On Isaiah's Vision - ܥܲܠ ܚܙܵܬ̣ܵܐ ܕܲܣܪ̈ܵܦܹܐ ܕܲܚܙܵܐ ܐܹܫܲܥܝܵܐ

1 :ܫܒܝܼܚ ܒܵܪܘܿܝܵܐ ܕܲܒܼܓܸܠܝܵܢܹܗ ܡ̇ܘܪܸܒܼ ܥܲܒܼܕܵܘ̈ܗܝ 2 ܘܲܒܼܚܸܙܘܵܢܹ̈ܐ ܡܦܲܠܸܓܼ ܥܘܼܬܼܪܹܗ ܠܲܒܼܢܲܝ̈ ܒܲܝܬܹܿܗ ܀ 3 :ܫܘܹ̇ܐ ܠܫܘܼܒܼܚܵܐ ܕܟܲܕܼ ܠܵܐ ܚܲܣܝܼܪ ܡ̣ܢ ܬܸܫܒܿܘܿܚܬܵܐ 4 ܝܵܗܹ̇ܒܼ ܫܘܼܒܼܚܹܗ ܠܲܡܫܲܒܿܚܵܢܵܘ̈ܗܝ ܕܲܢܫܲܒܿܚܘܼܢܵܝܗܝ ܀ 5 :ܒܹܗܘ̣ ܫܘܼܒܼܚܹܗ ܘܠܵܐ ܡܸܬܿܬܵܘܣܲܦ ܫܘܼܒܼܚܵܐ ܠܫܘܼܒܼܚܵܐ 6 ܘܐܸܢ ܡܸܫܬܿܒܲܚ ܠܲܡܫܲܒܿܚܵܢܵܘ̈ܗܝ ܡ̇ܘܪܸܒܼ ܫܘܼܒܼܚܹܗ ܀ 7 :ܫܘܼܒܼܚܵܐ ܗ̄ܘ̣ ܟܠܹܗ ܘܡ̣ܢ ܬܸܫܒܿܘܿܚܬܹܿܗ ܡܠܹܝܢ ܬܘܼܩܵܢܵܘ̈ܗܝ 8 ܘܠܵܐ ܚܲܣܝܼܪܵܐ ܗ̄ܘ̣ ܘܡ̣ܢ ܡ̇ܘܗܲܒܼܬܹܗ ܡܦܲܪܢܸܣ ܟܠܵܐ ܀ 9 :ܕܠܵܐ ܪܘܼܟܵܒܼܵܐ ܗ̄ܘ̣ ܘܲܒܼܕܸܡ̈ܘܵܬܼܵܐ ܡܥܵܕܼ ܡܸܬܼܚܵܘܸܐ 10 ܕܠܵܐ ܒܲܪ̄̇ܒܼ ܩܵܠܵܐ ܗ̄ܘ̣ ܘܲܒܼܩܵܠ ܪܸ̈ܓܼܫܹܐ ܡܲܫܡܲܥ ܩܵܠܹܗ ܀ 11 :ܒܟܼܠ ܐܸܣܟܹܿܡܝܼ̈ܢ ܡܚܵܘܸܐ ܝܵܬܹܗ ܠܲܥܒܼܵܕܼ̇ ܐܝܼܕܵܘ̈ܗܝ 12 ܘܲܒܼܟܼܠ ܕܸܡ̈ܘܵܢ ܨܵܐܲܪ ܐ̄ܪ̈ܵܙܵܘܗܝ ܩܕܼܵܡ ܚܲܘܵܝܹ̈ܐ ܀ 13 :ܪܲܒܿܘܼܬܼ ܚܘܼܒܹܿܗ ܡܚܵܘܸܐ ܒܚܸܙܘ̤ܵܐ ܕܕܸܡ̈ܘܵܢ ܕܸܡ̈ܘܵܢ 14 ܕܲܒܼܠ̈ܠܵܬܼܵܐ ܢܓܲܪܸܓܼ ܐ̄ܢܵܫܵܐ ܠܡܸܩܪܲܒܼ ܨܨܹܐܕܼܵܘܗܝ ܀ 15 :ܚܵܘܝܼ ܠܐܵܕܼܵܡ ܚܙܵܬܼܵܐ ܕܕܼܵܡܝܵܐ ܠܪܸ̈ܓܼܫܲܝ ܦܲܓܼܪܹܗ 16 ܘܐܲܝܟ ܕܲܠܫܲܒܼܪܵܐ ܩ̣ܪܵܝܗܝ ܕܲܢܢܲܟܸܿܦ ܓܲܠܝܼܘܼܬܼ ܦܲܓܼܪܹܗ ܀ 17 :ܡܲܠܸܠ ܥܲܡ ܢܘܿܚ ܒܝܲܕܼ ܒܲܪ̄ܬܼ ܩܵܠܵܐ ܓܘܼܫܡܵܢܵܝܬܵܐ 18 ܘܐܲܠܦܹܗ ܕܢܸܬܿܒܸܿܕܼ ܒܹܝܬܼ ܦܘܼܨܵܝܵܐ ܠܹܗ ܘܲܠܟܼܠܵܐ ܀ 19 :ܩ̣ܪܵܐ ܠܐܲܒܼܪܵܗܵܡ ܘܬܲܪܓܸܿܡ ܥܲܡܹܗ ܐܲܝܟ ܠܸܫܵܢܹܗ 20 ܘܛܲܒܼ݂ܥܹܗ ܒܲܫܡܹܗ ܕܢܸܗܘܘܿܢ ܝܲܠܕܵܘ̈ܗܝ ܩܵܪܹܝܢ ܒܲܫܡܹܗ ܀ pb. 132 21 :ܐܵܘܚܸܕܼ ܚܲܝܠܹܗ ܒܐܝܼܕܲܝ̈ ܝܲܥܩܘܿܒܼ ܒܐܸܣܛܹܿܝܡ ܓܲܒܼܪܵܐ 22 ܘܚܵܘܝܹܗ ܠܡܹܐܚܲܕܼ ܕܲܪܵܐ ܟܲܣܝܵܐ ܒܪܸ̈ܓܼܫܹܐ ܓܠܲܝ̈ܵܐ ܀ 23 :ܠܥܸ݂ܙ ܥܲܡ ܝܵܘܣܸܦ ܠܸܥܙܵܐ ܕܕܼܵܡܹ̇ܐ ܠܕܼܵܐ ܓܸܒܼܛܵܝܹ̈ܐ 24 ܘܝܲܗ̣̄ܒܼ ܒܹܗ ܚܲܝܠܵܐ ܠܡܸܣܬܲܟܵܠܘܼ ܒܲܣܬܼܝܼܪ̈ܵܬܼܵܐ ܀ 25 :ܓܠ̣ܵܐ ܪܲܒܿܘܼܬܹܗ ܥܲܠ ܛܘܼܪ ܣܝܼܢܲܝ ܠܥܹܝܢ ܒܲܪ ܥܲܡܪܲܡ 26 ܘܲܡ̣ܠܵܝܗܝ ܪܘܼܚܵܐ ܠܡܸܫܬܲܥܵܝܘܼ ܥܲܠ ܬܘܼܩܵܢܵܘ̈ܗܝ ܀ 27 :ܨܵܪ ܬܲܚܘܼܝܼܬܼܵܐ ܕܒܲܣܝܼܡܘܼܬܹܗ ܩܕܼܵܡ ܐܹܠܝܼܵܐ 28 ܕܢܸܗܘܸܐ ܝܵ̇ܕܲܥ ܠܲܡܕܲܡ̇ܝܘܼ ܒܢܝܼܫܵܐ ܕܪ̈ܲܚܡܵܘܗܝ ܀ 29 :ܠܒܸܫ̣ ܐܵܦ ܗܵܫܵܐ ܐ̄ܣܟܹܿܡܵܐ ܦܲܐܝܵܐ ܘܩܵܡ̣ ܒܹܝܬܼ ܩܘܼܕܼܫܵܐ 30 ܕܢܸܓܼܠܸܐ ܠܐ̄̈ܢܵܫܵܐ ܪܲܒܿܘܼܬܼ ܫܘܼܒܼܚܹܗ ܕܠܵܐ ܡܸܬܿܕܲܪܟܵܐ ܀ 31 :ܒܫܘܼܒܼܚܵܐ ܪܲܒܵܐ ܨܒܼܵܐ ܕܲܢܚܵܘܸܐ ܢܦܲܫܹܐ ܠܐ̄ܢܵܫܵܐ 32 ܘܲܩ̣ܪܸܒܼ ܨܹܐܕܼܵܘܗܝ ܚܲܕܼ ܒܲܪܢܵܫܵܐ ܕܢܸܬܼܒܲܩܸܐ ܒܹܗ ܀ 33 :ܠܥܹܝܢ ܐܹܫܲܥܝܵܐ ܓܠ̣ܵܐ ܪܲܒܿܘܼܬܹܗ ܒܗܲܝܟܲܠ ܩܘܼܕܼܫܵܐ 34 ܘܐܲܩܝܼܡ ܣܸܕܼܪܹ̈ܐ ܕܲܡܫܲܝܵܢܹ̈ܐ ܕܲܢܩܲܕܿܫܘܼܢܵܝܗܝ ܀ 35 :ܙܵܚ ܡ̣ܢ ܪܵܘܡ̇ܐ ܘܲܫܪ̣ܵܐ ܒܥܘܼܡܩܵܐ ܠܵܘ ܒܲܟܼܝܵܢܵܐ 36 ܘܩܵܡ̣ ܥܲܠ ܐܲܪܥܵܐ ܠܵܘ ܒܲܫܪܵܪܵܐ ܐܸܠܵܐ ܒܲܫܡܵܐ ܀ 37 :ܟܲܢܸܫ ܠܥܝܼܪܹ̈ܐ ܩ̣ܪܵܐ ܠܡܲܠܲܐܟܹ̈ܐ ܪܡ݂ܲܙ ܠܲܟܼܪ̈ܘܿܒܹܐ 38 ܘܐܲܒܸܿܫ ܐܸܢܘܿܢ ܚܙܵܬܼܵܐ ܕܡܲܠܝܵܐ ܬܲܗܪܵܐ ܥܦܝܼܦܵܐ ܀ 39 :ܦܪ݂ܲܚܵܢܹ̈ܐ ܘܛܵܣܘ ܢܘܼܪ̈ܵܢܹܐ ܪܗܸܛܘ̣ ܩܲܠܝܼܠܹ̈ܐ 40 ܘܲܣܒ݂ܲܪܘ ܕܡ̣ܛܵܐ ܘܩܲܕܸܿܡ ܐܸܢܘܿܢ ܪܸܡܙܹܗ ܠܐܲܪܥܵܐ ܀ 41 :ܩܥ̣ܵܘ ܫܝܼܦܘܿܪܹ̈ܐ ܛܲܟܸܿܣܘ ܣܸܕܼܪܹ̈ܐ ܣܕܲܪܘ ܠܓܸܝܘܿܢܹ̈ܐ 42 ܘܲܚܠܵܦ ܙܲܝܢܵܐ ܠܒܸܫ̣ܘ ܚܹܝܠ ܪܘܼܚܵܐ ܠܡܸܬܼܚܲܝܵܠܘܼ ܀ 43 :ܚܙ̣ܵܩܘ ܪܵܕܹܝܢ ܒܐܲܦܲܝ̈ ܪܵܘܡ̇ܐ ܕܠܵܐ ܗܲܠ̈ܟܼܵܬܼܵܐ 44 ܘܚܹܝܠ ܐܝܼܬܼܘܼܬܼܵܐ ܒܹܝܬܼ ܣܸܕܼܪ̈ܲܝܗܘܿܢ ܕܠܵܐ ܫܘܼܢܵܝܵܐ ܀ 45 :ܚܙ̣ܵܩ ܚܹܝܠ ܡܲܠܟܵܐ ܥܲܡ ܫܘܼܠܛܵܢܵܐ ܕܲܡܠܸܟ ܡܲܠ̈ܟܹܿܐ 46 ܘܠܵܐ ܐܸܬܼܝܲܥܲܬ̤ ܐܘܼܪܚܵܐ ܒܐܵܐܲܪ ܬܚܹܝܬܼ ܪܸ̈ܓܼܠܲܝܗܘܿܢ ܀ 47 :ܢܚܸ̣ܬܼ ܦܘܼܩܕܵܢܵܐ ܕܚܲܝܠܵܐ ܟܲܣܝܵܐ ܘܚܲܝ̈ܠܵܘܵܬܼܵܐ 48 ܘܠܵܐ ܐ̄ܢܵܫ ܐܲܪܓܸܿܫ ܒܩܵܠ ܡܲܚܲܬܿܬܹܗ ܐܸܠܵܐ ܐܸܢ ܚܲܕܼ ܀ 49 :ܚܲܕܼ ܒܲܪܢܵܫܵܐ ܡ̣ܢ ܐ̄ܢܵܫܘܼܬܼܵܐ ܚܙ̣ܵܘ ܠܲܦܠܲܓܹܿܗ 50 ܘܩܵܡ̣ ܘܐܸܬܼܒܲܩܝܼ ܒܪܲܒܿܘܼܬܼ ܚܲܝܠܹܗ ܘܲܒܼܫܲܡܫܵܘ̈ܗܝ ܀ 51 :ܚܲܕܼ ܒܲܪܢܵܫܵܐ ܚܙ̣ܵܗ̇ ܠܲܚܙܵܬܹܗ ܠܵܘ ܒܲܚܙܵܬܼܵܐ 52 ܐܸܠܵܐ ܒܗܵܘܢܵܐ ܐܲܟܼܡܵܐ ܕܲܡܨܸܐ ܥܒܼܝܼܕܼܵܐ ܠܡܸܚܙܵܐ ܀ 53 :ܒܗܵܘܢܵܐ ܟܲܣܝܵܐ ܚܙ̣ܵܐ ܠܲܚܙܵܬܼܵܐ ܕܠܵܐ ܡܸܬܼܚܲܙܝܵܐ 54 ܘܲܒܼܪܥܝܵܢܵܐ ܥܲܠ̣ ܥܲܡ ܥܝܼܪܹ̈ܐ ܠܗܲܝܟܲܠ ܩܘܼܕܼܫܵܐ ܀ 55 :ܠܗܲܝܟܲܠ ܩܘܼܕܼܫܵܐ ܥܲܠ̣ ܦܘܼܩܕܼܵܢܵܐ ܕܫܲܠܝܼܛ ܥܲܠ ܟܠ 56 ܘܩܵܡ̣ܘ ܫܲܡܵܫܵܘ̈ܗܝ ܕܲܢܫܲܡܫܘܼܢܵܝܗܝ ܩܲܕܿܝܼܫܵܐܝܼܬܼ ܀ 57 :ܬܪܘܿܢܘܿܣ ܕܫܘܼܒܼܚܵܐ ܨܲܒܸܿܬܼܘ. ܣܵܡ̣ܘ ܠܹܗ ܐܲܝܟ ܕܲܠܡܲܠܟܵܐ 58 ܘܐܲܣܡܝܼܘ ܘܹܐܠܵܐ ܢܘܼܪܵܢܵܝܬܼܵܐ ܒܹܝܬܼ ܠܹܗ ܘܲܠܗܘܿܢ ܀ pb. 133 59 :ܘܹܐܠܵܐ ܕܫܘܼܒܼܚܵܐ ܦܪܲܣܘ ܫܲܡܫܹ̈ܐ ܩܕܵܪܡ ܥܲܝܢܲܝ̈ܗܘܿܢ 60 ܕܠܵܐ ܢܸܬܼܒܲܩܘܿܢ ܒܦܲܪܨܘܿܦ ܡܲܠܟܵܐ ܕܲܫܪܸܐ ܒܫܘܼܒܼܚܵܐ ܀ 61 :ܓܸܦܹ̈ܐ ܕܲܒܼܗܘܿܢ ܗܘ̤ܵܘ ܬܲܟܼܣܝܼܬܼܵܐ ܠܲܩܢܘܿܡܲܝ̈ܗܘܿܢ 62 ܘܟܲܣܝܼܘ ܪܸ̈ܓܼܫܹܐ ܕܲܩܢ̣ܵܘ ܡܸܢܫܹܠܝ ܕܠܵܐ ܒܲܥܝܵܕܼܵܐ ܀ 63 :ܪܸܓܼܫܹܐ ܚܵܘܝܼܘ ܠܵܐ ܓܘܼܫܡܵܢܹ̈ܐ ܠܥܹܝܢ ܓܘܼܫܡܵܢܵܐ 64 ܘܣܲܬܿܪܘ ܐܸܢܘܿܢ ܡ̣ܢ ܬܸܫܒܿܘܿܚܬܵܐ ܕܪܲܒܿܘܼܬܼ ܚܸܙܘܵܐ ܀ 65 :ܐܲܝܟ ܣܘܼܕܼܵܪܹ̈ܐ ܟܪ̣ܵܟܼܘ ܓܸܦܲܝ̈ܗܘܿܢ ܥܲܠ ܐܲܦܲܝ̈ܗܘܿܢ 66 ܕܠܵܐ ܢܸܣܬܿܝ̈ܛܵܢ ܡ̣ܢ ܓܵܘܙܲܠܬܵܐ ܕܗܸܕܼܪܹܗ ܕܚܸܘܙܵܐ ܀ 67 :ܚܙܵܬܼܵܐ ܕܗܸܕܼܪܵܐ ܡܸܬܼܚܲܙܝܵܐ ܗ̄ܘ̣ܵܬܼ ܩܕܼܵܡ ܥܲܝܢܲܝ̈ܗܘܿܢ 68 ܘܕܲܚܝܼܠܝܼܢ ܗ̄ܘ̣ܵܘ ܕܲܢܚܘܼܪܘܼܢ ܒܵܗ̇ ܒܲܡܠܸܐ ܥܲܝܢܹ̈ܐ ܀ 69 :ܕܚܝܼܠܵܐ ܗ̄ܘ̣ܵܬܼ ܛܵܒܼ ܘܠܲܝܬܿ ܬܘܼܒܼ ܡܸܕܲܡ ܕܲܕܼܚܝܼܠ ܡܸܢܵܗ̇ 70 ܘܲܪܚܝܼܡܵܐ ܗ̄ܘ̣ܵܬܼ ܘܣܵܗܹ̇ܕܼ ܩܵܠܵܐ ܕܩܘܼܕܵܫܲܝ̈ܗܘܿܢ ܀ 71 :ܓܸܦܹ̈ܐ ܗܘ̤ܵܘ ܠܗܘܿܢ ܐܲܝܟ ܡܸܨܥܵܝܹ̈ܐ ܒܹܝܬܼ ܠܹܗ ܘܲܠܗܘܿܢ 72 ܒܗܘܿܢ ܩܲܪܸܒܼܘ ܠܹܗ ܕܵܫܢܹ̈ܐ ܕܩܘܼܕܼܫܵܐ ܕܪܸ̈ܥܝܵܢܲܝܗܘܿܢ ܀ 73 :ܫܬܵܐ ܓܸܦܹ̈ܐ ܐܵܘܥܝܼܘ ܡܸܢܫܹܠܝ ܕܠܵܐ ܪܘܼܟܵܒܼܵܐ 74 ܘܦܲܠܸܓܼܘ ܐܸܢܘܿܢ ܠܲܡ̈ܢܵܘܵܬܼܵܐ ܕܐܸܣܟܹܿܡܲܝ̈ܗܘܿܢ ܀ 75 :ܒܲܬܼܪܹܝܢ ܟܲܣܝܼܘ ܦܲܪ̈ܨܘܿܦܲܝܗܘܿܢ ܕܠܵܐ ܨܘܼܪ̈ܵܬܼܵܐ 76 ܘܒܲܬܼܪܹܝܢ ܣܲܬܼܪܘ ܪܸ̈ܓܼܠܹܐ ܕܲܒܼܗܘܿܢ ܟܲܕܼ ܠܲܝܬܿ ܐܸܢܹܝܢ ܀ 77 :ܒܲܬܼܪܹܝܢ ܐܲܪܝܼܡܘ ܓܸܦܹ̈ܐ ܠܡܸܦܪܲܚ ܩܲܠܝܼܠܵܐܝܼܬܼ 78 ܘܫܲܪܝܼܘ ܩܵܥܹ̇ܝܢ ܩܲܕܿܝܝܼܫܵܐܝܼܬܼ ܩܵܠܹ̈ܐ ܕܩܘܼܕܼܫܵܐ ܀ 79 :ܩܲܕܿܝܼܫ ܩܲܕܿܝܼܫ ܩܲܕܝܼܫ ܡ̇ܪܝܵܐ ܩܥ̣ܵܘ ܣܸܕܼܪ̈ܲܝܗܘܿܢ 80 ܘܙܵܥ ܫܲܬܼܐܸܣܹ̈ܐ ܕܗܲܝܟܲܠ ܩܘܼܕܼܫܵܐ ܒܩܘܼܕܵܫܲܝ̈ܗܘܿܢ ܀ 81 :ܬܠܵܬܼܵܐ ܩܘܼܕܼܫܹ̈ܐ ܩܥ̣ܵܘ ܫܲܘܝܵܐܝܼܬܼ ܚܲܕܼ ܫܘܼܠܛܵܢܵܐ 82 ܘܒܲܬܼܠܵܬܲܝ̈ܗܘܿܢ ܚܕܼܵܐ ܡ̇ܪܘܼܬܼܵܐ ܕܥܲܠ ܟܠ ܚܵܘܝܼܘ ܀ 83 :ܡ̇ܪܝܵܐ ܨܒܼܵܐܘܼܬܼ ܩ̣ܪܵܘ ܠܲܟܼܝܵܢܵܐ ܐܲܚܝܼܕܼ ܟܠܵܐ 84 ܘܐܲܟܸܿܢ ܒܲܕܸܿܩܘ ܕܲܬܼܠܝܼܬܼܵܐܝܼܬܼ ܩܥܸܐܐ ܐܝܼܬܼܘܼܬܼܵܐ ܀ 85 :ܬܠܝܼܬܼܵܝܘܼܬܼܵܐ ܐܲܟܼܪܸܙܘ ܒܐܲܪܥܵܐ ܒܩܘܼܕܵܫܲܝ̈ܗܘܿܢ 86 ܘܲܠܦܘܼܬܼ ܛܲܟܼܣܵܐ ܦܪܲܥ̣ܘ ܬܵܘܕܿܝܼܬܼܵܐ ܕܚܲܝܵܒܼܝܼܢ ܗ̄ܘ̣ܵܘ ܀ 87 :ܬܠܵܬܼ ܙܲܒܼ̈ܢܵܬܼܵܐ ܬܢܵܘ̣ ܬܸܫܒܿܘܿܚܬܼܵܐ ܒܩܵܠܵܐ ܕܲܦܠܸܐ 88 ܘܲܕܼܪܲܫܘ̣ ܐܘܼܪܚܵܐ ܠܐ̄ܢܵܫܵܐ ܠܡܸܩܪܵܐ ܬܠܵܬܼܵܐ ܫܡܵܗܹ̈ܐ ܀ 89 :ܬܠܵܬܼܵܐ ܫܡܵܘ̈ܗܹܐ ܟܣܹܝܢ ܗ̄ܘ̣ܵܘ ܒܲܫܡܵܐ ܕܗܵܘ̇ ܩܘܼܕܵܫܵܐ 90 ܘܩܲܕܸܿܡܘ ܥܝܼܪܹ̈ܐ ܘܒܲܕܸܿܩܘ ܐܸܢܘܿܢ ܒܩܘܼܕܵܫܲܝ̈ܗܘܿܢ ܀ 91 :ܘܐܸܠܵܐ ܡ̇ܢܲܐ ܗ̄ܝܼ ܕܲܬܼܠܵܬܼ ܙܲܒܼܢܝܼ̈ܢ ܩܲܕܸܫܘ ܒܲܠܚܘܿܕܼ 92 ܘܠܵܐ ܬܘܼܒܼ ܐܵܘܣܸܦ ܘܠܵܐ ܬܘܼܒܼ ܒܲܨܲܪܘ ܡ̣ܢ ܡܸܢܝܵܢܵܐ ܀ pb. 134 93 :ܐܸܢ ܦܵܠ̇ܚܘܼܬܼܗܘܿܢ ܩܲܕܿܝܼܫܘܼܬܼܵܐ ܗ̄ܝܼ ܐܲܡܝܼܢܵܐܝܼܬܼ 94 ܠܡܵܐ ܠܵܐ ܩܲܕܹܿܫܘ ܕܠܵܐ ܣܲܒܼܥܘܼܬܼܵܐ ܐܲܝܟ ܕܲܡܥܵܕܼܝܼܢ ܀ 95 :ܕܠܵܐ ܡܸܢܝܵܢܵܐ ܚܲܝܵܒܼܝܼܢ ܗ̄ܘ̣ܵܘ ܠܵܡܩܲܕܵܫܘܼ 96 ܘܡܵܢܵܐ ܗ̄ܝܼ ܥܸܠܬܼܵܐ ܕܐܲܗܡܝܼܘ ܘܲܫܬܸܩܘ̣ ܡ̣ܢ ܕܲܠܡܸܦܪܲܥ ܀ 97 :ܐܵܠܹܦ ܐܲܠܦܝܼ̈ܢ ܘܪܸܒܿܘܿ ܪܸ̈ܒܿܘܵܢ ܐܸܠܘܼ ܫܲܒܲܚܘ 98 ܙܥܘܿܪ ܗ̄ܘ̣ܵܐ ܫܘܼܒܼܚܵܐ ܠܗܵܝ̄̇ ܬܸܫܒܿܘܿܚܬܵܐ ܕܡܸܫܬܲܒܿܚܵܐ ܗ̄ܘ̣ܵܬܼ ܀ 99 :ܫܡܲܝܵܐ ܘܐܲܪܥܵܐ ܐܸܠܘܼ ܝܲܒܸܿܒܼܘ ܥܲܡ ܟܸܢܫܲܝ̈ܗܘܿܢ 100 ܠܵܐ ܣܵܦ̇ܩܝܼܢ ܗ̄ܘ̣ܵܘ ܠܲܡܫܲܒܵܚܘܼ ܐܲܟܼܡܵܐ ܕܲܦܠܸܐ ܀ 101 :ܒܪܝܼܬܼܵܐ ܟܠܵܗ̇ ܬܸܠܘܼ ܩܵܡܲܬ̤ ܥܲܡ ܓܘܼܕܲܝ̈ܗܘܿܢ 102 ܒܨܝܼܪܵܐ ܗ̄ܘ̣ܵܬܼ ܛܵܒܼ ܡ̣ܢ ܕܲܠܡܸܦܪܲ ܕܵܫܢܹ̈ܐ ܕܫܘܼܒܼܚܵܐ ܀ 103 :ܕܠܵܐ ܡܘܼܫ̈ܚܵܬܼܵܐ ܪܲܒܿ ܒܵܪܘܿܝܵܐ ܡ̣ܢ ܒܸܪ̈ܝܵܬܼܵܐ 104 ܘܲܕܼܠܵܐ ܟܲܝܠܵܐ ܒܨܝܼܪ̈ܵܢ ܗܸܢܹܝܢ ܡ̣ܢ ܪܲܒܿܘܼܬܹܗ ܀ 105 :ܘܐܸܢ ܗܵܟܲܢܵܐ ܗ̄ܝܼ ܐܲܝܟ ܡ̇ܐ ܕܣܵܗ̇ܕܿܝܼܡ ܫܘܼܚܠܵܦܲܝ̈ܗܘܿܢ 106 ܠܡܵܢܵܐ ܣܲܝܟܲܘܼܗܝ ܥܝܼܪܹ̈ܐ ܠܩܘܼܕܼܫܵܐ ܒܲܬܼܠܵܬܼ ܙܲܒܼܢܝܼ̈ܢ ܀ 107 :ܠܵܐ ܗ̄ܘ̣ܵܐ ܡܸܫܬܲܩ ܫܬܸܩܘ̣ ܪ̈ܘܼܚܵܢܹܐ ܡ̣ܢ ܬܸܫܒܿܘܿܚܬܼܵܐ 108 ܘܠܵܘ ܦܘܼܪܥܵܢܵܐ ܕܚܲܝܵܒܼܝܼܢ ܗ̄ܘ̣ܵܘ ܛܠܲܡ̣ܘ ܐܵܘ ܛܵܠ̇ܡܝܼܢ ܀ 109 :ܛܲܟܼܣܵܐ ܪܲܒܵܐ ܚܵܘܝܘܼ ܒܐܲܪܪܥܵܐ ܒܩܘܼܕܵܫܫܲܝ̈ܗܘܿܢ 110 ܕܲܟܼܝܵܢ ܟܲܣܝܵܐ ܬܠܵܬܼܵܐ ܒܢܘܿܡܝܼ̈ܢ ܟܣܹܝܢ ܒܐܝܼܬܼܘܼܬܹܗ ܀ 111 :ܚܕܼܵܐ ܐܝܼܬܼܘܼܬܼܵܐ ܝ̄ܠܸܦ̣ܘ ܟܲܕܼ ܬܸܩܢܲܬ̤ ܒܪܝܼܬܼܵܐ ܒܪܵܫܝܼܬܼ 112 ܘܒܼܵܬܲܪ ܙܲܒܼܢܵܐ ܩܢ̣ܵܘ ܒܼܘܼܝܵܢܵܐ ܕܒܼܘܼܕܵܩ ܩܢܘܿܡܹ̈ܐ ܀ 113 :ܐ̄ܪܵܙܵܐ ܟܲܣܝܵܐ ܓܠ̣ܵܐ ܠܗܘܿܢ ܟܲܣܝܵܐ ܠܵܐ ܗ̄ܘ̣ܵܐ ܒܓܸܠܝܵܐ 114 ܐܸܠܵܐ ܕܢܸܗܘܘܿܢ ܒܵܥܹ̇ܝܢ ܟܠܢܵܫ ܒܥܵܬܹܗ ܕܐ̄ܪܵܙܵܐ ܀ 115 :ܐ̄ܪܵܙܵܢܵܐܝܼܬܼ ܬܢܵܘ̣ ܬܸܫܒܿܘܿܚܬܼܵܐ ܬܠܵܬܼ ܘܲܒܼ̈ܢܵܬܼܵܐ 116 ܘܠܵܐ ܐܸܣܬܲܟܲܠܘ ܒܚܲܝܠܵܐ ܕܲܟܼܣܸܐ ܒܓܼܵܘ ܡܸܠܲܝ̈ܗܘܿܢ ܀ 117 :ܡܸܠܹ̈ܐ ܡܲܠܸܠܘ ܘܲܒܼܣܘܼܟܵܠܗܹܝܢ ܠܵܐ ܐܸܬܼܒܲܝܲܢܘ 118 ܩܘܼܕܼܫܐ ܩܲܕܸܿܫܘ ܘܡ̇ܢܲܐ ܗ̄ܝܼ ܥܸܠܬܹܗ ܠܵܐ ܣܦܲܩ̣ܘ ܐܲܕܼܪܸܟܼܘ ܀ 119 :ܐܘܼ ܪܚܵܐ ܕܫܲܝܢܵܐ ܕܪܲܫ̣ܘ ܠܲܒܼܪܝܼܬܼܵܐ ܠܘܵܬܼ ܒܵܪܘܿܝܵܐ 120 ܕܬܸܪܕܹܿܐ ܫܲܦܝܼܪ ܠܘܲܥܕܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܀ 121 :ܩܘܼܕܼܫܹ̈ܐ ܠܬܵܬܬܼܵܐ ܛܲܟܸܿܣܘ ܣܡ̣ܘ ܒܵܗ̇ ܒܲܕܼܡܘܼܬܼ ܡܝܼ̈ܠܹܐ 122 ܕܠܵܐ ܢܸܬܿܕܵܘܲܕܼ ܐܲܝܢܵܐ ܕܪܵܕܹܐ ܒܩܘܼܕܵܫܲܝ̈ܗܘܿܢ ܀ 123 ܩܲܕܝܼܫ ܡ̇ܪܝܵܐ ܩ̣ܥܵܘ ܥܲܠ ܐܲܪܥܵܐ ܘܙܵܥܲܬ̤ ܐܲܪܥܵܐ: pb. 135 124 ܘܐܲܠܦܘܼܗ̇ ܛܲܟܼܣܵܐ ܕܚܹܝܠ ܐܝܼܬܼܘܼܬܼܵܐ ܕܠܵܐ ܡܸܣܬܲܝܲܟ ܀ 125 :ܚܹܝܠ ܐܝܼܬܼܘܼܬܼܵܐ ܐܲܠܸܦܘ ܐܸܢܘܿܢ ܠܲܡܩܲܕܵܫܘܼ 126 ܘܗܸܢܘ̣ܿܢ ܐܲܠܸܦܘ ܒܝܲܕܼ ܐܹܫܲܥܝܵܐ ܬܲܗܪܵܐ ܪܲܒܵܐ ܀ 127 :ܬܲܗܪܵܐ ܪܲܒܵܐ ܚܙ̣ܵܐ ܒܲܪ ܐܵܡܘܿܨ ܒܲܫܡܲܝܵܢܹ̈ܐ 128 ܕܲܟܼܡܵܐܬ ܫܒܼܝܼܚܝܼܢ ܘܲܟܼܡܵܐ ܪܗܝܼܒܼܝܼܢ ܠܲܡܩܵܕܵܫܘܼ ܀ 129 :ܒܬܲܗܪܵܐ ܕܲܒܼܗܘܿܢ ܬܗܲܪܘ ܚܘܼܫܵܒܼܵܘ̈ܗܝ ܕܒܲܪ ܥܸܒܼܪ̈ܵܝܹܐ 130 ܘܟܲܢܸܫ ܗܵܘܢܹܗ ܡ̣ܢ ܟܠ ܕܘܼܟܵܐ ܠܘܲܥܕܹܿܗ ܕܚܸܙܘܵܐ ܀ 131 :ܒܬܲܗܪܹܗ ܕܚܸܙܘܵܐ ܘܲܕܼܫܲܡܵܫܵܘ̈ܗܝ ܬܗܲܪ ܚܲܙܵܝܵܐ 132 ܕܲܟܼܡܵܐ ܕܚܸܠܘ̣ ܗ̄ܘ̣ܵܐ ܡ̣ܢ ܓܸܠܝܵܢܵܐ ܕܡܲܠܸܠ ܥܲܡܹܗ ܀ 133 :ܒܩܸܢܛܵܐ ܕܲܒܼܗܘܿܢ ܬܗܲܪ ܗ̄ܘ̣ܵܐ ܣܲܓܼܝܼ ܛܵܒܼ ܡ̣ܢ ܢܲܦܫܹܗ 134 ܕܟܲܕ ܪܘܼܚ ܐܸܢܘܿܢ ܕܚܸܠܘ̣ ܡ̣ܢ ܚܸܙܘܵܐ ܪܘܼܚܵܢܵܝܵܐ ܀ 135 :ܡܲܢ ܟܲܝ ܐܲܙܝܼܥ ܠܩܲܢ̈ܝܲܝ ܚܲܝܠܵܐ ܡܸܬܿܕܲܡܲܪ ܗ̄ܘ̣ܵܐ 136 ܘܡ̣ܢ ܡܲܢ ܛܲܫܝܼܘ ܦܲܪ̈ܨܘܿܦܲܝܗܘܿܢ ܗܕܼܝܼܪ̈ܲܝ ܐܲܦܹ̈ܐ ܀ 137 :ܡܲܢ ܟܲܝ ܟܲܢܸܫ ܘܐܲܩܝܼܡ ܐܸܢܘܿܢ ܓܘܼܕܼܝܼ̈ܢ ܓܘܼܕܿܝܼ̈ܢ 138 ܘܐܲܪܡܝܼ ܥܠܲܝܗܘܿܢ ܢܝܼܪܵܐ ܘܩܸܢܛܵܐ ܘܗܵܐ ܡܸܬܼܒܲܠܗܹܝܢ ܀ 139 :ܠܡܲܢ ܟܲܝ ܩܵܥܹ̇ܢ ܩܵܠܹ̈ܐ ܕܩܘܼܕܼܫܵܐ ܟܲܕܼ ܕܲܚܝܼܠܝܼܢ 140 ܘܥܲܠ ܡ̇ܢ ܠܵܐ ܡܨܸܝܢ ܠܡܸܬܼܠܵܐ ܚܝܵܪܗܘܿܢ ܠܘܲܥܕܹܿܗ ܕܚܸܙܘܵܐ ܀ 141 :ܠܡܵܢܵܐ ܡܣܲܬܿܪܝܼܢ ܩܲܪ̈ܨܘܿܦܲܝܗܘܿܢ ܒܓܼܵܘ ܓܸܦܲܝ̈ܗܘܿܢ 142 ܘܥܲܠ ܡ̇ܢ ܩܵܥܹ̇ܝܢ ܬܠܵܬܼܵܐ ܩܵܠܝܼ̈ܢ ܘܠܵܐ ܬܘܼܒܼ ܬܵܢܹ̇ܝܢ ܀ 143 :ܒܹܝܬܼ ܦܘܼܠ̈ܓܹܐ ܩܵܡ̣ ܗ̄ܘ̣ܵܐ ܢܒܼܝܼܵܐ ܥܲܠ ܡ̇ܐ ܕܵܚܙ̣ܵܐ 144 ܕܬܲܗܪܹܗ ܕܚܸܘܙܵܐ ܥܵܒܹ̇ܕܼ ܗ̄ܘ̣ܵܐ ܠܹܗ ܠܡܸܬܼܦܲܠܵܓܼܘܼ ܀ 145 :ܐܵܪܵܐ ܐܝܼܬܼܵܘܗܝ ܡܸܕܸܿܡ ܕܲܚܙܹ̇ܝܬܼ ܐܵܘ ܠܵܐ ܐܝܼܬܼܵܘܗܝ 146 ܠܝܼ ܡܸܬܼܚܵܘܸܐ ܐܵܘ ܕܲܠܡܵܐ ܟܲܝ ܐܵܦ ܠܲܐ̄̈ܚܪ̈ܵܢܹܐ ܀ 147 :ܐܵܪܵܐ ܓܘܼܫܡܵܐ ܗ̄ܘ̣ ܘܓܼܘܼܫܡܵܢܵܐܝܼܬܼ ܚܵܐܲ̇ܪ ܐ̄ܢܵܐ ܒܹܗ 148 ܐܵܘ ܕܲܠܡܵܐ ܟܲܝ ܛܸܠܵܢܝܼܬܼܵܐ ܗ̄ܝܼ ܕܠܵܐ ܫܲܪܝܼܪܵܐ ܀ 149 :ܐܵܪܵܐ ܒܲܦܓܼܪ ܥܸܠܹ̇ܬܼ ܩܵܡܹ̇ܬܼ ܒܓܼܵܘ ܒܹܝܬܼ ܩܘܼܕܼܫܵܐ 150 ܐܵܘ ܕܲܠܡܵܐ ܟܲܝܼ ܒܗܵܘܢܵܐ ܚܙܹܝ̇ܬܹܗ ܟܲܕܼ ܠܵܐ ܚܙܹܝ̇ܬܹܗ ܀ 151 :ܐܝܼܬܼܵܘܗܝ ܘܠܲܝܬܵܘܗܝ ܡܸܬܼܪܲܢܸܐ ܗ̄ܘ̣ܵܐ ܝܼܣܲܪܠܵܝܵܐ 152 ܒܲܕܼܡܘܼܬܼ ܐܲܒܼܘܼܗܝ ܕܲܫܘ̣ܵܐ ܠܚܸܙܘܵܐ ܕܕܼܵܡܹ̇ܐ ܠܕܼܝܼܠܹܗ ܀ 153 :ܐܵܦ ܝܼܣܪܵܝܝܹܠ ܫܘ̣ܵܐ ܠܲܚܙܵܬܼܵܐ ܕܪܵܡ̇ܐ ܡܸܢܹܗ 154 ܘܐܸܬܼܟܲܢܝܼ ܠܹܗ ܫܡܵܐ ܝܼܣܪܵܝܹܠ ܚܙ̣ܵܐ ܠܐܲܠܵܗܵܐ ܀ 155 :ܕܵܡܹ̇ܐ ܚܸܙܘܹܗ ܕܒܲܪ ܝܼܣܪܵܝܹܠ ܠܚܸܙܘܵܐ ܕܐܲܒܼܘܼܗܝ 156 ܘܚܲܕܼ ܗ̄ܘ̣ ܚܲܝܠܵܐ ܕܚܵܘܝܼ ܚܲܝܠܹܗ ܬܲܡ̇ܢ ܘܲܬܼܢܵܢ ܀ 157 :ܗܵܘ̇ ܦܘܼܩܕܵܢܵܐ ܕܐܵܘܚܸܕܼ ܢܦܫܹܗ ܒܐܼܝܼܕܲܝ̈ ܝܲܥܩܘܿܒܼ 158 ܗܘ̤ ܬܘܼܒܼ ܚܵܘܝܼ ܐܵܦ ܠܐܹܫܲܥܝܵܐ ܚܙܵܬܬܼܵܐ ܕܬܲܗܪܵܐ ܀ 159 :ܬܲܗܪܵܐ ܪܲܒܵܐ ܚܙ̣ܵܐ ܚܲܙܵܝܵܐ ܒܲܪ ܚܲܙܵܝܹ̈ܐ 160 ܘܩܵܡ̣ ܘܐܸܬܼܒܲܩܝܼ ܒܲܕܼܠܵܐ ܪܸ̈ܓܼܫܹܐ ܐܲܝܟ ܕܲܒܼܪܸ̈ܓܼܫܹܐ ܀ pb. 136 161 :ܕܠܵܐ ܣܲܒܼܥܘܼܬܼܵܐ ܡܸܬܼܒܲܩܸܐ ܗ̄ܘ̣ܵܐ ܒܫܘܼܦܪܹܗ ܕܚܸܙܘܵܐ 162 ܘܲܟܼܡܵܐ ܕܚܵܐܲ݁ܪ ܬܘܼܒܼ ܚܵܐܲ݁ܪ ܗ̄ܘ̣ܵܐ ܗܲܢܝܼܵܐܝܼܬܼ ܀ 163 :ܗܲܢܝܼ ܗ̄ܘ̣ܵܐ ܛܵܒܼ ܚܸܙܘܹܗ ܕܚܸܙܘܵܐ ܥܲܠ ܪܸܥܝܵܢܹܗ 164 ܘܠܵܐ ܣܵܒܲ݁ܪ ܗ̄ܘ̣ܵܐ ܗܵܘܢܹܗ ܠܲܡܚܵܪ ܒܦܲܐܝܘܼܬܼ ܫܘܼܦܪܹܗ ܀ 165 :ܟܡܵܐ ܕܒܲܣܪ̈ܵܦܹܐ ܡܸܬܼܒܲܩܸܐ ܗ̄ܘ̣ܵܐ ܕܲܟܼܡܵܐ ܪܗܝܼܒܼܝܼܢ 166 ܩܸܢܛܵܐ ܘܚܘܼܒܵܐ ܡܸܬܿܬܵܘܣܲܦ ܗ̄ܘ̣ܵܐ ܒܓܼܵܘ ܪܸܥܝܵܢܹܗ ܀ 167 :ܟܡܵܐ ܕܓܸܦܲܝ̈ܗܘܿܢ ܥܲܠ ܐܲܦܲܝ̈ܗܘܿܢ ܡܸܬܼܥܲܦܝܼܢ ܗ̄ܘ̣ܵܘ 168 ܗܘ̤ ܒܓܼܵܘ ܢܲܦܫܹܗ ܡܸܬܼܦܲܪܲܣ ܗ̄ܘ̣ܵܐ ܠܡܸܣܬܲܬܵܪܘܼ ܀ 169 :ܟܡܵܐ ܕܒܲܪܬܼ ܩܵܠܵܐ ܕܩܲܕܼܝܼܫ ܩܲܕܿܝܼܫ ܡܸܫܬܲܡܥܵܐ ܗ̄ܘ̣ܵܬܼ 170 ܗܘ̤ ܕܠܵܐ ܫܵܘܹ̇ܐ ܐܵܦܠܵܐ ܠܡܸܫܡܲܥ ܡܸܬܼܚܲܫܲܒܲ ܗ̄ܘ̣ܐ ܀ 171 ܟܡܵܐ ܕܲܚܙܵܬܼܵܐ ܒܲܩܕܼܘܿܫ ܩܘܼܕܼܫܹ̈ܐ ܡܸܬܼܚܲܙܝܵܐ ܗ̄ܘ̣ܵܬܼ 172 ܕܚܹܝܠ ܒܵܪܘܿܝܵܐ ܫܪ̣ܵܐ ܒܲܥܒܼܵܕܼܵܘ̈ܗܝ ܡܸܬܼܚܲܫܲܒܼ ܗ̄ܘ̣ܵܐ ܀ 173 :ܒܲܩܕܼܘܿܫ ܩܘܼܕܼܫܹ̈ܐ ܚܙ̣ܵܝܗܝ ܗ̄ܘ̣ܵܐ ܠܚܸܙܘܵܐ ܕܐܸܬܼܚܵܘܝܼ ܠܹܗ 174 ܘܠܵܐ ܣܦܲܩ ܩܘܼܕܼܫܵܐ ܕܲܡܩܲܕܿܫܵܢܹ̈ܐ ܠܡܹܐܚܲܕܼ ܣܵܟܹܗ ܀ 175 :ܪܲܒܿ ܗ̄ܘ̣ ܣܲܓܿܝܼ ܚܸܙܘܵܐ ܕܲܚܙ̣ܵܐ ܡ̣ܢ ܟܠ ܚܸܙܘܝܼ̈ܢ 176 ܘܣܵܗ̇ܕܵܐ ܚܙܵܬܼܵܐ ܕܪ̈ܘܼܚܵܢܵܝܹܐ ܕܠܵܐ ܣܸܦܩܲܬ̤ ܠܹܗ ܀ 177 :ܬܚܹܒܼ݂ܩܵܠܲܝ̈ܗܘܿܢ ܠܐܝܼܘ ܓܸܦܲܝ̈ܗܘܿܢ ܦܗ̣ܵܐ ܡܲܕܲܥܗܘܿܢ 178 ܘܠܵܐ ܣܦܲܩ̣ܘ ܥܲܙܝܼܘ ܠܡܸܬܼܒܲܩܵܝܘܼ ܒܙܝܼܘܹܗ ܕܚܸܘܙܵܐ ܀ 179 :ܠܐܝܼܘ ܘܐܸܬܼܦܲܫܲܚܘ ܡ̣ܢ ܕܲܢܟܲܣܘܿܢ ܦܲܪ̈ܨܘܿܦܲܝܗܘܿܢ 180 ܘܟܲܕܼ ܛܵܒܼ ܟܲܣܝܼܘ ܠܵܐ ܐܸܬܼܟܲܣܝܼܘ ܐܲܟܼܡܵܐ ܕܙܵܕܹܩ ܀ 181 :ܩܸܢܛܵܐ ܘܚܘܼܒܵܐ ܡܠܸܐ ܗ̄ܘ̣ܵܐ ܚܸܙܘܵܐ ܠܲܕܼܚܵܐܲܪ ܒܹܗ 182 ܘܲܡܣܲܪܸܕܼ ܗ̄ܘ̣ܵܐ ܘܲܡܕܲܚܸܠ ܗ̄ܘ̣ܵܐ ܚܲܟܿܝܼܡܵܐܝܼܬܼ ܀ 183 :ܒܝܲܕܼ ܬܲܪ̈ܬܲܝܗܹܝܢ ܩܵܡ̣ ܚܲܙܵܝܵܐ ܠܡܸܬܼܒܲܩܵܝܘܼ 184 ܘܡܸܬܼܩܲܢܲܛ ܗ̄ܘ̣ܵܐ ܘܡܸܬܼܝܲܐܲܒܼ ܗ̄ܘ̣ܵܐ ܕܢܸܩܪܘܿܒܼ ܘܲܢܦܘܼܫ ܀ 185 :ܚܸܒܼܠܹ̈ܐ ܩ̈ܫܲܝܵܐ ܡ̇ܚܹ̇ܝܢ ܗ̄ܘ̣ܵܘ ܠܵܗ̇ ܠܦܵܪܘܿܫܘܼܬܹܗ 186 ܘܲܡܚܲܒܸܿܠ ܗ̄ܘ̣ܵܐ ܕܢܵܘܠܸܕܼ ܚܸܙܘܵܐ ܕܐܸܬܼܚܵܘܝܼ ܠܹܗ ܀ 187 :ܒܲܕܸܡܘܼܬܼ ܥܘܸܠܵܐ ܥܵܨܹ̇ܐ ܗ̄ܘ̣ܵܐ ܠܹܗ ܚܸܙܘܵܐ ܠܝܲܨܪܹܗ 188 ܕܲܒܼܝܲܕܼ ܪܸ̈ܓܼܫܵܘܗܝ ܢܸܦܘܿܩ ܢܲܟܼܪܸܙ ܪܲܒܿܘܼܬܼ ܚܲܝܠܹܗ ܀ 189 :ܙܲܪܥܵܐ ܛܵܒܼܵܐ ܕܪܘܼܚ ܓܸܠܝܵܢܵܐ ܩܲܒܸܿܠ ܗܵܘܢܹܗ 190 ܘܲܬܼܗܲܪ ܣܲܓܼܝܼ ܕܟܲܕܼ ܠܵܐ ܫܵܘܹ̇ܐ ܫܘ̣ܵܐ ܠܕܼܐܝܟ ܗܵܕܹܐ ܀ 191 :ܫܝܼܛܘܼܬܼ ܓܸܢܣܹܗ ܘܪܲܒܿܘܼܬܼ ܥܵܘ̣ܠܹܗ ܡܸܬܼܥܲܗܲܪ ܗ̄ܘ̣ܵܐ 192 ܘܦܵܪܘܿܫܵܐܝܼܬܼ ܡܸܬܿܕܲܡܲܪ ܗ̄ܘ̣ܵܐ ܒܐܲܝܕܼܵܬ ܕܲܚܙ̣ܵܐ ܀ 193 :ܚܲܫܵܐ ܕܚܵܘܒܵܘ̈ܗܝ ܙܵܩܹ̇ܬܼ ܗ̄ܘ̣ܵܐ ܠܹܗ ܠܒܲܪ ܡ̇ܝܘܿܬܹ̈ܐ 194 ܘܡܸܬܼܟܲܚܲܕܼ ܗ̄ܘ̣ܵܐ ܕܢܸܬܼܠܸܐ ܚܝܵܪܹܗ ܠܐܲܦܲܝ̈ ܚܸܙܘܵܐ ܀ pb. 137 195 :ܡ̇ܐ ܕܐܸܬܼܪܲܓܼܪܲܓܼ ܕܲܢܚܘܼܪ ܫܲܦܝܼܪ ܒܦܲܐܝܘܼܬܼ ܫܘܼܦܪܹܗ 196 ܚܵܪ̣ ܒܲܩܢܘܿܡܹܗ ܚܲܫ̣ ܘܐܸܬܿܬܲܢܲܚ ܥܲܠ ܣܘܼܪ̈ܚܵܢܵܘܗܝ ܀ 197 :ܡ̇ܐ ܕܐܸܬܼܝܲܐܲܒ ܠܩܵܠܵܐ ܕܥܝܼܪܹ̈ܐ ܕܩܵܥܥܹ̇ܝܢ ܩܲܕܿܝܼܫ 198 ܥܗ݂ܲܕܼ ܛܲܡܐܝܼܘܼܬܼܵܐ ܕܲܒܼܢܲܝ̈ ܥܲܡܹܗ ܘܚܲܦܝܼ ܐܲܦܵܘ̈ܗܝ ܀ 199 :ܡ̇ܐ ܕܐܸܬܼܝܲܐܲܒܼ ܠܩܵܠܵܐ ܕܥܝܼܪܹ̈ܐ ܕܩܵܥܹ̇ܝܢ ܩܲܕܿܝܼܫ 200 ܥܗ݂ܲܕܼ ܛܲܡܐܝܼܘܼܬܼܵܐ ܕܲܒܼܢܲܝ̈ ܥܲܡܹܗ ܘܚܲܦܝܼ ܐܲܦܵܘ̈ܗܝ ܀ 201 :ܡ̇ܐ ܕܐܸܬܼܒܲܩܝܼ ܕܲܟܼܝܵܢ ܪܘܼܚܵܐ ܐܝܼܬܼܵܘܗܝ ܚܸܙܘܵܐ 202 ܐܵܘܚܸܠ ܘܲܦܣ݂ܲܩ ܕܗܘ̤ ܛܵܠܹ̇ܩ ܠܹܗ ܡ̣ܢ ܚܲܝܘܼܬܼܵܐ ܀ 203 :ܒܐܵܓܼܘܿܢ ܚܲܫܹ̈ܐ ܪܡܸܐ ܗ̄ܘ̣ܵܐ ܢܒܼܝܼܵܐ ܩܕܼܵܡ ܓܸܠܝܵܢܵܐ 204 ܘܡܸܬܼܝܲܐܲܒܼ ܗ̄ܘ̣ܵܐ ܕܢܸܫܡܲܥ ܩܵܠܵܐ ܕܫܘܼܒܼܩܵܢ ܥܵܘ̣ܠܵܐ ܀ 205 :ܚܲܫܵܐ ܕܥܵܘ̣ܠܹܗ ܘܕܲܒܼܢܲܝ̈ ܥܲܡܹܗ ܙܵܩܹ̇ܬܼ ܗ̄ܘ̣ܵܐ ܠܹܗ 206 ܘܡܲܪܝܼܪܵܐܝܼܬܼ ܡܸܬܿܬܲܢܲܚ ܗ̄ܘ̣ܵܐ ܒܓܼܵܘ ܪܸܥܝܵܢܹܗ ܀ 207 :ܘܵܝ ܠܝܼ ܠܕܼܵܘܝܵܐ ܐܸܡ݂ܲܪ ܟܹܐܢܵܐ ܗܘ̤ ܠܲܩܢܘܿܡܹܗ 208 ܕܲܡܛܲܡܲܐ ܐ̄ܢܵܐ ܒܲܫܟܼܝܼܪ݁ܵܬܼܵܐ ܕܥܵܘ̣ܠܹܗ ܕܥܲܡܵܐ ܀ 209 :ܘܵܝ ܠܝܼ ܕܲܣܢܹܐ ܚܝܪܵܐ ܕܐܲܦܲܝ ܘܲܕܼܚܘܼܫܵܒܲܝ̈ 210 ܘܩܵܡܹ̇ܬܼ ܕܐܹܚܘܼܪ ܒܫܲܦܝܘܼܬܼ ܚܸܙܘܵܐ ܕܚܹܝܠ ܐܝܼܬܼܘܼܬܼܵܐ ܀ 211 :ܘܵܝ ܠܝܼ ܕܐܝܼܬܲܝ ܡܸܕܼܪܵܐ ܫܝܼܛܵܐ ܕܒܼܝܼܠ ܒܲܚܛܵܗܹ̈ܐ 212 ܘܲܫܘܹ̇ܝܬܼ ܕܐܸܚܙܸܐ ܠܪܸܡܙܵܐ ܕܪܲܟܸܿܒܼ ܠܫܝܼܛܘܼܬܼ ܡܸܕܼܪܲܢ ܀ 213 :ܒܕܼܝܼܢܵܐ ܟܹܐܢܵܐ ܩܲܛܪܸܓܼ ܢܲܦܫܹܗ ܢܒܼܝܼܵܐ ܟܹܐܢܵܐ 214 ܘܲܩܕܼܵܡ ܕܝܼܢܵܐ ܚܲܝܸܒܼ ܗܘ̤ ܠܹܗ ܕܠܵܐ ܢܸܬܼܚܲܝܲܒܼ ܀ 215 :ܐܲܝܟ ܚܲܝܵܒܼܵܐ ܩܵܡ̣ ܙܲܕܿܝܼܩܵܐ ܩܕܼܵܡ ܓܸܠܝܵܢܵܐ 216 ܘܥܲܕܼܠܵܐ ܢܸܒܼܠܲܥ ܩܲܪܸܡ ܐܵܘܕܿܝܼ ܕܚܲܝܵܒܼܵܐ ܐ̄ܢܵܐ ܀ 217 :ܐܲܝܟ ܕܲܒܼܥܲܪ̈ܩܹܐ ܡ̣ܬܿܚ ܠܲܩܢܘܿܡܹܗ ܒܲܬܼܘܵܬܼ ܢܲܦܫܵܐ 218 ܘܢܲܓܸܿܕܼ ܗܘ̤ ܠܹܗ ܥܲܕܼܠܵܐ ܢܸܡܛܘܿܢ ܢܸܓܼ̈ܕܹܿܐ ܨܹܐܕܼܵܘܗܝ ܀ 219 :ܢܸܓܼ̈ܕܹܿܐ ܩܫܲܝ̈ܵܐ ܦܣܲܩ̣ ܥܲܠ ܢܲܦܫܹܗ ܟܲܕܼ ܠܵܐ ܬܲܒܼܥ̣ܘܼܗܝ 220 ܘܦܵܪܘܿܫܵܐܝܼܬܼ ܦܪ݂ܲܫ ܘܵܠܝܼܬܼܵܐ ܕܚܲܝܵܒܼ ܐ̄ܢܵܫܵܐ ܀ 221 :ܚܠܵܦ ܚܲܝܵܒܹ̈ܐ ܚܲܝܸܒܼ ܢܲܦܫܹܗ ܟܲܕܼ ܠܵܐ ܚܲܝܵܒܼ 222 ܘܲܒܼܬܸܢ̈ܚܵܬܹܗ ܕܝܼܠܵܐ ܡܲܚ̈ܘܵܐܼܵܐ ܡ̣ܢ ܡܲܪ݁ܵܚܹܐ ܀ 223 :ܣܢܹܐܓܼܪܵܐ ܛܵܒܼܵܐ ܗܘ̤ܵܐ ܚܠܵܦ ܥܲܡܹܗ ܨܹܝܕܼ ܟܹܐܢܘܼܬܼܵܐ 224 ܘܲܒܼܬܿܟܲܫܲܦܬܹܿܗ ܫܲܠܝܼ ܪܘܼܓܼܙܵܐ ܘܐܲܒܲܪ ܚܸܡܬܼܵܐ ܀ 225 :ܒܲܣܢܹܐ ܓܼܪܘܼܬܹܗ ܬܗܲܪ ܕܲܝܵܢ̇ܵܐ ܘܲܒܼܢܲܝ̈ ܛܲܟܼܣܹܗ 226 ܕܲܟܼܡܵܐ ܝ̄ܕܕܲܥ ܗ̄ܘ̣ܵܐ ܠܲܡܪܲܟܵܒܼܘܼ ܦܘܼܪ̈ܣܹܐ ܚܢܝܼ̈ܓܹܐ ܀ 227 :ܦܝܵܣܵܐ ܕܡܸܠܵܘ̈ܗܝ ܫܡ݂ܲܥ ܦܘܼܩܕܵܢܵܐ ܕܲܟܼܣܸܐ ܒܚܸܘܙܵܐ 228 ܘܫܲܕܲܪ ܒܲܝܐܹܗ ܒܝܲܕܼ ܐܝܼܙܓܲܕܵܐ ܪܘܼܚܵܢܵܝܵܐ ܀ 229 :ܓܲܒܼܪܵܐ ܕܪܘܼܚܵܐ ܫܕܲܪ ܚܸܙܘܵܐ ܨܹܝܕܼ ܒܲܪ ܐܵܡܘܿܨ 230 ܕܢܸܙܘܿܥ ܒܐܸܕܼܢܵܘ̈ܗܝ ܣܒܲܪܬܼܵܐ ܛܵܒܼܬܼܵܐ ܕܫܘܼܒܼܩܵܢ ܥܵܘ̣ܠܵܐ ܀ 231 :ܣܒܲܪܬܼܵܐ ܛܵܒܼܬܼܵܐ ܐܲܝܬܿܝܼ ܥܝܼܪܵܐ ܠܒܲܪ ܥܸܒܼܪ̈ܵܝܹܐ 232 ܕܡܲܠܝܵܐ ܫܲܝܢܵܐ ܘܐܝܼܬܼ ܒܵܗ̇ ܐܵܬܼܵܐ ܕܚܘܼܣܵܝ ܚܵܘ̈ܒܹܿܐ ܀ 233 :ܚܘܼܣܵܝ ܚܵܘ̈ܒܹܿܐ ܛܥ݂ܲܢ ܪܘܼܚܵܐ ܒܐܝܼܕܼܵܐ ܕܙܵܘܥܵܘ̈ܗܝ 234 ܘܝܲܗ̣̄ܒܼ ܠܲܢܒܼܝܼܵܐ ܕܬܼܚܲܣܸܐ ܒܵܗ̇ ܡ̣ܢ ܟܘܼܬܼܡ̇ܬܹ̈ܐ ܀ pb. 138 235 :ܓܡܘܼܪܬܵܐ ܕܢܘܼܪܵܐ ܪܡ݂ܲܙ ܠܹܗ ܪܸܡܙܵܐ ܠܪܘܼܚܵܢܵܝܵܐ 236 ܕܢܸܩܪܘܿܒܼ ܘܢܸܣܲܒܼ ܒܟܼܠܒܿܬܼܵܐ ܕܢܘܼܪܵܐ ܘܲܢܩܲܪܸܒܼ ܠܹܗ ܀ 237 :ܢܘܼܪܵܠ ܒܢܘܼܪܵܠ ܦܩ݂ܲܕܼ ܠܹܗ ܕܢܹܐܚܘܿܕܼ ܠܢܘܼܪܵܝܵܐ 238 ܘܲܢܛܲܠܸܩ ܒܵܗ̇ ܝܲܥܪܵܐ ܕܥܵܘ̣ܠܵܐ ܕܝܼܥ̣ܵܐ ܒܐ̄ܢܵܫܵܐ ܀ 239 :ܝܲܥܪܵܐ ܕܥܵܘ̣ܠܵܐ ܝ̄ܥ̣ܵܐ ܒܐܸܫܟܵܪܵܐ ܕܚܸܛܵܘ̈ܗܝ ܕܐܵܕܼܵܡ 240 ܘܲܫܲܕܲܪ ܟܲܣܝܵܐ ܥܲܕܹܿܗ ܒܐܝܼܕܼܵܐ ܕܲܫܡܲܝܵܢܵܐ ܀ 241 :ܡܲܓܼܠܵܐ ܕܢܘܼܪܵܐ ܚܵܘܝܹܗ ܕܢܵܘܫܸܛ ܒܲܝܢܵܬܼ ܚܸܛܹ̈ܐ 242 ܘܢܸܚܨܘܿܕܼ ܝܲܥܪܵܐ ܘܲܢܦܘܼܫ ܙܲܪܥܵܐ ܕܠܵܐ ܢܸܟܼܝܵܢܵܐ ܀ 243 :ܐܲܝܟ ܚܵܨܘܿܕܼܵܐ ܩܪܸ݂ܒܼ ܪܘܼܚܵܢܵܐ ܨܹܝܕܼ ܒܲܪ ܐܵܡܘܿܨ 244 ܘܚܲܨܕܹܿܗ ܠܥܵܘ̣ܠܹܗ ܒܡܲܓܿܠܵܐ ܕܐܵܘܚܸܕܼ ܪܸܡܙܵܐ ܒܐܝܼܕܹܗ ܀ 245 :ܓܡܘܼܪܬܵܐ ܕܢܘܼܪܵܐ ܚܙ̣ܵܐ ܟܲܕܼ ܣܝܼܡܵܐ ܒܡܲܕܼܒܲܚܩܘܼܕܼܫܵܐ 246 ܘܲܩܪܸ݂ܒܼ ܐܲܚܕܵܗ̇ ܒܐܝܼܕܼܵܐ ܕܢܘܼܪܵܐ ܐܲܝܟ ܕܐܸܬܼܦܲܩܲܕܼ ܀ 247 :ܒܟܲܠܒܿܬܼܵܐ ܕܢܘܼܪܵܐ ܠܲܒܼܟܵܗ̇ ܠܢܘܼܪܵܐ ܢܘܼܪܵܢܵܝܵܬܼܵܐ 248 ܘܩܲܪܸܒܼ ܣܵܡܵܗ̇ ܥܲܠ ܣܸܦ̈ܘܵܬܼܵܐ ܒܸܣܪ̈ܵܢܝܵܬܼܵܐ ܀ 249 :ܐܘܿ ܬܸܕܼܡܘܼܪܬܵܐ ܕܨܹܝܕܼ ܒܲܪ ܐܵܡܘܿܨ ܡܸܣܬܲܥܪܵܐ ܗ̄ܘ̣ܵܬܼ 250 ܕܟܲܕܼ ܒܸܣܪܵܢܵܐ ܗ̄ܘ̣ ܠܵܐ ܝܵܩܹ̇ܕܼ ܗ̄ܘ̣ܵܐ ܡ̣ܢ ܝܵܩܹܕܿܬܵܐ ܀ 251 :ܢܘܼܪܵܐ ܠܢܘܼܪܵܐ ܠܵܐ ܣܦ݂ܲܩ ܐܸܚܲܕܼ ܒܸܠܥܵܕܼ ܡܸܕܸܿܡ 252 ܘܒܸܣܪܵܐ ܫܝܼܛܵܐ ܐܲܚܕܵܗ̇ ܒܦܘܼܡܹܗ ܘܠܵܐ ܐܸܬܼܚܲܪܲܟ ܀ 253 :ܠܵܐ ܚܵܫܘܿܫܵܐ ܚܲܫ̣ ܡ̣ܢ ܙܲܗܪܵܐ ܕܥܲܙܝܼܙܘܼܬܼܵܗ̇ 254 ܘܲܡܠܸܐ ܚܲܫܹ̈ܐ ܠܵܐ ܚܲܫ̣ ܦܲܓܼܪܹܗ ܟܲܕܼ ܩܸܪܒܲܬ̤ ܠܹܗ ܀ 255 :ܐܘܿ ܢܘܼܪܵܢܵܐ ܕܠܵܐ ܣܦ݂ܲܩ ܐܸܚܲܕܼ ܚܙܵܬܼܵܐ ܕܢܘܼܪܵܐ 256 ܐܘܿ ܦܲܓܼܪܵܐ ܕܠܵܐ ܐܲܟܿܝܵܬܹ̈ ܫܲܠܗܹܒܼܝܼܬܼܵܐ ܀ 257 :ܠܵܘ ܢܘܼܪܵܐ ܗ̣̄ܘܵܬܼ ܕܐܸܚܲܕܼ ܥܝܼܪܵܐ ܒܟܲܠܒܿܬܼܵܐ ܕܢܘܼܪܵܐ 258 ܐܵܦܠܵܐ ܢܒܼܝܼܵܐ ܠܵܐ ܗ̄ܘ̣ܵܐ ܓܡܘܼܪܬܵܐ ܗ̄ܝܼ ܕܩܸܪܒܲܬ̤ ܨܹܐܕܼܵܘܗܝ ܀ 259 :ܠܵܐ ܗ̄ܘ̣ܵܐ ܒܓܼܘܼܫܡܵܐ ܚ̣ܙܵܝܗܝ ܗ̄ܘ̣ܵܐ ܠܚܸܙܘܵܐ ܕܐܸܬܼܚܵܘܝܼ ܠܹܗ 260 ܘܠܵܐ ܗ̄ܘ̣ܵܐ ܚܸܙܘܵܐ ܓܘܼܫܡܵܢܵܐܝܼܬܼ ܡܸܬܼܚܵܘܸܐ ܗ̄ܘ̣ܵܐ ܀ 261 :ܠܵܬܐ ܒܵܪܘܿܝܵܐ ܣܲܝܸܟ ܝܵܬܹܗ ܒܗܲܝܟܲܠ ܩܘܼܕܼܫܵܐ 262 ܐܵܦܠܵܐ ܣܪ̈ܵܦܹܐ ܐܘܵܥܝܼܘ ܓܸܦܹ̈ܐ ܡܸܬܼܪ̈ܲܓܼܫܵܢܹܐ ܀ 263 :ܠܵܐ ܗ̄ܘ̣ܵܐ ܒܩܵܠܵܐ ܡܸܬܼܪܲܓܼܫܢܵܐ ܩܥ̣ܵܘ ܪ̈ܘܼܚܵܢܹܐ 264 ܘܠܵܐ ܐܹܫܲܥܝܵܐ ܒܪܸ̈ܓܼܫܲܝ ܦܲܓܼܪܵܐ ܨܵܬܹܗ ܠܩܵܠܵܐ ܀ 265 :ܪܘܼܚܵܢܵܐܝܼܬܼ ܗܘ̤ܵܐ ܓܸܠܝܵܢܵܐ ܥܲܠ ܒܸܣܪܵܢܵܐ 266 ܘܲܒܼܪܸܥܝܵܢܵܐ ܚܙ̣ܵܐ ܗܵܝ̇ ܕܲܚܙ̣ܵܐ ܘܠܵܐ ܗ̄ܘ̣ܵܐ ܒܥܲܝܢܹ̈ܐ ܀ 267 :ܒܥܲܝܢܹ̈ܐ ܕܗܵܘܢܵܐ ܚܙ̣ܵܐ ܠܲܚܙܵܬܼܵܐ ܕܠܵܐ ܡܸܬܼܚܲܙܝܵܐ 268 ܘܲܒܼܬܲܪܥܝܼܬܹܗ ܨܵܬܼ ܒܲܪ̄ܬܼ ܩܵܠܵܐ ܕܠܵܐ ܡܸܬܼܪܲܓܼܫܵܐ ܀ 269 :ܒܙܵܘܥܹ̈ܐ ܟܣܲܝ̈ܵܐ ܬܲܪܓܸܿܡ ܥܲܡܹܗ ܪܸܡܙܵܐ ܟܲܣܝܵܐ 270 ܘܩܲܛܝܼܢܵܐܝܼܬܼ ܠܥܸ݂ܙ ܓܸܠܝܵܢܵܐ ܥܲܡ ܚܘܼܫܵܒܼܵܘ̈ܗܝ ܀ 271 ܒܙܵܘܥܹ̈ܐ ܩܲܪܸܒܼ ܐܵܦ ܪܘܼܚܵܢܵܐ ܓܡܘܼܪܬܵܐ ܠܙܵܘܥܵܘ̈ܗܝ: pb. 139 272 ܟܲܕܼ ܟܠ ܟܠܹܗ ܠܲܝܬܿ ܗ̄ܘ̣ܵܐ ܓܡܘܼܪܬܵ ܐܸܠܵܐ ܚܙܵܬܼܵܐ ܀ 273 :ܚܙܵܬܼܵܐ ܗ̄ܘ̣ܵܬܼ ܓܹܝܪ ܕܡܸܬܼܚܲܙܝܵܐ ܗ̄ܘ̣ܵܬܼ ܫܲܪܝܼܪܵܐܝܼܬܼ 274 ܠܵܐ ܗ̄ܘ̣ܵܐ ܒܓܼܘܼܫܡܵܐ ܐܸܠܵܐ ܒܚܸܙܘܵܐ ܕܠܵܐ ܪܘܼܟܵܒܼܵܐ ܀ 275 :ܕܠܵܐ ܒܐܝܼ̈ܕܲܝܵܐ ܠܒ݂ܲܟ ܪܘܼܚܵܢܵܐ ܓܡܘܼܪܬܵܐ ܕܠܲܝܬܹܿܝܗ̇ 276 ܘܲܕܼܠܵܐ ܟܲܠܒܿܬܼܵܐ ܩܲܪܒܼܵܗ̇ ܠܦܘܼܡ̇ܐ ܕܲܠܒܼܝܼܫ ܓܘܼܫܡܵܐ ܀ 277 :ܒܟܲܠܒܿܬܼܵܐ ܕܠܲܝܬܹܿܝܗ̇ ܠܒ݂ܲܟ ܠܲܓܼܡܘܼܪܬܵܐ ܕܠܵܐ ܡܸܬܼܚܲܙܝܵܐ 278 ܘܩܲܪܒܼܵܗ̇ ܠܦܘܼܡ̇ܐ ܕܡܸܬܼܚܲܙܝܵܢܵܐ ܕܠܵܐ ܒܲܚܙܵܬܼܵܐ ܀ 279 :ܒܩܵܠܵܐ ܕܠܵܐ ܓܫܘܿܡ ܠܥܸ݂ܙ ܠܵܐ ܓܫܝܼܡܵܐ ܥܲܡ ܓܘܼܫܡܵܢܵܐ 280 ܘܲܓܼܠ̣ܵܐ ܘܚܵܘܝܝܹܗ ܫܘܼܒܼܩܵܢ ܥܵܘ̣ܠܵܐ ܕܢܵܣܹ̇ܒܼ ܡܲܓܵܢ ܀ 281 :ܗܵܐ ܩܸܪܒܲܬ̤ ܗܵܕܹܐ ܠܦܘܼܡܵܟ ܐܸܡ݂ܲܪ ܥܝܼܪܵܐ 282 ܕܬܲܥܒܲܪ ܥܵܘ̣ܠܵܟ ܘܬܸܫܪܸܐ ܦܟܼܵܪܹ̈ܐ ܕܚܵܘܒܲܝ̈ ܢܲܦܫܵܟ ܀ 283 :ܗܵܐ ܫܒܼܝܼܩ ܥܵܘ̣ܠܵܟ ܘܲܥܛܹܐ ܐ̄ܫܛܵܪܵܐ ܕܚܲܝܵܒܼܘܼܬܼܵܟ 284 ܩܘܼܡ ܦܘܼܩ ܐܲܟܼܪܸܙ ܩܵܠ ܫܘܼܒܼܩܵܢܵܐ ܠܲܒܼܢܲܝ̈ ܓܸܢܣܵܟ ܀ 285 :ܗܵܐ ܐܲܦܸܣ ܠܝܼ ܪܸܡܙܵܐ ܟܲܣܝܵܐ ܕܲܫܪܸܐ ܒܚܸܙܘܵܐ 286 ܕܐܹܩܲܪܸܒܼ ܠܵܟ ܣܲܡܵܐ ܕܪ̈ܲܚܡܹܐ ܕܠܵܐ ܒܐܝܼ̈ܕܲܝܵܐ ܀ 287 :ܗܵܐ ܚܵܘܝܼ ܠܝܼ ܕܲܒܼܡܵܢ ܐܲܣܸܐ ܟܹܐܒܼܵܐ ܕܢܲܦܫܵܟ 288 ܘܐܲܝܟܲܢ ܐܸܥܛܹܐ ܫܛܵܪ ܚܵܘ̈ܒܵܬܼܵܐ ܕܥܲܠ ܗܲܕܵܡܲܝ̈ܟ ܀ 289 :ܒܢܘܼܪܵܐ ܐܲܠܦܲܢܝ ܕܐܸܡܪܘܿܩ ܡܸܢܵܟ ܨܵܐܬܼܵܐ ܕܚܵܘ̈ܒܹܿܐ 290 ܘܒܼܵܗ̇ ܒܲܕܹܿܩ ܠܝܼ ܕܐܸܓܼܠܸܐ ܫܪܵܪܵܐ ܕܗܲܝܡܵܢܘܼܬܼܵܐ ܀ 291 :ܠܡܵܢ ܟܲܝ ܒܐܵܬܼܵܐ ܕܢܘܼܪܵܐ ܕܲܟܿܝܹܗ ܠܲܕܼܟܸܐ ܢܲܦܫܵܐ 292 ܕܗܵܐ ܗܝ̤ ܢܘܼܪܵܐ ܡܲܟܿܝܵܢܝܼܬܼܵܐ ܗ̄ܝܼ ܕܡܸܬܼܡܲܟܿܝܵܢܹ̈ܐ ܀ 293 :ܠܡܵܢ ܟܲ ܒܟܲܠܒܿܬܼܵܐ ܐܲܚܕܵܗ̇ ܥܝܼܪܵܐ ܘܠܵܐ ܗ̄ܘ̣ܵܐ ܒܐܝܼܕܹܗ 294 ܕܗܵܐ ܚܲܣܝܼܢ ܗ̄ܘ̣ ܚܹܝܠ ܪܘܼܚܵܢܵܐ ܡ̣ܢ ܫܲܬܼܝܼܩܵܐ ܀ 295 :ܠܡܵܢܵܐ ܢܘܼܪܵܐ ܫܩ݂ܲܠ ܡ̣ܢ ܡܲܕܼܒܿܚܵܐ ܕܲܥ̈ܠܵܘܵܬܼܵܐ 296 ܕܗܵܐ ܕܸܒܼܚܹ̈ܐ ܗ̄ܘ̣ܵܘ ܕܲܡܕܲܟܹܿܝܢ ܗ̄ܘ̣ܵܘ ܘܠܵܐ ܢܘܼܪܵܐ ܀ 297 :ܒܕܸܒܼܚܹ̈ܐ ܕܥܸܪ̈ܒܹܿܐ ܡܸܬܿܕܲܟܹܿܝܢ ܗ̄ܘ̣ܵܘ ܝܼܣܲܪ̈ܠܵܝܹܐ 298 ܘܡܸܛܠ ܡ̇ܢܵܐ ܠܵܘ ܡ̣ܢ ܕܸܒܼܚܹ̈ܐ ܫܩ݂ܲܠ ܩܲܪܸܒܼ ܠܹܗ ܀ 299 :ܒܲܕܼܡ̇ܐ ܕܥܸܓܼܠܹ̈ܐ ܡܸܬܼܚܲܣܹܝܢ ܗ̄ܘ̣ܵܘ ܛܲܟܐܲܝ̈ ܢܲܦܫܵܐ 300 ܘܥܲܠ ܡ̇ܢ ܠܵܐ ܕܡ̇ܐ ܥܲܠ ܦܘܼܡܹܗ ܘܚܲܣܝܼ ܚܵܘܒܵܘ̈ܗܝ ܀ 301 :ܠܵܐ ܐܸܫܬܲܡܥܲܬ̤ ܕܪܲܣ ܐ̄ܢܵܫ ܢܘܼܪܵܐ ܥܲܠ ܗܲܕܵܡܹ̈ܐ 302 ܘܠܵܐ ܕܪܘܼܚܵܢܵܐ ܠܵܐ ܩܢܸܐ ܪܸ̈ܓܼܫܹܐ ܐܸܚܲܕܼ ܢܘܼܪܵܐ ܀ 303 :ܢܘܼܟܼܪܵܝ ܣܲܓܼܝܼ ܗܵܢ ܚܘܼܣܵܝܵܐ ܠܕܲܒܼܢܵܡܘܿܣܵܐ 304 ܘܠܲܝܬܿ ܒܹܗ ܡܸܕܼܵܡܹ̇ܐ ܠܛܲܟܼܣܵܐ ܕܐܲܫܠܸܡ ܡܘܼܫܹܐ ܀ 305 :ܡܘܼܫܹܐ ܘܐܲܗܪܘܿܢ ܕܡ̇ܐ ܪܵܣ̇ܝܼܢ ܗ̄ܘ̣ܵܘ ܥܲܠ ܚܲܛܝܹ̈ܐ 306 ܠܵܘ ܥܲܠ ܦܘܼܡ̇ܐ ܐܸܠܵܐ ܒܐܸܕܼܢܹ̈ܐ ܘܒܲܟܼܪ̈ܵܘܵܬܼܵܐ ܀ 307 ܚܕܲܬܵܐ ܗ̄ܝܼ ܕܲܣܥ݂ܲܪ ܣܪܵܦܵܐ ܕܪܘܼܚܵܐ ܨܹܝܕܼ ܐܹܫܲܥܝܵܐ: pb. 140 308 ܘܠܲܝܬܿ ܠܵܗ̇ ܦܸܚܡܵܐ ܒܟܼܠܹܗ ܛܲܟܼܣܵܐ ܢܵܡܘܿܣܵܝܵܐ ܀ 309 :ܬܵܐ ܦܲܫܸܩ ܠܲܢ ܟܵܗܢܵܐ ܕܥܲܟܵܐ ܡܟܲܗܸܢ ܒܲܕܼܡ̇ܐ 310 ܡ̇ܢܲܐ ܗ̄ܝܼ ܗܵܕܹܐ ܕܲܣܥ݂ܲܪ ܥܝܼܪܵܐ ܨܹܝܕܼ ܒܲܪܓܸܢܣܲܢ ܀ 311 :ܬܵܐ ܚܵܘܵܐ ܠܲܢ ܝܼܣܲܪܠܵܝܵܐ ܚܙ̣ܵܐ ܠܐܲܠܵܗܵܐ 312 ܡ̇ܢܵ̇ܘ ܚܲܝܠܵܐ ܕܲܟܼܣܸܐ ܒܚܸܙܘܵܐ ܕܲܚ̣ܙܵܐ ܢܒܼܝܼܵܟ ܀ 313 :ܬܵܐ ܒܲܕܸܩ ܠܲܢ ܡܚܲܣܸܐ ܥܵܘ̣ܠܵܐ ܒܕܸܡ ܚܲܝ̈ܘܵܬܼܵܐ 314 ܐܡܵܢ ܠܵܐ ܒܲܕܼܡ̇ܐ ܥܛܵܝܗܝ ܪܘܼܚܵܢܵܐ ܠܥܵܘ̣ܠܹܵܗ ܕܐܲܚܘܼܟ ܀ 315 :ܠܡܵܢ ܠܵܐ ܪܲܣ ܠܹܗ ܕܡ̇ܐ ܥܲܠ ܐܸܕܼܢܹܗ ܐܵܘ ܥܲܠ ܛܲܪܦܹܗ 316 ܐܲܟܼܡܵܐ ܕܐܲܠܸܦܘ ܡܘܼܫܹܐ ܘܐܲܗܪܘܿܢ ܠܡܸܬܼܣܝܵܢܹ̈ܐ ܀ 317 :ܠܡܵܢ ܐܸܬܼܚܲܠܲܦ ܛܲܟܼܣܵܐ ܪܲܒܵܐ ܕܪܵܕܹܐ ܗ̄ܘ̣ܵܐ ܒܵܟ 318 ܘܐܲܠܦܵܟ ܥܝܼܪܵܐ ܠܡܸܪܕܵܐ ܒܐܘܼܪܚܵܐ ܕܠܵܐ ܚܲܙܝܵܐ ܠܵܟ ܀ 319 :ܠܵܪܵܐ ܡܸܕܸܿܡ ܣܟܸܐ ܒܹܗ ܒܚܸܙܘܵܐ ܕܲܚܙ̣ܵܐ ܢܒܼܝܼܵܟ 320 ܘܛܵܟ ܠܵܘ ܐ̄ܪܵܙܵܐ ܗ̄ܘ̣ ܐܸܠܵܐ ܫܪܵܪܵܐ ܕܡܲܥܒܲܪ ܐ̄ܪ̈ܵܙܹܐ ܀ 321 :ܫܪܵܪܵܐ ܓܼܠܝܵܐ ܡܲܟܼܪܸܙ ܐ̄ܪܵܙܵܐ ܒܝܲܕܼ ܫܘܼܓܼܢܵܝܹܗ 322 ܘܐܘܼܪܚܵܐ ܫܦܝܼܬܼܵܐ ܩܲܕܸܿܡ ܕܲܪܸܫ ܩܕܼܵܡ ܣܘܼܥܪ̈ܵܢܹܐ ܀ 323 :ܒܘܼܛܵܠ ܕܸܒܼܚܹ̈ܐ ܕܲܒܼܢܵܡܘܿܣܵܐ ܨܝܼܪ ܒܲܓܼܡܘܼܪܬܵܐ 324 ܘܫܘܼܒܼܩܵܢ ܥܵܘ̣ܠܵܐ ܕܫܲܪܝܼܪ ܡ̣ܢ ܗܵܘ̇ ܡܠܸܐ ܒܘܼܕܵܩܵܗ̇ ܀ 325 :ܥܘܼܬܼܪܵܐ ܪܲܒܵܐ ܕܠܵܐ ܡܸܬܼܡܲܣܟܲܢ ܟܣܸܐ ܒܲܚܙܵܬܼܵܗ̇ 326 ܘܡܘܼܠܟܵܢ ܚܲܝܹ̈ܐ ܕܪܵܡ ܡ̣ܢ ܐܲܪܥܵܐ ܡܸܬܼܒܲܕܲܩ ܒܵܗ̇ ܀ 327 :ܩܘܼܕܼܫܵܐ ܕܲܟܼܝܵܐ ܡܲܟܼܪܸܙ ܩܵܠܵܐ ܕܲܫܡܲܝܵܢܹ̈ܐ 328 ܘܠܵܐ ܐܸܫܬܲܡܥܲܬ̤ ܕܩܲܕܸܿܫܘ ܗܵܟܲܢ ܐܸܠܵܐ ܗܵܫܵܐ ܀ 329 :ܬܠܝܼܬܼܵܝܘܼܬܼܵܐ ܡܡܲܠܝܵܐ ܩܥܵܬܼܵܐ ܕܩܘܼܕܵܫܲܝ̈ܗܘܿܢ 330 ܘܲܬܼܠܝܼܬܼܵܐܝܼܬܼ ܡܲܠܦܝܼܢ ܠܐ̄ܢܵܫܵܐ ܠܲܡܩܲܕܵܫܘܼ ܀ 331 :ܬܠܵܬܼܵܐ ܩܵܠܹ̈ܐ ܪܲܟܸܿܒܼܘ ܘܲܩܥ̣ܵܘ ܬܠܵܬܼ ܙܲܒܼ̈ܢܵܬܼܵܐ 332 ܐܲܠܸܦܘ ܛܲܟܼܣܵܐ ܕܐܝܼܬܼ ܒܐܝܼܬܼܘܼܬܼܵܐ ܬܠܵܬܼܵܐ ܒܲܚܕܼܵܐ ܀ 333 :ܐܲܝܟ ܕܲܒܼܨܸܒܼܥܵܐ ܚܵܘܝܼܘ ܐܸܢܹܝܢ ܠܐܲܪ̈ܥܵܢܵܝܹܐ 334 ܕܚܘܼܪܘ ܡ̇ܝܘܿܬܹ̈ܐ ܘܩܲܕܸܿܫܘ ܫܲܦܝܼܪ ܐܲܝܟ ܒܲܪ̄ܬܼ ܩܵܠܲܢ ܀ 335 :ܬܠܵܬܼܵܐ ܩܢܘܿܡܹ̈ܐ ܫ̈ܘܲܝܵܐ ܐܲܟܼܪܸܙܘ ܒܩܘܼܕܵܫܲܝ̈ܗܘܿܢ 336 ܘܬܲܪܓܸܿܡܘ ܐܸܢܘܿܢ ܒܦܘܼܡ ܐܹܫܲܥܝܵܐ ܐܲܝܟ ܫܲܪܝܼܪܹ̈ܐ ܀ 337 :ܫܪܵܪܵܐ ܕܲܒܼܗܘܿܢ ܓܠ̣ܵܘ ܠܲܢܒܼܝܼܵܐ ܐ̄ܪܵܙܵܢܵܐܝܼܬܼ 338 ܘܲܫܩ݂ܲܠ ܣܵܡ̣ܵܘ ܒܲܟܼܬܼܝܼ̈ܒܼܵܬܼܵܐ ܐܲܝܟ ܕܲܒܼܓܲܙܵܐ ܀ 339 ܒܓܲܙܵܐ ܕܣܸܦܪܹ̈ܐ ܣܵܡ̣ܹܗ ܠܐ̄ܪܵܙܵܐ ܕܐܸܬܼܒܲܕܹܿܩ ܠܹܗ: pb. 141 340 ܘܛܲܒܼܥܹܗ ܒܫܸܬܼܩܵܐ ܥܲܕܼ ܡܸܬܼܦܲܫܲܩ ܒܝܲܕܼ ܣܘܼܥܪ̈ܵܢܹܐ ܀ 341 :ܫܸܬܼܩܵܐ ܐܲܪܡܝܼ ܥܲܠ ܩܘܼܕܵܫܵܐ ܒܲܕܼܡܘܼܬܼ ܛܲܒܼܥܵܐ 342 ܕܠܵܐ ܢܚܘܼܪ̈ܵܢ ܒܹܗ ܥܲܝܢܲܝ̈ ܒܸܣܪܵܐ ܘܢܲܫܘܼܛܵܢܵܝ̈ܗܘܿܢ ܀ 343 :ܠܙܲܒܼܢܹܗ ܢܛܝܼܪ ܗ̄ܘ̣ܵܐ ܩܘܼܕܼܫܵܐ ܕܲܟܼܝܵܐ ܠܡܸܬܼܒܲܕܵܩܘܼ 344 ܥܲܠ ܗܵܝ̇ ܟܲܣܝܹܗ ܢܒܼܝܼܵܐ ܒܫܸܬܼܩܵܐ ܡ̣ܢ ܚܲܙܵܝܹ̈ܐ ܀ 345 :ܒܐ̄ܪܵܙܵܐ ܩܲܕܸܿܡ ܓܠ̣ܵܝܗܝ ܓܸܠܝܵܢܵܐ ܒܦܘܼܡ ܪ̈ܘܼܚܵܢܹܐ 346 ܘܚܵܘܝܼ ܠܐ̄ܢܵܫܵܐ ܠܡܸܛܲܪ ܛܲܟܼܣܵܐ ܕܫܘܼܠܵܡ ܙܲܒܼܢܹ̈ܐ ܀ 347 :ܠܫܘܼܠܵܡ ܙܲܒܼܢܹ̈ܐ ܥܬܼܝܼܕܼ ܗ̄ܘ̣ܵܐ ܕܢܸܓܼܠܹܝܗܝ ܠܐ̄ܪܵܙ ܩܘܼܕܵܫܵܐ 348 ܘܩܲܕܸܿܡ ܣܵܡ̣ܹܗ ܐܲܝܟ ܪܲܗܒܼܘܿܢܵܐ ܒܲܟܼܬܼܝܼ̈ܒܼܵܬܼܵܐ ܀ 349 :ܐܵܦ ܪ̈ܘܼܚܵܢܹܐ ܒܗܵܕܹܐ ܬܸܢܘܲܝ ܩܲܕܹܿܫܘ ܘܲܫܬܸܩ̣ܘ 350 ܕܢܸܪܢܸܐ ܟܠܢܵܫ ܕܡ̇ܢܲܐ ܗ̄ܝܼ ܥܸܠܬܼܵܐ ܕܲܬܼܠܵܬܼ ܙܲܒܼܢܝܼ̈ܢ ܀ 351 :ܐܵܦ ܚܘܼܣܵܝܵܐ ܕܝܲܗ̣̄ܒܼ ܠܲܢܒܼܝܼܵܐ ܒܡܸܠܬܼܵܐ ܝܲܗ̣̄ܒܹܿܗ 352 ܕܡ̇ܐ ܕܲܡܫܲܓܼܢܝܼ ܡ̣ܢ ܚܘܼܣܵܝܵܐ ܢܕܼܘܼܢ ܕܥܲܠ ܡ̇ܢܵܐ ܀ 353 :ܐܵܦ ܗܝ̤ ܓܡܘܼܪܬܵܐ ܕܲܛܥܵܬ̤ ܥܵܘ̣ܠܵܐ ܒܥܵܬܼܵܐ ܡܲܠܝܵܐ 354 ܕܐܲܝܟܲܢ ܩܸܪܒܲܬ̤ ܠܦܘܼܡ̇ܐ ܕܒܸܣܪܵܐ ܘܠܵܐ ܐܸܣܬܲܝܲܛ ܀ 355 :ܡܲܢ ܟܲܝ ܝܲܗ̣̄ܒܼ ܒܵܗ̇ ܚܹܝܠ ܚܘܼܣܵܝܵܐ ܒܠܵܐ ܦܵܪܘܿܫܬܵܐ 356 ܘܐܲܝܟܲܢ ܡܝܼܬܿܬܵܐ ܐܲܚܝܲܬ̤ ܡܝܼܬܼܵܐ ܕܡܝܼܬܼ ܒܲܚܛܵܗܵܘ̈ܗܝ ܀ 357 :ܡܝܼܬܿܬܼܵܐ ܗ̄ܝܼ ܢܘܼܪܵܐ ܟܡܵܐ ܐܸܢ ܩܲܢܝܵܐ ܚܲܡܝܼܡܘܼܬܼܵܐ 358 ܘܠܵܐ ܦܵܪܘܿܫܬܵܐ ܗ̄ܝܼ ܟܡܵܐ ܐܸܢ ܐܝܼܬܼ ܒܵܗ̇ ܙܲܗܪܵܐ ܕܢܘܼܪܵܐ ܀ 359 :ܐ̄ܪܵܙ ܡ̇ܘܗܲܒܼܬܼܵܐ ܕܠܲܚܡܵܐ ܘܚܲܡܪܵܐ ܒܓܼܵܘܵܗ̇ 360 ܕܟܲܕܼ ܡܝܼܬܹ̈ܐ ܐ̄ܢܘܿܢ ܝܵܗ̇ܒܿܝܼܢ ܚܲܝܹ̈ܐ ܠܢܵܣܘܿܒܲܝ̈ܗܘܿܢ ܀ 361 :ܒܠܲܚܡܵܐ ܘܚܲܡܪܵܐ ܥܬܼܝܼܕܼ ܗ̄ܘ̣ܵܐ ܛܵܒܼܵܐ ܕܢܲܚܸܐ ܠܐ̄ܢܵܫܵܐ 362 ܘܩܲܕܸܿܡ ܐܲܚܝܼ ܠܒܲܕܼ ܒܲܪܢܵܫܵܐ ܒܚܸܙܘܵܐ ܕܢܘܼܪܵܐ ܀ 363 :ܬܲܪܥܵܐ ܐܸܚܲܕ ܒܐܲܦܲܝ̈ ܝܲܨܪܵܐ ܡܸܬܼܦܲܠܓܼܵܢܵܐ 364 ܕܐܸܢ ܥܲܣܩܝܼܢ ܠܹܗ ܚܲܝܹ̈ܐ ܕܠܲܚܡܵܐ ܢܚܘܼܪ ܒܲܓܼܡܘܼܪܬܵܐ ܀ 365 :ܐܵܪܵܐ ܓܡܘܼܪܬܵܐ ܟܝܵܢܵܐ ܚܲܪܫܵܐ ܥܛܵܬ̤ ܚܵܘ̈ܒܵܬܼܵܐ 366 ܦܲܓܼܪܵܐ ܘܲܕܼܡ̇ܐ ܕܐ̄ܢܵܫܵܐ ܠܵܐ ܡܨܸܐ ܡܚܲܣܸܐ ܚܵܘ̈ܒܹܿܐ ܀ 367 :ܐܵܪܵܐ ܡܸܠܬܼܵܐ ܫܲܪܝܼܪܵܐ ܠܵܟ ܕܫܸܒܼܩܲܬ̤ ܥܵܘ̣ܠܵܐ 368 ܠܡܵܢ ܡܸܬܼܦܲܐܓܲܬܼ ܥܲܠ ܫܘܼܒܼܩܵܢܵܐ ܕܲܒܼܣܘܼܥܪ̈ܵܢܹܐ ܀ 369 :ܐܵܪܵܐ ܚܙܵܬܼܵܐ ܕܛܸܠܵܢܝܼܬܼܵܐ ܨܵܒܹ̇ܝܬܿ ܕܬܹܐܚܘܿܕܼ 370 ܠܡܵܢ ܠܵܐ ܐܵܚ̇ܕܲܬܿ ܓܘܼܫܡܵܐ ܫܪܵܪܵܐ ܕܛܸܠܵܢܝܼܬܼܵܐ ܀ 371 :ܛܸܠܵܢܝܼܬܼܵܐ ܐ̄ܪܵܙ ܚܘܼܣܵܝܵ ܗ̄ܘ̣ ܕܨܝܕܼ ܒܲܪ ܐܵܡܘܿܨ 372 ܕܗܵܢܵܐ ܫܪܵܪܵܐ ܕܲܡܚܲܣܸܐ ܟܠ ܒܠܲܚܡܵܐ ܘܚܲܡܪܵܐ ܀ 373 :ܛܘܼܦܣܵܐ ܕܩܘܼܫܬܵܐ ܨܝܼܪ ܗ̄ܘ̣ܵܐ ܒܚܸܙܘܹܗ ܕܗܵܘ̇ ܓܸܠܝܵܢܵܐ 374 ܘܲܡܓܲܪܸܓܼ ܗ̄ܘ̣ܵܐ ܐ̄ܢܵܫܵܐ ܠܡܸܩܪܲܒܼ ܨܹܝܕܼ ܦܘܼܫܵܩܹܗ ܀ pb. 142 375 :ܘܪ̈ܵܦܹܐ ܨܵܪܘܼܗܝ ܐܲܝܟ ܕܲܠܨܲܠܡܵܐ ܡܸܬܼܚܲܙܝܵܢܵܐ 376 ܘܐܲܥܸܠܘ ܣܵܡ̣ܘܼܗܝ ܒܲܩܕܼܘܿܫ ܩܘܼܕܼܫܹ̈ܐ ܢܵܡܘܿܣܵܝܵܐ ܀ 377 :ܢܵܡܘܿܣܵܐܝܼܬܼ ܪܫܲܡ̣ܘ ܕܹܡܘܵܬܹ̈ܐ ܪ̈ܘܼܚܵܢܵܝܹܐ 378 ܘܟܲܕܼ ܛܵܒܼ ܗܵܟܲܢ ܡܫܲܓܼܢܲܝ ܗ̄ܘ̣ܵܐ ܛܵܒܼ ܡ̣ܢ ܢܵܡܘܿܣܵܐ ܀ 379 :ܢܲܗܝܼܪܝܼܢ ܗ̄ܘ̣ܵܘ ܛܵܒܼ ܣܲܡܡܵܢܹ̈ܐ ܕܨܝܼܪܝܼܢ ܗ̄ܘ̣ܵܘ ܒܹܗ 380 ܘܠܵܐ ܚܠܝܼܛ ܗ̄ܘ̣ܵܐ ܒܗܘܿܢ ܕܸܡ ܚܲܝ̈ܘܵܬܼܵܐ ܫܲܬܿܝܼ̈ܩܵܬܼܵܐ ܀ 381 :ܠܵܐ ܕܵܡܹ̇ܐ ܗ̄ܘ̣ܵܐ ܕܸܒܼܚܵܐ ܕܝܘܼܩܢܹܐ ܠܕܸܒܼܚܹ̈ܐ ܚܲܪ̈ܫܹܐ 382 ܘܠܵܐ ܬܸܫܒܿܘܿܚܬܵܐ ܕܲܡܫܲܒܿܚܵܢܵܘ̈ܗܝ ܠܫܘܼܒܼܚܹܗ ܕܡܘܼܫܹܐ ܀ 383 :ܫܒܼܝܼܚ ܗ̄ܘ̣ܵܐ ܣܲܓܿܝܼ ܘܠܲܝܬܿ ܗ̄ܘ̣ܵܐ ܫܘܼܒܚܵܐ ܕܕܵܡܹ̇ܐ ܠܫܘܼܒܼܚܹܗ 384 ܕܐܵܦ ܗܘ̤ ܫܘܼܒܼܚܹܗ ܕܗܲܝܟܲܠ ܩܘܼܕܼܫܵܐ ܦܟ݂ܲܗ ܒܲܚܙܵܬܹܗ ܀ 385 :ܒܗܲܝܟܲܠ ܩܘܼܕܼܫܵܐ ܨܵܪܘܼܗܝ ܥܝܼܪܹ̈ܐ ܠܲܨܠܸܡ ܩܘܼܫܬܵܐ 386 ܘܐܲܝܟ ܕܲܠܡܲܠܟܵܐ ܩܥ̣ܵܘ ܠܹܗ ܫܘܼܒܼܚܵܐ ܒܹܝܬܼ ܡܲܠܟܿܘܼܬܹܗ ܀ 387 :ܒܗܸܕܼܪܵܐ ܕܫܘܼܒܼܚܵܐ ܕܲܡܫܲܒܿܚܵܢܵܘ̈ܗܝ ܬܗܲܪ ܒܲܪ ܐܵܡܘܿܨ 388 ܘܲܗܘ̤ܵܐ ܒܥܲܝܢܵܘ̈ܗܝ ܥܲܠܡܵܐ ܘܫܘܼܒܼܚܹܗ ܐܲܝܟ ܠܵܐ ܡܸܕܹܿܡ ܀ 389 :ܐܵܦܠܵܐ ܕܐܝܼܬܼܵܘܗܝ ܚܲܫ̣ܒܹܿܗ ܠܥܵܠܡܵܐ ܒܦܸܚܡܵܐ ܕܫܘܼܒܼܚܹܗ 390 ܘܕܲܐܲܝܟ ܗܵܟܲܢܵܐ ܗ̄ܝܼ ܐܲܝܟ ܕܐܸܬܼܪܲܥܝܼ ܘܛܵܒܼ ܡ̣ܢ ܗܵܟܲܢ ܀ 391 :ܘܐܲܝܟ ܕܲܒܼܥܵܠܡܵܐ ܐ̄ܚܪܹܢܵܐ ܣܒ݂ܲܪ ܗ̄ܘ̣ܵܐ ܢܒܼܝܼܵܐ ܕܐܝܼܬܼܵܘܗܝ 392 ܘܩܵܡ̣ ܕܲܢܩܲܛܪܸܓܼ ܥܵܘ̣ܠܹܗ ܕܥܲܡܵܐ ܒܦܲܪܨܘܿܦ ܢܲܦܫܹܗ ܀ 393 :ܠܕܝܼܢܵܐ ܟܹܐܢܵܐ ܥܲܠ̣ ܥܲܡ ܢܲܦܫܹܗ ܚܠܵܦ ܟܠ ܒܲܪܢܵܫ 394 ܘܲܚ̣ܙܵܐ ܕܲܚܒܼܝܼܫ ܟܠܹܗ ܟܝܵܢܵܐ ܬܚܹܝܬܼ ܚܵܘ̈ܒܵܬܼܵܐ ܀ 395 :ܘܵܝܵܐ ܪܲܟܸܿܒܼ ܒܩܵܠ ܦܸܬܼܓܼܵܡܵܘ̈ܗܝ ܐܲܝܟ ܐܘܿܠ̈ܝܵܬܼܵܐ 396 ܘܒܲܟܿܝܼ ܐܸܢܘܿܢ ܠܚܲܫܲܝ̈ ܐ̄ܢܵܫܵܐ ܪܵܥܘܿܡ̇ܐܝܼܬܼ ܀ 397 :ܘܵܝܠܝܼ ܐܸܡ݂ܲܪ ܗܵܢܵܘ̇ ܕܹܝܢ ܘܵܝ ܠܲܟܼܝܵܢ ܐ̄ܢܵܫܵܐ 398 ܕܚܲܒܼ݂ܫܹܗ ܥܵܘ̣ܠܵܐ ܒܒܹܝܬܼ ܐܲܣܝܼܪܹ̈ܐ ܕܡ̇ܝܘܼܿܬܼܬܼܵܐ ܀ 399 :ܕܵܘܹܐ ܗ̄ܘ̣ ܣܲܓܿܝܼ ܟܝܵܢ ܡ̇ܝܘܿܬܹ̈ܐ ܡ̣ܢ ܟܠ ܕܲܗܘ̤ܵܘ 400 ܘܲܡܚܝܼܠ ܙܲܝܢܵܐ ܒܸܣܪܵܢܵܝܵܐ ܕܡܸܬܼܟܲܬܲܫܒܹܗ ܀ 401 :ܚܙ̣ܵܝܗܝ ܕܲܝܵܢ̇ܵܐ ܕܫܲܦܝܼܪ ܕܵܐܹ̇ܢ ܗܘ̤ ܠܲܩܢܘܿܡܹܗ 402 ܘܚܵܣ̣ ܥܲܠ ܫܸܦܠܵܐ ܕܟܼܠܹܗ ܟܝܵܢܵܐ ܒܪ̈ܲܚܡܹܐ ܕܲܥܠܵܘܗܝ ܀ 403 :ܚ̣ܙܵܝܗܝ ܕܲܡܩܲܛܪܸܓܼ ܠܲܫܟܼܝܼܪ̈ܵܬܼܵܐ ܕܓܸܢܣܹܗ ܒܢܲܦܫܹܗ 404 ܘܫܲܕܿܪܹܗ ܕܢܸܗܘܸܐ ܐ̄ܣܟܿܘܿܠܸܣܛܝܼܩܵܐ ܠܒܼܘܼܚܪܵܢ ܥܵܘ̣ܠܵܐ ܀ 405 :ܚܙ̣ܵܐ ܕܠܵܐ ܢܵܣܹ̇ܒܼ ܒܐܲܦܲܝ̈ ܢܲܦܫܹܗ ܠܡܸܒܼܣܲܪ ܥܵܘ̣ܠܵܗ 406 ܘܫܲܓܼܪܹܗ ܒܪܘܼܚܵܐ ܕܲܢܕܲܟܸܿܐ ܒܹܗ ܥܵܘ̣ܠܹܗ ܕܥܲܡܵܐ ܀ 407 ܚܙ̣ܵܐ ܕܟܹܐܢܵܐܝܼܬܼ ܝܵ̇ܕܲܥ ܕܲܢܕܼܘܼܢ ܕܠܵܐ ܕܠܵܐ ܒܘܼܣܪܵܢܵܐ: pb. 143 408 ܘܝܲܗ̣̄ܒܼ ܠܹܗ ܫܲܒܼܛܵܐ ܕܲܢܒܼܝܼܘܼܬܼܵܐ ܕܢܸܪܕܹܿܐ ܠܒܼܝܼܫܹ̈ܐ ܀ 409 :ܐܲܝܟ ܕܲܒܼܟܼܘܼܪܵܐ ܒܩܵܝ̣ܗܝ ܠܲܫܪܵܪܵܐ ܕܗܲܝܡܵܢܘܼܬܹܗ 410 ܘܥܲܒܼ݂ܕܹܿܗ ܠܦܘܼܡܹܗ ܒܘܼܕܵܩ ܐ̄ܪ̈ܵܙܹܐ ܕܲܣܬܼܝܼܪ̈ܵܬܼܵܐ ܀ 411 :ܒܩܵܠܵܐ ܐܲܫܡܲܥ ܠܵܐ ܩܢܸܐ ܨܹܝܕܼ ܒܲܪ ܒܲܝܬܹܿܗ 412 ܕܡܸܬܼܚܲܫܲܒܼ ܗ̄ܘ̣ܵܘ ܕܡܲܢ̣ܘܼ ܫܵܘܹ̇ܐ ܕܢܲܟܼܪܸܙ ܡܸܠܵܘ̈ܗܝ ܀ 413 :ܠܡܲܢ ܐܹܫܲܕܲܪ ܘܡܲܢ̣ܘܼ ܢܹܐܙܲܠ ܩܥ̣ܵܐ ܓܸܠܝܵܢܵܐ 414 ܘܦܲܢܝܼ ܟܹܐܢܵܐ ܕܐ̄ܢܵܐ ܐܵܙܹ̇ܠ ܐ̄ܢܵܐ ܚܘܼܒܵܢܵܐܝܼܬܼ ܀ 415 :ܠܡܲܢ ܟܲܝ ܫܲܐܸܠ ܝܵ̇ܕܲܥ ܟܠܵܐ ܐܲܝܟ ܠܵܐ ܝܵ̇ܕܲܥ 416 ܕܗܵܐ ܝܵ̇ܕܲܥ ܗ̄ܘ̣ܵܐ ܕܡܲܢ̣ܘܼ ܥܵܗܹ̇ܢ ܠܣܵܥܘܿܪܘܼܬܹܗ ܀ 417 :ܫܲܐܸܠ ܕܢܸܫܡܲܥ ܡܸܫܬܲܕܲܪܵܢܵܐ ܚܦܝܼܛ ܪܸܥܝܵܢܵܐ 418 ܘܢܸܓܼܒܸܿܐ ܗܘ̤ ܠܹܗ ܠܲܡܫܲܡܵܫܘܼ ܠܦܘܼܩܕܵܢ ܡ̇ܪܹܗ ܀ 419 :ܒܚܘܼܒܵܐ ܩܲܒܸܿܠ ܕܢܲܟܼܪܸܙ ܩܘܼܫܬܵܐ ܒܐܸܕܼܢܲܝ̈ ܥܲܛܠܹ̈ܐ 420 ܘܲܒܼܨܸܒܼܝܵܢܹܗ ܓܒܼ݂ܵܐ ܠܹܗ ܥܲܡܠܵܐ ܚܠܵܦ ܚܲܛܝܹ̈ܐ ܀ 421 :ܐ̄ܢܵܐ ܐܵܙܹ̇ܠ ܐ̄ܢܵܐ ܥܢ̣ܵܐ ܠܓܸܠܝܵܢܵܐ ܕܡܲܠܸܠ ܥܲܡܹܗ 422 ܘܲܡܬܲܪܓܸܿܡ ܐ̄ܢܵܐ ܫܪܵܪܵܐ ܕܲܫܡܵܟ ܕܠܵܐ ܐܲܚܦܝܝܼܬܼܵܐ ܀ 423 :ܐ̄ܢܵܐ ܡܲܟܼܪܸܙ ܐ̄ܢܵܐ ܚܹܝܠ ܐܝܼܬܼܘܼܬܼܵܟ ܒܹܝܬܼ ܐܲܪ̈ܥܵܢܹܐ 424 ܘܲܡܒܲܛܸܠ ܐ̄ܢܵܐ ܫܸܡ ܐܲܠܵܗܹ̈ܐ ܕܥܸܒܼܕܲܬ̤ ܛܘܼܥܝܲܝ ܀ 425 :ܗܲܒܼ ܠܝܼ ܛܲܒܼܥܵܐ ܕܲܫܡܵܟ ܪܲܒܵܐ ܕܠܵܐ ܡܸܬܿܕܲܓܲܠ 426 ܕܐܸܥܛܸܐ ܒܲܫܡܵܟ ܫܡܵܗܹ̈ܿܐ ܫܐܝܼܠܹ̈ܐ ܕܠܵܐ ܫܲܪܝܼܪܝܼܢ ܀ 427 :ܟܬܼܘܿܒܼ ܠܝܼ ܣܲܩܪܵܐ ܕܲܪܡ̇ܝ ܐܝܼܕܼܵܐ ܕܐܲܡܝܼܢܘܼܬܼܵܟ 428 ܕܐܸܩܪܹܝܗ̇ ܩܕܼܵܡ ܟܠ ܘܢܸܕܲܥ ܟܠܢܵܫ ܕܕܝܼܠܵܟ ܗ̄ܘ̣ ܟܠ ܀ 429 :ܐܵܘܚܸܕܼ ܒܐܝܼܕܲܝ̈ ܫܲܒܼܛܵܐ ܦܫܝܼܛܵܐ ܕܪܘܼܚ ܨܸܒܼܝܵܢܵܟ 430 ܕܐܹܩܲܦܲܚ ܒܹܗ ܦܬܲܟܼܪܹ̈ܐ ܚܲܪ̈ܫܹܐ ܕܪܲܟܸܿܒܼܘ ܫܹܐܕܹ̈ܐ ܀ 431 :ܐܘܿ ܠܲܢܒܼܝܼܵܐ ܫܒܼܝܼܚ ܒܲܢܒܼܝܼܝܹ̈ܐ ܟܡܵܐ ܐܸܬܿܟܲܝܲܒܼ 432 ܕܢܸܛܥܲܢ ܝܘܼܩܪܵܐ ܕܟܼܵܪܘܿܙܘܼܬܼܵ ܕܐܸܬܼܓܲܥܠܲܬ̤ ܠܹܗ ܀ 433 :ܐܘܿ ܠܐܝܼܙ ܓܲܕܵܐ ܩܲܠܝܼܠ ܗܵܘܢܵܐ ܟܡܵܐ ܪܗܸܛ̣ ܗܵܘܢܹܗ 434 ܕܥܲܕܼܠܵܐ ܢܚܸܙܘܿܩ ܡ̣ܛܵܐ ܨܸܒܼܝܵܢܹܗ ܠܐܲܝܟܵܐ ܕܫܲܠܚ̣ܘܼܗܝ ܀ 435 :ܐܘܿ ܠܚܲܙܵܝܵܐ ܕܫܲܦܝܼܪ̈ܵܬܼܵܐ ܟܡܵܐ ܚܵܪ̣ ܫܲܦܝܼܪ 436 ܘܛܵܣ̣ ܪܸܥܝܵܢܹܗ ܥܲܠ ܓܸܠܝܵܢܵܐ ܕܪܵܡ ܡ̣ܢ ܚܲܝܠܹܗ ܀ 437 :ܐܘܿ ܠܲܬܼܪܝܼܨܵܐ ܟܡܵܐ ܝ̄ܕܲܥ ܕܲܢܕܼܘܼܢ ܦܵܪܘܿܫܵܐܝܼܬܼ 438 ܕܚܵܪ̣ ܒܲܩܢܘܿܡܹܗ ܘܚܲܝܒܹܗ ܠܥܵܘ̣ܠܵܐ ܕܟܼܠܵܗ̇ ܬܹܒܹܝܠ ܀ 439 :ܬܵܘ ܢܸܩܒܿܘܿܥ ܠܲܢ ܢܝܼܫܵܐ ܕܕܼܵܡܹ̇ܐ ܠܲܕܼܒܲܪ ܐܵܡܘܿܨ 440 ܘܢܸܚܢܸܐ ܠܩܘܼܒܼܠܹܗ ܒܝܲܕܼ ܩܘܼܛܪܵܓܼܵܐ ܕܲܫܟܼܝܼܪ݁ܵܬܲܢ ܀ 441 :ܬܵܘ ܢܸܬܿܬܲܢܲܚ ܥܲܠ ܣܲܢ̈ܝܵܬܲܢ ܒܕܼܘܼܡܝܵܐ ܕܝܼܠܹܗ 442 ܘܲܢܕܼܘܼܢ ܥܵܘ̣ܠܲܢ ܥܲܕܼܠܵܐ ܢܕܼܘܼܢܲܢ ܕܝܼܢܵܐ ܥܬܼܝܼܕܼܵܐ ܀ pb. 144 443 :ܢܵܘܕܹܿܐ ܕܲܚ̣ܛܲܝܢ ܐܲܝܟ ܕܐܵܘܕܿܝܼ ܗܘ̤ ܩܕܼܵܡ ܓܸܠܝܵܢܵܐ 444 ܕܢܸܫܘܸܐ ܠܡܸܫܡܲܥ ܩܵܠ ܫܘܼܒܼܩܵܢܵܐ ܐܲܝܟ ܕܲܫܡܲܥ ܗܘ̤ ܀