On the Martyrs - ܥܲܠ ܣܵܗ̈ܕܹܿܐ

1 :ܒܟܼܠܕܿܘܼܟ ܐܲܩܝܼܡ ܝܼܫܘܿܥ ܣܵܗ̈ܕܹܿܐ ܠܲܙܝܼܦܘܼܬܹܗ 2 ܘܲܒܼܟܼܠܦܸܢ̈ܝܵܢ ܩܲܒܿܠܹܗ ܠܢܝܼܫܵܐ ܕܲܨܠܝܼܒܼܘܼܬܹܗ ܀ 3 :ܒܟܼܠܵܗ̇ ܬܹܒܹܝܠ ܐܲܕܼܢܲܚ ܫܸܡܫܵܐ ܕܟܼܵܪܘܿܙܘܼܬܹܗ pb. f.178v 4 ܘܲܒܼܙܲܝܼܩܵܘ̈ܗܝ ܩܲܦܠܹܗ ܠܚܸܫܟܵܐ ܡ̣ܢ ܥܵܡܲܪܬܵܐ ܀ 5 :ܫܕܼܵܗ̇ ܠܲܡܨܝܼܕܿܬܵܐ ܕܡܲܠܦܵܢܘܼܬܹܗ ܒܝܲܡܵܐ ܕܐ̄ܢܵܫܵܐ 6 ܘܲܠܓܼܵܘ ܡܸܢܵܗ̇ ܚܒܲܫ̣ ܟܠ ܥܲܡܡܝܼ̈ܢ ܥܲܡ ܟܠ ܡܲܠ̈ܟܿܝܼܢ ܀ 7 :ܠܵܐ ܫܒܲܩ̣ ܒܐܲܪܥܵܐ ܡܕܼܝܼܢ̄ܬܵܐ ܕܬܸܡܪܲܕܼ ܡ̣ܢ ܝܘܼܠܦܵܢܹܗ 8 ܘܠܵܐ ܦܫܲܬ̤ ܒܵܗ̇ ܓܘܿܢܝܵܐ ܒܐܲܪܥܵܐ ܕܠܵܘ ܒܵܗ̇ ܢܵܨܲ̇ܚ ܀ 9 :ܓܸܦܹ̈ܐ ܗܘ̤ܵܘ ܠܵܗ̇ ܠܟܼܵܪܘܿܙܝܼܬܹܗ ܘܦܸܪܚܲܬ̤ ܒܐܲܪܥܵܐ 10 ܘܲܒܼܟܼܠܦܸܢ̈ܝܵܢ ܐܸܚܕܲܬ̤ ܢܘܼܡܹܐ ܒܩܲܠܝܼܠܘܼܬܼܵܗ̇ ܀ 11 :ܒܝܲܡܵܐ ܘܝܲܒܼܫܵܐ ܪܸܗܛܲܬ̤ ܡܸܠܬܹܗ ܩܲܠܝܼܠܵܐܝܼܬܼ 12 ܘܟܼܵܕܼܢܹܗ ܠܥܵܠܡܵܐ ܒܢܝܼܪܵܐ ܢܝܼܚܵܐ ܕܡܲܠܦܵܢܘܼܬܹܗ ܀ 13 :ܒܚܘܼܒܵܐ ܪܲܒܵܐ ܩܲܒܿܠܘܼܗ̇ ܐ̄ܢܵܫܵܐ ܠܟܵܪܘܿܙܘܼܬܹܗ 14 ܘܡܸܛܠܵܬܼܵܗ̇ ܣܲܝܒܲܪܘ ܫܸܢ̈ܕܿܝܼܢ ܘܟܼܠ ܐܘܼܠܨܵܢܝܼ̈ܢ ܀ 15 :ܡܸܛܠ ܚܘܼܒܹܿܗ ܒܢܲܝ̈ܵܐ ܐܲܪܦܝܼܘ ܠܐܲܒܼܵܗܲܝ̈ܗܘܿܢ 16 ܘܲܚܫ݂ܲܒܼܘ ܐܸܢܘܿܢ ܐܲܝܟ ܢܘܼܟܼܪ̈ܵܢܹܐ ܘܠܹܗ ܐܸܬܼܢܲܩܲܦܘ ܀ 17 :ܡܸܛܠܵܬܹܗ ܐܵܦ ܐܲܒܼܵܗܹ̈ܐ ܟܦܲܪܘ ܒܲܒܼܢܲܝ̈ܗܘܿܢ 18 ܘܲܠܟܼܠ ܡ̇ܘ̈ܬܿܝܼܢ ܐܲܫܠܸܡܘ ܐܸܢܘܿܢ ܕܠܵܐ ܚܵܘܣܵܢܵܐ ܀ 19 :ܣܸܕܩܵܐ ܪܲܒܵܐ ܐܲܪܡܝܼ ܒܐܲܪܥܵܐ ܒܝܘܿܡ ܡܹܐܬܼܝܼܬܹܗ 20 ܘܦܲܣܩܹܗ ܠܚܘܼܒܵܐ ܗܵܘ̇ ܕܐܲܒܼܵܗܹ̈ܐ ܡ̣ܢ ܕܐܲܒܼܵܗܹ̈ܐ ܀ pb. 47 21 :ܐܲܚܵܐ ܠܐܲܚܘܼܗܝ ܡܸܛܠܵܬܹܗ ܠܡܵܘܬܵܐ ܐܲܫܠܸܡ 22 ܘܠܲܝܬܿ ܗ̄ܘ̣ܵܐ ܒܲܝܬܵܐ ܕܲܡܚܲܪܲܪ ܗ̄ܘ̣ܵܐ ܡ̣ܢ ܚܸܪܝܵܢܵܐ ܀ 23 :ܠܵܐ ܨܵܒܼ̇ܝܵܐ ܗ̄ܘ̣ܵܬܼ ܒܲܪܬܼܵܐ ܬܩܲܒܸܿܠ ܛܘܼܥܝܲܝ ܕܐܸܡ̇ܗ̇ 24 ܐܵܦܠܵܐ ܐܸܡ̇ܐ ܡܸܬܿܬܿܛܦܝܼܣܵܐ ܗ̄ܘ̣ܵܬܼ ܕܬܼܵܘܕܸܿܐ ܒܒܲܪܬܼܵܗ̇ ܀ 25 :ܝܼܫܘܿܥ ܐܝܼܬܼܵܘܗܝ ܥܸܠܬܼܵܐ ܕܟܼܠܹܗ ܗܵܢ ܦܘܼܠܵܓܼܵܐ 26 ܐܲܝܟ ܡ̇ܐ ܕܐܵܦ ܗܘ̤ ܡܲܠܸܦ ܗ̄ܘ̣ܵܐ ܠܲܢ ܢܲܗܝܼܪܵܐܝܼܬܼ ܀ 27 :ܠܵܐ ܠܲܡ ܬܸܣܒܿܪܘܼܢ ܕܐܸܬܹܿܝܬܼ ܕܐܲܪܡܸܐ ܫܲܝܢܵܐ ܒܐܲܪܥܵܐ 28 ܠܵܐ ܓܹܝܪ ܐܸܬܹ̇ܝܬܼ ܕܐܲܪܡܸܐ ܫܲܝܢܵܐ ܐܸܠܵܐ ܚܲܪܒܵܐ ܀ 29 :ܣܒܲܪܬܼܵܐ ܚܕܲܬܵܐ ܐ̄ܬܹܿܝܬܼ ܕܐܹܣܲܒܲܪ ܠܲܒܼܢܲܝ̈ܢܵܫܵܐ 30 ܘܐܲܝܢܵܐ ܕܡܸܬܿܬܿܛܦܝܼܣ ܘܲܡܩܲܒܸܿܠ ܠܝܼ ܣܢܝܼܠܵܐ ܗܵܘܹ̇ܐ ܀ 31 :ܒܐܲܒܼܘܼܗܝ ܟܵܦܲܪ ܐܲܝܢܵܐ ܕܡ̇ܘܕܹܿܐ ܒܝܼ ܘܲܒܼܡܸܠܲܝ̈ 32 ܘܠܸܐܡܹܗ ܫܵܒܹ̇ܩ ܡܲܢ ܕܲܡܩܲܒܸܿܠ ܘܲܡܗܲܝܡܸܢ ܒܝܼ ܀ 33 :ܒܲܒܼܢܲܝ̈ ܒܲܝܬܹܿܗ ܟܠܗܘܿܢ ܟܵܦܲܪ ܐܵܦ ܗܸܢܘ̣ܿܢ ܒܹܗ 34 ܘܙܵܩܹ̇ܦ ܦܲܓܼܪܹܗ ܠܘܼܩܒܲܠ ܥܵܠܡܵܐ ܠܹܠܲܝ ܐܝܼܡܵܩ ܀ 35 :ܙܩܝܼܦܹܗ ܛܵܥܹ̇ܢ ܠܥܸܠ ܡ̣ܢ ܟܲܬܼܦܹܗ ܘܢܵܦܹ̇ܩ ܒܲܠܘܝܼܬܼܝ 36 ܘܡܲܡܠܸܐ ܠܛܘܿܗܡ̇ܐ ܘܓܸܢܣܵܐ ܟܠܹܗ ܘܠܝܼ ܡܸܬܼܢܲܩܲܦ ܀ 37 :ܐܸܢ ܥܲܬܿܝܼܪܵܐ ܗ̄ܘ̣ ܫܵܐܹ̇ܛ ܥܘܼܬܼܪܹܗ ܘܗܵܘܹ̇ܐ ܡܸܣܟܹܿܝܢ 38 ܘܡ̇ܐ ܕܐܸܣܬܲܪܲܩ ܗܵܝܕܹܿܝܢ ܫܵܘܹ̇ܐ ܕܠܝܼ ܢܸܬܿܬܿܠܡܲܕܼ ܀ 39 :ܐܸܢ ܚܲܟܿܝܼܡܵܐ ܗ̄ܘ̣ ܘܠܲܦܫܝܼܛܘܼܬܹܗ ܕܝܘܼܠܦܵܢܝ ܩܵܪܸܒܼ 40 ܒܚܸܟܼܡܲܬܼ ܥܵܠܡܵܐ ܠܘܼܩܕܼܵܡ ܢܸܟܼܦܘܿܪ ܘܗܵܝܕܹܿܝܢ ܢܹܐܬܸܐ ܀ 41 :ܐܸܢ ܫܲܠܝܼܛܵܐ ܗ̄ܘ̣ ܘܲܬܼܚܹܝܬܼ ܫܘܼܠܛܵܢܝ ܒܵܥܹ̇ܐ ܕܢܸܥܘܿܠ 42 ܒܡܲܟܿܝܼܟܼܘܼܬܼܵܐ ܕܦܲܐܝܵܐ ܠܡܵܪܘܼܬܼܝ ܢܸܬܿܬܿܡܲܕܼ ܠܝܼ ܀ 43 :ܬܲܪܥܵܐ ܐ̄ܠܝܼܨܵܐ ܐܸܬܹܿܝܬܼ ܕܐܸܦܬܲܚ ܠܲܒܼܢܲܝ̈ܢܵܫܵܐ 44 ܘܩܲܛܝܼܢ ܣܲܓܿܝܼ ܘܠܵܐ ܗ̄ܘ̣ܵܐ ܠܟܼܠܢܵܫ ܦܫܝܼܩ ܕܢܸܥܘܿܠ ܒܹܗ ܀ 45 :ܙܥܘܿܪܹ̈ܐ ܒܲܠܚܘܿܕܼ ܡܨܹܝܢ ܥܵܐܠܝܼܢ ܒܹܗ ܒܬܲܪܥܵܐ ܕܦܸܬܼܚܹ̇ܝܬܼ 46 ܘܕܲܠܝܼܠܹ̈ܐ ܐ̄ܢܘܿܢ ܕܲܡܨܹܝܢ ܪܵܕܹܝܢ ܒܐܘܼܪܚܵܐ ܕܕܸܪܫܹ̇ܬܼ ܀ 47 :ܬܲܪܥܵܐ ܩܲܛܝܼܢ ܘܐܘܼܪܚܵܐ ܐ̄ܠܝܼܨܵܐ ܘܣܲܓܿܝܼ ܥܲܣܩܵܐ 48 ܘܠܵܐ ܗ̄ܘ̣ܵܐ ܠܟܼܠܢܵܫ ܩܫܝܼܩ ܠܹܗ ܗܵܕܹܐ ܕܢܗܲܠܸܟ ܒܵܗ̇ ܀ 49 :ܠܵܘ ܟܠ ܐܲܝܢܵܐ ܕܒܼܵܥܹ̇ܐ ܠܡܹܐܬܼܵܐ ܦܫܝܼܩ ܠܹܗ ܕܢܹܐܬܸܐ 50 ܕܬܼܘܼܠܡܵܕܼܵܐ ܕܝܼܠܝ ܒܥܲܡܠܵܐ ܪܲܒܵܐ ܐ̄ܢܵܫܵܐ ܓܵܡܲ݁ܪ ܀ 51 :ܠܵܘ ܟܠ ܐܲܝܢܵܐ ܕܩܵܪܹܐ ܢܲܦܫܹܗ ܬܲܠܡܝܼܕܵܐ ܕܝܼܠܝ 52 ܡܸܫܟܲܚ ܓܵܡܲ݁ܪ ܬܲܠܡܝܼܕܼܘܼܬܼܵܐ ܕܠܝܼ ܡܸܬܼܒܲܥܝܵܐ ܀ 53 :ܚܲܝܹܐ ܥܡܝܼܠܹ̈ܐ ܐܸܬܹ̇ܝܬܼ ܕܐܲܠܸܦ ܠܲܒܼܢܲܝ̈ܢܵܫܵܐ 54 ܘܗܘܵ ܗ̄ܘ̣ ܫܵܘܸ̇ܐ ܐܲܝܢܵܐ ܕܫܵܡܲ݁ܥ ܘܢܵܛ̇ܲܪ ܡܸܠܲܬܼܝ ܀ 55 :ܒܐܲܚܵܘ̈ܗܝ ܟܵܦܲܪ ܐܵܦ ܠܐܲܚ̈ܘܵܬܹܗ ܡܢܲܟܼܪܸܐ ܢܲܦܫܹܗ 56 ܘܫܵܒܹ̇ܩ ܒܵܬܹ̈ܐ ܘܩܘܼܪ̈ܝܵܐ ܘܢܸܟܼܣܹ̈ܐ ܘܟܸܢ ܩܵܪܹܒܼ ܠܝܼ ܀ pb. 48 57 ܗܵܢܵܐ ܙܲܪܥܵܐ ܙܪܲܥ ܦܵܪܘܿܩܲܢ ܒܲܒܼܢܲܝ̈ܢܵܫܵܐ: pb. f.179r 58 ܘܩܲܒܿܠܘܼܗܝ ܣܵܗ̈ܕܹܿܐ ܒܚܘܼܒܵܐ ܕܲܦܠܸܐ ܠܬܲܠܡܝܼܕܼܘܼܬܹܗ ܀ 59 :ܗܘ̤ܵܘ ܢܘܼܟܼܪ̈ܵܝܹܐ ܠܟܼܠ ܕܲܩܢܹܝܢ ܗ̄ܘ̣ܵܘ ܡܸܛܠܵܬܹܗ 60 ܘܐܲܝܟ ܠܵܐ ܡܸܕܹܿܡ ܚܲܫ̣ܒܿܘܼܗܝ ܠܥܵܠܡܵܐ ܘܲܠܛܵܒܼܵܬܹ̈ܐ ܀ 61 :ܣܢ̣ܵܘ ܠܲܢܝܵܚܹ̈ܐ ܘܲܪܚܸܡܘ ܕܠܵܐ ܘܫܼܠܵܡܵܐ 62 ܘܟܲܕܼ ܒܐܲܪܥܵܐ ܗܘ̤ܵܘ ܘܠܵܘ ܒܐܲܪܥܵܐ ܗܘ̤ܵܘ ܐܸܠܵܐ ܒܪܵܘ ܡ̇ܐ ܀ 63 :ܟܲܕܼ ܚܲܝܝܼܢ ܗ̄ܘ̣ܵܘ ܡܲܚܝܼܬܼܝܼܢ ܗ̄ܘ̣ܵܘ ܠܥܵܠܡܵܐ ܟܠܹܗ 64 ܕܠܹܗ ܚܲܝܝܼܢ ܗ̄ܘ̣ܵܘ ܠܵܐ ܗ̄ܘ̣ܵܐ ܠܥܵܠܡܵܐ ܕܠܵܐ ܡܸܬܼܩܲܕܹܿܐ ܀ 65 :ܣܢ̣ܵܘ ܚܲܝܲܝ̈ܗܘܿܢ ܘܲܪܚܸܡ̣ܘ ܡ̇ܘܬܵܐ ܕܠܵܐ ܒܲܩܛܝܼܪܵܐ 66 ܘܡ̇ܘܬܵܐ ܕܟܼܠܢܵܫ ܕܵܚܹ̇ܠ ܡܸܢܹܗ ܩܲܒܿܠܘܼܗܝ ܗܸܢܘ̣ܿܢ ܀ 67 :ܒܐܘܼܚܵܐ ܕܡ̇ܘܬܵܐ ܚܙܲܩ̣ܘ ܛܘܼܒܼܵܢܹ̈ܐ ܘܠܵܐ ܩ̣ܢܲܛܘ ܘܲܕܼܚܸܠܘ 68 ܘܟܲܕܼ ܛܵܒܼ ܣܲܓܿܝܼ ܡܲܪܝܼܪ ܛܲܥܡܹܗ ܠܵܐ ܦܵܫ̣ܘ ܡܸܢܹܗ ܀ 69 :ܚܲܝܹ̈ܐ ܕܙܲܒܼܢܵܐ ܥܲܡ ܕܲܠܥܵܠܲܡ ܬܩܲܠ̣ܘ ܫܲܪܝܼܪܹ̈ܐ 70 ܘܐܲܣܠܝܼܘ ܗܵܠܹܝܢ ܘܲܓܼܒܼܵܘ ܗܵܢܹ̇ܝܢ ܦܵܪܘܿܫܵܐܝܼܬܼ ܀ 71 :ܒܗܵܝ̇ ܡܲܣܲܐܬܼܵܐ ܬܪܝܼܨܵܬܵܐ ܕܗܵܘܢܵܐ ܐܸܬܼܚܲܫܲܚܘ ܗ̄ܘ̣ܵܘ 72 ܘܲܬܼܩܲܠ̣ܘ ܫܲܦܝܼܪ ܥܵܠܡܵܐ ܕܥܵܒܲ݁ܪ ܥܲܡ ܕܲܠܥܵܠܲܡ ܀ 73 :ܠܵܐ ܐܸܬܼܪܲܦܝܼܘ ܡ̣ܢ ܐܵܓܼܘܿܢܵܐ ܕܲܢܚܸܬܼܘ ܗ̄ܘ̣ܵܘ ܠܹܗ 74 ܘܠܵܐ ܦܵܫ̣ܘ ܘܐܲܫܦܸܠܘ ܡ̣ܢ ܩܲܫܝܘܼܬܼܵܐ ܕܚܲܫܹ̈ܐ ܘܫܸܢ̈ܕܹܿܐ ܀ 75 :ܠܵܐ ܐܸܫܬܿܕܲܠܘ ܒܥܘܼܬܼܪܵܐ ܘܕܼܵܫܢܹ̈ܐ ܕܲܡܠܸܐ ܙܲܒܼܢܵܐ 76 ܘܠܵܐ ܐܸܬܼܥܵܘܲܟܼܘ ܠܵܐ ܡ̣ܢ ܓܸܢܣܵܐ ܘܠܵܐ ܡ̣ܢ ܛܘܿܗܡ̇ܐ ܀ 77 :ܗܵܢܵܐ ܢܝܼܫܵܐ ܠܚܘܿܕܼ ܣܝܼܡ ܗ̄ܘ̣ܵܐ ܠܗܘܿܢ ܦܵܪܘܿܫܵܐܝܼܬܼ 78 ܕܲܚܠܵܦ ܝܼܫܘܿܥ ܢܸܓܼܒܿܘܿܢ ܡ̇ܘܬܵܐ ܘܢܸܣܢܘܿܢ ܚܲܝܹ̈ܐ ܀ 79 :ܡ̇ܘܬܹܿܗ ܕܝܼܫܘܿܥ ܚܙ̣ܵܐܘܼܗܝ ܕܲܗܘ̤ܵܐ ܥܸܠܲܬܼ ܚܲܝܲ̈ܢ 80 ܘܲܩܢ̣ܵܘ ܚܲܝܠܵܐ ܠܲܡܒܲܣܵܪܘܼ ܥܲܠ ܟܠ ܡ̇ܘܬܿܝܼ̈ܢ ܀ 81 :ܚܙ̣ܵܐܘܼܗܝ ܕܲܬܼܠܸܐ ܒܪܹܫ ܓܵܓܼܘܼܠܬܵܐ ܚܠܵܦ ܦܘܼܪܩܵܢܲܢ 82 ܘܦܲܪܥܘܼܗܝ ܚܘܼܒܼܠܹ̈ܐ ܕܡܸܬܿܬܿܚܝܼܒܼܝܼܢ ܗ̄ܘ̣ܵܘ ܕܸܡ ܨܵܘܪ̈ܲܝܗܘܿܢ ܀ 83 :ܚܵܪ̣ܘ ܒܹܗ ܒܡܵܪܲܢ ܕܲܬܼܠܸܐ ܒܩܲܝܣܵܐ ܥܲܡ ܓܲܝܵܣܹ̈ܐ 84 ܘܐܸܬܼܒܲܝܲܢܘ ܗ̄ܘ̣ܵܘ ܕܡܸܛܠ ܐ̄ܢܵܫܵܐ ܩܲܒܸܿܠ ܕܲܢܡܘܼܬܼ ܀ 85 :ܚܙ̣ܵܘ ܠܓܲܝܵܣܵܐ ܕܩܲܒܸܿܠ ܡܸܢܹܗ ܫܘܼܒܼܩܵܢ ܚܵܘܒܵܘ̈ܗܝ 86 ܘܐܸܬܼ ܚܲܫܲܒܼܘ ܗ̄ܘ̣ܵܘ ܕܓܼܵܠܹ̇ܝܢ ܪ̈ܲܚܡܵܘܗܝ ܐܵܦ ܥܠܲܝܗܘܿܢ ܀ 87 :ܚܙ̣ܵܘ ܐܸܣܛܘܼܟܼܣܹ̈ܐ ܕܐܸܫܬܲܚܠܲܦܘ ܗ̄ܘ̣ܵܘ ܒܝܘܿܡ ܢܘܼܚܵܡܹܗ 88 ܘܐܸܬܼܒܲܝܲܢܘ ܗ̄ܘ̣ܵܘ ܕܡ̇ܪܝܵܐ ܐܝܼܬܼܵܘܗܝ ܕܝܼܠܗܘܿܢ ܘܲܕܼܟܼܠ ܀ 89 :ܚܙ̣ܵܘ ܠܲܟܼܝܵܢܹ̈ܐ ܕܲܕܼܠܵܐ ܡܸܠܬܼܵܐ ܟܲܕܼ ܩܵܥܹ̇ܝܢ ܗ̄ܘ̣ܵܘ 90 ܕܐܸܣܬܲܟܲܠܘ ܗ̄ܘ̣ܵܘ ܕܡ̇ܪܵܐ ܐܝܼܬܼܵܘܗܝ ܕܪܵܘܡ̇ܐ ܘܥܘܼܡܩܵܐ ܀ 91 ܚܙ̣̰ܵܘ ܟܲܕܼ ܩܵܥܹ̇ܝܢ ܟܝܵܢܹ̈ܐ ܚܲܪ̈ܫܹܐ ܠܐ̄ܢܵܫܵܐ ܡܠܝܼܠܹ̈ܐ: pb. 49 92 ܘܝܼܕܲܥܘ ܘܐܲܪܓܸܿܫܘ ܕܡܸܛܠܡܵܢܵܐ ܛܥܸܡ ܗ̄ܘ̣ܵܐ ܡ̇ܘܬܵܐ ܀ 93 :ܪܗܸܛܘ ܐܵܦ ܗܸܢܘ̣ܿܢ ܘܐܸܬܼܓܵܘܲܣܘ ܒܹܗ ܐܲܝܟ ܓܲܝܣܵܐ 94 ܘܲܫܐܸ̣ܠܘ ܡܸܢܹܗ ܫܘܼܒܼܩܵܢ ܚܵܘ̈ܒܹܿܐ ܘܚܲܝܹ̈ܐ ܚܲܕܼܬܹ̈ܐ ܀ 95 :ܐܲܝܟ ܠܵܐ ܡܸܕܹܿܡ ܚܫ݂ܲܒܼܘ ܕܐܝܼܬܲܝܗܘܿܢ ܚܲܝܹ̈ܐ ܕܙܲܒܼܢܵܐ 96 ܘܐܲܝܟ ܚܲܕܼ ܝܵܘܡ̇ܐ ܗܲܝܡܸܢܘ ܕܐܝܼܬܼܵܘܗܝ ܥܵܠܡܵܐ ܗܵܢܵܐ ܀ 97 :ܣܢ̣ܵܐܘܼܗܝ ܠܥܵܠܡܵܐ ܘܲܠܟܼܠ ܕܐܝܼܬܼ ܒܹܗ ܦܵܥܠܹ̈ܐ ܕܲܒܼܪܵܐ 98 ܘܣܲܟܿܝܼܘ ܠܡܹܐܪܲܬܼ ܚܲܝܹ̈ܐ ܚܲܕܼܬܹ̈ܐ ܒܡܲܠܟܿܘܼܬܼ ܪܵܘܡ̇ܐ ܀ 99 :ܣܢ̣ܵܘ ܗ̄ܘ̣ܵܘ ܘܐܲܣܠܝܼܘ ܟܠܗܘܿܢ ܫܘܼܦܪܹ̈ܐ ܐܵܦ ܩܸܢܝܵܢܹ̈ܐ 100 ܘܲܪܚܸܒܼܘ ܥܵܠܡܵܐ ܕܲܥܬܼܝܼܕܼ ܘܛܘܼܒܹ̈ܐ ܡܠܝܼܟܹ̈ܐ ܀ 101 :ܐܲܣܠܝܼܘ ܕܲܗܒܼܵܐ ܡܸܬܼܚܲܒܿܠܵܢܵܐ ܕܲܕܠܵܐ ܝܘܼܬܼܪܵܢ 102 ܘܲܣܢ̣ܵܘ ܟܸܣܦܵܐ ܕܠܵܐ ܡܨܸܐ ܦܵܪܹܩ ܠܟܼܠ ܩܲܢܵܝܵܘ̈ܗܝ ܀ 103 :ܐܲܪܡܝܼܘ ܡܸܢܗܘܿܢ ܟܠ ܣܸܓܼ̈ܕܵܬܼܵܐ ܕܲܦܬܲܟܼܪܘܼܬܼܵܐ 104 ܘܲܩ̣ܥܵܘ ܫܘܼܒܼܚܵܐ ܠܚܲܕܼ ܐܲܠܵܗܵܐ ܕܪܵܡ ܡ̣ܢ ܪ̈ܵܘܡܝܼܢ ܀ 105 :ܣܢ̣ܵܘ ܗ̄ܘ̣ܵܘ ܘܐܲܣܠܝܼܘ ܫܘܼܒܼܚܵܐ ܕܥܘܼܡܪܵܐ ܡܸܬܼܝܲܒܿܠܵܢܵܐ 106 ܘܲܪܚܸܡ̣ܘ ܘܐܲܚܸܒܼ ܫܘܼܒܼܚܵܐ ܕܪܵܘܡ̇ܐ ܕܠܵܐ ܡܸܬܼܚܲܒܲܠ ܀ 107 :ܫܒܲܩ̣ܘ ܠܲܦܬܲܟܼܪܹ̈ܐ ܕܐܲܩܝܼܡ ܒܝܼܫܵܐ ܠܛܵܥܘܼܬܼ ܐ̄ܢܵܫܵܐ 108 ܘܩܲܪܸܒܼܘ ܘܲܣܓܸܕܼܘ ܣܸܓܼܕܲܬܼ ܚܘܼܒܵܐ ܩܕܼܵܡ ܕܲܝܵܢܵܐ ܀ 109 :ܐܲܪܦܝܼܘ ܗܵܪܟܵܐ ܠܟܼܠ ܩܸܢܝܵܢܝܼ̈ܢ ܘܲܠܟܼܠ ܫܘܼܦܪܝܼ̈ܢ 110 ܘܲܪܗܸܛܘ ܒܵܬܼܪܵܗ̇ ܕܡܲܪܓܵܢܝܼܬܼܵܐ ܫܒܼܝܼܚܲܬܼ ܡ̣ܢ ܟܠ ܀ 111 :ܠܡܵܪܹܐ ܒܲܝܬܵܐ ܐܸܫܬܵܘܕܲܥܘ ܗ̄ܘ̣ܵܘ ܡ̣ܢ ܒܸܪ̈ܬܹܗ 112 ܘܐܲܝܟ ܫܝܼܦܘܿܪܹ̈ܐ ܝܲܗ̣̄ܒܼܘ ܬܸܫܒܿܘܿܚܬܵܐ ܠܡܲܬܼܩܸܢ ܟܠܵܐ ܀ 113 ܐܲܪܦܝܼܘ ܪܸܛܢܵܐ ܕܲܡܓܼܘܼܫܘܼܬܼܵܐ ܕܐܲܒܲܥ ܒܝܼܫܵܐ: pb. f.179v 114 ܘܲܩܥܵܘܼ ܫܘܼܒܼܚܵܐ ܠܚܲܕܼ ܒܵܪܘܿܝܵܐ ܘܲܡܬܲܩܢܵܢܵܐ ܀ 115 :ܐܸܬܼܒܲܝܼܢܘ ܗ̄ܘ̣ܵܘ ܕܫܸܡܫܵܐ ܘܣܲܗܪܵܐ ܒܪܝܼܬܼܵܐ ܐܸܢܘܿܢ 116 ܘܠܵܐ ܙܵܕܹܩ ܠܗܘܿܢ ܠܡܸܚܛܲܦ ܕܲܪܓܼܵܐ ܕܐܲܠܵܗܘܼܬܼܵܐ ܀ 117 :ܐܸܬܼܒܲܝܲܢܘ ܗ̄ܘ̣ܵܘ ܕܠܵܐ ܐܲܠܵܗܹ̈ܐ ܦܠܸܐ ܕܢܸܫܬܿܡܗܘܼܢ 118 ܘܲܕܼܠܵܐ ܕܬܸܬܼܩܲܪܲܒܼ ܠܗܘܿܢ ܣܸܓܼܕܲܬܼ ܐܲܠܵܗ ܀ 119 :ܚܙ̣ܵܐܘܼܗܝ ܠܲܒܼܪܵܐ ܕܲܕܼܪܲܫ ܐܘܼܪܚܵܐ ܕܚܲܝܹ̈ܐ ܠܓܸܢܣܲܢ 120 ܘܐܲܝܟ ܕܥܲܠ ܓܼܫܪܵܐ ܥܒ݂ܲܪܘ ܥܲܠ ܡ̇ܘܬܵܐ ܠܐܲܬܼܪܵܐ ܕܚܲܝܹ̈ܐ ܀ 121 :ܕܚܝܼܠܵܐ ܣܲܓܿܝܼ ܫܵܥܬܼܵܐ ܕܡ̇ܘܬܵܐ ܘܛܵܒܼ ܚܲܫܝܼܫܵܐ 122 ܘܲܟܼܡܵܐ ܪܓܼܝܼܓܼܝܼܢ ܗܵܠܹܝܢ ܚܲܝܹ̈ܐ ܕܙܲܒܼܢܵܐ ܠܐ̄ܢܵܫܵܐ ܀ 123 :ܛܵܒܼ ܚܲܒܿܝܼܒܼܝܼܢ ܚܲܝܹ̈ܐ ܕܙܲܒܼܢܵܐ ܠܲܒܼܢܲܝ̈ܢܵܫܵܐ 124 ܘܐܵܦ ܙܲܕܿܝܼܩܹ̈ܐ ܕܦܵܪܫܝܼܢ ܡܸܢܗܘܿܢ ܛܵܒܼ ܡܸܬܿܬܿܥܝܼܩܝܼܢ ܀ 125 ܗܵܐ ܚܹܙܲܩܝܵܐ ܕܐܸܣܬܲܒܲܪ ܗ̄ܘ̣ܵܐ ܥܲܠ ܥܘܼܢܕܵܢܹܗ: pb. 50 126 ܐܲܦܢܝܼ ܐܲܦܵܘ̈ܗܝ ܠܐܸܣܬܼܵܐ ܘܲܒܼܟܼܵܐ ܚܲܫܝܼܫܵܐܝܼܬܼ ܀ 127 :ܒܟܼܵܬܼܵܐ ܪܲܒܿܬܼܵܐ ܒܟܼܵܐ ܗ̄ܘ̣ܵܐ ܡܲܠܟܵܐ ܕܲܫܡܲܥ ܕܡ̇ܐܹܬܼ 128 ܥܕܲܡ̇ܐ ܕܲܡܫܲܥ ܣܒܲܪܬܼܵܐ ܕܚܲܝܹ̈ܐ ܡ̣ܢ ܐܹܫܲܥܝܵܐ ܀ 129 :ܘܐܸܢ ܙܲܕܿܝܼܩܵܐ ܕܚܸܠ̣ ܘܐܸܣܬܲܪܲܕܼ ܡ̣ܢ ܟܵܣ ܡ̇ܘܬܵܐ 130 ܡܲܚܢ̣ܘܼ ܦܫܝܼܩ ܠܹܗ ܕܲܕܠܹ̈ܐ ܢܣܲܝܒܲܪ ܚܲܫܹ̈ܐ ܀ 131 :ܣܵܗ̈ܕܹܿܐ ܣܲܝܒܲܪܘ ܚܲܫܹ̈ܐ ܕܡ̇ܘܬܵ ܘܠܵܐ ܐܸܣܬܲܪܲܕܼܘ 132 ܘܡܝܼܬܼ ܥܲܡ ܝܼܫܘܿܥ ܡ̇ܘܬܵܐ ܕܙܲܒܼܢܵܐ ܕܥܲܡܹܗ ܢܸܚܘܿܢ ܀ 133 :ܡ̇ܘܬܹܿܗ ܕܝܼܫܘܿܥ ܥܲܒܼܕܹܿܗ ܠܡܵܘܬܵܐ ܕܫܸܢܬܼܵܐ ܢܸܗܘܸܐ 134 ܘܲܒܼܢܘܼܚܵܡܹܗ ܒܲܛܠܹܗ ܘܲܪܪܵܝܗܝ ܡ̣ܢ ܫܘܼܠܛܵܢܹܗ ܀ 135 :ܡ̣ܢ ܐܲܝܟܵܐ ܠܹܗ ܠܦܲܓܼܪܵܐ ܡܚܝܼܠܵܐ ܒܲܪ ܐܲܕܼܡܬܼܵܐ 136 ܕܢܼܟܼܠܸܐ ܘܢܸܟܼܠܸܐ ܘܢܸܙܟܸܿܐ ܠܚܲܫܹ̈ܐ ܘܫܸܢ̈ܕܹܿܐ ܓܲܢ̄ܒܵܪܵܐܝܼܬܼ ܀ 137 :ܡ̣ܢ ܐܲܝܟܵܐ ܠܹܗ ܠܓܸܢܣܲܢ ܕܵܘܝܵܐ ܘܣܲܓܿܝܼ ܚܲܫܹ̈ܐ 138 ܕܲܠܒܼܝܼܒܼܵܐܝܼܬܼ ܢܸܩܪܘܿܒܼ ܘܢܸܙܟܸܿܐ ܠܚܲܫܹ̈ܐ ܕܡ̇ܘܬܼܵܐ ܀ 139 :ܠܲܝܢܿ ܒܵܗ̇ ܚܲܝܠܵܐ ܒܲܡܚܝܼܠܘܼܬܼܵܐ ܕܥܲܦܪܹܗ ܕܐܵܕܼܵܡ 140 ܘܡ̣ܢ ܐܲܝܟܵܐ ܠܹܗ ܕܲܕܠܵܐ ܥܲܡܠܵܐ ܢܣܲܝܒܲܪ ܚܲܫܹ̈ܐ ܀ 141 :ܡܲܢ̣ܘܼ ܝܲܗ̣̄ܒܼܠܹܗ ܗܵܕܹܐ ܠܦܲܓܼܪܵܐ ܕܢܸܣܢܸܐ ܚܲܝܵܘ̈ܗܝ 142 ܘܐܲܝܟܲܢ ܡܸܫܟܲܚ ܠܲܡܒܲܣܵܪܘܼ ܥܲܠ ܟܵܣ ܡ̇ܘܬܵܐ ܀ 143 :ܒܐܲܝܢܵܐ ܚܲܝܠܵܐ ܙܟܼܵܐ ܗ̄ܘ̣ܵܐ ܠܢܸܓܼ̈ܕܹܿܐ ܐܵܦ ܠܲܣܪܵܩܹܐ 144 ܘܡܲܢ̣ܘܼ ܚܲܝܸܠ ܠܲܡܚܝܼܠܘܼܬܹܗ ܕܠܵܐ ܬܸܬܼܪܲܦܸܐ ܀ 145 :ܡ̇ܘܬܹܿܗ ܕܝܼܫܘܿܥ ܝܲܗ̣̄ܒܼ ܗ̄ܘ̣ܵܐ ܐܝܼܕܼܵܐ ܠܦܲܓܼܪ̈ܵܢܵܝܹܐ 146 ܘܒܹܗ ܗ̄ܘ̣ ܚܬܼܝܼܪܝܼܢ ܘܲܡܒܲܙܚܝܼܢ ܒܹܗ ܒܫܘܼܠܛܵܢ ܡ̇ܘܬܵܐ ܀ 147 :ܐܸܠܘܼ ܝܼܫܘܿܥ ܠܵܐ ܡܝܼܬܼ ܘܲܚܝ̣ܵܐ ܡܲܢ̣ܘܼ ܡܸܫܟܲܚ 148 ܘܟܲܕܼ ܡ̇ܝܘܿܬܹܐ ܗ̄ܘ̣ ܢܸܣܢܸܐ ܚܲܝܹ̈ܐ ܪ̈ܵܚܡܲܝ ܥܲܠ ܟܠ ܀ 149 :ܐܸܠܘܼ ܡܫܝܼܚܵܐ ܠܵܐ ܚܲܒܼܫܹܗ ܗ̄ܘ̣ܵܐ ܠܡܵܘܬܵܐ ܒܩܲܒܼܪܵܐ 150 ܐܵܦܠܵܐ ܠܐ̄ܢܵܫܵܐ ܐܝܼܬܼ ܗ̄ܘ̣ܵܐ ܣܲܒܼܪܵܐ ܕܚܲܝܹ̈ܐ ܚܲܕܼܬܹ̈ܐ ܀ 151 ܙܡܢܹܗ ܝܫܘܿܥ ܠܟܼܠܹܗ ܓܸܢܣܲܢ ܠܚܲܝܹ̈ܐ ܚܲܕ̈ܬܹܐ: 152 ܘܲܪܗܸܛܘ ܣܵܗ̈ܕܹܿܐ ܘܐܸܙܲܠܘ ܠܘܵܬܹܗ ܠܐܲܝܟܵܐ ܕܐܸܙܲܠ ܀ 153 :ܗܘ̤ ܩܲܕܼܡ̇ܝܑܬܼ ܐܸܙܲܠ ܢܛܲܝܸܒܼ ܥܘܼܡܪܵܐ ܒܪܵܘܡ̇ܐ 154 ܘܗܵܝܕܿܝܼܢ ܣܵܠ̇ܩܝܼܢ ܪ̈ܵܚܡܵܘܗܝ ܥܲܡܹܗ ܠܒܹܝܬܼ ܡܲܠܟܿܘܼܬܼܵܐ ܀ 155 :ܥܲܠ ܗܵܢ ܣܲܒܼܪܵܐ ܡ̇ܝ̇ܬܿܝܼܢ ܣܵܗ̈ܕܹܿܐ ܕܠܵܐ ܒܲܩܟܝܼܪܵܐ 156 ܘܡܸܛܠ ܗܵܕܹܐ ܫܵܝ̇ܛܝܼܢ ܚܲܝܹ̈ܐ ܕܠܵܐ ܡܸܬܼܩܲܕܹܿܝܢ ܀ 157 :ܠܥܵܠܡܵܐ ܐ̄ܚܪܹܢܵܐ ܣܲܟܿܝܼܘ ܟܹܐܢܹ̈ܐ ܠܡܸܬܼܒܲܣܵܢܘܼ 158 ܘܡܸܛܠ ܗܵܕܹܐ ܡ̇ܝ̇ܬܿܝܼܢ ܗܵܪܟܵܐ ܕܲܠܗܲܠ ܢܸܚܘܿܢ ܀ 159 :ܒܗܵܠܹܝܢ ܟܹܐܢܹ̈ܐ ܢܸܪܗܲܛ ܟܠܢܵܫ ܒܗܘܿܢ ܢܸܬܼܒܲܩܸܐ 160 ܕܲܒܼܡܵܘܬܲܝ̈ܗܘܿܢ ܒܸܛܠܲܬ̤ ܛܘܼܥܝܲܝ ܘܲܢܨܲܚ ܩܘܼܫܬܵܐ ܀ 161 :ܒܗܘܿܢ ܐܸܬܼܢܲܨܲܚ ܐܵܦ ܝܘܼܠܦܵܢܵܐ ܕܟܼܵܘܿܙܘܼܬܼܵܐ 162 ܕܠܵܐ ܗ̄ܘ̣ܵܐ ܒܡܸܠܹ̈ܐ ܐܲܣܗܸܕܼܘ ܥܠܵܘܗܝ ܐܸܠܵܐ ܒܡܵܘܬܵܐ ܀ pb. 51 163 :ܗܵܐ ܓܹܝܪ ܐܲܝܢܵܐ ܕܲܡܗܲܝܡܵܢܘܼ ܡܗܲܝܡܸܢ ܒܲܒܚܘܿܕܼ 164 ܠܵܐ ܡܸܬܿܛܲܠܡܵܐ ܬܵܘܕܿܝܼܬܼ ܡܸܠܵܘ̈ܗܝ ܡ̣ܢ ܦܘܼܪܥܵܢܵܐ ܀ 165 :ܦܵܘܠܘܿܣ ܩܵܥܹ̇ܐ ܕܐܸܢ ܠܲܡ ܬܵܘܕܹܿܐ ܒܡܵܘܬܹܿܗ ܕܝܼܫܘܿܥ 166 ܘܲܬܼܗܲܝܡܸܢ ܬܘܼܒܼ ܕܩܵܡ̣ ܡ̣ܢ ܩܲܒܼܪܵܐ ܚܲܝܹ̈ܐ ܬܹܐܪܲܬܼ ܀ 167 :ܐܸܢ ܬܵܘܕܿܝܼܬܼܵܐ ܕܦܘܼܡ̇ܐ ܒܲܠܚܘܿܕܼ ܝܵܗ̇ܒܵܐ ܚܲܝܹ̈ܐ 168 ܣܵܗ̈ܕܹܿܐ ܕܗܲܝܡܸܢܘ ܐܵܦ ܐܸܬܼܟܲܠܲܠܘ ܟܡܵܐ ܠܲܡ ܢܹܐܪܬܿܘܼܢ ܀ 169 ܐܸܢ ܓܲܝܵܣܵܐ ܒܡܸܠܬܼܵܐ ܒܲܠܚܘܿܕܼ ܥܲܠ̣ ܠܦܲܪܕܲܝܣܵܐ: pb. f.180r 170 ܠܐܲܝܢܵܐ ܐܲܬܼܪܵܐ ܥܵܐ̇ܠܝܼܢ ܣܵܗ̈ܕܹܿܐ ܕܫܵܛܘ̣ ܚܲܝܲܝ̈ܗܘܿܢ ܀ 171 :ܡܫܝܼܚܵܐ ܒܲܠܚܘܿܕܼ ܣܵܦܹ̇ܩ ܗ̄ܘ̣ ܠܹܗ ܠܗܵܢ ܦܘܼܪܥܵܢܵܐ 172 ܘܗܘ̤ ܦܵܪܲܥ ܒܗܘܿܢ ܠܣܵܗ̈ܕܹܿܐ ܟܠܝܼܠܹ̈ܐ ܕܚܘܼ ܡܗܵܢܲܝ̈ܗܘܿܢ ܀ 173 :ܠܗܵܠܹܝܢ ܟܹܐܢܹ̈ܐ ܡܲܢ̣ܘܼ ܣܵܦܹ̇ܩ ܠܲܡܩܲܠܵܣܘܼ 174 ܐܸܠܵܐ ܐܸܢ ܗܵܘ̇ ܡ̇ܪܵܐ ܛܵܒܼܵܐ ܕܡܝܼܬܼܘ ܥܲܠ ܐܲܦܵܘ̈ܗܝ ܀ 175 :ܗܵܐ ܡ̇ܘܬܲܝ̈ܗܘܿܢ ܛܵܒܼ ܡ̣ܢ ܚܲܝܹ̈ܐ ܒܟܼܠܕܿܘܼܟ ܢܵܨܚ̇ܝܼܢ 176 ܘܲܒܼܟܼܠ ܦܸܢ̈ܝܵܢ ܗܵܐ ܡܸܬܼܪܲܡܪܝܼܢ ܥܲܕܼܥܹܕܲܝܗ̈ܘܿܢ ܀ 177 :ܗܵܐ ܡ̣ܢ ܟܠܕܲܘܼܟ ܪܵܗ̇ܛܝܼܢ ܐ̄ܢܵܫܵܐ ܠܝܘܿܡ ܥܹܐܕܲܝ̈ܗܘܿܢ 178 ܘܟܼܠܝܘܿܡ ܢܵܨܚ̇ܝܼܢ ܕܘܼܟܼܪ̈ܵܢܲܝܗܘܿܢ ܒܐܲܪܒܲܥ ܦܸܢ̈ܝܵܢ ܀ 179 :ܠܵܐ ܡܨܹܝܢ ܫܘܼܪܹ̈ܐ ܕܢܸܛܪܘܼܢ ܗܵܟܲܢ ܠܲܡܕܼܝܼܢ̈ܢܵܬܼܵܐ 180 ܐܲܟܼܛ̇ܪܵܐ ܨܠܘܿܬܼܵܐ ܕܣܵܗ̈ܕܹܿܐ ܠܥܵܠܡܵܐ ܟܠܹܗ ܀ 181 :ܠܵܐ ܐܝܼܬܼ ܡܲܠܟܵܐ ܕܡܸܫܟܲܚ ܗܵܡܲܢ ܠܲܡܥܲܕܵܪܘܼ 182 ܐܲܝܟ ܡ̇ܐ ܕܡܲܨܝܵܐ ܨܠܘܿܬܼܵܐ ܕܣܵܗ̈ܕܹܿܐ ܕܲܬܼܥܲܕܲܪ ܠܲܢ ܀ 183 :ܠܲܝܬܿ ܫܲܠܝܼܛܵܐ ܕܦܵܪܹܩ ܠܐܲܝܢܵܐ ܕܡܸܬܼܓܵܘܲܣ ܒܹܗ 184 ܐܲܝܟ ܡ̇ܐ ܕܲܡܹܝܢ ܣܵܗ̈ܕܹܿܐ ܠܡܸܦܪܲܩ ܡ̣ܢ ܐܘܼܠܨܵܢܹ̈ܐ ܀ 185 :ܒܗܵܠܹܝܢ ܟܹܐܢܹ̈ܐ ܡܲܢ ܠܵܐ ܢܸܚܕܹܿܐ ܘܢܸܪܘܲܙ ܠܸܒܹܿܗ 186 ܘܡܲܢ ܠܵܐ ܢܝܲܩܲܪ ܕܘܼܟܼܪ̈ܵܢܲܝܗܘܿܢ ܘܥܲܕܼܥܹܕܲܝ̈ܗܘܿܢ ܀ 187 :ܒܗܵܠܹܝܢ ܕܲܗܘ̤ܵܘ ܐܲܝܟ ܕܵܒܼܘܿܚܹ̈ܐ ܠܲܩܢܘܿܡܲܝ̈ܗܘܿܢ 188 ܘܐܲܝܟ ܩܘܼܪ̈ܒܵܢܹܐ ܩܲܪܸܒܼܘ ܢܲܦܫܗܘܿܢ ܠܡܲܠܟܵܐ ܕܐܲܚܸܒܼܘ ܀ 189 :ܗܵܠܹܝܢ ܕܲܣܢ̣ܵܘ ܠܥܵܠܡܵܐ ܟܠܹܗ ܘܠܲܪ̈ܓܼܝܼܓܼܵܬܹܗ 190 ܘܲܪܚܸܡ̣ܘ ܚܲܫܹ̈ܐ ܘܡ̇ܘܬܵܐ ܕܲܚܠܵܦ ܝܼܫܘܿܥ ܀ 191 :ܗܵܠܹܝܢ ܕܲܟܼܦܲܪܘ ܒܛܘܿܗܡ̇ܐ ܘܥܘܼܬܼܪܵܐ ܘܲܒܼܫܠܛܵܢܵܐ 192 ܘܠܵܐ ܨܒܼܵܘ ܕܢܸܚܘܿܢ ܚܲܝܹ̈ܐ ܕܙܲܒܼܢܵܐ ܡܸܛܠ ܝܼܫܘܿܥ ܀ 193 :ܗܵܠܹܝܢ ܕܲܒܼܗܘܿܢ ܚܵܒܼ ܘܐܸܫܬܲܦܲܠ ܓܲܒܵܐ ܕܚܲܢܦܹ̈ܐ 194 ܘܲܙܟܼܵܐ ܘܲܢܨܲܚ ܝܘܼܠܦܵܢ ܝܼܫܘܿܥ ܒܹܝܬܼ ܟܵܦܘܿܪܹ̈ܐ ܀ 195 :ܗܵܠܹܝܢ ܕܲܕܼܠܵܐ ܣܵܗܕܿܘܼܬܼ ܡܸܠܹ̈ܐ ܐܲܣܗܸܕܼܘ ܒܲܠܚܘܿܕܼ 196 ܕܲܥܦܝܼܦܵܐܝܼܬܼ ܚܬܲܡ̣ܘ ܗ̄ܘ̣ܵܘ ܘܫܲܪܲܪܘ ܗܵܘ̇ ܡ̇ܐ ܕܩܲܒܸܿܠܘ ܀ 197 :ܒܡܸܠܹ̈ܐ ܐܲܣܸܕܼܘ ܥܲܠ ܝܘܼܠܦܵܢܵܐ ܕܟܼܵܪܘܿܙܘܼܬܼܵܐ 198 ܘܲܒܼܡܵܘܬܲܝ̈ܗܘܿܢ ܐܸܫܬܲܪܲܪ ܗ̣̄ܘܲܝ̈ ܐܵܦ ܡܸܠܲܝ̈ܗܘܿܢ ܀ pb. 52 199 :ܗܵܠܹܝܢ ܟܠܗܹܝܢ ܩ̣ܥܵܘ ܗ̄ܘ̣ܵܘ ܣܵܗ̈ܕܹܿܐ ܠܥܹܝܢ ܪ̈ܵܕܼܘܿܦܹܐ 200 ܕܫܲܪܝܼܪ ܗ̄ܘ̣ ܠܲܢ ܡܵܘܬܹܿܐ ܕܝܼܫܘܿܥ ܐܵܦ ܢܘܼܚܡܹܗ ܀ 201 :ܒܹܗ ܡ̇ܘܕܲܝܢܲܢ ܕܡ̣ܝܬܼ ܒܲܫܪܵܪܵܐ ܘܩܵܡ̣ ܒܲܫܪܵܪܵܐ 202 ܘܠܵܐ ܦܵܪܹܫ ܠܲܢ ܡ̇ܪܵܐ ܛܵܒܼܵܐ ܡ̣ܢ ܡ̇ܪܘܼܬܹܗ ܀ 203 :ܠܹܗ ܗܘ̣ ܚܙܲܝܢܲܢ ܕܩܵܡ̣ ܡ̣ܢ ܩܲܒܼܪܵܐ ܒܫܘܼܒܼܚܵܐ ܪܲܒܵܐ 204 ܘܠܵܐ ܡܸܬܼܚܲܠܲܦ ܒܡܵܪܵܐ ܐ̄ܚܪܹܢܵܐ ܕܫܲܪܝܼܪ ܗ̄ܘ̣ ܠܲܢ ܀ 205 :ܘܐܸܢ ܥܲܠ ܡܸܠܲܝ̈ܢ ܡܸܬܼܦܲܠܓܼܝܼܢ ܐ̄ܢܬܿܘܿܢ ܐܘܿ ܪ̈ܵܕܼܘܿܦܹܐ 206 ܥܒܼܵܕܼܵܐ ܣܵܗܕܵܐ ܠܡܸܠܲܝ̈ܢ ܐܸܢ ܨܸܒܹ̇ܝܢ ܐ̄ܢܬܿܘܿܢ ܀ 207 :ܠܵܐ ܗ̄ܘ̣ܵܐ ܒܡܸܠܹ̈ܐ ܠܚܘܿܕܼ ܡ̇ܘܕܹܿܝܢܲܢ ܒܡܵܪܘܼܬܼ ܝܼܫܥܘܿܥ 208 ܕܲܠܟܼܠ ܚܲܫܝܼ̈ܢ ܗܵܐ ܡܛܲܝܒܼܝܼܢܲܢ ܡܸܛܠ ܝܼܫܘܿܥ ܀ 209 :ܠܵܐ ܗ̄ܘ̣ܵܐ ܒܡܸܠܬܼܵܐ ܕܦܘܼܡ̇ܐ ܒܲܠܚܘܿܕܼ ܡ̇ܘܕܹܿܝܢܲܢ ܒܹܗ 210 ܕܲܒܼܝܲܕܼ ܡ̇ܘܬܵܐ ܓܵܡ̇ܪܝܼܢܲܢ ܠܹܗ ܠܚܘܼܒܲܢ ܨܹܐܕܼܵܘܗܝ ܀ 211 :ܠܵܐ ܡܨܸܐ ܣܲܝܦܵܐ ܕܢܸܦܣܘܿܩ ܚܘܼܒܲܢ ܕܲܠܘܵܬܼ ܝܼܫܘܿܥ 212 ܘܠܲܝܬܿ ܐܘܼܠܨܵܢܵܐ ܕܥܵܒܹ̇ܕܼ ܡܘܼܡ̇ܐ ܒܗܲܝܡܵܢܘܿܬܲܢ ܀ 213 :ܗܵܠܹܝܢ ܟܠܗܹܝܢ ܒܥ̣ܵܘ ܐܲܬܼܠܹܝܛܹ̈ܐ ܩܕܼܵܡ ܪ̈ܵܕܼܘܿܦܹܐ 214 ܘܠܵܐ ܙܵܥ̣ܘ ܘܐܲܫܦܸܠܘ ܡ̣ܢ ܪ̈ܵܕܼܘܿܦܹܐ ܕܙܲܕܿܝܼܩܘܼܬܼܵܐ ܀ 215 :ܒܩܵܠܵܐ ܪܵܡ̇ܐ ܐܲܙܥܸܩܘ ܣܵܗ̈ܕܹܿܐ ܩܕܼܵܡ ܕܲܝܵܢܵܐ 216 ܕܠܵܐ ܦܵܠ̇ܚܝܼܢ ܚ̄ܢܲܢ ܠܫܸܡܫܵܐ ܘܣܲܗܪܵܐ ܟܝܵܢܹ̈ܐ ܥܒܼܝܼ̈ܕܹܐ ܀ 217 :ܠܚܲܕܼ ܐܲܠܵܗܵܐ ܕܲܒܼܪܵܐ ܪܵܘܡ̇ܐ ܘܐܲܬܼܩܸܢ ܥܘܼܡܩܵܐ 218 ܠܹܗ ܦܵܠ̇ܚܝܼܢܲܢ ܘܠܹܗ ܡܩܲܪܒܼܝܼܢܲܢ ܚܵܘܒܲܬܼ ܚܘܼܒܵܐ ܀ 219 :ܠܹܗ ܚܵܫ̇ܒܿܝܼܢܲܢ ܡܵܪܵܐ ܡܪܲܝܡܵܐ ܟܠ ܡܲܡܠܸܟ 220 ܘܠܹܗ ܡܩܲܪܒܼܝܼܢܲܢ ܩܵܠܹ̈ܐ ܕܫܘܼܒܼܚܵܐ ܒܟܼܠ ܥܸܕܼܢܝܼ̈ܢ ܀ 221 :ܠܡܵܪܵܐ ܕܪܵܘܡ̇ܐ ܕܲܢܚܸܬܼ ܠܐܲܪܥܵܐ ܕܢܲܚܸܐ ܠܬܹܒܹܝܠ 222 ܒܹܗ ܡ̇ܘܕܹܿܝܢܲܢ ܕܠܵܐ ܦܘܼܠܵܓܼܵܐ ܐܲܝܟ ܡ̇ܐ ܕܲܟܼܬܼܝܼܒܼ ܀ 223 :ܠܗܵܘ̇ ܦܵܪܘܿܩܵܐ ܕܲܢܚܸܬܼ ܘܲܦܪܲܩ ܓܸܢܣܹܗ ܕܐܵܕܼܵܡ 224 ܠܹܗ ܙܵܡ̇ܪܝܼܢܲܢ ܩܵܠܹ̈ܐ ܕܫܘܼܒܼܚܵܐ ܠܹܠܲܝ ܐܝܼܡܵܡ ܀ 225 ܠܗܵܘ̇ ܦܵܪܘܿܩܵܐ ܕܡܝܼܬܼ ܥܲܠ ܐܲܦܲܝ̈ܢ ܕܢܲܚܹܝܢ ܥܲܡܹܗ: pb. f.180v 226 ܠܹܗ ܣܵܓܼܕܿܝܼܢܲܢ ܘܠܹܗ ܕܵܒܼܚܝܼܢܲܢ ܕܸܒܼܚܹ̈ܐ ܕܦܲܓܼܪ̈ܲܝܢ ܀ 227 :ܟܠ ܠܲܡ ܐܲܝܢܵܐ ܕܡܸܠܲܬܼܝ ܢܵܟܲܪ ܘܡܲܚܸܒܼ ܚܲܝܘ̈ܗܝ 228 ܙܩܝܼܦܹܗ ܢܸܛܥܲܢ ܘܢܹܐܬܸܐ ܒܵܬܲܪܝ ܘܲܥܡܝ ܢܸܬܼܒܲܣܲܡ ܀ 229 :ܠܡܲܠ̈ܟܹܿܐ ܛܪ݁ܘܼܢܹܐ ܐܲܒܼܗܬܼܘ ܐܸܢܘܿܢ ܒܦܵܬܼܓܼܵܡܲܝ̈ܗܘܿܢ 230 ܘܲܩܥ̣ܵܘ ܥܲܡܗܘܿܢ ܕܠܵܐ ܣܵܓܼ̇ܕܲܝܢܲܢ ܠܟܼܠ ܒܸܪ̈ܝܵܬܼܵܐ ܀ 231 :ܢܹܐܬܸܐ ܣܲܝܦܵܐ ܘܬܹܐܬܸܐ ܢܘܼܪܵܐ ܘܕܸܠܩܵܗ̇ ܥܲܡܵܗ̇ 232 ܘܢܸܚܙܸܐ ܐܸܢ ܗܘ̤ ܕܲܡܨܹܝܢ ܦܵܪܫܝܼܢ ܚܘܼܒܹܿܗ ܡܸܢܲܢ ܀ 233 :ܥܕܲܡ̇ܐ ܠܗܵܫܵܐ ܒܡܸܠܹ̈ܐ ܐܲܣܗܸܕܢ ܥܲܠ ܗܵܘ̇ ܕܐܲܚܸܒܼܢ 234 ܡ̣ܢ ܗܵܫܵܐ ܕܹܝܢ ܥܒܼܵܕܼܵܐ ܢܗܘܸܐ ܣܵܗܕܵܐ ܠܡܸܠܲܝ̈ܢ ܀ 235 ܠܣܵܗܕܲܘܼܬܼ ܡܸܠܹ̈ܐ ܟܒܲܪ ܐܝܼܬܼ ܐܲܢܼܪܵܐ ܠܲܡܕܲܓܵܠܘܼ: pb. 53 236 ܠܲܥܒܼܵܕܼܵܐ ܕܹܝܢ ܡܲܢ̣ܘܼ ܡܸܫܟܲܚ ܠܲܡܒܲܛܵܠܘܼ ܀ 237 :ܥܒܼܵܕܼܵܐ ܡ̇ܕܝܹܢ ܐܝܼܬܼܵܘܗܝ ܣܵܗܕܵܐ ܕܠܵܐ ܡܸܬܿܕܲܓܲܠ 238 ܗܘ̤ ܐܵܦ ܗܵܫܵܐ ܢܹܐܬܸܐ ܢܲܣܗܸܕܼ ܡܸܛܠ ܝܼܫܘܿܥ ܀ 239 :ܠܟܼܠ ܐܘܼ ܠܨܵܢܝܼ̈ܢ ܗܵܐ ܥܵܐ̇ܠܝܼܢܲܢ ܡܸܛܠܵܬܹܗ 240 ܘܲܠܟܼܠ ܢܸܓܼ̈ܕܿܝܼܢ ܗܵܐ ܡܛܲܝܒܼܝܼܢܲܢ ܡܸܛܠ ܚܘܼܒܹܿܗ ܀ 241 :ܘܐܸܢ ܐܸܡܪܝܼܬܿܘܿܢ ܕܣܵܗܕܿܘܼܬܼ ܡܼܠܹ̈ܐ ܠܵܐ ܡܩܲܒܿܠܝܼܢ ܐ̄ܢܬܿܘܿܢ 242 ܗܵܐ ܣܵܗܕܿܘܼܬܵܪܐ ܕܲܒܼܣܘܼܥܪ̈ܵܢܹܐ ܩܲܒܸܿܠܘ ܡ̇ܕܹܝܢ ܀ 243 :ܦܲܓܼܪܲܢ ܣܵܗܹ̇ܕܼ ܘܐܵܦ ܗܲܕܿܡܲܝ̈ܢ ܟܲܕܼ ܡܸܬܼܦܲܣܩܝܼܢ 244 ܕܫܲܪܝܼܪ ܝܼܫܘܿܥ ܕܡܸܛܠܵܬܹܗ ܡܸܬܿܛܲܠܩܝܼܢܲܢ ܀ 245 :ܣܲܝܒܲܪܘ ܣܵܗ̈ܕܹܿܐ ܡ̇ܘܬܵܐ ܕܙܲܒܼܢܵܐ ܒܣܲܒܼܪܵܐ ܕܚܲܝܹ̈ܐ 246 ܘܠܵܐ ܡܸܬܼܬܼܒܲܟܠܝܼܢ ܕܘܼܟܼܪ̈ܵܢܲܝܗܘܿܢ ܥܕܲܡ̇ܐ ܠܥܵܠܲܡ ܀ 247 :ܥܛܹܐ ܗ̄ܘ̣ ܕܘܼܟܼܪܵܢܵܐ ܕܪ̈ܵܕܘܿܦܲܝܗܘܿܢ ܘܕܼܝܼܠܗܘܿܢ ܩܲܝܵܡ 248 ܕܚܲܕܼ ܗ̄ܘ̣ ܝܼܫܘܿܥ ܕܡܸܛܠܵܬܹܗ ܝܲܗ̣̄ܒܼܘ ܦܲܓܼܪ̈ܲܝܗܘܿܢ ܀ 249 :ܡܲܠ̈ܟܹܿܐ ܚܲܢܦܹ̈ܐ ܕܫܲܢܸܩܘ ܐܸܢܘܿܢ ܗܵܐ ܐܸܬܼܒܲܛܲܠܘ 250 ܘܟܹܐܢܹ̈ܐ ܕܣܲܝܒܲܪܘ ܟܠ ܫܘܼܢܵܩܝܼ̈ܢ ܗܵܐ ܡܸܬܼܢܲܨܚܝܼܢ ܀ 251 :ܕܡܲܠ̈ܟܹܿܐ ܡܫܲܡܗܹ̈ܐ ܠܵܐ ܐܝܼܬܼ ܒܐܲܪܥܵܐ ܕܘܼܟܼܪ̈ܵܢܲܝܗܘܿܢ 252 ܘܐ̄̇ܢܵܫܵܐ ܒܨܝܼܪܹ̈ܐ ܗܵܐ ܡܸܬܼܪܲܡܪܡܝܼܢ ܥܲܕܼܥܹܕܿܝ̈ܗܘܿܢ ܀ 253 :ܒܗܵܕܹܐ ܠܲܝܬܿ ܠܹܗ ܐܵܦ ܫܘܼܡܵܗܵܐ ܠܓܸܢܣܵܐ ܕܐ̄ܢܵܫܵܐ 254 ܕܟܲܕܼ ܐ̄ܢܵܫܵܐ ܗ̄ܘ̣ܵܘ ܐܲܣܠܝܼܘ ܚܲܝܹ̈ܐ ܕܲܒܼܢܲܝ̈ܢܵܫܵܐ ܀ 255 :ܓܸܢܣܵܐ ܡܚܝܼܠܵܐ ܕܲܒܼܢܲܝ̈ܢܵܫܵܐ ܪܵܚܹ̇ܡ ܚܲܝܹ̈ܐ ܗ̄ܘ̣ 256 ܘܠܲܝܬܿ ܒܹܗ ܚܲܝܠܵܐ ܠܲܡܙܲܥܲܙܵܝܘܼ ܠܘܼܩܒܲܠ ܚܲܫܹ̈ܐ ܀ 257 :ܥܲܦܪܵܐ ܗ̄ܘ̣ ܦܲܓܼܪܲܢ ܘܡ̣ܢ ܐܲܝܟܵܐ ܠܹܗ ܕܲܝܠܵܐ ܒܥܲܦܪܵܐ 258 ܕܒܲܪ ܕܲܚܝܼܚܵܐ ܗ̄ܘ̣ ܘܠܵܐ ܐܝܼܬܼ ܡܸܕܲܡ ܪܲܡܚܝܼܠ ܡܢܹܗ ܀ 259 :ܗܵܢܵܐ ܓܸܢܣܵܐ ܥܲܦܪܵܢܵܝܵܐ ܕܵܘܹܐ ܡ̣ܢ ܟܠ 260 ܕܡܸܢܹܗ ܐܸܢܘܿܢ ܣܵܗ̈ܕܹܿܐ ܕܐܲܩܠܝܼܘ ܥܲܠ ܟܠ ܡ̇ܘܬܿܝܼ̈ܢ ܀ 261 :ܝܲܗ̣̄ܒܼܘ ܨܵܘܪ̈ܲܝܗܘܿܢ ܠܩܸܛܠܵܐ ܕܣܲܝܦܵܐ ܡܸܛܠ ܝܼܫܘܿܥ 262 ܕܡܸܢܹܗ ܕܡ̇ܪܗܘܿܢ ܢܩܲܠܒܿܘܼܢ ܐܲܓܼܪܵܐ ܚܠܵܦ ܥܲܡܠܲܝ̈ܗܘܿܢ ܀ 263 :ܡܦܣܝܼܢ ܐܸܢܘܿܢ ܕܠܵܐ ܡܸܬܿܛܲܠܡܝܼܢ ܡ̣ܢ ܒܵܪܘܿܝܵܐ 264 ܘܫܲܪܝܼܪܵܐ ܠܗܘܿܢ ܕܐܲܓܼܪܵܐ ܕܥܲܡܠܹ̈ܐ ܡܩܲܒܿܠܝܼܢ ܡܸܢܹܗ ܀ 265 :ܥܲܠ ܗܵܘ̇ ܣܲܒܼܪܵܐ ܕܚܲܝܹ̈ܐ ܚܲܕܼܬܹ̈ܐ ܣܒܲܠܘ̣ ܟܠ ܒܝܼ̈ܫܵܢ 266 ܕܢܸܥܠܘܼܢ ܢܸܫܪܘܿܢ ܒܲܠܡܹܐܝܢ ܢܘܼܗܪܵܐ ܒܐܲܢܼܪܵܐ ܕܲܠܥܸܠ ܀ 267 :ܥܲܠ ܬܘܼܟܼܠܵܢܵܐ ܕܡܲܠܟܿܘܼܬܼ ܪܵܘܡ̇ܐ ܝܲܗ̣̄ܒܼܘ ܨܵܘܪ̈ܲܝܗܘܿܢ 268 ܕܲܒܼܝܘܿܡ ܕܝܼܢܵܐ ܢܩܲܒܿܠܘܼܢ ܡܸܢܹܗ ܟܠܝܼܠ ܙܵܟܼܘܼܬܼܵܐ ܀ 269 ܚܠܵܦ ܬܵܘܕܿܝܼܬܼܵܐ ܕܲܒܼܦܘܼܪܩܵܢܲܢ ܝܲܗ̣̄ܒܼܘ ܦܲܓܼܪ̈ܲܝܗܘܿܢ: pb. 54 270 ܗܵܐ ܡܣܲܟܹܿܝܢ ܠܹܗ ܠܝܘܿܡ ܓܸܠܝܵܢܹܗ ܕܢܸܣܒܼܘܼܢ ܐܲܓܼܪܵܐ ܀ 271 :ܠܗܵܝ̇ ܐܘܿ ܪܸܫܠܸܡ ܒܥ̣ܵܘ ܗ̄ܘ̣ܵܘ ܕܢܹܐܪܬܿܘܼܢ ܕܐܝܼܬܼ ܒܲܡܪ̈ܵܘܡܹܐ 272 ܘܥܲܠ ܗܵܝ̇ ܒܲܣܲܪܘ ܥܲܠ ܒܘܼܣܵܡܹ̈ܐ ܕܥܘܼܡܪܵܐ ܕܲܠܬܿܚܬܿ ܀ 273 :ܒܗܵܘ̇ ܒܘܼܣܵܡܵܐ ܪܘܼܚܵܢܵܝܵܐ ܣܘܹܝܢ ܕܢܸܬܼܒܲܣܡܘܼܢ 274 ܘܡܸܛܠܗܵܕܹܐ ܟܦܲܪ̣ܘ ܒܲܦܬܿܟܼܪܹ̈ܐ ܘܐܵܘܕܿܝܼܘ ܒܲܒܼܪܵܐ ܀ 275 :ܒܗܵܘ̇ ܕܘܼܒܵܪܵܐ ܕܒܹܝܬܼ ܡܲܠܟܿܘܼܬܼܵܐ ܪܓܼܝܼܓܼܝܼܢ ܕܢܸܗܘܘܿܢ 276 ܘܥܲܠ ܗܵܝ̇ ܐܲܣܠܝܼܘ ܕܲܗܒܼܵܐ ܘܟܸܣܦܵܐ ܘܢܸܩܦܵܐ ܣܲܢܝܵܐ ܀ 277 :ܥܲܡܗܘܿܢ ܕܥܝܼܪܹ̈ܐ ܪܓܼܝܼܓܼܝܼܢ ܠܡܸܩܥܵܐ ܩܲܕܿܝܼܫ ܩܲܕܼܝܼܫ 278 ܘܡܸܛܠܗܵܕܹܐ ܐܲܚܸܒܼܘ ܘܲܪܚܸܡ̣ܘ ܠܥܘܼܡܪܵܐ ܕܲܠܥܸܠ ܀ 279 :ܡ̣ܢ ܦܵܬܼܘܿܪܵܐ ܕܲܡܠܸܐ ܚܲܝܹ̈ܐ ܪܓܼܝܼܓܼܝܼܢ ܠܡܸܠܥܲܣ 280 ܘܡܸܛܠܗܵܕܹܐ ܗܢ̣ܵܘ ܦܘܼܪ̈ܦܵܥܹܐ ܐܲܪ̈ܗܵܢܵܝܹܐ ܀ 281 ܡ̣ܢ ܗܵܘ̇ ܟܵܣܵܐ ܪܘܼܚܵܢܵܝܵܐ ܪܓܼܝܼܓܼܝܼܢ ܠܡܸܫܬܵܐ: pb. f.181r 282 ܘܥܲܠ ܗܵܝ̇ ܐܲܪܦܝܼܘ ܡܲܫܬܿܝܵܐ ܕܚܲܡܪܵܐ ܐܲܪܥܵܢܵܝܵܐ ܀ 283 :ܟܠܝܼ̈ܠܹܐ ܕܫܘܼܒܼܚܵܐ ܪܓܼܝܼܓܼܝܼܢ ܣܵܗ̈ܕܹܿܐ ܠܲܡܩܲܒܵܠܘܼ 284 ܘܥܲܠ ܗܵ̇ ܐܲܪܦܝܼܘ ܫܘܼܒܼܚܵܐ ܕܐܲܪܥܵܐ ܡܸܬܼܚܲܒܿܠܒܵܢܵܐ ܀ 285 :ܥܲܡܹܗ ܕܚܲܬܼܢܵܐ ܪܓܼܝܼܓܼܝܼܢ ܣܵܗ̈ܕܹܿܐ ܠܡܸܬܼܒܲܣܵܡܘܼ 286 ܥܲܠ ܗܵܝ̇ ܐܲܣܠܝܼܘ ܟܠ ܫܘܼܣܵܡܝܼ̈ܢ ܕܥܘܼܡܪܵܐ ܗܵܢܵܐ ܀ 287 :ܐܝܼܬܼ ܕܲܒܼܣܲܝܦܵܐ ܐܲܫܠܸܡ ܚܲܝܵܘ̈ܗܝ ܒܝܲܕܼ ܪ̈ܵܕܼܘܿܦܹܐ 288 ܘܲܥܬܼܝܼܕܼ ܕܢܸܣܲܒܼ ܠܘܸܝܼܠܵܐ ܕܫܘܼܒܼܚܵܐ ܠܵܐ ܡܸܬܼܚܲܒܲܠ ܀ 289 :ܐܝܼܬܼ ܕܐܸܬܼܦܲܣܲܩ ܗܲܕܵܡ ܗܲܕܵܡ ܡ̣ܢ ܪ̈ܵܕܼܘܿܦܹܐ 290 ܘܗܵܢܵ̇ܘ ܬܲܗܪܵܐ ܕܦܸܠܚܓܹܿܗ ܚܲܝ ܗ̄ܘ̣ܵܐ ܘܦܸܠܓܹܿܗ ܡܲܚܝܼܬܼ ܀ 291 :ܐܝܼܬܼ ܕܲܒܼܫܸܢ̈ܕܹܿܐ ܘܐܝܼܬܼ ܕܒܲܣܪ̈ܵܩܹܐ ܫܲܠܸܡ ܚܲܝܵܘ̈ܗܝ ܘܐܝܼܬܼ 292 ܕܒܲܚܒܼܘܼܫܝܵܐ ܘܐܝܼܬܼ ܕܒܼܐܘܼ ܠܨܵܢܹ̈ܐ ܘܐܝܼܬܼ ܕܲܒܼܫܸܢ̈ܕܹܿܐ ܀ 293 :ܐܹܝܘ ܠܐܲܬܼܠܹܝܛܹ̈ܐ ܕܙܲܕܿܝܼܩܘܼܬܼܵܐ ܕܲܢܨܲܚ̣ܘ ܘܲܙܟܼܵܘ 294 ܐܹܝܘ ܠܙܲܟܵܝܹ̈ܐ ܕܲܙܟܼܵܘ ܘܙܲܟܿܝܼܘ ܠܓܸܢܣܹܗ ܕܐܵܕܼܵܡ ܀ 295 :ܐܹܝܘ ܠܲܙܡܝܼܢܹ̈ܐ ܕܚܲܬܼܢܵܐ ܕܪܵܘܡ̇ܐ ܕܠܵܐ ܡܸܬܼܚܲܒܲܠ 296 ܕܐܲܫܠܸܡܘ ܢܲܦܫܗܘܿܢ ܠܟܼܠ ܐܘܼܠܨܵܢܝܼ̈ܢ ܘܲܠܟܼܠ ܢܸܓܼܕܿܝܼ̈ܢ ܀ 297 :ܐܹܝܘ ܠܙܲܠܝܼܩܹ̈ܐ ܕܫܸܡܫܵܐ ܪܲܒܵܐ ܕܙܲܕܿܝܼܩܘܼܬܼܵܐ 298 ܕܠܵܐ ܐܸܬܿܛܲܠܲܩܘ ܒܚܸܫܘܿܟܼܘܼܬܹܗ ܕܚܸܫܟܵܐ ܣܲܢܝܵܐ ܀ 299 :ܐܹܝܘ ܠܠܲܡܦܹܝܕܹ̈ܐ ܕܙܲܕܿܝܼܩܘܼܬܼܵܐ ܕܝܲܗ̣̄ܒܼܘ ܢܘܼܗܪܗܘܿܢ 300 ܕܲܢܗ݂ܲܪ ܒܐܲܪܥܵܐ ܘܲܩܦܲܠ̣ ܚܸܫܟܵܐ ܢܲܚܬܵܐ ܕܛܘܼܥܝܲܝ ܀ 301 :ܐܹܝܘ ܠܲܚܠܝܼܨܹ̈ܐ ܕܠܵܐ ܐܸܬܼܪܲܦܝܼܘ ܒܐܘܼܠܨܵܢܲܝ̈ܗܘܿܢ 302 ܕܲܙܟܼܵܘ ܐܸܢܘܿܢ ܠܚܹܐܪܹ̈ܐ ܘܡܲܠ̈ܟܹܿܐ ܘܫܲܠܝܼܛܢܹ̈ܐ ܀ 303 :ܐܹܝܘ ܠܲܢܙܝܼܪܹ̈ܐ ܕܩܵܡ̣ܘ ܒܐܵܓܼܢܵܐ ܠܘܼܩܒܲܠ ܒܝܼܫܵܐ 304 ܘܲܙܟܼܵܘ ܐܼܢܹܝܢ ܠܟܼܠܗܹܝܢ ܓܘܼܕܹ̈ܐ ܕܲܒܼܢܲܝ̈ ܚܸܫܟܵܐ ܀ 305 ܐܹܝܘ ܠܹܗ ܠܓܸܢܣܵܐ ܐܵܕܼܵܡ̇ܝܵܐ ܟܡܵܐ ܐܸܬܼܪܲܡܪܲܡ: pb. 55 306 ܕܲܗܘ̤ܵܐ ܡ̇ܪܵܐ ܥܲܠ ܡ̇ܐ ܕܪܵܘܡ̇ܐ ܘܥܲܠ ܡ̇ܐ ܕܥܘܼܡܩܵܐ ܀ 307 :ܐܲܝܠܸܠܘ ܘܲܩܥܵܘ̣ ܫܸܐܕܹ̈ܐ ܛܪ̈ܘܸܢܹܐ ܒܩܵܠ ܝܼܠܲܬܵܐ 308 ܕܘܵܝ ܠܲܢ ܕܲܒܼܛܸܠ ܬܵܓܼܵܐ ܪܲܒܵܐ ܕܪܹܫܵܢܘܼܬܲܢ ܀ 309 :ܒܸܛܠܲܬ̤ ܡܸܟܹܿܝܠ ܪܹܫܢܘܼܬܼܵܐ ܕܲܡܕܲܒܿܪ̈ܵܢܲܝܢ 310 ܘܠܲܝܬܿ ܠܲܢ ܡܸܟܹܿܝܠ ܡܲܦܬܲܚ ܦܘܼܡ̇ܐ ܥܲܠ ܡ̇ܐ ܕܲܗܘ̤ܵܐ ܀ 311 :ܒܛܸܠ ܠܹܗ ܡܸܟܹܿܝܠ ܝܘܼܠܦܵܢ ܡܸܠܲܝ̈ܢ ܡ̣ܢ ܬܲܠܡܝܼܕܲܝ̈ܢ 312 ܘܗܵܐ ܐܸܬܿܬܿܠܡܲܕܼ ܟܠܹܗ ܥܵܠܡܵܐ ܠܲܫܡܹܗ ܕܝܼܫܘܿܥ ܀ 313 :ܐܸܬܼܡܲܠܝܲܬ̤ ܠܵܗ̇ ܟܠܵܗ̇ ܒܪܝܼܬܼܵܐ ܡܸܠܲܝ̈ ܪܘܼܚܵܐ 314 ܘܟܼܠܢܵܫ ܪܵܗܹ̇ܛ ܕܢܸܬܼܓܵܘܲܣ ܒܹܗ ܒܲܓܼܠܝܼܠܵܝܵܐ ܀ 315 :ܗܵܐ ܐܸܬܿܬܿܠܡܲܕܼ ܟܠܹܗ ܥܵܠܡܵܐ ܠܲܫܡܹܗ ܕܝܼܫܘܿܥ 316 ܘܐܵܦ ܬܲܡܝܼܕܹ̈ܐ ܕܝܘܼܠܦܵܢ ܡܸܠܲܝ̈ܢ ܐܸܬܼܓܵܘܲܣܘ ܒܹܗ ܀ 317 :ܒܗܵܠܹܝܢ ܟܹܐܢܹ̈ܐ ܢܸܚܕܹܿܐ ܘܢܸܪܘܲܙ ܟܠܹܗ ܓܸܢܣܲܢ 318 ܘܲܡܚܝܼܠܘܼܬܼܵܐ ܕܟܼܠܹܗ ܦܲܓܼܪܲܢ ܒܗܘܿܢ ܬܸܬܼܚܲܝܲܠ ܀ 319 :ܬܵܘܕܿܝܼ ܠܡܵܪܵܐ ܕܢܲܨܲܚ ܥܲܒܼܕܵܘ̈ܗܝ ܒܐܵܓܼܘܿܢ ܥܲܡܠܹ̈ܐ 320 ܠܹܗ ܬܸܫܒܿܘܿܚܬܵܐ ܠܗܘܿܢ ܩܘܼܠܵܣܵܐ ܡ̣ܢ ܟܠ ܦܘܼܡܝܼ̈ܢ ܀