On Creation II - ܥܲܠ ܒܪܵܫܝܼܬܼ ܘܥܲܠ ܐܝܼܬܼܘܼܬܹܗ ܕܐܲܠܵܗܵܐ

1 :ܒܪܵܫܝܼܬܼ ܫܸܡܥܹ̇ܬܼ ܕܲܟܼܬ݂ܲܒܼ ܡܘܼܫܹܐ ܩܕܼܵܡ ܟܠ ܡܸܕܹܿܡ 2 ܘܲܒܼܥܹ̇ܝܬܼ ܕܐܸܚܙܘܿܩ ܒܲܫܒܼܝܼܠ ܡܸܠܵܘ̈ܗܝ ܠܘܵܬܼ ܫܘܼܪܵܝܵܐ ܀ 3 :ܚܲܡܸܫ ܐܵܬܼ̈ܘܵܢ ܚܙܹܝ̇ܬܹܗ ܕܲܪܲܫܲܡ̣ ܒܪܹܫ ܣܘܼܪܓܵܕܼܵܐ 4 ܘܡܲܠ̣ܟܲܢܝ ܪܸܥܝܵܢܝ ܠܡܸܬܼܗܲܓܵܝܘܼ ܒܚܲܕܼܬܼܘܼܬܼ ܣܸܦܪܹܗ ܀ 5 :ܐܲܝܟ ܕܲܠܟܹܐܦܹ̈ܐ ܦܣ݂ܲܠ ܐܵܬܼ̈ܘܬܼܵܐ ܒܦܲܪܘܠܵܐ ܕܪܘܼܚܵܐ 6 ܘܲܒܼܢ̣ܵܐ ܥܠܲܝܗܹܝܢ ܒܲܝܬܵܐ ܪܲܒܵܐ ܕܪܵܡ̇ܐ ܘܥܘܼܡܩܵܐ ܀ 7 :ܐܲܝܟ ܣܲܡܡܵܢܹ̈ܐ ܡܲܕܸܿܟ ܪܸܡܙܵܐ ܒܡܸܠܹ̈ܐ ܕܦܘܼܡܹܗ 8 ܘܨܵܪ ܒܸܪ̈ܝܵܬܼܵܐ ܕܠܵܐ ܚܲܙ̈ܝܵܢ ܠܹܗ ܟܲܕܼ ܟܡܸܬܿܬܿܩ̈ܝܵܢ ܀ 9 :ܒܲܕܼܡܘܼܬܼ ܨܲܠܡܵܐ ܪܲܟܿܒܹܗ ܠܥܵܠܡܵܐ ܕܲܗܘ̤ܸܵܐ ܒܪܵܫܝܼܬܼ 10 :ܘܫܲܩ݂ܲܠ ܣܵܡܹ݂ܗ ܩܕܼܵܡ ܚܲܙܵܝܹ̈ܐ ܕܢܸܬܼܒܲܩܘܿܢ ܒܹܗ 11 :ܛܲܟܼܣܵܐ ܪܲܒܵܐ ܥܒ݂ܲܕܼ ܨܲܝܵܐ ܠܐܘܼܡ̇ܢܘܼܬܹܗ 12 ܕܨܵܪ ܒܸܪ̈ܝܵܬܼܵܐ ܘܐܲܟܸܿܢ ܝܘܼܩܢܵܐ ܕܫܸܡ ܒܵܪܘܿܝܵܐ ܀ 13 :ܛܲܟܼܣܵܐ ܕܡܲܠܟܵܐ ܚܵܘܝܼ ܠܘܼܩܕܼܵܡ ܠܥܲܒܼܕܲܝ̈ ܡܲܠܟܵܐ 14 ܘܐܲܟܸܿܢ ܐܲܪܝܼܡ ܘܹܐܠܵܐ ܕܬܲܪܥܵܐ ܕܒܹܝܬܼ ܡܲܠܟܿܘܼܬܼܵܐ ܀ 15 :ܐܲܝܟ ܫܲܬܼܐܸܣܬܼܵܐ ܣܵܡ̣ܵܗ̇ ܠܡܸܠܬܼܵܐ ܗܲܝ̇ ܕܲܒܼܪܵܫܝܼܬܼ 16 ܘܲܠܥܸܠ ܡܸܵܢܵܗ̇ ܒܪ̣ܵܐ ܐܲܠܵܗܵܐ ܐܲܝܟ ܒܲܢܵܝܵܐ ܀ 17 :ܒܪܵܫܝܼܬܼ ܐܸܡ݂ܲܪ ܒܪ̣ܵܐ ܐܲܠܵܗܵܐ ܫܡܲܝܵܐ ܘܐܲܪܥܵܐ 18 ܠܟܼܵܬ ܗܝ̤ ܒܪܝܼܬܼܵܐ ܘܲܠܗܲܠ ܡܸܢܸܗ̇ ܡܵܪܹܐ ܒܪܝܼܬܼܵܐ ܀ 19 :ܒܪܝܼܬܼܵܐ ܐܸܡ݂ܲܪ ܩܕܼܵܡ ܒܵܪܘܿܝܵܐ ܘܟܸܢ ܒܵܪܘܿܝܵܐ 20 ܠܵܘ ܕܩܲܕܼܝܼܡܵܐ ܐܸܠܵܐ ܕܢܵܘܕܲܥ ܙܲܒܼܢܵܐ ܕܲܗܘ̤ܵܬܼ ܀ 21 :ܗܵܘܝܵܐ ܐܵܘܕܲܥ ܒܝܲܕܼ ܗܵܝ̇ ܕܲܟܼܬܲܒܼ ܒܪܵܫܝܼܬܼ ܠܘܼܩܕܼܵܡ 22 ܘܥܲܠ ܒܵܪܘܿܝܵܐ ܓܠ̣ܵܐ ܕܐܝܼܬܼܵܘܗܝ ܗ̄ܘ̣ܵܐ ܕܠܵܐ ܫܘܼܪܵܝܵܐ ܀ 23 :ܕܠܵܐ ܫܘܼܪܵܝܵܐ ܐܝܼܬܼܵܘܗܝ ܐܝܼܬܼܝܵܐ ܕܐܲܝܬܿܝܼ ܒܪܝܼܬܼܵܐ 24 ܘܲܕܼܠܵܐ ܫܘܼܠܵܡ ܡܩܵܘܸܐ ܒܛܲܟܼܣܵܐ ܕܐܲܡܝܼܢܘܼܬܹܗ ܀ 25 :ܕܐܝܼܬܼܵܘܗܝ ܘܐܝܼܬܼܵܘܗܝ ܡܨܸܐ ܪܸܥܝܵܢܵܐ ܕܢܹܐܡܲܪ ܒܲܠܚܘܿܕܼ 26 ܘܕܲܐܝܟܲܢ ܐܝܼܬܼܵܘܗܝ ܐܲܚܝܼܕܼ ܬܲܪܥܵܐ ܩܕܼܵܡ ܥܘܼܩܵܒܹܗ ܀ 27 :ܠܲܝܬܿ ܠܲܟܼܝܵܢܹܗ ܕܐܸܚܙܹܝܗܝ ܥܲܝܢܵܐ ܕܲܥܒܼܵܕܼ ܐܝܼܕܸܵܘ̈ܗܝ 28 ܘܠܵܐ ܠܲܥܒܼܵܕܵܘ̈ܗܝ ܕܢܸܬܼܒܲܩܘܿܢ ܒܹܗ ܠܦܘܼܬܼ ܪܸܓܲܬܼܗܘܿܢ ܀ pb. 169 29 :ܕܠܵܐ ܪܘܼܟܵܒܼܵܐ ܗ̄ܘ̣ ܘܕܼܠܵܐ ܣܵܟܼܵܐ ܗ̄ܘ̣ ܘܲܕܼܠܵܐ ܚܙܵܬܼܵܐ ܗ̄ܘ̣ 30 ܘܠܵܐ ܡܸܫܬܲܚܠܲܦ ܡ̣ܢ ܗܵܝ̇ ܕܐܝܼܬܼܵܘܗܝ ܐܘܵܬܼ ܕܲܠܩܘܼܒܼܠܵܐ ܀ 31 :ܪܵܡ ܗ̄ܘ̣ ܟܝܵܢܹܗ ܡ̣ܢ ܫܘܼܚܠܵܦܹ̈ܐ ܘܡ̣ܢ ܚܲܙܵܝܹ̈ܐ 32 ܘܠܲܝܬܿ ܒܲܥܒܼܝܼܕܹ̈ܐ ܕܣܵܦܹ̇ܩ ܗܵܘܢܹܗ ܕܢܹܐܡܲܪ ܕܲܟܼܡܵܐ ܗ̄ܘ̣ ܀ 33 :ܟܝܵܢܵܐ ܕܥܲܠ ܟܠ ܐܲܚܝܼܕܼ ܢܘܼܡܹܐ ܒܪܵܘܡܵܐ ܘܥܘܼܡܩܵܐ 34 ܘܲܠܓܼܵܘ ܡܸܢܹܗ ܚܒܼܝܼܫ ܟܠܡܸܕܹܿܡ ܕܲܗܘ̤ܵܐ ܡܸܢܹܗ ܀ 35 :ܡܸܢܹܗ ܡܲܠܝܵܐ ܒܪܝܼܬܼܵܐ ܕܲܒܼܪܵܐ ܡ̣ܢ ܠܵܐ ܡܸܕܹܿܡ 36 ܘܗܵܢܵܘ̇ ܬܲܗܪܵܐ ܕܟܲܕܼ ܠܲܝܬܿ ܡܸܕܹܿܡ ܒܪ̣ܵܐ ܟܠ ܡܸܕܹܿܡ ܀ 37 :ܒܪܸܡܙܹܗ ܩܵܐܹ̇ܡ ܥܵܠܡܵܐ ܪܲܒܵܐ ܥܲܠ ܠܵܐ ܡܸܕܹܿܡ 38 ܘܗܵܐ ܬܸܕܼܡܘܼܬܵܐ ܕܣܝܼܡ ܟܠܡܸܕܹܿܡ ܥܲܠ ܠܵܐ ܡܸܕܹܿܡ ܀ 39 :ܒܚܹܝܠ ܚܲܝܘܼܬܼܵܐ ܡܲܞܸܐ ܟܝܵܢܹ̈ܐ ܡܠܝܼܠܹ̈ܐ ܘܚܲܪ̈ܫܹܐ 40 ܘܗܵܐ ܬܲܚܘܝܼܬܼܵܐ ܕܪܲܒܿܘܼܬܼ ܚܲܝܠܹܗ ܒܗܘܿܢ ܒܲܟܼܝܵܢܹ̈ܐ ܀ 41 :ܟܝܵܢܹ̈ܐ ܩܵܥܹ̇ܐ ܥܲܠ ܪܲܒܿܘܼܬܹܗ ܕܠܵܐ ܡܸܬܿܕܼܪܟܵܐ 42 ܘܲܒܼܣܘܼܥܪ̈ܵܢܹܐ ܡܚܵܘܹܝܢ ܚܲܝܠܵܐ ܕܥܵܒܼܘܿܕܼܬܹܗ ܀ 43 :ܠܵܐ ܡܸܬܿܕܲܪܟܵܐ ܐܘܿ ܡ̇ܢܘܼܬܹܗ ܡ̣ܢ ܒܲܥܵܝܹ̈ܐ 44 ܕܲܟܼܡܵܐ ܕܒܼܵܥܹ̇ܝܢ ܠܗܲܠ ܡ̣ܢ ܣܵܟ̣ܵܐ ܣܝܼܡܵܐ ܒܥܵܬܹܗ ܀ 45 :ܠܵܐ ܠܹܗ ܣܵܟܼܵܐ ܘܠܵܐ ܠܲܒܼܥܵܬܹܗ ܫܘܼܠܵܡ ܡܸܠܹ̈ܐ 46 ܘܐ̄ܢܵܫܵܐ ܠܵܠܹ̇ܐ ܐܲܝܢܵܐ ܕܒܼܵܥܹ̇ܐ ܒܥܵܬܼܵܐ ܕܲܥܠܵܘܗܝ ܀ 47 :ܦܘܼܫ ܒܲܥܵܝܵܐ ܠܵܐ ܬܸܬܼܦܲܫܲܚ ܒܲܒܼܥܵܬܼ ܟܲܣܝܵܐ 48 ܕܲܥ ܠܲܟܼܝܵܢܵܟ ܘܗܲܒܼ ܪܲܒܿܘܼܬܼܵܐ ܠܲܡܬܿܩܢܵܢܵܟ ܀ 49 :ܒܥܝܼ ܐܸܢ ܒܵܥܹ̇ܝܬܿ ܒܥܵܬܼܵܐ ܕܦܲܐܝܵܐ ܠܲܕܼܠܵܐ ܣܵܟܼܵܐ 50 ܕܐܲܝܟܲܢ ܐܝܼܬܼܵܘܗܝ ܟܝܵܢܵܐ ܫܲܘܝܵܐ ܩܢܘܿܡܹ̈ܐ ܬܠܵܬܼܵܐ ܀ 51 :ܒܥܝܼ ܕܐܲܝܟܲܢܵܐ ܐܝܼܬܼ ܒܲܟܼܝܵܢܵܐ ܫܘܼܪܵܝܵܐ 52 ܐܲܒܼܵܗܘܼܬܼܵܐ ܘܝܼܠܝܼܕܼܘܼܬܼܵܐ ܘܢܵܦܘܿܩܘܼܬܼܵܐ ܀ 53 :ܐܵܦܠܵܐ ܗܵܕܹܐ ܠܵܘ ܒܲܒܼܥܵܬܼܵܐ ܢܸܒܼܥܸܐ ܕܐܲܝܟܲܢ 54 ܐܸܠܵܐ ܒܚܘܼܒܵܐ ܕܲܦܠܸܐ ܠܐܲܝܢܵܐ ܕܝܵܠܹ̇ܦ ܀ 55 :ܒܚܘܼܒܵܐ ܦܲܐܝܵܐ ܗ̄ܝܼ ܠܡܸܒܼܥܵܐ ܒܥܵܬܼܵܐ ܕܥܲܠ ܐܝܼܬܼܘܼܬܼܵܐ 56 ܘܲܕܼܠܵܐ ܒܨܵܬܼܵܐ ܫܲܦܝܼܪ ܗܸܪܓܵܐ ܕܥܲܠ ܟܲܣܝܘܼܬܼܵܐ ܀ 57 :ܡܵܕܹܝܢ ܠܵܐ ܥܕܼܝܼܠ ܐܲܝܢܵܐ ܕܒܼܵܥܹ̇ܐ ܠܡܹܐܠܲܦ ܫܲܦܝܼܪ 58 ܐܸܠܵܐ ܐܲܝܢܵܐ ܕܲܒܼܚܸܪܝܵܢܵܐ ܡܪܲܟܸܿܒܼ ܡܸܠܹ̈ܐ ܀ 59 :ܐܡܹܐܠܲܦ ܥܸܠܹ̇ܬܼ ܠܒܹܝܬܼ ܢܵܡܘܿܣܹ̈ܐ ܕܲܡܠܸܟ ܡܲܠ̈ܟܹܿܐ 60 ܘܕܸܐܚܙܸܐ ܛܲܟܼܣܵܐ ܕܒܹܝܬܼ ܡܲܠܟܿܘܼܬܼܵܐ ܕܠܵܐ ܚܲܙܝܵܐ ܠܝܼ ܀ 61 :ܠܵܘ ܕܐܸܬܼܒܲܩܸܐ ܒܟܲܣܝܵܐ ܥܸܠܹ̇ܬܼ ܠܐܲܝܟܵܐ ܕܥܹܠܹ̇ܬܼ 62 ܐܸܠܵܐ ܕܐܸܫܡܲܥ ܡܲܡܠܠܵܐ ܚܲܕܼܬܼܵܐ ܥܲܠ ܟܲܣܝܘܼܬܵܪܐ ܀ 63 :ܡܲܡܠܠܵܐ ܚܲܕܼܬܼܵܐ ܟܬܲܒܼ ܚܲܕܼ ܓܼܒܼܪܵܐ ܒܩܲܢܝܵܐ ܕܪܘܼܚܵܐ 64 ܘܲܒܼܥܹ̇ܝܬܼ ܕܐܹܠܲܦ ܚܹܝܠ ܣܘܼܟܵܠܵܐ ܕܲܟܼܣܸܐ ܒܡܸܠܵܘ̈ܗܝ ܀ pb. 170 65 :ܒܪܵܫܝܼܬܼ ܬܲܪܓܸܿܡ ܚܲܕܼ ܟܵܪܘܿܙܵܐ ܒܹܝܬܼ ܐܲܪ̈ܗܵܢܹܐ 66 ܘܲܨܒܹ̇ܝܬܼ ܕܐܸܕܲܥ ܕܡ̇ܢܲܐ ܗ̄ܝܼ ܥܸܠܬܼܵܐ ܕܟܼܵܪܘܿܙܘܼܬܹܗ ܀ 67 :ܒܪܹܫ ܦܸܬܓܼܵܡܵܘ̈ܗܝ ܚܙܹ̇ܝܝܬܼ ܟܲܕܼ ܪܵܗܹ̇ܛ ܫܡܵܐ ܕܲܒܼܪܵܫܝܼܬܼ 68 ܘܲܠܗܲܠ ܡܸܢܹܗ ܫܸܡ ܒܵܪܘܿܝܵܐ ܕܲܒܼܪܵܐ ܒܪܵܫܝܼܬܼ ܀ 69 :ܫܸܡ ܐܲܠܵܗܵܐ ܫܡܥܹ̇ܬܼ ܕܲܒܼܪܵܐ ܒܪܝܼܬܼܵܐ ܒܪܵܫܝܼܬܼ 70 ܘܫܲܚܩ݂ܲܢܝ ܪܸܥܝܵܢܝ ܕܐܸܒܼܥܸܐ ܒܚܘܼܒܵܐ ܒܥܵܬܼܵܐ ܕܫܲܡܹܗ ܀ 71 :ܫܡܹܗ ܐܵܣܸܦ ܒܝܼ ܢܘܼܪܵܐ ܕܲܫܡܹܗ ܕܐܸܕܲܥ ܠܲܫܡܹܗ 72 ܘܗܵܐ ܡܛܲܝܲܒܼ ܕܐܸܩܪܹܝܗܘܗܝ ܒܲܫܡܵܐ ܕܲܦܠܸܐ ܠܲܫܡܹܗ ܀ 73 :ܐܲܠܵܗ ܘܒܼܵܪܹܐ ܒܪܝܼܬܼܵܐ ܩܪ̣ܵܝܗܝ ܒܲܪ ܥܲܡܪܲܡ 74 ܘܗܵܐ ܡܕܲܟܸܐ ܐ̄ܢܵܐ ܕܐܸܩܪܹܝܘܗܝ ܐܵܦ ܐ̄ܢܵܐ ܐܲܟܼܡܵܐ ܕܲܩ̣ܪܵܝܗܝ ܀ 75 :ܕܐܲܠܵܗܵܐ ܟܠܵܐ ܗ̄ܘ̣ ܫܵܠܹ̇̄ܡ ܐ̄ܢܵܐ ܠܹܗ ܠܒܲܪ ܥܸܒܼܪ݁ܵܝܹܐ 76 ܘܲܕܼܒܼܵܪܘܿܝܵܐ ܗ̄ܘ̣ ܡܩܲܠܸܣ ܐ̄ܢܵܐ ܠܹܗ ܠܲܥ̇ܒܼܵܕܼ ܐܝܼܕܼܵܘ̈ܗܝ ܀ 77 :ܕܐܝܼܬܼܵܘܗܝ ܐܝܼܬܼܝܵܐ ܕܠܵܐ ܫܘܼܪܵܝܵܐ ܫܲܪܝܼܪܵܐ ܠܝܼ 78 ܘܲܕܼܠܲܝܬܿ ܫܘܼܠܵܡ ܠܐܲܡܝܼܢܘܼܬܹܗ ܠܵܐ ܡܕܲܓܸܿܠ ܐ̄ܢܵܐ ܀ 79 :ܕܠܵܐ ܡܸܣܬܲܝܲܟ ܟܝܵܢ ܐܝܼܬܼܘܼܬܹܗ ܡܩܲܒܸܿܠ ܐ̄ܢܵܐ ܠܹܗ 80 ܘܲܕܼܠܵܐ ܢܵܦܹ̇ܠ ܬܚܹܝܬܼ ܚܲܙܵܝܹ̈ܐ ܡܗܲܝܡܸܢ ܐ̄ܢܵܐ ܒܹܗ ܀ 81 :ܕܠܵܐ ܡܸܫܬܿܚܠܲܦ ܡ̣ܢ ܡ̇ܐ ܕܐܝܼܬܼܵܘܗܝ ܪܸܥܝܵܢܝ ܣܵܗܹ̇ܕܼ 82 ܘܲܕܼܠܵܐ ܚܵܐܹ̇ܫ ܒܲܡܚܝܼ̈ܠܵܬܼܵܐ ܐܸܫܵܢܝ ܩܵܥܹ̇ܐ ܀ 83 :ܕܥܲܡ ܐܝܼܬܼܘܼܬܹܗ ܩܢܸܐ ܝܼܕܲܥܬܼܵܐ ܕܗܵܠܹܝܢ ܕܲܗ̤ܵܘܲܝ̈ 84 ܘܐܲܝܟ ܕܲܒܼܠܘܼܚܹ̈ܐ ܟܬܼܝܼܒܼܵܐ ܒܡܲܕܲܥܝ ܘܠܵܐ ܡܸܬܼܠܚܝܵܐ ܀ 85 :ܕܝ̇ܵܕܲܥ ܗ̄ܘ̣ܵܐ ܟܠ ܐܲܝܟܲܢ ܗܵܘܹ̇ܐ ܥܲܕܼܠܵܐ ܢܸܗܘܸܐ 86 ܠܥܹܝܢ ܐܲܪ̈ܥܵܢܹܐ ܘܲܡܫܲܝܵܢܹ̈ܐ ܡܲܟܼܪܸܙ ܐ̄ܢܵܐ ܠܵܗ̇ ܀ 87 :ܕܐܝܼܬܼ ܒܲܟܼܝܵܢܹܗ ܩܢܘܿܡܹ̈ܐ ܫ̈ܘܲܝܵܐ ܕܲܫܘܹܝܢ ܥܲܡܹܗ 88 ܫܡܲܝܵܐ ܘܐܲܪܥܵܐ ܢܸܩܥܘܿܢ ܥܲܡ ܦܘܼܡܝ ܕܗܵܟܲܢ ܐܝܼܬܹܝܗ̇ ܀ 89 :ܕܐܝܼܬܼܵܘܗܝ ܐܲܒܼܵܐ ܘܲܒܼܪܵܐ ܘܪܘܼܚܵܐ ܚܕܼܵܐ ܐܝܼܬܼܘܼܬܼܵܐ 90 ܡܠܝܼܠܹ̈ܐ ܘܚܲܪ̈ܫܹܐ ܢܲܪܡܘܿܢ ܐܝܼܕܼܵܐ ܒܲܫܛܵܪ ܡܸܠܲܝ̈ ܀ 91 :ܕܐܲܒܼܵܐ ܗ̄ܘ̣ ܘܲܒܼܪܵܐ ܝܲܠܕܵܐ ܗ̄ܘ̣ ܘܪܘܼܚܵܐ ܐܝܼܬܼܝܵܐ ܗ̄ܘ̣ 92 ܒܲܫܒܼܝܼܠ ܬܵܕܿܝܼܬܼܝ ܢܸܪܕܿܘܿܢ ܐ̄ܢܵܫܵܐ ܘܪ̈ܘܼܚܵܢܵܝܹܐ ܀ 93 :ܕܠܲܝܬܿ ܒܹܝܬܼ ܐܲܒܼܵܐ ܠܲܒܼܪܵܐ ܘܪܘܼܚܵܐ ܛܵܘܪܵܐ ܘܪܸܡܙܵܐ 94 ܐܸܠܘܼ ܐܝܼܬܼ ܗ̄ܘ̣ܵܐ ܒܪܝܼܬܼܵܐ ܐ̄ܚܪܹܬܼܵܐ ܙܥܘܿܪܝܵܐ ܕܬܼܵܘܕܹܿܐ 95 :ܘܠܵܐ ܡܸܣܬܲܕܩܝܼܢ ܒܝܲܕ ܦܘܼܪܫܵܢܵܐ ܚܲܕܼ ܡ̣ܢ ܚܲܒܼܪܹܗ 96 ܠܲܝܬܿ ܒܲܥܒܼܝܼܕܹ̈ܐ ܕܢܹܐܡܲܪ ܕܲܟܼܡܵܐ ܗ̄ܝܼ ܗܵܝ ܫܲܘܝܘܼܬܼܵܐ ܀ pb. 171 97 :ܕܟܲܕܼ ܐܸܢܘܿܢ ܬܠܵܬܼܵܐ ܐܸܢܘܿܢ ܘܲܒܚܲܕܼ ܐܸܢܘܿܢ 98 ܠܲܝܬܿ ܠܸܫܢܵܐ ܕܲܡܨܸܐ ܢܩܲܠܸܣ ܠܗܵܝ̇ ܐܝܼܬܼܘܼܬܼܵܐ ܀ 99 :ܠܵܐ ܗ̄ܘ̣ܵܐ ܐܝܼܬܼܝܹ̈ܐ ܬܐܵܬܼܵܐ ܐܸܡ̇ܪܹܬܼ ܒܗܵܝ̇ ܕܲܬܼܠܵܬܼܵܐ 100 ܐܸܠܵܐ ܩܢܘܿܡܹ̈ܐ ܬܠܵܬܼܵܐ ܕܲܫܘܹܝܢ ܒܵܗ̇ ܒܐܝܼܬܼܘܼܬܼܵܐ ܀ 101 :ܚܕܼܵܐ ܐܝܼܬܼܘܼܬܼܵܐ ܐܸܡ̇ܪܹܬܼ ܕܐܝܼܬܹܝܗ̇ ܘܬܼܘܼܒܼ ܐܵܡܲ݁ܪ ܐ̄ܢܵܐ 102 ܘܒܼܵܗ̇ ܒܐܝܼܬܼܘܼܬܼܵܐ ܩܢܘܿܡܹ̈ܐ ܬܠܵܬܼܵܐ ܕܠܵܐ ܡܸܣܬܲܕܼܩܝܼܢ ܀ 103 :ܠܒܼܘܼܕܵܩ ܩܢܘܿܡܹ̈ܐ ܡܝܼܡ ܡܸܢܝܵܢܵܐ ܚܲܕܼ ܒܵܬܲܪ ܚܲܕܼ 104 ܕܢܸܕܲܥ ܟܠܢܵܫ ܕܫܲܪܝܼܪ ܛܲܟܼܣܵܐ ܕܲܩܢܘܿܡܲܝ̈ܗܘܿܢ ܀ 105 :ܫܪܵܪܵܐ ܓܲܠܝܵܐ ܡܲܟܼܪܸܙ ܛܲܟܼܣܵܐ ܕܲܫܡܵܗܲܝ̈ܗܘܿܢ 106 ܕܟܼܠ ܕܐܼܝܼܬܼ ܠܐܲܒܼܵܐ ܐܵܦ ܐܝܼܬܼ ܠܲܒܼܪܵܐ ܘܲܠܪܘܼܚܩܘܼܕܼܫܵܐ ܀ 107 :ܚܲܕܼܘ ܟܝܵܢܵܐ ܫܘܼܠܛܵܢܵܐ ܘܚܲܕܼ ܨܸܒܼܝܵܢܵܐ 108 ܘܠܲܝܬܿ ܦܘܼܪܫܵܢܵܐ ܕܪܲܒܿ ܐܵܘ ܕܲܙܥܘܙܿܪ ܒܹܝܬܼ ܚܲܕܼ ܠܲܐ̄ܚܪܹܝܢ ܀ 109 :ܠܲܝܬܿ ܒܐܝܼܬܼܘܼܬܼܵܐ ܡܸܕܸܿܡ ܕܲܒܼܨܝܼܪ ܡ̣ܢ ܐܝܼܬܼܘܼܬܼܵܐ 110 ܕܟܼܠ ܕܐܝܼܬܼܘܼܬܼܵܐ ܗ̄ܝܼ ܠܲܝܬܿ ܬܘܼܒܼ ܕܲܪܓܼܵܐܬ ܕܪܲܒ ܐܵܘ ܕܲܙܥܘܿܪ ܀ 111 :ܠܵܐ ܩܲܕܿܝܼܡܵܐ ܐܲܒܼܵܗܘܼܬܼܵܐ ܕܐܲܒܼܵܐ ܠܝܲܠܕܹܿܗ 112 ܘܠܵܐ ܬܘܼܒܼ ܒܪܝܼܬܼܵܐ ܕܲܒܼܪܵܐ ܒܨܝܼܪܵܐ ܡ̣ܢ ܝܵܠܘܿܕܹܗ ܀ 113 :ܠܵܐ ܛܠܸܐ ܪܘܼܚܵܐ ܠܵܐ ܡ̣ܢ ܐܲܒܼܵܐ ܘܠܵܐ ܡ̣ܢ ܝܲܠܕܵܐ 114 ܠܵܐ ܒܐܝܼܬܼܘܼܬܼܵܠ ܘܠܵܐ ܒܫܘܼܠܛܵܢܵܐ ܕܥܲܠ ܟܠ ܒܸܪ݁ܝܵܢ ܀ 115 :ܚܲܕܼ ܐܝܼܬܲܝܗܘܿܢ ܟܡܵܐ ܐܸܢ ܣܝܼܡܝܼܢ ܚܲܕܼ ܒܵܬܲܪ ܚܲܕܼ 116 ܬܠܵܬܼܵܐ ܐܸܢܘܿܢ ܟܡܵܐ ܐܸܢ ܚܲܕܼ ܗ̄ܘ̣ ܟܝܵܢܵܐ ܕܲܒܼܗܘܿܢ ܀ 117 :ܬܠܵܬܼܵܐ ܐܸܢܘܿܢ ܡܸܛܠ ܛܲܟܼܣܵܐ ܕܲܫܡܵܗܲܝ̈ܗܘܿܢ 118 ܘܬܼܘܼܒܼ ܚܲܕܼ ܐܸܢܘܿܢ ܒܗܵܝ̇ ܕܲܟܼܝܵܢܵܐ ܫܘܸܐ ܗ̄ܘ̣ ܒܲܟܼܝܵܢܹܗ ܀ 119 :ܠܵܘ ܒܲܦܣܵܩܵܐ ܘܲܒܼܦܘܼܪܫܵܢܵܐ ܦܪܝܼܫ ܚܲܕܼ ܡ̣ܢ ܚܲܕܼ 120 ܐܸܠܵܐ ܒܲܡܫܵܐ ܘܲܒܼܡܸܢܵܝܵܢܵܐ ܕܠܵܐ ܒܘܼܠܒܵܠܵܐ ܀ 121 :ܘܗܵܐ ܬܲܚܘܝܼܬܼܵܐ ܕܗܵܕܹܐ ܕܐܸܡ̇ܪܹܬܼ ܒܬܼܘܼܩܵܢܲܝ̈ܗܘܿܢ 122 ܕܐܝܼܬܼ ܗ̄ܘ̣ ܡܸܕܸܿܡ ܕܟܲܕܼ ܚܲܕܼ ܐܝܼܬܼܵܘܗܝ ܐܝܼܬܼ ܒܹܗ ܡܸܕܸܿܡ ܀ 123 :ܚܘܼܪ ܒܐܸܣܦܹܪܵܐ ܕܫܸܡܫܵܐ ܪܲܒܵܐ ܕܡܲܢܗܲܪ ܥܲܠ ܟܠ 124 ܕܟܲܕܼ ܚܲܕܼ ܐܝܼܬܹܝܗ̇ ܐܝܼܬܼ ܒܵܗ̇ ܢܘܼܗܪܵܐ ܘܚܲܡܝܼܡܘܼܬܼܵܐ ܀ 125 :ܚܲܕܼ ܗ̄ܘ̣ ܟܝܵܢܵܐ ܕܐܸܣܦܹܪ ܫܸܡܫܵܐ ܘܲܕܼܙܲܠܝܼܩܹ̈ܐ 126 ܘܠܵܐ ܩܲܕܿܝܼܡܵܐ ܠܵܐ ܗܝ̤ ܠܕܼܝܼܠܵܗ̇ ܘܠܵܐ ܕܝܼܠܵܗ̇ ܠܵܗ̇ ܀ 127 :ܒܵܗ̇ ܐܲܣܝܼܢܝܼܢ ܢܘܼܗܪܵܐ ܚܘܼܡ̇ܐ ܘܗ̤ܝ ܒܲܬܼܪ̈ܲܝܗܘܿܢ 128 ܘܟܲܕܼ ܚܲܕܼ ܐܸܢܘܿܢ ܬܠܵܬܼܵܐ ܐܸܢܘܿܢ ܒܣܘܼܪ݁ܵܢܲܝܗܘܿܢ ܀ 129 :ܐ̄ܣܦܹܪܵܐ ܕܫܸܡܫܵܐ ܘܢܘܼܗܪܵܐ ܘܚܘܼܡ̇ܐ ܬܠܵܬܼܵܐ ܐܸܢܘܿܢ 130 ܘܲܬܼܠܵܬܼܵܐ ܒܚܲܕܼ ܬܘܼܒܼ ܡܸܬܼܝܲܕܼܥܝܼܢ ܕܠܵܐ ܦܘܼܪܫܵܢܵܐ ܀ pb. 172 131 :ܠܵܐ ܐܸܬܼܚܲܙܝܲܬ̤ ܡܬܼܘܿܡ ܐܸܣܦܹܪܵܐ ܕܠܵܐ ܙܲܠܝܼܩܹ̈ܐ 132 ܘܠܵܐ ܕܢܲܚ̣ܘ ܡ̣ܢ ܥܘܼܒܵܗ̇ ܒܸܠܥܵܕܼ ܚܘܼܡ̇ܐ ܀ 133 :ܗܵܝ̇ ܐܲܝܟ ܕܐܝܼܬܹܝܗ̇ ܒܛܲܟܼܣܵܐ ܕܲܟܼܢܝܼܫܘܼܬܼܵܗ̇ 134 ܘܚܲܝܠܹ̈ܐ ܕܥܲܡܵܗ̇ ܒܐܲܡܝܼܢܘܼܬܼܵܐ ܕܠܵܐ ܡܸܣܬܲܕܩܵܐ ܀ 135 :ܒܲܕܼܡܘܼܬܼ ܝܲܠܕܵܐ ܢܵܦܹ̇ܩ ܨܸܡܚܵܐ ܡ̣ܢ ܓܵܘ ܥܘܼܒܵܗ̇ 136 ܘܟܲܕܼ ܛܵܒܼ ܢܵܦܹ̇ܩ ܠܵܘ ܒܲܦܣܵܩܵܐ ܢܵܦܹ̇ܩ ܡܸܢܵܗ̇ ܀ 137 :ܒܛܲܟܼܣܵܐ ܕܪܘܼܚܵܐ ܩܲܢܝܝܵܐ ܚܲܝܠܵܐ ܕܚܲܡܝܼܡܘܼܬܼܵܐ 138 ܘܫܲܪܝܵܐ ܒܓܼܵܘܵܗ̇ ܘܢܵܦ̇ܩܵܐ ܡܸܢܵܗ̇ ܕܠܵܐ ܫܘܼܢܵܝܵܐ ܀ 139 :ܠܵܟ ܬܸܫܒܿܘܿܚܬܵܐ ܒܪܵܘܡ̇ܐ ܘܥܘܼܡܩܵܐ ܐܝܼܬܼܝܵܐ ܓܢܝܼܙܵܐ 140 ܕܲܒܼܪܲܝܬܿ ܥܵܠܡܹ̈ܐ ܕܲܠܥܸܠ ܘܕܲܠܬܲܚܬܿ ܒܪܸܡܙܵܐ ܕܚܲܝܠܵܟ ܀ 141 :ܗܵܐ ܒܲܥܒܼܝܼܕܹ̈ܐ ܬܲܚܘܝܼܬܼ ܚܲܝܠܵܐ ܕܐܲܠܵܗܘܼܬܼܵܟ 142 ܕܚܵܙܩ̇ܝܼܢ ܘܫܵܪܹܝܢ ܕܠܵܐ ܫܘܼܢܵܝܵܐ ܡ̣ܢ ܕܘܼܟ ܠܲܐ̄ܚܪܹܝܢ ܀ 143 :ܚܵܙܩ̇ܝܼܢ ܚܲܝܠܹ̈ܐ ܬܪܹܝܢ ܒܐܸܣܦܹܪܵܐ ܟܲܕܼ ܠܵܐ ܚܵ̇ܙܩܝܼܢ 144 ܘܫܵܪܹܝܢ ܨܹܝܕܼ ܟܠ ܟܲܕܼ ܠܵܐ ܡܫܲܢܹܝܢ ܡ̣ܢ ܕܘܼܟܲܬܼܗܘܿܢ ܀ 145 :ܥܵܒܲ݁ܪ ܚܲܝܠܵܐ ܕܣܵܥܘܿܪܘܼܬܼܗܘܿܢ ܥܲܠ ܟܠ ܘܲܒܼܟܼܠ 146 ܘܠܵܐ ܡܸܬܼܥܵܘܟܼܵܐ ܩܲܠܝܼܠܘܼܬܹܗ ܒܡܸܬܼܚܵܐ ܕܥܲܠ ܟܠ ܀ 147 :ܘܐܸܢܗܘ̤ ܕܫܸܡܫܵܐ ܥܒܼܵ̈݁ܕܼܵܐ ܥܒܼܝܼܕܼܵܐ ܬܡܝܼܗ ܬܘܼܩܵܢܹܗ 148 ܡܲܢ ܠܵܐ ܢܸܬܼܡܲܗ ܒܚܹܝܠ ܥܵܒܲܘܿܕܼܵܐ ܕܠܵܐ ܡܸܣܬܲܝܲܟ ܀ 149 :ܠܵܐ ܡܸܣܬܿܝܲܟ ܣܵܟܹܗ ܒܣܵܟܼܵܐ ܕܡܸܣܬܲܝܟܼܵܢܹ̈ܐ 150 ܘܠܵܐ ܡܸܬܿܕܲܪܟܵܐ ܒܥܵܬܼܵܐ ܕܲܥܠܵܘܗܝ ܡ̣ܢ ܒܲܥܵܝܹ̈ܐ ܀ 151 :ܘܐܸܢ ܐܝܼܬܼ ܕܒܼܵܥܹ̇ܐ ܕܢܲܒܲܥ ܡܸܠܹ݁̈ܐ ܕܲܗ̈ܦܵܟܼܵܬܼܵܐ 152 ܢܲܒܲܥ ܡ̇ܕܹܝܢ ܘܲܢܚܵܘܸܐ ܠܲܢ ܗܵܠܹܝܢ ܕܝܼܠܲܢ ܀ 153 :ܢܚܵܘܸܐ ܕܐܲܝܟܲܢ ܫܲܪܝܵܐ ܢܲܦܫܵܐ ܒܓܼܵܘ ܗܲܕܵܡܹ̈ܐ 154 ܘܟܲܣܝܵܐ ܡ̣ܢ ܟܠ ܘܲܓܼܠܸܐ ܚܲܝܠܵܐ ܕܣܵܥܘܿܪܘܼܬܼܵܗ̇ ܀ 155 :ܐܲܝܟܲܢ ܩܲܢܝܵܐ ܐܵܦ ܗܝ̤ ܚܲܝܠܹ̈ܐ ܬܪܹܝܢ ܒܲܟܼܝܵܢܵܗ̇ 156 ܘܐܝܼܬܲܝܗܘܿܢ ܒܵܗ̇ ܘܲܠܒܲܪ ܡܸܢܵܗ̇ ܕܠܵܐ ܦܘܼܪܫܵܢܵܐ ܀ 157 :ܐܲܝܟܲܢ ܪܵܗܹ̇ܝܛ ܚܹܝܠ ܚܲܝܘܼܬܼܵܗ̇ ܒܟܼܠܗܘܿܢ ܪܸ̈ܓܼܫܹܐ 158 ܘܠܵܐ ܡܸܬܼܥܵܘܟܼܵܐ ܩܲܠܝܼܠܘܼܬܼܵܗ̇ ܒܓܼܘܼܫܡܹ̈ܐ ܥܒܲܝ̈ܵܐ ܀ 159 :ܐܲܝܟܲܢ ܚܵܙ̇ܩܵܐ ܡܸܠܬܼܵܐ ܕܡܸܢܵܗ̇ ܠܒܲܪ ܡ̣ܢ ܦܲܓܼܪܵܐ 160 ܘܠܵܐ ܡܸܬܼܪܲܚܩܵܐ ܠܵܐ ܡ̣ܢ ܨܹܐܕܹܝܗ̇ ܘܠܵܐ ܡ̣ܢ ܨܹܝܕܼ ܟܠ ܀ 161 :ܐܲܝܟܲܢ ܒܵܗ̇ ܗ̄ܝܼ ܘܲܠܒܲܪ ܡܸܢܵܗ̇ ܒܥܵܬܼܵܐ ܟܠܵܗ̇ 162 ܘܲܟܼܡܵܐ ܕܢܸܒܼܥܸܐ ܠܵܐ ܡܸܬܿܕܲܪܟܵܐ ܒܨܵܬܼܵܐ ܕܲܥܠܹܝܗ̇ ܀ 163 :ܡܲܢ̣ܘܼ ܡ̣ܢ ܡܬܼܘܿܡ ܚܙ̣ܵܗ̇ ܒܲܚܙܵܬܼܵܐ ܕܪܸ̈ܓܼܫܹܐ ܕܲܠܒܲܪ 164 ܘܡܲܢ̣ܘܼ ܠܲܒܼ݂ܵܟܵܗ̇ ܘܐܸܬܼܒܲܩܝܼ ܒܵܗ̇ ܒܥܲܝܢܲܝ̈ ܒܸܣܪܵܐ ܀ 165 :ܘܐܸܢܗܘ̤ ܕܐܝܼܬܼ ܒܲܢ ܡܸܕܹܿܡ ܕܲܥܣܸܩ ܡ̣ܢ ܒܘܼܚܪܵܢܲܢ 166 ܠܡܵܢ ܠܵܐܹ̇ܝܢ ܠܡܸܒܼܥܵܐ ܒܥܵܬܼܵܐ ܕܠܵܐ ܡܸܬܼܒܲܥܝܵܐ ܀ 167 :ܠܵܐ ܡܸܬܼܒܲܥܝܵܐ ܒܥܵܬܼܵܐ ܟܣܝܼܬܼܵܐ ܕܥܲܠ ܐܝܼܬܼܘܼܬܼܵܐ 168 ܕܐܵܦܸܢ ܒܵܥܹ̇ܐ ܐܲܝܢܵܐ ܕܒܼܵܥܹ̇ܐ ܡܸܛܥܵܐ ܛܵܥܹ̇ܐ ܀ pb. 173 169 :ܒܗܲܝܡܵܢܘܼܬܼܵܐ ܒܲܠܚܘܿܕܼ ܢܸܒܼܥܸܐ ܐܲܝܟ ܕܲܢܗܲܝܡܸܢ 170 ܟܲܕܼ ܐܵܦ ܗܵܕܹܐ ܠܵܘ ܒܲܒܼܥܵܬܼܵܐ ܐܸܠܵܐ ܒܚܘܼܒܵܐ ܀ 171 :ܒܚܘܼܒܵܐ ܡܲܨܝܵܐ ܗ̄ܝܼ ܕܢܸܒܼܥܸܐ ܒܥܵܬܼܵܐ ܕܲܟܼܝܵܢ ܟܲܣܝܵܐ 172 ܕܐܲܝܟܲܢ ܐܝܼܬܼܵܘܗܝ ܘܐܝܼܬܼܒܹܗ ܒܢܘܿܡܹ̈ܐ ܠܬܵܬܼܵܐ ܕܲܫܘܹܝܢ ܀ 173 :ܕܐܝܼܬܼܵܘܗܝ ܐܲܒܼܵܐ ܫܲܦܝܼܪ ܒܵܥܹ̇ܐ ܐܲܝܢܵܐ ܕܒܼܵܥܹ̇ܐ 174 ܘܐܝܼܬܼܠܹܗ ܝܲܠܕܵܐ ܘܪܘܼܚܵܐ ܕܡܸܢܹܗ ܦܲܐܝܵܐ ܕܢܵܘܕܹܿܐ ܀ 175 :ܦܸܠܹܐ ܠܲܥܒܼܝܼܕܹ̈ܐ ܕܢܵܘܕܿܘܿܢ ܟܠܫܵܥ ܠܚܹܝܠ ܥܵܒܼ̇ܘܿܕܼܵܐ 176 ܕܟܲܕܼ ܠܲܝܬܿ ܐܸܢܘܿܢ ܬܲܩܸܢ ܐܸܢܘܿܢ ܡ̣ܢ ܠܵܐ ܡܸܕܹܿܡ ܀ 177 :ܠܲܝܬܿ ܗ̄ܘ̣ܵܐ ܡܸܕܹܿܡ ܟܲܕܼ ܬܲܩܸܢ ܟܠ ܡ̣ܢ ܠܵܐ ܡܸܕܹܿܡ 178 ܘܕܲܨܒܼܵܐ ܒܚܘܼܒܹܿܗ ܗܘ̤ܵܐ ܟܠ ܡܸܕܹܿܡ ܡ̣ܢ ܠܵܐ ܡܸܕܹܿܡ ܀ 179 :ܗܘ̤ ܒܲܠܚܘܿܕܼܵܘܗܝ ܐܝܼܬܼ ܗ̄ܘ̣ܵܐ ܩܕܼܵܡ ܟܠ ܘܲܠܗܲܠ ܡ̣ܢ ܟܠ 180 ܘܟܲܕܼ ܫܸܦܪܲܬ̤ ܠܹܗ ܗܘ̤ܵܐ ܠܹܗ ܡܸܕܸܿܡ ܡܸܕܹܿܡ ܪܲܒܵܐ ܀ 181 :ܥܲܡ ܐܝܼܬܼܘܼܬܹܗ ܐܝܼܬܼܿܝܗܹܝܢ ܗ̣̄ܘܲܝ̈ ܗܵܠܹܝܢ ܕܲܗ̤ܘܲܝ̈ 182 ܠܵܘ ܒܲܟܼܝܵܢܵܐ ܐܸܠܵܐ ܒܚܘܼܒܵܐ ܪ̈ܫܝܼܡܵܢ ܗ̣̄ܘܲܝ̈ ܒܹܗ ܀ 183 :ܒܹܗ ܨܝܼܪܝܼܢ ܗ̄ܘ̣ܵܘ ܥܸܵܠܡܹ̈ܐ ܕܲܗܘ̤ܵܘ ܒܵܬܲܪ ܙܲܒܼܢܵܐ 184 ܘܲܡܢܹܝܢ ܗ̄ܘ̣ܵܘ ܠܹܗ ܕܲܟܼܡܵܐ ܘܐܲܝܟܲܢ ܘܐܸܡܲܬܼܝ ܗܵܘ̈ܝܵܢ ܀ 185 :ܠܵܘ ܚܲܕܼܬܼܵܐܝܼܬܼ ܪܢܵܐ ܗ̄ܘ̣ܵܐ ܕܢܲܬܼܩܸܢ ܒܵܬܲܪ ܙܲܒܼܢܵܐ 186 ܘܠܵܐ ܗ̄ܘ̣ܵܐ ܒܙܲܒܼܢܵܐ ܚܵܪ̣ ܒܹܗ ܒܙܲܒܼܢܵܐ ܘܐܲܟܸܿܢ ܥܲܒܼ݂ܕܹܿܗ ܀ 187 :ܛܲܟܼܣܵܐ ܥܒ݂ܲܕ ܠܹܗ ܠܲܥܒܼܵܕܼ ܐܝܼܕܼܵܘ̈ܗܝ ܕܐܸܡܲܬܼܝ ܢܸܗܘ̤ܵܐ 188 ܟܲܕܼ ܡ̣ܢ ܨܹܐܕܼܵܘܗܝ ܥܒܼܝܼܕܼ ܗ̄ܘ̣ܵܐ ܘܲܓܼܡܝܼܪ ܥܲܕܼܠܵܐ ܢܸܗܘܸܐ ܀ 189 :ܡ̣ܢ ܫܘܼܪܵܝܵܐ ܕܠܵܐ ܫܘܼܪܵܝܵܐ ܣܝܼܡܵܐ ܗ̣̄ܘܵܬܼ ܠܹܗ 190 ܕܢܸܓܼܠܸܐ ܚܲܝܠܵܐ ܕܥܵܒܼ̇ܘܿܕܼܘܼܬܹܗ ܒܲܥܒܼܵܕܼ ܐܝܼܕܼܵܘ̈ܗܝ ܀ 191 :ܚܲܟܿܝܼܡܵܐܝܼܬܼ ܥܒ݂ܲܕܼ ܟܠ ܕܲܥܒ݂ܲܕܼ ܚܲܟܿܝܼܡ ܟܠܵܐ 192 ܘܠܵܐ ܐ̄ܢܵܫ ܝܵ̇ܕܲܥ ܠܡܸܬܼܒܲܩܵܝܘܼ ܒܚܹܝܠ ܚܸܟܼܡܵܬܹ̈ܐ ܀ 193 :ܚܘܼܒܵܢܵܐܝܼܬܼ ܚܵܘܝܼ ܚܘܼܒܹܿܗ ܢܸܒܼܥܵܐ ܕܚܘܼܒܵܐ 194 ܘܠܲܝܬܿ ܒܲܥܒܼܝܼܕܹ̈ܐ ܕܲܡܨܸܐ ܠܡܸܦ̇ܪܲܥ ܚܵܘܒܲܬܼ ܚܘܼܒܹܿܗ ܀ 195 :ܐܘܼܡܵܢܵܐܝܼܬܼ ܬܲܩܢܹܗ ܠܥܵܠܡܵܐ ܡܠܸܐ ܝܼܕܲܥܬܼܵܐ 196 ܘܠܲܝܬܿ ܠܸܫܵܢܵܐ ܕܣܵܦܹ̇ܩ ܢܸܬܼܢܹܝܗ̇ ܠܐܘܼܡ̇ܢܘܼܬܹܗ ܀ 197 :ܬܲܗܪܵܐ ܪܲܒܵܐ ܡܠܸܐ ܫܘܼܪܵܝܵܐ ܕܥܵܒܼܘܿܕܼܘܼܬܹܗ 198 ܘܲܙܥܘܿܪ ܥܵܠܡܵܐ ܕܲܢܚܘܼܪ ܫܲܦܝܼܪ ܘܢܸܬܼܩܸܐ ܒܹܗ ܀ 199 :ܘܐܸܠܘܼ ܐܝܼܬܼ ܗ̄ܘ̣ܵܘ ܥܵܠܡܹ̈ܐ ܥܦܝܼܦܹ̈ܐ ܐܵܠܹܦ ܐܲܠܦܝܼ̈ܢ 200 ܙܥܘܿܪܝܼܢ ܗ̄ܘ̣ܵܘ ܛܵܒܼ ܠܡܸܚܙܵܐ ܒܪܝܼܬܼܵܐ ܟܲܕܼ ܡܸܬܿܬܲܩܢܵܐ ܀ 201 :ܐܸܠܘܼ ܒܪܹܝܢ ܗ̄ܘ̣ܵܬܘ ܟܸܢܫܲܝ̈ ܪܵܘܡ̇ܐ ܩܕܼܵܡ ܬܘܼܩܵܢܵܗ̇ 202 ܡܸܬܼܒܲܠܗܹܝܢ ܗ̄ܘ̣ܵܘ ܟܲܕܼ ܬܵܩܢܵܐ ܗ̄ܘ̣ܵܬܼ ܡ̣ܢ ܠܵܐ ܡܸܕܹܿܡ ܀ 203 :ܐܸܠܵܘܼ ܡܦܵܣܝܼܢ ܕܐܲܝܟܲܢ ܡܸܢܫܹܠܝ ܗܘ̤ܵܐ ܟܠ ܡܸܕܹܿܡ 204 ܡ̇ܘܦܸܐ ܗ̄ܘ̣ܵܐ ܠܹܗ ܚܲܝܠܵܐ ܕܲܒܼܗܘܿܢ ܠܡܸܬܿܕܲܡ̇ܪܘܼ ܀ 205 :ܟܡܵܐ ܟܲܝ ܗܵܘܹ̇ܐ ܗܵܘ̇ ܦܘܼܩܕܵܢܵܐ ܕܲܦܩ݂ܲܕܼ ܘܲܗܘ̤ܵܘ 206 ܘܠܵܐ ܐܸܬܼܥܵܘܟܲܬ̤ ܩܲܠܝܼܠܘܼܬܹܗ ܒܡܸܬܼܚܵܐ ܪܲܒܵܐ ܀ pb. 174 207 :ܐܲܝܟܲܢ ܟܲܝ ܩܵܡ̣ܘ ܫܡܲܝܵܐ ܘܐܲܪܥܵܐ ܡ̣ܢ ܠܵܐ ܡܸܕܹܿܡ 208 ܘܐܲܝܟܲܢ ܡܸܫܟܲܝ ܗܵܘ̇ ܠܵܐ ܡܸܕܹܿܡ ܠܡܸܛܥܲܢ ܡܸܕܹܿܡ ܀ 209 :ܠܵܘ ܠܵܐ ܡܸܕܹܿܡ ܛܲܥ̣ܢܹܗ ܠܝܘܼܩܪܵܐ ܕܗܵܘ̇ ܡ̇ܐ ܕܲܗܘ̤ܵܐ 210 ܐܸܠܵܐ ܪܸܡܙܵܐ ܕܗܵܘ̇ ܦܘܼܩܕܵܢܵܐ ܕܲܦܩ݂ܲܕܼ ܘܲܗܘ̤ܵܐ ܀ 211 :ܦܩ݂ܲܕܼ ܡ̣ܢ ܫܸܠܝܵܐ ܪܸܡܙܵܐ ܟܲܣܝܵܐ ܕܫܲܠܝܼܛ ܥܲܠ ܟܠ 212 ܘܩܵܡ̣ ܟܠܡܸܕܸܿܡ ܥܲܠ ܠܵܐ ܡܸܕܹܿܡ ܟܲܕܼ ܠܲܝܬܿ ܡܸܕܹܿܡ ܀ 213 :ܡ̣ܬܲܚ ܠܲܫܡܲܝܵܐ ܒܲܕܼܡܘܼܬܼ ܢܲܚܬܵܐ ܠܥܸܠ ܡ̣ܢ ܟܠܵܐ 214 ܘܲܪܩܲܥ̣ ܠܐܲܪܥܵܐ ܐܲܝܟ ܫܲܢܼܐܸܣܬܼܵܐ ܬܚܹܝܬܼ ܟܠ ܡܸܕܹܿܡ ܀ 215 :ܥܒ݂ܲܕܼ ܪܲܘܼܚܵܢܹܐ ܩܲܢܝܲܝ̈ ܚܲܝܠܵܐ ܕܠܵܐ ܡܸܢܝܵܢܵܐ 216 ܘܲܡ̣ܢܵܐ ܐܸܢܘܿܢ ܟܲܕܼ ܛܵܒܼ ܥܲܣܩܵܐ ܠܡܸܡܢܵܐ ܐܸܢܘܿܢ ܀ 217 :ܪܡ݂ܲܙ ܘܐܸܬܿܬܲܩܲܢ ܟܸܢܫܑܵܐ ܕܐܵܐܲܪ ܩܲܠܝܼܠ ܓܸܦܹ̈ܿܐ 218 ܘܲܦܪ݂ܲܚ ܡܸܢܫܹܠܝ ܘܐܸܚܲܕܼ ܢܘܼܡܹܐ ܒܐܲܒܲܥ ܦܸܢ̈ܝܵܢ ܀ 219 :ܐܲܪܕܿܝܼ ܡܲܝ̈ܵܐ ܐܲܣܝܼܦ ܢܘܼܪܵܐ ܦܪ݂ܲܣ ܚܸܫܘܿܟܼܵܐ 220 ܘܟܲܣܝܹܗ ܠܥܲܡܠܹܗ ܒܫܵܥܹ̈ܐ ܕܠܸܠܝܵܐ ܐܲܝܟ ܕܲܒܼܢܲܚܬܵܐ ܀ 221 :ܒܢܲܚܬܵܐ ܕܚܸܫܟܵܐ ܟܲܣܝܵܗ̇ ܠܐܲܪܥܵܐ ܒܪܵܫܝܼܬܼ ܕܲܗܘ̤ܵܬܼ 222 ܐܲܝܟ ܨܲܝܵܪܵܐ ܕܨܵܐܲܪ ܨܲܠܡܵܐ ܘܟܸܢ ܓܵܠܹ̇ܐ ܠܹܗ ܀ 223 :ܒܥܸܕܵܢ ܪܲܡܫܵܐ ܨܵܪܹܗ ܠܥܵܠܡܵܐ ܡܲܪܹܗ ܕܥܵܠܡܵܐ 224 ܒܥܸܕܵܢ ܨܲܦܪܵܐ ܓܠ̣ܵܐ ܬܲܚܦܝܼܬܼܵܐ ܕܲܠܥܸܠ ܡܸܢܹܗ ܀ 225 :ܒܲܕܼܡܘܼܬܼ ܨܲܠܡܵܐ ܪܲܟܸܿܒܼ ܘܲܥܒ݂ܲܕܼ ܫܡܲܝܵܐ ܘܐܲܪܥܵܐ 226 ܘܲܩ̣ܪܵܐ ܫܡܠܝܼܠܹ̈ܐ ܕܢܹܐܬܼܘܿܢ ܢܸܚܙܘܿܢ ܦܲܐܝܘܼܬܼ ܫܘܼܦܪܹܗ ܀ 227 :ܟܠܹܗ ܠܸܠܝܵܐ ܟܲܣܝܹܗ ܠܫܘܼܦܪܵܐ ܕܐܘܼܡ̇ܢܘܼܬܹܗ 228 ܘܠܵܐ ܨܒܼܵܐ ܕܢܸܓܼܠܸܐ ܕܐܲܝܟܲܢ ܐܸܡ݂ܲܪ ܘܩܵܡ̣ ܟܠ ܡܸܕܹܿܡ ܀ 229 :ܫܸܠܝܵܐ ܪܲܒܵܐ ܪܡܸܐ ܗ̄ܘ̣ܵܐ ܥܲܠ ܟܠ ܟܲܕܼ ܬܲܩܸܢ ܟܠ 230 ܘܲܒܼܗܝܼܠܝܼܢ ܗ̄ܘ̣ܵܘ ܟܝܵܢܹ̈ܐ ܡܠܝܼܠܹ̈ܐ ܐܵܦ ܫܲܬܿܝܼܩܹ̈ܐ ܀ 231 :ܬܲܪܬܹܿܝܢ ܘܲܥܣܲܪ ܫܵܥܹ̈ܐ ܐܲܓܲܪ ܫܸܠܝܵܐ ܥܲܠ ܟܠ 232 ܘܡ̇ܐ ܕܐܸܫܬܲܠܲܡ ܐܲܫܡܲܥ ܩܵܠܵܐ ܕܢܸܗܘܸܐ ܢܘܼܗܪܵܐ ܀ 233 :ܩܵܠܵܐ ܚܲܕܼܬܼܵܐ ܩ̣ܥܵܐ ܒܲܒܼܪܝܼܬܼܵܐ ܡ̇ܪܹܐ ܒܪܝܼܬܼܵܐ 234 ܘܙܵܥܹ̇ܘ ܣܸܕܼܪ̈ܲܝܗܘܿܢ ܕܲܫܡܲܝܵܢܹ̈ܐ ܒܪܲܒܿܘܼܬܼ ܩܵܠܹܗ ܀ 235 :ܐܲܝܟ ܫܝܼܦܘܿܪܵܐ ܐܲܙܥܸܩ ܩܵܠܹܗ ܒܓܼܵܘ ܥܵܡܲܪܬܵܐ 236 ܘܲܟܢܲܫ̣ܘ ܘܐܸܬܼܵܘ ܪ̈ܘܼܚܵܢܵܝܹܐ ܕܲܢܨܘܼܬܼܢܵܝܗܝ ܀ 237 :ܡܸܛܠܵܬܼܗܘܿܢ ܐܲܡܫܲܥ ܩܵܠܵܐ ܠܵܐ ܩܢܸܐ ܩܵܠܵܐ 238 ܕܢܲܠܸܦ ܐܸܢܘܿܢ ܕܪܸܡܙܹܗ ܬܲܩܸܢ ܠܗܘܿܢ ܘܲܠܟܼܠܵܐ ܀ 239 :ܒܝܲܕܼ ܒܲܪ̄ܒܼ ܩܵܠܵܐ ܚܲܟܸܿܡ ܐܸܢܘܿܢ ܠܩܲܢܝܲܝ̈ ܡܸܠܬܼܵܐ 240 ܕܢܸܗܘܘܿܢ ܝܵ̇ܕܼܥܝܼܢ ܕܗܘ̤ ܬܲܩܸܢ ܟܠ ܡ̣ܢ ܠܵܐ ܡܸܕܹܿܡ ܀ pb. 175 241 :ܩܵܠܵܐ ܕܕܼܵܡܹ̇ܐ ܠܙܵܘܥܵܐ ܕܲܒܼܗܘܿܢ ܐܲܡܫܲܥ ܐܸܢܘܿܢ 242 ܘܐܲܥܝܼܪ ܐܸܢܘܿܢ ܠܡܸܬܼܒܲܩܵܝܘܼ ܒܬܼܘܼܩܵܢ ܢܘܼܗܪܵܐ ܀ 243 :ܐܲܝܟ ܕܲܒܼܫܸܢܬܼܵܐ ܛܲܒܿܝܼܥܝܼܢ ܗ̄ܘ̣ܵܘ ܠܸܠܝܵܐ ܟܠܹܗ 244 ܘܢܵܕܼܘ ܡ̣ܢ ܫܸܠܝܵܐ ܒܝܲܕܼ ܒܲܪ̄ܬܼ ܩܵܠܵܐ ܕܙܸܥܩܲܬ̤ ܒܐܲܪܥܵܐ ܀ 245 :ܬܸܡܗܵܐ ܪܲܒܵܐ ܪܡܸܐ ܗ̄ܘ̣ܵܐ ܥܠܲܝܗܘܿܢ ܩܕܼܵܡ ܗܵܢ ܩܵܠܵܐ 246 ܘܡܸܬܿܕܲܡܪܝܼܢ ܗ̄ܘ̣ܵܘ ܕܐܲܝܟܲܢ ܟܲܝ ܩܵܡ̣ܘ ܟܲܕܼ ܠܲܝܬܿ ܐܸܢܘܿܢ ܀ 247 :ܒܙܵܘܥܹ̈ܐ ܕܲܒܼܗܘܿܢ ܡܸܬܼܪܲܥܹܝܢ ܗ̄ܘ̣ܵܘ ܥܠܝܗܘܿܢ ܘܥܲܠ ܟܠ 248 ܕܡܲܢ ܟܲܝ ܨܲܒܸܿܬܼ ܗܘܵܝܵܐ ܕܝܼܠܗܘܿܢ ܘܲܕܼܟܼܠ ܡܸܕܸܿܡ ܀ 249 :ܪܲܒܵܐ ܗܘ̤ܵܐ ܠܗܘܿܢ ܩܵܠ ܒܵܪܘܿܝܵܐ ܕܐܲܙܥܸܩ ܒܐܲܪܥܵܐ 250 ܘܐܲܠܸܦ ܐܸܢܘܿܢ ܣܸܦܪܵܐ ܚܲܕܼܬܼܵܐ ܕܠܵܐ ܝܵ̇ܕܲܥܝܼܢ ܗ̄ܘ̣ܵܘ ܀ 251 :ܐܲܝܟ ܕܲܠܫܲܒܼܪܹ̈ܐ ܟܬ݂ܲܒܼ ܒܲܪ̄ܬܼ ܩܵܠܵܐ ܚܠܵܦ ܐܵܬܼ̈ܘܵܬܼܵܐ 252 ܘܐܲܗܓܿܝܼ ܐܸܢܘܿܢ ܒܲܟܼܬܼܝܼ̈ܒܼܵܬܼܵܐ ܕܲܗܘܵܝ ܢܘܼܗܪܵܐ ܀ 253 :ܒܲܕܼܡܘܼܬܼ ܚܘܼܩܵܐ ܬܲܪܨܹܗ ܠܵܩܵܠܵܐ ܩܕܼܵܡ ܥܲܝܢܲܝ̈ܗܘܿܢ 254 ܘܫܲܪܝܼܘ ܩܵܥܹ̇ܝܢ ܒܪܝܼܟ ܒܵܪܘܿܝܵܐ ܕܲܒܼܪ̣ܵܐ ܢܘܼܗܪܵܐ ܀ 255 :ܢܸܗܘܸܐ ܢܘܼܗܪܵܐ ܩܥ̣ܵܐ ܗܵܘ̇ ܩܵܠܵܐ ܠܵܐ ܩܢܸܐ ܩܵܠܵܐ 256 ܘܢܸܦܩܲܬ̤ ܡܸܠܬܼܵܐ ܠܘܵܬܼ ܣܘܼܥܪܵܢܵܐ ܕܠܵܐ ܬܘܼܗܵܝܵܐ ܀ 257 :ܕܢܲܚ̣ ܡ̣ܢ ܫܸܠܝܵܐ ܢܘܼܗܪܵܐ ܦܲܐܝܵܐ ܡ̣ܢ ܠܵܐ ܡܸܕܸܿܡ 258 ܘܪܲܕܼܦܹܗ ܠܚܸܫܟܵܐ ܐܲܝܟ ܓܲܢ̄ܒܵܪܵܐ ܠܲܕܼܫܝܼܛ ܡܸܢܹܗ ܀ 259 :ܥܪ݂ܲܩ ܚܸܫܘܿܟܼܵܐ ܘܲܛܫ̣ܵܐ ܒܥܸܩܬܢܹ̈ܐ ܕܣܵܘܦܹ̈ܝܗ̇ ܕܐܲܪܥܵܐ 260 ܘܲܬܼܗܲܪܘ ܥܝܼܪܹ̈ܐ ܒܪܲܒܿܘܼܬܼ ܚܲܝܠܵܐ ܕܝܲܗ̣̄ܒܼ ܒܹܗ ܚܲܝܠܵܐ ܀ 261 :ܬܗܲܪܘ ܗ̄ܘ̣ܵܘ ܠܵܘ ܒܹܗ ܐܸܠܵܐ ܒܚܲܝܠܵܐ ܢܘܼܗܪܹܗ 262 ܕܐܲܝܟܲܢ ܚ݂ܲܣܢܹܗ ܠܚܸܫܟܵܐ ܘܛܲܪܕܹܿܗ ܩܲܠܝܼܠܵܐܝܼܬܼ ܀ 263 :ܩܲܠܝܼܠܵܐܝܼܬܼ ܥܪ݂ܲܩ ܚܸܫܘܿܟܼܵܐ ܡ̣ܢ ܥܵܡܲܪܬܵܐ 264 ܘܩܲܠܝܼܠܐܝܼܬܼ ܥܲܠ̣ ܢܲܗܝܼܪܵܐ ܘܐܲܡܠܸܟ ܒܐܲܪܥܵܐ ܀ 265 :ܒܲܕܼܡܘܼܬܼ ܚܲܬܼܢܵܐ ܓܢ̣ܵܐ ܒܲܓܼܢܘܿܢܵܐ ܕܪܵܘܡ̇ܐ ܘܥܘܼܡܩܵܐ 266 ܘܐܲܢܗܲܪ ܥܵܠܡܵܐ ܒܓܼܵܘܢܵܐ ܦܲܐܝܵܐ ܕܢܲܗܝܼܪܘܼܬܹܗ ܀ 267 :ܟܸܢܫܝܼ̈ܢ ܟܸܢܫܝܼ̈ܢ ܩܵܡ̣ܘ ܪ̈ܘܼܚܵܢܹܐ ܠܡܸܚܙܵܐ ܫܘܼܦܪܹܗ 268 ܘܠܵܐ ܣܵܒܹ̇ܥܝܼܢ ܗ̄ܘܼܵܘ ܠܲܡܩܲܠܵܣܘܼ ܠܲܡܬܿܩܢܵܢܹܗ ܀ 269 :ܗܲܢܝܼܠܵܐ ܗ̄ܘ̣ܵܬܼ ܚܙܵܬܼܵܐ ܕܢܘܼܗܪܹܗ ܠܪܸ̈ܥܝܵܢܲܝܗܘܿܢ 270 ܘܛܵܒܼ ܡ̣ܢ ܢܘܼܗܪܹܗ ܗܲܢܝܼ ܗ̄ܘ̣ܵܐ ܠܗܘܿܢ ܪܸܡܙܵܐ ܕܥܲܒܼܕܹܿܗ ܀ 271 :ܡܸܬܼܒܲܩܹܝܢ ܗ̄ܘ̣ܵܘ ܕܠܵܐ ܣܲܒܼܥܘܼܬܼܵܐ ܒܦܲܐܝܘܼܬܼ ܫܘܼܦܪܹܗ 272 ܕܐܵܦ ܗܘ̤ ܥܲܡܗܘܿܢ ܡܫܲܒܲܚ ܗ̄ܘ̣ܵܐ ܠܗܘܿܢ ܠܲܒܥܼܵܕܼ ܐܝܼܕܼܵܘ̈ܗܝ ܀ 273 :ܒܪ̣ܵܝܗܝ ܐܲܝܟ ܕܲܒܼܪܵܝܗܝ ܡ̣ܢ ܠܵܐ ܡܸܕܹܿܡ ܐܲܝܟ ܕܲܫܦ݂ܲܪ ܠܹܗ 274 ܘܲܦܢ̣ܵܐ ܘܫܲܒܲܚ ܘܠܵܘ ܕܲܢܫܲܒܲܚ ܐܸܠܵܐ ܕܢܲܠܸܦ ܀ 275 :ܠܝܘܼܠܦܵܢ ܟܸܢܫܹ̈ܐ ܕܲܫܡܲܝܵܢܹ̈ܐ ܫܲܒܿܚܹܗ ܠܢܘܼܗܪܵܐ 276 ܕܐܸܢܗܘ̤ ܫܲܒܲܚ ܟܡܵܐ ܠܗܘܿܢ ܙܵܕܹܩ ܠܲܡܫܲܒܵܚܘܼ ܀ pb. 176 277 :ܫܲܒܲܚܘ ܘܲܬܼܗܲܪܘ ܘܩܲܠܸܣܘ ܘܐܵܘܪܸܒܼܘ ܠܲܡܬܲܩܢܵܢܹܗ 278 ܘܐܵܘܕܿܝܼܘ ܘܲܣܓܸܕܼܘ ܘܗܲܝܡܸܢܘ ܘܐܲܫܲܪܘ ܠܚܹܝܠ ܐܝܼܬܼܘܼܬܼܵܐ ܀ 279 :ܚܹܝܠ ܐܝܼܬܼܘܼܬܼܵܐ ܝ̄ܠܸܦܘ ܪ̈ܘܼܚܵܢܹܐ ܒܝܲܕܼ ܢܲܗܝܼܪܹ̈ܐ 280 ܘܫܲܠܸܡ̣ܘ ܟܠܗܘܿܢ ܕܡ̣ܢ ܚܲܕܼ ܚܲܝܠܵܐ ܗܘ̤ܵܐ ܟܠܡܸܕܹܿܡ ܀ 281 :ܡܬ̣ܿܚ ܫܘܼܠܛܵܢܹܗ ܕܢܘܼܗܪܵܐ ܫܵܥܹ̈ܐ ܬܲܪܬܹܿܝܢ ܘܲܥܣܲܪ 282 ܘܲܦܢ̣ܵܐ ܚܸܫܟܵܐ ܕܢܹܐܬܸܐ ܢܸܥܘܿܠ ܠܟܲܪ ܕܐܝܼܬܼܵܘܗܝ ܗ̄ܘ̣ܵܐ ܀ 283 :ܬܗܲܪܘ ܪ̈ܘܼܚܵܢܹܐ ܒܥܸܕܵܢ ܪܲܡܫܵܐ ܐܲܝܟ ܕܲܒܲܨܲܦܪܵܐ 284 ܕܐܲܝܟܲܢ ܫܲܢܝܼ ܢܘܼܗܪܵܐ ܒܛܲܟܼܣܵܐ ܕܫܲܢܝܼ ܚܸܫܟܵܐ ܀ 285 :ܚܙܵܬܼܵܐ ܕܬܲܗܪܵܐ ܚܙ̣ܵܘ ܚܲܙܝܹ̈ܐ ܕܲܬܼܗܝܼܪܵܐ ܗ̄ܘ̣ܵܬܼ 286 ܟܝܵܢܹ̈ܐ ܚܲܪ݁ܫܹܐ ܕܢܵ݁ܛܪܝܼܢ ܛܲܟܼܣܵܐ ܐܲܝܟ ܡܲܠܵܠܹ̈ܐ ܀ 287 :ܒܚܸܫܟܵܐ ܘܢܘܼܗܪܵܐ ܡܸܢܬܼܒܲܩܹܝܢ ܗ̄ܘ̣ܵܘ ܒܚܹܝܠ ܒܵܪܘܿܝܵܐ 288 ܕܲܟܼܡܵܐ ܚܲܟܿܝܼܡ ܠܲܡܛܲܟܵܣܘܼ ܠܲܒܥܼܵܕܼ ܐܝܼܕܵܘ̈ܗܝ ܀ 289 :ܛܲܟܼܣܵܐ ܪܲܒܵܐ ܩܵܢܵܘ̣ ܐܵܦ ܗܸܢܘ̣ܿܢ ܒܝܲܕܼ ܫܲܬܿܝܼܩܹ̈ܐ 290 ܘܟܲܦ̣ܘ ܨܵܘܪ̈ܲܝܗܘܿܢ ܠܡܸܛܥܲܢ ܢܝܼܪܵܐ ܕܫܸܡ ܒܵܪܘܿܝܵܐ ܀ 291 :ܫܠܸ̣ܩ ܚܲܕܼ ܝܵܘܡ̇ܐ ܠܹܠܲܝ ܐܝܼܡܵܩ ܒܚܸܫܟܵܐ ܘܢܘܼܗܪܵܐ 292 ܘܐܲܙܥܸܩ ܡܸܢܫܹܠܝ ܩܵܠܵܐ ܕܕܼܵܡܹ̇ܐ ܠܗܵܘ̇ ܩܲܕܼܡ̇ܝܵܐ ܀ 293 :ܐܲܝܟ ܐܝܼܙܓܲܕܵܐ ܢܦ݂ܲܩ ܦܘܼܩܕܵܢܵܐ ܡ̣ܢ ܨܹܝܕܼ ܟܲܣܝܵܐ 294 ܕܢܸܗܘܸܐ ܪܩܝܼܥܵܐ ܫܡܲܝܵܐ ܕܕܼܵܡܹ̇ܐ ܠܗܵܘ̇ ܩܲܕܼܡ̇ܝܵܐ ܀ 295 :ܗܘ̤ܵܬܼ ܒܲܥܒܼܵܕܼܵܐ ܘܲܗܘ̤ܵܐ ܪܩܝܼܥܵܐ ܡܸܨܥܲܬܼ ܡܲܝ̈ܵܐ 296 ܘܩܵܡ̣ ܒܲܡܨܲܥܬܼܵܐ ܐܲܝܟ ܬܲܛܠܝܼܠܵܐ ܠܥܸܠ ܡ̣ܢ ܐܲܪܥܵܐ ܀ 297 :ܡ̣ܢ ܐܸܣܛܘܼܟܼܣܵܐ ܕܡܲܝ̈ܵܐ ܬܲܩܢܹܗ ܘܥܲܒܼ݂ܕܹܿܗ ܩܲܫܝܵܐ 298 ܕܢܸܗܘܸܐ ܣܵܦܹ̇ܩ ܠܡܸܛܥܲܢ ܡܲܝ̈ܵܐ ܠܥܸܠ ܡ̣ܢ ܚܲܨܹܗ ܀ 299 [Lacuna] 300 ܘܦܵܫ̣ ܥܲܠ ܐܲܪܥܵܐ ܡܢܵܬܼܵܐ ܕܫܲܘܝܵܐ ܥܲܡ ܗܵܝ̇ ܕܲܠܥܸܠ ܀ 301 :ܬܲܗܪܵܐ ܪܲܒܵܐ ܚܙ̣ܵܘ ܐܵܦ ܗܵܪܟܵܐ ܪ̈ܘܼܚܵܢܵܝܹܐ 302 ܢܲܚܬܵܐ ܕܡܲܝ̈ܵܐ ܕܲܛܥܝܼܢ ܡܲܝ̈ܵܐ ܘܲܪܗܝܼܒܼ ܣܵܠܹ̇ܩ ܀ 303 :ܬܡܲܪܘ ܘܐܸܬܿܕܲܡܲܝܪܘ ܒܐܘܼܡ̇ܢܘܼܬܼܵܐ ܕܪܸܡܙܵܐ ܕܪܲܩܥܹ̣ܗ 304 ܕܐܲܝܟܲܢ ܡܲܬܼܚܹܗ ܥܲܐ ܦܸܢ̈ܝܵܢ ܩܲܠܝܼܠܵܐܝܼܬܼ ܀ 305 :ܠܬܲܗܪܵܐ ܫܘܹ̇ܐ ܘܚܲܟܿܝܼܡܵܐܝܼܬܼ ܬܲܗܝܼܪܝܼܢ ܗ̄ܘ̣ܵܘ 306 ܕܐܲܝܟܲܢ ܩܲܫܝܼ ܠܡܲܝ̈ܵܐ ܪ̈ܦܲܝܵܐ ܘܲܛܥ݂ܲܢܘ ܡܲܝ̈ܵܐ ܀ 307 :ܠܬܲܚܬܿ ܟܲܝ ܡܲܬ̣ܚܹܗ ܒܐܲܦܲܝ̈ ܐܲܪܥܵܐ ܘܟܸܢ ܐܲܪܝܼܡܹܗ 308 ܡ̇ܕܹܝܢ ܥܲܡܹܗ ܣܠܸܩ̣ܘ ܡܲܠܲܐܟܹ̈ܐ ܘܢܘܼܗܪܵܐ ܘܐܵܐܲܪ ܀ 309 :ܘܐܸܢ ܡ̣ܢ ܣܵܘܦܹ̈ܐ ܐܝܼܬܼܘܗܝ ܐܲܟܼܡܵܐ ܕܐܝܼܐܬܼܵܘܗܝ 310 ܠܵܐ ܦܵܫ̣ ܡܸܕܹܿܡ ܕܠܵܐ ܠܓܼܵܘ ܡܸܢܹܗ ܚܲܒܼ݂ܫܹܗ ܒܪܵܘܡ̇ܐ ܀ 311 :ܘܐܸܠܵܐ ܐܲܝܟܲܢ ܡܸܬܼܥܲܠܸܐ ܗ̄ܘ̣ܵܐ ܡ̇ܐܢܵܐ ܩܲܫܝܵܐ 312 ܘܥܵܒܼ̇ܪܝܼܢ ܗ̄ܘ̣ܵܘ ܒܹܗ ܟܝܵܢܹ̈ܐ ܥܒܲܝܵ̈ܐ ܘܠܵܘ ܡܸܣܬܿܕܲܩ ܀ pb. 177 313 :ܥܲܣܩܵܐ ܗ̄ܝܼ ܣܲܓܿܝܼ ܒܥܵܬܼܵܐ ܕܐܲܝܟܲܢ ܗܘ̤ܵܐ ܘܐܸܬܼܥܲܠܝܼ 314 ܘܐܸܠܵܐ ܪܸܡܙܵܐ ܕܐܸܡ݂ܲܪ ܘܲܗܘ̤ܵܐ ܠܵܐ ܝܵ̇ܕܲܥ ܠܵܗ̇ ܀ 315 :ܪܸܥܝܵܢܝ ܫܲܚܩ݂ܲܢܝ ܕܐܸܒܼܥܸܐ ܕܐܲܝܟܲܢ ܘܠܵܐ ܣܦ݂ܲܩ ܐܲܕܼܪܸܟ 316 ܘܬܼܘܼܒܼ ܫܵܚܹ̇ܩ ܠܝܼ ܕܲܟܼܒܲܪ ܡܲܨܝܵܐ ܕܐܲܕܼܪܸܟ ܡܸܕܹܿܡ ܀ 317 :ܠܦܘܼܬܼ ܚܘܼܫܵܒܹ̈ܐ ܪܢܹ̇ܝܬܼ ܐܲܝܟ ܕܲܡܨܸܐ ܥܒܼܝܼܕܼܵܐ ܠܡܸܪܢܵܐ 318 ܕܲܟܼܒܲܪ ܒܐܲܬܼܪܵܐ ܕܲܠܥܸܠ ܡܲܬܼܚܹܗ ܠܗܵܢܵܐ ܡ̇ܐܢܵܐ ܀ 319 :ܘܲܟܼܒܲܪ ܟܠܹܗ ܡܢܵܬܼܵܐ ܕܡܲܝ̈ܵܐ ܫܩ݂ܲܠ ܦܘܼܩܕܵܢܵܐ 320 ܘܡ̣ܢ ܕܐܲܪܝܼܡܹܗ ܩܲܫܝܼ ܪܸܡܙܹܗ ܘܲܛܥ݂ܲܢ ܗܘ̤ ܠܹܗ ܀ 321 :ܟܒܲܪ ܡ̇ܐ ܕܲܣܠܸ݂ܩ ܡܲܬܼܚܹܗ ܡܸܢܹܫܹܠܝ ܠܥܸܠ ܡ̣ܢ ܟܠܵܐ 322 ܘܦܵܫ̣ ܟܠܡܸܕܹܿܡ ܠܬܲܚܬܿ ܥܲܠ ܐܲܪܥܵܐ ܐܲܝܟ ܕܐܝܼܬܼܵܘܗܝ ܗ̄ܘ̣ܵܐ ܀ 323 :ܕܠܵܐ ܢܘܼܗܵܝܵܐ ܗܘ̤ܵܐ ܬܘܼܩܵܢܹܗ ܩܲܠܝܼܠܵܐܝܼܬܼ 324 ܘܠܵܐ ܡܨܸܐ ܦܘܼܡ̇ܐ ܕܢܹܐܡܲܪ ܕܲܟܼܡܵܐ ܩܲܠܝܼܠܘܼܬܹܗ ܀ 325 :ܩܲܠܝܼܠ ܗ̄ܘ̣ܵܐ ܛܵܒܼ ܦܘܼܩܕܵܢܵܐ ܕܡܲܬܼ݂ܚܹܗ ܒܪܵܘܡ̇ܐ 326 ܘܐܸܢ ܐܝܼܬܼ ܡܸܕܹܿܡ ܕܩܲܠܝܼܠ ܣܲܓܿܝܼ ܡܲܬܿܝܼܢ ܡܸܢܹܗ ܀ 327 :ܗܵܝ̇ ܒܲܪ̄ܬܼ ܩܵܠܵܐ ܕܐܸܡܲܪ ܘܲܗܘ̤ܵܘ ܫܡܲܝܵܐ ܕܲܠܥܸܠ 328 ܗ̤ܝ ܬܲܩܸܢܬܹܗ ܒܗܵܘ̇ ܐܸܣܟܹܿܡܵܐ ܕܡ̣ܢ ܠܵܐ ܡܸܕܹܿܡ ܀ 329 :ܡ̣ܢ ܠܵܐ ܡܸܕܹܿܡ ܗܘ̤ܵܐ ܩܲܕܼܡ̇ܝܵܐ ܒܪܸܡܙܵܐ ܙܥܘܿܪܵܐ 330 ܘܗܵܢ ܡ̣ܢ ܡܸܕܸܿܡ ܒܵܗ̇ ܒܲܕܼܡܘܼܬܼܵܐ ܩܲܠܝܼܠܵܐܝܼܬܼ ܀ 331 :ܛܲܟܼܣܵܐ ܦܲܐܝܵܐܬ ܥܒ݂ܲܕܼ ܠܲܒܼܪܝܼܬܹܗ ܦܠܸܐܒܐܝܼܬܼܘܼܬܹܗ 332 ܘܚܲܟܿܝܼܡܵܐܝܼܬܼ ܒܪ̣ܵܐ ܡ̣ܢ ܡܸܕܹܿܡ ܘܡ̣ܢ ܠܵܐ ܡܸܕܹܿܡ ܀ 333 :ܠܲܥܒܼܵܕܼ ܐܝܼܕܼܵܘ̈ܗܝ ܚܵܘܝܼ ܒܛܲܟܼܣܵܐ ܕܥܵܒܼ̇ܘܿܕܼܘܼܬܹܗ 334 ܘܲܠܝܘܼܠܦܵܢܗܘܿܢ ܡܲܬܼܚܹܗ ܠܥܲܡܠܹܗ ܠܵܫܬܵܐ ܝܵܘܡܝܼ̈ܢ ܀ 335 :ܡܨܸܐ ܗ̄ܘ̣ܵܐ ܕܢܸܒܼܪܸܐ ܠܟܼܠܡܵܐ ܕܲܒܼܪ̣ܵܐ ܒܲܚܕܼܵܐ ܫܵܥܵܐ 336 ܐܸܠܵܐ ܥܒܼܵܕܵܘ̈ܗܝ ܠܵܐ ܝܵܠ̇ܦܝܼܢ ܗ̄ܘ̣ܵܘ ܚܹܝܠ ܪܲܒܿܘܼܬܹܗ ܀ 337 :ܠܝܘܼܬܼܪܵܢ ܥܲܒܼ݂ܕܵܗ̇ ܠܗܵܝ̇ ܕܐܸܬܿܬܲܗܝܼ ܠܡܸܒܼܪܵܐ ܒܪܝܼܬܼܵܐ 338 ܕܢܸܓܼܡܘܿܪ ܕܝܼܠܹܗ ܒܲܓܼܡܝܼܪܘܼܬܼܵܐ ܕܐܲܠܵܗܘܼܬܹܗ ܀ pb. 178 339 :ܒܫܘܼܪܵܝ ܝܵܘܡ̇ܐ ܥܒ݂ܲܕܼ ܠܲܫܡܲܝܵܐ ܘܲܠܡܲܠܲܐܟܹ̈ܐ 340 ܘܠܲܐܪܥܵܐ ܘܡܲܝ̈ܵܐ ܘܲܠܚܸܫܘܿܟܼܵܐ ܘܢܘܼܪܵܐ ܘܐܵܐܲܪ ܀ 341 :ܒܥܸܕܵܢ ܨܲܦܪܵܐ ܐܲܬܼܩܸܢ ܢܘܼܗܪܵܐ ܡ̣ܢ ܠܵܐ ܡܸܕܸܿܡ 342 ܘܝܼܠܸܦܘ ܥܝܼܪܹ̈ܐ ܕܡ̣ܢ ܠܵܐ ܡܸܕܹܿܡ ܗܘ̤ܵܘ ܐܵܦ ܗܸܢܘ̣ܿܢ ܀ 343 :ܒܝܵܘܡ̇ܐ ܕܲܬܼܪܹܝܢ ܥܒ݂ܲܕܼ ܠܲܪܩܝܼܥܵܐ ܡ̣ܢ ܓܵܘܡܲܝܵ̈ܐ 344 ܘܚܲܟܸܿܡ ܐܸܢܘܿܢ ܕܬܵܦ ܡ̣ܢ ܡܕܸܿܡ ܦܫܝܼܩ ܠܹܗ ܕܢܸܒܼܪܸܐ ܀ 345 :ܒܲܬܼܠܝܼܬܼܵܝܵܐ ܟܲܢܸܫ ܡܲܝ̈ܵܐ ܠܩܸܒܼܝܵܐ ܕܝܲܡܡܹ̈ܐ 346 ܘܐܵܘܕܲܥ ܐܸܢܘܿܢ ܕܪܸܡܙܹܗ ܫܲܠܝܼܛ ܥܲܠ ܬܘܼܩܵܢܵܘ̈ܗܝ ܀ 347 :ܒܲܪܒܼܝܼܥܵܝܵܐ ܥܒ݂ܲܕܼ ܢܲܗܝܼܪܹ̈ܐ ܫܸܡܫܵܐ ܘܣܲܗܪܵܐ 348 ܘܚܵܘܝܼ ܐܸܢܘܿܢ ܠܡܸܛܲܪ ܛܲܟܼܣܵܐ ܕܥܵܒܼܘܿܕܼܘܼܬܹܗ ܀ 349 :ܒܲܚܡܝܼܫܵܝܵܐ ܙܵܘ̤ܓܼ ܡܲܝ̈ܵܐ ܘܐܵܘܠܸܕܼܘ ܪ̈ܲܚܫܵܐ 350 ܘܐܵܘܕܲܥ ܐܸܢܘܿܢ ܕܐܵܦ ܫܲܬܿܝܼܩܹ̈ܐ ܡܫܲܡܠܹܝܢ ܡܸܠܹܗ ܀ 351 :ܒܲܫܬܿܝܼܬܼܵܝܵܐ ܒܪ̣ܵܐ ܡ̣ܢ ܐܲܪܥܵܐ ܓܸܢܣܹ̈ܐ ܚܲܪ̈ܫܹܐ 352 ܘܐܲܥܝܼܪ ܐܸܢܘܿܢ ܠܡܸܬܼܒܲܩܵܝܘ ܒܫܘܼܚܠܵܦܲܝ̈ܗܘܿܢ ܀ 353 :ܐܲܝܟ ܕܲܒܼܨܒܼܥܵܐ ܡܚܵܘܸܬ ܗ̄ܘ̣ܵܐ ܠܗܘܿܢ ܚܹܝܠ ܐܝܼܬܼܘܼܬܹܗ 354 ܕܚܘܼܪܘ ܡܲܠܲܐܟܹ̈ܐ ܕܚܹܝܠ ܟܠ ܡܸܕܸܿܡ ܡܨܸܐ ܐ̄ܢܵܐ ܚܲܝܠܵܐ ܀ 355 :ܐܲܝܟ ܕܲܒܼܩܲܢܝܵܐ ܟܬܹ̇ܒܼ ܗ̄ܘ̣ܵܐ ܠܗܘܿܢ ܣܸܦܪܵܐ ܒܗܵܘܢܵܐ 356 ܘܡܲܗܓܸܿܐ ܗ̄ܘ̣ܵܐ ܠܗܘܿܢ ܒܲܟܼܬܼܝܼ̈ܒܼܵܬܼܵܐ ܕܬܼܘܼܩܵܢ ܟܠܵܐ ܀ 357 :ܒܲܕܼܡܘܼܬܼ ܩܝܼܡ ܗ̄ܘ̣ܵܐ ܪܸܡܙܹܗ ܒܪܹܫ ܣܸܕܼܪ̈ܲܝܗܘܿܢ 358 ܘܬܼܵܢܹ̇ܐ ܗ̄ܘ̣ܵܐ ܠܗܘܿܢ ܚܹܝܠ ܣܘܼܟܵܠܵܐ ܕܲܣܬܼܝܼܪ݁ܵܬܹܗ ܀ 359 :ܐܲܝܟ ܕܲܠܨܲܠܡܵܐ ܨܵܪܹܗ ܠܥܵܠܡܵܐ ܩܕܼܵܡ ܥܲܝܢܲܝ̈ܗܘܿܢ 360 ܘܐܲܩܝܼܡ ܐܸܢܘܿܢ ܕܢܸܬܼܒܲܩܘܿܢ ܒܹܗ ܚܲܬܿܝܼܬܼܵܐܝܼܬܼ ܀ 361 :ܐܲܝܟ ܦܵܠܵܛܝܼܢ ܕܲܡܠܸܟ ܡܲܠ̈ܟܹܿܐ ܒܢ̣ܵܗ̇ ܠܲܒܼܪܝܼܬܼܵܐ 362 ܘܐܲܥܸܠ ܐܸܢܘܿܢ ܠܡܸܚܙܵܐ ܫܘܼܦܪܵܐ ܕܒܹܝܬܼ ܡܲܠܟܿܘܼܬܹܗ ܀ 363 :ܒܝܲܕܼ ܓܲܠ̈ܝܵܬܼܵܐ ܐܲܠܸܦ ܐܸܢܘܿܢ ܚܹܝ ܐܝܼܬܼܘܼܬܹܗ 364 ܕܠܵܐ ܢܸܫܬܲܚܩܝܼܢ ܠܡܸܒܼܥܵܐ ܒܥܵܬܼܵܐ ܕܥܲܠ ܟܲܣܝܘܼܬܹܗ ܀ 365 :ܟܣܸܐ ܗ̄ܘ̣ܵܐ ܡܸܢܗܘܿܢ ܘܠܵܐ ܝܵ̇ܕܼܥܝܼܢ ܗ̄ܘ̣ܵܘ ܪܲܒܿܘܼܬܼ ܚܲܝܠܹܗ 366 ܘܐܵܘܕܲܥ ܐܸܵܢܘܿܢ ܒܝܲܕܼ ܬܘܼܩܵܢܵܘ̈ܗܝ ܕܚܲܕܼ ܒܵܬܲܪ ܚܲܕܼ ܀ 367 :ܐܲܝܟ ܗܲܕܿܝܼܠܵܐ ܪܗܸܛ ܦܘܼܩܕܵܢܹܗ ܩܕܼܵܡ ܟܸܢܫܲܝ̈ܗܘܿܢ 368 ܘܢܓܲܕܼ ܐܸܢܘܿܢ ܠܘܵܬܼ ܝܘܼܠܦܵܢܵܐ ܕܟܲܣܝܘܼܬܼ ܚܘܼܒܹܿܗ ܀ 369 :ܚܘܼܒܹܿܗ ܓܠ̣ܵܐ ܠܗܘܿܢ ܕܲܟܼܡܵܐ ܪܵܚܹ̇ܡ ܠܲܥܒܼܵܕܼ̇ ܐܝܼܕܼܵܘ̈ܗܝ 370 ܘܲܪܓܼܝܼܓܼ ܣܲܓܿܝܼ ܠܡܸܛܲܪ ܥܲܡܠܹܗ ܡ̣ܢ ܢܸܟܼܝܵܢܹ̈ܐ ܀ 371 :ܚܘܼܒܵܢܵܐܝܼܬܼ ܒܪ̣ܵܐ ܟܠܡܸܕܸܿܡ ܕܲܟܼܣܸܐ ܘܲܓܼܠܸܐ 372 ܘܲܕܼܠܵܐ ܥܲܡܠܵܐ ܓܡ݂ܲܪ ܨܸܒܼܝܵܢܹܗ ܘܚܵܘܝܼ ܚܘܼܒܹܿܗ ܀ 373 :ܚܲܝܠܹܗ ܐܲܫܪܝܼ ܒܚܲܝܠܲܝ̈ ܪܵܘܡ̇ܐ ܕܲܗܘ̤ܵܘ ܡܸܢܹܗ 374 ܘܚܲܝܸܠ ܐܸܢܘܿܢ ܠܡܸܛܲܪ ܛܲܟܼܣܵܐ ܕܥܵܒܼܘܿܕܼܘܼܬܹܗ ܀ pb. 179 375 :ܐܲܝܟ ܫܲܠܝܼܛܹ̈ܐ ܐܲܩܝܼܡ ܐܸܢܘܿܢ ܥܲܠ ܟܠ ܕܲܒܼܪܵܐ 376 ܕܢܸܗܘܘܿܢ ܝܵ̇ܕܼܥܝܼܢ ܠܲܡܕܲܒܵܪܘܼ ܫܡܲܝܵܐ ܘܐܲܪܥܵܐ ܀ 377 :ܒܚܘܼܒܵܐ ܪܲܒܵܐ ܫܠܸܡ̣ܘ ܐܵܦ ܗܸܢܘ̣ܿܢ ܠܨܸܒܼܝܵܢ ܚܘܼܒܹܿܗ 378 ܘܗܲܢܝܼܵܐܝܼܬܼ ܟܕܲܢܘ ܨܵܘܪ̈ܲܝܗܘܿܢ ܬܚܹܝܬܼ ܦܘܼܩܕܵܢܹܗ ܀ 379 :ܦܩ݂ܲܕܼ ܐܲܝܟ ܡܲܠܟܵܐ ܘܛܲܟܸܿܣ ܕܲܪ̈ܓܹܐ ܕܫܘܼܠܛܵܢܲܝ̈ܗܘܿܢ 380 ܘܟܼܠܚܲܕܼ ܡܸܢܗܘܿܢ ܩܵܡ̣ ܒܲܥܒܼܵܕܼܵܐ ܕܐܸܬܚܵܘܝܼ ܠܹܗ ܀ 381 :ܐܝܼܬܼ ܕܲܦܩ݂ܲܕܼ ܠܹܗ ܕܲܢܙܝܼܥ ܠܐܵܐܲܪ ܐܲܝܟ ܪܲܒܿܚܲܝܠܵܐ 382 ܘܢܲܪܗܸܛ ܡܲܝ̈ܵܐ ܠܥܸܠ ܡ̣ܢ ܚܲܨܵܐ ܕܪܘܼܚܵܐ ܫܲܪܝܵܐ ܀ 383 :ܐܝܼܬܼ ܕܐܲܦܸܣ ܠܹܗ ܕܲܢܣܝܼܦ ܒܲܪ̈ܩܹܐ ܩܲܠܝܼܠܵܐܝܼܬܼ 384 ܘܢܲܫܡܲܥ ܩܵܠܹ̈ܐ ܕܪ̈ܲܥܡܹܐ ܩܫܲܝ̈ܵܐ ܚܲܣܝܼܢܵܐܝܼܬܼ ܀ 385 :ܐܝܼܬܼ ܕܐܵܘܚܸܕܼ ܠܹܗ ܐܸܣܦܹܝܪ ܫܸܡܫܵܐ ܒܐܝܼܕܼܵܐ ܕܙܵܘܥܵܘ̈ܗܝ 386 ܘܐܲܡܝܼܢ ܪܵܗܹ̇ܛ ܠܹܠܲܝ ܐܝܼܡܵܗ ܕܠܵܐ ܫܘܼܘܵܪܵܐ ܀ 387 :ܐܝܼܬܼ ܕܐܲܫܠܸܡ ܠܹܗ ܣܲܗܪܵܐ ܙܥܘܿܪܵܐ ܩܢܸܐ ܫܘܼܚܠܵܦܹ̈ܐ 388 ܘܗܵܐ ܡܛܲܟܸܿܣ ܠܹܗ ܠܥܘܼܡܪܵܐ ܕܙܲܒܼܢܵܐ ܕܠܵܐ ܢܼܬܿܕܵܘܲܕܼ ܀ 389 :ܐܝܼܬܼ ܕܲܠܟܼܵܙܟܿܒܹ̈ܐ ܚܲܪ̈ܫܹܐ ܡܙܝܼܥܝܼܢ ܠܡܸܪܕܼܵܐ ܒܛܲܟܼܣܵܐ 390 ܘܲܒܼܪ̈ܲܗܛܲܝܗܘܿܢ ܡܚܲܟܿܡܝܼܢ ܐ̄ܢܵܫܵܐ ܩܲܢܝܲܝ̈ ܡܸܠܬܼܵܐ ܀ 391 :ܐܲܝܟ ܕܐܸܬܼܦܲܩܲܕܼܘ ܠܲܡܕܲܒܵܪܘܼ ܫܘܼܠܛܵܢ ܥܲܡܡܹ̈ܐ 392 ܘܠܵܐܹ̇ܝܢ ܟܠܫܵܥ ܠܲܡܩܲܝܵܡܘܼ ܫܘܼܠܛܵܢܲܝ̈ܗܘܿܢ ܀ 393 :ܐܝܼܬܼ ܕܲܡܥܝܼܪܝܼܢ ܩܪ݁ܵܒܹܐ ܒܐܲܪܥܵܐ ܥܲܠ ܚܲܝܵܒܹ̈ܐ 394 ܘܐܝܼܬܼ ܕܲܡܫܲܠܹܝܢ ܩܹܐܪ̈ܣܹܐ ܩ̈ܫܲܝܵܐ ܡ̣ܢ ܙܲܟܵܝܹ̈ܐ ܀ 395 :ܐܝܼܬܼ ܕܲܡܟܲܒܿܫܝܼܢ ܥܲܡܡܹ̈ܐ ܡܪ̈ܝܼܕܹܐ ܒܝܲܕܼ ܚܲܒܼܪ̈ܲܝܗܘܿܢ 396 ܘܐܝܼܬܼ ܕܲܡܫܲܗܹܝܢ ܬܘܼܩܦܵܐ ܕܒܼܝܼ̈ܫܹܐ ܩܕܼܵܡ ܡܲܟܿܝܼܪܹ̈ܐ ܀ 397 :ܐܝܼܬܼ ܗ̄ܘ̣ ܕܪܵܕܹܝܢ ܒܪ̈ܲܥܡܹܐ ܘܒܲܪ݁ܩܖܹܐ ܥܲܙܝܼܙܵܐܝܼܬܼ 398 ܘܐܝܼܬܼ ܗ̄ܘ̣ ܕܡܲܚܬܼܝܼܢ ܡܸܛܪܵܐ ܘܛܲܠܵܐ ܒܲܣܝܼܡܵܐܝܼܬܼ ܀ 399 :ܐܝܼܬܼ ܗ̄ܘ̣ ܕܡܲܟܹܿܝܢ ܒܝܲܕܼ ܫܘܼܚܠܵܦܹ̈ܐ ܕܩܲܝܛܵܐ ܘܣܲܬܼܘܵܐ 400 ܘܐܝܼܬܼ ܗ̄ܘ̣ ܕܢܵܛ̇ܪܝܼܢ ܦܲܓܼܪ̈ܵܢܵܝܹܐ ܡ̣ܢ ܢܸܟܼܝܵܢܹ̈ܐ ܀ 401 :ܐܝܼܬܼ ܕܲܡܕܲܒܿܪܝܼܢ ܟܠܚܲܕܼ ܡܸܢܗܘܿܢ ܠܚܲܕܼ ܒܲܪܢܵܫܵܐ 402 ܘܲܙܗܝܼܪܝܼܢ ܒܹܗ ܕܠܵܐ ܢܲܟܿܘܿܢܵܝܗܝ ܫܹܐܕܹ̈ܐ ܛܪ̈ܘܼܢܹܐ ܀ 403 :ܠܨܸܒܼܝܵܢ ܟܲܣܝܵܐ ܡܫܲܡܫܝܼܢ ܟܠܗܘܿܢ ܒܲܚܦܝܼܛܘܼܬܼܵܐ 404 ܘܐܲܝܟ ܨܸܒܼܝܵܢܹܗ ܪܵܕܹܝܢ ܒܐܘܼܪܚܵܐ ܕܣܘܼܥܪ݁ܵܢܲܝܗܘܿܢ ܀ 405 :ܠܢܝܼܫܵܐ ܕܚܘܼܒܹܿܗ ܚܵܢܹ̇ܝܢ ܟܠܫܵܥ ܠܲܡܕܲܡ̇ܝܼܘ 406 ܘܠܵܐ ܡܸܬܼܪܲܦܹܝܢ ܡ̣ܢ ܣܘܼܟܵܝܵܐ ܕܦܘܼܪܥܵܢ ܐܲܓܼܪܵܐ ܀ 407 :ܐܲܝܟ ܐܲܬܼܠܹܝܛܹ̈ܐ ܪܡܹܝܢ ܒܐܵܓܼܘܿܢܵܐ ܗܵܐ ܡ̣ܢ ܕܲܗܘ̤ܵܘ 408 ܘܲܠܙܵܟܼܘܼܬܼܵܐ ܕܲܒܼܫܘܼܠܵܡܵܐ ܡܣܲܟܹܿܝܢ ܥܲܡ ܟܠ ܀ 409 :ܬܡܝܼܗ ܐܵܓܼܘܿܢܵܐ ܕܡܸܬܼܟܲܬܼܫܝܼܢ ܒܹܗ ܠܵܐ ܚܵܫܘܿܫܹ̈ܐ 410 ܘܠܵܐ ܡܸܬܼܡܲܠܠܵܐ ܪܲܒܿܘܼܬܼ ܥܲܡܠܹܗ ܒܠܸܫܵܢ ܒܸܣܪܵܐ ܀ pb. 180 411 :ܟܡܵܐ ܟܲܝ ܗܵܘܹ̇ܐ ܚܲܝܠܵܐ ܕܲܒܼܗܘܿܢ ܠܡܹܐܚܲܕܼ ܟܠܵܐ 412 ܕܗܵܐ ܒܨܝܼܪ ܩܲܠܝܼܠ ܐܲܠܦܹ̈ܐ ܐܸܫܬܵܐ ܘܠܵܐ ܡܸܬܼܪܲܦܹܝܢ ܀ 413 :ܟܡܵܐ ܟܲܝ ܦܵܠ̇ܚܝܼܢ ܒܐܲܦܲܝܝ̈ ܪܵܘܡ̇ܐ ܠܹܠܲܝ ܐܝܼܡܵܡ 414 ܘܠܵܐ ܠܐ̣ܝܼܘ ܘܲܬܼܚܸܒܼܘ ܡ̣ܢ ܡܲܪܕܲܝܼܬܼܵܐ ܕܥܲܡ ܢܲܗܝܼܪܹ̈ܐ ܀ 415 :ܟܡܵܐ ܟܲܝ ܛܵܥܹ̇ܝܢ ܝܲܳܪܵܐ ܕܲܒܼܗܘܿܢ ܝܘܼܩܪܹܗ ܕܙܲܒܼܢܵܐ 416 ܘܠܵܐ ܡܸܬܼܝܲܠܕܵܐ ܡܲܐܝܼܢܘܼܬܼܵܐ ܒܪܸ̈ܥܝܵܢܲܗܘܿܢ ܀ 417 :ܟܡܵܐ ܟܲܝ ܪܵܬܼܚ̇ܝܼܢ ܒܪܸܚܡܲܬܼ ܚܘܼܒܵܐ ܕܨܹܝܕܼ ܒܵܪܘܿܝܵܐ 418 ܘܠܵܐ ܩܲܪ̣ܘ ܘܲܗܦܲܟܼܘ ܡ̣ܢ ܛܘܼܝܵܒܼܵܐ ܕܐܲܝܟ ܨܸܒܼܝܵܢܹܗ ܀ 419 :ܒܚܹܿܝܠ ܨܸܒܼܝܵܢܹܗ ܢܸܬܼܗܲܪ ܝܲܬܿܝܼܪ ܛܵܒܼ ܡ̣ܢ ܕܲܒܼܗܘܿܢ 420 ܕܲܡܨܸܐ ܡܚܲܝܸܠ ܠܲܥܒܼܵܕ̇ ܐܝܼܕܼܵܘ̈ܗܝ ܠܡܸܛܲܪ ܛܲܟܼܣܵܐ ܀ 421 :ܠܚܲܝܠܹܗ ܢܩܲܠܸܣ ܚܹܝܝܠ ܚܘܼܡܣܵܢܵܐ ܕܲܒܼܢܲܝ̈ ܒܲܝܬܹܿܗ 422 ܘܲܠܥܘܼܕܼܪܵܢܹܗ ܢܸܓܼܕܿܘܿܠ ܟܠܫܵܥ ܟܠܝܼܠ ܬܵܘܕܿܝܼܬܼܵܐ ܀