Demonstration 8: On the Resurrection of the Dead - ܬܚܘܝܬܐ ܕܚܝܬ ܡܝ̈ܬܐ

ܚܪ̈ܝܢܐ ܓܝܪ ܒܟܠܙܒܢ܂ ܥܠ ܗܕܐ ܗܘ̈ܝܢ܂ ܕܐܝܟܢܐ ܠܡ ܩܝܡܝܢ ܡܝ̈ܬܐ܂ ܘܒܐܝܢܐ ܦܓܪܐ ܢܐܬܘܢ܂ ܕܗܐ ܒܠܐ ܠܗ ܦܓܪܐ ܘܡܬܚܒܠ܂ ܘܐܦ ܓܪ̈ܡܐ ܠܡ ܡܐ ܕܢܓܪ ܠܗܘܢ ܙܒܢܐ܂ ܡܬܕܩܩܝܢ ܘܠܐ ܝܕܝܥܝܢ܂ ܘܟܕ ܬܥܘܠ ܠܡ ܠܩܒܪܐ ܕܡܐܐ ܡܝ̈ܬܝܢ ܩܒܝܪܝܢ ܒܗ܂ ܡܠܐ ܙܘܪܐ ܥܦܪܐ ܠܐ ܬܫܟܚ ܬܡܢ܂ ܘܗܟܢܐ ܐܡܪܝܢ ܐܝܠܝܢ ܕܗܠܝܢ ܡܬܪܥܝܢ܂ ܕܝܕܥܝܢܢ ܠܡ ܕܩܝܡܝܢ ܡ̈ܝܬܐ܂ ܐܠܐ ܦܓܪܐ ܠܡ ܫܡܝܢܐ ܠܒܫܝܢ܂ ܘܨܘܪ̈ܬܐ ܪ̈ܘܚܢܝܬܐ܂ ܘܐܢ ܠܐ ܗܘܐ ܠܡ ܗܟܢܐ ܐܝܬܝܗ܂ ܗܠܝܢ ܠܡ ܡܐܐ ܡܝ̈ܬܝܢ ܕܒܚܕ ܩܒܪܐ ܩܒܝܪ̈ܝܢ܂ ܘܡܢ ܒܬܪ ܕܗܘܐ ܠܡ ܙܒܢܐ ܣܓܝܐܐ܂ ܠܝܬ ܬܡܢ ܐܦܠܐ ܡܕܡ܂ ܘܡܐ ܕܚܝ̈ܝܢ ܡܝ̈ܬܐ܂ ܘܠܒܫܝܢ ܠܡ ܦܓܪܐ ܘܩܝܡܝܢ܂ ܐܠܐ ܠܡ ܦܓܪܐ ܫܡܝܢܐ ܗܘ ܠܒܫܝܢ܂ ܡܢ ܐܝܟܐ ܠܡ ܐܬܐ ܗܘ ܦܓܪܐ܂ ܕܗܐ ܠܡ ܡܕܡ ܠܝܬ ܒܩܒܪܐ܀

ܡܢ ܕܗܠܝܢ ܕܝܢ ܡܬܪܥܐ܂ ܣܟܠܐ ܐܝܬܘܗܝ܂ ܘܕܠܐ ܝܕܥܬܐ܂ ܟܕ ܥܠܘ ܕܝܢ ܡܝ̈ܬܐ ܡܕܡ ܗܘܘ܂ ܘܟܕ ܗܘܘ ܙܒܢܐ ܣܓܝܐܐ܂ ܗܘܘ ܠܗܘܢ ܠܐ ܡܕܡ܂ ܘܡܐ ܕܗܘܐ ܙܒܢܐ ܕܩܝܡܝܢ ܡܝ̈ܬܐ܂ ܗܘܐ ܠܗ ܗܘ ܠܐ ܡܕܡ ܡܕܡ܂ ܐܝܟ ܟܝܢܗ ܩܕܡܝܐ܂ ܘܡܬܬܘܣܦ ܠܟܝܢܗ ܬܚܠܘܦܐ܂ ܐܘ ܥܛܠܐ ܕܡܬܪܥܐ ܗܠܝܢ܂ ܫܡܥ ܠܡܕܡ ܕܐܡܪ ܫܠܝܚܐ ܛܘܒܢܐ܂ ܟܕ ܡܦܝܣ ܠܣܟܠܐ ܕܐܟܘܬܟ܂ ܘܐܡܪ܂ ܣܟܠܐ܂ ܙܪܥܐ ܕܙܪܥ ܐܢܬ܂ ܐܠܐ ܡܐܬ ܠܐ ܚܝܐ܂ ܘܗܘ ܡܕܡ ܕܙܪܥ ܐܢܬ܂ ܠܐ ܗܘܐ ܐܝܟ ܗܘ ܕܝܠܝܕ ܒܥܣܒܗ܂ ܐܠܐ ܦܪܕܬܐ ܚܕܐ ܥܪܛܠܝܬܐ܂ ܕܚ̈ܛܐ ܐܘ ܕܣܥܪ̈ܐ܂ ܐܘ ܕܫܪܟܐ ܕܙܪ̈ܥܘܢܐ܂ ܘܠܚܕ ܚܕ ܡܢ ܙܪ̈ܥܘܢܐ܂ ܦܓܪܐ ܕܢܦܫܗ ܡܬܝܗܒ ܠܗ܂ ܐܠܗܐ ܕܝܢ ܡܠܒܫ ܠܗ ܠܙܪܥܟ ܦܓܪܗ܂ ܐܝܟܢܐ ܕܨܒܐ܀

ܡܟܝܠ ܐܬܛܦܝܣ ܠܟ ܣܟܠܐ ܡܢ ܗܕܐ܂ ܕܚܕ ܚܕ ܡܢ ܙܪ̈ܥܘܢܐ ܦܓܪܐ ܕܢܦܫܗ ܠܒܫ܂ ܠܐ ܡܢ ܡܬܘܡ ܙܪܥ ܐܢܬ ܚ̈ܛܐ ܘܚܨܕ ܐܢܬ ܣܥܪ̈ܐ܂ ܘܠܐ ܡܡܬܘܡ ܢܨܒ ܐܢܬ ܓܦܬܐ܂ ܘܡܘܥܝܐ ܠܗ ܬܐ̈ܢܐ܂ ܐܠܐ ܟܠ ܡܕܡ ܒܟܝܢܗ ܪܕܐ܂ ܗܟܢܐ ܐܦ ܦܓܪܐ ܕܢܦܠ ܒܐܪܥܐ‍‍ܗܘܝܘ ܩܐܡ܂ ܘܥܠ ܕܡܬܚܒܠ ܠܗ ܦܓܪܐ ܘܒܠܐ܂ ܡܢܗ ܡܢ ܡܬܠܐ ܕܙܪܥܐ܂ ܘܠܐ ܠܟ ܠܡܬܛܦܣܘ܂ ܕܐܝܟ ܕܙܪܥܐ ܡܐ ܕܢܦܠ ܒܐܪܥܐ܂ ܡܬܡܣܐ ܘܡܬܚܒܠ܂ ܘܡܢܗ ܡܢ ܡܣܝܘܬܗ܂ ܡܘܥܐ ܘܡܦܪܥ ܘܝܗܒ ܦܐܪ̈ܐ܂ ܡܛܠ ܕܐܪܥܐ ܕܟܪܝܒܐ ܕܙܪܥܐ ܠܐ ܢܦܠ ܒܗ܂ ܦܐܪ̈ܐ ܠܐ ܝܗܒܐ܂ ܐܦܢ ܟܘܠܗ ܡܛܪܐ ܗܝ ܐܪܥܐ ܫܬܝܐ ܠܗ܂ ܘܩܒܪܐ ܐܝܢܐ ܕܡܝ̈ܬܐ ܠܐ ܡܬܩܒܪܝܢ ܒܗ܂ ܒܢ̈ܝܢܫܐ ܒܚܝܬ ܡܝ̈ܬܐ ܠܐ ܢܦܩܝܢ ܡܢܗ܂ ܐܠܘ ܟܠܗ ܩܠ ܫܝܦܘܪܐ ܒܓܘܗ ܩܪܐ܂ ܘܐܢ ܕܝܢ ܐܝܟ ܕܐܡܪܝܢ܂ ܕܪ̈ܘܚܬܐ ܕܟܐ̈ܢܐ ܠܫܡܝܐ ܣܠܩܢ܂ ܘܦܓܪܐ ܫܡܝܢܐ ܠܒܫ̈ܢ܂ ܒܫܡܝܐ ܐܢܘܢ܂ ܘܗܘ ܕܡܩܝܡ ܡܝ̈ܬܐ ܒܫܡܝܐ ܥܡܪ܂ ܘܡܐ ܕܐܬܐ ܡܚܝܢܢ܂ ܠܡܢ ܡܩܝܡ ܡܢ ܐܪܥܐ܂ ܘܠܡܢܐ ܕܝܢ ܟܬܒ ܠܢ ܕܬܐܬܐ ܫܥܬܐ܂ ܐܦ ܗܫܐ ܐܝܬܝܗ܂ ܕܐܦ ܡܝ̈ܬܐ ܢܫܡܥܘܢ ܩܠܗ ܕܒܪܗ ܕܐܢܫܐ܂ ܘܢܚܘܢ ܘܢܦܩܘܢ ܡܢ ܩܒܪ̈ܝܗܘܢ܂ ܠܐ ܓܝܪ ܐܬܐ ܦܓܪܐ ܫܡܝܢܐ܂ ܥܐܠ ܠܩܒܪܐ ܘܡܚܕܪ ܢܦܩ ܠܗ ܡܢܗ܀

ܗܟܢܐ ܓܝܪ ܐܡܪܝܢ ܥܛ̈ܠܐ܂ ܕܠܡܢܐ ܠܡ ܐܡܪ ܫܠܝܚܐ܂ ܕܐܚܪܝܢ ܗܘ ܦܓܪܐ ܕܒܫܡܝܐ܂ ܘܐܚܪܝܢ ܕܒܐܪܥܐ܂ ܐܠܐ ܡܢ ܕܗܕܐ ܫܡܥ ܢܫܡܥ ܐܦ ܠܗܝ ܐܚܪܬܐ ܕܐܡܪ ܫܠܝܚܐ܂ ܕܐܝܬ ܠܡ ܦܓܪܐ ܕܢܦܫ܂ ܘܐܝܬ ܦܓܪܐ ܕܪܘܚ܂ ܘܬܘܒ ܐܡܪ܂ ܕܟܘܠܢ ܢܕܡܟ܂ ܐܠܐ ܠܐ ܟܘܠܢ ܢܬܚܠܦ܂ ܘܬܘܒ ܐܡܪ܂ ܕܥܬܝܕ ܗܘ ܗܢܐ ܕܡܐܬ܂ ܕܢܠܒܫ ܠܕܠܐ ܡܐܬ܂ ܘܗܢܐ ܕܡܬܚܒܠ ܕܢܠܒܫ ܠܕܠܐ ܡܬܚܒܠ܂ ܬܘܒ ܐܡܪ܂ ܕܟܘܠܢ ܠܡܩܡ ܠܢ ܩܕܡ ܒܝܡ ܕܡܫܝܚܐ܂ ܕܢܬܦܪܥ ܐܢܫ ܐܢܫ ܒܦܓܪܗ܂ ܡܕܡ ܕܡܢ ܩܕܝܡ ܥܒܝܕ ܗܘܐ ܠܗ܂ ܐܢ ܕܛܒ ܘܐܢ ܕܒܝܫ܂ ܬܘܒ ܐܡܪ܂ ܕܡܢܐ ܢܥܒܕܘܢ ܗܢܘܢ ܕܥܡܕܝܢ ܚܠܦ ܡܝ̈ܬܐ܂ ܐܢ ܡܝ̈ܬܐ ܓܝܪ ܠܐ ܩܝܡܝܢ܂ ܗܢܘܢ ܠܡܢܐ ܥܡܕܝܢ ܚܠܦܝܗܘܢ܂ ܬܘܒ ܐܡܪ܂ ܕܐܢ ܚܝܬ ܡܝ̈ܬܐ ܠܝܬ܂ ܐܦ ܠܐ ܠܡ ܡܫܝܚܐ ܩܡ܂ ܘܐܢ ܡܫܝܚܐ ܠܐ ܩܡ܂ ܒܛܠܐ ܗܝ ܗܝܡܢܘܬܟܘܢ ܘܟܪܘܙܘܬܢ܂ ܘܐܢ ܗܟܢܐ ܗܘ܂ ܐܫܬܟܚܢ ܠܢ ܣܗ̈ܕܐ ܕܓ̈ܠܐ܂ ܕܐܣܗܕܢ ܥܠ ܐܠܗܐ܂ ܕܐܩܝܡ ܠܡܫܝܚܐ ܠܕܠܐ ܐܩܝܡ܂ ܡܕܝܢ܂ ܐܢ ܡܝ̈ܬܐ ܠܐ ܩܝܡܝܢ ܐܦܠܐ ܕܝܢܐ ܐܝܬ܂ ܘܐܢ ܕܝܢܐ ܠܝܬ܂ ܢܐܟܘܠ ܓܐܪ ܘܢܫܬܐ܂ ܕܡܚܪ ܡܝܬܝܢ ܚܢܢ܂ ܠܐ ܠܡ ܬܛܥܘܢ܂ ܡܚܒܠܢ ܪ̈ܥܝܢܐ ܒܣܝ̈ܡܐ܂ ܫܘܥ̈ܝܬܐ ܒܝܫ̈ܬܐ܂ ܗܕܐ ܕܝܢ ܕܐܡܪ ܫܠܝܚܐ܂ ܕܐܚܪܝܢ ܗܘ ܦܓܪܐ ܕܒܫܡܝܐ܂ ܘܐܚܪܝܢ ܗܘ ܕܒܐܪܥܐ܂ ܗܟܢܐ ܬܫܬܡܥ ܠܟ ܡܠܬܐ ܗܕܐ܂ ܕܡܐ ܕܩܐܡ ܦܓܪܐ ܕܟܐ̈ܢܐ ܘܡܬܚܠܦ܂ ܐܬܩܪܝ ܠܗ ܫܡܝܢܐ܂ ܘܐܝܢܐ ܕܠܐ ܡܬܚܠܦ܂ ܐܬܩܪܝ ܠܗ ܒܟܝܢܗ ܐܪܥܢܐ܂

ܫܡܥ ܕܝܢ ܚܒܝܒܝ ܠܡܠܬܐ ܕܕܡܝܐ ܠܗܕܐ܂ ܕܗܘ ܬܘܒ ܫܠܝܚܐ ܐܡܪܗ܂ ܐܡܪ ܓܝܪ܂ ܕܒܪܢܫܐ ܕܪܘܚܐ ܠܟܠ ܕܐܢ܂ ܘܗܘ ܡܢ ܐܢܫ ܠܐ ܡܬܕܝܢ܂ ܘܬܘܒ ܐܡܪ܂ ܕܐܝܠܝܢ ܕܕܪܘܚ ܐܢܘܢ܂ ܕܪܘܚ ܗܘ ܡܬܪܥܝܢ܂ ܘܐܝܠܝܢ ܕܒܣܪ ܐܢܘܢ܂ ܕܒܣܪ ܗܘ ܡܬܪܥܝܢ܂ ܘܬܘܒ ܐܡܪ܂ ܕܟܕ ܕܒܣܪܐ ܗܘܝܢ܂ ܟܐ̈ܒܐ ܕܚܛܗ̈ܐ ܡܬܚܦܛܝܢ ܗܘܘ ܒܗܕ̈ܡܝܢ܂ ܕܦܐܪ̈ܐ ܢܗܘܐ ܠܡܘܬܐ܂ ܬܘܒ ܐܡܪ܂ ܕܐܢ ܐܝܬ ܒܟܘܢ ܪܘܚܐ ܕܡܫܝܚܐ܂ ܕܪܘܚ ܐܝܬܝܟܘܢ܂ ܗܠܝܢ ܟܠܗܝܢ ܐܡܪ ܫܠܝܚܐ܂ ܟܕ ܒܣܪܐ ܠܒܝܫ ܗܘܐ܂ ܘܥܒ̈ܕܐ ܕܪܘܚܐ ܦܠܚ ܗܘܐ܂ ܗܟܢܐ ܐܦ ܒܚܝܬ ܡܝ̈ܬܐ܂ ܗܘܐ ܚܘܠܦܐ ܠܙܕܝ̈ܩܐ܂ ܘܡܬܒܠܥܐ ܠܗ܂ ܨܘܪܬܐ ܐܪܥܢܝܬܐ ܒܫܡܝܢܝܬܐ܂ ܘܡܬܩܪܐ ܠܗ ܦܓܪܐ ܫܡܝܢܐ܂ ܘܕܠܐ ܡܬܚܠܦ ܡܬܩܪܐ ܠܗ ܐܪܥܢܝܐ܀

ܥܠ ܗܕܐ ܕܝܢ ܚܝܬ ܡܝ̈ܬܐ ܚܒܝܒܝ܂ ܟܡܐ ܕܡܫܟܚ ܐܢܐ ܐܦܝܣܟ܂ ܡܢ ܒܪܫܝܬ ܓܝܪ ܒܪܝܗܝ ܐܠܗܐ ܠܐܕܡ܂ ܡܢ ܥܦܪܐ ܓܒܠܗ ܘܐܩܝܡܗ܂ ܐܢ ܓܝܪ ܟܕ ܠܝܬܘܗܝ ܐܕܡ܂ ܡܢ ܠܐ ܡܕܡ ܥܒܕܗ܂ ܚܕ ܟܡܐ ܗܫܐ ܦܫܝܩܐ ܠܗ ܕܢܩܝܡܝܘܗܝ܂ ܕܗܐ ܡܙܪܥ ܙܪܝܥ ܒܐܪܥܐ܂ ܐܢ ܓܝܪ ܐܝܠܝܢ ܕܦܫܝܩܢ ܠܢ ܢܥܒܕ ܐܠܗܐ܂ ܠܐ ܡܬܚܙܝܢ ܠܢ ܥܒܕ̈ܘܗܝ ܪܘܪ̈ܒܐ܂ ܗܐ ܓܝܪ ܐܝܬ ܒܒ̈ܢܝ ܐܢܫܐ܂ ܐܢܫܐ ܐܘ̈ܡܢܐ܂ ܕܥܒܕܝܢ ܨܒܘ̈ܬܐ ܬܡܝ̈ܗܬܐ܂ ܘܐܝܠܝܢ ܕܠܐ ܗܘܘ ܐܘ̈ܡܢܝܗܝܢ ܕܥܒܝ̈ܕܬܐ ܗܠܝܢ܂ ܩܝܡܝܢ ܘܡܬܕܡܪܝܢ܂ ܕܐܝܟܢܐ ܠܡ ܗܘ̈ܝ܂ ܘܥܒܕܐ ܕܚܒܪ̈ܝܗܘܢ ܥܛܠ ܒܥܝ̈ܢܝܗܘܢ܂ ܚܕ ܟܡܐ ܥܒ̈ܕܘܗܝ ܕܐܠܗܐ܂ ܠܐ ܒܬܕܡܪ̈ܬܐ ܙܕܩ ܠܗܘܢ ܠܡܗܘܐ܂ ܠܐܠܗܐ ܕܝܢ܂ ܠܐ ܗܘܬ ܪܒܐ ܗܕܐ ܕܚܝ̈ܝܢ ܡܝ̈ܬܐ܂ ܟܕ ܙܪܥܐ ܒܐܪܥܐ ܠܐ ܙܪܝܥ ܗܘܐ܂ ܐܘܠܕܬ ܐܪܥܐ܂ ܡܕܡ ܕܠܐ ܢܦܠ ܒܗ܂ ܘܟܕ ܠܐ ܒܛܢܐ ܗܘܬ܂ ܝܠܕܬ ܒܒܬܘܠܘܬܗ܂ ܐܝܟܢܐ ܕܝܢ ܥܛܠܐ ܗܕܐ܂ ܕܬܘܥܐ ܬܘܒ ܐܪܥܐ ܡܕܡ ܕܢܦܠ ܒܗ܂ ܘܒܛܢܐ ܕܬܐܠܕ܂ ܘܗܐ ܩܪ̈ܝܒܝܢ ܚܒ̈ܠܝܗ܂ ܐܝܟ ܕܐܡܪ ܐܫܥܝܐ܂ ܕܡܢ ܚܙܐ ܐܝܟ ܗܕܐ܂ ܘܡܢ ܫܡܥ ܐܝܟ ܗܠܝܢ܂ ܕܡܚܒܠܐ ܐܪܥܐ ܒܝܘܡܐ ܚܕ܂ ܘܡܬܝܠܕ ܥܡܐ ܒܫܥܬܐ ܚܕܐ܂ ܐܕܡ ܓܝܪ ܠܐ ܙܪܝܥ ܗܘܐ ܘܝܥܐ܂ ܘܠܐ ܒܛܝܢ ܗܘܐ ܘܐܬܝܠܕ܂ ܗܫܐ ܓܝܪ ܝܠܕܘ̈ܗܝ܂ ܗܐ ܙܪܝܥܝܢ ܘܠܡܛܪܐ ܡܣ̈ܟܝܢ ܘܝܥܝܢ܂ ܘܐܪܥܐ ܗܐ ܒܛܢܐ ܠܣܓ̈ܝܐܐ܂ ܘܩܪܒ ܙܒܢ ܡܘܠܕܗ܀

ܟܠܗܘܢ ܓܝܪ ܐ̈ܒܗܬܢ܂ ܥܠ ܣܒܪܐ ܕܩܝܡܬܐ ܘܕܚܝܬ ܡܝ̈ܬܐ܂ ܡܣܟܝܢ ܗܘܘ ܘܪܗܛܝܢ܂ ܐܝܟ ܕܐܡܪ ܫܠܝܚܐ ܛܘܒܢܐ܂ ܕܐܠܘ ܠܗܝ ܡܕܝܢܬܐ ܕܢܦܩ ܡܢܗ ܐܒܪܗܡ܂ ܡܣܟܝܢ ܗܘܘ ܙܕܝ̈ܩܐ܂ ܐܝܬ ܗܘܐ ܠܗܘܢ ܙܒܢܐ܂ ܕܬܘܒ ܢܗܦܟܘܢ ܢܐܙܠܘܢ ܠܗ ܐܠܐ ܡܚܘܝܢ ܕܠܕܛܒܐ ܡܢܗ ܡܣܟܝܢ܂ ܠܗܝ ܕܐܝܬܝܗ ܒܫܡܝܐ܂ ܘܡܣܟܝܢ ܗܘܘ ܕܢܫܬܪܘܢ܂ ܘܒܥܓܠ ܢܐܙܠܘܢ ܠܗ܂ ܘܡܢ ܡܕܡ ܕܟܬܒܢܐ ܠܟ ܐܣܬܟܠ ܘܚܙܝ܂ ܕܠܩܝܡܬܐ ܡܣܟܝܢ ܗܘܘ܂ ܝܥܩܘܒ ܓܝܪ ܐܒܘܢ܂ ܟܕ ܡܐܬ ܗܘܐ܂ ܐܘܡܝ ܠܝܘܣܦ ܒܪܗ ܘܐܡܪ ܠܗ܂ ܕܒܩܒܪܐ ܕܐܒ̈ܗܝ ܩܒܘܪܝܢܝ܂ ܠܘܬ ܐܒܪܗܡ ܘܣܪܐ܂ ܘܐܝܣܚܩ ܘܪܦܩܐ܂ ܘܠܡܢܐ ܕܝܢ ܚܒܝܒܝ܂ ܠܐ ܨܒܐ ܗܘܐ ܝܥܩܘܒ ܕܒܡܨܪܝܢ ܢܬܩܒܪ܂ ܐܠܐ ܥܡ ܐܒ̈ܗܘܗܝ܂ ܗܕܐ ܩܕܡ ܚܘܝ܂ ܕܠܚܝܬ ܡܝ̈ܬܐ ܡܣܟܐ ܗܘܐ܂ ܕܟܕ ܬܗܘܐ ܩܥܬܐ ܘܩܠܐ ܕܩܪܢܐ܂ ܬܗܘܐ ܩܝܡܬܗ ܩܪܝܒܐ ܠܕܐܒ̈ܗܘܗܝ܂ ܘܠܐ ܢܬܚܠܛ ܒܙܒܢ ܩܝܡܬܐ܂ ܥܡ ܒܝ̈ܫܐ ܕܗܦܟܝܢ ܠܫܝܘܠ ܘܠܬܫܢܝܩܐ܀

ܘܗܟܢܐ ܐܦ ܝܘܣܦ ܐܘܡܝ ܠܐ̈ܚܘܗܝ܂ ܘܐܡܪ ܠܗܘܢ܂ ܕܟܕ ܢܬܕܟܪܟܘܢ ܐܠܗܐ܂ ܐܣܩܘ ܓܪ̈ܡܝ ܡܟܐ ܥܡܟܘܢ܂ ܘܥܒܕܘ ܐܚ̈ܘܗܝ ܐܝܟ ܡܠܬܗ ܕܝܘܣܦ܂ ܘܢܛܪܘ ܡܘܡܬܐ ܡܐܐ ܘܥܣܪܝܢ ܘܚܡܫ ܫ̈ܢܝܢ܂ ܒܗ ܒܙܒܢܐ ܗܘ܂ ܕܢܦܩܘ ܚܝ̈ܠܘܬܗ ܕܡܪܝܐ ܡܢ ܐܪܥ ܡܨܪܝܢ܂ ܗܝܕܝܢ ܫܩܠ ܡܘܫܐ ܓܪ̈ܡܘܗܝ ܕܝܘܣܦ ܘܢܦܩ܂ ܘܝܩܪܘ ܠܗ ܓܪ̈ܡܘܗܝ ܕܓܒܪܐ ܙܕܝܩܐ܂ ܘܛܐܒܘ ܠܗ ܡܢ ܕܗܒܐ ܘܡܢ ܣܐܡܐ܂ ܕܫܩܠܘ ܒܢ̈ܝ ܐܝܣܪܝܠ ܡܢ ܡܨܪܝܢ܂ ܟܕ ܚܠܨܘ ܐܢܘܢ܂ ܘܗܘܘ ܓܪ̈ܡܘܗܝ ܕܝܘܣܦ ܐܪܒܥܝܢ ܫ̈ܢܝܢ ܒܡܕܒܪܐ܂ ܘܒܗܘ ܙܒܢܐ ܕܫܟܒ ܡܘܫܐ܂ ܐܘܪܬ ܐܢܘܢ ܠܝܫܘܥ ܒܪܢܘܢ܂ ܛܒܝܢ ܗܘܘ ܠܗ ܓܝܪ ܓܪ̈ܡܘܗܝ ܕܝܘܣܦ ܐܒܘܗܝ܂ ܡܢ ܟܘܠܗ ܒܙܬܐ ܕܐܪܥܐ ܗܝ ܕܟܒܫ܂ ܘܠܡܢܐ ܕܝܢ ܠܝܫܘܥ܂ ܝܗܒ ܗܘܐ ܐܢܘܢ ܡܘܫܐ ܠܓܪ̈ܡܘܗܝ ܕܝܘܣܦ܂ ܐܠܐ ܡܛܠ ܕܝܢ// ܕܡܢ ܫܒܛܐ ܗܘܐ܂ ܕܐܦܪܝܡ ܒܪܗ ܕܝܘܣܦ܂ ܘܩܒܪ ܐܢܘܢ ܒܐܪܥܐ ܕܡܘܠܟܢܐ܂ ܕܬܗܘܐ ܣܝܡܬܐ ܒܐܪܥܐ ܗܝ܂ ܕܓܪ̈ܡܘܗܝ ܕܝܘܣܦ ܩܒܝܪܝܢ ܒܗ܂ ܘܐܦ ܒܙܒܢܐ ܗܘ ܕܡܐܬ ܗܘܐ ܝܥܩܘܒ܂ ܒܪܟ ܗܘܐ ܠܫܒ̈ܛܘܗܝ ܘܚܘܝ ܐܢܘܢ܂ ܡܕܡ ܕܓܕܫ ܠܗܘܢ ܒܚܪܬܐ ܕܝܘ̈ܡܬܐ܂ ܘܐܡܪ ܠܪܘܒܝܠ܂ ܪܘܒܝܠ ܒܘܟܪܝ ܐܢܬ܂ ܚܝܠܝ ܘܪܝܫ ܬܘܩܦܝ܂ ܛܥܝܬ܂ ܐܝܟ ܡܝܐ ܠܐ ܬܦܘܫ܂ ܥܠ ܕܣܠܩܬ ܠܡܫܟܒܗ ܕܐܒܘܟ܂ ܫܪܝܪܐܝܬ ܛܘܫܬ ܬܫܘܝܬܝ ܘܣܠܩܬ܂ ܘܗܘܐ ܡܢ ܙܒܢܐ ܕܫܟܒ ܝܥܩܘܒ܂ ܥܕܡܐ ܕܫܟܒ ܡܘܫܐ܂ ܡܐܬܝܢ ܘܬܠܬܝܢ ܘܬܠܬ ܫ̈ܢܝܢ܂ ܗܝܕܝܢ ܨܒܐ ܡܘܫܐ܂ ܕܢܚܣܐ ܒܟܗܢܘܬܗ ܥܠ ܪܘܒܝܠ܂ ܕܐܣܟܠ ܘܚܛܐ܂ ܥܠ ܕܕܡܟ ܥܡ ܒܠܗܐ ܕܪܘܟܬܗ ܕܐܒܘܗܝ܂ ܕܡܐ ܕܩܝܡܝܢ ܐܚ̈ܘܗܝ ܠܐ ܢܬܓܠܙ ܡܢ ܡܢܝܢܗܘܢ ܐܡܪ ܓܝܪ ܒܪܝܫ ܒܘܪ̈ܟܬܗ܂ ܢܚܐ ܪܘܒܝܠ ܘܠܐ ܢܡܘܬ܂ ܘܢܗܘܐ ܒܡܢܝܢܐ܀

ܘܐܦ ܟܕ ܡܛܐ ܙܒܢܐ ܕܢܫܟܘܒ ܡܘܫܐ ܥܡ ܐܒܗ̈ܘܗܝ܂ ܚܢܝܓܐ ܗܘܬ ܠܗ܂ ܘܟܪܝܐ ܗܘܬ ܠܗ܂ ܘܒܥܐ ܡܢ ܡܪܗ ܘܐܬܚܢܢ܂ ܕܢܥܒܪ ܠܐܪܥܐ ܕܡܘܠܟܢܐ܂ ܘܠܡܢܐ ܕܝܢ ܚܒܝܒܝ܂ ܟܪܝܐ ܗܘܬ ܠܗ ܠܡܘܫܐ ܓܒܪܐ ܙܕܝܩܐ܂ ܥܠ ܕܠܐ ܥܠ ܠܐܪܥܐ ܕܡܘܠܟܢܐ܂ ܐܠܐ ܡܛܠ ܕܢܐܙܠ ܘܢܬܩܒܪ ܥܡ ܐܒܗ̈ܘܗܝ܂ ܘܠܐ ܢܬܩܒܪ ܒܐܪܥܐ ܕܒܥܠܕܒܒ̈ܘܗܝ܂ ܒܐܪܥܐ ܕܡܘܐܒ܂ ܡܛܠ ܕܐܓܪܘ ܡܘܐ̈ܒܝܐ ܠܒܠܥܡ ܒܪ ܒܥܘܪ܂ ܠܡܠܛ ܠܐܝܣܪܝܠ܂ ܡܛܠ`ܗܢܐ ܗܟܢܐ ܨܒܐ ܗܘܐ ܡܘܫܐ܂ ܕܒܐܪܥܐ ܗܝ ܠܐ ܢܬܩܒܪ܂ ܕܠܐ ܢܐܬܘܢ ܡܘܐܒ̈ܝܐ܂ ܘܢܥܒܕܘܢ ܒܗ ܢܩܡܬܐ܂ ܘܢܓܠܘܢ ܓܪ̈ܡܘܗܝ ܕܓܒܪܐ ܙܕܝܩܐ ܘܢܫܕܘܢ ܐܢܘܢ܂ ܘܥܒܕ ܒܗ ܡܪܗ ܒܡܘܫܐ ܛܝܒܘܬܐ܂ ܘܐܣܩܗ ܠܛܘܪܐ ܕܢܒܘ܂ ܘܚܘܝܗ ܠܟܠܗ ܐܪܥܐ܂ ܟܕ ܐܥܒܪܗ ܩܕܡܘܗܝ܂ ܘܟܕ ܚܪ ܡܘܫܐ ܒܟܠܗ ܐܪܥܐ܂ ܘܚܪ ܒܛܘܪܐ ܕܝܒܘ̈ܣܝܐ܂ ܐܬܪ ܕܬܡܢ ܥܬܝܕܐ ܗܘܬ ܫܟܝܢܬܐ ܠܡܫܪܐ܂ ܘܟܪܝܬ ܠܗ ܘܒܟܐ܂ ܟܕ ܚܙܐ ܠܩܒܪܐ ܕܒܚܒܪܘܢ܂ ܐܬܪ ܕܩܒܝܪ̈ܝܢ ܐܒܗ̈ܘܗܝ܂ ܐܒܪܗܡ ܘܐܝܣܚܩ ܘܝܥܩܘܒ܂ ܥܠ ܕܠܘܬܗܘܢ ܠܐ ܐܬܩܒܪ܂ ܘܢܫܬܕܘܢ ܓܪ̈ܡܘܗܝ ܥܠ ܓܪ̈ܡܝܗܘܢ܂ ܘܥܡܗܘܢ ܢܩܘܡ ܒܩܝܡܬܐ܂ ܘܟܕ ܚܙܗ ܠܟܠܗ ܐܪܥܐ܂ ܠܒܒܗ ܡܪܗ ܘܐܡܪ ܠܗ܂ ܐܢܐ ܐܩܒܪܟ ܘܐܣܬܪܟ܂ ܘܐܢܫ ܩܒܪܟ ܠܐ ܢܕܥ܂ ܘܡܝܬ ܡܘܫܐ ܒܡܠܬ ܦܘܡܗ ܕܡܪܝܐ܂ ܘܩܒܪܗ ܒܢܚܠܐ ܒܐܪܥܐ ܕܡܘܐܒ܂ ܠܘܩܒܠ ܒܝܬ ܦܥܘܪ܂ ܐܬܪ ܕܚܛܐ ܐܝܣܪܝܠ܂ ܘܠܐ ܝܕܥ ܐܢܫ ܩܒܪܗ ܥܕܡܐ ܠܝܘܡܢܐ܂ ܬܪ̈ܬܝܢ ܕܝܢ ܨ̈ܒܘܢ ܫܦܝܪܢ܂ ܥܒܕ ܒܗ ܡܪܗ ܒܡܘܫܐ܂ ܕܠܐ ܐܘܕܥ ܩܒܪܗ ܠܒ̈ܢܝ ܐܝܣܪܝܠ܂ ܚܕܐ ܡܛܠ ܕܠܐ ܢܕܥܘܢ ܒܥܠܕܒ̈ܒܘܗܝ܂ ܘܢܫܕܘܢ ܓܪ̈ܡܘܗܝ ܡܢ ܩܒܪܗ܂ ܘܕܬܪ̈ܬܝܢ ܕܠܐ ܢܕܥܘܢ ܒ̈ܢܝ ܥܡܗ܂ ܘܢܥܒܕܘܢܗ ܠܩܒܪܗ ܒܝܬ ܣܓܕܬܐ܂ ܡܛܠ ܕܐܝܟ ܐܠܗܐ ܚܫܝܒ ܗܘܐ ܒܥ̈ܝܢܝ ܒ̈ܢܝ ܥܡܗ܂ ܘܐܣܬܟܠ ܡܢ ܗܕܐ ܚܒܝܒܝ܂ ܕܟܕ ܫܒܩ ܐܢܘܢ ܘܣܠܩ ܠܛܘܪܐ ܐܡܪܝܢ܂ ܕܗܢܐ ܡܘܫܐ ܕܐܣܩܢ ܡܢ ܐܪܥܐ ܕܡܨܪܝܢ܂ ܠܐ ܝܕܥܝܢܢ ܡܢܐ ܗܘܝܗܝ܂ ܘܥܒܕܘ ܠܗܘܢ ܥܓܠܐ ܘܣܓܕܘ ܠܗ܂ ܘܠܐ ܐܬܕܟܪܘ ܠܐܠܗܐ܂ ܕܐܣܩ ܐܢܘܢ ܡܢ ܡܨܪܝܢ ܒܝܕ ܡܘܫܐ܂ ܒܐܝܕܐ ܬܩܝܦܬܐ ܘܒܕܪܥܐ ܪܡܐ܂ ܡܛܠ ܗܢܐ ܢܟܦ ܐܠܗܐ ܥܠ ܡܘܫܐ܂ ܘܠܐ ܐܘܕܥ ܩܒܪܗ܂ ܕܠܐ ܟܕ ܢܘܕܥ ܩܒܪܗ ܢܛܥܘܢ ܒ̈ܢܝ ܥܡܗ܂ ܘܢܥܒܕܘܢ ܠܗܘܢ ܨܠܡܐ ܘܢܣܓܕܘܢ ܘܢܕܒܚܘܢ ܠܗ܂ ܘܒܚ̈ܛܗܝܗܘܢ ܢܙܝܥܘܢ ܓܪ̈ܡܘܗܝ ܕܓܒܪܐ ܙܕܝܩܐ܀

ܘܗܘ ܬܘܒ ܡܘܫܐ܂ ܐܟܪܙ ܓܠܝܐܝܬ ܚܝܬ ܡܝ̈ܬܐ܂ ܐܡܪ ܓܝܪ ܐܝܟ ܕܡܢ ܦܘܡܐ ܕܐܠܗܗ܂ ܕܐܢܐ ܡܡܝܬ ܐܢܐ܂ ܘܐܢܐ ܡܚܐ ܐܢܐ܂ ܬܘܒ ܐܦ ܚܢܐ ܗܟܢܐ ܐܡܪܬ ܒܨܠܘܬܗ܂ ܕܡܪܝܐ ܡܡܝܬ ܘܡܚܐ܂ ܘܡܚܬ ܠܫܝܘܠ ܘܡܣܩ܂ ܘܐܦ ܐܫܥܝܐ ܢܒܝܐ ܗܟܢܐ ܐܡܪ܂ ܕܢܚܘܢ ܡܝ̈ܬܝܟ ܡܪܝܐ܂ ܘܫ̈ܠܕܝܗܘܢ ܢܩܘܡܢ܂ ܘܢܬܬܥܝܪܘܢ ܘܢܫܒܚܘܢ ܫܟ̈ܒܝ ܥܦܪܐ܂ ܘܐܦ ܕܘܝܕ ܐܟܪܙ ܘܐܡܪ܂ ܕܗܐ ܠܡܝܬܐ ܥܒܕ ܐܢܬ ܬܕܡܪ̈ܬܐ܂ ܘܓܢܒܪ̈ܐ ܢܩܘܡܘܢ ܘܢܘܕܘܢ ܠܟ܂ ܘܢܫܬܥܘܢ ܕܒܩܒܪ̈ܐ ܛܝܒܘܬܟ܂ ܘܐܝܟܢܐ ܒܩܒܪ̈ܐ ܡܫܬܥܝܢ ܛܝܒܘܬܗ ܕܐܠܗܐ܂ ܐܠܐ܂ ܕܟܕ ܫܡܥܝܢ ܩܠ ܫܝܦܘܪܐ ܕܩܪܐ܂ ܘܩܪܢܐ ܕܙܥܩܐ ܡܢ ܪܘܡܐ܂ ܘܙܘܥܐ ܕܗܘܐ܂ ܘܩܒܪ̈ܐ ܕܡܬܦܬܚܝܢ܂ ܘܩܝܡܝܢ ܓܢܒܪ̈ܐ ܒܬܫܒܘܚܬܐ܂ ܘܡܫܬܥܝܢ ܒܩܒܪ̈ܐ ܚܕ ܠܚܕ ܘܐܡܪܝܢ܂ ܕܪܒܐ ܗܝ ܛܝܒܘܬܐ ܕܐܬܥܒܕܬ ܒܢ܂ ܕܦܣܝܩ ܗܘܐ ܣܒܪܢ܂ ܘܗܘܐ ܠܢ ܣܒܪܐ܂ ܘܚܒ̈ܝܫܝܢ ܗܘܝܢ ܒܚܫܘܟܐ܂ ܘܢܦܩܢ ܠܢܘܗܪܐ܂ ܘܐܙܕܪܥܢ ܒܚܒܠܐ܂ ܘܩܡܢ ܒܬܫܒܘܚܬܐ܂ ܘܐܬܛܡܪܢ ܢܦܫܢܐܝܬ܂ ܘܩܡܢ ܪܘܚܢܐܝܬ܂ ܘܐܙܕܪܥܢ ܬܘܒ ܒܟܪܝܗܘܬܐ܂ ܘܩܡܢ ܒܚܝܠܐ܂ ܗܕܐ ܗܝ ܛܝܒܘܬܐ ܕܡܫܬܥܝܢ ܒܩܒܪ̈ܐ܀

ܘܠܐ ܗܘܐ ܒܡ̈ܠܐ ܗܘ ܒܠܚܘܕ ܚܒܝܒܝ܂ ܐܡܪ ܐܠܗܐ ܕܡܚܐ ܐܢܐ ܡܝ̈ܬܐ܂ ܐܠܐ ܐܦ ܒܥܒ̈ܕܐ ܚܘܝܢ܂ ܒܣܗ̈ܕܘܬܐ ܣܓܝܐ̈ܬܐ܂ ܕܠܐ ܢܗܘܐ ܠܢ ܡܣܡ ܒܪܥܝܢܐ܂ ܩܕܡ ܘܚܘܝܢ ܓܠܝܐܝܬ܂ ܒܝܕ ܐܠܝܐ ܓܝܪ܂ ܐܬܚܙܝܬ ܬܕܡܘܪܬܐ ܕܚܝ̈ܝܢ ܡܝ̈ܬܐ܂ ܘܩܝܡܝܢ ܫܟ̈ܒܝ ܥܦܪܐ܂ ܟܕ ܡܝܬ ܓܝܪ ܒܪܗ ܕܐܪܡܠܬܐ܂ ܐܚܝܗ ܐܠܝܐ ܘܝܗܒܗ ܠܐܡܗ܂ ܘܐܠܝܫܥ ܬܘܒ ܬܠܡܝܕܗ܂ ܐܚܝ ܠܒܪܗ ܕܫܝܠܘܡܝܬܐ܂ ܕܬܬܩܝܡ ܘܬܫܪ ܠܢ ܣܗܕܘܬܐ ܕܬܪܝܢ܂ ܘܐܦ ܥܠ ܓܪ̈ܡܘܗܝ ܬܘܒ ܕܐܠܝܫܥ܂ ܡܝܬܐ ܫܕܘ ܥܠܝܗܘܢ ܒ̈ܢܝ ܐܝܣܪܝܠ܂ ܘܚܝܐ ܘܩܡ ܗܘ ܡܝܬܐ܂ ܘܫܪܬ ܣܗܕܘܬܐ ܕܬܠܬܐ܀

ܘܐܦ ܒܝܕ ܚܙܩܝܐܝܠ ܢܒܝܐ܂ ܐܬܚܙܝܬ ܬܘܒ ܓܠܝܐܝܬ ܚܝܬ ܡܝ̈ܬܐ܂ ܟܕ ܐܦܩܗ ܐܠܗܐ ܠܦܩܥܬܐ܂ ܘܚܘܝܗ ܓܪ̈ܡܐ ܣܓ̈ܝܐܐ܂ ܘܐܥܒܪܗ ܥܠܝܗܘܢ ܚܕܪ̈ܝܗܘܢ ܘܐܡܪ ܠܗ܂ ܚܝ̈ܝܢ ܓܪ̈ܡܐ ܗܠܝܢ ܒܪܢܫܐ܂ ܘܐܡܪ ܠܗ ܚܙܩܝܐܝܠ܂ ܐܢܬ ܗܘ ܝܕܥ ܡܪܐ ܡܪ̈ܘܬܐ܂ ܘܐܡܪ ܠܗ ܡܪܝܐ܂ ܐܬܢܒܐ ܒܪܢܫܐ ܥܠ ܓܪ̈ܡܐ ܗܠܝܢ܂ ܐܬܢܒܐ ܘܐܡܪ ܠܓܪ̈ܡܐ ܝܒܝ̈ܫܐ܂ ܫܡܥܘ ܦܬܓܡܗ ܕܡܪܐ ܡܪ̈ܘܬܐ܂ ܘܟܕ ܐܫܡܥ ܐܢܘܢ ܦܬ̈ܓܡܐ ܗܠܝܢ܂ ܗܘܐ ܙܘܥܐ ܘܩܠܐ܂ ܘܐܬܟܢܫܘ ܓܪ̈ܡܐ܂ ܐܦ ܐܝܠܝܢ ܕܡܕܩܩܘ ܡܕܩܩܝܢ ܗܘܘ܂ ܘܡܬܒܪܝܢ ܗܘܘ܂ ܘܚܙܐ ܐܢܘܢ ܢܒܝܐ ܘܬܡܗ܂ ܟܕ ܡܢ ܟܠ ܦܢ̈ܝܢ ܐܬܝܢ ܗܘܘ܂ ܘܓܪܡܐ ܠܚܒܪܗ ܡܩܒܠ ܗܘܐ܂ ܘܫܪܝܬܐ ܠܘܬ ܒܪܬ ܙܘܓܗ ܩܪܒܬ܂ ܘܐܬܪܟܒܘ ܚܕ ܥܠ ܚܕ܂ ܘܝܒܝܫܘܬܗܘܢ ܪܛܒܬ܂ ܘܐܬܠܦܦ ܫܪ̈ܝܬܐ ܒܓ̈ܝܕܐ܂ ܘܪܬܚ ܕܡܐ ܒܫܪ̈ܝܢܐ܂ ܘܐܬܩܪܡ ܡܫܟܐ ܥܠ ܒܣܪܐ܂ ܘܝܥܐ ܣܥܪܐ ܒܟܝܢܗ܂ ܘܫܕܝܢ ܗܘܘ܂ ܘܪܘܚܐ ܠܝܬ ܗܘܬ ܒܗܘܢ܂ ܗܝܕܝܢ ܬܘܒ ܦܩܕܗ ܠܢܒܝܐ ܘܐܡܪ ܠܗ܂ ܐܬܢܒܐ ܥܠ ܪܘܚܐ ܘܐܡܪ ܠܗ܂ ܬܝ ܪܘܚܐ ܡܢ ܐܪܒܥܬ ܪ̈ܘܚܐ܂ ܘܦܘܚܝ ܒܗܠܝܢ ܩ̈ܛܝܠܐ ܘܢܚܘܢ ܘܟܕ ܐܫܡܥ ܐܢܘܢ ܦܬܓܡܐ ܐܚܪܢܐ܂ ܥܠܬ ܒܗܘܢ ܪܘܚܐ܂ ܘܚܝܘ ܘܩܡܘ ܥܠ ܪ̈ܓܠܝܗܘܢ܂ ܚܝܠܐ ܕܛܒ ܣܓܝ܀

ܘܠܡܢܐ ܕܝܢ ܚܒܝܒܝ܂ ܡܢ ܚܕ ܦܬܓܡܐ܂ ܠܐ ܩܡܘ ܡܝ̈ܬܐ ܗܠܝܢ ܒܝܕ ܚܙܩܝܐܝܠ܂ ܘܐܫܬܡܠܝܬ ܩܝܡܬܗܘܢ܂ ܕܓܪ̈ܡܐ ܘܕܪܘܚܐ܂ ܕܗܐ ܒܚܕ ܦܬܓܡܐ ܐܬܪܟܒܘ ܓܪ̈ܡܐ܂ ܘܒܐܚܪܢܐ ܐܬܬ ܪܘܚܐ܂ ܐܠܐ ܡܛܠ ܕܬܟܬܪ ܓܡܝܪܘܬܐ ܠܘܬ ܡܪܢ ܝܫܘܥ ܡܫܝܚܐ܂ ܕܒܚܕ ܩܠܐ ܘܒܚܕ ܦܬܓܡܐ܂ ܡܩܝܡ ܒܐܚܪܝܬܐ ܠܟܠܗ ܦܓܪܗ ܕܐܕܡ܂ ܠܐ ܗܘܐ ܓܝܪ ܦܬܓܡܐ ܒܨܝܪ ܗܘܐ܂ ܐܠܐ ܡܝܬܝܢܗ ܙܥܘܪ ܗܘܐ܂ ܘܒܗܕܐ ܐܣܬܟܠ ܘܚܙܝ܂ ܕܐܦ ܐܠܝܐ ܘܐܠܝܫܥ ܬܠܡܝܕܗ܂ ܟܕ ܐܚܝܘ ܡܝ̈ܬܐ܂ ܠܐ ܗܘܐ ܒܚܕ ܦܬܓܡܐ ܐܩܝܡܘ ܐܢܘܢ܂ ܐܠܐ ܥܕܡܐ ܕܨܠܝܘ ܘܐܬܟܫܦܘ܂ ܘܐܘܚܪܘ ܥܕܢܐ ܠܐ ܙܥܘܪ܂ ܘܗܝܕܝܢ ܩܡܘ܀

ܘܐܦ ܡܪܢ ܒܡܐܬܝܬܗ ܗܝ ܩܕܡܝܬܐ܂ ܐܚܝ ܬܠܬܐ ܡܝ̈ܬܐ܂ ܕܬܫܪ ܣܗܕܘܬܐ ܕܬܠܬ܂ ܘܒܬܪ̈ܝܢ ܬܪ̈ܝܢ ܦܬ̈ܓܡܝܢ ܐܩܝܡ ܠܚܕ ܚܕ ܡܢܗܘܢ܂ ܠܒܪܗ ܓܝܪ ܕܐܪܡܠܬܐ܂ ܟܕ ܐܚܝܗ܂ ܩܪܝܗܝ ܬܪ̈ܬܝܢ ܙܒ̈ܢܝܢ܂ ܟܕ ܐܡܪ ܠܗ܂ ܥܠܝܡܐ ܥܠܝܡܐ ܩܘܡ܂ ܘܚܝܐ ܘܩܡ܂ ܘܠܒܪܬܗ ܬܘܒ ܕܪܒ ܟܢܘܫܬܐ܂ ܩܪܗ ܬܪܬܝܢ ܙܒ̈ܢܝܢ ܟܕ ܐܡܪ ܠܗ܂ ܛܠܝܬܐ ܛܠܝܬܐ ܩܘܡܝ܂ ܘܬܒܬ ܪܘܚܗ ܘܩܡܬ܂ ܘܟܕ ܡܝܬ ܠܥܙܪ ܘܐܙܠ ܠܒܝܬ ܩܒܘܪܐ܂ ܡܨܠܝܘ ܨܠܝ܂ ܘܩܪܐ ܒܩܠܐ ܪܡܐ ܘܐܡܪ܂ ܠܥܙܪ ܬܐ ܠܒܪ܂ ܘܚܝܐ ܘܢܦܩ ܡܢ ܩܒܪܗ܀

ܘܗܢܐ ܟܠܗ ܕܐܦܝܣܬܟ܂ ܕܒܬܪ̈ܝܢ ܬܪ̈ܝܢ ܦܬܓܡ̈ܝܢ ܩܡܘ ܡܝ̈ܬܐ ܗܠܝܢ܂ ܡܛܠ ܕܬܪ̈ܬܝܢ ܩܝ̈ܡܢ ܗܘܝܢ ܒܗܘܢ܂ ܚܕܐ ܗܝ ܩܝܡܬܐ܂ ܘܕܬܪ̈ܬܝܢ ܗܝ ܕܥܬܝܕܐ܂ ܡܛܠ ܕܒܗܝ ܩܝܡܬܐ ܕܩܝܡܝܢ ܒܗ ܟܠܗܘܢ ܒ̈ܢܝܢܫܐ܂ ܬܘܒ ܠܐ ܢܦܠܐ܂ ܘܒܚܕ ܦܬܓܡܐ ܕܐܠܗܐ ܕܒܝܕ ܡܫܝܚܗ ܡܫܬܕܪ܂ ܩܝܡܝܢ ܟܠܗܘܢ ܡܝ̈ܬܐ ܐܝܟ ܪܦܦ ܥܝܢܐ ܩܠܝܠܐܝܬ܂ ܡܛܠ ܕܠܐ ܗܘܐ ܙܥܘܪ ܘܒܨܝܪ ܡܝܬܝܢܗ܂ ܡܛܠ ܕܒܚܕ ܦܬܓܡܐ ܕܩܪܐ܂ ܡܫܡܥ ܠܟܠܗܘܢ ܣܘ̈ܦܐ܂ ܘܫܘܪܝܢ ܘܩܝܡܝܢ ܟܠܗܘܢ ܕܪܡܝܢ܂ ܘܠܐ ܗܦܟ ܦܬܓܡܐ ܠܘܬ ܡܫܕܪܢܗ ܣܪܝܩܐܝܬ܂ ܐܠܐ ܐܝܟ ܕܟܬܝܒ ܒܐܫܥܝܐ ܢܒܝܐ܂ ܕܡܕܡܐ ܠܗ ܠܦܬܓܡܐ ܒܡܛܪܐ ܘܒܬܠܓܐ܂ ܐܡܪ ܓܝܪ܂ ܕܐܝܟ ܕܢܚܬ ܡܛܪܐ ܘܬܠܓܐ ܡܢ ܫܡܝܐ܂ ܘܠܬܡܢ ܠܐ ܗܦܟ܂ ܐܠܐ ܡܘܥܐ ܠܐܪܥܐ ܘܡܘܠܕ ܠܗ܂ ܘܝܗܒ ܙܪܥܐ ܠܙܪܘܥܐ܂ ܘܠܚܡܐ ܠܡܐܟܘܠܬܐ܂ ܗܟܢܐ ܢܗܘܐ ܦܬܓܡ ܕܢܦܩ ܡܢ ܦܘܡܝ܂ ܘܠܐ ܢܗܦܘܟ ܠܘܬܝ ܣܪܝܩܐܝܬ܂ ܐܠܐ ܐܢ ܥܒܕ ܡܕܡ ܕܨܒܢܐ܂ ܘܫܠܡ ܕܫܕܪܬܗ܂ ܡܛܪܐ ܓܝܪ ܘܬܠܓܐ܂ ܠܐ ܗܦܟܝܢ ܠܫܡܝܐ܂ ܡܛܠ ܕܨܒܝܢ ܡܫܕܪܢܗܘܢ ܒܐܪܥܐ ܓܡܪܝܢ܂ ܘܦܬܓܡܐ ܕܡܫܕܪ ܒܝܕ ܡܫܝܚܗ܂ ܕܗܘ ܡܠܬܗ ܘܦܬܓܡܗ܂ ܗܦܟ ܠܘܬܗ ܒܚܝܠܐ ܣܓܝܐܐ܂ ܡܛܠ ܕܟܕ ܐܬܐ ܘܡܝܬܐ ܠܗ܂ ܢܚܬ ܒܕܡܘܬ ܡܛܪܐ ܘܬܠܓܐ܂ ܘܝܥܝܢ ܒܗ ܟܠܗܘܢ ܙܪ̈ܥܘܢܐ܂ ܘܛܥܢܝܢ ܒܗ ܦܐܪ̈ܐ ܙܕܝ̈ܩܐ܂ ܘܗܦܟ ܦܬܓܡܐ ܠܘܬ ܡܫܕܪܢܗ܂ ܘܠܐ ܗܘܐ ܣܪܝܩܐܝܬ ܗܘܝܐ ܡܐܙܠܬܗ܂ ܐܠܐ ܗܟܢܐ ܐܡܪ ܩܕܡ ܡܫܕܪܢܗ܂ ܗܐ ܐܢܐ ܘܒ̈ܢܝܐ ܕܝܗܒ ܠܝ ܡܪܝܐ܂ ܘܗܘ ܗܢܐ ܩܠܐ ܕܚܐܝܢ ܒܗ ܡܝ̈ܬܐ܂ ܦܪܘܩܢ ܣܗܕ ܥܠܘܗܝ܂ ܟܕ ܐܡܪ܂ ܕܬܐܬܐ ܫܥܬܐ܂ ܕܐܦ ܡܝ̈ܬܐ ܢܫܡܥܘܢ ܩܠܗ ܕܒܪܗ ܕܐܢܫܐ܂ ܘܢܦܩܘܢ ܡܢ ܩܒܪ̈ܝܗܘܢ܂ ܐܝܟ ܕܟܬܝܒ܂ ܕܒܪܫܝܬ ܩܠܐ ܗܘܐ ܕܗܘ ܡܠܬܐ܂ ܬܘܒ ܐܡܪ܂ ܕܡܠܬܐ ܦܓܪܐ ܗܘܬ ܘܐܓܢܬ ܒܢ܂ ܘܗܘ ܗܢܐ ܩܠܗ ܕܐܠܗܐ܂ ܙܥܩ ܡܢ ܪܘܡܐ܂ ܘܡܩܝܡ ܠܟܠܗܘܢ ܡܝ̈ܬܐ܀

ܬܘܒ ܐܦܝܣ ܡܪܢ ܠܙܕܘܩ̈ܝܐ܂ ܥܠ ܚܝܬ ܡܝ̈ܬܐ܂ ܟܕ ܐܝܬܝܘ ܠܗ ܡܬܠܐ ܕܐܢܬܬܐ ܚܕܐ܂ ܕܠܫܒܥܐ ܓܒܪ̈ܝܢ ܗܘܬ܂ ܘܐܡܪܝܢ ܠܗ܂ ܕܗܐ ܐܢܬܬܐ ܗܘܬ ܕܟܠܗܘܢ܂ ܒܚܝܬ ܡܝ̈ܬܐ܂ ܠܐܝܢܐ ܡܢܗܘܢ ܬܗܘܐ܂ ܗܝܕܝܢ ܐܡܪ ܠܗܘܢ ܡܪܢ܂ ܕܣܓܝ ܛܥܝܢ ܐܢܬܘܢ܂ ܘܠܐ ܝܕܥܝܢ ܐܢܬܘܢ ܟܬ̈ܒܐ܂ ܘܠܐ ܚܝܠܗ ܕܐܠܗܐ܂ ܐܝܠܝܢ ܓܝܪ ܕܠܗܘ ܥܠܡܐ ܫܘܘ܂ ܘܠܗܝ ܩܝܡܬܐ ܕܡܢ ܒܝܬ ܡܝ̈ܬܐ܂ ܠܐ ܓܒܪ̈ܐ ܢܣܒܝܢ ܢܫ̈ܐ܂ ܘܐܦܠܐ ܠܓܒܪ̈ܐ ܗܘܝܢ ܢܫ̈ܐ܂ ܡܛܠ ܕܠܡܡܬ ܠܐ ܡܫܟܚܝܢ܂ ܡܛܠ ܕܐܝܟ ܡܠܐ̈ܟܐ ܐܢܘܢ ܕܐܠܗܐ܂ ܘܒܢ̈ܝܐ ܕܩܝܡܬܐ܂ ܥܠ ܩܝܡܬܐ ܕܝܢ ܕܢܩܘܡܘܢ ܡܝ̈ܬܐ܂ ܠܐ ܩܪܝܬܘܢ ܒܟܬܒܐ ܕܐܡܪ ܐܠܗܐ ܠܡܘܫܐ ܡܢ ܣܢܝܐ܂ ܕܐܢܐ ܐܢܐ ܐܠܗܗ ܕܐܒܪܗܡ ܘܕܐܝܣܚܩ ܘܕܝܥܩܘܒ܂ ܘܗܐ ܐܠܗܐ ܠܐ ܗܘܐ ܕܡܝ̈ܬܐ܂ ܟܠܗܘܢ ܓܝܪ ܚܝ̈ܝܢ ܐܢܘܢ ܠܗ܀

ܘܐܝܬ ܕܐܦ ܟܕ ܚܝ̈ܝܢ ܠܐܠܗܐ ܡܝ̈ܬܐ ܐܢܘܢ܂ ܣܡ ܠܗ ܕܝܢ ܦܘܩܕܢܐ ܠܐܕܡ ܘܐܡܪ ܠܗ܂ ܕܒܝܘܡܐ ܕܐܟܠ ܐܢܬ ܡܢ ܐܝܠܢܐ܂ ܡܘܬܐ ܬܡܘܬ܂ ܘܡܢ ܒܬܪ ܕܥܒܪ ܥܠ ܦܘܩܕܢܐ ܘܐܟܠ܂ ܚܝܐ ܬܫܥܡܐܐ ܘܬܠܬܝܢ ܫܢ̈ܝܢ܂ ܘܠܐܠܗܐ ܡܝܬܐ ܚܫܝܒ ܗܘܐ ܠܗ ܒܚܛܗ̈ܘܗܝ܂ ܕܬܫܪ ܠܟ ܕܚܛܝܐ ܗܘ ܐܬܩܪܝ ܡܝܬܐ܂ ܘܐܦ ܟܕ ܚܝ܂ ܐܢܐ ܐܦܝܣܟ܂ ܗܟܢܐ ܓܝܪ ܟܬܝܒ ܒܚܙܩܝܐܝܠ ܢܒܝܐ܂ ܕܚܝ ܐܢܐ ܐܡܪ ܡܪܐ ܡܪ̈ܘܬܐ܂ ܕܠܐ ܨܒܢܐ ܒܡܘܬܗ ܕܡܝܬܐ ܚܛܝܐ܀

ܘܐܦ ܡܪܢ ܐܡܪ ܠܗܘ ܓܒܪܐ ܕܐܡܪ ܠܗ܂ ܕܐܙܠ ܐܩܒܘܪ ܠܐܒܝ ܘܐܬܐ ܠܘܬܟ܂ ܘܐܡܪ ܠܗ ܡܪܢ܂ ܫܒܘܩ ܡܝ̈ܬܐ ܩܒܪܝܢ ܡܝ̈ܬܝܗܘܢ܂ ܘܐܢܬ ܙܠ ܣܒܪ ܡܠܟܘܬܗ ܕܐܠܗܐ܂ ܐܝܟܢܐ ܕܝܢ ܡܫܬܡܥܐ ܠܟ ܡܠܬܐ ܗܕܐ ܐܘ ܚܒܝܒܝ܂ ܚܙܝܬ ܡܡܬܘܡ ܡܝ̈ܬܐ ܕܩܒܪ̈ܝܢ ܡܝ̈ܬܝܗܘܢ܂ ܐܘ ܐܝܟܢܐ ܩܐܡ ܡܝܬܐ ܠܡܩܒܪ ܡܝܬܐ܂ ܐܠܐ ܗܢܐ ܦܝܣܐ ܩܒܠ ܡܢܝ܂ ܕܚܛܝܐ ܟܕ ܚܝ ܡܝܬܐ ܗܘ ܠܐܠܗܐ܂ ܘܙܕܝܩܐ ܟܕ ܡܝܬ܂ ܠܐܠܗܐ ܚܝ ܗܘ܂ ܗܢܐ ܓܝܪ ܡܘܬܐ ܫܢܬܐ ܗܘ܂ ܐܝܟ ܕܐܡܪ ܕܘܝܕ܂ ܕܐܢܐ ܫܟܒܬ ܘܕܡܟܬ ܘܐܬܬܥܝܪܬ܂ ܬܘܒ ܐܡܪ ܐܫܥܝܐ ܕܢܬܥܝܪܘܢ ܫܟܒ̈ܝ ܥܦܪܐ܂ ܘܡܪܢ ܐܡܪ ܥܠ ܒܪܬܗ ܕܪܒ ܟܢܘܫܬܐ܂ ܕܛܠܝܬܐ ܠܐ ܡܝܬܬ܂ ܐܠܐ ܡܕܡܟ ܗܘ ܕܡܟܐ܂ ܘܥܠ ܠܥܙܪ ܐܡܪ ܠܬܠܡܝ̈ܕܘܗܝ܂ ܕܠܥܙܪ ܪܚܡܢ ܫܟܒ܂ ܐܠܐ ܐܙܠܢܐ ܕܐܥܝܪܝܘܗܝ܂ ܘܫܠܝܚܐ ܐܡܪ ܕܟܠܢ ܢܕܡܟ܂ ܐܠܐ ܠܐ ܟܘܠܢ ܢܬܚܠܦ܂ ܘܬܘܒ ܐܡܪ ܕܥܠ ܐܝܠܝܢ ܕܕܡܟܝܢ ܠܐ ܬܗܘܐ ܟܪܝܐ ܠܟܘܢ܀

ܡܢ ܡܘܬܐ ܕܝܢ ܬܢܝܢܐ ܘܠܐ ܠܢ ܠܡܕܚܠ܂ ܗܘ ܕܡܠܐ ܒܟܝܐ ܘܚܘܪܩ ܫ̈ܢܐ܂ ܘܬܢܚ̈ܬܐ ܘܕܘܘ̈ܢܐ܂ ܗܘ ܕܥܡܪ ܒܚܫܘܟܐ ܒܪܝܐ܂ ܛܘܒܝܗܘܢ ܕܝܢ ܠܡܗ̈ܝܡܢܐ ܘܠܙܕܝ̈ܩܐ܂ ܒܗܝ ܩܝܡܬܐ ܕܡܣܟܝܢ܂ ܕܢܬܬܥܝܪܘܢ ܘܢܩܒܠܘܢ ܡܘ̈ܠܟܢܝܗܘܢ ܛܒ̈ܐ܂ ܘܥܘ̈ܠܐ ܕܠܐ ܡܗܝܡܢܝܢ ܒܩܝܡܬܐ܂ ܘܝ ܠܗܘܢ ܡܢ ܡܕܡ ܕܢܛܝܪ ܠܗܘܢ܂ ܦܩܚ ܗܘܐ ܠܗܘܢ܂ ܐܠܘ ܠܐ ܩܝܡܝܢ ܗܘܘ܂ ܐܝܟ ܡܕܡ ܕܡܗܝ̈ܡܢܝܢ܂ ܡܛܠ ܕܥܒܕܐ ܕܡܢ ܡܪܗ ܢܓܕܐ ܘܐܣܘܪ̈ܐ ܡܛܝܒ ܠܗ܂ ܡܐ ܕܕܡܟ ܠܐ ܨܒܐ ܕܢܬܬܥܝܪ܂ ܕܝܕܥ ܕܡܐ ܕܗܘܐ ܨܦܪܐ ܘܐܬܥܝܪ܂ ܡܢܓܕ ܠܗ ܡܪܗ ܘܐܣܪ ܠܗ܂ ܘܥܒܕܐ ܛܒܐ ܐܝܢܐ ܕܕܫ̈ܢܐ ܐܫܬܘܕܝ ܠܗ ܡܪܗ܂ ܡܣܟܐ ܕܐܡܬܝ ܢܗܘܐ ܨܦܪܐ܂ ܘܢܩܒܠ ܡܘܗ̈ܒܬܐ ܡܢ ܡܪܗ܂ ܘܐܦ ܟܕ ܡܕܡܟ ܢܕܡܟ܂ ܒܚܠܡܗ ܚܙܐ܂ ܐܝܟ ܗܘ ܕܡܪܗ ܝܗܒ ܠܗ܂ ܗܘ ܡܕܡ ܕܐܫܬܘܕܝ ܠܗ܂ ܘܚܕܐ ܒܚܠܡܗ ܘܪܘܙ ܘܦܨܝܚ܂ ܘܥܘܠܐ ܫܢܬܗ ܠܐ ܒܣܡܐ ܠܗ܂ ܕܪܢܐ ܕܗܐ ܡܛܝ ܠܗ ܨܦܪܐ܂ ܘܬܒܝܪ ܠܒܗ ܒܚܠܡܗ܂ ܘܙܕܝ̈ܩܐ ܕܡܟܝܢ ܘܫܢܬܗܘܢ ܒܣܡܐ ܠܗܘܢ܂ ܒܐܝܡܡܐ ܘܒܠܠܝܐ܂ ܘܟܠܗ ܠܠܝܐ ܕܢܓܝܪ ܠܐ ܪܓܫܝܢ܂ ܘܐܝܟ ܚܕܐ ܫܥܐ ܚܫܝܒ ܒܥܝ̈ܢܝܗܘܢ܂ ܗܝܕܝܢ ܒܡܛܪܬܐ ܕܨܦܪܐ ܡܛܛܥܝܪܝܢ ܘܚܕܝܢ܂ ܘܥܘ̈ܠܐ ܫܢܬܗܘܢ ܪܡܝܐ ܥܠܝܗܘܢ܂ ܘܕܡܝܢ ܠܓܒܪܐ ܕܪܡܐ ܒܐܫܬܐ ܪܒܬܐ ܘܥܡܝܩܬܐ܂ ܘܡܬܗܦܟ ܒܥܪܣܗ ܠܟܐ ܘܠܟܐ܂ ܘܪܗܝܒ ܠܠܝܐ ܟܘܠܗ܂ ܕܢܓܪ ܠܗ ܥܠܘܗܝ܂ ܘܕܚܠ ܡܢ ܨܦܪܐ ܕܡܚܝܒ ܠܗ ܡܪܗ܀

ܗܝܡܢܘܬܢ ܕܝܢ ܗܟܢܐ ܡܚܘܝܐ܂ ܕܡܐ ܕܫܟܒܝܢ ܒܢ̈ܝ ܐܢܫܐ ܗܕܐ ܫܢܬܐ܂ ܕܡܟܝܢ ܠܗܘܢ܂ ܘܠܐ ܝܕܥܝܢ ܛܒ ܡܢ ܒܝܫ܂ ܘܠܐ ܙܕܝ̈ܩܐ ܡܩܒܠܝܢ ܡܘ̈ܠܟܢܝܗܘܢ܂ ܘܐܦܠܐ ܥܘ̈ܠܐ ܡܣܡ ܒܪܫܐ ܒܝܫܐ܂ ܥܕܡܐ ܕܐܬܐ ܕܝܢܐ܂ ܘܦܪܫ ܒܝܬ ܝܡܝܢܐ ܠܣܡܠܐ܂ ܘܐܬܛܦܝܣ ܡܢ ܡܕܡ ܕܟܬܝܒ܂ ܕܥܕܡܐ ܕܝܬܒ ܕܝܢܐ܂ ܘܡܬܦܬܚܝܢ ܣܦܪ̈ܐ ܩܕܡܘܗܝ܂ ܘܡܬܩܪܝܢ ܛܒ̈ܬܐ ܘܒܝ̈ܫܬܐ܂ ܐܝܠܝܢ ܕܦܠܚܘ ܛܒ̈ܬܐ ܡܩܒܠܝܢ ܛܒ̈ܬܐ ܡܢ ܛܒܐ܂ ܘܕܣܥܪܘ ܒܝܫ̈ܬܐ ܡܩܒܠܝܢ ܒܝܫ̈ܬܐ ܡܢ ܕܝܢܐ ܟܐܢܐ܂ ܠܘܬ ܛܒ̈ܐ ܓܝܪ ܠܐ ܡܚܠܦ ܟܝܢܗ܂ ܘܗܘܐ ܟܐܢܐ܂ ܡܛܠ ܕܟܢܐܝܬ ܠܣܓ̈ܝܐܐ ܡܚܝܒ܂ ܘܠܘܬ ܒܝܫ̈ܐ ܡܚܠܦ ܟܝܢܗ܂ ܒܗܢܐ ܥܠܡܐ ܕܡܬܛܠܩܐ ܠܗ ܛܝܒܘܬܐ ܒܟܐܢܘܬܐ܂ ܘܗܘܐ ܠܗ ܠܟܠ ܟܐܢܐ܂ ܘܠܐ ܡܫܬܘܬܦܐ ܛܝܒܘܬܐ ܥܡ ܟܢܘܬܐ/ܟܐܢܘܬܐ/ ܠܘܬܗܘܢ܂ ܐܝܟ ܕܠܐ ܥܕܪܬ ܛܝܒܘܬܐ ܠܣܘܓܦܢܐ܂ ܘܟܢܘܬܐ ܠܛܝܒܘܬܐ܂ ܛܝܒܘܬܐ ܓܝܪ ܪܚܝܩܐ ܗܝ ܡܢ ܕܝܢܐ ܘܟܢܘܬܐ/ܘܟܐܢܘܬܐ/ ܕܝܢܐ ܗܘ ܡܓܪܓܐ܂ ܘܡܢ ܕܩܪܝܒܐ ܠܘܬܗ ܛܝܒܘܬܐ܂ ܢܬܦܢܐ ܠܗ ܠܘܬܗ܂ ܘܠܐ ܡܫܠܡܐ ܠܗ ܒܝܕ ܟܐܢܘܬܐ܂ ܕܠܐ ܬܚܝܒܝܘܗܝ܂ ܟܕ ܒܘܨܪ̈ܘܗܝ ܬܬܒܥ ܒܐܝܕܗ܂ ܘܡܢ ܕܛܝܒܘܬܐ ܪܚܝܩܐ ܡܢܗ܂ ܟܢܘܬܐ/ܟܐܢܘܬܐ/ ܡܥܠܐ ܠܗ ܠܒܘܩܝܢܐ܂ ܘܒܗ ܡܬܚܝܒ ܘܐܙܠ ܠܬܫܢܝܩܐ܀

ܫܡܥ ܕܝܢ ܚܒܝܒܝ ܦܝܣܐ ܗܢܐ܂ ܕܦܘܪܥܢܐ ܒܚܪܬܐ ܗܘܐ܂ ܪܥܝܐ ܓܝܪ ܟܕ ܦܪܫ ܓܙܪܗ܂ ܘܐܩܝܡ ܡܢ ܝܡܝܢܗ ܘܡܢ ܣܡܠܗ܂ ܥܕܡܐ ܕܩܒܠ ܛܝܒܘܬܐ ܕܛܒ̈ܐ܂ ܘܗܝܕܝܢ ܐܘܪܬ ܐܢܘܢ ܡܠܟܘܬܐ܂ ܘܥܕܡܐ ܕܪܫܐ ܠܒܝ̈ܫܐ ܘܐܬܚܝܒܘ܂ ܗܝܕܝܢ ܫܕܪ ܐܢܘܢ ܠܬܫܢܝܩܐ܂ ܘܐܝܠܝܢ ܕܫܕܪܘ ܐܝ̈ܙܓܕܐ ܒܬܪ ܡܠܟܐ܂ ܘܐܡܪܘ ܕܠܐ ܢܗܘܐ ܗܢܐ ܥܠܝܢ ܡܠܟܐ܂ ܥܕܡܐ ܕܢܣܒ ܡܠܟܘܬܐ ܘܗܦܟ܂ ܘܗܝܕܝܢ ܡܬܢܟܣܝܢ ܒܥܠܕܒ̈ܒܘܗܝ ܩܕܡܘܗܝ܂ ܘܦ̈ܥܠܐ ܕܪܗܛܘ ܘܠܐܝܘ ܒܟܪܡܐ܂ ܥܕܡܐ ܕܫܠܐ ܥܡܠܐ ܠܐ ܢܣܒܝܢ ܐܓܪܐ܂ ܘܬܓܪ̈ܐ ܕܩܒܠܘ ܟܣܦܐ܂ ܥܕܡܐ ܕܐܬܐ ܡܪܐ ܟܣܦܐ܂ ܘܗܝܕܝܢ ܬܒܥ ܪܒܝܬܐ܂ ܘܒܬ̈ܘܠܬܐ ܕܡܣܟܝܢ ܠܚܬܢܐ܂ ܢܡ ܘܕܡܟ ܕܐܘܚܪ ܠܡܐܬܐ܂ ܥܕܡܐ ܕܢܫܡܥܢ ܩܥܬܐ܂ ܘܗܝܕܝܢ ܡܬܥܝܪܢ ܘܡܬܩܢܢ ܠܡ̈ܦܕܝܗܝܢ܂ ܘܥܐܠܢ ܚܟܝ̈ܡܬܐ܂ ܘܡܬܟܠܝܢ ܣܟ̈ܠܬܐ ܠܒܪ܂ ܘܐܝܠܝܢ ܕܪܗܛܘ ܒܗܝܡܢܘܬܐ܂ ܒܠܥܕܝܢ ܕܝܠܢ ܠܐ ܡܬܓܡܪܝܢ܀

ܡܢ ܗܠܝܢ ܟܠܗܝܢ ܐܣܬܟܠ ܚܒܝܒܝ܂ ܘܗܘܬ ܫܪܝܪܐ ܠܟ ܕܥܕܟܝܠ ܐܢܫ ܠܐ ܩܒܠ ܦܘܪܥܢܗ܂ ܠܐ ܓܝܪ ܙܕܝ̈ܩܐ ܐܝܪܬܘ ܡܠܟܘܬܐ܂ ܐܦܠܐ ܒܝ̈ܫܐ ܐܙܠܘ ܠܬܫܢܝܩܐ܂ ܘܪܥܝܐ ܥܕܟܝܠ ܠܐ ܦܪܫ ܓܙܪܗ܂ ܘܦܥ̈ܠܐ ܗܐ ܒܟܪܡܐ ܠܐܝܢ܂ ܘܥܕܟܝܠ ܐܓܪܐ ܠܐ ܩܒܠܘ܂ ܘܬܓܪ̈ܐ ܗܐ ܡܬܗܦܟܝܢ ܒܟܣܦܐ܂ ܘܥܕܟܝܠ ܠܐ ܐܬܐ ܡܪܗܘܢ ܠܡܣܒ ܚܘܫܒܢܐ܂ ܘܡܠܟܐ ܐܙܠ ܠܡܣܒ ܡܠܟܘܬܐ܂ ܘܥܕܟܝܠ ܠܐ ܗܦܟ ܕܬܪ̈ܬܝܢ ܙܒ̈ܢܝܢ܂ ܘܗܠܝܢ ܒܬ̈ܘܠܬܐ ܕܡܣܟܝܢ ܠܚܬܢܐ܂ ܕܡܟܢ ܐܢܝܢ ܥܕܡܐ ܠܗܫܐ܂ ܘܠܩܥܬܐ ܗܘ ܡܣܟܝܢ ܘܡܬܥܝܪܢ܂ ܘܩܕ̈ܡܝܐ ܕܠܐܝܘ ܒܗܝܡܢܘܬܐ܂ ܥܕܡܐ ܕܐܬܝܢ ܐܚܪ̈ܝܐ ܠܐ ܡܬܓܡܪ̈ܝܢ܀

ܫܒܪ̈ܝ ܬܪܥܝܬܐ ܕܝܢ ܐܡܪܝܢ܂ ܕܐܢ ܐܢܫ ܕܝܢ ܠܐ ܩܒܠ ܦܘܪܥܢܐ܂ ܠܡܢܐ ܐܡܪ ܫܠܝܚܐ܂ ܕܐܡܬܝ ܕܢܥܢܕ ܡܢ ܦܓܪܐ ܠܘܬ ܡܪܢ ܢܗܘܐ܂ ܥܗܕ ܕܝܢ ܚܒܝܒܝ܂ ܕܥܠ ܗܢܐ ܫܪܒܐ܂ ܐܦܝܣܬܟ ܗܘܝܬ ܒܬܚܘܝܬܐ ܕܝܚ̈ܝܕܝܐ܂ ܕܠܘܬ ܡܪܢ܂ ܪܘܚܐ ܕܡܩܒܠܝܢ ܙܕܝ̈ܩܐ܂ ܐܙܠܐ ܠܟܝܢܗ ܫܡܝܢܐ܂ ܥܕܡܐ ܠܙܒܢ ܩܝܡܬܐ܂ ܕܐܬܝܐ ܠܡܠܒܫ ܦܓܪܐ ܕܥܡܪܬ ܒܗ܂ ܘܒܟܠܙܒܢ ܡܥܗܕܐ ܥܠܘܗܝ ܩܕܡ ܐܠܗܐ܂ ܘܡܚܦܛܐ ܥܠ ܩܝܡܬܗ ܕܦܓܪܐ܂ ܗܘ ܕܥܡܪܬ ܒܗ܂ ܐܝܟ ܕܐܡܪ ܐܫܥܝܐ ܢܒܝܐ܂ ܥܠ ܥܕܬܐ ܕܡܢ ܥܡ̈ܡܐ܂ ܕܢܗܘܘܢ ܐܡܝܢܝܢ ܘܩܝܡܝܢ܂ ܡܕܟܪ̈ܢܝܟܝ ܩܕܡ ܡܪܝܐ܂ ܘܠܐ ܬܬܠܝܢ ܠܗܘܢ ܫܠܝܐ܂ ܠܥܘ̈ܠܐ ܕܝܢ ܠܝܬ ܠܗܘܢ ܡܕܟܪܢܐ ܩܕܡ ܡܪܝܐ܂ ܡܛܠ ܕܪܚܝܩܐ ܗܝ ܡܢܗܘܢ ܪܘܚܐ ܕܩܘܕܫܐ܂ ܡܛܠ ܕܒܢܦܫ ܐܢܘܢ܂ ܘܢܦܫܢܐܝܬ ܡܬܛܡܪܝܢ܀

ܘܬܘܒ ܡܬܬܩܠܝܢ ܝܘ̈ܠܦܢܐ ܡܐ̈ܢܘܗܝ ܕܒܝܫܐ ܒܡܠܬܐ ܕܐܡܪ ܡܪܢ܂ ܕܠܐ ܐܢܫ ܣܠܩ ܠܫܡܝܐ܂ ܐܠܐ ܐܢ ܗܘ ܕܢܚܬ ܡܢ ܫܡܝܐ ܒܪܗ ܕܐܢܫܐ܂ ܗܘ ܕܐܝܬܘܗܝ ܗܘܐ ܒܫܡܝܐ܂ ܘܐܡܪܝܢ ܕܗܐ ܡܪܢ ܣܗܕ܂ ܕܦܓܪܐ ܐܪܥܢܐ ܠܐ ܣܠܩ ܠܫܡܝܐ܂ ܗܕܐ ܚܝܠܗ ܠܐ ܡܕܪܟܝܢ ܗܕܝ̈ܘܛܐ܂ ܟܕ ܐܦܝܣ ܓܝܪ ܡܪܢ ܠܢܝܩܕܡܘܣ܂ ܠܐ ܐܕܪܟ ܚܝܠܗ ܕܡܠܬܐ܂ ܗܝܕܝܢ ܐܡܪ ܠܗ ܡܪܢ܂ ܕܠܐ ܐܢܫ ܣܠܩ ܠܫܡܝܐ܂ ܘܢܚܬ ܕܢܫܬܥܐ ܠܟܘܢ܂ ܡܕܡ ܕܐܝܬ ܬܡܢ܂ ܐܢ ܓܝܪ ܥܠ ܐܝܠܝܢ ܕܒܐܪܥܐ ܐܢܝܢ܂ ܐܡܪܬ ܠܟܘܢ܂ ܘܠܐ ܡܗܝܡܢܝܢ ܐܢܬܘܢ܂ ܐܝܟܢܐ ܐܢ ܐܡܪ ܠܟܘܢ ܥܠ ܐܝܠܝܢ ܕܒܫܡܝܐ ܐܢܝܢ ܬܗܝܡܢܘܢ܂ ܕܗܐ ܣܗܕܐ ܐܚܪܢܐ ܡܢ ܬܡܢ ܠܐ ܢܚܬ ܥܡܝ܂ ܕܢܣܗܕ ܥܠ ܐܝܠܝܢ ܕܒܫܡܝܐ ܐܢܝܢ ܘܬܗܝܡܢܘܢ܂ ܣܠܩ ܓܝܪ ܠܬܡܢ ܐܠܝܐ܂ ܘܠܐ ܢܚܬ܂ ܕܢܣܗܕ ܥܡܝ܂ ܘܬܫܪ ܣܗܕܘܬܐ ܕܬܪ̈ܝܢ܀

ܐܢܬ ܕܝܢ ܚܒܝܒܝ܂ ܠܐ ܢܗܘܐ ܠܟ ܦܘܠܓܐ ܥܠ ܚܝܬܡܝ̈ܬܐ܂ ܡܛܠ ܕܦܘܡܐ܂ ܚܝܐ ܣܗܕ܂ ܕܐܢܐ ܡܡܝܬ ܐܢܐ܂ ܘܐܢܐ ܡܚܐ ܐܢܐ܂ ܘܡܢ ܚܕ ܦܘܡܐ ܢܦܩ ܬܪ̈ܬܝܗܝܢ܂ ܘܐܝܟ ܕܫܪܝܪܐ ܠܢ ܕܡܡܝܬ܂ ܘܚܙܝܢ ܚܢܢ܂ ܘܐܦ ܕܡܚܐ ܫܪܝܪܐ ܘܡܗܝܡܢܐ܂ ܘܡܢ ܡܕܡ ܕܐܦܝܣܬܟ ܩܒܠ ܘܗܝܡܢ܂ ܕܒܝܘܡ ܩܝܡܬܐ ܢܩܘܡ ܦܓܪܟ ܒܫܠܡܘܬܐ܂ ܘܡܢ ܡܪܟ ܬܩܒܠ ܦܘܪܥܢܗ ܕܗܝܡܢܘܬܟ܂ ܘܒܡܕܡ ܕܗܝܡܢܬ ܬܚܕܐ ܘܬܬܒܣܡ܀