On the New Creation - ܥܲܠ ܚܘܼܕܵܬܼܵܐ ܕܲܒܼܪܝܼܬܼܵܐ

1 :ܚܲܕܼ ܒܵܪܘܿܝܵܐ ܒܪ̣ܵܗ̇ ܠܲܒܼܪܝܼܬܼܵܐ ܡ̣ܢ ܠܵܐ ܡܸܕܹܿܡ 2 ܘܗܘ̤ ܡܚܲܕܸܿܬܼ ܠܵܐ ܡ̣ܢ ܫܝܼ̈ܛܵܬܼܵܐ ܠܲܫܒܼܝܼ̈ܚܵܬܼܵܐ ܀ 3 :ܚܲܕܼ ܨܸܒܼܝܵܢܵܐ ܬܲܩܸܢ ܥܵܠܡܵܐ ܥܡܝܼܠ ܒܲܬܼܥܵܫܵܐ 4 ܘܗܘ̤ ܡܚܲܪܲܪ ܠܹܗ ܡ̣ܢ ܫܘܼܥܒܵܕܼܵܐ ܕܲܥܡܝܼ̈ܠܬܼܵܐ ܀ 5 ܚܲܕܼ ܗ̄ܘ̣ ܡܵܪܵܐ ܕܫܲܪܝܼ ܒܥܲܡܠܵܐ ܕܠܲܝܬܿ ܒܹܗ ܥܲܡܠܵܐ: pb. 56 6 ܘܗܘ̤ ܡܫܲܠܸܡ ܠܹܗ ܒܲܓܼܡܝܼܪܘܼܬܼܵܐ ܕܠܵܐ ܚܲܣܝܼܪܵܐ ܀ 7 :ܚܲܕܼ ܗ̄ܘ̣ ܟܝܵܢܵܐ ܕܐܲܟܼܝܼܢ ܟܠܵܐ ܡܠܝܼܠܹ̈ܐ ܘܚܲܪ݁ܫܹܐ 8 ܘܒܲܠܡܹܐܝܢ ܚܘܼܒܹܿܗ ܡܢܝܼܚ ܬܘܼܩܵܢܵܘ̈ܗܝ ܕܠܵܐ ܢܸܫܬܿܚܩܘܼܢ ܀ 9 :ܚܲܕܼ ܗ̄ܘ̣ ܪܸܡܙܵܐ ܕܙܵܐܹ̇ܢ ܬܹܒܹܝܠ ܒܲܕܼܡܸܬܼܚܲܙ̈ܝܵܢ 10 ܘܲܥܬܼܝܼܕܼ ܕܢܲܚܸܐ ܒܲܕܼܠܵܐ ܚܲܙ̈ܝܵܢ ܠܲܕܼܡܸܬܼܚܲܘܙ̈ܝܵܢ ܀ 11 :ܚܲܕܼ ܫܘܼܠܛܵܢܵܐ ܡܛܲܟܸܿܣ ܪܲܗܛܵܐ ܕܥܝܼܪܹ݁ܐ ܘܐ̄ܢܵܫܵܐ 12 ܘܡ̣ܢ ܒܹܝܬܼ ܓܲܙܹܗ ܡܦܲܠܸܓܼ ܕܸܫܢܹ̈ܐ ܠܨܸܒܼܝܵܢܲܝ̈ܗܘܿܢ ܀ 13 :ܚܲܕܼ ܗ̄ܘ̣ ܟܲܣܝܵܐ ܕܲܟܼܣܸܐ ܟܝܵܢܹܗ ܘܲܓܼܠܸܐ ܥܒܼܵܕܹܗ 14 ܘܟܲܕܼ ܗܘ̤ ܟܲܣܝܵܐ ܗ̄ܘ̣ ܥܒܼܵܕܵܘ̈ܗܝ ܩܵܥܹ̇ܝܢ ܥܲܠ ܟܲܣܝܘܼܬܹܗ ܀ 15 :ܥܒܼܵܕܵܘ̈ܗܝ ܣܵܗ̇ܕܿܝܼܢ ܥܲܠ ܟܲܣܝܘܼܬܹܗ ܕܠܵܐ ܡܸܬܿܕܵܪܟܵܐ 16 ܕܗܵܐ ܡ̣ܢ ܕܲܗܘ̤ܵܘ ܠܵܐ ܡܨܹܝܢ ܘܚܵܙܹ̇ܝܢ ܠܐܲܡܝܼܢܘܼܬܹܗ ܀ 17 :ܐܲܡܝܼܢܵܐܝܼܬܼ ܐܝܼܬܼܵܘܗܝ ܘܐܝܼܬܼܵܘܗܝ ܕܠܵܐ ܫܘܼܪܵܝܵܐ 18 ܘܲܕܼܠܵܐ ܫܘܼܠܵܡ ܨܒܼܵܐ ܕܲܢܩܵܘܘܿܢ ܥܒܼܵܕܹ̈ܐ ܕܲܥܒ݂ܲܕܼ ܀ 19 :ܒܐܲܡܝܼܢܘܼܬܹܗ ܨܒܼܵܐ ܕܲܢܫܵܘܬܸܿܦ ܥܒܼܵܕܹ̈ܐ ܕܲܥܒ݂ܲܕܼ 20 ܕܡ̇ܐ ܕܲܡܩܵܘܹܝܢ ܢܸܗܘܘܿܢ ܣܵܗ̈ܕܹܿܐ ܕܐܲܡܝܼܢܘܼܬܹܗ ܀ 21 :ܐܲܡܝܼܢܵܐܝܼܬܼ ܦܠܸܐ ܕܲܢܩܵܘܸܐ ܐܝܼܬܼܝܵܐ ܘܥܲܡܠܹܗ 22 ܕܐܲܝܟ ܕܐܝܼܬܼܵܘܗܝ ܗܘ̤ ܢܸܗܘܸܐ ܐܲܡܝܼܢ ܐܵܦ ܬܘܼܩܵܢܹܗ ܀ 23 :ܠܵܐ ܗ̄ܘ̣ܵܐ ܠܙܲܒܼܢܵܐ ܒܪ̣ܵܗ̇ ܠܲܒܼܪܝܼܬܼܵܐ ܒܵܪܹܐ ܒܪܝܼܬܼܵܐ 24 ܐܸܠܵܐ ܕܬܸܛܲܪ ܒܐܲܡܝܼܢܘܼܬܼܵܗ̇ ܐܵܦ ܠܹܗ ܠܙܲܒܼܢܵܐ ܀ 25 :ܥܲܡ ܬܘܼܩܵܢܵܗ̇ ܪܵܕܹܝܢ ܙܲܒܼܢܹ̈ܐ ܗܵܐ ܡ̣ܢ ܕܲܗܘ̤ܵܘ 26 ܘܥܵܒܼ̇ܪܝܼܢ ܙܲܒܼܢܹ̈ܐ ܘܗ̤ܝ ܠܵܐ ܥܵܒܼ̇ܪܵܐ ܡ̣ܢ ܡ̇ܐ ܕܐܝܼܬܹܝܗ̇ ܀ 27 :ܕܠܵܐ ܫܘܼܠܵܡܵܐ ܪܵܕܹܝܢ ܛܲܟܼܣܹ̈ܐ ܕܐܲܝܡܝܼܢܘܼܬܼܵܗ̇ 28 ܘܐܵܦܸܢ ܫܵܠ̇ܡܵܐ ܥܲܡ ܫܘܼܠܵܡܵܗ̇ ܐܵܦ ܚܘܼܕܵܬܼܵܗ̇ ܀ 29 :ܥܲܠ ܫܘܼܠܵܡܵܗ̇ ܢܲܓܼܕܲܢܲܝ ܪܸܥܝܵܢܝ ܠܡܸܫܬܲܢܵܝܘܼ 30 ܕܲܚܙܹ̇ܝܬܼ ܕܲܦܠܸܐ ܛܵܒܼ ܡ̣ܢ ܙܲܒܼܢܵܐ ܕܲܒܼܫܘܼܪܵܝܵܗ̇ ܀ 31 :ܦܠܸܐ ܫܘܼܠܵܡܵܗ̇ ܒܲܕܼܢܲܩܝܼܦ ܠܹܗ ܐܵܦ ܚܘܼܕܵܬܼܵܗ̇ 32 ܘܠܹܗ ܠܚܘܼܕܵܬܼܵܐ ܐܸܡ̇ܪܹܬܼ ܕܲܦܠܸܐ ܡ̣ܢ ܫܘܼܪܵܝܵܐ ܀ 33 :ܦܠܸܐ ܫܘܼܪܵܝܵܗ̇ ܕܬܸܩܢܲܬ̤ ܡܸܬܫܹܠܝ ܡ̣ܢ ܠܵܐ ܡܸܕܹܿܡ 34 ܘܲܦܠܸܐ ܣܲܓܼܝܼ ܐܵܦ ܚܘܼܕܵܬܼܵܗ̇ ܕܡ̣ܢ ܫܹܠܝ ܗܵܘܹ̇ܐ ܀ 35 :ܒܗܵܘ̇ ܐܸܣܟܹܿܡܵܐ ܕܲܗܘ̤ܵܬܼ ܡܸܢܫܹܠܝ ܡ̣ܢ ܠܵܐ ܡܸܕܸܿܡ 36 ܗܵܘ̇ܝܵܐ ܠܚܲܪܬܼܵܐ ܡܸܕܸܿܡ ܕܲܦܠܸܐ ܡ̣ܢ ܩܲܕܼܡ̇ܝܵܐ ܀ 37 :ܦܠܸܐ ܠܹܗ ܠܛܵܒܼܵܐ ܠܲܡܚܲܕܵܬܼܘܼ ܒܪܝܼܬܼܵܐ ܕܲܒܼܪܵܐ 38 ܕܲܒܼܚܘܼܕܵܬܼܵܗ̇ ܬܩܵܘܸܐ ܥܲܡܹܗ ܕܠܵܐ ܫܘܼܠܵܡܵܐ ܀ 39 :ܕܠܵܐ ܫܘܼܠܵܡܵܐ ܪܓܼܝܼܓܼ ܗ̄ܘ̣ܵܐ ܕܬܸܗܘܸܐ ܡ̣ܢ ܫܘܼܪܵܝܵܐ 40 ܘܲܡܫܲܠܸܡ ܠܵܗ̇ ܠܪܸܓܲܬܼ ܚܘܼܒܹܿܗ ܒܝܘܿܡ ܫܘܼܠܵܡܵܐ ܀ 41 ܗܵܢ ܨܸܒܼܝܵܢܵܐ ܗܘ̤ܵܐ ܠܹܗ ܡܸܡܬܼܘܿܡ ܕܠܵܐ ܫܘܼܪܵܝܵܐ: pb. 57 42 ܕܬܸܗܘܸܐ ܠܘܼܩܕܼܵܡ ܕܲܡܠܸܐ ܙܲܒܼܢܵܐ ܘܟܸܢ ܕܲܠܥܵܠܲܡ ܀ 43 :ܝܵ̇ܕܲܥ ܗ̄ܘ̣ܵܐ ܠܹܗ ܠܗܵܢ ܨܸܒܼܝܵܢܵܐ ܩܕܼܵܡ ܟܠܡܸܕܸܿܡ 44 ܘܠܵܘ ܚܲܕܼܬܼܵܐܝܼܬܼ ܨܒܼܵܐ ܕܲܢܬܲܩܸܢ ܘܐܲܟܸܿܢ ܬܲܩܸܢ ܀ 45 :ܡܦܵܣ ܗ̄ܘ̣ܵܐ ܣܲܓܿܝܼ ܐܵܦ ܒܚܘܼܕܼܵܬܼܵܐ ܕܒܼܵܬܲܪ ܕܒܼܵܢܹ̈ܐ 46 ܘܠܵܘ ܚܘܼܫܵܒܼܵܐ ܥܨ̣ܵܝܗܝ ܕܲܢܚܲܕܸܿܬܼ ܡ̇ܐ ܕܲܡܚܲܕܸܿܡ ܀ 47 :ܠܲܝܬܿ ܚܘܼܫܵܒܼܵܐ ܠܗܵܘ̇ ܚܘܼܫܵܒܼܵܐ ܕܠܵܐ ܡܸܬܼܚܲܫܲܒܼ 48 ܘܠܵܐ ܨܸܒܼܝܵܢܵܐ ܠܗܵܘ̇ ܨܸܒܼܝܵܢܵܐ ܕܠܵܐ ܨܒܼܵܐ ܘܨܵܒܹ̇ܐ ܀ 49 :ܡܚܲܫܲܒ̣ ܗ̄ܘ̣ܵܐ ܠܹܗ ܗܵܘ̇ ܡ̇ܐ ܕܲܣܥ݂ܲܪ ܥܕܼܠܵܐ ܢܸܣܥܘܿܪ 50 ܘܲܨܒܸܐ ܗ̄ܘ̣ܵܐ ܠܹܗ ܗܵܘ̇ ܨܸܒܼܝܵܢܵܐ ܕܲܨܒܼܵܐ ܘܲܗܘ̤ܵܘ ܀ 51 :ܠܵܘ ܚܲܕܼܬܼܵܐܝܼܬܼ ܣܥ݂ܲܪ ܟܠ ܕܣܥ݂ܲܪ ܘܲܥܬܼܝܼܕܼ ܕܢܸܣܥܿܪ 52 ܒܗܵܝ̇ ܕܐܝܼܬܼ ܗ̄ܘ̣ܵܐ ܠܹܗ ܟܠܡܵܐ ܕܲܗܘ̤ܵܐ ܥܲܕܠܵܐ ܢܸܗܘܸܐ ܀ 53 :ܚܲܕܼܝܼܡܵܐܝܼܬܼ ܥܒ݂ܲܕܼ ܫܘܼܪܵܝܵܐ ܠܲܥܒܼܵܕܼ ܐܝܼܕܼܵܘ̈ܗܝ 54 ܘܲܫܒܼܝܼܚܵܐܝܼܬܼ ܡܚܲܕܸܿܬܼ ܥܲܡܠܹܗ ܒܫܘܼܠܵܡ ܙܲܒܼܢܹ̈ܐ ܀ 55 :ܙܲܒܼܢܹ̈ܐ ܘܛܲܟܸܣܹ̈ܐ ܥܒ݂ܲܕܼ ܠܲܥܒܼܵܕܼܵܘ̈ܗܝ ܫܒܼܝܼܚ ܒܲܥ̇ܒܼܵܕܹܗ 56 ܘܠܵܐ ܡܨܸܐ ܥܒܼܵܕܹܗ ܕܢܑܹܡܲܪ ܕܟܼܡܵܐ ܫܒܼܝܼܚ ܘܲܡܛܲܟܲܣ ܀ 57 :ܫܒܼܝܼܚ ܘܲܡܛܲܟܲܣ ܟܲܟܼܣܵܐ ܕܲܥܒ݂ܲܕܼ ܠܲܬܼܪܹܝܢ ܥܵܠܡܹ̈ܐ 58 ܕܲܠܚܲܕܼ ܝܲܗ̣̄ܒܼܠܹܗ ܙܲܒܼܢܵܐ ܝ̄ܕܼܝܼܥܵܐ ܘܚܲܕܼ ܕܲܠܥܵܠܲܡ ܀ 59 :ܒܚܲܕܼ ܣܵܡ̣ ܛܲܟܼܣܵܐ ܕܲܢܩܵܘܸܐ ܟܠ ܒܲܥܡܝܼ̈ܠܵܬܼܵܐ 60 ܘܲܐ̄ܚܪܹܝܢ ܥܲܒܼܕܹܿܗ ܕܲܕܼܠܵܐ ܥܲܡܠܵܐ ܡܢܝܼܚ ܠܲܥܡܝܼ̈ܠܹܐ ܀ 61 :ܚܲܕܼ ܐܲܣܸܢ ܒܹܗ ܙܢܲܝ̈ ܕܘܼܪܵܫܵܐ ܕܲܡܠܸܐ ܥܲܡܠܹ̈ܐ 62 ܘܠܲܐ̄ܚܪܹܢܵܐ ܡ̣ܠܵܝܗܝ ܗܵܪܓܵܐ ܕܠܲܝܬܿ ܒܹܗ ܡܲܐܝܼܢܘܼܬܼܵܐ ܀ 63 :ܒܲܬܼܪ̈ܲܝܗܘܿܢ ܚܵܪ̣ ܒܥܲܝܢܵܐ ܟܣܝܼܬܼܵܐ ܕܲܓܼܝܼܙܘܼܬܹܗ 64 ܘܛܲܟܸܿܣ ܐܸܢܘܿܢ ܐܲܟܼܡܵܐ ܕܲܦܠܸܐ ܠܝܵ̇ܕܲܥ ܟܠܵܐ ܀ 65 :ܝܵ̇ܕܲܥ ܗ̄ܘ̣ܵܐ ܠܹܗ ܠܥܘܼܡܪܵܐ ܕܙܲܒܼܢܵܐ ܕܡܸܫܬܲܪܝܵܢܵܐ ܗ̄ܘ̣ 66 ܘܩܲܕܸܿܡ ܠܲܒܿܒܹܗ ܒܝܕܼ ܚܘܼܕܵܬܼܵܐ ܕܐܸܫܬܵܘܕܲܝܼ ܠܹܗ ܀ 67 :ܒܝܲܕܼ ܫܘܼܘܕܵܝܹ̈ܐ ܓܲܪܸܓܼ ܢܲܓܼܕܹܿܗ ܠܘܵܬܼ ܝܼܕܲܥܬܹܗ 68 ܕܡ̇ܐ ܕܝܼܕܲܥ ܠܹܗ ܢܗܲܝܡܸܢ ܕܲܡܨܸܐ ܡܩܝܼܡ ܡܲܦܘܼܠܬܹܿܗ ܀ 69 :ܐܲܝܟ ܕܲܠܢܲܦܠܵܐ ܐܲܚܕܹܿܡ ܒܐܝܝܼܕܼܵܐ ܒܸܣܪܵܢܵܝܵܬܵܐ 70 ܘܲܣܡ݂ܲܟ ܬܲܪܨܹܗ ܘܲܬܼܠܵܐ ܚܝܵܪܹܗ ܠܐܲܦܲܝ̈ ܪܵܘܡ̇ܐ ܀ 71 :ܒܐܝܼܕܼܵܐ ܕܐ̄ܢܵܫܵܐ ܐܲܚܕܹܿܗ ܠܥܵܠܡܵܐ ܡܵܪܹܗ ܕܥܵܠܡܵܐ 72 ܘܲܩܥܥ̣ܵܐ ܠܹܗ ܕܩܘܼܡ ܘܐܸܬܼܚܲܝܲܠ ܡ̣ܢ ܟܘܼܪܗܵܢܹܗ ܀ 73 :ܡܸܕܼܪܵܐ ܕܡܸܢܹܗ ܡܲܕܸܿܟ ܝܲܗ̣̄ܒܼ ܠܹܗ ܒܲܕܼܡܘܼܬܼ ܣܲܡܵܐ 74 ܘܐܸܫܬܿܝܼ ܡܸܢܹܗ ܘܢܲܦܨܵܗ̇ ܠܡܸܪܬܼܵܐ ܕܡ̇ܝܘܿܬܼܘܼܬܼܵܐ ܀ 75 :ܚܝ̣ܵܐ ܘܐܸܬܼܢܲܚܲܡ ܥܵܠܡܵܐ ܡܝܼܬܼܵܐ ܐ̄ܪܵܙܵܢܵܐܝܼܬܼ 76 ܘܝܼܠܸܦ ܛܲܟܼܣܵܐ ܕܬܼܘܼܒܼ ܡܸܬܼܢܲܚܲܡ ܒܗܘܿܢ ܒܲܥܒܼܵܕܹ̈ܐ ܀ 77 :ܕܪܲܫ ܠܹܗ ܐܘܼܪܚܵܐ ܠܲܡܣܲܟܵܝܘܼ ܠܬܼܘܼܩܵܢ ܪܵܘܡ̇ܐ 78 ܘܫܲܕܲܪ ܩܘܼܕܸܡ̇ܘܗܝ ܚܲܕܼ ܡ̣ܢ ܕܝܼܠܹܗ ܐܲܝܟ ܗܲܕܿܝܼܠܵܐ ܀ pb. 58 79 :ܚܲܕܼ ܐܝܼܙ ܓܲܘ̣ܵܐ ܫܠܲܚ̣ ܡ̣ܢ ܥܵܠܡܵܐ ܠܥܵܠܡܵܐ ܐ̄ܚܪܹܢܵܐ 80 ܕܲܢܛܲܝܸܒܼ ܠܹܗ ܠܥܵܠܡܵܐ ܥܡܝܼܠܵܐ ܥܵܠܡܵܐ ܓܡܝܼܪ̈ܵܐ ܀ 81 :ܐܲܝܟ ܪܲܒܿܟܿܘܼܡܪܹ̈ܐ ܦܲܩܕܹܿܗ ܕܢܸܥܘܿܠ ܠܩܘܼܕܿܫܵܐ ܕܲܠܥܸܠ 82 ܕܲܢܚܲܣܸܐ ܒܹܗ ܥܲܠ ܚܵܘܒܵܬܹ̈ܗ ܕܥܵܠܡܵܐ ܥܡܝܼܠܵܐ ܀ 83 :ܗܡܲܝܪܵܐ ܕܫܲܝܢܵܐ ܢܣ݂ܲܒܼ ܡ̣ܢ ܟܠܵܐ ܡ̇ܪܹܐ ܟܠܵܐ 84 ܕܡ̇ܐ ܕܗܘ̤ ܨܹܐܕܼܵܘܗܝ ܢܗܲܝܡܸܢ ܟܠܵܐ ܕܨܹܐܕܼܵܘܗܝ ܦܵܢܹ̇ܐ ܀ 85 :ܙܲܒܼܢܵܐ ܬܲܚܸܡ ܕܠܸܐܡܲܬܼܝ ܦܵܢܹ̇ܐ ܡ̣ܢ ܨܹܝܕܼ ܚܘܼܒܹܿܗ 86 ܘܗܵܐ ܡܣܲܟܹܿܝܢ ܠܹܗ ܐܲܪ̈ܥܵܢܵܝܹܐ ܘܲܫܡܲܝܵܢܹ̈ܐ ܀ 87 :ܠܗܵܘ̇ ܒܘܼܣܵܡܵܐ ܡܣܲܟܸܿܐ ܥܵܠܡܵܐ ܥܡܝܼܠ ܒܲܚܛܝܼܬܼܵܐ 88 ܕܢܸܣܲܒܼ ܡܸܢܹܗ ܚܪܘܼܪ ܚܵܘ̈ܒܵܬܼܵܐ ܕܚܵܒܼ ܠܐܲܠܵܗܹܗ ܀ 89 :ܠܗܵܘ̇ ܐܝܼܙ ܓܲܕܵܐ ܕܫܲܕܲܪ ܩܘܼܡ̇ܘܗܝ ܡܣܲܟܸܿܐ ܟܠܝܘܿܡ 90 ܕܢܹܐܬܸܐ ܡܣܲܒܿܪܝܼܘܗܝ ܥܲܠ ܚܘܼܕܵܬܼܵܐ ܕܥܲܬܿܝܼܩܘܼܬܹܗ ܀ 91 :ܡܸܢܫܹܠܝ ܕܵܢܲܚ ܢܘܼܗܪܵܐ ܕܥܵܠܡܵܐ ܡ̣ܢ ܗܵܘ̇ ܥܵܠܡܵܐ 92 ܘܪܵܕܹܦ ܡܸܢܹܗ ܚܸܫܟܵܐ ܕܥܲܡܠܹ̈ܐ ܐܲܪ̈ܥܵܢܵܝܹܐ ܀ 93 :ܒܢܘܼܗܪܵܐ ܕܐܲܦܵܘ̈ܗܝ ܡܲܥܒܲܪ ܐܸܒܼܠܵܐ ܕܲܟܼܡܝܼܪܘܼܬܹܗ 94 ܘܡܲܩܸܠ ܡܸܢܹܗ ܝܘܼܩܪܵܐ ܩܲܫܝܵܐ ܕܚܵܫܘܿܫܘܼܬܼܵܐ ܀ 95 :ܒܩܵܠ ܫܝܼܦܘܿܪܵܐ ܡܥܝܼܪ ܕܲܡܟܿܘܼܬܼܵܐ ܕܠܵܐ ܝܼܕܲܥܬܹܗ 96 ܘܢܵܐܹ̇ܕ ܩܵܐܹ̇ܡ ܐܲܝܟ ܕܡ̣ܢ ܥܲܪܣܵܐ ܕܥܲܣܩܘܼܬܼ ܟܹܐܒܼܵܘ̈ܗܝ ܀ 97 :ܠܟܼܠܹܗ ܒܟܼܠܹܗ ܡܚܲܕܸܿܬܼ ܡ̣ܢ ܫܹܠܝ ܕܠܵܐ ܬܘܼܗܵܝܵܐ 98 ܘܠܵܐ ܦܵܝܫܵܐ ܒܹܗ ܕܘܼܟܿܬܼܵܐ ܕܦܵܝ̇ܫܵܐ ܕܠܵܐ ܚܘܼܕܵܬܼܵܐ ܀ 99 :ܟܠܵܗ̇ ܒܪܝܼܬܼܵܐ ܡܸܬܼܚܲܕܿܬܼܵܐ ܒܹܗ ܒܗܵܘ̇ ܚܘܼܕܵܬܼܵܐ 100 ܫܡܲܝܵܐ ܘܐܲܪܥܵܐ ܘܟܼܠ ܕܲܚܒܼܝܼܫܝܼܢ ܒܲܬܼܚܘܼܡܲܝ̈ܗܘܿܢ ܀ 101 :ܡܠܝܼܠܹ̈ܐ ܘܚܲܪ̈ܫܹܐ ܢܵܚܝܼܢ ܐܲܟܲܚ̄ܕܼ ܡ̣ܢ ܥܲܡܠܲܝ̈ܗܘܿܢ 102 ܘܠܵܐ ܬܘܼܒܼ ܠܵܐܹ̇ܝܢ ܒܲܥܡܝܼ̈ܠܵܬܵܪܐ ܕܣܘܼܢܩܵܢܲܝ̈ܗܘܿܢ ܀ 103 :ܟܠ ܥܲܡ ܟܠܵܐ ܡܢܝܼܚ ܗܵܘ̇ ܥܵܠܡܵܐ ܡ̣ܢ ܟܠ ܝܘܼܩܪ̈ܝܼܢ 104 ܘܠܲܝܬܿ ܒܲܥܒܼܝܼܪܹ̈ܐ ܕܠܵܘ ܒܲܗܝܵܚܹܗ ܡܢܝܼܚ ܠܲܐܝܘܼܬܹܗ ܀ 105 :ܗܘ̤ܝܘܼ ܢܲܚܬܵܐ ܗܵܝ̇ ܕܲܪܫܝܼܡܵܐ ܒܣܸܦܪ̈ܲܝ ܪܘܼܚܵܐ 106 ܘܒܹܗ ܡܸܬܿܬܿܢܝܼܚܝܼܢ ܩܵܠܹ̈ܐ ܫܚܝܼܩܹ̈ܐ ܕܲܢܒܼܝܼܘܼܬܼܵܐ ܀ 107 :ܠܲܝܬܿ ܒܲܢܝܵܚܹܗ ܥܲܡܠܵܐ ܕܫܵܚܹ̇ܩ ܠܲܕܼܢܵܐܲܚ ܒܹܗ 108 ܘܠܵܐ ܬܘܼܒܼ ܩܵܢܹ̇ܛ ܡ̣ܢ ܫܘܼܚܠܵܦܵܐ ܕܩܹܝܬܼ ܛܵܒܼ ܠܲܕܼܒܼܝܼܫ ܀ 109 :ܠܲܝܬܿ ܫܘܼܠܵܦܵܐ ܕܒܹܝܬܼ ܛܵܒܼ ܘܲܠܒܼܝܼܫ ܒܗܵܘ̇ ܚܘܼܕܵܬܼܵܐ 110 ܘܠܵܐ ܕܲܡܣܲܟܸܿܐ ܒܣܘܼܟܵܝ ܣܲܒܼܪܵܐ ܕܣܲܒܼܪܵܐ ܐ̇ܚܪܹܢܵܐ ܀ 111 ܒܹܗ ܐܲܣܝܼܪܝܼܢ ܟܠ ܣܘܼܟܵܝܼ̈ܢ ܕܥܝܼܪܹ̈ܐ ܘܐ̄ܢܵܫܵܐ: pb. 59 112 ܘܒܹܗ ܡܸܣܬܲܝ̈ܟܼܵܢ ܩܲܕ̈ܡܵܝܵܬܼܵܐ ܘܲܐ̄ܚܪ̈ܵܝܵܬܼܵܐ ܀ 113 :ܒܲܠܡܹܐܝܢ ܫܲܝܢܹܗ ܢܵܝ̇ܚܝܼܢ ܟܸܢܫܹ̈ܐ ܕܲܫܡܲܝܵܢܹ̈ܐ 114 ܘܠܵܐ ܡܸܫܬܿܚܩܝܼܢ ܠܲܡܕܲܒܵܪܘܼ ܫܡܲܝܵܐ ܘܐܲܪܥܵܐ ܀ 115 :ܒܹܗ ܡܸܬܿܬܿܢܝܼܚܝܼܢ ܡ̣ܢ ܥܲܡܠܲܝ̈ܗܘܿܢ ܕܲܠܘܵܬܼ ܐ̄ܢܵܫܵܐ 116 ܒܗܵܝ̇ ܕܐܵܦ ܫܵܠܹ̇ܐ ܪܲܗܛܵܐ ܕܐ̄ܢܵܫܵܐ ܘܣܘܼܥܪ̈ܵܢܲܝܗܘܿܢ ܀ 117 :ܢܵܚ̇ܝܿܢ ܐ̄ܢܵܫܵܐ ܡ̣ܢ ܠܲܐܝܘܼܬܼܵܐ ܕܐ̄ܢܵܫܵܝ̈ܬܼܵܐ 118 ܘܠܵܐ ܡܸܣܬܲܢܩܝܼܢ ܥܲܠ ܚܘܼܫܵܚܵܐ ܕܐܲܪ̈ܥܵܢܵܝܵܬܼܵܐ ܀ 119 :ܚܘܼܪܵܪ ܐ̄ܢܵܫܵܐ ܡܢܝܼܚ ܡ̣ܢ ܥܲܡܠܵܐ ܠܪ̈ܘܼܚܵܢܵܝܹܐ 120 ܘܗܵܘܹ̇ܝܢ ܐ̄ܢܵܫܵܐ ܘܲܡܫܲܝܵܢܹ̈ܐ ܒܚܲܕܼ ܕܘܼܒܵܪܵܐ ܀ 121 :ܒܥܲܡܠܹ̈ܐ ܫܚܝܼܩܹ̈ܐ ܥܢܹܝܢ ܪ̈ܘܼܚܵܢܹܐ ܚܠܵܦ ܒܲܪܢܵܫܵܐ 122 ܘܡ̇ܐ ܕܐܸܬܼܚܲܪܲܪܘ ܢܵܚ̣ܘ ܦܵܩܘܿܕܹ̈ܐ ܘܡܸܬܼܦܲܩܕܵܢܹ̈ܐ ܀ 123 :ܚܠܵܦ ܣܘܼܢܩܵܢܹܗ ܦܵܩܕܿܝܼܢ ܗܵܫܵܐ ܘܐܵܦ ܡܸܬܿܦܲܩܕܿܝܼܢ 124 ܘܡ̇ܐ ܕܲܥܬ݂ܲܪ ܗܘ̤ ܠܵܐ ܬܘܼܒܼ ܦܵܩܕܿܝܼܢ ܘܠܵܐ ܡܸܬܼܦܲܩܕܿܝܼܢ ܀ 125 :ܒܥܘܼܬܼܪܵܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ ܡܲܡܠܸܟ ܬܲܡ̇ܢ 126 ܘܥܲܡܹܗ ܢܵܝܚ̇ܝܼܢ ܐܵܦ ܫܲܡܵܫܹ̈ܐ ܕܣܘܼܢܩܵܢ ܚܲܝܵܘ̈ܗܝ ܀ 127 :ܢܝܵܚܵܐ ܓܡܝܼܪܵܐ ܕܠܵܐ ܡܸܫܬܲܚܠܲܦ ܡܩܲܒܸܿܠ ܠܲܐܝܵܐ 128 ܘܠܵܐ ܬܘܼܒܼ ܫܵܚ̇ܩܝܼܢ ܐܵܦ ܡܸܫܬܿܚܩܝܼܢ ܟܝܵܢܹ̈ܐ ܚܠܵܦܵܘܗܝ ܀ 129 :ܟܠܵܗ̇ ܒܪܝܼܬܼܵܐ ܢܵܝ̇ܚܵܐ ܥܲܡܹܗ ܘܗܘ̤ ܥܲܡ ܟܠܵܐ 130 ܘܗܵܘܹ̇ܝܢ ܡܠܝܼ̈ܠܹܐ ܐܵܦ ܡܲܠܵܠܹ̈ܐ ܒܫܸܠܝܵܐ ܘܫܸܬܼܩܵܐ ܀ 131 :ܫܵܠܹ̇ܿܝܢ ܚܲܫܵܘ̈ܗܝ ܢܲܦܫܵܢܵܝܹ̈ܐ ܘܦܲܓܼܪ̈ܵܢܵܝܹܐ 132 ܘܠܵܐ ܡܸܬܼܟܲܬܲܫ ܘܠܵܐ ܡܸܬܼܟܼܬܿܫܝܼܢ ܚܲܫܹ̈ܐ ܠܩܘܼܒܼܠܹܗ ܀ 133 :ܕܵܥܟܵܐ ܚܛܝܼܬܼܵܐ ܘܕܼܵܥܹ̇ܟ ܡ̇ܘܬܵܐ ܗ̄ܘ̣ܵܐ ܠܹܗ 134 ܘܢܵܐܲܚ ܡܸܢܹܗ ܩܹܐܪܣܵܐ ܩܲܫܝܵܐ ܕܡܲܩܪܸܒܼ ܥܲܡܹܗ ܀ 135 :ܒܢܵܘܚܹܗ ܢܵܚܝܼܢ ܐܵܦ ܡ̇ܪ̈ܘܿܕܹܐ ܕܣܲܩ̣ܪܘܼܗܝ ܡܲܓܵܢ 136 ܘܗܵܘܹ̇ܝܢ ܥܲܡܹܗ ܒܚܲܕܼ ܨܸܒܼܝܵܢܵܐ ܕܚܲܕܼ ܒܵܪܘܿܝܵܐ ܀ 137 :ܚܲܕܼ ܨܸܒܼܝܵܢܵܐ ܡܲܡܠܸܟ ܬܲܡ̇ܢ ܥܲܠ ܟܠ ܘܲܒܼܟܼܠ 138 ܘܠܲܝܬܿ ܣܲܩܘܼܒܼܠܵܐ ܘܠܵܐ ܡܥܵܘܟܼܵܢܵܐ ܘܠܵܐ ܟܠ ܟܠܹܗ ܀ 139 :ܚܲܕܼܘ ܡܲܡܠܸܟ ܥܲܡ ܨܸܒܼܝܵܢܵܐ ܕܣܵܡ̣ ܠܹܗ ܬܵܓܼܵܐ 140 ܘܗܘ̤ܝܘܼ ܕܕܼܵܐܹ̇ܝܢ ܒܹܗ ܒܨܸܒܼܝܵܢܵܐ ܕܝܲܗ̣̄ܒ ܠܹܗ ܕܝܼܢܵܐ ܀ 141 :ܟܠܹܗ ܕܝܼܢܵܐ ܢܣ݂ܲܒܼ ܡ̣ܢ ܐܲܒܼܵܐ ܒܪܵܐ ܒܲܪ ܓܸܢܣܲܢ 142 ܘܗܘ̤ܝܘܼ ܕܝܵܗܹ̇ܒܼ ܕܵܫܢܹ̈ܐ ܠܛܵܒܹ̈ܐ ܘܢܸܓܼ̈ܕܹܿܐ ܠܒܼܝܼܫܹ̈ܐ ܀ 143 :ܒܝܘܿܡ ܓܸܠܝܵܢܹܗ ܡܚܵܘܸܐ ܚܲܝܠܵܐ ܕܪܹܫܢܘܼܬܹܗ 144 ܘܲܡܫܲܥܒܸܿܕܼ ܟܠ ܘܲܡܚܲܕܸܿܬܼ ܟܠ ܒܚܹܝܠ ܫܘܼܠܛܵܢܹܗ ܀ 145 :ܠܗܵܘ̇ ܚܘܼܕܵܬܼܵܐ ܕܗܵܘܹ̇ܐ ܒܐܝܼܕܼܵܘ̈ܗܝ ܡܣܲܟܿܝܵܐ ܒܪܝܼܬܼܵܐ 146 ܘܗܵܐ ܡܸܬܿܬܲܢܚܵܐ ܕܠܸܐܡܲܬܼܝ ܗܵܘܹ̇ܐ ܙܒܲܢ ܚܘܼܕܵܬܼܵܗ̇ ܀ 147 ܒܲܕܼܡܘܼܬܼ ܚܸܒܼܠܹ̈ܐ ܡ̇ܚܹ̇ܝܢ ܚܲܫܹ̈ܐ ܠܚܵܫܘܿܫܘܼܬܼܵܗ̇: pb. 60 148 ܕܐܸܡܲܬܼܝ ܬܵܘܠܸܕܼ ܥܘܸܠܹ̈ܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 149 :ܐܲܝܟ ܝܵܠܹܕܿܬܵܐ ܛܥܝܼܢܵܐ ܝܘܼܩܪܵܐ ܕܡ̇ܝܘܿܬܼܘܼܬܼܵܐ 150 ܘܗܘ̤ ܗܘ̇ ܝܵܘܡ̇ܐ ܡܢܝܼܚ ܟܲܪܝܘܼܬܼܵܗ̇ ܘܡܲܥܒܲܪ ܐܸܒܼܠܵܗ̇ ܀ 151 :ܠܒܼܘܼܫ ܚܘܼܕܵܬܼܵܐ ܠܵܒܼܫܵܐ ܡܸܢܫܹܠܝ ܒܪܸܡܙܵܐ ܟܲܣܝܵܐ 152 ܘܒܲܕܼܡܘܼܬܼ ܟܲܠܬܼܵܐ ܩܵܝ̇ܡܵܐ ܒܫܘܼܒܼܚܵܐ ܕܠܵܐ ܡܸܬܼܚܲܒܲܠ ܀ 153 :ܒܫܘܼܒܼܚܵܐ ܪܲܒܵܐ ܚܵܙܝܵܐ ܗܝ̤ ܠܵܗ̇ ܕܲܟܼܡܵܐ ܫܒܼܝܼܚܵܐ 154 ܘܠܵܐ ܡܸܣܬܲܒܼܥܵܐ ܚܙܵܬܼܵܐ ܕܐܲܦܹ̈ܝܗ̇ ܠܥܲܝܢܲܝ̈ ܢܲܦܫܵܗ̇ ܀ 155 :ܕܠܵܐ ܣܲܒܼܥܘܼܬܼܵܐ ܗ̄ܝܼ ܗܵܝ̇ ܚܲܕܼܘܼܬܼܵܐ ܠܲܕܼܚܵܕܹܐ ܒܵܗ̇ 156 ܘܝܲܬܿܝܼܪ ܐ̄ܢܵܫܵܐ ܘܲܡܫܲܝܵܢܹ̈ܐ ܕܫܲܡܸܫܘ ܫܲܦܝܼܪ ܀ 157 :ܐ̄ܢܵܫܵܐ ܘܥܝܼܪܹ݁ܐ ܢܵܚܝܼܢ ܬܲܡ̇ܢ ܒܗܵܘ̇ ܒܘܼܣܵܡܵܐ 158 ܘܗܸܢܘܿܢ ܗܵܘܹ̇ܝܢ ܝܵܪ̈ܬܹ̇ܐ ܕܛܘܼܒܹ̈ܐ ܕܠܵܐ ܫܘܼܠܵܡܵܐ ܀ 159 :ܢܵܝܚܝܼܢ ܥܝܼܪܹ̈ܐ ܡ̣ܢ ܬܸܫܡܸܫܬܵܐ ܕܲܝܠܵܦ ܟܠܵܐ 160 ܘܠܵܐ ܡܸܫܬܲܚܩܝܼܢ ܒܪܲܗܛܵܐ ܐ̄ܡܝܼܢܵܐ ܕܫܘܼܚܠܵܦ ܙܲܒܼܢܹ̈ܐ ܀ 161 :ܢܵܚܝܼܢ ܙܵܘܥܹ̈ܐ ܕܪܸ̈ܥܝܵܢܲܝܗܘܿܢ ܡ̣ܢ ܫܘܼܚܠܵܦܵܐ 162 ܘܠܵܐ ܬܘܼܒܼ ܪܵܓܿܝܼܢ ܪܸܓܿܬܼܵܐ ܣܢܝܼܬܼܵܐ ܒܲܕܼܡܘܼܬܼ ܫܹܐܕܹ̈ܐ ܀ 163 :ܒܵܛܹ̇ܠ ܪܲܗܛܵܐ ܕܡܸܨܛܲܠܝܵܢܹ̈ܐ ܡ̣ܢ ܬܓܼܡܲܝ̈ܗܘܿܢ 164 ܘܫܵܠ̇ܡܝܼܢ ܟܠܗܘܿܢ ܠܚܲܕܼ ܨܼܒܼܝܵܢܵܐ ܕܬܲܩܸܢ ܐܸܘܿܢ ܀ 165 :ܫܵܠܹ̇ܝܢ ܫܹܐܕܹ̈ܐ ܡ̣ܢ ܦܲܩܪܘܼܬܼܵܐ ܕܓܼܘܼܕܵܦܲܝ̈ܗܘܿܢ 166 ܘܲܚܠܵܦ ܨܲܥܪܵܐ ܦܲܪܥܝܼܢ ܫܘܼܒܼܚܵܐ ܟܲܕܼ ܠܵܐ ܨܵܒܹ̇ܝܢ ܀ 167 :ܠܵܐ ܬܘܼܒܼ ܣܵܕܼܪܝܼܢ ܩܹܐܪܣܵܐ ܕܒܸܙܚܵܐ ܠܘܼܩܒܲܠ ܐ̄ܢܵܫܵܐ 168 ܘܠܵܐ ܡܸܫܬܲܥܠܹܝܢ ܠܲܡܨܲܚܵܝܘܼ ܠܫܸܡ ܐܝܼܬܼܘܼܬܼܵܐ ܀ 169 :ܚܲܕܼ ܨܸܒܼܝܵܢܵܐ ܕܚܘܼܒܵܐ ܗܵܘܹ̇ܐ ܠܟܼܠ ܥܲܡ ܟܠܵܐ 170 ܠܲܡܫܲܝܵܢܹ̈ܐ ܘܠܲܐܪ̈ܥܵܢܵܝܹܐ ܠܛܵܒܹ̈ܐ ܘܒܼܝܼܫܹ̈ܐ ܀ 171 :ܛܵܒܹ̈ܐ ܘܒܼܝܼܫܹ̈ܐ ܩܵܢܹ̇ܝܢ ܚܘܼܒܵܐ ܕܠܵܐ ܡܸܬܼܦܲܟܲܗ 172 ܘܟܲܕܼ ܛܵܒܼ ܦܪܝܼܫܝܼܢ ܒܝܲܕܼ ܣܘܼܥܪ̈ܵܢܹܐ ܒܚܘܼܒܵܐ ܫܵܠ̇ܡܝܼܢ ܀ 173 :ܒܚܘܼܒܵܐ ܫܲܠܡܵܐ ܫܵܠ̇ܡܝܼܢ ܠܲܚܕܼܵܐ ܥܝܼܪܹ̈ܐ ܘܐ̄ܢܵܫܵܐ 174 ܠܲܡܙܲܕܵܩܘܼ ܚܕܼܵܐ ܬܸܫܒܿܘܿܚܬܵܐ ܠܚܲܕܼ ܒܵܪܘܿܚܵܐ ܀ 175 :ܫܘܼܒܼܚܵܐ ܩܵܥܹ̇ܝܢ ܛܵܒܹ̇ܐ ܘܒܼܝܼܫܹ̈ܐ ܟܲܪ ܕܐܝܼܬܲܝܗܘܿܢ 176 ܘܠܲܝܬܿ ܫܘܼܠܵܡܵܐ ܠܩܵܠ ܬܸܫܒܿܘܿܚܬܵܐ ܕܲܡܫܲܒܿܚܵܢܹ̈ܐ ܀ 177 :ܫܘܼܒܼܚܵܐ ܗ̄ܘ̣ ܗܸܪܓܵܐ ܕܐܲܡܝܼܢܝܼܢ ܒܹܗ ܐܲܡܝܼܢܵܐܝܼܬܼ 178 ܘܐܲܡܝܼܢܘܼܬܼܵܐ ܗ̄ܝܼ ܕܠܵܐ ܩܘܼܛܵܥܵܐ ܘܲܕܼܠܵܐ ܥܲܡܠܵܐ ܀ 179 :ܒܸܠܵܥܵܕܼ ܥܲܡܠܵܐ ܗܵܘܹ̇ܐ ܬܲܡ̇ܢ ܟܠܡܵܐ ܕܗܵܘܹ̇ܐ 180 ܘܠܵܐ ܡܨܸܐ ܦܘܼܡ̇ܐ ܟܡܵܐ ܕܡ̇ܝܘܿܬܼܵܐ ܗ̄ܘ̣ ܕܐܵܡܲܪ ܕܐܲܝܟܲܢ ܀ 181 :ܐܲܝܟܲܢ ܡܲܨܝܵܐ ܕܡ̇ܝܘܿܬܼܘܼܬܼܘܼܬܼܵܐ ܬܸܬܼܢܸܐ ܒܡܸܠܹ̈ܐ 182 ܥܲܠ ܕܘܼܒܵܪܵܐ ܕܗܵܘ̇ ܬܘܼܩܵܢܵܐ ܠܵܐ ܡ̇ܝܘܿܬܼܵܐ ܀ 183 :ܐܲܝܟܲܢ ܡܸܫܟܲܚ ܠܸܫܵܢ ܒܸܣܪܵܐ ܡܸܬܼܚܲܒܿܠܵܢܵܐ 184 ܕܲܢܨܘܼܪ ܛܘܼܦܣܵܐ ܕܗܵܝ̇ ܦܲܐܝܘܼܬܼܵܐ ܕܠܲܝܬܿ ܠܵܗ̇ ܦܸܚܡܵܐ ܀ pb. 61 185 :ܠܲܝܬܿ ܠܹܗ ܦܸܚܡܵܐ ܠܗܵܘ̇ ܕܘܼܒܵܪܵܐ ܒܗܵܢ ܕܘܼܒܵܪܵܐ 186 ܘܠܵܐ ܬܲܚܘܝܼܬܼܵܐ ܕܲܡܚܵܘܝܵܐ ܠܹܗ ܚܲܬܿܝܼܬܼܵܐܝܼܬܼ ܀ 187 :ܠܹܗܘ̣ ܒܲܠܚܘܿܕܼ ܕܵܡܹ̇ܐ ܕܘܼܡܝܵܐ ܕܚܲܬܿܝܼܬܼܘܼܬܹܗ 188 ܘܗܘ̤ ܡܨܸܐ ܕܢܼܬܼܢܸܐ ܥܲܠ ܦܲܬܝܼܘܼܬܼܵܐ ܕܪܲܒܿܘܼܬܼ ܫܘܼܒܼܚܹܗ ܀ 189 :ܫܘܼܒܼܚܹܗ ܓܲܪܓܲܢܝ ܕܐܸܬܼܢܸܐ ܒܡܸܠܹ̈ܐ ܠܲܒܫܼܝܼܚܘܼܬܼܵܗ̇ 190 ܕܲܟܼܡܸܐ ܫܒܼܝܼܚܵܐ ܘܲܟܼܡܵܐ ܡܫܲܒܿܚܵܐ ܠܲܕܼܫܵܘܹ̇ܝܢ ܠܵܗ̇ ܀ 191 :ܠܲܡܫܲܒܿܚܵܢܹ̈ܐ ܚܙܹ̇ܝܬܼ ܕܲܥܬܼܝܼܕܼܝܼܢ ܠܡܸܫܬܲܒܵܚܘ 192 ܘܐܲܚܝ̣ܕܲܢܝ ܬܲܗܪܵܐ ܒܪܲܒܿܘܼܬܼ ܫܘܼܒܼܚܵܐ ܕܠܵܐ ܡܸܬܼܡܲܠܲܠ ܀ 193 :ܠܵܐ ܡܸܬܼܡܲܠܠܵܐ ܗܵܝ̇ ܬܸܫܒܿܘܿܚܬܵܐ ܕܲܒܼܗܵܘ̇ ܝܵܘܡ̇ܐ 194 ܕܐܲܝܟܲܢ ܗܵܘ̇ܝܵܐ ܒܪܝܼܬܼܵܐ ܐ̄ܚܪܹܬܼܵܐ ܚܠܵܦ ܗܵܝ̇ ܕܐܝܼܬܹܝܗ̇ ܀ 195 :ܠܵܐ ܗ̄ܘ̣ܵܐ ܒܪܝܼܬܼܵܐ ܐ̄ܚܪܹܬܼܵܐ ܗܵܘ̇ܝܵܐ ܒܪܝܼܬܼܵܐ ܬܲܡ̇ܢ 196 ܘܠܵܐ ܬܘܼܒܼ ܡܸܕܸܿܡ ܐ̄ܚܪܹܢܵܐ ܩܵܐܹ̇ܡ ܚܠܵܦ ܩܲܕܼܡ̇ܝܵܐ ܀ 197 :ܗܘ̤ ܗܵܘ̇ ܡܸܕܸܿܡ ܕܲܗܘ̤ܵܐ ܒܪܵܫܝܼܬܼ ܡ̣ܢ ܠܵܐ ܡܸܕܹܿܡ 198 ܗܘ̤ܝܘܼ ܕܗܵܘܹ̇ܐ ܗܘܵܝܵܐ ܕܲܫܒܼܝܼܚ ܡ̣ܢ ܩܲܕܼܡ̇ܝܵܐ ܀ 199 :ܗܘ̤ܝܘ ܟܝܵܢܵܐ ܕܪ̈ܘܼܚܵܢܵܝܹܐ ܕܩܵܢܹ̇ܐ ܫܘܼܒܼܚܵܐ 200 ܘܲܟܼܝܵܢܵܐܝܼܬܼ ܡܩܵܘܹܝܢ ܒܲܚܕܼܵܐ ܕܠܵܐ ܫܘܼܚܠܵܦܵܐ ܀ 201 :ܗܘ̤ܝܘܼ ܓܸܢܣܵܐ ܕܦܲܓܼܪ̈ܵܢܵܝܹܐ ܕܝܵܪܹܬܼ ܚܲܝܹ̈ܐ 202 ܘܒܹܗ ܒܲܟܼܝܵܢܗܘܿܢ ܩܵܢܹ̇ܝܢ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 203 :ܠܦܲܓܼܪܵܐ ܘܢܲܦܫܵܐ ܡܢܝܼܚ ܢܘܼܚܵܡܵܐ ܕܡܸܬܼܢܲܚܡܵܢܹ̈ܐ 204 ܘܲܕܼܠܵܐ ܫܲܠܘܵܐ ܙܵܡ̇ܪܝܼܢ ܫܘܼܒܼܚܵܐ ܠܲܡܚܲܕܸܿܬܼ ܟܠ ܀ 205 :ܠܲܡܚܲܕܸܿܕܼ ܟܠ ܦܵܪܥ̇ܝܼܢ ܛܲܝܒܿܘܼ ܡܸܬܼܚܲܕܲܬܼܵܢܹ̈ܐ 206 ܒܲܕܼܠܵܐ ܦܵܐܹ̇ܫ ܟܠ ܡ̣ܢ ܟܠܵܐ ܕܠܵܐ ܡܸܬܼܚܲܕܲܬܼ ܀ 207 :ܟܠ ܡܸܬܼܚܲܬܼ ܟܲܕܼ ܠܵܐ ܡ̇ܘܒܸܿܕܼ ܟܝܵܢܹܗ ܩܲܕܼܡ̇ܐ 208 ܘܟܼܠ ܡܸܫܬܲܚܠܲܦ ܘܲܠܫܘܼܚܠܵܦܹܗ ܠܲܝܬܿ ܫܘܼܠܵܦܵܐ ܀ 209 :ܡܠܝܼܠܹ̈ܐ ܥܵܬܹ̇ܪܝܼܢ ܒܛܘܼܒܹ̈ܐ ܕܪܵܡܝܼܢ ܡ̣ܢ ܡܲܠܵܠܹ̈ܐ 210 ܘܐܵܦ ܫܲܬܿܝܼܩܹ̈ܐ ܢܵܝ̇ܚܝܼܢ ܒܛܲܟܼܣܵܐ ܕܠܵܐ ܡܸܬܿܕܵܘܲܕܼ ܀ 211 :ܫܡܲܝܵܐ ܡܩܵܘܹܝܢ ܒܹܗ ܒܲܥܥܝܵܕܼܵܐ ܕܐܸܬܿܬܲܩܲܢܘ ܒܹܗ 212 ܟܲܕܼ ܠܵܐ ܙܲܝ̇ܥܝܼܢ ܘܠܵܐ ܡܸܬܿܬܿܙܝܼܥܝܼܢ ܥܲܡܘܼܕܲܝ̈ܗܘܿܢ ܀ 213 :ܫܸܡܫܵܐ ܘܣܲܗܪܵܐ ܒܵܛܹ̇ܠ ܪܲܗܛܵܐ ܕܐܲܡܝܼܢܝܼܢ ܒܹܗ 214 ܠܵܘ ܟܲܕܼ ܒܵܛ̇ܠܝܼܢ ܐܸܠܵܐ ܕܢܵܚ̇ܝܼܢ ܡ̣ܢ ܪ̈ܲܗܛܲܝܗܘܿܢ ܀ 215 :ܡ̣ܢ ܪ̈ܲܗܛܲܝܗܘܿܢ ܢܵܚ̇ܝܼܢ ܚܲܪ̈ܫܹܐ ܕܠܵܐ ܒܘܼܝܵܢܵܐ 216 ܘܗܵܦܟܿܝܼܢ ܗܵܘܹ̇ܝܢ ܗܵܘ̇ ܢܲܗܝܼܪܵܐ ܕܲܗܘ̤ܵܐ ܒܪܵܫܝܼܬܼ ܀ 217 :ܠܢܘܼܗܪܵܐ ܗܵܦܟܵܐ ܟܢܝܼܫܘܼܬܼ ܢܘܼܗܪܵܐ ܕܐܸܣܦܹܪ̈ܲܝܗܘܿܢ 218 ܘܒܹܗ ܒܲܟܼܝܵܢܹܗ ܡܩܵܘܸܐ ܢܘܼܗܪܵܐ ܕܠܵܐ ܫܘܼܠܵܡܵܐ ܀ 219 :ܠܵܐ ܟܹܝܬܼ ܐܵܒܹ̇ܕ ܡ̣ܢ ܢܲܗܝܼܪܹ̈ܐ ܘܠܵܐ ܚܲܕܼ ܨܸܡܚܵܐ 220 ܘܠܵܐ ܡܸܬܼܒܲܨܲܪ ܡ̣ܢ ܦܲܐܝܘܼܬܼܵܐ ܕܢܲܗܝܼܪܘܼܬܹܗ ܀ 221 :ܠܲܝܬܿ ܒܲܟܼܝܵܢܹܗ ܕܡ̇ܘܒܸܿܕܼ ܡܸܕܼܵܡ ܕܐܝܼܬܼ ܒܲܟܼܝܵܢܹܗ 222 ܘܠܵܐ ܕܲܡܩܵܘܸܐ ܒܗܵܘ̇ ܡ̇ܐ ܕܐܝܼܬܼܵܘܗܝ ܕܠܵܐ ܫܘܼܚܠܵܦܵܐ ܀ pb. 62 223 :ܗܵܘ̇ ܫܘܼܠܵܦܵܐ ܥܵܨܹ̇ܐ ܠܟܼܠܵܐ ܠܡܸܫܬܲܚܠܵܦܘܼ 224 ܘܡ̇ܐ ܕܐܸܫܬܲܚܠܲܦ ܩܵܘܝܼ ܒܛܲܟܼܣܵܐ ܕܠܵܐ ܡܸܫܬܲܚܠܲܦ ܀ 225 :ܫܵܠܹ̇ܐ ܡܲܫܒܼܵܐ ܕܙܵܘܥܵܘ̈ܗܝ ܕܐܵܐܲܪ ܩܲܠܝܼܠ ܪܲܗܛܵܐ 226 ܒܲܕܼܠܵܐ ܚܵܫ̇ܚܵܐ ܚܫܲܚܬܼܵܐ ܕܡܲܫܒܹܗ ܠܐܲܪ̈ܥܵܢܵܝܹܐ ܀ 227 :ܐܲܝܟ ܕܒܲܠܡܹܐܢܵܐ ܥܵܐܹ̇ܠ ܢܵܐܲܚ ܡ̣ܢ ܫܘܼܚܠܵܦܵܘ̈ܗܝ 228 ܘܠܵܐ ܫܵܚܹ̇ܩ ܠܪ̈ܘܼܚܵܢܵܝܹܐ ܕܲܢܙܝܼܥܘܼܢܵܝܗܝ ܀ 229 :ܠܵܐ ܡܸܬܼܒܲܥܝܵܐ ܠܒܼܝܼܕܼܘܼܬܼ ܓܘܼܫܡܵܐ ܕܩܲܛܝܼܢܘܼܬܹܗ 230 ܘܠܵܐ ܕܲܢܩܲܒܸܿܠ ܡܲܝ̈ܵܐ ܪ̈ܦܲܝܵܐ ܘܢܸܪܘܿܣ ܒܐܲܪܥܵܐ ܀ 231 :ܐܵܦ ܗܘ̤ ܟܝܵܢܵܐ ܕܡܲܝܵ̈ܐ ܪ̈ܦܲܝܵܐ ܡܸܫܠܵܐ ܫܵܠܹ̇ܐ 232 ܘܠܵܐ ܡܸܬܼܒܲܥܪܲܪ ܒܲܥܪܝܼܪܵܐܝܼܬܼ ܐܲܝܟ ܕܲܒܼܩܲܕܼܡ̇ܐ ܀ 233 :ܠܵܐ ܫܵܚܹ̇ܩ ܠܹܗ ܡܲܫܒܼܵܐ ܕܪ̈ܘܼܚܹܐ ܠܓܼܘܼܫܡܵܐ ܪܲܦܝܵܐ 234 ܘܠܵܐ ܗܘ̤ ܪܲܦܝܵܐ ܪܵܕܹܐ ܒܛܲܟܼܣܵܐ ܕܐܲܫܝܼܕܼܘܼܬܹܗ ܀ 235 :ܠܵܐ ܡܸܫܬܲܚܩܝܼܢ ܟܝܵܢܹ̈ܐ ܫܚܝܼܩܹ̈ܐ ܒܫܘܼܚܠܵܦܲܝ̈ܗܘܿܢ 236 ܒܲܕܼ ܠܲܝܬܿ ܕܲܣܢܝܼܩ ܥܲܠ ܫܘܼܚܠܵܦܵܐ ܕܡ̣ܢ ܐܸܣܛܘܼܟܼܣܹ̈ܐ ܀ 237 :ܠܲܝܬܿ ܐܸܣܛܘܼܟܼܣܹ̈ܐ ܒܗܵܘ̇ ܕܘܼܒܵܪܵܐ ܪܘܼܚܢܵܝܵܐ 238 ܘܠܵܐ ܕܲܡܫܲܡܸܫ ܘܠܵܐ ܕܡܸܫܬܲܡܲܫ ܡ̣ܢ ܒܲܪ ܙܵܘܓܸܿܗ ܀ 239 :ܚܲܕܼ ܗ̄ܘ̣ ܚܲܝܠܵܐ ܕܢܵܛ̇ܲܪ ܟܠܵܐ ܒܸܠܥܵܕܼ ܟܠܵܐ 240 ܘܲܒܼܚܹܝܠ ܚܲܝܠܹܗ ܬܠܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܀ 241 :ܒܚܲܝܠܹܗ ܡܚܲܝܸܠ ܠܲܡܠܲܝܼܠܘܼܬܼܵܐ ܕܠܵܐ ܬܸܫܬܿܚܠܲܦ 242 ܘܲܠܚܲܪܫܘܼܬܼܵܐ ܕܬܸܛܲܪ ܛܲܟܼܣܵܐ ܕܫܸܠܝܵܐ ܘܫܸܬܼܩܵܐ ܀ 243 :ܒܫܸܠܝܵܐ ܘܫܸܬܼܩܵܐ ܡܩܵܘܹܝܢ ܚܲܪ̈ܫܹܐ ܒܲܟܼܝܵܢܲܝ̈ܗܘܿܢ 244 ܘܠܵܐ ܡܸܬܿܬܲܒܼܥܝܼܢ ܠܲܡܝܲܩܵܪܘܼ ܠܩܲܢܝܲܝ̈ ܡܸܠܬܼܵܐ ܀ 245 :ܩܲܢܝܲܝ̈ ܡܸܠܬܼܵܐ ܩܵܢܹ̇ܝܢ ܚܲܝܠܵܐ ܕܠܵܐ ܣܘܼܢܩܵܢܵܐ 246 ܘܠܲܝܬܿ ܣܘܼܢܩܵܢܵܐ ܥܲܠ ܣܘܼܢܩܵܢܵܐ ܕܡ̣ܢ ܫܲܬܼܝܼܩܹ̈ܐ ܀ 247 :ܡ̇ܢܵܐ ܚܵܫܲܚ̇ ܕܸܢܚܹܗ ܕܫܸܡܫܵܐ ܠܲܕܼܠܵܐ ܥܲܡܠܵܐ 248 ܘܡ̇ܢܵܐ ܡܵܘܬܲܪ ܪܲܗܛܹܗ ܕܣܲܗܪܵܐ ܠܲܕܼܠܵܐ ܙܲܒܼܢܵܐ ܀ 249 :ܡ̇ܢ ܗܸܢܝܵܢܵܐ ܡ̣ܢ ܨܸܡܚܲܝ̈ܗܘܿܢ ܕܟܼܵܟܿܒܲܝ̈ ܢܘܼܗܪܵܐ 250 ܠܐܲܝܢܵܐ ܕܠܵܐ ܣܢܝܼܩ ܥܲܠ ܢܲܗܝܼܪܵܐ ܕܡ̣ܢ ܢܲܗܝܼܪܹ̈ܐ ܀ 251 :ܠܡܵܢܵܐ ܡܲܫܒܼܵܐ ܕܙܵܘܥܵܘ̈ܗܝ ܕܐܵܐܲܪ ܠܲܕܼܠܵܐ ܣܵܘܩܵܐ 252 ܘܥܲܠ ܡ̇ܢ ܩܘܼܪܵܐ ܘܚܲܡܝܼܡܘܼܬܼܵܐ ܠܲܕܼܠܵܐ ܚܲܫܹ̈ܐ ܀ 253 :ܠܡܵܢܵܐ ܡܲܚܬܼܵܐ ܕܡܸܛܪܵܐ ܘܛܲܠܵܐ ܠܠܵܐ ܚܲܣܝܼܪܹ̈ܐ 254 ܘܥܲܠ ܡ̇ܢ ܙܲܒܼܢܹ̈ܐ ܐܵܘ ܥܸܕܼܢܹ̈ܐ ܠܲܕܼܠܵܐ ܙܲܒܼܢܹ̈ܐ ܀ 255 :ܠܡܵܢ ܫܘܼܚܠܵܦܹ̈ܐ ܕܩܲܝܛܵܐ ܘܣܲܬܼܘܵܐ ܠܲܕܼܠܵܐ ܫܘܼܚܠܵܦ 256 ܐܵܘ ܡܼܢܝܵܐ ܕܝܲܪ̈ܚܹܐ ܘܝܵܘܡܹ̈ܐ ܠܲܕܼܠܵܐ ܫܘܼܠܵܡ ܀ 257 :ܠܡܵܢ ܡ̇ܘܥܝܼܬܼܵܐ ܕܙܲܪ̈ܥܹܐ ܘܦܹܐܪܹ̈ܐ ܠܲܕܼܠܵܐ ܐܘܼܟܼܠܵܐ 258 ܘܥܲܠ ܡ̇ܢ ܪ̈ܲܚܫܵܐ ܐܵܦ ܚܲܝ̈ܘܵܬܼܵܐ ܠܲܕܼܠܵܐ ܕܘܼܪܵܫ ܀ 259 :ܠܡܵܢ ܟܠ ܟܠܹܗ ܡܸܕܸܿܡ ܕܐܝܼܬܼܵܘܗܝ ܡܸܬܼܐܲܟܼܠܵܢܵܐ 260 ܠܐܲܝܢܵܐ ܕܠܵܐ ܣܡܝܼܩ ܥܲܠ ܚܘܼܝܠ̇ܐ ܕܡ̣ܢ ܡܹܐܟܼܘܼܠܬܵܐ ܀ pb. 63 261 :ܠܡܵܢ ܐܝܼܙ̈ ܓܲܕܹܿܐ ܘܡܸܫܬܲܕܿܪ̈ܢܹܐ ܕܨܹܝܕܼ ܒܲܪܢܵܫܵܐ 262 ܐܲܝܟܵܐ ܕܐܲܣܝܼܪ ܝܲܨܪܵܐ ܫܲܪܝܵܠ ܒܪܸܚܡܲܬܼ ܚܘܼܒܵܐ ܀ 263 :ܐܲܣܝܼܪ ܐ̄ܢܵܫܵܐ ܒܪܸܚܡܲܬܼ ܚܘܼܒܵܐ ܒܗܵܘ̇ ܬܘܼܩܵܢܵܐ 264 ܘܠܲܝܬܿ ܫܘܼܠܛܵܢܵܐ ܠܡܸܫܬܲܠܵܦܘܼ ܨܹܝܕܼ ܕܲܠܩܘܼܒܼܠܵܐ ܀ 265 :ܥܲܡܹܗ ܕܐ̄ܢܵܫܵܐ ܢܵܐܲܚ ܟܠܵܐ ܡ̣ܢ ܟܠ ܥܲܡܠܝܼ̈ܢ 266 ܘܒܹܗ ܒܲܢܝܵܝܵܐ ܢܛܝܼܪ ܟܠ ܡܸܕܸܿܡ ܕܠܵܐ ܐܲܒܼܕܵܢܵܐ ܀ 267 :ܠܵܐ ܐ̄ܢܵܫ ܢܹܐܡܲܪ ܕܐܵܒܹ̇ܡ ܡ̣ܢ ܟܠ ܕܲܗܘ̤ܵܐ 268 ܕܗܵܐ ܟܠ ܡܸܕܸܿܡ ܒܹܗ ܒܲܟܼܝܵܢܹܐ ܡܩܵܘܸܐ ܘܲܢܛܝܼܪ ܀ 269 :ܒܹܗ ܒܲܟܼܝܵܢܵܐ ܕܢܲܗܝܼܪܘܼܬܹܗ ܡܩܵܘܸܐ ܢܘܼܗܪܵܐ 270 ܠܵܘ ܒܐܸܣܪܵܐ ܐܸܠܵܐ ܒܛܲܟܼܣܵܐ ܕܐܸܬܿܬܲܩܢ ܒܹܗ ܀ 271 :ܒܹܗ ܒܲܟܼܝܵܢܵܐ ܕܩܲܛܝܼܢܘܼܬܹܗ ܡܩܵܘܸܐ ܐܸܐܲܪ 272 ܠܵܘ ܟܲܕܼ ܢܵܫܹ̇ܒܼ ܐܸܠܵܐ ܒܫܸܠܝܵܐ ܕܠܵܐ ܫܘܼܚܠܵܦܵܐ ܀ 273 :ܒܹܗ ܒܲܟܼܝܵܢܵܐ ܕܚܸܫܘܿܟܼܘܼܬܼܵܐ ܢܛܝܼܪ ܚܸܫܘܿܟܼܵܐ 274 ܠܵܐ ܗ̄ܘ̣ܵܐ ܒܛܲܟܼܣܵܐ ܕܗܵܢ ܦܘܼܪܫܵܢܵܐ ܐܸܠܵܐ ܒܲܐ̄ܪܹܝܢ ܀ 275 :ܠܲܝܬܿ ܦܘܼܪܫܵܢܵܐ ܒܹܝܬܼ ܢܲܗܝܼܪܵܐ ܘܲܠܚܸܫܘܿܟܼܵܐ 276 ܒܲܕܼܠܲܝܬܿ ܫܸܡܫܵܐ ܕܦܵܪܹܫ ܠܸܠܝܵܐ ܡ̣ܢ ܐܝܼܡܵܡܵܐ ܀ 277 :ܘܠܲܝܬܿ ܐܝܼܡܵܡܵܐ ܒܲܕܼ ܠܲܝܬܿ ܥܲܡܠܵܐ ܠܲܟܼܠܵܐ ܥܲܡܠܵܐ 278 ܘܠܵܐ ܬܘܼܒܼ ܠܸܠܝܵܐ ܒܲܕܼ ܠܲܝܬܿ ܫܸܢܬܼܵܐ ܠܲܕܼܠܵܐ ܫܸܢܬܼܵܐ ܀ 279 :ܒܸܠܥܵܕܼ ܫܸܢܬܼܵܐ ܘܥܲܡܠܹ̈ܐ ܘܚܲܫܹ̈ܐ ܚܵܝܹ̇ܐ ܐ̄ܢܵܫܵܐ 280 ܡ̇ܕܹܝܢ ܠܵܐ ܣܡܝܼܩ ܥܲܠ ܕܘܼܒܵܪܵܐ ܕܠܹܠܲܚ ܐܝܼܡܵܩ ܀ 281 :ܠܣܘܿܢܩܵܢ ܚܲܝܵܘ̈ܗܝ ܗ̤ܘܲܝ̈ ܘܐܸܬܿܬܲܩܲܢ ܗܵܠܹܝܢ ܕܲܗ̤ܘܲܝ̈ 282 ܘܲܒܼܒܼܘܼܣܵܡܹܗ ܢܵܐܹ̇ܚ ܪܲܗܛܵܐ ܕܲܡܫܲܡܫܵܢܵܘ̈ܗܝ ܀ 283 :ܢܵܚ̇ܝܵܐ ܐܲܪܥܵܐ ܡ̣ܢ ܦܘܼܠܚܵܢܵܐ ܕܩܲܝܛܵܐ ܘܣܲܬܼܘܵܐ 284 ܘܠܵܐ ܡܸܫܬܲܚܩܵܐ ܠܡܸܬܲܠ ܦܹܐܪܹ̈ܐ ܠܲܕܼܦܵܠ̇ܲܚ ܠܵܗ̇ ܀ 285 :ܡܩܵܘܝܵܐ ܒܛܲܟܼܣܵܐ ܗܵܘ̇ ܕܲܗܘ̤ܵܬܼ ܒܹܗ ܒܪܵܫܝܼܬܼ ܕܲܗܘ̤ܵܬܼ 286 ܘܠܵܐ ܡܸܫܬܲܪܝܵܐ ܐܵܘ ܡܸܬܼܚܲܒܿܠܵܐ ܡ̣ܢ ܪܘܼܟܵܒܼܵܗ̇ ܀ 287 :ܒܹܗ ܒܪܘܼܟܵܒܼܵܐ ܕܐܸܬܼܪܲܟܿܒܲܬ̤ ܒܹܗ ܟܲܕܼ ܠܵܐ ܐܝܼܬܹܝܗ̇ 288 ܒܹܗ ܡܸܬܼܢܲܛܪܵܐ ܗܝ̤ ܘܲܟܼܝܵܢܹ̈ܐ ܕܲܡܟܲܝܢܝܼܢ ܒܵܗ̇ ܀ 289 :ܥܲܡܵܗ̇ ܢܵܚ̇ܝܼܢ ܟܝܵܢܹ̈ܐ ܠܐܲܝܵ̈ܐ ܡ̣ܢ ܠܲܐܝܘܼܬܼܵܐ 290 ܘܥܲܡܵܗ̇ ܢܵܛ̇ܪܝܼܢ ܛܲܟܼܣܵܐ ܕܫܸܠܝܵܐ ܕܠܵܐ ܫܘܼܚܠܵܦ ܀ 291 :ܥܲܡܵܗ̇ ܫܵܠܹ̇ܝܢ ܙܲܪ̈ܥܹܐ ܫܚܝܼܩܹ̈ܐ ܡ̣ܢ ܡܵܘܥܝܼܬܼܵܐ 292 ܒܲܕܼ ܠܵܐ ܚܵܫ̇ܲܚ ܐܘܼܟܼܠܵܐ ܕܡܸܢܗܘܿܢ ܠܐܵܟܼܘܿܠܲܝ̈ܗܘܿܢ ܀ 293 :ܒܵܗ̇ ܡܸܫܬܲܬܿܩܵܐ ܐܵܦ ܡ̇ܘܥܝܼܬܼܵܐ ܕܟܼܠ ܐܝܼܠܵܢܝܼ̈ܢ 294 ܘܠܵܐ ܬܘܼܒܼ ܝܵܥܹ̇ܝܢ ܐܵܘ ܡܸܫܬܲܚܩܝܼܢ ܒܝܲܕܼ ܬܲܪܒܿܝܼܬܼܵܐ ܀ 295 :ܒܵܗ̇ ܡܸܬܿܛܲܫܸܐ ܟܝܵܢܐ ܕܢܘܼܪܵܐ ܟܠ ܟܲܪ ܕܐܝܼܬܼܵܘܗܝ 296 ܘܟܲܕܼ ܡܸܬܼܒܲܛܠܵܐ ܚܫܲܚܬܼܵܐ ܕܡܸܢܹܗ ܗܘ̤ ܠܵܐ ܒܵܛܹܿܠ ܀ 297 ܥܐܹܝܗ̇ ܡܸܬܼܐܲܫܕܲܝܼܢ ܡܲܝܵ̈ܐ ܫܪ̈ܲܝܵܐ ܐܲܝܟ ܕܐܝܼܬܲܝܗܘܿܢ: pb. 64 298 ܟܲܕܼ ܠܵܐ ܪܵܕܹܝܢ ܐܵܘ ܡܸܬܿܬܿܙܝܼܥܝܼܢ ܒܡܲܫܒܼܵܘ̈ܗܝ ܕܐܵܐܲܪ ܀ 299 :ܒܵܗ̇ ܡܸܬܿܬܿܛܲܡܹܝܢ ܙܢܲܝܵ̈ܐ ܕܐܵܕܼܫܹ̈ܐ ܕܪܵܕܹܝܢ ܡܸܢܵܗ̇ 300 :ܘܗܵܘܹ̇ܝܢ ܒܫܸܠܝܵܐ ܘܫܸܬܼܩܵܐ ܕܠܵܐ ܚܘܼܫܵܚܵܐ 301 :ܠܵܗ̇ ܗ̄ܘ̣ ܗܵܦܹ̇ܟ ܟܠ ܬܘܼܩܵܢܵܐ ܕܲܗܘ̤ܵܐ ܡܸܢܵܗ̇ 302 ܕܲܗܒܼܵܐ ܘܡܸܕܼܪܵܐ ܫܒܼܝܼܚܵܐ ܘܫܝܼܛܵܐ ܒܵܗ̇ ܡܸܬܿܛܲܡܪܝܼܢ ܀ 303 :ܒܵܗ̇ ܟܠ ܡܸܕܹܿܡ ܘܲܥܠܹܝܝܗ̇ ܟܠܵܐ ܘܗ̤ܝ ܥܲܡ ܟܠܵܐ 304 ܘܒܲܢܛܝܼܪܘܼܬܼܵܗ̇ ܢܛܝܼܪ ܟܠ ܡܸܕܸܿܡ ܕܠܵܐ ܐܲܒܼܕܵܢܵܐ ܀ 305 :ܒܵܗ̇ ܟܠ ܕܲܡܟܼܵܢ ܠܲܡܗܲܠܵܟܼܘܼ ܠܥܸܠ ܡ̣ܢ ܚܲܨܵܗ̇ 306 ܪ̈ܲܚܫܵܐ ܘܚܲܝܘ̄ܬܼܵܐ ܘܐܵܦ ܦܵܪܲܚܬܼܵܐ ܩܲܢܝܲܬܼ ܓܸܦܵܐ ܀ 307 :ܒܵܗ̇ ܡܸܬܼܒܲܛܠܝܼܢ ܡ̣ܢ ܚܲܝܘܼܬܼܵܐ ܟܝܵܢܹ̈ܐ ܚܲܪ̈ܫܹܐ 308 ܠܵܘ ܟܲܕܼ ܛܵܠ̇ܩܝܼܢ ܐܸܠܵܐ ܕܫܵܠܹ̇ܝܢ ܡ̣ܢ ܝܘܼܒܵܠܵܐ ܀ 309 :ܡܸܫܠܵܐ ܫܠܹ̇ܝܢ ܡ̣ܢ ܝܘܼܒܵܠܵܐ ܓܸܢܣܹ̈ܐ ܚܲܪ̈ܫܹܐ 310 ܘܗܵܕܹܐ ܕܢܵܘܚܵܐ ܗ̄ܝܼ ܕܲܡܢܝܼܚ ܠܥܵܠܡܵܐ ܘܠܵܘ ܕܐܲܒܼܕܵܢܵܐ ܀ 311 :ܠܲܝܬܿ ܐܲܒܼܕܵܢܵܐ ܒܡܸܕܹܿܡ ܕܐܵܒܹ̇ܕܼ ܘܠܵܐ ܟܠ ܟܠܹܗ 312 ܕܗܵܐ ܟܠ ܡܸܕܸܿܡ ܠܐܲܪܥܵܐ ܗܵܦܹ̇ܟ ܘܒܼܵܗ̇ ܡܸܣܬܲܬܿܪ ܀ 313 :ܠܲܝܬܿ ܒܲܡܠܝܼܠܹ̈ܐ ܘܲܒܫܲܬܿܝܼܩܹ̈ܐ ܕܐܵܒܹ̇ܕܼ ܠܲܓܼܡܵܪ 314 ܐܸܠܵܐ ܐܸܢ ܚܲܕܼ ܟܝܵܢܵܐ ܡܠܝܼܠܵܐ ܘܚܲܕܼ ܫܲܬܿܝܼܩܵܐ ܀ 315 :ܚܕܼܘܼ ܕܐܵܒܹ̇ܕ ܟܠܹܗ ܒܟܼܠܹܗ ܒܦܲܓܼܪܵܐ ܘܢܲܦܫܵܐ 316 ܗܵܘ̇ ܒܲܪܢܵܫܵܐ ܕܗܵܘܹ̇ܐ ܡ̇ܐܢܵܐ ܠܐܵܟܹ̇ܠܩܲܪܨܵܐ ܀ 317 :ܚܲܕܼ ܗ̄ܘ̣ ܕܛܵܠܹ̇ܩ ܡ̣ܢ ܚܲܝܘܼܬܼܵܐ ܕܚܲܝܹ̈ܐ ܡܠܝܼܠܹ̈ܐ 318 ܘܗܘ̤ ܡܸܬܼܡܲܟܼܪܸܐ ܠܚܵܝܑܬܼ ܡܝܼܬܹ̈ܐ ܕܗܵܘ̇ܝܵܐ ܠܦܲܓܼܪܵܐ ܀ 319 :ܒܦܲܓܼܪܹܗ ܘܢܲܦܫܹܗ ܐܵܒܹ̇ܕܼ ܠܲܓܼܡܵܪ ܗܵܘ̇ ܐܲܒܿܝܼܕܼܵܐ 320 ܘܐܲܒܿܝܼܕܼܘܼܬܹܗ ܗܵܘ̇ܝܵܐ ܚܙܵܬܼܵܐ ܠܟܼܠܵܗ̇ ܒܪܝܼܬܼܵܐ ܀ 321 :ܟܠܵܗ̇ ܒܪܝܼܬܼܵܐ ܡܸܒܼܒܲܩܪܵܐ ܒܵܗ̇ ܒܐܲܒܿܝܼܪܘܼܬܹܗ 322 ܘܬܼܵܗ̇ܪܵܐ ܒܪ̈ܲܚܡܹܐ ܕܢܲܛܪܘܼܗ̇ ܒܪ̈ܲܚܡܹܐ ܡ̣ܢ ܐܲܒܼܕܵܢܵܐ ܀ 323 :ܒܗܵܘ̇ ܚܲܕܼ ܕܐܵܒܹ̇ܕܼ ܝܵܠ̇ܦܵܐ ܚܲܝܠܵܐ ܕܲܡܟܼܝܼܢܵܢܵܗ̇ 324 ܕܬܲܩܢܵܗ̇ ܒܪ݁ܲܚܡܹܐ ܘܢܲܛܪܵܗ̇ ܒܚܘܼܒܹܿܗ ܘܚܲܕܿܬܼܵܗ̇ ܒܛܲܝܒܿܘܼ ܀ 325 :ܒܝܲܕܼ ܐܲܒܼܕܵܢܹܗ ܚܵܙ̇ܝܵܐ ܚܙܵܬܼܵܐ ܕܠܵܐ ܚܲܙܝܵܐ ܠܵܗ̇ 326 ܢܲܦܫܵܐ ܚܲܝܬܼܵܐ ܕܡ̇ܘܦܹܝܢ ܚܲܝܹܝ̈ܗ̇ ܡ̣ܢ ܚܲܝܘܼܬܼܵܐ ܀ 327 :ܙܢܲܝ̈ܵܐ ܕܠܵܐ ܚܒܼܵܠ ܩܵܢ̇ܝܵܐ ܢܲܦܫܵܐ ܒܹܗ ܒܲܗܘܵܝܵܐ 328 ܬܲܗܢܵܘ̇ ܬܲܗܪܵܐ ܕܓܼܵܝܝ̇ܙܵܐ ܡ̣ܢ ܫܹܠܝ ܡܥܝܼܢ ܚܲܝܘܼܬܼܵܗ̇ ܀ 329 :ܠܵܐ ܡܸܬܼܚܲܒܲܠ ܟܝܵܢܵܐ ܕܪܘܼܚܵܐ ܘܠܵܐ ܟܠ ܟܠܹܗ 330 ܘܡܲܢ ܠܵܐ ܢܸܬܼܡܲܗ ܒܐܲܝܕܵܐ ܕܗܵܘ̇ܝܵܐ ܒܚܹܝܠ ܒܵܪܘܿܝܵܐ ܀ 331 :ܚܹܝܠ ܒܵܪܘܿܝܵܐ ܗ̄ܘ̣ ܕܡ̇ܘܒܸܿܕܼ ܢܲܦܫܵܐ ܕܚܲܕܼ ܒܲܪܢܵܫܵܐ 332 ܕܢܹܐܠܦܘܼܢ ܐ̄ܢܵܫܵܐ ܕܲܟܼܡܵܐ ܒܝܼܫܵܐ ܒܝܼܫܘܼܬܼ ܐ̄ܢܵܫܵܐ ܀ 333 ܒܝܼܫܘܼܬܼ ܒܝܼܫܬܹܿܗ ܕܗܵܘ̇ ܒܲܪܢܵܫܵܐ ܡܲܠܦܵܐ ܠܟܼܠܵܐ: pb. 65 334 ܕܐܸܠܘܼ ܒܪ̈ܲܚܡܹܐ ܠܵܐ ܚܵܝ̣ܵܘ ܐ̄ܢܵܫܵܐ ܠܵܐ ܚܵܐܹ̇ܝܢ ܗ̄ܘ̣ܵܘ ܀ 335 :ܒܪ̈ܲܚܡܹܐ ܕܥܲܠ ܟܠ ܡܚܵܘܸܐ ܚܲܝܠܵܐ ܕܲܒܼܛܲܝܒܿܘܼܬܹܗ 336 ܘܲܒܼܚܲܕܼ ܕܐܵܒܹ̇ܕܼ ܡܲܟܼܪܸܙ ܩܘܼܫܬܵܐ ܕܲܒܼܟܹܐ ܢܘܼܬܹܗ ܀ 337 :ܬܲܪܬܹܿܝܢ ܡܲܠܸܦ ܒܝܲܕܼ ܐܲܒܼܕܵܢܵܐ ܕܦܲܓܼܪܵܐ ܘܢܲܦܫܵܐ 338 ܕܛܵܒܼܵܐ ܗ̄ܘ̣ ܘܟܹܐܢܵܐ ܗ̄ܘ̣ ܨܹܝܕܼ ܡܲܠܵܠܹ̈ܐ ܘܨܿܝܕܼ ܫܲܬܿܝܼܩܹ̈ܐ ܀ 339 :ܡܠܝܼܠܹ̈ܐ ܘܚܲܪ̈ܫܹܐ ܝܵܠ̇ܦܝܼܢ ܐܲܟܲܚ̄ܕܼ ܥܲܠ ܬܲܪ̈ܬܲܝܗܹܝܢ 340 ܕܠܵܐ ܡܸܬܼܚܲܣܢܵܐ ܠܵܐ ܛܵܒܼܘܼܬܹܗ ܘܠܵܐ ܟܹܐܢܘܼܬܹܗ ܀ 341 :ܒܟܹܐܢܘܼ ܡܚܲܝܸܒܼ ܠܗܵܘ̇ ܚܲܝܵܒܼܵܐ ܕܚܲܝܸܒܼ ܗܘ̤ ܠܹܗ 342 ܕܠܵܐ ܬܸܗܘܸܐ ܠܵܗ̇ ܡܪܲܚܡܵܢܘܼܬܹܗ ܒܠܝܼܠܲܬܼ ܛܲܟܼܣܵܐ ܀ 343 :ܛܲܟܼܣܵܐ ܪܲܒܵܐ ܡܚܵܘܸܐ ܠܟܼܠܵܐ ܒܝܲܕܼ ܐܲܒܿܝܼܕܼܵܐ 344 ܠܵܘ ܕܲܢܚܵܘܸܐ ܐܸܠܵܐ ܕܢܵܘܕܵܥ ܕܫܵܘܹ̇ܐ ܕܡܹܐܒܲܕܼ ܀ 345 :ܠܵܘ ܕܲܢܚܵܘܸܐ ܚܹܝܠ ܟܹܐܢܘܼܬܹܗ ܣܵܥܲ݁ܪ ܗܵܕܹܐ 346 ܐܸܠܵܐ ܕܢܸܒܼܗܲܕܼ ܣܵܢ̇ܠܵܐ ܕܣܵܒܲ݁ܪ ܕܒܹܗ ܚܵܣܹ̇ܢ ܟܠ ܀ 347 :ܠܒܸܗܬܲܬܼ ܣܵܢܵܠܵܐ ܐܵܒܹ̇ܕܼ ܠܲܓܼܡܵܪ ܗܵܘ̇ ܒܲܪܢܵܫܵܐ 348 ܕܠܵܐ ܢܸܫܬܼܿܒܼܗܲܪ ܕܲܒܼܒܲܪܢܵܫܵܐ ܫܲܪܝܼ ܘܫܲܠܸܡ ܀ 349 :ܒܐ̄ܢܵܫܵܐ ܐܲܛܥܝܼ ܡ̣ܢ ܫܘܼܪܵܝܵܐ ܕܲܗܘܵܝ ܐ̄ܢܵܫܵܐ 350 ܘܲܒܼܒܲܪܢܵܫܵܐ ܓܵܡܲ݁ܪ ܛܘܼܥܝܲܝ ܟܲܕܼ ܠܵܐ ܓܵܡܲ݁ܪ ܀ 351 :ܠܵܐ ܡܸܬܼܓܲܡܪܵܐ ܪܸܓܲܬܼ ܢܲܦܫܹܗ ܕܡܲܪܝܼܪ ܢܲܦܫܵܐ 352 ܒܗܵܝ̇ ܕܐܵܒܹ̇ܕܼ ܠܹܗ ܢܵܘܣܵܐ ܕܒܼܵܥܹ̇ܐ ܕܢܸܣܬܲܬܲܪ ܒܹܗ ܀ 353 :ܒܡܲܓܼܕܿܠܵܐ ܕܒܸܣܪܵܐ ܡܩܝܼܡ ܠܹܗ ܠܡܸܕܼܪܵܐ ܕܡܲܪܝܼܪܘܼܬܹܗ 354 ܘܚܵܪܹܒܼ ܡܲܓܼܕܿܠܹܗ ܘܗܘ̤ ܡܸܬܼܦܲܟܲܪ ܒܚܲܒܼܠܹ̈ܐ ܕܢܘܼܪܵܐ ܀ 355 :ܒܢܘܼܪܵܐ ܢܵܦܹ̇ܠ ܕܚܲܡܝܼܡ ܪܸܬܼܚܵܗ̇ ܐܵܦ ܡ̣ܢ ܢܘܼܪܵܐ 356 ܘܲܒܼܚܸܫܘܿܟܼܵܐ ܕܥܵܠܹ̇ܒܼ ܚܸܫܟܹܿܗ ܠܲܕܼܚܸܫܘܿܟܼܝܼܢ ܀ 357 :ܒܒܼܝܼܫܘܼܬܼ ܢܸܓܼܕܵܘ̈ܗܝ ܚܵܙ̇ܝܵܐ ܒܪܝܼܬܼܵܐ ܚܕܲܬܵܐ 358 ܕܟܲܕܼ ܠܵܐ ܚܵܐܹ̇ܫ ܣܒܼܝܼܣܝܼܢ ܚܲܫܵܘ̈ܗܝ ܘܲܥܦܝܼܦ ܢܸܓܼܕܲܗ ܀ 359 :ܒܢܸܓܼܕܼܵܘ̈ܗܝ ܬܵܗ̇ܪܝܼܡܢ ܐܲܪ̈ܥܵܢܵܝܹܐ ܘܲܡܫܲܝܵܢܹ̈ܐ 360 ܕܲܟܼܡܵܐ ܐܲܡܪܲܚ ܘܲܟܼܡܵܐ ܟܹܐܢܵܐ ܬܒܲܥܬܼܵܐ ܕܥܵܘ̣ܠܹܗ ܀ 361 :ܥܵܘ̇ܠܵܐܝܼܬܼ ܣܥ̣ܵܐ ܕܢܸܛܘܿܦ ܠܹܗ ܫܡܵܐ ܝܲܩܝܼܪܵܐ 362 ܘܐܵܦ ܟܹܐܢܘܼܐܬܼܵܐ ܛܵܒܼ ܟܹܐܢܵܐܝܼܬܼ ܓܙ݂ܲܪܬܹܗ ܠܕܼܝܼܢܹܗ ܀ 363 :ܟܹܐܝܢ ܒܵܪܘܿܝܵܐ ܘܟܹܐܝܢ ܒܘܼܚܪܵܢܵܐ ܕܲܓܼܙܵܪ ܕܝܼܢܹܗ 364 ܕܲܪܕܼܵܐ ܩܲܠܝܼܠ ܘܚܵܐܹ̇ܝܢ ܣܲܓܲܝܼ ܕܲܢܚܲܟܸܿܡ ܟܠ ܀ 365 :ܒܟܹܐܢܘܼ ܥܵܒܹ̇ܕܼ ܕܲܪܕܼܵܐ ܠܒܼܝܼܫܹ̈ܐ ܕܫܵܛ̣ܘ ܦܘܼܩܕܵܢܵܘ̈ܗܝ 366 ܘܚܲܟܿܝܼܡܵܐܝܼܬܼ ܝܵܗܹ̇ܒܼ ܕܵܫܢܹ̈ܐ ܠܢܵܛܪ̈ܲܝ ܚܘܼܒܹܿܗ ܀ 367 :ܚܲܟܿܝܼܡܵܐܝܼܬܼ ܡ̇ܘܒܸܿܕܼ ܡ̣ܢ ܟܠܠ ܚܲܕܼ ܒܲܪܢܵܫܵܐ 368 ܘܪܲܚܡܵܢܵܐܝܼܬܼ ܡܲܚܸܐ ܠܟܼܠܵܐ ܒܝܲܕܼ ܚܲܝܘܼܬܹܗ ܀ 369 :ܐܵܬܼܵܐ ܝܵܗܹ̇ܒܼ ܠܲܡܠܝܼܠܘܼܬܼܵܐ ܘܲܠܚܲܪܫܘܼܬܼܵܐ 370 ܕܢܸܚܙܘܿܢ ܕܲܡܨܸܐ ܚܹܝܠ ܟܠ ܡܸܕܹܿܡ ܐܲܝܟ ܡ̇ܪܹܐ ܟܠ ܀ pb. 66 371 :ܡ̇ܪܵܐ ܗ̄ܘ̣ ܕܥܲܠ ܟܠ ܘܕܼܝܼܠܹܗ ܗ̄ܘ̣ ܟܠ ܡܠܝܼܠܹ̈ܐ ܘܚܲܪ̈ܫܹܐ 372 ܘܠܹܗܘ̣ ܙܵܕܹܩ ܫܸܡ ܐܝܼܬܼܘܼܬܵܐ ܘܐܲܠܵܗܘܼܢܼܵܐ ܀ 373 :ܦܠܸܐ ܠܹܗ ܠܐܝܼܬܼܝܵܐ ܕܲܒܼܪܵܐ ܒܪܝܼܬܼܵܐ ܡ̣ܢ ܠܵܐ ܡܸܕܸܿܡ 374 ܕܢܸܛܲܪ ܛܲܟܼܣܵܐ ܕܒܼܵܪܘܿܝܘܼܬܹܗ ܕܠܵܐ ܒܘܼܠܒܵܠܵܐ ܀ 375 :ܛܲܟܼܣܵܐ ܗ̄ܘ̣ ܪܲܒܵܐ ܕܲܡܚܲܕܸܿܬܼ ܠܵܗ̇ ܠܒܼܵܪܘܿܝܘܼܬܹܗ 376 ܕܲܒܼܚܘܼܕܵܬܹܗ ܢܨܘܼܪ ܐܲܚܘܝܼܬܼܵܐ ܕܒܲܣܝܼܡܘܼܬܹܗ ܀ 377 :ܒܒܲܣܝܼܡܘܼܬܹܗ ܡܚܵܘܸܐ ܠܟܼܠܵܐ ܒܚܘܼܕܵܬܼ ܟܠܵܐ 378 ܕܢܹܐܠܲܦ ܟܠܵܐ ܒܛܝܼܠܘܼܬܼ ܡ̇ܪܵܐ ܕܥܲܠ ܟܠ ܡܸܕܸܿܡ ܀ 379 :ܒܲܒܼܛܝܼܠܘܼܬܹܗ ܗܘ̤ܵܐ ܟܠ ܡܸܕܸܿܡ ܡ̣ܢ ܠܵܐ ܡܸܕܸܿܡ 380 ܘܠܵܐ ܨܒܼܵܘ ܝܲܕܼܥܘܼܗ̇ ܠܲܒܼܛܝܼܠܘܼܬܹܗ ܥܒܼܵܕ̈ܐ ܕܲܥܒ݂ܲܕܼ ܀ 381 :ܠܗܘܿܢ ܠܲܥܒܼܵܕܼܵܘ̈ܗܝ ܨܒܼܵܐ ܕܲܢܚܲܟܸܿܡ ܒܫܘܼܠܵܡ ܙܲܒܼܢܹ̈ܐ 382 ܥܲܠ ܗܵܝ̇ ܥܵܒ݂̇ܕܼ ܗܵܘ̇ ܚܘܼܕܵܬܼܵܐ ܘܕܝܼܢܵܐ ܟܹܐܢܵܐ ܀ 383 :ܒܝܲܕܼ ܚܘܼܕܼܵܬܼܵܐ ܝܵܠ̇ܦܝܼܢ ܚܲܝܠܵܐ ܕܒܼܵܪܘܿܝܘܼܬܹܗ 384 ܕܗܘ̤ܝܘܼ ܕܲܒܼܪܵܐ ܘܗܘ̤ܝܘܼ ܡܚܲܕܸܿܬܼ ܒܪܝܼܬܼܵܐ ܒܬܼܢܝܵܐ ܀ 385 :ܕܠܵܐ ܨܒܼܵܘ ܝܲܠܦ̣ܘܼܗܝ ܡ̣ܢ ܫܘܼܪܵܝܵܐ ܠܡܲܬܼܩܸܢ ܟܠܵܐ 386 ܝܵܦ̇ܝܼܢ ܚܲܝܠܵܐ ܕܐܲܠܵܗܘܼܬܹܗ ܒܝܘܿܡ ܫܘܼܠܵܡܵܐ ܀ 387 :ܗܵܢܵܘ̇ ܢܝܼܫܵܐ ܕܗܵܘ̇ ܚܘܼܕܵܬܼܵܐ ܕܲܒܼܫܘܼܠܵܡܵܐ 388 ܕܬܹܐܠܲܦ ܒܪܝܼܬܼܵܐ ܚܹܝܠ ܒܼܵܘܿܝܵܐ ܕܲܒܼܪܵܐ ܒܪܝܼܬܼܵܐ ܀ 389 :ܪܲܒܿ ܝܘܼܠܦܵܢܵܐ ܕܝܵܠ̇̄ܦܵܢܵܐ ܒܪܝܼܬܼܵܐ ܒܗܵܘ̇ ܚܘܼܕܵܬܼܵܐ 390 ܘܗܝ̤ ܒܵܗ̇ ܬܵܗ̇ܪܵܐ ܕܲܟܼܡܵܐ ܝܵܪܒܵܐ ܡ̣̤ ܡ̇ܐ ܕܐܝܼܬܹܝܗ̇ ܀ 391 :ܐܲܝܟ ܠܵܐ ܡܼܕܸܿܡ ܚܵܫ̇ܒܵܐ ܠܙܲܒܼܢܹܗ ܕܗܵܘ̇ ܕܘܼܪܵܫܵܐ 392 ܡ̇ܐ ܕܡܸܬܼܦܲܚܲܡ ܗܵܘ̇ ܬܘܼܩܵܢܵܐ ܒܗܵܢܵܐ ܕܲܬܼܢܵܢ ܀ 393 :ܐܵܦ ܠܵܐ ܕܐܝܼܬܼܵܘܗܝ ܟܲܕܼ ܛܵܒܼ ܐܝܼܬܼܵܘܗܝ ܪܸܢܝܵܐ ܒܢܲܦܫܵܗ̇ 394 ܡ̇ܐ ܕܡܸܬܼܒܲܩܝܵܐ ܒܐܲܡܝܼܢܘܼܬܹܗ ܕܗܵܘ̇ ܕܲܠܥܵܠܲܡ ܀ 395 :ܒܐܲܡܝܼܢܘܼܬܹܗ ܕܲܕܠܵܐ ܫܘܼܠܵܡ ܡܲܩܦܬܼܵܐ ܗܵܘܢܵܗ̇ 396 ܘܠܵܐ ܡܸܣܬܲܒܼܥܵܐ ܗܲܢܝܼܐܘܼܬܹܗ ܠܪܸܚܡܲܬܼ ܢܲܦܫܵܗ̇ ܀ 397 :ܒܗܲܢܝܼܐܘܼܬܹܗ ܬܡ݂ܲܗ ܐܵܦ ܪܸܥܝܵܢܝ ܪܵܕܹܐ ܒܬܼܵܐܘܫܵܐ 398 ܘܲܪܡ݂ܲܪ ܗܘ̤ ܠܹܗ ܕܲܢܚܘܼܪ ܫܲܦܝܼ ܒܦܲܐܝܘܼܬܼ ܫܘܼܦܪܹܗ ܀ 399 :ܚܘܼܪ ܠܲܡ ܫܲܦܝܼܪ ܡ̣ܠܲܟ ܠܹܗ ܠܪܸܥܝܵܢܝ ܠܹܗ ܠܪܸܥܝܵܢܵܐ 400 ܘܫܲܪܝܼ ܕܢܸܪܕܹܿܐ ܒܐܘܼܪܚܵܐ ܕܡܸܡܬܼܘܿܡ ܠܵܐ ܚܲܙܝܵܐ ܠܹܗ ܀ 401 :ܒܐܘܼܪܚܵܐ ܚܕܲܬܵܐ ܕܚܘܼܕܵܬܼ ܟܠܵܐ ܚܙܲܩ̣ܘ ܚܘܼܫܵܒܲܝ̈ 402 ܘܲܬܼܡ݂ܲܗܘ ܘܲܬܼܗܪܘ ܕܲܟܼܡܵܐ ܬܡܝܼ̈ܗܵܢ ܗܵܠܹܝܢ ܕܲܠܗܲܠ ܀ 403 :ܒܬܲܗܪܵܐ ܩܵܡ̣ܘ ܗ̄ܘ̣ܵܘ ܟܲܕܼ ܛܵܒܼ ܠܵܐ ܚܙ̣ܵܘ ܐܲܝܕܵܐ ܕܲܚܙ̣ܵܘ 404 ܘܐܵܘܚܸܠܘ ܘܲܦܣܲܩ̣ܘ ܕܠܵܐ ܡܨܹܝܢ ܚܵܙܹ̈ܝܢ ܚܙܵܬܼܵܐ ܕܲܒܼܥܵܘ̣ ܀ 405 ܣܲܒܼܪܵܐ ܛܵܒܼܵܐ ܠܲܒܸܿܒܼ ܐܸܢܘܿܢ ܕܠܵܐ ܢܸܬܼܡܲܚܠܘܼܢ: pb. 67 406 ܘܫܲܪܝܼܘ ܚܵܢܹ̇ܝܢ ܠܢܝܼܫܵܐ ܕܲܒܼܥܵܘ̣ ܠܲܡܕܲܡ̇ܝܘܼ ܀ 407 :ܢܝܼܫܵܐ ܣܵܡܹ̇ܬܼ ܠܡܲܡܠܠܵܐ ܕܪܸܥܝܵܢܝ ܕܢܸܚܥܸܐ ܠܩܘܼܒܼܠܹܗ 408 ܘܗܵܐ ܒܵܥܹ̇ܐ ܐ̄ܢܵܐ ܕܐܸܚܢܸܐ ܫܲܦܝܼܪ ܐܸܢܗܘ̤ ܕܡܲܨܝܵܐ ܀ 409 :ܡܨܸܐ ܗ̄ܘ̣ ܪܸܥܝܵܢܵܐ ܠܡܸܚܙܵܐ ܫܲܦܝܼܪ ܠܲܕܼܫܲܦܝܼܪ̈ܵܢ 410 ܘܠܲܝܬܿ ܠܹܗ ܡܸܕܹܿܡ ܕܲܡܥܵܘܸܟ ܠܹܗ ܐܸܢܢܗܘ̤ ܕܨܵܒܹ̇ܐ ܀ 411 :ܠܲܕܼܫܲܦܝܼܪ̈ܵܢ ܒܵܥܹ̇ܝܬܼ ܕܐܸܬܼܢܸܐ ܩܕܼܵܡ ܫܲܦܝܼܪܹ̈ܐ 412 ܕܢܸܗܘܘܿܢ ܚܵܢܹ̇ܝܢ ܠܲܡܚܵܪ ܫܲܦܝܼܪ ܒܫܲܦܝܼܪ݁ܵܬܼܵܐ ܀ 413 :ܫܲܦܝܼܪ̈ܵܬܼܵܐ ܕܝܘܿܡ ܚܘܼܕܼܵܬܼܵܐ ܬܢܹ̇ܝܬܼ ܐܲܝܟ ܕܲܬܼܢܹ̇ܝܬܼ 414 ܘܬܘܼܒܼ ܬܵܢܹ̇ܐ ܐ̄ܢܵܐ ܕܐܲܛܸܢ ܐ̄ܢܵܫܵܐ ܕܢܸܢܼܢܘܿܢ ܐܸܢܹܝܢ ܀ 415 :ܡܲܢ ܠܵܐ ܢܸܪܚܲܡ ܬܸܢܝܵܐ ܕܡܸܠܹ̈ܐ ܕܡܲܠ̈ܝܵܢ ܬܲܗܪܵܐ 416 ܘܡܲܢ ܠܵܐ ܢܸܗܪܘܿܓܼ ܒܲܫܒܼܝܼ̈ܚܵܬܼܵܐ ܕܲܡܫܲܒܿܝ̇ܚܵܢ ܠܹܗ ܀ 417 :ܬܲܗܪܵܐ ܘܫܘܼܒܼܚܵܐ ܡܠܸܐ ܥܸܢܝܵܢܗܘܿܢ ܠܲܕܼܗܵܪܓܼ ܒܹܗ 418 ܥܲܠ ܗܵܝ̇ ܗܸܪܓܹܿܬܼ ܐܵܦ ܗܵܪܹܓܼ ܐ̄ܢܵܐ ܒܗܸܪܓܹܿܐ ܕܲܒܼܗܹܝܢ ܀ 419 :ܒܗܹܝܢ ܪܵܓܵܐ ܠܝܼ ܠܡܸܬܗܲܓܵܝܘܼ ܕܠܵܐ ܣܲܒܼܥܘܼܬܼܵܐ 420 ܕܛܵܟ ܐܸܚܣܘܿܟ ܠܹܒܿܝ ܡ̣ܢ ܥܸܢܝܵܢܵܐ ܕܒܲܫܟܼܝܼܪ݁ܵܬܵܪܐ ܀ 421 :ܒܝܲܕܼ ܢܸܣܝܵܢܵܐ ܩܢܹ̇ܝܬܼ ܢܸܣܝܵܢܵܐ ܕܲܒܼܪܸܥܝܵܢܵܐ 422 ܘܝܸܠܦܹ̇ܬܼ ܕܛܵܒܼ ܗ̄ܘ̣ ܗܸܪܓܵܐ ܛܵܒܼܵܐ ܠܲܕܼܗܵܪܹܓܼ ܒܹܗ ܀ 423 :ܬܵܐ ܪܸܥܝܵܢܵܐ ܗܪܘܿܓܼ ܬܲܩܢܵܐܝܼܬܼ ܒܲܕܼܬܲܩܝܼ̈ܢܵܢ 424 ܘܲܬܢܝܼ ܒܚܘܼܒܵܐ ܬܸܢܝܵܢ ܡܸܠܹ̈ܐ ܕܚܘܼܕܵܬܼ ܟܠܵܐ ܀ 425 :ܬܵܐ ܚܘܼܪ ܫܲܦܝܼܪ ܕܲܟܼܡܵܐ ܫܲܦܝܼܪ ܚܘܼܕܼܵܬܼ ܟܠܵܐ 426 ܘܩܲܠܸܣ ܘܐܵܘܪܸܒܼ ܠܲܡܚܲܕܿܬܼܵܢܵܐ ܕܥܲܬܿܝܼܩܘܼܬܲܢ ܀ 427 :ܒܥܲܬܿܝܼܩܘܼܬܿܢ ܚܵܪ̣ ܗܵܘ̇ ܕܲܒܼܪܵܢ ܥܲܕܼܠܵܐ ܢܸܒܼܪܹܝܢ 428 ܘܩܲܕܹܿܡ ܨܵܪܹܗ ܠܝܘܿܡ ܚܘܼܕܵܬܲܢ ܥܲܡ ܬܘܼܩܵܢܲܢ ܀ 429 :ܐܲܝܟ ܕܲܠܫܲܒܼܪܵܐ ܨܒܼܵܐ ܕܲܢܒܲܝܐܝܼܗ̇ ܠܫܲܒܼܪܘܼܬܼ ܢܲܦܫܲܢ 430 ܕܠܵܐ ܬܸܟܼܪܸܐ ܠܵܗ̇ ܒܥܲܬܿܝܼܩܘܼܬܹܗ ܕܥܵܐܡܵܐ ܥܡܝܼܠܵܐ ܀ 431 :ܒܲܕܼܡܘܼܬܼ ܨܲܠܡܵܐ ܨܵܪ ܕܸܡ̈ܘܵܬܼܵܐ ܕܠܵܐ ܡܸܬܼܚܲܙ̈ܝܵܢ 432 ܘܚܵܘܝܼ ܐܸܢܹܝܢ ܠܗܵܘܢܵܐ ܟܲܣܝܵܠ ܕܲܟܼܣܸܐ ܒܢܲܦܫܲܢ ܀ 433 :ܒܗܵܘܢܵܐ ܚܵܘܝܲܢ ܗܵܘ̇ ܚܘܼܕܵܬܼܵܐ ܕܲܒܼܫܘܼܠܵܡܵܐ 434 ܘܟܲܕܼ ܛܵܒܼ ܪܲܚܝܼܩ ܣܵܡ̣ ܒܘܼܕܵܩܹܗ ܒܲܕܼܩܲܪ̈ܝܼܒܼܵܢ ܀ 435 :ܒܩܲܪ̈ܝܼܒܼܵܬܼܵܐ ܚܵܘܝܲܢ ܚܲܝܠܵܐ ܕܪ̈ܲܚܝܼܩܵܬܼܵܐ 436 ܘܲܒܼܓܲܠ̈ܝܵܬܼܵܐ ܐܲܠܦܲܢ ܛܲܟܼܣܵܐ ܕܲܒܼܟܲܣ̈ܝܵܬܼܵܐ ܀ 437 :ܒܓܸܠܝܵܐ ܓܠ̣ܵܐ ܠܲܢ ܥܲܠ ܟܲܣܝܘܼܬܼܵܐ ܕܐܲܠܵܗܘܼܬܹܗ 438 ܘܠܸܫܵܢ ܒܸܣܪܵܐ ܥܒ݂ܲܕܼ ܟܵܪܘܿܙܵܐ ܕܲܣܬܼܝܼܪ̈ܵܬܹܗ ܀ 439 :ܒܠܸܫܵܢ ܒܸܣܪܵܐ ܬܲܪܓܸܿܡ ܥܲܡܲܢ ܥܲܠ ܕܲܥܬܼܝܼ݁̈ܕܵܪܢ 440 ܒܗܵܘ̇ ܡ̇ܐ ܕܲܡܥܵܕܼ ܒܸܣܪܵܐ ܠܡܸܫܡܲܥ ܒܸܣܪ̈ܵܢܝܵܬܼܵܐ ܀ 441 ܠܹܗ ܠܒܸܣܪܵܢܵܐ ܐܲܠܸܦ ܐ̄ܪܵܙܵܐ ܪܘܼܚܵܢܵܝܵܐ: pb. 68 442 ܘܲܠܥܸ݂ܙ ܒܸܣܪܵܐ ܘܨܵܬܼܘ ܒܸܣܪ̈ܵܢܹܐ ܠܸܥܙܵܐ ܚܲܕܼܬܼܵܐ ܀ 443 :ܠܸܥܙܵܐ ܚܲܕܼܬܼܵܐ ܠܥܸ݂ܙ ܒܸܪܪܵܢܵܐ ܥܲܡ ܒܸܣܪ̈ܵܢܹܐ 444 ܘܲܟܼܒܲܪ ܐܵܡܲ݁ܪ ܐܲܝܢܵܐ ܕܫܵܡܲ݁ܥ ܕܡܲܢ̣ܘܼ ܕܲܠܥܸܙ ܀ 445 :ܡܲܢ̣ܘܼ ܕܲܠܥܸܙ ܨܵܒܹ̇ܝܬܿ ܕܬܸܫܡܲܥ ܐܘܿ ܫܵܡܘܿܥܵܐ 446 ܫܡܲܥ ܡܹܢܝ ܘܝܼܠܲܦ ܕܐ̄̇ܢܵܫܵܐ ܗ̄ܘ̣ ܕܲܠܦܥܸܙ ܥܲܡ ܐ̄ܢܵܫܘܼܬܼܵܐ ܀ 447 :ܐ̄ܢܵܫܵܐ ܗ̄ܘ̣ ܕܲܠܥܸܙ ܪܘܼܚܵܐ ܒܢܲܦܫܹܗ ܘܗܘ̤ ܥܲܡ ܐ̄ܢܵܫܵܐ 448 ܘܨܵܬܼ ܟܲܣ̈ܝܵܬܼܵܐ ܘܬܲܪܓܸܿܡ ܐܸܢܹܝܢ ܒܐܝܼܕܲܝ̈ ܐ̄ܢܵܫܵܐ ܀ 449 :ܐܲܝܟ ܡܸܨܥܵܝܵܐ ܗܘ̤ܵܐ ܒܹܝܬܼ ܐ̄ܢܵܫܵܐ ܘܲܠܒܼܵܪܘܿܝܵܐ 450 ܘܒܼܐܝܼܙ ܓܲܕܿܘܼܬܹܗ ܫܲܝܸܢ ܡ̇ܪܵܐ ܥܲܡ ܒܸܪ̈ܝܵܬܹܗ ܀ 451 :ܒܡܸܨܥܵܝܘܼܬܹܗ ܫܪ̣ܵܐ ܚܸܪܝܵܢܵܐ ܕܒܹܝܬܼ ܟܠ ܘܲܒܼܟܼܠ 452 ܘܐܲܟܼܪܸܙ ܒܐܲܪܥܵܐ ܣܒܲܪܬܼܵܐ ܕܫܲܝܢܵܐ ܕܠܵܐ ܡܸܫܬܲܚܠܲܦ ܀ 453 :ܗܵܢܵܘ̇ ܐ̄ܢܵܫܵܐ ܕܫܲܝܸܢ ܟܠܵܐ ܥܲܡ ܡ̇ܪܹܟܿܠ 454 ܘܗܘ̤ܝܘܼ ܕܲܕܼܪܲܫ ܐܘܼܪܚܵܐ ܚܕܲܬܵܐ ܕܚܘܼܕܵܬܼ ܟܠܵܐ ܀ 455 :ܗܘ̤ ܒܲܕܸܿܩ ܠܲܢ ܥܲܠ ܚܘܼܕܵܬܼܵܐ ܕܗܵܘܹ̇ܐ ܠܚܲܪܬܼܵܐ 456 ܘܗܘ̤ ܚܵܘ̣ܝܼ ܠܲܢ ܫܒܼܝܼܠ ܡܲܪܕܿܝܼܬܼܵܐ ܕܗܲܝܡܵܢܘܼܬܼܵܐ ܀ 457 :ܗܘ̤ ܐܲܠܸܦ ܠܲܢ ܕܒܹܗ ܡܸܬܼܚܲܕܿܬܼܵܐ ܥܲܬܿܝܼܩܘܼܬܲܢ 458 ܘܨܵܐ ܠܲܢ ܛܘܼܦܣܵܐ ܕܲܢܕܲܡܸܐ ܒܹܗ ܐ̄ܪܵܙܵܢܵܐܝܼܬܼ ܀ 459 :ܗܘ̤ ܒܲܩܢܘܿܡܹܗ ܚܵܘܝܼ ܐܸܢܹܝܢ ܠܗܵܠܹܝܢ ܕܝܼܠܲܢ 460 ܕܠܵܐ ܢܸܬܼܦܲܠܲܓܼ ܥܲܠ ܟܲܣ̈ܝܵܬܼܵܐ ܕܐܸܫܬܵܘܕܿܝܼ ܠܲܢ ܀ 461 :ܗܘ̤ ܩܲܕܡ̇ܝܑܬܼ ܫܲܠ̣ܚܹܗ ܠܢܲܚܬܵܐ ܕܡܵܝܘܿܬܼܘܼܬܼܵܐ 462 ܘܒܹܗ ܒܲܟܼܝܵܢܹܗ ܣܠܸ̣ܩ ܘܐܸܬܼܪܲܡܪܲܡ ܠܥܸܠ ܡ̣ܢ ܡ̇ܘܬܵܐ ܀ 463 :ܐܲܝܟ ܕܲܒܼܖܨܸܒܼܥܵܐ ܚܵܘ̣ܝܼ ܠܐ̄ܢܵܫܵܐ ܚܘܼܕܵܬܼ ܦܲܓܼܪܹܗ 464 ܕܞܘܼܪܘ ܡ̇ܝܘܿܬܹ̈ܐ ܒܦܲܓܼܪܵܐ ܕܲܗܘ̤ܵܐ ܠܵܐ ܡ̇ܝܘܼܿܬܼܵܐ ܀ 465 :ܒܗܵܕܹܐ ܬܸܢܘܲܝ ܢܲܚܡܹܗ ܚܲܝܠܵܐ ܐܲܠܵܗܵܝܵܐ 466 ܕܲܒܼܢܘܼܚܵܡܹܗ ܢܨܘܼܪ ܬܲܚܘܝܼܬܼܵܐ ܕܚܘܼܕܵܬܼ ܟܠܵܐ ܀ 467 :ܟܠܵܗ̇ ܒܪܝܼܬܼܵܐ ܚܲܕܲܬܼ ܥܲܡܹܗ ܐ̄ܪܵܙܵܢܵܐܝܼܬܼ 468 ܘܒܹܗ ܡܚܲܕܸܿܬܼ ܠܵܗ̇ ܫܲܪܝܼܪܵܐܝܼܬܼ ܒܫܘܼܠܵܡ ܙܲܒܼܢܹ̈ܐ ܀ 469 :ܒܹܗ ܗ̄ܘ̣ ܗܵܘܹ̇ܐ ܗܘ̇ ܚܘܼܕܵܬܼܵܐ ܕܪܵܡ ܡ̣ܢ ܡܸܠܬܼܵܐ 470 ܘܒܹܗ ܡܸܬܼܡܲܠܲܠ ܐܵܦ ܗܵܘ̇ ܕܝܼܢܵܐ ܕܠܵܐ ܡܸܬܼܡܲܠܲܠ ܀ 471 :ܠܹܗ ܓ̣ܒܼܵܐ ܡ̣ܢ ܟܠ ܗܵܘ̇ ܡ̇ܪܹܐ ܟܠ ܐܲܝܟ ܪܹܫܝܼܬܼܵܐ 472 ܕܢܸܗܘܸܐ ܡܡܲܠܸܐ ܕܘܼܟܲܬܼ ܝܵܬܹܗ ܠܲܥܒܼܵܕܼ ܐܝܼܕܼܵܘ̈ܗܝ ܀ 473 :ܕܘܼܟܲܬܼ ܐܝܼܬܼܝܵܐ ܡܡܲܠܸܐ ܠܟܼܠܵܐ ܒܝܲܕܼ ܓܲܠܝܘܼܬܹܗ 474 ܘܐܷܲܟ ܕܒܲܠܡܹܐܢܵܐ ܢܵܝ̇ܚܵܐ ܒܪܝܼܬܼܵܐ ܒܪܸ̈ܓܼܫܲܝ ܦܲܓܼܪܹܗ ܀ 475 :ܒܹܗ ܡܸܬܿܬܲܚܡܝܼܢ ܙܵܘܥܹ̈ܐ ܫܪ̈ܲܝܵܐ ܕܲܡܠܝܼܠܘܼܬܼܵܐ 476 ܘܠܵܐ ܡܸܫܬܲܚܩܝܼܢ ܠܡܸܒܼܥܵܐ ܒܥܵܬܼܵܐ ܕܟܲܣܝܘܼܬܼ ܟܲܣܝܵܐ ܀ 477 :ܗܲܝܟܲܠ ܩܘܼܕܼܫܵܐ ܕܐܲܚܝܼܕܼ ܟܠܵܐ ܗܵܘܹ̇ܐ ܠܟܼܠܵܐ 478 ܘܒܹܗ ܡܸܬܼܩܲܪܒܼܵܐ ܣܸܓܼܕܲܬܼ ܟܠܵܐ ܡ̇ܪܹܐ ܟܠܵܐ ܀ 479 ܟܠܵܗ̇ ܒܪܝܼܬܼܵܐ ܥܵܐ̇ܠܵܐ ܥܲܡܹܗ ܨܼܝܕܼ ܡ̇ܪܹܟܿܝܠ: pb. 69 480 ܘܲܡܩܲܪܒܼܵܐ ܠܹܗ ܚܕܼܵܐ ܬܵܘܕܼܝܼܬܼܵܐ ܕܠܵܐ ܦܘܼܠܵܓܼܵܐ ܀ 481 :ܗܵܢܵܘ̇ ܢܝܼܫܵܐ ܐܵܦ ܕܲܓܼܒܼܝܼܬܹܗ ܘܲܕܼܪܘܼܡܪܵܡܹܗ 482 ܕܢܸܗܘܸܐ ܠܡܹܐܢܵܐ ܡܢܝܼܚ ܠܒܸܪ̈ܝܵܬܼܵܐ ܡ̣ܢ ܥܲܡܠܲܝ̈ܗܹܝܢ ܀ 483 :ܗܘ̤ܝܘܼ ܡܢܝܼܚ ܠܹܗ ܠܥܵܠܡܵܐ ܠܲܐܝܵܐ ܡ̣ܢ ܠܲܐܝܘܼܬܹܗ 484 ܘܲܒܼܪܘܼ ܦܘܼܡܹܗ ܪܵܕܹܦ ܡܸܢܹܗ ܥܢܵܢܵܐ ܕܚܲܫܹ̈ܐ ܀ 485 :ܒܝܘܿܡ ܓܸܠܝܵܢܹܗ ܓܵܠܹ̇ܐ ܚܲܝܠܵܐ ܕܓܲܢ̄ܒܵܪܘܼܬܹܗ 486 ܘܚܵܙ̇ܝܵܐ ܒܪܝܼܬܼܵܐ ܚܹܝܠ ܐܝܼܬܼܘܼܬܼܵܐ ܕܡܸܬܿܢܲܨܲܚ ܒܹܗ ܀ 487 :ܡ̣ܢ ܫܹܠܝ ܕܵܢܲܚ̇ ܢܘܼܗܪܵܐ ܕܕܼܢܚܹܗ ܥܲܠ ܟܠ ܒܸܪ̈ܝܵܢ 488 ܘܠܲܝܬܿ ܒܲܥܒܼܝܼ̈ܕܹܐ ܕܠܵܐ ܬܵܗܲܪ ܘܒܹܗ ܡܸܬܼܓܵܘܲܣ ܀ 489 :ܕܝܵܪܵܐ ܕܟܼܠܵܐ ܡܲܦܢܸܐ ܨܹܐܕܼܵܘܗܝ ܡ̇ܪܹܐ ܟܠܵܐ 490 ܘܢܸܗܘܘܿܢ ܚܵܙܹ̇ܝܢ ܟܲܕܼ ܕܵܐܹ̇ܢ ܟܠ ܘܲܡܚܲܕܸܿܬܼ ܟܠ ܀ 491 :ܩܲܠܝܼܠܵܐܝܼܬܼ ܪܵܡܹ̇ܙ ܪܸܡܙܹܗ ܠܲܕܼܡܸܣܬܲܥܪ̈ܵܢ 492 ܘܛܵܟ ܩܵܕܹܗ ܠܹܗ ܥܒܼܵܕܼܵܐ ܠܪܸܡܙܹܗ ܕܠܵܐ ܫܘܼܘܚܵܪܵܐ ܀ 493 :ܚܕܼܵܐ ܒܲܪ̄ܬܼ ܩܵܠܵܐ ܩܵܥܹ̇ܐ ܒܐܲܪܥܵܐ ܘܫܵܡܲ݁ܥ ܠܵܗ̇ ܟܠ 494 ܘܥܲܕܼܠܵܐ ܫܵܠ̇ܡܵܐ ܫܠܸ݂ܡ ܟܠ ܡܸܕܸܿܡ ܘܢܵܚ̣ ܘܐܸܬܿܛܲܟܲܣ ܀ 495 :ܒܗܵܘ̇ ܦܘܼܩܕܵܢܵܐ ܕܲܩ̣ܪܵܐ ܡܸܢܫܹܠܝ ܒܪܝܼܬܼܵܐ ܒܪܵܫܝܼܬܼ 496 ܡܕܲܡܸܐ ܐܵܦ ܗܘ̤ ܘܲܡܚܲܕܸܿܬܼ ܟܠ ܒܚܹܝܠ ܡ̇ܪܹܟܿܠ ܀ 497 :ܗܘ̤ ܗܵܘ̇ ܚܲܝܠܵܐ ܕܡ̣ܢ ܠܵܐ ܡܸܕܸܿܡ ܥܒ݂ܲܕܼ ܟܠ ܡܸܕܸܿܡ 498 ܗܘ̤ ܡܚܲܕܸܿܬܼ ܒܹܗ ܫܡܲܝܵܐ ܘܐܲܪܥܵܐ ܡܠܝܼܠܹ̈ܐ ܘܚܲܪ̈ܫܹܐ ܀ 499 :ܡܠܝܼܠܹ݁̈ܐ ܘܚܲܪ̈ܫܹܐ ܡܢܝܼܚ ܡ̣ܢ ܥܲܡܠܵܐ ܘܡ̣ܢ ܫܘܼܚܠܵܦܵܐ 500 ܘܠܵܐ ܬܘܼܒܼ ܥܵܡ̇ܠܝܼܢ ܘܠܵܐ ܡܸܬܼܥܲܡܠܝܼܢ ܒܲܥܡܝܼ̈ܠܬܼܵܐ ܀ 501 :ܗܘ̤ ܫܲܪܝܼ ܒܹܗ ܒܗܵܘ̇ ܚܘܼܕܼܵܬܼܵܐ ܕܠܵܐ ܡܸܬܼܚܲܒܲܠ 502 ܘܗܘ̤ ܓܵܡܲ݁ܪ ܠܹܗ ܒܲܓܼܡܝܼܪܘܼܬܼܵܐ ܕܠܵܐ ܫܘܼܠܵܡܵܐ ܀ 503 :ܗܘ̤ ܗܘ̤ܵܐ ܠܘܼܩܕܼܵܡ ܒܚܲܝܹ̈ܐ ܕܪܵܡܝܼܢ ܡ̣ܢ ܢܸܟܼܝܵܢܹ̈ܐ 504 ܘܩܲܢܸܐ ܚܲܝܠܵܐ ܠܡܸܬܲܠ ܚܲܝܹ̈ܐ ܐܵܦ ܠܲܐ̄ܚܪ̈ܵܢܹܐ ܀ 505 :ܩܵܢܹܝܢ ܠܵܐ ܡ̇ܝܘܿܬܹ̈ܐ ܝ̄ܪܸܬܼ ܡ̇ܝܘܿܬܼܵܐ 506 ܘܲܒܼܝܵܪܬܿܘܼܬܹܗ ܡܫܵܘܬܸܿܦ ܐ̄ܢܵܫܵܐ ܘܪ̈ܘܼܚܵܢܵܝܹܐ ܀ 507 :ܒܢܲܝ̈ ܝܵܪܬܿܘܼܬܹܗ ܟܬܼܝܼܒܼ ܕܲܗ̤ܘܲܝܢܲܢ ܐܵܦ ܗܵܘܹ̇ܝܢܲܢ 508 ܡ̇ܕܹܝܢ ܫܲܪܝܼܪ ܘܠܵܐ ܡܸܬܿܕܲܓܲܠ ܫܘܼܘܕܵܝܣ ܡܸܠܵܘ̈ܗܝ ܀ 509 :ܫܪܵܪܵܐ ܓܲܠܝܵܐ ܚܙ̣ܵܘ ܪ̈ܘܼܚܵܢܹܐ ܒܝܲܕܼ ܐܲܪܥܵܢܵܐ 510 ܘܲܚܕܼܝܼܘ ܘܫܲܒܲܚܘ ܠܗܵܘ̇ ܕܲܓܼܠ̣ܵܐ ܒܹܗ ܫܪܵܪ ܟܲܣܝܘܼܬܹܗ ܀ 511 :ܩܵܠ ܬܸܫܒܿܘܿܚܬܵܐ ܐܲܙܥܸܩܘ ܒܐܲܪܥܵܐ ܟܸܢܫܲܝ̈ ܪܵܘܡ̇ܐ 512 ܠܟܲܣܝܵܐ ܕܚܵܘܝܼ ܚܘܼܒܹܿܗ ܒܓܸܠܝܵܐ ܠܲܒܼܢܲܝ̈ ܒܲܝܬܹܿܗ ܀ 513 :ܚܘܼܒܹܿܗ ܪܲܒܵܐ ܓܠ̣ܵܐ ܠܲܥܒܼܝܼܪܹ̈ܐ ܒܝܲܕܼ ܒܲܪܢܵܫܵܐ 514 ܘܐܲܠܸܦ ܐܸܢܘܿܢ ܕܠܲܝܬܿ ܒܲܥܒܼܝܼܕܹ̈ܐ ܕܪܲܒܿ ܡ̣ܢ ܐ̄ܢܵܫܵܐ ܀ pb. 70 515 :ܪܲܒܿ ܪ̈ܲܒܵܢܹܐ ܕܿܥܒܼܵܕܼ ܐܝܼܕܼܵܘ̈ܗܝ ܥܲܒܼܕܹܿܗ ܠܐ̄ܢܵܫܵܐ 516 ܘܗܵܐ ܡܡܲܠܹܝܢ ܒܹܗ ܟܝܵܢܵܐ ܛܲܟܼܣܵܠ ܕܲܡܫܲܡܫܵܢܹ̈ܐ ܀ 517 :ܠܪܲܒܵܢܘܼܬܹܗ ܣܵܓܼ̇ܕܵܐ ܒܪܝܼܬܼܵܐ ܐܲܝܟ ܕܲܠܡܵܪܵܐ 518 ܘܲܡܝܲܩܪܵܐ ܠܹܗ ܡܸܛܠ ܚܲܝܠܵܐ ܕܡܸܙܕܲܝܲܚ ܒܹܗ ܀ 519 :ܚܹܝܠ ܒܵܪܘܿܝܵܐ ܨܒܼܵܐ ܕܲܢܪܝܼܡܹܗ ܠܪܵܘܡ̇ܐ ܕܲܫܡܹܗ 520 ܘܗܵܐ ܡܸܫܬܿܡܲܗ ܒܲܫܡܵܐ ܕܠܲܝܬܿ ܒܹܗ ܦܚܡܵܐ ܐ̄ܚܪܹܢܵܐ ܀ 521 :ܠܲܝܬܿ ܠܲܥܒܼܝܼܕܼܵܐ ܫܸܡ ܥܵܒܲܘܿܕܼܵܐ ܘܠܵܐ ܟܠ ܟܠܹܗ 522 ܘܗܵܢܵܘ̇ ܬܲܗܪܵܐ ܕܲܫܘ̣ܵܐ ܥܒܼܝܼܕܼܵܐ ܠܫܸܡ ܥܵܒܲ݁ܘܿܕܵܪܐ ܀ 523 :ܒܪܝܼܬܹܗ ܝܲܩܲܪ ܒܵܪܹܐ ܒܪܝܼܬܼܵܐ ܒܗܵܕܹܐ ܕܲܣܥ݂ܲܪ 524 ܕܢܸܣܲܒܼ ܡܸܢܵܬܼܵܐ ܡܸܕܹܿܡ ܘܝܲܩܪܵܗ̇ ܒܫܘܼܒܼܚܹܗ ܀ 525 :ܡܢܵܬܼܵܐ ܗ̄ܘ̣ ܡ̣ܢ ܟܠ ܗܵܘ̇ ܒܲܪܢܵܫܵܐ ܕܲܗܘ̤ܵܐ ܒܗܵܠܹܝܢ 526 ܘܒܹܗ ܒܐܝܼܩܵܪܹܗ ܡܸܬܼܝܲܩܲܪ ܟܠ ܥܲܡ ܡ̇ܪܹܟܿܠ ܀ 527 :ܡܢܵܬܼܵܐ ܗ̄ܝܼ ܢܲܦܫܹܗ ܡ̣ܢ ܪ̈ܘܼܚܵܢܹܐ ܘܠܵܐ ܚܵܫܘܿܫܹ̈ܐ 528 ܘܩܲܪܝܼܒܼܝܼܢ ܠܹܗ ܒܲܐ̄ܚܝܵܢܘܼܬܼܵܐ ܘܲܒܼܪܘܼܡܪܵܡ̇ܐ ܀ 529 :ܡܢܵܬܼܵܐ ܗ̄ܘ̣ ܦܲܓܼܪܹܗ ܡ̣ܢ ܟܠ ܦܲܓܼܪ̈ܝܼܢ ܡܸܬܼܚܲܒܿܠܵܢܹ̈ܐ 530 ܘܲܡܚܲܝܢܝܼܢ ܠܹܗ ܒܛܘܿܗܡ̇ܐ ܕܦܲܓܼܪܵܐ ܘܲܕܼܚܘܼܕܵܬܼܵܐ ܀ 531 :ܘܡ̣ܢ ܟܠ ܒܸܪ̈ܝܵܢ ܐܝܼܬܼ ܒܹܗ ܡܢܵܬܼܵܐ ܒܪܵܫܝܼܬܼ ܚܲܝܲܝ̈ܢ 532 ܘܲܒܼܪܘܼܡܪܵܡܹܗ ܐܵܦ ܪܘܼܡܪܵܡ̇ܐ ܕܟܼܠܵܗ̇ ܒܪܝܼܬܵܪܐ ܀ 533 :ܐܲܝܟܲܢ ܡ̇ܕܹܝܢ ܐܵܒܹ̇ܕܼ ܡܸܕܸܿܡ ܡ̣ܢ ܒܸܪ̈ܝܵܬܼܵܐ 534 ܕܗܵܐ ܟܠ ܡܸܕܸܿܡ ܡܣܲܝܲܟ ܘܲܢܛܝܼܪ ܒܚܲܕܼ ܡ̣ܢ ܓܸܢܣܲܢ ܀ 535 :ܐܲܝܟܲܢ ܡܲܨܝܵܐ ܕܟܲܕܼ ܪܹܫܝܼܬܼܵܐ ܒܫܘܼܒܼܚܵܐ ܫܲܪܝܵܐ 536 ܓܘܼܫܡܵܐ ܕܡܸܢܹܗ ܗܘ̤ܵܬܼ ܪܹܫܝܼܬܼܵܐ ܢܩܵܘܸܐ ܒܨܲܥܪܵܐ ܀ 537 :ܠܵܐ ܫܵܡ̇ܘܿܥܵܐ ܠܵܐ ܬܸܦܠܓܼܝܼܘܗܝ ܠܚܘܼܒܵܐ ܕܟܼܠܵܐ 538 ܘܠܵܐ ܬܸܣܕܿܘܿܩܲܝܗܝ ܠܓܼܘܼܫܡܵܐ ܫܲܠܡܵܐ ܡ̣ܢ ܫܲܘܝܘܼܬܹܗ ܀ 539 :ܠܵܐ ܬܸܬܼܦܲܠܲܓܼ ܕܐܲܝܟܲܢ ܡܲܨܝܵܐ ܗܵܕܹܐ ܠܡܸܗܘܵܐ 540 ܗܲܝܡܸܢ ܕܲܡܨܸܐ ܚܹܝܠ ܒܵܪܘܿܝܵܐ ܚܹܝܠ ܟܠܡܸܕܸܿܡ ܀ 541 :ܠܚܹܝܠ ܒܵܪܘܿܝܵܐ ܦܫܝܼܩ ܟܠܡܸܕܸܿܡ ܕܲܟܼܣܸܐ ܘܲܓܼܠܸܐ 542 ܘܠܵܐ ܡܸܬܼܥܵܘܲܟ ܐܸܡܲܬܼܝ ܕܨܵܒܹ̇ܐ ܕܢܸܣܥܘܿܪ ܡܸܕܸܿܡ ܀ 543 :ܠܹܗ ܠܒܼܵܪܘܿܝܵܐ ܫܸܦܪܲܬ̤ ܗܵܕܹܐ ܕܗܵܟܲܢ ܢܸܣܥܘܿܪ 544 ܘܲܣܥܝܼܪܵܐ ܗ̄ܘ̣ܵܬܼ ܠܨܸܒܼܝܵܢ ܚܘܼܒܹܿܗ ܥܲܕܼܠܵܐ ܢܸܣܥܘܿܪ ܀ 545 :ܠܵܘ ܚܲܕܼܬܼܵܐܝܼܬܼ ܓ̣ܒܼܵܐ ܚܲܕ ܐ̄ܢܵܫܵܐ ܠܚܘܼܕܵܬܼ ܟܠܵܐ 546 ܕܓܲܒܸܐ ܗ̄ܘ̣ܵܐ ܠܹܗ ܥܲܕܼܠܵܐ ܢܸܒܼܪܸܐ ܒܪܝܼܬܼܵܐ ܒܪܵܫܝܼܬܼ ܀ 547 :ܥܲܡ ܐܝܼܬܼܘܼܬܹܗ ܐܝܼܬܹܝܗ̇ ܗ̄ܘ̣ܵܬܼ ܒܹܗ ܗܵܕܹܐ ܕܲܣܥܲܪ 548 ܠܵܐ ܕܐܝܼܬܹܝܗ̇ ܗ̄ܘ̣ܵܬܼ ܐܸܠܵܐ ܕܡܸܢܹܗ ܠܵܐ ܟܵܣܝܵܐ ܗ̄ܘ̣ܵܬܼ ܀ 549 :ܕܠܵܐ ܫܘܼܪܵܝܵܐ ܡܫܲܪܲܪ ܗ̄ܘ̣ܵܐ ܠܹܗ ܠܗܵܢ ܦܘܼܣܩܵܢܵܐ 550 ܘܐܝܼܬܼܵܘܗܝ ܗ̄ܘ̣ܵܐ ܠܹܗ ܐܲܟܼܡܵܐ ܕܐܝܼܬܼܵܘܗܝ ܒܵܬܲܪ ܙܲܒܼܢܵܐ ܀ pb. 71 551 :ܘܐܸܢ ܗܵܟܲܢܵܐ ܗ̄ܝܼ ܐܵܦ ܫܲܪܝܼܪܵܐ ܐܲܟܼܡܵܐ ܕܐܝܼܬܹܝܗ̇ 552 ܠܵܐ ܢܸܬܼܦܲܠܲܓܼ ܥܲܠ ܣܘܼܥܪܵܢܵܐ ܕܐܝܼܬܼܵܘܗܝ ܡܸܡܬܼܘܿܡ ܀ 553 :ܡܸܡܬܼܘܿܡ ܐܝܼܬܼܵܘܗܝ ܐܝܼܬܼܝܵܐ ܕܐܲܚܬܿܝܼ ܟܠ ܠܲܗܘܵܝܵܐ 554 ܘܒܹܗ ܟܲܣ̈ܝܵܢ ܗ̣̄ܘܲܝ̈ ܟܠܗܹܝܢ ܕܲܗ̤ܘܲܝ̈ ܐܸܡܲܬܼܝ ܕܲܗ̤ܘܲܝ̈ ܀ 555 :ܒܪܸܐ ܗ̄ܘ̣ܵܐ ܥܵܠܡܵܐ ܐܲܝܟ ܕܡ̣ܢ ܨܹܐܕܼܵܘܗܝ ܥܲܕܼܠܵܐ ܢܸܒܼܪܹܝܗܝ 556 ܘܲܡܚܲܕܲܬܼ ܗ̄ܘ̣ܵܐ ܩܕܼܵܡ ܕܲܢܒܲܕܸܿܩ ܥܲܠ ܚܘܼܕܵܬܹܗ ܀ 557 :ܒܬܸܢܝܵܐ ܚܲܕܿܬܹܗ ܠܨܸܒܼܝܵܢ ܚܘܼܒܹܿܗ ܨܵܒܹ̇ܐ ܒܚܲܝܲܝ̈ܢ 558 ܘܐܲܠܦܲܢ ܛܲܟܼܣܵܐ ܕܐܲܡܝܼܢܘܼܬܹܗ ܘܒܼܵܪܘܿܝܘܼܬܹܗ ܀ 559 :ܠܲܢ ܗ̄ܘ̣ ܐܲܠܸܦ ܒܗܵܠܹܝܢ ܕܲܣܥ݂ܲܪ ܡܸܛܠܵܬܲܢ 560 ܕܲܟܼܡܵܐ ܪܲܚ̣ܡܲܢ ܘܲܟܼܡܵܐ ܝܲܩܪܵܢ ܒܲܫܒܼܝܼ̈ܚܵܬܹܗ ܀ 561 :ܪܲܚܡܲܢ ܕܲܒܼܪܵܢ ܟܲܕܼ ܝܵ̇ܕܲܥ ܗ̄ܘ̣ܵܐ ܕܣܵܢܹ̇ܝܢܲܢ ܠܹܗ 562 ܘܲܡܚܲܕܸܿܬܼ ܠܲܢ ܘܲܡܦܵܣ ܣܲܓܿܝܼ ܕܠܵܐ ܫܵܘܹ̇ܝܢܲܢ ܀ 563 :ܠܵܐ ܫܵܘܹܿܝܢܲܢ ܘܲܟܼܡܵܐ ܕܢܹܐܡܲܪ ܠܵܐ ܫܵܘܹ̇ܝܢܲܢ 564 ܕܢܸܣܲܒܼ ܕܲܪܓܼܵܐ ܕܪܵܡ ܘܲܡܥܲܠܲܝ ܡ̣ܢ ܕܲܥܒܼܝܼ̈ܕܹܐ ܀ 565 :ܠܵܐ ܡܸܬܼܦܲܚܲܡ ܟܝܵܢ ܒܵܪܘܿܝܵܐ ܥܲܡ ܒܸܪ̈ܝܵܬܼܵܐ 566 ܘܡܲܢ ܠܵܐ ܢܸܬܼܡܲܗ ܕܥܲܒܼܕܹܿܢ ܦܸܚܡܹܗ ܒܝܲܕܼ ܕܐܵܘܪܸܒܼ ܀ 567 :ܚܲܕܼ ܡ̣ܢ ܐ̄ܢܵܫܵܐ ܨܒܼܵܐ ܨܸܒܼܝܵܢܹܗ ܘܲܨܒܼܵܐ ܒܹܗ ܛܵܒܼ 568 ܘܣܵܡ̣ ܨܸܒܼܝܵܢܹܗ ܒܝܲܕܼ ܨܸܒܼܝܵܢܹܗ ܕܲܢܦܲܪܢܸܣ ܟܠ ܀ 569 :ܒܝܲܕܼ ܨܼܒܼܝܵܢܹܗ ܣܵܡ̣ ܨܸܒܼܝܵܢܵܐ ܐܲܠܵܗܵܝܵܐ 570 ܘܠܲܝܬܿ ܨܸܒܼܝܵܢܵܐ ܕܠܵܐ ܒܹܗ ܡܲܣܲܝܲܟ ܨܸܒܼܝܵܢܵܐܝܼܬܼ ܀ 571 :ܒܹܗ ܡܸܬܼܩܲܝܲܡ ܥܵܠܡܵܐ ܕܙܲܒܢܵܐ ܘܗܵܘ̇ ܕܲܠܥܵܠܲܡ 572 ܘܗܘ̤ـܝܘܼ ܡܕܲܒܲܪ ܠܐܲܪ̈ܥܵܢܵܝܹܐ ܘܲܡܫܲܝܵܢܹ̈ܐ ܀ 573 :ܗܘ̤ ܙܵܐܹ̇ܢ ܟܠ ܡ̣ܢ ܒܹܝܬܼ ܓܲܙܵܐ ܕܗܵܘ̇ ܕܲܨܒܼܵܐ ܒܹܗ 574 ܘܗܘ̤ ܡܛܲܟܸܿܣ ܟܠ ܐܲܝܟ ܨܸܒܼܷܵܝܵܢܵܐ ܕܣܵܐܹ̇ܡ ܛܲܟܼܣܵܐ ܀ 575 :ܡܛܲܟܸܿܣ ܟܠܵܐ ܘܡܲܚܸܐ ܠܟܼܠܵܐ ܠܒܼܝܼܕܼ ܒܲܪ ܓܸܢܣܲܢ 576 ܘܟܲܕܼ ܒܲܪܢܵܫܵܐ ܗ̄ܘ̣ ܐܝܼܬܼ ܠܹܗ ܕܲܪܓܼܵܐ ܐܲܠܵܗܵܝܵܐ ܀ 577 :ܟܝܵܢܹܗ ܡܲܠܸܦ ܕܪܵܡ ܗ̄ܘ̣ ܡܸܢܹܗ ܕܲܪܓܼܵܐ ܕܲܢܣܲܒܼ 578 ܘܣܵܗܹ̇ܕܼ ܐܵܦ ܗܘ̤ ܕܪܵܡ ܗ̄ܘ̣ ܕܲܪܓܹܗ ܡ̣ܢ ܬܘܼܩܵܢܹܗ ܀ 579 :ܬܵܘ ܟܹܝܬܼ ܢܸܬܼܗܲܪ ܒܕܲܪܓܼܵܐ ܕܲܡ̣ܛܵܝܗܝ ܠܓܸܢܣܲܢ ܫܝܼܛܵܐ 580 ܘܢܸܦܪܘܿܥ ܛܲܝܒܿܘܼ ܠܗܵܘ̇ ܕܐܲܪܝܼܡܲܢ ܠܪܵܘܡ̇ܐ ܕܲܫܡܹܗ ܀ 581 :ܬܵܘ ܢܸܬܿܕܲܡܲܪ ܒܚܹܝܠ ܫܘܼܠܛܵܢܵܐ ܕܒܲܪ ܐ̄ܢܵܫܘܼܬܿܢ 582 ܕܲܡܚܲܕܲܬܼ ܟܠ ܘܕܼܵܐܹ̇ܢ ܟܠܵܐ ܐܲܝܟ ܡ̇ܪܹܟܿܠ ܀ 583 :ܬܵܘ ܢܸܬܼܡܲܗ ܒܹܗ ܡ̇ܐ ܕܡܸܬܼܚܵܘܸܐ ܡ̣ܢ ܟܲܪ ܕܐܝܼܬܼܵܘܗܝ 584 ܕܕܼܵܢܲܚ̇ ܡ̣ܢ ܫܹܠܝ ܘܲܡܚܲܦܸܐ ܠܹܗ ܠܢܘܼܗܪܵܐ ܒܢܘܼܗܪܹܗ ܀ 585 :ܬܵܘ ܢܸܬܼܥܲܗܲܕܼ ܗܵܝ̇ ܡܲܚܲܬܿܬܵܐ ܕܢܵܚܹ̇ܬܼ ܠܐܲܪܥܵܐ 586 ܘܦܵܢܹ̇ܐ ܘܣܵܠܹ̇ܩ ܟܲܕܼ ܐܝܼܬܼ ܥܲܡܹܗ ܟܠܵܗ̇ ܒܪܝܼܬܼܵܐ ܀ 587 ܟܠܵܗ̇ ܒܪܝܼܬܼܵܐ ܐܸܡ̇ܪܹܬܼ ܕܣܵܠ̇ܩܵܐ ܥܲܡ ܣܘܼܠܵܩܹܗ: pb. 72 588 ܒܗܵܝ̇ ܕܐܲܣܝܼܪܝܼܢ ܟܠܝܼܠܹ̈ܐ ܘܚܲܪ݁ܫܹܐ ܒܦܲܓܼܪܹܗ ܘܢܲܦܫܹܗ ܀ 589 :ܬܵܘ ܢܸܬܿܛܲܝܲܒܼ ܠܗܵܘ̇ ܛܘܼܝܵܒܼܵܐ ܕܲܡܛܲܝܲܒܼ ܠܲܢ 590 ܘܲܢܣܲܟܸܿܐ ܠܹܗ ܠܗܵܘ̇ ܣܘܼܟܵܝܐ ܕܲܡܒܲܝܲܐ ܠܲܢ ܀ 591 :ܒܚܘܼܒܵܐ ܢܸܛܲܪ ܪܲܗܒܼܘܿܢ ܚܲܝܹ̈ܐ ܕܗܵܘ̇ ܚܘܼܕܼܵܬܼܵܐ 592 ܕܠܵܐ ܢܸܬܼܟܲܐܲܪ ܡ̇ܐ ܕܡܸܬܼܚܲܕܿܬܼܝܼܢ ܫܡܲܝܵܐ ܘܐܲܪܥܵܐ ܀