Letter from Mar Papa to the citizens of Nisibis

ܩܕܝܫܐ ܥܡ ܪ̈ܿܥܝܐ. ܘܡܠܦ̈ܢܐ ܘܟܗ̈ܢܐ ܘܟܠ ܡܘܫܚ̈ܢ ܇ ܕܡܗܝ̈ܡܢܐ ܘܡܗܝܡ̈ܢܬܐ ܥܡ ܝܠܘܕ̈ܐ ܘܓܕܘ̈ܕܐ ܘܒܬܘ̈ܠܬܐ. ܦܦܐ ܚܠܫܐ ܪܫ ܐܦܝܣܩ̈ܘܦܐ ܕܡܕܢܚܐ : ܒܝܫܘܥ ܡܫܝܚܐ ܡܢܛܪܢܐ1 ܕܥܕܬܗ ܣܿܓܝ ܫܠܼܡ. ܚܒܝ̈ܒܝ ܆ ܠܘ ܠܒܢܝ̈ܢܫܐ ܦܸܠܚܬܼ ܡܼܢ ܛܠܝܘܬܝ : ܕܡܼܢ ܒܢܝ̈ܢܫܐ ܐܩܲܒܠ ܐܲܓܪܐ2 ܒܝܕ ܩܘܠܣ̈ܐ ܕܒܡܠܬܐ ܘܒܟܬܝ̈ܒܬܐ ܇ ܘܠܘ ܐܝܟ ܪܒܘܬܗ3 ܕܕܪܓܐ ܕܿܠܗ ܐܼܬܩܿܪܝܬܼ ܗܟܢܐ ܐܝܬܝ. ܐܠܐ ܒܟܠܗܝܢ ܝܬܝܪ ܡܼܢ ܟܠܢܵܫ ܒܨܝܪ ܐ̄ܢܐ. ܘܗܫܐ ܙܒܢܐ ܗܸ̄ܘ ܠܝ ܕܐܹܡܪ ܐܝܟ ܐܠܝܐ ܢܒܝܐ ܆ ܕܣܲܒ ܢܦܫܝ ܡܸܢܝ. ܡܛܠ ܕܠܐ ܗܘܿܝܬܼ ܛܒ ܐ̄ܢܐ ܡܼܢ ܐܒܗܝ̈. ܐܢ ܐܠܝܐ ܒܟܠܗܝܢ ܓܒܪ̈ܘܵܬܗ ܐܡܼܪ܆ ܕܠܐ ܛܒ ܐܝܟ ܐܒܗܘ̈ܗܝ ܆ ܐܢܐ ܕܠܐ ܣܦܩܿܬܼ ܠܡܬܡܲܛܝܘ ܠܡܘ̈ܫܚܬܐ ܙܥܘܪ̈ܝܬܐ ܕܐܒܗ̈ܝ ܆ ܐܝܟܢܐ ܥܡ pb. M3 109r ܪܒܘܬܗܘܢ ܘܓܢ̄ܒܪܘܬܗܘܢ ܡܡܲܪܐ ܐ̄ܢܐ. ܐܢ ܠܘܬ ܚܸܠܐ ܕܪ̈ܓܠܝܗܘܢ ܪܸܗܛܬܼ ܘܠܐ ܡܲܛܝܼܬܼ ܆ ܠܘܬܼ ܛܘܪܐ ܕܕܘܒܪ̈ܝܗܘܢ ܆ ܠܡܢܐ pb. M1 40v ܪܗܛ ܐ̄ܢܐ. ܝܬܝܪܐܝܬ ܒܙܒܢܐ ܗܢܐ ܕܙܩܝܼܦܝܼܢ ܡܚܫܘ̈ܠܐ.4 ܘܡܪܝܼܡܝܼܢ ܓܠ̈ܠܐ ܘܥܙܝܼܙܝܢ pb. C 15v ܟܝܡ̈ܘܢܐ ܘܩܫܸܝܢ ܩܪ̈ܒܐ ܕܥܬܝܕܝܢ ܩܠܝܠܐܝܬܼ ܠܡܐܬܐ ܥܠ ܥܕܬܗ ܕܐܠܗܐ. ܘܐܢܐ ܥܡ ܗܝܿ ܕܒܘܼܪܐ ܐ̄ܢܐ ܒܡܠܲܬܝ ܘܒܪܝܪ5 ܐ̄ܢܐ ܒܝܼܕܥܬܝ ܆ ܐܠܐ ܣܛܪ ܡܼܢ ܗܝܿ ܕܒܚ̈ܛܗܐ6 ܐܬܢܵܘܠܹܬܼ ܒܡ̈ܠܐ ܘܒܟܘܪ̈ܗܢܐ. ܘܐܲܫܦܠܬܼ ܡܼܢ ܣܘܓܐܐ ܕܢܣܝ̈ܘܢܐ ܕܥܒܼܪܘ ܥܠܝ. ܐܠܐ ܐܦ ܣܝܒܘܬܐ ܬܲܒܪܬܼܢܝ ܘܡܲܟܸܟܼܬܼܢܝ. ܝܬܝܪܐܝܬ ܚܐܦܐ ܕܢܣܝ̈ܘܢܐ ܕܥܕܘ ܥܠܝ : ܡܼܢ ܗܿܢܘܢ pb. B 114r/227 ܚܢܦ̈ܐ7 ܟܣܝ̈ܐ ܕܡܛܲܫܝܢ ܒܓܘ ܥܕܬܐ ܕܒܫܡܐ ܣܪܝܩܐ ܡܬܩܪܸܝܢ ܥܡܘ̈ܕܐ ܘܫܬܐ̈ܣܐ. ܘܗܫܐ ܗܼܢܘܢ ܐܝܬܝܗܘܢ ܣܬܘܪ̈ܐ ܘܥܩܘܪ̈ܐ. ܘܡܚܘܝܢ ܢܦܫܗܘܢ ܠܒܢܝ̈ܢܫܐ ܆ ܕܒܢܝ̈ܐ ܐܢܘܢ ܘܐܪ̈ܕܟܠܐ8. ܘܗܠܝܢ ܥܕܟܝܠ : ܪܫܐ ܐܢܘܢ ܕܚܹܒ̈ܠܐ ܕܥܬܝܕܝܢ ܕܢܐܬܘܢ9. ܠܡܿܢܐ ܡܬܒܥܹܝܢ ܠܝ ܚܝ̈ܐ. ܟܕ ܒܥܠܕܒܒ̈ܝܢ ܬܠܡܝܕܝ̈ܢ ܆ ܘܩܛܐܓܪ̈ܢܝܢ. ܘܕܝܵܢ̈ܝܢ ܒܢܝ̈ܢ. ܘܡܛܠ ܕܠܘ ܒܢܝ̈ܐ ܐܢܘܢ ܫܪܝܪ̈ܐ ܆ ܠܐ ܐܫܬܟܚ ܒܗܘܢ ܚܘܼܒܵܐ pb. A 51r ܕܠܘܬ ܐܠܗܐ. ܟܕ ܕܝܢ ܡܼܢ ܩܕܝܡ ܩܡ ܥܠܝ ܐܓܘܢܐ ܗܘܿ ܕܡܼܢ ܗܿܢܘܢ ܕܝܬܝܪ ܡܼܢ ܡܢܝܵܢܐ ܕܩܘܪ̈ܝܗܘܢ pb. E 74r 10 ܗܘܘ11 ܐܠܗܝ̈ܗܘܢ : ܘܣܓܝ̈ܐܐ ܡܼܢ ܟܪ̈ܣܛܝܢܐ ܕܬܚܒܸܘ ܟܦܪܘ12 ܒܡܫܝܚܐ. ܘܠܒܨܝܪܘܬܝ ܠܒܟܘ ܘܐܲܣܪܘ ܒܐܣܘܪ̈ܐ pb. C 16r ܩܫܝ̈ܐ. ܘܫܲܢܩܘܼܢܝ ܒܟܦܢܐ ܘܒܨܗܝܐ. ܘܒܼܢܓܕ̈ܐ ܘܒܡܚ̈ܘܬܐ. ܘܒܟܠܗܘܢ ܚܫ̈ܐ ܕܥܒܼܪܘ ܥܠܝ ܠܐ ܗܘܼܐ ܐܝܟ ܕܒܚܫܐ ܕܡܚܲ̈ܛܹܐ ܘܨܢܪ̈ܝܵܬܐ : ܕܬܚܬ ܛܦܪ̈ܐ ܕܐܝܕ̈ܝ ܘܕܪ̈ܓܠܝ ܣܡܼܘ. ܘܐܦ ܟܕ ܒܲܙܲܥܘ ܐܝܕ̈ܝ ܘܪ̈ܓܠܝ : ܘܐܿܥܸܠܘ ܡܲܬ̈ܢܸܐ ܒܒܙ̈ܥܐ ܕܓܘܫܡܝ܆ ܘܬܼܠܐܵܘܼܢܝ ܒܡܨܥܬܼ ܟܢܘܫܬܐ ܕܕܝ̈ܿܢܐ : ܘܐܫܠܚܘܢܝ ܘܦܲܪܣܝܘܢܝ ܘܐܟܪܟܘܢܝ ܒܫܘܩܵܐ ܆ ܘܡܫܝܚܐ ܥܕܪ ܠܡܚܝܠܘܬܝ. ܘܣܲܥܪܢܝ13 ܒܥܘܙܐ ܕܟܐܒܝ̈܆ ܘܐܪܘܚ ܠܝ ܒܟܢܘܫܝܐ ܕܟܘܪ̈ܗܢܝ : ܘܐܢܝܚ ܠܝ ܒܡܪܝܪܘܬܐ ܕܚܫܝ̈ܝ: ܘܒܟܠܗܝܢ ܗܠܝܢ ܠܐ ܚܸܫܿܬܼ ܐܝܟ ܕܒܟܐܒܐ ܗܢܐ ܆ pb. M3 109v ܕܗܠܝܢ ܚܢ̈ܦܐ pb. B116v/232 ܟܣܝ̈ܐ ܘܒܥܠܕܒ̈ܒܐ ܓ̈ܠܲܝܐ ܕܡܫܚܛܵܐܝܬ ܘܒܠܝܠܐܝܬ14 ܟܲܢܝܼܘ ܢܦܫܗܘܢ ܐܦܝܣܩܘ̈ܦܐ܆ ܡܢܗܘܢ ܒܟܬܝ̈ܒܬܐ ܕܦܘܩܕܢܐ ܕܗܘܿ ܕܥܼܢܕ : ܕܐܝܬܘܗܝ ܗܘܼܐ ܐܦܝܣܩܘܦܐ ܘܕܠܐ ܣܝܡ ܐܝܕܐ ܝܬܒ ܗܘܼܐ ܥܠ ܟܘܪܣܝܐ : pb. M1 41r ܘܟܲܢܼܝ ܢܦܫܗ ܐܦܝܣܩܘܦܐ܆ ܘܡܢܗܘܢ ܕܣܝܡܝܢ ܡܼܢ ܚܕ ܚܕ ܐܦܝܣܩܘܦܐ ܇ ܘܐܚܪ̈ܢܐ ܐܡܪܝܢ ܕܣܝܡܝܼܢܢ ܆ ܘܟܕ ܐܬܒܚܢܸܬܼ [ܨܒܘܬܗܘܢ ܐܫܬܟܚܘ ܕܠܐ ܣܝܡܝܢ. pb. C 16v ܘܐܚܪ̈ܢܐ ܕܐܬܬܣܝܡܘ]15 ܩܢܘܢܐܝܬ. [ܘܟܕ ܡܝܬܘ]16 ܐܦܝܣܩܘ̈ܦܐ ܕܡܕܝ̈ܢܬܐ ܡܫܡ̈ܗܬܐ ܫܲܢܝܘ ܡܼܢ ܟܘܖ̈ܣܘܬܗܘܢ ܘܗܘܘ ܓܝܪ̈ܐ ܒܫܘܬܦܘܬܐ ܛܢܦܬܐ17 ܒܙܘܘܓܐ ܪܘܚܢܝܐ. ܘܒܗܕܐ ܛܢܦܘܗܝ ܠܟܠܗ ܓܘܫܡܐ ܕܥܕܬܐ ܩܕܝܫܬܐ ܆ ܘܐܚܪ̈ܢܐ ܒܡܥܕܪ̈ܢܘܬܐ ܕܡܪ̈ܚܐ ܕܐܟܘܬܗܘܢ ܛܪܕܘ [ܟܠܗܘܢ]18 ܠܐܦܣܩܘ̈ܦܐ ܡܼܢ ܟܘܖ̈ܣܘܬܗܘܢ ܆ ܘܝܬܹܒܘ ܗܼܢܘܢ ܒܕܘܟܬܗܘܢ19. ܘܩܲܛܠܘ ܘܝܼܪܹܬܘ ܒܓܘ ܥܕܬܐ. ܘܐܚܪ̈ܢܐ ܒܣܘܥܪ̈ܢܐ ܕܢܘܟܪܝܘܬܐ ܐܬܩܛܪܓܘ܆ ܘܐܚܪ̈ܢܐ ܒܥܠܬ ܥܡܘܪ̈ܝܵܬܐ ܕܒܗܝܢ ܐܫܬܲܪܚܘ ܆ ܚܘܼܒܵܠܐ20 ܕܒܲܛܢܐ ܆ ܘܐܒܕܢܐ ܕܥܘܼ̈ܠܐ ܐܫܼܬܡܫ21 ܡܢܗܘܢ22. ܘܐܚܪ̈ܢܐ ܡܛܠ ܕܙܲܒܢܸܘ ܩܢܝ̈ܢܐ ܕܥܕ̈ܬܐ ܘܕܝܪ̈ܬܐ ܆ ܘܐܥܬܪܘ ܒܗܿ23 ܠܐܢܫ̈ܘܬܗܘܢ. ܘܐܚܪ̈ܢܐ ܕܡܚܘܝܢ24 ܢܦܫܗܘܢ ܡܣܲܪ̈ܩܹܐ ܘܢܙܝܪ̈ܐ ܆ ܐܫܬܟܚܘ ܕܚܡܪܐ25 ܒܟܠܝ̈ܠܐ ܘܒܙܡܲܪܐ ܫܬܿܝܢ ܗܘܘ ܐܝܟܐ ܕܠܐ ܘܵܠܐ. ܘܐܫܬܟܚܘ ܕܡܫܡܫܝܢ ܚܛܗܐ ܒܓܘ ܚܛܗܐ26. ܡܛܠ ܕܣܘܓܐܗܘܢ ܒܪܦܝܘܬܗܘܢ [ܣܛܵܘ ܐܟܚܕܐ]27 ܘܐܣܬܠܝܼܘ. ܟܕ ܨܒܲܝܵܢܢ ܕܟܣܝܐܝܬ ܐܝܟ ܒܢܝ̈ܐ ܢܩܢܐ ܐܢܘܢ ܒܝܕ ܡܪܬܝܢܘܬܐ pb. C17r ܕܡܢܢ. ܘܡܬܬܘܝܢܘܬܐ28 ܕܡܚܘܝܢ ܗܼܢܘܢ ܐܝܟ ܙܵܢܝܼܬܐ ܟܪܘܡܬܢܝܬܐ. ܘܝܬܝܪ ܡܢܗܿ ܩܼܢܵܘ29 ܚܘܨܦܐ. ܘܡܛܠ ܕܢܗܘܘܢ ܕܠܐ ܪܫܐ ܘܕܠܐ ܕܝܵܢܐ ܘܕܠܐ ܬܒܥܬܐ. ܘܕܠܐ ܕܹܚܠܐ ܘܩܸܢܛܐ ܢܓܡܪܘܢ ܨܒܝܢܐ ܕܪ̈ܓܝܓܬܗܘܢ ܛܢܦܬ̈ܐ ܆ ܐܸܬܲܒܪܘ ܟܠܗܘܢ ܥܡ ܚܕܕ̈ܐ. ܘܬܐܓܘܪܬܐ ܕܐܝܟ ܗܕܐ ܐܬܬܓܪܘ ܠܥܕܬܗ ܕܐܠܗܐ. ܘܗܐ ܥܒܝܕܝܢ ܒܗܹܬܬܐ ܘܬܲܗܠܠܬܐ ܘܓܼܚܟܝܢ ܘܡܡܲܝܩܝܢ ܒܢ ܚܢ̈ܦܐ ܘܝܗ̄ܘܕ̈ܝܐ ܆ pb. M3 110r ܐܟܚܕܐ ܆ ܘܗܫܐ ܕܝܠܝ ܠܐ ܬܹܪܢܘܢ. ܡܛܠ ܕܐܢܐ ܦܦܐ ܠܐ̄ܢܫ ܡܕܡ ܠܐ ܚܝܵܒܼ ܐ̄ܢܐ ܇ ܐܠܐ ܟܠܗܿ ܚܝܒܘܬܝ ܠܐܠܗܵܐ ܗܘܼ ܒܠܚܘܕ ܚܝܵܒ ܐ̄ܢܐ. ܘܕܝܿܕܥ ܕܠܝܬ ܠܝ ܕܐܦܪܘܥ pb. B 117r/233 ܠܗ ܆ ܫܒܿܩ ܠܝ ܚܘܒܬ̈ܝ ܒܪ̈ܚܡܘܗܝ. ܡܛܠ ܕܠܗ ܒܠܚܘܕܘܗܝ ܚܛܿܝܬܼ. ܘܦܩܚܐ ܗܝܼ ܕܐܬܲܬܕܝܢ ܡܼܢ ܗܘܿ ܕܠܗ ܚܝܵܒ ܐ̄ܢܐ܆ ܝܬܝܪ ܡܼܢ pb. M1 41v ܕܐܬܬܕܝܢ ܡܼܢ ܗܿܢܘܢ ܕܠܐ ܚܝܵܒ ܐ̄ܢܐ ܠܗܘܢ. ܘܗܼܢܘܢ ܚܝܵܒܝܢ ܠܝ. ܘܟܠܝܘܡ ܡܨܲܚܝܢ ܠܝ ܇ ܘܐܢ̄ܬ ܐܚܘܢ ܡܪܝ ܝܥܩܘܒ ܪܥܝܐ ܘܡܕܒܪܢܐ ܕܢܨܝܒܝܢ܆ ܕܬܒܥܼܬܿ ܡܢܢ ܟܬܝ̈ܒܬܐ ܕܒܘܝܐܐ ܇ ܐܼܬܦܩܕܬܼ ܕܐܘܕܥܟ. ܕܐܲܥܒܪ pb. C 17v ܡܢܟ ܢܝܚ̈ܐ30. ܘܛܲܝܸܒ ܐܦܝܟ̈ ܠܚܫ̈ܐ. ܘܣܝܼܡ ܢܦܫܟ ܠܐܘ̈ܠܨܢܐ. ܘܝܬܝܪ ܡܼܢ ܩܘܒܲܪܢܹܝܛܐ ܥܠ ܣܘܟܢܐ ܕܐܠܦܗ܆ ܗܘܸܝ ܥܝܼܪ ܘܢܲܛܪ ܘܫܗܿܪ ܒܨܠܘܬܐ܇ ܥܠ ܐܘܠܨ̈ܢܐ ܕܡܕܝܢ̄ܬܟ ܘܥܠ ܬܒܪܗܿ31 ܕܟܢܘܫܬܟ ܘܥܠ ܒܸܙܬܗܵ32 ܕܥܕܬܟ܆ ܘܥܠ ܦܘܪܣܲܝܵܐ ܕܒ̈ܢܼܬ ܥܲܡܟ. ܘܠܵܐ ܬܲܫܦܸܠ ܡܼܢ ܩܕܡ ܐܠܘܨܐ. ܕܐܝܟ ܢܗܪܐ ܒܡܠܐܸܐ33 ܐܬܿܐ ܥܠܝܟܘܢ. ܡܛܠ ܕܪܘܚܗ ܕܡܪܝܐ ܡܡܟܟܐ34 ܠܗ. ܐܠܐ ܐܣܘܪ ܚܨ̈ܝܟ. ܘܩܘܡ ܓܢ̄ܒܪܐܝܬ. ܘܣܘܓ ܬܘܪܥܬܗ ܕܥܲܡܟ. ܘܠܐܒܗ̈ܝܟ ܕܒܡܥܪܒܐ ܐܘܕܥ ܐܢܘܢ. ܕܪܕܘܦܝܐ ܗܢܐ ܕܒܝܬ ܐܪܝܘܣ܆ ܩܠܝܠܐܝܬ ܒܿܛܠ. ܘܒܬܪ ܙܒܢܐ ܬܘܒ ܗܘܿܐ ܪܕܘܦܝܐ ܪܒܐ ܒܡܕܝܢ̄ܬܟܘܢ. ܘܐܟܚܕܐ ܐܬܿܐ ܪܕܘܦܝܐ ܥܠ ܡܪ̈ܥܝܬܐ ܘܪ̈ܥܘܬܗܝܢ. ܘܗܘܿܐ ܥܩܘܪܝܐ ܕܥܕܬܐ ܘܣܚܘܦܝܐ ܕܡܕܒܚ̈ܐ ܘܒܸܙܚܐ ܘܨܥܪܐ ܒܟܬ̈ܒܐ ܘܒܐܪ̈ܙܐ ܩܕ̈ܝܫܐ. ܒܪܡ ܕܝܢ ܐܲܫܕ35 ܕܡܐ ܕܒܢܝ̈ܢܫܐ ܠܐ ܢܫܬܡܫ. ܘܡܐ36 ܕܗܘܿܐ ܫܸܠܝܐ ܒܥܕܬܐ ܕܡܥܪܒܐ܆ ܢܗܘܐ ܩܪܒܐ ܪܒܐ ܒܥܕܬܐ pb. C 18 r ܕܒܡܕܢܚܐ. ܘܢܗܘܐ ܐܘܠܨܢܐ ܘܪܕܘܦܝܐ ܕܠܐ ܐܬܟܬܸܒ ܘܠܐ ܐܫܬܡܗ ܐܟܘܬܗ. ܘܬܸܪܘܹܐ ܐܪܥܐ ܆ ܡܼܢ ܕܡܐ ܕܩܕܝ̈ܫܐ. ܘܢܐܟܠ̈ܢ ܚܝܘ̈ܬܐ ܘܢܼܣ̈ܒܥܢ. ܡܼܢ ܫܠܕܝ̈ܗܘܢ ܘܢܲܘܬܪ̈ܢ. pb. A 51v ܘܐܦ37 ܠܩܕ̈ܝܫܐ ܒܢܲܝܢ̈ ܚܒܝ̈ܒܐ ܥܩܒܠܗܐ ܘܡܝܼܠܝܼܣ38܆ ܡܼܢ ܩܕܡ ܕܢܹܐܬ̈ܝܢ ܟܬܝܒ̈ܬܟܘܢ. pb. M3 110v ܩܲܒܸܠܢ ܘܫܲܘܬܸܦܢ ܐܢܘܢ ܥܡܢ ܒܐܪ̈ܙܐ. ܘܝܲܗܒܢܢ ܠܗܘܢ ܫܘܠܛܢܐ ܠܡܫܡܫܘ ܒܕܪ̈ܓܗܘܢ. ܐܝܟ ܕܡܼܢ ܩܕܝܡ ܡܛܠ pb. E 74v ܕܚܬ̈ܢܐ ܐܢܘܢ ܕܕܡܐ ܠܥܕܬܐ ܩܕܝܫܬܐ. ܒܪܡ ܠܐ ܐܝܟ ܒܪܝ ܚܒܝܒܐ ܡܪܝ ܫܡܥܘܢ. ܡܬܐܲܠܨܝܢ ܒܐܓܘܢܝ̈ܗܘܢ. ܐܦܠܐ ܐܝܟ ܐܲܒܕܘܡܲܐ ܩܫܝܫܐ ܘܪܒܝܬܐ. ܘܢܗܘܐ ܢܲܓܪ ܐܘܠܨܢܐ ܒܥܕܬܐ ܕܡܕܢܚܐ܆ ܐܪܒܥܐ ܫܒܘܥ̈ܝܢ ܕܫܢ̈ܝܐ. ܘܬܠܬܐ pb. B 117v/234 ܦܛܪܝܪ̈ܟܐ ܚܕ ܒܬܪ ܚܕ ܐܝܟ ܪ̈ܒܝ ܚܝ̈ܠܘܬܐ ܒܪܝܫ ܡܫܪ̈ܝܬܗܘܢ ܢܫܬܠܡܘܢ ܠܡܘ̈ܬܐ pb. M1 42r; C 18v ܕܚ̈ܝܼܠܐ. ܘܐܢ̄ܬ ܡܠܦܢܐ ܡܪܝ ܐܦܪܝܡ ܆ ܕܐܝܟ ܢܒܝܐ ܐܫܬܲܡܵܗܬܿ ܒܥܕܬܐ ܩܕܝܫܬܐ ܆ ܘܲܒܥܵܝܬܿ ܠܢ ܡܲܦܣܢܘܬܐ ܕܟܼܠܝܵܢܟ ܒܡܟܬܒܢܘܬܐ ܕܬܫ̈ܥܝܬܐ ܕܥܠܝܢ ܬܼܥܒܸܕ ܕܐܝܬܝܢ ܡܝ̈ܬܐ ܒܚܛܗ̈ܝܢ ܆ ܠܐ39 ܐ̄ܢܬ ܘܠܐ ܐ̄ܢܫ ܐ̄ܚܪܝܢ ܢܫܬܠܛ ܠܡܥܒܕ ܥܠܝܢ ܟܬܝ̈ܒܬܐ. ܘܐܦܠܐ ܬܘܒ ܗ̈ܢܝܢ ܟܬܝܒ̈ܬܐ ܕܒܦܘܠܚܢܐ ܘܟܬܘ̈ܒܐ ܘܒܦܼܢܩ̈ܝܬܐ ܕܝܠܗܘܢ ܥܒܼܕܘ ܘܫܕܪܘ ܠܐܬܪ̈ܘܬܐ ܇ [ܠܐ ܫܠܝܛܝܢ ܡܕܒܪ̈ܢܐ ܕܐܬܪ̈ܘܬܐ]40 ܟܕ ܡܼܫܟܚܝܢ ܠܗ̈ܝܢ ܒܥܕܬܗܘܢ ܘܒܕܝܪ̈ܬܗܘܢ ܠܟܬܝܒ̈ܬܐ ܗܿܢܝ̈ܢ ܕܟܬܒܘ ܆ ܡܪ̈ܚܐ ܡܛܠ ܒܙܚܐ ܘܨܥܪܐ ܕܝܠܝ܆ ܠܐ ܢܬܸܠܚܘܢ ܘܠܐ ܢܘܩܕܘܢ ܘܠܐ ܢܸܠܚܘܢ ܐܢܝܢ̈. ܘܠܐ ܕܢܥܒܕܘܢ ܒܗܸܝܢ̈ ܬܘܪܨܐ ܡܕܡ ܐܝܟ ܕܠܒܢܝܢܐ ܕܝܠܝ. ܐܠܐ ܗܟܢܐ ܢܬܢܛܪ̈ܢ ܟܠ ܟܪ pb. C 19r ܕܐܝܬܝܗ̈ܝܢ ܆ ܥܕܡܐ ܠܚܪܬܐ ܕܝܘܡ̈ܬܐ. ܘܗܘܸ ܡܪܢ ܒܟܐܢܘܬܗ ܐܝܟ ܝܕܥܬܐ ܕܐܠܗܘܬܗ ܢܼܒܥܐ ܕܝܼܢܐ ܕܥܕܬܗ ܩܕܝܫܬܐ܆ ܒܗܘܿ ܝܘܡܐ ܪܒܐ ܕܕܝܼܢܐ. ܘܐܢ̄ܬ ܒܪܢ ܚܒܝܒܐ ܡܪܝ ܐܦܪܝܡ܆ ܐܡܼܪ ܠܒܢܬܸ ܨܘܒܐ. ܝܬܝܪܐܝܬ܆ ܠܗ̈ܢܝܢ ܕܐܝܬܝܗ̈ܝܢ ܬܪܒܝܬܐ ܕܬܘܠܡܕܢ ܆ ܕܫܒܘܩܝ ܐܒܠܐ ܘܒܝܬ ܒܟܐ̈ ܕܥܠܝ ܦܦܐ. ܘܪ̈ܢܝܝ41 ܘܐܬܚܲܫܵܒܹ̈ܝܢ ܥܠ ܗܘܿ ܒܝܬ ܒܟܐ̈ ܕܝܠܟܝܢ̈ ܘܕܡܕܝܢ̄ܬܟܹܝܢ. ܘܢܩܕ̈ܡܢ ܢܪ̈ܟܒܢ ܆ ܩܠ̈ܐ ܕܐܘ̈ܠܝܬܐ. ܘܐܢܬܬܐ ܠܚܒܪܬܗܿ܆ ܬܲܠܸܦ ܩܝܼܢܬܐ ܕܚܫܐ. ܘܢܩܕ̈ܡܢ ܢܹܐ̈ܠܦܢ ܆ ܘܢܲܠܦܢ ܠܚܕܕ̈ܐ. ܘܙܲܗܪ ܐܢܝܢ̈ ܕܣܿܥܹܪܟܹܿܝܢ ܕܢܛܝܪ ܠܓܹܙܵܐ42܆ ܠܐ ܬܪܒܝܼܢܵܝܗܝ ܒܲܚܦܘܦܐ ܘܒܡܫ̈ܚܢܐ. ܘܦܓܪ̈ܝܟܝܢ ܕܢܛܝܪܝܢ ܠܐܒܠܐ pb. M3 111r ܘܠܡܪܩܘܕܬܐ: ܘܠܡܘܬܒܐ ܕܥܠ ܐܪܥܐ ܘܠܒܵܘܬܐ ܕܥܠ ܐܹܓܲܪܹ̈ܐ. ܠܐ ܬܩܕ̈ܡܢ ܬܦܲܢܩܲܢ ܐܢܘܢ. ܘܐܦ ܐܢ̄ܬ ܆ ܦܘܩ ܒܒܥܬܐ ܕܫܟܚ̈ܬܐ. ܘܛܲܝܸܒܼ ܠܟ ܩܠܐ̈ ܡܫܚ̈ܠܦܐ ܘܢܥܡ̈ܬܐ ܕܟܠ ܙܢܝ̈ܢ ܘܐܥܝܪ ܢܦܫܟ. ܘܟܿܢܹܫ ܚܘܫܒ̈ܝܟ ܘܛܲܝܹܒ ܠܟ ܕܘܟܬܐ ܕܫܸܠܝܐ. ܘܦܘܠܚܢܐ ܘܟܬܘ̈ܒܐ pb. C 19v ܘܠܘܚܐ̈ ܣܓܝܐܬ̈ܐ ܠܨܚܚ̈ܐ. ܡܛܠ ܕܡܬܩܲܫܐ ܡܢܟ ܥܡܠܐ ܆ ܐܪܒܥܐ ܫܒܘ̈ܥܝܢ ܕܫܢܝܐ̈ ܘܬܪ̈ܬܝܢ43 ܡܢܘܬ̈ܗ ܕܫܒܘܥܐ ܕܚܡܫܐ. ܟܬܘܒ44 ܘܣܝܡ45 ܥܘܗܕܢܐ ܕܟܠܗܝܢ ܒܝܫܬܐ̈ ܕܐܬ̈ܝܢ ܥܠ ܥܠܡܐ46. ܟܦܢܐ̈ ܘܡܘܬ̈ܢܐ: ܘܩܪ̈ܒܐ ܕܥܠ ܥܕܬܐ. ܘܩܪ̈ܒܐ47 ܕܡܠܟܘ̈ܬܐ܇ ܘܚܛܘܦܝܐ ܘܒܙܬܐ pb. M1 42v ܕܚܕ pb. B 118r/235 ܡܼܢ ܚܕ. ܙܘ̈ܥܐ ܘܢܘ̈ܕܐ ܕܡܕܝܢܬܐ ܪܘܪ̈ܒܬܐ. ܓܠܝܙܘܬܐ ܕܡܛܪܐ48. ܘܩܡܨܐ ܕܐܚܿܕ ܢܘ̈ܡܐ ܫܢܝܐ̈ ܥܣܪ. ܐܢܐ ܦܦܐ ܐܝܟ ܕܐܬܦܲܩܿܕܬܼ ܪܫܡܿܬܼ ܒܐܓܪܬܐ ܗܕܐ. ܥܠ ܐܚܪ̈ܢܝܬܐ ܕܒܐܓܪܬܐ ܠܐ ܪ̈ܫܝܡܢ ܆ ܝܠܦܬܘܢ49 ܡܼܢ ܒܪܢ ܚܒܝܒܐ ܘܩܕܝܫܐ ܡܪܝ ܫܡܥܘܢ. ܕܠܗ ܐܲܦܹܣܢܲܢ ܕܢܐܚܘܕ ܡܕܒܪܢܘܬܐ ܕܦܛܪܝܪܟܘܬܐ ܡܼܢ ܒܬܪܢ. ܕܟܠ ܡܕܡ ܠܗ ܦܩܕܢܢ ܘܙܲܗܲܪܢܢ50 ܒܐܝܠܝܢ ܕܐܬܝܗܸܒ ܠܢ ܠܡܕܥ. ܐܦ ܚܢܢ ܐܘܕܥܢܢ ܠܗ ܠܡܪܝ ܫܡܥܘܢ ܒܩܪܝܒܘܬܐ ܕܡܪܝ ܐܲܒܕܘܡܵܐ51 ܩܫܝܫܐ ܘܪܒܝܬܐ. ܘܐܢܐ ܐܙܿܠ ܐ̄ܢܐ ܠܩܒܪܐ ܆ ܟܕ ܛܥܝܢ ܐ̄ܢܐ ܚܫܐ̈ ܥܠ ܚܫܝ̈܆ ܘܟܘܪ̈ܗܢܐ ܥܠ ܟܘܪ̈ܗܢܝ. ܐܝܟ ܐܒܐ ܕܚܿܙܐ ܥܩܘܪܝܐ ܘܚܘܪܒܐ52 ܕܒܝܬܗ. ܘܐܒܕܢܐ pb. C 20r ܕܒܢܘ̈ܗܝ ܘܕܒܢܬ̈ܗ ܘܕܟܠܗܿ53 ܐ̄ܢܫܘܬܗ. ܗܠܝܢ ܟܠܗܝܢ ܆ ܟܬܒܿܬܼ ܘܪ̈ܚܝܩܢ ܚܕ54 ܫܒܘܥܐ ܕܫܢܝܐ̈. ܒܪܫ ܫܒܘܥܐ ܕܬܪ̈ܝܢ55. ܢܬܬܥܝܪ̈ܢ ܚܕܐ ܒܬܪ ܚܕܐ. ܘܠܘ ܟܠܗܝܢ ܐܟܚܕܐ56 ܇ ܩܪܘ ܐܓܪܬܐ ܘܡܼܢ ܒܬܪܗܿ ܠܐ ܢܬܟܬܸܒ ܡܕܡ. ܘܐܝܢܐ ܕܡܡܪܚ ܆ ܢܗܘܐ ܢܘܟܪܝܐ ܆ ܠܗܝܿ ܝܪܬܘܬܐ ܕܡܫܝܚܐ ܇ ܛܿܝܸܒ ܠܣܓܘܕܘ̈ܗܝ ܒܡܠܟܘܬܐ ܕܫܡܝܐ. ܟܠܗܿ ܥܕܬܐ ܕܦܢܝܬܟܘܢ ܬܬܢܛܪ ܒܥܘܕܪܢܗ ܕܡܫܝܚܐ. ܘܒܨ̈ܠܘܬܐ ܕܓܿܡܪ̈ܝ ܨܒܝܢܗ57. ܡܪܢ ܥܡܢ ܘܥܡܟܘܢ. ܘܥܡ ܟܠܗܿ ܥܕܬܐ ܩܕܝܫܬܐ ܐܡܝܢ.