On Creation I - ܥܲܠ ܬܘܼܩܵܢܵܐ ܕܲܒܼܪܝܼܬܼܵܐ

1 :ܐܝܼܬܼܝܵܐ ܕܨܲܒܸܿܬܼ ܪܵܘܡ̇ܐ ܘܥܘܼܡܩܵܐ ܒܪܸܡܙܵܐ ܕܚܲܝܠܹܗ 2 ܒܝܲܕܼ ܒܲܪ̄ܬܼ ܩܵܠܵܐ ܨܒܼܵܐ ܕܲܢܒܲܕܸܿܩ ܥܲܠ ܬܘܼܩܵܢܵܘ̈ܗܝ ܀ 3 :ܒܪܵܫܝܼܬܼ ܬܲܩܸܢ ܫܡܲܝܵܐ ܘܐܲܪܥܵܐ ܘܡܲܝ̈ܵܐ ܘܐܵܐܲܪ 4 ܘܟܸܢܫܲܝ̈ ܪܵܘܡ̇ܐ ܘܢܘܼܗܪܵܐ ܘܚܸܫܟܵܐ ܕܲܦܝܼܣ ܥܲܠ ܟܠ ܀ 5 :ܒܪ̣ܵܗ̇ ܠܲܒܼܪܝܼܬܼܵܐ ܡ̣ܢ ܠܵܐ ܡܸܕܸܿܡ ܒܪܸܡܙܵܐ ܙܥܘܿܪܵܐ 6 ܘܐܲܝܟ ܕܲܒܼܢܲܚܬܵܐ ܟܲܣܝܼ ܐܲܦܹ̈ܝܗ̇ ܒܝܲܕܼ ܚܸܫܘܿܟܼܵܐ ܀ 7 :ܬܲܗܪܵܐ ܪܲܒܵܐ ܣܲܥ݂ܲܪ ܒܵܪܘܿܝܵܐ ܒܪܹܫ ܬܘܼܩܵܢܵܘ̈ܗܝ 8 ܕܲܒܼܢܵܐ ܒܲܝܬܵܐ ܘܐܲܛܸܡ ܟܵܘܵܘ̈ܗܝ ܘܲܡ̣ܠܵܝܗܝ ܚܸܫܟܵܐ ܀ 9 :ܒܝܲܕܼ ܥܸܠ̈ܠܵܬܼܵܐ ܨܒܼܵܐ̣ ܕܲܢܒܲܕܸܿܩ ܥܲܠ ܬܘܼܩܵܢܵܘ̈ܗܝ 10 ܘܲܠܝܘܼܠܦܵܢܵܐ ܕܲܡܠܝܼܠܘܼܬܼܵܐ ܬܲܗܝܼ ܥܒܼܵܕܵ̇ܘ̈ܗܝ ܀ 11 :ܒܪܹܝܢ ܗ̄ܘ̣ܵܘ ܟܸܢܫܹ̈ܐ ܕܲܡܫܲܝܵܢܹ̈ܐ ܒܪܵܫܝܼܬܼ ܕܲܗܘ̤ܵܬܼ 12 ܘܲܠܝܘܼܠܦܵܢܗܘܿܢ ܐܲܡܫܲܥ ܩܵܠܵܐ ܕܢܸܗܘܸܐ ܢܘܼܗܪܵܐ ܀ 13 :ܢܸܗܘܸܐ ܢܘܼܗܪܵܐ ܡܲܢܗܲܪ ܟܠܵܐ ܩܥ̣ܵܐ ܒܵܪܘܿܝܵܐ 14 ܘܟܲܢܸܫ ܐܸܢܘܿܢ ܠܲܫܡܲܝܵܢܹ̈ܐ ܠܡܸܫܡܲܥ ܬܲܗܪܵܐ ܀ 15 :ܐܘܿ ܫܝܼܦܘܿܪܵܐ ܕܩܵܠ ܒܵܪܘܿܝܵܐ ܕܐܲܙܥܸܩ ܡܸܢܫܹܠܝ 16 ܘܐܲܪܗܸܒܼ ܐܢܘܿܢ ܠܟܸܢܫܲܝ̈ ܪܵܘܡ̇ܐ ܒܩܵܠ ܢܸܥ̈ܡܵܬܹܗ ܀ 17 :ܐܘܿ ܦܘܼܩܕܵܢܵܐ ܕܥܲܡ ܒܲܪ̄ܬܼ ܩܵܠܵܐ ܗܘ̤ܵܐ ܣܘܼܥܪܵܢܵܐ 18 ܐܘܿ ܐܘܼܡ̇ܢܵܐ ܕܥܲܡܠܹܗ ܪܸܡܙܹܗ ܒܟܼܠܡܵܐ ܕܲܥܒ݂ܲܕܼ ܀ 19 :ܢܸܗܘܸܐ ܢܘܼܗܪܵܐ ܢܲܚܬܵܐ ܦܲܐܝܵܐ ܕܲܡܨܲܒܸܿܬܼ ܟܠ 20 ܘܒܹܗ ܢܸܬܼܟܲܣܘܿܢ ܪܵܘܡ̇ܐ ܘܥܘܼܡܩܵܐ ܘܟܼܠܡܵܐ ܕܲܒܼܗܘܿܢ ܀ 21 :ܫܠܸ̣ܡ ܣܘܼܥܪܵܢܵܐ ܥܲܡ ܦܘܼܩܕܵܢܵܐ ܘܲܗܘ̤ܵܐ ܢܘܼܗܪܵܐ 22 ܘܪܲܕܼܦܹܗ ܠܚܸܫܟܵܐ ܘܐܲܦܨܲܚ ܠܐܵܐܲܪ ܕܲܟܼܡܝܼܪܵܐ ܗ̣̄ܘܵܬܼ ܀ 23 :ܩܥ̣ܵܘ ܣܸܕܼܪ̈ܲܝܗܘܿܢ ܕܟܸܢܫܲܝ̈ ܪܵܘܡ̇ܐ ܒܪܝܼܟ ܒܵܪܘܿܝܵܐ 24 ܕܲܒܼܪ̣ܵܐ ܘܨܲܒܹܿܬܼ ܢܘܼܗܪܵܐ ܦܲܐܝܵܐ ܘܐܲܦܨܲܚ ܟܠܵܐ ܀ 25 :ܗܘ̤ ܠܹܗ ܫܲܒܲܚ ܥܲܠ ܬܘܼܩܵܢܹܗ ܕܫܲܦܝܼܪ ܥܲܒܼܕܹܿܗ 26 ܘܐܲܣܗܸܕܼ ܩܵܠܹܗ ܥܲܠ ܪܲܒܿܘܼܬܹܗ ܕܚܹܝܠ ܟܠ ܡܸܫܟܲܚ ܀ 27 :ܐܘܿ ܒܲܪ̄ܕܼ ܩܵܠܵܐ ܕܡ̣ܢ ܠܵܐ ܡܸܕܲܡ ܥܸܒܼܕܲܬ̤ ܡܸܕܹܿܡ 28 ܐܘܿ ܦܘܼܩܕܵܢܵܐ ܕܠܵܐ ܫܵܘܚܲܪܬܹܗ ܓܠܝܼܙܘܼܬܼ ܡܸܕܹܿܡ ܀ 29 ܒܝܲܕܼ ܒܲܪ̄ܬܼ ܩܵܠܵܐ ܨܒܼܵܐ̣ ܒܵܪܘܿܝܵܐ ܕܢܲܠܸܦ ܐܸܢܘܿܢ: pb. 194 30 ܠܚܲܝ̈ܠܵܘܵܬܼܵܐ ܡܸܬܼܝܲܕܼܥܵܢܹ̈ܐ ܥܲܠ ܐܝܼܬܼܘܼܬܹܗ ܀ 31 :ܠܵܐ ܪܓܼܝܼܫܝܼܢ ܗ̄ܘ̣ܵܘ ܕܐܝܼܬܼܵܘܗܝ ܡܸܡܬܼܘܿܡ ܩܕܼܵܡ ܒܸܪ̈ܝܵܬܹܗ 32 ܘܠܵܐ ܝܵ̇ܕܲܥܝܼܢ ܗ̄ܘ̣ܵܘ ܡܲܢ̣ܘܼ ܨܲܒܸܿܬܼ ܠܲܩܢܘܿܡܲܝ̈ܗܘܿܢ ܀ 33 :ܒܩܵܠܵܐ ܕܐܲܡܲܥ ܕܢܸܗܘܸܐ ܢܘܼܗܪܵܐ ܩܢ̣ܵܘ ܒܘܼܝܵܢܵܐ 34 ܘܥܲܡ ܣܘܼܥܪܵܢܵܐ ܩܥ̣ܵܘ ܬܸܫܒܿܘܿܚܬܵܐ ܠܡܲܬܼܩܸܢ ܟܠܵܐ ܀ 35 :ܒܗܵܢܵܐ ܦܘܼܪܣܵܐ ܐܲܡܫܲܥ ܩܵܠܵܐ ܠܵܐ ܩܢܸܐ ܩܵܠܵܐ 36 ܕܢܲܠܸܦ ܐܸܢܘܿܢ ܠܪ݁ܘܼܚܵܢܵܝܹܐ ܚܹܝܠ ܟܲܣܝܘܼܬܹܗ ܀ 37 :ܪܲܒܵܐ ܠܗܘܿܢ ܩܵܠܵܐ ܕܡܲܠܸܠ ܒܪܵܫܝܼܬܼ ܒܐܲܪܥܵܐ 38 ܘܐܲܦܸܠ ܐܸܢܘܿܢ ܕܚܲܕܼ ܒܵܪܘܿܝܵܐ ܒܪ̣ܵܐ ܟܠܡܸܕܹܿܡ ܀ 39 :ܟܕܲܢ̣ܘ ܩܵܠܲܝ̈ܗܘܿܢ ܒܚܘܼܒܵܐ ܫܲܠܡܵܐ ܘܲܣܓܸܕܼܘ ܩܘܼܕܼܡ̇ܘܗܝ 40 ܘܝܲܒܸܿܒܼܘ ܟܠܗܘܿܢ ܩܵܠܹ̈ܐ ܕܩܘܼܕܼܫܵܐ ܠܡܲܠܟܵܐ ܕܪܵܘܡ̇ܐ ܀ 41 :ܗܘܵܝܝܹܗ ܕܢܘܼܗܪܵܐ ܐܲܠܸܦ ܐܸܢܘܿܢ ܚܹܝܠ ܒܵܪܘܿܝܵܐ 42 ܘܲܟܼܕܲܢ ܐܸܢܘܿܢ ܒܢܝܼܪܵܐ ܚܝܼܚܵܐ ܕܩܵܠ ܬܵܘܕܿܝܼܬܹܗ ܀ 43 :ܫܠܸ̣ܡ ܚܲܕܼ ܝܵܘܡ̇ܐ ܠܹܠܲܝ ܐܝܼܡܵܡ ܒܫܘܼܠܵܡ ܢܘܼܗܪܵܐ 44 ܘܫܲܪܝܼ ܚܸܫܟܵܐ ܕܢܼܕܪܘܿܫ ܐܘܼܪܚܵܐ ܠܝܵܘܡ̇ܐ ܕܲܬܼܪܹܝܢ ܀ 45 :ܛܲܟܼܣܵܐ ܪܲܒܵܐ ܥܒ݂ܲܕܼ ܠܲܬܼܪ̈ܲܝܗܘܿܢ ܒܫܘܼܠܛܵܢܲܝ̈ܗܘܿܢ 46 ܕܠܵܐ ܢܸܬܼܠܒܼܘܼܢ ܚܲܕܼ ܡ̣ܢ ܚܲܒܼܪܹܗ ܒܝܲܕܼ ܪ̈ܲܗܛܲܝܗܘܿܢ ܀ 47 :ܒܝܵܘܡ̇ܐ ܕܲܬܼܪܹܝܢ ܢܦ݂ܲܩ ܦܘܼܩܕܼܵܢܵܐ ܕܢܸܗܘܸܐ ܪܩܝܼܥܵܐ 48 ܘܦܲܠܸܓܼ ܡܲܝ̈ܵܐ ܦܸܠܓܵܐ ܠܪܵܘܡ̇ܐ ܘܦܸܠܓܵܐ ܠܐܲܪܥܵܐ ܀ 49 :ܢܸܗܘܸܐ ܪܩܝܼܥܵܐ ܒܡܸܨܥܲܬܼ ܡܲܝ̈ܵܐ ܡ̇ܐܝܵܐ ܩܲܫܝܵܐ 50 ܘܢܸܛܥܲܢ ܡܲܝ̈ܵܐ ܠܥܸܠ ܡ̣ܢ ܚܲܨܹܗ ܕܠܵܐ ܢܸܣܬܲܝܲܛ ܀ 51 :ܐܘܿ ܦܘܼܩܕܵܢܵܐ ܕܩܫܝܼ ܡܲܝ̈ܵܐ ܟܝܵܢܵܐ ܪܲܦܝܵܐ 52 :ܘܲܥܒ݂ܲܕܼ ܐܸܢܘܿܢ ܟܝܵܢܵܐ ܩܲܫܝܵܐ ܕܢܸܛܥܲܢ ܡܲܝ̈ܵܐ 53 :ܐܘܿ ܡܲܬܼܩܵܠܵܐ ܕܦܲܠܸܓܼ ܡܲܝ̈ܵܐ ܩܸܒܼܝܵܐ ܪܲܒܵܐ 54 :ܘܟܲܢܸܫ ܐܸܢܘܿܢ ܠܲܬܼܪܹܝܢ ܝܲܡܡܹ̈ܐ ܠܪܵܘܡ̇ܐ ܘܥܘܼܡܩܵܐ 55 :ܐܲܝܟ ܬܲܛܠܝܼܠܵܐ ܠܒܲܝܬܵܐ ܕܠܬܲܚܬܿ ܡ̣ܬܲܚ ܠܲܪܩܝܼܥܵܐ 56 ܕܢܸܗܘܸܐ ܡܡܲܠܸܐ ܕܘܲܟܲܬܼ ܐܲܪܥܵܐ ܠܒܲܝܬܵܐ ܕܲܠܥܸܠ ܀ 57 :ܒܲܕܼܡܘܼܬܼ ܢܲܚܬܵܐ ܚܸܘܵܪ ܓܵܘܢܵܐ ܙܲܩܪܹ݂ܗ ܪܸܡܙܵܐ 58 ܘܨܵܪ ܒܹܗ ܛܲܒܼܥܹ̈ܐ ܫܸܡܫܵܐ ܘܣܲܗܣܲܐ ܕܸܠܩܹ̈ܐ ܕܢܘܼܗܪܵܐ ܀ 59 :ܬܪܹܝܢ ܢܲܗܝܼܪܹ̈ܐ ܕܸܠܩܹ̈ܐ ܕܢܘܼܗܪܵܐ ܬܠܵܐ̣ ܒܲܪܩܝܼܥܵܐ 60 ܕܲܩܼܕܸܠܩܲܝ̈ܗܘܿܢ ܢܚܲܕܿܘܿܢ ܠܐܲܪܥܵܐ ܠܩܘܼܝܵܡ ܐ̄ܢܵܫܵܐ ܀ 61 :ܡ̣ܢ ܗܵܘ̇ ܢܘܼܗܪܵܐ ܩܲܕܼܡ̇ܐ ܕܲܗܘ̤ܸܵܐ ܥܒ݂ܲܕ ܢܲܗܝܼܪܹ̈ܐ 62 ܘܡܸܢܹܗ ܦܲܠܸܓܼ ܠܫܸܡܫܵܐ ܘܣܲܗܪܵܐ ܕܸܠܩܹ̈ܐ ܙܥܘܿܪܹ̈ܐ ܀ pb. 195 63 :ܡܢܵܬܼܵܐ ܕܫܲܦܝܵܐ ܩܒ݂ܲܥ ܒܐܸܣܦܹܪܵܐ ܪܲܒܵܐ 64 ܘܬܸܛܪܹܗ ܕܢܘܼܗܪܵܐ ܣܵܡ̣ ܒܐܸܣܦܹܪܵܐ ܕܣܲܪܵܐ ܪܲܓܼܝܵܐ ܀ 65 :ܡܢܵܬܼܵܐ ܕܪܲܒܵܐ ܘܐܵܦ ܢܲܗܝܼܪܵܐ ܝܲܗ̣̄ܒܼ ܠܐܝܼܡܵܡܵܐ 66 ܘܗܵܝ̇ ܕܲܙܥܘܿܪܵܐ ܘܐܵܦ ܥܲܡܘܼܛܵܐ ܠܠܸܠܝܵܐ ܫܲܠܝܵܐ ܀ 67 :ܬܲܚܸܡ ܪܲܗܛܵܐ ܕܫܸܡܫܵܐ ܘܗܲܣܪܵܐ ܫܵܢܹ̈ܐ ܬܪܸܥܣܲܪ 68 ܕܡ̇ܐ ܕܫܲܠܸܡ ܚܲܕܼ ܢܸܬܸܠ ܐܲܬܼܪܵܐ ܕܢܸܪܕܸܿܐ ܚܲܒܼܪܹܗ ܀ 69 :ܒܬܲܪܬܹܿܝܢ ܦܸܢ̈ܝܵܢ ܥܒ݂ܲܕܼ ܡܲܪܕܿܝܼܬܹܗ ܕܫܸܡܫܵܐ ܪܲܒܵܐ 70 ܕܠܵܐ ܢܸܬܿܕܵܘܲܕܼ ܛܲܟܼܣܵܐ ܕܐܘܼܪܚܹܗ ܕܣܲܗܪܵܐ ܙܥܘܿܪܵܐ ܀ 71 :ܒܥܘܼܡܪܵܐ ܕܐ̄ܢܵܫܵܐ ܪܵܕܹܐ ܒܐܘܼܪܚܹܗ ܒܓܼܵܘ ܐܝܼܡܵܡܵܐ 72 ܘܝܵܗܹ̇ܒܼ ܐܲܬܼܪܵܐ ܠܣܲܗܪܵܐ ܙܥܘܿܪܵܐ ܕܢܸܪܕܸܿܐ ܒܐܘܼܪܚܹܗ ܀ 73 :ܒܪܲܗܛܵܐ ܐܲܡܝܼܢ ܚܵܙܹ̇ܩ ܪܵܕܹܐ ܒܬܲܪܬܹܿܝܢ ܦܸܢ̈ܝܵܢ 74 ܟܲܕܼ ܟܵܪܹܟ ܠܹܗ ܠܚܘܼܕܪܵܐ ܕܪܵܘܡ̇ܐ ܠܹܠܲܝ ܐܝܼܡܵܡ ܀ 75 :ܒܥܸܕܵܢ ܕܵܢܲܚ̇ ܨܹܐܕܲܝܢ ܒܲܕܼܡܘܼܬܼ ܚܲܬܼܢܵܐ 76 ܘܲܒܼܚܸܘܪܹ̈ܐ ܕܐܸܣܦܹܝܪ ܨܸܡܚܹܗ ܡܲܦܨܲܚ ܠܐܲܪܥܵܐ ܀ 77 :ܒܥܸܕܵܢ ܪܲܡܫܵܐ ܡܫܲܢܸܐ ܘܚܵܙܹ̇ܩ ܐܲܝܟ ܪܲܒܿܚܲܝܠܵܐ 78 ܕܡ̇ܐ ܕܐܲܪܓܸܿܫ ܒܹܗ ܚܸܫܟܵܐ ܕܫܲܢܝܼ ܥܲܠ̣ ܘܐܸܫܬܲܠܲܛ ܀ 79 :ܗܲܣܪܵܐ ܙܥܘܿܪܵܠ ܒܝܲܕܼ ܫܘܼܚܠܵܦܹ̈ܐ ܥܵܒܹ̇ܕܼ ܪܲܗܛܹܗ 80 ܘܲܒܼܚܲܕܼ ܝܲܪܚܵܐ ܕܲܪ݁ܓܹܐ ܬܪܸܥܣܲܪ ܣܵܠܹ̇ܩ ܘܢܵܚܹ̇ܬܼ ܀ 81 :ܠܵܐ ܡܥܵܘܸܟ ܠܹܗ ܢܘܼܗܪܹܗ ܕܣܲܗܪܵܐ ܠܫܸܡܫܵܐ ܪܲܒܵܐ 82 ܡ̇ܐ ܕܦܵܓܲܥ ܒܹܗ ܒܫܘܼܠܛܵܢ ܪܵܘܡ̇ܐ ܒܲܫܒܼܝܼܠ ܕܸܢܚܹܗ ܀ 83 :ܠܚܲܝܹ̈ܐ ܕܐ̄ܢܵܫܵܐ ܒܥ̣ܵܐ ܒܼܵܘܿܝܵܐ ܒܲܝܬܵܐ ܪܲܒܵܐ 84 ܘܣܵܡ̣ ܫܲܬܼܐܸܣܵܘ̈ܗܝ ܒܡܲܝ̈ܵܐ ܪ̈ܓܼܝܵܐ ܘܫܲܪܲܪ ܐܸܢܹܝܢ ܀ 85 :ܡ̣ܬܲܚ ܬܲܛܠܝܼܠܹܗ ܡ̣ܢ ܪܲܦܝܘܼܬܼܵܐ ܕܡܲܝ̈ܐ ܪ̈ܦܲܝܵܐ 86 ܘܲܟܼܫ̣ܵܐ ܡܲܝ̈ܐ ܠܥܸܠ ܡ̣ܢ ܚܲܨܹܗ ܐܲܝܟ ܩܵܒܼܝܼܬܼܵܐ ܀ 87 :ܬܠ̣ܵܐ ܩܲܢܕܹܿܝܠܹ̈ܐ ܫܸܡܫܵܐ ܘܣܲܗܪܵܐ ܒܬܲܛܠܝܼܠ ܒܲܝܬܹܿܗ 88 ܘܐܲܪܡܝܼ ܡܸܫܚܵܐ ܪܸܡܙܵܐ ܕܚܲܝܠܹܗ ܘܐܲܟܼܠܸܩ ܐܸܢܘܿܢ ܀ 89 :ܫܒܼܝܼܚ ܒܵܪܘܿܝܵܐ ܦܠܸܐ ܬܘܼܩܵܢܹ̈ ܘܪܲܒܿ ܚܘܼܫܵܒܹܗ 90 ܕܩܲܕܹܿܡ ܝܼܕܲܥ ܩܕܼܵܡ ܬܘܼܩܵܢܹܗ ܡ̇ܢ ܚܵ̇ܫܲܚ ܠܹܗ ܀ 91 :ܥܘܼܡܪܵܐ ܥܦܝܼܦܵܐ ܥܒ݂ܲܕܼ ܠܲܒܼܪܝܼܬܼܵܐ ܡܲܬܼܩܸܢ ܟܠܵܐ 92 ܬܪܹܝܢ ܡܸܕܼܝܼ̈ܝܢ ܨܲܒܸܿܬܼ ܘܲܒܼܢ̣ܵܐ ܠܲܬܼܪܹܝܢ ܥܵܠܡܹ̈ܐ ܀ 93 :ܥܒ݂ܲܕܼ ܬܿܚܬܵܝܵܐ ܕܢܸܗܘܸܐ ܥܵܗܹ̇ܝܢ ܠܡܵܝܘܿܬܼܘܼܬܼܵܐ 94 ܘܐܲܣܸܢ ܘܲܡ̣ܠܵܝܗܝ ܦܹܐܪܹ̈ܐ ܕܚܵܫ̇ܚܝܼܢ ܠܦܲܓܼܪ̈ܢܵܝܹܐ ܀ 95 ܥܒ݂ܲܕܼ ܥܸܠܵܝܵܐ ܥܘܼܡܪܵܐ ܦܲܐܝܵܐ ܕܲܡܠܸܐ ܛܘܼܒܹ̈ܐ: pb. 196 96 ܕܢܸܬܼܒܲܣܡܘܼܢ ܒܹܗ ܪ̈ܘܼܚܵܢܵܝܹܐ ܪܘܼܚܵܢܵܐܝܼܬܼ ܀ 97 :ܠܐܲܪ̈ܗܵܢܵܝܹܐ ܥܒ݂ܲܕܼ ܨܸܒܼܘ̈ܬܼܵܐ ܐܲܪ̈ܥܵܢܝܵܬܼܵܐ 98 ܘܠܲܫܡܲܝܵܢܹ̈ܐ ܡ̣ܠܲܟ ܛܵܒܼܵܬܼ̈ܐ ܫܡܲܝܵܢ̈ܝܵܬܼܵܐ ܀ 99 :ܒܲܬܼܪܹܝܢ ܥܘܼܡܪܹ̈ܐ ܡܸܬܼܒܲܩܸܐ ܗ̄ܘ̣ܵܐ ܗܵܘ̇ ܝܵ̇ܕܲܥ ܟܠ 100 ܘܥܲܕܼܠܵܐ ܢܸܗܘܘܿܢ ܫܡܲܝܵܐ ܘܐܲܪܥܵܐ ܒܗܘܿܢ ܚܵܐܲ̇ܪ ܗ̄ܘ̣ܵܐ ܀ 101 :ܩܲܕܼܝܼܡ ܗ̄ܘ̣ܵܐ ܓܹܝܪ ܨܼܒܼܝܵܢ ܚܘܼܒܹܿܗ ܩܕܼܵܡ ܬܘܼܩܵܢܹܗ 102 ܘܨܝܼܪܝܼܢ ܗ̄ܘ̣ܵܘ ܠܹܗ ܒܝܲܕܼ ܨܼܒܼܝܵܢܹܗ ܥܒܼܵܕܹ̈ܐ ܕܲܥܒ݂ܲܕܼ ܀ 103 :ܫܲܟܼܠܸܠ ܘܲܒܼܢ̣ܵܐ ܫܡܲܝܵܐ ܘܐܲܪܥܵܐ ܒܲܝܬܵܐ ܪܘܼܚܵܐ 104 ܘܐܲܣܸܢ ܘܲܡ̣ܠܲܝܗܝ ܥܘܼܬܼܪܵܐ ܪܲܒܵܐ ܠܲܕܼܥܵܡܲ݁ܪ ܒܹܗ ܀ 105 :ܟܲܢܸܫ ܡܲܝ̈ܵܐ ܘܲܥܒ݂ܲܕܼ ܝܲܡܡܹ̈ܐ ܩܸܒܼܝܵܐ ܪܲܒܵܐ 106 ܘܙܵܘܓܼ ܐܸܢܘܿܢ ܪܸܡܙܵܐ ܕܚܲܝܠܹܗ ܘܐܵܘܐܸܕܼܘ ܪ̈ܲܚܫܵܐ ܀ 107 :ܐܘܠܸܕܼ ܥܘܼܒܵܐ ܕܡܲܝܵܐ ܪ̈ܦܲܝܵܐ ܓܘܼܫܡܹ̈ܐ ܥܒܲܝܵ̈ܐ 108 ܘܡ̣ܢ ܝܲܩܝܼܪܹ̈ܐ ܦܵܪܲܚܬܼܵܐ ܕܩܲܠܝܼܠ ܓܸܦܵܗ̇ ܀ 109 :ܦܩܲܕ ܠܵܗ̇ ܠܐܲܪܥܵܐ ܘܒܸܛܢܲܬ̤ ܓܸܢܣܹ̈ܐ ܘܛܘܿܗܡܹ̈ܐ 110 ܥܒܝܼܪܵܐ ܕܫܲܝܢܵܐ ܘܚܲܝܘܲܬܼ ܫܸܢܵܐ ܘܟܼܠ ܓܸܢܣܵܢܝܼ̈ܢ ܀ 111 :ܦܲܠܚ̣ܵܗ̇ ܠܐܲܪܥܵܐ ܘܐܲܪܡܝܼ ܒܓܼܵܘܵܗ̇ ܙܲܪܥܵܐ ܕܚܲܝܹ̈ܐ 112 ܘܝܼܥܵܘ̣ ܙܲܪ̈ܥܹܐ ܘܩܵܡ̣ܘ ܐܝܼܠܵܢܹ̈ܐ ܘܗܲܒܸܿܒܼܘ ܦܹܐܪܹ̈ܐ ܀ 113 :ܫܲܡܠܝܼ ܘܲܓܼܡ݂ܲܪ ܚܹܝܠ ܒܵܪܘܿܝܵܐ ܟܠܡܵܐ ܕܲܗܘ̤ܵܐ 114 ܘܗܵܝܕܹܿܝܢ ܓܲܒܼܠܹܗ ܠܝܵܪܬܵܐ ܘܡ̇ܪܵܐ ܕܟܼܠ ܩܸܢܝܵܢܝܼ̈ܢ ܀ 115 :ܒܟܼܠܡܵܐ ܕܲܥܒ݂ܲܕܼ ܩܵܠܵܐ ܐܲܫܡܲܥ ܥܲܠ ܬܘܼܩܵܢܹܗ 116 ܘܟܲܕܼ ܓܵܒܹ̇ܠ ܠܹܗ ܠܥܲܦܪܹܗ ܕܐܵܕܼܵܡ ܩܵܠܵܐ ܘܡܸܠܟܵܐ ܀ 117 :ܒܟܼܠܡܵܐ ܕܲܗܘ̤ܸܵܐ ܡܸܕܹܿܡ ܐܸܡ݂ܲܪ ܘܲܗܘ̤ܵܐ 118 ܘܲܒܼܬܼܘܼܩܵܢܵܐ ܕܲܨܠܸܡ ܐ̄ܢܵܫܵܐ ܬܵܘ ܠܲܡ ܢܸܥܒܸܿܕܼ. 119 :ܡ̣ܬܲܚ ܠܲܫܡܲܝܵܐ ܘܠܵܐ ܩ̣ܪܵܐ ܠܲܥܸܕܼܪܹܗ ܚܲܝܠܵܐ ܐ̄ܚܪܹܢܵܐ 120 ܪܩܲܥ̣ ܬܘܼܒܼ ܠܐܲܪܥܵܐ ܘܠܵܐ ܐܸܬܼܡܲܠܲܟ ܒܲܒܼܢܲܝ̈ ܡܸܠܟܹܿܗ ܀ 121 :ܥܒ݂ܲܕܼ ܟܸܢܫܲܝ̈ܗܘܿܢ ܕܲܡܫܲܝܵܢܹ̈ܐ ܢܘܼܪܵܐ ܘܪܘܼܚܵܐ 122 ܘܠܵܐ ܓܠ̣ܵܐ ܐ̄ܪܵܙܵܐ ܕܚܹܝܠ [...] ܐܝܼܬܼܘܼܬܹܗ ܒܢܘܿܡܹ̈ܐ ܕܥܲܡܹܗ ܀ 123 :ܒܬܼܘܼܩܵܢ ܐܵܕܼܵܡ ܡܸܠܟܵܐ ܚܲܕܼܬܼܵܐ ܘܐܵܦ ܚܘܼܫܒܼܵܐ 124 ܟܲܕܼ ܡܲܫܡܲܥ ܠܹܗ ܠܩܵܠ ܚܘܼܫܒܼܵܘ̈ܗܝ ܪܵܘܡ̇ܐ ܀ 125 :ܬܵܘ ܠܲܡ ܢܸܥܒܸܿܕܼ ܐ̄ܢܵܫܵܐ ܒܨܲܠܡܲܢ ܐܵܦ ܒܲܕܼܡܘܼܬܿܢ 126 ܘܢܸܗܘܸܐ ܫܲܠܝܼܛ ܥܲܠ ܟܠ ܕܲܗܘ̤ܵܐ ܒܲܕܼܡܘܼܬܼ ܡܲܠܟܵܐ ܀ 127 :ܡ̇ܢܵܘ ܗܵܢܵܐ ܕܲܡܫܲܚܠܸܦ ܐܲܢ̄ܬܿ ܐܘܿ ܒܵܪܘܿܝܵܐ 128 ܡܸܟܵܐ ܚܲܕܼܬܼܵܐ ܘܐܵܦ ܚܘܼܫܵܒܼܵܐ ܒܥܲܦܪܹܗ ܕܐܵܕܼܵܡ ܀ 129 :ܠܡܲܢ ܩܵܪܹܗ ܐܲܢ̄ܬܿ ܥܸܕܼܪܵܐ ܥܲܡܵܟ ܒܬܼܘܼܩܵܢ ܨܲܠܡܵܟ 130 ܘܡܲܢ̣ܘܼ ܗܘ̤ܵܐ ܠܵܟ ܡ̇ܠܹ̇ܟ ܡܸܠܟܵܐ ܒܟܼܠܡܵܐ ܕܲܥܒ݂ܲܕܿܬܿ ܀ 131 :ܐܘܿ ܥܲܦܪܵܐ ܕܫܝܼܛ ܕܲܚܝܼܚܹܗ ܘܪܵܡ ܬܘܼܩܵܢܹܗ 132 ܕܐ̄ܪ̈ܵܙܹܐ ܟܣܲܝܵ̈ܐ ܡܸܬܼܡܲܠܠܝܼܢ ܒܵܗ̇ ܒܲܓܼܒܼܝܼܠܘܼܬܹܗ ܀ 133 ܐܘܿ ܡ̇ܝܘܿܬܼܵܐ ܕܲܓܼܠ̣ܵܐ ܘܒܲܕܹܿܩ ܒܝܲܕܼ ܬܘܼܩܵܢܹܗ: pb. 197 134 ܩܢܘܿܡܹ̈ܐ ܠܬܵܬܼܵܐ ܚܕܼܵܐ ܐܝܼܬܼܘܼܬܼܵܐ ܕܠܵ ܫܘܼܪܵܝܵܐ ܀ 135 :ܒܝܲܕܼ ܪܘܼܟܵܒܼܵܐ ܕܨܲܠܡܹܗ ܕܐܵܕܼܵܡ ܒܲܕܸܿܩ ܐܲܒܼܵܐ 136 ܕܲܒܼܫܲܘܝܘܼܬܼܵܐ ܕܲܒܼܪܵܐ ܘܪܘܼܚܵܐ ܗܘ̤ܵܐ ܟܠ ܡܸܕܸܿܡ ܀ 137 :ܟܲܣܝܹܗ ܠܐ̄ܪܵܙܵܐ ܕܒܼܘܼܕܵܩ ܩܢܘܿܡܹ̈ܐ ܡ̣ܢ ܟܠ ܕܲܗܘ̤ܸܵܐ 138 ܕܕܲܠܡܵܐ ܢܸܪܢܘܿܢ ܪ̈ܘܼܚܵܢܵܝܹܐ ܚܲܝܠܵܐ ܐ̄ܚܪܹܢܵܐ ܀ 139 :ܒܐܵܕܼܵܡ ܨܲܠܡܹܗ ܐܲܝܟ ܕܲܒܼܐ̄ܪܵܙܵܐ ܓܠ̣ܵܐ ܠܲܢܒܼܝܹ̈ܐ 140 ܕܲܒܼܪܵܐ ܘܪܘܼܚܵܠܐ ܫܘܹܝܢ ܥܲܡ ܐܲܒܼܵܐ ܫܒܸܡ ܐܝܼܬܼܘܼܬܼܵܐ ܀ 141 :ܒܗܵܝ̇ ܕܲܒܼܖܨܲܠܡܲܢ ܟܝܵܢܵܐ ܕܲܫܘܸܐ ܐܲܟܼܪܸܙ ܘܐܲܠܸܦ 142 ܘܲܒܼܚܲܕܼ ܕܡܘܼܬܼܵܐ ܩܢܘܿܡܹ̈ܐ ܬܠܵܬܼܵܐ ܓܠ̣ܵܐ ܘܒܲܕܸܿܩ ܠܲܢ ܀ 143 :ܒܐܵܕܼܵܡ ܝܵܪܬܵܐ ܐܲܠܸܦ ܘܲܓܼܠ̣ܵܐ ܬܠܝܼܬܼܵܝܘܼܬܼܵܐ 144 ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܚܕܼܵܐ ܫܲܘܝܘܼܬܼܵܐ ܀ 145 :ܗܵܢܵܐ ܚܲܝܠܵܐ ܕܲܟܼܣܸܐ ܡ̣ܢ ܟܠ ܒܪ̣ܵܐ ܟܠ ܡܸܕܹܿܡ 146 ܘܲܒܼܫܘܼܠܵܡܵܐ ܕܟܼܠܡܵܐ ܕܲܗܘ̤ܵܐ ܪܲܟܸܿܒܼ ܐ̄ܢܵܫܵܐ ܀ 147 :ܚܕܼܵܐ ܒܲܪ̄ܬܼ ܩܵܠܵܐ ܐܲܫܡܲܥ ܟܲܣܝܵܐ ܥܲܠ ܟܠ ܕܲܗܘ̤ܵܐ 148 ܘܲܒܼܬܼܘܼܩܵܢܵܐ ܕܨܲܠܡܹܗ ܕܐܵܕܼܵܡ ܫܲܚܠܸܦ ܩܵܠܵܐ ܀ 149 :ܬܵܘ ܠܵܡ ܢܸܥܒܸܿܕܼ ܐ̄ܢܵܫܵܐ ܡܠܝܼܠܵܐ ܒܨܲܠܡܵܐ ܕܝܼܠܲܢ 150 ܘܒܲܐ̄ܚܝܵܢܘܼܬܼܵܐ ܕܢܲܦܫܹܗ ܘܦܲܓܼܪܹܗ ܢܹܐܣܘܿܪ ܟܠܵܐ ܀ 151 :ܢܸܗܘܸܐ ܐ̄ܚܝܵܢܵܐ ܠܲܫܡܲܝܵܢܹ̈ܐ ܒܚܲܝܹ̈ܐ ܕܢܲܦܫܵܐ 152 ܐܵܦ ܩܲܪܝܼܒܼܵܐ ܠܦܲܓܼܪ̈ܵܢܵܝܹܐ ܒܪܘܼܟܵܒܼ ܦܲܓܼܪܵܐ ܀ 153 :ܘܢܸܗܘܸܐ ܨܲܠܡܵܐ ܒܝܲܕܼ ܓܼܠܝܘܼܬܹܗ ܡܲܟܼܪܸܙ ܟܲܣܝܘܼܬܼܝ 154 ܘܢܸܗܘ̤ܐ ܫܲܠܝܼܛ ܥܲܠ ܟܠ ܕܲܗܘ̤ܵܐ ܕܡܹܐܠܲܦ ܡܵܪܘܼܬܼܝ ܀ 155 :ܒܹܗ ܓܵܠܹ̇ܐ ܐ̄ܢܵܐ ܥܲܠ ܐܝܼܬܼܘܵܬܼܵܐ ܕܲܟܼܝܵܢܝ ܟܲܣܝܵܐ 156 ܘܒܹܗ ܡܲܠܸܦ ܐ̄ܢܵܐ ܠܪ̈ܘܼܚܵܢܵܝܹܐ ܫܘܼܠܛܵܢܝ ܕܥܲܠ ܟܠ ܀ 157 :ܡܝܲܩܲܪ ܐ̄ܢܵܐ ܠܵܗ̇ ܠܲܓܼܒܼܝܼܠܘܼܬܹܗ ܡ̣ܢ ܟܠ ܕܲܒܼܪܹܝ̇ܬܼ 158 ܕܒܼܐܝܼܕܼܵ ܘܦܘܼܡ̇ܐ ܓܵܒܹ̇ܠ ܐ̄ܢܵܐ ܠܹܗ ܘܢܵܦܲ݁ܚ ܐ̄ܢܵܐ ܒܹܗ ܀ 159 :ܒܐܝܼܕܼܵܐ ܟܣܝܼܬܼܵܐ ܡܙܲܝܲܚ ܐ̄ܢܵܐ ܠܹܗ ܠܗܥܲܦܪܹܗ ܫܝܼܛܵܐ 160 ܘܡ̣ܢ ܦܘܼܡܝ ܚܲܝܵܐ ܢܵܦܲ݁ܚ ܐ̄ܢܵܐ ܒܹܗ ܪܘܼܚܵܐ ܕܚܲܝܹ̈ܐ ܀ 161 :ܐܘܿ ܐܝܼܬܼܘܼܬܼܵܐ ܕܠܵܐ ܪܘܼܟܵܒܼܵܐ ܕܟܲܣܝܵܐ ܡ̣ܢ ܟܠ 162 ܕܡܸܛܠ ܫܝܼܛܵܐ ܐܲܙܥܲܪ ܢܲܦܫܹܗ ܒܫܸܡ ܗܲܕܸܡܹ̈ܐ ܀ 163 :ܫܩ݂ܲܠ ܠܹܗ ܡ̇ܪܝܵܐ ܥܲܦܪܵܐ ܫܝܼܛܵܐ ܡ̣ܢ ܐܲܕܼܡܬܼܵܐ 164 ܘܪܲܟܸܿܒܼ ܠܐܵܕܼܵܡ ܨܲܠܡܵܐ ܡܠܝܼܠܵܐ ܡ̣ܢ ܕܲܚܝܼܚܵܐ ܀ 165 :ܘܲܢܦܲܚ̣ ܒܐܲܦܵܘ̈ܗܝ ܢܫܲܡܬܼܵܐ ܕܚܲܝܹ̈ܐ ܡ̣ܢ ܪܘܼܚ ܦܘܼܡܹܗ 166 ܘܲܗܘ̤ܵܐ ܐܵܕܼܵܡ ܠܲܢܦܸܫ ܚܲܝܵܐ ܡ̇ܐܢܵܐ ܡܠܝܼܠܵܐ ܀ 167 :ܠܹܗ ܒܲܠܚܘܿܕܼܵܘܗܝ ܕܠܵܐ ܒܼܲܪ̄ܬܼ ܙܵܘܓܵܐ ܪܲܟܸܿܒܼ ܥܲܒܼܕܹܿܗ 168 ܟܲܕܼ ܡܲܠܸܦ ܠܹܗ ܕܲܒܼܟܼܠ ܡܸܕܹܿܡ ܚܕܲܬܼ ܬܼܘܩܵܢܹܗ ܀ pb. 198 169 :ܘܫܲܡܠܝܼ ܘܓܲܡ̣ܪܹܗ ܠܡܵܐܢܵܐ ܡܠܝܼܠܵܐ ܕܨܲܡܹܗ ܚܲܝܵܐ 170 ܘܠܲܝܬܿ ܒܲܪ ܦܸܚܡܵܐ ܕܕܼܵܡܹ̇ܐ ܠܐܵܕܼܵܡ ܕܢܸܬܼܩܲܝܲܐ ܒܹܗ ܀ 171 :ܐܲܪܡܝܼ ܫܸܠܝܵܐ ܕܫܸܢܬܼܵܐ ܘܲܛܒ݂ܲܥ ܐܵܕܼܵܡ ܫܲܒܼܪܵܐ 172 ܘܲܢܣܲܒܼ݂ ܐܸܠܥܵܐ ܡ̣ܢ ܗܲܕܵܡܘ̈ܗܝ ܘܬܲܩܸܢ ܠܐܲܢ̄ܬܿܬܼܵܐ ܀ 173 :ܠܹܗ ܡܲܠܝܼ ܠܹܗ ܗܲܕܼܵܐ ܦܲܓܼܪܹܗ ܐܲܝܟ ܩܲܕܼܡ̇ܝܵܐ 174 ܘܡ̣ܢ ܗܵܘ̇ ܕܝܼܠܹܗ ܪܲܟܸܿܒܼ ܦܲܓܼܪܵܐ ܕܕܼܵܡܹ̇ܐ ܠܕܼܝܼܠܹܗ ܀ 175 :ܗܘ̤ܵܐ ܒܲܪܢܵܫܵܐ ܕܕܵܡܹ̇ܐ ܠܐ̄ܢܵܫܵܐ ܡ̣ܢ ܒܲܪܢܵܫܵܐ 176 ܘܫܲܡܠܝܼ ܘܲܗܘ̤ܵܐ ܦܲܓܼܪܵܐ ܘܢܲܦܫܵܐ ܒܲܕܼܡܘܼܬܼ ܐܵܕܼܵܡ ܀ 177 :ܕܡܸܟ ܛܲܒܿܝܼܥܵܐ ܘܠܵܐ ܐܲܪܓܸܿܫ ܗ̄ܘ̣ܵܐ ܒܚܘܼܠܵܟ ܦܲܓܼܪܹܗ 178 ܘܢܵܕܼ ܡ̣ܢ ܫܸܢܬܹܗ ܘܲܚ̣ܙܵܐ ܐ̄ܢܵܫܵܐ ܕܕܼܵܡܹ̇ܐ ܠܦܲܓܼܪܹܗ . 179 :ܪܟܲܙ̣ ܓܸܠܝܵܢܵܐ ܒܪܘܼܚ ܒܵܪܘܿܝܵܐ ܒܟܸܢܵܪ ܢܲܦܫܹܗ 180 ܘܡܲܠܸܠ ܦܘܼܡܹܗ ܩܵܠܹ̈ܐ ܚܲܕܼܬܹ̈ܐ ܕܢܒܼܝܼܘܼܬܼܵܐ ܀ 181 :ܗܵܢܵܐ ܙܲܒܼܢܵܐ ܓܲܪܡ̇ܐ ܐܝܼܬܹܝܗ̇ ܡ̣ܢ ܗܲܕܵܡܲܝ̈ 182 ܒܫܹܡܝ ܬܸܬܼܟܲܢܸܐ ܐܲܢ̄ܬܲܬܼ ܓܲܒܼܪܵܐ ܡܩܲܝܡܲܬܼ ܥܘܼܡܪܵܐ ܀ 183 :ܩ̣ܪܵܗ̇ ܬܘܼܒܼ ܒܲܫܡܵܐ ܕܡܸܬܼܕܲܩ ܒܹܗ ܫܸܡ ܣܘܼܥܪܵܢܵܐ 184 ܘܚܵܘܝܼ ܕܐܝܼܬܹܝܗ̇ ܐܸܡ̇ܐܐ ܕܚܲܝܹ̈ܐ ܝܵܠܕܲܬܼ ܚܲܝܹ̈ܐ ܀ 185 :ܟܲܢܸܫ ܨܹܐܕܼܵܘܗܝ ܟܠ ܓܸܢܣܵܢܝܼ̈ܢ ܕܲܗܘ̤ܵܘ ܒܐܲܪܥܵܐ 186 ܕܢܲܪܡܸܐ ܥܠܲܝܗܘܿܢ ܛܲܒܼܥܵܐ ܕܡܸܠܬܹܗ ܕܢܸܗܘܘܿܢ ܕܝܼܠܹܗ ܀ 187 :ܟܲܢܒܿ ܐܸܢܘܿܢ ܒܲܡܫܵܗܲܝ̈ܗܘܿܢ ܐܲܟܼܡܵܐ ܕܲܣܦ݂ܲܩ 188 ܘܝܼܠܸܦ ܚܲܝܠܵܐ ܕܫܲܥܒܸܿܕܼ ܠܹܗ ܟܠ ܐܲܝܟ ܕܲܠܡܵܪܵܐ ܀ 189 :ܒܐܲܬܼܪܵܐ ܫܝܼܛܵܐ ܬܲܩܸܢ ܐܸܢܘܿܢ ܠܥܲܦܪ̈ܵܢܵܝܹܐ 190 ܘܟܸܢ ܣܵܡ̣ ܐܸܢܘܿܢ ܒܐܲܬܼܪܵܐ ܕܲܥܕܹܢ ܕܲܦܠܸܐ ܘܲܪܓܼܝܼܓܼ ܀ 191 :ܥܲܠ̣ܘ ܝܵܪ̈ܵܘܿܬܹܐ ܠܓܼܵܘ ܦܲܪܕܲܝܣܵܐ ܘܐܸܚܲܕܼܘ ܢܘܼܡܹܐ 192 ܘܐܲܟܼܬܸܿܒܼ ܠܗܘܿܢ ܫܛܵܪ ܡ̇ܪܘܼܬܹܗ ܒܝܲܕܼ ܦܘܼܩܕܵܢܵܐ ܀ 193 :ܝܲܗ̣̄ܒܼ ܒܐܝܼܕܲܝ̈ܗܘܿܢ ܫܘܼܠܛܵܢ ܦܹܐܪܹ̈ܐ ܪ̈ܓܼܝܼܓܹܐ ܕܲܥܕܹܢ 194 ܘܲܟܼܠܵܐ ܐܸܢܘܿܢ ܡ̣ܢ ܐܝܼܠܵܢܵܐ ܕܡ̇ܘܠܸܕܼ ܡ̇ܘܬܵܐ ܀ 195 :ܩܪ̣ܵܐ ܠܲܡ ܠܐܵܕܼܵܡ ܨܲܠܡܹܗ ܘܣܵܡ̣ ܠܹܗ ܬܚܘܼܡ̇ܐ 196 ܕܠܵܐ ܢܸܬܼܩܲܪܲܒܼ ܢܸܣܲܒܼ ܦܹܐܪܵܐ ܩܢܸܐ ܝܼܕܲܥܬܼܵܐ ܀ 197 :ܠܵܐ ܠܲܡ ܬܹܐܟܼܘܿܠ ܡ̣ܢ ܐܝܼܠܵܢܵܐ ܕܡ̇ܘܬܵܐ ܡ̇ܘܠܸܕܼ 198 ܛܲܪ ܦܘܼܩܕܵܢܵܐ ܕܝܵܗܹ̇ܒܼ ܐ̄ܢܵܐ ܠܵܟ ܦܹܐܪܵܐ ܕܚܲܝܹ̈ܐ ܀ 199 :ܬܪܹܝܢ ܐܝܼܠܵܢܹ̈ܐ ܣܵܡ̣ ܒܵܪܘܿܝܵܐ ܠܒܼܘܼܚܪܵܐ ܨܲܠܡܹܗ 200 ܘܲܒܼܪܵܐ ܐܸܢܘܿܢ ܐܝܼܠܵܢ ܚܲܝܹ̈ܐ ܘܐܝܼܠܵܢ ܡ̇ܘܬܵܐ ܀ 201 :ܬܪܹܝܢ ܬܘܼܩܵܢܹ̈ܐ ܐܲܝܟ ܕܲܒܼܐ̄ܪܵܙܵܐ ܣܵܡ̣ ܒܐܝܼܠܵܢܹ̈ܐ 202 ܥܘܡܪܵܐ ܕܐܲܪܥܵܐ ܘܡܲܠܟܿܘܼܬܼ ܪܵܘܡ̇ܐ ܒܗܘܿܢ ܒܲܕܸܿܩ ܠܲܢ ܀ pb. 199 203 :ܗܘ̤ܵܐ ܦܘܼܩܕܵܢܵܐ ܐܲܝܟ ܫܲܠܝܼܛܵܐ ܕܢܸܛܲܪ ܐܸܢܘܿܢ 204 ܕܕܲܠܡܵܐ ܢܲܡܪܲܚ ܐܵܕܼܵܡ ܫܲܒܼܪܵܐ ܥܲܠ ܦܹܐܪ̈ܲܝܗܘܿܢ ܀ 205 :ܓܠ̣ܵܐ ܘܒܲܕܸܿܩ ܠܹܗ ܐܲܝܟ ܕܲܒܼܐ̈̄ܪܵܙܵܐ ܒܝܲܕܼ ܦܘܼܩܕܵܢܵܐ 206 ܕܚܲܝܹ̈ܐ ܚܲܕܼܬܹ̈ܐ ܝܵܗܹ̇ܒܼ ܐ̄ܢܵܐ ܠܵܟ ܐܸܢ ܠܵܐ ܬܸܚܛܵܐ ܀ 207 :ܘܟܲܕܼ ܝܵ̇ܕܲܥ ܠܹܗ ܕܡܸܚܛܵܐ ܚܵܛܹ̇ܐ ܐܲܝܟ ܚܲܝܛܵܐ 208 ܒܝܲܕܼ ܦܘܼܩܕܵܢܵܐ ܨܒܼܵܐ ܕܢܲܢܲܣܹܝܗܝ ܐܲܝܟ ܠܵܐ ܝܵ̇ܕܲܥ ܀ 209 :ܘܟܲܕܼ ܝܵ̇ܕܲܥ ܗ̄ܘ̣ܵܐ ܕܡ̇ܝܘܿܬܼܘܼܬܼܵܐ ܣܵܡ̣ ܒܲܟܼܝܵܢܹܗ 210 ܒܥܸܠܲܬܼ ܦܹܐܪܵܐ ܨܒܼܵܐ ܕܲܢܕܲܚܸܠ ܠܲܕܼܒܼܵܬܲܪܟܸܿܢ ܀ 211 :ܒܝܲܕܼ ܦܘܼܩܕܵܢܵܐ ܕܥܲܠ ܐܝܼܠܵܢܵܐ ܕܕܼܵܝܗܝ ܠܲܦܫܝܼܛܵܐ 212 ܘܐܲܝܬܿܝܼ ܠܓܸܠܝܵܐ ܦܵܪܘܿܫܘܼܬܹܗ ܒܝܲܕܼ ܢܸܣܝܵܢܵܐ ܀ 213 :ܗܘ̤ܵܐ ܦܘܼܩܕܵܢܵܐ ܒܲܕܼܡܘܼܬܼ ܟܘܼܪܵܐ ܠܒܼܘܼܚܪܵܢ ܐ̄ܢܵܫܵܐ 214 ܘܪܸܓܲܬܼ ܦܹܐܪܵܐ ܒܲܕܼܡܘܼܬܼ ܪܸܬܼܚܵܐ ܠܥܸܠ ܡ̣ܢ ܕܲܗܒܼܵܐ ܀ 215 :ܢܦܲܚ̣ ܒܹܗ ܐܵܐܲܪ ܕܪܸܓܲܬܼ ܦܹܐܪܵܐ ܒܕܲܗܒܹܗ ܕܐܵܕܼܵܡ 216 ܘܐܲܣܓܿܝܼ ܡܲܪ̣̱ܩܹܗ ܒܢܘܼܪܵܐ ܕܐܘܼܟܼܠܹܗ ܘܚܵܘܝܼ ܫܘܼܦܪܹܗ ܀ 217 :ܕܲܗܒܼܵܐ ܛܵܒܼܵܐ ܒܪ̣ܵܝܗܝ ܠܐܵܕܼܵܡ ܡܲܬܼܩܸܢ ܟܠܵܐ 218 ܘܟܲܣܝܼ ܫܘܼܦܪܹܗ ܒܠܵܐ ܝܼܕܲܥܬܼܵܐ ܐܲܝܟ ܬܲܚܦܝܼܬܼܵܐ ܀ 219 :ܒܝܲܕܼ ܦܘܼܩܕܵܢܵܐ ܐܲܝܟ ܕܲܒܼܟܼܘܼܪܵܐ ܐܲܥܸܠ ܢܲܣܕܹ̱̣݂ܿܗ 220 ܘܲܒܼܢܸܣܝܵܢܵܐ ܡ̣ܪܲܩ ܨܵܐܘܼܬܹܗ ܘܚܵܘܝܼ ܫܘܼܦܪܹܗ ܀ 221 :ܐ̄ܪܵܙܵܢܵܐܝܿܬܼ ܦܲܩܸܕܼ ܐܸܢܘܿܢ ܠܲܕܼܒܹܝܬܼ ܐܵܕܼܵܡ 222 ܕܠܵܐ ܢܨܘܼܬܼܘܼܢܵܝܗܝ ܟܸܢܫܲܝ̈ ܪܵܘܡ̇ܐ ܠܩܵܠ ܦܘܼܩܕܵܢܵܐ ܀ 223 :ܒܲܝܢܲܝ ܟܲܣܝܵܐ ܠܦܲܓܼܪ̈ܵܢܵܝܹܐ ܗܘ̤ܵܐ ܗܵܢ ܐ̄ܪܵܙܵܐ 224 ܘܠܵܐ ܫܵܘܬܸܿܦ ܒܵܗ̇ ܒܬܸܢܘܲܝ ܕܐܵܕܼܵܡ ܠܲܫܡܲܝܵܢܹ̈ܐ ܀ 225 :ܠܵܐ ܫܡܝܼܥ ܗ̄ܘ̣ܵܐ ܠܹܗ ܠܪܹܫܵܐ ܕܐܵܐܲܪ ܗܵܢ ܦܘܼܩܵܕܵܢܵܐ 226 ܘܠܵܐ ܝܵ̇ܕܲܥ ܗ̄ܘ̣ܵܐ ܕܡܸܛܠ ܡ̇ܢܵܐ ܟܠܹܝܢ ܡ̣ܢ ܦܹܐܪܵܐ ܀ 227 :ܚܣܵܡܵܐ ܕܲܠܚܵܗ̇ ܠܫܲܦܝܼܘܼܬܼ ܢܲܦܫܹܗ ܘܲܚ̣ܫܸܟ ܡܸܢܫܹܠܝ 228 ܕܲܚܙ̣ܵܝܗܝ ܠܐܵܕܼܵܡ ܕܲܥܒܼܝܼܕܼ ܡ̇ܪܵܐ ܥܲܠ ܟܠ ܕܲܗܘ̤ܵܐ ܀ 229 :ܛܢܵܢܵܐ ܫܲܓܼܪܹܗ ܫܲܓܼܪܹܗ̇ ܠܐܵܟܹ̇ܠܩܲܪܨܵܐ ܒܲܕܼܡܘܼܬܼ ܢܘܼܪܵܐ 230 ܕܡܸܛܠܡܵܢܵܐ ܥܒܼܝܼܕܼ ܥܲܦܪܵܐ ܡܲܠܟܵܐ ܒܐܲܪܥܵܐ ܀ 231 :ܠܵܐ ܣܸܦܩܲܬ̤ ܠܒܲܪ ܕܲܚܝܼܚܵܐ ܕܲܩܪ̣ܵܝܗܝ ܨܲܠܡܹܗ 232 ܐܸܠܵܐ ܕܫܲܥܒܸܿܕܼ ܪܵܘܡ̇ܐ ܘܥܘܼܡܩܵܐ ܬܚܹܝܬܼ ܫܘܠܛܵܢܹܗ ܀ 233 :ܠܵܐ ܟܲܕܿܘܼ ܠܹܗ ܠܥܲܦܪܧܵܐ ܕܐܲܪܥܵܐ ܕܓܲܒܼܠܹܗ ܒܐܘܼܕܼܵܘ̈ܗܝ 234 ܐܸܠܵܐ ܕܐܲܪܡܝܼ ܢܝܼܪܵܐ ܕܥܲܡܠܹܗ ܥܲܠ ܪ̈ܘܼܚܵܢܹܐ ܀ 235 :ܠܝܼ ܪܘܼܚܵܢܵܐ ܩܢܸܐ ܫܘܼܠܛܵܢܵܐ ܒܬܸܓܼܡܹ̈ܐ ܕܐܲܟܼܘܵܬܼܝ 236 ܐܵܦܠܵܐ ܒܡܸܠܬܼܵܐ ܨܒܼܵܐ ܕܲܢܒܲܕܸܿܩ ܥܲܠ ܬܘܼܩܵܢܲܢ ܀ 237 :ܗܵܢܵܐ ܫܝܼܛܵܐ ܥܲܦܪܵܐ ܕܐܲܪܥܵܐ ܒܲܪ ܕܲܚܝܼܚܵܐ 238 ܒܡܸܠܟܵܐ ܪܲܒܵܐ ܘܲܒܼܚܘܼܫܵܒܼܵܐ ܨܲܒܸܿܬܼ ܓܲܒܼܠܹܗ ܀ 239 ܩ̣ܪܵܝܗܝ ܬܘܼܒܼ ܨܲܠܡܹܗ ܟܲܕܼ ܡ̇ܘܪܸܒܼ ܠܹܗ ܐܲܝܟ ܕܲܠܡܵܪܵܐ: pb. 200 240 ܘܲܟܼܕܲܢ ܐܸܢܘܿܢ ܠܲܡܫܲܝܵܢܹ̈ܐ ܒܦܘܼܠܚܵܢ ܚܲܝܵܘ̈ܗܝ ܀ 241 :ܕܐܸܩܪܘܿܒܼ ܨܹܐܕܼܵܘܗܝ ܒܸܠܥܵܕܼ ܓܘܼܫܡܵܐ ܠܵܐ ܚܵܙܹ̇ܐ ܠܝܼ 242 ܕܐܸܩܪܘܿܒܼ ܨܹܐܕܼܵܘܗܝ ܕܠܵܐ ܪܘܼܟܵܒܼܵܐ ܠܵܐ ܥܵܢܹ̇ܐ ܠܝܼ ܀ 243 :ܠܵܐ ܫܲܠܝܼܛ ܗ̄ܘ̣ܵܐ ܗܵܘ̇ ܚܲܣܵܡܵܐ ܒܫܘܼܪܵܝ ܙܲܒܼܢܹ̈ܐ 244 ܢܫܲܚܠܸܦ ܝܵܬܹܗ ܘܢܲܛܥܸܐ ܠܐ̄ܢܵܫܵܐ ܒܝܲܕܼ ܕܸܡ̈ܘܵܬܼܵܐ ܀ 245 :ܚܸܘܝܵܐ ܓܒܼܵܐ ܠܹܗ ܕܲܢܟܲܣܸܐ ܒܹܗ ܡܲܪܝܼܪܘܼܬܹܗ 246 ܘܐܲܝܟ ܟܸܢܵܪܵܐ ܒܡܸܢܲܝ̈ ܒܸܣܪܵܐ ܙܡ݂ܲܪ ܙܹܐܦܵܢܵܐ ܀ 247 :ܢܲܓܼܕܹܿܗ ܠܚܸܘܝܵܐ ܩܢܸܐ ܪܘܼܟܵܒܼܵܐ ܠܘܵܬܼ ܒܲܪ̄ܬܼ ܐ̄ܢܵܫܵܐ 248 ܕܡ̇ܐ ܕܲܚܙܵܬܹ̈ ܕܒܸܣܪܵܢܵܝܵܐ ܗ̄ܘ̣ ܬܩܲܒܸܿܠ ܡܸܠܟܹܿܗ ܀ 249 :ܙܡ݂ܲܪ ܙܹܐܦܵܢܵܐ ܒܐܲܒܿܘܼܬܼ ܒܸܣܪܵܐ ܩܵܠܹ̈ܐ ܢܟܼܝܼܠܹ̈ܐ 250 ܕܡܸܛܠܡܵܢܵܐ ܟܠܹܝܬܿܘܿܢ ܘܲܫܠܹܝܢ ܡ̣ܢ ܡܹܐܟܼܘܼܠܬܵܐ ܀ 251 :ܕܲܠܡܵܐ ܬܚܘܼܡ̇ܐ ܣܵܡ̣ ܒܵܪܘܿܝܵܐ ܥܲܠ ܐܝܼܠܵܢܹ̈ܐ 252 ܕܠܵܐ ܬܸܬܼܒܲܣܡܘܼܢ ܡ̣ܢ ܦܹܐܪ̈ܲܝܗܘܿܢ ܐܲܝܟ ܚܲܝ̈ܘܵܬܼܵܐ ܀ 253 :ܠܥܸܙܲܬ̤ ܚܵܘܵܐ ܒܩܵܠܵܐ ܓܫܝܼܡܵܐ ܥܲܡ ܒܸܣܪܵܢܵܐ 254 ܕܫܲܠܝܼܛ ܗ̄ܘ̣ ܠܲܢ ܥܲܠ ܒܘܼܣܵܡܵܐ ܕܟܼܠܗܘܿܢ ܦܹܐܪܹ̈ܐ ܀ 255 :ܡ̣ܢ ܚܲܕܼ ܒܲܠܞܚܘܿܕܼ ܬܲܚܸܡ ܘܲܟܼܠ̣ܵܢ ܕܡ̇ܘܬܵܐ ܡ̇ܘܠܸܕܼ 256 ܘܲܕܼܠܵܐ ܢܡܘܼܬܼ ܠܲܡ ܡܸܛܠܗܵܕܹܐ ܟܠ̣ܵܢ ܡ̣ܢ ܦܹܐܪ̈ܵܘܗܝ ܀ 257 :ܥܸܠܬܹܗ ܕܡ̇ܘܬܵܐ ܕܲܡܟܲܣܲܝ ܗ̄ܘ̣ܵܐ ܡ̣ܢ ܪ̈ܘܼܚܵܢܹܐ 258 ܘܲܚܕܼܝܼ ܢܟܼܝܼܠܵܐ ܕܐܸܫܟܲܚ ܐܲܬܼܪܵܐ ܕܢܲܪܡܸܐ ܙܹܐܦܹܗ ܀ 259 :ܦܲܠܚ̣ܵܗ̇ ܠܐܲܪܥܵܐ ܕܫܸܡܥܵܐ ܕܐܸܢܹ̈ܐ ܕܐܸܠܥܵܐ ܪܦܝܼܬܼܵܐ 260 ܘܐܲܡܝܼ ܙܲܪܥܹܗ ܐܵܟܹ̇ܠܩܲܨܵܐ ܒܓܼܵܘ ܬܲܪܥܝܼܬܼܵܗ̇ ܀ 261 :ܠܵܘ ܣܲܡ ܡ̇ܘܬܵܐ ܟܣܸܐ ܒܐܝܼܠܵܢܵܐ ܚܸܘܝܵܐ ܬܲܪܓܸܿܡ 262 ܥܲܝܢܹ̈ܐ ܕܢܘܼܗܪܵܐ ܝܵܗܹ̇ܒܼ ܦܹܐܪܵܐ ܠܕܼܵܐܟܹ̇ܠ ܡܸܢܹܗ ܀ 263 :ܚܲܝܠܵܐ ܪܲܒܵܐ ܩܢܸܐ ܐܝܼܠܵܢܵܐ ܒܝܲܕܼ ܡܹܐܟܼܘܼܠܬܹܿܗ 264 ܘܲܡܨܸܐ ܡܫܲܚܠܸܦ ܘܥܵܒܹ̇ܕܼ ܐ̄ܢܵܫܵܐ ܐܲܝܟ ܐܲܠܵܗܹ̈ܐ ܀ 265 :ܢܸܒܼܥܵܐ ܪܲܒܵܐ ܕܐܲܠܵܗܘܼܬܼܵܐ ܟܣܸܐ ܒܐܝܼܠܵܢܵܐ 266 ܘܐܸܢ ܫܵ̄̇ܬܹ̇ܝܢ ܐ̄ܢܬܿܘܿܢ ܡ̣ܢ ܚܲܠܝܘܼܬܹܗ ܩܢ̣ܲܝܬܿܘܿܢ ܕܲܪܓܼܵܐ ܀ 267 :ܘܡܸܛܠܗܵܕܹܐ ܟܠ̣ܵܟܼܘܿܢ ܡܸܢܹܗ ܕܠܵܐ ܬܕܲܡܘܿܢ ܠܹܗ 268 ܕܕܲܠܡܵܐ ܬܸܡܛܘܿܢ ܠܪܵܘܡ̇ܐ ܪܲܒܵܐ ܕܐܲܠܵܗܘܼܬܹܗ ܀ 269 :ܡܸܚܣܲܡ ܚܵܣܹ̇ܡ ܕܠܵܐ ܬܸܗܘܘܿܢ ܠܹܗ ܒܢܲܝ̈ ܝܼܵܬܿܘܼܬܼܵܐ 270 ܘܠܵܐ ܬܸܬܼܟܵܢܘܿܢ ܒܲܫܡܵܐ ܪܲܒܵܐ ܕܐܲܠܵܗܘܼܬܹܗ ܀ pb. 201 271 :ܒܪܘܿܒܼܘ ܨܹܝܕܼ ܦܹܐܪܵܐ ܘܐܲܟܼܘܿܠܘ ܡܸܢܹܗ ܘܲܚܙܵܘ ܢܘܼܗܪܵܐ 272 ܘܗܵܐ ܩܵܢܹ̇ܝܢ ܐ̄ܢܬܿܘܿܢ ܚܹܝܠ ܚܵܟܼ̈ܡܵܬܼܵܐ ܐܲܝܟ ܐܲܠܵܗܹ̈ܐ ܀ 273 :ܚܙܵܬ̤ ܠܲܡ ܐܲܢ̄ܬܿܬܼܵܐ ܕܲܪܓܼܝܼܓܼ ܦܹܐܪܵܐ ܘܦܲܐܝܵܐ ܚܙܵܬܹܗ 274 ܘܢܸܣܒܲܬ̤ ܘܐܸܟܼܠܲܬ̤ ܘܟܸܢ ܝܸܗ̄ܒܲܬ̤ ܠܹܗ ܠܒܲܥܠܵܗ̇ ܘܐܸܟܲܠ̣ ܀ 275 :ܗܝ̤ ܩܲܕܼܡ̇ܝܑܬܼ ܫܸܡܥܲܬ̤ ܡܸܠܟܵܐ ܘܩܸܛܦܲܬ̤ ܦܹܐܪܵܐ 276 ܘܣܲܪܗܸܒܼ ܦܘܼܡ̇ܗ̇ ܥܲܠ ܡܹܐܟܼܘܼܠܬܵܐ ܕܬܸܗܘܸܐ ܐܲܠܵܗ ܀ 277 :ܒܐܘܼܟܼܠܵܐ ܕܦܹܐܪܵܐ ܨܒܼܵܬ̤ ܕܬܸܚܛܘܿܦ ܠܵܗ̇ ܫܸܡ ܐܲܠܵܗܵܐ 278 ܘܬܸܣܲܒܼ ܕܲܪܓܼܵܐ ܠܥܸܵܠ ܡ̣ܢ ܒܲܥܠܵܗ̇ ܘܬܸܗܘܸܐ ܪܹܫܵܐ ܀ 279 :ܒܪܸܓܲܬܼ ܐܘܼܟܼܠܵܐ ܣܒ݂ܲܪܘ ܡ̇ܝܘܿܬܹ̈ܐ ܕܲܠܥܸܠ ܡ̇ܛܹ̇ܝܢ 280 ܘܬܲܚܬܿܝܼ ܐܸܢܘܿܢ ܥܒܼܵܕܼ ܦܘܼܩܕܵܢܵܐ ܠܥܘܼܡܩܵܐ ܕܲܫܝܘܼܠ ܀ 281 :ܒܐܘܼܟܼܠܹܗ ܕܦܹܐܪܵܐ ܩܢ̣ܵܘ ܒܘܼܝܵܢܵܐ ܥܲܦܪ̈ܵܢܵܝܹܐ 282 ܘܚܵܪ̣ܘ ܘܐܸܬܼܢܲܟܲܦܘ ܡ̣ܢ ܓܲܠܝܘܼܬܼܵܐ ܕܗܲܕܵܡܲܝ̈ܗܘܿܢ ܀ 283 :ܗܘ̤ܵܬܼ ܡܹܐܟܼܘܼܠܬܵܐ ܐܲܝܟ ܡܲܚܙܝܼܬܼܵܐ ܠܙܵܘܥܲܝ̈ ܢܲܦܫܵܐ 284 :ܘܢܲܟܸܿܦ ܗܵܘܢܵܐ ܠܪܸ̈ܓܼܫܹܐ ܕܲܠܒܲܪ ܒܢܲܚ̈ܬܲܝܼ ܛܲܪ̈ܦܹܐ 285 :ܩ̣ܢܵܘ ܒܘܼܝܵܢܵܐ ܕܦܵܪܘܿܫܘܼܬܼܵܐ ܫܲܒܼܪ̈ܲܝ ܠܸܒܵܐ 286 ܘܟܲܣܝܼܘ ܒܸܣܪܵܐ ܥܲܪܛܸܠܵܝܵܐ ܕܗܲܕܸܡܲܝ̈ܗܘܿܢ ܀ 287 :ܡ̣ܢ ܐܝܼܠܵܢܵܐ ܕܐܸܟܲܠ̣ܘ ܡܸܢܹܗ ܥܒ݂ܲܕܼܘ ܬܲܟܼܣܝܼܬܼܵܐ 288 ܘܕܲܐܫܠܲܚ ܐܸܢܘܿܢ ܛܲܪ̈ܦܹܐ ܕܡܸܢܹܗ ܟܲܣܝܼܘ ܐܸܢܘܿܢ ܀ 289 :ܠܦܵܢܝܹܗ ܕܝܵܘܡ̇ܐ ܐܸܢܘܿܢ ܩܵܠ ܒܵܪܘܿܝܵܐ 290 ܟܲܕܼ ܡܲܫܡܲܥ ܗ̄ܘ̣ܵܐ ܩܵܠ ܗܲܠ̈ܟܼܵܬܼܵܐ ܒܓܼܵܘ ܦܲܪܕܲܝܣܵܐ ܀ 291 :ܐܹܝܘ ܪܘܼܚܵܢܵܐ ܕܐܲܫܡܲܥ ܩܵܠܵܐ ܕܠܵܐ ܗܲܕܵܡܹ̈ܐ 292 ܐܹܝܘ ܝܵ̇ܕܲܥ ܟܠ ܕܲܡܫܲܐܸܠ ܠܹܗ ܠܨܲܠܡܹܗ ܐ̄ܢܬܿ ܀ 293 :ܝܵ̇ܕܲܥ ܕܐܲܝܟܵܐ ܗ̄ܘ̣ ܘܲܡܫܲܐܸܠ ܠܹܗ ܟܲܕܼ ܚܵܙܹ̇ܐ ܠܹܗ 294 ܡܲܫܡܵܥ ܩܵܠܵܐ ܐܵܦ ܩܵܪܹܐ ܠܹܗ ܕܢܲܦܢܹܝܘܗܝ ܨܹܐܕܼܵܘܗܝ ܀ 295 :ܐܲܝܟܵܐ ܐ̄ܢܬܿ ܐܵܕܼܵܡ ܨܲܠܡܵܐ ܓܲܠܝܵܐ ܡܒܲܕܸܿܩ ܟܲܣܝܘܼܬܼܝ 296 ܐܲܝܟܵܐ ܐ̄ܢܬܿ ܝܵܪܬܵܐ ܕܣܵܡ̣ܬܵܟܟ ܡ̇ܪܵܐ ܥܲܠ ܟܠ ܩܸܢܝܵܢܝ ܀ 297 :ܒܝܲܕܼ ܢܸܥ̈ܡܵܬܼܵܐ ܪ̈ܵܥܘܿܡ̇ܬܼܵܐ ܒܥ̣ܵܝܗܝ ܠܐܲܒܿܝܼܕܼܵܐ 298 ܘܲܥܦܝܼܦܵܐܝܼܬܼ ܒܩܵܠ ܚܸܢ̈ܓܼܵܬܼܵܐ ܐܵܕܼܵܡ ܐܵܕܼܵܡ ܀ 299 :ܐܲܝܟܵܐ ܐ̄ܢܬܿ ܐܵܕܼܵܡ ܩܥ̣ܵܐ ܒܼܵܘܿܝܵܐ ܠܘܵܬܼ ܥܲܽܦܪܵܢܵܐ 300 ܘܦܲܢܝܼ ܥܒܼܝܼܕܼܵܐ ܠܘܵܬܼ ܥܵܒܼܘܿܕܼܵܐ ܩܵܠܵܐ ܚܢܝܼܓܼܵܐ ܀ 301 :ܩܵܠ ܗܲܠ̈ܟܼܵܬܼܵܟ ܫܸܡ̇ܥܹܬܼ ܘܲܛܫܹ̇ܝܬܼ ܡ̣ܢ ܟܘܼܚܵܕܼܵܐ 302 ܕܠܵܐ ܬܸܬܼܒܲܩܸܐ ܒܥܲܪܛܸܠܵܝܘܼܬܼܝ ܕܲܡܦܲܪܣܲܝ ܐ̄ܢܵܐ ܀ 303 :ܡܲܢ̣ܘܼ ܐܲܫܠܲܚ ܢܲܚ̈ܬܲܝ ܫܘܼܒܼܚܵܟ ܡܲܠܟܵܐ ܕܐܲܪܥܵܐ 304 ܘܡܲܢ̣ܘܼ ܥܲܒܼ݂ܕܵܟ ܥܲܪܛܸܠܵܝܵܐ ܡ̣ܢ ܬܲܟܼܣܝܼܬܼܵܐ ܀ 305 :ܐܸܚܲܕܼ ܥܸܠܬܼܵܐ ܢܲܟܼܦܵܐ ܕܲܒܼܗܸܬܼ ܒܐܸܠܥܵܐ ܕܡܸܢܹܗ 306 ܟܲܕܼ ܣܵܒܲ̇ܪ ܗ̄ܘ̣ܵܐ ܕܠܵܐ ܡܸܬܼܚܲܝܲܒܼ ܒܲܓܼܙܵܪ ܕܝܼܢܵܐ ܀ 307 ܐܲܢ̄ܬܿܬܼܵܐ ܕܝܲܗ̣̄ܒܼܬܿ ܥܲܡܝܼ ܗܝ̤ ܝܸܗ̄ܒܲܬ̤ ܠܝܼ ܦܹܐܪܵܐ ܘܐܸܟܼܠܹ̇ܬܼ: pb. 202 308 ܘܐܸܠܘܼܠܵܐ ܗܝ̤ ܠܵܐ ܥܵܒܲ݁ܪ ܗ̄ܘܹ̇ܝܬܼ ܥܲܠ ܦܘܼܩܕܵܢܵܟ ܀ 309 :ܛܲܥܢܹ݂ܗ ܠܐܵܕܼܵܡ ܒܲܡܠܸܐ ܙܲܒܼܢܵܐ ܐܲܝܟ ܕܲܠܫܲܒܼܪܵܐ 310 ܘܫܲܐܸܠ ܠܐܲܐ̄ܬܿܬܼܵܐ ܕܡ̇ܢܵܘ̇ ܗܵܢܵܐ ܥܵܘ̣ܠܵܐ ܕܲܥܒ݂ܲܕܿܬܿܝ ܀ 311 :ܘܐܵܦ ܗܝ̤ ܣܵܓܼܬܼܵܗ̇ ܠܥܸܠܬܼܵܐ ܒܚܸܘܝܵܐ ܒܲܕܼܡܘܼܬܼ ܐܵܕܸܵܡ 312 ܕܚܸܘܝܵܐ ܡܲܠܟܲܢܝ ܘܐܸܟܼܠܹܬܼ ܦܹܐܪܵܐ ܕܠܵܐ ܡ̣ܢ ܨܸܒܼܷܝܵܢܝ ܀ 313 :ܠܵܐ ܕܹܝܢ ܫܲܐ̣ܠܹܗ ܠܚܸܘܝܵܐ ܕܐܲܛܥܝܼ ܕܲܠܡܵܢ ܐܲܛܥܝܼ 314 ܕܠܵܘ ܗܘ̤ ܐܲܛܥܝܼ ܐܸܠܵܐ ܕܡܲܠܸܠ ܗ̄ܘ̣ܵܐ ܒܹܗ ܀ 315 :ܦܣܲܩ̣ ܒܵܪܘܝܵܐ ܕܝܼܢܵܐ ܩܲܫܝܵܐ ܥܲܠ ܣܵܪܘܿܝܵܐ 316 ܘܲܦܟ݂ܲܪ ܘܲܫܕܼܵܝܗܝ ܒܹܝܬܼ ܐܲܣܝܼܪܹ̈ܐ ܒܝܲܕܼ ܠܵܘ̈ܛܵܬܼܵܐ ܀ 317 :ܠܝܼܛܵܐ ܬܸܗܘܸܐ ܡ̣ܢ ܟܠ ܕܲܒܼܪܹܝܬܼ ܕܪܵܚܹ̇ܫ ܒܐܲܪܥܵܐ 318 ܘܢܸܒܼܟܲܠ ܪܲܗܛܵܐ ܕܩܲܠܝܼܠܘܼܬܼܵܟ ܕܠܵܐ ܬܘܼܒܼ ܬܲܛܥܸܐ ܀ 319 :ܥܲܦܪܵܐ ܫܝܼܛܵܐ ܡ̣ܢ ܓܵܘ ܐܲܪܥܵܐ ܢܸܗܘܸܐ ܐܘܼܟܼܠܵܟ 320 ܘܠܵܐ ܬܸܬܒܲܣܲܡ ܡ̣ܢ ܚܲܠܝܘܼܬܼܵܐ ܕܦܹܐܪܥܵܐ ܀ 321 :ܣܵܝܢܠܵܐ ܬܸܗܘܸܐ ܠܐ̄ܢܵܫܵܐ ܕܐܲܛܥܝܼܬܿ ܟܠܗܘܿܢ ܝܵܘܡܲܝ̈ܟ 322 ܘܗܸܢܘ̣ܿܢ ܢܸܗܘܘܿܢ ܠܵܟ ܣܵܩܘܿܪܹ̈ܐ ܕܠܵܐ ܬܲܪܥܘܼܬܼܵܐ ܀ 323 :ܢܕܘܼܫܘܼܢ ܪܹܫܵܟ ܘܲܢܩܲܦܚܘܼܢܵܟ ܟܲܕܼ ܙܵܟܹ̇ܝܢ ܠܵܟ 324 ܘܐܲܢ̄ܬܿ ܡ̇ܐ ܕܲܚܛܵܘ̣ ܬܸܡܚܸܐ ܐܸܢܘܿܢ ܒܝܲܕܼ ܨܸܢ̈ܥܵܬܼܵܐ ܀ 325 :ܒܲܓܼܙܵܪ ܕܝܼܢܵܐ ܕܚܸܘܝܵܐ ܚܲܝܼܒܼ ܠܐܟܹ̇ܠܩܲܪܨܵܐ 326 ܘܲܒܼܠܵܘ̈ܛܵܬܼܵܐ ܕܥܲܠ ܒܸܣܪ̈ܵܢܹܐ ܠܵܛ̣ ܠܲܢܟܼܝܼܠܵܐ ܀ 327 :ܠܵܐ ܨܒܼܵܐ̣ ܕܢܸܓܼܠܸܐ ܥܲܠ ܡܲܠܲܐܟܹ̈ܐ ܒܫܘܼܪܵܝ ܙܲܒܼܢܹ̈ܐ 328 ܕܠܵܐ ܬܸܣܓܸܿܐ ܠܵܗ̇ ܛܘܼܥܝܲܝ ܒܐܲܪܥܵܐ ܕܫܸܡ ܐܲܠܵܗܹ̈ܐ ܀ 329 :ܒܗܵܕܹܐ ܬܸܢܘܲܝ ܟܲܣܝܼ ܫܲܪܒܹܿܗ ܕܐܵܟܹ̇ܿܠܩܲܪܨܵܐ 330 ܕܠܵܐ ܢܸܣܒܲܪ ܠܹܗ ܕܚܹܝܠ ܟܠ ܡܸܫܟܲܚ ܐܲܝܟ ܒܵܪܘܿܝܵܐ ܀ 331 :ܥܲܡ ܪ̈ܘܼܚܵܢܹܐ ܥܛܝܼܦܲܝ̈ ܢܘܼܗܪܵܐ ܒܪܸܐ ܗ̄ܘ̣ܵܐ ܐܵܦ ܗܘ̤ 332 ܘܲܡܕܲܝܲܪ ܗ̄ܘ̣ܵܐ ܥܲܡ ܩܲܕܼܝܼܫܹ̈ܐ ܒܐܲܦܲܝ̈ ܪܵܘܡ̇ܐ ܀ 333 :ܪܹܫܵܢܘܼܬܼܵܐ ܕܫܘܼܠܛܵܢ ܐܵܐܲܪ ܩܢܸܐ ܗ̄ܘ̣ܵܐ ܘܲܡܙܲܝܼܥ 334 ܘܕܲܚܣ݂ܲܡ ܒܐܵܕܼܵܡ ܢܦܲܓܼ ܡ̣ܢ ܕܲܪܓܹܗ ܒܲܕܼܡܘܼܬܼ ܒܲܪܩܵܐ ܀ 335 :ܘܠܹܗ ܠܵܐܹ̇ܛ ܗ̄ܘ̣ܵܐ ܒܗܵܝ̇ ܕܥܲܠ ܟܲܪܣܵܟ ܬܗܲܠܸܟ ܒܲܐܪܥܵܐ 336 ܕܠܵܐ ܬܘܼܒܼ ܣܵܠܹ̇ܩ ܠܐܲܦܲܝ̈ ܪܵܘܡ̇ܐ ܒܩܲܠܝܼܠܘܼܬܹܗ ܀ pb. 203 337 :ܠܹܗ ܬܘܼܒܼ ܡܲܟܸܿܟ ܘܲܓܼܙܲܪ ܐܘܼܟܼܠܵܐ ܥܲܦܪܵܐ ܫܝܼܛܵܐ 338 ܟܲܕܼ ܡܸܬܼܓܲܪܓܼܚ ܒܐܲܦܲܝ̈ ܐܲܪܜܥܵܐ ܒܹܝܬܼ ܥܲܦܪܵܢܹܐ ܀ 339 :ܠܹܗܘ̣ ܟܲܢܝܼ ܣܵܢ̇ܠܵܐ ܕܐ̄ܢܵܫܵܐ ܩܵܛܹ̇ܠ ܐ̄ܢܵܫܵܐ 340 ܘܗܘ̤ܝܘܼ ܕܡ̇ܚܹ̇ܐ ܒܥܸܩܒܹܗ ܕܐ̄ܢܵܫܵܐ ܒܥܘܼܩܣܵܐ ܕܥܵܘ̣ܠܵܐ ܀ 341 :ܪܕܼܵܝܗܝ ܠܲܢܟܼܝܼܠܵܐ ܒܢܸܓܼ̈ܕܹܿܐ ܩ̈ܫܲܝܵܐ ܠܦܘܼܬܼ ܣܲܟܼܠܘܼܬܹܗ 342 ܕܐܲܪܝܼܡ ܫܲܒܼܛܹܗ ܥܲܠ ܒܲܪ̄ܬܼ ܐ̄ܢܵܫܵܐ ܕܫܸܡܥܲܬ̤ ܡܸܠܟܹܿܗ ܀ 343 :ܒܚܸܒܼܠܹ̈ܐ ܕܝܲܠܕܼܵܐ ܢܲܓܿܕܼܵܗ̇ ܠܚܵܘܵܐ ܕܩܸܛܦܲܬ̤ ܦܹܐܪܵܐ 344 ܘܥܲܠ ܕܐܸܬܿܬܿܪܝܼܡܲܬ̤ ܡܲܟܸܿܟ ܪܹܫܵܗ̇ ܬܲܚܬܲܝ ܓܼܒܼܪܵܐ ܀ 345 :ܠܐܵܕܼܵܡ ܨܲܠܡܹܗ ܐ̄ܚܪܵܝܑܬܼ ܠܵܛܹܗ ܒܲܓܼܙܵܪ ܕܝܼܢܵܐ 346 ܕܩܲܫܝܘܼܬܼ ܢܸܓܼ̈ܕܹܿܐ ܦܲܟܲܗܘ ܡܸܪܬܹܗ ܒܚܸܘܝܵܐ ܘܚܵܘܵܐ ܀ 347 :ܠܝܼܛܵܐ ܐܲܪܥܵܐ ܡܸܛܠܵܬܼܵܟ ܡܲܠܟܵܐ ܕܐܲܪܥܵܐ 348 ܟܘܼ̈ܒܹܿܐ ܬܵܘܥܸܐ ܐܵܦ ܬܸܬܸܿܠ ܠܵܟ ܟܲܕܼ ܬܸܦܠܘܿܚ ܒܵܗ̇ ܀ 349 :ܒܕܼܘܼܥܬܵܐ ܕܐܲܦܲܝ̈ܟ ܬܹܐܟܼܘܿܠ ܠܲܚܡܵܐ ܟܲܕܼ ܡܸܫܬܿܚܩܲܬܿ 350 ܘܲܢܫܘܼܛܘܼܢܵܟ ܐܵܦ ܩܸܢܝܵܢܲܝ̈ܟ ܕܫܵܛ̣ܬܿ ܦܘܼܩܕܵܢܲܝ̈ ܀ 351 :ܥܲܦܪܵܐ ܐ̄ܢܬܿ ܡ̣ܢ ܕܲܚܝܼܚܵܐ ܘܥܲܦܵܪܵܐ ܬܸܗܘܸܐ 352 ܕܲܫܪ݂ܲܝܬܿ ܡܸܠܲܝ̈ ܢܸܫܪܸܐ ܡ̇ܘܬܵܐ ܫܘܼܠܛܵܢ ܚܲܝܲܝ̈ܟ ܀ 353 :ܐܘܿ ܝܵ̇ܕܲܥ ܟܠ ܕܝܵ̇ܕܲܥ ܟܠܵܐ ܥܲܕܼܠܵܐ ܢܸܗܘܸܐ 354 ܕܚܵܘܝܼ ܚܸܡܬܹܗ ܒܲܓܼܙܵܪ ܕܝܼܢܹܗ ܐܲܝܟ ܠܵܐ ܝܵ̇ܕܲܥ ܀ 355 :ܒܪ̣̱ܵܝܗܝ ܗ̄ܘ̣ܵܐ ܠܐܵܕܼܵܡ ܡ̣ܢ ܕܲܚܝܼܚܵܐ ܘܲܩܪ̣ܵܝܗܝ ܨܲܠܡܹܗ 356 ܘܥܲܒܼ݂ܕܹܿܗ ܠܥܲܦܪܹܗ ܒܲܕܼܡܘܼܬܼ ܥܲܦܪܵܐ ܕܡ̇ܝܘܿܬܘܼܬܼܵܐ ܀ 357 :ܠܗܵܕܹܐ ܣܵܡ̣ܹܗ ܡ̣ܢ ܫܘܼܪܵܝܵܐ ܒܪܘܼܟܵܒܼ ܦܲܓܼܪܹܗ 358 ܕܢܸܪܕܸܿܐ ܒܐܘܼܪܚܵܐ ܕܡ̇ܝܘܼܬܼܘܼܬܼܵܐ ܕܢܸܫܐܲܠ ܚܲܝܹ̈ܐ ܀ 359 :ܠܵܐ ܡ̣ܢ ܚܸܡܬܼܵܐ ܓܙܲܪ ܠܵܘ̈ܛܵܬܼܵܐ ܘܟܹܐܒܹ̈ܐ ܕܝܲܠܕܼܵܐ 360 ܘܠܵܘ ܒܲܬܼܘܸܵܬܼܵܐ ܐܥܸܠ ܡ̇ܘܬܵܐ ܥܲܠ ܡ̇ܝܘܿܬܹ̈ܐ ܀ 361 :ܟܝܵܢܵܝ̈ܬܼܵܐ ܕܣܵܡ̣ ܒܲܟܼܝܵܢܵܐ ܕܡ̇ܝܘܿܬܘܼܬܼܵܐ 362 ܗܦ݂ܲܟ ܣܵܡ̣ ܐܸܢܹܝܢ ܐܲܝܟ ܠܘܼܚܵܡܵܐ ܠܥܘܼܕܼܪܵܢ ܐ̄ܢܵܫܵܐ ܀ 363 :ܝܵ̇ܕܲܥ ܗ̄ܘ̣ܵܐ ܠܹܗ ܠܥܲܦܪܹܗ ܕܐܵܕܼܵܡ ܥܲܕܼܠܵܐ ܢܸܗܘܸܐ 364 ܕܡ̇ܘܬܵܐ ܫܵܪܹܐ ܘܲܡܒܲܛܸܠ ܠܹܗ ܠܪܘܼܟܵܒܼ ܦܲܓܼܪܹܗ ܀ 365 :ܓܼܠܝܵܐ ܗ̄ܘ̣ܵܬܼ ܠܹܗ ܕܡܸܚܟܵܐ ܚܵܛܹ̇ܐ ܒܪܸܓܲܬܼ ܦܹܐܪܵܐ 366 ܘܝܵ̇ܕܲܥ ܗ̄ܘ̣ܵܐ ܠܹܗ ܠܝܲܨܪܵܐ ܒܝܼܫܵܐ ܕܦܵܪܘܿܫܘܼܬܹܗ ܀ 367 ܒܝܲܕܼ ܢܸܣܝܵܢܵܐ ܨܒܼܵܐ̣ ܕܲܢܚܲܟܸܡ ܠܲܡܠܝܼܠܘܼܬܹܗ: pb. 204 368 ܕܠܵܐ ܬܸܗܘܸܐ ܠܵܗ̇ ܦܵܪܘܿܫܘܼܬܹܗ ܕܠܵܐ ܕܘܼܪܵܫܵܐ ܀ 369 :ܦܘܼܪ̈ܣܹܐ ܪܲܟܸܿܒܼ ܒܝܲܕܸ ܦܘܼܩܕܵܢܵܐ ܕܢܹܐܠܲܦ ܐܵܕܼܵܡ 370 ܕܙܵܕܹܩ ܗ̄ܘ̣ܵܐ ܠܹܗ ܕܢܸܛܲܪ ܛܲܟܼܣܵܐ ܕܦܘܼܩܪܵܢ ܡ̇ܪܹܗ ܀ 371 ܒܝܲܕܼ ܐܝܼܠܵܢܵܐ ܓܠ̣ܵܐ ܬܲܚܦܝܼܬܼܵܐ ܕܦܵܪܘܿܫܘܼܬܹܗ ܀ 372 ܘܒܼܐܘܼܟܼܠܹܗ ܕܦܹܐܪܵܐ ܚܵܘܝܼ ܚܲܝܠܵܐ ܕܲܡܠܝܼܠܘܼܬܹܗ ܀ 373 :ܠܵܘ ܐܝܼܠܵܢܵܐ ܩܢܸܐ ܗ̄ܘ̣ܵܐ ܚܲܝܠܵܐ ܕܦܵܪܘܿܫܘܼܬܼܵܐ 374 ܘܠܵܘ ܫܲܬܿܝܼܩܵܐ ܥܒ݂ܲܕܼ ܠܲܡܠܝܼܠܵܐ ܕܢܸܕܲܥ ܗܵܠܹܝܢ ܀ 375 :ܠܵܘ ܒܐܝܼܠܵܢܵܐ ܟܣܸܐܐ ܗ̄ܘ̣ܵܐ ܡ̇ܘܬܵܐ ܕܫܲܥܒܸܿܕܼ ܠܐܵܕܼܵܡ 376 ܘܠܵܘ ܦܘܼܩܕܵܢܵܐ ܥܒ݂ܲܕܼ ܚܲܛܵܝܹ̈ܐ ܠܲܕܼܒܼܵܬܼܪܟܸܿܢ ܀ 377 :ܪܘܼܟܵܒܼ ܦܲܓܼܪܹܗ ܕܐܵܕܼܵܡ ܩܲܥܹ̇ܐ ܕܡ̇ܝܘܿܬܼܵܐ ܗ̄ܘ̣ܵܐ 378 ܐܵܦ ܚܲܒܼܪܘܼܬܼܵܐ ܕܚܵܘܵܐ ܕܲܗܘ̤ܵܬܼ ܡܲܠܝܲܬܼ ܚܲܫܹ̈ܐ ܗ̄ܝܼ ܀ 379 :ܥܵܠܡܵܐ ܟܠܹܗ ܡ̣ܢ ܬܘܼܩܵܢܵܘ̈ܗܝ ܠܗܵܕܹܐ ܣܵܗܹ̇ܕܼ 380 ܘܦܹܐܪܹ̈ܐ ܘܙܲܪ̈ܥܹܐ ܠܩܘܼܝܵܡ ܙܲܪ̈ܥܹܐ ܓܡ̇ܝܘܿܬܼܘܼܬܼܵܐ ܀ 381 :ܩ̣ܪܵܝܗܝ ܠܐܝܼܠܵܢܵܐ ܩܢܸܐ ܝܼܕܲܥܬܼܵܐ ܠܵܘ ܒܲܟܼܝܵܢܹܗ 382 ܐܸܠܵܐ ܕܢܸܒܼܩܸܐ ܚܸܟܼܡܲܬܼ ܐܵܕܼܵܡ ܒܥܸܠܲܬܼ ܦܹܐܪܹܗ ܀ 383 :ܩܪ̣ܵܝܗܝ ܠܲܐ̄̇ܚܪܹܢܵܐ ܝܵܗܹ̇ܒܼ ܚܲܝܹ̈ܐ ܠܵ ܡ̣ܢ ܕܝܼܠܹܗ 384 ܐܸܠܵܐ ܕܨܵܪܹܗ ܒܐ̄ܪܵܙ ܡܲܠܟܿܘܼܬܼܵܐ ܡܲܠܝܲܬܼ ܚܲܝܹ̈ܐ ܀ 385 :ܒܝܲܕܼ ܐܸܣܲܪ ܒܹܗ ܓܙܵܪ̈ܲܝ ܕܝܼܢܵܐ ܡܠܹܝܢ ܠܘܼܚܵܡܹ̈ܐ 386 ܘܠܲܐ̄ܚܪܹܝܢ ܝܲܗ̣̄ܒܹܿܗ ܪܲܗܒܼܘܿܢ ܚܲܝܹ̈ܐ ܠܲܦܫܝܼܛܘܼܬܼܵܐ ܀ 387 :ܠܵܐ ܣܵܦܹ̇ܩ ܗ̄ܘ̣ܵܐ ܐܵܕܼܵܡ ܫܲܒܼܪܵܐ ܠܲܚܼܡܝܼܪܘܼܬܼܵܐ 388 ܘܠܵܐ ܡܸܫܟܲܚ ܗ̄ܘ̣ܵܐܐ ܠܲܡܨܵܬܼ ܫܸܡܥܵܐ ܕܡܲܠܟܿܘܼܬܼ ܪܵܘܡ̇ܐ ܀ 389 :ܒܡܚܝܼ̈ܠܵܬܼܵܐ ܐܲܝܟ ܕܲܒܼܚܲܠܒܼܵܐ ܩܢ݂ܵܐ ܕܘܼܪܵܫܵܐ 390 ܘܟܸܢ ܒܲܕܸܿܩ ܠܹܗ ܒܝܲܕܼ ܐܝܼܠܵܢܵܐ ܬܪܹܝܢ ܬܘܼܩܵܢܹ̈ܐ ܀ 391 :ܠܥܘܼܡܪܵܐ ܕܐܲܪܥܵܐ ܡ̣ܬܲܠ ܒܐܝܼܠܵܢܵܐ ܡ̇ܘܠܸܕܼ 392 ܘܒܼܐܝܼܠܵܢ ܚܲܝܹ̈ܐ ܨܵܪ ܬܘܼܩܵܢܵܐ ܕܡܲܠܟܿܘܼܬ ܪܵܘܡ̇ܐ ܀ 393 :ܡ̣ܠܲܟ ܦܲܪܕܲܝܣܵܐ ܐܲܝܟ ܦܘܼܪܥܵܢܵܐ ܠܥܲܡܠܹ̈ܐ ܕܲܬܼܢܵܢ 394 ܘܲܢܛ݂ܲܪ ܦܹܐܪ̈ܵܘܗܝ ܒܲܙܝܼܪܘܼܬܼܵܐ ܕܩܵܠ ܦܘܼܩܕܼܵܢܵܘ̈ܗܝ ܀ 395 :ܫܒܼܝܼܚ ܗ̄ܘ̣ܵܐ ܢܸܒܼܥܹܗ ܕܡܲܫܩܸܐ ܪܸܕܼܝܹܗ ܠܐܲܪܒܲܥܦܸܢ̈ܝܵܢ 396 ܘܐܲܝܟ ܣܝܼܠܘܿܢܵܐ ܒܝܲܡܵܐ ܥܵܒܲ݁ܪ ܟܲܕܼ ܠܵܐ ܚܵܠܹ̇ܛ ܀ 397 :ܐܹܝܘ ܦܘܼܩܵܕܵܢܵܐܬ ܕܢܵܛܲ݁ܪ ܡܲܝ̈ܵܐ ܐܲܝܟ ܕܲܒܼܡܵܐܢܵܐ 398 ܘܠܵܐ ܚܵܠܹ̇ܛ ܠܹܗ ܠܢܸܒܼܥܵܐ ܕܲܥܕܹܢ ܒܩܸܒܼܝܵܐ ܪܲܒܵܐ ܀ 399 :ܐܹܝܘ ܫܲܪܝܘܼܬܼܵܐ ܕܡܲܝ̈ܵܐ ܕܦܵܣ̇ܩܝܼܢ ܡܲܝ̈ܵܐ 400 ܘܟܲܕܼ ܚܲܕܼ ܐܸܢܘܿܢ ܗܘ̤ܵܘ ܢܘܼܟܼܪ̈ܵܝܵܐ ܡܲܝ̈ܵܐ ܠܡܲܝܵ̈ܐ ܀ 401 :ܠܵܘ ܒܲܟܼܝܵܢܵܐ ܩܢܸܐ ܫܘܼܠܛܵܢܵܐ ܢܸܒܼܥܵܐ ܕܲܥܕܹܢ 402 ܚܹܝܠ ܒܵܪܘܿܝܵܐ ܗ̄ܘ̣ ܕܢܵܛܲܪ ܡܲܝ̈ܵܐ ܒܡܲܝܵ̈ܐ ܪ̈ܦܲܝܵܐ ܀ 403 ܗܵܘ̇ ܕܲܒܼܪ݂ܵܐ ܟܠ ܡ̣ܢ ܠܵܐ ܡܸܕܸܿܡ ܒܚܹܝܠ ܪܲܒܿܘܼܬܹܗ: pb. 205 404 ܪܡ݂ܲܙ ܠܲܪ̈ܦܲܝܵܐ ܕܠܵܐ ܢܸܬܼܚܲܠܛܘܼܢ ܥܲܡ ܚܲܒܼܪ̈ܲܝܗܘܿܢ ܀ 405 :ܠܚܲܝܠܹܗ ܐܵܘܪܸܒܼ ܐܵܦ ܒܲܪ ܥܲܡܪܲܡ ܕܲܬܼܢ̣ܵܐ ܐܸܢܹܝܢ 406 ܕܲܦܫܝܼ̈ܩܵܢ ܠܹܗ ܐܵܦ ܥܲܣ̈ܩܵܬܼܵܐ ܠܚܹܝܠ ܨܸܒܼܝܵܢܹܗ ܀ 407 :ܒܗܵܕܹܐ ܬܸܢܘܲܝ ܦܲܠܸܓܼ ܐܸܢܘܿܢ ܠܡܲܝ̈ܵܐ ܕܲܥܕܸܢ 408 ܕܢܗܘܘܿܢ ܣܵܗ̇ܕܿܝܼܢ ܥܲܠ ܪܲܒܿܘܼܬܹܗ ܕܚܹܝܠ ܟܠ ܡܸܫܟܲܚ ܀ 409 :ܐܲܝܟ ܟܵܪ̈ܘܿܙܹܐ ܫܲܕܲܪ ܐܸܢܘܿܢ ܠܐܲܪܒܲܥ ܦܸܢ̈ܝܵܢ 410 ܕܢܸܗܘܘܿܢ ܩܵܥܹ̇ܝܢ ܟܲܕܼ ܫܲܬܿܝܼܩܝܼܢ ܥܲܠ ܪܲܒܿܘܼܬܹܗ ܀ 411 :ܒܗܸܢܕܿܘܿ ܡܲܟܼܪܸܙ ܦܝܼܫܘܿܢ ܪܲܒܵܐ ܚܹܝܠ ܒܼܵܘܿܝܵܐ 412 ܘܲܒܼܒܹܪ̈ܘܿܠܹܐ ܘܡܲܪ̈ܓܵܢܝܵܬܼܵܐ ܡܲܥܬܲܪ ܠܐܲܪܥܵܐ ܀ 413 :ܥܲܡ ܟܘܼܫܵܝܹ̈ܐ ܠܥܸ݂ܙ ܗ̄ܘ̣ܵܐ ܓܝܼܚܘܿܢ ܒܩܵܠܵܐ ܕܫܸܦܥܵܘ̈ܗܝ 414 ܘܟܲܕܼ ܫܲܬܿܝܼܩ ܗ̄ܘ̣ ܡܪܝܼܡ ܠܲܟܼܝܵܢܹܗ ܘܡܲܫܩܸܐ ܠܐܲܪܥܵܐ ܀ 415 :ܕܸܩܠܲܬܼ ܩܵܥܹ̇ܐ ܐܲܝܟ ܫܝܼܦܘܿܪܵܐ ܠܐܵܬܼܘܿܪ̈ܵܝܹܐ 416 ܕܗܵܐ ܒܵܪܘܿܝܵܐ ܒܓܼܵܘ ܫܲܬܿܝܼܩܹ̈ܐ ܫܡܲܥܘ ܡܲܠܵܠܹ̈ܐ ܀ 417 :ܦܪܵܬܼ ܐܲܝܟ ܪܲܥܡܵܐ ܡܲܫܡܲܥ ܩܵܠܹܗ ܒܪܸܕܼܝܹܗ ܪܲܒܵܐ 418 ܘܐܲܝܟ ܫܝܼܦܘܿܪܵܐ ܡܥܝܼܪ ܥܲܠ̈ܠܵܬܼܵܐ ܒܩܵܠ ܫܵܩܘܼܬܹܗ ܀ 419 :ܠܵܘ ܪܲܒܿܘܼܬܼܵܐ ܕܢܲܗܪ̈ܵܘܵܬܼܵܐ ܩܲܠܸܣ ܡܘܼܫܹܐ 420 ܠܚܹܝܠ ܒܵܪܘܿܝܵܐ ܐܵܘܪܸܒܼ ܕܲܡܨܸܐ ܚܹܝܠ ܟܠ ܡܸܕܲܡ ܀ 421 :ܘܟܲܕܼ ܨܸܒܼܝܵܢܹܗ ܐܝܼܬܼܵܘܗܝ ܓܲܙܹܗ ܘܥܘܼܬܼܪܵܐ ܪܸܡܙܹܗ 422 ܬܲܗܝܼ ܐܸܢܘܿܢ ܠܲܥܒܼܵܕܼ̇ ܐܝܼܕܼܵܘ̈ܗܝ ܐܲܝܟ ܚܲܣܝܼܪܵܐ ܀ 423 :ܠܸܫܬܵܐ ܝܵܘܡܝܼ̈ܢ ܐܲܬܼܩܸܢ ܟܠܵܐ ܡܲܬܼܩܸܢ ܟܠܵܐ 424 ܘܒܲܫܒܼܝܼܥܵܝܵܐ ܢܵܚ̣ ܡ̣ܢ ܥܲܡܠܹܗ ܗܵܘ̇ ܓܵܡܲ݁ܪ ܟܠ ܀ 425 :ܠܵܐ ܥܲܣܩܵܐ ܗ̄ܘ̣ܵܬܼ ܠܪܲܒܿܘܼܬܼ ܚܲܝܠܹܗ ܕܗܵܘ̇ ܕܲܒܼܪ̣ܵܐ ܟܠ 426 ܕܲܒܼܚܲܕܼ ܪܸܡܙܵܐ ܢܨܲܒܸܿܕܼ ܢܸܥܒܸܿܕܼ ܟܠܡܵܐ ܕܲܗܘ̤ܵܐ ܀ 427 :ܠܸܫܬܵܐ ܝܵܘܡܝܼ̈ܢ ܬܘܼܩܵܢܵܘ̈ܗ ܠܵܐ ܚܲܣܝܼܪܵܐ 428 ܕܢܲܠܸܦ ܚܲܝܠܹܗ ܠܪ̈ܘܼܚܵܢܵܝܹܐ ܕܗܘ̤ ܬܲܩܸܢ ܟܠ ܀ 429 :ܠܗܘܿܢ ܡܲܠܸܦ ܗ̄ܘ̣ܵܐ ܟܲܕܼ ܒܵܪܹܐ ܗ̄ܘ̣ܵܐ ܢܘܼܗܪܵܐ ܦܲܐܝܵܐ 430 ܕܡ̣ܢ ܠܵܐ ܡܸܕܸܿܡ ܡܨܸܐ ܒܼܵܘܿܝܵܐ ܠܡܸܥܒܲܕܼ ܡܸܕܸܿܡ ܀ 431 :ܘܲܠܗܘܿܢ ܡ̇ܘܕܲܥ ܐܸܣܦܹܝܪ ܫܸܡܫܵܐ ܘܬܼܘܼܩܵܢ ܣܲܗܪܵܐ 432 ܕܐܵܦ ܡ̣ܢ ܡܸܕܸܿܡ ܡܨܸܐ ܕܲܢܫܲܚܠܸܦ ܘܢܸܗܒܸܿܕܼ ܡܸܕܸܿܡ ܀ 433 :ܩܥ̣ܵܘ ܣܸܕܼܪ̈ܲܝܗܘܿܢ ܟܲܕܼ ܚܵܙܹ̇ܝܢ ܗ̄ܘ̣ܵܘ ܬܲܗܪܵܐ ܪܲܒܵܐ 434 ܕܥܲܡ ܦܘܼܩܪܵܢܵܐ ܗܘ̤ܵܐ ܣܘܼܥܪܵܢܵܐ ܐܸܫܬܵܘܚܲܪ ܀ 435 :ܝ̄ܠܸܦܘ ܗ̄ܘ̣ܵܘ ܚܲܝܠܵܐ ܕܒܼܵܪܘܿܝܘܼܬܼܵܐ ܒܝܲܕܼ ܬܘܼܩܵܢܵܘ̈ܗܝ 436 ܘܗܘ̤ ܒܲܠܚܘܿܕܼܵܘܗܝ ܗܲܝܡܸܢܘ ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܀ 437 :ܒܪܸܡܙܵܐ ܕܝܼܠܹܗ ܩܢ̣ܵܘ ܫܘܼܠܛܵܢܵܐ ܠܡܸܣܥܲܪ ܟܠܵܐ 438 ܘܩܵܡ̣ܘ ܟܸܢܫܲܝ̈ܗܘܿܢ ܥܲܠ ܣܘܼܥܪ݁ܵܢܹܐ ܕܐܲܪ̈ܥܵܢܵܝܹܐ ܀ 439 ܠܗܘܿܢ ܐܲܓܼܥܸܠ ܗ̄ܘ̣ܵܐ ܥܘܼܬܪܵܐ ܪܲܒܵܐ ܐܲܝܟ ܫܲܪܝܼܪܹ̈ܐ: pb. 206 440 ܘܲܥܒ݂ܲܕܼ ܐܸܢܘܿܢ ܐܲܦܸܛܪ̈ܘܿܦܹܐ ܕܡ̇ܝܘܿܬܼܘܼܬܼܵܐ ܀ 441 :ܩܢ̣ܵܘ ܫܘܼܠܛܵܢܵܐ ܪܘܼܚܵܢܵܝܵܐ ܥܲܠ ܟܠ ܕܲܗܘ̤ܵܐ 442 ܘܚܲܝܸܠ ܐܲܢܘܿܢ ܪܸܡܙܵܐ ܕܚܲܝܠܹܗ ܠܘܵܬܼ ܬܸܫܒܿܘܿܚܬܵܐ ܀ 443 :ܠܐܵܟ̇ܠܩܲܪܨܵܐ ܥܲܒܼ݂ܕܹܿܗ ܪܹܫܵܐ ܕܲܡܙܝܼܥ ܠܐܵܐܲܪ 444 ܘܐܲܝܟ ܪܲܒܿ ܚܲܝܠܵܐ ܐܲܫܠܸܡ ܒܐܝܼܕܹܗ ܠܲܟܼܢܵܘܵܬܹ̈ܐ ܀ 445 :ܚܘܼܬܼܪܵܐ ܚܲܛܦܹܗ ܒܝܲܕܼ ܫܘܼܠܛܵܢܹܗ ܠܗܵܘ̇ ܡ̇ܪܘܿܕܼܵܐ 446 ܘܥܲܠ ܒܼܵܘܿܝܵܐ ܨܒܼܵܐ ܕܢܸܫܬܲܥܠܸܐ ܒܪܵܡܘܼܬܼ ܠܸܒܹܿܗ ܀ 447 :ܘܲܕܼܠܵܐ ܐܸܫܟܲܚ ܕܢܲܒܼܐܸܫ ܒܝܼܫܵܐ ܠܚܹܝܠ ܐܝܼܬܼܘܼܬܼܵܐ 448 ܨܒܼ݂ܵܐ ܕܲܢܨܲܚܸܐ ܨܠܸܡ ܒܵܪܘܿܝܵܐ ܚܠܵܦ ܒܵܪܘܿܝܵܐ ܀ 449 :ܒܨܲܥܪܹܗ ܕܐܵܕܼܵܡ ܣܥ̣ܵܐ ܡ̇ܪܘܿܕܼܵܐ ܥܲܠ ܒܵܪܘܿܝܵܐ 450 ܟܲܕܼ ܣܵܒܲ݁ܪ ܗ̄ܘ̣ܵܐ ܕܡܲܒܼܐܸܫ ܗ̄ܘ̣ܵܐ ܠܹܗ ܠܲܨܠܸܡ ܨܲܠܡܹܗ ܀ 451 :ܐܲܛܥܝܼ ܠܐܵܕܼܵܡ ܒܪܸܓܲܬܼ ܦܹܐܪܵܐ ܕܢܹܐܟܼܘܿܠ ܘܲܢܡܘܼܬܼ 452 :ܕܡ̇ܐ ܕܡ̣ܝܼܬܼ ܐܵܕܼܵܡ ܢܥܝܼܡ ܠܐܲܠܵܗܵܐ ܒܡܵܘܬܹܿܗ ܕܐܵܕܼܵܡ 453 :ܒܡܵܘܬܹܿܗ ܕܐܵܕܼܵܡ ܣܒ݂ܲܪ ܡ̇ܪܘܿܕܼܵܐ ܕܚܵܛܹ̇ܦ ܗ̄ܘ̣ܵܐ ܠܹܗ 454 ܫܡܵܐ ܝܲܩܝܼܪܵܐ ܕܫܸܡ ܐܝܼܬܼܘܼܬܼܵܐ ܕܐܲܠܵܗ ܟܠܵܐ ܀ 455 :ܒܥ̣ܵܐ ܡ̇ܪܘܿܕܼܵܐ ܕܢܸܣܲܒܼ ܕܲܪܚܼܵܐ ܒܛܘܼܥܝܲܝ ܕܐܵܕܼܵܡ 456 ܘܣܲܚ̣ܦܹܗ ܪܸܡܙܵܐ ܒܲܕܼܡܘܼܬܼ ܒܲܪܩܵܐ ܡ̣ܢ ܫܘܼܠܛܵܢܹܗ ܀ 457 :ܢܦ݂ܲܠ ܚܲܣܵܡܵܐ ܡ̣ܢ ܪܲܒܿܘܼܬܹܗ ܘܲܫܠܲܚ̣ ܫܘܼܒܼܚܹܗ 458 ܘܟܲܕܼ ܣܵܒܲ݁ܪ ܗ̄ܘ̣ܵܐ ܕܡܸܬܼܒܲܝܲܐ ܗ̄ܘ̣ܵܐ ܣܓܼܝܼ ܠܹܗ ܟܹܐܒܹܗ ܀ 459 :ܒܲܓܼܙܵܪ ܕܝܼܢܵܐ ܕܩܲܒܸܿܠ ܐܵܕܼܵܡ ܣܒ݂ܲܪ ܡ̇ܪܘܿܕܵܐ 460 ܕܗܵܐ ܡ̣ܢ ܟܲܕܿܘܼ ܫܵܪܹ̇ܐ ܡ̇ܘܬܵܐ ܠܪܘܼܟܵܒܼ ܦܲܓܼܪܹܗ ܀ 461 :ܠܵܐ ܓܹܝܪ ܣܸܠܩܲܬ̤ ܪܸܓܼܬܼ ܒܝܼܫܵܐ ܐܲܝܟ ܨܒܼܝܵܢܹܗ 462 ܘܠܵܐ ܡ̣ܝܼܬܼ ܐܵܕܼܵܡ ܒܐܘܼܟܼܠܹܗ ܕܦܹܐܪܵܐ ܐܲܟܼܡܵܐ ܕܲܣܒ݂ܲܪ ܀ 463 :ܡ̣ܬܲܚ ܓܹܝܪ ܚܲܝܵܘ̈ܗܝ ܬܫܲܥܡܠܵܐ ܘܝܲܬܿܝܼܪ ܒܵܬܲܪ ܙܲܒܼܢܵܐ 464 ܘܐܲܪܕܲܝܼ ܦܲܓܼܪܹܗ ܢܸܒܼܥܵܐ ܕܚܲܝܹ̈ܐ ܠܩܘܼܝܵܡ ܓܸܡܣܹܗ ܀ 465 :ܪܕܼܵܝܗܝ ܠܘܼܚܵܡܵܐ ܒܲܓܼܙܵܪ ܕܝܼܢܵܐ ܐܲܝܟ ܕܲܠܫܲܒܼܪܵܐ 466 ܘܲܒܼܠܘܼܚܵܡܵܐ ܣܢ̣ܵܗ̇ ܠܲܚܛܝܼܬܼܵܐ ܥܸܠܲܬܼ ܡ̇ܘܬܹܿܗ ܀ 467 :ܠܵܘ ܚܲܪ̈ܬܼܵܬܼܵܐ ܩܢ̣ܵܘ ܡ̇ܝܘܿܬܹ̈ܐ ܒܲܓܼܙܵܪ ܕܝܼܢܲܐ 468 ܒܹܗ ܒܲܟܼܝܵܢܵܐ ܣܵܡ̣ ܒܵܪܘܿܝܵܐ ܗܵܠܹܝܢ ܕܲܓܼܕܲܫ ܀ 469 :ܪܲܒܵܐ ܗܘ̤ܵܐ ܠܹܗ ܦܘܼܩܕܵܢ ܡ̇ܪܹܗ ܘܚܲܟܸܿܡ ܢܲܦܫܹܗ 470 ܘܲܒܼܪܸܥܝܵܢܹܗ ܟ̣ܬܲܒܼ ܐܵܬܼ̈ܘܵܬܼܵܐ ܚܠܵܦ ܠܘܼܚܵܡܵܐ ܀ 471 :ܣܢ̣ܵܗ̇ ܠܲܚܛܝܼܬܼܵܐ ܕܲܗܘ̤ܸܵܬܼ ܥܸܠܬܵܐ ܠܡܵܝܘܿܬܼܘܼܬܼܵܐ 472 ܘܲܩܢ݂ܵܐ ܚܘܼܒܵܐ ܠܘܵܬܼ ܒܵܪܘܿܝܵܐ ܕܲܪܕܼܵܝܗܝ ܘܲܩܢ̣ܵܝܗܝ ܀ 473 :ܩܲܕܿܝܼ̈ܡܵܢ ܗ̣̄ܘܲܝ̈ ܗܵܠܹܝܢ ܕܐܵܕܼܵܡ ܠܘܵܬܼ ܒܵܪܘܿܝܵܐ 474 ܘܠܵܘ ܒܲܬܼܘܵܬܼܵܐ ܐܲܥܸܠ ܡ̇ܘܬܵܐ ܕܠܵܐ ܒܨܸܒܼܝܵܢܹܗ ܀ 475 :ܠܥܘܼܕܼܪܵܢ ܐܵܕܼܵܡ ܡܲܠܸܠ ܐܸܢܹܝܢ ܐܲܝܟ ܚܲܕ̈ܬܼܵܬܼܵܐ 476 ܕܲܒܼܢܸܣܝܵܢܵܐ ܢܹܐܠܲܦ ܐܵܕܼܵܡ ܨܸܒܼܝܵܢ ܡ̇ܪܹܗ ܀ 477 ܟܠܗܹܝܢ ܕܲܗ̤ܘܲܝ̈ ܒܲܕܹܿܡ ܒܐܵܕܼܵܡ ܐܲܝܟ ܨܼܒܼܝܵܢܹܗ: pb. 207 478 ܘܲܒܼܪܘܼܟܵܒܹܗ ܐܸܣܲܪ ܚܘܼܒܵܐ ܕܟܼܠܡܵܐ ܕܲܗܘ̤ܵܐ ܀ 479 :ܚܲܝܵܒܼ ܐܵܕܼܵܡ ܥܲܠ ܟܠ ܕܲܗܘ̤ܵܐ ܠܡܸܦܪܲܥ ܫܘܼܒܼܚܵܐ 480 ܠܗܵܘ̇ ܒܵܪܘܿܝܵܐ ܕܚܵܘܝܼ ܚܘܼܒܹܿܗ ܠܘܵܬܼ ܬܘܼܩܵܢܵܘ̈ܗܝ ܀