܠܢܲܦܫܵܐ ܀ 323 :ܐܹܝܘ ܬܸܕܡܘܼܪܬܵܐ ܕܣܵܥܲ݁ܪ ܐ̄ܢܵܫܵܐ ܒܲܕܼܠܵܐ ܕܝܼܠܹܗ 324 ܕܪܵܫܹ̇ܡ ܦܲܓܼܪܹܐ ܡܸܨܛܲܠܝܵܢܹ̈ܐ ܘܚܵܫܝܼܢ ܕܲܠܓܼܵܘ ܀ pb. 366 325 :ܒܛܲܟܼܣܵܐ ܕܐܵܣܝܵܐ ܣܵܥ̇ܲܪ ܐܵܦ ܗܘ̤ ܨܹܝܕܼ ܗܲܕܵܡܹ̈ܐ 326 ܕܓܸܵܐܹ̇ܫ ܕܼܠܒܲܪ ܘܡܲܕܼܪܸܟ ܚܲܫܵܐ ܕܹܝܕܼ ܓܵܘܝܹ̈ܐ ܀ 327 :ܠܦܲܓܼܪܵܐ ܘܢܲܫܵܐ ܡܩܲܪܸܒܼ ܦܘܼܪ̈ܣܹܐ ܕܐܘܼܡܵܢܘܼܬܹܗ 328 ܘܓܲܠܝܵܐ ܘܟܲܣܝܵܐ ܡܲܐܣܸܐ ܒܚܲܝܠܵܐ ܐܲܠܵܗܵܝܵܐ ܀ 329 :ܐܲܠܵܗܵܐܝܼܬܼ ܡܡܲܪܸܟ ܣܲܡܵܐ ܕܡܲܓܼܥܲܠ ܒܐܝܼܕܼܵܘ̈ܗܝ 330 ܘܲܠܟܼܠ ܟܹܐܒܼܝܼ̈ܢ ܡܲܐܣܸܐ ܒܚܲܝܠܹܗ ܘܠܵܐ ܡܸܬܼܒܲܨܲܪ ܀ 331 :ܐܲܝܟ ܚܵܢܘܼܬܼܵܐ ܦܬܲܚ̣ ܠܹܗ ܬܲܪܥܵܐ ܕܗܲܝܟܲܠ ܩܘܼܕܫܵܐ 332 ܘܣܵܥܲ݁ܪ ܡܲܪ̈ܥܹܐ ܘܥܵܨ̇ܒܼ ܟܹܐܒܹ̈ܐ ܕܲܟܼ̈ܢܵܘܵܬܹܗ ܀ 333 :ܒܪܘܼܫܡܵܐ ܕܲܠܒܲܪ ܓܵܐܹ̇ܫ ܟܹܐܒܹ̈ܐ ܟܣܲܝ̈ܵܐ ܕܠܓܼܵܘ 334 ܘܐܲܪܟܸܿܢ ܣܵܐܹ̇ܡ ܣܲܡܵܐ ܕܪܘܼܚܵܐ ܒܐܵܬ̤ܐ ܕܡܲܝ̈ܵܐ ܀ 335 :ܒܩܵܠܵܐ ܓܲܠܝܵܐ ܡܲܟܼܪܸܙ ܚܲܝܠܵܐ ܕܲܣܬܼܝܼܪ̈ܵܬܹܗ 336 ܘܲܒܼܠܸܫܵܢܹܗ ܡܦܲܠܸܓܼ ܥܘܼܬܼܪܵܐ ܪܘܼܚܵܢܵܝܵܐ ܀ 337 :ܩܵܠܹ̈ܐ ܡܲܫܡܲܥ ܒܐܸܕܢܲܝ̈ ܥܵܢ̈ܐ ܟܲܕܼ ܪܵܫܹ̇ܡ ܠܵܗ̇ 338 ܘܨܵܝ̇ܬܵܐ ܒܚܘܼܒܵܐ ܫܡܵܗܹ̈ܐ ܬܠܵܬܼܵܐ ܟܲܕܼ ܡܸܬܼܟܲܪܙܝܿܢ ܀ 339 :ܒܲܫܡܵܐ ܕܐܲܒܼܵܐ ܘܕܲܒܼܪܵܐ ܘܪܘܼܚܵܐ ܡܚܲܬܸܿܡ ܡܸܠܵܘ̈ܗܝ 340 ܘܲܡܫܲܪܲܪ ܠܹܗ ܠܐܲܝܢܵܐ ܕܥܵܡܹ̇ܕܼ ܒܲܫܡܵܗܲܝ̈ܗܘܿܢ ܀ 341 :ܫܡܵܗܹ̈ܐ ܬܠܵܬܼܵܐ ܨܵܐܲܪ ܒܐܲܦܵܘ̈ܗܝ ܒܲܕܼܡܘܼܬܼ ܣܲܟܿܪܵܐ 342 ܕܢܸܚܙܹܐ ܛܪܘܼܢܵܐ ܨܠܸܡ ܐܝܼܬܼܘܼܬܼܵܐ ܒܪܹܫ ܒܲܪܢܵܫܵܐ ܀ 343 :ܠܒܸܗܬܲܬܼ ܫܹܐܕܹ̈ܐ ܗ̄ܝܼ ܥܸܠܲܬܼ ܪܘܼܫܡܵܐ ܕܲܒܼܒܹܝܬܼ ܥܲܝܢܹ̈ܐ 344 ܕܡ̇ܐ ܕܡܸܬܼܒܲܩܹܝܢ ܒܪܹܫ ܒܲܪܢܵܫܵܐ ܢܚܘܼܒܼܘܼܢ ܡܸܢܹܗ ܀ 345 :ܡܸܛܠܵܬܼܗܘܿܢ ܗܵܘܹ̇ܝܢ ܐ̄ܪ̈ܵܙܹܐ ܕܡܸܫܚܵܐ ܘܡܲܝ̈ܵܐ 346 ܕܢܸܗܘܘܿܢ ܙܷܲܢܵܐ ܠܘܼܩܒܲܠ ܩܹܐܪܣܵܐ ܕܬܲܟܼܬܿܘܼܫܲܝ̈ܗܘܿܢ ܀ 347 :ܙܲܝܢܵܬ ܗ̄ܘ̣ ܡܸܫܚܵܐ ܕܡܸܬܼܡܲܫܚܝܼܢ ܒܹܗ ܐܲܪ̈ܥܵܢܵܝܹܐ 348 ܕܠܵܐ ܢܸܬܿܬܲܚܕܿܘܼܢ ܡ̣ܢ ܪ̈ܘܼܚܵܢܹܐ ܒܕܲܪܵܐ ܟܲܣܝܵܐ ܀ 349 :ܛܲܒܼܥܵܐ ܗ̄ܘ̣ ܪܲܒܵܐ ܕܲܡܠܸܟ ܡܲܠ̈ܟܹܿܐ ܕܡܸܬܿܛܲܒܼܥܝܼܢ ܒܹܗ 350 ܕܢܸܗܘܘܿܢ ܦܵܠ̇ܚܝܼܢ ܒܐܸܣܛܵܕܼܝܼܘܿܢ ܪܘܼܚܵܢܵܝܬܵܐ ܀ 351 :ܒܒܹܝܬܼ ܥܲܝܢܵܝ̈ܗܘܿܢ ܡܩܲܒܿܠܝܼܢ ܛܲܒܼܥܵܐ ܪܘܼܚܵܢܝܵܐ 352 ܕܢܸܗܘܸܐ ܢܲܗܝܼܪ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 353 :ܒܲܕܼܡܘܼܬܼ ܦܵܥܠܹ̈ܐ ܚܦܝܼܛܹ̈ܐ ܩܵܝ̇ܡܝܼܢ ܒܲܬܼܪܲܥ ܡܲܠܟܵܐ 354 ܘܟܼܵܗܢܵܐ ܒܪܹܫܗܘܿܢ ܐܲܝܟ ܪܲܒܿ ܚܲܝܠܵܐ ܒܪܹܫ ܡܲܪܥܝܼܬܹܗ ܀ 355 :ܐܲܝܟ ܕܲܠܩܹܐܪܣܵܐ ܡܩܝܼܡ ܣܸܕܼܪ̈ܲܝܗܘܿܢ ܒܥܸܕܼܵܢ ܐ̄ܪ̈ܵܙܹܐ 356 ܕܢܸܗܘܘܿܢ ܫܵܕܹܝܢ ܓܹܐܪܹ̈ܐ ܫܢܝܼܢܹ̈ܐ ܒܲܒܼܥܸܠܕܲܪܵܐ ܀ 357 :ܓܐܪܹ̈ܐ ܕܡܸܠܹ̈ܐ ܡܪܲܟܸܿܒܼ ܣܵܐܹ̇ܡ ܒܓܼܵܘ ܦܘܼܡܲܝ̈ܗܘܿܢ 358 ܕܢܸܗܘܘܿܢ ܚܵܠܝܼܢ ܠܘܼܩܒܲܠ ܒܝܼܫܵܐ ܕܫܲܥܒܸܿܕܼ ܐܸܢܘܿܢ ܀ 359 :ܢܝܼܫܵܐ ܬܵܪܹܝܨ ܩܕܼܵܡ ܥܲܝܢܲܝ̈ܗܘܿܢ ܕܢܸܬܿܕܲܡܘܿܢ ܒܹܗ 360 ܘܐܲܝܟ ܕܲܒܼܝܲܬܼܪܵܐ ܡ̇ܬܲܚ ܡܸܠܹ̈ܐ ܒܠܸܫܵܢܲܝ̈ܗܘܿܢ ܀ 361 :ܠܒܼܘܼܩܝܵܐ ܥܵܐ̇ܠܝܼܢ ܒܫܘܼܪܵܝ ܩܹܐܪܣܵܐ ܕܐܸܙܕܲܡܲܢܘ ܠܹܗ 362 ܟܲܕܼ ܡܸܬܼܒܲܚܪܝܼܢ ܒܝܲܕܼ ܬܵܘܕܿܝܼܬܼܵܐ ܕܪܸ̈ܥܝܵܢܲܝܗܘܿܢ ܀ pb. 367 363 :ܐܲܝܟ ܕܲܒܼܩܘܼܫܬܵܐ ܩܵܐܹ̇ܡ ܟܵܗܢܵܐ ܒܪܹܫ ܣܸܕܼܪ̈ܲܝܗܘܿܢ 364 ܘܡܲܚܵܘܸܐ ܠܗܘܿܢ ܢܝܼܫܵܐ ܕܩܘܼܫܬܵܐ ܕܢܸܚܢܘܿܢ ܫܲܦܝܼܪ ܀ 365 :ܟܵܦ̇ܪܝܼܢ ܒܢܝܼܫܵܐ ܒܢܝܼܫܵܐ ܘܚܲܝܠܹܗ ܘܲܕܼܡܲܠܲܐܟܼܵܘ̈ܗܝ 366 ܘܐܲܟܸܿܢ ܨܐܲ݁ܪ ܢܝܼܫܵܐ ܕܡܲܠܟܵܐ ܒܒܹܝܬܼ ܥܲܝܢܲܝ̈ܗܘܿܢ ܀ 367 :ܟܵܦ̇ܪܝܼܢ ܘܡ̇ܘܕܹܿܝܢ ܬܲܪܬܹܿܝܢ ܒܲܚܕܼܵܐ ܕܠܵܐ ܦܘܼܠܵܓܼܵܐ 368 ܟܦܘܼܪܝܵܐ ܒܒܼܝܼܫܵܐ ܘܬܼܵܘܕܲܝܼܬܼ ܠܸܒܵܐ ܒܫܸܡ ܐܝܼܬܼܘܼܬܼܵܐ ܀ 369 :ܩܝܵܡܵܐ ܡܩܝܼܡܝܼܢ ܒܝܲܕܼ ܟܵܗܢܘܼܬܼܵܠ ܨܹܝܕܼ ܐܝܼܬܼܘܼܬܼܵܐ 370 ܕܠܵܐ ܬܘܼܒܼ ܗܵܦܟܿܝܼܢ ܨܹܝܕܼ ܣܵܛܵܢܵܐ ܒܣܘܼܥܪ݁ܵܢܲܝܗܘܿܢ ܀ 371 :ܠܟܼܵܣܢܵܐ ܝܵܗ̇ܒܿܝܼܢ ܫܘܼܘܕܵܝ ܡܸܠܹ̈ܐ ܕܪܸ̈ܥܝܵܢܲܝܗܘܿܢ 372 ܘܡܲܥܸܠ ܩܵܪܹܐ ܨܕܼܵܡ ܨܸܒܼܝܵܢܵܐ ܐܲܠܵܗܵܝܵܐ ܀ 373 :ܬܪܲܥ ܩܲܪܛܲܝܣܵܐ ܕܒܹܝܬܼ ܡܲܠܟܿܘܼܬܼܵܐ ܐܲܚܝܼܕܼ ܒܐܝܼܕܼܵܘ̈ܗܝ 374 ܘܫܲܠܝܼܛ ܗ̄ܘ̣ ܠܹܗ ܕܢܸܟܼܬܿܘܿܒܼ ܐ̄ܢܵܫܵܐ ܒܝܲܕܼ ܦܵܠܵܛܝܼܢ ܀ 375 :ܒܲܫܡܵܗܲܝ̈ܗܘܿܢ ܩܵܪܹܐ ܘܲܡܩܝܼܡ ܥܲܒܼ̈ܕܲܝ ܡܲܠܟܵܐ 376 ܘܡܲܥܒܲܪ ܚܲܕܼ ܚܲܕܼ ܘܛܵܒܲ݁ܥ ܒܐܲܦܵܘ̈ܗܝ ܛܲܒܼܥܵܐ ܕܡܸܫܚܵܐ ܀ 377 :ܒܩܵܠ ܦܸܬܼܓܼܵܡܵܘ̈ܗܝ ܡܲܟܼܪܸܙ ܚܲܝܠܵܐ ܕܲܟܼܣܸܐ ܒܡܸܠܵܘ̈ܗܝ 378 ܕܲܕܼܡܲܢ ܐܸܢܘܿܢ ܘܲܫܡܵܐ ܕܡܲܢ̣ܘܼ ܕܡܸܬܿܛܲܒܼܥܝܼܢ ܒܹܗ ܀ 379 :ܦܠܵܢ ܠܲܡ ܥܲܒܼܕܵܐ ܗ̄ܘ̣ ܕܲܡܠܸܟ ܡܲܠ̈ܟܹܿܐ ܕܲܠܥܸܠ ܘܕܲܠܬܲܚܬܿ 380 ܘܒܲܫܡܹܗ ܡܛܲܒܲܥ ܕܢܸܗܘܸܐ ܦܵܠ̇ܲܚ ܐܲܝܟ ܨܸܒܼܝܵܢܹܗ ܀ 381 :ܫܸܡ ܐܝܼܬܼܘܼܬܼܵܐ ܡܡܲܕܸܿܟ ܒܐܝܼܕܼܵܘ̈ܗܝ ܥܲܡܹܗ ܕܡܸܫܚܵܐ 382 ܘܪܸܫܹ̇ܡ ܘܐܲܡܲ݁ܪ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܀ 383 :ܡܸܬܼܪܫܸܡ ܐܲܡܲ݁ܪ ܠܦܵܢ ܒܲܫܡܵܗܹ̈ܐ ܬܠܵܬܼܵܐ ܕܲܫܘܹܝܢ 384 ܕܠܲܝܬܿ ܦܘܼܪܫܵܢܵܐ ܕܩܲܫܝܼܫ ܘܲܙܥܘܿܪ ܒܹܝܬܼ ܚܲܕܼ ܠܲܐ̄ܚܪܹܝܢ ܀ 385 :ܠܵܘ ܪܵܫܹ̇ܡ ܐ̄ܢܵܐ ܐܵܡܲ݁ܪ ܟܵܗܢܵܐ ܐܸܠܵܐ ܕܡܸܬܼܪܫܸܡ 386 ܕܠܵܐ ܕܝܼܠܹܗ ܗ̄ܘ̣ ܛܲܒܼܥܵܐ ܕܡܲܪܡܸܐ ܐܸܠܵܐ ܕܡ̇ܪܹܗ ܀ 387 :ܗܘ̤ ܡܸܨܥܵܝܵܐ ܗ̄ܘ̣ ܕܲܓܼܒܸܐ ܒܛܲܝܒܿܘܼ ܠܲܡܫܲܡܵܫܘܼ 388 ܘܒܲܕܼܠܵܐ ܕܝܼܠܹܗ ܪܵܕܹܦ ܥܵܘ̣ܠܵܐ ܘܝܵܗܹ̇ܒܼ ܪܘܼܚܵܐ ܀ 389 :ܒܫܸܡܚܵܐ ܓܼܠܝܵܐ ܡܚܵܘܸܐ ܚܲܝܠܵܐ ܕܐܝܼܬܼ ܒܲܫܡܵܗܹ̈ܐ 390 ܕܲܡܨܸܐ ܡܫܲܪܲܪ ܪܲܦܝܘܼܬܼ ܐ̄ܢܵܫܵܐ ܒܲܕܼܠܵܐ ܓܼܠ̈ܝܵܢ ܀ 391 :ܫܡܵܗܹ̈ܐ ܬܠܵܬܼܵܐ ܬܵܢܹ̇ܐ ܒܡܸܫܚܵܐ ܒܐ̄ܢܵܫܵܐ ܟܠܹܗ 392 ܕܠܵܐ ܢܲܟܿܘܿܢܵܝܗܝ ܫܹܐܕܹ̈ܐ ܛܪ̈ܘܼܢܹܐ ܘܚܲܫܹ̈ܐ ܠܙܝܼ̈ܙܹܐ ܀ 393 :ܠܵܐ ܗ̄ܘ̣ܵܐ ܒܡܸܫܚܵܐ ܗ̄ܘ̣ ܕܢܵܛܲܪ ܐ̄ܢܵܫܵܐ ܡ̣ܢ ܢܸܟܼܝܵܢܹ̈ܐ 394 ܚܹܝܠ ܐܝܼܬܼܘܼܬܼܵܐ ܗ̄ܘ̣ ܕܘܒܲܩܢܹܐ ܚܲܝܠܵܐ ܠܲܡܚܝܼܠܘܼܬܼܵܐ ܀ 395 :ܡܸܫܚܵܐ ܐܵܬ̤ܐ ܗ̄ܘ̣ ܕܡܲܟܼܪܸܙ ܚܲܝܠܵܐ ܐܲܠܵܗܵܝܵܐ 396 ܘܲܒܼܓܲܥ̈ܝܵܬܼܵܐ ܡܫܲܪܲܪ ܥܲܒܼܕܼܵܐ ܗ̄ܘ̣ ܒܲܣܬܼܝܼܪ̈ܵܬܼܵܐ ܀ 397 :ܒܚܲܝܠܵܐ ܕܝܼܠܹܗ ܩܵܢܹ̇ܝܢ ܚܲܝܠܵܐ ܦܲܓܼܪܵܐ ܘܢܲܦܫܵܐ 398 ܘܠܵܐ ܬܘܼܒܼ ܩܵܢ̇ܛܝܼܢ ܡ̣ܢ ܢܸܟܼܝܵܢܹ̈ܐ ܕܡ̇ܝܘܿܬܼܘܼܬܼܵܐ ܀ pb. 368 399 :ܐܲܝܟ ܐܲܬܼܠܹܝܛܹ̈ܐ ܢܵܚ̇ܬܿܝܼܢ ܩܵܝ̇ܡܝܼܢ ܒܐܸܣܛܵܕܼܝܘܿܢ 400 ܘܐܵܚ̇ܕܿܝܼܢ ܕܲܪܵܐ ܥܲܡ ܚܘܼܬܼܚܵܬܹ̈ܐ ܪ̈ܦܲܝܵܐ ܕܒܼܗܘܿܢ ܀ 401 :ܗܵܢܵܐ ܚܲܝܠܵܐ ܡܲܩܢܸܐ ܡܸܫܚܵܐ ܕܲܡܫܝܼܚܘܼܬܼܵܐ 402 ܠܵܐ ܗ̄ܘ̣ܵܐ ܡܸܫܚܵܐ ܐܸܠܵܐ ܪܘܼܚܵܐ ܕܲܡܚܲܝܸܠ ܠܹܗ ܀ 403 :ܪܘܼܚܵܐ ܡܚܲܝܠܵܐ ܠܲܡܫܝܼܚܘܼܬܼܵܐ ܕܡܸܫܚܵܐ ܪܲܦܚܵܐ 404 ܘܗܵܘܹ̇ܐ ܚܝܼܨܵܐ ܒܝܲܕ ܣܘܼܥܪܵܢܵܐ ܕܡܸܫܬܲܡܲܫ ܒܹܗ ܀ 405 :ܒܲܚܠܝܼܨܘܼܬܹܗ ܡܚܲܝܸܨ ܦܲܓܼܪܵܐ ܘܙܵܘܥܲܝ̈ ܢܲܦܫܵܐ 406 ܘܲܠܒܼܝܼܒܼܵܐܝܼܬܼ ܐܵܪܥܝܼܢ ܩܹܐܪ̈ܣܹܐ ܠܘܼܩܒܲܠ ܒܝܼܫܵܐ ܀ 407 :ܪܘܼܫܡܵܐ ܕܲܫܡܹܗ ܚܵܙܹ̇ܝܢ ܫܹܐܕܹ̈ܐ ܥܲܠ ܒܲܪܢܵܫܵܐ 408 ܘܪܵܥ̇ܠܝܼܢ ܡܸܢܹܗ ܕܚܵܙܹ̇ܝܢ ܒܲܫܡܹܗ ܫܡܵܐ ܝܲܩܝܼܪܵܐ ܀ 409 :ܫܸܡ ܐܝܼܬܼܘܼܬܼܵܐ ܡܕܼܝܼܩ ܡ̣ܢ ܘܼܫܡܵܐ ܕܲܒܼܒܹܝܬܼ ܥܲܝܢܹ̈ܐ 410 ܘܒܼܵܗ̈ܬܵܢ ܥܲܝܢܹ̈ܐ ܕܢܲܟܿܘܼܠܬܼܵܢܹ̈ܐ ܕܲܢܚܘܼܘܼܢ ܒܹܗ ܀ 411 :ܫܸܡܫܵܐ ܕܲܬܼܪܹܝܢ ܕܢܲܚ̣ ܡ̣ܢ ܪܵܘܡ̇ܐ ܒܪܹܫ ܒܲܪܢܵܫܵܐ 412 ܘܲܒܼܙܲܠܝܼܩܵܘ̈ܗܝ ܪܕܹܦ ܛܘܼܥܝܲܝ ܚܸܫܟܵܐ ܕܲܬܼܪܹܝܢ ܀ 413 :ܬܵܐ ܒܲܪܢܵܫܵܐ ܩܲܠܸܣ ܘܐܵܘܪܸܒܼ ܠܲܡܝܲܩܪܵܢܵܟ 414 ܕܥܲܒܼ݂ܕܹܿܗ ܠܦܲܓܼܪܵܟ ܫܸܡܫܵܐ ܕܲܬܼܪܹܝܢ ܒܝܲܕܼ ܡ̇ܘܗܲܒܼܬܹܗ ܀ 415 :ܬܵܐ ܚܲܝܵܒܼܵܐ ܦܪܘܿܥ ܬܵܘܕܿܝܼܬܼܵܐ ܠܲܡܚܲܪܪܵܢܵܟ 416 ܕܦܲܪܩܵܟ ܘܚܲܪܪܵܟ ܡ̣ܢ ܫܘܼܥܒܵܕܼܵܐ ܕܒܼܝܼܫܵܐ ܘܡ̇ܘܬܵܐ ܀ 417 :ܬܵܐ ܡ̇ܝܘܿܬܼܵܐ ܗܲܒܼ ܬܸܫܒܿܘܿܚܬܵܐ ܠܚܹܝܠ ܐܝܼܬܼܘܼܬܼܵܐ 418 ܕܝܲܗ̣̄ܒܼ ܒܵܟ ܚܲܝܠܵܟ ܕܬܸܙܪܘܿܥ ܚܲܝܹ̈ܐ ܒܡܵܝܘܿܬܼܘܼܬܼܵܐ ܀ 419 :ܩܢܝܼ ܒܟܼܠ ܦܘܼܡܝܼ̈ܢ ܓܸܢܣܹܗ ܕܐܵܕܼܵܡ ܥܲܦܪܵܢܵܝܵܐ 420 ܠܗܵܘ̇ ܕܐܲܪܝܼܡܵܟ ܡ̣ܢ ܕܲܚܝܼܚܵܐ ܠܘܵܬܼ ܪܲܒܿܘܼܬܹܗ ܀