Narsai: On Creation III - ܥܲܠ ܬܘܼܩܵܢܵܗ̇ ܕܲܒܼܪܝܼܬܼܵܐ ܘܡܵܘܕܲܥ ܐܵܦ ܥܲܠ

1 :ܒܹܝܬܼ ܓܲܙܵܐ ܪܲܒܵܐ ܦܬ݂ܲܚ ܠܲܢ 2 ܒܲܪ ܥܲܡܪܲܡ ܒܲܢܒܼܝܼܘܼܬܹܗ. 3 :ܚܲܝܠܹܗ ܪܲܒܵܐ ܕܒܼܵܪܘܿܝܵܐ 4 ܕܐܸܡܲܬܼܝ ܫܲܪܝܼ ܒܲܥܒܼܵܕܵ݁ܐ ܀ 5 :ܟܲܣܝܵܐ ܗ̄ܘ̣ܵܬܼ ܗܵܕܹܐ ܡ̣ܢ ܟܠ 6 ܕܐܲܝܟܲܢ ܫܲܪܝܼ ܒܒܸܪ̈ܝܵܬܼܵܐ. 7 :ܘܲܒܼܚܲܝܠܵܐ ܕܡܲܢ ܐܸܬܿܬܿܩܲܢܘ 8 ܫܡܲܝܵܐ ܘܐܲܪܥܵܐ ܘܟܼܠ ܕܲܒܼܗܘܿܢ ܀ 9 :ܘܲܨܒܼܵܐ ܕܢܵܘܕܲܥ ܒܵܪܘܿܝܵܐ 10 ܥܒܼܵܕܼܵܐ ܕܚܲܝܠܹܗ ܠܲܡܠܝܼܠܹ̈ܐ. 11 :ܠܡܘܼܫܹܐ ܓܒܼ݂ܵܐ ܠܹܗ ܬܲܠܡܝܼܕܼܵ 12 ܘܐܲܠܦܹܗ ܣܸܦܪܵܐ ܪܘܼܚܵܢܵܐ ܀ 13 :ܒܛܘܼܪܵܐ ܕܣܝܼܢܲܝ ܚܵܘܝܼ ܠܹܗ 14 ܚܙܵܬܼܵܐ ܕܡܲܠܝܵܐ ܬܸܕܼܡܘܼܪܬܵܐ. 15 :ܘܩܵܠܵܐ ܐܘܵܬܹܗ ܡܲܫܡܲܥ ܗ̄ܘ̣ܵܐ 16 ܟܲܕܼ ܢܵܓܹ̇ܕܼ ܠܹܗ ܠܝܘܼܦܵܢܵܐ ܀ 17 ܐ̄ܢܵܫܵܐܝܼܬܼ ܨܒܼܵܐ ܕܲܢܚܵܘܸܐ: pb. 181 18 ܢܲܦܫܹܗ ܠܡܘܼܫܹܐ ܒܵܪܘܿܝܵܐ. 19 :ܘܥܲܠ ܗܵܕܹܐ ܡܸܬܼܪܲܓܼܪܵܓܼ ܗ̄ܘ̣ܵܐ 20 ܡܘܼܫܹܐ ܠܡܸܚܙܵܐ ܠܲܟܼܝܵܢܹܗ ܀ 21 :ܐܸܢܗܘ̤ ܕܹܝܢ ܕܲܓܼܒܲܝܬܵܢܝ ܠܵܟ 22 ܬܲܠܡܝܼܕܼܵܐ ܘܪܵܚܹ̇ܡ ܐܲܢ̄ܬܿ ܠܝܼ. 23 :ܚܵܘܵܢܝ ܫܘܼܒܼܚܹܗ ܕܲܟܼܝܵܢܵܟ 24 ܘܐܸܬܼܒܲܩܸܐ ܒܙܝܼܘܵܟ ܟܲܣܝܵܐ ܀ 25 :ܣܲܓܿܝܼ ܛܵܥܹ̇ܝܬܿ ܐܘܿ ܡܘܼܫܹܐ 26 ܡ̇ܪܝܵܐ ܠܘܵܬܹܗ ܐܵܡܲ݁ܪ ܗ̄ܘ̣ܵܐ. 27 :ܠܵܐ ܚܵܙܹ̇ܐ ܠܝܼ ܡ̇ܝܘܿܬܼܵܐ 28 ܕܪܵܡ ܗ̄ܘ̣ ܟܝܵܢܝ ܡ̣ܢ ܚܲܙܵܝܹ̈ܐ ܀ 29 :ܠܝܘܼܠܦܵܢܵܐ ܩܪܹܝܬܼܵܟ ܨܹܐܕܲܝ 30 ܕܬܹܐܠܲܦ ܕܐܝܼܬܲܝ ܒܵܪܘܿܝܵܐ. 31 :ܠܵܐ ܗ̄ܘ̣ܵܐ ܕܬܹܐܠܲܦ ܥܲܠ ܟܲܣܝܘܼܬܼܝ 32 ܕܠܵܐ ܡܸܬܿܕܲܟܿܟܵܐ ܠܲܥܒܼܝܼ̈ܕܹܐ ܀ 33 :ܡ̇ܪܝܵܐ ܐܝܼܬܼܝ ܘܐܲܠܵܗܵܐ 34 ܘܗܵܢ̇ܵܘ ܫܹܡܝ ܕܐܝܼܬܲܝ ܘܐܝܼܬܲܝ. 35 :ܘܲܒܼܚܲܝܠܵܐ ܕܡܹܢܝ ܐܲܩܝܼܡܹܬܼ 36 ܫܡܲܝܵܐ ܘܐܲܪܥܵܐ ܘܟܼܠ ܕܲܒܼܗܘܿܢ ܀ 37 :ܘܲܕܼܠܵܐ ܡܦܵܣܝܼܢ ܡ̇ܝܘܿܬܹ̈ܐ 38 ܕܡ̇ܪܘܼܬܼܝ ܫܲܠܝܼܛܵܐ ܥܲܠ ܟܠ. 39 :ܠܵܟ ܥܵܒܹ̇ܕܼ ܐ̄ܢܵܐ ܐܝܼܙܓܲܕܵܐ 40 ܘܡܸܨܥܵܝܵܐ ܕܬܲܠܸܦ ܐܸܢܘܿܢ ܀ 41 :ܒܐܝܼܕܲܝ̈ܟ ܨܵܒܹ̇ܐ ܐ̄ܢܵܐ ܕܐܸܓܼܠܸܐ 42 ܥܲܠ ܐܝܼܬܼܘܼܬܼܝ ܘܥܲܠ ܬܘܼܩܵܢܲܝ̈. 43 :ܒܵܟ ܨܵܒܹ̇ܐ ܐ̄ܢܵܐ ܕܐܹܚܲܟܸܿܡ 44 ܠܟܼܠܹܗ ܟܝܵܢܵܐ ܕܲܟܠܝܼܠܹ̈ܐ ܀ 45 :ܚܙܝܼ ܡܘܼܫܹܐ ܕܓܼܵܠܹ̇ܐ ܐ̄ܢܵܐ ܠܵܟ 46 ܐ̄ܪ̈ܵܙܹܐ ܟܣܲܝܵ̈ܐ ܕܬܼܘܼܩܵܢܲܝ̈. 47 :ܚܘܿܬܼ ܘܐܲܟܼܪܸܙ ܒܹܝܬܼ ܡ̇ܝܘܿܬܹ̈ܐ 48 ܕܥܵܒܼܘܿܕܼܵܐ ܐ̄ܢܵܐ ܕܟܼܠ ܕܲܗܘ̤ܸܵܐ ܀ 49 :ܒܐܲܪܒܿܥܝܼܢ ܝܵܘ̈ܡ̇ܬܼܵܐ ܓܲܡܪܹܗ 50 ܪܲܒܵܐ ܠܬܲܠܡܝܼܕܼܵܐ ܚܲܕܼܬܼܵܐ. 51 :ܘܲܣܦ݂ܲܩ ܗܵܘܢܹܗ ܕܡ̇ܝܘܿܬܼܵܐ 52 ܕܢܹܐܚܘܿܕܼ ܣܵܟܼܵܐ ܕܟܼܠ ܕܲܗܘ̤ܵܐ ܀ 53 :ܚܲܝܠܵܐ ܕܪܘܼܚܵܐ ܐܲܫܪܝܼ ܒܹܗ 54 ܘܲܙܡ݂ܲܪ ܒܹܗ ܒܵܠܹ̈ܐ ܬܡܝܼܗܹ̈ܐ. 55 :ܘܲܒܼܚܲܠܝܘܼܬܼܵܐ ܕܢܸܡܵܬܹ̈ܐ 56 ܬܗܲܪܘ ܥܸܠܵܝܹ̈ܐ ܘܬܲܚܬܵܝܹ̈ܐ ܀ 57 :ܗܘ̤ܸܵܬܼ ܒܲܪ̄ܬܼ ܩܵܠܹܗ ܐܲܝܟ ܪܲܥܡܵܐ 58 ܘܫܲܡ̣ܘܥܘܼܗܝ ܚܵܪ̈ܫܹܐ ܘܲܡܠܝܼܠܹ̈ܐ. 59 :ܘܦܸܬܼܓܼܵܡܵܘ̈ܗܝ ܐܲܝܟ ܫܝܼܦܘܿܪܹ̈ܐ 60 ܐܲܟܼܪܸܙܘ ܚܲܝܠܹܗ ܕܥܵܒܼܘܿܕܼܵܐ ܀ 61 :ܒܪܵܫܝܼܬܼ ܠܲܡ ܫܲܪܝܼ ܘܲܒܼܪ̣ܵܐ 62 ܒܵܪܘܿܝܵܐ ܟܠܡܵܐ ܕܲܗܘ̤ܵܐ. 63 :ܘܬܲܚܸܡ ܙܲܒܼܢܹ̈ܐ ܒܝܼܕܲܥܬܹܗ 64 ܕܫܘܼܪܵܝܵܐ ܘܲܕܼܫܘܼܠܵܡܵܐ ܀ 65 :ܘܟܲܕܼ ܒܐܝܼܬܼܘܼܬܹܗ ܠܵܐ ܫܲܪܝܼ 66 ܕܲܟܼܝܵܢܹܗ ܕܠܵܐ ܫܘܼܪܵܝܵܐ ܗ̄ܘ̣. 67 :ܠܲܒܼܪܝܼܬܼܵܐ ܒܙܲܒܼܢܵܗ̇ 68 ܐܲܝܟܲܢܵܐ ܕܗܘ̤ ܝܵ̇ܕܲܥ ܗ̄ܘ̣ܵܐ ܀ 69 :ܠܵܘ ܓܹܝܪ ܚܘܼܫܵܒܼܵܐ ܚܲܕܼܬܼܵܐ 70 ܢܲܓܼܕܹܿܗ ܕܢܸܒܼܪܸܐ ܒܸܪ̈ܝܵܬܼܵܐ. 71 :ܕܗܵܕܹܐ ܡ̣ܢ ܡܬܼܘܿܡ ܣܝܼܡܵܐ ܗ̣̄ܘܵܬܼ 72 ܒܝܼܕܲܥܬܹܗ ܥܲܡ ܐܝܼܬܼܘܼܬܹܗ ܀ 73 :ܘܠܵܘ ܬܘܼܒܼ ܠܲܢܝܵܚܹܗ ܬܲܩܸܢ 74 ܫܡܲܝܵܐ ܘܐܲܪܥܵܐ ܘܟܼܠ ܕܲܒܼܗܘܿܢ. 75 :ܐܸܠܵܐ ܒܚܘܼܒܵܐ ܘܲܒܼܪ̈ܲܚܡܹܐ 76 ܓܠ̣ܵܐ ܨܸܒܼܝܵܢܹܗ ܠܲܥܒܼܝܼܕܹ̈ܐ ܀ 77 :ܗܘ̤ ܓܹܝܪ ܛܵܒܼܵܐ ܗ̄ܘ̣ ܒܲܟܼܝܵܢܹܗ 78 ܘܲܟܼܝܵܢܵܐ ܗ̄ܘ̣ ܕܲܡܠܸܐ ܛܘܼܒܹ̈ܐ. 79 :ܘܲܒܼܛܲܝܒܿܘܼܬܹܗ ܨܒܼܵܐ ܘܐܲܝܬܿܝܼ 80 ܡ̣ܢ ܠܵܐ ܡܸܕܸܿܡ ܟܠܡܸܕܹܿܡ ܀ pb. 182 81 :ܕܗܵܕܹܐ ܦܲܐܝܵܐ ܠܥܵܒܼ̇ܘܿܕܼܵܐ 82 ܕܒܲܥܒܼܵܕܼܵܘ̈ܗܝ ܢܲܟܼܪܸܙ ܚܲܝܠܹܗ. 83 :ܘܲܬܼܒܼܘܼܩܵܢܵܐ ܕܒܸܪ̈ܝܵܬܹܗ 84 ܥܒܼܝܼܕܹ̈ܐ ܢܸܩܢܘܿܢ ܝܼܕܲܥܬܼܵܐ ܀ 85 :ܐܝܼܬܼܘܼܬܹܗ ܕܠܵܐ ܫܘܼܪܵܝܵܐ ܗ̄ܝܼ 86 ܘܡ̇ܪܘܼܬܹܗ ܕܠܵܐ ܫܘܼܠܵܡܵܐ ܗ̄ܝܼ. 87 :ܠܲܥܒܼܵܕܼܵܘ̈ܗܝ ܕܹܝܢ ܫܘܼܪܵܝܵܐ 88 ܘܙܲܒܼܢܵܐ ܘܛܲܟܼܣܵܐ ܠܒܸܪ̈ܝܵܬܹܗ ܀ 89 :ܠܵܐ ܡܸܬܿܕܲܪܟܵܐ ܐܝܼܬܼܘܼܬܹܗ 90 ܡ̣ܢ ܚܘܼܫܵܒܼܵܐ ܕܲܥܒܼܝܼ̈ܕܹܐ. 91 :ܘܠܵܐ ܒܲܚܙܵܬܼܵܐ ܡܸܣܬܿܝܲܟ 92 ܕܪܵܡ ܗ̄ܘ̣ ܟܝܵܢܹܗ ܡ̣ܢ ܗܵܕܹܐ ܀ 93 :ܠܵܐ ܡܸܬܼܡܲܫܚܵܐ ܐܝܼܬܼܘܼܬܹܗ 94 ܕܲܟܼܡܵܐ ܩܲܕܿܝܼܡ ܠܲܒܼܪܵܫܝܼܬܼ. 95 :ܘܠܲܝܬܿ ܙܲܒܼܢܵܐ ܕܠܵܐ ܐܝܼܬܼܵܘܗܝ ܗ̄ܘ̣ܵܐ 96 ܕܲܩܕܼܵܡ ܟܠ ܗܘ̤ ܐܝܼܬܼܵܘܗܝ ܗ̄ܘ̣ܵܐ ܀ 97 :ܐܝܼܬܼܵܘܗܝ ܗ̄ܘ̣ܵܐ ܕܠܵܐ ܫܘܼܪܵܝܵܐ 98 ܟܝܵܢܵܐ ܐܝܼܬܼܝܵܐ ܘܲܓܼܡܝܼܪܵܐ. 99 :ܐܲܒܼܵܐ ܘܲܒܼܪܵܐ ܘܪܘܼܚ ܩܘܼܕܼܫܵܐ 100 ܩܢܘܿܡܹ̈ܐ ܬܠܵܬܼܵܐ ܚܲܕܼ ܚܲܝܠܵܐ ܀ 101 :ܐܲܒܼܵܐ ܓܡܝܼܪܵܐ ܕܠܵܐ ܫܘܼܪܵܝ 102 ܕܐܵܘܠܸܕܼ ܠܲܒܼܪܵܐ ܕܠܵܐ ܚܲܫܵܐ. 103 :ܘܲܒܼܪܵܐ ܕܡܸܢܹܗ ܐܲܟܼܘܵܬܹܗ 104 ܕܠܲܝܬܿ ܙܲܒܼܢܵܐ ܒܹܝܬܼ ܠܹܗ ܘܠܲܐܒܼܘܼܗܝ ܀ 105 :ܘܪܘܼܚܵܐ ܕܡܸܢܹܗ ܕܲܟܼܝܵܢܵܐ 106 ܩܢܘܿܡ̇ܐ ܐܝܼܬܼܝܵܐ ܘܫܲܪܝܼܪܵܐ. 107 :ܕܗ̤ܝ ܫܲܘܝܘܼܬܼܵܐ ܕܲܟܼܝܵܢܹܗ 108 ܣܵܗ̇ܕܼܵܐ ܕܐܝܼܬܼܝܵܐ ܗ̄ܘ̣ ܥܲܡ ܐܲܒܼܵܐ ܀ 109 :ܝܲܠܕܹܿܗ ܕܐܲܒܼܵܐ ܠܹܗ ܕܵܡܹ̇ܐ 110 ܕܐܝܼܬܼܵܘܗܝ ܥܲܡ ܐܲܒܼܘܼܗܝ ܡܸܡܬܼܘܿܡ. 111 :ܘܡܸܛܠ ܕܐܝܼܬܼܵܘܗܝ ܥܲܡ ܐܲܒܼܘܼܗܝ 112 ܠܵܐ ܚܵܒܼ̇ܫܝܼܢ ܙܲܒܼܢܹ̈ܐ ܠܝܲܠܕܹܿܗ ܀ 113 :ܝܲܠܕܹܿܗ ܕܐܲܒܼܵܐ ܠܹܗ ܕܵܡܹ̇ܐ 114 ܘܐܝܼܬܼܵܘܗܝ ܥܲܡܹܗ ܐܲܝܟ ܨܸܡܚܵܐ. 115 :ܕܒܲܡܘܼܬܼ ܨܸܡܚܵܐ ܥܲܡ ܢܘܼܪܵܐ 116 ܐܝܼܬܼܵܘܗܝ ܝܲܠܐܕܵܐ ܥܲܡ ܐܲܒܼܘܼܗܝ ܀ 117 :ܨܸܡܚܵܗ̇ ܕܢܘܼܪܵܐ ܥܲܡܵܐ ܗ̄ܘ̣ 118 ܘܠܲܝܬܹܿܝܗ̇ ܢܘܼܪܵܐ ܕܠܵܐ ܨܸܡܚܵܐ. 119 :ܕܗ̤ܝ ܥܲܡ ܨܸܡܚܵܗ̇ ܡܸܬܼܚܲܙܝܵܐ 120 ܘܨܸܡܚܵܐ ܥܲܡܵܗ̇ ܡܸܬܼܒܲܕܲܩ ܀ 121 :ܒܐܲܒܼܵܐ ܐܝܼܬܼܵܘܗܝ ܐܵܦ ܝܲܠܕܹܿܗ 122 ܘܲܒܼܪܵܐ ܥܲܡܹܗ ܕܠܵܐ ܫܘܼܪܵܝ. 123 :ܘܠܵܐ ܐܲܒܼܵܐ ܒܸܠܥܵܕܼ ܝܲܠܕܹܿܗ 124 ܘܠܵܐ ܒܪܵܐ ܒܸܠܥܵܕܼ ܝܵܠܘܿܕܹܗ ܀ 125 :ܠܵܘ ܐܲܝܟ ܨܸܡܚܵܐ ܡܸܬܼܩܲܝܲܡ 126 ܕܠܵܐ ܩܢܘܿܡ̇ܐ ܒܪܵܐ ܡ̣ܢ ܐܲܒܼܵܐ. 127 :ܐܸܠܵܐ ܩܢܘܿܡ̇ܐ ܗ̄ܘ̣ ܫܲܪܝܼܪܵܐ 128 ܘܨܲܠܡܵܐ ܕܕܼܵܡܹ̇ܐ ܠܝܵܠܘܿܕܹܗ ܀ 129 :ܠܵܐ ܐܲܒܼܵܐ ܒܪܵܐ ܡܸܬܼܟܲܢܸܐ 130 ܘܠܵܐ ܒܪܵܐ ܐܲܒܼܵܐ ܡܸܫܬܿܡܲܗ. 131 :ܕܦܘܼܪܫܵܢܵܐ ܕܲܫܡܵܗܲܝ̈ܗܘܿܢ 132 ܫܪܵܪܵܐ ܡܲܟܼܪܸܙ ܕܲܩܢܘܿܡܹ̈ܐ ܀ 133 :ܪܘܼܚܵܐ ܩܢܘܿܡ̇ܐ ܗ̄ܘ̣ ܡ̣ܢ ܐܲܒܼܵܐ 134 ܕܲܫܘܸܐ ܥܲܡܹܗ ܒܟܼܠܡܸܕܹܿܡ. 135 :ܐܲܝܟ ܕܲܫܘܸܐ ܒܪܵܐ ܥܲܡ ܐܲܒܼܵܐ 136 ܫܘܸܐ ܪܘܼܚܵܐ ܒܐܲܒܼܵܐ ܘܲܒܼܪܵܐ ܀ 137 :ܠܵܐ ܣܵܪܲܚ ܠܵܗܚ ܠܫܲܘܝܘܼܬܼܵܐ 138 ܫܘܼܚܠܵܦܵܐ ܕܲܫܡܵܗܲܝ̈ܗܘܿܢ. 139 :ܫܡܵܗܹ̈ܐ ܠܛܲܟܼܣܵܐ ܡܸܬܼܢܲܣܒܿܝܼܢ 140 ܘܲܩܢܘܿܡܹ̈ܐ ܫܘܹܝܢ ܒܐܝܼܬܼܘܼܬܼܵܐ ܀ 141 :ܒܢܲܦܫܲܢ ܨܵܪ ܠܲܢ ܬܲܚܘܝܼܬܼܵܐ 142 ܩܢܘܿܡܹ̈ܐ ܬܠܵܬܼܵܐ ܕܐܝܼܬܼܘܼܬܼܵܐ. pb. 183 143 :ܕܵܒܼܪܵܐ ܘܪܘܼܚܵܐ ܡ̣ܢ ܐܲܒܼܵܐ 144 ܐܲܝܟ ܡܸܠܬܼܵܐ ܘܚܲܝܹ̈ܐ ܘܢܲܦܫܵܐ ܀ 145 :ܥܲܡܵܗ̇ ܕܢܲܦܫܵܐ ܡܸܬܼܝܲܠܕܵܐ 146 ܡܸܠܬܼܵܐ ܘܚܲܝܠܵܐ ܘܚܲܝܘܼܬܼܵܐ. 147 :ܘܥܲܡܹܗ ܕܐܲܒܼܵܐ ܐܝܼܬܲܝܗܘܿܢ 148 ܒܪܵܐ ܘܪܘܼܚܵܐ ܕܠܵܐ ܫܘܼܪܵܝܵܐ ܀ 149 :ܬܪܹܝܢ ܚܲܝܠܹ̈ܐ ܠܘܹܝܢ ܠܗ̇ ܠܢܲܦܫܵܐ 150 ܡܸܠܬܼܵܐ ܘܚܲܝܘܼܬܼܵܐ ܥܲܡܵܗ̇. 151 :ܘܲܬܼܪܹܝܢ ܚܲܝܠܝܼ̈ܢ ܥܲܡ ܐܲܒܼܵܐ 152 ܒܪܵܐ ܘܪܘܼܚܵܐ ܕܠܵܐ ܫܘܼܪܵܝܵܐ ܀ 153 :ܒܪܵܐ ܝܲܠܕܵܐ ܕܠܵܐ ܫܘܼܪܵܝܵܐ 154 ܘܪܘܼܚܵܐ ܕܢܵܦܹ̇ܩ ܡ̣ܢ ܐܲܒܼܵܐ. 155 :ܚܲܕܼ ܝܲܠܕܵܐ ܘܚܲܕܼ ܢܵܦ̇ܘܿܩܵܐ 156 ܚܕܼܵܐ ܫܲܘܝܘܼܬܼܵܐ ܕܒܲܟܼܝܵܢܵܐ ܀ 157 :ܐܝܼܬܼܵܘܗܝ ܪܘܼܚܵܐ ܡ̣ܢ ܐܲܒܼܵܐ 158 ܘܠܵܐ ܡܸܬܼܟܲܢܸܐ ܒܫܸܡ ܝܲܠܕܵܐ. 159 :ܕܠܵܘ ܢܘܼܟܼܪܵܝܵܐ ܗ̄ܘ̣ ܒܲܟܼܝܵܢܵܐ 160 ܘܠܵܐ ܗ̄ܘ̣ܵܐ ܒܟܲܟܼܣܵܐ ܕܲܫܡܵܗܹ̈ܐ ܀ 161 :ܓܒܼܝܼܠܵܐ ܚܵܘܵܐ ܡ̣ܢ ܐܵܕܼܵܡ 162 ܘܠܲܝܬܹܿܝܗ̇ ܒܲܪܬܹܗ ܐܵܘ ܚܵܬܹܗ. 163 :ܘܟܲܕܼ ܡܸܢܹܗ ܗ̄ܝܼ ܒܲܟܼܝܵܢܵܐ 164 ܐܲܢ̄ܬܿܬܹܗ ܒܲܠܚܘܿܕܼ ܡܸܬܼܩܲܪܝܵܐ ܀ 165 :ܒܲܟܼܝܵܢܲܢ ܐܲܝܟ ܕܲܒܼܐ̄̈ܪܵܙܵܐ 166 ܨܵܪ ܠܲܢ ܛܘܼܦܣܵܐ ܕܐܝܼܬܼܘܼܬܹܗ. 167 :ܘܡܲܢ ܕܐܸܬܼܦܲܠܲܓܼ ܥܲܠ ܝܲܠܕܵܐ 168 ܢܸܚܙܸܐ ܒܕܼܝܼܠܲܢ ܬܲܚܘܝܼܬܹܗ ܀ 169 :ܒܹܗ ܒܲܟܼܝܵܢܲܢ ܚܲܟܸܿܡ ܠܲܢ 170 ܕܢܸܣܬܲܟܲܠ ܥܲܠ ܪܲܒܿܘܼܬܹܗ. 171 :ܕܐܸܢ ܕܝܼܠܲܢ ܠܵܐ ܓܼܠܝܵܐ ܠܲܢ 172 ܟܡܵܐ ܟܲܣܝܵܐ ܒܥܵܬܼܵܐ ܕܝܼܠܹܗ ܀ 173 :ܒܸܪ̈ܝܵܬܹܗ ܠܵܐ ܡܸܬܿܕܲܪ̈ܟܵܢ 174 ܘܲܥܒܼܵܕܼܵܘ̈ܗܝ ܥܲܣܩܝܼܢ ܡܸܢܲܢ. 175 :ܘܐܲܝܟܲܢ ܢܲܡܪܲܚ ܘܲܢܥܲܩܸܒܼ 176 ܥܲܠ ܐܝܼܬܼܘܼܬܹܗ ܕܠܵܐ ܫܘܼܪܵܝ ܀ 177 :ܥܒܼܷܝܼܕܼܵܐ ܠܵܐ ܡܨܸܐ ܕܲܢܥܲܩܸܒܼ 178 ܥܲܠ ܐܝܼܬܼܘܼܬܹܗ ܕܥܵܒܼ̇ܘܿܕܼܵܐ. 179 :ܟܡܵܐ ܕܒܼܵܥܹ̇ܐ ܕܐܲܝܟܲܢ ܫܲܪܝܼ 180 ܕܠܵܐ ܫܘܼܪܵܝܵܐ ܡܸܫܟܲܚ ܠܹܗ ܀ 181 :ܘܲܟܼܡܵܐ ܕܒܼܵܥܹ̇ܐ ܚܘܼܫܵܒܼܵܐ 182 ܕܲܢܥܲܩܸܒܼ ܥܲܠ ܐܝܼܬܼܘܼܬܹܗ. 183 :ܒܚܲܕܼܵܐ ܒܲܠܚܘܿܕܼ ܡܸܫܟܲܚ ܠܹܗ 184 ܕܠܵܐ ܡܸܣܬܲܝܲܟ ܒܲܟܼܝܵܢܹ̈ܗ ܀ 185 :ܬܸܣܦܲܩ ܗܵܕܹܐ ܠܲܒܼܥܵܬܲܢ 186 ܕܠܲܥܒܼܵܕܵܘ̈ܗܝ ܢܸܒܼܨܸܐ ܒܲܠܚܘܿܕܼ. 187 :ܘܲܒܼܥܵܬܼܵܐ ܕܥܲܠ ܐܝܼܬܼܘܼܬܹܗ 188 ܒܫܸܬܼܩܵܐ ܡܸܢܲܢ ܬܸܬܼܝܲܩܲܪ ܀ 189 :ܢܸܫܡܲܥ ܕܹܝܢ ܥܲܠ ܬܘܼܩܵܢܵܘ̈ܗܝ 190 ܘܲܢܫܲܒܲܚ ܠܲܥܒܼܵܕܼ̇ ܐܝܼܕܼܵܘ̈ܗܝ. 191 :ܕܚܲܝܵܒܼ ܗ̄ܘ̣ ܥܒܼܝܼܕܼܵܐ ܕܢܵܘܕܸܿܐ 192 ܠܒܼܵܪܘܿܝܵܐ ܥܲܠ ܟܠ ܕܲܒܼܪܵܐ ܀ 193 :ܕܫܲܪܝܼ ܒܪܵܫܝܼܬܼ ܒܲܒܼܪܝܼܬܼܵܐ 194 ܗܵܕܹܐ ܫܡ݂ܲܥܢܲܢ ܡ̣ܢ ܡܘܼܫܹܐ. 195 :ܘܲܕܼܩܲܕܿܝܼܡ ܗ̄ܘ̣ ܠܲܒܼܪܵܫܝܼܬܼ 196 ܕܐܲܝܟܲܢ ܘܲܟܼܡܵܐ ܠܵܐ ܢܸܒܼܥܸܐ ܀ 197 :ܢܸܒܼܥܸܐ ܕܹܝܢ ܐܲܝܟ ܝܵܕܲܘܿܥܹ̈ܐ 198 ܒܥܵܬܼܵܐ ܕܦܲܐܝܵܐ ܠܥܒܼܝܼܕܹ̈ܐ. 199 ܕܡ̇ܢܲܐ ܗ̄ܝܼ ܥܸܠܬܼܵܐ ܕܡܲܫܡܲܥܥ ܗ̄ܘ̣ܵܐ: pb. 184 200 ܒܲܪ̄ܬܼ ܩܵܠܵܐ ܥܲܠ ܬܘܼܩܵܢܵܘ̈ܗܝ ܀ 201 :ܒܪܵܫܝܼܬܼ ܕܹܝܢ ܫܲܪܝܼ ܘܲܒܼܪ̣ܵܐ 202 ܫܡܲܝܵܐ ܘܐܲܪܥܵܐ ܩܲܕܼܡ̇ܝܑܬܼ. 203 :ܘܲܟܼܝܵܢܹ̈ܐ ܐ̄ܚܪ̈ܵܢܹܐ ܚܲܡܫܵܐ 204 ܕܠܵܐ ܩܪ̣ܵܐ ܐܸܢܘܿܢ ܒܲܫܡܵܗܹ̈ܐ ܀ 205 :ܒܗܵܕܹܐ ܕܹܝܢ ܡܸܠܬܼܵܐ ܚܒܼܝܼܫܝܼܢ 206 ܒܓܼܵܘ ܬܘܼܩܵܢܵܐ ܕܲܒܼܪܵܫܝܼܬܼ. 207 :ܢܘܼܪܵܐ ܘܡܲܝ̈ܐ ܘܚܸܫܘܿܟܼܵܐ 208 ܘܡܲܠܲܐܟܹ̈ܐ ܡܠܝܼܠܹ̈ܐ ܘܚܲܪ̈ܫܹܐ ܀ 209 :ܒܗܵܕܹܐ ܡܸܠܬܼܵܐ ܕܲܒܼܪܵܫܝܼܬܼ 210 ܚܒ݂ܲܫ ܬܘܼܩܵܢܵܐ ܕܡܲܠܲܐܟܹ̈ܐ. 211 :ܘܗ̤ܘ ܒܵܪܘܿܝܵܐ ܕܟܼܠܡܸܕܹܿܡ 212 ܒܪ̣ܵܐܐ ܐܸܢܘܿܢ ܡ̣ܢ ܠܵܐ ܡܸܕܹܿܡ ܀ 213 :ܒܗܵܢ ܬܘܼܩܵܢܵܐ ܕܲܒܼܪܵܫܝܼܬܼ 214 ܠܵܐ ܐܸܡ݂ܲܕ ܕܐܲܫܡܲܥ ܩܵܠܵܐ. 215 :ܕܠܲܝܬܿ ܗ̄ܘ̣ܵܐ ܥܒܼܝܼܕܼܵܬ ܕܫܵܡܲ݁ܥ ܗ̄ܘ̣ܵܐ 216 ܕܲܡܩܲܒܸܿܠ ܗ̄ܘ̣ܵܐ ܝܘܼܠܦܵܢ̇ܐ ܀ 217 :ܟܲܕܼ ܕܹܝܢ ܫܲܪܝܼ ܒܲܟܼܝܵܢܹ̈ܐ 218 ܕܚܲܕܼ ܒܵܬܲܪ ܚܲܕܼ ܗܵܘܹ̇ܝܢ ܗ̄ܘ̣ܵܘ. 219 :ܒܒܲܪ̄ܬܼ ܩܵܠܵܐ ܨܒܼܵܐ ܕܲܢܒܲܕܸܿܩ 220 ܥܲܠ ܬܘܼܩܵܢܹܗ ܠܡܲܠܲܐܟܹ̈ܐ ܀ 221 :ܥܸܠܬܼܵܐ ܕܒܲܪ̄ܬܼ ܩܵܠܵܐ ܗܵܕܿܐ ܗ̄ܝܼ 222 ܕܲܠܪ̈ܘܼܚܵܢܹܐ ܢܲܠܸܦ ܗ̄ܘ̣ܵܐ. 223 :ܕܗܵܘ̇ ܡ̇ܪܵܐ ܕܟܼܠܗܹܝܢ ܡܲܬܼܩܸܢ 224 ܗܘ̤ܝܘܼ ܕܐܲܩܝܼܡ ܟܸܢܫܲܝ̈ܗܘܿܢ ܀ 225 :ܐܹܝܘ ܩܵܠܵܐ ܕܡ̣ܢ ܟܠ ܚܲܣܝܼܢ 226 ܕܲܒܼܪܵܫܝܼܬܼ ܡܸܬܼܡܲܠܲܠ ܗ̄ܘ̣ܵܐ. 227 :ܘܠܲܟܼܝܵܢܹ̈ܐ ܡܸܬܼܝܲܕܼܥܵܢܹ̈ܐ 228 ܒܚܘܼܒܵܐ ܠܘܵܬܹܗ ܢܵܓܹ̇ܕܼ ܗ̄ܘ̣ܵܐ ܀ 229 :ܡܟܲܣܸܐ ܗ̄ܘ̣ܵܐ ܕܹܝܢ ܚܸܫܘܿܟܼܵܐ 230 ܠܪܵܘܡ̇ܐ ܘܥܘܼܡܩܵܐ ܫܲܘܝܵܐܝܼܬܼ. 231 :ܘܐܲܪܥܵܐ ܒܡܲܝܵ̈̄ܐ ܛܡܝܼܪܵܐ ܗ̄ܘ̣ܵܬܼ 232 ܥܲܕܼܠܵܐ ܬܩܲܒܸܿܠ ܬܘܼܩܵܢܵܐ ܀ 233 :ܕܠܵܐ ܚܙܵܬܼܵܐ ܘܠܵܐ ܬܘܼܩܵܢܵܐ 234 ܐܝܼܬܹܝܗ̇ ܗ̄ܘ̣ܵܬܼ ܐܲܪܥܵܐ ܒܪܵܫܝܼܬܼ. 235 :ܘܠܵܐ ܡܬܲܩܲܢܬܵܐ ܩܵܪܹܐ ܠܵܗ̇ 236 ܕܠܵܐ ܡܨܲܒܿܬܼܵܐ ܗ̄ܘ̣ܵܬܼ ܒܐܝܼܠܵܢܹ̈ܐ ܀ 237 :ܪܘܼܚܵܐ ܠܲܡ ܡܸܬܼܝܲܒܲܠܠ ܗ̄ܘ̣ܵܐ 238 ܠܥܸܠ ܡ̣ܢ ܡܲܝ̈ܵܐ ܕܲܬܼܗܘܿܡܹ̈ܐ. 239 :ܟܲܕܼ ܩܵܪܹܐ ܪܘܼܚܵܐ ܕܐܵܐܲܪ 240 ܠܡܲܫܒܼܵܐ ܕܪܘܼܚܵܐ ܩܲܛܝܼܢܵܐ ܀ 241 :ܗܘ̤ܵܬܼ ܕܹܝܢ ܡܸܠܬܹܗ ܕܥܵܒܼ̇ܘܿܕܼܵܐ 242 ܚܠܵܦ ܬܘܼܩܵܢܵܐ ܕܝܘܼܠܦܵܢܵܐ. 243 :ܘܐܲܫܡܲܥ ܩܵܠܵܐ ܠܡܲܠܲܐܟܹ̈ܐ 244 ܕܢܸܫܗܘܸܐ ܢܘܼܗܪܵܐ ܡܲܢܗܲܪ ܟܠ ܀ 245 :ܐܹܝܘ ܩܵܠܵܐ ܕܡ̣ܢ ܠܵܐ ܡܸܕܸܿܡ 246 ܐܲܝܬܿܝܼ ܢܘܼܗܪܵܐ ܠܲܗܘܵܝܵܐ. 247 :ܐܹܝܘ ܢܘܼܗܪܵܐ ܕܥܲܡܹܗ ܕܫܸܡܥܵܐ 248 ܟܝܵܢܵܐ ܕܠܲܝܬܼܵܘܗܝ ܐܸܬܿܬܲܩܲܢ ܀ 249 :ܪܲܕܼܦܹܗ ܢܘܼܗܪܵܐ ܠܚܸܫܘܿܟܼܵܐ 250 ܕܲܦܪܝܼܣ ܗ̄ܘ̣ܵܐ ܥܲܠ ܒܸܪ̈ܝܵܬܼܵܐ. 251 :ܘܲܬܼܗܲܪܘ ܐܲܟܲܚ̄ܕܼ ܪ̈ܘܼܚܵܢܹܐ 252 ܒܚܲܝܠܵܐ ܕܝܗ̣̄ܒܼ ܠܹܗ ܫܘܼܠܛܵܢܵܐ ܀ 253 :ܘܥܲܠ ܡܸܠܬܼܵܐ ܕܲܒܼܪ̣ܵܐ ܢܘܼܗܪܵܐ 254 ܐܲܫܡܲܥ ܬܘܼܒܼ ܩܵܠܵܐ ܐ̄ܚܪܹܢܵܐ. 255 :ܕܲܡܫܲܒܲܚ ܠܹܗ ܠܬܼܘܼܩܵܢܹܗ 256 ܕܫܲܦܝܼܪ ܡܸܢܹܗ ܐܸܬܿܬܲܩܲܢ ܀ 257 :ܐܹܝܘ ܐܘܼܡ̇ܢܵܐ ܚܲܟܿܝܼܡܵܐ 258 :ܕܲܟܼܡܵܐ ܙܗܝܼܪ ܒܹܗ ܒܬܼܘܼܩܵܢܹܐ 259 :ܣܵܡ̣ ܠܹܗ ܬܚܘܼܡ̇ܐ ܠܢܲܗܝܼܪܵܐ 260 ܕܲܟܼܡܵܐ ܘܵܠܹ̇ܐ ܕܢܸܫܲܠܲܛ ܀ 261 :ܦܪ݂ܲܫ ܒܹܝܬܼ ܢܘܼܗܪܵܐ ܠܚܸܫܘܿܟܼܵܐ 262 ܕܠܵܐ ܢܸܣܥܸܐ ܚܲܕܼ ܥܲܠ ܚܲܒܼܪܹܗ. pb. 185 263 :ܘܣܵܡ̣ ܢܵܡܘܿܣܵܐ ܠܪ̈ܲܗܛܲܝܗܘܿܢ 264 ܒܫܵܥܹ̈ܐ ܕܠܸܠܝܵܐ ܘܕܐܝܼܡܵܡܵܐ ܀ 265 :ܩܪ̣ܵܐ ܕܹܝܢ ܠܢܘܼܗܪܵܐ ܐܝܼܡܵܡܵܐ 266 ܘܲܠܸܫܘܼܟܼܵܐ ܩ̣ܪܵܐ ܠܸܠܝܵܐ. 267 :ܘܒܲܫܡܵܗܹ̈ܐ ܟܲܢܝܼ ܐܸܢܘܿܢ 268 ܠܦܘܼܬܼ ܣܘܼܥܪ̈ܵܢܹܐ ܕܫܵܥܲܝ̈ܗܘܿܢ ܀ 269 :ܗܘ̤ܵܐ ܕܹܝܢ ܪܲܡܫܵܐ ܐܵܦ ܨܲܦܪܵܐ 270 ܝܵܘܡ̇ܐ ܐܲܝܟ ܡ̇ܐ ܕܲܟܼܬܼܝܼܒܼ. 271 :ܘܲܩ̣ܪܵܝܗܝ ܝܵܘܡ̇ܐ ܩܲܕܼܡ̇ܝܵܐ 272 ܕܠܲܝܬܿ ܗ̄ܘ̣ܵܐ ܐ̄ܚܪܹܢܵܐ ܕܐܲܟܼܘܵܬܹܗ ܀ 273 :ܣܵܡ̣ ܠܹܗ ܕܹܝܢ ܐܵܦ ܫܘܼܪܵܝܵܐ 274 ܠܸܠܝܵܐ ܠܝܵܘܡ̇ܐ ܩܲܕܼܡ̇ܝܵܐ. 275 :ܕܢܸܛܲܪ ܛܲܟܼܣܵܐ ܕܲܒܼܪܝܼܬܹܗ 276 ܕܚܸܫܘܿܟܼܵܐ ܗܘ̤ܵܐ ܩܲܕܼܡ̇ܝܑܬܼ ܀ 277 :ܫܠܸ݂ܡ ܕܹܝܢ ܝܵܘܡ̇ܐ ܩܲܕܼܡ̇ܝܵܐ 278 ܠܹܠܲܝ ܐܝܼܡܵܩ ܚܲܕܼ ܝܵܘܡ̇ܐ. 279 :ܘܐܲܙܥܸܩ ܬܘܼܒܼ ܩܵܠܵܐ ܐ̄ܚܪܹܢܵܐ 280 ܕܢܗܘܸܐ ܪܩܝܼܥܵܐ ܡ̣ܢ ܡܝ̈ܵܐ ܀ 281 :ܐܹܝܘ ܩܵܠܵܐ ܩܢܸܐ ܫܘܼܠܛܵܢܵܐ 282 ܕܥܲܡܵܗ̇ ܕܡܸܠܬܼܵܐ ܣܘܼܥܪܵܢܵܐ. 283 :ܐܹܝܘ ܚܲܝܠܵܐ ܕܡ̣ܢ ܪ̈ܲܦܝܵܬܼܵܐ 284 ܚܲܝܸܨ ܘܲܥܒ݂ܲܕܼ ܩܲܫ̈ܝܵܬܼܵܐ ܀ 285 :ܡ̣ܢ ܡܲܝ̈ܵܐ ܒܪ̣ܵܝܗܝ ܠܲܪܩܝܼܥܵܐ 286 ܕܢܸܛܥܲܢ ܡܲܝ̈ܵܐ ܠܥܸܠ ܡܸܢܹܗ. 287 :ܘܲܩܪ̣ܵܝܗܝ ܒܲܡܫܵܐ ܕܲܫܡܲܝܵܐ 288 ܗܵܘ̇ ܩܲܕܼܡ̇ܝܵܐ ܕܲܒܼܪܵܫܝܼܬܼ ܀ 289 :ܐܲܝܟ ܬܲܛܠܝܼܠܵܐ ܩܲܪܝܼܒܼܵܐ 290 ܥܒ݂ܲܕܼ ܠܲܪܩܝܼܥܵܐ ܒܲܡܨܲܥܬܼܵܐ. 291 :ܕܢܸܗܘܸܐ ܩܲܪܝܼܒܼ ܠܲܚܙܵܬܼܵܐ 292 ܘܦܵܪܹܫ ܒܹܝܬܼ ܡܲܝ̈ܵܐ ܠܡܲܝܵ̈ܐ ܀ 293 :ܐܹܝܘ ܡܲܬܼܩܵܠܵܐ ܕܠܵܐ ܪܵܥܹ̇ܠ 294 ܕܦܲܠܸܓܼ ܡܲܝ̈ܵܐ ܫܲܘܝܵܐܝܼܬܼ. 295 :ܦܸܠܓܵܐ ܠܐܲܪܥܵܐ ܠܲܚܫܲܚܬܼܵܗ̇ 296 ܘܦܸܠܓܵܐ ܠܝܲܨܹܗ ܕܲܪܩܝܼܥܵܐ ܀ 297 :ܐܹܝܘ ܐܘܼܡ̇ܢܵܐ ܡܲܬܼܩܸܢ ܟܠ 298 ܕܝܼܕܲܥܬܹܗ ܠܵܐ ܡܸܬܿܕܲܪܟܵܐ. 299 :ܕܥܲܕܼܠܵܐ ܢܫܲܪܸܐ ܒܲܥ̇ܒܼܵܕܼܵܐ 300 ܝܵ̇ܕܲܥ ܗ̄ܘ̣ܵܐ ܡ̇ܢ ܚܵܫܲ݁ܚ ܠܹܗ ܀ 301 :ܥܬܼܝܼܕܼ ܗ̄ܘ̣ܵܐ ܕܢܸܬܼܠܸܐ ܢܲܗܝܼܪܹ̈ܐ 302 ܟܝܵܢܵܐ ܕܢܘܼܪܵܐ ܒܲܪܩܝܼܥܵܐ. 303 :ܘܐܲܣܸܢ ܡܲܝ̈ܵܐ ܠܥܸܠ ܡܸܢܹܗ 304 ܕܠܵܐ ܢܸܣܬܲܝܲܛ ܡ̣ܢ ܢܘܼܪܵܐ ܀ 305 :ܝܵ̇ܕܲܥ ܗ̄ܘ̣ܵܐ ܬܘܼܒܼ ܒܵܪܘܿܝܵܐ 306 ܥܲܕܼܠܵܐ ܢܸܒܼܪܸܐ ܟܠ ܕܲܗܘ̤ܵܐ. 307 :ܕܥܘܼܡܪܵܐ ܐ̄ܚܪܹܢܵܐ ܚܵܫܲ݁ܚ ܗ̄ܘ̣ܵܐ 308 ܠܲܡܠܝܼܠܹ̈ܐ ܒܫܘܼܠܵܡ ܙܲܒܼܢܹ̈ܐ ܀ 309 :ܘܥܲܠ ܗܵܕܹܐ ܒܪ̣ܵܝܗܝ ܠܲܪܩܝܼܥܵܐ 310 ܐܲܝܟ ܬܲܛܠܝܼܠܵܐ ܒܲܡܨܲܥܬܼܵܐ. 311 :ܕܲܒܼܫܘܼܠܵܡܵܐ ܢܸܗܘܸܐ ܠܲܢ 312 ܕܘܼܟܲܬܼ ܐܲܪܥܵܐ ܠܲܢܝܵܚܲܢ ܀ 313 :ܗܘ̤ܵܐ ܕܹܝܢ ܨܲܦܪܵܐ ܐܲܝܟ ܪܲܡܫܵܐ 314 ܘܝܵܘܡ̇ܐ ܕܲܬܼܪܹܝܢ ܐܸܫܬܲܠܲܡ. 315 :ܘܲܦܢ̣ܵܐ ܘܫܲܒܿܚܹܗ ܠܬܼܘܼܩܵܢܹܗ 316 ܕܫܲܦܝܼܪ ܡܸܢܹܗ ܐܸܬܿܬܲܩܲܢ ܀ 317 :ܗܘ̤ܵܐ ܕܹܝܢ ܪܲܡܫܵܐ ܕܲܬܼܠܵܬܼܵܐ 318 ܕܠܵܐ ܡܫܲܓܼܢܲܢ ܡ̣ܢ ܩܲܕܼܡ̇ܝܵܐ. 319 :ܕܚܲܕܼ ܗ̄ܘ̣ ܚܲܝܠܵܐ ܦܵܩܹ̇ܕܼ ܗ̄ܘ̣ܵܐ 320 ܕܢܸܗܘܸܬ ܡܸܕܸܿܡ ܘܲܗܘ̤ܵܐ ܠܹܗ ܀ 321 :ܢܸܬܼܟܲܢܫܘܼܢ ܡܲܝ̈ܵܐ ܐܸܡ݂ܲܪ 322 ܘܢܸܗܘܘܿܢ ܝܲܡܡܹ̈ܐ ܒܐܲܬܼܪܵܐ ܚܲܕܼ. 323 ܘܢܸܬܼܓܲܠ̈ܝܵܢ ܐܲܦܹܝ̈ܗ̇ ܕܐܲܪܥܵܐ: pb. 186 324 ܕܬܸܗܘܸܐ ܚܵܫ̇ܚܵܐ ܠܲܥܡܘܼܪܝܵܐ ܀ 325 :ܐܹܝܘ ܦܘܼܩܕܵܢܵܐ ܕܠܵܐ ܠܵܠܹ̇ܐ 326 ܐܹܝܘ ܡܸܠܬܼܵܐ ܕܠܵܐ ܡܸܬܼܥܵܘܕܼܵܐ. 327 :ܕܥܲܡܹܗ ܕܲܦܩ݂ܲܕܼ ܨܸܒܼܝܵܢܹܗ 328 ܐܸܬܼܟܲܢܲܫܘ ܡܲܝ̈ܵܐ ܠܝܲܡܡܹ̈ܐ ܀ 329 :ܢܸܗܪܲܬ̤ ܐܲܪܥܵܐ ܘܐܸܬܼܦܲܨܚܲܬ̤ 330 ܘܲܢܦ݂ܲܩ ܥܠܹܝܗ̇ ܦܘܼܩܕܵܪܢܵܐ. 331 :ܬܲܦܸܩ ܠܲܡ ܐܲܪܥܵܐ ܘܬܼܵܘܥܸܐ 332 ܥܸܣ̈ܒܹܿܐ ܘܙܲܪ̈ܥܹܐ ܘܐܝܼܠܵܢܹܐ ܀ 333 :ܗܘ̤ܵܐ ܦܘܼܩܕܵܢܵܐ ܒܲܥܒܼܵܕܵ݁ܐ 334 ܘܐܸܨܛܲܒܿܬܲܬ̤ ܐܲܪܥܵܐ ܒܦܹܐܪܹ̈ܐ. 335 :ܘܲܗܘ̤ܵܘ ܙܲܪ̈ܥܹܐ ܘܐܝܼܠܵܢܹ̈ܐ 336 ܘܫܲܒܿܚܹܗ ܛܵܒܼܵܐ ܠܬܼܘܼܩܵܢܹܗ ܀ 337 :ܗܘ̤ܵܐ ܕܹܝܢ ܪܲܡܫܵܐ ܐܵܦ ܨܲܦܪܵܐ 338 ܝܵܘܡ̇ܐ ܫܲܠܡܵܐ ܕܲܬܼܠܵܬܼܵܐ. 339 :ܘܲܢܦܲܩ̣ ܦܘܼܩܕܵܢܵܐ ܐ̄ܚܪܹܢܵܐ 340 ܘܦܲܩܸܕܼ ܕܢܸܗܘܘܿܢ ܢܲܗܝܼܪܹ̈ܐ ܀ 341 :ܢܗܘܘܿܢ ܠܲܡ ܕܹܝܢ ܢܲܗܝܼܪܹ̈ܐ 342 ܒܲܪܩܝܼܥܵܐ ܠܥܸܠ ܡ̣ܢ ܐܲܪܥܵܐ. 343 :ܕܙܲܒܼܢܹ̈ܐ ܘܝܲܪ̈ܚܹܐ ܘܲܫ̈ܢܲܝܵܐ 344 ܒܝܲܕܼ ܪ̈ܲܗܛܲܝܗܘܿܢ ܢܸܬܼܝܲܕܼܥܘܼܢ ܀ 345 :ܢܸܦܩܲܬ̤ ܡܸܠܬܼܵܐ ܠܲܥܒܼܵܕܼܵ݁ܐ 346 ܘܲܗܘ̤ܵܘ ܡܸܢܫܹܠܝ ܢܲܗܝܼܪܹ݁ܐ. 347 :ܘܣܵܡ̣ ܢܵܡܘܿܣܵܐ ܕܠܵܐ ܥܵܒܲ݁ܪ 348 ܠܪܲܗܛܵܐ ܕܠܸܠܝܵܐ ܘܕܐܝܼܡܵܡܵܐ ܀ 349 :ܐܹܝܘ ܐܘܼܡ̇ܢܵܐ ܡܨܲܒܸܿܕܼ ܟܠ 350 ܕܲܒܼܟܼܠ ܫܲܠܝܼܛ ܨܸܒܼܝܵܢܹܗ. 351 :ܕܡ̣ܢ ܡܸܕܹܿܡ ܘܡ̣ܢ ܠܵܐ ܡܸܕܸܿܡ 352 ܦܫܝܼܩ ܠܹܗ ܕܢܸܥܒܸܿܕܼ ܟܠܡܸܕܸܿܡ ܀ 353 :ܡ̣ܢ ܢܘܼܗܪܵܐ ܒܪ̣ܵܐ ܢܲܗܝܼܪܹ̈ܐ 354 ܡ̣ܢ ܗܵܘ̇ ܢܘܼܗܪܵܐ ܩܲܕܼܡ̇ܝܵܐ. 355 :ܟܲܕܼ ܦܲܠܓܹܗ ܠܲܡ̈ܢܵܘܵܬܼܵܐ 356 ܠܣܲܗܪܵܐ ܘܟܼܵܘܟܿܒܹ̈ܐ ܘܲܠܫܸܡܫܵܐ ܀ 357 :ܠܵܐ ܩܒ݂ܲܥ ܐܸܢܘܿܢ ܒܲܪܩܝܼܥܵܐ 358 :ܕܠܵܐ ܢܸܬܼܥܵܘܟܼܘܼܢ ܪ̈ܲܗܛܲܝܗܘܿܢ 359 :ܐܲܝܟ ܩܲܢܘܿܕܲܝܼܠܹ݁̈ܐ ܬܠ̣ܵܐ ܐܸܢܘܿܢ 360 ܘܛܲܟܸܿܣ ܪܲܗܛܵܐ ܕܫܵܥܲܝ̈ܗܘܿܢ ܀ 361 :ܫܠܸ̣ܡ ܕܹܝܢ ܝܵܘܡ̇ܐ ܪܒܼܝܼܥܵܐ 362 ܒܲܬܼܚܘܼܡ̇ܐ ܕܪܲܡܫܵܐ ܘܨܲܦܪܵܐ. 363 :ܘܲܢܦܲܩ̣ ܦܘܼܩܕܵܢܵܐ ܐ̄ܚܪܹܢܵܐ 364 ܕܢܸܗܘܸܐ ܪ̈ܲܚܫܵܐ ܡ̣ܢ ܡܝܵ̈ܐ ܀ 365 :ܘܐܵܘܠܸܕܼܘ ܡܲܝ̈ܵܐ ܚܲܝ̈ܘܵܬܼܵܐ 366 ܓܸܢܣܵܢܹ̈ܐ ܕܠܵܐ ܡܸܢܝܵܢܵܐ. 367 :ܪ̈ܲܚܫܵܐ ܘܢܘܼܢܹ̈ܐ ܘܬܲܢܝܼܢܹ̈ܐ 368 ܘܚܲܝ̈ܘܵܬܼܵܐ ܩܵܛ̈ܘܿܠܵܬܼܵܐ ܀ 369 :ܐܹܝܘ ܚܲܝܠܵܐ ܕܲܦܫܝܼ̈ܩܵܢ ܠܹܗ 370 ܥܲܣ̈ܩܵܬܼܵܐ ܐܲܝܟ ܨܸܒܼܝܵܢܹܗ. 371 :ܕܡ̣ܢ ܡܲܝܵ̈ܐ ܪܲܟܸܿܒܼ ܘܲܥܒ݂ܲܕܼ 372 ܓܸܢܣܵܢܹ̈ܐ ܕܠܵܐ ܡܸܢܝܵܢܵܐ ܀ 373 :ܡ̣ܢ ܡܲܝ̈ܵܐ ܒܪ̣ܵܐ ܦܵܪ̈ܚܵܬܼܵܐ 374 ܟܝܵܢܵܐ ܕܣܵܚܹ̇ܐ ܥܲܠ ܐܵܐܲܪ. 375 :ܘܟܲܕܼ ܡ̣ܢ ܡܲܝ̈ܵܐ ܗ̄ܝܼ ܐܲܝܟ ܪ̈ܲܚܫܵܐ 376 ܛܥܝܼܢ ܠܵܗ̇ ܐܵܐܲܪ ܘܲܡܗܲܠܸܟ ܀ 377 :ܐܹܝܘ ܛܵܒܼܵܐ ܟܡܵܐ ܪܲܒܿ ܚܘܼܒܹܿܗ 378 ܕܢܵܛܲ̇ܪ ܪܸܡܙܹܗ ܠܩܸܢܝܵܢܵܘ̈ܗܝ. 379 :ܕܲܒܼܫܘܼܠܵܡ ܬܘܼܩܵܢܲܝ̈ܗܘܿܢ 380 ܒܒܼܘܼܪ̈ܟܵܬܼܵܐ ܙܵܘܸܕܼ ܐܸܢܘܿܢ ܀ 381 :ܐܵܘܠܸܕܼܘ ܠܲܡ ܘܲܣܓܼܵܘ ܒܐܲܪܥܵܐ 382 ܒܝܲܡܵܐ ܘܝܲܒܼܫܵܐ ܫܲܘܝܵܐܝܼܬܼ. 383 ܟܲܕܼ ܡܸܬܼܢܲܛܪܝܼܢ ܓܸܢܣܲܝ̈ܟܿܘܿܢ: pb. 187 384 ܒܝܘܼܒܵܠܵܐ ܚܲܓܕܼ ܒܵܬܲܪ ܚܲܕܼ ܀ 385 :ܒܝܵܘܡ̇ܐ ܚܡܝܼܫܵܝܵܐ ܫܲܠܸܡ 386 ܒܪܝܼܬܼܵܐ ܕܪ̈ܲܚܫܵܐ ܘܦܵܪ̈ܚܵܬܼܵܐ. 387 :ܘܲܒܼܝܵܘܡ̇ܐ ܕܸܫܬܵܐ ܫܲܪܝܼ 388 ܕܢܸܒܼܪܸܐ ܚܲܝܘ̄ܬܼܵܐ ܘܲܒܼܥܝܼܪܵܐ ܀ 389 :ܬܲܦܸܩ ܠܲܡ ܐܲܪܥܵܐ ܘܬܲܝܬܸܿܐ 390 ܢܲܦܫܵܐ ܚܲܝܬܼܵܐ ܕܟܼܠ ܓܸܢܣܝܼ̈ܢ. 391 :ܚܲܝܘܲܬܼ ܫܸܢܵܐ ܘܲܒܼܥܝܼܪܵܐ 392 ܘܪ̈ܲܚܫܵܐ ܝܲܠܕܵܐ ܕܡ̣ܢ ܐܲܪܥܵܐ ܀ 393 :ܐܹܝܘ ܟܝܵܢܵܐ ܚܲܪܫܵܐ ܕܐܲܦܪܲܥ 394 ܚܲܝ̈ܘܵܬܼܵܐ ܡ̣ܢ ܓܵܘ ܥܘܼܒܹܿܗ. 395 :ܕܟܲܕܼ ܡܸܕܼܪܵܐ ܗ̄ܘ̣ ܫܝܼܛ ܒܲܚܙܵܬܼܵܐ 396 ܐܵܘܠܸܕܼ ܫܘܼܦܪܵܐ ܕܟܼܠ ܓܸܢܣܝܼ̈ܢ ܀ 397 :ܠܵܘ ܗܘ̤ ܐܵܘܠܸܕܼ ܒܲܟܼܝܵܢܹܗ 398 :ܐܸܠܵܐ ܚܲܝܠܵܐ ܕܥܵܒܼܘܿܕܹܗ 399 :ܗܵܘ̇ ܕܲܪܩܲܥ̣ ܐܲܪܥܵܐ ܒܪܵܫܝܼܬܼ 400 ܦܩ݂ܲܕܼ ܠܵܗ̇ ܘܝܸܠܕܲܬ̤ ܚܲܝ̈ܘܵܬܼܵܐ ܀ 401 :ܒܝܵܘܡ̇ܐ ܕܸܫܬܼܵܐ ܐܸܬܼܒܲܪܝܲܬ̤ 402 ܒܥܝܼܪܵܐ ܘܚܲܝܘ̄ܬܼܵܐ ܥܲܡ ܐܵܕܼܵܡ. 403 :ܕܗܵܠܹܝܢ ܕܥܵܗ̈ܢܵܢ ܠܦܘܼܠܚܵܢܹܗ 404 ܥܲܡܹܗ ܢܩܲܒܿܠ݁̈ܢ ܬܘܼܩܵܢܵܐ ܀ 405 :ܒܝܵܘܡ̇ܐ ܕܸܫܬܵܐ ܐܸܫܬܲܠܲܡ 406 ܬܘܼܩܵܢܵܐ ܕܟܼܠܡܵܐ ܕܲܗܘ̤ܵܐ. 407 :ܘܚܵܘܝܼ ܚܲܝܠܹܗ ܒܵܪܘܿܝܵܐ 408 ܒܲܥܒܼܵܕܵܘ̈ܗܝ ܕܐܸܡ݂ܲܪ ܘܲܗܘ̤ܵܘ ܀ 409 :ܒܝܵܘܡ̇ܐ ܫܒܼܝܼܥܵܝܵܐ ܐܸܬܿܬܿܢܝܼܚ 410 ܥܵܒܼ݁ܘܿܕܼܵܐ ܡ̣ܢ ܬܘܼܩܵܢܵܘ̈ܗܝ. 411 :ܘܒܲܪܟܹܗ ܠܝܵܘܡ̇ܐ ܫܒܼܝܼܥܵܝܵܐ 412 ܘܲܩܪ̣ܵܝܗܝ ܝܵܘܡ̇ܐ ܩܲܕܿܝܼܫܵܐ ܀ 413 :ܠܵܐ ܓܹܝܪ ܠܵܠܹ̇ܐ ܗܵܘ̇ ܚܲܝܠܵܐ 414 ܘܠܵܐ ܡܸܬܼܥܵܘܲܟ ܨܼܒܼܝܵܢܹܗ. 415 :ܗܘ̤ܵܐ ܡܸܕܹܿܡ ܡ̣ܢ ܠܵܐ ܡܸܕܹܿܡ 416 ܠܸܫܬܵܐ ܝܵܘܡܝܼ̈ܢ ܛܠܡܸܕܹܿܡ ܀ 417 ܠܵܐ ܗ̄ܘ̣ܵܐ ܕܥܲܣܩܵܐ ܠܨܸܒܼܝܵܢܹܗ. 418 ܠܵܐ ܒܪ̣ܵܐ ܡܸܚܕܼܵܐ ܟܠܡܸܕܹܿܡ. 419 :ܕܲܒܼܚܲܕܼ ܝܘܿܡ ܘܲܒܼܣܲܓܿܝܼ̈ܠܹܐ 420 ܫܘܸܐ ܠܹܗ ܕܢܸܥܒܸܿܕܼ ܟܠܡܸܕܹܿܡ ܀ 421 :ܛܲܟܼܣܵܐ ܥܒܲܕܼ ܠܵܗ̇ ܠܲܒܼܪܝܼܬܹܗ 422 ܐܲܝܟܲܢܵܐ ܕܗܘ̤ ܝܵ̇ܕܲܥ ܗ̄ܘ̣ܵܐ. 423 :ܘܲܠܝܘܼܠܦܵܢܵܐ ܕܲܡܠܝܼܠܹ̈ܐ 424 ܠܸܫܬܵܐ ܝܵܘ̈ܡܝܼܢ ܫܲܠܸܡ ܟܠ ܀ 425 :ܚܵܙܹ̇ܝܢ ܗ̄ܘ̣ܵܘ ܓܹܝܪ ܬܘܼܩܵܢܹܗ 426 ܡܲܠܲܐܟܹ̈ܐ ܘܡܸܬܼܒܲܩܹܝܢ ܒܹܗ. 427 :ܘܡ̇ܐ ܕܐܸܡ݂ܲܪ ܡܸܠܬܼܵܐ ܘܲܗܘ̤ܵܬܼ 428 ܩܥ̣ܵܘ ܠܹܗ ܫܘܼܒܼܚܵܐ ܪ̈ܘܼܚܵܢܹܐ ܀ 429 :ܒܝܼܕܲܥܬܼܵܐ ܟܠ ܣܵܥܲ݁ܪ ܗ̄ܘ̣ܵܐ 430 ܗܵܘ̇ ܝܵܕܲܘܿܥܵܐ ܕܟܼܠ ܝܵ̇ܕܲܥ. 431 :ܘܡ̣ܢ ܡܸܕܹܿܡ ܘܡ̣ܢ ܠܵܐ ܡܸܕܹܿܡ 432 ܐܲܝܬܿܝܼ ܥܒܼܝܼܕܹ̈ܐ ܠܲܗܘܵܝܵܐ ܀ 433 ܠܢܘܼܗܪܵܐ ܒܪ̣ܵܝܗܝ ܡ̣ܢ ܠܵܐ ܡܸܕܹܿܡ. 434 ܕܲܢܚܵܘܹܐ ܥܲܠ ܪܲܒܿܘܼܬܹܗ. 435 :ܘܐܵܦ ܠܢܲܦܫܲܢ ܡ̣ܢ ܠܵܐ ܡܸܕܸܿܡ 436 ܕܲܢܚܵܘܸܐ ܕܲܒܼܟܼܠ ܫܲܠܝܼܛ ܀ 437 :ܒܪ̣ܵܐ ܠܢܲܗܝܼܪܹ̈ܐ ܡ̣ܢ ܢܘܼܗܪܵܐ 438 ܫܸܡܫܵܐ ܘܣܲܗܪܵܐ ܠܲܡܦܹܝܕܹ̈ܐ. 439 :ܘܝܲܒܸܿܒܼܘ ܟܸܢܫܹ̈ܐ ܕܡܲܠܲܐܟܹ̈ܐ 440 ܫܘܼܒܼܚܵܐ ܠܚܲܝܠܵܐ ܡܲܬܼܩܸܢ ܟܠ ܀ 441 :ܒܗܵܠܹܝܢ ܦܘܼܪ̈ܣܹܐ ܚܵܐܲܪ ܗ̄ܘ̣ܵܐ 442 ܒܵܪܘܿܝܵܐ ܟܲܕܼ ܡܲܬܼܩܸܢ ܟܠ. 443 :ܘܲܡܬܲܗܸܐ ܗ̄ܘ̣ܵܐ ܠܲܥܒܼܵܕܵܘ̈ܗܝ 444 ܕܢܲܠܸܦ ܚܲܝܠܹܗ ܠܲܡܠܝܼܠܹ̈ܐ ܀ 445 :ܒܒܼܘܼܪ̈ܟܵܬܼܵܐ ܩܲܕܿܝܼ̈ܫܵܬܼܵܐ 446 ܙܵܘܕܹܗ ܠܝܵܡ̇ܐ ܫܒܼܝܼܥܵܝܵܐ. pb. 188 447 :ܕܠܵܐ ܢܸܗܘܸܐ ܠܹܗ ܢܘܼܟܼܪܵܝܵܐ 448 ܕܠܵܐ ܨܒܼܵܐ݂ ܕܢܸܒܼܪܸܐ ܒܹܗ ܡܸܕܸܿܡ ܀ 449 :ܝܵܘܡ̇ܐ ܗ̄ܘ̣ܵܐ ܐܵܦ ܗܵܘ̇ ܝܵܘܡ̇ܐ 450 ܡ̣ܢ ܝܵܘ̈ܡ̇ܬܼܵܐ ܩܲܕܼܡ̇ܝܹܵܐ. 451 :ܘܲܕܼܠܵܐ ܗܘ̤ܵܐ ܠܹܗ ܬܘܼܩܵܢܵܐ 452 ܩ̣ܪܵܝܗܝ ܩܲܕܼܝܼܫܵܐ ܕܠܵܐ ܢܲܣܠܹܝܘܗܝ ܀ 453 :ܝܲܕܲܥܬܼܵܐ ܕܩܲܕܿܝܼܫܘܼܬܹܗ 454 ܗܵܕܹܿܐ ܗ̄ܝܼ ܕܐܸܬܿܬܿܬܝܼܚ ܡ̣ܢ ܥܲܡܠܵܐ. 455 :ܕܡ̇ܐ ܕܲܫܡܲܥ̣ܢܲܢ ܫܸܡ ܥܲܠܡܵܐ 456 ܢܹܐܠܲܦ ܡܲܢ̣ܘܼ ܒܵܪܘܿܝܵܐ ܀ 457 :ܥܬܼܝܼܕܼ ܗ̄ܘ̣ܵܐ ܢܸܗܘܸܐ ܗܵܢ ܝܵܘܡ̇ܐ 458 :ܝܘܼܠܦܵܢܵܐ ܠܙܲܪܥܹܗ ܕܐܲܒܼܪܵܐ 459 :ܕܡ̇ܐ ܕܢܵܛ̇ܪܝܼܢ ܠܹܗ ܡ̣ܢ ܥܲܡܠܵܐ 460 ܢܹܐܠܦܘܼܢ ܥܸܠܬܹܗ ܕܡ̇ܢ ܐܝܼܬܹܝܗ̇ ܀ 461 :ܥܲܠ ܟܠ ܕܹܝܢ ܕܲܗܘ̤ܵܐ ܡܸܢܹܗ 462 ܩܵܠܵܐ ܐܲܡܫܲܥ ܟܲܕܼ ܗܵܘܹ̇ܐ. 463 :ܘܗܘ̤ ܠܹܗ ܫܲܒܲܚ ܠܬܼܘܼܩܵܢܹܗ 464 ܕܫܲܦܝܼܪ ܡܸܢܹܗ ܐܸܬܿܬܲܩܲܢ ܀ 465 :ܥܕܲܡ̇ܐ ܠܗܵܪܟܵܐ ܫܲܘܝܘܼܬܼܵܐ 466 ܕܚܲܕܼ ܩܵܠܵܐ ܥܲܠ ܟܠ ܕܲܗܘ̤ܵܐ. 467 :ܘܲܒܼܫܘܼܠܵܡܵܐ ܕܬܼܘܼܩܵܢܵܘ̈ܗܝ 468 ܩܵܠܵܐ ܚܲܕܼܬܼܵܐ ܐܸܬܼܡܲܠܲܠ ܀ 469 :ܢܸܥܒܸܿܕܼ ܠܲܡ ܐ̄ܢܵܫܵܐ ܡܠܝܼܠܵܐ 470 ܒܨܲܠܡܲܢ ܕܝܼܠܲܢ ܘܲܕܼܢܘܼܬܲܢ. 471 :ܘܢܸܫܬܲܠܲܛ ܥܲܠ ܟܠ ܕܲܗܘ̤ܵܐ 472 ܕܡܸܛܠܵܬܹܗ ܐܸܬܿܬܲܩܲܢ ܀ 473 :ܐܹܝܘ ܐܘܼܡ̇ܐ ܟܡܵܐ ܚܲܟܿܝܼܡ 474 ܐܹܝܘ ܛܵܒܼܵܐ ܟܡܵܐ ܫܦܝܼܥ ܚܘܿܒܹܿܗ. 475 :ܕܲܒܼܪ̣ܵܐ ܘܨܲܒܸܿܬܼ ܟܠܡܸܕܹܿܡ 476 ܘܗܵܝܕܲܝܹܢ ܓܲܒܼܠܹܗ ܠܝܵܪܘܿܬܼܵܐ ܀ 477 :ܒܢ̣ܵܐ ܠܹܗ ܒܲܝܬܵܐ ܠܥܲܦܪܵܢܵܐ 478 ܘܐܲܣܸܢ ܘܲܡ̣ܠܵܝܗܝ ܛܵܒܼܵܬܼ̈ܐ. 479 :ܘܚܲܪ̈ܫܹܐ ܘܲܡܠܝܼܠܹ̈ܐ ܐܲܟܲܚ̄ܕܼ 480 ܠܬܸܫܡܸܫܬܹܿܗ ܫܲܥܒܸܿܕܼ ܐܸܢܘܿܢ ܀ 481 :ܒܟܼܠܗܹܝܢ ܝܲܩܪܹܗ ܠܡܵܝܘܿܬܼܵܐ 482 :ܒܬܼܘܼܩܵܢܹܗ ܘܲܒܼܫܘܼܠܛܵܢܹܗ 483 :ܒܗܵܝ̇ ܕܲܩ̣ܪܵܝܗܝ ܨܲܠܡܵܐ ܕܝܼܠܹܗ 484 ܘܫܲܥܒܸܿܕܼ ܠܹܗ ܟܠܡܵܐ ܕܲܗܘ̤ܸܵܐ ܀ 485 :ܒܟܼܠܗܹܝܢ ܕܲܗ̤ܘܲܝ̈ ܘܐܸܬܿܬܲܩܲܢ 486 ܩܵܠܵܐ ܒܲܠܚܘܿܕܼ ܡܲܫܡܲܥ ܗ̄ܘ̣ܵܐ. 487 :ܘܗܵܪܟܵܐ ܒܬܼܘܼܩܵܢܹܗ ܕܐܵܕܼܵܡ 488 ܡܸܠܟܵܐ ܘܚܘܼܫܵܒܼܵܐ ܚܲܕܼܬܼܵܐ ܀ 489 :ܢܸܥܒܸܿܕܼ ܐ̄ܢܵܫܵܐ ܒܲܕܼܡܘܼܬܲܢ 490 ܘܢܸܗܘܸܐ ܫܲܠܝܼܛ ܐܲܟܼܘܵܬܲܢ. 491 :ܕܲܒܼܝܲܕܼ ܨܲܠܡܵܐ ܕܓܲܠܝܘܼܬܹܗ 492 ܢܲܟܼܪܸܙ ܚܲܝܠܹܗ ܠܲܥܒܼܝܼܕܹ̈ܐ ܀ 493 :ܒܹܗܓܵܠܹ̇ܐ ܐ̄ܢܵܐ ܥܲܠ ܟܲܣܝܘܼܬܼܝ 494 ܠܲܟܼܝܵܢܹ̈ܐ ܡܸܬܼܝܲܕܼܥܵܢܹ̈ܐ. 495 :ܘܒܹܗ ܡܒܲܕܸܿܩ ܐ̄ܢܵܐ ܥܲܠ ܡ̇ܪܘܼܬܼܝ 496 ܠܚܲܪ̈ܫܹܐ ܘܠܲܡܝܼܠܹ̈ܐ ܐܲܟܲܚ̄ܕܼ ܀ 497 :ܐܲܝܟ ܨܲܠܡܵܐ ܣܵܐܹ̇ܡ ܐ̄ܢܵܐ ܠܹܗ 498 ܠܲܥܒܼܝܼܕܹ̈ܐ ܕܢܸܬܼܒܲܩܘܿܢ ܒܹܗ. 499 :ܕܲܒܼܝܲܕܼ ܚܘܼܒܵܐ ܕܲܠܘܵܬܹܗ 500 ܒܹܗ ܟܠ ܐ̄ܢܵܫ ܠܝܼ ܢܸܫܬܵܘܕܲܥ ܀ 501 :ܬܲܗܪܵܐ ܗ̄ܘ̣ ܬܘܼܩܵܢܹܗ ܕܐܵܕܼܵܡ 502 ܘܲܡܫܲܚܠܲܦ ܡ̣ܢ ܕܲܥܒܼܝܼ̈ܕܹܐ. 503 :ܕܟܼܠ ܕܲܗܘ̤ܵܐ ܒܡܸܠܬܹܗ ܥܲܒܼ݂ܕܹܿܗ 504 ܘܠܹܗ ܒܡܸܠܟܵܐ ܐܸܡ݂ܲܪ ܕܐܸܥܒܸܿܕ ܀ 505 :ܫܒܼܝܼܚܵܐ ܓܒܼܝܼܠܬܹܿܗ ܕܥܲܦܪܵܢܵܐ 506 ܘܐ̄ܪ̈ܙܹܐ ܟܣܲܝ̈ܵܐ ܛܡܝܼܪܝܼܢ ܒܵܗ̇. 507 :ܕܠܵܐ ܐܸܡ݂ܲܪ ܕܢܸܗܘܸܐ ܐܲܟܼܘܵܬܼܝ 508 ܐܸܠܵܐ ܒܨܲܠܡܲܢ ܘܲܕܡܘܼܬܿܢ ܀ pb. 189 509 :ܐܹܝܘ ܡܝܘܿܬܼܵܐ ܕܲܟܼܣܹܝܢ ܒܵܗ̇ 510 ܒܲܓܼܒܼܝܼܠܬܹܿܗ ܐ̄ܪ̈ܵܙܹܐ ܟܣܲܝܵ̈ܐ. 511 :ܐܹܝܘ ܥܲܦܪܵܢܵܐ ܕܒܲܕܸܿܩ ܠܲܢ 512 ܒܬܼܘܼܩܵܢܹܗ ܒܢܘܿܡܹ̈ܐ ܬܠܵܬܼܵܐ ܀ 513 :ܒܬܼܘܼܩܵܢܵܐ ܕܨܲܠܡܹܗ ܕܐܵܕܼܵܡ 514 ܐܲܝܟ ܕܲܒܼܐ̄ܪܵܙܵܐ ܐܲܠܸܦ ܠܲܢ. 515 :ܗܵܝ̇ ܕܲܒܼܨܲܠܡܲܢ ܘܲܕܼܡܘܿܬܲܢ 516 ܒܢܘܿܡܹ̈ܐ ܬܠܵܬܼܵܐ ܫܵܘܕܲܥ ܠܲܢ ܀ 517 :ܐܝܼܬܼܘܼܬܼܵܬܐ ܕܠܵܐ ܫܘܼܪܵܝܵܐ 518 ܕܐܲܒܼܵܐ ܘܲܒܼܪܵܐ ܘܪܘܼܚܩܘܼܕܼܫܵܐ. 519 :ܒܨܲܠܡܹܗ ܕܐܵܕܼܵܡ ܐܸܬܼܝܲܩܲܪ 520 ܐܲܝܟ ܕܲܒܼܐ̄ܪܵܙܵܐ ܟܠ ܕܲܗܘ̤ܵܐ ܀ 521 :ܘܐܸܠܵܐ ܠܡܲܢ̣ܘܼ ܩܵܪܹ̇ܐ ܗ̄ܘ̣ܵܐ 522 ܒܫܲܘܝܘܼܬܼܵܐ ܕܥܲܡ ܪܲܒܿܘܼܬܹܗ. 523 :ܕܲܒܼܨܲܠܡܲܢ ܕܹܝܢ ܬܵܘ ܢܸܥܒܸܿܕܼ 524 ܠܵܐ ܐܵܡܲ̇ܪ ܗ̄ܘ̣ܵܐ ܠܡܲܠܲܐܟܹ̈ܐ ܀ 525 :ܒܗܵܕܹܐ ܕܨܲܠܡܲܢ ܐܲܠܸܦ ܠܲܢ 526 ܥܲܠ ܦܘܼܪܫܵܢܵܐ ܕܲܩܢܘܿܡܹ̈ܐ. 527 :ܘܲܒܼܗܵܝ̇ ܕܲܕܼܡܘܼܬܼܵܐ ܕܝܼܠܲܢ 528 ܥܲܠ ܫܲܘܝܼܬܹܗ ܕܲܟܼܝܵܢܵܐ ܀ 529 :ܬܵܘ ܠܲܡ ܢܸܥܒܸܿܕܼ ܒܲܪܢܵܫܵܐ 530 ܘܢܹܐܣܘܼܪ ܒܹܗ ܟܠܡܵܐ ܕܲܗܘ̤ܵܐ. 531 :ܕܒܲܐ̄ܚܝܵܢܘܼܬܼܗܘܿܢ ܕܲܠܘܵܬܹܗ 532 ܒܚܘܼܒܵܐ ܢܡܲܠܘܿܢ ܣܘܼܢܩܵܢܵܘ̈ܗܝ ܀ 533 :ܘܲܥܒ݂ܲܕܼ ܐܲܠܵܗܵܐ ܒܨܲܠܡܹܗ 534 ܠܐܵܕܼܵܡ ܥܲܦܪܵܐ ܡ̣ܢ ܐܲܪܥܵܐ. 535 :ܘܲܢܦܲܚ̣ ܒܹܗ ܢܲܦܫܵܐ ܠܚܲܝܹ̈ܐ 536 ܟܝܵܢܵܐ ܚܲܝܵܐ ܘܲܡܠܝܼܠܵܐ ܀ 537 :ܐܹܝܘ ܚܘܼܒܵܐ ܕܲܠܘܵܬܼ ܓܸܢܣܲܢ 538 ܐܹܝܘ ܐܝܼܩܵܪܹܗ ܕܬܼܘܼܩܵܢܲܢ. 539 :ܕܚܲܝܘܼܬܼܵܐ ܕܐܲܫܪܝܼ ܒܓܼܵܘܲܢ 540 ܡ̣ܢ ܚܘܼܒܹܿܗ ܨܒܼܵܐ ܘܲܢܦܲܚ̣ ܒܲܢ ܀ 541 :ܐܹܝܘ ܟܝܵܢܵܐ ܕܠܵܐ ܪܘܼܟܵܒܼܵܐ 542 ܕܐܝܼܬܼܘܼܬܹܗ ܠܵܐ ܡܸܢܼܡܲܫܚܵܐ. 543 :ܕܟܼܕܲ ܕܡܲܬܼܩܸܢ ܠܹܗ ܠܲܟܼܝܵܢܲܢ 544 ܒܐܝܼ̈ܕܲܝܵܐ ܘܦܘܼܡܵܐ ܥܲܒܼ݂ܕܲܢ ܀ 545 :ܠܵܐ ܥܲܒܼ݂ܕܲܢ ܐܲܝܟ ܚܲܝ̈ܘܵܬܼܵܐ 546 ܕܵܗܘ̤ܵܐ ܕܲܟܼܪܹ̈ܐ ܘܢܸܩ̈ܒܼܵܬܼܵܐ. 547 :ܕܐܵܕܼܵܡ ܩܲܕܿܝܼܡ ܒܲܒܼܪܝܼܬܹܗ 548 ܘܗܵܝܕܲܝܹܢ ܚܵܘܵܐ ܡ̣ܢ ܐܸܠܥܹܗ ܀ 549 :ܬܲܩܸܢ ܠܐܵܕܼܵܡ ܩܲܕܼܡ̇ܝܑܬܼ 550 ܘܗܵܝܕܹܿܝܢ ܠܐܲܢ̄ܬܿܬܼܵܐ ܡ̣ܢ ܐܵܕܼܵܡ. 551 :ܕܢܹܐܠܲܦ ܚܲܝܠܵܐ ܕܥܵܒܼܘܿܕܹܗ 552 ܕܗܘ̤ܝܘܼ ܕܨܲܒܸܿܬܼ ܬܘܼܩܵܢܹܗ ܀ 553 :ܓܒ݂ܲܠ ܠܲܡ ܡ̇ܪܝܵܐ ܐܲܠܵܗܵܐ 554 ܠܐܵܕܼܵܡ ܥܲܦܪܵܐ ܡ̣ܢ ܐܲܪܥܵܐ. 555 :ܘܣܵܡܹ̣ܗ ܒܦܲܪܕܲܝܣܵܐ ܕܲܥܕܹܢ 556 ܕܢܸܗܘܸܐ ܒܓܼܵܘܹܗ ܝܵܪܘܿܬܼܵܐ ܀ 557 :ܒܥܘܼܡܪܵܐ ܦܲܐܝܵܐ ܘܲܪܓܼܝܼܓܼܵܘ 558 ܣܵܡ̣ܹܗ ܠܐܵܕܼܵܡ ܐܲܝܟ ܨܲܠܡܹܗ. 559 :ܕܲܥܒܼܝܼܕܹ̈ܐ ܒܝܲܕܼ ܩܲܪܝܼܒܼܵܐ 560 ܒܚܘܼܒܵܐ ܢܸܩܪܘܿܢ ܥܵܒܼ̇ܘܿܕܼܵܐ ܀ 561 :ܕܵܡܹ̇ܐ ܨܲܒܡܹܗ ܠܒܼܵܪܘܿܝܵܐ 562 ܠܹܗ ܒܲܫܡܵܐ ܠܵܘ ܒܲܟܼܝܵܢܵܐ. 563 :ܕܐܲܫܠܛܹܗ ܥܲܠ ܟܠ ܕܐܲܬܼܩܸܢ 564 ܐܲܝܟ ܒܵܪܘܿܝܵܐ ܥܲܠ ܕܝܼܠܹܗ ܀ 565 :ܗܵܘܹ̇ܐ ܐܲܒܼܵܐ ܡ̇ܐ ܕܐܵܘܠܸܕܼ 566 ܘܝܵ̇ܠܹܕܼ ܝܲܠܕܵܐ ܕܕܼܵܡܹ̇ܐ ܠܹܗ. 567 :ܐܲܝܟ ܐܲܒܼܵܐ ܕܐܵܘܠܸܕܼ ܠܲܒܼܪܵܐ 568 ܒܲܟܼܝܵܢܹܗ ܕܠܵܐ ܫܘܼܪܵܝܵܐ ܀ 569 :ܗܘ̤ ܒܙܲܒܼܢܵܐ ܗܵܘܹ̇ܐ ܐܲܒܼܵܐ 570 ܘܲܒܼܙܒܼܢܵܐ ܝܵ̇ܠܹܕܼ ܝܲܠܕܵܐ. 571 :ܐܝܼܬܼܝܵܐ ܕܠܵܐ ܙܲܒܼܢܵܐ ܐܵܘܠܸܕܼ 572 ܘܠܲܝܬܿ ܙܲܒܼܢܵܐ ܒܹܝܬܼ ܠܹܗ ܠܝܲܠܕܹܿܗ ܀ 573 :ܥܵܒܹ̇ܿܕܼ ܡܸܕܹܿܡ ܡ̣ܢ ܡܸܕܹܿܡ 574 ܘܟܲܕܼ ܠܵܐ ܐܝܼܬܵܘܗܝ ܡܲܬܼܩܸܢ ܠܹܗ. pb. 190 575 :ܐܲܝܟ ܥܵܒܼ̇ܘܿܕܼܵܐ ܕܐܲܝܬܿܝܼ ܟܠ 576 ܠܲܗܘܵܝܵܐ ܡ̣ܢ ܠܵܐ ܡܸܕܹܿܡ ܀ 577 :ܥܵܒܹ̇ܕܼ ܡܸܕܹܿܡ ܡ̣ܢ ܡܸܕܹܿܡ 578 ܘܡܸܬܿܕܲܡܸܐ ܠܹܗ ܠܒܼܵܪܘܿܝܵܐ. 579 :ܟܠ ܕܲܗܘ̤ܵܐ ܒܐܲܪܥܵܐ ܚܵܐ̇ܲܪ 580 ܘܕܝܼܠܹܗ ܚܝܪܹܗ ܒܲܫܡܲܝܵܐ ܀ 581 :ܕܲܒܼܚܲܕܼ ܪܸܡܙܵܐ ܕܲܚܝܵܪܹܗ 582 ܠܐܲܬܼܪܹܗ ܒܵܥܹ̇ܐ ܥܸܠܵܝܵܐ. 583 :ܒܗܵܠܹܝܢ ܕܵܡܹ̇ܐ ܥܲܦܪܵܢܵܐ 584 ܐܲܝܟ ܕܲܒܼܐ̄̈ܪܵܙܵܐ ܠܒܼܵܪܘܿܝܵܐ ܀ 585 :ܕܟܲܕܼ ܬܘܼܒܼ ܒܡܸܠܬܼܵܐ ܘܚܲܝܘܬܼܵܐ 586 ܦܵܩܹ̇ܕܼ ܐܵܦ ܗܘ̤ ܠܲܟܼܝܵܢܹ̈ܐ. 587 :ܒܲܫܡܵܐ ܕܨܲܒܡܵܐ ܫܐܝܼܠܵܐܝܼܬܼ 588 ܟܲܢܝܹܗ ܠܐܵܕܼܵܡ ܩܲܕܼܡ̇ܝܵܐ ܀ 589 :ܘܗܘ̤ܵܬܐ ܨܲܠܡܵܐ ܒܲܥܒܼܵܕܼܵܐ 590 ܒܲܡܫܝܼܚܵܐ ܐܵܕܼܵܡ ܕܲܬܼܪܹܝܢ. 591 :ܗܵܪܟܵܐ ܫܸܩܠܲܬ̤ ܫܘܼܠܵܡܵܐ 592 ܗܵܝ̇ ܕܲܒܼܨܲܠܡܲܢ ܬܵܘ ܢܸܥܒܸܿܕܼ ܀ 593 :ܕܫܲܩ̣ܠܹܗ ܠܨܲܠܡܹܗ ܒܵܪܘܿܝܵܐ 594 ܘܥܲܒܼܕܹܿܗ ܥܘܼܡܪܵܐ ܠܐܝܼܩܵܪܹܗ. 595 :ܒܲܡܫܝܼܚܵܐ ܗܘ̤ܵܘ ܒܲܥܒܼܵܕܼܵܐ 596 ܡܘܼܠܟܵܢܹ̈ܐ ܕܲܠܘܵܬܼ ܐܵܕܼܵܡ ܀ 597 :ܕܲܩ̣ܪܵܝܗܝ ܨܲܠܡܹܗ ܘܐܸܬܼܚܲܒܲܠ 598 ܗܦ݂ܲܟ ܘܐܸܬܼܚܲܕܲܬܼ ܒܲܡܫܝܼܚܵܐ ܀ 599 :ܒܝܲܕܼ ܥܸܠܬܼܵܐ ܕܨܲܠܡܹܗ ܕܐܵܕܼܵܡ 600 ܬܢ̣ܵܐ ܪܲܒܿܘܼܬܹܗ ܕܦܲܪܕܲܝܣܵܐ. 601 :ܕܐܵܕܼܵܡ ܢܸܕܲܥ ܐܝܼܩܵܪܹܗ 602 ܕܒܲܐܬܼܪܵܐ ܫܒܼܝܼܚܵܐ ܣܵܐܹ̇ܡ ܠܹܗ ܀ 603 :ܥܒ݂ܲܕܼ ܠܲܡ ܡ̇ܪܝܵܐ ܐܲܠܵܗܵܐ 604 ܦܲܪܕܲܝܣܵܐ ܒܲܥܕܹܢ ܠܘܼܩܕܵܡ. 605 :ܘܐܵܘܥܝܼ ܒܓܼܵܘܹܗ ܐܝܼܠܵܢܹ̈ܐ 606 ܕܥܵܗ̇ܢܝܼܢ ܣܲܓܼܝܼ ܠܡܹܐܟܼܘܼܠܬܵܐ ܀ 607 :ܚܲܕܼ ܕܹܝܢ ܡܸܢܗܘܿܢ ܕܐܝܼܠܵܢܹ̈ܐ 608 ܣܵܡ̣ ܒܲܡܨܲܥܬܹܗ ܕܦܲܪܕܲܝܣܵܐ. 609 :ܘܲܩܪ̣ܵܝܗܝ ܐܝܼܠܵܢܵܐ ܕܚܲܝܹ̈ܐ 610 ܕܢܸܩܢܸܐ ܒܹܗ ܐܵܕܼܵܡ ܚܲܝܹ̈ܐ ܀ 611 :ܢܨ݂ܲܒܼ ܕܹܝܢ ܐܝܼܠܵܢܵܐ ܐ̄ܚܪܹܿܢܵܐ 612 ܘܲܩܪ̣ܵܝܗܝ ܝܵ̇ܕܲܥ ܘܵܠ̈ܝܵܬܼܵܐ. 613 :ܕܝܼܕܲܥܬܼܵܐ ܕܟܲܣܝܵܐ ܒܐܵܕܼܵܡ 614 ܒܦܹܐܪܵܐ ܕܡܸܢܹܗ ܡܸܬܼܕܼܠܝܵܐ ܀ 615 :ܬܢ̣ܵܐ ܥܲܠ ܢܸܒܼܥܵܐ ܕܢܵܦܹ̇ܩ ܗ̄ܘ̣ܵܐ 616 ܡ̣ܢ ܦܲܪܕܲܝܣܵܐ ܘܡܲܫܩܸܐ ܠܹܗ. 617 :ܕܡ̣ܢ ܪܲܒܿܘܼܬܹܗ ܡܸܬܼܦܲܪܫܝܼܢ 618 ܐܲܪܒܿܥܵܐ ܢܸܒܼܥܹ̈ܐ ܠܟܼܠ ܦܸܢ̈ܝܵܢ ܀ 619 :ܢܲܗܪܵܐ ܩܲܕܼܡ̇ܝܵܐ ܦܝܼܫܘܿܢ 620 ܕܚܵܕܲܪ ܠܐܲܪܥܵܐ ܕܲܚܘܝܼܠܵܐ. 621 :ܕܬܲܡ̇ܢ ܕܲܗܒܼܵܐ ܘܒܹܪ̈ܘܿܠܹܐ 622 ܘܟܹܐܦܹ̈ܐ ܘܛܲܒܼܥܹ̈ܐ ܢܲܗܝܼܪܹ̈ܐ ܀ 623 :ܢܲܗܪܵܐ ܬܸܢܝܵܢܵܐ ܓܝܼܚܘܿܢ 624 ܕܡܲܫܩܸܐ ܠܐܲܪܥܵܐ ܕܟܼܘܼܫܵܝܹ̈ܐ. 625 :ܘܲܒܼܫܸܩܥܵܐ ܕܡܸܢܹܗ ܡܲܚܸܐ 626 ܠܡܸܨܪ̈ܵܝܣܹܐ ܘܡܸܕܼܝܵܢܵܝܹ̈ܐ ܀ 627 :ܢܲܗܪܵܐ ܕܲܬܠܵܬܼܵܐ ܕܸܩܠܲܬܼ 628 ܕܲܥܒܼܝܼܕܼ ܐܝܼܙ ܓܲܕܵܐ ܠܐܵܬܼܘܿܪ. 629 :ܘܡܸܬܼܬܼܒܲܣܡܝܼܢ ܡ̣ܢ ܚܲܠܝܘܼܬܹܗ 630 ܟܠܗܘܿܢ ܥܲܡܡܹ̈ܐ ܕܲܚܕܼܵܪܵܘܗܝ ܀ 631 :ܦܪܵܬܼ ܕܹܝܢ ܢܲܗܪܵܐ ܪܒܼܝܼܥܵܝܵܐ 632 ܕܥܵܒܲ̇ܪ ܒܲܡܨܲܥܬܼܵܗ̇ ܕܐܲܪܪܥܵܐ. 633 :ܘܝܵܗܹ̇ܒܼ ܢܲܦܫܹܗ ܠܦܲܠܵܝܹ̈ܐ 634 ܕܲܢܪܲܟܿܒܼܘܼܢ ܒܹܗ ܐܲܪ̈ܥܵܬܼܵܐ ܀ 635 ܠܵܘ ܕܲܢܫܲܒܲܚ ܦܲܪܕܲܝܣܵܐ. 636 ܐܸܫܬܲܥܝܼ ܢܒܼܝܼܵܐ ܗܵܠܹܝܢ. 637 ܘܠܵܘ ܕܲܢܩܲܠܸܣ ܪܲܒܿܘܼܬܼܵܐ: pb. 191 638 ܕܢܲܗܪ̈ܵܘܵܬܼܵܐ ܕܲܒܼܓܼܵܘܹܗ ܀ 639 :ܠܚܲܝܠܹܗ ܕܒܼܵܪܘܿܝܵܐ ܐܲܘܪܸܒܼ 640 ܕܲܦܫܝܼ̈ܩܵܢ ܠܹܗ ܥܲܣ̈ܩܵܬܼܵܐ. 641 :ܕܐܲܝܟܲܢ ܢܸܒܼܥܹܗ ܕܦܲܪܕܲܝܣܵܐ 642 ܒܓܼܵܘ ܝܲܡܵܐ ܥܵܒܲ̇ܪ ܨܹܐܕܲܝܢ ܀ 643 :ܥܵܒܼ̇ܪܝܼܢ ܡܲܝ̈ܵܐ ܒܓܼܵܘ ܝܼܡܲܡܹ̈ܐ 644 ܘܠܵܐ ܚܵܠܛ̇ܝܼܢ ܡܲܝܵ̈ܐ ܒܡܲܝܵ̈ܐ. 645 :ܘܣܵܗ̇ܕܵܐ ܗܵܕܹܐ ܠܪܲܒܿܘܼܬܹܗ 646 ܕܚܲܝܠܹܗ ܐܲܬܼܩܸܢ ܟܠܡܸܕܹܿܡ ܀ 647 :ܐܹܝܘ ܪܸܡܙܵܐ ܕܢܵܛܲ̇ܪ ܡܲܝ̈ܵܐ 648 ܒܓܼܵܘ ܡܲܝܵ̈ܐ ܐܲܝܟ ܕܲܒܼܡܵܐܝܵܐ. 649 :ܘܠܵܐ ܚܵܠܹ̇ܛ ܡܲܝ̈ܵܐ ܕܲܥܕܹܢ 650 ܒܡܲܝܵ̈ܐ ܫܓܼܝܼܫܹ̈ܐ ܕܲܬܼܗܘܿܡ̇ܐ ܀ 651 :ܥܒܼܵܕܹ̈ܐ ܚܲܪ̈ܫܹܐ ܘܫܲܬܿܝܼܩܹ̈ܐ 652 ܩܵܥܹ̇ܝܢ ܟܠܫܵܥ ܥܲܠ ܚܲܝܠܹܗ. 653 ܟܲܕܼ ܡܲܠܦܝܼܢ ܠܲܡܠܝܼܠܘܼܬܼܵܐ. 654 ܕܗܵܐ ܥܵܒܼܘܿܕܼܵܐ ܒܲܥ̇ܒܼܵܕܵܘ̈ܗܝ ܀ 655 :ܝܘܼܠܦܵܢܵܐ ܕܡܠܸܐ ܚܲܝܹ̈ܐ 656 ܓܠ̣ܵܐ ܠܲܢ ܫܲܪܒܹܿܗ ܕܦܲܪܕܲܝܣܵܐ. 657 :ܘܬܲܫܥܝܼܬܼܵܐ ܕܥܲܠ ܐܝܼܠܵܢܵܐ 658 ܠܲܡܠܝܼܠܘܼܬܼܵܐ ܩܲܪܸܒܼܬܲܢ ܀ 659 :ܒܥܸܠ̈ܠܵܬܼܵܐ ܨܒܼܵܐ ܕܲܢܚܲܟܸܿܡ 660 ܒܵܪܘܿܝܵܐ ܠܲܡܠܝܼܠܘܼܬܲܢ. 661 :ܘܐܲܝܟ ܕܲܠܫܲܒܼܪܹ̈ܐ ܒܠܘܼܚܵܡܵܐ 662 ܠܚܹܐܪܘܼܬܼܵܐ ܕܒܲܢ ܐܵܘܕܲܥ ܠܲܢ ܀ 663 :ܠܪ̈ܘܼܚܵܢܹܐ ܒܝܲܕܼ ܬܘܼܩܵܢܵܘ̈ܗܝ 664 ܐܲܠܸܦ ܕܐܝܼܬܼܝܵܐ ܗ̄ܘ̣ ܘܥܵܒܼܘܿܕܼܵܐ ܗ̄ܘ̣. 665 :ܘܠܲܢ ܒܲܟܼܝܵܢܵܐ ܚܲܟܸܿܡ ܠܲܢ 666 ܕܲܓܠ̣ܵܐ ܒܲܢ ܥܲܠ ܟܲܣܝܘܼܬܹܗ ܀ 667 :ܒܪܵܫܝܼܬܼ ܠܐܲܪܥܵܐ ܘܠܲܫܡܲܝܵܐ 668 ܬܲܩܸܢ ܟܲܕܼ ܠܵܐ ܐܝܼܬܲܝܗܘܿܢ. 669 :ܘܥܲܡܹܗ ܕܚܲܝܠܵܐ ܕܲܒܼܪܵܫܝܼܬܼ 670 ܗܘ̤ܵܘ ܚܲܝܠܹ̈ܐ ܡܸܬܼܝܲܕܼܥܵܢܹ̈ܐ ܀ 671 :ܒܪ̣ܵܐ ܢܲܗܝܼܪܹ̈ܐ ܟܲܕܼ ܡܲܫܡܲܥ 672 ܩܵܠܵܐ ܠܟܸܢܫܹ̈ܐ ܕܪ̈ܘܼܚܵܢܹܐ. 673 :ܘܒܲܗܘܵܝܹܗ ܕܢܘܼܗܪܵܐ ܐܲܠܸܦ 674 ܕܗܘ̤ ܨܲܒܸܿܬܼ ܠܲܩܢܘܿܡܲܝ̈ܗܘܿܢ ܀ 675 :ܥܒ݂ܲܕܼ ܡ̣ܢ ܡܲܝ̈ܵܐ ܠܲܪܩܝܼܥܵܐ 676 ܘܐܲܛܥܸܢ ܡܲܝ̈ܵܐ ܠܥܸܠ ܡܸܢܹܗ. 677 :ܘܨܲܒܿܬܹܗ ܒܛܲܒܼܥܹ̈ܐ ܢܲܗܝܼܪܹ̈ܐ 678 ܨܸܒܼܬܵܐ ܕܚܵ̇ܫܚܵܐ ܠܲܡܠܝܼܠܹ̈ܐ ܀ 679 :ܟܲܢܸܫ ܡܲܝ̈ܵܐ ܡ̣ܢ ܐܲܪܥܵܐ 680 ܠܩܸܒܼܝܵܐ ܕܝܲܡܡܹ̈ܐ ܘܲܬܼܗܘܿܡܹ̈ܐ. 681 :ܘܨܲܒܿܬܼܵܗ̇ ܒܙܲܪ̈ܥܹܐ ܘܒܼܐܝܼܠܵܢܹ̈ܐ 682 ܠܚܲܝܹ̈ܐ ܕܐ̄ܢܵܫܵܐ ܘܕܲܒܼܥܝܼܪܵܐ ܀ 683 :ܐܲܪܚܸܫܘ ܡܲܝ̈ܵܐ ܚܲܝ̈ܘܵܬܼܵܐ 684 ܘܝܸܠܕܲܬ̤ ܐܲܪܥܵܐ ܟܠ ܓܸܢܣܝܼ̈ܢ. 685 :ܘܲܒܼܬܼܘܼܩܵܢܹ̈ܐ ܫܲܬܿܝܼܩܹ̈ܐ 686 ܚܲܟܸܿܡ ܣܲܓܿܝܼ ܠܲܡܠܝܼܠܹ̈ܐ ܀ 687 :ܥܒ݂ܲܕܼ ܠܲܟܼܝܵܢܲܢ ܡ̣ܢ ܐܲܪܥܵܐ 688 ܘܲܢܦ݂ܲܚ ܒܲܢ ܪܘܼܚܵܐ ܕܚܲܝܹ̈ܐ. 689 :ܘܲܒܼܚܘܼܒܵܐ ܕܲܠܘܵܬܼ ܓܸܢܣܲܢ 690 ܐܸܣ݂ܲܪ ܚܲܪ̈ܫܹܐ ܘܲܡܠܝܼܠܹ̈ܐ ܀ 691 :ܗܵܠܹܝܢ ܟܠܗܘܿܢ ܬܘܼܩܵܢܹ̈ܐ 692 ܟܣܹܝܢ ܗ̄ܘ̣ܵܘ ܡܸܡܬܼܘܿܡ ܒܝܼܕܲܥܬܹܗ. 693 :ܘܲܠܓܸܠܝܵܐ ܐܲܝܬܿܝܼ ܐܸܢܘܿܢ 694 ܘܚܵܘܝܼ ܚܘܼܒܹܿܗ ܠܩܸܢܝܵܢ̈ܘ̈ܗܝ ܀ 695 :ܩܲܕܿܝܼܡ ܗ̄ܘ̣ܵܐ ܕܹܝܢ ܨܸܒܼܝܵܢܹܗ 696 ܠܬܼܘܼܩܵܢܵܘ̈ܗܝ ܥܲܡ ܐܝܼܬܼܘܼܬܹܗ. 697 :ܘܝܵ̇ܕܲܥ ܗ̄ܘ̣ܵܐ ܥܲܕܼܠܵܐ ܢܸܒܼܪܸܐ 698 ܕܲܟܼܡܵܐ ܟܝܵܢܹ̈ܐ ܥܵܒܹ̇ܕܼ ܗ̄ܘ̣ܵܐ ܀ 699 :ܡܦܵܣ ܗ̄ܘ̣ܵܐ ܕܲܬܼܪܹܝܢ ܬܘܼܩܵܢܹ̈ܐ 700 :ܥܵܗ̇ܢܝܼܢ ܗ̄ܘ̣ܵܘ ܠܲܡܠܝܼܠܘܼܬܼܵܐ 701 :ܥܘܼܡܪܵܐ ܕܐܲܪܥܵܐ ܠܡܵܝܘܿܬܹ̈ܐ 702 ܘܲܫܡܲܝܵܐ ܠܠܵܐ ܡ̇ܝܘܿܬܹ̈ܐ ܀ 703 ܝܵ̇ܕܲܥ ܗ̄ܘ̣ܵܐ ܚܘܼܫܵܒܲܝ̈ܗܘܿܢ: pb. 192 704 ܕܲܡܠܝܼܠܹ̈ܐ ܥܲܕܼܠܵܐ ܢܸܗܘܘܿܢ. 705 :ܘܲܓܲܠ̈ܝܵܢ ܗ̄ܘܲܝ̈ ܠܹܗ ܟܲܣ̈ܝܵܬܼܵܐ 706 ܕܲܒܼܵܬܲܪ ܙܲܒܼܢܵܐ ܡܸܣܬܲܥܪ̈ܵܢ ܀ 707 :ܒܟܼܠ ܕܲܗܘ̤ܵܐ ܡܸܬܼܒܲܩܸܐ ܗ̄ܘ̣ܵܐ 708 ܥܲܕܼܠܵܐ ܢܹܐܬܸܐ ܠܲܗܘܵܝܵܐ. 709 :ܘܲܡܣܲܝܟܼܝܼܢ ܗ̄ܘ̣ܵܘ ܒܝܼܕܲܥܬܹܗ 710 ܥܒܼܵܕܹ̈ܐ ܕܡܸܢܹܗ ܗܵܘܹ̇ܝܢ ܗ̄ܘ̣ܵܘ ܀ 711 :ܠܵܘ ܣܘܼܢܩܵܢܹܗ ܐܸܬܼܡܲܠܝܼ 712 ܕܠܲܝܬܿܝܼ ܒܪܝܼܬܼܵܐ ܠܲܗܘܵܝܵܐ. 713 :ܨܸܒܼܝܵܢܹܗ ܟܲܣܝܵܐ ܚܵܘܝܼ 714 ܕܲܟܼܡܵܐ ܪܵܚܹ̇ܡ ܠܩܸܢܝܵܢܵܘ̈ܗܝ ܀ 715 :ܗܘ̤ ܢܸܒܼܥܵܐ ܗ̄ܘ̣ ܕܲܡܠܸܐ ܚܲܝܹ̈ܐ 716 ܕܲܩܢܸܐ ܗ̄ܘ̣ ܚܲܝܼ̈ܐ ܒܲܟܼܝܵܢܹܗ. 717 :ܘܡ̣ܢ ܠܵܐ ܡܸܕܲܡ ܬܲܩܸܢ ܟܠ 718 ܘܝܲܗ̣̄ܒܼ ܚܲܝܘܼܬܼܵܐ ܒܲܠܝܼܠܹ̈ܐ ܀ 719 :ܥܘܼܬܼܪܹܗ ܐܝܼܬܼܵܘܗܝ ܨܸܒܼܝܵܢܹܗ 720 ܘܓܲܙܹܗ ܪܲܒܵܐ ܚܘܼܫܵܒܹܗ. 721 :ܘܟܲܕܼ ܠܵܐ ܫܲܐ̣ܠܘܼܗܝ ܢܵܣܘܿܒܹ̈ܐ 722 ܦܬ݂ܲܚ ܣܝܼܡܵܬܹ̈ܗ ܘܐܲܥܬܲܪ ܟܠ ܀ 723 :ܦܪܝܼܣ ܚܘܼܒܹܿܗ ܥܲܠ ܒܸܪ̈ܝܵܬܹܗ 724 ܘܣܵܥܲ̇ܪ ܟܠܝܘܿܡ ܩܸܢܝܵܢܵܘ̈ܗܝ. 725 :ܘܢܵܛܲ̇ܪ ܪܸܡܙܹܗ ܠܲܟܼܝܵܢܹ̈ܐ 726 ܡܠܝܼܠܹ̈ܐ ܘܚܲܪ̈ܫܹܐ ܫܲܘܝܵܐܝܼܬܼ ܀ 727 :ܣܵܡ̣ ܢܵܡܘܿܣܵܐ ܠܡܵܝܘܿܬܹ̈ܐ 728 ܕܐܸܢ ܢܵܛ̇ܪܝܼܢ ܠܹܗ ܚܵܐܹ̇ܝܢ ܒܹܗ. 729 :ܘܐܲܩܝܼܡ ܚܲܝܠܹܗ ܪܘܼܚܵܢܵܐ 730 ܠܬܸܫܡܸܫܬܵܐ ܕܣܘܼܢܩܵܢܲܝ̈ܗܘܿܢ ܀ 731 :ܗܵܠܹܝܢ ܡܸܡܬܼܘܿܡ ܣܝܼ̈ܡܵܢ ܗ̣̄ܘܲܝ̈ 732 ܕܡܸܣܬܲܥܪ݁ܵܢ ܐܲܝܟ ܨܸܒܼܝܵܢܹܗ. 733 :ܘܒܼܝܼܕܲܥܬܼܵܐ ܕܠܵܐ ܡܸܬܿܕܲܪܟܵܐ 734 ܬܲܚܸܡ ܙܲܒܼܢܹ̈ܐ ܠܲܥ̇ܒܼܵܕܼܵܘ̈ܗܝ ܀ 735 :ܟܠܗܘܿܢ ܟܲܟܼܪܸܙ ܟܲܣܝܘܼܬܹܗ 736 ܒܓܲܠ̈ܝܵܬܼܵܐ ܕܲܥܒܼܵܕܼ ܐܝܼܕܼܵܘ̈ܗܝ. 737 :ܟܲܕܼ ܬܵܢܹ̇ܝܢ ܥܲܠ ܪܲܒܿܘܼܬܹܗ 738 ܫܸܡܫܵܐ ܘܣܲܗܪܵܐ ܒܪ̈ܲܗܛܲܝܗܘܿܢ ܀ 739 :ܠܹܗ ܚܲܝܵܒܼܝܼܢ ܬܘܼܩܵܢܵܘ̈ܗܝ 740 ܬܵܘܕܲܝܼܬܼܵܐ ܥܲܠ ܡ̇ܘܗܲܒܼܬܹܗ. 741 :ܕܲܒܼܪ̈ܲܚܡܹܐ ܨܲܒܸܿܬܼ ܐܸܢܘܿܢ 742 ܒܚܘܼܒܵܐ ܢܵܘܕܿܘܿܢ ܠܐܝܼܬܼܘܼܬܹܗ ܀ 743 :ܠܵܘ ܣܘܼܢܩܵܢܹܗ ܡܸܬܼܡܲܠܸܐ 744 ܡ̣ܢ ܬܵܘܕܲܝܼܬܼܵܐ ܕܲܥܒܼܝܼܕܹ̈ܐ. 745 :ܬܵܘܕܲܝܼܬܼܵܐ ܠܲܢ ܝܘܼܬܼܪܵܢܵܐ ܗ̄ܝܼ 746 ܘܠܹܗ ܕܝܼܠܹܗ ܠܵܐ ܡܸܬܼܒܲܥܝܵܐ ܀ 747 :ܡܲܢ̣ܘܼ ܩܲܠܸܣ ܠܲܟܼܝܵܢܹܗ 748 ܟܲܕܼ ܐܝܼܬܼܵܘܗܝ ܗ̄ܘ̣ܵܐ ܡܬܼܘܿܡ̇ܐܝܼܬܼ. 749 :ܘܡܲܢ ܩܲܪܸܒܼ ܠܹܗ ܬܸܫܒܿܘܿܚܬܵܐ 750 ܥܲܕܼܠܵܐ ܢܸܒܼܪܸܐ ܒܸܪ̈ܝܵܬܼܵܐ ܀ 751 :ܫܘܼܒܼܚܹܗ ܐܝܼܬܼܵܘܗܝ ܒܲܟܼܝܵܢܹܗ 752 ܘܪܘܼܡܪܵܡܹܗ ܥܲܡ ܐܝܼܬܼܘܼܬܹܗ. 753 :ܘܠܵܐ ܙܲܥܲܪ ܐܵܦܠܵܐ ܝܵܪܹܒܼ 754 ܕܪܵܡ ܗ̄ܘ̣ ܟܝܵܢܹܗ ܡ̣ܢ ܗܵܠܹܝܢ ܀ 755 :ܠܲܢ ܗ̄ܘ̣ ܡ̇ܘܪܸܒܼ ܟܲܕܼ ܩܵܪܹܐ 756 ܘܲܡܩܲܪܸܒܼ ܠܲܢ ܠܝܼܕܲܥܬܹܗ. 757 :ܕܡ̇ܐ ܕܝܼܕܲܥܢܵܝܗܝ ܢܸܬܸܿܠ ܠܲܢ 758 ܡܲܠܟܿܘܼܬܼܵܐ ܚܠܵܦ ܬܵܘܕܲܝܼܬܼܵܐ ܀ 759 :ܒܚܘܼܒܵܐ ܕܢܲܦܫܵܐ ܢܵܘܕܸܿܐ ܠܹܗ 760 ܠܥܵܒܼ̇ܘܿܕܼܵܐ ܥܲܠ ܬܘܼܩܵܢܵܘ̈ܗܝ. 761 :ܕܡܸܛܠܵܬܲܢ ܬܲܩܸܢ ܟܠ 762 ܠܹܗ ܬܵܘܕܲܝܼܬܼܵܐ ܡ̣ܢ ܟܝܼܠܹܗ ܀