Narsai: On the Dedication of the Church - ܥܲܠ ܩܘܼܕܵܫܥܹܕܿܬܵܐ

1 :ܚܠܘܿܠܵܐ ܪܲܒܵܐ ܥܒ݂ܲܕܼ ܠܵܗ̇ ܠܥܹܕܿܬܹܿܗ ܒܲܪ ܐܲܠܵܗܵܐ 2 ܘܥܲܡܡܹ̈ܐ ܟܠܗܘܿܢ ܙܲܡܸܢ ܘܲܩ̣ܪܵܐ ܠܝܘܿܡ ܡܸܫܬܿܘܼܬܼܵܗ̇ ܀ 3 ܒܲܪ̄ܬܼ ܚܸܫܘܿܟܹ̈ܐ ܡ̣ܟܲܪ ܠܹܗ ܫܸܡܫܵܐ ܕܙܲܝܼܩܘܼܬܼܵܐ: pb. 157 4 ܘܲܙܠܲܚ ܒܐܲܦܹ̈ܝܗ̇ ܫܘܼܦܪܹܗ ܦܲܐܝܵܐ ܘܢܘܼܗܪܵܐ ܠܸܒܲܫܲܬ̤ ܀ 5 :ܠܒܲܪ̄ܬܼ ܡܸܣܟܹܿܢܹ̈ܐ ܪܚܸܡ݂ ܥܲܬܿܝܼܪܵܐ ܕܠܵܐ ܡܸܬܼܡܲܣܟܲܢ 6 ܘܥܘܼܬܼܪܹܗ ܪܲܒܵܐ ܐܲܓܼܥܸܠ ܒܐܝܼܕܹ̈ܝܗ̇ ܕܒܹܗ ܬܸܬܼܪܲܡܪܲܡ ܀ 7 :ܚܲܬܼܢܵܐ ܡܫܝܼܚܵܐ ܒܚܘܼܒܹܿܗ ܪܲܒܵܐ ܐܲܪܟܸܿܢ ܪܵܘܡܹܗ 8 ܘܲܠܡܵܝܘܿܬܹ̈ܐ ܨܒܼܵܐ ܘܐܸܬܼܚܲܬܲܢ ܘܪܲܡܪܸܡ ܐܸܢܘܿܢ ܀ 9 :ܡ̇ܪܵܐ ܕܪܵܡ̇ܐ ܐܲܪܟܸܿܢ ܪܵܘܡܹܗ ܨܹܝܕܼ ܬܲܚܬܵܝܹ̈ܐ 10 ܘܲܗܘ̤ܵܐ ܚܲܬܼܢܵܐ ܠܥܲܡܡܹ̈ܐ ܛܲܡ̈ܠܹܐ ܘܩܲܕܹܿܫ ܐܸܢܘܿܢ ܀ 11 :ܥܹܕܲܬܼ ܥܲܡܡܹ̈ܐ ܡ̣ܟܲܪ ܠܹܗ ܚܲܬܼܢܵܐ ܒܲܪ ܥܸܠܵܝܵܐ 12 ܘܚܲܠ̣ܛܵܗ̇ ܒܚܘܼܒܹܿܗ ܘܐܲܪܝܼܡ ܪܹܫܵܗ̇ ܒܹܝܬܼ ܣܵܩܘܿܪܹ̈ܝܗ̇ ܀ 13 :ܚܕܼܵܐ ܓܼܠܘܵܝܵܬܵܐ ܫܒܼܝܼܩܬܬܵܐ ܫܚܝܼܩܬܵܐ ܘܲܡܫܲܦܲܠܬܵܐ 14 ܗܘ̤ܵܬܼ ܒܲܪ̄ܬܼ ܢܸܩܦܵܐ ܠܲܒܼܪܹܗ ܕܪܵܡ̇ܐ ܫܪܸܐ ܒܲܡܪ̈ܵܘܡܹܐ ܀ 15 :ܚܕܼܵܐ ܚܸܫܘܿܟܼܬܵܐ ܥܛܝܼܦܲܬܼ ܚܸܫܟܵܐ ܕܕܸܚܠܲܬܼ ܫܹܐܕܹ̈ܐ 16 ܪܲܚ̣ܡܵܗ̇ ܢܘܼܗܪܵܐ ܘܲܩܪ̣ܵܗ̇ ܨܹܐܕܼܵܘܗܝ ܘܲܡ̣ܠܵܗ̇ ܢܘܼܗܪܵܐ ܀ 17 :ܠܲܡܒܲܕܿܪܬܵܐ ܘܠܦܵܗܝܼܬܼܵܐ ܕܒܲܣܪ̈ܝܼܩܵܬܼܵܐ 18 ܩܪ̣ܵܐ ܗ̄ܘ̣ܵܐ ܘܟܲܢܸܫ ܒܲܪ ܐܲܠܵܗܵܐ ܘܥܲܒܼ݂ܕܼܵܗ̇ ܕܝܼܠܹܗ ܀ 19 :ܠܗܵܝ̇ ܛܵܥܝܼܬܼܵܐ ܒܲܪ̄ܬܼ ܢܘܼܟܼܪ̈ܵܝܹܐ ܪܚܸܡ ܪܵܚܹ̇ܡ ܟܠ 20 ܘܟܲܢܫܵܗ̇ ܨܹܐܕܼܵܘܗܝ ܘܲܙܪܲܥ ܒܐܸܕܼܢܹ̈ܝܗ̇ ܝܘܼܠܦܵܢ ܚܲܝܹ̈ܐ ܀ 21 :ܠܗܵܝ̇ ܐܲܒܿܝܼܕܿܬܵܐ ܕܐܲܒܿܝܼܕܼܵܐ ܗ̄ܘ̣ܵܬܼ ܒܚܲܝܠܹ̈ܐ ܕܛܘܼܥܝܲܝ 22 ܒܥ̣ܵܗ̇ ܡܸܫܟܲܚ ܟܠ ܘܲܕܼܒܲܪ ܐܲܥܠܵܗ̇ ܠܲܛܝܵܪ ܚܲܝܹ̈ܐ ܀ 23 :ܠܲܡܦܲܪܣܵܝܬܵܐ ܘܠܲܡܨܲܥܲܪܬܵܐ ܡ̣ܟܲܪ ܝܲܩܝܼܪܵܐ 24 ܘܢܲܟܿܦܵܗ̇ ܒܙܝܼܘܹܗ ܘܟܲܣܝܼ ܨܲܥܪܵܗ̇ ܒܐܸܣܛܲܠ ܫܘܼܒܼܚܹܗ ܀ 25 :ܠܚܲܒܼܪܲܬܼ ܫܹܐܕܹ̈ܐ ܘܐܲܡܬܼܵܐ ܕܕܲܝܘܹ̈ܐ ܓܒܼܵܐ ܩܲܕܿܝܼܫܵܐ 26 ܘܙܲܠܚܵܗ̇ ܒܚܘܼܒܹܿܗ ܘܐܲܫܝܼܓܼ ܡܸܢܵܗ̇ ܥܵܘ̣ܠܵܗ̇ ܪܲܒܵܐ ܀ 27 :ܚܙܵܗ̇ ܕܐܘܼܟܵܡܵܐ ܘܚܸܠܵܐ ܛܥܝܼܢܵܐ ܘܲܣܢܸܐ ܚܸܙܘܵܗ̇ 28 ܘܐܲܚܬܼܵܗܗ̇ ܠܡܲܝ̈ܵܐ ܘܚܲܠܸܠ ܡܲܪ̣ܩܵܗ̇ ܡ̣ܢ ܨܵܐܘܼܬܼܵܗ̇ ܀ 29 :ܚܕܼܵܐ ܡܲܣܚܘܼܬܼܵܐ ܕܡܲܠܝܵܐ ܚܲܝܹ̈ܐ ܐܲܬܼܩܸܢ ܗ̄ܘ̣ܵܐ ܠܵܗ̇ 30 ܘܐܲܫܝܼܓܼ ܚܲܠܠܵܗ̇ ܘܲܡ̣ܪܲܩ ܐܲܦܹܝ̈ܗ̇ ܡ̣ܢ ܣܲܢ̈ܝܵܬܼܵܐ ܀ 31 :ܒܡܲܝ̈ܵܐ ܚܲܝܹ̈ܐ ܐܲܫܝܼܓܼ ܨܵܐܬܼܵܗ̇ ܕܲܡܟܲܬܲܡܬܵܐ 32 ܘܡܸܫܚܵܐ ܕܩܘܼܕܼܫܵܐ ܢܣ݂ܲܟ ܥܲܠ ܪܹܫܵܗ̇ ܘܐܲܦܨܲܚ ܐܲܦܹ̈ܝܗ̇ ܀ 33 ܒܡܸܫܚܵܐ ܘܡܲܝܵ̈ܐ ܐܲܫܝܼܓܼ ܦܲܓܼܪܵܗ̇ ܘܕܲܟܿܝܼ ܢܲܦܫܵܗ̇: pb. 158 34 ܘܲܫܡܵܐ ܣܵܡ̣ ܠܵܗ̇ ܥܹܕܲܬܼ ܩܘܼܕܼܫܵܐ ܡܲܠܝܲܬܼ ܫܘܼܦܪܹ̈ܐ ܀ 35 :ܐܲܫܠܲܚ ܡܸܢܵܗ̇ ܫܸܡ ܣܲܢܝܘܼܬܼܵܗ̇ ܥܲܡ ܣܘܼܪ̈ܚܵܢܹܝܗ̇ 36 ܘܐܲܒܿܫܵܗ̇ ܫܘܼܦܪܵܐ ܘܥܹܕܿܬܵܐ ܓܒܼܝܼܬܼܵܐ ܣܵܡ̣ ܟܘܼܢܵܝܵܗ̇ ܀ 37 :ܒܲܫܡܵܐ ܦܲܐܝܵܐ ܕܣܵܡ̣ܘ ܠܵܗ̇ ܢܒܼܝܹ̈ܐ ܒܓܸܠܝܵܢܲܝ̈ܗܘܿܢ 38 ܒܹܗ ܗ̄ܘ̣ ܩܪ̣ܵܗ̇ ܗ̄ܘ̣ܵܐ ܚܲܬܼܢܵܐ ܫܒܼܝܼܚܵܐ ܒܝܘܿܡ ܡܲܣܚܘܼܬܼܵܗ̇ ܀ 39 :ܥܹܕܲܬܵܐ ܩܪ̣ܵܐܘܼܗ̇ ܢܒܼܝܼ̈ܐ ܕܪܘܼܚܵܐ ܒܦܸܬܼܓܼܵܡܲܝ̈ܗܘܿܢ 40 ܘܒܼܵܗ̇ ܗ̄ܘ̣ ܙܡܲܪܘ ܗ̄ܘ̣ܵܘ ܫܘܼܒܼܚܵܐ ܠܡܵܪܵ̄ܗ̇ ܡ̣ܢ ܟܠ ܥܲܡܡܹ̈ܐ ܀ 41 :ܥܹܕܿܬܵܐ ܪܲܒܿܬܼܵܐ ܣܵܡ̣ܘ ܫܘܼܡܵܗܵܗ̇ ܢܒܼܝܼ̈ܐ ܟܹܐܢܹ̈ܐ 42 ܘܐܸܬܼܵܐ ܚܲܬܼܢܵܐ ܘܫܲܪܵܪ ܠܲܫܡܵܗ̇ ܒܡܲܥܡܘܿܕܼܝܼܬܼܵܐ ܀ 43 :ܒܡܲܝܵ̈ܐ ܚܲܠܠܵܗ̇ ܒܡܸܫܚܵܐ ܪܲܫܡ̣ܵܗ̇ ܒܚܘܼܒܵܐ ܙܲܠܚܵܗ̇ 44 ܘܐܸܣܛܲܠ ܢܘܼܗܪܵܐ ܫܩܲܠ̣ ܠܹܗ ܘܐܲܠܒܿܫܵܗ̇ ܩܲܕܿܝܼܫܵܐܝܼܬܼ ܀ 45 :ܒܲܫܡܹܗ ܚܲܝܵܐ ܘܲܒܼܫܸܡ ܐܲܒܼܘܼܗܝ ܘܲܕܪܘܼܚܩܘܼܕܼܫܵܐ 46 ܚܲܬܼܡ̇ܗ̇ ܠܟܲܠܬܼܵܐ ܘܫܲܡܠܝܼ ܫܘܼܦܪܵܗ̇ ܪܘܼܚܵܢܵܝܵܐ ܀ 47 :ܟܠܝܼܠܵܐ ܕܢܘܼܗܪܵܐ ܣܵܡ̣ ܥܲܠ ܪܹܫܵܗ̇ ܕܲܡܗܲܕܿܪܬܵܐ 48 ܘܦܲܓܼܪܹܗ ܩܨ݂ܵܐ ܠܵܗ̇ ܘܲܕܼܡܹܗ ܡ̣ܙܲܓܼ ܠܵܗ̇ ܘܚܲܕܿܝܼ ܠܸܒܵܗ̇ ܀ 49 :ܒܚܲܫܹܗ ܚܲܪܵܪܵܗ̇ ܒܩܸܛܠܹܗ ܦܲܪ̣ܵܩܵܗ̇ ܒܡܵܘܬܹܿܗ ܙܲܒܼܢܵܗ̇ 50 ܘܲܒܼܢܘܼܚܵܡܹܗ ܙܠܲܚ̣ ܠܵܗ̇ ܚܲܝܹ̈ܐ ܪ̈ܘܼܚܵܢܵܝܹܐ ܀ 51 :ܓܢܘܿܢܵܐ ܩܛ݂ܲܪ ܠܵܗ̇ ܡ̣ܢ ܙܲܠܝܼܩܹ̈ܐ ܕܢܘܼܗܪܹܗ ܕܐܲܒܼܘܼܗܝ 52 ܘܥܵܠܡܹ̈ܐ ܘܕܼܵܪܹ̈ܐ ܩܪ̣ܵܐ ܠܲܚܠܘܿܠܵܗ̇ ܡܲܪܕܸܿܐ ܚܲܝܹ̈ܐ ܀ 53 :ܥܹܕܿܬܵܐ ܟܲܠܬܼܵܗ̇ ܕܲܙܩܝܼܦܘܼܬܼܵܐ ܢܘܼܗܪܵܐ ܠܸܒܼܫܲܬ̤ 54 ܘܡ̣ܢ ܙܲܠܝܼܩܹ̈ܝܗ̇ ܢܗ݂ܲܪܘ ܚܲܒܿܝܼܒܹ̈ܝܗ̇ ܒܢܲܝ̈ ܝܵܪܬܿܘܼܬܼܵܗ̇ ܀ 55 :ܚܘܼܒܹܿܗ ܕܚܲܬܼܢܵܐ ܠܵܐ ܡܸܬܼܡܲܥܲܠ ܡ̣ܢ ܡܲܠܵܠܹ̈ܐ 56 ܘܪ̈ܲܚܡܹܝܗ̇ ܕܟܲܠܬܼܵܐ ܠܵܐ ܡܸܬܼܪܲܫܡܝܼܢ ܒܲܟܼܬܼܝܼ̈ܒܼܵܬܼܵܐ ܀ 57 :ܚܘܼܒܹܿܗ ܕܚܲܬܼܢܵܐ ܕܲܠܘܵܬܼ ܟܲܠܬܼܵܐ ܒܩܲܝܣܵܐ ܩܲܒܼ݂ܥܹܗ 58 ܘܪ̈ܲܚܡܹܝܗ̇ ܕܟܲܠܬܵܐ ܒܵܬܲܪ ܚܲܬܼܢܵܐ ܙܩܝܼܦܵܐ ܪ̈ܲܕܼܦܘܼܗ̇ ܀ 59 :ܐܲܝܢܵܘ ܚܲܬܼܢܵܐ ܕܡܸܛܠ ܟܲܠܬܼܵܐ ܙܩܝܼܦܵܐ ܣܲܝܒܲܪ 60 ܐܸܠܵܐ ܡܫܝܼܚܵܐ ܕܚܘܼܒܹܿܗ ܪܲܒܵܐ ܠܵܐ ܡܸܬܼܡܲܠܲܠ ܀ 61 :ܘܐܲܝܕܵܐ ܗ̄ܝܼ ܟܲܠܬܼܵܐ ܕܪܸܚܡܲܬ̤ ܚܲܬܼܢܵܐ ܕܲܬܼܠܸܐ ܒܩܲܝܣܵܐ 62 ܐܸܠܵܐ ܥܹܕܲܬܵܐ ܕܪܵܡ ܗ̄ܘ̣ ܫܲܪܒܵܗ̇ ܡ̣ܢ ܡܲܠܵܠܹ݁̈ܐ ܀ 63 :ܡܸܛܠ ܥܹܕܿܬܹܿܗ ܡ̣ܝܼܬܼ ܒܲܙܩܝܼܦܵܐ ܒܲܪ ܐܲܠܵܗܵܐ 64 ܘܡܸܛܠ ܡ̇ܘܬܹܿܗ ܪܚܸܡܬܹܗ ܥܹܕܿܬܵܐ ܘܠܹܗ ܐܸܬܼܢܲܩܦܲܬ̤ ܀ 65 :ܚܲܬܼܢܵܐ ܩܛܝܼܠܵܐ ܘܟܲܠܬܼܵܐ ܦܪܝܼܩܬܵܐ ܢܩܸܦܘ̣ ܠܲܚ̈ܕܵܕܹܐ 66 ܘܗܵܐ ܒܲܚܠܘܿܠܗܘܿܢ ܒܵܣܡ̇ܝܼܢ ܕܵܪܹ̈ܐ ܥܲܡ ܫܲܪ̈ܒܼܵܬܼܵܐ ܀ 67 :ܒܪܵܘܡ̇ܐ ܪܵܡ̇ܐ ܣܵܡ̣ܵܗ̇ ܚܲܬܼܢܵܐ ܠܟܲܠܲܬܼ ܚܘܼܒܹܿܗ 68 ܘܚܵܘܝܼ ܫܘܿܦܪܵܗ̇ ܠܲܫܡܲܝܵܢܹ̈ܐ ܘܠܲܐܪ̈ܥܵܢܵܝܹܐ ܀ 69 ܙܲܡܸܢ ܕܵܪܹ̈ܐ ܩܪ̣ܵܐ ܫܲܪ̈ܒܼܵܬܼܵܐ ܠܲܚܠܘܿܠ ܚܲܝܹ̈ܐ: pb. 159 70 ܘܐܲܣܡܸܟ ܐܸܢܘܿܢ ܩܕܼܵܡ ܒܲܪ̄ܬܼ ܡܲܠܟܵܐ ܟܲܠܲܬܼ ܩܘܼܕܼܫܵܐ ܀ 71 :ܢܒܼܝܼ̈ܐ ܟܹܐܢܹ̈ܐ ܫܠܝܼܚܹ̈ܐ ܙ̈ܗܲܝܵܐ ܟܵܗܢܹ̈ܐ ܘܡܲܠ̈ܟܹܿܐ 72 ܘܣܵܗ̈ܕܹܿܐ ܩܛܝܼܠܹ̈ܐ ܩܪ̣̱ܵܐ ܠܲܚܠܘܿܠܵܗ̇ ܕܥܹܕܲܬܼ ܩܘܼܕܼܫܵܐ ܀ 73 :ܚܠܘܿܠܵܐ ܪܲܒܵܐ ܚܲܬܼܢܵܐ ܡܫܝܼܚܵܐ ܟܲܠܬܼܵܐ ܥܹܕܿܬܵܐ 74 ܣܡܝܼܪܹ̈ܐ ܫܠܝܼܚܹ̈ܐ ܢܒܼܝܹ̈ܐ ܘܣܵܗ̈ܕܹܿܐ ܟܘܼܡܪܹ̈ܐ ܘܡܲܠ̈ܟܹܿܐ ܀ 75 :ܟܠܗܘܿܢ ܥܲܡܡܹ̈ܐ ܥܵܠܡܹ̈ܐ ܘܕܼܵܪܹ̈ܐ ܓܢܹܝܢ ܒܲܣܡܵܟܼܵܗ̇ 76 ܘܒܼܵܣ̇ܡܝܼܢ ܟܠܗܘܿܢ ܒܦܲܓܼܪܹܗ ܘܲܕܼܡܹܗ ܕܚܲܬܼܢܵܐ ܡܝܼܚܵܐ ܀ 77 :ܦܲܓܼܪܵܐ ܕܚܲܬܼܢܵܐ ܐܘܼܟܼܠܵܐ ܚܲܝܵܐ ܒܲܚܠܘܿܠ ܥܹܕܿܬܹܿܗ 78 ܘܲܕܼܡܹܗ ܫܸܩܝܵܐ ܪܘܼܚܵܢܵܝܵܐ ܒܹܝܬܼ ܡܸܫܬܿܘܼܬܹܗ ܀ 79 :ܚܠܘܿܠܵܐ ܗ̄ܘ̣ ܪܲܒܵܐ ܕܲܣܡܝܼܟܼܝܼܢ ܒܹܗ ܥܵܠܡܹ̈ܐ ܟܠܗܘܿܢ 80 ܘܲܡܕܲܝܠܝܼܢ ܒܹܗ ܟܸܢܫܲܝ̈ ܪܵܘܡ̇ܐ ܠܲܡܫܲܡܵܫܘܼ ܀ 81 :ܣܡܵܟܼܵܐ ܗ̄ܘ̣ ܚܲܝܵܐ ܕܚܲܝܹ̈ܐ ܪܵܕܹܝܢ ܒܲܝܢܵܬܼ ܣܸܕܼܪ̈ܵܘܗܝ 82 ܘܫܵܬܹܿܝܢ ܣܡܝܼܟܼܵܘ̈ܗܝ ܚܲܝܹ̈ܐ ܚܲܕܼܬܹ̈ܐ ܕܡܲܙܲܓܼ ܚܲܬܼܢܵܐ ܀ 83 :ܙܡ̇ܪܵܐ ܕܪܘܼܚܵܐ ܗܵܐ ܪܵܡ ܩܵܠܹܗ ܒܲܚܠܘܿܠ ܚܲܝܹ̈ܐ 84 ܘܲܒܼܚܲܕܼܘܼܬܼܵܐ ܕܠܵܐ ܡܸܬܼܡܲܠܠܵܐ ܙܠܝܼܚ ܒܘܼܣܵܡܹܗ ܀ 85 :ܫܘܼܦܪܹܗ ܕܚܲܬܼܢܵܐ ܙܵܡ̇ܪܝܼܢ ܣܡܝܼܟܹ̈ܐ ܕܠܵܐ ܣܲܒܼܥܘܼܬܼܵܐ 86 ܘܲܡܙܲܚܝܼܢ ܠܹܗ ܠܲܟܼܠܝܼܠ ܩܘܼܕܼܫܵܐ ܒܗܘܼܠܵܠܲܝ̈ܗܘܿܢ ܀ 87 :ܚܠܝܼܛܝܼܢ ܩܵܠܹ̈ܐ ܕܲܒܼܢܲܝ̈ ܐ̄ܢܵܫܵܐ ܘܲܕܼܡܲܠܲܐܟܹ̈ܐ 88 ܘܲܡܠܸܐ ܒܲܝܬܵܐ ܕܒܹܝܬܼ ܡܸܫܬܿܘܼܬܼܵܐ ܙܡ̇ܪ̈ܲܝ ܪܘܼܚܵܐ ܀ 89 :ܪܹܫ ܙܲܡ̇ܪܹ̈ܐ ܕܵܘܝܼܕܼ ܡܲܠܟܵܐ ܛܥܝܼܢ ܩܝܼܬܼܵܪܹܗ 90 ܘܢܵܩܹ̇ܿܫ ܙܡܲ݁ܪ ܛܘܼܒܲܝ̈ ܥܹܕܿܬܵܐ ܘܫܘܼܦܵܪ ܚܲܬܼܢܵܐ ܀ 91 :ܚܲܬܼܢܵܐ ܡܫܝܼܚܵܐ ܘܟܲܠܬܼܵܐ ܥܹܕܿܬܵܐ ܥܲܠ ܣܸܦ̈ܘܵܬܹܗ 92 ܘܗܵܐ ܒܲܙܡ̇ܪܹܗ ܣܡܝܼܪܹ̈ܐ ܒܵܣܹ̇ܿܡܝܼܢ ܪܘܼܚܵܢܵܐܝܼܬܼ ܀ 93 :ܫܡܲܥܝ ܐܘܿ ܥܹܕܿܬܵܐ ܟܲܠܲܬܼ ܢܘܼܗܪܵܐ ܐܸܡܼܲ ܕܵܘܝܼܕܼ 94 ܘܐܸܫܬܲܥܸܐ ܠܹܟܼܝ ܫܘܼܦܪܹܗ ܕܚܲܬܼܢܵܐ ܕܪܵܚܹ̇ܡ ܠܸܒܹܿܟܼܝ ܀ 95 :ܫܲܦܝܼܪ ܒܚܸܙܙܹܗ ܡ̣ܢ ܒܢܲܝ̈ܢܵܫܵܐ ܡܫܝܼܚܵܐ ܚܲܬܼܢܵܐ 96 ܘܪ̈ܲܚܡܹܐ ܢܣܝܼܟܼܝܼܢ ܥܲܠ ܣܸܦ̈ܘܬܹܗ ܩܲܕܿܝܼ̈ܫܵܬܼܵܐ ܀ 97 :ܒܪܝܼܟ ܗ̄ܘ̣ ܠܥܵܠܲܡ ܕܗܸܕܼܪܹܗ ܘܫܘܼܒܼܚܹܗ ܙܟܼܵܐ ܠܲܛܪ̈ܘܼܢܹܐ 98 ܫܢܝܼܢܝܼܢ ܓܹܐܪ̈ܵܘܗܝ ܘܠܲܒܼܥܸܠܕܿܒܼܵܒܼܵܘ̈ܗܝ ܩܛ݂ܲܠ ܒܲܙܩܝܼܦܹܗ ܀ 99 :ܚܛܝܼܬܼܵܐ ܘܡ̇ܘܬܵܐ ܘܐܵܦ ܣܵܛܵܢܵܐ ܒܡܵܘܬܹܿܗ ܐܲܪܡܝܼ 100 ܘܲܒܼܙܵܟܼܘܼܬܼܵܐ ܦܢ̣ܵܐ ܡ̣ܢ ܩܪܵܒܼܵܐ ܘܪܵܡ̇ܐ ܩܸܫܬܹܿܗ ܀ 101 :ܟܘܼܪܣܝܹܗ ܡܲܬܼܩܲܢ ܡ̣ܢ ܝܲܡܝܼܢܵܐ ܕܐܲܒܼܘܼܗܝ ܪܵܡ̇ܐ 102 ܘܙܲܕܿܝܼܩܘܼܬܼܵܐ ܥܛܝܼܦ ܫܘܼܠܛܵܢܹܗ ܘܠܵܐ ܡܸܫܬܲܚܠܲܦ ܀ pb. 160 103 :ܒܡܸܫܚܵܐ ܛܵܒܼܵܐ ܕܐܲܠܵܗܘܼܬܹܗ ܡ̣ܫܲܚ ܐ̄ܢܵܫܘܼܬܹܗ 104 ܘܲܒܼܚܲܕܼܘܼܬܼܵܐ ܙܲܠܚܹܗ ܠܦܲܓܼܪܹܗ ܡܲܪܕܸܿܐ ܚܲܝܹ̈ܐ ܀ 105 :ܒܒܸܣܡܵܐ ܛܵܒܼܵܐ ܡܒܲܣܡܝܼܢ ܠܒܼܘܼܫܹ̈ܐ ܕܦܲܓܼܪܵܢܘܼܬܹܗ 106 ܘܡ̣ܢ ܝܲܡܝܼܢܵܐ ܕܐܲܒܼܘܼܗܝ ܟܲܣܝܵܐ ܫܪܸܐ ܒܲܡܪ̈ܵܘܡܹܐ ܀ 107 :ܡ̇ܪܝ ܗ̄ܘ̣ ܚܲܬܼܢܵܐ ܘܡ̇ܪܝܵܐ ܐܸܡ݂ܲܪ ܕܬܸܒܼ ܡ̣ܢ ܝܲܡܝܼܢܝܼ 108 ܥܕܲܡ̇ܐ ܕܐܹܣܝܼܡ ܟܠܗܘܿܢ ܣܵܢܐܲܝ̈ܟ ܟܘܼܒܼܫܵܐ ܠܪܸ̈ܓܼܠܲܝܟ ܀ 109 :ܗܘ̤ܝܘܼ ܟܘܼܡܪܵܐ ܘܕܸܒܼܚܵܐ ܚܲܝܵܐ ܡܚܲܣܸܐ ܚܵܘ̈ܒܹܿܐ 110 ܘܠܵܐ ܡܸܫܬܿܚܠܲܦ ܡ̣ܢ ܟܘܼܡܪܘܼܬܹܗ ܘܡ̣ܢ ܟܵܗܢܘܼܬܹܗ ܀ 111 :ܒܗܸܕܼܪ̈ܲܝ ܩܘܼܕܼܫܵܐ ܝ̄ܠܝܼܕܼ ܡ̣ܢ ܐܲܒܼܘܼܗܝ ܠܥܸܠ ܡ̣ܢ ܙܲܒܼܢܹ̈ܐ 112 ܘܲܒܼܐ̄ܢܵܫܘܼܬܹܗ ܝ̄ܠܝܼܕܼ ܡ̣ܢ ܡܲܪܝܲܡ ܩܲܕܿܝܼܫܵܐܝܼܬܼ ܀ 113 :ܟܠܗܘܿܢ ܡܲܠ̈ܟܹܿܐ ܠܹܗܘ̣ ܣܵܓܼ̇ܕܿܝܼܢ ܒܩܘܼܪ̈ܒܵܢܲܝܗܘܿܢ 114 ܘܥܲܡܡܹ̈ܐ ܟܠܗܘܿܢ ܠܹܗܘ̣ ܦܵܠ̇ܚܝܼܢ ܥܲܒܼܕܿܘܼܬܼ ܥܵܠܲܡ ܀ 115 :ܠܥܵܠܲܡ ܩܲܝܵܡ ܫܡܹܗ ܩܲܕܿܝܼܫܵܐ ܥܲܡ ܫܘܼܠܛܵܢܹܗ 116 ܘܲܩܕܵܡ ܫܸܡܫܵܐ ܫܡܹܗ ܐܝܼܬܼܵܘܗܝ ܗ̄ܘ̣ܵܐ ܘܠܵܐ ܡܸܫܬܲܚܠܲܦ ܀ 117 :ܒܹܗ ܡܸܬܼܒܲܪܟܼܝܼܢ ܟܠܗܘܿܢ ܥܲܡܡܹ̈ܐ ܘܲܡܫܲܒܿܚܝܼܢ ܠܹܗ 118 ܕܡܸܢܗܘܿܢ ܐܝܼܬܹܝܗ̇ ܥܹܕܿܬܼ ܩܘܼܕܼܫܵܐ ܟܲܠܲܬܼ ܢܘܼܗܪܵܐ ܀ 119 :ܬܡ݂ܲܗ ܠܹܗ ܕܵܘܝܼܕܼ ܒܫܘܼܦܪܹܗ ܕܚܲܬܼܢܵܐ ܕܠܵܐ ܡܸܬܼܡܲܠܲܠ 120 ܘܫܲܪܝܼ ܙܵܡܲ݁ܪ ܫܘܼܒܼܚܹܗ ܪܵܡ̇ܐ ܥܲܡ ܝܲܠܘܼܕܹ̈ܐ ܀ 121 :ܚܙ̣ܵܝܗܝ ܥܲܠ ܐܲܪܥܵܐ ܕܲܠܒܸ݂ܫ ܦܲܓܼܪܲܢ ܘܐܸܬܿܕܲܡܲܪ ܒܹܗ 122 ܘܫܲܪܝܼ ܩܵܥܹ̇ܐ ܘܡܲܟܼܪܸܙ ܫܘܼܒܼܚܹܗ ܥܲܡ ܘܫܼܠܛܵܢܹܗ ܀ 123 :ܘܡ̇ܪܝܵܐ ܡ̇ܪܲܐ ܡ̇ܐ ܡܫܲܒܲܚ ܫܡܵܟ ܒܟܼܠܵܗ̇ ܐܲܪܥܵܐ 124 ܕܗܵܐ ܒܲܫܡܲܝܵܐ ܫܘܼܒܼܚܵܟ ܪܵܥܹ̇ܡ ܡ̣ܢ ܥܸܠܲܝܹ̈ܐ ܀ 125 :ܗܵܠܹܝܢ ܩܵܠܹ̈ܐ ܕܲܡܠܹܝܢ ܬܲܗܪܵܐ ܙܡܲܪ̣ ܠܵܗ̇ ܕܵܘܝܼܕܼ 126 ܠܥܹܕܲܬܼ ܩܘܼܕܼܫܵܐ ܡܟܼܝܼܪܬܹܿܗ ܕܫܸܡܫܵܐ ܕܙܲܕܿܝܼܩܘܼܬܼܵܐ ܀ 127 :ܫܘܼܦܪ̈ܵܘܗܝ ܕܚܲܬܼܢܵܐ ܡ̣ܠܵܐ ܡܲܫܡܲܥܬܼܵܗ̇ ܕܟܲܠܲܬܼ ܢܘܼܗܪܵܐ 128 ܘܢܘܼܪܵܐ ܕܚܘܿܒܹܿܗ ܐܲܕܼܠܸܩ ܓܵܘܙܲܠ ܒܓܼܵܘ ܪܸܥܝܵܢܵܗ̇ ܀ 129 :ܩܵܡ̣ ܐܹܫܲܥܝܵܐ ܘܫܲܪܝܼ ܩܵܥܹ̇ܐ ܒܲܚܠܘܿܠ ܚܲܝܹ̈ܐ 130 ܕܥܲܡܲܢܘܼܐܹܝܠ ܐܝܼܬܼܵܘܗܝ ܚܲܬܼܢܵܐ ܕܥܹܕܿܬܵܐ ܪܸܚܡܲܬ̤ ܀ 131 :ܠܥܸܠ ܡ̣ܢ ܛܲܟܼܣܵܐ ܒܬܼܘܼܠܬܵܐ ܝ̄ܠܸܕܼܬܹܗ ܕܠܵܐ ܙܘܼܘܵܓܼܵܐ 132 ܘܗܘ̤ܝܘܼ ܡ̇ܪܵܐ ܓܲܢ̄ܒܵܪ ܚܲܝܠܵܐ ܕܠܵܐ ܡܸܫܬܲܚܠܲܦ ܀ 133 :ܫܠܵܡܵܐ ܘܫܲܝܢܵܐ ܛܥܝܼܢ ܫܘܼܠܛܵܢܹܗ ܠܥܲܡܡܹ̈ܐ ܟܠܗܘܼܢ 134 ܘܠܵܐ ܐܝܼܬܼ ܣܵܟܼܵܐ ܠܫܲܝܢܹܗ ܪܲܒܵܐ ܘܲܠܡܲܠܟܿܘܼܬܹܗ ܀ 135 ܝܲܥܩܘܿܒܼ ܣܵܒܼܵܐ ܝܲܗ̣̄ܒܼ ܒܲܪ̄ܬܼ ܩܵܠܵܐ ܒܓܼܵܘ ܒܘܼܣܵܡܵܐ: pb. 161 136 ܕܗܵܢܵܘ̇ ܚܲܬܼܢܵܐ ܕܠܹܗܘ̣ ܣܲܟܿܝܼܘ ܟܠܗܘܿܢ ܟܹܐܢܹ̈ܐ ܀ 137 :ܗܵܢܵܘ̇ ܕܐܼܬܼܵܐ ܘܒܲܛܸܠ ܢܒܼܝܹ̈ܐ ܘܡܲܠܟܲܝ̈ ܥܲܡܵܐ 138 ܗܵܢܵܘ̇ ܚܲܬܼܢܵܐ ܕܚܲܫ̣ ܒܲܙܩܝܼܦܵܐ ܡܸܛܠ ܥܹܕܿܬܹܿܗ ܀ 139 ܘܒܲܕܼܡܹܗ ܚܲܣܝܵܐ ܚܲܠܸܠ ܐܸܣܛܠܵܐ ܕܦܲܓܼܪܵܢܘܼܬܹܗ ܀ 140 :ܗܵܢܵܘ̇ ܚܲܬܼܢܵܐ ܕܛܵܒܼ ܡ̣ܢ ܚܲܠܒܼܵܐ ܚܵܘܲܪ ܫܸܢܵܘ̈ܗܝ 141 ܘܡܲܦܪܲܓܼ ܟܠܹܗ ܒܫܘܼܒܼܚܵܐ ܕܲܠܒܸܫ̣ ܡ̣ܢ ܢܘܼܚܵܡܵܐ ܀ 142 :ܢܒܼܝܹ̈ܐ ܟܠܗܘܿܢ ܪ̈ܲܒܲܝ ܒܵܬܹ̈ܐ ܩܵܡ̣ܘ ܒܲܙܡ̇ܪܗܘܿܢ 143 ܘܫܘܼܦܪ̈ܵܘܗܝ ܕܚܲܬܼܢܵܐ ܡ̣ܠܵܐ ܡܲܫܡܲܥܬܼܵܗ̇ ܕܟܲܠܲܬܼ ܢܘܼܗܪܵܐ ܀ 144 :ܚܲܕܼ ܩܵܥܹ̇ܐ ܗ̄ܘ̣ܵܐ ܕܗܵܐ ܠܲܡ ܢܵܦܹ̇ܿܩ ܡ̣ܢ ܐܵܦܲܪܬܼܵܐ 145 ܕܪܵܥܹ̇ܐ ܠܥܲܡܵܐ ܘܦܵܪܹܩ ܥܲܡܡܹ̈ܐ ܘܥܲܠ ܟܠ ܡܲܡܠܸܟ ܀ 146 :ܐ̄ܚܪ݂ܢܵܐ ܡܲܙܥܸܩ ܕܐܵܬܹ̈ܐ ܡܫܝܼܚܵܐ ܘܡ̇ܘܬܵܐ ܣܵܒܹ̇ܠ 147 ܘܥܵܩܲ̇ܪ ܨܸܗܝܘܿܢ ܘܥܹܕܲܬܵܐ ܒܵܢܹ̇ܐ ܒܲܙܩܝܼܦܘܼܬܹܗ ܀ 148 :ܐ̄ܚܪܹܢܵܐ ܙܵܡܲ݁ܪ ܕܩܘܼܡܝ ܠܲܡ ܐܲܢܗܲܪܝ ܟܲܠܲܬܼ ܢܘܼܗܪܵܐ 149 ܕܗܵܐ ܐܸܬܼܵܐ ܠܹܗ ܢܘܼܗܪܹܟܼܝ ܪܲܒܵܐ ܡܫܝܝܼܚܵܐ ܚܲܬܼܢܵܐ ܀ 150 :ܗܵܐ ܕܢܲܚ̣ ܢܘܼܗܪܹܗ ܘܐܲܢܗܲܪ ܥܲܝܢܲܝ̈ܟܿܝ ܘܐܲܦܨܲܚ ܐܲܦܲܝ̈ܟܿܝ 151 ܘܗܵܐ ܐܝܼܩܵܪܹܗ ܫܪܸܐ ܥܲܠ ܪܹܫܹܟܼܝ ܘܲܡܗܲܕܲܪ ܠܹܟܼܝ ܀ 152 :ܠܹܟܼܝ ܗ̄ܘ̣ ܐܵܬܹ̇ܝܢ ܡܲܠ̈ܟܹܿܐ ܕܐܲܪܥܵܐ ܒܩܘܼܪ̈ܒܵܢܲܝܗܘܿܢ 153 ܘܚܲܝܠܹ̈ܐ ܕܥܲܡܡܹ̈ܐ ܗܵܐ ܪܵܗ̇ܛܝܼܢ ܠܹܟܼܝ ܚܘܼܒܵܢܵܐܝܼܬܼ ܀ 154 :ܐ̄ܪ݂ܢܵܐ ܡܝܲܒܸܿܒܼ ܕܘܼܨܝ ܒܲܪ̄ܬܼ ܥܲܡܡܹ̈ܐ ܚܠܵܦ ܒܲܪ̄ܬܼ ܨܸܗܝܘܿܢ 155 ܕܗܵܐ ܐܸܬܹ̇ܐ ܠܹܟܼܝ ܡܲܠܟܵܐ ܡܫܝܼܚܵܐ ܘܲܡܚܲܕܹܿܐ ܠܹܟܼܝ ܀ 156 :ܙܲܕܼܝܼܩ ܘܲܬܼܪܝܼܨ ܘܡܲܟܿܝܼܟ ܒܚܘܼܒܹܿܗ ܡܠܸܐ ܦܘܼܪܩܵܢܵܐ 157 ܘܲܡܚܲܒܸܿܒܼ ܠܹܟܼܝ ܚܠܵܦ ܥܸܒܼܪܵܝܬܵܐ ܕܲܪܢܵܬ̤ ܢܸܩܦܹܗ ܀ 158 :ܥܫܸ̣ܢ ܗ̄ܘ̣ܵܐ ܙܡ̇ܪܵܐ ܘܲܣܓܼܝܼܘ ܩܵܠܝܹ̈ܗ̇ ܕܲܢܒܼܝܼܘܼܬܼܵܐ 159 ܒܲܚܠܘܿܠ ܥܹܕܿܬܵܐ ܡܟܼܝܼܪܬܹܿܗ ܕܝܼܫܘܿܥ ܚܲܬܼܢܵܐ ܦܲܐܝܵܐ ܀ 160 :ܩܵܠ ܚܲܕܼܘܼܬܼܵܐ ܫܡ݂ܲܥ ܩܵܨ̇ܘܿܡ̇ܐ ܘܫܲܪܝܼ ܩܵܥܹ̇ܐ 161 ܕܟܼܵܘܟܿܒܼܵܐ ܗ̄ܘ̣ ܪܲܒܵܐ ܚܲܬܼܢܵܐ ܕܪܵܘܡ̇ܐ ܥܹܕܲܬܼ ܩܘܼܕܼܫܵܐ ܀ 162 :ܪܹܫܵܐ ܗ̄ܘ̣ ܪܵܡ̇ܐ ܕܩ̣ܵܡ ܡ̣ܢ ܙܲܪܥܵܐ ܕܒܹܝܬܼ ܝܼܣܪܵܝܹܠ 163 ܘܗܘ̤ܝܘܼ ܪܹܫܵܐ ܕܟܼܠܗܘܿܢ ܥܲܡܡܹ̈ܐ ܕܡܸܢܗܘܿܢ ܐܝܼܬܿܝ ܀ 164 :ܕܵܘܝܼܕܼ ܫܲܚܠܸܦ ܩܵܠܹ̈ܐ ܐ̄ܚܪ̈ܵܢܹܐ ܕܲܙܡܝܼܪ݁ܵܬܹܗ 165 ܘܫܲܪܝܼ ܙܵܡܲ݁ܪ ܫܘܼܦܪܵܗ̇ ܕܟܲܠܬܼܵܐ ܙܒܼܝܼܢܲܬܼ ܒܲܕܼܡ̇ܐ ܀ 166 :ܗܵܐ ܒܲܪ̄ܬܼ ܡܲܠܟܵܐ ܒܫܘܼܒܼܚܵܐ ܩܵܡܲܬ̤ ܡ̣ܢ ܝܲܡܝܼܢܹܗ 167 ܕܚܲܬܼܢܵܐ ܫܒܼܝܼܚܵܐ ܕܐܸܬܼܵܐ ܘܦܲܪ̣ܩܵܗ̇ ܒܲܘܩܝܼܦܘܼܬܹܗ ܀ pb. 162 168 :ܐܘܿ ܒܲܪ̄ܬܼ ܡܲܠܟܵܐ ܕܟܼܠܹܗ ܫܘܼܒܼܚܵܗ̇ ܡ̣ܢ ܒܹܝܬܼ ܡܲܠܟܵܐ ܗ̄ܘ̣ 169 ܘܲܒܼܢܲܟܼܦܘܼܬܼܵܗ̇ ܣܩܝܼܠܵܐ ܡܨܲܒܿܬܼܵܐ ܘܡܲܠܝܵܐ ܫܘܼܦܪܹ̈ܐ ܀ 170 :ܠܵܐ ܗ̄ܘ̣ܐ ܡ̣ܢ ܠܒܲܪ ܐܝܼܬܼܵܘܗܝ ܫܘܼܦܪܵܗ̇ ܕܟܲܠܲܬܼ ܡܲܠܟܵܐ 171 ܡ̣ܢ ܠܓܼܵܘ ܣܩܝܼܠܵܐ ܒܫܘܼܦܪܹܗ ܕܚܲܬܼܢܵܐ ܕܡܝܼܬܼ ܥܲܠ ܐܲܦܹܝ̈ܗ̇ ܀ 172 :ܒܚܘܼܒܹܿܗ ܕܚܲܘܼܒܹܿܗ ܕܚܲܬܼܢܵܐ ܣܩܝܼܠܵܐ ܥܹܕܿܬܵܐ ܘܡܲܠܝܵܐ ܫܘܼܦܪܹ̈ܐ 173 ܘܗܲܝܡܵܢܘܼܬܼܵܐ ܘܣܲܒܼܪܵܐ ܘܚܘܼܒܵܐ ܙܠܝܼܚ ܥܲܠ ܐܲܦܹܝ̈ܗ̇ ܀ 174 :ܡܨܲܒܲܬܼ ܠܒܼܘܼܫܵܗ̇ ܒܕܹܿܗܒܼܵܐ ܛܵܒܼܵܐ ܕܗܲܝܡܵܢܘܼܬܼܵܐ 175 ܘܣܝܼܡ ܥܲܠ ܪܹܫܵܗ̇ ܟܠܝܼܠܵܐ ܦܲܐܝܵܐ ܕܩܲܕܼܝܼܫܘܼܬܼܵܐ ܀ 176 :ܒܲܪܬܼܵܐ ܕܥܲܡܡܹ̈ܐ ܕܲܛܥܵܬ̤ ܥܲܡܵܗ̇ ܐܵܦ ܒܹܝܬܼ ܐܲܒܼܘܼܗ̇ 177 ܘܲܨܠܵܬ̤ ܐܼܕܼܢܵܗ̇ ܠܩܵܠܵܐ ܕܚܲܬܼܢܵܐ ܕܡ̣ܝܼܬܼ ܥܲܠ ܐܲܦܹܝ̈ܗ̇ ܀ 178 :ܚܙ̣ܵܗ̇ ܗ̄ܘ̣ܵܐ ܚܲܬܼܢܵܐ ܕܕܼܵܠ̇ܩܵܐ ܒܚܘܼܒܹܿܗ ܫܲܪܝܼܪܵܐܝܼܬܼ 179 ܘܐܸܬܼܪܲܓܼܪܲܓܼ ܠܹܗ ܠܫܘܼܦܪܵܗ̇ ܦܲܐܝܵܐ ܘܥܲܒܼ݂ܕܵܗ̇ ܕܝܼܠܹܗ ܀ 180 :ܠܡܵܪܵܗ̇ ܣܸܓܼܕܲܬ̤ ܘܲܠܦܵܪܘܿܩܵܗ̇ ܒܚܘܼܒܵܐ ܢܸܩܦܲܬ̤ 181 ܘܗܵܐ ܒܩܘܼܪ̈ܒܵܢܹܐ ܪܸܓܿܝܼܢ ܐܲܦܹܝ̈ܗ̇ ܡܲܠ̈ܟܹܿܐ ܕܐܲܪܥܵܐ ܀ 182 :ܚܘܼܒܵܐ ܫܲܠܡܵܐ ܕܚܲܬܼܢܵܐ ܘܟܲܠܬܼܵܐ ܚܙ̣ܵܐ ܒܲܪ ܐܝܼܫܲܝ 183 ܘܐܵܘܣܸܦ ܩܵܠܹ̈ܐ ܕܲܙܡܝܼܪ݁ܵܬܹܗ ܕܡܸܛܠ ܥܹܕܿܬܵܐ ܀ 184 :ܥܹܕܿܬܵܐ ܪܲܒܿܬܼܵܐ ܕܡ̣ܢ ܐܸܡ̈ܘܵܬܼܵܐ ܬܸܚܕܲܪܵܟ ܚܲܬܼܢܵܐ 185 ܘܡܸܛܠ ܚܘܼܒܵܐ ܠܥܸܠ ܠܲܡܪܵܘܡ̇ܐ ܬܲܗܦܹܝ̈ܗ̇ ܀ 186 :ܡ̣ܢ ܩܵܕܵܡܲܝܟ ܗ̄ܝܼ ܚܕܼܵܐ ܬܸܫܒܿܘܿܚܬܵܐ ܕܥܹܕܿܬܵܐ ܪܲܒܿܬܼܵܐ 187 ܘܒܼܵܗ̇ ܢܸܣ̈ܓܿܕܼܵܢ ܠܵܟ ܟܠ ܫܲܪ̈ܒܼܵܬܼܗܘܿܢ ܕܥܲܡܡܹ̈ܐ ܕܦܪܲܩ̣ܬܿ ܀ 188 :ܪܸܓܼܠܵܐ ܕܥܲܡܡܹ̈ܐ ܒܵܟ ܗ̄ܘ̣ ܩܵܝ̇ܡܵܐ ܒܲܬܼܪܝܼܨܘܼܬܼܵܐ 189 ܘܲܒܼܓܼܵܘ ܥܹܕܿܬܵܟ ܠܵܟ ܗ̄ܘ̣ ܡܒܲܪܟܼܝܼܢ ܙܲܕܿܝܼܩܵܐܝܼܬܼ ܀ 190 :ܒܥܹܕܿܬܵܟ ܪܲܒܿܬܼܵܐ ܐܵܘܕܸܿܐ ܠܵܟ ܡ̇ܪܝ ܟܲܕܼ ܪܵܘܹ̇ܙ ܐ̄ܢܵܐ 191 ܘܒܲܝܢܵܬܼ ܟܸܢܫܹ̈ܐ ܣܒܼܝܼܣܲܝ̈ ܥܲܡܡܹ̈ܐ ܐܹܙܲܡܲܪ ܠܵܟ ܀ 192 :ܣܲܒܿܪܹܬܼ ܡ̇ܪܲܢ ܙܲܕܿܝܼܩܘܼܬܼܵܟ ܒܥܹܕܼܿܬܵܟ ܪܲܒܿܬܼܵܐ 193 ܘܣܸܦ̈ܘܵܬܼܝ ܠܵܐ ܟܠܹ̇ܝܬܼ ܡ̣ܢ ܦܘܼܪܩܵܢܵܟ ܘܗܲܝܡܵܢܘܼܬܼܵܟ . 194 :ܠܵܐ ܡ̇ܪܝ ܫܵܛܹ̇ܬܼ ܙܲܕܿܝܼܩܘܬܼܵܟ ܘܗܲܝܡܵܢܘܼܬܼܵܟ 195 ܡ̣ܢ ܒܹܝܬܼ ܥܲܡܡܹ̈ܐ ܥܹܕܿܬܵܟ ܪܲܒܿܬܼܵܐ ܙܒܼܝܼܢܲܬܼ ܒܲܕܼܡ̇ܟ ܀ 196 :ܣܓܼܝܼܕܼ ܐܲܢ̄ܬܿ ܚܲܬܼܢܵܐ ܕܐܸܬܿܕܲܟܲܪܬܿ ܥܹܕܿܬܵܟ ܕܲܩܢܲܝܬܿ ܡ̣ܢ ܩܕܝܼܡ 197 ܠܵܐ ܡ̇ܪܝ ܬܲܗܦܸܟ ܝܲܡܝܼܢ ܚܘܼܒܵܟ ܡ̣ܢ ܓܵܘ ܥܹܕܿܬܵܟ ܀ 198 :ܗܲܝܡܵܢܘܼܬܼܵܟ ܗܵܐ ܡܸܬܼܟܲܪܙܵܐ ܚܲܬܼܢܵܐ ܦܲܐܝܵܐ 199 ܒܥܹܕܿܬܵܐ ܪܲܒܿܬܼܵܐ ܕܲܒܼܩܲܕܿܝܼܫܹ̈ܐ ܢܵܨܲ̇ܚ ܫܘܼܦܪܵܗ̇ ܀ 200 :ܐܲܠܵܗܵܐ ܩܵܡ̣ ܒܥܹܕܿܬܵܐ ܪܲܒܿܬܼܵܐ ܒܹܝܬܼ ܩܲܕܿܝܼܫܹ̈ܐ 201 ܘܪܲܒܿܘܼ ܘܲܕܼܚܝܼܠ ܫܒܼܝܼܚ ܘܲܡܪܲܡܪܲܡ ܥܲܠ ܕܲܚܕܵܪܵܘܗܝ ܀ 202 :ܣܡܝܼܕܲܝ̈ ܒܥܹܕܿܬܵܐ ܫܲܒܿܚܘܼܗܝ ܒܥܹܕܿܬܵܐ ܥܹܕܲܬܼ ܥܲܡܡܹ̈ܐ 203 ܠܚܲܬܼܢܵܐ ܡܫܝܼܚܵܐ ܕܥܹܕܲܬܼ ܥܲܡܡܹ̈ܐ ܦܪ̣ܵܩ ܒܲܨܠܝܼܒܹܗ ܀ pb. 163 204 :ܐܵܘܕܸܿܐ ܡ̇ܪܝ ܙܲܕܿܝܼܩܵܐܝܼܬܼ ܡ̣ܢ ܟܠܹܗ ܠܹܒܿܝ 205 ܒܥܹܕܿܬܵܟ ܪܲܒܿܬܼܵܐ ܕܲܟܼܢܝܼܫܝܼܢ ܒܵܗ̇ ܬܪ̈ܝܼܨܲܚ ܫܘܼܒܼܚܵܐ ܀ 206 :ܫܲܒܲܚܘ ܠܡܵܪܝܵܐ ܚܕܼܵܐ ܬܸܫܒܿܘܿܚܬܵܐ ܚܕܲܬܵܐ ܐܸܡ݂ܲܪ 207 ܕܗܵܐ ܬܸܫܒܿܘܿܚܬܹܿܗ ܒܥܹܕܿܬܵܐ ܪܲܒܿܬܼܵܐ ܡ̣ܢ ܙܲܕܿܝܼܩܹ̈ܐ ܀ 208 :ܟܸܢܫܹ̈ܐ ܕܥܲܡܡܹ̈ܐ ܚܙ̣ܵܐ ܒܲܪ ܐܝܼܫܲܝ ܒܥܹܕܲܬܼ ܩܘܼܕܼܿܫܵܐ 209 ܘܐܲܠܸܦ ܐܸܢܘܿܢ ܙܡ̇ܪܵܐ ܚܲܕܼܬܼܵܐ ܒܲܚܠܘܿܠ ܥܹܕܿܬܵܐ ܀ 210 :ܟܠܟܼܘܿܢ ܥܲܡܡܹ̈ܐ ܬܵܘ ܩܘܿܫܘ ܟܲܦܵܐ ܒܥܹܕܿܬܵܐ ܐܸܡܟܼܘܿܢ 211 ܘܲܙܡܲܪܘ ܫܘܼܒܼܚܵܐ ܠܗܵܘ̇ ܕܲܒܼܪ̈ܲܚܡܵܘܗܝ ܦܪ̣ܵܩ ܚܲܝܲܝ̈ܟܿܘܿܢ ܀ 212 :ܒܗܵܠܹܝܢ ܩܵܠܹ̈ܐ ܫܘܼܦܪܹ̈ܐ ܕܥܹܕܿܬܵܐ ܙܡ݂ܲܪ ܒܲܪ ܐܝܼܫܲܝ 213 ܒܗܵܝ̇ ܡܸܫܬܿܘܼܬܼܵܐ ܕܲܥܒ݂ܲܕܼ ܠܥܹܕܿܬܹܿܗ ܒܲܪ ܐܲܠܵܗܵܐ ܀ 214 :ܗܵܐ ܪܵܥܡܝܼܢ ܒܵܗ̇ ܒܥܹܕܲܬܼ ܩܘܼܕܼܫܵܐ ܩܵܠܹ̈ܐ ܫܒܼܝܼܚܹ̈ܐ 215 ܬܒܼܝܹ̈ܐ ܫܠܝܼܚܹ̈ܐ ܕܲܡܙܲܪܝܼܢ ܒܵܗ̇ ܪܘܼܚܵܢܵܐܝܼܬܼ ܀ 216 :ܚܠܝܼܛܝܼܢ ܩܵܠܹ̈ܐ ܕܲܢܒܼܝܼܘܼܬܼܵܐ ܘܕܲܫܠܝܼܚܘܼܬܼܵܐ 217 ܘܡܲܠܝܵܐ ܥܹܕܿܬܵܐ ܪ̈ܲܥܡܹܐ ܫܒܼܝܼܚܹ̈ܐ ܕܲܙܝܼܪ݁ܵܬܼܵܐ ܀ 218 :ܦܵܘܠܘܿܣ ܪܲܒܵܐ ܗܵܐ ܪܵܡ ܩܵܠܹܗ ܐܲܝܟ ܫܝܼܦܘܿܪܵܐ 219 ܘܩܵܥܹ̇ܐ ܘܡܲܟܼܪܸܙ ܫܘܼܦܪܵܗ̇ ܪܵܡ̇ܐ ܕܥܹܕܲܬܼ ܩܘܼܕܼܫܵܐ ܀ 220 :ܥܲܠ ܠܸܫܵܢܹܗ ܓܼܕܝܼܠܝܼܢ ܛܲܟܼܣܹܝ̈ܗ̇ ܪ̈ܘܼܚܵܢܵܝܹܐ 221 ܘܲܒܼܣܘܼܪ̈ܓܵܕܼܵܘܗܝ ܪܫܝܼܡܝܼܢ ܫܘܼܦܪܹ̈ܝܗ̇ ܡܲܠܝܲܝ̈ ܚܲܝܹ̈ܐ ܀ 222 :ܪܵܡ ܗ̄ܘ̣ ܙܡ̇ܪܹܗ ܕܟܼܵܪܘܿܙ ܥܲܡܡܹ̈ܐ ܒܥܹܕܲܬܼ ܩܘܼܕܼܫܵܐ 223 ܘܲܒܼܩܝܼܢܵܬܹ̈ܗ ܬܗܲܪܘ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܀ 224 :ܫܠܝܼܚܹ̈ܐ ܟܠܗܘܿܢ ܥܲܡܹܗ ܙܵܡ̇ܪܝܼܢ ܒܠܸܫܵܢܲܝ̈ܗܘܿܢ 225 ܒܗܵܢܵܐ ܚܠܘܿܠܵܐ ܕܚܲܬܼܢܵܐ ܡܫܝܼܚܵܐ ܠܥܹܕܿܬܹܿܗ ܐܲܬܼܩܸܢ ܀ 226 :ܣܒܲܪܬܹܗ ܕܚܲܬܼܢܵܐ ܪܵܥ̇ܡܵܐ ܚܲܝܹ̈ܐ ܒܲܚܠܘܿܠ ܥܹܕܿܬܹܿܗ 227 ܘܡܸܢܵܗ̇ ܫܵܬܹ̇ܝܢ ܡܙܝܼܢܲܝ̈ ܚܲܬܼܢܵܐ ܚܲܝܹ̈ܐ ܚܲܕܼ̈ܬܹܐ ܀ 228 :ܪܲܒܿܘܼ ܚܠܘܿܠܵܐ ܘܲܦܠܸܐ ܣܡܵܟܼܵܐ ܘܲܚܠܸܐ ܫܸܩܝܵܐ 229 ܚܵܕܹ̇ܐ ܚܲܬܼܢܵܐ ܘܕܸܿܝ̇ܨܵܐ ܟܲܠܬܼܵܐ ܘܪܵܡ ܒܘܼܣܵܡܵܐ ܀ 230 :ܪ̈ܲܒܲܝ ܟܵܗܢܹ̈ܐ ܘܟܼܵܗܢܹ̈ܐ ܙ̈ܗܲܝܵܐ ܙܡܝܼܢܲܝ̈ ܥܹܕܿܬܵܐ 231 ܡܠܹܝܢ ܦܘܼܡܲܝ̈ܗܘܿܢ ܙܡ̇ܪ̈ܲܝ ܪܘܼܚܵܐ ܒܲܚܠܘܿܠ ܚܲܝܹ̈ܐ ܀ 232 :ܐܘܿ ܠܹܟܼܝ ܥܹܕܿܬܵܐ ܡܟܼܝܼܪܬܹܿܗ ܕܫܸܡܫܵܐ ܕܙܲܕܿܝܼܩܘܼܬܼܵܐ 233 ܕܗܵܐ ܪܵܡ ܫܘܼܒܼܚܹܟܼܝ ܘܲܒܼܒܹܝܬܼ ܟܵܘܒܹ̈ܐ ܟܠܝܼܠܹܟܼܝ ܨܵܡܲܚ̇ ܀ 234 :ܗܵܐ ܥܲܡ ܕܵܪܹ̈ܐ ܪܵܕܹܐ ܚܠܘܿܠܹܟܼܝ ܡܠܸܐ ܒܘܼܣܵܡܹ̈ܐ 235 ܘܡܸܬܼܒܲܣܡܝܼܢ ܒܹܗ ܥܵܠܡܹ̈ܐ ܘܥܲܡܡܹ̈ܐ ܕܲܒܼܟܼܠ ܦܸܢ̈ܝܵܢ ܀ 236 :ܒܐܲܪܥܵܐ ܩܒܼܝܼܥܵܐ ܥܹܕܲܬܼ ܩܘܼܕܼܫܵܐ ܙܒܼܝܼܢܲܬܼ ܒܲܕܼܡ̇ܐ 237 ܘܪܹܫܵܗ̇ ܪܵܡ̇ܐ ܗܵܐ ܒܲܫܡܲܝܵܐ ܗ̄ܘ̣ ܒܹܝܬܼ ܐܲܠܵܗܵܐ ܀ 238 :ܟܠܝܘܿܡ ܣܵܓܹ̇ܐ ܣܡܵܟܼܵܗ̇ ܪܲܒܵܐ ܥܲܡ ܒܘܼܣܵܡܹܝ̈ܗ̇ 239 ܒܥܲܡܡܹ̈ܐ ܕܐܵܬܹ̇ܝܢ ܡ̣ܢ ܟܠ ܦܸܢ̈ܝܵܢ ܕܒܼܵܗ̇ ܢܸܬܼܦܲܨܚܘܼܢ ܀ pb. 164 240 :ܥܲܡ ܫܲܬܼܐܸܣܬܼܵܐ ܕܗܲܝܡܵܢܘܼܬܼܵܐ ܣܝܼܡ ܒܸܢܝܵܢܵܗ̇ 241 ܘܠܵܐ ܡܙܝܼܥܝܼܢ ܠܵܗ̇ ܡܲܫ̈ܒܹܐ ܘܡܸܠ̈ܠܹܐ ܕܟܼܠ ܣܵܩܘܿܪܹ̈ܝܗ̇ ܀ 242 :ܓܙܲܡ̣ܘ ܠܵܗ̇ ܡܲܠ̈ܟܹܿܐ ܘܠܵܐ ܐܲܙܝܼܥܘܼܗ̇ ܠܲܡܫܲܪܲܪܬܵܐ 243 ܘܗܵܐ ܒܙܵܟܼܘܼܬܼܵܐ ܡܟܲܠܲܠ ܪܹܫܵܗ̇ ܕܲܡܒܲܪܲܟܼܬܵܐ ܀ 244 :ܒܹܝܬܼ ܙܵܩܘܿܦܹ̈ܐ ܠܚܲܢܦܹ̈ܐ ܩܵܡܲܬ̤ ܥܹܕܲܬܼ ܩܘܼܕܼܫܵܐ 245 ܘܡ̣ܢ ܝܲܡܝܼܢܵܗ̇ ܘܡ̣ܢ ܣܸܡܵܠܵܗ̇ ܫܘܼܒܼܚܵܐ ܠܸܒܼܫܲܬ̤ ܀ 246 :ܙܟܼܵܬ̤ ܝܘܼܠܦܵܢܹ̈ܐ ܘܣܲܝܦܲܬ̤ ܓܲܒܹ̈ܐ ܕܲܒܼܢܲܝ̈ ܛܘܼܥܝܲܝ 247 ܘܗܵܐ ܪܵܡ ܪܹܫܵܗ̇ ܘܲܬܼܚܹܝܬܼ ܪܸ̈ܓܼܠܹܝܗ̇ ܪܡܹܝܢ ܣܵܩܘܿܪܹ̈ܝܗ̇ ܀ 248 :ܦܬܼܝܼܚܝܼܢ ܬܲܪ̈ܥܹܐ ܩܕܼܵܡ ܟܠ ܕܐܵܬܹ̇ܐ ܕܢܸܬܼܓܵܘܲܣ ܒܵܗ̇ 249 ܘܡܲܠܝܵܐ ܢܘܼܗܪܵܐ ܘܪܵܥܡܝܼܢ ܝܲܠܕܹܿܝ̈ܗ̇ ܒܲܙܡܝܼܪ̈ܵܬܼܵܐ ܀ 250 :ܪܗܝܼܒܼܷܝܼܢ ܡܲܠ̈ܟܹܿܐ ܘܪܵܗ̇ܛܝܼܢ ܣܵܓ̇ܿܕܿܝܼܢ ܠܟܼܘܼܒܼܫܵܐ ܕܪܸ̈ܓܼܠܹܝܗ̇ 251 ܘܥܲܡܡܹ̈ܐ ܟܠܗܘܿܢ ܒܬܲܪ̈ܥܹܝܗ̇ ܟܢܝܼܫܝܼܢ ܥܲܡ ܩܘܼܪ̈ܒܵܢܹܐ ܀ 252 :ܪܵܡܝܼܢ ܫܘܼܪ̈ܝܗ̇ ܘܠܵܐ ܡܸܬܼܚܲܣܢܝܼܢ ܡ̣ܢ ܪ̈ܵܕܼܘܿܦܹܐ 253 ܘܗܵܐ ܒܲܣܒܲܪܬܵܐ ܪܫܝܼܡ ܫܘܼܘܕܵܝܹܗ ܕܫܲܝܢܵܗ̇ ܪܲܒܵܐ ܀ 254 :ܒܩܸܛܠܵܐ ܦܪܝܼܩܵܐ ܒܲܕܼܡܚܐ ܙܒܼܝܼܢܵܐ ܥܹܕܿܬܼ ܥܲܡܡܹ̈ܐ 255 ܘܲܬܼܚܹܝܬܼ ܓܸܦܵܘ̈ܗܝ ܕܲܳܨܠܝܼܒܼ ܢܘܼܗܪܵܐ ܫܪܹܝܢ ܚܲܒܿܝܼܒܹ̈ܝܗ̇ ܀ 256 :ܠܥܸܠ ܡ̣ܢ ܟܹܐܦܵܐ ܕܗܲܝܡܵܢܘܼܬܼܵܐ ܒܢܵܗ̇ ܦܵܪܘܿܩܲܢ 257 ܘܠܵܐ ܚܵܣ̇ܢܝܼܢ ܠܵܗ̇ ܬܲܪ̈ܥܹܐ ܕܲܫܝܘܿܠ ܘܡܘܼܟܼܠܲܝ̈ ܡ̇ܘܬܵܐ ܀ 258 :ܥܲܠ ܬܵܘܕܿܝܝܼܬܹܗ ܕܪܹܫ ܬܲܠܡܝܼ̈ܕܹܐ ܣܝܼܡ ܒܸܢܝܵܢܵܗ̇ 259 ܘܪܵܡ̇ܝܼܢ ܫܘܼܪܹ̈ܝܗ̇ ܒܣܲܒܼܪܵܐ ܛܵܒܼܵܐ ܘܚܘܼܒܵܐ ܕܲܟܼܝܵܐ ܀ 260 :ܩܒܼܝܼܥܵܐ ܒܐܲܪܥܵܐ ܘܗܵܐ ܫܘܼܟܼܠܵܠܵܗ̇ ܒܲܫܡܲܝܵܐ 261 ܘܪܵܘܡ̇ܐ ܘܥܘܼܡܩܵܐ ܠܒܼܝܼܟ ܫܘܼܠܛܵܢܵܗ̇ ܕܟܲܠܲܬܼ ܢܘܼܗܪܵܐ ܀ 262 :ܥܹܕܿܬܵ ܒܐܲܪܥܵܐ ܘܥܹܕܿܬܵܐ ܒܪܵܘܡ̇ܐ ܘܲܚܕܼܵܐ ܥܹܕܿܬܵܐ 263 ܥܹܕܲܬܼ ܩܘܼܕܼܫܵܐ ܘܥܹܕܲܬܼ ܒܘܼܟܼܪܹ̈ܐ ܗܵܝ̇ ܕܲܥܬܼܝܼܕܼܵܐ ܀ 264 :ܚܕܼܵܐ ܓܹܝܪ ܥܹܕܿܬܵܐ ܕܒܲܬܼܪܹܝܢ ܥܵܠܡܹ̈ܐ ܢܵܨܲ݁ܚ ܫܘܼܦܪܵܗ̇ 265 ܕܚܲܬܼܢܵܐ ܕܡܲܟܼܪܵܗ̇ ܒܲܬܼܪܹܝܢ ܥܵܠܡܹ̈ܐ ܐܵܘ ܪܸܒܼ ܠܲܫܡܵܗ̇ ܀ 266 :ܢܵܨ̇ܚܵܐ ܒܐܲܪܥܵܐ ܘܟܼܵܢ̇ܫܵܐ ܥܲܡܡܹ̈ܐ ܠܒܹܝܬܼ ܚܵܘܣܵܢܵܗ̇ 267 ܘܗܵܐ ܒܲܫܡܲܝܵܐ ܡܬܼܝܼܚܝܼܢ ܫܘܼܪܹ̈ܝܗ̇ ܒܕܼܘܼܡܣܲܝ̈ ܢܘܼܪܵܐ ܀ 268 :ܒܥܵܠܡܵܐ ܕܥܵܒܲ݁ܪ ܠܡܹܐܢܵܐ ܐܝܼܬܹܝܗ̇ ܠܟܼܠ ܫܲܪ̈ܒܼܵܬܼܵܐ 269 ܘܲܒܼܗܵܘ̇ ܕܲܥܬܼܝܼܕܼ ܥܝܼܪܹ̈ܐ ܘܐ̄ܢܵܫܵܐ ܒܵܗ̇ ܡܸܬܼܦܲܨܚܝܼܢ ܀ 270 :ܡܸܚܕܼܵܐ ܕܫܵܠܹ̇ܡ ܗܵܢܵܐ ܪܲܗܛܵܐ ܕܡܵܝܘܿܬܼܘܼܬܼܵܐ 271 ܨܡܲܚ̣ ܠܹܗ ܫܘܼܦܪܵܗ̇ ܒܐܲܬܼܪܵܐ ܪܵܡ̇ܐ ܕܠܵܐ ܡ̇ܝܘܿܬܹ̈ܐ ܀ 272 :ܗܵܪܟܵܐ ܒܵܣ̇ܡܵܐ ܒܦܲܓܼܪܹܗ ܘܲܕܼܡܹܗ ܕܚܲܬܼܢܵܐ ܡ̇ܪܵܗ̇ 273 ܘܬܲܡܵܢ ܪܵܘ̇ܙܵܐ ܒܙܝܼܘܹܗ ܦܲܐܝܵܐ ܥܛܝܼܦ ܓܵܘܙܲܠܬܵܐ ܀ 274 ܗܵܪܟܵܐ ܒܕܸܒܼܚܵܐ ܕܦܲܓܼܪܹܗ ܘܲܕܼܡܹܗ ܡܚܲܣܝܵܐ ܠܲܒܼܢܹ̈ܝܗ̇: pb. 165 275 ܘܬܲܡ̇ܢ ܡܚܵܘܝܵܐ ܟܝܵܢ ܐ̄ܢܵܫܘܼܬܹܗ ܠܟܼܠ ܚܲܒܿܝܼܒܹܝ̈ܗ̇ ܀ 276 ܗܵܪܟܵܐ ܘܬܲܡ̇ܢ ܒܹܗ ܬܸܬܼܒܲܣܲܡ ܥܹܕܿܬܵܐ ܘܲܒܼܢܹܝ̈ܗ̇ ܀ 277 :ܗܵܪܟܵܐ ܪܵܥ̇ܡܵܐ ܒܣܸܦܪ̈ܲܝ ܪܘܼܚܵܐ ܕܐܲܟܼܬܸܿܒܼܘ ܟܹܐܢܹ̈ܐ 278 ܘܬܲܡ̇ܢ ܚܵ̇ܕܼܝܵܐ ܒܲܩܢܘܿܡܲܝ̈ܗܘܿܢ ܠܒܼܝܼܫܲܝ̈ ܢܘܼܗܪܵܐ ܀ 279 :ܗܵܪܟܵܐ ܣܸܦܪܹ̈ܐ ܕܢܒܼܝܼܘܼܬܼܵܐ ܘܕܲܫܠܝܼܚܘܼܬܼܵܐ 280 ܘܬܲܡ̇ܢ ܟܸܢܫܹ̈ܐ ܕܲܩܢܘܿܡܲܝ̈ܗܘܿܢ ܕܲܒܼܢܲܝ̈ ܢܘܼܗܪܵܐ ܀ 281 :ܗܵܪܟܵܐ ܪܵܥܹ̇ܡܝܼܢ ܒܓܼܵܘ ܣܸܦܪ̈ܲܝܗܘܿܢ ܒܓܼܵܘ ܒܹܝܬܼ ܩܘܼܕܼܫܑܵܐ 282 ܘܡ̇ܐ ܕܐܸܬܼܢܲܚܲܡܘ ܠܵܗ̇ ܗ̄ܘ̣ ܟܵܢ̇ܫܝܼܢ ܒܐܲܬܼܪܵܐ ܕܢܘܼܗܪܵܐ ܀ 283 :ܠܥܸܠ ܡܸܬܼܥܲܐܠܝܵܐ ܒܗܵܝ̇ ܬܸܫܒܿܘܿܚܬܵܐ ܕܠܵܐ ܡܸܬܼܡܲܠܠܵܐ 284 ܘܟܸܢܫܹ̈ܐ ܕܲܒܼܢܹܝ̈ܗ̇ ܒܵܗ̇ ܡܸܬܼܒܲܣܡܝܼܢ ܥܲܡ ܪ̈ܘܼܚܵܢܹܐ ܀ 285 :ܬܡ݂ܲܗ ܠܹܗ ܪܸܥܝܵܢܝ ܒܫܘܼܦܪܵܗ̇ ܪܵܡ̇ܐ ܕܥܹܕܲܬܼ ܩܘܼܕܼܫܵܐ 286 ܘܠܲܝܬܿ ܠܝܼ ܡܸܠܬܼܵܐ ܕܣܵܦ̇ܩܵܐ ܕܐܹܡܲܪ ܥܲܠ ܦܲܐܝܘܼܬܼܵܗ̇ ܀ 287 :ܪܵܡ ܗ̄ܘ̣ ܫܲܪܒܵܗ̇ ܡ̣ܢ ܚܲܟܿܝܼܡܹ̈ܐ ܘܡ̣ܢ ܡܲܠܵܠܹ̈ܐ 288 ܘܗܝ̤ ܗ̄ܝܼ ܡܥܝܼܢܵܐ ܕܟܼܠ ܟܸܟܼ̈ܡܵܬܼܵܐ ܕܒܹܝܬܼ ܐܲܠܵܗܵܐ ܀ 289 :ܢܘܼܗܪܵܐ ܥܛܝܼܦܵܐ ܘܢܘܼܗܪܵܐ ܠܒܼܝܼܫܵܐ ܡܟܼܝܼܪܲܬܼ ܢܘܼܗܪܵܐ 290 ܢܘܼܗܪܵܐ ܙܠܝܼܚܵܐ ܘܢܘܼܗܪܵܗ̇ ܦܲܐܝܵ ܠܵܐ ܡܸܬܼܡܲܠܲܠ ܀ 291 :ܠܵܗ̇ ܗ̄ܘ̣ ܡܙܲܝܚܝܼܢ ܥܵܠܡܹ̈ܐ ܘܥܲܡܡܹ̈ܐ ܡ̣ܢ ܫܘܼܪܵܝܵܐ 292 ܘܒܼܵܗ̇ ܗ̄ܘ̣ ܪܵܥܡ̇ܝܼܢ ܣܸܦܪ̈ܲܝ ܪܘܼܚܵܐ ܒܕܼܵܪܹ̈ܐ ܟܠܗܘܿܢ ܀ 293 :ܡ̇ܪܹܐ ܢܒܼܝܹ̈ܐ ܣܵܡ̣ ܫܲܬܸܐܣܹܝ̈ܗ̇ ܬܪܲܨ ܒܸܢܝܵܢܵܗ̇ 294 ܘܲܟܼܬ݂ܲܒܼ ܒܲܕܼ ܡܹܗ ܟܬܼܵܒܼܵܐ ܕܫܲܝܢܵܗ̇ ܘܲܕܼܙܵܟܼܘܼܬܼܵܗ̇ ܀ 295 :ܫܠܝܼܚܹ̈ܐ ܒܢ̣ܵܐܘܼܗ̇ ܒܟܼܵܪܘܿܙܘܼܬܼܗܘܿܢ ܡܲܠܝܲܬܼ ܚܲܝܹ̈ܐ 296 ܘܡ̣ܝܼܬܼܘ ܥܲܠ ܐܲܦܹܝ̈ܗ̇ ܘܪܲܡܪܸܡܘ ܫܘܼܪܹ̈ܝܗ̇ ܒܝܲܕܼ ܩܸܛܠܲܝ̈ܗܘܿܢ ܀ 297 :ܟܵܗܢܹ̈ܐ ܘܡܲܠ݁̈ܟܹܿܐ ܐܲܣܓܿܝܼܘ ܫܘܦܪܵܗ̇ ܕܡ̇ܪܲܬܼ ܓܲܙܹ̈ܐ 298 ܘܥܲܡܡܹ̈ܐ ܟܠܗܘܿܢ ܪܥܸܡ̣ܘ ܩܵܠܲܝ̈ܗܘܿܢ ܒܲܙܡܝܼܪ̈ܵܬܼܵܗ̇ ܀ 299 :ܣܓܼܝܼ ܪܘܼܡܝܵܢܵܗ̇ ܘܝܼܪܸܒܼ ܚܠܘܼܠܵܗ̇ ܕܟܼܠܲܬܼ ܡܲܠܟܵܐ 300 ܘܲܡܠܹܝܢ ܓܲܙܹܝ̈ܗ̇ ܥܘܼܬܼܪܵܐ ܪܲܒܵܐ ܕܠܵܐ ܡܸܬܼܚܲܠܲܨ ܀ 301 :ܒܓܼܵܘ ܥܸܠܝܵܬܼܵܐ ܟܲܕܼ ܥܸܠܲܬ̤ ܗ̄ܘ̣ܵܬܼ ܠܒܹܝܬܼ ܐܲܠܵܗܵܐ 302 ܚܲܬܼܢܵܐ ܪܡ̇ܐ ܠܵܗ̇ ܦܲܓܼܪܹܗ ܘܲܕܼܡܹܗ ܘܚܘܼܒܹܿܗ ܪܲܒܵܐ ܀ 303 :ܐܵܦ ܫܘܫܒܼܝܼܢܹ̈ܐ ܫܠܝܼܚܹ̈ܐ ܝܲܗ̣̄ܒܼܘ ܠܵܗ̇ ܪ̈ܘܼܡܝܵܢܲܝܗܘܿܢ 304 ܚܲܫܹ̈ܐ ܘܡ̇ܘ̈ܬܹܿܐ ܕܡ̣ܢ ܪ̈ܵܕܼܘܿܦܹܐ ܣܒ݂ܲܠܘ ܥܲܠ ܐܲܦܹܝ̈ܗ̇ ܀ 305 :ܢܒܼܝܹ̈ܐ ܐܲܪܡܝܼܘ ܓܸܠܝܵܢܲܝ̈ܗܘܿܢ ܕܡܸܛܠܵܬܼܵܗ̇ 306 ܘܲܒܼܣܸܦܪ̈ܲܝܗܘܿܢ ܪܲܩܸܕܼܘ ܩܘܼܕܼܡܹܝܗ̇ ܪܘܼܚܵܢܵܐܝܼܬܼ ܀ 307 :ܣܵܗ̈ܕܹܿܐ ܪܡ̇ܘ̣ ܠܵܗ̇ ܕܸܡ ܨܵܘܪ̈ܲܝܗܘܿܢ ܚܲܒܿܝܼܒܼܵܐܝܼܬܼ 308 ܘܐܸܬܼܵܐ ܟܸܗܢܹ̈ܐ ܪܡ̇ܘ̣ ܕܲܪ̈ܓܲܝܗܘܿܢ ܒܹܝܬܼ ܚܘܼܣܵܝܵܐ ܀ 309 ܡܲܠ̈ܟܹܿܐ ܝܲܗ̣̄ܒܼܘ ܠܵܗ̇ ܫܘܼܠܛܵܢܲܝ̈ܗܘܿܢ ܐܲܝܟ ܪܘܼܡܝܵܢܵܐ: pb. 166 310 ܘܲܒܼܬܼܵܓܲܝ̈ܗܘܿܢ ܠܟܼܘܼܒܼܫܵܐ ܕܪܸ̈ܓܼܠܹܝܗ̇ ܣܓܸܕܼܘ ܟܲܕܼ ܚܵ̇ܕܹܝܢ ܀ 311 :ܓܲܒܼܪܹ̈ܐ ܘܢܸܫܹ̈ܐ ܣܵܒܹ̈ܐ ܥܠܲܝܡܹ̈ܐ ܘܟܼܠ ܡܘܼܫ̈ܚܵܬܼܵܐ 312 ܫܩ݂ܲܠܘ ܩܲܪܸܒܼܘ ܠܵܗ̇ ܩܵܠܲܝ̈ ܫܘܼܒܼܚܵܐ ܐܲܝܟ ܪܘܼܡܝܵܢܵܐ ܀ 313 :ܣܓܼܝܼ ܠܵܗ̇ ܥܘܼܬܼܪܵܗ̇ ܕܥܹܕܲܬܼ ܩܘܼܕܼܫܵܐ ܕܲܒܼܪܵܐ 314 ܘܡܸܢܵܗ̇ ܥܵܬܼ̇ܪܝܼܢ ܟܠܗܘܿܢ ܬܸܓܼܡܹ̈ܐ ܘܟܸܫܢܹ̈ܐ ܕܲܒܼܢܹܝ̈ܗ̇ ܀ 315 :ܕܲܥܒ݂ܲܪ ܐܵܦ ܩܲܝܡܵܝܼܢ ܐܵܦ ܕܲܥܬܼܝܼܕܼܝܼܢ 316 ܒܫܘܼܦܪܵܗ̇ ܪܲܒܵܐ ܙܠܝܼܚܝܼܢ ܕܲܪ̈ܓܹܐ ܕܫܘܼܠܛܵܢܲܝ̈ܗܘܿܢ ܀ 317 :ܗܲܝܟܲܠܹ̈ܝܗ̇ ܪ̈ܵܡܹܐ ܕܵܠܩܝܼܢ ܒܢܘܼܗܪܵܐ ܡܠܸܐ ܒܘܼܣܵܡܵܐ 318 ܒܒܹܝܬܼ ܚܘܼܣܵܝܵܐ ܥܛܝܼܦ ܙܲܗܝܘܼܬܼܵܐ ܘܩܲܕܿܝܼܫܘܼܬܼܵܐ ܀ 319 :ܩܒܼܝܼܥ ܒܵܗ̇ ܡܲܕܼܒܿܚܵܐ ܐ̄ܪܵܙܵܐ ܕܩܲܒܼܪܹܗ ܕܚܲܬܼܢܵܐ ܡܫܝܼܚܵܐ 320 ܘܣܝܼܡ ܒܵܗ̇ ܨܠܝܼܒܼܵܐ ܢܝܼܫܵܐ ܕܩܸܛܠܹܗ ܡܲܪܕܸܿܐ ܚܲܝܹ̈ܐ ܀ 321 :ܡܸܬܼܦܲܠܲܓܼ ܒܵܗ̇ ܦܲܓܼܪܵܐ ܘܲܕܼܡ̇ܐ ܠܚܘܼܣܵܝ ܚܵܘ̈ܒܹܿܐ 322 ܕܸܒܼܚܹܗ ܚܲܝܵܐ ܕܗܵܘ̇ ܪܲܒܿܟܿܘܼܡܪܹ̈ܐ ܕܒܲܕܹܡܹܗ ܙܲܒܼܢܵܗ̇ ܀ 323 :ܡܲܫܟܲܢܙܲܒܼܢܵܐ ܕܲܫܠܸܡ ܙܲܒܼܢܹܗ ܛܘܼܒܼܵܐ ܝܲܗ̣̄ܒܼ ܠܵܗ̇ 324 ܕܲܕܼܠܵܐ ܫܘܼܠܵܡ ܫܸܡܠܲܬ̤ ܛܘܼܒܹ̈ܐ ܕܒܹܝܬܼ ܐܲܠܵܗܵܐ ܀ 325 :ܟܵܗܢܹ̈ܐ ܕܛܘܼܦܣܵܐ ܠܟܼܵܗܢܲܝ̈ ܫܪܵܪܵܐ ܝܲܗ̣̄ܒܼܘ ܐܝܼܩܵܪܵܐ 326 ܕܲܥܒ݂ܲܪ ܛܘܼܦܣܵܐ ܘܙܲܚܲܘ ܫܪܵܪܵܐ ܕܥܹܕܲܬܿ ܩܘܼܕܼܫܵܐ ܀ 327 :ܕܸܒܼܚܸ̈ܐ ܚܲܪ݁ܫܹܐ ܕܲܒܼܢܵܡܘܿܣܵܐ ܣܓܸܕܼܘ ܡ̣ܢ ܪܘܼܚܩܵܐ 328 ܠܕܸܒܼܚܵܗ̇ ܡܠܝܼܠܵܐ ܕܥܹܕܿܬܵܐ ܟܲܠܬܼܵܐ ܡܟܼܝܼܪܬܹܿܗ ܕܲܒܼܪܵܐ ܀ 329 :ܕܸܒܼܚܹ̈ܐ ܡܝܼܬܹ̈ܐ ܒܕܸܒܼܚܵ ܚܲܝܵܐ ܫܩܲܠ̣ܘ ܫܘܼܠܵܡܵܐ 330 ܒܓܼܵܘ ܒܹܝܬܼ ܩܘܼܕܼܫܵܐ ܕܥܹܕܿܬܵܐ ܐܸܡ̇ܐ ܕܫܲܪܝܼܪܘܼܬܼܵܐ ܀ 331 :ܟܢܘܼܫܬܵܐ ܢܸܦܩܲܬ̤ ܕܲܣܢܵܬ̤ ܚܲܬܼܢܵܐ ܕܠܹܗ ܐܸܬܼܡܲܟܼܪܲܬ̤ 332 ܘܥܸܠܲܬ̤ ܥܹܕܿܬܵܐ ܘܲܗܘ̤ܸܵܬܼ ܟܲܠܬܼܵܐ ܕܫܲܪܝܼܪ ܚܘܼܒܵܗ̇ ܀ 333 :ܟܢܘܼܫܬܵܐ ܙܸܩܦܲܬ̤ ܘܥܹܕܿܬܼ ܥܲܡܡܹ̈ܐ ܚܝܵܬ̤ ܒܲܙܩܝܼܦܹܗ 334 ܘܗܵܐ ܡܸܬܼܒܲܣܡܵܐ ܒܦܲܓܼܪܹܗ ܘܲܕܼܡܹܗ ܡܚܲܣܸܐ ܚܵܘ̈ܒܹܿܐ ܀ 335 :ܗܵܐ ܦܸܪܢܝܼܬܼܵܐ ܕܟܲܠܲܬܼ ܢܘܼܗܪܵܐ ܥܲܠ ܣܸܦ̈ܘܵܬܼܵܗ̇ 336 ܦܲܓܼܪܹܗ ܘܲܕܼܡܹܗ ܕܚܲܬܼܢܵܐ ܚܲܝܵܐ ܒܲܪ ܥܸܠܵܝܵܐ ܀ 337 :ܒܐܲܪܒܲܥܦܸܢ̈ܝܵܢ ܗܵܐ ܫܲܠܝܼܛܵܐ ܟܲܠܲܬܼ ܡܲܠܟܵܐ 338 ܘܪܵܘܡ̇ܐ ܘܥܘܼܡܩܵܐ ܠܒܼܝܼܟ ܫܘܼܠܛܵܢܵܗ̇ ܕܲܡܫܲܒܲܚܬܵܐ ܀ 339 :ܐܲܪܒܲܥܦܸܢ̈ܝܵܢ ܛܥܹܝܼ̈ܢܵܢ ܠܲܫܡܵܗ̇ ܕܡܲܠܝܲܬܼ ܫܘܼܦܪܹ̈ܐ 340 ܕܒܲܐܪܒܲܥ ܐܵܬܼ̈ܘܵܢ ܣܵܡ̣ ܟܘܼܢܵܝܵܗ̇ ܚܲܬܼܢܵܐ ܡ̇ܪܵܗ̇ ܀ 341 :ܛܘܼܒܲܝܟܿܝ ܥܹܕܿܬܬܵܐ ܕܪܲܚܡܹܟܼܝ ܡ̇ܪܹܟܼܝ ܘܲܦܪܲܩ ܚܲܝܲܝ̈ܟܿܝ 342 ܘܫܲܝܢܵܐ ܪܲܒܵܐ ܙܠܲܚ̣ ܒܲܫܒܼܝܼܠܲܝܟܿܝ̈ ܘܲܒܗܲܠܟܼܵܬܹ̈ܟܼܝ ܀ 343 :ܛܘܼܒܲܝܟܿܝ ܥܹܕܿܬܵܐ ܕܪܲܚܡܹܟܼܝ ܫܸܡܫܵܐ ܕܙܲܕܿܝܼܩܘܼܬܼܵܐ 344 ܘܢܘܼܗܪܵܐ ܓܲܐܝܵܐ ܙܠܲܚ̣ ܒܐܵܦܲܕܼܢܲܝ̈ܟܿܝ ܘܲܡ̣ܠܵܟܼܝ ܫܘܼܒܼܚܵܐ ܀ pb. 167 345 :ܛܘܼܒܲܝܟܿܝ ܥܹܕܿܬܵܐ ܕܲܓܼܒܼܵܟܼܝ ܢܘܼܗܪܵܐ ܕܠܵܐ ܡܸܬܼܚܲܒܲܠ 346 ܘܥܲܠܝܼ ܣܵܡ̣ܟܼܝ ܒܪܵܘܡ̇ܐ ܪܵܡ̇ܐ ܠܥܸܠ ܒܲܡܫܲܝܵܐ ܀ 347 :ܛܘܼܒܲܝܟܿܝ ܥܹܕܿܬܵܐ ܕܡܲܟܼ݂ܪܹܟܼܝ ܚܲܬܼܢܵܐ ܡ̇ܪܵܐ ܛܵܒܼܵܐ 348 ܘܲܬܼܪܹܝܢ ܥܵܠܡܹ̈ܐ ܩ̣ܪܵܐ ܠܲܚܠܲܘܿܠܹܟܼܝ ܕܲܡܠܸܐ ܛܘܼܒܹ̈ܐ ܀ 349 :ܛܘܼܒܲܝܟܿܝ ܥܹܕܿܬܵܐ ܕܙܲܒܼܢܹܟܼܝ ܒܲܕܼܡܹܗ ܒܲܪ ܐܲܠܵܗܵܐ 350 ܘܲܦܪ݂ܲܩ ܚܲܝܲܝ̈ܟܿܝ ܡ̣ܢ ܥܲܒܼܕܿܘܼܬܼܵܐ ܕܣܸܓܼܕܲܬܼ ܨܲܠܡܹ̈ܐ ܀ 351 :ܛܘܼܒܲܝܟܿܝ ܥܹܕܿܬܵܐ ܕܐܲܒܼܵܐ ܨܒܼܵܐ ܒܹܡܼܝ ܘܲܒܼܪܵܐ ܡܲܟܼܪܹܟܼܝ 352 ܘܪܘܼܚܵܐ ܕܩܘܼܕܼܫܵܐ ܫܲܡܠܝܼ ܫܘܼܦܪܹܟܼܝ ܪܘܼܚܵܢܵܝܵܐ ܀ 353 :ܛܘܼܒܲܝܟܿܝ ܥܹܕܿܬܵܐ ܕܲܒܼ̈ܢܲܬܼ ܡܲܠ̈ܟܹܿܐ ܛܘܼܒܼܵܐ ܝܲܗ̣̄ܒܼ ܠܹܟܼܝ 354 ܕܪܲܚ̣ܡܹܟܼܝ ܚܲܬܼܢܵܐ ܕܕܼܝܼܠܹܗ ܐܸܢܘܿܢ ܫܡܲܝܵܐ ܘܐܲܪܥܵܐ ܀ 355 :ܛܘܼܒܲܝܟܿܝ ܥܹܕܿܬܵܐ ܕܗܵܐ ܒܲܫܡܲܝܵܐ ܓܢܘܿܟܹܟܼܝ ܡܲܬܼܩܲܢ 356 ܘܲܣܕܼܝܼܪܝܼܢ ܒܹܗ ܛܘܼܒܹ̈ܐ ܡܠܝܼܟܹ̈ܐ ܕܠܵܐ ܫܘܼܠܵܛܵܐ ܀ 357 :ܛܘܼܒܲܝܟܿܝ ܥܹܕܿܬܵܐ ܕܟܲܕܼ ܡ̣ܢ ܐܲܪܥܵܐ ܗ̄ܘ̣ ܓܸܢܣܹܟܼܝ ܫܝܼܛܵܐ 358 ܗܵܐ ܒܲܫܡܲܝܵܐ ܨܝܼܪܝܼܢ ܫܘܼܦܪܲܝܣܣܟܿܝ ܒܹܝܬܼ ܐܲܠܵܗܵܐ ܀ 359 :ܛܘܼܒܲܝܟܿܝ ܥܹܕܿܬܵܐ ܕܟܼܠܗܘܿܢ ܫܘܼܦܪܹ̈ܐ ܢܣܲܟ ܥܲܠ ܪܹܫܹܟܼܝ 360 ܡ̇ܪܹܐ ܛܘܼܒܹ̈ܐ ܕܪܲܚ̣ܡܹܟܼܝ ܘܡܲܟܼܪܹܟܼܝ ܘܐܵܘܪܸܒܼ ܠܲܫܡܹܟܼܝ ܀ 361 :ܛܘܼܒܲܝܟܿܝ ܥܹܕܿܬܵܐ ܕܥܹܐܕܲܝ̈ܟܿܝ ܪܵܥ̇ܡܝܼܢ ܒܐܲܪܒܲܥܦܸܢ̈ܝܵܢ 362 ܘܡܸܬܼܪܲܡܪܲܡ ܒܹܟܼܝ ܫܡܹܗ ܩܲܕܿܝܼܫܵܐ ܐܲܝܟ ܫܘܼܘܕܵܝܹܗ ܀ 363 :ܟܲܠܲܬܼ ܛܘܼܒܹ̈ܐ ܩܲܒܸܿܠܝ ܡܸܠܲܝ̈ ܐܲܝܟ ܪܘܼܡܝܵܢܵܐ 364 ܘܲܬܼܚܹܝܬܼ ܟܸܢܦܹܟܼܝ ܣܲܬܲܪܝ ܚܲܝܲܝ̈ ܡ̣ܢ ܢܸܟܼܝܵܢܹ̈ܐ ܀ 365 :ܡ̇ܪܲܢ ܗܲܒܼ ܠܝܼ ܕܠܵܐ ܐܸܬܼܢܲܟܼܪܸܐ ܡ̣ܢ ܗܵܘ̇ ܛܘܼܒܼܵܐ 366 ܕܠܹܗ ܗ̄ܘ̣ ܡܣܲܟܿܝܵܐ ܥܹܕܿܬܵܐ ܘܲܒܼܢܹ̈ܝܗ̇ ܒܝܘܿܡ ܓܸܠܝܵܢܵܟ ܀ :ܥܘܼܒܼܚܵܐ ܠܵܟ ܚܲܬܼܢܵܐ ܡܝܼܚܵܐ ܡ̣ܢ ܥܹܕܿܬܵܟ ܙܒܼܝܼܢܲܬܼ ܒܲܕܼܡ̇ܟ ܀