On the Confessors - ܕܲܥܪܘܼܒܼܬܵܐ ܕܡܵܘܕܿܝܵܢܹ̈ܐ

1 :ܩܵܠ ܙܵܟܼܘܼܬܼܵܐ ܕܲܒܼܪܹܫ ܩܲܝܣܵܐ ܫܡܲܥ̣ܘ ܡ̇ܝܘܿܬܹ̈ܐ 2 ܘܲܩ̣ܢܵܘ ܣܲܒܼܪܵܐ ܠܡܹܐܚܲܕܼ ܕܲܪܵܐ ܪܘܼܚܢܵܐܝܼܬܼ ܀ 3 :ܚܲܕܼ ܡ̣ܢ ܓܸܢܣܵܐ ܕܚܵܒܼ݂ ܒܲܚܛܝܼܬܼܵܐ ܙܟܼܵܐ ܒܲܨܠܝܼܒܼܵܐ 4 ܘܩܵܡ̣ܘ ܚܲܝܵܒܹ̈ܐ ܠܩܵܠ ܙܵܟܼܘܼܬܹܗ ܘܲܠܒܸܫ̣ܘ ܙܲܝܢܵܐ ܀ pb. 29 5 :ܒܢܲܦܫܵܐ ܘܦܲܓܼܪܵܐ ܫܩ݂ܲܠ ܙܵܟܼܘܼܬܼܵܐ ܐܵܕܼܵܡ ܕܲܬܼܪܹܝܢ 6 ܘܲܒܼܢܲܝ̈ ܓܸܡܣܹܗ ܒܪ̈ܓܼܫܲܝ ܦܲܓܼܪܵܐ ܘܙܵܘܥܲܝ̈ ܢܲܦܫܵܐ ܀ 7 :ܠܗܵܝ̇ ܒܲܪܬܼ ܩܵܠܵܐ ܕܲܩܥܵܬ̤ ܒܐܲܪܥܵܐ ܫܡ݂ܲܥܘ ܐܲܪ̈ܥܵܢܹܐ 8 ܕܩܘܼܡܘ ܐܸܬܼܠܲܒܸܿܒܼܘ ܐ̄ܢܵܐ ܒܲܠܚܘܿܕܲܝ ܙܟܹ̇ܝܬܼ ܒܲܨܠܝܼܒܼܵܐ ܀ 9 :ܠܲܝܬܿ ܗ̄ܘ̣ܵܐ ܣܲܒܼܪܵܐ ܕܫܸܡ ܙܵܟܼܘܼܬܼܵܐ ܠܦܲܓܼܪ̈ܵܢܵܝܹܐ 10 ܘܠܲܒܸܿܒܼ ܐܸܢܘܿܢ ܩܵܠ ܫܘܼܘܕܵܝܵܐ ܕܚܲܕܼ ܕܐܸܬܼܢܲܨܚ ܀ 11 :ܠܵܐ ܡܲܨܝܵܐ ܗ̄ܘ̣ܵܬܼ ܡ̇ܝܘܿܬܼܬܼܵܐ ܠܡܸܚܣܲܢ ܚܲܫܹ̈ܐ 12 ܘܕܲܚܙܵܬ̤ ܦܲܓܼܪܵܐ ܕܢܼܠܸܐ ܒܩܲܝܣܵܐ ܩܢܵܬ̤ ܠܘܼܒܵܒܼܵܐ ܀ 13 :ܠܵܐ ܡܸܫܟܲܚ ܗ̄ܘ̣ܵܐ ܦܲܓܼܪܵܐ ܪܲܦܝܵܐ ܠܡܸܣܢܵܐ ܚܲܝܹ̈ܐ 14 ܘܕܼܐܫܝܼܛ ܐܸܢܘܿܢ ܚܚܲܕܼ ܦܲܓܼܪܵܢܵܐ ܚܲܝܸܨ ܪ̈ܓܼܫܵܘܗܝ ܀ 15 :ܠܵܐ ܝܵ̇ܕܥܝܼܢ ܗ̄ܘ̣ܵܐ ܐܲܪ̈ܥܵܢܵܝܹܐ ܠܡܸܪܕܼܵܐ ܠܪܵܘܡ̇ܐ 16 ܘܕܼܪܫܵܗ̇ ܠܐܘܼܪܚܵܐ ܚܲܕܼ ܐܲܪܥܵܢܵܐ ܩܕܼܵܡ ܥܲܝܢܲܝ̈ܗܘܿܢ ܀ 17 :ܠܵܐ ܡܦܵܣܝܼܢ ܗ̄ܘ̣ܵܘ ܠܡܹܐܚܲܕܼ ܕܲܪܵܐ ܒܪܸ̈ܓܼܫܲܝ ܦܲܓܼܪܵܐ 18 ܘܚܵܘܝܼ ܐܸܢܘܿܢ ܒܝܲܕܼ ܚܘܼܡܣܵܢܵܐ ܕܡ̣ܢ ܡܹܐܟܼܘܼܠܬܵܐ ܀ 19 :ܠܵܐ ܚܵܟܼܡ̇ܝܼܢ ܗ̄ܘ̣ܵܘ ܠܲܡܕܵܫ ܟܸܣܦܵܐ ܬܚܹܝܬܼ ܪܸ̈ܓܼܠܲܝܗܘܿܢ 20 ܘܐܲܠܸܦ ܐܸܢܘܿܢ ܚܲܕܼ ܟܲܕܼ ܦܲܟܼܪܹܗ ܘܕܼܵܫܹܗ ܒܐܲܪܥܵܐ ܀ 21 :ܛܡܝܼܪ ܗ̄ܘ̣ܵܐ ܘܲܟܼܣܸܐ ܦܲܚܵܐ ܢܟܼܝܼܠܵܐ ܕܪܸܚܡܲܬܼ ܫܘܼܒܼܚܵܐ 22 ܘܲܪܗܸܛ ܥܲܒܼܕܹܿܗ ܚܲܕܼ ܩܲܠܝܼܠܵܐ ܘܒܲܕܿܩ ܢܸܟܼܠܹܗ ܀ 23 :ܒܐܲܪ̈ܥܵܢܵܝܵܬܼܵܐ ܥܢܸܐ ܗ̄ܘ̣ܵܐ ܦܲܓܼܪܵܐ ܘܙܵܘ̈ܥܲܝ ܢܲܦܫܵܐ 24 ܘܠܲܝܬܿ ܗ̄ܘ̣ܵܐ ܙܲܗܪܵܐ ܕܪ̈ܘܼܚܵܢܝܵܬܼܵܐ ܒܹܝܬܼ ܐܲܪ̈ܥܵܢܹܐ ܀ 25 :ܡܸܬܼܟܲܬܿܫܝܼܢ ܗ̄ܘ̣ܵܘ ܒܐܸܣܛܵܕܼܝܼܘܿܢ ܕܐܲܬܼܠܹܝܛܘܼܬܼܵܐ 26 ܘܠܲܝܬܿ ܕܲܡܦܲܢܹܐ ܟܠܝܼܠ ܙܵܟܼܘܼܬܼܵܐ ܚܠܵܦ ܥܲܡܠܲܝ̈ܗܘܿܢ ܀ 27 :ܢܵܚ̇ܬܿܝܼܢ ܟܠܫܵܥ ܠܡܹܐܚܲܕܼ ܕܼܪܵܐ ܒܐ̄ܢܵܫܵܝ̈ܬܼܵܐ 28 ܘܡ̇ܐ ܕܐܸܬܼܟܲܬܿܫܘ ܚܵܒܼ݂ܘ ܒܐܵܓܼܘܿܢܵܐ ܘܦܵܫ̣ ܦܘܼܪܥܵܢܵܐ ܀ 29 :ܟܲܕܼ ܕܹܝܢ ܥܵܫܢܲܬ̤ ܚܵܝܵܒܼܘܼܬܼܵܐ ܕܓܸܢܣܵܐ ܕܐ̄ܢܵܫܵܐ 30 ܘܐܲܗܠܘ ܘܲܓܼܚܸܟܼܘ ܫܹܐܕܹ̈ܐ ܛܪ̈ܘܼܢܹܐ ܥܲܠ ܚܲܫܝ̈ܗܘܿܢ ܀ 31 :ܚܵܣ̣ ܚܲܢܵܢܵܐ ܕܲܚܙ̣ܵܐ ܨܲܠܡܸܗ ܟܲܕܼ ܡܸܬܼܒܲܙܲܚ 32 ܘܡܲܫ݂ܚܹܗ ܒܪܘܼܚܵܐ ܠܡܹܐܪܲܥ ܚܲܫܹ̈ܐ ܒܸܣܪ̈ܵܢܵܝܹܐ ܀ 33 :ܒܚܲܝܠܵܐ ܕܪܘܼܚܵܐ ܚܲܙܩܹܗ ܠܨܲܠܡܹܗ ܐܲܝܟ ܕܲܒܼܙܲܝܢܵܐ 34 ܕܲܒܼܚܝܠ ܪܘܼܚܵܐ ܢܸܦܘܿܩ ܢܸܙܟܸܿܐ ܠܪ̈ܘܼܚܵܢܵܝܹܐ ܀܆ 35 :ܢܲܣܝܹܗ ܒܟܼܠܗܹܝܢ ܠܲܩܪܲܒܼܬܼܵܢܵܐ ܦܲܓܼܪܵܢܵܝܵܐ 36 ܕܲܒܼܢܸܣܝܵܢܹܗ ܢܕܲܪܸܫ ܦܲܓܼܪܵܐ ܠܘܵܬܼ ܙܵܟܼܘܼܬܼܵܐ ܀ 37 :ܒܹܗ ܐܲܝܟ ܢܝܼܫܵܐ ܐܲܠܸܦ ܐܵܢܘܿܢ ܠܲܟܼܢܵܘܵܬܹ̈ܐ 38 ܕܢܸܗܘܘܿܢ ܚܵܢܹ̇ܝܢ ܠܘܵܬܼ ܬܘܼܩܵܢܵܐ ܕܡܲܠܟܿܘܼܬܼ ܪܵܘܡ̇ܐ ܀ 39 ܐܲܝܟ ܡܲܚܙܝܼܬܼܵܐ ܩܒ݂ܲܥ ܙܵܟܼܘܼܬܹܗ ܠܐܵܓܼܘܿܢܸܣܛܹ̈ܐ: pb. 30 40 ܕܲܢܕܲܡܘܿܢ ܒܹܗ ܒܙܵܘܥܹ̈ܐ ܘܪܸܓܿܫܹܐ ܠܘܵܬܼ ܫܘܼܠܵܡܵܐ ܀ 41 :ܒܚܲܫܵܘ̈ܗܝ ܝܼܠܸܦ̣ܘ ܠܡܹܐܚܲܕܼ ܕܿܪܵܐ ܥܲܡ ܚܘܼܬܼܚܵܬܹ̈ܐ 42 ܘܲܒܼܚܘܼܡܣܵܢܹܗ ܒܲܣܲܪܘ ܘܐܲܫܝܼܛܘ ܠܲܪ̈ܓܼܝܼܓܼܵܬܼܵܐ ܀ 43 :ܚ̣ܘܵܙ ܕܲܡܩܲܒܲܥ ܦܲܓܼܪܹܗ ܒܨܸܨܹ̈ܐ ܡ̣ܢ ܛܵܠܘܿܡܹ̈ܐ 44 :ܘܝܲܗ̣̄ܒܼܘ ܦܲܓܼܪ̈ܲܝܗܘܿܢ ܠܟܼܠ ܐܘܼܠܨܵܢܝܼ̈ܢ ܒܕܼܘܼܡܝܵܐ ܕܝܼܠܹܗ 45 :ܒܡܵܘܬܹܿܗ ܩܲܒܸܿܠܘ ܣܲܒܼܪܵܐ ܛܵܒܼܵܐ ܕܚܵܝܑܬܼ ܡܝܼܬܹ̈ܐ 46 ܘܲܣܢ̣ܵܘ ܚܲܝܹ̈ܐ ܘܲܪܚܸܡ̣ܘ ܡܵܘܬܵܐ ܕܢܸܚܘܿܢ ܥܲܡܹܗ ܀ 47 :ܠܥܸܕܵܢ ܡ̇ܘܬܹܿܗ ܡܸܬܼܥܲܗܕܼܝܼܢ ܗ̄ܘ̣ܵܐ ܟܲܕܼ ܚܵܫ̇ܝܼܢ ܗ̄ܘ̣ܵܘ 48 ܕܲܫܒ݂ܲܩ ܨܲܥܪܹܗ ܘܐܲܦܝܼܣ ܠܐܲܒܼܘܼܗܝ ܥܲܠ ܫܘܼܒܼܩܵܢܵܐ ܀ 49 :ܠܗܵܝ̇ ܒܲܪܬܼ ܩܵܠܵܐ ܡܸܬܿܕܿܟܼܝܼܢ ܗ̄ܘ̣ܵܐ ܕܲܩܥ̣ܵܐ ܒܩܲܝܣܵܐ 50 ܕܐܲܒܼܵܐ ܕܪ̈ܲܚܡܹܐ ܫܒܼܘܿܩ ܣܲܟܼܠܬܼܵܐ ܠܠܵܐ ܝܼܕܲܥܬܼܵܐ ܀ 51 :ܒܹܗ ܐܸܬܿܕܲܡܝܘܼ ܟܲܕܼ ܚܵܫ̇ܝܼܢ ܗ̄ܘ̣ܵܘ ܒܚܲܫܲܝ̈ ܙܲܒܼܢܵܐ 52 ܘܚܲܠܸܦܘ ܚܲܝܹ̈ܐ ܕܲܡܠܸܐ ܙܲܒܼܢܵܐ ܒܲܕܼܠܵܐ ܫܘܼܠܵܡ ܀ 53 :ܙܩܲܦ̣ܘ ܦܲܓܼܪ̈ܲܝܗܘܿܢ ܦܲܓܼܪ̈ܵܢܵܝܹܐ ܠܲܪ̈ܓܼܝܼܓܼܵܬܼܵܐ 54 ܘܐܲܪ̈ܥܵܢܵܝܵܬܼܵܐ ܗ̤ܘܲܝ̈ ܡܝܼ̈ܬܼܵܬܑܼܵܐ ܩܕܼܵܡ ܥܲܝܢܲܝ̈ܗܘܿܢ ܀ 55 :ܡܝܼܬܼܘ ܠܲܒܼܪܝܼܬܼܵܐ ܟܲܕܼ ܚܲܝܝܼܢ ܒܵܗ̇ ܐܲܝܟ ܠܵܐ ܚܲܝܹ̈ܐ 56 ܐܵܦ ܗ̤ܝ ܒܪܝܼܬܼܵܐ ܚܲܫ݂ܒܿܘܼܗ̇ ܗܸܢܘ̣ܿܢ ܐܲܝܟ ܠܵܐ ܚܲܝܵܐ ܀ 57 :ܗܲܠܸܟܼܘ ܒܐܲܪܥܵܐ ܒܐ̄ܪܵܙ ܕܘܼܒܵܪܹ̈ܐ ܪ̈ܘܼܚܵܢܵܝܹܐ 58 ܘܲܒܼܥܲܡܠܲܝ̈ܗܘܿܢ ܨܵܪܘ ܬܘܼܩܵܢܵܐ ܕܠܵܐ ܡܸܬܼܚܲܒܲܠ ܀ 59 :ܒܚܲܫܹ̈ܐ ܕܙܲܒܼܢܵܐ ܙܒܲܢ̣ܘ ܡܲܠܟܿܘܼܬܼܵܐ ܕܠܵܐ ܫܵܘܼܠܵܡܵܐ 60 ܘܲܒܼܫܝܼ̈ܛܵܬܼܵܐ ܩܢ̣ܵܘ ܪܘܼܡܪܵܡܵܐ ܕܕܲܪܓܼܵܐ ܕܲܠܥܸܠ ܀ 61 :ܢܚܸܬܼܘ ܠܐܵܓܼܘܿܢܵܐ ܘܐܸܚܲܕܼܘ ܕܲܪܵܐ ܥܲܡ ܚܲܣܝܼܢܵܐ 62 ܘܲܠܒܲܟܼ݂ܘ ܪܘܼܚܵܐ ܒܝܲܕܼ ܗܲܕܵܡܹ̈ܐ ܡܸܬܼܚܲܙܝܵܢܹ̈ܐ ܀ 63 :ܐܝܼܕܼܵܐ ܠܸܒܼܟܲܬ̤ ܪܘܼܚܵܐ ܠܵܐ ܓܘܼܫܡܵܢܵܐ 64 ܘܚܵܒܼ݂ ܘܐܸܬܼܦܲܟܲܪ ܩܲܠܝܼܠ ܓܸܦܹ̈ܐ ܩܕܼܵܡ ܝܲܩܝܼܪܵܐ ܀ 65 :ܐܘܿ ܠܲܟܼܝܵܢܵܐ ܡܸܬܼܚܲܒܿܠܵܢܵܐ ܕܚܵܐܹ̇ܒܼ ܟܠܝܘܿܡ 66 ܕܲܚܣ݂ܲܢ ܘܲܙܟܼܵܐ ܠܲܩܪܲܒܼܬܼܵܢܵܐ ܕܙܵܟܹ̇ܐ ܟܠܝܘܿܡ ܀ 67 :ܐܘܿ ܕܲܚܝܼܚܵܐ ܕܥܲܦܪܹܗ ܣܵܗܹ̇ܕܼ ܥܲܠ ܫܝܼܛܘܼܬܹܗ 68 ܕܲܙܟܼܵܐ ܠܪܘܼܚܵܐ ܕܲܫܡܹܗ ܡܲܟܼܪܸܙ ܩܲܠܝܼܠܘܼܬܹܗ ܀ 69 :ܚܙ̣ܵܐ ܡܵܪܘܿܕܼܵܐ ܠܐܵܕܼܵܡ ܕܲܬܼܪܹܝܢ ܘܙܲܟܿܝܼ 70 ܘܲܩܥ̣ܵܐ ܘܐܲܝܠܸܠ ܥܲܠ ܙܵܟܼܘܼܬܼܵܐ ܕܠܵܐ ܒܲܥܝܵܕܵܪܐ ܀ 71 :ܚܙ̣ܵܐ ܕܡܸܬܼܪܲܕܼܦܝܼܢ ܚܲܝܠܵܘܵܬܹ̈ܐ ܡ̣ܢ ܫܸܡ ܝܼܫܘܿܥ 72 ܘܐܲܚܕܹ݂ܿܗ ܓܘܼܢܚܵܐ ܕܐܲܝܟܲܢ ܪܵܕܹܦ ܦܲܓܼܪܵܐ ܠܪܘܼܚܵܐ ܀ 73 :ܫܡ݂ܲܥ ܕܲܡܫܲܢܹܝܢ ܕܲܝܘܹ̈ܐ ܒܩܵܠܵܐ ܡܸܢܼܪܲܓܼܫܵܢܵܐ 74 ܘܙܵܥ ܘܐܸܬܼܒܲܠܗܝܼ ܕܠܵܐ ܚܵܫܘܿܫܹ̈ܐ ܥܪܲܩ̣ܘ ܡ̣ܢ ܩܵܠܵܐ ܀ 75 :ܒܹܝܬܼ ܦܘܼ̈ܠܵܓܼܵܐ ܩܵܡ̣ ܡܲܪܵܚܵܐ ܥܲܠ ܡ̇ܐܐ ܕܲܗܘ̤ܵܐ 76 ܟܲܕܼ ܡܸܬܼܚܲܫܲܒ̣ ܕܚܸܠܡܵܐ ܗ̄ܘ̣ ܕܲܠܡܵܐ ܐܵܘ ܥܸܠܵܘܹ̈ܐ ܀ 77 ܣܵܒܲ̇ܪ ܗ̄ܘ̣ܵܐ ܓܹܝܪ ܒܲܟܪܘܼܢܘܼܬܹܗ ܕܠܵܐ ܡܸܬܼܡܲܟܲܟ: pb. 31 78 ܘܬܼܘܼܒܼ ܪܵܢܹ̇ܐ ܗ̄ܘ̣ܵܐ ܥܲܠ ܡ̇ܝܘܿܬܹ̈ܐ ܕܠܵܐ ܡܸܬܼܦܲܪܩܝܼܢ ܀ 79 :ܟܲܕܼ ܕܹܝܢ ܝܲܠܦܹܗ ܒܝܲܕܼ ܣܘܼܥܪ̈ܵܢܹܐ ܠܦܘܼܪܩܵܢ ܐ̄ܢܵܫܵܐ 80 ܢܦ݂ܲܠ ܡ̣ܢ ܪܵܘܡܹܗ ܘܫܲܪܝܼ ܡܪܲܟܸܿܒܼ ܦܘܼܪ̈ܣܹܐ ܫܢܝܼܥܹ̈ܐ ܀ 81 :ܫܲܠܚܹ݂ܗ ܠܙܲܝܢܵܐ ܕܲܛܪܘܼܢܘܼܬܼܵܐ ܕܡܲܩܪܷܒܼ ܗ̄ܘ̣ܵܐ ܒܹܗ 82 ܘܠܵܗ̇ ܠܲܫܒܼܝܼܬܼܵܐ ܙܲܝܹܢ ܘܐܲܡܝܼܩ ܚܲܕܼ ܠܘܼܩܒܲܠ ܚܲܕܼ ܀ 83 :ܟܲܬܼܫܹܗ ܠܥܵܠܡܵܐ ܕܗܘ̤ ܥܲܡ ܢܲܦܫܹܗ ܢܲܩܪܸܒܼ ܘܲܢܚܘܼܒܼ 84 ܘܲܗܘ̤ܵܐ ܠܹܗ ܗܘ̤ ܐܲܝܟ ܚܲܙܵܝܵܐ ܕܲܩܪ̈ܲܒܼܬܼܵܢܹܐ ܀ 85 :ܓܲܪܸܓܼ ܐܸܢܘܿܢ ܠܲܒܼܢܲܝ̈ ܐܲܪܥܵܐ ܠܘܵܬܼ ܬܲܟܼܬܿܘܼܫܵܐ 86 ܘܩܵܡ̣ ܗܘ̤ ܡܲܗܸܠ ܟܲܕܼ ܡܸܬܼܚܲܝܒܼܝܼܢ ܚܲܕܼ ܡ̣ܢ ܚܲܒܼܪܹܗ ܀ 87 :ܠܹܗ ܠܲܟܼܝܵܢܵܐ ܕܡ̇ܝܘܿܬܼܘܼܬܼܵܐ ܐܲܠܒܸܿܫ ܙܲܝܢܹܗ 88 ܘܫܲܪܝܼ ܡܒܲܣܒܸܿܣ ܗܘ̤ ܠܲܩܢܘܿܡܹܗ ܡܸܬܼܚܲܒܿܠܵܢܵܐ ܀ 89 :ܦܲܪܲܣ ܬܲܚܦܝܼܬܼܵܐ ܘܣܲܡܝܝܼ ܐܸܢܘܿܢ ܡ̣ܢ ܒܘܼܝܵܢܵܐ 90 ܕܠܵܐ ܢܸܬܼܒܲܩܘܿܢ ܕܲܠܡܵܢ ܡܵܚܹ̇ܝܢ ܐ̄ܢܵܫܵܐ ܠܐ̄ܢܵܫܵܐ ܀ 91 :ܐܲܠܒܸܿܫ ܐܸܢܘܿܢ ܪܘܼܚܵܐ ܕܫܘܼܩܪܵܐ ܕܲܟܼܬܼܝܼܫܘܼܬܹܗ 92 ܘܲܥܒ݂ܲܕܼ ܐܵܢܘܿܢ ܐܲܝܟ ܬܵܒܼܘܿܥܹ̈ܐ ܕܫܲܪܝܼܪ̈ܵܬܼܵܐ ܀ 93 :ܐܲܫܩܝܼ ܐܵܢܘܿܢ ܬܸܛܪܵܐ ܕܠܝܼܚܵܐ ܕܡܲܪܝܼܪܘܼܬܹܗ 94 ܘܐܲܪܘܝܼ ܐܸܢܘܿܢ ܒܲܪ̈ܓܼܝܼܓܼܵܬܵܪܐ ܐܲܝܟ ܡܹܐܪܝܼܬܼܵܐ ܀ 95 :ܐܲܪܡܝܼ ܛܢܵܢܵܐ ܕܫܸܡ ܐܲܠܵܗܵܐ ܒܪܸ̈ܥܝܵܢܲܝܗܘܿܢ 96 :ܘܲܥܒܲܕܼ ܐܸܢܘܿܢ ܬܵܒܼܥܲܝ̈ ܨܲܥܪܵܐ ܕܛܘܼܥܝܲܝ ܕܐܵܘܠܸܕܼܘ 97 :ܫܡ݂ܲܥ ܡܲܪܵܝܵܐ ܕܣܲܬܼܪܹܗ ܩܵܠܵܐ ܕܫܸܡ ܒܵܪܘܿܝܵܐ 98 ܠܒܸܢܝܵܢ ܥܵܘ̣ܠܵܐ ܕܫܸܡ ܐܲܠܵܗܹ̈ܐ ܕܲܒܼܢܹܐ ܗ̄ܘ̣ܵܐ ܠܹܗ ܀ 99 :ܚ̣ܙܵܐ ܕܡܸܬܼܟܲܪܙܵܐ ܚܕܼܵܐ ܬܵܘܕܿܝܼܬܼܵܐ ܕܚܲܕܼ ܐܵܠܵܗܵܐ 100 ܘܐܸܓܲܪ̣ ܦܵܠܚܹ̈ܐ ܕܕܿܓܵܠܘܼܬܼܵܐ ܕܲܢܣܲܝܥܘܼܢܵܝܗܝ ܀ 101 :ܚܙ̣ܵܝܗܝ ܠܲܟܼܝܵܢܵܐ ܪܦܸܐ ܒܐܵܓܼܘܿܢܵܐ ܕܠܘܼܩܒܲܠ ܚܲܫܹ̈ܐ 102 ܕܫܲܪܝܼ ܡܲܩܠܸܐ ܒܝܲܕܼ ܚܘܼܡܣܵܢܵܐܬ ܠܥܸܠ ܡ̣ܢ ܚܲܫܹ̈ܐ ܀ 103 :ܓܘܼܢܚܵܐ ܐܲܚܕܹܿܗ ܕܐܲܝܟܲܢ ܦܲܓܼܪܵܐ ܣܵܢܹ̇ܐ ܠܡܵܘܬܵܐ 104 ܗ̣ܦܲܟ ܒܥܹ̇ܐ ܠܹܗ ܠܲܡܚܲܒܿܠܵܢܹܗ ܕܢܸܩܪܘܿܒܼ ܨܹܐܕܼܵܘܗܝ ܀ 105 :ܒܹܝܬܼ ܦܘܼܪ̈ܬܵܟܹܐ ܪܡܸܐ ܗ̄ܘ̣ܵܐ ܘܫܲܚܝܼܩ ܟܲܕܼ ܡܸܬܼܚܲܫܲܒܼ 106 ܕܡܸܛܠ ܡ̇ܢܵܐ ܣܵܢܹ̇ܝܢ ܚܲܝܹ̈ܐ ܪ̈ܵܚܡܲܝ ܚܲܝܹ̈ܐ ܀ 107 :ܠܡܵܢ ܟܲܝ ܐܲܫܝܼܟܘ ܐܲܪ̈ܥܵܢܵܝܹܐ ܠܐܲܪ̈ܥܵܢܝܵܬܼܵܐ 108 ܘܥܲܠ ܡ̇ܢ ܒܲܣܲܪܘ ܥܲܠ ܚܘܼܬܼܚܵܬܹ̈ܐ ܕܠܵܐ ܒܲܥܝܵܕܼܵܐ ܀ 109 :ܠܡܵܢ ܟܲܝ ܕܵܫܘܼܗ̇ ܐܲܪ̈ܥܵܢܵܝܹܐ ܠܪܸܓܲܬܼ ܒܸܣܪܵܐ 110 ܘܥܲܠ ܡ̇ܢ ܐܲܗܸܠܘ ܒܲܢܝܵܚܲܝ̈ܗܘܿܢ ܐܲܝܟ ܝܲܬܿܝܼܪܹ̈ܐ ܀ 111 :ܠܡܵܢ ܐܸܬܼܢܲܟܼܪܝܼ ܟܝܵܢܵܐ ܕܐܲܣܝܼܪ ܒܲܪ̈ܓܼܝܼܓܼܵܬܼܵܐ 112 ܘܲܟܼܕܢ ܢܲܦܫܹܗ ܒܕܼܘܼܒܵܪ ܚܲܝܹ̈ܐ ܕܢܘܼܟܼܪܵܝܝܼܢ ܠܹܗ ܀ 113 :ܠܵܐ ܗܘ̤ܵܬܼ ܗܵܕܹܐ ܐܵܘ ܐܸܫܬܲܡܥܲܬ̤ ܒܹܝܬܼ ܡ̇ܝܘܿܬܹ̈ܐ 114 ܕܡ̇ܝܘܿܬܼܘܼܬܼܵܐ ܬܸܣܢܸܐ ܠܚܲܝܹ̈ܐ ܘܬܸܪܚܲܡ ܡ̇ܘܬܵܐ ܀ 115 ܠܲܝܬܿ ܠܹܗ ܠܓܸܢܣܵܐ ܕܲܒܼܢܲܝ̈ ܐܵܕܼܵܡ ܣܲܒܼܪܵܐ ܐ̄ܚܪܹܢܵܐ: pb. 32 116 ܐܸܠܵܐ ܥܘܼܡܪܵܐ ܕܲܡܠܸܐ ܙܲܒܼܢܵܐ ܘܚܲܝܹ̈ܐ ܕܙܲܒܼܢܵܐ ܀ 117 :ܠܵܐ ܣܢ̣ܵܘ ܐ̄ܢܵܫܵܐ ܠܐ̄ܢܵܫܵܝܵܬܼ̈ܐ ܐܲܝܟ ܠܵܐ ܐ̄ܢܵܫܵܐ 118 ܘܠܵܐ ܐܸܬܼܢܲܟܼܪܝܘܼ ܒܢܲܝ̈ ܕܲܚܝܼܚܵܐ ܠܦܘܼܠܚܵܢ ܐܲܪܥܵܐ ܀ 119 :ܠܵܐ ܦܠܲܚ̣ܘ ܡܸܡܬܼܘܿܡ ܐܲܪ̈ܥܵܢܵܝܹܐ ܠܦܠܚܵܢ ܪܘܼܚܵܐ 120 ܘܠܵܐ ܝܲܗ̣̄ܒܼܘ ܦܹܐܪܹ̈ܐ ܡܸܬܼܚܲܒܿܠܵܢܹ̈ܐ ܠܠܵܐ ܚܵܫܘܿܫܹ̈ܐ ܀ 121 :ܠܵܐ ܪܕܼܵܘ ܒܐܘܼܪܚܵܐ ܕܠܲܐܦܲܝ̈ ܪܵܘܡ̇ܐ ܐܲܪ̈ܥܵܢܵܝܹܐ 122 ܘܠܵܐ ܜܪ̣ܵܚ ܦܲܓܼܪܵܐ ܝܲܩܝܼܪ ܓܸܦܹ̈ܐ ܥܲܡ ܪ̈ܘܼܚܵܢܹܐ ܀ 123 :ܐܸܡܗܘܿܢ ܐܪܥܵܐ ܗ̄ܝܼ ܘܒܲܐܪܥܵܐ ܝ̄ܠܝܼܕܼܝܼܢ ܥܲܠ ܕܚܝܼܚܵܐ 124 ܘܒܲܕܼܡܘܼܬܼ ܫܲܒܼܪܹ̈ܐ ܝܵܢ̇ܩܝܼܢ ܚܲܠܒܼܵܐ ܕܐܲܪ̈ܥܵܢܵܝܵܬܼܵܐ ܀ 125 :ܒܨܝܼܪܝܼܢ ܣܲܓܿܝܼ ܡ̣ܢ ܕܘܼܪܵܫܵܐ ܪܘܼܚܵܢܵܝܵܐ 126 ܘܠܵܐ ܡܨܸܝܢ ܠܡܸܣܲܒܼ ܐܘܼܟܼܠܵܐ ܓܡܝܼܪܵܐ ܕܡܸܠܲܬܼ ܚܲܝܹ̈ܐ ܀ 127 :ܚܕܲܬܵܐ ܗ̄ܝܼ ܕܲܗܘ̤ܵܬܼ ܡ̣ܢ ܫܠܹܝ ܒܐܲܪܥܵܐ ܠܒܼܢܲܝ̈ ܐܲܪܥܵܐ 128 ܕܲܣܢ̣ܵܘ ܠܐܲܪܥܥܵܐ ܘܠܲܐ̄ܚܝܵܢܘܼܬܼܵܐ ܕܐܲܪ̈ܥܵܢܝܵܬܼܵܐ ܀ 129 :ܒܗܵܠܹܝܢ ܚܲܫܹ̈ܐ ܡܸܫܬܲܢܲܩ ܗ̄ܘ̣ܵܐ ܣܵܢ̇ܠܵܐ ܕܐ̄ܢܵܫܵܐ 130 ܕܲܚܙ̣ܵܐ ܐ̄ܢܵܫܵܐܐ ܕܫܲܪܝܼܘ ܡܲܩܠܹܝܢ ܠܲܡܕܵܫ ܚܲܫܹ̈ܐ ܀ 131 :ܚܙ̣ܵܐ ܚܲܣܵܡܵܐ ܕܲܗܘ̤ܵܘ ܐ̄ܢܵܫܵܐ ܣܵܢܠܹ̈ܐ ܠܚܘܼܒܹܿܗ 132 ܘܐܲܣܸܦ ܢܘܼܪܵܐ ܕܝܲܨܪܹܗ ܒܝܼܫܵܐ ܕܢܵܘܒܸܿܕܼ ܐܸܢܘܿܢ ܀ 133 :ܚ̣ܙܵܐ ܕܐܸܙܕܲܝܲܢܘ ܥܲܦܪ̈ܵܢܵܝܹܐ ܠܘܼܩܒܲܠ ܚܲܝܠܹܗ 134 ܘܚܲܠܸܦ ܐܵܦ ܗܘ̤ ܙܲܝܢܵܐ ܕܢܸܟܼܒܲܠ ܐ̄ܢܵܫܵܐ ܀ 135 :ܒܝܲܕܼ ܨܸܢ̈ܥܵܬܼܵܐ ܙܲܝܸܢ ܢܲܦܫܹܗ ܪܹܫܵܐ ܕܐܵܐܲܪ 136 ܕܲܚܙܵܐ ܦܫܝܼܛܹ̈ܐ ܕܝܼܠܸܦܘ ܦܘܼܪ̈ܣܹܐ ܠܘܼܩܒܲܠ ܢܸܟܼܠܵܘ̈ܗܝ ܀ 137 :ܠܗܘܿܢ ܗ̄ܘ̣ ܙܲܝܸܢ ܚܲܕܼ ܠܘܼܩܒܲܠ ܚܲܕܼ ܠܲܒܼܢܲܝ̈ ܐܲܪܥܵܐ 138 ܘܣܲܕܸܿܩ ܐܸܢܘܿܢ ܒܝܲܕܼ ܚܸܪܝܵܢܵܐ ܚܲܕܼ ܡ̣ܢ ܚܲܒܼܪܹܗ ܀ 139 :ܠܹܗ ܠܲܟܼܝܵܢܵܐ ܕܡܸܕܼܪܹܗ ܕܐܵܕܼܵܡ ܦܠ݂ܲܓܼ ܡ̇ܪܘܿܕܼܵܐ 140 ܘܡܸܢܹܗ ܐܲܩܝܼܩ ܥܸܕܼܪܵܐ ܠܓܲܒܵܐ ܕܚܲܝ̈ܠܵܘܬܹܗ ܀ 141 :ܠܗܘܿܢ ܠܲܦܫܝܼܛܹ̈ܐ ܩܪ̣ܵܐ ܢܵܟܼܘܿܠܵܐ ܕܲܢܣܲܝܥܘܼܢܵܝܗܝ 142 ܘܲܠܗܘܿܢ ܫܲܕܲܪ ܐܲܝܟ ܓܵܫܘܿܫܹ̈ܐ ܠܘܵܬܼ ܚܲܒܼܪ̈ܲܝܗܘܿܢ ܀ 143 :ܐܲܠܸܦ ܐܸܢܘܿܢ ܙܢܲܝ̈ ܬܲܟܼܬܿܘܼܫܵܐ ܕܦܘܼܪ̈ܣܹܐ ܨܢܝܼܥܹ̈ܐ 144 ܘܐܲܥܢܝܼ ܐܸܢܘܿܢ ܒܗܸܪܓܵܐ ܕܥܵܘ̣ܠܵܐ ܠܡܹܐܫܲܕܼ ܥܵܘ̣ܠܵܐ ܀ 145 :ܦܩ݂ܲܪ ܘܐܸܫܬܲܝܚܲܢ ܟܝܵܢܵܐ ܫܝܼܛܵܐ ܥܲܠ ܗܲܕܵܡ̇ܘ̈ܗܝ 146 ܘܫܲܪܝܼ ܡܒܲܣܒܸܿܣ ܗܘ̤ ܠܲܩܢܘܿܡܹܗ ܕܠܵܐ ܒܘܼܝܵܢܵܐ ܀ 147 :ܢܚܸܬܼܘ ܠܐܵܓܼܘܿܢܵܐ ܒܸܣܪܵܢܵܝܵܐ ܠܘܼܩܒܲܠ ܒܸܣܪܵܐ 148 ܘܐܸܚܲܕ ܕܲܪܵܐ ܥܵܦܪܵܐ ܫܝܼܛܵܐ ܥܲܡ ܬܘܼܩܵܢܹܗ ܀ 149 :ܩܵܡ ܡ̇ܪܘܿܕܼܵܐ ܘܲܒܼܢܲܝ̈ ܓܲܒܹܿܗ ܡ̣ܢ ܣܸܡܵܠܹܗ 150 ܘܚܹܝܠ ܟܲܣܝܘܼܬܼܵܐ ܘܲܒܼܢܲܝ̈ ܩܘܼܫܬܵܐ ܡ̣ܢ ܝܲܡܝܼܢܵܐ ܀ 151 :ܟܢܲܫ̣ܘ ܚܲܙܵܝܹ̈ܐ ܠܲܡ ܕܐܲܬܼܠܹܝܛܵܐ ܚܲܝܠܲܝ̈ ܪܵܘܡ̇ܐ 152 ܕܢܸܚܙܘܿܢ ܐ̄ܢܵܫܵܐ ܟܲܕܼ ܡܸܬܼܟܲܬܿܫܝܼܢ ܥܲܡ ܪ̈ܘܼܚܵܢܹܐ ܀ 153 ܫܹܐܕܹ̈ܐ ܘܐ̄ܢܵܫܵܐ ܐܸܚܲܕܘ ܕܲܪܵܐ ܒܪܸ̈ܓܼܫܹܐ ܘܙܵܘܥܹ̈ܐ: pb. 33 154 ܡܸܬܼܪ̈ܲܓܼܫܵܢܹܐ ܒܪܸ̈ܓܼܫܹܐ ܕܦܲܓܼܪܵܐ ܘܫܹ̈ܐܕܹܐ ܒܙܵܘܥܹ̈ܐ ܀ 155 :ܐܲܠܒܸܿܫ ܪܘܼܚܵܐ ܐܝܼܕܼܵܐ ܕܒܸܣܪܵܐ ܠܙܵܘܥܹ̈ܐ ܕܲܒܼܗܘܿܢ 156 ܕܲܒܼܗܲܕܵܡܹ̈ܐ ܡܸܬܼܚܲܙܝܵܢܹ̈ܐ ܓ̣ܡܲܪܘ ܪܸܓܲܬܼܗܘܿܢ ܀ 157 :ܐܲܪܡܝܼܘ ܐܝܼܕܵܐ ܠܵܐ ܚܵܫܘܿܫܹ̈ܐ ܥܲܠ ܚܵܫܘܿܫܹ̈ܐ 158 ܘܒܲܣܒܸܿܣܘ ܓܘܼܫܡܵܐ ܢܲܚܬܵܐ ܕܲܠܒܲܪ ܡ̣ܢ ܫܸܪܝܵܢܵܐ ܀ 159 :ܒܢܲܚܬܵܐ ܒܕܸܣܪܵܐ ܩܸܬܲܬ̤ ܐܝܼܕܼܵܐ ܕܲܒܼܥܸܠܕܲܪܵܐ 160 ܘܠܵܐ ܩܪܸܒܼ ܚܲܫܵܐ ܠܙܵܘܥܹ̈ܐ ܕܲܠܓܼܵܘ ܡ̣ܢ ܗܲܕܵܡܹ̈ܐ ܀ 161 :ܠܪܸ̈ܓܼܫܲܝ ܦܲܓܼܪܵܐ ܡܸܬܼܚܲܙܝܵܢܵܐ ܠܒ݂ܲܟ ܡ̇ܪܘܿܕܼܵܐ 162 ܘܠܵܐ ܡ̣ܛܵܐ ܚܘܼܪܦܵܐ ܕܣܲܝܦܵܐ ܕܢܸܟܼܠܹܗ ܠܘܵܬܼ ܪܸܥܝܵܢܵܐ ܀ 163 :ܠܨܸܦܵܐ ܫܝܼܛܵܐ ܕܣܝܼܡܲܬܼ ܚܲܝܹ̈ܐ ܢܩܲܫ̣ ܨܸܢܥܵܬܹ̈ܐ 164 ܘܲܣܲܬܲܪܘ ܙܵܘܥܹ̈ܐ ܠܥܘܼܬܼܪܵܐ ܕܪܘܼܚܵܐ ܒܚܸܣܢܲܝ̈ ܢܲܫܦܵܐ ܀ 165 :ܒܝܲܕ ܓܲܠ̈ܝܵܬܼܵܐ ܣܒ݂ܲܕ ܡܲܪܵܚܵܐ ܕܲܚܣܲܢ ܘܲܙܟܼܵܐ 166 ܘܠܵܐ ܐܸܬܼܒܲܩܝܼ ܒܚܹܝܠ ܟܲܣܝܘܼܬܼܵܐ ܕܲܒܼܓܼܵܘ ܢܲܦܫܵܐ ܀ 167 :ܐܵܦܸܢ ܦܲܓܼܪܵܐ ܪܦܸܐ ܗܲܕܵܡܹ̈ܐ ܚܵܒܼ݂ ܒܐܵܓܼܘܿܢܵܐ 168 ܐܸܠܵܐ ܢܲܦܫܵܐ ܠܵܐ ܐܸܙܕܲܟܼܝܲܬ̤ ܡ̣ܢ ܨܸܢ̈ܥܵܬܹܗ ܀ 169 :ܒܓܼܘܼܫܡܵܐ ܪܲܦܝܵܐ ܩܒ݂ܲܥ ܚܲܣܵܡܵܐ ܓܹܐܪܵܐ ܕܪܘܼܓܼܙܹܗ 170 ܘܩܲܒܸܿܠ ܐܸܢܘܿܢ ܗܵܘܢܵܐ ܬܲܩܢܵܐ ܒܣܲܟܿܪܵܐ ܕܪܘܼܚܵܐ ܀ 171 :ܒܠܲܥܘ̣ ܗܲܕܵܡܹ̈ܐ ܡܸܬܼܚܲܙܝܵܢܹ̈ܐ ܒܲܡܠܸܐ ܙܲܒܼܢܵܐ 172 ܘܩܵܘܝܼܘ ܙܵܘ̈ܥܹܐ ܠܵܐ ܚܵܫܘܿܫܹ̈ܐ ܕܠܵܐ ܫܘܼܓܼܢܵܝܵܐ ܀ 173 :ܠܵܐ ܐܲܫܦܸܠ ܗ̄ܘ̣ܵܐ ܐܵܦܠܵܐ ܓܘܼܫܡܵܐ ܒܗܵܝ̇ ܕܐܸܬܼܒܲܣܒܲܣ 174 ܕܟܲܕܼ ܚܵܫܘܿܫܵܐ ܗ̄ܘ̣ ܥܨ̣ܵܐ ܠܲܟܼܝܵܢܵܐ ܠܒܲܪ ܡ̣ܢ ܛܲܟܼܣܵܐ ܀ 175 :ܬܲܗܪܵܐ ܗ̄ܘ̣ܵܐ ܓܹܝܪ ܒܝܲܕܼ ܚܘܼܡܣܵܢܹܗ ܕܠܘܼܩܒܲܠ ܚܲܫܹ̈ܐ 176 ܘܛܵܒܼ ܥܲܙܝܼ ܗ̄ܘ̣ܵܐ ܟܲܕܼ ܡܸܬܼܦܲܣܲܩ ܕܠܵܐ ܚܵܘܣܵܢܵܐ ܀ 177 :ܐܘܿ ܚܵܫܘܿܫܵܐ ܕܣܵܗܹ̇ܕܼ ܟܝܵܢܹܗ ܥܲܠ ܚܘܼܒܵܠܹܗ 178 ܕܲܛܥܼܵܐ ܟܝܵܢܹܗ ܘܕܲܡܝܼ ܒܚܲܝܠܵܐ ܕܠܵܐ ܚܵܫܘܫܹ̈ܐ ܀ 179 :ܐܘܿ ܕܲܚܝܼܚܵܐ ܦܸܪ̈ܕܹܿܐ ܕܚܵܠܵܐ ܡܸܬܼܒܲܕܿܪܵܢܵܐ 180 ܕܟܲܢܸܫ ܝܵܬܹܗ ܠܘܵܬܼ ܬܘܼܩܵܢܵܐ ܪܘܼܚܵܢܵܝܵܐ ܀ 181 :ܐܘܿ ܡ̇ܝܘܿܬܼܵܐ ܕܲܓܼܒܼܝܼܠ ܟܠܹܗ ܒܡܵܝܘܿܬܼܘܼܬܵܪܐ 182 ܕܫܲܚܠܸܦ ܛܝܼܢܹܗ ܠܘܵܬܼ ܪܘܼܟܵܒܼܵܐ ܕܢܘܼܟܼܪܵܝ ܠܲܫܡܹܗ ܀ 183 :ܐܘܿ ܐܲܕܼܡܬܼܵܐ ܪܲܦܝܲܬܼ ܓܘܼܫܡܵܐ ܓܒܼܝܼܠܲܬܼ ܒܐܲܪܥܵܐ 184 ܕܵܗܘ̤ܵܬܼ ܡ̣ܢ ܫܠܹܝ ܡܲܪܓܵܢܝܼܬܼܵܐ ܩܲܢܝܲܬܼ ܫܘܼܦܪܵܐ ܀ 185 :ܐܘܿ ܙܓܼܘܿܓܼܝܼܬܼܵܐ ܟܝܢܵܐ ܩܲܪܣܵܐ ܢܩܸܐ ܠܲܬܼܒܼܵܪܵܐ 186 ܕܢܲܩܫܘܼܗ̇ ܚܲܫܹ̈ܐ ܐܲܝܟ ܠܐܵܕܼܵܡܘܿܣ ܘܠܵܐ ܐܸܬܿܬܲܒܿܪܲܬ̤ ܀ 187 :ܟܹܐܦܵܐ ܫܝܼܛܵܐ ܕܠܵܐ ܐܸܬܿܬܿܣܝܼܡܲܬ̤ ܒܒܸܢܝܵܢ ܩܘܼܫܬܵܐ 188 ܗܘ̤ܵܬܼ ܒܪܹܫ ܒܸܢܝܵܢܵܐ ܕܗܲܝܟܲܠ ܡܲܠܟܵܐ ܀ pb. 34 189 :ܛܝܼܢܵܐ ܕܓܲܪܦܘܼܗܝ ܡܲܝ̈ܵܐ ܕܚܲܫܹ̈ܐ ܕܚܵܫܘܿܫܘܼܬܼܵܐ 190 ܚܲܝܸܨ ܗܘ̤ ܠܹܗ ܘܲܗܘ̤ܵܐ ܚܸܨܦܵܐ ܕܩܵܒܹ̇ܐ ܚܲܫܹ̈ܐ ܀ 191 :ܪܦܸܐ ܪܸܥܝܵܢܵܐ ܕܚܲܝܠܸ ܢܲܦܫܹܗ ܐܲܝܟ ܓܲܢ̄ܒܵܪܵܐ 192 ܘܲܒܼܥ̣ܵܐ ܕܢܲܩܠܸܐ ܥܲܠ ܚܲܣܝܼܢܵܐ ܕܕܼܵܫ ܠܲܟܼܝܵܢܹܗ ܀ 193 :ܡܲܢ ܟܲܝ ܐܲܠܦܹܗ ܠܝܲܩܝܼܪ ܓܘܼܫܡܵܐ ܙܢܲܝ̈ ܬܲܟܼܬܿܘܼܫܵܐ 194 ܘܡܲܢ̣ܘܼ ܚܲܝܨܹܗ ܠܡܹܐܚܲܕܼ ܕܲܪܵܐ ܥܲܡ ܪ̈ܘܼܚܵܢܹܐ ܀ 195 :ܡܲܢ̣ܘܼ ܚܵܘܝܹܗ ܠܲܟܼܪܸܐ ܚܲܝܹ̈ܐ ܠܡܸܣܢܵܐ ܚܲܝܵܘ̈ܗܝ 196 ܘܡܲܢ ܐܲܝܬܿܝܼ ܠܹܗ ܣܒܲܪܬܼܵܐ ܕܚܲܝܹ̈ܐ ܕܠܵܐ ܫܘܼܠܵܡܵܐ ܀ 197 :ܡܲܢ ܐܲܥܝܼܪܹܗ ܡ̣ܢ ܛܘܼܒܵܥܹܗ ܠܕܲܡܟܵܐ ܒܗܝܼܠܵܐ 198 ܘܡܲܢ̣ܘܼ ܬܪܲܨ ܠܹܗ ܐܘܼܪܚܵܐ ܠܪܵܘܡ̇ܐ ܠܪܵܚܹ̇ܡ ܥܘܼܡܩܵܐ ܀ 199 :ܐܸܡ݂ܲܬܼܝ ܐܲܚܸܒܼܘ ܦܲܓܼܪܵܢܵܝܹܐ ܦܲܓܼܪ̈ܵܢܵܝܹܐ ܠܪ̈ܘܼܚܵܢܝܵܬܼܵܐ 200 ܘܐܲܝܟܵܐ ܕܲܡܝܼܘ ܐܲܪ̈ܥܵܢܵܝܹܐ ܠܲܫܡܲܝܵܢܹ̈ܐ ܀ 201 :ܡܲܢ̣ܘܼ ܓܠ̣ܵܐ ܠܹܗ ܠܲܕܼܠܵܐ ܣܲܒܼܪܵܐ ܥܲܠ ܦܘܼܪܥܵܢܵܐ 202 ܘܡܲܢ ܒܲܕܸܿܩ ܠܹܗ ܥܲܠ ܚܘܼܕܵܬܼܵܐ ܕܦܲܓܼܪܵܐ ܘܢܲܦܫܵܐ ܀ 203 :ܪܸܡܙܵܐ ܠܥܸܙ ܒܹܗ ܕܗܵܘ̇ ܕܐܲܪܡܝܼ ܒܹܗ ܢܘܼܪܵܐ ܕܚܘܼܒܹܿܗ 204 ܘܐܲܠܦܹܗ ܒܟܸܣܝܵܐ ܠܡܹܐܚܲܕܼ ܕܲܪܵܐ ܥܲܡ ܚܘܼܬܼܚܵܬܹ̈ܐ ܀ 205 :ܒܚܹܝܠ ܟܲܣܝܘܼܬܼܵܐ ܚܲܝܸܠ ܢܲܦܫܹܗ ܠܘܵܬܼ ܬܲܟܼܬܿܘܼܫܵܐ 206 ܘܒܹܗ ܐܸܬܼܓܲܢ̄ܒܼܪ ܘܲܓܼܙܲܡ ܘܐܲܩܠܝܼ ܥܲܠ ܣܵܩܘܼܪܹܗ ܀ 207 :ܒܪܘܼܚ ܓܸܠܝܵܢܵܐ ܩܢ̣ܵܐ ܒܘܼܝܵܢܵܐ ܠܡܸܣܢܵܐ ܚܲܝܵܘ̈ܗܝ 208 ܘܒܹܗ ܐܸܬܼܚܲܟܲܡ ܠܲܡܚܲܠܵܦܘܼ ܚܲܝܹ̈ܐ ܒܚܲܝܹ̈ܐ ܀ 209 :ܚܲܝܹ̈ܐ ܒܚܲܝܹ̈ܐ ܦܲܚܸܡܘ ܘܲܬܼܩ̣ܠܘ ܐܲܝܟ ܦܪ̈ܘܿܫܹܐ 210 ܘܙܸܠܲܬ̤ ܟܲܦܬܼܵܐ ܕܚܲܝܹ̈ܐ ܕܲܬܼܢܵܢ ܡ̣ܢ ܕܲܠܥܵܠܲܡ ܀ 211 :ܬܩܲܠ̣ܘ ܚܘܼܡܣܵܢܵܐ ܕܚܲܝܹ̈ܐ ܕܲܬܼܢܵܢ ܒܡܲܠܟܿܘܼܬܼ ܪܵܘܡ̇ܐ 212 ܘܠܵܐ ܣܠ̣ܩܘ ܥܲܡܠܹ̈ܐ ܥܲܠ ܦܘܼܪܥܵܢܵܐ ܕܲܥܬܼܝܼ̈ܕܼܵܬܼܵܐ ܀ 213 :ܙܥܘܿܪܝܼܢ ܚܲܫܹ̈ܐ ܕܦܲܓܼܪܵܐ ܘܢܲܦܫܵܐ ܡ̣ܢ ܡܘܼܠܟܵܢܹ̈ܐ 214 ܘܠܵܐ ܡܸܬܼܦܲܚܡܝܼܢ ܢܘܼܪܵܐ ܘܣܲܝܦܵܐ ܒܲܟܼܠܝܼܠ ܫܘܼܒܼܚܵܐ ܀ 215 :ܠܵܐ ܡܨܸܐ ܣܵܦܹ̇ܩ ܦܲܓܼܪܵܐ ܒܕܸܒܼܚܹܗ ܠܘܵܬܼ ܬܲܪܥܘܼܬܼܵܐ 216 ܐܵܦܠܵܐ ܢܲܦܫܵܐ ܒܝܲܕܼ ܚܘܼܡܣܢܵܗ̇ ܠܥܸܠܲܬܼ ܫܲܝܢܵܐ ܀ 217 ܒܛܲܝܒܿܘܼ ܚܲܫ̣ܒܿܘܼܗ̇ ܠܗܵܝ̇ ܡ̇ܘܗܲܒܼܬܼܵܐ ܕܥܸܠܲܬܼ ܫܲܝܢܵܐ ܀ 218 ܘܠܵܐ ܐܸܫܬܿܒܼܗܲܪܘ ܕܲܒܼܝܲܕܼ ܥܲܡܠܹ̈ܐ ܢܣܲܒܼ݂ܘ ܙܵܟܼܘܼܬܼܵܐ ܀ 219 :ܠܗܵܝ̇ ܒܲܪܬܼ ܩܵܠܵܐ ܡܸܬܿܕܲܟܼܝܼܢ ܗ̄ܘ̣ܵܘ ܥܲܒܼ̈ܕܲ ܡܲܠܟܵܐ 220 ܕܡ̇ܐ ܕܲܥܒܲܕܿܬܿܘܿܢ ܟܠ ܕܲܦܩܝܼ̈ܕܼܵܢ ܠܵܐ ܬܸܬܼܚܲܬܿܪܘܼܢ ܀ 221 :ܠܗܵܘ̇ ܟܵܪܘܿܙܵܐ ܡܲܫܡܲܥ ܥܲܡܡܹ̈ܐ ܡܸܬܼܥܲܗܕܼܝܼܢ ܗ̄ܘ̣ܵܐ 222 ܕܠܵܐ ܠܲܡ ܫܵܘܹ̇ܝܢ ܚܲܫܹ̈ܐ ܕܙܲܒܼܢܵܐ ܠܛܘܼܒܹ̈ܐ ܡܠܝܼܟܹ̈ܐ ܀ 223 :ܒܥܲܡܠܹ̈ܐ ܕܢܲܦܫܹܗ ܬܲܗܝܼܪܝܼܢ ܗ̄ܘ̣ܵܘ ܕܲܟܼܡܵܐ ܫܒܒܼܚܝܼܢ 224 ܘܲܒܼܦܸܬܼܓܼܵܡܵܘ̈ܗܝ ܡܸܬܿܕܲܡܪܝܼܢ ܗ̄ܘ̣ܵܘ ܕܲܡܠܹܝܢ ܩܸܢܛܵܐ ܀ pb. 35 225 :ܕܵܚܹ̇ܠ ܐ̄ܢܵܐ ܠܲܡ ܐܸܢܵܐ ܕܙܸܪܥܹ̇ܬܼ ܡܸܠܲܬܼ ܚܲܝܹ̈ܐ 226 ܕܲܠܡܵܐ ܐܸܢܵܐ ܩܢܘܿܡܝ ܐܸܬܼܢܲܟܼܪܸܐ ܠܣܝܼܡܲܬܼ ܚܲܝܹ̈ܐ ܀ 227 :ܘܐܸܢܗܘ̤ ܕܡ̇ܐܝܵܐ ܕܲܓ̣ܒܼܵܝܗܝ ܪܘܼܚܵܐ ܩܸܢܛܵܐ ܡܠܸܐ ܗ̄ܘ̣ܵܐ 228 ܡܲܢ ܢܸܫܬܲܒܼܗܲܪ ܕܲܚܠܵܦ ܥܲܡܠܵܘ̈ܗܝ ܢܸܫܬܿܘܸܐ ܠܛܝܼܒܹ̈ܐ ܀ 229 :ܐܸܢ ܐܲܬܼܠܹܝܛܵܐ ܕܙܲܕܿܝܼܩܘܼܬܼܵܐ ܡܲܟܸܿܟ ܢܲܦܵܫܹܗ 230 ܡܲܢ̣ܘܼ ܢܚܵܘܸܐ ܫܘܼܦܪܵܐ ܕܥܲܡܠܵܘ̈ܗܝ ܩܕܼܵܡ ܚܲܙܵܝܹ̈ܐ ܀ 231 :ܒܢܝܼܫܵܐ ܕܡܸܠܵܘ̈ܗܝ ܡܸܬܼܒܲܩܹܝܢ ܗ̄ܘ̣ܵܘ ܐܵܦ ܐܲܬܼܠܹܝܛܹ̈ܐ 232 ܕܲܙܥܘܿܪ ܚܲܫܵܐ ܡ̣ܢ ܦܘܼܪܥܵܢܵܐ ܡܸܬܼܪܲܥܹܝܢ ܗ̄ܘ̣ܵܘ ܀ 233 :ܘܡܸܛܠ ܗܵܕܹܐ ܒܗܲܢܝܼܐܘܼܬܼܵܐ ܣܲܝܒܲܪܘ ܚܲܫܹ̈ܐ 234 ܕܚܵܪ̣ܘ ܒܲܟܼܠܝܼܠܹ̈ܐ ܕܲܦܐܹܝܢ ܣܲܓܿܝܼ ܡ̣ܢ ܥܲܡܠܲܝ̈ܗܘܿܢ ܀ 235 :ܓܚܸܟܼܘ ܥܲܠ ܣܲܝܦܹ̈ܐ ܘܫܵܛ̣ܘ ܠܲܣܪ̈ܵܩܹܐ ܘܕܼܵܫܘ̣ ܥܲܠ ܢܘܼܪܵܐ 236 ܘܒܲܙܲܚܘ ܘܐܲܗܸܠܘ ܒܲܟܪܘܼܢܘܼܬܼܵܐ ܕܒܼܝܼܫܵܐ ܘܡ̇ܘܬܵܐ ܀ 237 :ܬܲܒܿܪܘܼܗܝ ܠܣܲܝܦܵܐ ܒܚܘܼܪܦܵܐ ܩܲܫܝܵܐ ܕܪܸ̈ܥܝܵܢܲܝܗܘܿܢ 238 ܘܦܲܣܸܩܘ ܐܸܢܘܿܢ ܠܡܵܐܢܲܝ̈ ܢܸܓܼ̈ܕܹܿܐ ܒܚܘܼܡܣܵܢ ܢܲܦܫܵܐ ܀ 239 :ܙܟܼܵܐܘܼܗ̇ ܠܢܘܼܪܵܐ ܒܚܲܡܝܼܡܘܼܬܵܪܐ ܕܚܘܼܒܵܐ ܕܲܒܼܗܘܿܢ 240 ܘܩܸܪܲܬ̤ ܘܲܫܗܵܬ̤ ܥܲܙܝܼܙܘܼܬܼܵܗ̇ ܡ̣ܢ ܦܲܚܼܪ̈ܲܝܗܘܿܢ ܀ 241 :ܐܘܿ ܠܲܟܼܝܵܢܵܐ ܡܛܲܠܸܩ ܓܘܼܫܡܹ̈ܐ ܕܚܵܒܼ݂ ܡ̣ܢ ܓܘܼܫܡܹ̈ܐ 242 ܐܘܿ ܐܵܟܼܘܿܠܬܵܐ ܕܲܗܘ̤ܵܬܼ ܐܘܼܟܼܠܵܐ ܠܡܸܬܼܐܲܟܼܠܵܢܹ̈ܐ ܀ 243 :ܐܘܿ ܦܲܓܼܪ̈ܵܢܹܐ ܝܵܩ̈ܕܲܝ ܟܠܫܵܥ ܒܲܪ̈ܓܼܝܼܓܼܵܬܼܵܐ 244 ܕܫܲܬܸܿܩܘ ܥܘܼܙܵܐ ܕܫܲܠܗܹܒܼܝܼܬܼܵܐ ܒܚܘܼܡܣܵܢܲܝ̈ܗܘܿܢ ܀ 245 :ܠܢܘܼܪܵܐ ܒܢܘܼܪܵܐ ܕܪܸ̈ܥܝܵܢܲܝܗܘܿܢ ܚܣ݂ܲܢܘ ܐܲܬܼܠܹܝܛܹ̈ܐ 246 ܘܠܵܐ ܐܸܬܼܟܵܪܝܼܘ ܙܵܘܥܹ̈ܐ ܕܒܼܗܘܿܢ ܡ̣ܢ ܝܵܩܹܕܲܬܵܐ ܀ 247 :ܒܗܘܿܢ ܐܸܬܼܡܪܲܬ̤ ܐܸܬܼܓܲܡܪܲܬ̤ ܒܝܲܕܼ ܣܘܼܥܪ݁ܵܢܹܐ ܗܵܝ̇ ܕܲܟܼܬܼܝܼܒܼܵܐ 248 ܕܐܸܢܗܘ̤ ܕܬܼܥܒܲܪ ܒܝܲܡܵܐ ܘܢܘܼܪܵܐ ܥܲܡܵܟ ܐܝܼܬܲܝ ܀ 249 :ܒܢܘܼܪܵܐ ܘܡܲܝ̈ܵܐ ܥܲܠ̣ܘ ܘܐܸܬܼܢܲܣܝܼܘ ܡ̣ܢ ܪ̈ܵܕܼܘܿܦܹܐ 250 ܘܩܪܲܬ̤ ܢܘܼܪܵܐ ܘܲܦܟ݂ܲܗܘ ܡܲܝ̈ܵܐ ܘܩܵܡ̣ܘ ܒܲܪܘܲܚܬܼܵܐ ܀ 251 :ܐܘܿ ܥܲܦܪ̈ܵܢܹܐ ܕܫܸܓܼܪܲܬ̤ ܐܸܢܘܿܢ ܫܲܠܗܹܒܼܝܼܬܵܪܐ 252 ܘܲܗܘ̤ܵܘ ܡ̇ܐܢܹ̈ܐ ܕܣܝܼܡܲܬܼ ܚܲܝܹ̈ܐ ܕܠܵܐ ܡܸܬܼܓܲܢܒܵܐ ܀ 253 :ܐܘܿ ܕܲܚܝܼܚܵܐ ܕܡܲܬܼܪܲܝ ܟܠܫܵܥ ܒܡܲܝ̈ܵܐ ܕܚܲܫܹ̈ܐ 254 ܕܲܥܒܲܪܘ ܚܲܫܹ̈ܐ ܒܓܼܵܘ ܗܲܕܵܡ̇ܘ̈ܗܝ ܒܲܕܼܡܘܼܬܼ ܢܘܼܪܵܐ ܀ 255 :ܡ̇ܐܢܵܐ ܕܲܙܩܝܼܪ ܒܡܸܢܲܝ̈ ܥܲܡܪܵܐ ܡܸܬܼܚܲܒܿܠܢܵܐ 256 ܐܲܫܝܼܓܼ ܢܲܦܫܹܗ ܒܫܲܠܗܹܒܼܝܼܬܼܵܐ ܘܠܵܐ ܐܸܬܼܚܲܪܲܟ ܀ 257 :ܐܲܡܝܼܢܹܛܘܿܢ ܢܸܩܪܸܐ ܐܸܢܘܿܢ ܠܦܲܓܼܪ̈ܵܢܵܝܹܐ 258 ܕܐܲܫܝܼܓܼܘ ܨܵܐܬܼܵܐ ܕܗܲܕܵܡܲܝ̈ܗܘܿܢ ܒܫܲܠܗܹܒܼܝܼܬܼܵܐ ܀ pb. 36 259 :ܗܵܝ̇ ܓܹܝܪ ܦܲܓܼܪܵܐ ܗ̄ܝܼ ܡܸܬܼܚܲܒܿܠܵܢܵܐ ܐܲܝܟ ܟܠ ܦܲܓܼܪ̈ܝܼܢ 260 ܘܢܲܚܬܵܐ ܕܡܸܢܵܗ̇ ܠܵܐ ܡܸܬܼܚܲܒܲܠ ܡ̣ܢ ܐܸܟܹ̇ܠܬܵܐ ܀ 261 :ܐܵܦ ܦܲܓܼܪ̈ܵܢܹܐ ܦܲܓܼܪܵܐ ܩܢܹܝܢ ܗ̄ܘ̣ܵܘ ܡܸܬܼܚܲܒܿܠܵܢܵܐ 262 ܘܢܲܚܬܵܐ ܕܚܘܼܒܵܐ ܕܒܼܝܼܫܝܼܢ ܗ̄ܘ̣ܵܘ ܠܵܐ ܐܸܬܼܚܲܒܲܠ ܀ 263 :ܠܨܵܐܬܼܵܐ ܕܓܼܘܼܫܡܵܐ ܐܲܫܝܼܓܼ ܢܘܼܪܵܐ ܕܡܲܝܵ̈ܐ ܕܚܲܫܹ̈ܐ 264 ܘܫܲܦܲܪ ܓܘܼܫܡܵܐ ܘܢܸܗܪܲܬ̤ ܢܲܦܫܵܐ ܒܩܵܠ ܚܘܼܕܵܬܼܵܐ ܀ 265 :ܩܵܠ ܚܘܼܕܵܬܼܵܐ ܫܡ݂ܲܥܘ ܡ̇ܝܘܿܬܹ̈ܐ ܕܡܲܠܸܠ ܒܐܲܪܥܵܐ 266 ܘܲܣܬܲܪܘ ܦܲܓܼܪܵܐ ܕܲܒܼܢܸܐ ܒܚܲܫܹ̈ܐ ܕܬܼܘܼܒܼ ܢܸܬܼܚܲܕܲܬܼ ܀ 267 :ܚܙ̣ܵܘ ܪܘܼܟܵܒܼܵܐ ܕܗܲܕܵܡܲܝ̈ܗܘܿܢ ܕܙܲܥܘܿܪ ܘܲܡܚܝܼܠ 268 ܘܩܲܕܸܿܡܘ ܣܲܬܼܪܘܼܗܝ ܒܝܲܕܼ ܛܘܼܝܵܒܼܵܐ ܕܪܸ̈ܥܝܵܢܲܝܗܘܿܢ ܀ 269 :ܗܸܢܘ̣ܿܢ ܣܲܬܼܪܘܼܗܝ ܠܵܐ ܗ̄ܘ̣ܵܐ ܩܛܝܼܪܵܐ ܕܪ̈ܵܕܼܘܿܦܲܝܗܘܿܢ 270 ܕܲܦܫܝܼܩ ܗ̄ܘ̣ܵܐ ܠܗܘܿܢ ܠܡܸܪܕܲܦ ܚܲܫܹ̈ܐ ܡ̣ܢ ܓܘܼܫܡܲܝ̈ܗܘܿܢ ܀ 271 :ܒܫܘܼܚܬܵܐ ܕܦܲܓܼܪܵܐ ܡܸܬܼܚܲܒܿܠܵܢܵܐ ܡܸܬܼܒܲܩܹܝܢ ܗ̄ܘ̣ܵܐ 272 ܘܐܲܥܸܠܘ ܢܲܣܟܿܘܼܗܝ ܒܟܼܘܼܪܵܐ ܕܚܲܫܹ̈ܐ ܕܢܸܩܢܸܐ ܫܘܼܦܪܵܐ ܀ 273 :ܠܵܐ ܗ̄ܘ̣ܵܐ ܩܛܝܼܪܵܐ ܥܨ̣ܵܐ ܚܹܐܪܘܼܬܼܵܐ ܕܪܸ̈ܥܝܵܢܲܝܗܘܿܢ 274 ܗܸܢܘ̣ܿܢ ܕܵܢܘܼܗ̇ ܐܲܝܟ ܦܵܪ̈ܘܿܫܹܐ ܕܗܵܕܹܐ ܦܲܐܝܵܐ ܀ 275 :ܒܗܵܘܢܵܐ ܬܲܩܝܐ ܚܙ̣ܵܘ ܦܲܓܼܪ̈ܲܝܗܘܿܢ ܕܲܢܣܝܼܣܝܼܢ ܗ̄ܘ̣ܵܐ 276 ܘܫܲܕܼܵܘ ܓܘܼܫܡܵܐ ܕܛܝܼܢܵܐ ܪܲܦܝܵܐ ܘܲܩܢ̣ܵܘ ܪܘܼܚܵܐ ܀ 277 :ܐܲܝܟ ܚܲܟܿܝܼܡܹ̈ܐ ܕܵܢܘ ܘܐܸܬܼܒܝܲܢܘ ܒܲܬܼܪܹܝܢ ܓܲܒܼܝܼ̈ܢ 278 ܕܦܲܩܵܚ ܡ̇ܘܬܵܐ ܕܲܡܠܸܐ ܙܲܒܼܢܵܐ ܘܠܵܐ ܕܵܥܵܠܲܡ ܀ 279 :ܒܕܝܼܢܵܐ ܥܲܠ̣ܘ ܗ̄ܘ̣ܵܘ ܒܙܵܥܲܝ̈ ܢܲܦܫܵܐ ܘܪܸ̈ܓܼܫܲܝ ܦܲܓܼܪܵܐ 280 ܕܐܲܝܕܼܵܐ ܟܹܐܢܵܐ ܕܢܸܚܲܫ ܩܲܠܝܼܠ ܐܵܘ ܩܲܫܝܵܐܝܼܬܼ ܀ 281 :ܐܲܝܕܼܵܐ ܦܫܝܩܵܐ ܙܵܘܥܹ̈ܐ ܐܸܡܲܪܘ ܠܪܸ̈ܓܼܫܲܝ ܦܲܓܼܪܵܐ 282 ܚܲܫܹ̈ܐ ܕܙܲܒܼܢܵܐ ܐܵܘ ܫܘܼܢܵܩܵܐ ܕܠܵܐ ܫܘܼܠܵܡܵܐ ܀ 283 :ܡ̣ܢ ܡܲܢ ܢܸܕܼܚܲܝܠ ܢܲܦܫܵܐ ܐܸܡܪܲܬ̤ ܠܢܵܘܣܵܐ ܕܥܘܼܡܪܲܗ̇ 284 ܡ̣ܢ ܩܵܛܘܿܠܵܐ ܕܚܲܕܼ ܒܲܪܢܵܫܵܐ ܐܵܘ ܕܲܬܼܪ̈ܲܝܗܘܿܢ ܀ 285 :ܘܸܟܼܒܲܪ ܚܵܘܩܵܐ ܕܗܵܘ̇ ܦܸܬܼܓܼܵܡܵܐ ܩܪ̣ܵܐ ܪܸܥܝܵܢܵܐ 286 ܕܠܵܐ ܬܸܬܼܪܲܗܒܿܘܼܢ ܡ̣ܢ ܩܵܛܘܼܠܵܐ ܕܩܵܛܹ̇ܠ ܦܲܓܼܪܵܐ ܀ 287 :ܕܚܲܠܘ ܕܹܝܢ ܝܲܬܿܝܼܪ ܐܵܦ ܐܸܣܬܲܪܲܕܼܘ ܐܲܝܟ ܦܵܪ̈ܘܿܫܹܐ 288 ܡ̣ܢ ܡܲܢ ܕܲܡܨܸܐ ܕܢܲܦܫܵܐ ܘܦܲܓܼܪܵܐ ܢܲܪܡܸܐ ܒܢܘܼܪܵܐ ܀ 289 :ܒܵܗܵܘ̇ ܫܘܼܢܵܩܵܐ ܕܠܵܐ ܫܘܼܠܵܡܵܐ ܡܸܬܼܒܲܩܹܝܢ ܗ̄ܘ̣ܵܘ 290 ܘܲܒܼܗܵܘ̇ ܕܝܼܢܵܐ ܕܥܵܐ̇ܠܵܐ ܒܨܵܬܹܗ ܠܙܵܘ̈ܥܲܝ ܢܲܦܫܵܐ ܀ 291 :ܚܲܝܵܐ ܗ̄ܝܼ ܡܸܠܬܹܗ ܕܐܲܠܵܗ ܟܠܵܐ ܩܪ̣ܵܘ ܘܐܸܬܼܗܲܓܿܝܼܘ 292 ܘܚܲܪܝܼܦ ܕܝܼܢܹܗ ܛܵܒܼ ܡ̣ܢ ܣܲܝܦܵܐ ܕܬܼܪܹܝܢ ܦܘܼܡ̇ܘ̈ܗܝ ܀ 293 :ܒܠܘܼܚܹܗ ܕܠܸܒܿܗܘܿܢ ܟܬܲܒܼܘ ܢܲܨܝܼܚܹ̈ܐ ܣܸܦܪܹ̈ܐ ܕܪܘܼܚܵܐ 294 ܘܪܘܼܚܵܢܵܐܝܼܬܼ ܡܸܬܼܗܲܓܸܿܝܢ ܗ̄ܘ̣ܵܘ ܒܲܣܬܼܝܼܪ̈ܵܬܼܵܐ ܀ 295 ܡ̇ܐ ܕܥܲܠ̣ܘ ܢܸܓܼ̈ܕܹܿܐ ܘܲܚ̈ܙܲܝ ܥܲܝܢܹ̈ܐ ܘܙܵܥ̣ܘ ܗܲܕܵܡܹ̈ܐ: pb. 37 296 ܩܪ̣ܵܘ ܚܘܼܫܵܒܹ̈ܐ ܒܲܥܬܼܝܼ̈ܕܼܵܬܼܵܐ ܘܒܲܝܲܐܘ ܐܸܢܘܿܢ ܀ 297 :ܡ̇ܐ ܬܘܼܒܼ ܕܐܲܒܼܪܸܩ ܣܲܝܦܵܐ ܕܚܝܼܠ ܠܥܸܠ ܡ̣ܢ ܓܘܼܫܡܵܐ 298 ܣܵܡ̣ܘ ܪܸܥܝܵܢܵܐ ܦܘܼܪܩܵܢ ܚܲܝܹ̈ܐ ܐܲܝܟ ܣܲܢܘܲܪܬܵܐ ܀ 299 :ܡ̇ܐ ܕܐܸܫܬܲܓܼܪܲܬ̤ ܫܲܠܗܹܒܼܝܼܬܼܵܐ ܒܩܲܝܪܲܝ̈ ܚܸܡܬܼܵܐ 300 ܢܚܸܬܼ ܚܘܼܡܣܵܢܵܐ ܒܲܕܼܡܘܼܬܼ ܛܲܠܵܐ ܥܲܠ ܗܲܕܵܡܹ̈ܐ ܀ 301 :ܒܐܘܼܪܚܵܐ ܕܒܼܵܒܹܠ ܪܕܼܵܘ ܢܲܨܝܼܚܹ̈ܐ ܒܪܸ̈ܥܝܵܢܲܗܘܿܢ 302 ܘܲܚܙ̣ܵܘ ܬܲܡܵܢ ܢܘܼܪܵܐ ܕܚܵܒܲܬ̤ ܘܦܲܓܼܪܵܐ ܕܲܙܟܼܵܐ ܀ 303 :ܒܗܵܘܢܵܐ ܚܙ̣ܵܐܘܼܗ̇ ܠܗܵܝ̇ ܢܲܒܼܪܲܬܵܐ ܕܲܟܼܡܵܐ ܣܸܠܩܲܬ̤ 304 ܘܐܲܝܟܲܢ ܩܲܦܲܚ ܪܸܡܙܵܐ ܟܲܣܝܵܐ ܠܪܵܘܡ̇ܐ ܕܕܸܠܩܵܗ̇ ܀ 305 :ܕܚܝܼܠܵܐ ܗ̄ܘ̣ܵܬܼ ܛܵܒܼ ܟܲܕܼ ܐܸܫܬܲܪܲܬ̤ ܒܩܲܝܣܹ̈ܐ ܕܚܸܡܬܼܵܐ 306 ܘܫܝܼܛ ܗ̄ܘ̣ܵܐ ܘܲܒܼܣܸܐ ܫܘܼܠܵܡ ܕܸܠܩܵܗ̇ ܐܸܙܕܲܟܲܝܲܐܬ̤ ܀ 307 :ܥܲܙܝܼܙ ܗ̄ܘ̣ܵܐ ܛܵܒܼ ܗܵܘ̇ ܦܘܼܩܕܼܵܢܵܐ ܕܝܲܗ̣̄ܒܼ ܠܵܗ̇ ܐܘܼܟܼܠܵܐ 308 ܘܢܲܫܝܼܫ ܘܲܪܦܸܐ ܚܹܝܠ ܣܘܼܥܪܵܢܵܗ̇ ܒܪܲܪ ܡ̣ܢ ܛܲܟܼܣܵܐ ܀ 309 :ܡܛܲܠܩܵܬܝܼܬܼܵܐ ܕܟܼܠܡܵܐ ܕܐܝܼܬܼܵܘܗܝ ܡܸܬܼܚܲܒܿܠܵܢܵܐ 310 ܛܥܵܬ̤ ܠܲܟܼܝܵܢܵܗ̇ ܘܲܦ̣ܟܲܗ ܚܲܝܠܵܐ ܕܥܲܙܝܼܙܘܼܬܵܗ̇ ܀ 311 :ܦܘܼܡ̇ܐ ܕܐܲܝܵܐ ܕܠܵܐ ܣܒ݂ܲܥ ܡܸܡܬܼܘܿܡ ܡ̣ܢ ܝܲܥܢܘܼܬܼܵܐ 312 ܫܕܼܵܘ ܠܹܗ ܓܸܙܪܵܐ ܘܠܵܐ ܦܬ݂ܲܚ ܦܘܼܡܹܗ ܠܘܼܩܒܲܠ ܐܘܼܟܼܠܹܗ ܀ 313 :ܠܗܵܝ̇ ܕܐܸܣܬܲܥܪܲܬ̤ ܡ̣ܢ ܒܵܒܼܵܠܝܹ̈ܐ ܒܲܚܬܼܝܼܪܘܼܬܼܵܐ 314 ܨܵܪܘ ܢܲܨܝܼܚܹ̈ܐ ܐܲܝܟ ܡܲܚܙܝܼܬܼܵܐ ܩܕܼܵܡ ܥܲܝܢܲܝ̈ܗܘܿܢ ܀ 315 :ܬܲܡ̇ܢ ܩܵܡ̣ܘ ܗ̄ܘ̣ܵܘ ܐܵܦ ܐܸܬܼܒܲܩܝܼܘ ܒܥܲܝ̈ܢܲܝ ܠܸܒܵܐ 316 ܟܲܕܼ ܐܸܬܼܟܲܢܲܫܘ ܥܲܡܡܹ̈ܐ ܠܡܸܚܙܵܐ ܛܘܼܠܵܩ ܐ̄ܢܵܫܵܐ ܀ 317 :ܠܗܵܘ̇ ܫܘܼܠܵܡܵܐ ܕܗܵܘ̇ ܣܘܼܥܪܵܢܵܐ ܣܲܟܿܝܼܘ ܘܲܫܠܸܡ̣ܘ 318 ܟܲܕ ܐܸܫܬܿܓܼܪܲܬ̤ ܢܘܼܪܵܐ ܒܢܘܼܪܵܐ ܕܲܛܪܘܼܢܘܼܬܼܵܐ ܀ 319 :ܘܸܟܼܒܲܪ ܗܵܕܹܐ ܥܵܢܘ̣ ܐܵܦ ܗܸܢܘ̣ܿܢ ܠܩܵܛܘܿܠܲܝ̈ܗܘܿܢ 320 ܕܠܵܐ ܝܵܨ̇ܦܝܼܢܲܢ ܠܡܸܦܲܩ ܪܘܼܚܵܐ ܥܲܠ ܚܘܼܒܵܠܲܢ ܀ 321 :ܗܵܘ̇ ܦܘܼܩܕܵܢܵܐ ܕܦܲܓܸܿܕܼ ܦܘܼܡ̇ܐ ܕܫܲܠܗܹܒܼܝܼܬܼܵܐ 322 ܗܘ̤ ܦܵܪܹܩ ܠܲܢ ܡ̣ܢ ܫܘܼܢܵܩܵܐ ܕܐܘܼܠܨܵܢܲܝ̈ܟܿܘܿܢ ܀ 323 :ܠܗܵܘ̇ ܡܘܼܠܡܵܢܵܐ ܕܠܵܐ ܡܸܬܿܕܿܓܲܠ ܫܡ݂ܲܥܘ ܘܐܸܬܼܠܲܒܲܒܼܘ 324 ܕܡܲܢ ܕܲܡܣܲܝܒܲܪ ܥܕܲܡܵܐ ܠܚܲܪܬܼܵܐ ܢܸܚܸܐ ܠܥܵܠܲܡ ܀ 325 :ܣܲܒܼܪܵܐ ܕܚܲܝܹ̈ܐ ܫܲܪܲܪ ܐܸܢܘܿܢ ܒܐܘܼܠܨܵܢܲܝ̈ܗܘܿܢ 326 ܘܠܵܐ ܐܸܬܼܪܲܦܝܼܘ ܟܲܕܼ ܚܵܫ̇ܝܼܢ ܗ̄ܘ̣ܵܘ ܡ̣ܢ ܟܵܦܘܿܪܹ̈ܐ ܀ 327 :ܚܙܵܬܼܵܐ ܕܬܲܗܪܑܵ ܡܸܬܼܚܵܘܝܵܐ ܗ̣̄ܘܵܬܼ ܩܕܼܵܡ ܗܲܝܢܲܝ̈ܗܘܿܢ 328 ܘܡܸܬܼܦܲܟܿܣܵܐ ܗ̣̄ܘܵܬܼ ܚܲܡܝܡܘܼܬܼܵܐ ܕܚܘܼܒܵܐ ܒܚܘܼܒܵܐ ܀ 329 :ܒܪܸܚܡܲܬܼ ܚܘܼܒܵܐ ܐܲܠܵܗܵܝܵܐ ܡܸܬܼܥܲܩܪܵܐ ܗ̣̄ܘܵܬܼ 330 ܪܸܚܡܲܬܼ ܚܘܼܒܵܐ ܕܣܝܼܡ ܒܲܟܼܝܵܢܵܐ ܕܡ̇ܝܘܿܬܼܘܼܬܼܵܐ ܀ pb. 38 331 :ܐܘܿ ܨܸܒܼܝܵܢܵܐ ܩܢܸܐ ܚܹܐܪܘܼܬܼܵܐ ܕܦܵܪܫܘܼܬܵܪܐ 332 ܕܲܥܨ̣ܵܐ ܩܛܝܼܪܹܗ ܠܐܲܣܝܼܪܘܼܬܼܵܐ ܕܣܵܡ̣ ܒܵܪܘܿܝܵܐ ܀ 333 :ܐܘܿ ܢܸܟܼܝܵܢܵܐ ܕܐܲܣܝܼܪ ܟܠܹܗ ܒܚܲܝܹ̈ܐ ܕܙܲܒܼܢܵܐ 334 ܕܚܲܣܢܹ݂ܗ ܚܘܼܒܵܐ ܕܪܸܚܡܲܬܼ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 335 :ܐܘܿ ܕܲܡܡܲܫܟܲܢ ܟܝܵܢܹܗ ܠܡܵܘܬܵܐ ܚܠܵܦ ܣܲܟܼܠܘܼܬܹܗ 336 ܘܫܲܪܝܼ ܦܵܪܲܗ ܒܚܲܫܲܝ̈ ܦܲܓܼܪܵܐ ܫܛܵܪ ܚܵܘ̈ܒܵܬܹܐ ܀ 337 :ܐܘܿ ܕܲܡܙܲܒܲܢ ܠܐܵܟܹ̇ܠܩܲܪܨܵܐ ܒܐܘܼܟܼܠܵܐ ܕܦܹܐܪܵܐ 338 ܕܲܩ̣ܪܵܐ ܚܪܘܼܪܹ̈ܐ ܒܝܲܕܼ ܚܘܼܡܣܵܢܵܐ ܕܲܪ̈ܓܼܝܼܓܼܵܬܼܵܐ ܀ 339 :ܥܲܡ ܟܠ ܘܲܒܼܟܼܠ ܥܒ݂ܲܕܼܘ ܬܲܟܼܬܿܘܼܫܹ̈ܐ ܒܸܣܪ̈ܵܢܵܝܹܐ 340 ܘܥܲܠ ܟܠ ܐܲܩܠܝܼܘ ܘܲܠܟܼܠ ܚܲܝܸܒܼܘ ܘܲܢܨܲܚ̣ܘ ܘܲܙܟܼܵܘ ܀ 341 :ܒܚܲܫܲܝ̈ ܦܲܓܼܪܵܐ ܘܙܵܘܥܲܝ̈ ܢܲܦܫܵܐ ܢܣ݂ܲܒܼܘ ܙܵܟܼܘܼܬܼܵܐ 342 ܘܒܲܣܲܪܘ ܘܐܲܗܸܠܘ ܒܲܪ̈ܓܼܝܼܓܼܵܬܼܵܐ ܕܦܲܓܼܪܵܐ ܘܢܲܦܫܵܐ ܀ 343 :ܙܟܼܵܘ ܠܲܥܝܼܪܹ݁ܵܐ ܟܝܵܢܵܐ ܕܲܬܼܪܹܝܢ ܒܝܲܕܼ ܚܘܼܣܵܢܵܐ 344 ܘܠܹܗ ܠܲܟܼܝܵܢܵܐ ܕܵܫܘܼܗܝ ܘܲܥܒܲܪܘ ܠܥܸܠ ܡ̣ܢ ܥܘܼܩܣܵܘ̈ܗܝ ܀ 345 :ܠܪܸܓܲܬܼ ܦܲܓܼܪܵܐ ܢܸܒܼܥܵܐ ܕܪܵܕܹܐ ܒܐܲܡܝܼܢܘܼܬܼܵܐ 346 ܦܣܩ̣ܘܼܗܝ ܫܸܦܝܹܗ ܡ̣ܢ ܗܲܕܵܡܹ̈ܐ ܕܠܵܐ ܢܸܬܼܪܲܓܿܘܿܢ ܀ 347 :ܠܪܸܚܡܲܬܼ ܟܸܣܦܵܐ ܐܸܡ̇ܐ ܕܝܸܠܕܲܬ̤ ܟܠ ܒܝܼ̈ܫܬܼܵܐ 348 ܣܵܡ̣ܘܼܗ̇ ܒܩܲܒܼܪܵܐ ܕܠܵܐ ܬܘܼܒܼ ܬܸܬܸܿܠ ܦܹܐܪܹ̈ܐ ܠܡܵܘܬܵܐ ܀ 349 :ܠܪܸܚܡܲܬܼ ܫܘܼܒܼܚܵܐ ܚܲܒܼܫܘܼܗ̇ ܒܚܸܣܢܹ̈ܐ ܕܡܲܟܿܝܼܟܼܘܼܬܼܵܐ 350 ܘܐܸܚܲܕܼܘ ܒܐܲܦܹܝ̈ܗ̇ ܬܲܪ̈ܥܹܐ ܕܚܘܼܒܵܐ ܕܒܵܐ ܡܬܼܚܲܣܢܝܼܢ ܀ 351 :ܚܣܵܡܵܐ ܛܪܘܼܢܵܐ ܕܲܟܪܲܕܼ ܘܐܲܩܠܝܼ ܥܲܠ ܟܠ ܚܲܫܝܼ̈ܢ 352 ܡܲܟܸܿܟܼܘ ܥܘܼܫܢܵܐ ܕܬܲܩܦܝܼܬܹܗ ܒܡܸܠܲܬܼ ܫܲܝܢܵܐ ܀ 353 :ܠܚܸܡܬܼܵܐ ܕܐܝܼܬܹܝܗ̇ ܚܲܝܘܲܬܼ ܒܲܪܵܐ ܕܠܵܐ ܡܸܫܬܿܝܢܵܐ 354 ܐܸܣܲܪܘ ܦܲܟܼܪܘܼܗ̇ ܒܒܲܣܝܼܡܘܼܬܼܵܐ ܐܲܝܟ ܫܸܫܠܬܼܵܐ ܀ 355 :ܒܚܘܼܬܼܪܲܐ ܐܲܪܝܵܐ ܕܣܵܥܹ̇ܐ ܒܓܼܘܼܡܕܵܐ ܠܡܸܬܼܒܲܪ ܐ̄ܢܵܫܵܐ 356 ܐܲܥܸܠܘ ܚܲܒܼܫ̣ܘܼܗܝ ܒܓܼܵܘ ܢܵܡܲܪܬܵܐ ܕܡܲܟܿܝܼܟܼܘܼܬܼܵܐ ܀ 357 :ܠܝܲܨܪܵܐ ܒܝܼܫܵܐ ܦܣܲܩ̣ܘ ܘܐܲܪܝܼܡܘܼܗܝ ܡ̣ܢ ܥܸܩܵܪܹܐ 358 ܕܠܵܐ ܬܘܼܒܼ ܢܲܚܠܸܦ ܘܢܸܛܥܲܢ ܦܹܐܪܹ̈ܐ ܕܡܲܪܝܼܪܘܼܬܼܵܐ ܀ 359 :ܡܲܟܸܿܟܼܘ ܪܵܘܡ̇ܐ ܕܲܪܓܼܝܼܓܼܵܬܼܵܐ ܕܙܵܘܥܹ̈ܐ ܘܪܸ̈ܓܼܫܹܐ 360 ܘܫܲܥܒܸܿܕܼܘ ܘܐܸܢܘܿܢ ܬܚܹܝܬܼ ܨܸܒܼܝܵܢܵܐ ܪܵܚܹ̇ܡ ܩܘܼܫܬܵܐ ܀ 361 :ܒܙܲܝܢܵܐ ܕܪܘܼܚܵܐ ܚܣ݂ܲܢܘ ܟܠ ܚܲܝ̈ܠܝܼܢ ܕܲܠܓܼܵܘ ܘܕܲܠܒܲܪ 362 ܕܡܲܩܪܸܒܼ ܗ̄ܘ̣ܵܐ ܒܹܗ ܨܼܒܼܝܵܢ ܢܲܦܫܵܐ ܐܲܝܟ ܕܲܒܼܕܼܝܼܠܹܗ ܀ 363 :ܒܲܕܼܠܵܐ ܕܝܼܠܹܗ ܢܨܲܚ ܨܸܒܼܝܵܢܹܗ ܐܲܝܟ ܕܲܒܼܕܼܝܼܠܹܗ 364 ܘܐܸܬܼܚܲܫܒܲܬ̤ ܠܹܗ ܙܵܟܼܘܼܬܼ ܚܲܝܠܵܐ ܐܲܝܟ ܕܲܒܼܕܝܼܠܹܗ ܀ 365 ܠܵܘܕܼܝܼܠܹܗ ܗ̄ܘ̣ܵܬܼ ܕܢܸܙܟܸܿܐ ܠܚܲܫܹ̈ܐ ܕܲܩܒܼܝܼܥܝܼܢ ܒܹܗ: pb. 39 366 ܐܸܠܵܐ ܕܚܲܝܠܵܐ ܕܝܲܗ̣̄ܒܼ ܒܹܗ ܚܲܝܠܵܐ ܠܡܸܚܣܲܢ ܚܲܫܘ̈ܗܝ ܀ 367 :ܢܘܼܪܵܐ ܕܚܘܼܒܵܐ ܐܲܣܸܦ ܪܘܼܚܵܐ ܒܓܼܵܘ ܪܸܥܝܵܢܵܐ 368 ܘܐܲܕܼܠܸܩ ܘܐܵܘܩܸܕܼ ܝܲܥܪܵܐ ܣܲܢܝܵܐ ܕܲܪ̈ܕܼܝܼܓܼܵܬܼܵܐ ܀ 369 :ܒܡܘܼܠܟܵܢ ܚܲܝܹ̈ܐ ܠܵܐ ܡ̇ܝ̈ܘܿܬܹܐ ܚܲܪ̣ܵܨܸܒܼܝܵܢܵܐ 370 ܘܢܲܬܼܦܹܗ ܚܘܼܒܵܐ ܕܢܹܐܙܲܠ ܢܸܓܼܡܘܿܪ ܨܸܒܼܝܵܢ ܢܲܦܫܹܗ ܀ 371 :ܒܙܵܘܥܹ̈ܐ ܟܣܲܝܵ̈ܐ ܡܠܸ݂ܩ ܘܐܸܬܼܡܲܟܝܼ ܠܪܵܘܡ̇ܐ ܕܲܠܥܸܠ 372 ܘܲܚ̣ܙܵܐ ܒܗܵܘܢܵܐ ܠܗܵܘ̇ ܬܘܼܩܵܢܵܐ ܕܠܵܐ ܡܸܬܼܚܲܒܲܠ ܀ 373 :ܒܓܸܦܹ̈ܐ ܕܪܘܼܚܵܐ ܦܪܲܚ̣ܘ ܐܲܪ̈ܥܵܢܹܐ ܘܥܲܠ̣ܘ ܠܲܫܡܲܝܵܐ 374 ܘܲܫܡ݂ܲܥܘ ܬܲܡ̇ܢ ܩܵܠ ܗܘܼܠܵܠܵܐ ܕܠܵܐ ܡܸܬܼܡܲܠܲܠ ܀ 375 :ܒܲܠܘܼܝܼܬܼ ܦܵܘܠܘܿܣ ܡ̇ܐܢܵܐ ܓܲܒܼܝܵܐ ܪܕܼܵܘ ܢܲܨܝܼܚܹ̈ܐ 376 ܘܡܲܢܲܥܘ ܠܐܲܬܼܪܵܐ ܕܲܡܗܲܠܠܝܼܢ ܒܹܗ ܪܘܼܚܵܢܵܐܝܼܬܼ ܀ 377 :ܪܸܡܙܵܐ ܕܲܓܼܒܼ݂ܵܝܗܝ ܩܲܪܸܒܼ ܐܸܢܘܿܢ ܒܝܲܕܼ ܨܸܒܼܝܵܢܵܐ 378 ܠܡܸܫܡܲܥ ܩܵܠܵܐ ܕܠܵܐ ܡܸܬܼܡܲܠܲܠ ܒܠܸܫܵܢ ܒܸܣܪܵܐ ܀ 379 :ܥܲܡܹܗ ܣܠܸܩ̣ܘ ܗ̄ܘ̣ܵܘ ܠܬܼܘܼܠܬܼܵܐ ܕܪܵܘܡ̇ܐ ܒܗܵܘܢܵܐ ܟܲܣܝܵܐ 380 ܘܟܲܣܝܼܘ ܫܘܼܦܪܵܐ ܕܢܸܨܚܵܢܲܝ̈ܗܘܿܢ ܒܕܼܘܼܡܚܵܐ ܕܝܼܠܹܗ ܀ 381 :ܒܢܝܼܫܵܐ ܬܪܝܼܨܵܐ ܕܐܲܝܠܹܝܢ ܕܲܢܨܲܚ̣ܘ ܕܲܡܝܼܘ ܟܠܫܵܥ 382 ܘܲܚܢ̣ܵܘ ܣܲܓܿܝܼ ܣܲܓܼܝܼ ܒܝܲܕܼ ܚܘܼܡܣܵܢܵܐ ܕܪܸ̈ܥܝܵܬܲܝܗܘܿܢ ܀ 383 :ܡ̇ܘܬܹܿܗ ܕܗܵܒܹܝܠ ܨܝܼܕܼ ܗ̄ܘ̣ܵܐ ܟܠܫܵܥ ܩܕܼܵܡ ܥܲܝܢܲܝ̈ܗܘܿܢ 384 ܘܲܒܼܩܵܛܘܼܠܹܗ ܡܸܬܼܒܲܩܹܝܢ ܗ̄ܘ̣ܵܘ ܟܲܕܼ ܡܸܬܼܢܲܓܲܕ ܀ 385 :ܠܩܵܠܵܐ ܕܲܕܼܡܹܗ ܡܸܬܿܬܿܥܝܼܪܝܼܢ ܗ̄ܘ̣ܵܘ ܚܘܼܫܵܒܲܝ̈ܗܘܿܢ 386 ܟܲܕܼ ܓܵܥܹ̇ܐ ܗ̄ܘ̣ܵܐ ܠܘܵܬܼ ܚܵܙܹ̇ܐ ܟܠ ܥܲܠ ܩܵܛܘܿܠܹܗ ܀ 387 :ܩܪܘܼܒܼܚܵܐ ܪܲܒܵܐ ܥܲܒܼ݂ܕ ܫܲܬܼܝܼܩܵܐ ܥܲܡ ܡܲܪܵܚܵܐ 388 ܘܝܲܗ̣̄ܒܹܿܗ ܠܪܸܡܙܵܐ ܕܢܸܥܘܿܠ ܢܸܩܪܸܝܘܗܝ ܩܕܼܵܡ ܕܲܝܢܵܐ ܀ 389 :ܩܪܘܼܒܼܚܵܐ ܕܕܲܡ̇ܐ ܚܙ̣ܵܐ ܕܲܝܢܵܐ ܘܛܲܢ ܘܐܸܬܼܥܲܙܲܪ 390 ܘܲܦܣ݂ܲܩ ܕܝܼܢܵܐ ܥܲܠ ܩܵܛܘܿܠܵܐ ܠܦܘܼܬܼ ܣܲܟܼܠܘܼܬܹܗ ܀ 391 :ܠܲܫܒܼܥܵܐ ܢܸܓܼ̈ܕܹܿܐ ܩ̈ܫܲܝܵܐ ܡܲܬܼܚܹܗ ܠܐܵܫܹ̇ܕܼ ܠܲܕܼܡܵܐ 392 ܕܒܲܓܼܙܵܪ ܕܝܼܢܹܗ ܢܣܲܪܸܕܼ ܐ̄ܢܵܫܵܐ ܡ̣ܢ ܨܹܝܕܼ ܩܸܛܠܵܐ ܀ 393 :ܩܗܵܕܹܐ ܬܸܢܘܲܝ ܝܲܗ̣̄ܒܼܘ ܓܘܼܫܡܲܝ̈ܗܘܿܢ ܣܵܗ̈ܕܹܿܐ ܒܚܝܼܪܹ̈ܐ 394 ܘܠܵܐ ܬܒܲܥ̣ܘ ܨܲܥܪܵܐ ܕܐܘܼܠܨܵܢܲܝ̈ܗܘܿܢ ܡ̣ܢ ܐܵܠܘܿܨܹ̈ܐ ܀ 395 :ܒܲܕܼܡ̇ܐ ܕܩܵܥܹ̇ܐ ܐܲܝܟ ܡܲܠܵܠܵܐ ܡܸܢܼܒܲܝܢܝܼܢ ܗ̄ܘ̣ܵܘ 396 ܘܗܲܢܝܼܵܐܝܼܬܼ ܫܲܦܲܥܘ ܕܼܡܗܘܿܢ ܕܢܸܩܢܹܐ ܩܵܠܵܐ ܀ 397 :ܒܢܸܓܼ̈ܕܹܿܐ ܩ̈ܫܲܝܵܐ ܕܥܲܠ ܡܲܪ̈ܵܚܹܐ ܡܸܬܼܢܲܩܡܝܼܢ ܗ̄ܘ̣ܵܘ 398 ܥܝܵܪܬܵܐ ܕܡ̇ܘܬܵܐ ܡ̣ܢ ܩܵܛܘܿܠܹ̈ܐ ܕܚܲܝܸܒܼܘ ܐܸܢܘܿܢ ܀ 399 :ܠܵܐ ܪܵܫܹ̇ܝܢ ܗ̄ܘ̣ܵܘ ܠܪ̈ܵܕܼܘܿܦܲܝܗܘܿܢ ܕܥܲܠ ܡ̇ܢ ܗܵܟܲܢ 400 ܕܲܡܦܵܣܝܼܢ ܗ̄ܘ̣ܵܘ ܕܗܘ̤ ܐܘܼܠܨܵܢܵܐ ܥܸܠܲܬܼ ܚܲܝܹ̈ܐ ܗ̄ܘ̣ ܀ 401 ܠܵܐ ܡܲܟܼܪܹܝܢ ܗ̄ܘ̣ܵܘ ܥܲܠ ܚܘܼܒܵܠܵܐ ܕܗܲܕܿܡܲܝ̈ܗܘܿܢ: pb. 40 402 ܕܨܝܼܪ ܗ̄ܘ̣ܵܐ ܟܠܫܵܥ ܩܕܼܵܡ ܥܲܝܢܲܝ̈ܗܘܿܢ ܢܘܼܚܵܡ ܦܲܓܼܪܵܐ ܀ 403 :ܠܵܐ ܡܥܵܩܝܼܢ ܗ̄ܘ̣ܵܘ ܥܲܠ ܦܘܼܪܫܵܢܵܐ ܕܦܲܓܼܪܵܐ ܘܢܲܦܫܵܐ 404 ܟܲܕܼ ܚܵܙܹ̇ܝܢ ܗ̄ܘ̣ܵܘ ܕܲܡܫܲܢܹܝܢ ܗ̄ܘ̣ܵܘ ܒܡܵܘܬܵܐ ܠܚܲܝܹ̈ܐ ܀ 405 :ܐܘܿ ܪܸܥܝܵܢܵܐ ܟܡܵܐ ܚܲܡܣܸܢ ܗ̄ܘ̣ܵܐ ܘܫܵܛ̇ ܠܲܟܼܝܵܢܵܐ 406 ܕܐܲܣܡܝܼ ܘܫܲܬܸܩ ܥܲܠ ܦܘܼܪܫܵܢܵܐ ܕܲܬܼܪܹܝܢ ܓܲܒܹ̈ܐ ܀ 407 :ܐܘܿ ܚܹܐܪܘܼܬܼܵܐ ܕܲܟܼܡܵܐ ܒܣܲܪܬܼܵܗ̇ ܠܐܲܣܝܼܪܘܼܬܼܵܐ 408 ܘܚܸܫܒܲܬ̤ ܚܘܼܒܵܐ ܕܣܝܼܡ ܒܲܟܼܝܵܢܵܐ ܐܲܝܟ ܠܵܐ ܐܝܼܬܼܵܘܗܝ ܀ 409 :ܐܘܿ ܬܲܟܼܬܼܘܼܫܵܐ ܕܥܸܒܼܕܲܬ̤ ܢܲܦܫܵܐ ܗܝ̤ ܥܲܡ ܝܵܬܼܗ̇ 410 ܘܚܸܣܢܲܬ̤ ܘܲܙܟܼܵܬ̤ ܠܲܛܪܘܼܢܘܼܬܼܵܐ ܕܙܵܘܥܹ̈ܐ ܩ̈ܫܲܝܵܐ ܀ 411 :ܗܝ̤ ܥܲܡ ܙܲܘܥܹ̈ܐ ܐܸܚܕܲܬ̤ ܕܲܪܵܐ ܘܙܵܘܥܹ̈ܐ ܥܲܡܵܗ̇ 412 ܝܸܗ̄ܒܲܬ̤ ܐܝܼܕܼܵܐ ܗܝ̤ ܥܲܡ ܙܲܘܥܹ̈ܐ ܠܚܹܝܠ ܚܹܐܪܘܼܬܼܵܐ ܀ 413 :ܚܹܝܠ ܚܹܐܪܘܼܬܼܵܐ ܕܦܵܪܘܿܫܘܼܬܼܵܐ ܢܨܲܚ ܒܐܵܓܼܘܿܢܹ̈ܐ 414 ܕܲܠܸܐ ܗ̄ܘ̣ܵܐ ܠܵܗ̇ ܪܸܡܙܵܐ ܟܲܣܝܵܐ ܕܚܵܣܹ̇ܝܠ ܟܠܵܐ ܀ 415 :ܒܙܲܝܢܵܐ ܕܪܘܼܚܵܐ ܙܟܼܵܬ̤ ܚܹܐܪܘܼܬܼܵܐ ܟܝܵܢܵܐ ܘܚܲܫܘ̈ܗܝ 416 ܐܲܝܟ ܪܲܒܿ ܚܠܝܼܨܵܐ ܙܕܵܟܹ̇ܐ ܒܚܹܝܠ ܡܲܠܟܿܘܼܬܼܵܐ ܀ 417 :ܒܚܹܝܠ ܗܵܢ ܙܲܝܢܵܐ ܡܸܬܼܟܲܬܿܫܝܼܢ ܗ̄ܘ̣ܵܘ ܦܲܓܼܪ̈ܵܢܵܝܹܐ 418 ܥܲܡ ܪ̈ܘܼܚܵܢܹܐ ܘܦܲܓܼܪ̈ܵܢܵܝܹܐ ܒܡܸܣܝܵܐ ܘܓܸܠܝܵܐ ܀ 419 :ܒܝܲܕܼ ܣܘܼܪ̈ܵܢܹܐ ܩܲܒܸܿܠܘ ܒܘܼܩܝܵܐ ܕܚܹܝܠ ܥܘܼܕܪܵܢܹܗ 420 ܕܟܼܠ ܕܐܲܩܪܸܒܼ ܒܹܗ ܢܣܲܒܼ ܙܵܟܼܘܼܬܼܵܐ ܘܝܼܪܸܒܼ ܘܐܲܡ̣ܠܸܟ ܀ 421 :ܒܥܲܝܢܵܐ ܟܣܝܼܬܼܵܐ ܕܗܲܣܝܡܵܢܘܼܬܼܵܐ ܡܸܬܼܒܲܩܹܝܢ ܗ̄ܘ̣ܵܘ 422 ܒܗܵܘ̇ ܐܲܬܼܠܹܝܛܵܐ ܕܠܲܒܼܫܹܗ ܘܐܲܩܪܸܒܼ ܥܲܡ ܚܲܣܝܼܢܵܐ ܀ 423 :ܚܲܫܹܗ ܕܐܝܼܘܿܒܼ ܣܝܼܡ ܗ̄ܘ̣ܵܐ ܟܠܫܵܥ ܩܕܼܵܡ ܥܲܝܢܲܝ̈ܗܘܿܢ 424 ܘܲܡܕܿܡܹܝܢ ܗ̄ܘ̣ܵܘ ܒܚܘܼܡܣܵܢ ܢܲܦܫܹܗ ܠܘܵܬܼ ܙܵܟܼܘܼܬܼܵܐ ܀ 425 :ܐܲܝܟ ܡܲܓܙܝܼܬܼܵܐ ܩ̣ܒܲܥܘ ܬܲܟܼܬܿܘܼܫܹܗ ܠܡܸܚܙܵܐ ܒܗܵܘܢܵܐ 426 ܕܐܲܝܟܲܢ ܡܲܩܪܸܒܼ ܦܲܓܼܪܵܢܵܝܵܐ ܥܲܡ ܪܘܼܚܵܢܵܐ ܀ 427 :ܒܓܸܠܝܵܐ ܘܟܸܣܝܵܐ ܡܸܬܼܒܲܩܹܝܢ ܗ̄ܘ̣ܵܘ ܐܲܝܟ ܕܲܒܼܓܸܠܝܵܐ 428 ܟܲܕܼ ܚܵܙܹ̇ܝܢ ܗ̄ܘ̣ܵܘ ܕܢܵܨܲ̇ܚ ܦܲܓܼܪܵܐ ܘܚܵܐܹ̇ܒܼ ܪܘܼܚܵܐ ܀ 429 :ܒܩܵܠ ܙܵܟܼܘܼܬܼܵܐ ܕܒܸܣܪܵܐ ܫܝܼܛܵܐ ܡܸܬܼܠܲܒܿܒܼܝܼܢ ܗ̄ܘ̣ܵܘ 430 ܠܡܹܐܚܲܕܼ ܕܲܪܵܐ ܥܲܡ ܚܲܣܝܼܢܵܐ ܒܪܸ̈ܓܼܫܲܝ ܦܲܓܼܪܵܐ ܀ 431 :ܗܵܝ̇ ܩܵܠܵܐ ܕܦܲܢܝܼ ܐܝܼܘܿܒܼ ܠܘܵܬܼ ܒܲܪ̄ܬܼ ܙܵܘܓܹܿܗ 432 ܡܦܲܢܹܝܢ ܗ̄ܘ̣ܵܘ ܠܹܗ ܠܐܵܟܹ̇ܿܠܩܲܪܨܵܐ ܣܲܒܼܪܵܐ ܣܦܝܼܩܵܐ ܀ 433 :ܐܲܝܟ ܫܵܛܝܼܬܼܵܐ ܚܲܫܒ̣ܵܗ̇ ܐܝܼܘܿܒܼ ܠܐܸܠܥܵܐ ܕܢܸܩܦܹܗ 434 ܕܝܸܗ̄ܒܲܬ̤ ܫܸܡܥܵܗ̇ ܒܲܫܡܵܐ ܕܗܵܘ̇ ܕܲܠܥܸܙ ܒܵܗ̇ ܀ 435 :ܫܵܛܝܵܐ ܙܲܢܝܼ ܒܪܸܓܲܬܼ ܙܵܘܥܹ̈ܐ ܥܲܡ ܫܵܛܝܼܬܼܵܐ 436 ܘܥܲܩ̣ܪܹܗ ܟܹܐܢܵܐ ܠܝܲܥܪܵܐ ܕܝܼܥ̣ܵܐ ܒܐܲܪܥܵܐ ܕܢܸܩܦܹܗ ܀ 437 ܙܸܠ ܠܵܟ ܒܝܼܫܵܐ ܥܲܡ ܙܲܕܿܝܼܩܵܐ ܩ̣ܥܵܘ ܢܲܨܝܼܚܹ̈ܐ: pb. 41 438 ܙܸܠ ܐܸܫܬܲܛܵܐ ܥܲܡ ܫܵܛ̈ܝܵܬܼܵܐ ܐܲܝܟ ܕܲܡܥܵܕܼ ܐܲܢ̄ܬܿ ܀ 439 :ܠܵܐ ܡܲܙܸܠ ܐܲܢ̄ܬܿ ܠܢܲܟܼܦܘܼܬܼ ܢܲܦܫܲܢ ܒܢܸܩܦܵܟ ܣܲܢܝܵܐ 440 ܘܠܵܐ ܡܩܲܒܿܠܝܼܢܲܢ ܙܲܪܥܵܐ ܒܝܼܫܵܐ ܒܓܼܵܘ ܚܘܼܫܵܒܲܝ̈ܢ ܀ 441 :ܙܸܠ ܐܸܙܕܲܝܲܢ ܒܦܲܓܼܪ̈ܵܢܵܝܹܐ ܠܘܼܩܒܲܠ ܢܲܦܫܲܢ 442 ܕܒܸܠܥܵܕܼ ܒܸܣܪܵܐ ܡܚܝܼܠܘܼ ܚܲܝܠܵܟ ܠܵܘܵܬܼ ܬܲܟܼܬܿܘܼܫܵܐ ܀ 443 :ܙܸܠ ܟܲܢܸܫ ܠܵܟ ܠܲܟܼ̈ܢܵܘܸܵܬܼܵܟ ܕܲܢܣܲܢܵܘܵܬܼܵܟ ܕܲܢܣܲܝܥܘܼܢܵܟ 444 ܕܡ̣ܢ ܫܘܼܪܵܝܵܐ ܒܲܢ ܡܲܩܪܸܒܼ ܐܲܢ̄ܬܿ ܥܲܡ ܐ̄ܢܵܫܘܼܬܲܢ ܀ 445 :ܒܐܸܠܥܵܐ ܕܦܲܓܼܪܲܢ ܐܸܚܲܕܿܬܿ ܕܲܪܲܐ ܥܲܡ ܪܹܫ ܓܸܢܣܲܢ 446 ܘܐܲܝܟ ܕܲܒܼܣܲܝܦܵܐ ܩܛܲܠܬܵܝܗܝ ܠܐܲܕܼܵܡ ܒܝܲܕܼ ܗܲܕܵܡܹܗ ܀ 447 :ܒܩܹܫܬܵܐ ܕܚܵܘܵܐ ܫܕܲܝܬܿ ܐܵܦ ܒܐܝܼܘܿܒܼ ܓܹܐܪܹ̈ܐ ܕܢܸܟܼܠܲܝ̈ܟ 448 ܘܩܲܒܸܿܠ ܐܸܢܘܿܢ ܒܣܲܟܿܪܵܐ ܕܟܼܝܼܬܼܵܐ ܕܗܲܝܡܵܢܘܼܬܼܵܐ ܀ 449 :ܒܝܵܘܣܸܦ ܐܲܪܡܝܼܬܿ ܟܲܒܼܠܹ̈ܐ ܩܫܲܝ̈ܵܐ ܕܪܸܓܲܬܼ ܒܸܣܪܵܐ 450 ܘܲܦܣ݂ܲܩ ܐܸܢܘܿܢ ܒܩܲܠܝܼܠܘܼܬܼܵܐ ܕܙܵܘܥܹ̈ܐ ܢܲܟܼܦܹ̈ܐ ܀ 451 :ܘܡܸܛܠ ܕܝܼܠܸܦܬܿ ܒܝܲܕܼ ܢܸܣܝܵܢܵܐ ܠܡܸܙܟܵܐ ܒܙܲܝܢܲܢ 452 ܗܵܐ ܥܲܡܲܢ ܒܕܼܝܼܠܲܢ ܒܵܥܹ̇ܝܬܿ ܠܡܸܬܼܟܲܬܵܫܘܼ ܀ 453 :ܢܟܼܝܼܠܵܐ ܐܝܼܬܿܝܟ ܘܒܸܐܣܟܹܿܝܡ ܐ̄ܢܵܫܵܐ ܡܲܛܥܹܝܬܿ ܐ̄ܢܵܫܵܐ 454 ܘܒܸܠܥܵܕܼ ܐ̄ܢܵܫܵܐ ܠܵܐ ܡܲܩܪܸܒܼ ܐܲܢ̄ܬܿ ܥܲܡ ܒܲܪܢܵܫܵܐ ܀ 455 :ܒܫܲܒܼܪܘܼܬܼ ܐ̄ܢܵܫܵܐ ܓܵܡܪܲܬܿ ܝܲܨܪܵܐ ܕܡܲܪܝܼܪܘܼܬܼܵܟ 456 ܘܒܹܗ ܡܲܛܥܸܡ ܐܲܢ̄ܬܿ ܠܲܟܼܢܵܘܵܬܹ̈ܐ ܡܸܪܲܬܼ ܡܵܘܬܵܐ ܀ 457 :ܬܵܐ ܥܲܡ ܚܲܝܠܵܐ ܒܸܣܪܵܢܵܝܵܐ ܕܲܡܟܲܢܲܫ ܠܵܟ 458 ܘܐܲܚܘܿܕܼ ܕܼܪܵܐ ܒܒܸܣܪ̈ܵܢܵܝܹܐ ܥܲܡ ܗܲܕܵܡܲܝ̈ܢ ܀ 459 :ܥܘܿܠ ܣܲܬܼܪܹܝܗ̇ ܠܣܲܢܝܘܼܬܼ ܢܲܦܫܵܟ ܒܒܸܣܪܵܐ ܓܲܠܝܵܐ 460 ܘܲܓܼܡܘܿܪ ܝܲܨܪܵܟ ܒܒܸܣܪ̈ܵܢܵܝܹܐ ܠܘܵܬܼ ܒܸܪ̈ܢܹܐ ܀ 461 :ܠܵܐ ܕܵܚ̇ܠܝܼܢܲܢ ܡ̣ܢ ܨܸܢ̈ܥܵܬܼܵܟ ܟܡܵܐ ܐܸܢ ܩܲܫ̈ܝܵܢ 462 ܘܠܵܐ ܥܵܪܩܝܼܢܲܢ ܡ̣ܢ ܩܵܠ ܩܸܫܬܵܐ ܕܲܢܟܼܝܼܠܘܼܬܼܵܟ ܀ 463 :ܠܵܟ ܫܵܠ̇ܚܝܼܢܲܢ ܙܲܝܢܲܢ ܡܸܢܲܢ ܐܸܢ ܠܵܐ ܙܟܲܝܢܵܟ 464 ܘܠܵܐ ܝܵܗ̇ܒܿܝܼܢܲܢ ܐܲܬܼܪܵܐ ܕܬܸܬܼܪܘܿܥ ܣܸܕܼܪ̈ܲܝ ܩܘܼܫܬܵܐ ܀ 465 :ܠܵܐ ܫܵܠܹ̇ܝܢܲܢ ܡ̣ܢ ܬܲܟܼܬܿܘܼܫܵܐ ܟܡܵܐ ܕܐܝܼܡܵܡܵܐ ܗ̄ܘ̣ 466 ܥܕܲܡ̇ܐ ܕܐܵܬܹ̇ܐ ܪܲܡܫܹܗ ܕܡ̇ܘܬܵܠ ܘܲܡܢܝܼܚ ܦܲܓܼܪ̈ܲܝܢ ܀ 467 :ܐܸܢ ܒܵܥܹ̇ܐ ܐܲܢ̄ܬܿ ܕܬܹܐܠܲܦ ܢܝܼܫܵܐ ܕܲܚܠܝܼܨܘܼܬܿܢ 468 ܓܡܘܿܪ ܨܸܒܼܝܵܢܵܟ ܒܡܵܘܬܵܐ ܕܲܥܠܲܝܢ ܘܲܚܙܝܼ ܥܒܼܵܕܹ̈ܐ ܀ 469 :ܐܸܢ ܪܵܓܵܐ ܠܵܟ ܕܬܸܒܼܩܸܐ ܚܲܝܠܲܢ ܒܝܲܕܼ ܣܘܼܥܪ̈ܵܢܹܐ 470 ܩܲܪܸܒܼ ܢܸܓܼ̈ܕܹܿܐ ܘܐܵܘܚܸܕܼ ܢܘܼܪܵܐ ܘܲܠܛܘܿܫ ܣܲܝܦܵܐ ܀ 471 :ܠܵܐ ܓܹܝܪ ܪܵܘܡ̇ܐ ܐܵܦܠܵܐ ܥܘܼܡܩܵܐ ܚܫܝܼܒܼ ܠܲܢ ܡܸܕܹܿܡ 472 ܘܠܵܐ ܫܘܼܠܛܵܢܹ̈ܐ ܕܲܫܡܲܝܵܢܹ̈ܐ ܡܨܸܝܢ ܙܵܟܹ̇ܝܬ ܠܲܢ ܀ pb. 42 473 :ܐܵܦܠܵܐ ܒܪܝܼܬܼܵܐ ܐ̄ܚܪܹܝܼܬܼܵܐ ܐܸܢܗܘ̤ ܕܬܲܩܪܸܒܼ ܥܲܡܲܢ 474 ܠܵܐ ܡܪܲܦܝܵܐ ܠܹܗ ܠܚܘܼܒܵܐ ܕܢܲܦܫܲܢ ܡ̣ܢ ܗܵܘ̇ ܕܲܒܼܪܵܢ ܀ 475 :ܐܘܿ ܐܲܬܼܠܹܝܛܹ̈ܐ ܕܙܲܕܿܝܼܩܘܼܬܼܵܐ ܟܡܵܐ ܐܸܬܼܓܲܢ̄ܒܲܪܘ 476 ܕܲܙܟܼܵܘ ܒܐܲܪܥܵܐ ܘܫܲܪܝܼܘ ܡܲܩܠܹܝܢ ܥܲܠ ܕܲܫܡܲܝܵܐ ܀ 477 :ܚܣܲܢܘ̣ ܠܲܟܪܘܼܢܵܐ ܘܡܲܟܸܿܟܼܘ ܚܲܝܠܹܗ ܒܝܲܕܼ ܚܲܫܲܝ̈ܗܘܿܢ 478 ܘܐܲܗܸܠܘ ܘܲܓܼܚܸܟܼܘ ܐܵܦ ܥܲܠ ܡ̇ܘܬܵܐ ܕܲܕܼܚܝܼܠ ܥܲܠ ܟܠ ܀ 479 :ܣܢܵܘ̣ ܚܲܝܲܝ̈ܗܘܿܢ ܘܫܵܛ̣ܘ ܠܲܢܝܵܚܹ̈ܐ ܐܲܪ̈ܥܵܢܵܝܹܐ 480 ܘܙܲܡܸܢܘ ܦܲܓܼܪܵܐ ܘܢܲܦܫܵܐ ܐܲܟܲܚ̄ܕܼ ܠܲܚܠܘܿܠ ܪܵܘܡ̇ܐ ܀ 481 :ܠܗܵܝ̇ ܡܸܫܬܿܘܼܬܼܵܐ ܕܠܵܐ ܡܸܫܬܿܪܝܵܐ ܚ̣ܙܵܘ ܟܲܣܝܵܐܝܼܬܼ 482 ܘܨܲܒܸܿܬܼܘ ܗܵܘܢܵܐ ܒܝܲܕܼ ܚܘܼܣܵܢܵܐ ܐܲܝܟ ܕܲܒܼܢܲܚ̈ܬܹܿܐ ܀ 483 :ܩܸܢܛܵܐ ܘܚܘܼܒܵܐ ܡܠܹܝܢ ܗ̄ܘ̣ܵܘ ܟܠܫܵܥ ܪܸ̈ܥܝܵܢܲܝܗܘܿܢ 484 ܟܲܕܼ ܡܸܬܼܥܲܗܕܼܝܼܢ ܠܗܵܘ̇ ܕܲܣܢܹܝܢ ܗ̄ܘ̣ܵܘ ܢܲܚ̈ܬܹܿܐ ܕܢܲܦܫܹܗ ܀ 485 :ܒܹܗ ܚܵܝ̇ܪܝܼܢ ܗ̄ܘ̣ܵܘ ܟܲܕܼ ܢܵܦܹ̇ܩ ܗ̄ܘ̣ܵܐ ܡ̣ܢ ܡܸܫܬܿܘܼܬܼܵܐ 486 ܘܲܒܼܫܘܼܢܵܩܹܗ ܡܸܬܼܒܲܩܹܝܢ ܗ̄ܘ̣ܵܘ ܕܲܟܼܡܵܐ ܡܲܪܝܼܪ ܀ 487 :ܠܗܵܝ̇ ܡܲܦܲܫܬܵܐ ܕܲܒܼܘܼ̈ܠܵܬܼܵܐ ܡܸܬܿܕܲܟܼܪܝܼܢ ܗ̄ܘ̣ܵܘ 488 ܘܠܵܐ ܫܵܠܹ̇ܝܢ ܗ̄ܘ̣ܵܘ ܠܲܡܟܲܢܵܫܘܼ ܡܸܫܚܵܐ ܕܪ̈ܲܚܡܹܐ ܀ 489 :ܘܟܲܕܼ ܛܵܒܼ ܪܲܒܿ ܗ̄ܘ̣ܵܐ ܥܘܼܬܼܪܵܐ ܕܚܲܫܹ̈ܐ ܕܟܲܢܸܫܘ ܒܐܲܪܥܵܐ 490 ܩܲܢܝܼܛܝܼܢ ܗ̄ܘ̣ܵܘ ܕܕܲܠܡܵܐ ܢܸܚܣܲܪ ܕܸܠܩܹܗ ܕܚܲܫܵܐ ܀ 491 :ܒܥܲܝܢܹ̈ܐ ܕܗܵܘܢܵܐ ܡܸܬܼܒܲܩܹܝܢ ܗ̄ܘ̣ܵܘ ܒܲܟܼܬܼܝܼ̈ܒܼܵܬܼܵܐ 492 ܘܲܠܘܵܬܼ ܢܝܼܫܵܐ ܕܚܲܬܿܝܼܬܼܘܼܬܼܵܐ ܡܸܬܿܕܲܪܓܼܝܼܢ ܗ̄ܘ̣ܵܘ ܀ 493 :ܡܦܵܣܝܼܢ ܗ̄ܘ̣ܵܘ ܓܹܝܪ ܕܲܒܼܛܝܼܠ ܥܲܡܠܵܐ ܒܸܠܥܵܕܼ ܚܘܼܒܵܐ 494 ܘܠܵܐ ܡܨܸܐ ܥܵܐܹ̇ܒ ܒܲܬܼܪܲܥ ܪܵܘܡ̇ܐ ܐܸܠܵܐ ܥܲܡܹܗ ܀ 495 :ܡܸܠܲܬܼ ܦܵܘܠܘܼܣ ܥܸܒܼܕܲܬ̤ ܐܸܢܘܿܢ ܕܢܸܪܢܘܿܢ ܗܵܕܹܐ 496 ܕܒܲܛܸܠ ܐܸܢܹܝܢ ܠܲܫܒܼܝܼ̈ܚܵܬܼܵܐ ܒܸܠܥܵܕܼ ܚܘܼܒܵܐ ܀ 497 :ܐܸܢ ܢܒܼܝܼܘܼܬܼܵܐ ܕܪܲܒܵܐ ܡ̣ܢ ܟܠ ܦܵܫܲܬ̤ ܒܐܲܪܥܵܐ 498 ܐܲܝܟܲܢ ܣܵܠ̇ܩܝܼܢ ܥܲܡܠܹ̈ܿܐ ܒܨܝܼܪܹ̈ܐ ܠܪܵܡ̇ܐ ܕܲܠܥܸܠ ܀ 499 :ܐܸܢ ܡ̇ܘܗܲܒܼܬܼܵܐ ܕܲܒܼܠܸܫܵܢܹ̈ܐ ܢܚܵܫܵܐ ܚܲܫ̣ܒܵܗ̇ 500 ܡܲܢ̣ܘܼ ܟܥܲܙܸܐ ܩܕܼܵܡ ܒܘܼܚܪܵܢܵܐ ܕܕܝܼܢܵܐ ܟܹܐܢܵܐ ܀ 501 :ܗܲܝܡܵܢܘܼܬܼܵܐ ܚܵܣܢܲܬܼ ܛܘܼܪܹ̈ܐ ܩܪ̣ܵܗ̇ ܠܵܐ ܡܸܕܸܿܡ 502 ܘܐܲܝܟܲܢ ܢܸܣܒܲܥ ܕܐܝܼܬܼܵܘܗܝ ܡܸܕܹܿܡ ܡܸܕܸܿܡ ܕܲܒܼܨܝܼܪ ܀ 503 :ܐܸܢܗܘ̤ ܕܚܲܫܹ̈ܐ ܥܲܡ ܙܸܕܼܩܵܬܼ̈ܐ ܗܘ̤ܵܘ ܝܲܬܿܝܼܪܹ̈ܐ 504 ܡܲܢ̣ܘܼ ܕܲܡܨܸܐ ܢܟܲܢܸܫ ܥܘܼܬܼܪܹܗ ܕܚܘܼܒܵܐ ܪܲܒܵܐ ܀ 505 :ܠܲܠܡܹܐܝܢ ܚܘܼܒܵܐ ܪܕܼܵܘ ܢܲܨܝܼܚܹ̈ܐ ܒܙܵܘ̈ܥܲܝ ܢܲܦܫܵܐ 506 ܘܒܹܗ ܐܲܝܟ ܡܸܪܕܵܐ ܣܵܡ̣ܘ ܣܝܼ̈ܡܵܬܼܵܐ ܕܩܸܢܝܵܢܲܝ̈ܗܘܿܢ ܀ 507 :ܚܙ̣ܵܘ ܟܠ ܛܵܒܼ̈ܢ ܕܠܵܐ ܡܸܬܼܦܲܚ̈ܡܵܢ ܥܲܡ ܪܲܒܿܘܼܬܹܗ 508 ܘܫܵܛ̣ܘ ܟܠܡܸܕܹܿܡ ܘܲܪܚܸܡܘ ܚܘܼܒܵܐ ܡ̣ܢ ܟܠܡܸܕܹܿܡ ܀ pb. 43 509 :ܒܝܲܕܼ ܚܲܫܲܝ̈ܗܘܿܢ ܒܩ̣ܵܘ ܪܲܒܿܘܼܬܹܗ ܕܠܵܐ ܡܸܬܼܚܲܣܢܵܐ 510 ܘܠܵܐ ܒܥ̣ܵܘ ܥܲܡܹܗ ܥܸܕܼܪܵܐ ܐ̄̇ܚܪܹܢܵܐ ܒܐܘܼܠܨܵܢܲܝ̈ܗܘܿܢ ܀ 511 :ܠܗܘܿܢ ܦܲܐܝܵܐ ܗ̣̄ܘܵܬܼ ܠܡܸܪܚܲܡ ܚܘܼܒܵܐ ܠܝܵܪܹ̈ܥܲܝ ܚܘܼܒܵܐ 512 ܐܵܦ ܠܹܗ ܠܚܘܼܒܵܐ ܠܲܡܥܲܕܿܪܘܼ ܠܲܒܼܢܲܝ̈ ܐ̄ܪܵܙܹܗ ܀ 513 :ܕܪܲܚܡܘܼܗܝ ܣܲܓܿܝܼ ܘܠܵܐ ܐܸܬܼܪܲܦܝܼܘ ܡ̣ܢ ܥܸܢܝܵܢܹܗ 514 ܐܲܚܸܒܼ ܐܸܢܘܿܢ ܘܥܲܕܲܪ ܐܸܢܘܿܢ ܠܥܸܠ ܡ̣ܢ ܚܲܝܠܵܐ ܀ 515 :ܕܲܪܕܼܵܘ ܡܸܢܹܗ ܘܠܵܐ ܦܵܫ̣ܘ ܡܸܢܹܗ ܒܝܲܕܼ ܣܘܼܥܪ̈ܢܹܐ 516 ܡܲܢܲܥ ܐܸܢܘܿܢ ܠܲܠܡܹܐܝܢ ܚܲܝܹ̈ܐ ܕܠܵܐ ܫܘܼܠܵܡܵܐ ܀ 517 :ܠܗܘܿܢ ܙܵܟܼܘܼܬܼܵܐ ܥܲܡ ܦܘܼܪܥܵܢܵܐ ܕܠܵܐ ܡܸܬܼܚܲܒܲܐܠ 518 ܕܲܣܢ̣ܵܘ ܚܲܝܹ̈ܐ ܘܲܪܚܸܡܘ ܣܲܒܼܪܵܐ ܕܠܵܐ ܡܸܬܿܕܲܓܲܠ ܀ 519 :ܠܗܘܿܢ ܩܘܼܠܵܣܵܐ ܡ̣ܢ ܟܠ ܦܘܼܡ̈ܝܼܢ ܐܲܝܟ ܙܲܟܝܵܐ 520 ܘܠܲܢ ܓܘܼܢܵܝܵܐ ܕܠܵܐ ܕܲܡܹ̇ܝܢܲܢ ܒܢܝܼܫܵܐ ܕܝܼܠܗܘܿܢ ܀ 521 :ܠܝܵܪ̈ܬܹܿܐ ܫܲܦܠܹ̈ܐ ܫܒܲܩ̣ܘ ܡܲܪ̈ܗܵܛܹܐ ܡ̣ܢ ܚܲܫܲܝ̈ܗܘܿܢ 522 ܘܒܲܕܲܪܘ ܐܸܢܘܿܢ ܒܲܪ̈ܓܼܝܼܓܼܵܬܼܵܐ ܐܲܪ̈ܥܵܢܝܵܬܼܵܐ ܀ 523 :ܠܲܚܒܸܢܵܢܹ̈ܐ ܝܲܗ̄ܒܿܘܼܗܝ ܠܥܘܼܬܼܪܵܐ ܕܡ̣ܢ ܥܲܡ̈ܠܲܝܗܘܿܢ 524 ܘܠܵܐ ܦܲܪܢܸܣܘ ܒܹܗ ܡܸܣܟܹܿܢܘܼܬܼܵܐ ܕܚܲܝܹ̈ܐ ܕܐ̄ܢܵܫܵܐ ܀ 525 :ܒ̈ܢܲܝܵܐ ܪ̈ܦܲܝܵܐ ܫܩܲܠ̣ܘ ܝܵܪܬܿܘܼܬܼܵܐ ܕܪ̈ܘܼܚܵܢܝܵܬܼܵܐ 526 ܘܙܲܒܿܢܘܼܗ̇ ܡܲܓܵܢ ܘܠܵܐ ܫܩܲܠܘ ܛܝܼܡܹ̈ܐ ܪ̈ܘܼܚܵܢܵܝܹܐ ܀ 527 :ܠܵܘ ܒܲܫܪܵܪܵܐ ܗܘ̤ܵܘ ܝܵܪ̈ܘܿܬܹܐ ܠܥܘܼܬܼܪܵܐ ܕܪܘܼܚܵܐ 528 ܘܕܲܓܵܠܵܐܝܼܬܼ ܐܲܚܸܒܼܘ ܘܲܪܚܸܡܘ ܩܘܼܫܬܵܐ ܒܙܹܐܦܵܐ ܀ 529 :ܡܸܛܠ ܚܘܼܒܵܐ ܕܐܲܪ̈ܥܵܢܵܝܵܬܼܵܐ ܢܩܸ݂ܦܘ ܠܲܫܪܵܪܵܐ 530 ܘܡܸܛܠ ܕܲܪܓܼܵܘ ܕܪܹܫܢܘܼܬܼܵܐ ܠܒܸܫ̣ܘ ܐܸܣܟܹܿܡܵܐ ܀ 531 :ܒܪܸܚܡܲܬܼ ܫܘܼܒܼܚܵܐ ܨܲܒܸܿܬܼܘ ܘܲܒܼܢ̣ܵܘ ܢܵܘ̈ܣܹܐ ܠܟܹܐܢܹ̈ܐ 532 ܘܲܥܒ݂ܲܘܕܼܘ ܐܸܢܢܘܿܢ ܒܹܝܬܼ ܬܹܐܓܼܘܼܪܬܵܐ ܠܪܸܚܡܲܬܼ ܟܸܣܦܵܐ ܀ 533 :ܦܲܚܹ̈ܐ ܕܟܸܣܦܵܐ ܨܠܵܘ ܒܹܝܬܼ ܩܘܼܕܼܫܵܐ ܡܫܲܡܫܲܝ̈ ܩܘܼܕܼܫܵܐ 534 ܕܢܲܦܸܠ ܨܲܝܕܵܐ ܕܟܸܣܦܵܐ ܢܕܼܝܼܕܼܵܐ ܠܪܸܚܡܲܬܼ ܟܸܣܦܵܐ ܀ 535 :ܡܸܛܠ ܟܸܣܦܵܐ ܩܪܵܡ̣ܘ ܥܲܠ ܐܸܣܹ̈ܐ ܟܸܣܦܵܐ ܢܟܼܝܼܠܵܐ 536 ܕܢܸܚܙܸܐ ܟܠܢܵܫ ܦܲܐܝܘܼܬܼ ܟܸܣܦܵܐ ܘܢܲܝܬܸܿܐ ܟܸܣܦܵܐ ܀ 537 :ܒܪܸܚܡܲܬܼ ܟܸܣܦܵܐ ܙܲܝܲܚܘ ܓܲܪ̈ܡܹܐ ܒܪܸ̈ܓܼܫܹܐ ܕܠܲܒܲܪ 538 ܘܲܒܼܪܸܥܝܵܢܵܐ ܢܲܫܸܩܘ ܟܸܣܦܵܐ ܕܠܵܐ ܣܲܒܼܥܘܼܬܼܵܐ ܀ 539 :ܒܪܸܚܡܲܬܼ ܟܸܣܦܵܐ ܙܲܝܲܚܘ ܓܲܪ̈ܡܹܐ ܒܪܸܓܼܫܹܐ ܕܲܠܒܲܪ 540 ܘܲܒܼܪܸܥܝܵܢܵܐ ܢܲܫܸܩܘ ܟܸܣܦܵܐ ܕܠܵܐ ܣܲܒܼܥܘܼܬܼܵܐ ܀ 541 :ܐܲܩܢܝܼܘ ܐܸܢܘܿܢ ܓܲܪ̈ܡܹܐ ܡܝܼܬܹ̈ܐ ܩܵܠܵܐ ܓܫܝܼܡܵܐ 542 ܠܡܸܬܼܒܲܥ ܟܸܣܦܵܐ ܡ̣ܢ ܐ̄ܢܵܫܘܼܬܼܵܐ ܒܹܝܬܼ ܚܸܙܘܵܢܹ̈ܐ ܀ 543 :ܣܵܢܲܝܲܝ̈ ܟܸܣܦܵܐ ܕܦܲܣܸܩܘ ܢܸܫ̈ܒܹܿܐ ܕܲܦܪܲܣ ܟܸܣܦܵܐ 544 ܥܸܒܼܕܲܬ̤ ܐܸܢܘܿܢ ܪܸܚܡܲܬܼ ܟܸܣܦܵܐ ܨܲܝܕܵܐ ܠܟܸܣܦܵܐ ܀ 545 :ܒܚܲܝܠܵܐ ܕܓܼܪ̈ܡܹܐ ܨܒܼܵܬ̤ ܝܲܥܢܘܼܬܼܵܐ ܠܡܸܒܼܠܲܥ ܣܲܓܿܝܼ 546 ܘܲܒܼܘܼܕܼܪܵܢܹܗ ܗܢܵܬ̤ ܫܘܼܠܛܵܢܵܐ ܠܡܸܪܕܲܦ ܫܹܐܕܹ̈ܐ ܀ pb. 44 547 :ܠܵܘ ܒܲܫܪܵܪܵܐ ܪܸܕܼܦܲܬ̤ ܐܸܢܘܿܢ ܐܸܠܵܐ ܒܙܹܐܦܵܐ 548 ܘܡ̣ܢ ܩܵܠ ܟܸܣܦܵܐ ܥܪܲܩ̣ܘ ܡ̇ܪ̈ܘܿܕܹܐ ܘܠܵܘ ܡ̣ܢ ܩܘܼܫܬܵܐ ܀ 549 :ܪܸܚܡܲܬܼ ܟܸܣܦܵܐ ܐܸܓܼܪܲܬ̤ ܐܸܢܘܿܢ ܦܵܥܠܹ̈ܐ ܠܟܲܪܡ̇ܗ̇ 550 ܕܢܸܗܘܘܿܢ ܦܵܠ̇ܚܝܼܢ ܒܐܸܫܟܵܪ ܥܵܘ̣ܠܵܐ ܐܲܝܟ ܕܲܒܼܩܘܼܫܬܵܐ ܀ 551 :ܦܵܠܲ݁ܚ ܕܲܝܘܵܐ ܠܪܸܚܡܲܬܼ ܟܸܣܦܵܐ ܒܪܸ̈ܓܼܫܲܝ ܦܲܓܼܪܵܐ 552 ܘܲܡܫܲܡܸܫ ܠܹܗ ܒܲܪ̈ܓܼܝܼܓܼܵܬܼܵܐ ܐܲܝܟ ܕܲܠܡܵܪܵܐ ܀ 553 :ܬܵܐ ܦܵܪܘܿܫܵܐ ܡܫܲܥ ܘܐܸܬܿܕܲܡܲܪ ܦܵܪܘܿܫܵܐܝܼܬܼ 554 ܕܲܟܼܡܵܐ ܦܸܪܚܲܬ̤ ܪܸܚܡܲܬܼ ܟܸܣܦܵܐ ܒܓܸܦܹ̈ܐ ܕܟܸܣܦܵܐ ܀ 555 :ܒܢܝܼܪܵܐ ܕܥܲܡܠܹܗ ܟܸܕܼܢܲܬ̤ ܐܲܟܲܚ̄ܕܼ ܐ̄ܢܵܫܵܐ ܘܫܹ̈ܐܕܹܐ 556 ܘܠܵܐ ܣܦܲܩ̣ܘ ܡܲܠܝܼܘ ܚܲܣܝܼܪܘܼܬܼܵܗ̇ ܪܵܘܡ̇ܐ ܘܥܘܼܡܩܵܐ ܀ 557 :ܙܟܼܵܬ̤ ܠܲܥܪ̈ܝܼܡܹܐ ܘܠܲܗܸܕܼܝܼܘܿܛܹ̈ܐ ܒܲܗ̈ܦܵܟܼܵܬܼܵܐ 558 ܘܲܩܢܵܬ̤ ܕܲܪܓܼܵܐ ܕܪܲܒܵܢܘܼܬܼܵܐ ܠܥܸܠ ܡ̣ܢ ܟܠ ܐ̄ܢܵܫ ܀ 559 :ܐܵܦ ܐܲܬܼܠܹܝܛܹ̈ܐ ܕܲܢܨܲܚ̣ܘ ܘܲܙܟܼܵܘ ܒܐܵܓܼܘܿܢ ܩܘܼܫܬܵܐ 560 ܚܸܣܢܲܬ̤ ܐܸܢܘܿܢ ܒܐܸܣܟܹܿܝܡ ܚܘܼܒܵܐ ܕܨܹܝܕܼ ܓܲܪ̈ܡܲܝܗܘܿܢ ܀ 561 :ܐܲܓܼܪܵܐ ܓܚܘܼܒܵܐ ܬܸܒܼܥܲܬ̤ ܐܸܢܢܘܿܢ ܠܓܲܪ̈ܡܹܐ ܕܢܲܟܼܦܹ̈ܐ 562 ܟܲܕܼ ܒܐܸܣܟܹܿܡܵܐ ܘܠܵܘ ܒܲܫܪܵܪܵܐ ܪܸܚܡܲܬ̤ ܐܸܢܘܿܢ ܀ 563 :ܡܸܛܠ ܟܸܣܦܵܐ ܐܲܣܓܿܝܼܘ ܘܝܲܩܲܪܘ ܝܲܥܢܹ̈ܐ ܠܟܸܣܦܵܐ 564 ܘܲܬܼܒܲܥ̣ܘ ܐܲܓܼܪܵܐ ܕܐܸܣܟܹܿܝܡ ܙܹܐܦܵܐ ܐܲܝܟ ܫܲܪܝܼܪܵܐ ܀ 565 :ܠܵܐ ܒܵܥܹ̇ܝܢ ܗ̄ܘ̣ܵܘ ܚܲܪ̈ܡܹܐ ܕܟܹܐܢܹ̈ܐ ܠܲܡܝܲܩܵܪܘܼ 566 ܘܠܵܐ ܗ̄ܘ̣ܵܘ ܥܲܠ ܙܡܝܼܪ̈ܵܬܲܢ ܘܥܲܠ ܬܸܫܡܸܫܬܲܢ ܀ 567 :ܠܵܐ ܚܸܫܲܚ ܗ̄ܘ̣ܵܐ ܠܙܲܗ̈ܝܲܝ ܢܲܦܫܵܐ ܥܸܛܪܵܐ ܕܡܸܢܲܢ 568 ܘܠܵܐ ܠܲܥܛܝܼܦܲܝ̈ ܢܘܼܗܪܵܐ ܓܲܐܝܵܐ ܕܸܠܩܹ̈ܐ ܕܙܲܒܼܢܵܐ ܀ 569 :ܒܪܸܚܡܲܬܼ ܢܲܦܫܵܐ ܦܠܸܐ ܗ̄ܘ̣ܵܐ ܠܟܹܐܢܹ̈ܐ ܠܲܡܝܲܩܵܪܘܼ 570 ܐܲܝܟ ܕܐܵܦ ܗܸܢܘ̣ܿܢ ܒܙܵܘ̈ܥܲܝ ܢܲܦܫܵܐ ܪܚܸܡ̣ܘ ܠܐܲܠܵܗܵܐ ܀ 571 :ܒܟܸܣܝܵܐ ܫܦ݂ܲܪܘ ܗ̄ܘ̣ܵܘ ܐܲܝܟ ܦܵܪ̈ܘܿܫܹܐ ܠܚܸܙܹ̇ܐ ܒܟܸܣܝܵܐ 572 ܐܵܦ ܗܘ̤ ܟܲܣܝܵܐ ܝܲܩܲܪ ܐܸܢܘܿܢ ܒܟܸܣܝܵܐ ܘܓܸܠܝܵܐ ܀ 573 :ܐܵܦ ܪܹܫܝܼܬܲܢ ܕܲܕܪܲܫ ܐܘܼܪܚܵܐ ܒܚܲܝܹ̈ܐ ܠܪܵܘܡ̇ܐ 574 ܠܗܵܘ̇ ܝܲܗ̣̄ܒܼ ܛܘܼܒܼܵܐ ܕܲܕܠܵܐ ܚܙܵܢܼܵܐ ܗܲܝܡܸܢ ܒܲܫܡܹܗ ܀ 575 :ܠܢܝܼܫܵܐ ܕܝܼܠܹܗ ܙܵܕܹ̇ܩ ܗ̄ܘ̣ܵܐ ܠܲܢ ܠܡܸܚܢܵܐ ܒܙܵܘ̈ܥܹܐ 576 ܘܠܵܐ ܒܲܚܙܵܬܼܵܐ ܢܚܵܘܸܐ ܫܘܼܦܪܵܐ ܠܲܟܼܢܵܘ̈ܬܲܢ ܀ 577 :ܠܵܐ ܦܲܐܝܵܐ ܗ̄ܘ̣ܵܬܼ ܕܒܼܐܝܼܩܵܪ ܟܹܐܢܹ̈ܐ ܢܝܲܩܲܪ ܢܲܦܫܲܢ 578 ܘܠܵܐ ܙܵܕܹ̇ܩ ܗ̄ܘ̣ܵܘ ܕܢܸܬܼܒܲܥ ܐܸܢܘܿܢ ܐܲܓܼܪܵܐ ܕܥܲܡܠܲܢ ܀ 579 :ܡܲܓܼܵܢ ܝܲܗ̄ܒܿܘܼܗ̇ ܠܗܵܝ̇ ܡ̇ܘܗܲܒܼܬܼܵܐ ܕܲܥܬܲܪܘ ܡܸܢܵܗ̇ 580 ܘܒܼܵܗ̇ ܒܲܕܼܡܘܼܬܼܵܐ ܘܵܠܹ̇ܐ ܗ̄ܘ̣ܵܐ ܠܲܢ ܠܲܡܫܲܡܵܫܘܼ ܀ pb. 45 581 :ܪܲܒܿܘܼܬܼ ܟܲܪܣܵܐ ܥܸܠܲܬ̤ ܘܲܫܪܵܬ̤ ܒܹܝܬܼ ܡ̇ܝ̈ܘܿܬܹܐ 582 ܘܡܸܛܠ ܗܵܢܵܐ ܡܕܼܵܘܲܕܼ ܘܲܫܚܝܼܩ ܥܘܼܡܪܵܐ ܕܐ̄ܢܵܫܵܐ ܀ 583 :ܪܸܚܡܲܬܼ ܡܲܣܪܵܐ ܦܸܪܣܲܬ̤ ܢܸܫ̈ܒܹܿܐ ܒܹܝܬܼ ܐܲܪ̈ܥܵܢܹܐ 584 ܘܲܢܦ݂ܲܠ ܟܠܢܵܫ ܒܲܡܨܸܝܼ̈ܕܼܵܬܼܵܐ ܕܥܵܠܘܿܒܼܘܼܬܼܵܐ ܀ 585 :ܫܘܼܒܼܚܵܐ ܣܪܝܼܩܵܐ ܡܲܟܸܿܟ ܢܲܦܫܹܗ ܒܫܸܡ ܚܲܠܝܘܼܬܼܵܐ 586 ܘܐܲܫܩܝܼ ܐܸܢܘܿܢ ܠܲܒܼܢܲܝ̈ܢܵܒܵܐ ܡܸܪܲܬܼ ܡ̇ܘܬܵܐ ܀ 587 :ܚܣܵܡܵܐ ܣܲܢܝܵܐ ܥܵܘܪܵܗ̇ ܠܢܲܦܫܵܐ ܡ̣ܢ ܝܼܕܲܥܬܼܵܐ 588 ܘܲܚܫܸ݂ܟ ܥܵܠܡܵܐ ܘܫܲܪܝܼ ܡ̇ܐܹ̇ܫ ܐܸܣܹ̈ܐ ܒܛܲܗܪܵܐ ܀ 589 :ܥܒ݂ܲܪ ܣܘܼܟܵܠܵܐ ܡ̣ܢ ܪܸܥܝܵܢܵܐ ܕܲܡܠܝܼܠܘܼܬܼܵܐ 590 ܘܲܒܼܛܸܠܘ ܙܵܘܥܹ̈ܐ ܕܦܵܘܿܫܘܼܬܼܵܐ ܡ̣ܢ ܒܘܼܝܵܢܵܐ ܀ 591 :ܘܐܸܢ ܥܘܼܕܼܪܵܢܵܐ ܕܪܸܡܙܵܐ ܠܵܐ ܡܲܕܼܪܸܟ ܠܲܢ 592 ܒܛܸܠܘ ܘܐܸܬܿܕܲܓܲܠܘ ܐܵܦ ܡܘܼܠܟܵܢܹ̈ܐ ܕܲܠܘܵܬܼ ܓܸܢܣܲܢ ܀ 593 :ܬܵܘ ܚܲܝܵܒܹܵܐ ܢܸܦܪܘܿܥ ܩܲܠܝܼܠ ܫܛܵܪ ܚܵܘ̈ܒܵܬܲܢ 594 ܕܲܠܡܵܐ ܢܸܥܫܲܢ ܝܘܼܩܪܵܐ ܕܥܵܘ̣ܠܲܢ ܘܲܢܛܲܒܲܠ ܠܲܢ ܀ 595 :ܬܵܘ ܢܸܬܼܓܵܘܲܣ ܒܲܠܡܹܐܝܢ ܟܹܐܢܹ̈ܐ ܐܲܝܟ ܕܲܒܼܟܹܐܢܹ̈ܐ 596 ܕܲܢܥܲܕܿܪܘܼܢܵܢ ܒܚܘܼܒܵܐ ܘܪ̈ܲܚܡܹܐ ܩܕܼܵܡ ܕܲܝܵܢܵܐ ܀ 597 :ܬܵܘ ܢܸܥܒܸܿܕܼ ܠܲܢ ܪ̈ܵܚܡܹܐ ܡܸܟܵܐ ܥܲܕܼ ܚܲܝܝܼܢܲܢ 598 ܕܲܢܩܲܒܿܠܘܼܢܵܢ ܒܲܡܛܲܠܲܝ̈ܗܘܿܢ ܕܠܵܐ ܡܸܫܬܬܲܪ̈ܝܵܢ ܀ 599 :ܬܵܘ ܢܸܬܿܬܲܓܼܪ ܥܲܡ ܟܲܫܝܼܪܹ̈ܐ ܪܘܼܚܵܢܵܐܝܼܬܼ 600 ܕܢܸܫܘܸܐ ܠܐܲܓܼܪܵܐ ܕܦܵܥܠܹ̈ܐ ܕܲܛܥܲܢܘ ܝܘܼܩܪܹܗ ܕܝܵܘܡܵܐ ܀ 601 :ܢܕܘܼܢ ܪܸܥܝܵܢܲܢ ܒܐܲܝܠܹܝܢ ܕܲܚܛܲܝܢ ܐܲܝܟ ܦܵܪ̈ܘܿܫܹܐ 602 ܕܢܸܗܘܸܐ ܚܲܒܼܪܹ̈ܐ ܠܐܲܝܠܹܝܢ ܕܲܣܒܲܠܘ ܢܸܓܼ̈ܕܹܿܐ ܒܚܘܼܒܵܐ ܀ 603 :ܕܠܵܐ ܣܵܦ̇ܩܝܼܢܲܢ ܠܲܡܣܲܝܒܵܪܘܼ ܚܲܫܲܝ̈ ܦܲܓܼܪܵܐ 604 ܢܸܚܲܫ ܩܲܠܝܼܠ ܒܙܵܘܥܲܝ̈ ܢܲܦܫܵܐ ܚܠܵܦ ܗܲܕܵܡܹ̈ܐ ܀ 605 :ܕܲܡܚܝܼܠ ܚܲܝܠܲܢ ܠܲܡܥܲܙܵܝܘܼ ܩܕܼܵܡ ܚܘܼ̈ܬܼܚܵܬܹܐ 606 ܢܸܩܪܸܐ ܠܪ̈ܲܓܡܹܐ ܕܚܲܫܘ ܠܲܟܼܝܵܢܲܢ ܕܲܢܥܲܕܿܪܘܼܢܵܢ ܀ ܥܘܼܢܵܝܵܐ: ܒܪܝܼܟ ܡ̇ܪܵܐ ܕܕܼܵܡ̇ܟܿܝܼܢ ܥܲܒܼܕܵܘ̈ܗܝ: ܘܗܘ̤ ܡ̇ܘܪܸܒܼ ܕܘܼܟܼܪ̈ܵܢܲܝܗܘܿܢ ܀