Narsai: On the Antichrist - ܥܲܠ ܡܹܐܬܼܝܼܬܹܗ ܕܐܲܢܛܝܼܟܿܪܸܣܛܘܿܣ

1 :ܛܸܒܵܐ ܒܠܝܼܠܵܐ ܫܡܲܥܢܲܢ ܕܐܵܬܹ̇ܐ ܒܫܘܼܠܵܡ ܙܲܒܼܢܹ̈ܐ 2 ܘܲܥܣܸܩ ܣܲܓܿܝܼ ܠܲܡܬܲ ܢܵܝܘܼ ܥܲܠ ܒܘܼܠܒܵܠܹܗ. 3 :ܓܘܼܢܚܵܐ ܪܲܒܵܐ ܥܬܼܝܼܕ ܕܢܸܬܼܡܲܠܲܠ ܒܹܝܬܼ ܐܲܪ̈ܥܵܢܹܐ 4 ܘܠܵܐ ܡܨܐ ܦܘܼܡܵܐ ܕܢܹܐܡܲܪ ܕܲܟܼܡܵܐ ܡܲܪܝܼܪ ܫܸܡܥܹܗ. 5 :ܣܒܲܪܬܼܵܐ ܒܝܼܫܵܐ ܡܣܲܒܲܪ ܒܝܼܫܵܐ ܒܹܝܬܼ ܡܵܝܘ̈ܬܸܐ 6 ܘܠܲܝܬܿ ܒܲܪܢܵܫܵܐ ܕܠܵܐ ܡܸܬܿܕܵܘܲܕ ܘܦܵܗܹ̇ܐ ܗܵܘܢܹܗ. 7 :ܠܒܸܟܼܝܵܐ ܫܵܘܹ̇ܐ ܡܸܕܸܡ ܕܲܥܬܼܝܼܕ ܠܡܸܬܼ ܡܲܠܵܠܘܼ 8 ܘܩ̈ܠܹܐ ܚܢܝܼ̈ܓܹܐ ܦܐܸܐ ܕܲܢܪܲܟܸܒܼ ܥܲܠ ܒܘܼܕܵܩܹܗ. 9 :ܒܚܲܫܵܐ ܢܸܫܡܲܥ ܐܲܝܢܵܐ ܕܫܵܡܲ݁ܥ ܦܵܪܘܿܫܵܐܝܼܬܼ 10 ܘܲܒܼܟܲܪܝܘܼܬܼܵܐ ܢܕܲܡܲܥ ܐܲܝܢܵܐ ܕܨܵܐܹ̇ܬܼ ܫܲܦܝܼܪ. 11 :ܒܗܵܘܢܵܐ ܢܸܟܼܪܸܐ ܘܲܒܼܪܥܝܵܢܵܐ ܢܲܫܦܲܥ ܕܼܡ̈ܥܹܐ 12 ܘܲܚܠܵܦ ܢܲܚ̈ܬܹܐ ܢܸܣܕܘܿܩ ܙܵܘ̈ܥܹܐ ܥܲܠ ܡܵܐ ܕܲܥܬܼܝܼܕ. 13 :ܢܸܟܼܿܠܵܐ ܩܲܫܝܵܐ ܥܬܼܝܼܕ ܕܲܢܪܲܟܸܿܒܼ ܐܵܟܹ̇ܠܩܲܨܵܐ 14 ܘܲܨܢܝܼܥܵܐܝܼܬܼ ܡܙܲܝܸܢ ܢܲܦܫܹܗ ܠܘܼܩܒܲܠ ܚܲܝܹ̈ܢ. 15 ܡܸܪܕܵܐ ܕܥܵܘ̣ܠܵܐ ܨܵܒܹ̇ܐ ܕܲܢܩܝܼܡ ܥܲܠ ܟܹܐܢܘܼܬܼܵܐ: pb. f.164r 16 ܘܫܸܡ ܒܵܪܘܿܝܵܐ ܡܛܲܝܲܒܼ ܕܲܢܣܝܼܡ ܥܲܠ ܚܲܪ ܡܘܼܬܹܗ. 17 :ܠܕܲܪܓܼܵܐ ܪܵܡܵܐ ܒܵܥܹ̇ܐ ܕܢܸܣܲܩ ܚܬܝܼܪ ܪܸܥܝܵܢܵܐ 18 ܘܥܲܠ ܐܝܼܬܼܘܼܬܼܵܐ ܡܲܩܸܠܹܐ ܒܓܼܘܼܡܪܵܐ ܡܲܪܵܚܵܐܝܼܬܼ. 19 :ܚܘܼܨܦܵܐ ܢܟܼܝܼܠܵܐ ܠܵܒܸ̇ܫ ܣܲܟܼܠܵܐ ܒܲܕܡܘܼܬܼ ܙܲܝܢܵܐ 20 ܘܣܵܕܲ̇ܕ ܩܹܐܪܣܵܐ ܠܘܼܩܒܲܠ ܩܘܼܫܬܵܐ ܥܵܘܠ̇ܐܝܼܬܼ. 21 :ܒܫܸܡ ܙܲܟܵܝܵܐ ܡܟܲܢܹܐ ܢܲܦܫܹܗ ܡܠܹܗ ܚܵܘ̈ܬܼܐ 22 ܘܩܵܠ ܬܸܫܒܿܘܿܚܬܵܐ ܕܠܵܐ ܦܵܐܝܵܐ ܠܹܗ ܚܲܛܹ̇ܦ ܡܲܓܲܢ. 23 :ܐܸܢܵܐ ܐ̄ܢܵܐ ܡܫܝܼܚܵܐ ܐܵܡܲ݁ܪ [...]ܡܵܐ ܘܠܵܐ ܡܸܬܼܟܲܚܲܕ 24 ܘܒܼܝܼ ܡܸܫܬܼܠܡܝܼܢ ܐ̄ܪ̈ܙܹܐ ܘܛܘܼܦܣ̈ܐ ܕܲܪܫܲܡܘ ܟܹܐܢܹ̈ܐ. 25 :ܐܲܝܟ ܕܵܠܟܹܐܢܵܐ ܡܚܲܦܸܛ ܐ̄ܢܵܫܵܐ ܕܲܢܩܲܒܿܠܘܼܢܵܝܗܝ 26 ܘܛܵܥܹ̇ܐ ܘܡܲܛܥܹܐ ܥܲܕ ܡܸܢܼܦܲܪܣܸܐ ܡ̣ܢ ܟܹܐܢܘܼܬܐ. 27 :ܒܛܘܼܥܝܲܝ ܡܲܛܥܹܐ ܘܲܒܼܕܼܡ̈ܘܵܬܼܵܐ ܡܚܵܘܸܐ ܚܲܝ̈ܠܹܐ 28 ܥܕܲܡܵܐ ܕܫܵܡܲ݁ܪ ܗܵܝ̇ ܒܲܪܬܼ ܩܵܠܵܐ ܕܲܒܼܫܘܼܠܵܡܵܐ. 29 :ܚܲܪ ܡܵܢܵܐܝܼܬܼ ܡܲܩܠܸܐ ܚܲܪܡܵܐ ܥܲܠ ܟܠ ܩܵܠ̈ܝܹܢ 30 :ܘܣܵܥܹ̇ܐ ܘܣܵܠܹ̇ܩ ܠܕܲܪܓܼܵܐ ܪܵܡܵܐ ܟܲܕ ܠܵܐ ܣܵܠܹ̇ܩ 31 :ܒܚܲܪܡܵܢܘܼܬܹܗ ܬܡܲܗ ܟܵܪܘܿܙܵܐ ܦܲܘܠܘܿܣ ܓܲܒܼܝܵܐ 32 ܘܩܲܕܸܡ ܨܵܪܵܗ̇ ܒܲܟܼܬܼ̈ܝܼܒܼܵܬܼܵܐ ܕܢܸܚܙܹܝܗ̇ ܟܠܢܵܫ. 33 :ܒܡܵܪܘܿܕܘܼܬܼܵܐ ܟܲܢܝܹܗ ܠܐܲܒܼܢܵܐ ܕܡܸܬܼܚܵܘܹܐ ܒܹܗ 34 ܕܲܡܩܝܼܡ ܡܸܪܕܵܐ ܘܟܼܵܠܹ̇ܐ ܫܪܵܪܵܐ ܕܠܵܐ ܢܸܬܼܡܲܠܲܠ. 35 :ܢܦܲܩ ܗ̄ܘ̣ܵܐ ܛܸܒܹܿܗ ܡ̣ܢ ܫܘܼܪܵܝܵܐ ܕܟܼܵܪ ܘܿܙܘܼܬܼܵܐ 36 ܘܫܲܪܝܼܘ ܐ̄ܢܵܫܵܐ ܒܵܥܹ̇ܝܢ ܒܥܵܬܼܵܐ ܕܥܲܠ ܡܹܐܬܼܝܼܬܹܗ. 37 :ܫܡܲ݁ܥ ܗ̄ܘ̣ܵܐ ܫܠܝܼܚܵܐ ܒܥܬܼܵܐ ܕܲܥܠܵܘܗܝ ܡ̣ܢ ܬܲܠܡܝܼܕܵܘ̈ܗܝ 38 ܘܚܲܟܸܿܡ ܐܸܢܘܿܢ ܕܠܵܐ ܢܸܬܼܪܲܗܒܼܘܼܢ ܒܛܸܒܵܐ ܕܫܸܡܥܹܗ. 39 :ܠܵܐ ܠܲܡ ܬܩܲܒܿܠܘܼܢ ܕܩܲܪܝܼܒܼ ܙܒܲܢܵܐ ܕܫܘܼܠܵܡ ܙܲܒܼܢܹ̈ܐ 40 ܘܠܵܐ ܬܸܬܿܛܦܝܼܣܘܢ ܠܵܐ ܠܸܐܓܲܪܬܵܐ ܘܠܵܐ ܠܓܸܠܝܵܢܵܐ. pb. f.164v 41 :ܐܸܢ ܠܵܐ ܬܹܐܬܼܐ ܡܵܪܘܿܕܘܼܬܵܐ ܓܠ̣ܵܐ ܝܵܕܘܿܥܵܐ 42 ܠܵܐ ܡܸܫܬܲܠܲܡ ܕܘܼܒܵܪ ܚܲܝܹ̈ܐ ܐܲܪ̈ܥܸܢܵܝܹܐ. 43 :ܐܢ ܠܵܐ ܐ̄ܬܹ̇ܐ ܒܲܪ ܐܲܒܼܪܵܢܵܐ ܕܢܸܛܥܹܐ ܘܢܲܛܥܹܐ 44 ܠܵܐ ܡܸܬܼܒܲܕܲܩ ܫܪܵܪܵܐ ܕܲܠܝܵܐ ܕܚܘܼܕܵܬܼ ܟ̱ܠܵܐ. 45 :ܐܸܢ ܠܵܐ ܡܚܵܘܹܐ ܒܼܝܼܫܘܼܬܼ ܝܲܨܪܹܗ ܠܥܹܝܢ ܟܠ ܒܸܪ̈ܝܢ 46 :ܠܵܐ ܡܸܬܼܚܲܬܼܡܵܐ ܚܵܝܲܬܼ ܡܥܲܬܹܗ ܒܝܲܕ ܣܘܼܥܪ݁ܵܢܹܐ 47 :ܙܲܒܼܢܵܐ ܡܬܲܚܸܡ ܡ̣ܢ ܥܵܒܼܘܿܕܵܐ ܠܲܥܒܼܵܕ ܐܝܼܕܵܘ̈ܗܝ 48 ܥܕܲܡܵܐ ܕܫܵܠܹ̇ܡ ܠܵܐ ܡܲܪܦܹܗ ܠܹܗ ܠܛܵܥܝܵܐ ܕܢܲܛܠܹܐ. 49 :ܣܝܵܓܼܵܐ ܕܪܸܡܙܵܐ ܩܵܐܹ̇ܡ ܒܐܲܦܵܘ̈ܗܝ ܒܲܕ ܡܘܼܬܼ ܫܘܼܪܐ 50 ܕܲܡܥܘܸܟ ܠܹܗ ܡ̣ܢ ܡܲܪܕܝܼܬܼܵܐ ܕܝܼܬܼܵܐ ܕܡܵܪܘܿܕܘܼܬܹܗ. 51 :ܪܓܸܝܼܓܼ ܗ̄ܘ̣ܵܐ ܣܲܓܝܼ ܕܢܸܓܼܡܘܿܪ ܪܸܓܿܬܹܗ ܗܵܐ ܡ̣ܢ ܙܲܒܼܢܵܐ 52 ܘܠܵܐ ܡܲܪܦܸܐ ܠܹܗ ܥܕܲܡܵܐ ܕܫܵܠܸ̇ܡ ܦܣܵܩܵܐ ܕܲܦܣܲܩ. 53 :ܠܗܵܘ̇ ܦܘܿܩܕܵܢܵܐ ܕܬܲܚܸܡ ܘܲܟܼܠܵܝܗܝ ܡܣܲܟܸܿܐ ܢܟܼܝܼܠܵܐ 54 ܕܐܸܡܲܬܼܝ ܬܸܫܠܲܡ ܦܲܪܬܿܘܼܙܡܝܐ ܘܢܸܓܼܠܹܐ ܙܹܐܦܹܗ. 55 :ܐܲܝܟ ܐܲܬܿܘܢܵܐ ܫܵܓܲ̇ܪ ܗܘ̤ ܠܹܗ ܒܩܲܝܣܲܝ̈ ܚܸܡܬܼܵܐ 56 ܕܐܸܡܲܬܼܝ ܢܲܣܸܦ ܢܘܼܪܵܐ ܕܪܘܼܓܼܙܹܗ ܘܢܵܘܩܸܕ ܐ̄ܢܵܫܵܐ. 57 :ܦܲܚܹ̈ܐ ܕܢܸܟܼܠܵܐ ܡܥܲܝܸܕ ܛܵܡܲܪ ܠܠܲܝ ܐܝܼܡܵܡ 58 ܘܝܵܬܹ̇ܒܼ ܢܵܛܲܪ ܕܐܸܡܲܬܼܝ ܢܹܐܬܹܐ ܨܵܝܕܵܐ ܠܘܲܠܕܵܐ. 59 :ܐܲܝܟ ܨܲܝܵܕܵܐ ܡܲܓܲܪ ܪܘܼܚܹܗ ܦܬܼܝܼܠ ܪܸܥܝܵܢܵܐ 60 ܘܐܲܡܝܼܢ ܚܵܐܲܪ ܕܐܸܡܲܬܼܝ ܬܸܣܲܩ ܠܪܹܫ ܬܲܪܥܝܼܬܹܗ. 61 :ܠܚܲܓܼܠܵܐ ܕܵܡܹ̇ܐ ܝܲܨܪܹܗ ܒܓܼܵܘܹܗ ܕܚܲܓܼܠܵܐ ܨܢܝܼܥܵܐ 62 ܘܛܵܒܼ ܡ̣ܢ ܚܲܠܓܼܵܐ ܪܓܼܝܼܓܼ ܘܲܡܣܵܘܲܚ ܠܝܘܿܡ ܫܘܼܠܵܡܵܐ. 63 :ܘܐܸܠܘܼܠܵܐ ܚܒܼܝܪܫ ܒܦܲܘܩܪܵܢ ܟܲܣܝܵܐ ܩܠܘܒܝܵܐ ܩܲܫܝܵܐ 64 ܟܒܲܪ ܣܵܥܹ̇ܐ ܗ̄ܘ̣ܵܐ ܘܒܼܠܲܥ ܗ̄ܘ̣ܵܐ ܠܹܗ ܠܓܸܢܣܲܢ ܟܠܫܵܥ. 65 ܡ̣ܢ ܨܸܒܼܝܵܢܹܗ ܐܲܒܿܝܼܕܝܼܢ ܗ̄ܘ̣ܵܘ ܗܵܐ ܡ̣ܢ ܢܘܼܓܼܪܵܐ: pb. f.165r 66 ܐܸܠܘܼܠܵܐ ܟܠܵܝܗܝ ܗܵܘ̇ ܦܘܼܩܘܵܢܵܐ ܕܲܩܪܲܢ ܨܲܠܡܹܗ. 67 :ܗܘܝ̤ܘ ܕܲܩܪܹܗ ܕܠܵܐ ܢܫܬܼܥܠܹܐ ܠܒܲܪ ܡ̣ܢ ܛܲܟܼܣܵܐ 68 ܘܬܼܘܼܒܼ ܟܵܠܹ̇ܐ ܠܹܗ̇ ܥܕܲܡܵܐ ܠܝܵܘܡܵܐ ܕܣܝܼܡ ܒܝܼܕܲܥܬܹܗ. 69 :ܚܲܟܲܝܡܵܐܝܼܬܼ ܟܠܵܝܗܝ ܒܲܬܼܚܘܼܡܵܐ ܕܪܡܙܹܗ ܟܲܣܝܵܐ 70 ܘܚܲܟܿܝܼܡܵܐܝܼܬܼ ܦܵܬܲܚ ܒܐܲܦܵܘ̈ܗܝ ܘܢܵܦ̇ܩ ܘܡܲܛܥܹܐ. 71 :ܠܝܘܼܬܼܪܵܢ ܗܵܘܹ̇ܐ ܝܘܿܡ ܓܸܠܝܵܢܹܗ ܕܡܵܐ ܐܸܢ ܡܲܚܣܲܝܪ 72 ܕܢܹܐܠܲܦ ܟܠܢܵܫ ܒܝܼܫܘܼܬܼ ܢܸܟܼܒܵܘ̈ܗܝ ܕܠܘܼܩܒܲܠ ܐ̄ܢܵܫܵܐ. 73 :ܬܼܪܬܹܿܝܢ ܡܲܠܸܦ ܡ̣ܢ ܒܝܼܫܘܼܬܹܗ ܠܥܝܼܪܹ̈ܐ ܕܐ̄ܢܵܫܵܐ 74 ܚܲܪܡܵܢܘܼܬܹܗ ܘܚܹܝܠ ܒܲܪܘܿܝܵܐ ܕܟܼܠܹ̇ܐ ܪܘܼܓܼܙܹܗ. 75 :ܐܲܝܟ ܕܲܒܼܨܲܒܼܥܵܐ ܡܚܵܘܸܐ ܛܵܒܼܵܐ ܚܘܼܒܹܗ ܕܥܠܲܝܢ 76 ܕܐܸܠܘܼܠܵܐ ܟܠܵܝܗܝ ܡܛܲܠܸܩ ܗ̄ܘ̣ܵܐ ܠܲܡ ܡ̣ܢ ܫܘܼܪܵܝܐ. 77 :ܐܸܢܗܘ̤ ܕܗܵܫܵܐ ܒܫܘܼܠܵܢ ܙܲܩܼ̈ܢܹܐ ܗܵܟܢ ܐܲܒܼܵܐܫ 78 ܟܡܵܐ ܡܲܒܼܐܸܫ ܗ̄ܘ̣ܵܐ ܐܸܠܘܼ ܫܲܒܼܩܹܗ ܡ̣ܢ ܝܘܿܡ ܕܲܗ̤ܘܲܝܢ. 79 :ܟܘܼܪ ܒܘܼܚܪܵܢܵܐ ܥܲܒܼܕܸܗ ܠܝܲܨܪܹܗ ܠܲܢ ܘܲܠܟܼܠܵܐ 80 ܕܲܒܼܒܼܝܼܫܘܼܬܹܗ ܢܸܒܼܩܸܐ ܕܲܗܒܼܵܐ ܕܦܵܪܘܿܫܘܼܬܲܢ. 81 :ܒܹܗ ܡܲܠܸܦ ܠܲܢ ܙܢܲܝ̈ ܬܲܟܼܬܘܼܫܵܐ ܕܠܘܼܩܒܲܠ ܩܘܼܫܬܵܐ 82 ܘܒܹܗ ܡܵܘܕܲܥ ܠܲܢ ܥܲܠ ܥܘܼܕܪܵܢܹܗ ܕܲܡܢܲܛܲܪ ܠܲܢ. 83 :ܠܚܲܪܬܹܐ ܢܲܛܪܹܗ ܠܩܹܐܪܣܵܐ ܪܲܒܵܐ ܕܲܡܥܲܬܼ ܠܹܗ 84 ܕܢܸܚܙܘܿܢ ܐ̄ܢܵܫܵܐ ܘܲܫܡܲܝܵ̈ܢܹܐ ܒܝܼܫܘܼܬܼ ܝܲܨܪܹܗ. 85 :ܩܕܼܵܡ ܗܵܘ̇ ܝܵܘܡܵܐ ܕܲܡܚܲܕܸܬܼ ܒܹܗ ܒܪܝܬܼܵܐ ܕܲܒܼܪܵܐ 86 ܝܵܗܹ̇ܒܼ ܐܲܬܼܪܵܐ ܕܢܲܝܬܸܿܐ ܠܓܸܠܝܵܐ ܥܵܘܠܘܼܬܹܗ. 87 :ܠܵܐ ܗ̄ܘ̣ܵܐ ܕܟܲܟܸܿܐ ܪܓܼܝܼܓܼ ܒܪܘܿܝܵܐ ܥܲܠ ܗܵܝ̇ ܫܲܒܼܦܩܹܗ 88 ܐܸܠܵܐ ܕܢܸܓܼܠܸܐ ܚܲܪ ܡܵܢܘܼܬܹܗ ܘܪܲܦܝܘܼܬܼ ܢܲܦܫܲܢ. 89 :ܐܲܝܟ ܕܲܒܼܕܝܼܢܵܐ ܡܩܲ[ܛ]ܪܸܓܼ ܠܲܢ ܒܹܗ ܚܲܪܝܼܡܵܐܝܼܬܼ 90 ܕܠܵܐ ܥܝܼܪܝܼܒܲܢ ܒܩܹܐܪܣܵܐ ܕܚܲܫܹ̈ܐ ܕܲܚܠܵܦ ܩܘܼܫܬܵܐ. pb. f.165v 91 :ܩܹܐܪܣܵܐ ܗ̄ܘ̣ ܪܲܒܵܐ ܕܲܡܛܝܲܒܼ ܠܲܢ ܕܢܸܥܒܸܿܕ ܥܲܡ̇ܢ 92 ܘܲܒܼܟܼܠ ܦܘܼܪ݁ ܣܝܼܢ ܒܵܥܹ̇ܐ ܕܢܲܛܥܹܝܢ ܡ̣ܢ ܨܹܝܕ ܩܘܼܫܬܵܐ. 93 :ܚܙܵܝܗܝ ܠܲܟܼܝܵܢܲܢ ܟܲܙܟܼܵܐ ܘܲܫܕܵܗ̇ ܠܓܲܢܒܵܪܘܼܬܹܗ 94 ܘܗܵܐ ܡܸܬܼ ܡܲܪܡܲܪ ܕܐܝܼܟܲܢ ܡ̣ܢ ܫܹܠܝ ܚܲܒܼ ܘܐܸܬܼܦܲܪܣ. 95 :ܚܙ̣ܵܐ ܕܐܲܗܸܠ ܒܹܗ ܚܲܕ ܡ̣ܢ ܓܸܢܣܲܢ ܘܥܲܒܼܕܹܗ ܓܘܼܚܪܵܐ 96 ܘܗܵܐ ܡܸܬܼܦܲܪܣ ܕܢܸܬܼܒܲܥ ܥܝܼܪܬܹܿܗ ܡ̣ܢ ܩܲܪ̈ܝܒܼܵܘܗܝ. 97 :ܚܙ̣ܵܐ ܕܐܸܬܥܲܠܝܼ ܠܕܲܪܓܼܵܐ ܪܵܡܵܐ ܕܫܸܡ ܐܝܼܬܼܘܼܬܼܵܐ 98 ܘܗܵܐ ܡܸܬܼܚܲܫܲܒܼ ܕܢܲܥܒܼܵܪ ܕܲܪܓܹܗ ܒܚܲܪ ܡܵܢܘܼܬܼܵܐ. 99 :ܚܙܑ̣ܵܐ ܕܐܸܫܬܼܥܒܲܕܘ ܥܝܼܪܹ̈ܐ ܘܐ̄ܢܵܫܵܐ ܬܚܹܝܬܼ ܫܘܼܠܛܵܢܹܗ 100 ܘܗܵܐ ܡܸܨܛܲܢܲܥ ܕܲܢܩܝܼܡ ܡܸܪܕܵܐ ܠܘܼܩܒܲܠ ܚܲܝܠܹܗ. 101 :ܫܡܲܥ ܗ̄ܘ̣ܵܐ ܕܲܥܬܼܝܼܕ ܕܢܹܐܬܹܐ ܒܚܲܪܬܼܵܐ ܠܲܡܕܵ ܟ̱ܠܵܐ 102 ܘܲܡܥܲܬܸܿܕ ܠܹܗ ܙܲܝܢܵܐ ܕܥܵܘ̣ܠܹܗ ܕܢܹܐܬܹܐ ܒܕܘܼܡܝܹܗ. 103 :ܫܡܲܥ ܕܲܒܼܫܘܼܒܼܚܵܐ ܕܲܫܡܲܝܵܢܹ̈ܐ ܢܵܚܹ̇ܬܼ ܠܐܲܪܥܵܐ 104 ܘܛܲܝܸܒܼ ܐܵܦ ܗܘ̤ ܓܘܼ̈ܕܹܐ ܕܫܹܐܕܹ̈ܐ ܕܲܢܙܲܚܝܘܼܢܵܝܗܝ. 105 :ܫܡܲܥ ܕܲܒܼܕܝܼܢܵܐ ܕܠܵܬ ܫܘܼܠܵܡܵܐ ܥܬܝܼܕ ܕܢܸܫܬܲܢܲܩ 106 ܘܐܲܩܠܝܼ ܒܓܼܘܼܡܕܵܐ ܠܘܼܩܒܲܠ ܚܲܝܠܵܐ ܕܡܫܲܢܸܩ ܠܹܗ. 107 :ܚܙ̣ܵܐ ܕܩܸܪܒܲܬ̤ ܠܵܗ̇ ܐܵܦܵܦܵܣܝܼܣ ܕܥܸܕܲܢ ܫܸܦܠܹܗ 108 ܘܗܵܐ ܡܸܫܬܲܢܹܐ ܐܲܝܟ ܩܵܛܘܿܠܵܐ ܒܥܸܕܲܢ ܡܵܘܬܹܿܗ. 109 :ܫܲܪܝܼܪܵܐ ܠܹܗ ܕܠܵܐ ܡܬܼܦܲܠܲܛ ܡ̣ܢ ܟܹܐܢܘܼܬܼܵܐ 110 ܘܐܲܩܠܝܼ ܘܒܲܣܲܪ ܥܲܠ ܟܠ ܕܸܚ̈ܠܵܢ ܩܲܦܣܵܩ ܣܲܒܼܪܐ. 111 :ܪܢ̣ܵܐ ܕܠܲܝܬܼ ܐܲܬܼܪܵܐ ܕܢܸܣܬܲܬܲܪ ܒܹܗ ܒܝܘܿܡ ܒܘܼܚܪܵܢܵܐ 112 ܘܝܼܨܸܦ ܣܲܓܿܝܼ ܕܢܸܓܼܡܘܿܪ ܪܸܓܿܬܹܗ ܥܵܘ̇ܠܵܐܝܼܬܼ. 113 :ܪܲܒܿܘܼܬܼ ܥܵܘ̣ܠܵܐ ܥܒܲܕܬܹܗ ܕܢܲܥܘܸܠ ܕܠܵܐ ܚܵܘܣܵܐ 114 ܘܚܸܪܚܵܘܼܬܹܗ ܥܒܲܕܬܹܗ ܕܢܸܪܫܲܥ ܠܒܲܪ ܡ̣ܢ ܛܲܟܼܣܵܐ. 115 ܠܫܲܪ ܡ̣ܢ ܛܲܟܼܣܵܐ ܕܥܵܒܼܘܿܕ ܘܬܐ ܢܦܲܩ ܡܵܪܚܵܐ: pb. f.166r 116 ܘܥܲܠ ܥܵܒܼܘܿܕܵܐ ܘܲܥܒܼܵܕ ܐܝܼܕܵܘ̈ܗܝ ܒܥ̣ܵܐ ܕܢܸܫܬܲܥܠܸܐ. 117 :ܠܘܼܩܒܲܠ ܚܲܝܠܵܐ ܕܝܲܗ̣̄ܒ ܒܹܗ ܚܲܝܠܵܐ ܡܩܐܸܐ ܚܬܼܝܼܪܵܐ 118 ܘܠܵܐ ܡܸܬܼܒܲܝܲܢ ܕܗܘ̤ ܠܹܗ ܡܲܟܸܿܐ ܒܚܸܪ ܚܵܘܼܬܼܗ. 119 :ܥܲܡ ܨܸܒܼܝܵܢܐ ܕܝܲܩܲܪ ܐ̄ܢܵܫܵܐ ܡܲܩܪܸܒܼ ܥܲܛܠܵܐ 120 ܘܲܒܼܝܲܕ ܐܢܵܫܵܐ ܓܵܣܹ̇ܐ ܡܸܪܬܹܗ ܥܲܠ ܐܝܼܬܼܘܼܬܼܵܐ. 121 :ܒܝܲܕ ܒܲܪܢܵܫܵܐ ܦܪܲܩ ܒܵܪܘܿܝܵܐ ܠܲܒܼܢܲܝ̈ܢܵܫܵܐ 122 ܘܲܒܼܒܲܪ ܢܵܫܵܐ ܨܵܒܹ̇ܐ ܐܵܦ ܗܘ̤ ܕܢܵܘܒܸܿܕ ܐ̄ܢܵܫܵܐ. 123 :ܠܐ̄ܢܵܫܵܐ ܓܒܼ݂ܵܐ ܠܹܗ ܐܲܠܵܗ ܟܠܵܐ ܘܚܲܪܲܪ ܒܹܗ ܟܠ 124 ܘܚܲܕ ܒܲܪܢܵܫܵܐ ܠܒܼ݂ܵܐ ܠܹܗ ܐܵܦ ܗܘ̤ ܕܲܢ̣ܫܲܥܒܸܕ ܟܠ. 125 :ܡܫܝܼܚܵܐ ܘܡܲܠܟܵܐ ܩܪܵܝܗܝ ܒܵܪܘܿܝܵܐ ܠܐ̄ܢܵܫܵܐ ܕܲܓܼܒܵܐ 126 ܘܒܼܵܗ̇ ܒܲܕܡܘܼܬܼܵܐ ܡܟܲܢܸܐ ܠܐ̄ܢܵܫܵܐ ܕܗܵ݁ܘܹܐ ܥܘܼܡܪܹܗ. 127 :ܕܠܵܐ ܙܘܼܘܓܼܵܐ ܓܲܒܼܠܹܗ ܒܟܲܪܣܵܐ ܠܡܸܦܪܲܩ ܐ̄ܢܵܫܵܐ 128 ܘܲܟܼܒܲܪ ܐܵܦ ܗܘ̤ ܗܵܕܹܐ ܡܲܛܸܒܼ ܥܲܠ ܗܵܘ̇ ܛܵܥܝܵܐ. 129 :ܡ̣ܢ ܝܘܼܒܵܠܵܐ ܕܒܹܝܬܼ ܐܲܒܼܪܵܗܵܡ ܢܣܲܒܼ ܪܹܫܝܼܬܼܵܐ 130 ܘܕܲܡ ܝܼܗ̄ܘܼܕܵܝܵܐ ܗ̄ܘ̣ ܕܗܵܘܹ̇ܐ ܡܵܐܢܵܐ ܠܗܵܝ̇ ܛܵܥܝܼܘܼܬܼܵܐ. 131 :ܒܟܼܠܗܹܝܢ ܕܲܗܘ̤̈ܝ ܒܐܵܕܼܵܡ ܕܲܬܼܪܹܝܢ ܡܸܕܡܵܐ ܐܵܦ ܗܘ̤ 132 ܘܣܵܥܲ݁ܪ ܚܲܝܵܠܹܐ ܟܲܕ ܠܵܐ ܣܵܥܲ݁ܪ ܫܲܪܝܼܪܵܐܝܼܬܼ. 133 :ܒܗܵܘ̇ ܐܸܣܟܹܿܡܵܐ ܕܐܸܬܼܵܐ ܠܥܵܠܡܵܐ ܦܲܓܼܪܵܢܵܐܝܼܬܼ 134 ܒܹܗ ܗܘ̤ ܐܵܬܹ̇ܐ ܐܵܦ ܗܘ̤ ܠܥܵܠܡܵܐ ܒܦܲܓܼܪܵܐ ܕܐ̄ܢܵܫܵܐ. 135 :ܚܲܕ ܒܲܪ ܢܵܫܵܐ ܓܵܒܹ̇ܐ ܢܟܼܝܼܠ̈ܐ ܡ̣ܢ ܐ̄ܢܵܫܘܼܬܼܵܐ 136 ܘܲܡܕܲܝܲܪ ܒܹܗ ܐܲܟܼܡܵܐ ܕܕܲܝܲܪ ܟܲܣܝܵܐ ܒܐ̄ܢܵܫܵܐ. 137 :ܒܐ̄ܢܵܫܵܐ ܥܵܡܲ݁ܪ ܣܵܢܐܵܐ ܕܐ̄ܢܵܫܵܬ ܕܢܲܛܥܹܐ ܠܐ̄ܢܵܫܵܐ 138 ܘܲܡܟܲܢܸܐ ܠܹܗ ܒܪܵܐ ܕܐܲܠܵܗܵܐ ܐܲܟ ܗܵܝ̇ ܕܲܗܘ̤ܵܬܼ. 139 :ܒܲܪ ܐܲܠܵܗܵܐ ܡܟܲܢܸܐ ܢܟܼܝܼܠܵܐ ܠܒܲܪ ܐܲܒܼܕܵܢܵܐ 140 ܘܫܸܡ ܐܲܠܵܗܵܐ ܚܵܛܹ̇ܦ ܒܐܝܼܕܹܗ ܘܡܲܩܸܦ ܠܲܫܡܹܗ: pb. f.166v 141 ܫܡܵܐ ܝܲܩܝܼܪܵܐ ܣܵܐܹ̇ܡ ܚܲܪܡܵܐ ܥܲܠ ܫܝܼܛܘܼܬܹܗ. 142 :ܘܣܵܥܹ̈ܐ ܕܢܸܣܲܩ ܠܕܲܪܓܼܵܐ ܪܵܡܵܐ [...]ܠܐ ܡܲܦܵܣ ܠܗ 143 ܒܚܘܼܬܼܪܵܐ ܣܲܟܼܠܵܐ ܡܲܩܠܹܐ ܫܲܒܝܵܐ ܥܲܠ ܐܝܼܬܼܘܼܬܼܵܐ. 144 :ܘܲܒܼܚܸܪܝܵܢܵܐ ܚܵܛܹ̇ܦ ܢܵܘܡܹ̈ܐ ܕܐܲܠܵܗܘܼܬܼܵܐ 145 ܐܲܝܟ ܫܲܒܵܝܵܐ ܥܵܒܲ̇ܪ ܒܐܲܪܥܵܐ ܡܠܸܐ ܪܵܡܘܼܬܼܵܐ. 146 :ܘܫܵܒܸ̇ܐ ܠܐ̄ܢܵܫܵܐ ܕܢܗܘܘܿܢ ܥܲܒܼ̈ܕܹܐ ܠܡܵܪܘܿܕܘܼܬܹܗ 147 :ܒܪܹܫ ܓܵܠܘܼܬܼܵܐ ܡܲܦܲܩ ܐ̄ܢܵܫܵܐ ܡ̣ܢ ܗܵܘ ܢܲܝ̈ܗܘܿܢ 148 ܘܲܚܠܵܦ ܢܟܼܣܸ̈ܐ ܒܵܐܹ̇ܙ ܥܘܼܬܼܪܵܐ ܕܪܸ̈ܥܝܵܢܲܝܗܘܿܢ. 149 :ܠܗܵܘܢܵܐ ܫܵܒܹ̇ܐ ܘܲܠܪܸܥܝܵܢܵܐ ܡܲܫܠܲܚ ܥܲܪܛܸܠ 150 ܘܲܚܠܵܦ ܦܲܓܼܪܵܐ ܒܢܲܦܫܵܐ ܡܒܲܙܲܚ ܘܲܡܨܲܥܲܪ ܠܵܗ̇. 151 ܥܲܡ ܚܘܿܫܵܒܹ̈ܐ ܟܣܲܝ̈ܐ ܡܲܩܪܸܒܼ ܐܘܼܡܵܢܵܐܝܼܬܼ. 152 ܕܢܸܗܘܸܐ ܡܫܲܥܒܸܿܕ ܟܠܹܗ ܐ̄ܢܵܫܵܐ ܠܲܪ̈ܓܼܝܼܓܼܵܬܹܗ. 153 :ܐܘܡܵܢܵܐܝܼܬܼ ܡܪܲܟܸܿܒܼ ܩܹܐܪܣܵܐ ܕܲܡܛܲܝܒܼ ܠܹܗ 154 ܘܫܹܐ̈ܕܹܐ ܨܢܝܼ̈ܥܹܐ ܡܥܲܬܿܕܝܼܢ ܙܲܒܼܢܵܐ ܕܲܡܛܲܝܲܩ ܠܹܗ. 155 :ܒܐܘܼܡܵܢܘܼܬܼܵܐ ܕܕܲܝ̈ܘܹܐ ܡܲܛܥܹܐ ܩܕܼܵܡ ܚܲܙܵܝܹ̈ܐ 156 ܘܛܠܵܢ̈ܝܵܬܼܵܐ ܕܠܵܐ ܫܲܪܝܼܪ̈ܢ ܡܚ̤ܵܘܹܐ ܠܥܲܝ̈ܢܹܐ. 157 :ܒܡܹܐ ܚܲܕ ܥܲܝ̈ܢܹܐ ܡܩܝܼܡ ܗܲܓܵܓܹܐ ܩܕܼܵܡ ܒ̈ܒܼܵܬܼܵܐ 158 ܘܥܲܠ ܠܵܐ ܡܸܕܡ ܣܲܣܡܸܟ ܪܸ̈ܓܼܫܹܐ ܐܲܝܟ ܕܥܲܠ ܡܸܕܸܡ. 159 :ܕܘܼܡܝܵܐ ܕܪܸ̈ܓܼܫܹܐ ܡܸܬܼܚܲܙ̈ܝܵܢܹܐ ܨܵܐܲܪ ܒܐܲܪܥܵܐ 160 ܘܲܡܕܲܡܹܐ ܠܗܘܿܢ ܐܲܝܟ ܗܵܘ̇ ܕܲܗܘ̤ܵܘ ܟܲܕ ܠܵܐ ܗܵܘܹ̇ܝܢ. 161 :ܫܸܐ̈ܕܹܐ ܗܵܘܹ̇ܝܢ ܚܙܵܬܼܵܐ ܕܐܝܼܬܹܝܗ̇ ܟܲܕ ܠܵܐ ܐܝܼܬܹܝܗ̇ 162 ܘܲܡܫܲܪܪܝܼܢ ܠܵܗ̇ ܒܝܲܕ ܕܸܡ̈ܘܬܼܵܐ ܕܠܵܐ ܫܲܪܝܼܪ̈ܵܢ. 163 ܗܸܢ̣ܘܿܢ ܗܵܘܹ̇ܝܢ ܣܡܲܝ̈ܐ ܘܚܲܪ̈ܫܹܐ ܘܦܹܐܦܲܐ ܘܠܲܠ̈ܓܹܐ. 164 ܘܒܲܪ ܐܲܒܼܕܵܢܵܐ ܡܲܐܣܸܐ ܒܛܘܼܥܝܲܝ ܟܲܕ ܠܵܐ ܡܲܐܣܸܐ. 165 ܗܸܢ̣ܘܿܢ ܩܵܥܹ̇ܝܢ ܐܲܝܟ ܐܲܠܝܨܹ̈ܐ ܩܕܼܵܡ ܦܲܩܪܘܼܬܹܗ: pb. f.167r 166 ܘܗܘ̤ ܡܸܫܬܲܩܲܠ ܘܡܵܘܫܸܛ ܐܝܼܕܹܗ ܠܘܵܬܼ ܚܘܼܠܡܵܢܵܐ. 167 :ܠܵܘ ܚ̇ܘܼܠܡܵܢܵܐ ܕܩܘܼܫܬܵܐ ܝܵܗܹ̇ܒܼ ܟܪܝܼܗ ܒܲܚܛܝܼܬܼܵܐ 168 ܠܚܘܼܠܡܵܢ ܢܲܦܫܵܐ ܪܓܼܝܼܓܼ ܕܲܢܚܲܒܸܿܠ ܠܫܘܼܘܕܵܝ ܡܸܠܵܘ̈ܗܝ. 169 :ܐ̄ܣܟܹܿܡ ܗܵܘ̇ ܐܵܣܝܵܐ ܕܐܲܬ̤ܵܐ ܠܥܠܡܵܐ ܥܛܝܼܦ ܙܹܐܦܵܢܵܐ 170 ܘܩܪܵܐ ܠܐ̄ܢܵܫܵܐ ܕܬܵܘ ܐܸܬܼܐܲܣܵܘ ܗܵܢ̇ܘ ܕܹܝܢ ܡܘܼܬܼܘ. 171 :ܡܵܘܬܵܐ ܩܲܫܝܵܐ ܡܠܸܐ ܚܘܼܠܡܵܢܹܗ ܕܐܵܣܝܵܐ ܢܟܼܝܼܠܵܐ 172 ܘܒܸܐܣܟܹܿܡ ܛܵܒܼܬܵܐ ܡܦܲܠܸܓܼ ܬܵܘܟܵܐ ܠܡܸܫܬܲܡܥܵܢܵܘ̈ܗܝ. 173 :ܒܐܸܣܟܹܿܡ ܡܫܝܼܚܵܐ ܡܕܼܵܡܸܐ ܡܸܫܝܼܚܵܐ ܕܕܲܓܵܠܘܼܬܼܵܐ 174 ܘܢܵܓܸܕ ܨܐܕܼܵܘܗܝ ܟܸܢ̈ܫܹܐ ܕܥܲܡܡܹ̈ܐ ܕܲܢܙܚܝܘܼܢܵܝܗܝ. 175 :ܐܲܝܟ ܙܲܕܝܼܩܵܐ ܡܪܝܼܡ ܒܲܪܬܼ ܩܵܠܹܗ ܠܨܹܝܕ ܚܲܛܵܝܹ̈ܐ 176 ܕܬܼܵܘ ܣܲܒܼܘ ܡܲܓܲܢ ܫܛܲܪ ܚܵܘܒܲܝ̈ܟܿܘܿܢ ܗܵܢ̇ܘ ܕܝܼܢ ܚܘܼܒܼܘ. 177 :ܐܲܝܟ ܡܲܟܿܝܼܟܼܵܐ ܡܲܪܟܸܿܢ ܡܸܠܵܘ̈ܗܝ ܡܠܸܐ ܪܵܡܘܼܬܼܵܐ 178 ܘܡܲܟܿܝܼܟܼܵܐܝܼܬܼ ܙܵܪܲܥ̇ ܡܸܠܬܹܗ ܒܪܸܥܝܵܢ ܐ̄ܢܵܫܵܐ. 179 :ܘܲܟܼܒܲܪ ܐܵܡܲ݁ܪ ܚܲܪ ܡܵܢܵܐܝܼܬ ܐܲܝܟ ܦܵܪܘܿܩܲܢ 180 ܕܚܘܼܪܘ ܒܝܼ ܕܢܝܼܚ ܐ̄ܢܵܐ ܘܢܘܼܚܘ ܡ̣ܢ ܚܘܼܬܼܪܵܐ ܒܐܣܟܸܿܡ ܢܝܼܚܘܼܬܼܝ. 181 :ܘܲܟܒܲܪ ܡܲܟܼܪܸܙ ܫܘܼܒܼܩܵܢ ܥܵܘ̣ܠܵܐ ܥܵܘܼ̇ܠ ܟܠܹܵܗ 182 ܘܟܼܵܐܹ̇ܐ ܒܒܼܝܼ̈ܫܹܐ ܒܝܼܫܵܐ ܕܠܵܐ ܐܝܼܬܼ ܦܸܚܡܵܐ ܠܪܘܼܫܠܹܗ. 183 :ܘܲܟܼܒܲܪ ܫܵܪܸܐ ܩܸܨܡܸ̈ܐ ܘܢܸܚ̈ܫܹܐ ܕܟܲܠܕܵܝܘܼܬܼܵܐ 184 ܐܲܝܟ ܕܲܢܫܲܪܲܪ ܙܹܐܦܵܢܘܼܬܹܗ ܕܠܵܐ ܙܘܼܥܙܵܥܵܐ. 185 :ܘܲܟܼܒܲܪ ܗܵܘܹ̇ܐ ܗܘ̤ ܕܲܠܩܘܼܒܼܠܵܐ ܕܐܘܼܡܵܢܘܼܬܹܗ 186 ܡܸܣܲܬܼ ܕܢܲܕ ܢܲܚ ܝܲܨܪܸܗ ܒܝܼܫܵܐ ܠܘܼܩܒܲܠ ܡܵܪܹܗ. 187 :ܘܲܟܼܒܲܪ ܟܦܲܪ ܒܲܐܚܝܵܢܘܼܬܼܵܐ ܕܲܒܼܢܲܝ̈ ܐ̄ܪܵܙܹܗ 188 ܡܸܣܲܬܼ ܕܢܸܚܛܘܿܦ ܫܡܵܐ ܝܲܩܝܼܪܵܐ ܕܢܘܼܟܼܪܵܝ ܠܲܫܡܹܗ. 189 :ܘܲܟܼܒܲܪ ܓܵܥܲܪ ܒܟܼܘܼܡܪܹ̈ܐ ܕܐܩܝܼܡ ܒܹܝܬܼ ܣܸܓܼܕܵܬܹ̈ܗ 190 ܡܸܣܲܬܼ ܕܲܢܩܝܼܡ ܗܵܝ̇ ܬܲܪܥܝܼܬܼܵܐ ܕܡܸܣܬܲܓܼܕܵܢܵܐ ܗ̄ܘ̣. pb. f.167v 191 :ܘܲܟܼܒܲܪ ܬܵܢܹ̇ܐ ܕܡ̇ܢ ܛܵܥܹ̇ܝܢ ܐܢ̄ܬܲܘܿܢ ܒܵܬܲܪ ܛܘܥܝܲܝ 192 ܕܠܵܐ ܐ̄ܢܵܫ ܢܲܟܠ ܕܡ̣ܢ ܨܹܝܕ ܩܘܼܫܬܵܐ ܡܲܛܥܸܐ ܠܐ̄̈ܢܵܫܵܐ. 193 :ܐܘܿ ܟܡܵܐ ܐܘܼܡܵܢ ܣܵܢܐܵܐ ܕܐ̄ܢܵܫܵܐ ܘܲܕ ܥܵܒܼܘܿܕܵܐ 194 ܐܸܠܵܐ ܚܲܝܠܵܐ ܕܝܲܗ̣̄ܒ ܒܹܗ ܚܲܝܠܵܐ ܠܵܐ ܚܵܣܹ̇ܝܢ ܠܹܗ. 195 :ܐܘܿ ܟܡܵܐ ܡܲܪܵܚ ܛܪܘܼܢܵܐ ܕܪܵܪܸܕ ܥܲܠ ܐܝܼܬܼܘܼܬܼܵܐ 196 ܘܐܸܠܵܐ ܐܝܼܬܼܝܵܐ ܕܐܝܼܬܼܵܘܗܝ ܘܐܝܼܬܼܵܘܗܝ ܠܵܐ ܡܫܲܥܒܲܕ ܠܹܗ. 197 :ܥܲܠ ܐܝܼܬܼܘܼܬܼܵܐ ܡܪܲܕ ܡܵܪܘܿܕܵܐ ܒܪܵܡܘܼܬܼ ܪܘܼܚܹܗ 198 ܘܥܲܠ ܗܵܘ̇ ܪܸܡܙܵܐ ܕܲܒܼܪܵܝܗܝ ܥܲܡ ܟܠ ܐܲܩܠܝܼ ܘܒܲܣܲܪ. 199 :ܒܲܫܡܵܐ ܚܲܝܵܐ ܩܵܪܹܐ ܢܲܦܫܹܗ ܡܝܼܬܼ ܒܲܚܛܵܝܗܵܘ̈ܗܝ 200 ܘܐܲܠܵܗܵܐܝܼܬܼ ܡܚܵܘܸܐ ܥܘܼܬܼܪܹܗ ܠܥܹܝܢ ܚܲܙܵܝܵܘ̈ܗܝ. 201 :ܡܫܝܼܚܵܐ ܘܡܲܠܟܵܐ ܐܡܲ݁ܪ ܕܐܝܼܬܲܝ ܡܫܝܼܚ ܒܲܚܛܝܼܬܼܵܐ 202 ܘܠܲܡܫܲܡܫܵܢܵܘ̈ܗܝ ܩܵܪܹܐ ܫܠܝܼܚܹ̈ܐ ܕܙܲܕܝܼܩܘܼܬܼܵܐ. 203 :ܫܹܐ̈ܕܹܐ ܡܫܲܕܲܪ ܐܲܝܟ ܟܵܪ̈ܘܿܙܹܐ ܠܟܼܠ ܐܲܬܼܪ̈ܘܵܢ 204 ܘܢܦܩܝܼܢ ܙܵܪܥܝܼܢ ܛܸܒܵܐ ܣܲܢܝܵܐ ܕܝ̣ܘܿܡ ܡܹܐܬܼܝܼܬܹܗ. 205 :ܩܠܹ̈ܐ ܫܓܼܝ̈ܫܹܐ ܡܲܪܡܹܝܢ ܒܐܸܕܢܹ̈ܐ ܕܫܵܡܘܿܥܲܝ̈ܗܘܿܢ 206 ܘܠܲܝܬܿ ܡܲܫܡܲܥܬܼܵܐ ܕܠܵܐ ܡܸܫܬܲܓܼܫܵܐ ܒܣܘܼܥܪ̈ܢܲܝܗܘܿܢ. 207 :ܫܠܸܩ ܠܹܗ ܙܲܒܼܢܵܐ ܕܐܪ̈ܙܸܐ ܘܛܘܼ̈ܦܣܹܐ ܩܵܥܹ̇ܝܢ ܚܲܪ̈ܡܹܐ 208 ܘܐܸܬ̣ܵܐ ܫܪܵܪܵܐ ܕܨܝܕ ܗ̄ܘ̣ܵܐ ܒܣܸܦܪܸ̈ܐ ܪܘܼܚܵܢܵܐܝܼܬܼ. 209 :ܩܘܼܡܘ ܦܘܿܩܘ ܩܲܒܸܿܠܘ ܩܘܼܫܬܵܐ ܓܲܠܝܵܐ ܒ̈ܢܲܝ ܡܘܼܠܟܵܢܵܐ 210 ܘܣܲܒܼܘ ܛܵܒܼܬܼ̈ܐ ܕܲܡܠ݂ܲܟ ܛܵܒܼܵܐ ܠܨܸܒܼܝܵܢܲܝ̈ܟܿܘܿܢ. 211 :ܦܘܼܫܘ ܡ̣ܢ ܗܸܪܓܵܐ ܘܡ̣ܢ ܥܸܢܝܵܢܵܐ ܕܫܘܼܡܠܵܝ ܐ̄ܪ̈ܙܹܐ 212 ܘܲܚܬܼܘܿܡܘ ܣܸܦܪܹ̈ܐ ܕܲܢܛܘܼܪ̈ܬܵܐ ܦܲܓܼܪ̈ܢܝܵܬܼܵܐ. 213 :ܠܡ̇ܢ ܡܸܬܼܒܲܥܝܵܐ ܡܲܚܙܝܼܬܼ ܛܘܼܦܵܣܹ̈ܐ ܠܪܸ̈ܥܝܵܢܲܝܟܿܘܿܢ 214 ܚܘܼܪܘ ܘܐܸܬܼܒܲܩܵܘ ܚܲܬܿܝܼܬܼܵܐܝܼܐܬܼ ܒܹܗ ܒܲܫܪܵܪܵܐ. 215 ܦܘܼܫܘ ܡ̣ܢ ܥܲܡܠܵܐ ܕܙܲܕܝܼܩܘܼܬܼܵܐ ܕܣܲܓܿܝܼ ܥܲܡܠܹܗ: pb. f.168r 216 ܘܢܘܼܚܘ ܒܲܠܡܹܐ ܢܵܐ ܕܲܥܬܼ̈ܝܼܕܼܵܬܼܵܐ ܕܟܼܵܣ̈ܝܵܢ ܒܲܩܢܘܿܡܝ. 217 :ܐܘܿ ܡ̣ܢ ܦܘܼܡܵܐ ܡܡܲܠܸܠ ܪܘܼܫܥܐ [ܕ]ܠܵܐ ܡܸܬܼ ܡܲܠܲܠ 218 ܟܡܵܐ ܡܸܫܬܲ ܥܠܸܐ ܘܠܵܐ ܡܸܬܼܟܲܚܲܕ ܐܵܦܸܢ ܩܲܠܝܼܠ. 219 :ܐܘܿ ܡ̣ܢ ܦܲܩܪܵܐ ܕܦܲܩܝܼܪ ܝܲܨܪܹܗ ܛܵܒܼ ܡ̣ܢ ܟܲܠܒܵܐ 220 ܘܐܲܡܝܼܢ ܢܵܒܲ݁ܚ ܘܠܵܐ ܡܸܬܼ ܒܲܝܲܢ ܕܲܒܼܡ̇ܢ ܢܵܒܲ݁ܚ. 221 :ܐܘ ܠܲܟܼܬܼܝܫܵܐ ܕܟܵܬܹ̇ܫ ܢܲܦܫܹܗ ܟܲܕ ܠܵܐ ܐܲܠܝܼܚܨ 222 ܘܡܲܪܡܸܐ ܗܸܪܬܼܵܐ ܒܹܝܬܼ ܐܪ̈ܥܵܢܹܐ ܘܠܲܫܡܲܝܵܢܹ̈ܐ. 223 :ܠܥܝܼܪܹ̈ܐ ܘܐ̄ܢܵܫܵܐ ܕܵܠܲܚ̇ ܪܘܼܓܼܙܹܗ ܕܪܲܓܲܘܼܙܬܼܵܢܵܐ 224 ܘܥܲܠ ܪ̈ܘܼܚܵܢܹܐ ܘܥܲܠ ܦܲܓܼܪ̈ܢܹܐ ܓܵܣܸ̇ܐ ܡܸܪܬܹܗ. 225 :ܒܐ̄ܢܵܫܵܐ ܥܵܡܲܪ ܐܲܝܟ ܡܵܐ ܕܲܥܵܡ݂ܲܪ ܒܚܸܘܝܵܐ ܒܪܵܫܝܼܬܼ 226 ܘܲܡܢܲܟܸܿܬܼ ܒܹܗ ܠܲܒܼܢܲܝ̈ܢܵܫܵܐ ܐܲܝܟ ܕܲܠܚܵܘܵܐ. 227 :ܐܲܝܟ ܕܲܒܼܢܲܝܬܵܐ ܡܟܲܣܸܐ ܟܝܵܢܹܗ ܒܦܲܓܼܪܵܢܘܼܬܵܐ 228 ܐܲܝܟ ܕܐܸܬܼܟܲܣܝܼ ܒܚܸܘܝܵܐ ܒܥܕܸܢ ܘܲܛܥܵܐ ܘܐܲܛܠܝܼ. 229 :ܐܲܝܟ ܐܹܘܪܓܵܢܘܿܢ ܗܵܘܹ̇ܐ ܦܲܓܼܪܵܐ ܠܩܲܛܝܼܢܘܼܬܹܗ 230 ܘܲܒܼܗܲܕܡܹ̈ܐ ܡܬܲܪܓܸܿܡ ܩ̈ܐܐ ܕܲܡܠܹܝܢ ܪܘܼܫܥܵܐ. 231 :ܗܘ̤ ܘܠܸܓܝܘܿܢܵܘ̈ܗܝ ܥܵܐܹ̇ܠ ܫܵܪܹܐ ܒܢܘܿܣܵܐ ܛܲܡܵܐܐ 232 ܘܲܡܩܲܒܿܠܝܼܢ ܒܹܗ ܣܸܓܼܕܲܬ̤ ܥܵܘ̣ܠܵܐ ܡ̣ܢ ܪ̈ܲܫܝܼܓܹܐ. 233 :ܟܠܹܗ ܚܲܝܠܹܗ ܡܙܲܡܸܢ ܫܵܪܹ̇ܐ ܠܘܲܥܕܼܵܐ ܕܦܲܓܼܪܹܗ 234 ܕܢܸܐ ܬܸܘܿܢ ܢܙܲܚܝܘܢ ܦܵܩܪܸ̈ܐ ܠܦܲܩܪ̈ܵܐ ܕܲܦܩܝܼܪ ܡܸܢܗܘܿܢ. 235 :ܟܠܗܘܢ ܕܲܝ̈ܘܹܿܐ ܡܲܪܗܸܛ ܩܘܼܕܡܵܘܗܝ ܕܲܝܘܵܐ ܡܓܲܫܡܵܐ 236 ܕܲܢܣܲܒܿܪܘܼܢܵܝܗܝ ܐܲܝܟ ܫܲܪܝܼܪܵܐ ܠܕܲܓܵܠ ܟܠܹܗ. 237 :ܟܠܗܘܿܢ ܫܸܐܕܹ̈ܐ ܫܵܓܼܫܝܼܢ ܠܐܲܪܥܵܐ ܒܝܘܿܡ ܓܸܠܝܵܢܹܗ 238 ܕܢܸܗܘܸܐ ܪܵܗܹ̇ܛ ܫܸܡ ܛܵܥܝܘܼܬܹܗ ܩܲܠܝܼܠܵܐܝܼܬܼ. 239 :ܥܲܠ ܟܠ ܘܲܒܼܟܼܠ ܦܵܪܣܝܼܢ ܢܸܫ̈ܒܸܐ ܕܲܡܨܝܼ̈ܕܵܬܹܗ 240 ܕܲܢܨܘܼܕܘܼܢܵܝܗܝ ܠܥܵܠܡܵܐ ܒܪܝܼܪܵܐ ܒܲܥܪܝܼܡܘܼܬܹܗ. pb. f.168v 241 :ܘܵܝ ܠܲܟܼܝܵܢܲܢ ܡ̣ܢ ܡܲܟܿܝܵܢܲܢ ܕܲܟܼܡܵܐ ܡܕܲܪܲܡ 242 ܕܒܲܢ ܡܲܛܥܹܐ ܠܲܢ ܡ̣ܢ ܨܸܝܕ ܩܘܼܫܬܵܐ ܕܠܑܵܐ ܪܓܼܝܼܫܝܼܢܲܢ. 243 :ܘܵܝ ܠܹܗ ܠܓܸܢܣܲܢ ܡ̣ܢ ܓܲܝܵܣܵܐ ܕܥܲܡܝܼܢ ܥܲܡܹܗ 244 ܘܲܡܓܲܝܸܣ ܠܹܗ ܘܠܵܐ ܡܸܬܼܒܲܝܲܢ ܒܲܢܟܼܝܼܠܘܼܬܹܗ. 245 :ܘܵܝ ܠܹܗ ܠܛܘܼܗܡܲܢ ܡ̣ܢ ܒܲܪ ܛܘܼܗܡܵܐ ܕܪ̈ܘܼܚܵܢܵܝܹܐ 246 ܘܲܡܒܲܙܲܚ ܒܹܗ ܘܗܲܢܝܼ ܒܸܙܚܸܗ[...] ܥܲܠ ܪܸܥܝܵܢܹܗ. 247 :ܘܵܝܠܲܢ ܡ̣ܢ ܗܵܘ̇ ܫܒܼܵܒܼܵܐ ܒܝܼܫܵܐ ܕܐܝܼܬܼ ܒܲܬܼܚܘܼܡܲܢ 248 ܕܥܵܠܹ̇ܒܼ ܟܠܝܘܿܡ ܘܠܵܐ ܡܸܬܼܡܲܠܝܵܐ ܥܵܠܘܿܒܼܘܲܬܹܿܗ. 249 :ܗܵܐ ܒܨܝܼܪ ܩܲܠܝܼܠ ܐܲܠ̈ܦܹܐ ܐܸܫܬܵܐ ܡܸܥܠܲܒܼ ܥܵܠܹ̇ܒܼ 250 ܘܬܼܘܼܒܼ ܣܝܼܡܵܐ ܠܹܗ ܕܐܵܦ ܗ̤ܝ ܢܵܘ̈ܡܹܐ ܕܚܲܝܲܝ̈ܢ ܢܸܣܲܒܼ. 251 :ܠܚܲܝܹ̈ܢ ܒܵܥܹ̇ܐ ܕܢܲܥܕܸܐ ܡܸܢܲܢ ܒܫܘܼܠܵܡ ܙܲܒܼ̈ܢܹܐ 252 ܘܠܵܐ ܡܲܪ ܫܸܠ ܠܹܗ ܗܵܘ̇ ܨܸܒܼܝܵܢܵܐ ܕܲܩܪܵܢ ܨܲܠܡܹܗ. 253 :ܒܗܵܕܹܐ ܬܸܢܘܲܝ ܐܸܬܸܐ ܨܹܐܕܲܝܢ ܒܐ̄ܢܵܫܵܐ ܕܡܸܢܲܢ 254 ܕܒܹܗ ܒܲܟܼܝܵܢܲܢ ܢܨܘܼܕ ܠܲܟܼܝܵܢܲܢ ܐܲܝܟ ܕܲܒܼܦܲܚܵܐ. 255 :ܦܲܚܵܐ ܗܵܘܹ̇ܐ ܗܵܘ̇ ܒܲܪܢܵܫܵܐ ܠܗܵܘ̇ ܨܲܝܵܕܵܐ 256 ܘܥܵܐܹ̇ܠ ܟܵܡܹ̇ܢ ܠܓܼܵܘ ܡ̣ܢ ܦܲܓܼܪܢ ܕܲܢܨܘܼܕܵܢ ܒܹܗ. 257 :ܚܙ̣ܵܐ ܕܲܒܼܐ̄ܢܵܫܵܐ ܦܲܪܩܲܢ ܛܵܒܼܵܐ ܡ̣ܢ ܒܝܼܫܘܼܬܹܗ 258 ܘܗܵܐ ܡܸܬܼܦܲܪܲܣ ܕܢܲܦܢܹܝܢ ܨܹܐܕܼܵܘܗܝ ܒܝܲܕ ܒܲܪܢܵܫܵܐ. 259 :ܚܙ̣ܵܐ ܕܠܵܐ ܡܸܫܟܲܚ ܕܗܘ̤ ܒܲܠܚܘܿܕܼܵܘܗܝ ܢܲܩܪܸܒܼ ܠܲܢܝܼ̈ܢ 260 ܘܐܸܓܲܪ ܐ̄̈ܢܵܫܵܐ ܕܢܸܬܼ ܟܲܬܲܫ̈ ܒܹܗ ܥܲܡ ܚܹܐܪܘܼܬܲܢ. 261 :ܒܐܝܼܕܵܐ ܕܐ̄ܢܵܫܵܐ ܡܵܘܚܸܕ ܣܲܝܦܵܐ ܕܡܲܪܝܼܪܘܼܬܹܗ 262 ܘܚܵܪܹܒܼ ܣܸܕܪܸ̈ܐ ܕܲܒܼܢܲܝ̈ܢܵܫܵܐ ܕܠܵܐ ܚܵܘܣܵܢܵܐ. 263 :ܠܓܼܵܘ ܡ̣ܢ ܦܲܓܼܪܵܐ ܡܸܬܼܚܲܙܝܵܢܵܐ ܥܵܐܹ݁ܠ ܟܵܡܹ̇ܢ 264 ܘܲܡܫܲܕܸܐ ܒܹܗ ܒܲܟܼܝܵܢ ܐ̄ܢܵܫܵܐ ܓܹܐܪܹ̈ܐ ܕܪܘܼܓܼܙܹܗ. 265 ܠܵܐ ܗ̄ܘ̣ܵܐ ܒܓܸܠܝܵܐ ܡܲܩܪܸܒܼ ܥܲܡ̇ܢ ܢܲܟܿܘܼܠܬܼܵܢܵܐ: pb. f.169r 266 ܘܠܵܘ ܒܲܩܛܝܼܪܵܐ ܥܵܨܸ̇ܐ ܠܝܲܨܪܢ ܕܢܸܫܬܲܥܒܲܕ ܠܹܗ. 267 :ܒܐ̄ܢܵܫܵܐ ܡܬܼܪܓܸܿܡ ܥܲܡ ܚܹܐ ܪܘܼܬܲܢ ܩ̈ܐܹܐ ܢܟܼܝܼ̈ܠܹܐ 268 ܘܲܡܚܲܬܼ ܚܸܬܼ ܠܲܢ ܐܲܝܟ ܨܲܝܵܕܵܐ ܠܘܲܥܕܵܐ ܕܢܸܟܼܠܵܘ̈ܗܝ. 269 :ܐ̄ܢܵܫܵܐ ܗ̄ܘ̣ ܕܲܡܪܝܼܡ ܩܵܠܹܗ ܒܐܲܪܥܵܐ ܘܩܵܥܹ̇ܐ ܠܐ̄ܢܵܫܵܐ 270 ܕܐ̄ܢܵܐ ܐ̄ܢܵܐ ܐ̄ܢܵܫܵܐ ܕܦܸܪܩܸ̇ܬܼ ܐ̄ܢܵܫܵܐ ܘܬܼܘܼܒܼ ܦܵܪܸܩ ܐ̄ܢܵܐ. 271 :ܬܵܘ ܣܲܒܼܘ ܒܐܝܼ̈ܕܲܝ ܚܲܝܹ̈ܐ ܚܲ[...]ܬܹ̈ܐ ܩܵܥܹ̇ܐ ܢܟܼܝܼܠܵܐ 272 ܟܲܕ ܡܵܘܗܒܼܬܹܗ ܡܵܘܬܵܐ ܗ̄ܝ̣ ܟܠܵܗ̇ ܕܠܵܐ ܫܘܼܠܵܡܵܐ. 273 :ܠܡܵܘܬܿܢ ܨܵܒܸ̇ܐ ܘܲܒܟܼܠ ܥܸ̈ܠܠܲܢ ܪܓܼܝܼܓܼ ܕܲܢܡܝܼܬܲܢ 274 ܘܐܸܠܘܼܠܵܐ ܣܝܵܓܼ ܪܸܡܙܵܐ ܒܐܲܦܵܘ̈ܗܝ ܡܛܲܠܸܩ ܗ̄ܘ̣ܵܐ ܠܲܢ. 275 :ܪܸܡܙܵܐ ܟܲܣܝܵܐ ܟܠܵܝܗܝ ܒܲܬܼܚܘܼܡܵܐ ܠܪܘܼܓܼܙܹܗ ܩܲܫܝܵܐ 276 ܘܡܵܐ ܕܡܲܪܫܸܠ ܠܹܗ ܬܘܼܒܼ ܟܠܹ̇ܿܐ ܠܹܗ ܕܠܵܐ ܢܵܘܒܸܕ ܠܲܢ. 277 :ܗܘ̤ ܡܲܪ ܫܸܠ ܠܹܗ ܕܢܸܓܼܡܘܿܪ ܪܸܓܿܬܹܗ ܨܲܗܝܲܬ̤ ܠܲܕ ܡ̇ܢ 278 ܘܗܘ̤ ܟܵܠܹ̇ܐ [ܠܹܗ] ܕܢܵܘܕܲܥ ܚܘܼܒܹܗ ܕܲܠܘܵܬܼ ܓܸܢܣܲܢ. 279 :ܡܸܢܹܗ ܕܓܸܢܣܲܢ ܡܫܲܕܲܪ ܪܸܡܙܹܗ ܘܟܼܠܹ̇ܿܐ ܪܘܓܼܙܹܗ 280 ܕܢܸܚܙܸܐ ܘܢܸܒܼܗܲܬܼ ܕܐܝܼܬܼ ܒܹܗ ܒܓܸܢܣܲܢ ܕܢ̇ܦܹܩ ܠܐܘܪܥܹܗ. 281 :ܚܲܕ ܐܝܙܓܲܕܵܐ ܡܫܲܕܲܪ ܡܸܢܲܢ ܨܹܝܕ ܒܝܼܫܘܼܬܗ 282 :ܘܲܡܫܲܠܸܐ ܠܵܗ̇ ܠܲܫܓܸܝܫܘܼܬܹܗ ܒܩܵܠ ܦܸܬܼܓܼܵܡܵܘ̈ܗܝ 283 :ܒܲܕ ܡܘܼܬܼ ܨܸܡܚܵܐ ܡ̣ܢ ܐܸܣܦܹܝܪܵܐ ܕܵܢܲܚ̇ ܡ̣ܢ ܫܠܸܝ 284 ܘܪܵܕܼ̇ܦ ܚܸܫܟܵܐ ܕܲܫܟܼܝܼܪ̈ܬܹܗ ܡ̣ܢ ܐ̄ܢܵܫܘܼܬܼܵܐ. 285 :ܐܲܝܟ ܪܲܒܿ ܚܲܝܠܵܐ ܢܵܦ̇[...]ܦ ܠܐܘܼܪ ܥܹܗ ܒܲܪ ܬܵܘ̈ܬܒܹܐ 286 ܘܡܲܥܕܐ ܡܸܢܹܗ ܫܒܝܼܬܼܵܐ ܕܐ̄ܢܵܫܵܐ ܒܚܲܝܠܵܐ ܕܪܘܼܚܵܐ. 287 :ܒܚܝܠܵܐ ܕܪܘܼܚܵܐ ܐܬܸ̇ܐ ܒܚܲܪܬܼܵܐ ܢܒܼܝܼܵܐ ܕܪܘܼܚܵܐ 288 ܕܢܸܦܘܿܩ ܢܲܩܪܸܒܼ ܥܲܡ ܡܵܪܘܿܕܵܐ ܡܬܲܪܓܲܡ ܙܹܐܦܵܐ. 289 :ܪܘܼܚܵܢܵܐܝܼܬܼ ܡܲܩܪܸܒܼ ܥܲܡܹܗ ܕܙܹܐܦܵܢܵܝܵܐ 290 ܘܲܡܚܵܘܸܐ ܠܹܗ ܕܐܝܼܬܼ ܒܹܗ ܒܦܲܓܼܪܢ ܚܲܝܠܵܐ ܕܪܘܼܚܵܐ. pb. f.169v 291 :ܒܙܲܒܼܢܵܐ ܕܣܵܒܲܪ̇ ܕܓܼܵܡܲ݁ܪ ܪܸܓܿܬܗ ܒܦܲܓܼܪ̈ܢܵܝܹܐ 292 ܡܕܝܼܡ ܦܲܓܼܪܵܢܵܐ ܘܲܡܦܲܪܣܸܬ ܠܵܗ̇ ܠܪܓܵܠܘܼܬܹܗ. 293 :ܒܝܵܘܡܵܐ ܕܪܵܢܹ̇ܐ ܕܗܵܐ ܡ̣ܢ ܟܲܕܘܼ ܐܲܡܠܸܟ ܥܲܠ ܟܠ 294 ܡܪܝܼܡ ܚܲܕ ܓܲܒܼܪܵܐ ܡܸܠܲܬܼ ܦܘܼܡܹܗ ܘܲܡܫܲܠܸܦ ܠܹܗ. 295 ܡܸܢܲܢ ܢܵܦܹ̇ܩ ܓܲܒܼܪܵܐ ܠܩܘܼܒܼܠܹܗ ܕܲܡܠܸܐ ܚܘܼܬܼܪܵܐ. 296 ܘܐܵܚܹ̇ܕ ܥܲܡܹܗ ܕܲܪܵܐ ܒܓܸܠܝܵܐ ܠܥܹܝܢ ܟܠ ܒܸܪ̈ܝܵܢ. 297 :ܡ̣ܢ ܡܲܫܪܝܼܬܲܢ ܡܙܲܝܸܢ ܪܘܼܚܵܐ ܚܲܕ ܒܲܪ ܚܲܝܠܵܐ 298 ܘܲܡܫܲܕܲܪ ܠܹܗ ܕܢܸܜܒܸܿܕ ܩܹܐܪܣܵܐ ܥܲܡ ܦܵܩܪܘܼܬܹܗ. 299 :ܒܦܲܓܼܪܢ ܐܲܦܪܸܒܼ ܥܲܡ ܚܐܪܘܼܬܲܢ ܘܚܵܒܲܬܼ ܡܸܢܹܗ 300 ܘܡܸܢܹܗ ܕܦܲܓܼܪܢ ܚܵܐܹ̇ܒܼ ܐܵܦ ܗܘ̤ ܘܡܲܗܸܠ ܒܹܗ ܟܠ. 301 :ܒܦܲܓܼܪܵܐ ܕܲܚܙܵܝܗܝ ܟܲܕ ܡܸܬܼܚܲܒܲܠ ܒܲܪ̈ܓܼܝܼܓܼܵܬܹܗ 302 ܒܹܗ ܡܚܵܘܹܐ ܠܹܗ ܐܵܦ ܐܠܝܼܵܐ ܓܲܢ̄ܒܵܪܘܼܬܹܗ. 303 :ܦܲܓܼܪܵܐ ܕܲܡܪܲܕ ܡ̣ܢ ܚܘܼܒܵܠܵܐ ܕܡܵܘܬܵܐ ܝܲܥܢܵܐ 304 ܥܵܒܹ̇ܕ ܩܹܐܪܣܵܐ ܥܲܡ ܡܵܪܘܿܕܼܵܐ ܕܐܲܥܠ ܡܵܘܬܵܐ. 305 :ܩܹܐܪܣܵܐ ܪܲܒܵܬ ܗܵܘܹ̇ܐ ܒܐܲܪܥܵܐ ܒܫܘܼܠܵܡ ܙܲܒܼ̈ܢܹܐ 306 ܕܡܸܬܼܟܲܬܿܫܝܼܢ ܒܹܗ ܬܪܹܝܢ ܦܲܓܼܪ̈ܢܹܐ ܒܲܢܼܪܹܝܢ ܚܲܝ̈ܠܹܐ. 307 :ܩܘܼܫܬܵܐ ܘܙܹܐܦܵܐ ܠܵܒܼܫܝܼܢ ܙܲܝܢܵܐ ܥܲܠ ܪܸ̈ܓܼܫܝܗܘܿܢ 308 ܘܫܵܕܹ̇ܝܢ ܓܹܐܪܹ̈ܐ ܕܦܸܬܼܓܼܵܡܲܝ̈ܗܘܿܢ ܚܲܕ ܠܘܼܩܒܲܠ ܚܲܕ. 309 :ܒܩܘܫܬܵܐ ܡܚܲܙܲܩ ܒܲܪ ܬܵܘ̈ܬܵܒܹܐ ܟܠܹܗ ܒܟܼܠܹܗ 310 ܘܒܲܪ ܐܲܒܼܕܵܢܵܐ ܥܛܝܼܦ ܐܸܣܟܹܿܡܵܐ ܕܕܲܓܵܠܘܼܬܼܵܐ. 311 :ܒܲܪ ܝܲܡܝܼܢܵܐ ܠܒܼܝܼܫ ܫܸܪܝܵܢܵܐ ܕܙܲܕܝܼܩܘܼܬܼܵܐ 312 ܘܒܲܪ ܐܲܒܼܕܵܢܵܐ ܡܟܲܒܲܡ ܪ̈ܘܼܩܥܹܐ ܕܥܵܘ̣ܠܵܐ ܢܕܝܼܕܵܐ. 313 :ܢܒܼܝܼܵܐ ܕܩܘܼܫܬܵܐ ܣܝܼܡ ܣܲܢܘܼܪܬܵܐ ܕܗܲܝܡܵܢܘܼܬܼܵܐ 314 ܘܦܵܥܠܵܐ ܢܟܼܝܼܠܵܐ ܩܪܝܼܡ ܥܲܠ ܪܹܫܹܗ ܛܵܣܵܐ ܕܙܹܐܦܵܐ. 315 ܟܹܐܢܵܐ ܡܲܩܪܸܒܼ ܒܫܸܡ ܟܸܐܢܘܼܬܼܵܐ ܓܲܢ̄ܒܵܪܵܐܝܼܬ: pb. f.170r 316 ܘܥܵܘܲ݁ܠ ܟܠܹܗ ܡܫܵܕܹܐ ܡܸ̈ܠܹܐ ܕܟܲܕܵܒܼܘܼܬܼܵܐ. 317 :ܟܲܕܵܒܼܵܐܝܼܬܼ ܡܲܩܪܸܒܼ ܒܝܼܫܵܐ ܒܒܼܝܼܫܵܐ ܟܢܵܬܹܗ 318 ܘܫܲܪܝܼܪܵܐܝܼܬܼ ܢܵܨ̇ܚ ܩܘܼܫܬܵܐ ܒܦܘܼܡ ܐܸܠܝܼܵܐ. 319 :ܟܲܕ ܒܼܘܼܬܼܵܐ ܗ̄ܘ̣ ܟܠܹܗ ܙܲܝܢܹܗ ܕܒܲܪ ܐܲܒܼܕܵܢܵܐ 320 ܘܪܘܼܚܵܐ ܡܝܲܚܸܨ ܠܟܼܵܪܘܿܙܘܼܬܹܗ ܕܚܼܨ ܪܸܥܝܵܢܵܐ. 321 :ܒܪܘܼܚܵܐ ܩܵܥܹ̇ܐ ܐܲܝܟ ܫܝܦܘܿܪܵܐ ܢܒܼܝܼܵܐ ܕܪܘܼܚܵܐ 322 ܘܨܵܝ̇ܬܲܝܢ ܩܵܠܹܗ ܒܢܲܝ̈ ܦܵܠܚܘܼܬܼܵܐ ܪܘܼܚܵܢܵܝܵܬܵܐ. 323 :ܒܛܘܼܥܝܲܝ ܠܵܥܹ̇ܙ ܫܠܝܼܚܵܐ ܢܟܼܝܼܠܵܐ ܥܲܡ ܟܲܕܵܒܹ̈ܐ 324 :ܘܡܸܫܬܡܥܝܼܢ ܠܹܗ ܐܲܝܟ ܗܵܘ̇ ܫܸܡܠܵܐ ܕܚܵܘܵܐ ܠܚܸܘܿܝܵܐ 325 :ܠܒܼܘܼܛܵܠ ܢܸܟܼܠܹܗ ܕܢܲܟܿܘܼܠܬܼܵܢܵܐ ܐܵܬܹ̇ܐ ܢܒܼܝܼܵܐ 326 ܕܠܵܐ ܬܸܣܬܲܬܲܬ ܛܘܼܥܝܲܝ ܕܝܼܠܹܗ ܒܪܸܥܝܵܢ ܐ̄ܢܵܫܵܐ. 327 :ܕܢܸܐܢܸܐ ܢܫܲܠܸܡ ܗܵܝ̇ ܕܲܟܼܬܼܝܼܒܼܵܐ ܐܵܬܹ̇ܐ ܒܚܲܪܬܼܵܐ 328 ܕܢܲܦܢܸܐ ܠܸܒܵܐ ܕܥܵܛ̈ܠܲܝ ܠܸܒܵܐ ܠܘܵܬܼ ܣܘܼܟܵܠܵܐ. 329 :ܠܡܸܠܲܬܼ ܩܘܼܫܬܵܐ ܡܚܵܬܸܿܡ ܩܵܠܹܗ ܕܟܼܵܪܘܿܙ ܩܘܼܫܬܵܐ 330 ܕܩܲܕܡܲܬ̤ ܙܲܥܩܲܬ̤ ܕܗܵܐ ܐܹܠܝܼܵܐ ܐܸܬ݂ܵܐ ܘܐܵܬܹ̇ܐ. 331 :ܐܹܠܝܼܵܐ ܠܲܡ ܐܵܬܹ̇ܐ ܕܢܲܟܲܪܸܙ ܐܘܼܪܚܵܐ ܕܩܘܼܫܬܵܐ 332 ܡܵܕܹܝܬ ܓܲܠܝܵܐ ܗ̄ܝ̣ ܕܒܹܗ ܡܸܬܼܚܲܬܲܡ ܟܠܡܵܐ ܕܲܟܼܬܼܝܼܒܼ. 333 :ܠܫܘܼܪܵܪ ܡܸ̈ܠܹܐ ܕܲܢܒܼܝܼܘܼܬܼܵܐ ܐܵܬܹܐ ܢܲܟܸܦܵܐ 334 ܘܛܵܐܸ̇ܢ ܣܲܓܿܝܼ ܘܲܡܦܲܪܣܸܐ ܠܹܗ ܠܙܹܐܦܵܐ ܒܓܼܠܝܵܐ. 335 :ܐܲܝܟ ܐܲܬܼܠܹܝܛܵܐ ܢܵܚܹ̇ܬܼ ܩܵܐܹ̇ܡ ܒܡܸܨܥܲܬܼ ܫܹ̈ܐܕܹܐ 336 ܘܐܵܚܹ̇ܕ ܕܲܪܵܐ ܥܲܡ ܚܲܣܝܼܢܵܐ ܘܚܲܝ̈ܠܵܘܬܹܗ. 337 :ܟܠܗܘܿܢ ܫܹ̈ܐܕܹܐ ܐܵܚ̇ܕܝܼܢ ܥܲܡܹܗ ܕܲܪܵܐ ܩܲܫܝܵܐ 338 ܘܗܘ̤ ܥܲܡ ܟܠܗܘܿܢ ܘܠܵܐ ܚܵܣ̇ܢܝܼܢ ܠܵܗ̇ ܠܓܼܢ̄ܒܵܪܵܘܼܬܹܗ. 339 :ܚܲܝܠܵܗ ܕܪܘܼܚܵܐ ܡܚܲܝܹܠ ܦܲܓܼܪܹܗ ܘܙܵܘ̈ܥܝܲ ܢܲܦܫܹܗ 340 ܘܠܵܐ ܡܸܬܼܪܲܦܸܐ ܡ̣ܢ ܬܼܟܲܬܘܼܫܵܐ ܕܲܚܠܵܦ ܡܵܪܹܗ. pb. f.170v 341 :ܗܵܘ̇ ܦܘܼܩܕܵܢܵܐ ܕܙܲܟܿܝܹܗ ܒܩܹܐܪܣܵܐ ܕܟܼܟܼܡܪ̈ܝ ܒܲܥܵܐܐ 342 ܗܘ̤ ܡܙܲܟܸܿܐ ܠܹܗ ܐܵܦ ܒܲܩܪܵܒܼܵܐ ܕܥܲܡ ܡܵܪܘܿܕܵܐ. 343 :ܒܗܵܕܹܐ ܬܸܢܘܲܝ ܝܲܗ̣̄ܒ ܒܹܗ ܚܲܝܠܵܐ ܒܝܵܘ̈ܗܝ ܐܵܚܵܒܼ 344 ܕܢܸܟܼܪܵܘܿܫ ܐܘܼܪܚܵܐ ܠܗܵܝ̇ ܙܟܼܵܘܼܬܼܵܐ ܕܲܒܼܫܘܼܠܵܡܵܐ. 345 ܪܲܗܒܘܿܢܵܐ ܗܲܘ̣ܵܬ̤ ܚܲܪ ܒܵܐ ܕܲܥܒܼܵܕ ܒܟܼܘܼܡܪ̈ܝ ܒܲܥܠܵ. 346 ܕܗܵܕܹܐ ܚܲܪܒܵܐ ܕܲܥܬܼܝܼܕ ܕܢܸܬܼܒܲܥ ܒܡܲܫܪܝܼܬܼ ܫܹ̈ܐܕܹܐ. 347 :ܐ̄ܪܙܵܐ ܨܵܪ ܒܹܗ ܪܸܡܙܵܐ ܕܲܓܼܒܼܵܝܗܝ ܠܲܢܒܼܝܼܘܼܬܼܵܐ 348 ܘܲܥܬܼܝܼܕ ܕܢܸܓܼܡܘܿܪ ܫܪܵܪܵܐ ܕܡܸܠܵܘ̈ܗܝ ܒܝܲܕ ܣܘܼܥܪ̈ܢܹܐ. 349 :ܒܐ̄ܪܙܵܐ ܩܵܛܹ̇ܠ ܢܒܼ̈ܝܹܐ ܕܫܘܼܩܪܵܐ ܢܒܼܝܼܵܐ ܕܩܘܼܫܬܵܐ 350 ܕܲܟܼܡܵܐ ܕܲܗܘ̤ܵܬ̤ ܗܵܟܼܢ ܗܵܘܝܵܐ ܒܫܘܼܠܵܡ ܙܲܒܼ̈ܢܹܐ. 351 :ܒܐܝܼܕ̈ܵܘܗܝ ܢܲܟܸܣ ܠܦܵܠܲܝܲܚ̈ ܫܹ̈ܐܕܹܐ ܠܒܸܗܬܲܬܼ ܫܹ̈ܐܕܹܐ 352 ܘܒܹܗ ܡܸܬܼܦܲܪܣܸܐ ܐܵܦ ܗܘ̤ ܪܲܒܵܐ ܕܕܲܓܵܠܘܼܬܼܵܐ. 353 :ܠܕܲܓܵܠܘܼܬܼܵܐ ܕܗܵܘ̇ ܕܲܓܵܠܵܐ ܡܦܲܪܣܸܐ ܟܹܐܢܵܐ 354 ܘܲܡܟܲܐܲܪ ܠܹܗ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܫܐ. 355 :ܒܙܲܒܹܢܵܐ ܕܬܼܵܩܦܵܐ ܕܲܓܵܠܘܼܬܹܗ ܡܲܩܪܸܒܼ ܥܲܡܹܗ 356 ܘܲܡܩܲܛܪܓ ܠܹܗ ܕܕܲܓܵܠܵܐܝܼܬܼ ܡܲܩܠܹܐ ܒܓܼܘܼܡܕܵܐ. 357 :ܗܘ̤ ܒܲܠܚܘܿܕܵܘܗܝ ܡܲܒܼܗܸܬܼ ܚܘܼܬܼܪܵܐ ܕܲܛܪܘܿܢܘܼܬܹܗ 358 ܘܲܡܫܵܘܕܲܥ ܠܹܗ ܚܹܝܠ ܒܵܪܘܿܝܵܐ ܕܣܝܼܡ ܒܲܟܼܝܵܢܲܢ. 359 :ܒܝܲܨܪܹܗ ܒܝܼܫܵܐ ܚܵܪ ܒܵܪܘܝܵܐ ܡ̣ܢ ܫܘܼܪܝܵܐ 360 ܘܩܲܕܸܡ ܣܵܡ ܒܲܢ ܚܹܝܠ ܥܘܼܕܵܪܵܢܹܗ ܕܢܲ[ܩ]ܪܸܒܼ ܥܲܡܹܗ. 361 :ܒܝܲܕ ܐܹܠܝܼܵܐ ܡܲܩܪܸܒ ܥܲܡܹܗ ܟܠܹܗ ܓܸܢܣܲܢ 362 ܘܲܡܚܲܝܸܒܼ ܠܵܗ̇ ܠܓܲܢܒܵܪܘܼܬܹܗ ܒܲܡܚܝܼܠܘܼܬܲܢ. 363 :ܐܹܝܟ ܕܲܠܣܲܟܿܪܵܐ ܐܵܚܹ̇ܕ ܒܐܲܦܵܘ̈ܗܝ ܚܙܵܬܹܗ ܕܢܲܟܼܦܵܐ 364 ܘܲܡܣܲܦܸܩ ܒܹܗ ܟܠܗܘܿܢ ܓܹܐܪ̈ܘܗܝ ܘܠܵܐ ܡܲܟܸܿܐ ܠܹܗ. 365 ܠܒܘܼܒܼܠܹܗ ܚܵܢ̇ܝܼܢ ܟܠܗܘܿܢ ܫܹ̈ܐܕܐ ܒܒܲܪ ܐܲܒܼܕܵܢܵܐ: pb. f.171r 366 ܘܠܵܐ ܡܵܛܹ̇ܐ ܠܹܗ ܚܲܕ ܡ̣ܢ ܢܸܟܼ̈ܠܐ ܕܢܸܘܼܝܵܢܲܝ̈ܗܘܿܢ. 367 :ܬܲܗܪܵܐ ܗ̄ܘ̣ ܪܲܒܵܐ ܩܹܐܪܣܵܐ ܕܥܵܒܼ̇ܕ ܒܲܪ ܬܵܘ̈ܬܵܒܹܐ 368 ܕܗܘ̤ ܒܲܠܚܘܿܕܵܘܗܝ ܠܘܼܩܠܲܠ ܐܲܠܦܹ̈ܐ ܘܠܵܐ ܡܸܬܼܪܲܦܹܐ. 369 :ܠܬܲܗܪܵܐ ܫܵܘܹ̇ܐ ܚܹܝܠ ܐܝܼܬܼܘܼܬܼܵܐ ܕܲܡܚܝܠ ܠܹܗ 370 ܕܐܲܝܟܢ ܡܲܩܠܸܐ ܚܲܕ ܒܪܢܵܫܵܐ ܥܲܠ ܣܲܓܝܸ̈ܐܐ. 371 :ܟܡܵܐ ܟܵܝ ܚܲܣܝܼܢ ܗܵܘ̇ ܥܘܼܕܪܵܢܵܐ ܕܲܒܹܗܲܕܵܡܵܘ̈ܗܝ 372 ܕܠܵܐ ܡܸܨܝܢ ܕܲܝ̈ܘܹܐ ܩܲܢܢܼ̈ܝ ܚܲܝܠܵܐ ܠܡܲܟܵܝܘܼܬܹܗ. [...]. 373 :ܟܡܵܐ ܟܐܝܢ ܗܵܘܢܵܐ ܘܡܸܠܲܬܼ ܦܘܼܡܹܗ ܕܦܲܓܼܪܵܢܵܝܵܐ 374 ܕܲܡܫܲܠܸܐ ܠܗܘܿܢ ܠܩܵܐܹ̈ܐ ܫܓܼܝܼ̈ܫܹܐ ܕܗܵܝ̇ ܡܲܫܪܝܼܬܼܵܐ. 375 :ܬܵܘ ܢܸܬܼܗܲܪ ܒܹܗ ܒܗܵܘ̇ ܬܲܟܼܬܘܪܫܵܐ ܥܲܕܠܵܐ ܢܸܗܘܸܐ 376 ܕܐܸܡܲܬܼܝ ܕܢܸܗܘܸܐ ܠܵܐ ܢܸܬܼܪܦܸܐ ܒܩܲܫܝܼܘܼܬܼ ܫܸܡܥܹܗ. 377 :ܬܵܘ ܢܸܬܿܕܲܡܲܪ ܦܵܪܘܿܫܵܐܝܼܬܼ ܒܓܲܒܼܪܵܐ ܕܡܸܢܲܢ 378 ܕܥܵܒܹ̇ܕ ܩܹܐܪܣܵܐ ܥܲܡ ܪ̈ܘܼܚܵܢܹܐ ܕܲܩܫܹܝܢ ܡܸܢܹܗ. 379 :ܬܵܘ ܢܸܬܼܒܲܩܸܐ ܚܲܬܿܝܼܬܼܵܐܝܼܬܼ ܒܙܲܝܢܵܐ ܕܲܥܠܵܘܗܝ 380 ܕܚܵܣܹ̇ܝܢ ܣܸܕܪܹ̈ܐ ܕܲܩܪܲܒܼܬܵܢܹܐ ܘܠܵܐ ܡܸܬܼܒܲܨܪ. 381 :ܡܲܢܘܼ ܡ̣ܢ ܡܬܼܘܿܡ ܚܙܑ̣ܵܐ ܒܲܪܢܵܫܵܐ ܐܲܝܟ ܐܹܠܝܼܵܐ 382 ܕܲܟܼܪܝܼܟܼܝܼܢ ܠܹܗ ܐܲܠ̈ܦܹܐ ܕܫܹ̈ܐܕܹܐ ܘܠܵܐ ܡܲܟܹܿܝܢ ܠܹܗ. 383 :ܡ̇ܢ ܐܸܬܼܒܲܩܝܼ ܒܓܲܒܼܪܵܐ ܕܲܙܟܼܵܐ ܠܡܵܘܬܵܐ ܝܲܥܢܵܐ 384 ܘܲܗܦܲܟ ܕܵܫܹܗ ܐܵܦ ܠܲܢܟܼܝܼܠܵܐ ܕܐܲܥܸܠ ܡܵܘܬܵܐ. 385 :ܡܵܘܬܵܐ ܘܒܼܝܼܫܵܐ ܒܵܗ̇ܬܝܼܢ ܡܸܢܹܗ ܕܒܲܪ ܡܲܝ̈ܘܿܬܹܐ 386 ܘܠܵܐ ܡܸܨܝܢ ܕܵܝܫܝܼܢ ܠܪܲܒܘܼܬܼ ܕܲܪܓܼܵܐ ܕܐܸܬܼܝܲܩܲܪ ܒܹܗ. 387 :ܓܘܼܢܚܵܐ ܪܲܒܵܐ ܢܵܦܹ̇ܿܠ ܡ̣ܢ ܫܹܠܝ ܥܲܠ ܣܵܛܵܢܵܐ 388 ܟܲܕ ܚܵܙܹ̇ܐ ܠܹܗ ܕܐܬܹ̇ܐ ܒܝܲܚܠܵܐ ܠܘܼܩܒܲܠ ܚܲܝܠܹܗ. 389 :ܡܸܒܼ̈ܠܹܐ ܡܵܚܹ̇ܝܢ ܠܚܲܝ̈ܠܘܵܬܹܗ ܒܩܵܠ ܦܲܬܼܓܼܵܡܵܘ̈ܗܝ 390 ܡܵܐ ܕܫܵܡ̇ܥܝܼܢ ܠܹܗ ܕܲܡܪܝܼܡ ܩܵܠܹܗ ܥܲܠ ܣܸܕܪ̈ܝܗܘܿܢ. pb. f.171v 391 :ܠܵܘ ܡ̣ܢ ܩܵܠܹܗ ܕܦܲܓܼܪܵܢܵܝܵܐ ܕܲܚܠܝܼܢ ܦܵܩܪܹ̈ܐ 392 ܐܸܠܵܐ ܡ̣ܢ ܗܵܘ̇ ܚܲܝܠܵܐ ܕܲܟܼܣܸܐ ܠܓܼܵܘ ܡ̣ܢ ܡܸܠܵܘ̈ܗܝ. 393 :ܐܸܒܼܠܵܐ ܪܲܒܵܐ ܣܵܓܸ̇ܐ ܥܠܲܝܗܘܿܢ ܕܲܩܢܲܝ̈ ܚܸܫܒܵܐ 394 ܡܵܐ ܕܡܸܬܼܒܲܩܹܝܢ ܒܢܘܼܗܪܵܐ ܕܡܸܠܵܘ̈ܗܝ ܕܒܲܪ ܡܵܝ̈ܘܿܬܹܐ. 395 :ܒܝܘܿܡ ܙܵܟܼܘܼܬܼܗܘܿܢ ܚܵܝ̇ܒܲܝܼܢ ܫܵܦ̈ܠܹܐ ܡ̣ܢ ܒܲܪ ܫܵܦ̈ܠܹܐ 396 ܘܡܸܬܿܕܲܡܪܝܼܢ ܒܹܗ ܕܐܲܝܟܲܢ ܚܵ[...]ܢ ܠܲܟܼܡܹܐ ܢܲܝ̈ܗܘܿܢ. 397 :ܟܠܗܘܿܢ ܐܲܟܼܚܕܵܐ ܠܘܼܝܢ ܒܐܵܘܝܘܼܬܼܵܐ ܠܚܲܕ ܒܲܪܢܵܫܵܐ 398 ܘܲܡܣܲܝܥܝܼܢ ܠܹܗ ܘܠܵܐ ܡܸܨܝܢ ܙܵܟܹ̇ܿܝܢ ܠܚܲܕ ܒܲܪܢܵܫܐ. 399 :ܚܲܕ ܒܲܪܢܵܫܵܐ ܩܪ̈ܲܝܬܿ ܠܐܠܝܼܵܐ ܒܲܪ ܬܵܘܬܵܒܹ̈ܐ 400 ܘܲܐ̄ܚܪܹܝܢ ܟܲܢܝܼܬܿ ܒܲܪ ܐܲܒܼܕܵܢܵܐ ܕܐܵܒܹ̇ܕ ܠܲܓܼܡܲܪ. 401 :ܐ̄ܢܵܫܵܐ ܘܐ̄ܢܵܫܵܐ ܥܵܒܼ̇ܕܝܼܢ ܩܹܐܪܣܵܐ ܚܲܕ ܠܘܼܩܒܲܠ ܚܲܕ 402 ܢܒܼܝܼܵܐ ܒܪܣܚܵܐ ܘܒܲܪ ܐܲܒܼܕܵܢܵܐ ܒܚܹܝܠ ܣܵܛܵܢܵܐ. 403 :ܒܲܪܢܵܫܵܐ ܗ̄ܘ̣ ܓܝܼܪ ܗܵܘ̇ ܒܲܪܢܵܫܵܐ ܕܐܬܹ̇ܐ ܕܢܲܛܥܹܐ 404 ܘܣܵܢܵܐܐ ܕܐ̄ܢܵܫܵܐ ܓܵܡ̇ܪ ܒܐܝܼܕܼܵܘ̈ܗܝ ܛܘܼܥܝܲܝ ܕܲܫܡܹܗ. 405 :ܠܵܐ ܡܨܸܐ ܕܢܲܛܥܹܐ ܒܸܠܥܵܕ ܐ̄ܢܵܫܵܐ ܠܲܒܢܲܝ̈ܢܵܫܵܐ 406 ܘܥܲܠ ܗܵܝ̇ ܓܵܒܹ̇ܐ ܐ̄ܢܵܫܵܐ ܠܪܘܼܫܥܵܐ ܕܢܲܪܫܲܥ ܒܐܝܼܕܹܗ. 407 :ܪܘܼܫܥܵܐ ܪܲܒܵܐ ܣܸܥܲ݁ܪ ܒܐܝܼܕܼܵܘ̈ܗܝ ܕܗܵܘ̇ ܒܲܪ ܢܵܫܵܐ 408 ܘܥܲܠ ܥܒܘܿܕܵܐ ܘܲܥܒ̣ܵܕ ܐܝܼܕܼܵܘ̈ܗܝ ܡܸܫܬܲܩܲܠ ܒܹܗ. 409 :ܥܵܘ̣ܠܵܐ ܩܫܝܵܐ ܓܵܣܹ̇ܐ ܦܘܼܡܹܗ ܥܲܠ ܐܝܼܬܼܘܼܬܼܵܐ: ܘ̄ 410 ܘܲܒܼܣܸܦܘ̈ܬܹܗ ܡܨܲܚܹܐ ܠܲܫܡܵܐ ܕܩܲܕܹܩ ܡ̣ܢ ܟܠ. 411 :ܫܡܵܐ ܩܲܕܝܼܫܵܐ ܨܵܒܹ̇ܐ ܕܢܸܚܛܘܿܦ ܛܲܡܐܐ ܕܛܲܡ̈ܐܹܐ 412 ܘܣܸܓܼܕܲܬܼ ܡܵܪܵܐ ܪܓܼܝܼܓܼ ܕܲܢܩܲܒܸܿܠ ܥܲܒܼܕܵܐ ܕܥܒܼ̈ܕܹܐ. 413 :ܒܗܲܝܟܲܠ ܩܘܼܕܫܵܐ ܥܵܐ̇ܠ ܝܵܬܹ̇ܒܼ ܥܘܼܡܪܵܐ ܕܫܹ̈ܐܕܐ 414 ܘܣܵܥܸ̇ܐ ܘܐܲܡܲ݁ܪ ܐ̄ܢܵܐ ܐ̄ܢܵܐ ܡܫܝܼܚܵܐ ܘܒܲܪ ܐܲܠܵܗܵܐ. 415 ܐܵܦ ܫܲܡܵܫܵܘ̈ܗܝ ܗܵܕܹܐ ܩܵܥܹ̇ܝܢ ܥܵܘ̇ܠܵܐܝܼܬܼ: pb. f.172r 416 ܕܐܹܝܢ ܐܲܠܵܗܵܐ ܗ̄ܘ̣ ܐܘܿܗ ܡ̣ܢ ܪܲܒܵܐ ܘܡ̣ܢ ܬܲܠܡܝܼܪܘ̈ܗܝ. 417 :ܒܫܸܡ ܐܲܠܵܗܵܐ ܛܵܥܹ̇ܐ ܘܡܲܛܥܸܐ ܠܲܕܛܵܥܹ̇ܝܢ ܒܹܗ 418 ܘܟܲܕ ܣܵܢܹ̇ܐ ܠܹܗ ܡܟܲܣܸܐ ܒܲܫܡܹ ܣܲܝܢܘܼܬܼ ܢܲܦܫܹܗ. 419 :ܣܲܢܝܵܐ ܒܕܲܟܼܝܵܐ ܒܵܥܹ̇ܐ ܕܢܸܫܦܲܪ ܠܵܐ ܗ̄ܘ̣ܵܐ ܕܢܸܫܦܲܪ 420 ܐܸܠܵܐ ܕܢܲܣܢܸܐ ܦܲܐܝܘܼܬܼ ܫܘܼܦܪܹܗ ܒܲܫܘܼܝܼܪܘܼܬܹܗ. 421 :ܠܵܘ ܠܹܗ ܡܲܣܢܹܐ ܣܲܢܝܵܐ ܠܒܲܦܝܵܐ ܕܠܵܐ ܡܸܫܬܲܚܠܲܦ 422 ܕܗܘ̤ ܠܹܗ ܡܲܣܢܸܐ ܒܐܲܝܕܵܐ ܕܣܵܥܲܪ ܡܲܪܵܚܵܐܝܼܬܼ. 423 :ܡܲܪܵܚܘܼܬܼܵܐ ܗ̄ܝ̣ ܕܥܲܒܼܕܵܐ ܢܼܚܛܘܿܦ ܫܸܡ ܥܵܒܼܘܿܕܵܐ 424 ܘܪܘܫܥܵܐ ܡܲܠܝܵܐ ܕܛܝܼܢܵܐ ܓܒܼܝܼܠܵܐ ܢ[ܫ]ܘܼܛ ܓܵܒܼܘܿ ܠܵܐ. 425 :ܥܲܠ ܓܵܒܼܘܿ ܠܹܗ ܣܥܹ̇ܐ ܚܲܪܡܵܐ ܚܲܪ ܡܵܢܵܐܝܼܬܼ 426 ܘܲܠܚܲܪ ܡܵܢܵܐ ܝܵܗܹ̇ܿܒܼ ܕܲܪܲܓܼܵܐ ܕܪܹܫܵܢܘܼܬܼܵܐ. 427 :ܠܪܹܫܵܐ ܕܐܵܐܲܪ ܩܵܪܹܐ ܢܸܟܼܝܼܠܵܐ ܪܹܫ ܟܠ ܡܸܕܸܡ 428 ܘܠܹܗ ܗܘ̤ ܡܙܲܕܸܩ ܣܸܓܼܕܲܬ̤ ܐ̄ܢܵܫܵܐ ܠܩܵܛܹ̇ܠ ܐ̄ܢܵܫܵܐ. 429 :ܩܛܹ̇ܠ ܐ̄ܢܵܫܵܐ ܗ̄ܘ̣ ܕܲܡܕܲܝܲܪ ܒܹܗ ܒܐܲܒܲܝܼܕ ܚܲܝܹ̈ܐ 430 ܘܗܘ̤ ܡܚܲܦܸܛ ܠܹܗ ܠܡܸܩܛܲܠ ܐ̄ܵܢܵܫܵܐ ܒܣܲܝܦܵܐ ܕܥܵܘ̣ܠܵܐ. 431 :ܣܲܝܦܵܐ ܕܥܵܘ̣ܠܵܐ ܐܚܹ̇ܕ ܒܐܝܼܕܹܗ ܕܲܡܠܸܐ ܥܵܘ̣ܠܵܐ 432 ܘܚܵܪܹܒܼ ܣܸܕܪܹ̈ܐ ܕܲܒܼܢܲܝ̈ܢܵܫܵܐ ܥܵܘ̇ܠܵܐܝܼܬܼ. 433 :ܒܐܸܣܟܸܡ ܫܲܝܢܵܐ ܓܵܢܸ̇ܒܼ ܫܲܝܢܵܐ ܣܵܢܹ̇ܐ ܫܲܝܢܵܐ 434 ܘܐܲܝܟ ܣܲܡ ܚܲܝܹ̈ܐ ܙܵܪܲܥ ܡܸܠܬܹܗ ܒܐܲܕܢܲܝ̈ ܐ̄ܢܵܫܵܐ. 435 :ܫܠܵܡܵܐ ܡܲܟܼܪܸܙ ܒܝܘܿܡ ܓܸܠܝܵܢܹܗ ܕܠܝܼܚ ܒܲܚܣܵܡܵܐ 436 ܘܒܲܕܡܘܼܬܼ ܪܵܚܡܵܐ ܡܚܵܘ̣ܐ ܐܲܦܹ̈ܐ ܕܟܲܕܵܒܼܘܼܬܼܵܐ. 437 :ܟܠ ܝܘܼܠܦܵܢ̈ܝܼܢ ܕܲܙܪܲܥ ܒܐܲܪܥܵܐ ܡܒܲܛܠ ܛܲܢܦܵܐ 438 ܘܗܵܦ̇ܟ ܒܵܢܹ̇ܐ ܒܸܢܝܵܢ ܙܸܐܦܹܗ ܒܲܨܢܝܼܥܘܼܬܼܵܐ. 439 :ܐܘܲܡܵܢܵܐܝܼܬܼ ܡܩܝܼܡ ܝܘܼܠܦܵܢܹܗ ܪܲܒܵܐ ܕܛܘܼܥܝܲܝ 440 ܘܠܵܐ ܐ̄ܢܵܫ ܝܵܕܲܥ̇ ܕܢܸܬܼܒܲܩܸܐ ܒܵܗ̇ ܒܐܘܼܡܵܢܘܼܬܹܗ. pb. f.172v 441 :ܡܒܲܛܸܠ ܟܘܡܪܹ̈ܐ ܐܵܦ ܩܵܨܘ̈ܡܹܐ ܘܲܥ̈ܠܵܘܬܼܵܐ 442 :ܘܥܵܨ̇ܐ ܠܐ̄ܢܵܫܵܐ ܕܲܢܕܲܒܿܚܘܼܢ ܠܹܗ ܨܸܒܼܝܵܢܲܝ̈ܗܘܿܢ 443 ܫܵܪܹܐ ܡܲܠ̈ܟܹܐ ܘܡܲܥܒܲܪ ܛܲܟܼܣܹ̈ܐ ܕܪܹܫܵܢܘܼܬܼܵܐ. 444 ܘܗܘ̤ ܒܲܠܚܘܿܕܵܘܗܝ ܩܵܪܹܐ ܢܲܦܫܹܗ ܡܲܠܟܵܐ ܘܡܵܪܵܐ. 445 :ܬܚܹܝܬܼ ܡܵܪܘܼܬܹܗ ܟܵܕܹܢ ܨܵܘܪܵܐ ܕܲܒܼܫܲܝ̈ ܚܹܐܪܹ̈ܐ 446 ܘܲܡܩܲܪܒܼܝܼܢ ܠܹܗ ܪܸ̈ܥܝܵܢܲܝ̈ܗܘܿܢ ܚܠܵܦ ܡܲܕܲܐܬܼܵܐ. 447 :ܟܠܝܼܠ ܩܘܼܠܵܣܹ̈ܐ ܓܵܕ ܠܝܼܢ ܣܵܝ̇ܡܝܼܢ ܒܪܹܫ ܚܲܪ ܡܘܼܬܹܗ 448 ܘܲܡܟܼܠܠܝܼܢ ܠܹܗ ܐܲܝܟ ܕܲܠܡܲܠܟܵܐ ܒܦܸܬܼܓܼܵܡܲܝ̈ܗܘܿܢ. 449 :ܟܹܐܢܹ̈ܐ ܒܲܠܚܘܕ ܠܵܐ ܡܸܬܼܟܲܕܢܝܼܢ ܬܚܹܝܬܼ ܫܘܼܠܛܵܢܹܗ 450 ܘܠܵܐ ܡܸܬܿܛܦܝܼܣܝܼܢ ܠܩܵܠ ܫܘܼܓܼܵܫܵܘ̇ܗܝ ܕܢܲܟܿܘܼܠܬܼܵܢܵܐ. 451 :ܪܸ̈ܒܿܘܼ ܦܲܚ̈ܝܼܢ ܡܥܲܡܸܩ ܛܵܡܲܪ ܕܲܢܨܘܼܕ ܐܸܢܘܿܢ 452 ܘܲܒܼܟܼܠ ܦܘܼܪ̈ܣܝܼܢ ܡܲܛܝܼ ܟܹܐܢܹ̈ܐ ܕܲܢܨܘܼܕ ܐܸܢܘܿܢ. 453 :ܠܲܒܼܢܲܝ̈ ܓܲܒܹܗ ܡܓܲܪܸܓܼ ܚܲܪܡܵܐ ܠܘܼܩܒܲܠ ܟܹܐܢܹ̈ܐ 454 ܘܒܲܡܫܲܡܫܵܢܵܘ̈ܗܝ ܡܫܲܕܹܐ ܓܹܐܪܹ̈ܐ ܒܦܵܠܝܲܝ̈ ܩܘܼܫܬܵܐ. 455 :ܒܐܝܼܕܵܐ ܕܥܲܡܡܹ̈ܐ ܐ̄ܚ̇ܕ ܕܪܵܬ ܥܲܡ ܙܲܕܝܼ̈ܩܹܐ: ܘ̄ 456 ܘܲܒܼܗܲܕܵܡܹ̈ܐ ܡܸܬܼܚܲܙܝܵܙܹ̈ܐ ܡܥܝܼܩ ܠܲܬܼܪ̈ܝܼܨܐ. 457 :ܒܓܼܘܼܫܡܵܐ ܡܲܩܪܸܒܼ ܠܵܐ ܓܘܼܫܡܵܢܵܐ ܥܲܡ ܓܘܼܫܡܵܢܵܐ 458 ܘܲܒܼܣܲܦܣܹܪܵܐ ܕܡܸܠܬܼܵܐ ܚܵܪܹ̈ܒܼ ܠܩܵܢܝܲܝ̈ ܡܸܠܬܼܵܐ. 459 :ܩܪܵܒܐ ܪܲܒܵܐ ܥܵܒܹ̇ܕ ܥܲܡ ܟܠ ܕܠܵܐ ܫܵܠܹ̇ܡ ܠܹܗ 460 ܥܕܲܡܵܐ ܕܫܵܡܲ݁ܥ ܗܵܝ̇ ܒܲܪܬܼ ܩܵܠܵܐ ܕܲܡܛܲܠܩܵܐ ܠܹܗ. 461 :ܩܹܐܪܣܵܐ ܣܵܕܲܪ ܠܘܼܩܒܲܠ ܟܠܢܫ ܕܠܵܐ ܡܵܘܕܸܐ ܒܹܗ 462 ܥܕܲܡܵܐ ܕܒܼܵܗܹ̇ܬܼ ܡ̣ܢ ܦܘܼܩܕܵܢܵܐ ܕܫܲܠܝܼܛ ܥܲܠ ܟܠ. 463 :ܥܲܠ ܟܠ ܡܲܩܠܸܐ ܘܲܠܟܼܠ ܫܵܐܹܛ̇ ܚܬܼܝܼܪ ܪܸܥܝܵܢܵܐ 464 ܥܕܲܡܵܐ ܕ[...]ܢܲܚ̇ ܡܲܠܟܵܐ ܕܥܲܠ ܟܠ ܘܲܡܦܲܪܣܸܐ ܠܹܗ. 465 ܠܟܼܠ ܐܲܬܼܪ̈ܘܵܢ ܦܵܪ̇ܚ ܛܸܒܵܐ ܕܲܫܓܼܝܼܫܘܼܬܹܗ: pb. f.173r 466 ܥܕܲܡܵܐ ܕܩܵܥܹ̇ܝܢ ܚܲܝ̈ܠܝ ܪܵܘܡܵܐ ܘܡܫܲܠܹܝܢ ܠܹܗ. 467 :ܥܲܠ ܟܠ ܦܸܢ̈ܝܵܢ ܦܵܪܹܣ ܢܸܫ̈ܒܹܐ ܕܲܨܢܝܼܥܘܼܬܹܗ 468 ܥܕܲܡܵܐ ܕܚܵܙܹ̇ܐ ܠܲܡܫܲܝܵܢܹ̈ܐ ܕܢܵܦ̇ܩܝܼܢ ܠܐܘܼܪܥܹܗ. 469 :ܒܐܲܪܥܵܐ ܡܩܵܘܹܐ ܘܛܵܒܹ̇ܐ ܘܡܲܛܥܹܐ ܠܐܲܪ̈ܥܵܢܵܝܹܐ 470 ܥܕܲܡܵܐ ܕܲܡܕܝܼܩ ܢܝܼܫܵܐ ܒ[...]ܠܵܟܵܐ ܘܪܵ ܥܸ̇ܠ ܡܸܢܹܗ. 471 :ܗܘ̤ ܘܐܹܠܝܼܵܐ ܣܵܕܪܝܼܢ ܩܹܐܪܣܵܐ ܚܲܕ ܠܘܼܩܒܼܵܠ ܚܲܕ 472 ܥܕܲܡܵܐ ܕܫܵܠܡܵܐ ܦܪܵܬܿܘܿܙܡܝܼܵܐ ܕܥܘܼܡܪܵܐ ܕܙܲܒܼܢܵܐ. 473 :ܒܹܗ ܒܐܵܓܼܘܿܢܵܐ ܡܩܵܘܹܐ ܟܹܐܢܵܐ ܥܲܡ ܥܵܘ̇ܠܵܐ 474 :ܥܕܲܡܵܐ ܕܦܵܬܲܚ̇ ܪܸܡܙܵܐ ܟܹܿܣܝܵܐ ܬܲܪ̈ܥܲܝ ܪܵܘܡܵܐ 475 :ܒܹܗ ܒܲܩܪܵܒܼܵܐ ܪܡܸܐ ܫܲܪܝܪܵܐ ܥܲܡ ܕܲܓܵܠܵܐ 476 ܥܕܲܡܵܐ ܕܬܼܵܩܹ̇ܢ ܟܘܼܪܣܲܝ ܕܩܵܐ ܠܲܡܕܵܢ ܟܠܵܐ. 477 :ܒܹܗ ܒܲܫܚܵܩܵܐ ܪܡܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ 478 ܥܕܲܡܵܐ ܕܲܡܢܝܼܚ ܚܲܕ ܦܘܼܩܕܵܢܵܐ ܠܟܼܠܗܘܿܢ ܬܸܓܼܡܹ̈ܐ. 479 :ܥܝܪܹ̈ܐ ܘܐ̄ܢܵܫܵܐ ܩܵܥܹ̇ܝܢ ܐܲܟܲܚ̄ܕ ܒܪܸ̈ܥܝܵܢܲܝܗܘܿܢ 480 ܟܲܕ ܡܸܬܼܝܲܐܒܼܝܼܢ ܕܐܸܡܲܬܼܝ ܢܫܲܠܸܡ ܩܪܵܒܼܵܐ ܕܥܵܘ̣ܠܵܐ. 481 :ܟܸܐܢܹ̈ܐ ܘܢܲܟܼ̈ܦܹܐ ܛܥܝܼܢܝܼܢ ܝܲܬܿܝܼܪ ܝܘܼܩܪܹܗ ܕܚܲܫܵܐ 482 ܘܛܵܒܼ ܡ̣ܢ ܟܠܢܵܫ ܚܲܫܝܼܫܝܼܢ ܒܵܗ̇ ܒܒܲܝܼܫܘܼܬܼ ܒܝܼܫܵܐ. 483 :ܚܸܒܼ̈ܠܸܐ ܩܫܲܝ̈ܐ ܡܵܚܹ̇ܝܢ ܟܠܫܵܥ ܠܚܘܼܫܵܒܲܝ̈ܗܘܿܢ 484 ܘܐܲܝܟ ܝܵܠܸܕܬܵܐ ܡܣܲܟܹܿܝܢ ܠܥܘܼ̈ܠܹܐ ܕܚܵܝܑܬܼ ܡܝܼ̈ܬܹܐ. 485 :ܐܸܒܼܠܵܐ ܠܒܼܫܝܼܢ ܫܡܲܝܵܐ ܘܬܲ[...]ܥܵܐ ܘܟܼܠܡܵܐ ܕܲܒܼܗܘܿܢ 486 ܕܐܸܡܲܬܼܝ ܢܸܐܬܹܐ ܗܵܘ̇ ܚܘܼܕܵܬܵܐ ܕܠܵܐ ܡܸܫܬܲ ܚܠܲܦ. 487 :ܐܲܝܟ ܕܲܠܡܝܼܬܼܵܐ ܒܵܟܼܝܵܐ ܒܪܝܼܬܼܵܐ ܗ̤ܝ ܠܲܩܢܘܿܡܵܗ̇ 488 ܕܐܸܡܲܬܼܝ ܬܸܚܸܐ ܒܗܵܝ̇ ܚܲܝܘܼܬܼܵܐ ܕܠܵܐ ܡܸܬܼܚܲܒܿܠܵܐ. 489 :ܐܲܝܟ ܥܲܢܝܼܕܵܐ ܣܝܼܡ ܠܵܗ̇ ܚܲܫܵܗ̇ ܩܕܼܵܡ ܒܵܒܼܵܬܹ̈ܗ̇ 490 ܘܡܸܬܼܒܲܩܝܵܐ ܒܹܗ ܕܐܸܡܲܬܼܝ ܬܸܚܙܹܝܘܗܝ ܒܚܲܝܹ̈ܐ ܚܲܕ̈ܬܹܐ. pb. f.173v 491 :ܩܵܠ ܬܢܚ̈ܬܼܵܐ ܡܲܙܥܸܩ ܒܐܲܪܥܵܐ ܡ̣ܢ ܟܠ ܦܘܼ̈ܡܝܼܢ 492 :ܘܡܲܪܝܼܪܵܐܝܼܬܼ ܒܵܟܹ̇ܝܢ ܚܲܪ̈ܫܹܐ ܥܲܠ ܡܲܠܵܠܐ 493 :ܠܚܲܕ ܣܘܼܟܵܝܵܐ ܡܣܲܟܹܿܝܢ ܟܠܗܘܿܢ ܒܲܚܕܵܐ ܫܲܘܝܘܼ 494 ܥܕܲܡܵܐ ܕܢܵܚ̇ܝܼܢ ܒܵܠܡܹܐܝܢ ܚܘܼܒܹܗ ܠܵܐ ܡܸܬܿܬܿܢܝܼܚܢ. 495 :ܩܵܠ ܗܵܝ̇ ܩܲܪܢܵܐ ܕܵܒܼܫܘܼܠܵܡܵܐ ܪܓܼܝܼܓܼܝܼܢ ܠܲܡܨܵܬܼ 496 ܘܐܸܠܵܐ ܫܲܡܥܘܼܪ ܠܵܐ ܡܸܬܼܒܲܝܐܝܼܢ ܡ̣ܢ ܟܲܪܝܘܼܬܼܵܐ. 497 :ܡܸܫܡܲܥ ܒܲܠܚܘܿܕ ܫܡܲܠܘ ܕܲܥܬܼܝܼܕܵܐ ܕܬܸܩܪܸܬ ܒܚܲܪܬܼܵܐ 498 ܘܝܘܿܡ ܒܘܼܕܸܩܵܗ̇ ܟܣܸܐ ܘܲܡܣܲܬܲܪ ܡ̣ܢ ܟܠ ܒܸܪ̈ܝܵܢ. 499 :ܚܲܕܘ ܒܲܠܚܘܿܕ ܝܵܕܲܥ ܝܵܘܡܵܐ ܕܡܸܫܬܲܡܥܵܐ ܒܹܗ 500 ܗܵܘ̇ ܕܲܟܼܣܸܐ ܒܹܗ ܨܲܒܼܝܵܢ ܟܲܣܝܵܐ ܕܲܓܼܠܸܐ ܠܹܗ ܟܠ. 501 :ܗܘ̤ ܥܲܡ ܟܲܣܝܵܐ ܝܵܕܲܥ ܝܵܘܡܵܐ ܕܝܘܿܡ ܓܸܠܝܵܢܵܗ̇ 502 ܘܐܲܡܲܬܼܝ ܕܨܵܒܹ̇ܐ ܓܵܠܹ̇ܐ ܚܲܝܠܹܗ ܘܲܡܚܵܘܸܐ ܠܹܗ. 503 :ܠܡܸܢܝܵܢ ܚܲܝܹ̈ܐ ܕܥܘܼܡܪܵܐ ܕܙܲܒܢܵܐ ܡܩܵܘܸܐ ܪܸܡܙܹܗ 504 ܥܕܲܡܵܐ ܕܫܵܠܹ̇ܡ ܘܐܟ̇ܢ ܓܵܡ̇ܪ ܫܘܼܘܕܵܝ ܡܸܠܵܘ̈ܗܝ. 505 :ܡ̣ܢ ܫܹܠܝ ܕܵܢܲܚ̇ ܒܲܕ ܡܘܼܬܼ ܩܲܪܩܵܐ ܥܲܠ ܥܵܡܲܪܬܵܐ 506 ܘܲܡܟܲܣܸܐ ܠܹܗ ܠܪܵܘܡܵܐ ܘܥܘܡܩܵܐ ܒܢܘܼܗܪܵܐ ܕܡܸܠܵܘ̈ܗܝ. 507 :ܢܘܼܗܪܵܐ ܪܲܒܵܐ ܕܠܵܐ ܡܸܬܼܡܲܠܲܠ ܡܲܒܼܪܸܩ ܡܸܢܹܗ 508 ܘܗܵܘܹ̇ܐ ܢܘܼܗܪܵܐ ܐܲܝܟ ܠܵܐ ܢܘܼܗܪܵܐ ܒܦܸܚܡܵܐ ܕܢܘܼܗܪܹܗ. 509 :ܪܡܝܼܢܵܐ ܦܵܬܲܚ ܒܝܲܕ ܡܲܚܲܬܬܹܗ ܘܐܟܿܢ ܢܵܚܹ̇ܬܼ 510 ܘܚܲܝ̈ܠܲܝ ܪܵܘܡܵܐ ܡܙܲܡܸܢ ܩܵܪܹܐ ܕܲܢܙܲܚܝܘܼܢܵܝܗܝ. 511 :ܟܠܗܘܿܢ ܐܲܟܼܚ̄ܕܵܐ ܟܵܢ̇ܫܝܼܢ ܨܹܐܕܵܘܗܝ ܡ̣ܢ ܟܠ ܕܘܼܟܵܐ 512 ܘܲܡܙܲܚܝܼܢ ܠܹܗ ܒܚܘܼܒܵܐ ܕܲܦܐܹܐ ܠܪܲܒܿܘܼܬܼ ܕܲܪܓܹܗ. 513 :ܐܸܠܹܦ ܐܲܠܦܝܼ̈ܢ ܩܵܥܹ̇̄ܝܢ ܫܘܼܒܼܚܹܗ ܕܠܵܐ ܣܲܒܼܥܘܼܬܼܵܐ 514 ܘܪܸ̈ܒܿܘܼ ܪܸ̈ܒܿܘܿܢ ܬܵܢܹ̇ܝܢ ܫܘܼܒܼܚܹܗ ܕܠܵܐ ܩܘܼܛܵܥܵܐ. 515 ܫܘܼܒܼܚܵܐ ܘܩܘܼܕܫܵܐ ܛܥܝܼܢܝܼܢ ܟܠܗܘܿܢ ܒܙܘ̈ܵܥܹܐ ܕܲܒܼܘܗܘܿܢ: pb. f.174r 516 ܘܲܡܩܲܪ ܒܼܝܼܢ ܠܹܗ ܟܠܝܼܠ ܙܵܟܼܘܼܬܼܵܐ ܕܦܵܐܝܵܐ ܠܲܫܡܹܗ. 517 :ܒܪܝܼܟ ܙܲܟܵܝܵܐ ܩܵܥܹ̇ܝܢ ܟܠܗܘܿܢ ܬܸܓܼܡܹ̈ܐ ܠܬܓܼܡܹ̈ܐ 518 ܘܲܡܙܲܝܼܥܝܼܢ ܠܵܗ̇ ܠܐܲܪܥܵܐ ܒܩܵܠܵܐ ܕܩܘܼܕܵܫܲܝ̈ܗܘܿܢ. 519 :ܫܒܼܝܼܚ ܡܲܚܸܐ ܟܠ ܩܵܥܹ̇ܝܢ ܣܸܕܪܹ̈ܐ ܕܛܘܼܟܵܝ̈ܗܘܿܢ 520 ܘܲܡܒܲܠܗܝܼܢ ܠܹܗ ܠܥܵܠܡܵܐ ܒܬܲܗܪܵܐ ܕܦܸܬܼܓܼܵܡܲܝ̈ܗܘܿܢ. 521 :ܬܲܗܪܵܐ ܪܲܒܵܐ ܡܲܠܝܵܐ ܩܥܵܬܼܵܐ ܕܫܝܼܦܘܿܪ̈ܝܗܘܿܢ 522 :ܘܠܵܐ ܡܨܸܐ ܦܘܼܡܵܐ ܠܲܡܬܼܵܢܵܝܘܼ ܥܲܠ ܩܲܫܝܼܘܼܬܼܵܗ̇. ܕ̄ 523 :ܕܚܝܼܠܵܐ ܣܲܓܿܝܼ ܚܙܵܬܼܵܐ ܕܐܲܦܹ̈ܐ ܕܡܸܬܼܚܵܘܹܝܬ ܒܵܗ̇ 524 ܘܲܒܼܨܝܼܪ ܢܘܼܗܪܵܐ ܕܥܲܝܢܲܝ̈ ܒܸܣܪܵܐ ܕܢܸܬܼܒܲܩܸܐ ܒܲܗ̇. 525 :ܒܲܪ̈ܩܹܐ ܕܢܘܼܗܪܵܐ ܢܵܦ̇ܩܝܼܢ ܡܸܢܗܘܿܢ ܕܢܘܼܪ̈ܢܵܝܹܐ 526 ܘܫܵܓ̇[ܓܼܵ]ܐ ܚܙܵܬܹܐ ܠܲܡܚܵܪ ܠܥܘܼܙܵܐ ܕܦܲܪ̈ ܨܘܼܦܲܝܗܘܿܢ. 527 :ܩܸܢܛܵܐ ܘܚܘܼܒܵܐ ܡܲܠܝܵܐ ܚܙܵܬܼܗܘܿܢ ܘܩܵܠ ܡܸܠܲܬܗܘܿܢ 528 ܩܸܢܛܵܐ ܠܒܼܝܼ̈ܫܹܐ ܘܛܘܒܼܵܐ ܠܛܵܒܹ̈ܐ ܛܘܼܒܼ ܠܲܕ ܡܲܚܸܒܼ. 529 :ܛܘܼܒܹ̈ܐ ܘܢܸܓܼ̈ܕܸܐ [...]ܝܢ ܒܐܸܣܟܹܿܡܵܐ ܕܡܸܬܼܚܵܘܹܝܢ ܒܹܗ 530 ܛܘܼܒܹ̈ܐ ܠܟܹܐܢܹ̈ܐ ܘܢܸ̈ܓܼܕܹܐ ܠܕܲܐܣܟܸܿܠܘ ܘܵܝ ܠܲܕܠܵܐ ܬܵܒܼܘ. 531 :ܣܒܲܪܬܼܵܐ ܛܵܒܼܬܼܵܐ ܕܚܘܼܕܵܬܼ ܟ̱ܠܵܐ ܙܵܪܥܝܼܢ ܒܐܲܪܥܵܐ 532 ܘܐܲܝܟ ܕܲܠܙܲܪ̈ܥܹܐ ܡܟܲܢܫܝܼܢ ܦܲܓܼܪܹ̈ܐ ܠܐܸܕܪܵܐ ܕܚܲܝܹ̈ܐ. 533 :ܩܕܼܵܡ ܦܲܪܨܘܿܦܵܐ ܕܚܲܕ ܩܲܪܨܘܿܦܵܐ ܟܵܢ̇ܫܝܼܢ ܩܵܝ̇ܡܝܼܢ 534 ܘܲܡܣܲܟܹܿܝܢ ܠܹܗ ܕܢܸܣܥܘܿܪ ܚܲܝܠܹܗ ܒܫܘܼܠܛܵܢܲܝ̈ܗܘܿܢ. 535 :ܬܚܹܝܬܼ ܫܘܼܠܛܵܢܹܗ ܟܕܝܼܢܝܼܢ ܟܠܗܘܿܢ ܐܲܝܟ ܕܲܒܼܢܝܼܪܵܐ 536 ܘܗܲܢܝܼܵܐܐ ܠܗܘܿܢ ܛܥܲܡܬܼܵܐ ܕܲܫܡܹܗ ܡ̣ܢ ܟܠ ܦܘܼܡܝܼ̈ܢ. 537 :ܥܲܠ ܡܲܪ ܟܲܒܼܬܼܵܐ ܕܪܘܼܚܵܐ ܝܵܬܸ̇ܒܼ ܡܲܠܟܵܐ ܕܡܲܠܟܹ̈ܐ 538 ܘܲܟܼܕܝܼܢܝܼܢ ܒܵܗ̇ ܐܲܠ̈ܦܸܐ ܕܪܘܼܚܵܐ ܕܠܵܐ ܡܸܢܝܵܢܵܐ. 539 :ܚܲܬܿ ܡܸܢܝܵܢܵܐ ܠܚܲܝ̈ܠܘܵܬܼܵܐ ܕܲܡܙܲܚܝܼܢ ܠܹܗ 540 ܘܠܵܐ ܫ[...]ܡܵܐ ܠܩܵܠ ܩܘܼܕܵܫܵܐ ܕܲܡ̣ܩܲܕ ܫܵܢܵܘ̈ܗܝ. pb. f.174v 541 :ܒܗܸܕܪܵܐ ܪܲܒܵܐ ܡܚܵܘܸܐ ܢܲܦܫܹܗ ܠܥܹܝܢ ܟܠ ܒܸܪ̈ܝܵܢ 542 ܘܲܒܼܬܸܫܒܿܘܿܚܬܹܗ ܡܫܲܒܿܚܝܼܢ ܐ̄ܢܵܫܵܐ ܘܲܫܡܲܝܵܢܹ̈ܐ. 543 ܢܝܼܫܵܐ ܕܚܲܫܹܗ ܘܲܕ ܙܵܟܼܘܼܬܹܗ ܐܵܬܹ̇ܐ ܩܕܼܵܡܵܘܗܝ. 544 ܘܬܹܵܗܪܵܐ ܒܪܝܼܬܼܵܐ ܒܓܲܒܼܪܵܐ ܙܩܝܼܦܵܐ ܟܡܵܐ ܐܸܬܼܪܲܡܪܲܡ. 545 :ܒܗܵܘ̇ ܥܸܕܵܢܵܐ ܒܵܗ̇ܬܝܼܢ ܫܹ̈ܐܕܹܐ ܥܲܡ ܙܵܩ̈ܘܿܦܹܐ 546 ܕܚܵܙܹ̇ܝܢ ܢܝܼܫܵܐ ܕܲܒܲܙܚܘ ܗ̄ܘ̣ܵܘ ܒܹܗ ܟܲܕ ܡܸܙܕܲܝܲܚ. 547 :ܒܬܲܗܪܵܐ ܪܲܒܵܐ ܩܵܝ̇ܡܝܼܢ ܕܲܝ̈ܘܹܐ ܘܲܝܗܘܼ̈ܕܵܝܹܐ 548 ܟܲܕ ܡܸܬܼܒܲܩܹܝܢ ܒܓܲܒܼܪܵܐ ܕܲܙܒܲܦܘ ܕܐܲܡܠܸܟ ܥܲܠ ܟܠ. 549 :ܓܘܼܢܚܵܐ ܓܢܝܼܚܵܐ ܢܵܦܹ̇ܠ ܡ̣ܢ ܫܹܠܝ ܥܲܠ ܣܵܛܵܢܵܐ 550 ܕܲܫܡܵܐ ܕܨܲܚܝܼ ܩܵܥܹ̇ܝܢ ܫܘܼܒܚܹܗ ܫܡܲܝܵܐ ܘܐܲܪܥܵܐ. 551 :ܐܸܒܼܠܵܐ ܗ̄ܘ̣ ܩܲܫܝܵܐ ܕܠܵܐ ܒܘܼܝܵܐܵܐ ܠܒܲܪ ܐܲܒܼܕܵܢܵܐ 552 ܕܐܵܒܹ̇ܕ ܟܠܹܗ ܠܥܹܝܢ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ. 553 :ܩܵܠܵܐ ܕܚܝܼܠܵܐ ܡܲܫܡܲܥ ܨܹܐܕܵܘܗܝ ܫܡܵܐ ܕܲܟܼܦܲܪ ܒܹܗ 554 ܘܲܡܟܲܦܲܪ ܠܹܗ ܡ̣ܢ ܚܲܝܘܼܬܼܵܐ ܒܢܲܦܫܹܗ ܘܦܲܓܼܪܹܗ. 555 :ܟܠܗ ܒܟܼܠܹܗ ܐܒܹܕ ܥܲܛܠܵܐ ܕܐܵܘܒܸܿܕ ܗܘ̤ ܠܹܗ 556 :ܘܠܵܐ ܦܵܐܹ̇ܫ ܒܹܗ ܣܪܝܼܕܼܵܐ ܒܝܼܚܹ̈ܐ ܠܵܐ ܡܵܝ̈ܘܬܹܐ 557 :ܚܕܵܐ ܒܲܪܬܼ [ܩܐܐ] ܡܲܙܥܸܩ ܨܹܐܕܵܘܗܝ ܡܫܝܼܚܵܐ ܡܲܠܟܵܐ 558 ܘܛܵ[ܠܸ]ܛ ܟܠܹܗ ܘܒܼܿܗܹ̇ܬܼ ܚܘܬܼܪܵܐ ܕܪܵܒܹܿܗ ܢܟܼܝܼܠܵܐ. 559 :ܚܕܲܬܵܐ ܚܵܙܹ̇ܝܢ ܥܝܼܪܹ̈ܐ ܘܐ̄ܢܵܫܵܐ ܒܝܘܿܡ ܐܲܒܼܕܵܢܹܗ 560 ܘܬܵܗ̇ܪܝܼܢ ܣܲܓܿܝܼ ܒܚܹܝܠ ܥܵܒܼܘܿܕܵܐ ܕܚܹܝܠ ܟܠ ܡܸܫܟܲܚ. 561 :ܚܕܲܬܵܐ ܡܚܵܘܸܐ ܡܵܪܐ ܠܥܲܒܼܕܵܘ̈ܗܝ ܒܲܥܒܼܵܕ ܐܝܼܕܵܘ̈ܗܝ 562 ܘܟܲܕ ܡܸܕܸܡ ܗ̄ܘ̣ ܡܨܸܐ ܥܵܒܹ̇ܕ ܠܹܗ ܐܲܝܟ ܠܵܐ ܡܸܕܹܡ. 563 :ܡ̣ܢ ܠܵܐ ܡܸܕܸܡ ܒ̣ܪܵܐ ܟܠ ܡܸܕܸܡ ܐܲܝܟ ܕܲܫܦܲܪ ܠܹܗ 564 ܘܲܕ ܫܵܦܲ̇݁ܪ ܠܹܗ ܡܲܗܦܸܟ ܡܸܕܸܡ ܠܘܵܬܼ ܠܵܐ ܡܸܕܸܡ. 565 ܫܲܦܝܼܪ ܐܲܝܬܿܝܼ ܟܠ ܠܲܗܘܝܵܐ ܡ̣ܢ ܠܵܐ ܡܸܕܸܡ: pb. f.175r 566 ܘܫܲܦܝܼܪ ܡܵܘܒܸܿܕ ܠܒܲܪ ܐܲܒܼܪܵܢܵܐ ܕܠܵܐ ܚܵܘܣܵܢܵܐ. 567 :ܠܲܡܠܝܼܠܘܼܬܼܵܐ ܡܚܲܟܸܿܡ ܛܵܒܼܵܐ ܒܝܲܕ ܐܲܒܼܕܵܢܹܗ 568 ܕܙܵܕܸ̇ܩ ܗ̄ܘ̣ܵܐ ܠܵܗ̇ ܕܬܸܛܲܪ ܛܲܟܼܣܵܐ ܕܒܼܵܪܘܿܝܼܬܹܗ. 569 :ܠܒܲܪ ܡ̣ܢ ܛܲܟܼܣܵܐ ܕܒܼܵܪܘܝܘܼܬܼܵܐ ܢܦܲܩ̣ ܚܲܪܡܵܢܵܐ 570 ܥܲܠ ܗܵܕ ܡܵܘܒܸܕ ܘܲܡܛܲܠܸܩ ܠܹܗ ܡ̣ܢ ܚܲܝܘܼܬܼܵܐ. 571 :ܐܸܒܼܠܵܐ ܥܦܝܼܦܵܐ ܣܵܓܹ̇ܐ ܠܪܲܒܹܿܗ ܒܝܲܕ ܐܲܒܼܕܵܢܹܗ 572 ܘܢܸܓܼܕܵܐ ܩܲܫܝܵܐ ܡܸܬܿܬܵܘܣܲܦ ܠܹܗ ܒܛܘܼܠܵܩ ܚܲܝܵܘ̈ܗܝ. 573 :ܡܢܚ ܗ̄ܘ̣ܵܐ ܐܵܦ ܗܘ̤ ܕܢܹܐܒܲܕ ܠܲܓܼܡܲܪ ܥܲܡ ܬܲܠܡܝܼܕܹܗ 574 ܘܠܵܐ ܕܢܸܫܬܲܢܲܫ ܥܲܙܝܼܙܵܐܝܼܬܼ ܕܠܵܐ ܫܘܼܠܵܡܵܐ. 575 :ܚܲܟܿܝܼܡܵܐܝܼܬܼ ܣܵܥܲ݁ܪ ܨܹܐܕܵܘܗܝ ܪܸܡܙܵܐ ܕܲܒܼܪܵܝܗܝ 576 ܘܠܵܐ ܐ̄ܢܵܫ ܝܵܕܲܥ ܕܢܹܐܡܲܪ ܕܲܟܼܡܵܐ ܗ̄ܝ̣ ܪܸܚܡܲܬܼ ܚܘܼܒܹܿܗ. 577 :ܚܘܼܒܵܐ ܪܲܒܵܐ ܡܠܸܐ ܣܘܼܥܪܵܢܵܐ ܕܣܵܥܲ݁ܪ ܬܲܡ̇ܢ 578 ܕܠܵܐ ܡܵܘܩܸܕ ܠܹܗ ܠܓܲܒܵܐ ܕܒܼܝܼ̈ܫܹܐ ܐܲܝܟ ܕܲܠܗܵܘ̇ ܚܲܕ. 579 :ܒܚܲܕ ܕܲܡܚܲܒܸܿܠ ܡܚܵܘܸܐ ܕܟܹܐܢܵܐ ܗ̄ܘ̣ ܐܵܦ ܪܲܚܡܵܢܵܐ ܗ̄ܘ̣ 580 ܕܐܲܝܟ ܕܐܸܘܒܸܿܕ ܚܲܕ ܡܨܸܐ ܗ̄ܘ̣ܵܐ ܕܢܵܘܒܸܿܕ ܐܵܦ ܣܲܓܿܝܼ̈ܐܐ. 581 :ܠܵܘ ܠܐܲܒܼܕܵܢܵܐ ܪܓܼܝܼܓܼ ܠܐܲܒܼܕܵܢܹܗ ܕܒܲܪ ܐܲܒܼܕܵܢܵܐ 582 ܐܸܠܵܐ ܕܢܸܓܼܠܸܐ ܥܲܠ ܟܹܐܢܘܼܬܹܗ ܘܒܲܣܝܡܘܼܬܹܗ. 583 :ܠܬܲܪܬܹܿܝܢ ܡܵܘܕܲܥ ܠܲܬܼܪܹܝܢ ܓܲܒܹ̈ܐ ܕܛܵܒܹ̈ܐ ܘܒܼܝܼ̈ܫܹܐ 584 ܕܟܲܕ ܛܵܒܼ ܛܵܒܼܵܐ ܗ̄ܘ̣ ܚܠܝܼܛܵܐ ܒܛܲܒܼܬܹܗ ܐܵܦ ܟܹܐܢܘܼܬܼܵܐ. 585 :ܠܛܵܒܼ ܡܸܣܬܼܥܪܵܐ ܟܠ ܡܲܪܕܘܼܬܼܵܐ ܕܡ̣ܢ ܝܼܕܲܥܬܹܗ 586 ܘܝܵܕܥܲܝ̈ ܚܘܼܒܹܗ ܝܵܕܥܝܼܢ ܒܲܠܚܘܿܕ ܕܲܢܩܲܠܣܘܼܢܵܝܗܝ. 587 :ܫܲܦܝܼܪ ܪܵܕܸܐ ܠܣܵܢܝܲܝ̈ ܥܘܼܬܼܪܵܐ ܕܒܲܣܝܼܡܘܼܬܹܗ 588 ܘܫܲܦܝܼܪ ܩܵܢܹ̇ܐ ܠܢܵܛܪ̈ܝ ܐ̄ܪܵܙܵܐ ܕܗܲܝܡܵܢܘܼܬܹܗ. 589 :[...]ܕܝܼܢܵܐ ܟܹܐܢܵܐ ܒܵܚܲ݁ܪ ܥܵܘ̣ܠܵܐ ܘܙܲܕܝܼܩܘܼܬܼܵܐ 590 ܘܲܩܕܵܡ ܪܸܡܙܹܗ ܡܩܝܼܡ ܠܲܡ̈ܠܝܼܠܹܐ ܒܣܘܼܥܪ̈ܢܲܝܗܘܿܢ. pb. f.175v 591 :ܠܟܼܘܪ ܒܘܼܚܪܵܢܵܐ ܡܲܥܸܠ ܟܠ̱ܵܐ ܒܝܲܕ ܚܲܕ ܓܲܒܪܵܐ 592 ܘܝܵܗܹ̇ܒܼ ܒܐܝܼܕܵܘ̈ܗܝ ܛܘܼܒܼܵܐ ܠܛܵܒܹ̈ܐ ܘܢܸܓܼܪܵܐ ܠܒܼܝܼ̈ܫܹܐ. 593 :ܠܗܵܕܹܐ ܦܲܪܫܹܗ ܡ̣ܢ ܫܘܼܪܵܝܵܐ ܕܲܓܼܒܼܝܼܠܘܼܬܹܗ 594 ܕܲܢܦܲܪܸ̈ܫ ܒܹܗ ܬܸܓܼܡܹ̈ܐ ܕܟܹܐܢܹ̈ܐ ܘܲܕܥܵܘ̈ܠܹܐ. 595 :ܠܗܵܕܹܐ ܣܵܡܹܗ ܡ̣ܢ ܟܲܕ ܨܵܪܹܗ ܕܠܵܐ ܙܘܘܵܓܼܵܐ 596 ܕܲܢܚܲܕܼܬܼ ܒܹܗ ܒܪܝܼܬܼܵܐ ܕܥܸܬܼܩܲܬ̤ ܒܡܝܘܿܬܼܘܼܵܬܼܵܐ. 597 :ܠܟܼܠܵܗ̇ ܒܪܝܼܬܼܵܐ ܡܚܲܕܸܬܼ ܪܸܡܙܹܗ ܒܡܸܨܥܵܝܘܼܬܹܗ 598 ܘܲܡܚܲܟܸܿܡ ܠܵܗ̇ ܕܬܸܕܲܥ ܗ̤ܝ ܠܵܗ̇ ܘܲܠܥܒܼܘܿܕܵܗ̇. 599 :ܒܲܕ ܡܘܼܬܼ ܐܲܡܬܼܵܐ ܡܩܝܼܡ ܠܵܗ̇ ܩܕܼܵܡܵܘܗܝ ܒܝܘܿܡ ܓܸܠܝܵܢܹܗ 600 ܘܲܡܙܲܚܝܵܐ ܠܹܗ ܒܩܵܠ ܬܸܫܒܿܘܿܚܬܵܐ ܕܠܵܐ ܡܬܿܕܲܪܟܵܐ. 601 :ܥܵܠܡܵܐ ܟܠܹܗ ܥܲܡ ܥܵܡܘܪ̈ܘܗܝ ܡܲܦܸܩ ܠܐ̄ܘܪܥܹܗ 602 ܕܢܸܓܼܕܘܿܠ ܠܲܫܡܹܗ ܟܠܝܼܠ ܩܘܼܠ̈ܣܹܐ ܕܲܦܐܹܝܢ ܠܲܫܡܹܗ. 603 :ܫܡܵܐ ܩܲܕܝܼܫܵܐ ܕܝܲܠܕܵܐ ܕܡܸܢܹܗ ܟܣܸܐ ܒܲܚܙܵܬܹܗ 604 ܘܒܹܗ ܡܸܬܼܩܲܕܲܫ ܡ̣ܢ ܪ̈ܘܼܚܵܢܐ ܘܡ̣ܢ ܦܲܓܼܪ̈ܢܹܐ. 605 :ܫܒܼܚܼܝ ܓܸܠܝܵܢܹܗ ܘܠܵܐ ܡܸܬܼܡܲܠܠܵܐ ܚܙܵܬܼܵܐ ܕܦܲܓܸܪܹܗ 606 ܘܲܙܥܘܿܪ ܦܘܼܡܵܐ ܕܩܵܢܝܲܝ̈ ܡܸܠܬܐ ܕܢܹܐܡܲܪ ܕܲܟܼܡܲܐ ܗ̄ܝ̣. 607 :ܐܲܠ̈ܦܸܐ ܕܥܝܼܪܹ̈ܐ ܘܲܕܡܲܠܲܐܟܹ̈ܐ ܛܥܝܼܢܝܼܢ ܢܝܼܫܹܗ 608 ܘܲܡܙܲܚܝܼܢ ܠܹܗ ܘܡܸܙܕܲܚܝܼܢ ܒܹܗ ܐܲܝܟ ܡܵܐ ܕܫܵܘܹ̇ܝܢ. 609 :ܒܐܲܦܲܝ̈ ܪܵܘܡܵܐ ܡܛܲܝܒܼܝܼܢ ܩܵܝ̇ܡܝܼܢ ܟܲܕ ܡܸܬܹܚܵܘܹܐ 610 ܘܲܡܩܲܒܿܠܝܼܢ ܠܹܗ ܒܩܵܠܹܵ̇ܐ ܕܟܲܝ̈ܐ ܕܩܘܼܕܵܫܲܝ̈ܗܘܿܢ. 611 :ܒܲܕܡܘܼ[...]ܡܫܵܐ ܡܕܝܼܩ ܡ̣ܢ ܪܵܘܡܵܐ ܠܐܲܦܲܝ̈ ܐܲܪܥܵܐ 612 :ܘܢܵܗܲ݁ܪ ܥܵܠܡܵܐ ܡ̣ܢ ܙܲܠܝܼܩܹ̈ܐ ܕܪܲܒܿܘܼܬܼ ܢܘܼܗܪܹܗ 613 :ܥܵܪܹܩ ܫܸܡܫܵܐ ܘܛܲܫܹ̇ܐ ܣܲܗܪܵܐ ܐܵܦ ܙܲܠܲܝܩܵܘ̈ܗܝ 614 ܘܒܼܵܛܹ̇ܠ ܪܲܗܛܵܐ ܕܟܼܵܘܟܲܒܼ ܢܘܼܓܼܗܵܐ ܘܕܲܟܼܢܵܘ̈ܬܹܗ. 615 ܫܵܠܹ̇ܐ ܐܵܐܲܪ ܡ̣ܢ ܡܲܪܕܝܼܬܼܵܐ ܕܩܲܠܝܼܠܘܼܬܹܗ: pb. f.176r 616 ܘܢܵܐܲܚ ܝܲܡܵܐ ܬܲܟܼܬܘܼܫܵܐ ܫܓܼܝܼܫܵܐ ܕܓܲܠܠܵܘ̈ܗܝ. 617 :ܗܵܦ̇ܟܿܝܼܢ ܚܲܪ̈ܫܹܐ ܠܘܵܬܼ ܗܵܘ̇ ܡܸܕܹܗ ܕܲܗܘ̤ܵܘ ܡܸܢܹܗ 618 ܘܗܵܘܹ̇ܐ ܥܵܠܡܵܐ ܐܲܝܟ ܗܵܘ̇ ܕܲܗܘ̤ܵܐ ܒܪܵܫܝܼܬܼ ܕܲܗܘ̤ܵܐ. 619 :ܟܝܵܢ ܡܲܠ̈ܠܹܐ ܡܩܵܘܹܐ ܒܲܠܚܘܿܕ ܘܠܵܐ ܡܸܬܼܚܲܒܲܠ 620 ܘܗܘ̤ ܒܲܠܚܘܿܕܵܘܗܝ ܥܵܐ̇ܐ ܠܟܼܘܼܪܵܐ ܕܒܘܼܚܪܵܢ ܝܲܨܪܹܗ. 621 :ܠܒܼܠܼܐ ܚܪܵܢ ܟ̱ܠܵܐ ܐܵܬܹ̇ܐ ܒܚܲܪܬܼܵܐ ܕܵܐܹ̇ܢ ܟܠܵܐ 622 ܘܩܵܥܹ̇ܐ ܒܐܲܪܥܵܐ ܚܕܼܵܐ ܒܲܪܬܼ ܩܵܐܐ ܕܡܲܠܝܵܐܬܲܗܘܵܐ. 623 :ܒܐܲܪ̈ܒܲܥܦܸܢܝܵܢ ܪܵܗܹ̇ܛ ܩܵܠܹܗ ܐܲܝܟ ܐܝܼܙܓܲܕܵܐ 624 ܘܢܵܕܵܐ ܒܪܝܼܬܼܵܐ ܐܲܝܟ ܡ̣ܢ ܫܢܬܼܵܐ ܕܝܲܩܝܼܪܘܼܬܼܵܐ. 625 :ܚܹܝܠ ܚܲܝܘܼܬܼܵܐ ܙܵܪܲܥ ܒܐܪܥܵܐ ܒܡܸܠܲܬܼ ܦܘܼܡܹܗ 626 ܘܪܵܦܹܬܼ ܥܲܦܪܵܐ ܘܩܵܢܹ̇ܐ ܪܸ̈ܓܼܫܹܐ ܪ̈ܲܓܼܘܼܫܬܼܵܢܹܗ. 627 :ܐܲܝܟ ܙܲܪ̈ܥܘܿܢܹܐ ܝܵܥܹ̇ܝܢ ܦܲܓܼܪܹ̈ܐ ܡ̣ܢ ܕܲܚܝܼܚܵܐ 628 ܘܢܵܗ̇ܪܵܐ ܚܙܵܬܼܵܐ ܕܪܸ̈ܥܝܵܢܲܝܗܘܿܢ ܛܵܒܼ ܡ̣ܢ ܫܸܡܫܵܐ. 629 :ܟܠܹܗ ܦܲܓܼܪܵܐ ܦܲܢܹ̇ܐ ܠܚܲܝܹ̈ܐ ܠܵܐ ܡܵܝ̈ܘܿܬܹܗ 630 ܘܠܵܐ ܛܵܥܝܵܐ ܒܹܗ ܐܵܦܠܵܐ ܡܢܵܬܼܵܐ ܙܥܘܿܪܬܼܵܐ ܕܣܲܥܪܵܐ. 631 :ܟܠܹܗ ܒܟܼܠܹܗ ܩܵܐܹ̇ܡ ܐܲܟܲܚ̄ܕ ܟܠ ܟܵܪ ܕܲܢܦ̣ܠ 632 ܘܠܵܐ ܦܵܐܹ̇ܫ ܒܵܗ̇ ܒܐܲܪܥܵܐ ܡ̣ܢܹܗ ܐܵܦܠܵܐ ܛܲܪܦܵܐ. 633 ܪܸܡܙܵܐ ܕܓܲܒܼܠܹܗ ܡܒܥܪ ܡܸܕܪܹܡ ܡ̣ܢ ܓܵܘ ܡܸܕܪܵܐ܆ 634 ܘܲܡܪܲܟܸܿܒܼ ܠܹܗ ܐܘܼܡܵܢܵܐܝܬܼ ܕܠܵܐ ܬܘܼܒܼ ܢܹܐܒܲܕ. 635 :ܕܝܼܢܵܐ ܐܵܡܲ݁ܪ ܥܲܡ ܣܵܛܵܢܵܐ ܘܡܵܘܬܵܐ ܚܠܵܦܵܘܗܝ 636 ܘܬܼܵܒܲܥ ܡܸܢܗܘܿܢ ܥܝܵܪܬܵܐ ܕܨܲܥܪܹܗ ܘܲܕܫܘܼܠܛܵܢܹܗ. 637 :ܒܒܹܝܬܼ ܐܲܣܝܼܪܹ̈ܐ ܕܚ̣ܫܘܵܐ ܡܲܪܡܹܐ ܠܫܹ̈ܐܕܹܐ ܕܕܵܪܫܘܼܗܝ 638 ܘܲܒܼܫܸܫ̈ܠܵܬܼܵܐ ܕܫܲܠܗܹܒܼܝܼܬܼܵܐ ܡܦܲܟܲܪ ܕܲܝ̈ܘܹܐ. 639 :ܒܣܵܢܐܘ̈ܗܝ ܐܣܲ݁ܪ ܘܡܲܪܡܸܐ ܒܦܘܼܡܗܘܿܢ ܩܹܐܡܵܐ ܕܫܸܬܼܩܵܐ 640 ܘܠܹܗ ܫܵܪܹܐ ܠܹܗ ܡ̣ܢ ܫܸܢ̈ܠܵܬܼܵܐ ܕܡܵܝܘܿܬܼܘܼܬܼܵܐ. pb. f.176v 641 ܒܡܲܝ̈ܐ ܕܪ̈ܲܚܡܹܐ ܡܫܝܼܓܼ ܨܵܐܘܼܬܼܵܐ ܕܥܲܠ ܗܲܕܵܡܵܘ̈ܗܝ. 642 ܘܲܡܨܲܒܸܿܬܼ ܠܹܗ ܒܢܲܚܬܵܐ ܕܫܘܼܒܼܚܵܐ ܕܠܵܐ ܡܸܬܼܚܲܒܲܠ. 643 :ܚܒܼܵܠܵܐ ܘܡܵܘܬܵܐ ܡܵܪܹܩ ܡܸܢܹܗ ܕܡܸܬܼ ܚܲܒܿܠܵܢܵܐ 644 ܘܲܚܠܵܦ ܦܲܓܼܪܵܐ ܡܲܦܪܲܚ ܦܲܓܸܪܹܗ ܠܪܵܘܡܵܐ ܕܲܠܥܸܠ. 645 :ܒܝܲܩܝܼܪܘܼܬܹܗ ܬܵܗ̇ܪܝܼܢ ܟܸܢ̈ܫܹܐ ܪ̈ܘܼܚܵܢܝܵܢܹܐ 646 ܕܐܲܝܟܢ ܦܵܪܲܚ ܟܝܵܢܵܐ ܥܲܒܼܝܵܐ ܕܠܵܐ ܒܲܥܥܝܵܕܼܵܐ. 647 :ܐܵܦ ܗܘ̤ ܩܢܘܿܡܹܗ ܒܹܗ ܡܸܬܿܕܲܡܲܪ ܕܠܵܐ ܣܲܒܼܥܘܼܬܼܵܐ 648 ܕܒܲܐܝܢܵܐ ܚܲܝܠܵܐ ܩܢܵܬ̤ ܪܲܦܝܘܼܬܹܗ ܦܵܪܘܿܚܘܼܬܼܵܐ. 649 :ܘܲܟܼܒܲܪ ܐܵܡܲ݁ܪ ܟܝܵܢ ܡܵܝ̈ܘܿܬܹܐ ܗܘ̤ ܠܲܟܝܢܹܗ 650 ܕܐ̄ܢܵܐ ܐ̄ܢܵܐ ܟܝܵܢܵܐ ܐܵܘ ܕܲܠܡܵܐ ܟܵܝ ܐ̄ܚܪܹܝܢ ܗ̄ܘ̣ ܚܘܼܠܦ. 651 :ܐܸܠܘܼ ܡܲܨܝܵܐ ܕܪܵܢܹ̇ܐ ܗܵܕܹܐ ܟܒܲܪ ܪ̈ܵܢܹܐ ܗ̄ܘ̣ܵܐ 652 ܐܸܠܵܐ ܠܵܐ ܡܨܹܐ ܕܡܸܬܼܥܲܩܪܵܐ ܠܵܗ̇ ܠܵܐ ܝܼܕܲܥܬܼܵܐ. 653 :ܗܵܘ̇ ܕܲܡܢܲܚܸܡ ܠܡܵܝܘܿܬܹ[...]ܬܹܗ ܡ̣ܢ ܕܲܚܝܼܚܵܐ 654 ܗܘ̤ ܡܚܲܝܸܠ ܠܹܗ ܕܠܵܐ ܢܸܬܼܦܲܠܲܓܼ ܥܲܠ ܫܘܼܚܠܵܦܹܗ. 655 :ܥܲܡ ܚܘܼܕܵܬܹܗ ܩܵܢܹ̇ܐ ܚܲܝܠܵܐ ܕܚܲܣܝܼܢ ܡ̣ܢ ܟܠ 656 ܘܠܵܐ ܡܨܸܝܢ ܚܲܫܹ̈ܐ ܠܡܸܫܬܲ ܠܵܛܘܼ ܥܲܠ ܚܘܼܫܲܒܼܵܘ̈ܗܝ. 657 :ܒܪܲܒܿܘܼܬܼ ܚܲܝܠܵܐ ܕܡܸܬܼ ܝܲܗ̄ܒܵܐ ܠܹܗ ܬܸܗ̇ܪܸܬܼ ܐܵܦ ܐ̄ܢܵܐ 658 ܘܐܲܣܛܝܼܬܼ ܡܸܠܲܬܼܝ ܡ̣ܢ ܡܲܪܕܝܼܬܹܗ ܠܘܵܬܼ ܪܲܒܿܘܼܬܹܗ. 659 :ܒܫܲܪܒܵܐ ܕܛܵܥܝܵܐ ܚܙܲܩܘ ܚܘܼܫܵܒܲܝ̈ ܡ̣ܢ ܫܲܘܼܪܵܝܵܐ 660 ܘܲܒܼܬܲܫܥܝܼܬܹܗ ܕܒܲܪ ܐܲܒܼܕܵܢܵܐ ܨܒܹ̇ܝܬܼ ܕܐܸܬܼܗܲܓܹܿܐ. 661 :ܠܘܼܩܒܲܠ ܚܘܼܬܼܪܹܗ ܒܥܹ̇ܝܬܼ ܕܐܸܙܕܲܝܲܢ ܒܡܲܢܵܐ ܕܡܸܠܹ̈ܐ 662 ܘܕܲܚܙܹ̇ܝܬܼ ܕܲܥܬܼܝܼܕ ܠܡܸܬܼ ܦܲܪܣܵܝܘܼ ܫܠܹ̇ܝܬܼ ܠܝܼ ܡܸܢܹܗ. 663 :ܠܪܲܡܘܼܬܼ ܪܘܼܚܹܗ ܒܨܹ̇ܝܬܼ ܠܝܼ ܕܐܸܡܲܪ ܒܩܵܠ ܦܸܬܼܓܼܵܡܲܝ̈ 664 ܘܩܲܕܡܹ̇ܬܼ ܚܵܪܹ̇ܬܼ ܒܝܲܕ ܡܲܦܘܼܠܬܹܿܗ ܕܲܟܼܡܵܐ ܩܲܫܝܵܐ. 665 ܒܡܲܪܵܚܘܼܬܹܗ ܕܲܕܠܵܐ ܢܵܡܘܿܣ ܬܸܗ̇ܪܹܬܼ ܣܲܓܿܝܼ: pb. f.177r 666 ܘܲܒܼܫܘܼܢܵܩܹܗ ܕܲܕܠܵܐ ܫܘܼܠܵܡ ܬܸܡܗܹ̇ܬܼ ܪܲܒܲܬܼ. 667 :ܚܸܪܚܵܘܼܬܹܗ ܩܪܵܬ̤ ܓܲܪܓܼܬܲܢܝ ܕܐܸܬܼܢܸܐ ܢܸܟܼܠܹܗ 668 ܘܲܦܗ̣ܵܐ ܠܹܗ ܠܹܒܿܝ ܒܲܓܼܙܵܪ ܕܝܼܢܵܐ ܕܲܡܛܲܝܲܒܼ ܠܹܗ. 669 :ܒܩܲܫܝܘܼܬܼ ܢܸܓܼܕܵܘ̈ܗܝ ܦܸܟܗܲܬ̤ ܡܸܠܲܬܝ ܡ̣ܢ ܩܲܫܝܘܼܬܹܗ 670 ܘܐܸܡ̇ܪܹܬܼ ܐ̄ܢܵܐ ܠܝܼ ܕܡ̇ܢ ܡܲܒܼܐܸܫ ܐ̄ܢܵܐ ܠܒܼܝܼܫܵܐ ܕܐܲܒܝܼܕ. 671 :ܢܸܫܠܸܐ ܡܵܕܹܝܢ ܡ̣ܢ ܒܝܘܼܛܪܵܓܹܗ ܕܲܡܛܝܛܪ̈ܓܼ ܗ̄ܘ̣ 672 ܘܢܸܡܠܘܿܟ ܢܲܦܫܲܢ ܕܠܵܐ ܬܸܬܼܪܲܦܸܐ ܒܩܹܐ ܪܣܵܐ ܕܥܲܡܹܗ. 673 :ܩܹܐܪܣܵܐ ܪܲܒܵܐ ܥܬܝܼܕ ܗ̄ܘ̣ ܕܢܸܣܕܘܿܪ ܠܘܼܩܒܲܠ ܥܲܡ̇ܢ 674 ܬܵܘ ܢܸܚܫܘܿܠ ܠܲܢ ܙܵܝܼܢܵܐ ܕܚܵܣܹ̇ܢ ܠܲܛܪܘܿܢܘܼܬܹܗ. 675 :ܓܹܐܪܹ̈ܐ ܕܪܘܼܓܼܙܵܐ ܡܛܲܝܸܒܼ ܫܵܕܹܐ ܒܡܲܫܪܝܼܬܼ ܓܸܢܣܲܢ 676 ܢܹܐܚܘܿܕ ܒܐܲܦܵܘ̈ܗܝ ܣܲܟܪܵܐ ܕܟܼܝܼܬܼܵܐ ܕܗܲܝܡܵܢܘܼܬܼܵܐ. 677 :ܒܣܲܝܦܵܐ ܕܝܲܨܪܸܗ ܪܓܼܝܼܓܼ ܕܲܢܛܲܠܸܩ ܚܲܝܘܼܬܼ ܚܲܝܹ̈ܢ 678 ܢܣܝܼܡ ܣܲܢܘܼܪܬܵܐ ܕܣܲܒܼܪܵܐ ܛܵܒܼܵܐ ܒܪܹܫ ܪܸܥܝܵܢܲܢ. 679 :ܒܢܲܝܙܟܼܵܐ ܕܚܸܡܬܹܗ ܣܝܼܡ ܠܹܗ ܕܢܸܥܩܘܿܪ ܒܸܢܝܵܢ ܢܲܦܫܲܢ 680 ܢܸܠܒܲܫ ܚܘܼܒܵܐ ܐܲܝܟ ܫܸܪܝܵܢܵܐ ܕܠܵܐ ܢܸܬܼܪܲܦܸܐ. 681 :ܒܟܼܠ ܐܘܼܡܵܢܘܼ ܡܸܬܼܦܲܪܲܣ ܠܲܢ ܕܐܲܝܟܢ ܢܸܙܟܹܿܝܢ 682 ܬܵܘ ܢܸܙܕܲܝܲܢ ܕܠܵܐ ܢܲܟܿܘܿܢܲܢ ܓܹܐܪܹ̈ܐ ܕܒܼܝܼܫܵܐ܀ ܫܘܼܠܵܡܹܗ. ܫܘܼܒܼܚܵܐ ܠܚܲܝܠܵܟ ܦܵܪܘܿܩܲܢ ܕܒܹܗ ܙܟܲܝܬܵܝܗܝ ܠܐ̄ܟܹ̇ܠܩܲܪܨܵܐ܀ ܐ̄ܚܪܹܢܵܐ ܡܛܲܛܸܠ ܩܪ̈ܒܹܐ ܡ̣ܢ ܣܵܪ̈ܦܹܝܗ̇ ܕܐܲܪܥܵܐ: ܒܲܛܸܠ ܡܸܢܲܢ ܩܪ̈ܒܼܵܘܗܝ ܕܲܢܟܼܝܼܠܵܐ܀