Narsai: On Pentecost - ܥܲܠ ܝܘܿܡ ܥܹܐܕܼܵܐ ܕܦܲܢܛܹܩܘܼܣܛܹܐ

1 :ܓܲܙܵܐ ܕܪܘܼܚܵܐ ܦܬ݂ܲܚ ܒܵܪܘܿܝܵܐ ܩܕܼܵܡ ܡ̇ܝܘܿܬܹ̈ܐ 2 ܘܐܲܥܬܲܪ ܐܸܢܘܿܢ ܡ̣ܢ ܣܝܼ̈ܡܵܬܼܵܐ ܕܪܲܒܿܘܼܬܼ ܚܲܝܠܹܗ ܀ 3 :ܒܡܵܐܢܵܐ ܣܵܡܹܗ ܠܥܘܼܬܼܪܹܗ ܡܲܥܬܲܪ ܟܠܵܐ 4 ܘܟܲܕܼ ܗܘ̤ ܫܝܼܛܵܐ ܗ̄ܘ̣ ܢܛ݂ܲܪ ܒܹܗ ܓܲܙܵܐ ܕܲܫܒܼܝܼ̈ܚܵܬܼܵܐ ܀ 5 :ܛܝܼܢܵܐ ܪܲܦܝܵܐ ܥܒܲܕܼ ܓܹܐܙܲܒܼܪܵܐ ܕܲܣܬܼܝܼܪ̈ܵܬܹܗ 6 ܘܫܲܓܼܪܹܗ ܒܪܘܼܚܵܐ ܘܣܵܡ̣ ܒܹܗ ܪܘܼܚܵܐ ܫܒܼܝܼܚܵܐ ܒܫܝܼܛܵܐ ܀ 7 :ܐܲܝܟ ܟܸܢܵܪܹ̈ܐ ܒܡܸܢܲܝ̈ ܦܲܓܼܪܹܗ ܙܡܲܪ ܟܲܣܝܵܬܹ̈ܐ 8 ܘܚܲܟܿܝܼ ܒܩܵܠܹܗ ܠܐܲܪ݁ܥܵܢܵܝܹܐ ܘܠܲܫܡܲܝܵܢܹ̈ܐ ܀ 9 :ܐܲܝܟ ܫܝܼܦܘܿܪܵܐ ܩܥ̣ܵܐ ܦܘܼܩܵܕܵܢܵܐ ܒܠܸܫܵܢ ܒܸܣܪܵܐ 10 ܘܲܟܼܢܲܫ̣ܘ ܨܹܐܕܼܵܘܗܝ ܪ̈ܘܼܚܵܢܵܝܹܐ ܘܦܲܓܼܪ̈ܵܢܵܝܹܐ ܀ 11 :ܩܲܢܝܵܐ ܪܥܝܼܥܵܐ ܗܘ̤ܵܐ ܐܲܒܿܘܼܒܼܵܐ ܠܪܘܼܚܵܐ ܚܲܝܵܐ 12 ܘܦܲܨܲܚ ܟܠܵܐ ܒܗܲܢܝܼܐܘܼܬܼܵܐ ܕܵܙܡܝܼܪ̈ܵܬܹܗ ܀ 13 :ܡ̇ܘܠܸܕܼ ܚܲܫܹ̈ܐ ܫܪ̣̱ܵܐ ܒܹܗ ܚܲܝܠܵܐ ܡܲܚܸܐ ܠܟܼܠܵܐ 14 ܘܫܲܪܝܼ ܡܲܪܕܸܿܐ ܚܲܝܹ̈ܐ ܠܟܼܠܵܐ ܒܪܘܼܚ ܣܸܦ̈ܘܵܬܹܗ ܀ 15 :ܟܪܝܼܗܵܐ ܕܲܪܡܸܐ ܒܟܹܐܒܹ̈ܐ ܕܥܵܘ̣ܠܵܐ ܢܘܼܓܼܪܵܐ ܕܙܲܒܼܢܵܐ 16 ܫܲܪܝܼ ܡܲܐܣܸܐ ܟܹܐܒܹ̈ ܕܦܲܓܼܪܵܐ ܘܡܘܼܡܹ̈ܐ ܕܢܲܦܫܵܐ ܀ pb. 73 17 :ܩܲܝܣܵܐ ܕܝܼܒܸܫ ܒܚܘܼܡ̇ܐ ܩܲܫܝܵܐ ܕܲܪ̈ܓܼܝܼܓܼܵܬܼܵܐ 18 ܐܲܦܪܲܥ ܡܸܫܢܹܠܝ ܘܲܛܥ݂ܲܢ ܦܹܐܪܹ̈ܐ ܕܗܲܢܝܼܐܘܼܬܼܵܐ ܀ 19 :ܟܲܪܡ̇ܐ ܕܲܛܠ݂ܲܡ ܦܵܠ ܦܘܼܠܚܵܢܵܐ ܘܐܵܘܥܝܼ ܝܥܪܵܐ 20 ܒܲܟܲܪ ܡܸܢܹܫܠܝ ܣܓܼܘܼܠܵܐ ܕܚܲܡܪܵܐ ܘܲܦܪ̣݂ܲܥ ܫܘܼܒܼܚܵܐ ܀ 21 :ܝܵܪܵܪܬܵܐ ܕܒܲܪܕܲܪ ܥܘܼܬܼܪܵܐ ܕܲܢܣ݂ܲܒܼ ܙܒܲܠܝܼܠܘܼܬܼܵܐ 22 ܦܢ̣ܵܐ ܨܹܝܕܼ ܐܲܒܼܘܼܗܝ ܘܲܣܘ݂ܲܝ ܠܐܘܼܪܥܹܗ ܘܝܲܗ̣̄ܒܼܠܹܗ ܥܘܼܬܼܪܹܗ ܀ 23 :ܒܚܘܼܒܵܐ ܘܪ̈ܲܚܡܹܐ ܡܣ݂ܲܚ ܒܵܪܘܿܚܵܐ ܠܘܼܩܒܲܠ ܚܲܝܲܝ̈ܢ 24 ܘܥܲܦܩܹܗ ܠܓܸܢܣܲܢ ܒܝܲܕܼ ܪܹܫܝܼܬܼܵܐ ܕܢܲܣ݂ܲܒܼ ܡܸܢܲܢ ܀ 25 :ܟܲܣܝܼ ܨܲܥܪܵܢ ܒܐܸܣܛܲܠ ܫܘܼܒܼܚܵܐ ܕܙܲܩ̣ܪܘܼܗ̇ ܪ̈ܲܚܡܹܐ 26 ܘܝܲܗ̄ܒܼ ܪܲܗܒܼܘܿܢܵܐ ܚܲܝܠܵܐ ܕܪܘܼܚܵܐ ܐܲܝܟ ܥܸܙܲܩܬܼܵܐ ܀ 27 :ܙܲܡܸܢ ܘܲܩܪܵܢ ܠܲܚܠܘܿܠ ܚܲܝܹ̈ܐ ܕܠܵܐ ܫܘܼܠܵܡܵܐ 28 ܘܲܠܡܸܫܬܿܘܼܬܼܵܐ ܕܡܲܠܝܵܐ ܛܘܼܒܹ̈ܐ ܕܠܵܐ ܡܸܣܬܿܒܼܥܝܼܢ ܀ 29 :ܒܐ̄ܪܵܙܵܐ ܡܲܟܼܪܲܢ ܠܫܵܘܬܵܦܘܼܬܼܵܐ ܕܲܠܘܵܬܼ ܚܘܼܒܹܿܗ 30 ܘܦܲܬ̣ܿܚ ܓܲܙܹܗ ܘܚܲܬܸܿܡ ܡܸܠܵܘ̈ܗܝ ܒܝܲܕܼ ܣܘܼܥܪ̈ܵܢܹܐ ܀ 31 :ܓܒܼܵܐ ܡ̣ܢ ܓܸܢܣܲܢ ܚܲܕܼ ܗܲܕܼܵܡ̇ܐ ܐܲܝܟ ܪܹܫܝܼܬܼܵܐ 32 ܘܩܲܕܿܫܹܗ ܒܪܘܼܚܵܐ ܘܩܲܒܸܿܠ ܕܸܒܼܚܹܗ ܐܲܝܟ ܦܘܼܪܩܵܢܵܐ ܀ 33 :ܥܲܒܼܕܹܿܗ ܓܲܙܵܐ ܕܲܣܬܼܝܼܪ̈ܵܬܼܵܐ ܘܲܕܼܚܲܠ̈ܝܵܬܼܵܐ 34 ܘܐܲܡܠܸܟ ܒܐܝܼܕܹܗ ܕܢܲܥܬܲܪ ܟܠܵܐ ܡ̣ܢ ܡ̇ܘܗܲܒܼܬܹܗ ܀ 35 :ܒܹܗ ܐܸܫܬܵܘܕܿܝܼ ܠܲܒܼܢܲܝ̈ ܓܸܢܣܹܗ ܘܝܵܪܬܿܘܼܬܼ ܚܲܝܹ̈ܐ 36 ܘܥܲܒܼܕܹܿܗ ܢܸܒܼܥܵܐ ܕܢܲܫܩܸܐ ܠܕܼܝܼܠܹܗ ܡ̣ܢ ܚܲܝܘܼܬܹܗ ܀ 37 :ܡ̣ܠܵܝܗܝ ܡ̣ܢ ܚܲܝܠܵܐ ܕܐܲܠܵܗܘܼܬܹܗ ܕܠܵܐ ܡܸܬܼܒܲܨܲܪ 38 ܕܢܼܬܸܿܠ ܚܲܝܠܵܐ ܒܡܵܝܘܿܬܼܘܼܬܼܵܐ ܡܚܝܼܠܲܬܼ ܚܲܝܠܵܐ ܀ 39 :ܡ̣ܠܲܟ ܘܐܸܫܬܵܘܕܿܝܼ ܠܲܡܫܲܡܫܵܢܹ̈ܐ ܕܟܼܵܪܘܿܙܘܼܬܹܗ 40 ܕܢܲܥܬܲܪ ܐܸܢܘܿܢ ܡ̣ܢ ܡܲܠܝܘܼܬܼܵܐ ܕܚܲܝܠܵܐ ܕܲܢܣܲܒܼ ܀ 41 :ܠܲܒܸܿܒܼ ܐܸܢܘܿܢ ܟܲܕܼ ܐܵܙܹ̇ܠ ܗ̄ܘ̣ܵܐ ܠܘܵܬܼ ܫܵܠܘ̇ܚܹܗ 42 ܕܗܵܐ ܐܵܙܹ̇ܠ ܐ̄ܢܵܐ ܘܲܡܫܲܕܲܪ ܐ̄ܢܵܐ ܡܘܼܠܟܵܢܵܐ ܕܐܵܒܼܝ ܀ 43 :ܦܵܪܲܩܠܹܛܵܐ ܟܲܢܝܹܗ ܠܥܘܼܬܼܪܵܐ ܕܫܘܼܘܕܵܝ ܡܸܠܵܘ̈ܗܝ 44 ܕܲܡܨܸܐ ܡܒܲܝܲܐ ܠܡܸܣܟܹܿܢܘܼܬܼܵܐ ܕܟܲܪܝܼܘܼܬܼ ܢܲܦܫܵܐ ܀ 45 :ܩܪ̣ܵܝܗܝ ܡܘܼܠܟܵܢܵܐ ܕܢܸܩܒܿܘܿܠ ܣܲܒܼܪܵܐ ܒܪܸ̈ܥܝܵܢܵܝܗܘܿܢ 46 ܕܐܸܡܲܬܼܝ ܢܸܚܙܘܿܢ ܟܲܕܼ ܡܸܬܼܦܲܠܲܓܼ ܥܘܼܬܼܪܹܗ ܒܓܸܠܝܵܐ ܀ 47 :ܩܪ̣ܵܝܗܝ ܬܘܼܒܼ ܚܲܝܠܵܐ ܕܲܟܼܣܸܐ ܒܪܵܘܡ̇ܐ ܠܥܸܠ ܡ̣ܢ ܟܠܵܐ 48 ܕܲܡܨܸܐ ܚܵܣܹ̇ܢ ܘܙܵܟܹ̇ܐ ܠܟܼܠܵܐ ܒܚܹܝܠ ܪܲܒܿܘܼܬܹܗ ܀ 49 :ܐܲܢ̄ܬܿܘܿܢ ܩܵܘܵܘ ܒܐܲܬܼܪܵܐ ܕܲܝܗܘܼܕܼ ܐܲܝܟܵܐ ܕܚܸܫܹ̇ܬܼ 50 ܥܕܲܡ̇ܐ ܕܐܸܬܸܿܠ ܚܲܝܝܠܵܐ ܕܪܘܼܚܵܐ ܒܗܲܕܵܡܲܝ̈ܟܿܘܿܢ ܀ pb. 74 51 :ܒܨܸܗܝܘܿܢ ܩܵܘܵܘ ܐܲܝܟ ܒܘܼܕܵܩܵܐ ܕܲܢܒܼܝܼܘܼܬܼܵܐ 52 ܕܡܸܢܵܗ̇ ܢܸܦܘܿܩ ܐܲܝܢܵܐ ܕܲܡܨܸܐ ܠܡܸܫܒܲܩ ܥܵܘ̣ܠܵܐ ܀ 53 :ܥܵܘ̣ܠܵܐ ܕܥܲܡܡܹ̈ܐ ܨܒܼܵܐ ܕܲܢܒܲܛܸܠ ܒܥܸܠܲܬܼ ܥܲܡܵܐ 54 ܘܣܵܡ̣ܵܗ̇ ܠܥܸܠܬܼܵܐ ܕܡܸܛܠ ܝܲܥܩܘܿܒܼ ܡܲܗܦܸܟ ܥܵܘ̣ܠܵܐ ܀ 55 :ܒܨܸܗܝܘܿܢ ܚܵܘܝܼ ܕܐܝܼܬܼܵܘܗܝ ܢܘܼܗܪܹܗ ܘܲܓܼܙܵܪ ܕܝܼܢܹܗ 56 ܟܲܕܼ ܡܲܢܗܲܪ ܟܠ ܘܲܡܩܲܛܪܸܓܼ ܒܝܲܕܼ ܒܘܼܚܪܵܢܹܗ ܀ 57 :ܒܕܼܘܼܟܿܬܵܐ ܕܲܓܼܒܼܵܐ ܘܲܩܪ̣ܵܗ̇ ܒܲܫܡܹܗ ܘܣܵܡ̣ ܢܵܡܘܿܣܵܘ̈ܗܝ 58 ܬܲܡ̇ܢ ܦܲܫܸܩ ܚܹܝܠ ܦܸܠ̈ܐܵܬܼܵܐ ܘܟܲܣܝܘܼܬܼ ܐ̄ܪ̈ܵܙܹܐ ܀ 59 :ܠܛܘܼܪܵܐ ܕܨܸܗܝܘܿܢ ܙܲܡܸܢ ܘܲܩܪ̣ܵܐ ܠܫܲܒܼܛܲܝ̈ ܥܲܡܡܹ̈ܐ 60 ܘܚܲܕܿܝܼ ܐܸܢܘܿܢ ܒܲܚܠܘܿܠ ܕܸܒܼܚܹ̈ܐ ܢܵܡܘܿܣܵܝܹ̈ܐ ܀ 61 :ܒܨܸܗܝܘܿܢ ܦܲܫܸܩ ܐܵܦ ܦܸܠܐܬܼܵܐ ܕܗܵܝ̇ ܡܸܫܬܿܘܼܬܼܵܐ 62 ܕܡܸܬܼܟܲܢܫܝܼܢ ܠܵܗ̇ ܐܲܪ̈ܥܵܢܵܝܹܐ ܘܲܡܫܲܝܵܢܹ̈ܐ ܀ 63 :ܬܲܡ̇ܢ ܦܲܩܸܕܼ ܕܲܢܩܵܘܘܿܢ ܠܹܗ ܪ̈ܵܚܡܲܝ ܚܘܼܒܹܿܗ 64 ܕܢܸܦܪܘܿܥ ܐܸܢܘܿܢ ܐܲܓܼܪܵܐ ܕܚܘܼܒܵܐ ܕܚܵܘܝܼܘ ܨܹܐܕܼܵܘܗܝ ܀ 65 :ܐܸܣܲܪ̣ ܐܸܢܘܿܢ ܒܬܸܢܘܲܝ ܕܐܲܓܼܪܵܐ ܪܘܼܚܵܢܵܝܵܐ 66 ܕܠܵܐ ܢܸܢܼܪܲܦܘܿܢ ܡ̇ܐ ܕܲܡܫܲܢܹܝܢ ܚܲܕܼ ܡ̣ܢ ܨܹܝܕܼ ܚܲܕܼ ܀ 67 :ܐܲܪܡܝܼ ܥܠܲܝܗܘܿܢ ܛܲܒܼܥܵܐ ܕܪܘܼܚܵܐ ܐ̄ܪܵܙܵܢܵܐܝܼܬܼ 68 ܘܲܪܫܲܡ ܐܸܢܘܿܢ ܒܪܘܼܚ ܣܸܦܘܵܬܹ̈ܗ ܕܢܸܗܘܘܿܢ ܕܝܼܠܹܗ ܀ 69 :ܒܪܘܼܚܵܐ ܕܦܘܼܡܹܗ ܚܵܘܝܼ ܐܸܢܘܿܢ ܚܹܝܝܠ ܡ̇ܘܗܲܒܼܬܹܗ 70 ܕܡܸܢܹܗ ܢܵܦܹ̇ܩ ܦܘܼܪܥܵܢ ܐܲܓܼܪܵܐ ܕܥܘܼܬܪܵܐ ܕܲܡ̣ܠܲܟ ܀ 71 :ܢܦ݂ܲܚ ܒܐܲܦܲܝ̈ܗܘܿܢ ܘܫܲܪܲܪ ܐܸܢܘܿܢ ܒܫܘܼܘܕܵܝ ܡܸܠܵܘ̈ܗܝ 72 ܘܐܲܠܸܦ ܐܸܢܘܿܢ ܠܡܸܫܒܲܩ ܚܵܘ̈ܒܹܿܐ ܘܠܲܡܕܵܢ ܥܵܘ̣ܠܵܐ ܀ 73 :ܝܲܗ̣̄ܒܼ ܒܐܝܼܕܲܝ̈ܗܘܿܢ ܩܠܝܼܕܼܵܐ ܕܪ̈ܲܚܡܹܐ ܘܲܓܼܙܵܪ ܕܝܼܢܵܐ 74 ܠܡܸܦܬܲܚ ܬܲܪܥܵܐ ܠܲܬܼܪܹܝܢ ܓܲܒܿܝܼ̈ܢ ܠܛܵܒܼ̈ܐ ܘܒܼܝܼܫܹ̈ܐ ܀ 75 :ܚܙ݂ܲܩ ܗܘ̤ ܕܢܸܣܲܒܼ ܡܲܠܟܿܘܼܬܼ ܪܵܘܡ̇ܐ ܕܐܸܬܼܡܲܠܟܲܬ̤ ܠܹܗ 76 ܘܲܠܗܘܿܢ ܒܲܕܸܿܩ ܕܩܵܘܵܘ ܒܲܝܗܘܼܕܼ ܘܐܲܟܼܪܸܙܘ ܙܵܟܼܘܼܬܝ ܀ 77 :ܬܲܡ̇ܢ ܩܵܘܵܘ ܒܐܲܬܼܪܵܐ ܕܣܸܒܼܠܹ̇ܬܼ ܚܲܫܵܐ ܘܨܲܥܪܵܐ 78 ܕܬܲܡ̇ܢ ܐܸܬܸܿܠ ܬܲܚܘܝܼܬܼ ܪܲܒܿܘܼܬܼܝ ܠܲܡܨܲܥܪ݁ܵܢܲܝ ܀ 79 :ܩܕܼܵܡ ܣܲܓܿܝܼ̈ܠܹܐ ܣܸܒܼܠܹ̇ܬܼ ܚܲܫܵܐ ܡ̣ܢ ܡܲܪ̈ܵܚܹܐ 80 ܘܲܠܥܹܝܢ ܟܠܢܵܫ ܡܚܵܘܹܐ ܐ̄ܢܵܐ ܠܹܗ ܠܚܲܝܠܝ ܪܲܥ̇ܒܼܵܕܼܵܐ ܀ 81 :ܐܲܝܟܵܐ ܕܐܲܗܸܠܘ ܘܲܓܼܚܸܟܼܘ ܫܲܦ̈ܠܹܐ ܥܲܠ ܡܲܟܿܝܼܟܼܘܼܬܼܝ 82 ܬܲܡ̇ܢ ܐܲܟܼܪܸܙܘ ܥܲܒ ܓܲܢ̄ܒܵܪܘܼܬܼܝ ܕܠܵܐ ܡܸܬܼܚܲܣܢܵܐ ܀ 83 :ܕܚܲܫܒ̣ܿܘܼܢܝ ܫܝܼܛܵܐ ܘܲܡܠܸܐ ܚܲܫܹ̈ܐ ܘܡܲܣܠܲܝ ܡ̣ܢ ܟܠ 84 ܡܲܠܸܦ ܐ̄ܢܵܐ ܠܗܘܿܢ ܒܝܲܕܼ ܣܘܼܥܪ̈ܵܢܹܐ ܕܚܸܟܼ̈ܡܵܬܼܝ ܀ 85 :ܕܛܲܠܡ̣ܘܼܢܝ ܫܘܼܒܼܚܵܐ ܕܙܵܕܹܩ ܗ̄ܘ̣ܵܐ ܠܝܼ ܐܲܝܟ ܙܲܟܵܝܵܐ 86 ܗܵܐ ܡܸܬܼܟܲܚܕܝܼܢ ܟܲܕܼ ܙܵܡ̇ܪܝܼܢ ܠܝܼ ܟܠ ܠܸܫܵܢܝܼ̈ܢ ܀ pb. 75 87 :ܕܠܵܐ ܗܲܠܸܠܘ ܠܝܼ ܒܝܲܕܼ ܟܸܢܵܪܵܐ ܕܪܘܼܟܵܒܼ ܕܲܘܝܼܕܼ 88 ܐܸܙܡܲܣ ܙܵܟܼܘܼܬܝ ܒܡܸܢܹ̈ܐ ܬܪܸܥܣܲܪ ܕܡ̣ܢ ܫܲܒܼܛܲܝ̈ܗܘܿܢ ܀ 89 :ܐܲܝܟ ܟܸܢܵܪܵܐ ܕܲܬܼܪܸܥܣܲܪܬܵܐ ܛܲܟܸܿܣ ܐܸܢܘܿܢ 90 ܕܲܢܫܲܒܿܚܘܼܢܵܝܗܝ ܒܩܵܠܹ̈ܐ ܬܪܸܥܣܲܪ ܐܲܝܟ ܕܲܒܼܡܸܢܹ̈ܐ ܀ 91 :ܘܲܕܼܠܵܐ ܦܲܪܥܘܼܗܝ ܩܵܠ ܬܵܘܕܲܝܼܬܼܵܐ ܕܚܲܝܵܒܼܝܼܢ ܗ̄ܘ̣ܵܘ 92 ܢ̣ܩܲܫ ܙܵܟܼܘܼܬܹܗ ܒܝܲܕܼ ܟܸܢܵܪܵܐ ܕܲܬܼܪܸܥܣܲܪܬܹܿܗ ܀ 93 :ܬܪܸܥܣܲܪ ܩܵܠܹ̈ܐ ܩܥ̣ܵܘ ܙܵܟܼܘܼܬܹܗ ܐܲܝܟ ܫܝܼܦܘܿܪܹ̈ܐ 94 ܕܲܫܬܸܩܘ ܫܲܒܼܛܹ̈ܐ ܝܲܒܸܿܒܼ ܡܸܢܹ̈ܐ ܕܗܲܕܵܡܲܝ̈ܗܘܿܢ ܀ 95 :ܒܥܹܐܕܼܵܐ ܦܨܝܼܚܵܐ ܕܒܲܚ̣ ܠܲܩܢܘܿܡܹܗ ܒܛܲܟܼܣܵܐ ܕܐܸܡܪܵܐ 96 ܘܲܒܼܥܲܕܼܥܹܕܼܵܐ ܕܦܲܢܛܹܩܘܼܣܛܹܐ ܪܫܼܡ̣ ܙܵܟܼܘܼܬܹܗ ܀ 97 :ܚܲܪܲܪ ܟܠܵܐ ܒܐ̄ܪܵܙ ܦܘܼܪܩܵܢܵܐ ܕܡ̣ܢ ܓܵܘ ܡܸܨܪܹܝܢ 98 ܘܦܲܠܸܓܼ ܥܘܼܬܼܪܹܗ ܐܲܝܟ ܦܸܠ̈ܐܬܼܵܐ ܕܲܒܼܛܘܼܪ ܣܝܼܢܲܝ ܀ 99 :ܒܥܹܐܕܼܵܐ ܕܲܟܼܬܿܒܼ ܠܘܼܚܹ̈ܐ ܕܟܹܐܦܵܐ ܥܠܸܒܵܐ ܕܟܹܐܦܵܐ 100 ܨܵܪ ܐܵܬܼ̈ܘܵܬܼܵܐ ܪ̈ܘܼܚܵܢܝܵܬܼܵܐ ܒܙܵܘ̈ܥܲܝ ܢܲܦܫܵܐ ܀ 101 :ܒܝܵܘܡ̇ܐ ܕܐܵܘܪܸܬܼ ܝܵܪܬܿܘܼܬܼ ܠܒܸܣܪ̈ܵܢܵܝܹܐ 102 ܦܲܠܸܓܼ ܥܘܼܬܼܪܵܐ ܪܘܼܚܵܢܵܝܵܐ ܠܪ̈ܘܼܚܵܢܵܝܹܐ ܀ 103 :ܒܙܲܒܼܢܵܐ ܕܟܲܬܼܒܵܗ̇ ܠܲܕܼܝܵܬܹܩܹܐ ܡܲܠܝܲܬܼ ܡ̇ܘܬܵܐ 104 ܚܬ݂ܲܡ ܡܘܼܠܟܵܢܹ̈ܐ ܠܲܕܼܝܵܬܹܩܹܐ ܝܵܗ̇ܒܲܬܼ ܚܲܝܹ̈ܐ ܀ 105 :ܒܕܼܘܼܡܪܵܐ ܕܩܵܠܹ̈ܐ ܘܲܕܼܩܲܪ̈ܢܵܬܼܵܐ ܕܲܒܼܛܘܼܪ ܣܝܼܢܲܝ 106 ܐܲܡܫܲܥ ܡ̣ܢ ܫܹܠܝ ܩܵܠܵܐ ܕܪܘܼܚܵܐ ܕܲܡܚܲܕܸܿܬܼ ܟܠ ܀ 107 :ܬܲܡ̇ܢ ܩܵܠܵܐ ܕܲܡܠܸܐ ܩܸܢܛܵܐ ܘܡܲܪܗܸܒܼ ܥܲܒܼ̈ܕܹܿܐ 108 ܘܗܵܪܟܵܐ ܩܵܠܵܐ ܕܡܲܩܢܹܐ ܣܲܒܼܪܵܐ ܠܢܲܦܫܵܐ ܘܦܲܓܼܪܵܐ ܀ 109 :ܬܲܡ̇ܢ ܢܘܼܪܵܐ ܐܵܦ ܬܸܢܵܢܵܐ ܘܙܵܘܥܵܐ ܩܲܫܝܵܐ 110 ܘܗܵܪܟܵܐ ܢܘܼܗܪܵܐ ܕܡܸܬܼܦܲܠܲܓܼ ܗ̄ܘ̣ܵܐ ܒܐܵܬܼܵܐ ܕܢܘܼܪܵܐ ܀ 111 :ܬܲܡ̇ܢ ܫܲܡܸܫܘ ܥܲܒܼ̈ܕܹܿܐ ܠܥܲܒܼ̈ܕܹܿܐ ܒܩܵܠܹ̈ܐ ܕܚܝܼܠܹ̈ܐ 112 ܘܗܵܪܟܵܐ ܩܵܪܹܐ ܒܩܵܠܵܐ ܢܝܼܚܵܐ ܕܲܡܠܸܐ ܫܲܝܢܵܐ ܀ 113 :ܬܲܡ̇ܢ ܨܸܒܼܬܵܐ ܕܐܲܪ̈ܥܵܢܝܵܬܼܵܐ ܠܐܲܪ̈ܥܵܢܵܝܹܐ 114 ܘܗܵܪܟܵܐ ܫܘܼܦܪܵܐ ܕܪ̈ܘܼܚܵܢܝܵܬܼܵܐ ܠܲܫܡܲܝܵܢܹ̈ܐ ܀ 115 :ܒܩܸܢܛܵܐ ܪܲܒܵܐ ܫܪܸܐ ܗ̄ܘ̣ܵܐ ܬܲܡ̇ܢ ܐܵܦ ܡܸܨܥܵܝܵܐ 116 ܕܲܡܝܲܒܸܿܠ ܗ̄ܘ̣ܵܐ ܡܸܠܹ̈ܐ ܠܥܲܡܵܐ ܕܲܦܠܝܼܓܼ ܠܸܒܹܿܗ ܀ 117 :ܗܵܪܟܵܐ ܪܹܫܵܐ ܕܲܬܼܪܥܣܲܪܬܵܠ ܒܗܝܼܠ ܟܲܕܼ ܚܵܕܹܐ 118 ܘܡܲܡܠܸܟ ܫܲܝܢܵܐ ܒܓܼܵܘ ܪܸܥܝܵܢܵܐ ܕܲܟܼܢܵܘܵܬܹ̈ܗ ܀ 119 :ܡܘܼܫܹܐ ܩܵܥܹ̇ܐ ܕܕܸܚܠܵܐ ܘܩܸܢܛܵܐ ܡܠܹܝܢ ܚܘܼܫܵܒܲܝ̈ 120 ܘܫܸܡܥܘܿܢ ܡܲܟܼܪܸܙ ܣܲܒܼܪܵܐ ܘܚܘܼܒܵܐ ܘܗܲܝܡܵܢܘܼܬܼܵܐ ܀ 121 :ܡܘܼܫܹܐ ܬܲܠܚܹܗ ܠܢܲܚܬܵܐ ܕܫܲܕܲܪ ܚܲܬܼܢܵܐ ܠܟܲܠܬܼܵܐ 122 ܘܫܸܡܥܘܿܢ ܟܲܣܝܵܗ̇ ܠܥܹܕܲܬܼ ܥܲܡܡܹ̈ܐ ܒܐܸܣܟܲܠ ܫܘܼܒܼܚܵܐ ܀ 123 ܚܲܣܢܹܗ ܠܝܲܨܪܹܗ ܠܡܲܝܬܸܿܐ ܡܟܼܘܼܪܹ̈ܐ ܘܬܲܒܲܪ ܠܘܼܚܹ̈ܐ: pb. 76 124 ܘܦܲܪܣܝܼ ܘܲܓܼܠ̣ܵܗ̇ ܠܙܲܠܝܼܠܘܬܼܵܗ̇ ܕܟܲܠܲܬܼ ܡܲܠܟܵܐ ܀ 125 :ܗܵܪܟܵܐ ܩܵܥܹ̇ܝܢ ܪ̈ܵܚܡܲܝ ܚܲܬܼܢܵܐ ܐܲܝܟ ܫܝܼܦܘܿܪܹ̈ܐ 126 ܘܲܡܚܵܘܹܝܢ ܠܹܗ ܠܫܘܼܦܪܵܗ̇ ܟܲܣܝܵܐ ܕܥܹܕܲܬܼ ܩܘܼܕܼܫܵܐ ܀ 127 :ܩܵܠܵܐ ܕܪܚܵܐ ܫܡܲܥ̣ܘ ܒܸܣܪ̈ܵܢܹܐ ܘܲܓܼܥܲܨܘ ܡܸܢܹܗ 128 ܘܗܵܪܟܵܐ ܫܲܡ̣ܥܘܼܗܝ ܪ̈ܘܼܚܵܢܵܝܹܐ ܘܲܣܘܲܚܘ ܠܐܘܼܪܥܹܗ ܀ 129 :ܩ̣ܥܵܘ ܠܹܗ ܠܡܘܼܫܹܐ ܕܐܲܢ̄ܬܿ ܠܲܡ ܡܲܠܸܠ ܐܲܠܵܗܵܐ 130 ܕܠܵܐ ܗܲܢܝܼ ܗ̄ܘ̣ܵܐ ܩܵܠ ܒܵܪܘܿܝܵܐ ܠܲܕܼܠܵܐ ܐܲܠܵܗ ܀ 131 :ܒܲܓܼܢܘܿܢ ܚܲܬܼܢܵܐ ܪܘܼܚܵܢܵܝܵܐ ܣܵܘܲ݁ܚ ܟܠܢܵܫ 132 ܕܐܸܡܲܬܼܝ ܢܸܫܡܲܥ ܣܒܲܪܬܼܵܐ ܚܕܲܬܼܵܐ ܕܩܵܠ ܒܵܪܘܿܝܵܐ ܀ 133 :ܥܲܠ ܗܵܢ ܣܲܒܼܪܵܐ ܢܦܲܩ̣ܘ ܘܐܸܬܿܬܲܓܲܪܘ ܦܵܥܵܠܹ̈ܐ ܒܟܲܪܡ̇ܐ 134 ܕܢܸܣܒܼܘܼܢ ܐܲܓܼܪܵܐ ܪܲܗܒܼܘܿܢ ܚܠܵܦ ܕܼܝܵܢܵܪܵܐ ܀ 135 :ܦܵܠܚܹ̈ܐ ܚܝܼܨܹ̈ܐ ܫܡܲܥ̣ܘ ܫܘܼܘܕܵܝܵܐ ܕܡܲܠܟܵܐ ܕܪܵܘܡ̇ܐ 136 ܘܛܲܝܸܒܼܘ ܙܵܘܥܹ̈ܐ ܥܲܡ ܗܲܕܵܡܹ̈ܐ ܠܡܸܠܒܲܫ ܙܲܝܢܵܐ ܀ 137 :ܩܥ̣ܵܐ ܡ̣ܢ ܫܸܠܝܵܐ ܐܲܝܟ ܫܝܼܦܘܿܪܵܐ ܩܕܼܵܡ ܡܲܠܟܿܘܼܬܼܵܐ 138 ܘܟܲܢܸܫ ܪܸܡܙܵܐ ܠܚܵܝ̈ܠܵܘܼܬܼܵܐ ܠܐܘܼܪܥܹܗ ܕܡܲܠܟܵܐ ܀ 139 :ܐܲܡܫܲܥ ܩܵܠܵܐ ܘܐܲܙܝܼܥ ܠܐܲܪܥܵܐ ܘܚܵܘܝܼ ܢܘܼܪܵܐ 140 ܟܲܕܼ ܡܲܟܸܿܣ ܗ̄ܘ̣ܵܐ ܘܲܡܠܲܒܸܿܒܼ ܗ̄ܘ̣ܵܐ ܒܩܸܢܛܵܐ ܘܪ̈ܲܚܡܹܐ ܀ 141 :ܒܙܵܘܥܵܐ ܚܵܘܝܼ ܪܘܼܓܼܙܵܐ ܩܲܫܝܵܐ ܥܲܠ ܡܲܪ̈ܵܚܹܐ 142 ܘܲܒܼܝܲܕܼ ܢܘܼܪܵܐ ܓܠ̣ܵܐ ܥܲܠ ܥܘܼܬܼܪܹܗ ܕܠܵܐ ܡܸܬܼܒܲܨܲܪ ܀ 143 :ܗܘ̤ܵܐ ܠܲܡ ܡܸܢܹܫܹܠܝ ܩܵܠܵܐ ܕܥܲܙܝܼܙ ܒܲܕܼܡܘܼܬܼ ܪܘܼܚܵܐ 144 ܘܲܡܠܵܝܗܝ ܬܿܡܪܵܐ ܕܲܒܼܝܼܚܘܼܬܹܗ ܠܥܘܼܡܪܵܐ ܕܐ̄ܢܵܫܵܐ ܀ 145 :ܚܙ̣ܵܘ ܠܸܫܵܢܹ̈ܐ ܕܡܸܬܼܦܲܠܓܼܝܼܢ ܗ̄ܘ̣ܵܘ ܒܲܕܼܡܘܼܬܼ ܢܘܼܪܵܐ 146 ܘܣܵܐܹ̇ܡ ܗ̄ܘ̣ܵܐ ܠܗܘܿܢ ܪܸܡܙܵܐ ܟܲܣܝܵܐ ܥܲܠ ܪܹ̈ܫܲܝܗܘܼܿܢ ܀ 147 :ܒܐܵܬܼܵܐ ܕܢܘܼܪܵܐ ܝܲܗ̄ܒܹܿܗ ܠܥܘܼܬܼܪܵܐ ܪܘܼܚܵܢܵܝܵܐ 148 ܕܠܵܐ ܢܸܬܼܒܲܨܲܪ ܟܲܕܼ ܢܵܣ̇ܒܿܝܼܢ ܠܹܗ ܒܣܲܓܿܝܼܐܘܼܬܼܵܐ ܀ 149 :ܒܨܸܡܚܵܐ ܕܢܘܼܗܪܵܐ ܦܲܠܸܓܼ ܡܲܠܟܵܐ ܠܚܲܝܠܵܘܵܬܹ̈ܐ 150 ܐܲܦܣܝܼܢ̈ܝܵܬܼܵܐ ܪ̈ܘܼܚܵܢܝܵܬܼܵܐ ܕܠܵܐ ܡܸܬܼܚܲܒܿܠ̈ܢ ܀ 151 :ܒܝܲܕܼ ܠܸܫܵܢܹ̈ܐ ܕܒܲܕܼܡܘܼܬܼ ܢܘܼܪܵܐ ܓܠ̣ܵܐ ܚܸܟܼ̈ܡܵܬܹܗ 152 ܘܐܲܠܸܦ ܐܸܢܘܿܢ ܣܸܦܪܵܐ ܚܲܕܼܬܼܵܐ ܕܠܵܐ ܝܵ̇ܕܥܝܼܢ ܗ̄ܘ̣ܵܘ ܀ 153 :ܨܵܪ ܬܘܼܒܼ ܚܲܝܠܵܐ ܕܡܸܬܼܢܲܨܚܝܼܢ ܒܹܗ ܒܵܗ̇ ܒܲܚܙܵܬܼܵܐ 154 ܕܒܲܕܼܡܘܼܬܼ ܢܘܼܪܵܐ ܡܛܲܠܩܝܼܢ ܝܲܥܪܵܪܵܗ̇ ܕܡ̇ܝܘܿܬܼܘܼܬܼܵܐ ܀ 155 :ܒܙܲܝܢܵܐ ܟܲܣܝܵܐ ܙܲܝܸܢ ܐܸܢܘܿܢ ܐܲܝܟ ܕܠܲܩܪܵܒܼܵܐ 156 ܘܐܵܘܚܸܕܼ ܐܸܢܘܿܢ ܣܲܝܦܵܐ ܕܪܘܼܚܵܐ ܠܡܸܚܪܲܒܼ ܥܵܘ̣ܠܵܐ ܀ 157 :ܫܲܚܠܸܦ ܥܘܼܬܼܪܹܗ ܒܲܡ̈ܢܵܘܵܬܼܵܐ ܕܟܼܠ ܐܸܣܟܹܿܡܝܼ̈ܢ 158 ܕܲܢܦܲܠܓܼܘܼܢܵܝܗܝ ܐܲܝܟ ܡܲܡܫܲܥܬܼܵܐ ܕܲܡܩܲܒܿܠܵܢܵܘ̈ܗܝ ܀ 159 ܠܘܵܬܼ ܠܸܫܢܹ̈ܐ ܕܠܵܐ ܝܵ̇ܕܼܥܝܼܢ ܗ̄ܘ̣ܵܘ ܡܸܫܬܲܕܲܪܝܼܢ ܗ̄ܘ̣ܵܘ: pb. 77 160 ܘܲܟܼܬܲܒܼܘ ܣܸܦܪܹ̈ܐ ܘܐܲܗܓܿܝܼܘ ܐܸܢܘܿܢ ܪܘܼܚܵܢܵܐܝܼܬܼ ܀ 161 :ܟܬܲܒܼܘ ܐܵܬܼ̈ܘܵܬܼܵܐ ܪ̈ܘܼܚܵܢܝܵܬܼܵܐ ܒܠܘܼܚܹ̈ܐ ܕܠܸܒܵܐ 162 ܘܬܲܪܓܸܿܡ ܦܘܼܡ̇ܐ ܒܸܣܪܵܢܵܝܵܐ ܚܹܝܠ ܝܲܕܼ̈ܥܵܬܼܵܐ ܀ 163 :ܗܘ̤ܵܘ ܗܲܕ̈ܡܹ̈ܐ ܒܲܕܼܡܘܼܬܼ ܡܸܢܹ̈ܐ ܠܨܸܒܼܥܵܐ ܕܪܘܼܚܵܐ 164 ܘܲܢܩ݂ܲܫ ܟܲܣܝܵܐ ܒܡܸܢܼܪܲܓܼܫܵܢܵܐ ܪܘܼܚܵܐ ܒܦܲܓܼܪܵܐ ܀ 165 :ܐܘܿ ܐܘܿܪܓܵܢܘܿܢ ܕܲܩܢܸܐ ܩܵܠܵܐ ܕܡ̇ܝܘܿܬܼܘܼܬܼܵܐ 166 ܕܫܲܚܠܸܦ ܩܵܠܹܗ ܘܲܙܡܲܪ ܚܲܝܹ̈ܐ ܒܐܸܕܼܢܲܝ̈ ܡܝܼܬܹ̈ܐ ܀ 167 :ܐܘܿ ܟܸܢܵܪܵܐ ܕܡܸܢܲܝ̈ ܒܸܣܪܵܐ ܡܸܬܼܚܲܒܿܠܵܢܵܐ 168 ܕܪܲܟܸܿܒܼ ܠܵܐ ܚܵܫܘܿܫܹ̈ܐ ܕܠܵܠܐ ܒܲܥܝܵܕܹܗ ܀ 169 :ܐܘܿ ܐܲܒܿܘܼܒܼܵܐ ܕܩܲܢܝܵܐ ܪܥܝܼܥܵܐ ܙܵܡܲ݁ܪ ܚܲܫܹ̈ܐ 170 ܕܲܪܕܲܦ ܩܵܠܹܗ ܚܵܫܘܿܫܘܼܬܼܵܐ ܡ̣ܢ ܚܵܫܘܿܫܹ̈ܐ ܀ 171 :ܐܘܿ ܗܸܕܼܝܘܿܛܹ̈ܐ ܕܐܲܗܸܠܘ ܘܲܓܼܚܸܟܼܘ ܥܲܠ ܣܹܘܦܲܣܛܹ̈ܐ 172 ܘܟܲܪ̈ܝܲܝ ܡܸܠܬܼܵܐ ܕܦܲܣܩ̣ܘܼܗܝ ܠܪܲܗܛܵܗ̇ ܕܲܪܗܸܛܪܘܼܬܼܵܐ ܀ 173 :ܐܘܿ ܨܲܝܵܕܹ̈ܐ ܨܵܝ̈ܕܲܝ ܐܘܼܟܼܠܵܐ ܡܸܬܼܚܲܒܿܠܵܢܵܐ 174 ܕܨܵܕܼܘܼܗܝ ܠܐܘܼܟܼܠܵܐ ܕܡ̇ܘܬܵܐ ܝܲܥܢܵܐ ܠܘܵܬܼ ܚܲܝܘܼܬܼܵܐ ܀ 175 :ܐܘܿ ܡܸܣܟܹܿܢܹ̈ܐ ܨܪ̈ܝܼܟܲܝ ܥܘܼܡܪܵܐ ܘܫܵܐܠܲܝ̈ ܙܸܕܼܩܵܐ 176 ܕܲܥܬܲܪܘ ܡ̣ܢ ܫܹܠܝ ܘܦܲܠܸܓܼܘ ܚܲܝܹ̈ܐ ܡ̣ܢ ܓܲܙܲܝ̈ܗܘܿܢ ܀ 177 :ܡܚܝܼܠܲܝ̈ ܚܲܝܠܵܐ ܢܦܲܩ̣ܘ ܠܲܩܪܵܐ ܕܥܲܡ ܚܲܣܝܼܢܵܐ 178 ܘܲܒܼܗܲܕܵܡܹ̈ܐ ܡܸܬܼܚܲܙܝܵܢܹ̈ܐ ܙܟܼܵܘ ܠܲܛܪܘܼܢܵܐ ܀ 179 :ܫܲܒܼܪ̈ܲܝ ܠܸܒܵܐ ܩܢ̣ܵܘ ܚܸܟܼܡܬܼܵܐ ܪܘܼܚܵܢܵܝܬܼܵܐ 180 ܘܐܲܩܢܝܼܘ ܛܲܥܡܵܐ ܠܚܸܟܼܡܲܬܼ ܐ̄ܢܵܫܵܐ ܕܦܸܟܼܗܲܬ̤ ܒܐܲܪܥܵܐ ܀ 181 :ܣܲܡܝܲܝ̈ ܠܸܒܵܐ ܓܠܝܼܙܲܝ̈ ܢܘܼܗܪܵܐ ܡ̇ܝܫܲܝ̈ ܒܐܲܪܥܵܐ 182 ܗܘ̤ܸܵܘ ܠܲܡܦܹܝܕܹ̈ܐ ܘܲܪܕܲܦܘ ܚܸܫܟܵܐ ܘܐܲܦܨܲܚܘ ܠܐܲܪܥܵܐ ܀ 183 :ܦܲܓܼܪ̈ܵܢܵܝܹܐ ܛܥܝܼܢܲܝ̈ ܝܘܼܩܪܵܐ ܕܐܲܪ̈ܥܵܢܝܵܬܼܵܐ 184 ܗܘ̤ܵܘ ܪ̈ܘܼܚܵܢܹܐ ܘܲܩܢ̣ܵܘ ܓܸܦܹ̈ܐ ܕܦܵܪܘܿܚܘܼܬܼܵܐ ܀ 185 :ܐܲܪ̈ܥܵܢܵܝܹܐ ܒܢܲܝ̈ ܕܲܚܝܼܚܵܐ ܝܲܠܕܵܐ ܕܐܲܪܥܵܐ 186 ܫܲܪܝܼܘ ܚܵܢܹ̇ܝܢ ܠܡܸܫܕܼܵܐ ܒܢܝܼܫܵܐ ܕܲܫܡܲܝܵܢܹ̈ܐ ܀ 187 :ܨܵܝ̈ܕܲܝ ܚܲܪ̈ܫܹܐ ܢܦܲܩ̣ܘ ܕܲܢܨܘܼܕܼܘܼܢ ܠܲܡܠܝܼܠܘܼܬܼܵܐ 188 ܘܐܲܪܡܝܼܘ ܡܨܝܼܕܲܬܵܐ ܕܟܼܵܪܘܿܙܘܼܬܼܵܐ ܘܚܲܒܼܫܘܼܗ̇ ܠܐܲܪܥܵܐ ܀ 189 :ܨܵܕܼܘ ܡ̣ܢ ܝܲܡܵܐ ܘܨܵܕܼܿܘ ܡ̣ܢ ܝܲܒܼܫܵܐ ܟܠ ܠܸܫܢܝܼ̈ܢ 190 ܘܙܲܡܸܢܘ ܐܸܢܘܿܢ ܕܢܹܐܟܼܠܘܼܢ ܒܐܘܼܟܼܠܵܐ ܪܘܼܚܵܢܝܵܐ ܀ 191 :ܐܵܘܚܸܕܼܘ ܢܘܼܪܵܐ ܕܟܼܵܪܘܿܙܘܼܬܼܵܐ ܒܝܲܥܪܵܐ ܕܥܵܘ̣ܠܵܐ 192 ܘܐܵܘܩܸܕܼܘ ܟܘܼ̈ܒܹܿܐ ܕܲܪ̈ܓܼܝܼܓܼܵܬܼܵܐ ܕܐܵܘܥܝܼ ܒܝܼܫܵܐ ܀ 193 :ܒܐܵܬܼܵܐ ܕܢܘܼܪܵܐ ܫܩܲܠ̣ܘ ܫܘܼܠܛܵܢܵܐ ܠܡܸܦܠܲܚ ܒܐܲܪܪܥܵܐ 194 ܘܐܵܘܩܸܕܼܘ ܝܲܥܪܵܐ ܘܲܙܪܲܥܘ ܚܸܛܹ̈ܐ ܙܲܪܥܵܐ ܛܵܒܼܵܐ ܀ 195 :ܒܙܲܗܪܵܐ ܕܢܘܼܪܵܐ ܩܢ̣ܵܘ ܚܸܟܼ̈ܡܵܬܼܵܐ ܕܟܼܠ ܠܸܫܢܝܼ̈ܢ 196 ܘܐܲܩܢܝܼܘ ܐܸܢܘܿܢ ܛܲܥܡܵܐ ܚܲܠܝܵܐ ܠܥܲܡܡܹ̈ܐ ܣܲܟܼܠܹ̈ܐ ܀ 197 :ܒܚܲܝܠܵܐ ܕܪܘܼܚܵܐ ܟܢܲܫ̣ܘ ܟܠ ܥܲܡܡܹ̈ܐ ܠܡܸܚܙܵܐ ܬܲܗܪܵܐ 198 ܟܲܕܼ ܚܵܙܹ̇ܝܢ ܗ̄ܘ̣ܵܘ ܚܕܲܬܵܐ ܕܲܗܘ̤ܵܬܼ ܕܠܵܐ ܒܲܥܝܵܕܼܵܐ ܀ pb. 78 199 :ܬܲܘܝܼܪܝܼܢ ܗ̄ܘ̣ܵܘ ܘܡܸܬܿܕܲܡܪܝܼܢ ܗ̄ܘ̣ܵܘ ܚܲܕܼ ܠܘܼܩܒܲܠ ܚܲܕܼ 200 ܟܲܕܼ ܫܵܡ̇ܥܝܼܢ ܗ̄ܘ̣ܵܘ ܩܵܠܹ̈ܐ ܦܪ̈ܝܼܫܹܐ ܡ̣ܢ ܚܲܕܼ ܥܲܡܵܐ ܀ 201 :ܬܲܗܪܵܐ ܪܲܒܵܐ ܚܙ̣ܵܘ ܡ̇ܝܘܿܬܹ̈ܐ ܒܡܵܝܘܿܬܼܘܼܬܼܵܐ 202 ܟܲܕܼ ܡܲܪܕܹܿܐ ܗ̄ܘ̣ܵܐ ܟܝܵܢܵܐ ܨܲܗܝܵܐ ܬܲܦܹ̈ܐ ܕܡܲܝܵܐ ܀ 203 :ܬܲܡܵܢ ܩܲܒܸܿܠܘ ܥܲܡܡܹ̈ܐ ܦܠܝܼܓܼ̈ܐ ܚܕܼܵܐ ܐܵܘܝܘܼܬܼܵܐ 204 ܕܫܲܢ ܐܸܢܘܿܢ ܫܸܡܥܵܐ ܚܲܕܼܬܼܵܐ ܕܥܸܢܝܵܢ ܩܵܠܹ̈ܐ ܀ 205 :ܩܥ̣ܵܘ ܣܘܼܪ̈ܝܵܢܹܐ ܠܘܵܬܼ ܝܵܘܢܵܝܹ̈ܐ ܐܲܝܟ ܡܸܠܲܢܗܘܿܢ 206 ܘܢܵܚܲܬ̤ ܚܸܡܬܼܵܐ ܘܲܒܼܛܸܠ ܪܘܼܓܼܙܵܐ ܘܐܲܡܠܸܟ ܫܲܝܢܵܐ ܀ 207 :ܠܥܸܙܘ ܟܘܼܫܵܝܑܹ̈ ܥܲܡ ܪ̈ܗ̄ܘܿܡ̇ܝܹܐ ܚܕܼܵܐ ܒܲܪ̄ܬܼ ܩܵܠܵܐ 208 ܘܲܙܡܲܪܘ ܫܘܼܒܼܚܵܐ ܒܚܲܕܼ ܠܸܫܵܢܵܐ ܠܚܲܕܼ ܒܵܪܘܿܝܵܐ ܀ 209 :ܪܡܲܙ̣ܘ ܡ̇ܕܼܵܝܹ̈ܐ ܠܐܵܠܵܢܵܝܹ̈ܐ ܕܡ̇ܢܲܐ ܗ̄ܝܼ ܗܵܕܹܐ 210 ܘܬܲܪܓܸܿܡ ܦܘܼܡ̇ܐ ܘܐܲܢܝܼܚ ܐܸܢܘܿܢ ܡ̣ܢ ܫܘܼܐܵܠܵܐ ܀ 211 :ܫܲܐܸܠܘ ܥܘܼܪ̈ܠܹܐ ܠܥܲܡܵܐ ܓܙܝܼܪܵܐ ܐܲܝܟ ܒܲܝܬܵܝܹ̈ܐ 212 ܕܐܸܢܗܘ̤ ܕܲܗܘ̤ܵܬܼ ܗܵܕܹܐ ܡܸܡܬܼܘܿܡ ܒܹܝܬܼ ܫܲܒܼܛܲܝ̈ܟܿܘܿܢ ܀ 213 :ܥܲܡܵܐ ܠܥܲܡܡܹ̈ܐ ܡܸܫܬܿܥܸܐ ܗ̄ܘ̣ܵܐ ܕܠܵܐ ܚܲܙܝܵܐ ܠܝܼ 214 ܘܠܵܐ ܐܸܣܬܲܥܪܲܬ̤ ܗܵܕܹܐ ܒܥܲܡܲܢ ܥܕܲܡ̇ܐ ܠܗܵܫܵܐ ܀ 215 :ܒܚܲܕܼ ܠܸܫܵܢܵܐ ܩܲܒܸܿܠ ܐܲܒܼܪܵܡ ܘܐܲܫܠܸܡ ܠܲܒܼܢܵܘ̈ܗܝ 216 ܘܒܹܗ ܐܸܬܼܪܲܟܲܒܼ ܐܵܦ ܦܸܠ̈ܐܵܬܼܵܐ ܕܲܢܒܼܝܼܘܼܬܼܵܐ ܀ 217 :ܪܸܡܙܵܐ ܟܲܣܝܵܐ ܫܪ̣ܵܐ ܫܘܼܐܵܠܹ̈ܐ ܕܲܬܼܪܹܝܢ ܓܲܒܿܝܼ̈ܢ 218 ܘܐܲܠܸܦ ܐܸܢܘܿܢ ܕܦܸܡܵܐ ܗ̄ܝܼ ܗܵܕܹܐ ܕܗܵܝ̇ ܕܐܸܣܬܲܥܪܲܬ̤ ܀ 219 :ܗܵܘ̇ ܦܘܼܩܕܵܢܵܐ ܕܝܲܗ̣̄ܒܼ ܠܸܫܵܢܹ̈ܐ ܘܦܲܠܸܓܼ ܥܲܡܡܹ̈ܐ 220 ܗܘ̤ܝܘܼ ܕܲܠܥܸܙ ܒܚܲܕܼ ܠܸܫܵܢܵܐ ܥܲܡ ܣܲܓܿܝܼ̈ܠܹܐ ܀ 221 :ܣܵܦܪܵܐ ܕܐܲܠܸܦ ܣܸܦܪܵܐ ܚܲܕܼܬܼܵܐ ܠܗܵܝ̇ ܫܲܒܼܪܘܼܬܼܵܐ 222 ܗܘ̤ܝܘܼ ܕܡܲܢܲܥ ܠܲܓܼܡܝܼܪܘܼܬܼܵܐ ܒܗܵܕܹܐ ܕܲܗܘ̤ܵܬܼ ܀ 223 :ܩܲܢܝܵܐ ܕܲܪܫܲܡ ܡܸܠܹ̈ܐ ܒܠܸܒܵܐ ܕܗܵܝ̇ ܥܲܛܠܘܼܬܼܵܐ 224 ܗܘ̤ܝܘܼ ܕܐܲܣܓܿܝܼ ܠܠܸܒܵܐ ܬܲܗܢܵܐ ܘܬܲܪܓܸܿܡ ܫܲܦܝܼܪ ܀ 225 :ܩܠܝܼܕܼܵܐ ܕܲܦܬܲܚ ܬܲܪ̈ܥܲܝ ܢܲܦܫܵܐ ܡܲܠܝܲܬܼ ܚܘܼܬܼܪܵܐ 226 ܒܹܗܘ̣ ܦܸܬܼܚܲܬ̤ ܡܲܟܿܝܼܟܼܘܼܬܼܵܐ ܓܲܙܵܐ ܕܪܘܼܚܵܐ ܀ 227 :ܬܲܡ̇ܢ ܚܘܼܬܼܪܵܐ ܚ̣ܛܲܦ ܪܸܥܝܵܢܵܐ ܠܡܸܣܥܵܐ ܠܪܘܡ̇ܐ 228 ܘܣܲܚܦܹܗ ܩܵܠܵܐ ܘܲܫܕܼܵܝܗܝ ܒܐܲܪܥܵܬܐ ܕܠܵܐ ܬܘܼܒܼ ܢܲܡܪܲܚ ܀ 229 :ܠܗܲܠ ܬܲܟܼܬܿܘܼܫܵܐ ܣܕܲܪܘ ܡܲܪ̈ܲܚܹܐ ܠܘܼܩܒܲܠ ܟܲܣܝܵܐ 230 ܘܗܵܪܟܵܐ ܟܲܣܝܵܐ ܢܚܸܬܼ ܨܸܒܼܝܵܢܹܗ ܠܘܵܬܼ ܡܲܟܿܝܼܪܹ̈ܐ ܀ 231 :ܩܸܢܛܵܐ ܕܡܲܝ̈ܵܐ ܕܐܲܫܝܼܓܼ ܠܐܲܪܥܵܐ ܣܲܪܸܕܼ ܐܸܢܘܿܢ 232 ܘܫܲܪܝܼܘ ܒܵܢܹ̇ܝܢ ܒܸܢܝܵܢ ܥܵܘ̣ܠܵܐ ܕܢܸܬܲܦܨܘܿܢ ܒܹܗ ܀ 233 :ܫܘܸܐ ܗ̄ܘ̣ܵܐ ܠܸܒܵܐ ܕܲܚܬܼܝܼܘܼܬܼܵܐ ܒܒܸܝܵܢ ܥܵܘ̣ܠܵܐ 234 ܘܣܲܕܼܩܵܗ̇ ܩܵܠܵܐ ܠܗܵܝ̇ ܫܲܘܝܘܼܬܼܵܐ ܘܒܲܕܲܪ ܘܲܫܕܼܵܗ̇ ܀ 235 :ܪܸܡܙܵܐ ܗܘ̤ܵܐ ܠܗܘܿܢ ܒܲܕܼܡܘܼܬܼ ܪܲܡܫܵܐ ܘܐܲܢܝܼܚ ܐܸܢܘܿܢ 236 ܕܠܵܐ ܢܸܫܬܲܚܩܘܼܢ ܒܐܲܝܕܼܵܐ ܕܥܲܣܩܵܐ ܡ̣ܢ ܚܲܝܲܝ̈ܗܘܿܢ ܀ pb. 79 237 :ܗܸܢܘ̣ܿܢ ܪܲܓܼܘܼ ܗ̄ܘ̣ܵܘ ܡܲܪܵܚܵܐܝܼܬܼ ܠܡܸܣܥܵܐ ܠܪܵܘܡ̇ܐ 238 ܘܗܘ̤ ܝܵ̇ܕܲܥ ܟܠ ܐܸܣܲܪ̣ ܐܸܢܘܿܢ ܒܐܲܪ̈ܥܵܢܵܝܵܬܼܵܐ ܀ 239 :ܝܲܗ̣̄ܒܼ ܠܸܫܵܢܹ̈ܐ ܒܐܸܣܟܹܿܝܡ ܚܸܡܬܼܵܐ ܠܵܘ ܟܲܕܼ ܚܲܡܝܼܬܼ 240 ܐܸܠܵܐ ܕܢܲܪܡܸܐ ܦܓܼܘܼܕܹ̈ܐ ܕܩܸܢܛܵܐ ܒܦܘܼܡ ܡܲܪ̈ܲܚܹܐ ܀ 241 :ܠܝܘܼܬܼܪܵܢ ܥܲܒܼܕܵܗ̇ ܠܗܵܝ̇ ܡܲܪܕܿܘܼܬܼܵܐ ܕܒܲܕܲܪ ܐܸܢܘܿܢ 242 ܘܨܵܪ ܒܵܗ̇ ܐ̄ܪ̈ܵܙܹܐ ܕܗܵܕܹܐ ܕܲܗܘ̤ܵܬܼ ܒܫܘܼܠܵܡ ܙܲܒܼܢܹ̈ܐ ܀ 243 :ܒܟܼܠܗܹܝܢ ܕܲܣܥ̣ܲܪ ܗܘ̤ ܢܸܬܼܒܲܪܵܟ ܡ̣ܢ ܟܠ ܦܘܼܡܝܼ̈ܢ 244 ܕܲܩܕܼܵܡ ܙܲܒܼܢܹ̈ܐ ܡܩܲܕܹܿܡ ܝܵ̇ܕܲܥ ܘܐܲܟܸܿܢ ܣܵܥܲ݁ܪ ܀ 245 :ܝܵ̇ܕܲܥ ܗ̄ܘ̣ܵܐ ܓܹܝܪ ܕܲܒܼܚܲܕܼ ܕܸܒܼܚܵܐ ܡܚܲܣܸܐ ܠܟܼܠܵܐ 246 ܘܩܲܕܹܿܡ ܨܵܪܹܗ ܠܚܘܼܣܵܝ ܚܵܘ̈ܒܹܿܐ ܒܕܸܒܼܚܵܐ ܕܐܸܡܪܵܐ ܀ 247 :ܡܦܵܣ ܒܗܵܕܹܐ ܕܝܵܗܹ̇ܒܼ ܪܘܼܚܵܐ ܒܝܲܕܼ ܠܸܫܵܢܹ̈ܐ 248 ܘܨܵܪ ܬܲܚܝܼܬܼܵܗ̇ ܒܗܵܝ̇ ܕܐܸܣܬܲܥܪܲܬ̤ ܨܹܝܕܼ ܩܲܕܼܡ̇ܝܹ̈ܐ ܀ 249 :ܚܹܝܠ ܐܝܼܬܼܘܼܬܹܗ ܓܠ̣ܵܐ ܠܲܥܒܼܵܕܵܘ̈ܗܝ ܘܚܲܟܸܿܡ ܐܸܢܘܿܢ 250 ܕܕܼܝܼܠܹܗ ܐܸܢܘܿܢ ܩܲܕ̈ܡ̇ܝܵܬܼܵܐ ܘܲܐ̄ܚܪ̈ܵܝܵܬܼܵܐ ܀ 251 :ܦܲܠܸܓܼ ܥܘܼܬܼܪܵܐ ܘܝܲܗ̣̄ܒܼ ܠܸܫܵܢܹ̈ܐ ܒܐܵܬܼܵܐ ܕܢܘܼܪܵܐ 252 ܘܐܲܠܸܦ ܐܸܢܘܿܢ ܕܗܘ̤ܝܘܼ ܕܦܲܠܸܓܼ ܗܵܪܟܵܐ ܘܬܲܡ̇ܢ ܀ 253 :ܬܲܡ̇ܢ ܦܲܠܸܓܼ ܘܐܲܥܢܝܼ ܐܸܢܘܿܢ ܒܐܲܪ̈ܥܵܢܵܝܵܬܼܵܐ 254 ܘܗܵܪܟܵܐ ܦܲܠܸܓܼ ܘܕܲܪܸܫ ܐܸܢܘܿܢ ܒܪ̈ܘܼܚܵܢܝܵܬܼܵܐ ܀ 255 :ܬܲܡ̇ܢ ܟܲܣܝܼ ܕܡܸܛܠ ܡ̇ܢܵܐ ܦܲܠܸܓܼ ܐܸܢܘܿܢ 256 ܘܗܵܪܟܵܐ ܒܲܕܸܿܩ ܘܲܓܼܠ̣ܵܐ ܚܲܝܠܵܐ ܕܗܵܝ̇ ܘܲܕܼܗܵܕܹܐ ܀ 257 :ܠܗܲܠ ܐܲܝܟ ܫܲܒܼܪܹ̈ܐ ܐܲܪܝܼܡ ܫܲܒܼܛܵܐ ܘܕܲܚܸܠ ܐܸܢܘܿܢ 258 ܘܗܵܪܟܵܐ ܦܲܬ̣ܚܹܗ ܠܲܬܼܪܲܥ ܪ̈ܲܚܡܵܘܗܝ ܠܲܓܼܡܝܼܪܘܼܬܼܵܐ ܀ 259 :ܟܲܕܼ ܛܵܒܼ ܗܘ̤ܝܘܼ ܕܬܲܪܠܵܐ ܬܲܡ̇ܢ ܘܚܲܟܸܿܡ ܗܵܪܟܵܐ 260 ܫܲܚܠܸܦ ܐܸܢܹܝܢ ܒܝܲܕܼ ܠܘܼܚܵܡܵܐ ܘܲܒܼܚܵܣܵܢܵܐ ܀ 261 :ܕܲܚܸܠ ܬܲܡ̇ܢ ܘܠܲܒܸܿܒܼ ܗܵܪܟܵܐ ܐܲܝܟ ܝܵܕܘܿܥܹ̈ܐ 262 ܘܡܲܕܹܿܟ ܐܸܢܹܝܢ ܐܲܝܟ ܣܲܡܡܵܢܹ̈ܐ ܠܫܸܩܝܵܐ ܕܢܲܦܫܵܐ ܀ 263 :ܬܲܡ̇ܢ ܣܲܬܼܪ ܚܹܝܠ ܟܲܣ̈ܝܵܬܼܵܐ ܕܠܵܐ ܢܸܬܿܬܿܫܝܼ̈ܛܵܢ 264 ܘܗܵܪܟܵܐ ܒܲܕܸܿܩ ܘܲܓܼܠ̣ܵܐ ܥܘܼܬܼܪܵܐ ܕܫܘܼܒܼܚܹܗ ܪܲܒܵܐ ܀ 265 :ܚܵܘܝܼ ܫܘܼܒܼܚܹܗ ܒܲܡܩܲܒܿܠܵܢܹ̈ܐ ܕܟܼܵܪܘܿܙܘܼܬܹܗ 266 ܕܪܲܡܪܸܡ ܐܸܢܘܿܢ ܠܥܹܝܢ ܚܲܙܵܝܹ̈ܐ ܠܒܲܪ ܡ̣ܢ ܛܲܟܼܣܵܐ ܀ 267 :ܓܠ̣ܵܐ ܟܲܣ̈ܝܵܬܹܗ ܒܪܘܼܟܵܒܼ ܦܲܓܼܪܵܐ ܡܸܬܼܚܲܙܝܵܢܵܐ 268 ܘܐܲܫܡܲܥ ܩܵܠܵܐ ܕܪܲܒܿܘܼܬܼ ܚܲܝܠܹܗ ܒܠܸܫܵܢ ܒܸܣܪܵܐ ܀ 269 :ܦܘܼܡܹ̈ܐ ܗܘ̤ܵܘ ܠܹܗ ܙܵܘܥܹ̈ܐ ܘܪܸ̈ܓܼܫܹܐ ܚܠܵܦ ܟܲܣܝܘܼܬܹܗ 270 ܘܫܲܡܠܝܼ ܘܲܓܼܡ݂ܲܪ ܣܵܥܘܿܪܘܼܬܹܗ ܒܢܲܦܫܵܐ ܘܦܲܓܼܪܵܐ ܀ 271 :ܠܵܐ ܚܲܣܝܼܪܵܐ ܒܝܲܕܼ ܚܲܣܝܼܪܹ̈ܐ ܨܒܼܵܐ ܕܲܢܡܲܠܸܐ 272 ܚܲܣܝܼܪܘܼܬܼܵܐ ܕܦܲܓܼܪ̈ܵܢܵܝܹܐ ܘܪ̈ܘܼܚܵܢܵܝܹܐ ܀ 273 ܐܘܿ ܚܲܣܝܼܪܹ̈ܐ ܕܦܲܠܸܓܼܘ ܥܘܼܬܼܪܵܐ ܕܠܵܐ ܚܲܣܝܼܪܵܐ: pb. 80 274 ܘܡܸܬܼܚܲܙܝܵܢܹ̈ܐ ܕܐܲܟܼܪܸܙܘ ܟܲܣܝܵܐ ܒܪܸ̈ܓܼܫܹܐ ܓܠܲܝ̈ܵܐ ܀ 275 :ܐܘܿ ܒܢܲܝ̈ ܐܲܪܥܵܐ ܝ̄ܠܝܼܕܲܝ̈ ܒܐܲܪܥܵܐ ܘܥܵܡ̇ܪ̈ܲܝ ܒܐܲܪܥܵܐ 276 ܕܲܕܼܪܲܫܘ ܐܘܼܪܚܵܐ ܠܡܲܠܟܿܘܼܬܼ ܪܵܘܡ̇ܐ ܒܝܲܕܼ ܡܸܠܲܝ̈ܗܘܿܢ ܀ 277 :ܐܘܿ ܠܲܟܼܝܵܢܵܐ ܕܟܼܠܝܘܿܡ ܗܵܦܹ̇ܿܟ ܠܲܟܼܝܵܢ ܡܸܕܼܪܹܗ 278 ܕܲܗܘ̤ܵܐ ܒܚܘܼܒܵܐ ܥܘܼܡܪܵܐ ܠܪܘܼܚܵܐ ܕܠܵܐ ܡܸܫܬܲܚܠܲܦ ܀ 279 :ܒܗܲܝܟܲܠ ܡܸܕܼܪܵܐ ܨܒܼܵܐ ܒܵܪܘܿܝܵܐ ܕܢܸܥܡܲܪ ܚܘܼܒܹܿܗ 280 ܘܲܒܼܚܵܫܘܿܫܵܐ ܚܵܘܝܼ ܥܘܼܬܼܪܵܐ ܕܪܲܒܿܘܼܬܼ ܚܲܝܠܹܗ ܀ 281 :ܒܡܸܬܼܚܲܙܝܵܢܵܐ ܓܠ̣ܵܐ ܟܲܣܝܘܼܬܹܗ ܟܣܸܐ ܡ̣ܢ ܟܠܵܐ 282 ܘܲܒܼܡܸܣܟܹܿܢܹ̈ܐ ܦܲܠܸܓܼ ܥܘܼܬܼܪܵܐ ܕܒܲܣܝܼܡܘܼܬܹܗ ܀ 283 :ܒܦܘܼܡ ܚܲܠܵܫܹ̈ܐ ܡܲܠܸܓܼ ܐ̄ܪ̈ܵܙܹܐ ܕܲܣܬܼܝܼܪ̈ܵܬܹܗ 284 ܕܐܝܼܬܼ ܠܹܗ ܝܲܠܕܵܐ ܕܕܸܵܡܹ̇ܐ ܟܠܹܗ ܠܐܲܒܼܵܐ ܕܝܲܠܕܹܿܗ ܀ 285 :ܒܠܸܫܵܢ ܒܸܣܪܵܐ ܩܥ̣ܵܐ ܥܲܠ ܪܘܼܚܵܐ ܕܡܸܢܹܗ ܐܝܼܬܼܵܘܗܝ 286 ܘܐܲܝܟ ܕܲܫܘܸܐ ܠܹܗ ܒܪܵܐ ܒܲܟܼܝܵܢܵܐ ܫܘܸܐ ܐܵܦ ܪܘܼܚܵܐ ܀ 287 :ܒܟܸܢܵܪ ܡܸܠܹ̈ܐ ܪ̈ܲܓܿܘܼܙܬܼܵܢܹܐ ܫܡ݂ܲܥܘ ܫܲܘܝܘܼܬܼܵܐ 288 ܕܐܝܼܬܼ ܠܲܩܢܘܿܡܹܗ ܕܲܒܼܪܵܐ ܘܪܘܼܚܵܐ ܥܲܡ ܐܝܼܬܼܘܼܬܹܗ ܀ 289 :ܟܣܹܝܢ ܗ̄ܘ̣ܵܘ ܥܲܡܹܗ ܟܲܓܼ ܐܝܼܬܲܝܗܘܿܢ ܕܠܵܐ ܫܘܼܪܵܝܵܐ 290 ܘܒܲܕܸܿܩ ܐܸܢܘܿܢ ܒܲܨܠܸܡ ܐ̄ܢܵܫܵܐ ܕܢܵܘܪܸܒܼ ܨܲܠܡܹܗ ܀ 291 :ܒܨܲܠܡܵܐ ܓܲܠܝܵܐ ܓܠ̣ܵܐ ܒܘܼܕܵܩܵܐ ܕܲܒܼܪܵܐ ܘܪܘܼܚܵܐ 292 ܘܚܵܘܝܼ ܐܸܢܘܿܢ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 293 :ܒܦܘܼܡ̇ܐ ܕܒܸܣܪܵܐ ܟܕܲܢ ܪ̈ܘܼܚܵܢܹܐ ܘܦܲܓܼܪ̈ܵܢܵܝܹܐ 294 ܒܝܲܕܼ ܦܘܼܠܚܵܢܵܐ ܕܫܸܡ ܐܝܼܬܼܘܼܬܼܵܐ ܩܢܘܿܡܹ̈ܐ ܬܠܵܬܼܵܐ ܀ 295 :ܦܘܿܩܘ ܠܲܡ ܬܲܠܡܸܕܼܘ ܠܟܼܠܗܘܿܢ ܥܲܡܡܹ̈ܐ ܘܐܲܥܡܸܕܼܘ ܐܵܢܘܿܢ 296 ܒܲܫܡܵܐ ܕܐܲܒܼܵܐ ܘܕܲܒܼܪܵܐ ܕܡܸܢܹܗ ܘܲܕܼܪܘܼܚ ܩܘܼܕܼܫܵܐ ܀ 297 :ܘܐܸܢ ܐܲܪ̈ܥܵܢܹܐ ܥܡ݂ܲܕܼܘ ܘܐܸܬܼܩܲܕܲܫܘ ܒܫܸܡ ܐܝܼܬܼܘܼܬܼܵܐ 298 ܠܲܫܡܲܝܵܢܹ̈ܐ ܠܡܵܢ ܟܲܝ ܐܵܘܬܲܪ ܗܵܢ ܫܘܼܡ̇ܗܵܐ ܀ 299 :ܠܦܵܘܠܘܿܣ ܢܸܩܪܸܐ ܕܢܹܐܠܲܦ ܡܸܢܹܗ ܐܲܝܟ ܓܹܐܙܲܒܼܪܵܐ 300 ܕܲܦܬ݂ܲܚ ܒܐܝܼܕܹܗ ܩܠܝܼܕܼܵܐ ܕܪܸܡܙܵܐ ܓܲܙܵܐ ܕܪܘܼܚܵܐ ܀ 301 :ܒܝܲܕܼ ܠܲܡ ܥܹܕܲܬܵܐ ܓܠ̣ܵܐ ܚܸܟܼ̈ܡܵܬܹܗ ܐܲܠܵܗ ܟܠܵܐ 302 ܠܚܲܝ̈ܠܵܘܵܬܼܵܐ ܡܸܬܼܝܲܕܼܥܵܢܹ̈ܐ ܕܠܵܐ ܝܵ̇ܕܼܥܝܼܢ ܗ̄ܘ̣ܵܘ ܀ 303 :ܘܐܸܢ ܪ̈ܘܼܚܵܢܹܐ ܒܥܹܕܿܬܵܐ ܝ̄ܠܸܦܘ ܗ̄ܘ̣ܵܘ ܚܹܝܠ ܟܲܣܝܘܼܬܼܵܐ 304 ܡܲܢ ܠܵܐ ܢܵܘܕܸܿܐ ܚܕܼܵܐ ܐܝܼܬܼܘܼܬܼܵܐ ܐܲܝܟ ܦܘܼܡ ܥܹܕܿܬܵܐ ܀ 305 :ܐܸܢ ܫܘܼܠܛܵܢܹ̈ܐ ܕܲܡܫܲܝܵܢܹ̈ܐ ܒܵܗ̇ ܐܸܬܼܚܲܟܲܡܘ 306 ܡܲܢ ܠܵܐ ܢܹܐܠܲܦ ܡ̣ܢ ܚܸܟܼ̈ܡܵܬܼܵܐ ܕܝܸܠܦܲܬ̤ ܘܲܓܼܠܵܬ̤ ܀ 307 :ܥܹܕܲܬܵܐ ܝܸܠܠܲܬ̤ ܡ̣ܢ ܡ̇ܟܼܘܿܪܵܗ̇ ܪܲܒܵܐ ܕܪ̈ܲܒܹܿܐ 308 ܘܟܸܬܼܒܲܬ̤ ܣܸܦܪܵܐ ܕܢܸܬܼܗܲܓܿܘܿܢ ܒܹܗ ܝܲܠ̈ܕܹܿܐ ܕܡܸܢܵܗ̇ ܀ 309 :ܫܠܝܼܚܹ̈ܐ ܩܲܒܸܿܠܘ ܚܲܝܠܵܐ ܕܪܘܼܚܵܐ ܘܲܥܬ݂ܲܪܘ ܘܝܼܪܸܒܼܘ 310 ܘܦܲܪܢܸܣܘ ܡܸܢܹܗ ܡܸܣܟܹܿܢܘܼܬܼܵܐ ܕܓܸܢܣܵܐ ܕܐ̄ܢܵܫܵܐ ܀ 311 ܡܲܓܵܢ ܢܲܣܒ̣ܿܘܼܗ̇ ܠܗܵܝ̇ ܡ̇ܘܗܲܒܼܬܼܵܐ ܡܲܠܝܲܬܼ ܛܘܼܒܹ̈ܐ: pb. 81 312 ܘܡܲܓܵܢ ܦܲܪܣܘܼܗ̄ ܩܕܼܵܡ ܢܵܣܘܿܒܹ̈ܐ ܐܲܝܟ ܕܐܸܬܼܦܲܩܲܕܼܘ ܀ 313 :ܢܦܲܩ̣ܘ ܟܵܪ̈ܘܿܙܹܐ ܒܵܬܲܪ ܥܵܠܡܵܐ ܒܲܥܪܝܼܪܵܝܵܐ 314 ܘܟܲܒܸܿܫܘ ܟܲܕܼܢܘܼܗܝ ܒܢܝܼܪܵܐ ܢܝܼܚܵܐ ܕܫܸܡ ܒܵܪܘܿܝܵܐ ܀ 315 :ܒܚܘܼܒܵܐ ܫܲܡ̣ܥܘܼܗ̇ ܠܗܵܝ̇ ܒܲܪ̄ܬܼ ܩܵܠܵܐ ܕܬܲܠܡܸܕܼܘ ܘܐܲܥܡܸܕܼܘ 316 ܘܓܲܡܪܘܼܗ̇ ܒܡܸܠܹ̈ܐ ܘܲܒܼܣܘܼܥܪ̈ܵܢܹܐ ܕܠܵܐ ܬܘܼܗܵܝܵܐ ܀ 317 :ܐܲܟܼܪܸܙܘ ܘܐܲܦܸܘ ܫܸܡ ܐܝܼܬܼܘܼܬܼܵܐ ܩܢܘܿܡܹ̈ܐ ܬܠܵܬܼܵܐ 318 ܚܕܼܵܐ ܫܲܘܝܘܼܬܼܵܐ ܕܠܵܐ ܡܸܣܬܬܲܕܼܩܵܐ ܒܝܲܕܼ ܦܘܼܠܵܓܼܵܐ ܀ 319 :ܦܵܠܚܹ̈ܐ ܚܝܼܨܹ̈ܐ ܪܟܸܒܼܘ ܥܲܠ ܪ̈ܲܟܼܫܵܐ ܥܲܡܡܹ̈ܐ ܡܪ̈ܝܼܕܹܐ 320 ܘܲܟܼܕܲܢܘ ܐܸܢܘܿܢ ܬܚܹܝܬܼ ܡܲܪܟܲܒܼܬܼܵܐ ܕܲܡܠܸܟ ܡܲܠ̈ܟܹܿܐ ܀ 321 :ܒܙܲܝܢܵܐ ܕܪܘܼܚܵܐ ܚܣܲܢ̣ܘ ܟܠ ܚܲܝ̈ܠܝܼܢ ܕܫܸܡ ܐܲܠܵܗܹ̈ܐ 322 ܘܐܲܠܸܦܘ ܐ̄ܢܵܫܵܐ ܕܢܸܩܪܘܿܢ ܒܲܫܡܵܐ ܕܚܲܕܼ ܐܲܠܵܗܵܐ ܀ 323 :ܥܩ݂ܲܪܘ ܚܲܢܦܘܼܬܼܵܐ ܘܝܗ̄ܘܼܕܼܝܘܼܬܼܵܐ ܕܠܵܐ ܝܲܗ̣̄ܒܼܘ ܦܹܐܪܹ̈ܐ 324 ܘܲܢܨܲܒܼܘ ܩܘܼܫܬܵܐ ܦܹܐܪܵܐ ܕܗܲܢܝܼ ܠܡܵܪܹܐ ܟܲܪܡܵܐ ܀ 325 :ܐܵܘܩܸܕܼܘ ܝܲܥܪܵܐ ܕܐܵܘܥܝܼ ܒܝܼܫܵܐ ܒܚܲܩܵܠܵܐ ܕܐ̄ܢܵܫܵܐ 326 ܘܐܲܡܪܝܼܘ ܙܲܪܥܵܐ ܕܡܸܠܲܬܼ ܚܲܝܹ̈ܐ ܒܓܼܵܘ ܢܲܦܫܵܬܼ̈ܐ ܀ 327 :ܥܩ݂ܲܪܘ ܢܵܡܘܿܣܵܐ ܕܲܦܬܲܟܼܪܘܼܬܼܵܐ ܕܲܒܼܢܵܬ̤ ܛܘܼܥܝܲܝ 328 ܘܣܵܡ̣ܘ ܫܲܬܼܐܸܣܹ̈ܐ ܕܒܸܢܝܵܢ ܩܘܼܫܬܵܐ ܕܚܲܕܼ ܝܵܪܘܿܝܵܐ ܀ 329 :ܪܕܲܦܘ ܥܲܪܦܸܠܵܐ ܕܦܪܝܼܣܵܐ ܗ̣̄ܘܵܬܼ ܥܲܠ ܐ̄ܢܵܫܘܼܬܼܵܐ 330 ܘܲܪܕܼܵܐ ܥܵܡܠܵܐ ܠܘܼܩܒܲܠ ܨܸܡܚܵܐ ܕܙܲܕܿܝܼܩܘܼܬܼܵܐ ܀ 331 :ܬܪܸܥܣܲܪ ܕܸܠܩܹ̈ܐ ܢܗܲܪܘ ܒܲܒܼܪܝܼܬܼܵܐ ܕܚܸܫܘܿܟܼܵܐ ܗ̣̄ܘܵܬܼ 332 ܘܫܹܠܚܲܬ̤ ܐܸܒܼܠܵܗ̇ ܘܠܸܒܼܫܲܬ̤ ܢܲܚܬܵܐ ܕܗܲܝܡܵܢܘܼܬܵܪܐ ܀ 333 :ܒܛܲܟܼܣܵܐ ܕܝܲܪ̈ܚܹܐ ܫܲܡܸܫܘ ܠܐܲܪܥܵܐ ܒܟܼܠ ܫܘܼܚܠܵܦܝܼ̈ܢ 334 ܘܡܲܕܸܿܟܼܘ ܐܘܼ ܟܼܠܵܐ ܪܘܼܚܵܢܵܝܵ ܠܦܘܼܬܼ ܪܸ̈ܥܝܵܢܹܐ ܀ 335 :ܢܦܲܩ̣ܙ ܠܲܫܒܼܝܼܠܹ݁̈ܐ ܘܒܹܝܬܼ ܐܲܘܼܪ̈ܚܵܬܼܵܐ ܐܲܝܟ ܕܐܸܬܼܦܲܩܲܕܼܘ 336 ܘܟܲܢܸܫܘ ܘܲܡܠ̣ܵܘ ܒܹܝܬܼ ܡܸܫܬܿܘܼܬܼܵܐ ܛܵܒܹ̈ܐ ܘܒܼܝܼܫܹ̈ܐ ܀ 337 :ܒܝܲܡܵܐ ܘܝܲܒܼܫܵܐ ܪܕܼܵܘ ܥܲܡ ܐ̄ܢܵܫܵܐ ܕܢܲܚܘܿܢ ܐ̄ܢܵܫܵܐ 338 ܘܒܸܐܕܼܢܲܝܝ̈ ܟܠܢܵܫ ܙܪܲܥܘ ܣܲܒܼܪ̈ܵܬܼܵܐ ܕܚܵܝܑܬܼ ܡܝܼ̈ܬܹܐ ܀ 339 :ܦܲܪܣܘܼܗ̇ ܡܨܝܼܕܲܬܵܐ ܕܟܼܵܪܘܿܙܘܼܬܼܵܐ ܠܐܲܪܒܲܥ ܦܸܢ̈ܝܵܢ 340 ܘܟܲܢܫܲܬ̤ ܘܲܡܠܵܬ̤ ܨܲܝܕܵܐ ܕܐ̄ܢܵܫܵܐ ܕܗܲܢܝܼ ܘܲܪܚܝܼܡ ܀ 341 :ܒܲܕܼܡܘܼܬܼ ܢܸܒܼܥܹ̈ܐ ܐܲܫܩܝܼܘ ܠܐܲܪܥܵܐ ܡܲܠܝܲܬܼ ܚܲܝܹ̈ܐ 342 ܘܐܲܦܪܝܼ ܚܲܝܹ̈ܐ ܓܘܼܒܵܐ ܡܝܼܬܼܵܐ ܕܝܲܒܿܝܼܫܘܼܬܼܵܗ̇ ܀ 343 :ܐܲܪܡܝܼܘ ܦܸܨܹ̈ܐ ܘܦܲܠܸܓܼܘ ܥܲܡܡܹ̈ܐ ܘܐܲܬܼܪ̈ܵܘܵܬܼܵܐ 344 ܘܟܼܠܚܲܕܼ ܡܼܢܗܘܿܢ ܚ̣ܙܲܩ ܠܲܦܢܝܼܬܼܵܐ ܕܣܵܡܹܗ ܪܸܡܙܵܐ ܀ 345 :ܫܸܡܥܘܿܢ ܐܲܫܡܲܥ ܩܵܠܵܐ ܚܲܕܼܬܼܵܐ ܒܐܲܪܥܵܐ ܕܪܗ̄ܘܿܡܹܐ 346 ܘܐܲܠܸܦ ܐܸܢܘܿܢ ܬܪܲܥ ܡ̇ܪܘܼܬܼܵܐ ܕܚܲܕܼ ܒܵܪܘܿܝܵܐ ܀ pb. 82 347 :ܪܹܫ ܬܲܠܡܝܼܕܹ̈ܐ ܡܛܵܬܹܗ ܐܸܡ̇ܐ ܕܲܡܕܼܝܼ̈ܢܵܬܼܵܐ 348 ܘܐܲܝܟ ܕܲܒܼܪܹܫܵܐ ܩ̣ܒܲܥ ܒܵܗ̇ ܥܲܝܢܹ̈ܐ ܕܗܲܝܡܵܢܘܼܬܼܵܐ ܀ 349 :ܐܲܝܟ ܫܝܼܦܘܿܪܵܐ ܩܥ̣ܵܐ ܒܲܪ ܪܲܥܡܵܐ ܠܐܵܦܸܣܵܝܹ̈ܐ 350 ܘܟܲܢܸܫ ܐܸܢܘܿܢ ܠܡܸܡܫܲܥ ܬܲܗܪܵܐ ܕܟܼܵܪܘܿܙܘܼܬܹܗ ܀ 351 :ܦܲܫܩܹܗ ܠܲܫܡܹܗ ܒܝܲܕܼ ܣܘܼܥܪ݁ܵܢܹܐ ܕܲܚܦܝܼܛܘܼܬܹܗ 352 ܕܐܲܪܓܸܿܫ ܒܹܗ ܟܠ ܟܲܕܼ ܩܵܥܹ̇ܐ ܗ̄ܘ̣ܵܐ ܕܬܼܵܘ ܣܲܒܼܘ ܚܲܝܹ̈ܐ ܀ 353 :ܒܪܲܥܡܵܐ ܕܩܵܠܹܗ ܡܸܬܼܪܲܓܸܿܐ ܗ̄ܘ̣ܵܐ ܠܸܒܵܐ ܕܐ̄ܢܵܫܵܐ 354 ܘܡܸܬܼܪܲܟܲܟ ܗ̄ܘ̣ܵܐ ܠܡܸܬܲܠ ܦܹܐܪܹ̈ܐ ܣܲܒܼܪܵܐ ܘܚܘܼܒܵܐ ܀ 355 :ܡܲܬܿܝ ܦܲܠ̣ܚܵܗ̇ ܠܐܲܪܥܵܐ ܕܲܝܗܘܼܕܼ ܒܩܵܠ ܦܸܬܼܓܼܵܡܵܘ̈ܗܝ 356 ܘܐܲܪܡܝܼ ܒܓܼܵܘܵܗ̇ ܙܲܪܥܵܐ ܕܚܲܝܹ̈ܐ ܘܦܸܪܥܲܬ̤ ܫܘܼܒܼܚܵܐ ܀ 357 :ܐܲܪܥܵܐ ܟܪܝܼܬܵܐ ܕܲܠܠܝܼܚܵܐ ܗ̄ܘ̣ܵܬܼ ܒܝܲܕܼ ܦܸܠ̈ܐܵܬܼܵܐ 358 ܬܪܲܨ ܠܵܗ̇ ܫܸܩܝܵܐ ܕܦܘܼܫܵܩ ܐ̄ܪ̈ܵܙܹܐ ܘܲܩܢܵܬ̤ ܚܲܝܠܵܐ ܀ 359 :ܥܲܡܵܐ ܓܙܝܼܪܵܐ ܕܡܸܫܬܲܒܼܗܲܪ ܗ̄ܘ̣ܵܐ ܒܛܲܒܼܥܵܐ ܕܒܸܣܪܵܐ 360 ܚܙ̣ܵܐ ܕܡܸܬܼܪܲܫܡܝܼܢ ܥܲܡܡܹܐ ܒܪܘܼܚܵܐ ܘܬܲܒܿܪܹܗ ܠܛܲܒܼܥܹܐ ܀ 361 :ܓܲܡܪܹܗ ܠܥܲܡܵܐ ܐܲܝܟ ܚܲܣܝܼܪܵܐ ܒܐܲܝܠܹܝܢ ܕܲܣܢܝܼܩ 362 ܘܝܲܗ̣̄ܒܼ ܠܹܗ ܐܘܼܟܼܠܵܐ ܪܘܼܚܵܢܵܝܵܐ ܫܡܵܗܹ̈ܐ ܬܠܵܬܼܵܐ ܀ 363 :ܒܲܕܼܡܘܼܬܼ ܫܲܒܼܪܵܐ ܡܸܬܼܗܲܓܸܿܐ ܗ̄ܘ̣ܵܐ ܒܲܫܡܵܐ ܕܐܲܒܼܵܐ 364 ܘܟܲܕܼ ܐܸܬܼܚܲܟܲܡ ܐܲܠܦܹܗ ܩܢܘܿܡܹ̈ܐ ܬܠܵܬܼܵܐ ܕܲܫܘܹܝܢ ܀ 365 :ܐܠܝܼܬܼܵܝܘܼܬܼܵܐ ܙܪܲܥ̣ܘ ܟܵܪ̈ܘܿܙܹܐ ܒܐܸܕܼܢܲܝ̈ ܟܠܢܵܫ 366 ܘܐܵܘܥܝܼ ܒܐܲܪܥܵܐ ܚܕܼܵܐ ܬܵܘܕܲܝܼܬܼܵܐ ܕܫܸܡ ܒܵܪܘܿܝܵܐ ܀ 367 :ܠܡܲܪܩܘܿܣ ܢܲܓܼܕܹܿܗ ܩܵܠܵܐ ܕܲܩ̣ܪܵܝܗܝ ܠܘܵܬܼ ܪ̈ܗ̄ܘܿܡ̇ܝܹܐ 368 ܘܬܲܪܓܸܿܡ ܬܲܡ̇ܢ ܚܹܝܠ ܣܘܼܥܪ݁ܵܢܹܐ ܕܟܼܵܪܘܿܙܘܼܬܼܵܐ ܀ 369 :ܐܲܡܫܲܥ ܛܸܒܵܐ ܕܡܲܠܟܵܐ ܚܲܕܼܬܼܵܐ ܒܐܸܕܼܢܲܝ̈ ܡܲܠܟܵܐ 370 ܘܲܬܡܲܗ ܡܲܠܟܵܐ ܕܐܸܢ ܐܝܼܬܼ ܡܲܠܟܵܐ ܠܥܸܠ ܡ̣ܢ ܪܹܫܹܗ ܀ 371 :ܡܲܠܟܵܐ ܘܥܲܡܵܐ ܨܵܬܼܘ ܦܸܬܼܓܼܵܡܵܘ̈ܗܝ ܕܲܒܼܚܝܼܪܝܼܢ ܗ̄ܘ̣ܵܘ 372 ܘܩܲܒܸܿܠܘ ܘܲܫܠܸܡ̣ܘ ܕܐܝܼܬܼ ܗ̄ܘ̣ ܡܲܠܟܵܐ ܕܡܲܡܠܸܟ ܥܲܠ ܟܠ ܀ 373 :ܠܘܼܩܵܐ ܐܲܫܦܲܥ ܫܸܩܝܵܐ ܕܡܸܠܵܘ̈ܗܝ ܒܐܲܪܥܵܐ ܕܡܸܨܪܹܝܢ 374 ܘܒܲܕܼܡܘܼܬܼ ܓܝܼܚܘܿܢ ܦܪܲܣ ܥܲܠ ܟܠܢܵܫ ܣܒܲܪܬܼܵܐ ܕܚܲܝܹ̈ܐ ܀ 375 :ܠܥܸ݂ܙ ܣܘܼܪܝܵܝܵܐ ܥܲܡ ܡܸܨܪܲܝܵܐ ܕܢܘܼܟܼܪܵܝܝܼܢ ܠܹܗ 376 ܘܲܟܼܢܲܫ̣ܘ ܨܹܐܕܼܵܘܗܝ ܕܲܡܫܲܥ̣ܘ ܠܸܥܙܹܗ ܕܲܠܗܘܿܢ ܕܵܡܹ̇ܐ ܀ 377 :ܕܲܡܝܼ ܒܩܵܠܹܗ ܐܲܝܟ ܦܵܪܲܚܬܼܵܐ ܠܘܵܬܼ ܒܲܪ̄ܿܬܼ ܓܸܢܣܵܗ̇ 378 ܘܲܚܒ݂ܲܫ ܐܸܢܘܿܢ ܠܓܼܵܘ ܡ̣ܢ ܢܸܫ̈ܒܹܿܐ ܕܟܼܵܪܘܿܙܘܼܬܹܗ ܀ 379 :ܒܕܼܝܼܠܗܘܿܢ ܡܲܠܸܠ ܘܐܲܫܡܲܥ ܐܸܢܘܿܢ ܩܵܠ ܦܘܼܪܩܵܢܵܐ 380 ܘܐܲܥܝܼܪ ܐܸܢܘܿܢ ܐܲܝܟ ܕܡ̣ܢ ܫܸܢܵܬܼܵܐ ܠܦܘܼܠܚܵܢ ܚܲܝܹ̈ܐ ܀ pb. 83 381 :ܒܗܵܕܹܐ ܬܸܢܘܲܝ ܐܲܥܬܲܪ ܐܸܢܘܿܢ ܒܚܹܝܠ ܠܵܫܵܢܹ̈ܐ 382 ܕܟܼܠܢܵܫ ܢܸܣܲܒܼ ܣܲܒܼܪܵܐ ܛܵܒܼܵܐ ܒܡܸܠܲܬܼ ܦܘܼܘܹܗ ܀ 383 :ܒܝܲܕܼ ܡ̇ܘܗܲܒܼܬܼܵܐ ܕܲܒܼܠܸܫܵܢܹ̈ܐ ܐܲܠܸܦ ܐܸܢܘܿܢ 384 ܠܡܸܪܕܵܐ ܒܐܘܼܪܚܵܐ ܕܟܼܵܪܘܿܙܘܼܬܼܵܐ ܠܟܼܠ ܐܲܪܪ̈ܵܘܵܢ ܀ 385 :ܒܡܲܡܠܠܵܐ ܚܲܕܼܬܼܵܐ ܣܵܡ̣ܘ ܫܲܬܸܐܣܹ̈ܐ ܕܒܸܢܝܵܢ ܩܘܼܫܬܵܐ 386 ܘܫܲܟܼܠܸܠܘ ܘܲܒܼܢ̣ܵܘ ܡ̣ܢ ܟܠ ܥܲܡܡܝܼ̈ܢ ܚܕܼܵܐ ܬܵܘܕܿܝܼܬܼܵܐ ܀ 387 :ܦܵܘܠܘܿܣ ܓܼܒܼܝܵܐ ܒܥ̣ܵܐ ܒܵܗ̇ ܕܲܗܒܼܵܐ ܫܪܵܪܵܐ ܕܲܟܼܝܵܐ 388 ܘܐܲܦܸܠ ܟܠܢܵܫ ܕܐܲܝܟܲܢ ܢܸܒܼܢܸܐ ܚܲܟܿܝܼܡܵܐܝܼܬܼ ܀ 389 :ܩܵܥܹ̇ܐ ܟܠܢܵܫ ܒܗܲܪ̈ܵܛܝܼܩܹܐ ܦܵܥܠܹ̈ܐ ܢܟܼܝܼܠܹ̈ܐ 390 ܕܠܵܐ ܠܲܡ ܬܸܒܼܢܘܿܢ ܥܡܝܼܪܵܐ ܘܟܼܘܼ̈ܒܹܿܐ ܒܗܵܢ ܒܸܢܝܵܢܵܐ ܀ 391 :ܠܹܗ ܦܲܐܝܵܐ ܗ̣̄ܘܵܬܼ ܠܲܡܙܲܗܵܪܘ ܠܘܵܬܼ ܒܲܝܬܵܝܹ̈ܐ 392 ܘܗܘ̤ ܝܵ̇ܕܲܥ ܗ̄ܘ̣ܵܐ ܠܡܸܒܼܚܲܪ ܝܲܥܪܵܐ ܕܒܸܢܝܵܢ ܥܵܘ̣ܠܵܐ ܀ 393 :ܐܲܝܟ ܪܲܒܿܚܲܝܠܵܐ ܒܪܹܫ ܡܲܫܪܝܼܬܼܵܐ ܡܠܲܒܸܿܒܼ ܟܠܫܵܥ 394 ܕܠܵܐ ܐ̄ܢܵܫ ܢܸܫܠܲܚ ܙܲܝܢܵܐ ܕܪܘܼܚܵܐ ܕܠܵܐ ܢܸܬܼܚܲܝܲܒܼ ܀ 395 :ܡܲܠܸܦ ܦܘܼܪ̈ܣܹܐ ܕܐܲܝܟܲܢ ܢܲܩܪܸܒܼ ܪܘܼܚܵܢܵܐܝܼܬܼ 396 ܘܲܡܚܵܘܸܐ ܠܲܢ ܕܲܒܼܥܸܠܕܲܪܲܢ ܪܘܼܚܵܢܵܝܵܐ ܗ̄ܘ̣ ܀ 397 :ܠܒܲܫܘ ܠܲܡ ܩܘܼܫܬܵܐ ܣܘܝܸܡܘ ܣܲܢܘܲܪܬܵܐ ܕܦܘܼܪܩܵܢ ܚܲܝܹ̈ܐ 398 ܘܐܲܚܘܿܕܼܘ ܣܲܝܦܵܐ ܕܡܸܠܲܬܼ ܪܘܼܚܵܐ ܒܪܸ̈ܥܝܵܢܲܝܟܿܘܿܢ ܀ 399 :ܗܵܐ ܐܲܠܸܦ ܠܲܢ ܦܵܠܚܵܐ ܕܪܘܼܚܵܐ ܙܢܲܝ̈ ܬܲܡܼܬܿܘܼܫܵܐ 400 ܬܵܘ ܢܸܬܿܛܲܝܲܒܼ ܠܡܸܠܒܲܫ ܙܲܝܢܵܐ ܒܛܲܟܼܣܵܐ ܕܝܼܠܹܗ ܀ 401 :ܗܵܐ ܕܪܲܫܘ ܐܘܼܪܚܵܐ ܕܟܼܵܪܘܿܙܘܼܬܼܵܐ ܥܲܒܼܕܲܝ̈ ܡܲܠܟܵܐ 402 ܬܵܘ ܢܸܪܕܹܿܐ ܒܵܗ̇ ܠܘܲܥܕܵܐ ܕܚܲܝܹ̈ܐ ܕܠܵܐ ܫܘܼܠܵܡܵܐ ܀ 403 :ܗܵܐ ܢܦܲܩ̣ܘ ܦܲܠ̣ܚܘܼܗ̇ ܠܐܲܪܥܵܐ ܕܟܼܘܼ̈ܒܹܿܐ ܒܝܲܕܼ ܚܲܫܲܝ̈ܗܘܿܢ 404 ܢܸܥܩܘܿܪ ܡܸܢܵܗ̇ ܝܼܥܪܵܐ ܕܐܵܘܥܝܼ ܡܸܨܥܲܬܼ ܚܸܛܹ̈ܐ ܀ 405 :ܗܵܐ ܦܬ݂ܲܚܘ ܬܲܪ̈ܥܹܐ ܕܐܲܚܝܼܕܝܼܢ ܗ̄ܘ̣ܵܘ ܒܐܲܦܲܝ̈ ܐ̇̄ܢܵܫܵܐ 406 ܬܵܘ ܢܸܬܼܚܲܦܲܛ ܕܠܵܐ ܢܸܬܿܬܲܚܕܲܘܼܢ ܒܪܲܦܝܘܼܬܼ ܢܲܦܫܲܢ ܀ 407 :ܗܵܐ ܙܩܲܪܘ ܢܲܚܬܵܐ ܕܗܲܝܡܵܢܘܼܬܼܵܐ ܒܥܘܼܒܵܐ ܕܡܲܝ̈ܵܐ 408 ܢܟܲܣܸܐ ܟܠܢܵܫ ܟܹܐܒܹ̈ܐ ܕܦܲܓܼܪܹܗ ܘܡܘܼܡܹ̈ܐ ܕܢܲܦܫܹܗ ܀ 409 ܗܵܐ ܚ̣ܫܲܠ ܙܲܝܢܵܐ ܠܲܩܪ̈ܲܒܼܬܼܵܢܹܐ ܕܙܲܕܿܝܼܩܘܼܬܼܵܐ ܀ 410 ܠܵܐ ܢܸܬܼܪܲܦܸܐ ܩܕܼܵܡ ܨܸܢ̈ܥܵܬܹܗ ܕܐܵܟܹ̇ܠܩܲܪܨܵܐ ܀ 411 :ܗܵܐ ܐܲܠܸܦܘ ܠܲܢ ܕܐܲܝܟܲܢ ܢܸܙܟܸܿܐ ܘܲܒܼܡܵܢ ܚܵܐܹ̇ܒܼ 412 ܢܩܲܒܸܿܠ ܓܼܐܪ̈ܵܘܗܝ ܒܣܲܟܿܪܵܐ ܕܟܼܝܼܪܵܐ ܕܗܲܝܡܵܢܘܼܬܼܵܐ ܀ 413 :ܗܵܐ ܦܬ݂ܲܚܘ ܓܲܙܵܐ ܕܲܡܠܸܐ ܛܘܼܒܹ̈ܐ ܩܕܼܵܡ ܢܵܣܘܿܒܹ̈ܐ 414 ܢܸܣܲܒܼ ܡܲܓܵܢ ܘܢܸܬܸܿܠ ܡܲܓܵܢ ܘܢܸܚܸܐ ܘܢܲܚܸܐ ܀ 415 :ܗܵܐ ܢܒܲܥ̣ ܫܸܩܝܵܐ ܪܘܼܚܵܢܝܵܐ ܠܐܲܪ̈ܥܵܢܵܝܹܐ 416 ܢܲܫܩܸܐ ܠܢܲܦܫܲܢ ܘܠܲܟܼ̈ܢܵܘܵܬܲܢ ܡ̣ܢ ܚܲܠܝܘܼܬܹܗ ܀ 417 ܗܵܐ ܕܢܲܚ̣ ܫܸܡܫܵܐ ܕܙܲܕܿܝܼܩܘܼܬܼܵܐ ܒܓܼܵܘ ܚܸܫܘܿܟܹ̈ܐ: pb. 84 418 ܢܸܪܕܿܘܿܦ ܛܘܼܥܝܲܝ ܚܸܫܟܵܐ ܕܲܬܼܪܹܝܢ ܡ̣ܢ ܪܸܥܝܵܢܲܢ ܀ 419 :ܕܠܵܐ ܣܵܦ̇ܩܝܼܢܲܢ ܠܲܓܼܡܝܼܪܘܼܬܼܵܐ ܐܲܝܟ ܟܵܪ̈ܘܿܙܹܐ 420 ܢܲܪܡܸܐ ܡܸܠܹ̈ܐ ܚܠܵܦ ܣܘܼܥܪ݁ܵܢܹܐ ܐܲܝܟ ܫܵܡܘܿܢܵܐ ܀ 421 :ܕܟܲܪܝܵܐ ܡܸܠܬܲܢ ܕܬܸܡܛܸܐ ܠܪܵܘܡ̇ܐ ܕܕܘܼܒܵܪ݁ܲܝܗܘܿܢ 422 ܢܸܚܙܘܿܩ ܥܲܡܗܘܿܢ ܒܚܘܼܒܵܐ ܕܢܲܦܫܵܐ ܕܩܠܝܼܓܼ ܓܸܦܹܗ ܀ 423 :ܢܸܩܥܸܐ ܥܲܡܗܘܿܢ ܚܕܼܵܐ ܬܵܘܕܿܝܼܬܼܵܐ ܠܚܲܕܼ ܒܵܪܘܿܝܵܐ 424 ܕܐܲܥܬܲܪ ܟܠܵܐ ܡ̣ܢ ܡ̇ܘܗܲܒܼܬܼܵܐ ܕܪܲܒܿܘܼܬܼ ܚܲܝܠܹܗ ܀