Aphrahat: Demonstration 7: On Penitents - ܬܚܘܝܬܐ ܕܬ̈ܝܒܐ

ܙܟܝܐ ܚܕ ܗܘ ܒܠܚܘܕ܂ ܡܢ ܟܠ‍ ܝ̈ܠܝܕܐ ܕܠܒܫܘ ܦܓܪܐ܂ ܕܐܝܬܘܗܝ ܡܪܢ ܝܫܘܥ ܡܫܝܚܐ܂ ܐܝܟ ܕܗܘ ܣܗܕ ܥܠ ܢܦܫܗ܂ ܐܡܪ ܓܝܪ ܕܐܢܐ ܙܟܝܬܗ ܠܥܠܡܐ܂ ܘܐܦ ܢܒܝܐ ܣܗܕ ܥܠܘܗܝ܂ ܕܠܐ ܥܒܕ ܥܘܠܐ܂ ܐܦܠܐ ܢܟܠܐ ܐܫܬܟܚ ܒܦܘܡܗ܂ ܘܫܠܝܚܐ ܛܘܒܢܐ ܐܡܪ܂ ܕܗܘ ܕܠܐ ܝܕܥ ܗܘܐ ܚܛܝܬܐ܂ ܡܛܠܬܢ ܚܛܝܬܐ ܥܒܕܗ܂ ܘܐܝܟܢܐ ܥܒܕܗ ܚܛܝܬܐ܂ ܐܠܐ ܡܛܠ ܕܫܩܠܗ ܠܚܛܝܬܐ܂ ܟܕ ܠܐ ܗܘܐ ܗܘ ܥܒܕܗ܂ ܘܩܒܥܗ ܒܙܩܝܦܗ܂ ܬܘܒ ܐܡܪ ܫܠܝܚܐ܂ ܕܣܓ̈ܝܐܝܢ ܕܪܗܛܝܢ ܒܐܣܛܕܝܐ܂ ܐܠܐ ܚܕ ܗܘ ܢܣܒ ܠܗ ܟܠܝܠܐ܂ ܬܘܒ ܠܝܬ ܐܚܪܢܐ ܡܢ ܒ̈ܢܝ ܐܕܡ܂ ܕܢܦܠ ܒܐܝܓܘܢܐ ܕܠܐ ܡܬܡܚܐ ܘܒܠܥ܂ ܡܛܠ ܕܐܡܠܟܬ ܚܛܝܬܐ܂ ܡܢ ܕܥܒܪ ܐܕܡ ܥܠ ܦܘܩܕܢܐ܂ ܘܡܢ ܣܓ̈ܝܐܐ ܒܠܥܐ ܗܘܬ܂ ܘܠܣܓ̈ܝܐܐ ܡܡܚܝܐ ܗܘܬ܂ ܘܠܣܓ̈ܝܐܐ ܩܛܠܬ܂ ܘܐܢܫ ܡܢ ܣ̈ܓܝܐܐ ܠܐ ܩܛܠܗ܂ ܥܕܡܐ ܕܐܬܐ ܦܪܘܩܢ܂ ܘܫܩܠܗ ܘܩܒܥܗ ܒܙܩܝܦܗ܂ ܘܐܦ ܟܕ ܒܙܩܝܦܐ ܩܒܝܥܐ܂ ܥܘܩܣܗ ܐܝܬܘܗܝ܂ ܘܠܣܓ̈ܝܐܐ ܕܒܨ܂ ܥܕ ܗܘܝܐ ܚܪܬܐ܂ ܘܡܬܬܒܪ ܠܗ ܥܘܩܣܗ܀

ܠܟܠ ܟܐܒ̈ܐ ܐܝܬ ܣܡ̈ܡܢܐ ܘܡܬܐܣܝܢ܂ ܟܕ ܐܣܝܐ ܚܟܝܡܐ ܢܫܟܚ ܐܢܘܢ܂ ܘܠܕܡܬܡܚܝܢ ܒܐܝܓܘܢܐ ܕܝܠܢ܂ ܐܝܬ ܠܗܘܢ ܣܡܐ ܬܝܒܘܬܐ܂ ܕܣܝܡܝܢ ܥܠ ܫܘܚ̈ܢܝܗܘܢ ܘܡܬ̈ܚܠܡܝܢ. ܐܘ ܐܣ̈ܘܬܐ ܬܠܡܝ̈ܕܘܗܝ ܕܐܣܝܢ ܚܟܝܡܐ܂ ܣܒܘ ܠܟܘܢ ܣܡܐ ܗܢܐ܂ ܕܒܗ ܬܚܠܡܘܢ ܡܚ̈ܘܬܐ ܕܟܪ̈ܝܗܐ܂ ܩܪ̈ܒܬܢܐ ܓܝܪ܂ ܕܒܠܥܝܢ ܒܩܪܒܐ ܡܢ ܐܝ̈ܕܝ ܗܘ ܡܢ ܕܡܬܟܬܫ ܥܡܗܘܢ܂ ܟܕ ܐܣܝܐ ܚܟܝܡܐ ܡܫܬܟܚ ܠܗܘܢ܂ ܡܬܦܪܣ ܠܗ ܠܐܣܝܘܬܗܘܢ܂ ܕܢܚܠܡ ܠܡܡ̈ܚܝܐ܂ ܘܡܐ ܕܡܚܠܡ ܠܗ ܐܣܝܐ ܠܗܘ ܕܒܠܥ ܒܩܪܒܐ܂ ܡܩܒܠ ܡܘܗ̈ܒܬܐ ܘܐܝܩܪܐ ܡܢ ܡܠܟܐ܂ ܗܟܢܐ ܚܒܝܒܝ܂ ܡܢ ܕܥܡܠ ܒܐܝܓܘܢܐ ܕܝܠܢ܂ ܘܐܬܐ ܒܥܠܕܪܗ ܥܠܘܗܝ ܘܡܚܐ ܠܗ܂ ܘܠܐ ܠܡܬܠ ܠܗ ܣܡܐ ܬܝܒܘܬܐ܂ ܟܕ ܬܘܬ ܢܦܫܐ ܕܗܘ ܡܡܚܝܐ ܬܗܘܐ ܣܓܝܐܐ܂ ܡܛܠ ܕܐܠܗܐ ܠܐ ܡܣܠܐ ܠܬܝ̈ܒܐ܂ ܐܡܪ ܓܝܪ ܚܙܩܝܐܝܠ ܢܒܝܐ܂ ܕܠܐ ܨܒܐ ܐܢܐ ܒܡܘܬܗ ܕܡܝܬܐ ܚܛܝܐ܂ ܐܠܐ ܕܢܬܘܒ ܡܢ ܐܘܪܚܗ ܒܝܫܬܐ ܘܢܚܐ܀

ܠܐ ܓܝܪ ܒܗܬ ܗܘ ܕܒܠܥ ܒܩܪܒܐ ܕܢܦܫܗ ܢܬܠ ܠܐܝ̈ܕܝ ܐܣܝܐ ܚܟܝܡܐ܂ ܡܛܠ ܕܚܣܢܗ ܩܪܒܐ ܘܒܠܥ܂ ܘܡܐ ܕܐܬܐܣܝ܂ ܠܐ ܡܣܠܐ ܠܗ ܡܠܟܐ܂ ܐܠܐ ܥܡ ܚܝܠܗ ܡܢܐ ܘܚܫܒ ܠܗ܂ ܗܟܢܐ ܠܐ ܘܠܐ ܕܢܒܗܬ ܒܪܢܫܐ ܕܣܛܢܐ ܡܚܐ ܠܗ܂ ܕܢܘܕܐ ܣܟܠܘܬܗ܂ ܘܢܥܒܪ ܡܢܗ܂ ܘܢܒܥܐ ܠܗ ܣܡܐ ܬܝܒܘܬܐ܂ ܡܢ ܓܝܪ ܕܒܗܬ ܕܢܚܘܐ ܫܘܚܢܗ܂ ܡܛܐ ܠܗ ܠܚܠܕܝܬܐ܂ ܘܠܟܠܗ ܦܓܪܗ ܡܛܐ ܢܟܝܢܐ܂ ܘܡܢ ܕܠܐ ܒܗܬ ܡܬܐܣܐ ܫܘܚܢܗ܂ ܘܬܘܒ ܗܦܟ ܠܡܦܠ ܒܐܝܓܘܢܐ܂ ܘܐܝܢܐ ܕܩܢܐ ܚܠܕܝܬܐ ܬܘܒ ܠܐ ܡܫܟܚ ܠܡܬܐܣܝܘ܂ ܘܙܝܢܐ ܕܫܠܚ ܠܐ ܠܒܫ܂ ܗܟܢܐ ܡܢ ܕܡܙܕܟܐ ܒܐܝܓܘܢܐ ܕܝܠܢ܂ ܐܝܬ ܠܗ ܗܢܐ ܦܘܪܣܐ ܕܢܬܐܣܐ܂ ܟܕ ܢܐܡܪ ܕܚܛܝܬ܂ ܘܢܒܥܐ ܬܝܒܘܬܐ܂ ܘܐܝܢܐ ܕܒܗܬ܂ ܠܐ ܡܫܟܚ ܕܢܬܐܣܐ܂ ܡܛܠ ܕܠܐ ܨܒܐ ܕܢܘܕܥ ܡܚ̈ܘܬܗ ܠܐܣܝܐ ܕܫܩܠ ܬܪ̈ܝܢ ܕܝܢܪ̈ܝܢ܂ ܕܡܢܗܘܢ ܡܐܣܐ ܠܟܠܗܘܢ ܕܡܬܡܚܝܢ܀

ܘܐܦ ܠܟܘܢ ܘܠܐ ܐܣ̈ܘܬܐ ܬܠܡ̈ܝܕܘܗܝ ܕܐܣܝܢ ܢܨܝܚܐ܂ ܕܠܐ ܬܟܠܘܢ ܐܣܝܘܬܐ܂ ܡܢ ܡܢ ܕܣܢܝܩ ܕܢܬܐܣܐ܂ ܡܢ ܕܡܚܘܐ ܠܟܘܢ ܫܘܚܢܗ܂ ܗܒܘ ܠܗ ܣܡܐ ܬܝܒܘܬܐ܂ ܘܡܢ ܕܒܗܬ ܕܢܚܘܐ ܟܐܒܗ܂ ܐܢܬܘܢ ܡܘ̈ܠܟܘܗܝ ܕܡܢܟܘܢ ܠܐ ܢܛܫܐ܂ ܘܡܐ ܕܓܠܐ ܠܟܘܢ܂ ܠܐ ܬܦܪܣܘܢܗ܂ ܕܠܐ ܡܛܠܬܗ܂ ܐܦ ܙܟ̈ܝܐ ܢܬܚܫܒܘܢ ܠܗܘܢ ܚܝ̈ܒܐ܂ ܡܢ ܣ̈ܢܐܐ ܘܒ̈ܥܠܕܒܒܐ܂ ܣܕܪܐ ܐܝܢܐ ܕܩܛ̈ܝܠܐ ܢܦܠܝܢ ܡܢܗ܂ ܫܦܠܘܬܐ ܥܠ ܟܠܗܘܢ ܡܬܚܫܒܐ ܡܢ ܒܥܠܕܒܒ̈ܝܗܘܢ܂ ܘܟܕ ܐܝܠܝܢ ܕܡܡܚܝܢ ܢܫܬܟܚܘܢ ܒܗܘܢ܂ ܗܠܝܢ ܐܝܠܝܢ ܕܠܐ ܐܬܡܚܝܘ܂ ܡܐܣܝܢ ܟܐܒ̈ܝܗܘܢ܂ ܘܠܐ ܓܠܝܢ ܥܠܝܗܘܢ ܠܒܥܠܕܒ̈ܒܝܗܘܢ܂ ܐܢ ܕܝܢ ܠܟܠܢܫ ܡܘܕܥܝܢ ܥܠܝܗܘܢ܂ ܫܩܠܐ ܠܗ ܫܡܐ ܒܝܫܐ ܟܘܠܗ ܡܫܪܝܬܐ܂ ܘܐܦ ܡܠܟܐ ܡܕܒܪܢܗ ܕܚܝܠܐ܂ ܪܓܙ ܥܠ ܗܠܝܢ ܐܝܠܝܢ ܕܡܦܪܣܝܢ ܡܫܪܝܬܗ܂ ܘܒܠܥܝܢ ܡܢܗ ܡܚ̈ܘܬܐ܂ ܕܒܝܫܢ ܡܢ ܕܗܢܘܢ ܕܒܠܥܘ ܒܩܪܒܐ܀

ܘܐܢ ܕܝܢ ܐܝܠܝܢ ܕܐܬܡܚܝܘ ܠܐ ܨܒܝܢ ܕܢܓܠܘܢ ܥܠ ܫܘ̈ܚܢܝܗܘܢ܂ ܐܣ̈ܘܬܐ ܪܫܝܢܐ ܡܕܡ ܠܐ ܚܝܒܝܢ܂ ܥܠ ܕܠܐ ܐܚܠܡܘ ܠܟܪ̈ܝܗܐ ܕܐܬܡܚܝܘ܂ ܘܐܢ ܨܒܝܢ ܐܝܠܝܢ ܕܡܡܚܝܢ ܕܢܛܫܘܢ ܟܐܒ̈ܝܗܘܢ܂ ܬܘܒ ܙܝܢܐ ܠܐ ܡܫܟܚܝܢ ܠܡܠܒܫ܂ ܡܛܠ ܕܚܠܕܝܬܐ ܩܢܘ ܒܦܓܪ̈ܝܗܘܢ܂ ܘܟܕ ܚܠܕܝܬܐ ܐܝܬ ܠܗܘܢ܂ ܘܢܡܪܚܘܢ ܠܡܠܒܫ ܙܝܢܐ܂ ܟܕ ܢܦܠܝܢ ܠܡܥܒܕ ܐܝܓܘܢܐ܂ ܙܝܢܗܘܢ ܡܚܡ ܥܠܝܗܘܢ܂ ܘܣܪܝܢ ܘܡܬܡܣܝܢ ܫܘܚ̈ܢܝܗܘܢ ܘܡܬܩܛܠܝܢ܂ ܘܡܐ ܕܡܫܟܚܝܢ ܫ̈ܠܕܝܗܘܢ܂ ܐܝܠܝܢ ܕܛܫܝܘ ܡܢܗܘܢ ܫܘ̈ܚܢܝܗܘܢ܂ ܗܝܕܝܢ ܗܘ ܓܚܟܝܢ ܥܠ ܟܘܠܗ ܦܘܪܣܝܗܘܢ܂ ܥܠ ܕܛܫܝܘ ܟܐܒ̈ܐ ܕܡܚ̈ܘܬܗܘܢ܂ ܘܐܦ ܠܐ ܫ̈ܠܕܝܗܘܢ ܝܗܒܝܢ ܠܩܒܘܪܐ܂ ܘܡܬܚܫܒܝܢ ܠܗܘܢ ܣܟ̈ܠܐ ܘܒܝ̈ܫܐ ܘܡܪ̈ܚܐ܀

ܘܐܦ ܡܢ ܕܡܚܘܐ ܫܘܚܢܗ ܘܡܬܐܣܐ܂ ܢܙܕܗܪ ܡܢ ܗܝ ܕܘܟܬܐ ܕܐܬܐܣܝܬ܂ ܕܠܐ ܢܒܠܥ ܒܗ ܕܬܪ̈ܬܝܢ ܙܒ̈ܢܝܢ܂ ܡܛܠ ܕܡܢ ܕܒܠܥ ܬܪ̈ܬܝܢ ܙܒ̈ܢܝܢ܂ ܐܦ ܠܐܣܝܐ ܚܟܝܡܐ ܩܫܝܐ ܗܝ ܐܣܝܘܬܗ܂ ܡܛܠ ܕܟܠ ܡܚܘܬܐ ܕܒܫܘܡܬܐ ܗܘܝܐ܂ ܠܐ ܡܬܐܣܝܐ܂ ܘܐܦ ܟܕ ܛܒ ܬܘܒ ܬܬܐܣܐ܂ ܙܝܢܐ ܠܐ ܡܫܟܚ ܠܡܠܒܫ܂ ܘܐܦ ܟܕ ܙܝܢܐ ܢܡܪܚ ܘܢܠܒܫ܂ ܢܣܒ ܠܗ ܥܝܕܐ ܕܚܝܒܘܬܐ܀

ܐܘ ܠܒܝ̈ܫܝ ܙܝܢܗ ܕܡܫܝܚܐ܂ ܝܠܦܘ ܫ̈ܠܠܝ ܩܪܒܐ܂ ܕܠܐ ܬܚܘܒܘܢ܂ ܘܬܗܘܘܢ ܫ̈ܦܠܐ ܒܐܝܓܘܢܐ܂ ܨܢܝܥ ܗܘ ܘܐܘܡܢ ܒܥܠܕܪܢ܂ ܐܠܐ ܙܝܢܗ ܫܦܠ ܗܘ ܡܢ ܕܝܠܢ܂ ܘܠܐ ܠܢ ܗܟܝܠ ܠܡܬܗܦܟܘ ܥܡܗ܂ ܘܠܡܫܩܠ ܙܝܢܗ܂ ܕܡܟܘܬܐ ܒܥܝܪܘܬܐ܂ ܗܘ ܓܝܪ ܠܐ ܡܬܚܙܐ ܠܢ܂ ܟܕ ܡܩܪܒ ܥܡܢ܂ ܢܬܦܢܐ ܠܘܬ ܗܘ ܡܢ ܕܚܙܐ ܠܗ ܕܢܒܛܠܝܘܗܝ ܡܢܢ܀

ܐܦ ܠܟܘܢ ܡܠܟ ܐܢܐ ܠܐܝܠܝܢ ܕܡܬܡܚܝܢ܂ ܕܠܐ ܬܒܗܬܘܢ ܬܐܡܪܘܢ ܕܐܫܦܠܢ ܒܐܝܓܘܢܐ܂ ܣܒܘ ܠܟܘܢ ܣܡܐ ܕܠܐ ܕܡܝܢ܂ ܘܬܘܒܘ ܘܚܝܘ܂ ܥܕ ܠܐ ܬܬܩܛܠܘܢ܂ ܠܟܘܢ ܕܝܢ ܡܥܗܕ ܐܢܐ ܐܣܘ̈ܬܐ܂ ܡܕܡ ܕܟܬܝܒ ܒܣܦܪ̈ܘܗܝ ܕܐܣܝܢ ܚܟܝܡܐ܂ ܕܗܘ ܠܐ ܟܠܐ ܬܝܒܘܬܐ܂ ܟܕ ܚܛܐ ܓܝܪ ܐܕܡ܂ ܩܪܐ ܠܗ ܬܝܒܘܬܐ܂ ܟܕ ܐܡܪ ܠܗ܂ ܐܝܟܐ ܐܢܬ ܐܕܡ܂ ܘܗܘ ܛܫܝ ܚܛܗܗ ܡܢ ܒܚܪ ܠܒܐ܂ ܘܐܚܕ ܥܠܬܐ ܒܚܘܐ ܕܐܛܥܝܬܗ܂ ܘܥܠ ܕܠܐ ܐܘܕܝ ܒܣܟܠܘܬܗ܂ ܓܙܪ ܥܠܘܗܝ ܡܘܬܐ܂ ܘܥܠ ܟܠܗܘܢ ܝܠܕܘ̈ܗܝ܂ ܘܐܦ ܠܩܐܝܢ ܕܡܠܐ ܗܘܐ ܢܟܠܐ܂ ܘܩܘܪܒܢܐ ܠܐ ܩܒܠ ܡܢܗ܂ ܝܗܒ ܠܗ ܬܝܒܘܬܐ ܘܠܐ ܩܒܠ܂ ܐܡܪ ܠܗ ܓܝܪ ܕܐܢ ܬܫܦܪ ܩܒܠܬ ܩܘܪܒܢܟ܂ ܘܐܠܐ ܬܫܦܪ܂ ܚܛܗܟ ܗܘ ܡܠܘܐ ܠܟ܂ ܘܩܛܠ ܠܐܚܘܗܝ ܒܢܟܠܐ ܕܠܒܗ ܘܐܬܠܝܛ܂ ܘܗܘܐ ܙܐܥ ܘܢܐܕ ܒܐܪܥܐ܂ ܐܦ ܠܕܪܐ ܕܒܝܘ̈ܡܝ ܢܘܚ܂ ܡܐܐ ܘܥܣܪܝܢ ܫ̈ܢܝܢ ܝܗܒ ܠܗܘܢ ܬܝܒܘܬܐ܂ ܘܗܢܘܢ ܠܐ ܨܒܘ ܕܢܬܘܒܘܢ܂ ܘܠܡܘܠܝ ܡܐܐ ܫܢ̈ܝܢ ܥܛܐ ܐܢܘܢ܀

ܘܚܙܝ ܚܒܝܒܝ ܟܡܐ ܡܝܬܪܐ ܗܕܐ܂ ܟܕ ܢܘܕܐ ܐܢܫ ܘܢܥܒܪ ܡܢ ܥܘܠܗ܂ ܘܐܠܗܢ ܠܐ ܡܣܠܐ ܠܬܝܒ̈ܐ܂ ܒܢ̈ܝ ܢܝܢܘܐ ܓܝܪ ܥܫܢܘ ܚܛܗܝ̈ܗܘܢ܂ ܘܩܒܠܘ ܟܪܘܙܘܬܗ ܕܝܘܢܢ܂ ܟܕ ܗܦܘܟܝܐ ܐܟܪܙ ܥܠܝܗܘܢ܂ ܘܗܢܘܢ ܬܒܘ܂ ܘܐܬܪܚܡ ܥܠܝܗܘܢ ܐܠܗܐ܂ ܘܒ̈ܢܝ ܐܝܣܪܝܠ ܟܕ ܣܓܝܘ ܚܘܒ̈ܝܗܘܢ܂ ܘܩܪܐ ܠܗܘܢ ܬܝܒܘܬܐ܂ ܘܠܐ ܩܒܠܘ܂ ܩܪܐ ܠܗܘܢ ܓܝܪ ܒܝܕ ܐܪܡܝܐ ܘܐܡܪ܂ ܬܘܒܘ ܒ̈ܢܝܐ ܬܝ̈ܒܐ ܘܐܣܐ ܬܝܒܘܬܟܘܢ܂ ܬܘܒ ܐܟܪܙ ܒܐܕ̈ܢܝ ܐܘܪܫܠܡ ܘܐܡܪ ܠܗ܂ ܕܬܘܒܝ ܠܘܬܝ ܒܪܬܐ ܬܝܒܬܐ܂ ܬܘܒ ܐܡܪ ܠܗܘܢ ܠܒ̈ܢܝ ܐܝܣܪܝܠ܂ ܬܘܒܘ ܘܐܬܦܢܘ ܡܢ ܐܘܪ̈ܚܬܟܘܢ ܒܝܫ̈ܬܐ܂ ܘܡܢ ܒܝܫܘܬ ܥܒܕܝ̈ܟܘܢ܂ ܘܗܟܢܐ ܐܡܪ ܠܗ ܠܥܡܐ܂ ܕܐܢ ܬܬܘܒ ܠܘܬܝ܂ ܐܦܢܝܟ ܘܩܕܡܝ ܬܩܘܡ܂ ܬܘܒ ܗܟܢܐ ܐܡܪ ܘܚܣܕ ܐܢܘܢ܂ ܐܡܪܬ ܠܡ ܕܬܘܒܝ ܠܘܬܝ ܥܡܘܪܬܐ ܕܐܝܣܪܝܠ܂ ܡܢ ܟܠܗ ܠܒܟܝ܂ ܘܠܐ ܬܒܬ/ܬܒܬܝ/܂ ܬܘܒ ܫܩܠ ܥܠܝܗܘܢ ܡܬܠܐ܂ ܘܐܥܗܕ ܐܢܘܢ ܡܕܡ ܕܟܬܝܒ ܒܢܡܘܣܐ܂ ܘܨܒܐ ܕܢܕܓܠ ܢܡܘܣܐ ܡܛܠ ܬܝܒܘܬܗܘܢ܂ ܐܡܪ ܓܝܪ ܕܟܕ ܢܣܒ ܓܒܪܐ ܐܢܬܬܐ܂ ܘܬܦܘܩ ܡܢ ܠܘܬܗ܂ ܘܬܗܘܐ ܠܓܒܪܐ ܐܚܪܢܐ܂ ܘܐܢ ܢܡܘܬ ܓܒܪܐ ܐܚܪܢܐ ܕܢܣܒܗ ܐܘ ܢܫܒܩܝܗ܂ ܘܬܗܦܘܟ ܠܘܬ ܒܥܠܗ ܩܕܡܝܐ܂ ܬܘܒ ܠܐ ܫܠܝܛ ܠܗ ܠܒܥܠܗ ܩܕܡܝܐ ܕܢܚܕܪ ܢܣܒܝܗ܂ ܡܢ ܒܬܪ ܕܐܬܛܡܐܬ܂ ܘܐܢ ܕܝܢ ܢܣܒܝܗ܂ ܗܐ ܡܬܛܡܐܘ ܬܬܛܡܐ ܐܪܥܐ ܗܝ܂ ܘܐܦ ܗܫܐ ܠܡ ܢܣܒܬܟܝ ܠܝ ܐܘܪܫܠܡ܂ ܘܗܘܝܬܝ ܠܝ܂ ܘܢܦܩܬܝ ܡܢ ܠܘܬܝ܂ ܘܐܙܠܬܝ ܘܙܢܝܬܝ ܒܟܐ̈ܦܐ ܘܒܩܝ̈ܣܐ܂ ܗܫܐ ܠܡ ܬܘܒܝ ܠܘܬܝ ܘܡܩܒܠ ܐܢܐ ܠܟܝ܂ ܘܒܬܝܒܘܬܟܝ ܢܡܘܣܐ ܫܪܐ ܐܢܐ܀

ܠܐ ܬܕܚܠܘܢ ܐܘܢ ܬܝܒ̈ܐ܂ ܡܢ ܦܣܩ ܣܒܪܐ܂ ܕܟܬܝܒ ܒܟܬ̈ܒܐ܂ ܡܛܠ ܕܠܪܘܚܗ ܕܐܠܗܐ ܗܟܢܐ ܝܐܐ ܠܗ ܠܡܙܗܪܘ܂ ܣܡ ܓܝܪ ܙܘܗܪܐ ܕܕܚܠܬܐ ܒܚܙܩܝܐܝܠ ܢܒܝܐ܂ ܟܕ ܐܡܪ ܠܗ܂ ܕܐܢ ܟܠܗܘܢ ܝܘܡ̈ܬܗ ܢܥܒܕ ܒܪܢܫܐ ܕܝܢܐ ܘܙܕܝܩܘܬܐ܂ ܘܐܚܪܝܬ ܝܘܡ̈ܬܗ ܢܥܒܕ ܥܘܠܐ܂ ܒܗ ܒܥܘܠܗ ܢܡܘܬ܂ ܘܐܢ ܥܘܠܐ ܢܥܒܕ ܒܪܢܫܐ܂ ܟܠܗܘܢ ܝܘܡ̈ܬܗ܂ ܘܢܬܘܒ ܘܢܥܒܕ ܕܝܢܐ ܘܙܕܝܩܘܬܐ܂ ܢܚܐ ܢܦܫܗ܂ ܒܗܕܐ ܚܕܐ ܡܠܬܐ ܙܗܪ ܠܙܕܝܩܐ܂ ܕܠܐ ܢܚܛܐ ܘܢܘܒܕ ܪܗܛܗ܂ ܘܝܗܒ ܣܒܪܐ ܠܥܘܠܐ ܕܢܥܒܪ ܡܢ ܥܘܠܗ ܘܢܚܐ܂ ܬܘܒ ܐܡܪ ܠܗ ܠܚܙܩܝܐܝܠ܂ ܕܐܦܢ ܣܒܪܗ ܦܣܩ ܐܢܐ ܕܥܘܠܐ܂ ܐܢܬ ܡܙܗܪܘ ܙܗܪܝܗܝ܂ ܐܦ ܟܕ ܡܠܒܒܘ ܡܠܒܒ ܐܢܐ ܠܙܕܝܩܐ܂ ܐܢܬ ܕܚܠܬܐ ܣܝܡ ܩܕܡܘܗܝ ܕܢܙܕܗܪ܂ ܡܐ ܕܐܡܪ ܐܢܐ ܠܚܛܝܐ ܕܡܡܬ ܬܡܘܬ܂ ܘܠܐ ܙܗܪܬܝܗܝ܂ ܚܛܝܐ ܒܥܘܠܗ ܢܡܘܬ܂ ܘܕܡܗ ܡܢ ܐܝ̈ܕܝܟ ܐܬܒܥ܂ ܥܠ ܕܠܐ ܙܗܪܬܝܗܝ܂ ܘܐܢ ܬܙܗܪ ܠܚܛܝܐ܂ ܗܘ ܚܛܝܐ ܢܚܐ ܕܙܗܪܬܝܗܝ܂ ܘܐܢܬ ܢܦܫܟ ܡܦܨܐ ܐܢܬ܂ ܘܟܕ ܬܐܡܪ ܠܙܕܝܩܐ ܕܡܚܐ ܬܚܐ܂ ܘܢܬܬܟܠ ܠܗ ܥܠ ܗܕܐ܂ ܠܟ ܘܠܐ ܠܟ ܕܬܙܗܪܝܘܗܝ ܕܠܐ ܢܬܪܝܡ ܘܢܚܛܐ܂ ܘܗܘ ܢܚܐ ܕܡܙܕܗܪ܂ ܘܐܢܬ ܢܦܫܟ ܡܦܨܐ ܐܢܬ܂܂܂܂܂ ܬܘܒ ܫܡܥܘ ܬܝܒ̈ܐ܂ ܠܐܝܕܐ ܕܦܫܝܛܐ ܘܩܪܝܐ ܠܬܝܒܘܬܐ܂ ܐܡܪ ܓܝܪ ܐܦ ܒܝܕ ܐܪܡܝܐ ܢܒܝܐ܂ ܘܝܗܒ ܬܝܒܘܬܐ܂ ܗܟܢܐ ܓܝܪ ܐܡܪ܂ ܕܐܢ ܐܡܪ ܥܠ ܥܡܐ ܘܥܠ ܡܠܟܘܬܐ܂ ܠܡܥܩܪ ܘܠܡܣܬܪ ܘܠܡܣܚܦ ܘܠܡܘܒܕܘ܂ ܘܢܬܘܒ ܥܡܐ ܗܘ ܡܢ ܥܘܠܗ܂ ܐܗܦܟ ܐܢܐ ܡܢܗ ܒܝܫܬܐ ܕܓܙܪܬ ܥܠܘܗܝ܂ ܘܐܢ ܐܡܪ ܥܠ ܥܡܐ ܘܥܠ ܡܠܟܘܬܐ ܠܡܒܢܐ ܘܠܡܨܒ܂ ܘܢܬܬܟܠ ܠܗ ܥܠ ܗܕܐ܂ ܘܢܥܒܕ ܕܒܝܫ ܩܕܡܝ܂ ܐܗܦܟ ܐܦ ܐܢܐ ܡܢܗ ܛܒܬܐ ܕܡܠܟܬ ܥܠܘܗܝ܂ ܘܒܥܘܠܗ ܘܒܚ̈ܛܗܘܗܝ ܐܘܒܕܝܘܗܝ܀

ܫܡܥܘ ܬܘܒ ܐܦ ܐܢܬܘܢ ܐܚ̈ܝܕܝ ܩ̈ܠܝܕܐ ܕܬܪ̈ܥܐ ܕܫܡܝܐ܂ ܘܦܬܚܘ ܬܪ̈ܥܐ ܠܬܝܒ̈ܐ܂ ܐܬܛܦܝܣܘ ܠܡܕܡ ܕܐܡܪ ܫܠܝܚܐ ܛܘܒܢܐ܂ ܕܐܢ ܐܢܫ ܡܢܟܘܢ ܢܬܥܡܠ ܒܣܟܠܘܬܐ܂ ܐܢܬܘܢ ܐܝܠܝܢ ܕܒܪܘܚ ܐܢܬܘܢ ܐܬܩܢܘܗܝ ܒܪܘܚܐ ܡܟܝܟܬܐ܂ ܘܗܘܝܬܘܢ ܠܡ ܙܗܝܪܝܢ܂ ܕܕܠܡܐ ܐܦ ܐܢܬܘܢ ܬܬܢܣܘܢ܂ ܕܚܠ ܗܘܐ ܓܝܪ ܫܠܝܚܐ ܘܙܗܪ ܐܢܘܢ܂ ܐܡܪ ܓܝܪ ܥܠ ܢܦܫܗ܂ ܕܕܠܡܐ ܐܢܐ ܕܠܚܪ̈ܢܐ ܐܟܪܙܬ܂ ܐܢܐ ܩܢܘܡܝ ܐܣܬܠܐ ܠܝ܂ ܡܢ ܕܡܬܥܡܠ ܡܢܟܘܢ ܒܣܟܠܘܬܐ܂ ܠܐ ܠܡ ܐܝܟ ܒܥܠܕܒܒܐ ܬܐܚܕܘܢܗ܂ ܐܠܐ ܗܘܝܬܘܢ ܡܠܟܝܢ ܘܡܪܬܝܢ ܠܗ ܐܝܟ ܕܠܐܚܐ܂ ܡܛܠ ܕܡܐ ܕܦܪܫܬܘܢܝܗܝ ܡܢܟܘܢ܂ ܡܬܒܠܥ ܠܗ ܡܢ ܣܛܢܐ܂ ܬܘܒ ܐܡܪ ܕܚܝܒܝܢ ܚܢܢ ܐܝܠܝܢ ܕܡܫܪܪܝܢ ܕܟܘܪܗܢܐ ܕܟܪ̈ܝܗܐ ܢܫܩܘܠ܂ ܬܘܒ ܐܡܪ ܕܡܢ ܕܚܓܝܪ ܠܐ ܢܣܬܚܦ ܐܠܐ ܢܬܐܣܐ܀

ܘܐܦ ܠܟܘܢ ܬܝ̈ܒܐ ܐܡܪܢܐ܂ ܕܠܐ ܬܟܠܘܢ ܡܢ ܢܦܫܟܘܢ ܦܘܪܣܐ ܗܢܐ܂ ܕܝܗܝܒ ܠܐܣܝܘܬܐ܂ ܐܡܪ ܓܝܪ ܒܟܬܒܐ܂ ܕܡܘܕܐ ܒܚ̈ܛܗܘܗܝ ܘܥܒܪ ܡܢܗܘܢ܂ ܡܬܪܚܡ ܥܠܘܗܝ ܐܠܗܐ܂ ܚܙܘ ܠܒܪܐ ܕܦܪܚ ܢܟܣ̈ܘܗܝ܂ ܘܟܕ ܬܒ ܠܘܬ ܐܒܘܗܝ܂ ܚܕܝ ܒܗ ܘܩܒܠܗ܂ ܘܬܘܪܐ ܕܦܛܡܐ ܩܛܠ ܠܗ܂ ܘܚܕܝ ܐܒܘܗܝ ܒܬܝܒܘܬܗ܂ ܘܩܪܐ ܐܦ ܪ̈ܚܡܘܗܝ ܕܢܚܕܘܢ ܥܡܗ܂ ܘܥܦܩܗ ܐܒܘܗܝ ܘܡܢܫܩ ܗܘܐ ܠܗ܂ ܘܐܡܪ܂ ܕܒܪܝ ܗܢܐ ܡܝܬܐ ܗܘܐ ܘܚܝܐ܂ ܘܐܒܝܕܐ ܗܘܐ ܘܐܫܬܟܚ܂ ܘܠܐ ܪܫܝܗܝ ܐܒܘܗܝ ܥܠ ܢܟܣ̈ܘܗܝ ܕܦܪܚ܀

ܘܠܒܒ ܐܢܘܢ ܡܪܢ ܠܬܝܒ̈ܐ ܘܐܡܪ܂ ܕܠܐ ܐܬܝܬ ܕܐܩܪܐ ܠܙܕܝܩ̈ܐ܂ ܐܠܐ ܠܚ̈ܛܝܐ ܠܬܝܒܘܬܐ܂ ܘܐܡܪ ܬܘܒ܂ ܕܬܗܘܐ ܚܕܘܬܐ ܒܫܡܝܐ܂ ܥܠ ܚܕ ܚܛܝܐ ܕܢܬܘܒ܂ ܝܬܝܪ ܡܢ ܬܫܥܝܢ ܘܬܫܥܐ ܙܕܝܩ̈ܝܢ܂ ܕܠܐ ܣܢܝܩܝܢ ܥܠ ܬܝܒܘܬܐ܂ ܥܪܒܐ ܕܐܒܕ ܡܢ ܟܠܗ ܓܙܪܐ܂ ܥܠ ܗܘ ܗܘ ܒܛܝܠ ܠܗ ܠܪܥܝܐ܂ ܝܬܝܪ ܡܢ ܗܠܝܢ ܕܠܐ ܛܥܘ܂ ܡܫܝܚܐ ܓܝܪ ܡܛܠ ܚ̈ܛܝܐ ܡܝܬ܂ ܘܠܐ ܡܛܠ ܙܕܝ̈ܩܐ܂ ܐܝܟ ܕܐܡܪ ܒܢܒܝܐ܂ ܕܚ̈ܛܗܐ ܕܣܓ̈ܝܐܐ ܫܩܠ܂ ܘܫܠܝܚܐ ܐܡܪ܂ ܕܐܢ ܟܕ ܚ̈ܛܝܝܢ ܗܘܝܢ܂ ܐܬܪܥܝ ܥܡܢ ܐܠܗܐ ܒܡܘܬܐ ܕܒܪܗ܂ ܟܡܐ ܗܫܐ ܝܬܝܪܐܝܬ ܒܬܪܥܘܬܗ ܢܚܐ ܒܚܝ̈ܘܗܝ܀

ܡܢ ܕܡܘܕܐ ܒܣܟܠܘܬܗ܂ ܫܒܩ ܠܗ ܐܠܗܐ܂ ܕܘܝܕ ܓܝܪ ܟܕ ܚܛܐ܂ ܐܬܐ ܠܘܬܗ ܢܬܢ ܢܒܝܐ܂ ܘܐܘܕܥܗ ܣܟܠܘܬܗ܂ ܘܡܣܡ ܒܪܫܐ ܕܡܩܒܠ܂ ܗܝܕܝܢ ܕܘܝܕ ܐܘܕܝ ܘܐܡܪ ܕܚܛܝܬ܂ ܐܡܪ ܠܗ ܢܒܝܐ܂ ܐܦ ܡܪܝܐ ܐܥܒܪ ܣܟܠܘܬܟ܂ ܡܛܠ ܕܐܘܕܝܬ܂ ܘܟܕ ܨܠܝ ܗܟܢܐ ܐܡܪ܂ ܕܠܟ ܒܠܚܘܕܝܟ ܚܛܝܬ܂ ܘܒܝܫ̈ܬܐ ܩܕܡܝܟ ܥܒܕܬ܂ ܘܒܥܐ ܬܘܒ ܡܢ ܐܠܗܐ ܘܐܡܪ܂ ܕܠܐ ܬܥܠܝܘܗܝ ܠܥܒܕܟ ܒܕܝܢܐ܂ ܡܛܠ ܕܠܐ ܙܟܐ ܩܕܡܝܟ ܟܘܠ ܕܚܝ܂ ܘܐܦ ܫܠܝܡܘܢ ܗܟܢܐ ܐܡܪ܂ ܡܢܘ ܢܐܡܪ ܕܙܟܝ ܐܢܬ ܠܒܝ܂ ܘܐܬܕܟܝܬ ܡܢ ܚ̈ܛܗܐ܂ ܘܐܦ ܒܢܡܘܣܐ ܟܬܝܒ܂ ܕܨܠܝ ܡܘܫܐ ܩܕܡ ܐܠܗܐ ܘܐܡܪ܂ ܕܫܒܩ ܐܢܬ ܥܘܠܐ ܘܚܛܝܬܐ܂ ܘܡܙܟܝܘ ܠܐ ܡܙܟܐ ܐܢܬ܂ ܘܐܦ ܟܕ ܨܒܐ ܕܢܥܛܐ ܠܥܡܗ܂ ܡܛܠ ܚ̈ܛܗܝܗܘܢ܂ ܗܟܢܐ ܐܡܪ ܡܘܫܐ܂ ܟܕ ܒܥܐ ܘܡܬܚܢܢ܂ ܘܐܡܪ ܠܗ ܕܫܒܘܩ ܠܥܡܟ ܣܟܠܘܬܗ܂ ܐܝܟ ܕܫܒܩܬ ܠܗܘܢ ܡܢ ܡܨܪܝܢ܂ ܘܥܕܡܐ ܠܝܘܡܢܐ܂ ܘܐܡܪ ܠܗ ܐܠܗܐ܂ ܕܫܒܩ ܐܢܐ ܠܗܘܢ ܐܝܟ ܡܠܬܟ܀

ܐܬܕܡܘ ܐܘ ܕܒܥܝܢ ܬܝܒܘܬܐ ܠܐܗܪܘܢ܂ ܗܘ ܪܫܐ ܕܟܗ̈ܢܐ܂ ܕܟܕ ܐܚܛܝ ܠܥܡܐ ܒܥܓܠܐ܂ ܐܘܕܝ ܥܠ ܚܛܗܗ܂ ܘܫܒܩ ܠܗ ܡܪܗ܂ ܘܐܦ ܕܘܝܕ ܪܫܐ ܕܡ̈ܠܟܐ ܕܐܝܣܪܝܠ܂ ܐܘܕܝ ܥܠ ܣܟܠܘܬܗ ܘܐܫܬܒܩ ܠܗ܂ ܘܐܦ ܫܡܥܘܢ ܪܫܐ ܕܬܠܡ̈ܝܕܐ܂ ܟܕ ܟܦܪ ܕܡܫܝܚܐ ܠܐ ܚܙܐ ܠܝ܂ ܘܐܚܪܡ ܘܝܡܐ ܕܠܐ ܝܕܥܢܐ ܠܗ܂ ܘܟܕ ܬܘܬ ܢܦܫܐ ܩܪܒ ܠܘܬܗ܂ ܘܐܣܓܝ ܕܡ̈ܥܝ ܒܟܬܗ܂ ܩܒܠܗ ܡܪܢ ܘܥܒܕܗ ܫܬܐܣܬܐ܂ ܘܩܪܝܗܝ ܟܐܦܐ ܒܢܝܢܐ ܕܥܕܬܐ܀

ܠܐ ܬܗܘܘܢ ܣܟ̈ܠܐ ܐܝܟ ܐܕܡ܂ ܕܒܗܬ ܕܢܘܕܐ ܣܟܠܘܬܗ܂ ܘܐܦ ܠܐ ܠܩܐܝܢ ܬܬܕܡܘܢ܂ ܕܟܕ ܐܬܪܫܝ ܕܩܛܠ ܠܐܚܘܗܝ܂ ܐܡܪ ܕܠܐ ܝܕܥܢܐ ܐܝܟܘ ܗܒܝܠ܂ ܡܛܠ ܕܠܐ ܗܘܝܬ ܢܛܘܪܗ܂ ܘܠܐ ܬܩܘܡܘܢ ܒܪܥܝܢܐ ܙܩܝܦܐ܂ ܒܕܡܘܬܐ ܕܕܪܐ ܡܚܒܠܢܐ܂ ܘܠܐ ܬܣܓܘܢ ܥܘܠܐ ܥܠ ܥܘܠܐ܂ ܘܬܣܓܘܢ ܚܛ̈ܗܝܟܘܢ܂ ܕܡܙܟܝܢ ܐܢܬܘܢ ܢܦܫܟܘܢ܂ ܟܕ ܚܝ̈ܒܐ ܐܢܬܘܢ܂ ܫܡܥܘ ܠܐܒ̈ܗܝܢ ܩܕܡ̈ܝܐ܂ ܕܐܦ ܟܕ ܙܕܝ̈ܩܐ ܗܘܘ܂ ܠܡܘܟܟܐ ܣܝܡܝܢ ܗܘܘ ܢܦܫܗܘܢ܂ ܐܡܪ ܓܝܪ ܐܒܪܗܡ܂ ܕܐܢܐ ܐܝܬܝ ܥܦܪܐ ܘܩܛܡܐ܂ ܘܣܡ ܢܦܫܗ ܬܚܝܬ ܒܨܝܪܘܬܐ܂ ܘܐܦ ܕܘܝܕ ܐܡܪ܂ ܕܒܪ ܐܢܫܐ ܐܝܟ ܠܗܓܐ ܐܢܘܢ ܝܘ̈ܡܘܗܝ܂ ܘܫܠܝܡܘܢ ܐܡܪ ܘܙܗܪ܂ ܕܐܢ ܙܕܝܩܐ ܠܡܚܣܢ ܚܝܐ܂ ܚܛܝܐ ܘܪܫܝܥܐ ܐܝܟܐ ܢܫܬܟܚ܀

ܒܥܢܐ ܡܢܟ ܚܒܝܒܝ ܒܪ̈ܚܡܘܗܝ ܕܐܠܗܐ܂ ܕܠܐ ܡܛܠ ܕܟܬܒܬ ܠܟ܂ ܕܐܠܗܐ ܠܐ ܡܣܠܐ ܠܬܝ̈ܒܐ܂ ܬܬܪܦܐ ܠܟ ܡܢ ܚܠܝܨܘܬܟ܂ ܘܬܗܘܐ ܠܟ ܣܢܝܩܐ ܥܠ ܬܝܒܘܬܐ܂ ܠܣܢ̈ܝܩܐ ܗܘ ܒܠܚܘܕ ܝܗܝܒܐ ܬܝܒܘܬܐ܂ ܗܕܐ ܕܝܢ ܬܗܘܐ ܠܟ܂ ܕܥܠ ܬܝܒܘܬܐ ܠܐ ܬܗܘܐ ܣܢܝܩ܂ ܐܝܕܐ ܗܕܐ ܠܚ̈ܛܝܐ ܦܫܝܛܐ܂ ܘܙܕܝ̈ܩܐ ܠܐ ܒܥܝܢ ܠܗ܂ ܙܕܩܐ ܓܝܪ ܠܡܣ̈ܟܢܐ ܗܘ ܡܬܝܗܒ܂ ܘܥܬܝܪ̈ܐ ܠܐ ܣܢܝܩܝܢ ܥܠܘܗܝ܂ ܠܓܒܪܐ ܕܡܢ ܠܣ̈ܛܝܐ ܡܫܬܠܚ ܠܗ ܝܗܒܝܢ ܕܢܠܒܫ܂ ܕܢܟܣܐ ܦܘܪܣܝܗ ܕܒܗܬ܂ ܡܕܡ ܕܐܝܬ ܠܟ ܠܐ ܬܘܒܕ܂ ܕܠܐ ܬܘܒ ܬܠܐܐ ܠܡܒܥܝܗ܂ ܐܘ ܐܫܟܚܬܝܗܝ ܐܘ ܠܐ܂ ܘܐܦ ܟܕ ܛܒ ܬܫܟܚܝܘܗܝ ܠܕܝܠܟ ܠܐ ܕܡܐ܂ ܠܐ ܓܝܪ ܦܚܡ ܗܘ ܕܡܣܟܠ ܘܬܐܒ܂ ܠܗܘ ܡܢ ܕܣܟܠܘܬܐ ܪܚܝܩܐ ܗܝ ܡܢܗ܂ ܐܢܬ ܡܢܬܐ ܥܠܝܬܐ ܗܘܝܬ ܪܚܡ܂ ܘܡܢ ܟܠܗ ܒܨܝܪܘܬܐ ܐܬܪܚܩ܂ ܐܬܚܠܨ ܒܗ ܒܙܝܢܟ ܫܦܝܪ܂ ܕܠܐ ܬܬܡܚܐ ܒܩܪܒܐ܂ ܠܐ ܬܗܘܐ ܣܢܝܩܐ ܠܡܒܥܐ ܣܡܐ܂ ܘܬܠܐܐ ܠܡܐܙܠ ܠܘܬ ܐܣܝܐ܂ ܘܟܕ ܛܒ ܬܬܐܣܐ ܗܢܝܢ ܫܘ̈ܡܬܐ ܗܘܝܢ ܝܕܝܥܢ܂ ܠܐ ܬܬܟܠ ܠܟ ܕܗܐ ܐܝܬ ܐܣܝܘܬܐ܂ ܘܬܬܠ ܢܦܫܟ ܠܫܡܐ ܫܦܠܐ܂ ܐܠܐ ܗܘܝ ܝܬܝܪܐ ܡܢ ܬܝܒܘܬܐ܂ ܡܢ ܕܣܕܝܩ ܢܚܬܗ ܣܢܝܩ ܥܠܘܗܝ ܕܢܬܡܠܐ܂ ܘܐܦ ܟܕ ܛܒ ܢܬܚܝܛ܂ ܟܠܢܫ ܦܪܫ ܠܗ܂ ܘܡܢ ܕܬܪܝܥ ܣܝܓܗ ܒܢܐ ܠܗ ܒܥܡܠܐ܂ ܘܐܦ ܟܕ ܛܒ ܢܒܢܝܘܗܝ ܬܘܪܥܬܐ ܡܬܩܪܝܐ܂ ܘܡܢ ܕܒܝܬܗ ܓܢܒ̈ܐ ܦܠܫܝܢ ܠܗ܂ ܡܢ ܠܓܘ ܡܬܦܠܫ܂ ܘܦܘܠܫܬܗ ܝܕܝܥܐ ܗܝ܂ ܘܒܥܡܠܐ ܝܩܝܪܐ ܩܢܐ ܡܕܡ ܕܐܘܒܕ܂ ܘܡܢ ܕܦܣܩ ܐܝܠܢ ܦܐܪ̈ܘܗܝ܂ ܢܘܓܪܐ ܗܘܐ ܥܕ ܡܚܠܦ ܘܝܗܒ ܦܐܪ̈ܐ܂ ܘܡܢ ܕܬܪܥ ܡܒܘܥܗ ܠܫܩܝܐ܂ ܥܡܠ ܘܠܐܐ ܥܕ ܣܟܪ ܠܗ܂ ܘܟܕ ܛܒ ܢܣܟܪܝܘܗܝ܂ ܕܚܠ ܡܢܗ܂ ܕܠܡܐ ܢܣܓܘܢ ܡܝܐ ܘܢܬܪܥܘܢܗ܂ ܘܡܢ ܕܩܛܦ ܟܪܡܗ ܒܙܒܢ ܣܡܕܪܗ܂ ܡܬܓܠܙ ܡܢ ܡܐܟܘܠܬܐ ܕܥܢܒ̈ܐ܂ ܘܡܢ ܕܓܢܒ ܒܗܝܬܢ ܐܢܝܢ ܐ̈ܦܘܗܝ܂ ܘܥܕ ܚܢܝܢ ܠܗ ܠܐܐ ܘܥܡܠ܂ ܘܡܢ ܕܫܦܠ ܦܥܠܗ ܒܟܪܡܐ ܢܣܒ ܐܓܪܐ ܘܡܪܟܢ ܪܫܗ܂ ܘܠܐ ܡܫܟܚ ܬܒܥ ܝܬܝܪܐ܂ ܘܡܢ ܕܟܒܫ ܥܘܙܐ ܕܥܠܝܡܘܬܗ܂ ܚܕܐ ܠܘܬܗ ܕܥܬܝܩ ܝܘ̈ܡܬܐ܂ ܘܡܢ ܕܠܐ ܫܬܐ ܡ̈ܝܐ ܓ̈ܢܝܒܐ܂ ܡܬܢܝܚ ܥܠ ܡܒܘܥ ܚ̈ܝܐ܀

ܐܘܢ ܐܝܠܝܢ ܕܐܙܕܡܢܘ ܠܐܝܓܘܢܐ܂ ܫܡܥܘ ܠܩܠܐ ܕܩܪܢܐ ܘܐܬܠܒܒܘ܂ ܘܐܦ ܠܟܘܢ ܐܡܪܢܐ ܐܚ̈ܝܕܝ ܩܪ̈ܢܬܐ܂ ܟܗ̈ܢܐ ܘܣ̈ܦܪܐ ܘܚܟܝ̈ܡܐ܂ ܩܪܘ ܘܐܡܪܘ ܠܟܠܗ ܥܡܐ܂ ܡܢ ܕܕܚܠ ܢܗܦܘܟ ܠܗ ܡܢ ܐܝܓܘܢܐ܂ ܕܠܐ ܢܬܒܘܪ ܠܒܐ ܕܐܚ̈ܘܗܝ ܐܝܟ ܠܒܗ܂ ܘܡܢ ܕܢܨܒ ܟܪܡܐ ܢܗܦܘܟ ܠܦܘܠܚܢܗ܂ ܕܠܐ ܢܪܢܐ ܒܗ ܘܢܚܘܒ ܒܩܪܒܐ܂ ܘܡܢ ܕܡܟܪ ܐܢܬܬܐ ܘܨܒܐ ܕܢܫܩܠܝܗ ܢܗܦܘܟ ܠܗ܂ ܘܥܡ ܐܢܬܬܗ ܢܚܕܐ܂ ܘܡܢ ܕܒܢܐ ܒܝܬܐ ܢܗܦܘܟ ܠܘܬܗ܂ ܕܠܡܐ ܢܬܕܟܪ ܒܝܬܗ܂ ܘܠܐ ܢܬܟܬܫ ܡܠܝܐܝܬ܂ ܠܝܚܝ̈ܕܝܐ ܗܘ ܝܐܐ ܐܝܓܘܢܐ܂ ܡܛܠ ܕܠܩܕܡܝܗܘܢ ܣܝܡܢ ܐ̈ܦܝܗܘܢ܂ ܘܠܐ ܡܬܕܟܪܝܢ ܡܕܡ ܕܒܬܪܗܘܢ܂ ܡܛܠ ܕܣܝܡ̈ܬܗܘܢ ܩܕܡܝܗܘܢ ܐܢܝܢ܂ ܘܡܕܡ ܕܒܙܝܢ ܟܠܗ ܠܢܦܫܗܘܢ ܗܘܐ܂ ܘܫܩܠܝܢ ܝܘܬܪܢܗܘܢ ܡܢ ܝܬܝܪܘ܂܂܂܂ ܠܟܘܢ ܕܝܢ ܐܡܪܢܐ ܩܪ̈ܝܝ ܩܪ̈ܢܬܐ܂ ܡܐ ܕܫܠܡܬܘܢ ܠܡܙܗܪܘ܂ ܚܙܘ ܠܕܗܦܟܝܢ ܘܣܥܘܪܘ ܠܐܝܠܝܢ ܕܡܫܬܚܪܝܢ܂ ܘܐܚܬܘ ܐܢܘܢ ܠܡܝܐ ܕܒܘܩܝܢܐ܂ ܠܐܝܠܝܢ ܕܢܦܫܗܘܢ ܡܓܒܝܢ ܠܩܪܒܐ܂ ܟܠ ܕܚܠܝܨ ܡܝܐ ܒܩܝܢ ܠܗ܂ ܘܐܝܠܝܢ ܕܚܒܢܢܝܢ ܡܢ ܬܡܢ ܡܬܦܪܫܝܢ܀

ܫܡܥ ܕܝܢ ܚܒܝܒܝ ܐܪܙܐ ܗܢܐ܂ ܕܩܕܡ ܓܕܥܘܢ ܘܚܘܝ ܕܡܘܬܗ܂ ܟܕ ܟܢܫܗ ܠܥܡܐ ܠܩܪܒܐ܂ ܙܗܪܘ ܣܦܪ̈ܐ ܡ̈ܠܝ ܢܡܘܣܐ܂ ܘܦܬܓ̈ܡܐ ܕܡܢ ܠܥܠ ܟܬܒܬ ܠܟ܂ ܗܝܕܝܢ ܗܦܟ ܥܡܐ ܣܓܝܐܐ ܡܢ ܚܝܠܐ܂ ܘܟܕ ܐܫܬܚܪܘ ܐܝܠܝܢ ܕܐܬܓܒܝܘ ܠܩܪܒܐ܂ ܐܡܪ ܠܗ ܡܪܝܐ ܠܓܕܥܘܢ܂ ܐܚܬ ܐܢܘܢ ܠܡܝܐ܂ ܘܒܩܝ ܐܢܘܢ ܬܡܢ܂ ܡܢ ܕܠܐܥ ܡܝܐ ܒܠܫܢܗ܂ ܡܣܬܪܗܒ ܘܠܒܝܒ ܠܡܐܙܠ ܠܩܪܒܐ܂ ܘܡܢ ܕܢܦܠ ܥܠ ܟܪܣܗ ܠܡܫܬܐ ܡܝܐ܂ ܪܦܐ ܘܢܫܝܫ ܡܢ ܕܠܡܐܙܠ ܠܩܪܒܐ܂܂܂ ܪܒ ܗܘ ܕܝܢ ܗܢܐ ܐܪܙܐ ܚܒܝܒܝ܂ ܕܩܕܡ ܓܕܥܘܢ ܘܚܘܝ ܛܘܦܣܐ ܕܡܥܡܘܕܝܬܐ܂ ܘܐܪܙܗ ܕܐܝܓܘܢܐ܂ ܘܕܡܘܬܐ ܕܝܚܝ̈ܕܝܐ܂ ܩܕܡ ܓܝܪ ܘܙܗܪ ܠܥܡܐ܂ ܡܢ ܠܘܩܕܡ ܒܒܘܩܝܢܐ ܕܡܝܐ܂ ܐܦ ܟܕ ܒܡܝܐ ܒܩܐ ܐܢܘܢ܂ ܡܢ ܥܣܪܐ ܐ̈ܠܦܝܢ ܬܠܬܡܐܐ ܓܒܪ̈ܝܢ ܐܬܓܒܝܘ ܒܠܚܘܕ܂ ܠܡܥܒܕ ܐܝܓܘܢܐ܂ ܫܠܡܐ ܕܝܢ ܗܕܐ ܠܡܠܬܗ ܕܡܪܢ ܕܐܡܪ܂ ܕܣܓ̈ܝܐܝܢ ܐܢܘܢ ܩܪ̈ܝܐ ܘܙܥܘܪ̈ܝܢ ܓܒ̈ܝܐ܀

ܡܛܠܗܢܐ ܗܟܢܐ ܝܐܐ ܠܩܪ̈ܝܝ ܩܪ̈ܢܬܐ܂ ܟܪ̈ܘܙܐ ܕܥܕܬܐ܂ ܕܢܩܪܘܢ ܘܢܙܗܪܘܢ ܠܟܠܗ ܩܝܡܗ ܕܐܠܗܐ܂ ܡܢ ܩܕܡ ܡܥܡܘܕܝܬܐ܂ ܠܐܝܠܝܢ ܕܐܓܒܝܘ ܢܦܫܗܘܢ ܠܒܬܘܠܘܬܐ ܘܠܩܕܝܫܘܬܐ܂ ܓܕܘ̈ܕܐ \ܘܒܬ̈ܘܠܬܐ܂ ܩܕܝ̈ܫܐ ܢܙܗܪܘܢ ܐܢܘܢ/ܘܒ̈ܬܘܠܬܐ ܘܩ̈ܕܝܫܐ܂ ܘܢܙܗܪܘܢ ܐܢܘܢ܂/ ܟܪ̈ܘܙܐ ܘܢܐܡܪܘܢ܂ ܕܡܢ ܕܠܒܗ ܣܝܡ ܠܟܝܢܐ ܕܫܘܬܦܘܬܐ܂ ܢܫܬܘܬܦ ܡܢ ܩܕܡ ܡܥܡܘܕܝܬܐ܂ ܕܠܡܐ ܢܦܠ ܒܐܝܓܘܢܐ ܘܢܬܩܛܠ܂ ܘܡܢ ܕܕܚܠ ܡܢ ܗܕܐ ܡܢܬܐ ܕܬܟܬܘܫܐ܂ ܢܗܦܘܟ ܠܗ܂ ܕܠܡܐ ܢܬܒܪ ܠܒܐ ܕܐܚ̈ܘܗܝ ܐܝܟ ܠܒܗ܂ ܘܡܢ ܕܩܢܝܢܐ ܪܚܡ ܢܗܦܘܟ ܡܢ ܚܝܠܐ܂ ܕܠܡܐ ܟܕ ܢܚܣܢܗ ܩܪܒܐ܂ ܢܬܕܟܪ ܩܢܝܢܗ ܘܢܗܦܘܟ ܠܗ܂ ܘܡܢ ܕܡܢ ܐܝܓܘܢܐ ܗܦܟ܂ ܗܘܐ ܠܗ ܚܣܕܐ܂ ܡܢ ܕܢܦܫܗ ܠܐ ܐܓܒܝ܂ ܘܙܝܢܐ ܥܕܟܝܠ ܠܐ ܠܒܫ܂ ܐܢ ܗܦܟ ܠܐ ܡܬܓܢܐ܂ ܐܠܐ ܟܠ ܕܡܓܒܐ ܢܦܫܗ܂ ܘܠܒܫ ܙܝܢܐ܂ ܐܢ ܗܦܟ ܡܢ ܐܝܓܘܢܐ܂ ܗܘܐ ܠܗ ܓܘܚܟܐ܂ ܠܡܢ ܕܢܦܫܗ ܡܣܪܩ܂ ܝܐܐ ܠܗ ܬܟܬܘܫܐ܂ ܡܛܠ ܕܠܐ ܡܬܕܟܪ ܡܕܡ ܕܒܬܪܗ ܘܗܦܟ ܠܘܬܗ܀

ܘܡܐ ܕܐܟܪܙܘ ܘܣܒܪܘ ܘܙܗܪܘ܂ ܠܟܠܗ ܩܝܡܗ ܕܐܠܗܐ܂ ܢܩܪܒܘܢ ܐܢܘܢ ܠܡܝܐ ܕܡܥܡܘܕܝܬܐ܂ ܠܐܝܠܝܢ ܕܐܬܓܒܝܘ ܠܐܝܓܘܢܐ ܘܢܬܒܩܘܢ܂ ܘܡܢ ܒܬܪ ܡܥܡܘܕܝܬܐ܂ ܢܚܙܘܢ ܐܝܠܝܢ ܕܚ̈ܠܝܨܝܢ ܘܐܝܠܝܢ ܕܢܫ̈ܝܫܝܢ܂ ܠܚ̈ܠܝܨܐ ܘܠܐ ܠܡܠܒܒܘ܂ ܘܠܕܪܦܝܢ ܘܢܫ̈ܝܫܝܢ ܬܘܒ ܢܗܦܟܘܢ ܡܢ ܐܝܓܘܢܐ ܓܠܝܐܝܬ܂ ܕܕܠܡܐ ܟܕ ܢܡܛܐ ܐܢܘܢ ܩܪܣܐ܂ ܢܓܢܒܘܢ ܙܝܢܗܘܢ ܘܢܥܪܩܘܢ ܘܢܚܘܒܘܢ܂ ܐܡܪ ܠܗ ܓܝܪ ܠܓܕܥܘܢ܂ ܐܚܬ ܐܢܘܢ ܠܡ̈ܝܐ ܠܐܝܠܝܢ ܕܐܓܒܝܘ ܢܦܫܗܘܢ܂ ܘܟܕ ܢܚܬ ܥܡܐ ܠܡܝܐ܂ ܐܡܪ ܠܗ ܡܪܝܐ ܠܓܕܥܘܢ܂ ܟܠ ܐܝܠܝܢ ܕ̈ܠܥܝܢ ܡܝܐ܂ ܐܝܟ ܕܠܐܥ ܟܠܒܐ ܒܠܫܢܗ܂ ܗܢܘܢ ܗܠܝܢ ܢܐܙܠܘܢ ܥܡܟ ܠܩܪܒܐ܂ ܘܟܘܠ ܐܝܠܝܢ ܕܢܦܠܝܢ ܠܡܫܬܐ ܡܝܐ܂ ܠܐ ܢܐܙܠܘܢ ܥܡܟ ܠܩܪܒܐ܂ ܪܒ ܗܘ ܐܪܙܐ ܗܢܐ ܚܒܝܒܝ܂ ܕܩܕܡ ܘܚܘܝ ܐܬܗ ܠܓܕܥܘܢ܂ ܐܡܪ ܠܗ ܓܝܪ܂ ܕܟܠ ܕܠܐܥ ܡܝܐ ܐܝܟ ܟܠܒܐ܂ ܠܗ ܘܠܐ ܠܡܐܙܠ ܠܩܪܒܐ܂ ܘܡܢ ܟܠ ܚܝ̈ܘܢ ܕܐܬܒܪܝ ܥܡ ܒܪܢܫܐ܂ ܠܝܬ ܕܪܚܡ ܡܪܗ ܐܝܟ ܟܠܒܐ܂ ܘܢܛܪ ܡܛܪܬܗ ܒܐܝܡܡܐ ܘܒܠܠܝܐ܂ ܘܐܦ ܟܕ ܡܡܚܐ ܡܚܐ ܠܗ ܡܪܗ܂ ܗܘ ܡܢ ܠܘܬܗ ܠܐ ܡܫܢܐ܂ ܘܟܕ ܥܡ ܡܪܗ ܢܦܘܩ ܠܨܝܕܐ܂ ܘܢܦܓܥ ܒܗ ܒܡܪܗ ܐܪܝܐ ܕܬܩܝܦ܂ ܢܦܫܗ ܠܡܘܬܐ ܡܫܠܡ ܚܠܦ ܡܪܗ܂ ܗܟܢܐ ܐܝܬܝܗܘܢ ܚܠܝ̈ܨܐ ܐܝܠܝܢ ܕܡܬܦܪܫܝܢ ܡܢ ܡܝܐ܂ ܕܒܬܪ ܡܪܗܘܢ ܐܙܠܝܢ ܐܝܟ ܟܠܒ̈ܐ܂ ܘܢܦܫܗܘܢ ܡܫܠܡܝܢ ܠܡܘܬܐ ܥܠ ܐ̈ܦܘܗܝ܂ ܘܬܟܬܘܫܗ ܥܒܕܝܢ ܠܒܝܒܐܝܬ܂ ܘܢܛܪܝܢ ܡܛܪܬܗ ܒܐܝܡܡܐ ܘܒܠܠܝܐ܂ ܘܢܒܚܝܢ ܐܝܟ ܟܠܒ̈ܐ܂ ܟܕ ܡܬܗܓܝܢ ܒܢܡܘܣܐ ܐܝܡܡܐ ܘܠܠܝܐ܂ ܘܪܚܡܝܢ ܠܡܪܢ܂ ܘܡܠܚܟܝܢ ܫܘܡ̈ܬܗ܂ ܟܕ ܦܓܪܗ ܢܣܒܝܢ܂ ܘܣܝܡܝܢ ܠܗ ܥܠ ܥܝܢܝ̈ܗܘܢ܂ ܘܠܚܟܝܢ ܠܗ ܒܠܫܢ̈ܝܗܘܢ܂ ܐܝܟ ܕܡܠܚܟ ܟܠܒܐ ܠܡܪܗ܂ ܘܐܝܠܝܢ ܕܒܢܡܘܣܐ ܠܐ ܡܬܗܓܝܢ܂ ܡܬܩܪܝܢ ܟܠܒ̈ܐ ܦܐܩ̈ܐ܂ ܕܠܐ ܡܫܟܚܝܢ ܠܡܒܚ܂ ܘܟܠ ܐܝܠܝܢ ܕܠܐ ܚܦܝܛܝܢ ܠܡܨܡ܂ ܡܬܩܪܝܢ ܟܠܒ̈ܐ ܕܝܥܢܐ ܢܦܫܗܘܢ܂ ܘܠܐ ܝܕܥܝܢ ܠܡܣܒܥ܂ ܘܐܝܠܝܢ ܕܚܦܝܛܝܢ ܠܡܒܥܐ ܪ̈ܚܡܐ ܢܣܒܝܢ ܠܚܡܐ ܕܒ̈ܢܝܐ ܘܪܡܝܢ ܠܗܘܢ܀

ܘܐܡܪ ܠܗ ܬܘܒ ܡܪܝܐ ܠܓܕܥܘܢ܂ ܕܐܝܠܝܢ ܕܢܦܠܝܢ ܠܡܫܬܐ ܡ̈ܝܐ ܠܐ ܢܐܙܠܘܢ ܥܡܟ ܠܩܪܒܐ܂ ܕܠܐ ܢܦܠܘܢ ܘܢܚܘܒܘܢ ܒܩܪܒܐ܂ ܡܛܠ ܕܩܕܡܘ ܚܘܝܘ ܐܪܙܗ ܕܡܦܘܠܬܐ ܕܚܒܢܢܐܝܬ ܡ̈ܝܐ ܫܬܝܢ ܗܘܘ܂ ܡܛܠ ܗܢܐ ܚܒܝܒܝ ܗܟܢܐ ܝܐܐ ܠܗܘܢ ܠܢ̈ܦܠܝ ܒܐܝܓܘܢܐ܂ ܕܠܐ ܢܬܕܡܘܢ ܠܗܢܘܢ ܚܒ̈ܢܢܐ܂ ܕܠܐ ܢܗܦܟܘܢ ܠܗܘܢ ܡܢ ܬܟܬܘܫܐ܂ ܘܢܗܘܘܢ ܚܣܕܐ ܠܟܠܗܘܢ ܚܒܪ̈ܝܗܘܢ܀

ܫܡܥ ܕܝܢ ܚܒܝܒܝ ܡܠܬܐ ܗܕܐ܂ ܠܐ ܡܛܠ ܕܐܦܝܣܬܟ ܡܢ ܟܬ̈ܒܐ܂ ܕܐܠܗܐ ܠܐ ܡܣܠܐ ܠܬܝ̈ܒܐ܂ ܬܬܟܠ ܠܟ ܘܬܡܪܚ ܠܡܚܛܐ܂ ܘܠܐ ܡܛܠ ܕܐܡܪܬ ܠܟ ܗܠܝܢ܂ ܢܬܪܦܐ ܠܗ ܗܘ ܕܒܠܥ ܘܠܐ ܢܒܥܐ ܬܝܒܘܬܐ܂ ܗܟܢܐ ܓܝܪ ܝܐܐ ܠܗ܂ ܕܟܠܗܘܢ ܝܘܡ̈ܬܗ ܒܐܒܠܐ ܢܗܘܐ ܕܠܐ ܢܬܬܪܝܡ ܘܢܬܚܝܒ ܠܗ܂ ܥܒܕܐ ܐܝܢܐ ܕܡܣܟܠ ܩܕܡ ܡܪܗ ܡܚܠܦ ܠܒܘܫܗ ܕܢܬܪܥܐ ܠܗ ܡܪܗ܂ ܘܡܩܕܡ ܘܡܚܫܟ ܠܘܬܗ܂ ܕܠܡܐ ܢܣܒ ܒܐ̈ܦܘܗܝ܂ ܘܡܐ ܕܚܙܐ ܡܪܗ ܕܐܡܝܢ ܗܘ ܠܘܬܗ܂ ܫܒܩ ܠܗ ܣܟܠܘܬܗ ܘܡܬܪܥܐ ܠܗ܂ ܐܢ ܓܝܪ ܐܡܪ ܠܡܪܗ ܕܐܣܟܠܬ ܠܟ ܚܐܢ ܠܗ ܡܪܗ܂ ܐܢ ܕܝܢ ܟܕ ܐܣܟܠ ܢܐܡܪ ܠܡܪܗ ܕܠܐ ܚܛܝܬ ܡܘܣܦ ܠܗ ܥܠ ܪܘܓܙܗ ܠܡܪܗ܂ ܥܗܕ ܚܒܝܒܝ ܠܒܪܐ ܕܦܪܚ ܢܟܣ̈ܘܗܝ܂ ܘܟܕ ܐܘܕܝ ܠܐܒܘܗܝ ܫܒܩ ܠܗ ܚܘ̈ܒܘܗܝ܂ ܘܐܦ ܚܛܝܬܐ ܣܓܝܐܬ ܚܘ̈ܒܐ܂ ܘܟܕ ܩܪܒܬ ܠܘܬ ܡܪܢ ܫܒܩ ܠܗ ܚ̈ܛܗܝܗ ܣܓ̈ܝܐܐ ܘܚܢܗ܂ ܘܐܦ ܙܟܝ ܡܟܣܐ ܚܛܝܐ ܗܘܐ܂ ܘܐܘܕܝ ܒܚ̈ܛܗܘܗܝ ܘܫܒܩ ܠܗ ܡܪܢ܂ ܘܐܦ ܦܪܘܩܢ ܗܟܢܐ ܐܡܪ܂ ܕܠܐ ܐܬܝܬ ܕܐܩܪܐ ܠܙܕ̈ܝܩܐ ܐܠܐ ܠܚ̈ܛܝܐ ܠܬܝܒܘܬܐ܂ ܡܪܢ ܓܝܪ ܡܝܬ ܡܛܠ ܚ̈ܛܝܐ܂ ܘܠܐ ܗܘܐ ܣܪܝܩܐܝܬ ܗܘܬ ܡܐܬܝܬܗ܂ ܘܐܦ ܫܠܝܚܐ ܐܡܪ ܥܠ ܢܦܫܗ܂ ܕܡܓܕܦܢ ܗܘܝܬ ܘܪܕܘܦ ܘܡܨܥܪܢ ܘܪܚܡ ܥܠܝ ܐܠܗܐ܂ ܬܘܒ ܗܟܢܐ ܐܡܪ ܕܡܫܝܚܐ ܚܠܦܝܢ ܡܝܬ܂ ܥܪܒܐ ܓܝܪ ܕܐܒܕ ܡܢ ܟܠܗ ܓܙܪܐ܂ ܒܥܝܗܝ ܡܪܗ ܘܐܫܟܚܗ ܘܚܕܝ ܒܗ܂ ܘܚܕܘܬܐ ܗܘܝܐ ܠܥܝܪ̈ܝ ܫܡܝܐ ܟܕ ܚܛܝܐ ܬܐܒ ܡܢ ܥܘܠܗ܂ ܠܐ ܓܝܪ ܨܒܐ ܐܒܐ ܕܒܫܡܝܐ ܕܢܐܒܕ ܚܕ ܡܢ ܗܠܝܢ ܙܥܘܪ̈ܐ܂ ܕܚܛܘ ܘܡܬܒܥܝܐ ܠܗܘܢ ܬܝܒܘܬܐ܂ ܠܐ ܐܬܐ ܡܪܢ ܕܢܩܪܐ ܠܙܕܝ̈ܩܐ ܐܠܐ ܠܚ̈ܛܝܐ ܠܬܝܒܘܬܐ܂ ܟܠ ܡܢ ܕܡܬܟܪܗ ܡܢܢ܂ ܢܫܩܘܠ ܡܢ ܚܫܗ܂ ܘܡܢ ܕܡܬܟܫܠ ܢܬܩܠܐ ܚܠܦܘܗܝ܀

ܟܕ ܠܚܕ ܡܢ ܗܕܡ̈ܝܢ ܢܡܛܐ ܟܐܒܐ܂ ܚܢܢ ܢܥܡܠ ܒܫܘܚܢܗ ܥܕܡܐ ܕܡܬܐܣܐ܂ ܟܕ ܚܕ ܡܢ ܗܕܡ̈ܝܢ ܢܫܬܒܚ ܟܠܗ ܦܓܪܐ ܗܕܝܪ ܘܝܐܐ܂ ܘܟܕ ܠܚܕ ܡܢ ܗܕ̈ܡܝܢ ܢܡܛܐ ܟܐܒܐ܂ ܠܟܠܗ ܦܓܪܐ ܛܥܢܬܗ ܐܫܬܐ܂ ܟܠ ܕܡܟܫܠ ܠܚܕ ܡܢ ܗܠܝܢ ܙܥܘܪ̈ܐ܂ ܢܦܠ ܒܝܡܐ܂ ܟܕ ܪܚܝܐ ܕܚܡܪܐ ܒܨܘܪܗ܂ ܘܡܢ ܕܚܕܐ ܠܒܝܫܬܐ ܕܐܚܘܗܝ ܒܥܓܠ ܕܝܠܗ ܗܘܐ ܬܒܪܗ܂ ܘܡܢ ܕܪܦܣ ܒܪܓܠܗ ܥܠ ܐܚܘܗܝ ܠܐ ܢܬܚܣܐ܂ ܠܡܚܘܬܗ ܕܡܡܝܩܢܐ ܠܝܬ ܠܗ ܐܣܝܘܬܐ܂ ܘܡܒܙܚܢܐ ܚܘܒ̈ܘܗܝ ܠܐ ܡܫܬܒܩܝܢ܂ ܡܢ ܕܚܦܪ ܓܝܪ ܓܘܡܨܐ ܢܦܠ ܒܗ܂ ܘܕܡܥܓܠ ܟܐܦܐ ܥܠܘܗܝ ܬܗܦܘܟ܂ ܡܢ ܕܡܫܬܪܥ ܘܢܦܠ ܠܐ ܢܐܡܪ ܕܟܠ ܐܢܫ ܢܬܕܡܐ ܠܝ܂ ܘܥܬܝܪܐ ܕܡܛܐ ܠܡܣܟܢܘܬܐ܂ ܠܐ ܢܐܡܪ ܕܟܠܗܘܢ ܥܬܝܪ̈ܐ ܠܝ ܢܬܕܡܘܢ܂ ܐܢ ܓܝܪ ܡܫܬܡܥܐ ܒܥܘܬܗ܂ ܚܘܣܪܢܗ ܕܝܠܗ ܡܢܘ ܢܡܠܐ܀

ܗܠܝܢ ܟܠܗܝܢ ܟܬܒܬ ܠܟ ܚܒܝܒܝ܂ ܡܛܠ ܕܒܕܪܢ ܕܝܠܢ܂ ܐܝܬ ܕܡܓܒܝܢ ܢܦܫܗܘܢ܂ ܕܢܗܘܘܢ ܝܚܝ̈ܕܝܐ܂ ܒ̈ܢܝ ܩܝܡܐ ܘܩܕܝ̈ܫܐ܂ ܘܥܒܕܝܢ ܚܢܢ ܐܝܓܘܢܐ ܠܘܩܒܠ ܒܥܠܕܪܢ܂ ܘܗܘ ܒܥܠܕܪܢ ܠܩܘܒܠܢ ܡܬܟܬܫ܂ ܕܢܗܦܟܢ ܠܟܝܢܐ ܕܦܪܫܢ ܡܢܗ܂ ܒܚܐܪܘܬܢ‍ ܘܐܝܬ ܡܢܢ ܕܡܬܚܝܒܝܢ ܘܒܠܥܝܢ܂ ܘܟܕ ܚܝ̈ܒܐ ܐܢܘܢ܂ ܢܦܫܗܘܢ ܡܙܟܝܢ܂ ܘܐܦܢ ܣܟ̈ܠܘܬܗܘܢ ܝܕܥܝܢ ܚܢܢ܂ ܗܢܘܢ ܗܠܝܢ ܕܒܗܘ ܪܥܝܢܐ ܩܝܡܝܢ܂ ܘܠܐ ܨܒܝܢ ܕܢܬܩܪܒܘܢ ܠܬܝܒܘܬܐ܂ ܘܡܛܠ ܒܗܬܬܗܘܢ ܡܝܬܝܢ ܡܘܬܐ ܬܢܝܢܐ܂ ܘܠܐ ܥܗܕܝܢ ܠܡܐܫ ܬܐܪ̈ܬܐ܂ ܘܐܝܬ ܬܘܒ ܕܡܘܕܐ ܒܣܟܠܘܬܗ܂ ܘܬܝܒܘܬܐ ܠܐ ܝܗܒܝܢ ܠܗ܂ ܐܘܢ ܪܒ ܒܝܬܐ ܕܡܫܝܚܐ܂ ܗܒ ܬܝܒܘܬܐ ܠܟܢܬܟ܂ ܘܥܗܕ ܕܡܪܟ ܠܐ ܐܣܠܝ ܠܬܝ̈ܒܐ܂ ܙܝܙ̈ܢܐ ܙܪ̈ܝܥܝܢ ܒܚܩܠܐ܂ ܘܡܪܐ ܙܪܥܐ ܠܐ ܫܒܩ ܠܥܒ̈ܕܘܗܝ܂ ܕܙܝ̈ܙܢܐ ܢܕܟܘܢ ܡܢ ܒܝܢܬ ܚ̈ܛܐ܂ ܥܕ ܙܒܢ ܚܨܕܐ܂ ܘܡܨܝܕܬܐ ܦܪܝܣܐ ܒܝܡܐ܂ ܘܢܘ̈ܢܐ ܠܐ ܡܬܓܒܝܢ ܥܕܡܐ ܕܣܠܩܐ ܠܥܠ܂ ܘܥܒ̈ܕܐ ܡܢ ܡܪܗܘܢ ܩܒܠܘ ܟܣܦܐ܂ ܘܠܥܒܕܐ ܫܦܠܐ ܡܪܗ ܕܐܢ ܠܗ܂ ܚ̈ܛܐ ܘܬܒܢܐ ܚܠܝܛܝܢ ܐܟܚܕܐ܂ ܘܡܪܐ ܐܕܪܐ ܦܪܫ ܘܡܕܟܐ܂ ܣܓ̈ܝܐܝܢ ܐܢܘܢ ܕܩܪܝܢ ܠܡܫܬܘܬܐ܂ ܘܡܢ ܕܠܝܬ ܠܗ ܢܚ̈ܬܐ܂ ܡܪܗ ܡܦܩ ܠܗ ܠܚܫܘܟܐ܂ ܚܟܝ̈ܡܬܐ ܘܣܟ̈ܠܬܐ ܩܝܡܢ ܐܟܚܕܐ܂ ܘܡܪܗ ܕܓܢܘܢܐ ܝܕܥ ܠܡܢ ܡܥܠ܀

ܐܘ ܪ̈ܥܘܬܐ ܬܠܡܝܕ̈ܘܗܝ ܕܡܪܢ܂ ܪܥܘ ܥܢܐ ܘܕܒܪܘ ܫܦܝܪ܂ ܚܝܠܘ ܠܟܪ̈ܝܗܐ܂ ܘܣܡܟܘ ܠܕܡܪܥܝܢ܂ ܥܨܘܒܘ ܠܬܒܝܪ̈ܐ܂ ܘܐܣܘ ܠܚܓܝܪ̈ܐ܂ ܘܛܪܘ ܫܡ̈ܝܢܬܐ ܠܡܪܗ ܕܓܙܪܐ܂ ܠܐ ܬܬܕܡܘܢ ܠܪܥܝܐ ܒܘܪܐ ܘܣܟܠܐ܂ ܕܠܐ ܐܫܟܚ ܒܣܟܠܘܬܗ ܠܡܪܥܐ ܥܢܐ܂ ܘܝܒܫ ܕܪܥܗ ܘܐܬܥܘܪܬ ܥܝܢܗ܂ ܥܠ ܕܐܡܪ ܕܡܝܬܐ ܬܡܘܬ܂ ܘܕܐܒܕܐ ܬܐܒܕ܂ ܘܐܝܕܐ ܕܡܫܬܚܪܐ܂ ܗܝ ܬܐܟܘܠ ܒܣܪܐ ܕܚܒܪ̈ܬܗ܂ ܘܡܐ ܕܐܬܐ ܪܒ ܪ̈ܥܘܬܐ܂ ܡܚܝܒ ܠܗ ܠܪܥܝܐ ܒܘܪܐ ܘܣܟܠܐ܂ ܕܠܐ ܦܪܢܣ ܟܢܘ̈ܬܗ ܫܦܝܪ܂ ܘܐܝܢܐ ܕܪܥܐ ܥܢܐ ܘܡܕܒܪ ܫܦܝܪ܂ ܡܬܩܪܐ ܥܒܕܐ ܛܒܐ ܘܟܫܝܪܐ܂ ܕܩܪܒ ܥܢܐ ܠܪܥܝܐ ܟܕ ܡܫܠܡܐ܂ ܐܘ ܕܘ̈ܩܐ ܕܘܩܘ ܫܦܝܪ܂ ܘܙܗܪܘ ܠܥܡܐ ܟܠܗ ܡܢ ܚܪܒܐ܂ ܕܠܡܐ ܬܐܬܐ ܚܪܒܐ ܘܬܣܒ ܢܦܫܐ܂ ܗܝ ܓܝܪ ܢܦܫܐ ܒܚ̈ܛܗܝܗ ܡܬܢܣܒܐ܂ ܘܕܡܗ ܡܢ ܐܝ̈ܕܝܟܘܢ ܡܬܬܒܥ܂ ܘܐܢ ܕܝܢ ܒܬܪ ܙܘܗܪܐ ܬܬܢܣܒ ܢܦܫܐ܂ ܢܦܫܐ ܗܝ ܒܚ̈ܛܗܝܗ ܡܬܢܣܒܐ܂ ܘܐܢܬܘܢ ܠܐ ܡܬܪܫܝܢ ܐܢܬܘܢ܂ ܐܘܢ ܥܢܐ ܫܡ̈ܝܢܬܐ܂ ܠܐ ܬܕܩܪܢ ܠܟܪ̈ܝܗܬܐ ܕܠܐ ܬܚܘܒܢ ܕܝܢܐ܂ ܡܢ ܪܥܝܢ ܪܒܐ ܡܐ ܕܐܬܐ܀

ܩܒܠ ܦܝܣܐ ܗܢܐ ܚܒܝܒܝ܂ ܕܡܩܪܒ ܠܬܝ̈ܒܐ܂ ܘܡܙܗܪ ܠܙܕܝ̈ܩܐ܂ ܥܠܡܐ ܗܢܐ ܕܛܝܒܘܬܐ ܗܘ܂ ܘܥܕܡܐ ܕܫܠܡ ܐܝܬ ܒܗ ܬܝܒܘܬܐ܂ ܩܪܒ ܠܗ ܙܒܢܐ ܕܛܠܩܐ ܛܝܒܘܬܐ܂ ܘܡܡܠܟܐ ܟܢܘܬܐ܂ ܘܠܝܬ ܬܝܒܘܬܐ ܒܗܘ ܙܒܢܐ܂ ܘܫܠܝܐ ܟܐܢܘܬܐ ܡܛܠ ܕܚܣܢܬ ܒܥܘܙܗ ܛܝܒܘܬܐ܂ ܘܡܐ ܕܩܪܒ ܙܒܢܐ ܕܟܐܢܘܬܐ ܠܐ ܨܒܝܐ ܛܝܒܘܬܐ ܡܩܒܠܐ ܠܬܝ̈ܒܐ܂ ܡܛܠ ܕܬܚܘܡܐ ܣܝܡ ܠܗ ܡܦܩܢܐ܂ ܡܢ ܒܬܪ ܗܝܕܝܢ ܠܝܬ ܬܘܒ ܬܝܒܘܬܐ܂ ܩܪܝ ܚܒܝܒܝ܂ ܘܐܝܠܦ ܘܕܥ ܘܚܙܝ܂ ܕܥܠ ܗܕܐ ܟܠܢܫ ܣܢܝܩ ܗܘ ܩܠܝܠ ܡܢ ܣܓܝ܂ ܡܛܠ ܕܣܓ̈ܝܐܝܢ ܕܪܗܛܝܢ ܒܐܣܛܕܝܐ܂ ܘܓܒܪܐ ܢܨܝܚܐ ܫܩܠ ܠܗ ܠܟܠܝܠܐ܂ ܘܟܠܢܫ ܐܝܟ ܥܡܠܗ ܐܓܪܗ ܡܩܒܠ܀