Narsai: On Creation V - ܥܲܠ ܬܘܼܩܵܢܵܐ ܕܡܲܠܲܐܟܹ̈ܐ

1 :ܬܲܗܪܵܐ ܪܲܒܵܐ ܡܠܸܐ ܬܘܼܩܵܢܹܗ ܕܡܲܬܼܩܸܢ ܟܠܵܐ 2 ܘܠܵܐ ܡܸܬܼܡܲܠܲܠ ܚܹܝܠ ܟܘܼܟܵܠܵܐ ܕܲܟܼܣܸܐ ܒܥܲܠܹܗ ܀ 3 :ܚܲܝܠܵܐ ܟܲܣܝܵܐ ܟܣܸܐ ܒܲܒܼܥܵܬܼܵܐ ܕܐܘܼܡ̇ܢܘܼܬܹܗ 4 ܘܠܵܐ ܡܸܬܼܦܲܫܲܩ ܐܸܠܵܐ ܦܲܫܸܩ ܗܘ̤ ܠܒܲܗܵܝܵܘ̈ܗܝ ܀ 5 :ܪܵܡ̇ܐ ܒܥܵܬܹܗ ܘܟܲܣܝܵܐ ܒܨܵܬܹܗ ܘܥܲܣܩܵܐ ܫܟܼܵܚܬܹܿܗ 6 ܘܲܟܼܡܵܐ ܕܢܸܒܼܥܹܝܘܗܝ ܬܘܼܒܼ ܡܸܬܼܒܲܥܝܵܐ ܕܢܸܒܼܥܹܘܗܝ ܫܲܦܝܼܪ ܀ 7 :ܥܲܡܝܼܩ ܥܘܼܬܼܪܵܐ ܕܚܲܟܿܝܼܡܘܼܬܹܗ ܡ̣ܢ ܟܠ ܥܘܼܡܩܝܼ̈ܢ 8 ܘܠܵܐ ܡܸܣܬܲܝܲܟ ܛܲܟܼܣܵܐ ܬܲܩܢܵܐ ܕܒܼܵܪܘܿܝܘܼܬܹܗ ܀ 9 :ܪܘܝܼܚ ܦܘܼܩܕܼܵܢܹܗ ܡ̣ܢ ܬܘܼܩܵܢܹܗ ܕܠܵܐ ܡܘܼܫ̈ܚܵܬܼܵܐ 10 ܘܲܠܟܼܠ ܩܸܨܵܐ ܘܠܲܝܬܿ ܠܹܗ ܩܸܨܵܐ ܕܲܡܬܲܚܸܡ ܠܹܗ ܀ 11 :ܩܲܠܝܼܠ ܪܸܡܙܹܗ ܘܚܲܣܝܼܢ ܚܲܝܠܹܗ ܘܬܲܩܝܼܦ ܥܘܼܫܢܹܗ 12 ܘܲܙܥܘܙܿܪ ܦܘܼܡ̇ܐ ܕܢܸܬܼܢܸܐ ܙ̈ܢܲܝܵܐ ܕܓܼܢ̄ܒܵܪܘܼܬܹܗ ܀ 13 :ܡܹܐܡܪܵܐ ܒܵܥܹ̇ܐ ܡܹܐܡܪܵܐ ܕܲܥܠܵܘܗܝ ܠܐܲܝܢܵܐ ܕܐܵܡܲ݁ܪ 14 ܕܐܲܝܟܲܢ ܐܸܡ݂ܲܪ ܘܩܵܡ̣ܘ ܬܘܼܦܵܢܵܘ̈ܗܝ ܡ̣ܢ ܠܵܐ ܡܸܕܸܿܡ ܀ 15 :ܡ̣ܢ ܠܵܐ ܡܸܕܸܿܡ ܒܪ̣ܵܐ ܟܠܡܸܕܸܿܡ ܟܲܕܼ ܠܲܝܬܿ ܡܸܕܸܿܡ 16 ܘܥܲܠ ܠܵܐ ܡܸܕܸܿܡ ܣܵܡ̣ ܟܠܡܸܕܸܿܡ ܕܡ̣ܢ ܠܵܐ ܡܸܕܸܿܡ ܀ 17 :ܚܲܕܼ ܦܘܼܩܵܢܵܐ ܦܩ݂ܲܕܼ ܦܘܼܩܕܵܢܹܗ ܥܲܠ ܟܠ ܡܸܕܸܿܡ 18 ܘܥܲܡܵܗ̇ ܕܡܸܠܬܼܵܐ ܗܘ̤ܵܐ ܟܠܡܸܕܸܿܡ ܡ̣ܢ ܠܵܐ ܡܸܕܸܿܡ ܀ 19 :ܩܲܠܝܼܠܵܐܝܼܬܼ ܪܗܸܛ ܦܘܼܩܕܵܢܹܗ ܥܲܠ ܬܘܼܩܵܢܹܗ 20 ܘܛܵܟ ܩܲܕܿܡܹܗ ܗ̄ܘ̣ܵܐ ܥܒܼܵܕܼܵ݁ܐ ܠܪܸܡܙܵܐ ܕܦܵܩܘܿܕܼܘܼܬܹܗ ܀ pb. 208 21 :ܠܵܐ ܩܵܘܝܼ ܠܹܗ ܥܒܼܵ݁ܕܼܵܐ ܠܪܸܡܙܵܐ ܐܵܦܠܵܐ ܒܪܸܡܙܵܐ 22 ܘܠܵܐ ܐܸܫܬܵ.ܚܲܪ ܠܲܡܚܵܘܵܝܘܼ ܚܹܝܠ ܪܲܒܿܘܼܬܹܗ ܀ 23 :ܪܸܡܙܵܢܵܐܝܼܬܼ ܪܡ݂ܲܙ ܠܲܒܼܪܝܼܬܼܵܐ ܕܬܹܐܬܸܐ ܠܓܸܠܝܵܐ 24 ܘܬܸܩܢܲܬ̤ ܡܸܢܹܫܠܝ ܟܲܕܼ ܠܵܐ ܝܸܕܼܥܲܬ̤ ܕܐܲܝܟܲܢ ܬܸܩܢܲܬ̤ ܀ 25 :ܡܸܢܫܹܠܝ ܐܸܡ݂ܲܪ ܘܲܗܘ̤ܵܘ ܚܲܪ̈ܫܹܐ ܥܲܡ ܡܲܠܵܠܹ̈ܐ 26 ܘܲܬܼܗܲܪܘ ܘܲܬܼܡܲܗ̣ܘ ܒܲܟܼܝܵܢܲܝ̈ܗܘܿܢ ܕܟܼܵܢ̣ܘ ܡ̣ܢ ܫܸܠܝܵܐ ܀ 27 :ܡܠܝܼܠܹ̈ܐ ܝܲܬܼܝܼܪ ܬܗܲܪܘ ܒܲܟܼܝܵܢܗܘܿܢ ܕܲܟܼܡܵܐ ܡܟܲܝܲܢ 28 ܘܲܟܼܡܵܐ ܡܫܲܠܲܛ ܥܲܠ ܚܹܐܪܘܼܬܼܵܐ ܕܫܲܪܝܵܐ ܒܓܼܵܘܹܗ ܀ 29 :ܒܬܲܗܪܵܐ ܘܬܸܡܗܵܐ ܩܵܡ̣ܘ ܟܸܢܫܲܝ̈ܗܘܿܢ ܟܲܕܼ ܐܸܬܿܬܲܩܲܢܘ 30 ܘܲܕܼܠܵܐ ܣܲܒܼܥܵܐ ܡܸܬܿܕܲܡܪܝܼܢ ܗ̄ܘ̣ܵܘ ܒܡܸܠܬܼܵܐ ܕܲܒܼܗܘܿܢ ܀ 31 :ܒܲܡܠܝܼܠܘܼܬܼܗܘܿܢ ܬܲܗܝܼܪܝܼܢ ܗ̄ܘ̣ܵܘ ܕܲܟܼܡܵܐ ܡܠܝܼܠܵܐ 32 ܘܲܟܼܡܵܐ ܩܲܠܝܼܠ ܚܹܝܠ ܒܘܼܝܵܢܵܐ ܕܡܸܬܼܗܲܦܲܟ ܒܵܗ̇ ܀ 33 :ܒܗܘܿܢ ܘܲܒܼܟܼܠܵܐ ܡܸܬܼܒܲܩܹܝܢ ܗ̄ܘ̣ܵܘ ܦܵܪܘܿܫܵܐܝܼܬܼ 34 ܕܡܲܢ ܟܲܝ ܐܲܩܝܼܡ ܠܗܘܿܢ ܘܲܠܟܼܠܵܐ ܟܲܕܼ ܠܲܝܬܿ ܐܸܢܘܿܢ ܀ 35 :ܗܸܢܘ̣ܿܢ ܟܲܝ ܩܵܡ̣ܘ ܡܸܬܼܪܲܢܹܝܢ ܗ̄ܘ̣ܵܘ ܒܗܵܘܢܵܐ ܕܲܒܼܗܘܿܢ 36 ܐܵܘ ܕܲܠܡܵܐ ܟܲܝ ܚܲܝܠܵܐ ܐ̄ܚܪܹܢܵܐ ܬܲܩܸܢ ܐܸܢܘܿܢ ܀ 37 :ܐܵܪܵܐ ܡ̇ܢܲܐ ܗ̄ܝܼ ܗܕܹܐ ܕܲܗܘ̤ܵܬܼ ܪܡܲܙ̣ܘ ܠܲܚܕܼܵܕܹ̈ܐ 38 ܐܝܼܬܼܝܹ̈ܐ ܐܝܼܬܲܝܢ ܐܵܘ ܡ̣ܢ ܐܝܼܬܼܝܵܐ ܐ̄ܚܪܹܢܵܐ ܗ̤ܘܲܝܢܲܢ ܀ 39 :ܐܝܼܬܲܢ ܗ̣̄ܘܲܝܢ ܟܲܝ ܐܲܝܟ ܡ̇ܐ ܕܐܝܼܬܲܝܢ ܐܵܘ ܠܵܐ ܐܝܼܬܲܝܢ 40 ܗܵܫܵܐ ܗ̤ܘܲܝܢܲܢ ܐܵܘ ܪܲܚܝܼܩܘܼ ܗܵܘܝܵܐ ܡܸܢܲܢ ܀ 41 :ܒܥܵܬܼܵܐ ܪܲܒܿܬܼܵܐ ܗܘ̤ܵܬܼ ܒܲܝܢܲܝܗܘܿܢ ܒܪܫܝܼܬܼ ܕܲܗܘ̤ܵܘ 42 ܘܛܵܒܼ ܐܸܬܿܕܲܡܲܪܘ ܥܲܠ ܬܘܼܩܵܢܵܐ ܕܝܼܠܗܘܿܢ ܘܲܕܼܟܼܠ ܀ 43 :ܒܪܲܒܿܘܼܬܼ ܡܸܬܼܚܵܐ ܕܪܵܘܡ̇ܐ ܘܥܘܼܡܩܵܐ ܡܸܬܼܒܲܩܹܝܢ ܗ̄ܘ̣ܵܘ 44 ܕܲܟܼܡܵܐ ܟܲܝ ܪܲܒܿ ܗܵܘ̇ ܦܘܼܩܕܵܢܵܐ ܕܐܵܘܪܸܒܼ ܐܸܢܘܿܢ ܀ 45 :ܒܚܸܫܘܿܟܼܘܼܬܹܗ ܕܥܵܠܡܵܐ ܒܲܪܝܵܐ ܡܸܬܿܕܲܡܪܝܼܢ ܗ̄ܘ̣ܵܘ 46 ܘܕܲܟܼ ܛܵܒܼ ܚܸܫܘܿܟ ܠܗܘܿܢ ܠܵܐ ܚܸܫܘܿܟ ܐܲܟܼܡܵܐ ܕܚܸܫܘܿܟ ܀ 47 :ܒܚܸܫܘܿܟܼܘܼܬܹܗ ܨܲܕܲܝܼܕܼܵܬܐ ܗ̄ܘ̣ܵܬܼ ܚܙܵܬܼܵܐ ܕܲܒܼܗܘܿܢ 48 ܕܐܲܝܟܲܢ ܪܵܗ̇ܛܵܐ ܘܠܵܐ ܡܸܬܼܥܵܟܼܵܐ ܒܥܲܡܘܼܛܘܼܬܹܗ ܀ 49 :ܚܙܵܬܼܵܐ ܕܬܲܗܪܵܐ ܚܵܙܹ̇ܝܢ ܗ̄ܘ̣ܵܘ ܒܵܗ̇ ܒܲܟܼܡܝܼܪܼܬܹܗ 50 ܘܠܵܐ ܣܵܒܼ̇ܥܝܼܢ ܗ̄ܘ̣ܵܘ ܠܡܸܒܼܥܵܐ ܒܥܵܬܼܵܐ ܕܥܲܠ ܣܘܼܥܪܵܢܹܗ ܀ 51 :ܛܵܒܼ ܪܲܒܵܐ ܗ̄ܘ̣ܵܬܼ ܪܲܒܿܘܼܬܼ ܬܲܗܪܵܐ ܕܲܪܡܹܝܢ ܗ̄ܘ̣ܵܐ ܒܵܗ̇ 52 ܘܲܕܼܠܵܐ ܣܵܟܼܵܐ ܡܸܬܼܲܫܚܝܼܢ ܗ̄ܘ̣ܵܘ ܠܡܸܕܵܥ ܥܸܠܬܼܵܗ̇ ܀ 53 :ܒܐܲܓܼܘܿܢ ܬܲܗܪܵܐ ܕܬܼܘܼܩܵܢ ܟܠܵܐ ܡܸܬܼܟܲܬܼܫܝܼܢ ܗ̄ܘ̣ܵܘ 54 ܘܡܸܢܼܝܲܐܒܼܝܼܢ ܗ̄ܘ̣ܵܘ ܠܡܹܐܠܲܦ ܥܸܠܬܼܵܐ ܕܫܸܚܩܲܬ̤ ܀ 55 :ܒܐܸܣܛܵܕܼܝܼܘܿܢ ܕܲܗܘܵܝ ܥܵܠܡܹ̈ܐ ܐܲܡܝܼܢܝܼܢ ܗ̄ܘ̣ܵܐ 56 ܘܠܵܐ ܫܵܠܹ̇ܝܢ ܗ̄ܘ̣ܵܘ ܡ̣ܢ ܬܲܟܼܬܿܘܼܫܵܐ ܕܲܒܼܥܵܬܼ ܟܲܣܝܵܐ ܀ pb. 209 57 :ܠܟܲܣܝܵܐ ܕܲܟܼܣܸܐ ܡܸܬܼܝܲܐܒܼܝܼܢ ܗ̄ܘ̣ܵܘ ܠܡܸܚܙܵܐ ܒܓܸܠܝܵܐ 58 ܕܡ̇ܐ ܕܡܸܬܼܒܲܕܲܩ ܢܢܝܼܚ ܠܲܐܝܘܼܬܼܵܐ ܕܪܸ̈ܥܝܵܢܲܝܗܘܿܢ ܀ 59 :ܒܗܵܢܵܐ ܣܲܒܼܪܵܐ ܢܠܸܐ ܗ̄ܘ̣ܵܐ ܣܲܒܼܪܵܐ ܕܚܘܼܫܵܒܲܝ̈ܗܘܿܢ 60 ܠܡܸܫܡܲܥ ܡܸܕܸܿܡ ܕܫܵܪܹܐ ܒܥܵܬܼܵܐ ܕܫܸܚܩܲܬ̤ ܐܸܢܘܿܢ ܀ 61 :ܒܚܸܒܼܠܹ̈ܐ ܕܚܝܼܠܹ̈ܐ ܩܵܡ̣ܘ ܣܸܕܼܪ̈ܲܝܗܘܿܢ ܚܲܕܼ ܠܘܼܩܒܲܠ ܚܲܕܼ 62 ܘܐܲܝܟ ܝܵܠܹܕܿܬܵܐ ܡܸܬܼܒܲܠܗܹܝܢ ܗ̄ܘ̣ܵܘ ܠܡܸܐܠܲܕܼ ܕܲܒܼܥܵܘ ܀ 63 :ܠܸܠܝܵܐ ܟܠܹܗ ܠܐ݂ܝܘ ܒܲܒܼܥܵܬܼܵܐ ܕܗܵܕܹܐ ܒܥܵܬܼܵܐ 64 ܥܕܲܡ̇ܐ ܕܲܡܫܲܥ̣ܘ ܩܵܠܵܐ ܕܡܲܙܥܸܩ ܕܢܸܗܘܸܐ ܢܘܼܗܪܵܐ ܀ 65 :ܒܥܸܕܵܢ ܨܲܦܪܵܐ ܫܡܲܥ̣ܘ ܒܲܪ̄ܬܼ ܩܵܠܵܐ ܕܠܵܐ ܒܲܪ̄ܬܼ ܩܵܠܵܐ 66 ܕܡܸܬܼܡܲܠܠܵܐ ܗ̄ܘ̣ܵܬܼ ܠܦܘܼܬܼ ܡܲܫܡܲܥܬܼܵܐ ܕܪܸ̈ܥܝܵܢܲܝܗܘܿܢ ܀ 67 :ܪܘܼܚܵܢܵܐܝܼܬܼ ܩܥ̣ܵܐ ܗܵܘ̇ ܪܸܡܙܵܐ ܕܬܲܩܸܢ ܐܸܢܘܿܢ 68 ܘܪܘܼܚܵܢܵܐܝܼܬܼ ܫܡ݂ܲܥܘ ܐܵܦ ܗܸܢܘ̣ܿܢ ܫܸܡܥܵܐ ܕܪܘܼܚܵܐ ܀ 69 :ܫܸܡܥܵܐ ܕܠܵܐ ܫܡܝܼܥ ܫܡ݂ܲܥܘ ܫܵܡܘܿܥܹ̈ܐ ܫܵܡ̇ܥܲܝ̈ ܫܲܦܝܼܪ 70 ܘܟܲܕܼ ܛܵܒܼ ܫܲܡ̣ܥܘܼܗܝ ܠܵܐ ܣܦܲܩ̣ܘ ܫܲܡ̣ܥܘܼܗܝ ܐܲܟܼܡܵܐ ܕܐܝܼܬܼܵܘܗܝ ܀ 71 :ܫܡ݂ܲܥܘ ܟܲܕܼ ܩܵܥܹ̇ܐ ܗܵܘ̇ ܡܲܫܡܲܥ ܟܠ ܠܵܘ ܟܲܕܼ ܩܵܥܹ̇ܐ 72 ܒܗܵܝ̇ ܕܐܵܦ ܩܵܠܹܗ ܠܵܐ ܕܵܡܹ̇ܐ ܗ̄ܘ̣ܵܐ ܠܩܵܠܵܐ ܓܫܝܼܡܵܐ ܀ 73 :ܒܩܵܠܵܐ ܕܩܵܠܹܗ ܬܲܡܝܼܗܝܼܢ ܗ̄ܘ̣ܵܘ ܫܵܡܥܲܝ̈ ܩܵܠܹܗ 74 ܕܐܲܝܟܲܢ ܡܲܫܡܲܥ ܩܵܠ ܨܸܒܼܝܵܢܹܗ ܘܲܟܼܣܸܐ ܟܝܵܢܹܗ ܀ 75 :ܒܓܲܠܝܼܘܼܬܼ ܩܵܠܹܗ ܘܟܲܣܝܘܼܬܼ ܝܵܬܹܗ ܡܸܬܿܕܲܡܪܝܼܢ ܗ̄ܘ̣ܵܘ 76 ܘܩܲܢܝܼܛܝܼܢ ܗ̄ܘ̣ܵܘ ܠܡܸܒܼܥܵܐ ܒܥܵܬܼܵܐ ܕܥܲܠ ܟܲܣܝܘܼܬܹܗ ܀ 77 :ܒܩܸܢܛܵܐ ܫܪܹܝܢ ܗ̄ܘ̣ܵܘ ܥܲܕܼܠܵܐ ܢܸܚܙܘܿܢ ܗܵܘܝܹܗ ܕܢܘܿܗܪܵܐ 78 ܘܡ̣ܢ ܕܐܸܬܿܬܲܩܲܢ ܢܵܚ̣ܘ ܒܲܠܡܹܐܢܵܐ ܕܢܲܗܝܼܪܘܼܬܹܗ ܀ 79 :ܒܲܠܡܹܐܝܢ ܫܲܝܢܵܐ ܢܵܚ̣ܘ ܒܲܗܘܵܝܹܗ ܕܢܗܘܼܪܵܐ ܦܲܐܝܵܐ 80 ܘܲܚܕܼܝܼܘ ܘܫܲܒܲܚܘ ܠܲܡܬܲܩܢܵܢܹܗ ܕܫܲܦܝܼܪ ܥܲܒܼ݂ܕܹܿܗ ܀ 81 :ܫܘܼܒܼܚܵܐ ܩ̣ܥܵܘ ܠܵܗ̇ ܠܗܵܝ̇ ܒܲܪ̄ܬܼ ܩܵܠܵܐ ܕܲܒܼܪܵܬ̤ ܢܘܼܗܪܵܐ 82 ܘܲܫܒܼܝܼܚܵܐܝܼܬܼ ܬܢܵܘ̣ ܬܸܫܒܿܘܿܚܬܹܿܗ ܕܡܲܫܡܲܥ ܩܵܠܵܐ ܀ 83 :ܫܘܼܒܼܚܵܐ ܠܕܲܐܫܡܲܥ ܩܵܠܵܐ ܠܫܸܡܥܲܢ ܕܠܵܐ ܒܲܪ̄̈ܬܼ ܩܵܠܵܐ 84 ܘܲܒܼܣܘܼܥܪ̈ܵܢܹܐ ܓܠܲܝ̈ܵܐ ܚܵܘܝܲܢ ܚܹܝܠ ܟܲܣܝܘܼܬܹܗ ܀ 85 :ܒܝܲܕܼ ܣܘܼܥܪ̈ܵܢܹܐ ܚ̣ܙܵܘ ܪ̈ܘܼܚܵܢܹܐ ܠܲܟܼܣܸܐ ܡ̣ܢ ܟܠ 86 ܘܢܵܚ̣ܘ ܡ̣ܢ ܩܸܢܛܵܐ ܘܡ̣ܢ ܥܘܼܩܵܒܼܵܐ ܕܥܲܠ ܟܲܣܝܘܼܬܹܗ ܀ 87 :ܒܲܗܘܵܝ ܚܲܪܫܵܐ ܚܵܪ̣ܘ ܒܲܗܘܵܝܵܐ ܕܲܩܢܘܿܡܲܝ̈ܘܿܢ 88 ܕܐܲܝܟ ܕܲܗܘ̤ܵܐ ܗܘ̤ ܗܘ̤ܵܘ ܐܵܦ ܗܸܢܘ̣ܿܢ ܡ̣ܢ ܠܵܐ ܡܸܕܸܿܡ ܀ 89 :ܡ̣ܢ ܠܵܐ ܡܸܕܸܿܡ ܗܘ̤ܵܐ ܢܲܗܝܼܪܵܐ ܐܲܝܟ ܟܠ ܡܸܕܸܿܡ 90 ܘܲܒܼܬܼܘܼܩܵܢܹܗ ܬܗܲܪܘ ܪ̈ܘܼܚܵܢܹܐ ܥܲܠ ܛܲܟܼܣܲܝ̈ܗܘܿܢ ܀ 91 ܒܛܲܟܼܣܵܐ ܩܵܡ̣ܘ ܗ̄ܘ̣ܵܘ ܩܕܼܵܡ ܗܵܘ̇ ܛܲܟܼܣܵܐ ܕܛܲܟܸܿܣ ܐܸܢܘܿܢ: pb. 210 92 ܘܲܬܼܚܹܝܬܼ ܫܘܼܒܼܚܹܗ ܟܕܲܢܘ̣ ܩܵܠܲܝ̈ܗܘܿܢ ܠܲܡܫܲܒܵܚܘܼ ܀ 93 :ܫܒܼܝܼܚ ܒܪܘܿܝܵܐ ܩܥ̣ܵܘ ܟܸܢܫܲܝ̈ܗܘܿܢ ܚܘܼܒܵܢܵܐܝܼܬܼ 94 ܕܲܒܼܬܼܘܼܩܵܢܵܘ̈ܗܝ ܓܠ̣ܵܐ ܥܲܠ ܝܵܬܹܗ ܕܡܲܬܼܩܸܢ ܟܠܵܐ ܗ̄ܘ̣ ܀ 95 :ܣܓܼܝܼܕܼ ܡ̣ܢ ܟܠܵܐ ܡܲܬܼܩܸܢ ܟܠܵܐ ܡ̣ܢ ܠܵܐ ܡܸܕܸܿܡ 96 ܕܲܒܼܝܲܕܼ ܡܸܕܸܿܡ ܐܲܠܦܲܢ ܚܲܝܠܵܐ ܕܐܲܠܵܗܘܼܬܹܗ ܀ 97 :ܐܲܠܵܗܵܐܝܼܬܼ ܩܲܕܸܿܫܘ ܩܘܼܕܼܡ̇ܘܗܝ ܕܐܲܠܵܗ ܟܠܵܐ 98 ܘܲܠܦܘܼܬܼ ܫܘܼܒܼܚܹܗ ܦܲܪܥܘܼܗܝ ܫܘܼܒܼܚܚܵܐ ܕܙܵܕܹܩ ܗ̄ܘ̣ܵܐ ܠܹܗ ܀ 99 :ܐܲܝܟ ܚܲܝܵܒܹ̈ܐ ܦܪܲܥܘ̣ ܬܵܘܕܲܝܼܬܼܵܐ ܕܚܲܝܵܒܼܝܼܢ ܗ̄ܘ̣ܵܘ 100 ܘܩܲܠܸܣܘ ܘܐܵܘ ܪܸܒܼܘ ܠܒܼܵܪܘܿܝܘܼܬܹܗ ܕܫܲܦܝܼܪ ܬܲܩܢܲܬ̤ ܀ 101 :ܣܲܓܿܝܼ ܫܸܦܪܲܬ̤ ܠܪܸ̈ܥܝܵܢܲܝܗܘܿܢ ܒܪܝܼܬܼܵܐ ܕܲܗܘ̤ܵܬܼ 102 ܘܛܵܒܼ ܐܸܬܿܕܲܡܲܪܘ ܒܲܡܬܲܩܢܵܢܵܗ̇ ܘܲܡܢܲܛܪܵܢܵܗ̇ ܀ 103 :ܚܲܟܿܝܼܡܵܐܝܼܬܼ ܚܵܪ̣ܘ ܚܲܟܿܝܼܡܹ̈ܐ ܒܚܸܟܼܡܲܬܼ ܟܲܣܝܵܐ 104 ܕܲܟܼܡܵܐ ܨܢܝܼܥܵܐ ܠܲܡܬܲܩܵܢܘܼ ܘܠܲܡܢܲܛܵܪܘܼ ܀ 105 :ܒܝܲܕܼ ܚܸܟܼ̈ܡܵܬܹܗ ܝ̄ܠܸܦܘ ܚܲܟܿܝܼܡܹ̈ܐ ܪ̈ܘܼܚܵܢܝܵܬܼܵܐ 106 ܘܲܒܼܒܼܘܼܝܵܢܹܗ ܩܢ̣ܵܘ ܒܘܼܝܵܢܵܐ ܠܡܸܒܼܥܵܐ ܕܟܲܣ̈ܝܵܢ ܀ 107 :ܠܒܹܝܬܼ ܝܘܼܠܦܵܢܵܐ ܐܲܥܸܠ ܐܸܢܘܿܢ ܐܲܝܟ ܕܲܠܫܲܒܼܪܹ̈ܐ 108 ܕܢܸܗܘܘܿܢ ܗܵܪܓܿܝܼܢ ܒܫܸܡ ܒܵܪܘܿܝܵܐ ܘܒܼܵܪܘܿܝܘܼܬܹܗ ܀ 109 :ܒܫܸܡ ܒܵܪܘܿܝܵܐ ܘܒܼܵܪܘܿܝܘܼܬܹܗ ܡܸܬܼܗܲܓܹܿܝܢ ܗ̄ܘ̣ܵܘ 110 ܘܲܒܼܫܘܼܚܠܵܦܹ̈ܐ ܕܲܒܼ̈ܢܵܬܼ ܩܵܠܵܘ̈ܗܝ ܬܲܡܝܼܗܝܼܢ ܗ̄ܘ̣ܵܘ ܀ 111 :ܒܗܵܝ̇ ܒܲܪ̄ܬܼ ܩܵܠܵܐ ܕܲܗܘܵܝ ܢܘܼܗܪܵܐ ܬܲܡܝܼܗܝܼܢ ܗ̄ܘ̣ܵܘ 112 ܘܛܵܟ ܪܵܢܹ̇ܝܢ ܗ̄ܘ̣ܵܘ ܕܲܒܼܒܲܪ̄ܬܼ ܩܵܠܵܐ ܗܘ̤ܵܘ ܐܵܦ ܗܸܢܘ̣ܿܢ ܀ 113 :ܒܥܵܬܼܵܐ ܐܲܒܿܥܵܬ̤ ܗܵܝ̇ ܒܲܪ̄ܬܼ ܩܵܠܵܐ ܒܪܸ̈ܥܝܵܢܲܝܗܘܿܢ 114 ܘܲܒܼܥ̣ܵܘ ܫܲܦܝܼܪ ܘܝܼܠܸܦ̣ܘ ܫܲܦܝܼܪ ܥܲܠ ܦܲܐܝܘܼܬܼܵܗ̇ ܀ 115 :ܬܵܘ ܟܹܝܬܼ ܢܸܒܼܥܸܐ ܥܲܡ ܪ̈ܘܼܚܵܢܹܐ ܒܥܵܬܼܵܐ ܕܲܒܼܥܵܘ 116 ܘܢܹܐܠܲܦ ܥܲܡܗܘܿܢ ܥܸܠܲܬܼ ܩܵܠܵܐ ܘܚܹܝܠ ܣܘܼܟܵܠܵܐ ܀ 117 :ܬܵܘ ܢܸܬܼܒܲܝܲܢ ܒܚܹܝܠ ܒܘܼܝܵܢܵܐ ܕܒܲܝܸܢ ܐܸܢܘܿܢ 118 ܕܐܲܝܝܟܲܢ ܘܥܲܠ ܡ̇ܢ ܒܝܲܕܼ ܒܲܪ̄ܬܼ ܩܵܠܵܐ ܚܲܟܸܿܡ ܐܸܢܘܿܢ ܀ 119 :ܠܡܵܢ ܟܲܝ ܩܵܠܵܐ ܠܗܵܘ̇ ܕܒܲܟܼܝܵܢܹܗ ܕܠܵܐ ܒܵܪ̄ܬܼ ܩܵܠܵܐ ܗ̄ܘ̣ 120 ܕܗܵܐ ܐܲܝܟ ܕܲܓܼܢܝܼܙ ܓܢܝܼܙ ܡ̣ܢ ܩܵܠܵܐ ܡܸܬܼܪܲܓܼܫܵܢܵܐ ܀ 121 :ܕܠܵܐ ܒܲܪ̄ܬܼ ܩܵܠܵܐ ܗ̄ܘ̣ ܗܵܘ̇ ܕܲܟܼܝܵܢܹܗ ܕܠܵܐ ܪܘܼܟܵܒܼܵܐ ܗ̄ܘ̣ 122 ܘܐܸܢ ܗܵܟܲܢܵܐ ܗ̄ܝܼ ܥܸܠܬܼܵܐ ܟܲܣܝܵܐ ܒܩܵܠܹܗ ܕܩܵܠܵܐ ܀ 123 :ܒܩܵܠܵܐ ܐܲܠܸܦ ܕܗܘ̤ ܬܲܩܸܢ ܟܠ ܡ̣ܢ ܠܵܐ ܡܸܕܼܿܡ 124 ܘܕܼܝܼܠܹܗ ܐܸܢܘܿܢ ܫܡܲܝܵܐ ܘܐܼܲܥܵܐ ܘܟܼܠܡܵܐ ܕܲܒܼܗܘܿܢ ܀ 125 ܒܲܬܼܪܹܝܢ ܡ̇ܐܒܹ̈ܐ ܡܸܬܼܚܲܙܝܵܢܹ̈ܐ ܚܒ݂ܲܫ ܟܠܡܸܕܲܡ: pb. 211 126 ܕܠܵܐ ܐ̄ܢܵܫ ܢܸܪܢܸܐ ܐܝܼܬܼ ܒܲܒܼܪܝܼܬܹܗ ܒܪܝܼܬܼܵܐ ܕܲܐ̄ܚܪܹܝܢ ܀ 127 :ܫܡܲܝܵܐ ܘܐܲܪܥܵܐ ܘܡܲܝ̈ܵܐ ܘܐܵܐܲܪ ܒܪ̣ܵܐ ܩܲܕܼܡ̇ܝܑܬܼ 128 ܘܥܲܡ ܬܘܼܩܵܢܗܘܿܢ ܐܵܦ ܬܘܼܩܵܢܵܐ ܕܪ̈ܘܼܚܵܢܵܝܹܐ ܀ 129 :ܒܲܕܼܡܘܼܬܼ ܫܘܼܪܵܐ ܒܪ̣ܵܐ ܠܲܫܡܲܝܵܐ ܘܲܪܩܲܥ̣ ܠܐܲܪܥܵܐ 130 ܘܠܲܓܼܵܘ ܡܸܢܗܘܿܢ ܚ̣ܒܲܫ ܟܠܡܸܕܸܿܡ ܡܠܝܼܠܹ̈ܐ ܘܚܲܪ̈ܫܹܐ ܀ 131 :ܡܕܼܝܝܼܢ̄ܬܵܐ ܪܲܒܿܬܼܵܐ ܒܥ̣ܵܐ ܠܲܥܡܘܼܪܝܵܐ ܕܲܥܒܼܵܕܼ̇ ܐܝܼܕܵܘ̈ܗܝ 132 ܘܐܲܣܸܢ ܣܵܡ̣ ܒܵܗ̇ ܟܠܡܵܐ ܕܚܵܫܲ݁ܚ ܠܣܘܼܢܩܵܢ ܥܲܡܠܹܗ ܀ 133 :ܠܲܡܠܝܼܠܘܼܬܼܵܐ ܝܲܬܿܝܼܪ ܬܲܪܣܝܼ ܡ̣̤ ܛܵܒܼܬܹ̈ܐ 134 ܘܲܓܼܠܵܐ ܘܚܵܘܝܵܗ̇ ܚܹܝܠ ܐܝܼܬܼܘܼܬܹܗ ܘܒܼܵܪܘܿܝܘܼܬܹܗ ܀ 135 :ܠܗܘܿܢ ܠܲܡܠܝܼܠܹ̈ܐ ܓܠ̣ܵܐ ܒܲܒܼܪܝܼܬܼܵܐ ܕܩܲܠܝܼܠ 136 ܘܲܠܘܼܠܦܵܢܗܘܿܢ ܬܲܗܝܹܗ ܠܥܲܡܠܹܗ ܠܸܫܬܵܐ ܝܵܘܡܝܼ̈ܢ ܀ 137 :ܒܸܫܬܵܐ ܝܵܘ̈ܡܝܼܢ ܐܲܠܸܦ ܐܸܢܘܿܢ ܛܲܟܼܣܵܐ ܕܚܲܝܠܹܗ 138 ܘܲܥܒ݂ܲܕܼ ܐܸܢܘܿܢ ܣܵܦܪܹ̈ܐ ܡܗܝܼܪܹ̈ܐ ܕܲܥܒܼܵܕܼ݁ ܐܝܼܕܼܵܘ̈ܗܝ ܀ 139 :ܣܸܦܪܵܐ ܡܗܝܼܪܵܐ ܝ̄ܠܸܦ̣ܘ ܒܲܒܼܪܝܝܼܬܼܵܐ ܕܲܠܥܹܢܲܝܗܘܿܢ 140 ܘܫܲܪܝܼܘ ܡܛܲܟܿܣܝܼܢ ܒܲܡܗܝܼܪܘܼܬܼܗܘܿܢ ܠܠܵܐ ܦܵܪ̈ܘܿܫܹܐ ܀ 141 :ܒܦܵܪܘܿܫܘܼܬܼܗܘܿܢ ܩ̣ܢܵܘ ܒܘܼܝܝܵܢܵܐ ܠܵܐ ܦܲܪ̈ܘܿܫܹܐ 142 ܘܐܲܫܠܸܡܘ ܐܝܼܕܼܵܐ ܠܡܸܫܬܲܒܵܕܼܘܼ ܠܫܘܼܠܛܵܢܲܝ̈ܗܘܿܢ ܀ 143 :ܠܗܵܘ̇ ܫܘܼܠܛܵܢܵܐ ܕܐܲܫܠܸܛ ܐܸܢܘܿܢ ܫܠܸܡ̣ܘ ܫܲܬܿܝܼܩܹ̈ܐ 144 ܘܟܲܕܼ ܠܵܐܪܓܼܝܼܫܝܼܢ ܐܲܪܓܸܿܫܘ ܘܝܼܕܲܥ̣ܘ ܕܐܝܼܬܼ ܒܵܪܘܿܝܵܐ ܀ 145 :ܒܝܲܕܼ ܡܲܠܵܠܹ̈ܐ ܝ̄ܠܸܦܘ̣ ܫܲܬܿܝܼܩܹ̈ܐ ܠܡܸܛܲܪ ܛܲܟܼܣܵܐ 146 ܘܲܒܼܫܲܬܿܝܼܩܹ̈ܐ ܬܗܲܪܘ ܡܲܠܵܠܹ̈ܐ ܒܚܹܝܠ ܒܵܪܘܿܝܵܐ ܀ 147 :ܬܪ̈ܲܝܗܘܿܢ ܬܸܓܼܡܹ̈ܐ ܝ̄ܬܼܪܘ ܚܲܕܼ ܡ̣ܢ ܚܲܕܼ ܡ̣ܢ ܚܲܕܼ ܡ̇ܪܵܐ 148 ܘܠܵܗ̇ ܠܡܵܪܘܼܬܼܵܐ ܦܪܲܥ̣ܘ ܬܵܘܕܲܝܼܬܼܵܐ ܚܲܕܼ ܒܐܝܼܕܲܝ̈ ܀ 149 :ܥܸܠܬܼܵܐ ܛܵܒܼܬܼܵܐ ܗܘ̤ܵܘ ܠܲܚܕܼܵܕܹ̈ܐ ܡܠܝܼܠܹ̈ܐ ܘܚܲܪ̈ܫܹܐ 150 ܘܛܵܒܼ ܐܸܬܼܝܲܬܲܪܘ ܒܕܸܚܠܲܬܼ ܡ̇ܪܵܐ ܕܬܲܩܸܢ ܐܸܢܘܿܢ ܀ 151 :ܚܲܕܼ ܬܘܼܩܵܢܵܐ ܕܚܲܕܼ ܫܘܼܠܛܵܢܵܐ ܝ̄ܠܸܦ̣ܘ ܕܐܝܼܬܲܝܗܘܿܢ 152 ܘܠܵܐ ܐܸܬܼܦܲܠܲܓ̣ܘ ܕܕܼܵܡ ܐܝܼܬܼ ܚܲܝܠܵܐ ܐ̄ܚܪܹܢܵܐ ܕܫܲܠܝܼܛ ܀ 153 :ܗܘ̤ ܬܘܼܩܵܢܗܘܿܢ ܚܲܝܸܠ ܐܸܢܘܿܢ ܒܚܹܝܠ ܒܵܪܘܿܝܵܐ 154 ܘܲܒܼܣܘܼܥܪ̈ܵܢܹܐ ܓܡ݂ܲܪܘ ܣܘܼܥܪ̈ܵܢܹܐ ܕܣܘܼܥܪ̈ܵܢܲܝܗܘܿܢ ܀ 155 :ܗܵܫܵܐ ܕܲܫܠܸܡ̣ܘ ܡܠܝܼܠܹ̈ܐ ܘܚܲܪ݁ܫܹܐ ܠܚܲܕܼ ܫܘܼܠܛܵܢܵܐ 156 ܬܵܘ ܢܸܬܼܒܲܩܸܐ ܒܗܵܘ̇ ܫܘܼܠܛܵܢܵܐ ܕܚܲܟܸܿܡ ܐܸܢܘܿܢ ܀ 157 :ܬܵܘ ܢܸܬܼܒܲܝܲܢ ܒܫܘܼܚܠܵܦ ܬܲܗܪܵܐ ܕܒܼܵܪܘܿܝܘܼܬܹܗ 158 ܕܟܲܕܼ ܚܲܕܼ ܐܝܼܬܼܵܘܗܝ ܠܵܘ ܚܲܕܼ ܐܝܼܬܼܵܘܗܝ ܒܲܕܼܡܸܬܼܚܲܙ̈ܝܵܢ ܀ 159 :ܒܗܵܘܢܵܐ ܢܸܫܡܲܥ ܠܗܵܘ̇ ܡ̇ܐ ܕܲܪܫܝܼܡ ܒܲܟܼܬܼܝܼ̈ܒܼܵܬܼܵܐ 160 ܘܲܒܼܣܘܼܟܵܠܵܐ ܢܚܘܼܪ ܒܲܟܼܬܼܵܒܼܵܐ ܘܒܲܟܼܬܼܝܼ̈ܒܼܵܬܹܗ ܀ 161 :ܟܬܼܵܒܼܵܐ ܓܠ̣ܵܐ ܠܲܢ ܥܲܠ ܬܘܼܩܵܢܵܐ ܕܝܼܠܲܢ ܘܲܕܼܟܼܠ 162 ܘܥܲܠ ܬܘܼܩܵܢܵܐ ܕܪ̈ܘܼܚܵܢܵܝܹܐ ܠܵܐ ܨܒܼܵܐ ܓܠ̣ܵܐ ܠܲܢ ܀ 163 :ܠܵܐ ܟܬ݂ܲܒܼ ܡܘܼܫܹܐ ܥܲܠ ܬܘܼܩܵܢܗܘܿܢ ܒܣܸܦܪܵܐ ܕܲܟܼܬܲܒܼ 164 ܥܕܲܡܵܐ ܕܲܡ̣ܛܵܐ ܨܹܝܕܼ ܐܲܒܼܪܵܗܵܡ ܘܲܥܗ݂ܲܕܸ ܐܸܢܘܿܢ ܀ pb. 212 165 :ܠܵܐ ܒܲܕܸܿܩ ܠܲܢ ܥܲܠ ܒܘܼܕܵܩܗܘܿܢ ܒܪܹܫ ܬܲܫܥܝܼܬܹܗ 166 ܥܕܲܡ̇ܐ ܕܒܲܕܸܿܩ ܒܐܝܼܙܓܲܕܿܘܼܬܼܗܘܿܢ ܕܲܠܘܵܬܼ ܗܵܓܼܵܪ ܀ 167 :ܠܵܐ ܐܵܘܕܲܥ ܠܲܢ ܕܩܲܒܸܿܠܘ ܡܸܕܸܿܡ ܠܲܡܕܲܒܵܪܘܼ 168 ܥܕܲܡ̇ܐ ܕܚܵܘܝܼܘ ܝܲܨܝܼܦܘܼܬܼܗܘܿܢ ܕܨܹܝܕܼ ܡܸܨܪܵܝܬܼܵܐ ܀ 169 :ܠܵܐ ܐܸܡ݂ܲܪ ܠܲܢ ܕܐܝܼܬܲܝܗܘܿܢ ܠܲܢ ܐ̄ܚܝܵܢܹ̈ܐ ܘܚܲܒܼܪܹ̈ܐ 170 ܥܕܲܡ̇ܐ ܕܗܸܢܘ̣ܿܢ ܐܲܠܸܦܘ ܛܲܟܼܣܵܐ ܠܐܲܡܬܼܵܗ̇ ܕܣܲܪܲܝ ܀ 171 :ܒܫܸܬܼܩܵܐ ܥܲܒܼ݂ܪܹܗ ܠܫܲܪܒܵܐ ܪܲܒܵܐ ܕܣܘܼܥܪ̈ܵܢܲܝܗܘܿܢ 172 ܘܐܲܝܟ ܠܲܝܬܿ ܐܸܢܘܿܢ ܐܲܗܡܝܼ ܘܲܫܬܸ݂ܩ ܡ̣ܢ ܬܘܼܩܵܢܗܘܿܢ ܀ 173 :ܫܸܬܼܩܵܐ ܐܲܪܡܝܼ ܥܲܠ ܣܘܼܥܪܵܢܗܘܿܢ ܕܣܵܥܪ̈ܲܝ ܚܲܝܲܝ̈ܢ 174 ܘܲܒܼܬܲܚܦܝܼܬܼܵܐ ܕܠܵܐ ܒܘܼܝܵܢܵܐ ܟܲܣܝܼ ܐܸܢܘܿܢ ܀ 175 :ܠܡܵܢ ܟܲܝ ܐܲܗܡܝܼ ܡ̣ܢ ܥܘܼܗܕܵܢܗܘܿܢ ܡܥܲܗܸܕܼ ܟܠܵܐ 176 ܕܗܵܐ ܟܠ ܕܲܗܘ̤ܵܐ ܡܸܥܗܲܕܼ ܥܲܗܕܹܿܗ ܒܲܟܼܬܼܝܼ̈ܒܼܵܬܹܗ ܀ 177 :ܠܡܵܢ ܟܲܝ ܚܲܦܝܹܗ ܠܫܲܪܒܵܐ ܓܼܠܝܝܵܐ ܗܵܘ̇ ܕܲܗܘ̤ܵܘ ܒܹܗ 178 ܘܠܵܐ ܓܠ̣ܵܝܗܝ ܩܘܼܕܼܡܲܝܢ ܐܲܝܟ ܕܲܓܼܠܵܐ ܠܲܢ ܥܲܠ ܬܘܼܩܩܵܢܲܢ ܀ 179 :ܠܡܵܢ ܠܵܐ ܐܸܡ݂ܲܪ ܕܲܗܘ̤ܵܘ ܥܲܡ ܟܠ ܐܵܘ ܒܵܬܲܪ ܟܠ 180 ܐܲܟܼܡܵܐ ܕܐܸܡ݂ܲܪ ܥܲܠ ܒܲܪܢܵܫܵܐ ܕܲܗܘ̤ܵܐ ܒܚܲܪܬܼܵܐ ܀ 181 :ܠܡܵܢ ܠܵܐ ܓܠ̣ܵܐ ܠܹܗ ܗܵܘ̇ ܕܲܓܼܠ̣ܵܐ ܠܹܗ ܥܲܠ ܟܠ ܡܸܕܸܿܡ 182 ܕܐܝܼܬܼ ܒܲܒܼܪܝܼܬܹ̈ ܒܪܝܼܬܼܵܐ ܕܪܵܡ̇ܐ ܡ̣ܢ ܢܸܟܼܝܵܢܹ̈ܐ ܀ 183 :ܪܵܡ ܗ̄ܘ̣ ܟܝܵܢܗܘܿܢ ܡ̣ܢ ܢܸܟܼܝܵܢܹ̈ܐ ܦܲܓܼܪ݁ܵܢܵܝܹܐ 184 ܐܦܸܢ ܐܲܡܝܼܪ ܥܲܠ ܒܲܪܢܵܫܵܐ ܕܪܵܡ ܗ̄ܘ̣ ܡ̣ܢ ܟܠ ܀ 185 :ܠܡܵܢ ܠܵܐ ܚܵܘܝܹܗ ܚܹܝܠ ܒܘܼܝܵܢܵܐ ܕܡܸܠܬܼܵܐ ܕܲܒܼܗܘܿܢ 186 ܘܠܵܐ ܒܲܕܼܩ ܠܹܗ ܥܲܠ ܫܲܪܝܼܘܼܬܼܵܐ ܕܨܸܒܼܝܵܢܲܝ̈ܗܘܿܢ ܀ 187 :ܠܡܵܢ ܠܵܐ ܐܲܠܦܹܗ ܕܪܘܼܚܵܐ ܐܸܢܘܿܢ ܘܲܕܼܠܵܐ ܪܘܼܟܵܒܼ 188 ܕܛܵܟ ܝܵܠܦ̇ܝܼܢ ܗ̣̄ܘܲܝܢ ܕܚܲܕܼ ܗ̄ܘ̣ ܟܝܵܢܗܘܿܢ ܘܲܕܼܟܼܝܵܢ ܢܲܦܫܲܢ ܀ 189 :ܒܲܟܼܝܵܢܗܘܿܢ ܚܵܪ̣ ܗܵܘ̇ ܐܘܼܡ̇ܢܵܐ ܕܟܲܝܸܢ ܐܸܢܘܿܢ 190 ܘܕܲܚܙ̣ܵܐ ܕܲܦܐܹܝܢ ܟܲܣܝܼ ܐܸܢܘܿܢ ܡ̣ܢ ܚܲܙܵܝܹ̈ܐ ܀ 191 :ܠܲܫܒܼܝܼܚܘܼܬܼܗܘܿܢ ܚܙ̣ܵܐ ܕܲܫܒܼܝܼܚܵܐ ܡ̣ܢ ܟܠ ܕܲܒܼܪ̣ܵܐ 192 ܘܐܸܢ ܡܸܬܼܓܼܠܝܵܐ ܛܵܥܹ̇ܝܢ ܐ̄ܢܵܫܵܐ ܒܲܫܒܼܝܼܚܘܼܬܼܵܗ̇ ܀ 193 :ܒܛܘܼܥܝܲܝ ܕܲܒܼܗܘܿܢ ܡܸܬܼܒܲܩܸܐ ܗ̄ܘ̣ܵܐ ܥܲܕܼܠܵܐ ܢܸܗܘܘܿܢ 194 ܘܩܲܕܸܿܡ ܫܲܬܿܩܵܗ̇ ܒܫܸܬܼܩܵܐ ܕܐܲܪܡܝܼ ܥܲܠ ܬܬܘܼܩܵܢܗܘܿܢ ܀ 195 :ܠܝܲܨܪܵܐ ܚܙ̣ܵܐ ܕܡܸܬܼܪܲܓܼܪܲܓܼ ܠܡܸܕܸܿܡ ܕܲܪܓܼܝܼܓܼ 196 ܥܲܠ ܗܵܝ̇ ܟܲܣܝܹܗ ܠܫܲܪܒܵܐ ܪܓܼܝܼܓܼܵܐ ܠܓܼܵܘ ܡ̣ܢ ܫܸܬܼܩܵܐ ܀ 197 :ܫܸܬܼܩܵܐ ܐܲܪܡܝܼ ܥܲܠ ܪܸܓܼܬܼܗܘܿܢ ܕܲܒܼܢܲܝ̈ ܐܵܕܼܵܡ 198 ܕܠܵܐ ܬܸܣܬܲܬܲܪ ܪܸܓܿܬܼܵܐ ܒܝܼܫܬܵܐ ܒܪܸ̈ܥܝܵܢܲܝܗܘܿܢ ܀ 199 :ܒܪܸ̈ܥܝܵܢܲܗܘܿܢ ܐܲܪܡܝܼ ܦܓܼܘܼܪܹ̈ܐ ܕܠܵܐ ܝܼܕܲܥܬܼܵܐ 200 ܕܠܵܐ ܡ̇ܐ ܕܝܼܕܲܥܘ̣ ܢܕܼܵܘܕܼܘܼܢ ܪܲܗܛܵܐ ܕܒܼܵܪܘܿܝܘܼܬܹܗ ܀ 201 ܚܙ̣ܵܐ ܗ̄ܘ̣ܵܐ ܠܪܸܡܙܹܗ ܪܲܗܛܵܐ ܝܠܝܼܠܵܐ ܕܚܘܼܫܵܒܲܝ̈ܗܘܿܢ: pb. 213 202 ܘܲܩܕܲܡ ܐܸܢܘܿܢ ܥܲܕܼܠܵܐ ܢܫܲܪܘܿܢ ܠܡܸܪܕܼܵܐ ܒܬܼܵܘܫܵܐ ܀ 203 :ܣܝܵܓܼܵܐ ܕܫܸܬܼܩܵܐ ܣܵܓܼ̣ ܒܐܲܦܲܝ̈ܗܘܿܢ ܕܒܲܥܪܝܼܪ̈ܵܝܹܐ 204 ܕܠܵܐ ܢܕܘܼܫܘܼܢܵܝܗܝ ܠܲܥܒܼܵܕܼ̇ ܐܝܼܕܼܵܘ̈ܗܝ ܒܓܼܘܼܕܵܦܲܝ̈ܗܘܿܢ ܀ 205 :ܩܵܠ ܓܘܼܕܵܦܗܘܿܢ ܫܡܲܥ̣ ܡ̣ܢ ܥܵܠܲܡ ܥܲܕܼܠܵܐ ܢܸܗܘܘܿܢ 206 ܘܡ̣ܢ ܕܐܸܬܿܬܲܩܢܘ ܫܲܠܝܹܗ ܒܫܸܠܝܵܐ ܕܲܫܡܲܝܵܢܹ̈ܐ ܀ 207 :ܐܲܝܟ ܕܲܠܚܪ̈ܫܹܐ ܫܲܬܲܩ ܐܸܢܘܿܢ ܡ̣ܢ ܨܹܝܕܼ ܛܘܼܥܝܲܝ 208 ܕܠܵܐ ܢܸܬܸܿܠ ܠܵܗ̇ ܐܲܬܼܪܵܐ ܠܛܘܼܥܝܲܝ ܕܬܲܡܠܸܟ ܒܐܲܪܥܵܐ ܀ 209 :ܠܲܟܼܬܼܝܼܫܘܼܬܼܵܐ ܕܛܘܼܥܝܲܝ ܫܲܠܝܼ ܫܒܸܠܝܵܐ ܕܲܒܼܗܘܿܢ 210 ܕܠܵܐ ܬܸܬܼܒܲܥܪܲܪ ܘܬܸܕܼܠܘܿܚ ܐ̄ܢܵܫܵܐ ܒܲܫܓܼܝܼܫܘܼܬܼܵܗ̇ ܀ 211 :ܝܵ̇ܕܲܥ ܗ̄ܘ̣ܵܐ ܠܵܗ̇ ܕܒܲܥܪܝܼܪܵܝܬܵܐ ܗ̄ܝܼ ܘܩܵܛ̇ܠܲܬܼ ܐ̄ܢܵܫܵܐ 212 ܡܸܛܠ ܗܵܢܵܐ ܐܲܣܪ̣ܵܗ̇ ܒܫܸܬܼܩܵܐ ܐܲܝܟ ܕܲܒܼܙܲܝܢܵܐ ܀ 213 :ܒܒܹܝܬܼ ܐܲܣܝܼܪܹ̈ܐ ܕܠܵܐ ܥܘܼܗܕܵܢܵܐ ܐܲܥܸܠ ܚܲܒܼܫܵܗ̇ 214 ܕܠܵܐ ܢܸܬܼܥܲܗܲܪ ܫܸܡ ܒܝܼܫܘܼܬܼܵܗ̇ ܒܹܝܬܼ ܐܲܪ̈ܥܵܢܹܐ ܀ 215 :ܠܫܸܡ ܒܝܼܫܘܼܬܼܵܗ̇ ܠܚ̣ܵܐ ܡ̣ܢ ܣܸܦܪ̈ܵܘܗܝ ܒܐܝܼܕܲܝ̈ ܡܘܼܫܹܐ 216 ܕܠܵܐ ܢܸܬܼܗܲܓܿܘܿܢ ܐ̄ܢܵܫܵܐ ܒܫܲܪ̈ܒܹܿܐ ܕܲܫܟܼܝܼܪܘܼܬܼܵܗ̇ ܀ 217 :ܫܸܡ ܐܝܼܬܼܘܼܬܹܗ ܡܸܬܼܚܲܦܛܵܐ ܗ̄ܘ̣ܵܬܼ ܕܬܿܦܢܸܐ ܨܹܐܕܹܝܗ̇ 218 ܥܲܠ ܗܵܝ̇ ܟܲܦܪܹܗ ܠܲܫܡܸܵܐ ܣܲܢܝܵܐ ܡ̣ܢ ܢܵܡܘܿܣܹܗ ܀ 219 :ܒܵܪܘܿܝܘܼܬܼܵܐ ܓܵܢ̇ܒܵܐ ܗ̄ܘ̣ܵܬܼ ܠܵܗ̇ ܙܹܐܦܵܢܵܐܝܼܬܼ 220 ܘܒܸܕܝܵܐ ܕܐܝܼܬܼܝܹ̈ܐ ܕܠܵܐ ܫܲܪܝܼܪܝܼܢ ܡܸܬܼܢܲܒܿܝܵܐ ܗ̄ܘ̣ܵܬܼ ܀ 221 :ܒܚܹܝܠ ܡܲܠܲܐܟܹ̈ܐ ܡܸܬܼܚܲܝܠܵܐ ܗ̄ܘ̣ܵܬܼ ܡܚܝܼܠܲܬܼ ܚܲܝܠܵܐ 222 ܘܲܒܼܦܲܐܝܘܼܬܼܗܘܿܢ ܡܣܲܬܿܪܵܐ ܗ̄ܘ̣ܵܬܼ ܠܵܗ̇ ܠܲܫܟܼܝܼܪܘܼܬܼܵܗ̇ ܀ 223 :ܐܝܼܬܼܝܹ̈ܐ ܕܐܲܝܬܿܝܼܘ ܒܪܝܼܬܼܵܐ ܠܓܸܠܝܵܐ ܡܟܲܢܝܵܐ ܗ̄ܘ̣ܵܬܼ ܠܗܘܿܢ 224 ܘܕܲܒܼܥܘܕܼܪܵܢܗܘܿܢ ܬܲܠܝܵܐ ܒܪܝܼܬܼܵܐ ܘܲܢܛܝܼܪ ܥܵܠܡܵܐ ܀ 225 :ܠܕܲܪܓܼܵܐ ܪܵܡܵܐ ܕܐܲܠܵܥܗܘܼܬܼܵܐ ܡܥܲܠܝܵܐ ܗ̄ܘ̣ܵܬܼ ܠܗܘܿܢ 226 ܘܒܼܵܪ̈ܝܲܝ ܟܠܵܐ ܘܢܵܛܪ̈ܲܝ ܟܠܵܐ ܡܫܲܡܗܵܐ ܗ̄ܘ̣ܵܬܼ ܠܗܘܿܢ ܀ 227 :ܠܵܘ ܕܡܲܠܲܐܟܹ̈ܐ ܡܸܬܼܥܲܠܹܝܢ ܗ̄ܘ̣ܵܘ ܠܗܵܢܵܐ ܪܵܘܡܵܐ 228 ܐܸܠܵܐ ܕܛܘܼܥܝܲܝ ܡܸܬܼܓܵܘܣܵܐ ܗ̄ܘ̣ܵܬܼ ܒܲܫܡܵܗܲܝ̈ܗܘܿܢ ܀ 229 :ܘܠܵܘ ܬܘܼܒܼ ܛܘܼܥܝܲܝ ܠܵܘ ܗ̤ܝ ܩܢܘܿܡܵܗ̇ ܡܸܫܬܿܓܼܫܵܐ ܗ̄ܘ̣ܵܬܼ 230 ܒܲܕܼܠܵܐ ܩܲܢܝܵܐ ܩܢܘܿܡ̇ܐ ܕܐܝܼܬܼܵܘܗܝ ܒܝܲܕܼ ܣܘܼܥܪ̈ܵܢܹܐ ܀ 231 :ܨܸܒܼܝܵܢ ܫܹܐܕܹ̈ܐ ܘܝܲܨܪܵܐ ܕܐ̄ܢܵܫܵܐ ܪܓܼܝܼܓܼ ܗ̄ܘ̣ܵܐ ܠܗܵܕܹܐ 232 ܘܲܠܒܼܝܼܫܘܼܬܗܘܿܢ ܟܠ̣ܵܐ ܗܵܘ̇ ܕܲܟܼܠܵܐ ܒܚܲܕܼ ܡܲܠܲܐܟܹ̈ܐ ܀ 233 :ܒܒܼܝܼܫܘܼܬܼ ܒܝܼܫܹ̈ܐ ܚܵܪ̣ ܗܵܘ̇ ܛܵܒܼܵܐ ܕܟܼܠܹܗ ܛܵܒܼܵܐ ܗ̄ܘ̣ 234 ܘܟܲܣܝܵܗ̇ ܠܛܵܒܼܬܼܵܐ ܕܲܒܼܪ̈ܘܼܚܵܢܹܐ ܕܠܵܐ ܬܸܨܛܲܚܸܐ ܀ 235 ܡ̣ܢ ܨܘܿܚܝܼܬܼܵܐ ܟܠ̣ܵܗ̇ ܠܲܒܼܪܝܼܬܼܗܘܿܢ ܕܙܲܗܝܲܝ̈ ܢܲܦܫܵܐ: pb. 214 236 ܘܐܲܝܟ ܕܲܒܼܓܲܙܵܐ ܣܵܡ̣ܵܗ̇ ܒܫܸܬܼܩܵܐ ܕܠܵܐ ܬܸܬܼܒܲܥܪܲܪ ܀ 237 :ܒܛܲܒܼܥܵܐ ܕܫܸܬܼܩܵܐ ܛܲܒܼܥܹܗ ܠܓܲܙܵܐ ܕܲܒܼܢܲܝ̈ ܒܲܝܬܹܿܗ 238 ܕܠܵܐ ܢܵܘܒܿܕܼܘܼܢܵܝܗܝ ܥܲܒܼ̈ܕܹܿܐ ܒܝܼܫܹ̈ܐ ܡܩܝܼܡܲܝ̈ ܡܸܪܕܵܐ ܀ 239 :ܡܸܪܕܼܵܐ ܡܩܝܼܡ ܗ̄ܘ̣ܵܐ ܬܸܓܼܡܵܐ ܕܫܹܐܕܹ̈ܐ ܥܲܠ ܐܝܼܬܼܘܼܬܹܗ 240 ܘܐܲܣܓܿܝܼ ܡܸܪܕܹܿܗ ܠܚܸܣܢܵܐ ܕܲܒܼܢ̣ܵܐ ܩܕܼܵܡ ܪܸܓܼܬܼܗܘܿܢ ܀ 241 :ܚܸܣܢܵܐ ܪܵܡ̇ܐ ܒܢ̣ܵܐ ܒܝܲܕܼ ܫܸܬܼܩܵܐ ܕܡ̣ܢ ܪ̈ܘܼܚܵܢܹܐ 242 ܘܲܠܓܼܵܘ ܡܸܢܹܗ ܣܵܡ̣ ܬܘܼܩܵܢܗܘܿܢ ܒܲܙܗܝܼܪܘܼܬܼܵܐ ܀ 243 :ܚܲܟܿܝܼܡܵܐܝܼܬܼ ܣܥ݂ܲܪ ܗܵܘ̇ ܪܸܡܙܵܐ ܡܚܲܟܸܿܡ ܟܠܵܐ 244 ܕܣܲܬܿܪܵܗ̇ ܠܛܵܒܼܬܼܵܐ ܡ̣ܢ ܒܝܼܫܘܼܬܼܵܐ ܕܒܼܝܼܫܹ̈ܐ ܀ 245 :ܐܘܿ ܠܹܟܼܝ ܒܝܼܫܵܐ ܟܡܵܐ ܒܝܼܫ ܝܲܨܪܵܐ ܕܡܲܪܵܚܘܼܬܹܟܼܝ 246 ܕܐܵܦ ܒܵܪܘܿܝܵܐ ܡܣܲܬܲܪ ܡܸܢܹܟܼܝ ܛܵܒܼܬܵܐ ܕܛܘܼܒܹܗ ܀ 247 :ܐܘܿ ܠܹܟܼܝ ܛܘܼܥܝܲܝ ܕܲܒܼܛܵܥܲܝ̈ܵܐ ܟܡܵܐ ܡܲܪܵܚܵܐ ܐ̄ܢܬܿܝ 248 ܕܡܲܬܼܩܸܢ ܟܠܵܐ ܙܗܝܼܪ ܒܲܥܒܼܵܕܹ̇ܗ ܡ̣ܢ ܓܘܼܢܵܝܹܟܼܝ ܀ 249 :ܐܘܿ ܠܲܣܢܝܼܬܼܵܐ ܕܡܲܣܢܹܐ ܚܵܘܪܵܗ̇ ܠܲܕܼܚܵܐܲ݁ܪ ܒܵܗ̇ 250 ܕܟܲܣܝܹܗ ܛܵܒܼܵܐ ܠܫܘܼܦܪܵܐ ܕܥܲܡܠܹܗ ܡ̣ܢ ܒܵܒܼܵܬܼ̈ܗ̇ ܀ 251 :ܐܘܿ ܠܡܲܣܠܲܝܬܵܐ ܕܡܲܣܠܲܝ ܫܸܡܥܵܗ̇ ܥܲܠ ܫܵܡ̇ܘܿܥܹ̈ܐ 252 ܕܢܸܕܲܬ̤ ܡܸܢܵܗ̇ ܠܒܼܵܪܹܐ ܒܪܝܼܬܼܵܐ ܡ̣ܢ ܫܘܼܪܵܝܵܐ ܀ 253 :ܡ̣ܢ ܫܘܼܪܵܝܵܐ ܚܙ̣ܵܗ̇ ܠܲܚܙܵܬܼܵܐ ܕܲܟܼܡܵܐ ܢܕܼܝܼܕܼܵܐ 254 ܘܐܲܗܦܸܟ ܐܲܦܵܘ̈ܗܝ ܕܠܵܐ ܢܚܘܼܪ ܨܹܐܕܹܝ̇ ܒܬܼܘܼܩܵܢ ܥܝܼܪܹ̈ܐ ܀ 255 :ܘܐܸܢ ܒܵܪܘܿܝܵܐ ܠܵܐ ܨܒܼܵܐ ܕܢܸܚܙܹܝܗ̇ ܠܲܡܫܲܟܲܪܬܼܵܐ 256 ܡܲܢ̣ܘܼ ܕܢܲܡܪܲܚ ܘܢܸܬܼܒܲܩܸܐ ܒܵܗ̇ ܒܦܲܪܨܘܿܦ ܚܘܼܒܵܐ ܀ 257 :ܒܦܲܪܨܘܿܦ ܚܘܼܒܵܐ ܠܵܐ ܙܵܕܹܩ ܠܲܢ ܕܲܢܚܘܼܪ ܨܹܐܕܹܝܗ̇ 258 ܕܕܲܠܡܵܐ ܢܸܗܘܸܐ ܫܟܼܝܼܪ݁ܲܝ ܚܸܙܘܵܐ ܒܕܼܘܼܡܝܵܐ ܕܼܠܵܗ̇ ܀ 259 :ܕܘܼܡܝܵܗ̇ ܟܲܣܝܹܗ ܠܕܘܼܡܝܵܐ ܕܥܝܼܪܹ̈ܐ ܡ̣ܢ ܪܸܥܝܵܢܲܢ 260 ܘܐܸܠܘܼܠܵܐ ܗ̄ܘ̣ܵܬܼ ܓܠܸܐ ܗ̄ܘ̣ܵܐ ܠܥܹܢܲܝܢ ܡ̣ܢ ܫܘܼܪܵܝܵܐ ܀ 261 :ܘܐܸܢ ܗܵܟܲܢ ܒܝܼܫ ܚܝܵܪܵܗ̇ ܐܲܝܟ ܕܐܵܦ ܒܝܼܫ ܗ̄ܘ̣ 262 ܡܲܢ ܠܵܐ ܢܲܗܦܸܟ ܚܙܵܬܼܵܐ ܕܠܸܒܹܿܗ ܡ̣ܢ ܥܸܢܝܵܢܵܗ̇ ܀ 263 :ܥܪܘܿܩܘ ܟܹܝܬܼ ܐ̄ܢܵܫܵܐ ܡ̣ܢ ܥܸܢܝܵܢܵܗ̇ ܕܒܼܝܼܫܬܵܐ ܒܝܼܫܬܵܐ 264 ܕܠܵܐ ܬܸܬܼܓܲܠܙܘܼܢ ܡ̣ܢ ܥܸܢܝܵܢܵܗ̇ ܕܛܵܒܼܬܼܵܐ ܛܵܒܼܬܵܐ ܀ 265 :ܚܙ̣ܵܘ ܡ̇ܢ ܣܸܥܪܲܬ̤ ܡ̣ܢ ܫܘܼܪܵܝܵܐ ܕܫܘܼܪܵܝ ܙܲܒܼܢܹ̈ܐ 266 ܕܠܵܐ ܝܸܗ̄ܒܲܬ̤ ܠܲܢ ܕܢܸܚܙܸܐ ܒܪܝܼܬܼܵܐ ܕܲܫܡܲܝܵܢܹ̈ܐ ܀ 267 :ܦܲܐܝܵܐ ܒܪܝܼܬܼܗܘܿܢ ܡ̣ܢ ܒܸܪ̈ܝܵܬܼܵܐ ܕܲܗ̤ܘܲܝ̈ ܥܲܡܗܘܿܢ 268 ܘܣܵܗܹ̇ܕܼ ܛܲܟܼܣܵܐ ܕܣܵܥܘܿܘܼܬܼܗܘܿܢ ܕܲܟܼܡܵܐ ܦܲܐܝܵܐ ܀ pb. 215 269 :ܪܓܼܝܼܓܼܵܐ ܚܙܵܬܼܗܘܿܢ ܘܩܲܠܝܼܠ ܪܲܗܛܵܐ ܕܣܘܼܥܪ̈ܵܢܲܝܗܘܿܢ 270 ܘܡܲܢ̣ܘܼ ܣܵܦܹ̇ܩ ܕܲܢܚܘܼܪ ܫܲܦܝܼܪ ܒܛܘܼܟܵܣܲܝ̈ܗܘܿܢ ܀ 271 :ܒܛܲܟܼܣܵܐ ܦܲܐܝܵܐ ܛܲܟܸܿܣ ܐܸܢܘܿܢ ܗܵܘ̇ ܡܲܬܼܩܸܢ ܟܠ 272 ܕܲܒܼܛܲܟܼܣܲܝ̈ܗܘܿܢ ܢܛܲܟܸܿܣ ܥܵܠܡܵܐ ܒܲܥܪܝܼܪܵܝܵܐ ܀ 273 :ܠܛܘܼܟܵܣ ܥܵܠܡܵܐ ܛܲܟܸܿܣ ܐܸܢܘܿܢ ܒܲܡܠܝܼܠܘܼܬܼܵܐ 274 ܕܠܵܐ ܬܸܗܘܸܐ ܠܵܗ̇ ܒܪܝܼܬܼܵܐ ܒܠܝܼܠܬܵܐ ܘܲܕܼܠܵܐ ܛܲܟܼܣܵܐ ܀ 275 :ܠܵܘ ܕܲܒܼܨܝܼܪ ܗ̄ܘ̣ܵܐ ܕܲܢܛܲܟܸܿܣ ܟܠ ܛܲܟܸܿܣ ܐܸܢܘܿܢ 276 ܐܸܠܵܐ ܕܢܵܘܕܲܥ ܕܐܵܦ ܬܘܼܩܵܢܹܗ ܒܛܲܟܼܣܵܐ ܡܛܲܟܲܣ ܀ 277 :ܥܲܡ ܒܸܪ݁ܝܵܬܼܵܐ ܫܲܬܿܝܼ̈ܩܵܬܼܵܐ ܬܲܩܸܢ ܐܸܢܘܿܢ 278 ܕܠܵܐ ܢܸܬܿܬܿܪܝܼܡܘܼܢ ܘܢܸܛܥܘܿܢ ܛܲܟܼܣܵܐ ܕܒܼܵܪܘܿܝܘܼܬܹܗ ܀ 279 :ܥܲܡ ܠܵܐ ܡܡܠܝܼܠܹ̈ܐ ܐܲܥܸܠ ܐܸܢܘܿܢ ܠܒܹܝܬܼ ܝܘܼܠܦܵܢܵܐ 280 ܕܠܵܐ ܢܸܬܼܚܲܬܿܪܘܼܢ ܕܕܼܵܡ ܠܵܐ ܣܢܝܼܩܝܼܢ ܥܲܠ ܕܘܼܪܵܫܵܐ ܀ 281 :ܒܩܵܠܵܐ ܓܼܠܝܵܐ ܐܲܫܡܲܥ ܐܸܢܘܿܢ ܚܹܝܠ ܟܲܣܝܘܼܬܹܗ 282 ܕܢܸܗܘܘܿܢ ܝܵ̇ܕܼܥܝܼܢ ܕܐܝܼܬܼ ܐܝܼܬܼܘܼܬܼܵܐ ܕܟܲܣܝܵܐ ܡܸܢܗܘܿܢ ܀ 283 :ܐܲܝܟ ܕܲܠܫܲܒܼܪܹ̈ܐ ܚܲܟܸܿܡ ܐܸܢܘܿܢ ܒܒܼܵܪܘܿܝܘܼܬܹܗ 284 ܕܠܵܐ ܢܸܬܿܕܼܵܘܕܼܘܼܢ ܒܗܸܕܼܪܵܐ ܘܫܘܼܒܼܚܵܐ ܕܲܩܢܘܿܡܲܝ̈ܗܘܿܢ ܀ 285 :ܒܪܸܡܙܵܐ ܙܥܘܿܪܵܐ ܐܸܡ݂ܲܪ ܘܲܗܘ̤ܵܘ ܐܲܝܟ ܟܠ ܕܲܗܘ̤ܵܐ 286 ܘܥܲܡ ܟܠܡܸܕܹܿܡ ܐܲܫܘܝܼ ܐܸܢܘܿܢ ܒܥܵܒܼܘܿܕܼܘܼܬܼܵܐ ܀ 287 :ܥܲܒܼ̈ܕܹܿܐ ܐܸܢܘܿܢ ܡܟܵܐ ܐܸܢ ܐܲܡܝܼܪ ܕܪܘܼܚܵܐ ܐܸܢܘܿܢ 288 ܘܡ̣ܢ ܚܲܕܼ ܚܲܝܠܵܐ ܩܢ̣ܵܘ ܟܘܼܝܵܢܵܐ ܠܡܸܦܪܲܚ ܒܐܵܐܲܪ ܀ 289 :ܚܹܝܠ ܒܵܪܘܿܝܵܐ ܚܲܝܸܠ ܐܸܢܘܿܢ ܠܡܸܣܥܲܪ ܚܲܝܠܹ̈ܐ 290 ܘܗܘ̤ ܥܒ݂ܲܕ ܐܸܢܘܿܢ ܥܲܒܼ̈ܕܹܿܐ ܛܵܒܹ̈ܐ ܕܣܵܥܘܿܪܘܼܬܹܗ ܀ 291 :ܚܲܝܘܼܬܼ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܙܵܘܼܕܼ ܐܸܢܘܿܢ 292 ܘܲܫܦܝܼܥܵܐܝܼܬܼ ܐܲܥܬܲܪ ܐܸܢܘܿܢ ܒܚܹܐܪܘܼܬܼ ܢܲܦܫܵܐ ܀ 293 :ܣܲܡ ܚܲܝܘܼܬܼܵܐ ܘܚܹܐܪܘܼܬܼ ܢܲܦܫܵܐ ܣܵܡ̣ ܒܲܟܼܝܵܢܗܘܿܢ 294 ܘܲܟܼܝܵܢܵܐܝܼܬܼ ܐܲܚܝܼ ܐܸܢܘܿܢ ܘܚܲܪܲܪ ܐܸܢܘܿܢ ܀ 295 :ܒܚܲܝܹ̈ܐ ܕܪܵܡܝܼܢ ܡ̣ܢ ܢܸܟܼܝܵܢܹ̈ܐ ܝܲܩܲܪ ܐܸܢܘܿܢ 296 ܘܲܒܼܚܹܐܪܘܼܬܼܵܐ ܕܠܵܐ ܡܸܬܼܚܲܣܢܵܐ ܐܲܥܬܲܪ ܐܸܢܘܿܢ ܀ 297 :ܥܘܼܬܼܪܵܐ ܪܲܒܵܐ ܕܦܵܪܘܿܫܘܼܬܼܵܐ ܝܲܗ̣̄ܒܼ ܒܐܝܼܕܲܝ̈ܗܘܿܢ 298 ܕܠܵܐ ܢܸܣܬܲܢܩܘܼܢ ܠܡܹܐܙܲܦ ܡܸܕܸܿܡ ܡ̣ܢ ܫܲܬܿܝܼܩܹ̈ܐ ܀ 299 :ܕܠܵܐ ܣܘܼܢܩܵܢܵܐ ܐܲܥܡܲܪ ܐܸܢܘܿܢ ܒܥܵܠܡܵܐ ܣܢܝܼܩܵܐ 300 ܘܲܕܼܠܵܐ ܠܹܐܘܬܼܵܐ ܐܲܥܢܝܼ ܐܸܢܘܿܢ ܒܣܘܼܢܩܵܢ ܚܲܝܲܝ̈ܢ ܀ 301 :ܢܘܼܪܵܐ ܘܪܘܼܚܵܐ ܫܲܡܲܗ ܐܸܢܘܿܢ ܒܦܘܼܡ ܒܲܪ ܐܝܼܫܲܝ 302 ܘܛܵܒܼ ܡ̣ܢ ܗܵܠܹܝܢ ܩܲܠܝܼܠ ܕܵܘܩܵܐ ܕܪܸ̈ܥܝܵܢܲܝܗܘܿܢ ܀ 303 :ܢܘܼܪܵܢܵܐܝܼܬܼ ܘܪܘܼܚܵܢܵܐܝܼܬܼ ܛܵܝ̇ܣܝܼܢ ܒܐܵܐܲܪ 304 ܘܠܵܐ ܡܸܬܼܥܵܘܕܼܝܼܢ ܠܵܐ ܡ̣ܢ ܢܘܼܪܵܐ ܘܠܵܐ ܡ̣ܢ ܪܘܼܚܵܐ ܀ 305 :ܒܹܝܬܼ ܐܸܣܛܘܼܟܼܣܹ̈ܐ ܣܲܩܘܼܒܼܠܵܝܹ̈ܐ ܡܡܲܨܥܝܼܢ ܩܵܝ̇ܡܝܼܢ 306 ܘܠܵܐ ܡܸܣܬܲܓܿܦܝܼܢ ܠܵܐ ܡ̣ܢ ܥܲܪܝܵܐ ܘܠܵܘ ܡ̣ܢ ܚܘܼܡ̇ܐ ܀ pb. 216 307 :ܒܓܼܵܘ ܡܸܢܝܵܢܵܐ ܕܝܵܘܡܹ̈ܐ ܘܝܲܪ̈ܚܹܐ ܚܒܼܝܼܫܝܼܢ ܐܲܝܟ ܟܠ 308 ܘܠܵܐ ܡܸܣܬܲܢܩܝܼܢ ܥܲܠ ܫܘܼܚܠܵܦܵܐ ܕܛܵܒܼ ܡ̣ܢ ܚܲܒܼܪܹܗ ܀ 309 :ܐܲܝܟ ܚܲܕܼ ܝܵܘܡ̇ܐ ܚܫܝܼܒܼ ܗܵܢ ܥܵܠܡܵܐ ܩܕܼܵܡ ܥܲܝܢܲܝ̈ܗܘܿܢ 310 ܒܗܵܝ̇ ܕܐܵܦ ܚܲܕܼ ܗ̄ܘ̣ ܝܵܘܡ̇ܐ ܕܗܵܦܹ̇ܟ ܥܲܠ ܟܠ ܝܵܘܡܝܼ̈ܢ ܀ 311 :ܚܲܕܼ ܗ̄ܘ̣ ܝܵܘܡ̇ܐ ܕܪܵܕܹܐ ܒܥܵܠܡܵܐ ܡ̣ܢ ܫܘܼܪܵܝܵܐ 312 ܘܥܲܡܹܗ ܕܪܲܗܛܹܗ ܪܵܗ̇ܛܝܼܢ ܗܸܢܘ̣ܿܢ ܕܠܵܐ ܩܘܼܛܵܥܵܐ ܀ 313 :ܠܵܐ ܡܸܬܼܩܲܛܥܝܼܢ ܪܸ̈ܥܝܵܢܲܝܗܘܿܢ ܒܡܸܢܼܚܹܗ ܕܙܲܒܼܢܵܐ 314 ܕܡ̇ܪܹܗ ܕܙܲܒܼܢܵܐ ܚܲܝܸܠ ܐܸܢܘܿܢ ܠܡܸܛܲܪ ܙܲܒܼܢܵܐ ܀ 315 :ܐܘܿ ܠܪܸܥܝܵܢܵܐ ܩܢܸܐ ܚܘܼܡܣܵܢܵܐ ܕܓܲܢ̄ܒܵܪܘܼܬܼܵܐ 316 ܕܠܵܐ ܡܸܬܼܪܲܦܸܐ ܡ̣ܢ ܣܲܩܘܼܒܼܠܹ̈ܐ ܕܚܕܼܝܼܪܝܼܢ ܠܹܗ ܀ 317 :ܐܘܿ ܠܚܹܝܠ ܚܲܝܠܵܐ ܐܲܠܵܗܵܝܵܐ ܕܲܒܼܪ̈ܘܼܚܵܢܹܐ 318 ܕܐܲܚܝܼܕܼ ܥܵܠܡܵܐ ܘܲܡܕܲܒܲܪ ܠܹܗ ܒܲܒܼܢܲܝ̈ ܒܲܝܬܹܿܗ ܀ 319 :ܐܘܿ ܠܲܥܒܼܝܼ̈ܕܹܐ ܕܲܥܒܲܕܼ ܐܸܢܘܿܢ ܗܵܘ̇ ܕܲܥܒ݂ܲܕܼ ܟܠ 320 ܕܥܵܒܼ̇ܕܿܝܼܢ ܡܸܕܸܿܡ ܕܪܵܡ ܡ̣ܢ ܚܲܝܠܵܐ ܕܲܩܢܘܿܡܲܝ̈ܗܘܿܢ ܀ 321 :ܐܹܝܘ ܠܲܟܼܝܵܢܵܐ ܕܟܲܕܼ ܠܵܐ ܐܝܼܬܼܵܘܗܝ ܐܸܬܼܵܐ ܠܓܸܠܝܵܐ 322 ܘܡ̣ܢ ܕܐܸܬܿܬܲܩܲܢ ܫܲܪܝܼ ܡܕܲܡܸܐ ܒܲܡܬܲܩܢܵܢܹܗ ܀ 323 :ܐܘܿ ܠܡܵܘܗܲܒܼܬܼܵܐ ܕܠܵܐ ܡܸܣܬܲܝܟܼܵܐ ܒܲܡܩܲܒܿܠܵܢܹܝ̈ܗ̇ 324 ܕܝܸܗ̄ܒܲܬ̤ ܢܲܦܫܵܗ̇ ܕܲܢܣܲܝܟܼܘܢܵܗ̇ ܡܸܣܬܲܒܝܟܼܵܢܹ̈ܐ ܀ 325 :ܐܘܿ ܠܪܲܒܿܘܼܬܼܵܐ ܕܡ̣ܢ ܪܲܒܿܘܼܬܼܵܐ ܐܲܠܵܗܵܝܬܵܐ 326 ܕܲܓܼܠܵܬ̤ ܗܸܕܼܣܵܗ̇ ܒܡܸܕܸܿܡ ܩܲܠܝܼܠܠ ܡ̣ܢ ܒܸܪ̈ܝܵܬܼܵܗ̇ ܀ 327 :ܡܸܕܹܿܡ ܩܲܠܝܼܠ ܐܝܼܬܼܵܘܗܝ ܟܝܢܵܐ ܕܲܫܡܲܝܵܢܹ̈ܐ 328 ܘܗܵܢܵܘ̇ ܬܲܗܪܵܐ ܕܒܲܙܥܘܿܪܘܼܬܹܗ ܡܕܲܒܲܪ ܟܠܵܐ ܀ 329 :ܙܥܘܿܪ ܗ̄ܘ̣ ܟܝܵܢܗܘܿܢ ܠܦܘܼܬܼ ܪܲܒܿܘܿܬܼܵܐ ܕܓܼܘܼܫܡܹ̈ܐ ܥܒܲܝ̈ܵܐ 330 ܘܠܵܐ ܡܸܬܼܦܲܚܡܝܼܢ ܥܲܡ ܦܲܩ̈ܥܵܬܼܵܐ ܘܛܘܼܪܹ̈ܐ ܪ̈ܵܡܹܐ ܀ 331 :ܡܟܲܝܲܢ ܐܸܢܘܿܢ ܡ̣ܢ ܐܸܣܦܹܪܵܐ ܕܫܸܡܫܵܐ ܘܣܲܗܪܵܐ 332 ܘܟܲܕܼ ܛܵܒܼ ܗܵܟܲܢ ܠܵܐ ܡܨܹܝܢ ܣܗ̇ܛܝܼܢ ܒܸܠܥܵܕܲܝܗܗܘܿܢ ܀ 333 :ܐܘܿ ܠܲܟܼܝܵܢܵܐ ܕܡܲܪܗܸܛ ܢܘܼܗܪܵܐ ܒܢܲܗܝܼܪܘܼܬܹܗ 334 ܘܲܛܥܝܼܢ ܡܸܕܹܿܡ ܕܪܲܒ ܡ̣ܢ ܚܲܝܠܹܗ ܕܠܵܐ ܡܘܼܫ̈ܚܵܬܼܵܐ ܀ 335 :ܐܘܿ ܠܢܲܗܝܼܪܹ̈ܐ ܕܦܵܪܚܝܼܢ ܒܐܵܐܲܪ ܥܲܡ ܢܲܗܝܼܪܹ̈ܐ 336 ܘܠܵܐ ܡܸܬܼܥܵܘܕܼܵܐ ܢܲܗܝܼܪܘܼܬܼܗܘܿܢ ܡ̣ܢ ܚܸܫܘܿܟܼܵܐ ܀ 337 :ܐܘܿ ܠܦܵܪ̈ܘܿܚܹܐ ܕܲܩܢܹܝܢ ܓܸܦܹ̈ܐ ܕܠܵܐ ܪܘܼܟܵܒܼܵܐ 338 ܕܦܵܪܚܝܼܢ ܘܛܵܝ̇ܣܝܼܢ ܟܲܕܼ ܠܵܐ ܠܵܐܹ̇ܝܢ ܒܣܘܼܥܪ̈ܵܢܲܝܗܘܿܢ ܀ pb. 217 339 :ܐܘܿ ܠܲܒܼܪܝܼܬܼܵܐ ܕܡ̣ܢ ܒܵܪܘܿܝܵܐ ܠܵܐ ܡ̇ܝܘܿܬܼܵܐ 340 ܕܩܲܢܝܵܐ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܐܲܝܟ ܒܵܪܘܿܝܵܐ ܀ 341 :ܐܘܿ ܒܵܪܘܿܝܵܐ ܕܚܲܝ ܒܲܟܼܝܵܢܹܗ ܘܪܵܡ ܒܐܝܼܬܼܘܼܬܹܗ 342 ܕܫܵܘܘܬܸܿܦ ܠܥܲܒܼܕܵܘ̈ܗܝ ܒܲܫܒܼܝܼ̈ܚܵܬܼܵܐ ܕܐܲܠܵܗܘܼܬܹܗ ܀ 343 :ܐܘܿ ܕܐܲܡܝܼܢܵܐ ܐܲܡܝܼܢܘܼܬܼܵܐ ܕܐܲܡܝܼܢܘܼܬܹܗ 344 ܕܝܲܗ̄ܒܼ ܠܲܒܼܪܝܼܬܹܗ ܐܲܡܝܼܢܘܼܬܼܵܐ ܕܠܵܐ ܡܸܬܼܦܲܣܩܵܐ ܀ 345 :ܐܘܿ ܟܡܵܐ ܪܲܒܵܐ ܫܦܝܼܥܘܼܬܼ ܚܘܼܒܵܟ ܡܲܬܼܩܸܢ ܟܠܵܐ 346 ܕܬܵܦ ܠܲܥܒܼܵܕܼܵ݁ܟ ܥܒ݂ܲܕܿܬܵܝܗܝ ܚܲܒܼܪܵܐ ܒܪܲܒܿܘܼܬܼ ܫܘܼܒܼܚܵܟ ܀ 347 :ܫܒܝܼܚ ܬܘܼܩܵܢܵܟ ܠܵܘ ܐܲܟܼܟܵܬܼܵܟ ܚܵܣ ܠܵܐ ܐܝܼܬܹܝܗ̇ 348 ܕܐܲܢ̄ܬܿ ܒܵܪܘܿܝܵܐ ܐ̄ܢܬܿ ܘܲܥܒܼܵܕܼ݁ ܐܝܼܕܲܝ̈ܟ ܒܛܲܝܒܘܼ ܥܒ݂ܲܕܿܬܵܝܗܝ ܀ 349 :ܡ̣ܢ ܬܸܫܒܿܘܿܚܬܵܐ ܕܲܫܒܼܝܼܚܘܼܬܼܵܟ ܡܠܹܝܢ ܬܘܼܩܵܢܲܝ̈ܟ 350 ܘܐܝܼܬܲܝܗܘܿܢ ܒܵܟ ܘܠܵܐ ܡܸܬܼܚܲܠܛܝܼܢ ܥܲܡ ܐܝܼܬܼܘܼܬܼܵܟ ܀ 351 :ܐܝܼܬܿܝܟ ܘܐܝܼܬܲܝܟ ܠܒܲܪ ܡ̣ܢ ܕܝܼܠܵܟ ܘܲܒܼܓܼܵܘ ܕܝܼܠܵܟ 352 ܘܐܲܡܝܼܢܘܼܬܼܵܟ ܠܵܐ ܡܸܬܼܕܲܪܟܵܐ ܡ̣ܢ ܒܲܥܵܝܝܹ̈ܐ ܀ 353 :ܠܵܐ ܡܸܬܿܕܲܪܟܲܬܿ ܡ̣ܢ ܡܲܠܵܠܹ̈ܐ ܕܲܡܡܲܠܠܝܼܢ ܒܵܟ 354 ܒܲܕܼܠܲܝܬܿ ܡܸܠܬܼܵܐ ܕܣܵܦ̇ܩܵܐ ܕܬܹܐܡܲܪ ܕܐܲܝܟܲܢ ܐܝܼܬܲܝܟ ܀ 355 :ܡܲܢ̣ܘܼ ܣܵܦܹ̇ܩ ܕܢܸܬܼܢܸܐ ܫܘܼܒܼܚܵܐ ܕܲܫܒܼܝܼܚܘܼܬܼܵܟ 356 ܕܐܵܦ ܐܸܢ ܣܵܦܹ̇ܩ ܠܵܟ ܝܲܬܿܝܼܪܵܐ ܗ̄ܘ̣ ܫܘܼܒܼܚܵܐ ܕܡܸܢܲܢ ܀ 357 :ܡ̣ܢ ܝܲܬܿܝܼܪܘܼ ܡܫܲܒܲܚ ܐܲܝܢܵܐ ܕܲܡܫܲܒܲܚ ܠܵܟ 358 ܒܲܕܼܪܵܡ ܫܘܼܒܼܚܵܟ ܡ̣ܢ ܬܸܫܒܿܘܿܚܬܵܐ ܘܡ̣ܢ ܓܘܼܢܵܝܵܐ ܀ 359 :ܫܘܸܐ ܗ̄ܘ̣ ܠܐܘܼܬܼܘܼܬܼܵܟ ܫܘܼܒܼܚܵܐ ܫܒܼܝܼܚܵܐ ܘܨܲܥܪܵܐ ܨܥܝܼܪܵܐ 360 ܘܚܲܕܼ ܐܸܢܘܿܢ ܠܵܟ ܩܵܠ ܩܘܼܠܵܣܵܐ ܘܩܵܠ ܓܘܼܢܵܝܵܐ ܀ 361 :ܒܝܲܕܼ ܗܸܠ̈ܠܵܬܼܵܐ ܒܵܥܹ̇ܝܬܿ ܫܘܼܒܼܚܵܐ ܡ̣ܢ ܬܘܼܩܵܢܵܟ 362 ܕܡ̇ܐ ܕܲܡܫܲܒܲܚ ܢܸܗܘܸܐ ܫܒܼܝܼܚܵܐ ܒܗܵܝ̇ ܕܲܡܫܲܒܲܚ ܀ 363 :ܠܵܐ ܐ̄ܢܵܫ ܫܲܒܿܚܵܟ ܥܲܕܼܠܵܐ ܬܿܝܬܸܿܐ ܒܪܝܼܬܼܵܐ ܠܓܸܠܝܵܐ 364 ܡ̇ܕܹܝܢ ܓܼܠܝܵܐ ܗ̄ܝܼ ܕܐܵܦ ܠܵܐ ܗܵܫܵܐ ܡܸܫܬܲܒܲܚ ܐܲܢ̄ܬܿ ܀ 365 :ܠܵܘ ܬܸܫܒܿܘܿܚܬܼܵܐ ܫܲܒܿܚܘܼܟ ܥܝܼܪܹ̈ܐ ܥܲܕܼܠܵܐ ܢܸܗܘܘܿܢ 366 ܕܐܸܠܘܼܠܵܐ ܗܘ̤ܵܘ ܐܵܦܠܵܐ ܒܫܘܼܒܼܚܵܟ ܡܸܬܼܒܲܣܡܝܼܢ ܗ̄ܘ̣ܵܘ ܀ 367 :ܗܘܵܝܵܐ ܩܲܕܿܝܼܡ ܠܲܡܫܲܒܿܚܵܢܹ̈ܐ ܠܵܘ ܬܸܫܒܿܘܿܚܬܼܵܐ 368 ܡ̇ܕܹܝܢ ܫܘܼܒܼܚܵܐ ܠܥܸܠܲܬܼ ܫܘܼܒܼܚܵܐ ܗ̄ܘ̣ ܕܲܡܫܲܒܿܚܚܵܢܹ̈ܐ ܀ 369 :ܐܘܿ ܟܡܵܐ ܫܒܼܝܼܚܵܐ ܗܵܝ̇ ܐܝܼܬܼܘܼܬܼܵܐ ܡܫܲܒܿܚܲܬܼ ܥܒܼܵܕ̈ܝܗ̇ 370 ܕܥܸܒܼܕܲܬ̤ ܐܸܢܘܿܢ ܩܲܢܝܲܝ̈ ܫܘܼܒܼܚܵܐ ܒܥܸܠܲܬܼ ܫܘܼܒܼܚܵܗ̇ ܀ 371 :ܫܒܝܼܚ ܬܘܼܩܵܢܵܐ ܕܲܫܡܲܝܵܢܹ̈ܐ ܐܲܟܼܡܵܐ ܕܲܫܒܼܝܼܚ 372 ܘܗܵܢܵܘ̇ ܬܲܗܪܵܐ ܕܟܲܕܼ ܠܲܝܬܿ ܐܸܢܘܿܢ ܗܘ̤ܵܘ ܘܐܸܫܬܲܒܲܚܘܼ ܀ 373 :ܬܲܗܪܵܐ ܗ̄ܘ̣ ܕܐܲܝܟܲܢ ܡ̣ܢ ܠܵܐ ܡܸܕܸܿܡ ܗܘ̤ܵܘ ܫܲܦܝܼܪܹ̈ܐ 374 ܘܐܲܝܟܲܢ ܫܸܦܪܲܬ̤ ܫܲܦܝܼܪܘܼܬܼܗܘܿܢ ܒܸܠܥܵܕܼ ܡܸܕܹܿܡ ܀ 375 ܡܠܘܿܠܵܐ ܕܡܸܕܹܿܡ ܗܵܘܹ̇ܐ ܥܸܠܬܼܵܐ ܠܗܵܘ̇ ܡ̇ܐ ܕܗܵܘܹ̇ܐ: pb. 218 376 ܘܡܲܢ ܠܵܐ ܢܸܬܼܗܲܪ ܕܲܫܦ݂ܲܪܘ ܥܝܼܪܹ̈ܐ ܒܸܠܥܵܕܼ ܡܸܕܹܿܡ ܀ 377 :ܗܵܘ̇ ܦܘܼܩܕܼܵܢܵܐ ܕܐܸܡ݂ܲܪ ܘܲܗܘ̤ܵܘ ܚܠܵܦ ܡܸܕܹܿܡ 378 ܘܗܘ̤ ܡܲܠܝܼ ܠܗܘܿܢ ܕܘܼܟܲܬܼ ܛܲܟܼܣܵܐ ܕܐܘܼܡ̇ܢܘܼܬܼܵܐ ܀ 379 :ܪܸܡܙܵܐ ܕܲܗܘ̤ܵܐ ܡܠܘܿܠܵܐ ܘܥܲܡܠܵܐ ܐܵܦ ܐܘܼܡ̇ܢܵܐ 380 ܘܫܲܪܝܼ ܘܫܲܠܸܡ ܟܲܕܼ ܠܵܐ ܒܥܼܵܐ ܠܹܗ ܥܸܕܼܪܵܐ ܐ̄ܚܪܹܢܵܐ ܀ 381 :ܠܲܝܬܿ ܗ̄ܘ̣ܵܐ ܥܲܡܹܗ ܥܸܕܼܪܵܐ ܕܗܘܼܠܹܐ ܒܸܕܼܝܵܐ ܕܡ̇ܐܢܝܼ 382 ܘܠܵܐ ܐܲܪܟܿܘܿܢܛܵܐ ܕܪܲܟܸܿܒܼ ܙܹܐܦܵܐ ܕܲܒܼܒܲܪ ܕܲܝܨܵܢ ܀ 383 :ܠܵܐ ܥܲܕܲܪܬܹܗ ܒܝܼܫܬܵܐ ܕܐܵܘܠܸܕܼ ܡܠܸܐ ܒܝܼ̈ܫܵܬܼܵܐ 384 ܘܠܵܐ ܐܲܠܵܗܹ̈ܐ ܠܵܐ ܐܲܠܵܗܹ̈ܐ ܕܟܲܢܝܼ ܨܢܝܼܥܵܐ ܀ 385 :ܡܲܪܵܚܵܐܝܼܬܼ ܟܲܢܝܼ ܨܢܝܼܥܵܐ ܐܝܼܬܼܝܹ̈ܐ ܠܫܹܐܕܹ̈ܐ 386 ܘܕܲܓܵܠܵܐܝܼܬܼ ܐܸܡ݂ܲܪ ܛܵܥ̇ܝܵܐ ܕܗܘܼܠܹܐ ܒܪܵܬ̤ ܟܠ ܀ 387 :ܕܲܓܵܠ ܒܸܕܼܝܵܐ ܕܡ̇ܢܝܼܢܵܝܹ̈ܐ ܕܲܬܼܪܹܝܢ ܚܲܝ̈ܠܹܐ 388 ܘܡܲܪܵܚ ܗܵܪܓܵܐ ܕܒܹܝܬܼ ܒܲܪ ܕܲܚܨܵܢ ܕܒܲܫܒܼܝܼܥܵܢܹ̈ܐ ܀ 389 :ܠܵܐ ܬܪܹܝܢ ܬܲܩܸܢܘ ܒܪܝܼܬܼܵܐ ܒܪܵܫܝܼܬܼ ܡ̇ܢܝܼܢܵܝܝܹ̈ܐ 390 ܘܠܵܐ ܬܘܼܒܼ ܫܲܒܼܥܵܐ ܒܪ̣ܵܘ ܐܸܣܛܘܼܟܼܣܹ̈ܐ ܐܘܿ ܕܲܝܨܢܵܝܹ̈ܐ ܀ 391 :ܠܲܝܬܹܿܝܗ̇ ܒܝܼܫܬܵܐ ܡ̇ܐܢܝܼ ܒܝܼܫܵܐ ܡ̇ܢ ܣܵܪܹܒܼ ܐܲܢ̄ܬܿ 392 ܘܠܵܐ ܐܲܪ̈ܟܿܘܿܢܛܹܐ ܕܲܒܼܕܼܵܐ ܚܲܒܼܪܵܟ ܩܢܹܝܢ ܫܘܼܠܛܵܢܵܐ ܀ 393 :ܫܠܵܘ ܡܲܪ̈ܲܚܹܐ ܡ̣ܢ ܡܲܨܘܼܬܼܵܐ ܕܥܲܡ ܒܵܪܘܿܝܵܐ 394 ܠܵܐ ܬܨܲܚܘܿܢܵܗ̇ ܠܫܲܪܝܼܪܘܼܬܹܗ ܒܫܸܡ ܕܲܓܼܵܠܹ̈ܐ ܀ 395 :ܕܿܓܵܠܹ̈ܐ ܐ̄ܢܬܿܘܿܢ ܘܕܲܓܵܠܘܼܬܼܵܐ ܡܠܹܝܢ ܠܸܒܲܝ̈ܟܿܘܿܢ 396 ܘܠܵܐ ܫܲܪܝܼܪܝܼܢ ܐܝܼܬܼܝܝܹ̈ܐ ܕܐܵܘܠܸܕܼܘ ܪܸ̈ܥܝܵܢܲܟܿܘܿܢ ܀ 397 :ܚܲܕܼܘܼ ܐܝܼܬܼܝܵܐ ܕܐܝܼܬܼܵܘܗܝ ܘܐܝܼܬܼܵܘܗܝ ܐܲܟܼܡܵܐ ܕܐܝܼܬܼܵܘܗܝ 398 ܘܗܘ̤ܝܘܼ ܕܬܲܩܸܢ ܒܪܝܼܬܼܵܐ ܒܪܵܫܝܼܬܼ ܡ̣ܢ ܠܵܐ ܡܸܕܸܿܡ ܀ 399 :ܠܵܐ ܣܢܝܼܩ ܐܝܼܬܼܝܵܐ ܕܢܸܫܐܲܠ ܥܸܕܼܪܵܐ ܡ̣ܢ ܬܘܼܩܵܢܹܗ 400 ܘܠܵܐ ܬܘܼܩܵܢܹܗ ܡܨܸܐ ܕܢܸܬܼܥܲܠܸܐ ܨܹܝܕܼ ܐܝܼܬܼܘܼܬܹܗ ܀ 401 :ܠܗܲܠ ܡ̣ܢ ܟܠ ܗ̄ܘ̣ ܐܝܼܬܼܝܵܐ ܕܐܝܼܬܼܵܘܗܝ ܕܠܵܐܐ ܫܘܼܪܵܝܵܐ 402 ܘܲܠܟܼܵܐ ܡܸܢܹܗ ܫܡܲܝܝܵܐܐ ܘܐܲܪܥܵܐ ܘܟܼܠܡܵܐ ܕܲܒܼܗܘܿܢ ܀ 403 :ܠܒܲܪ ܡ̣ܢ ܟܠܵܐ ܘܲܠܓܼܵܘ ܡ̣ܢ ܟܠ ܐܝܼܬܼܵܘܗܝ ܘܐܝܼܬܼܵܘܗܝ 404 ܘܠܵܐ ܡܸܣܬܲܝܲܟ ܥܘܼܫܢܵܐ ܕܚܲܝܠܹܗ ܒܲܥܒܼܵܕܼ̇ ܐܝܼܕܼܵܘ̈ܗܝ ܀ 405 :ܒܓܼܵܘ ܬܘܼܩܵܢܹܗ ܚܒܼܝܼܫܵܐ ܗܝܼܠܵܐ ܕܡ̇ܢܝܼܢܵܝܹ̈ܐ 406 ܘܲܠܦܘܼܩܕܵܢܹܗ ܡܫܲܡܫܝܼܢ ܐܝܼܬܼܝܹ̈ܐ ܕܒܹܝܬܼ ܒܲܪ ܕܲܝܨܵܢ ܀ 407 ܒܹܗ ܡܣܲܝܲܟ ܟܠ ܒܲܕܼ ܣܵܦܹ̇ܩ ܗ̄ܘ̣ ܟܝܵܢܹܗ ܠܟܼܠܵܐ: pb. 219 408 ܘܠܲܝܬܿ ܠܹܗ ܣܵܟܼܵܐ ܕܲܡܣܲܝܸܟ ܠܵܗ̇ ܠܐܘܼܡ̇ܢܘܼܬܹܗ ܀ 409 :ܐܲܡܝܼܢܵܐܝܼܬܼ ܐܝܼܬܼܵܘܗܝ ܘܐܝܼܬܼܵܘܗܝ ܒܵܗ̇ ܒܐܝܼܬܼܘܼܬܹܗ 410 ܘܠܲܝܬܿ ܥܲܡ ܚܲܝܠܹܗ ܚܲܝܠܵܐ ܐ̄ܚܪܹܢܵܐ ܕܢܘܼܟܼܪܵܝ ܠܲܫܡܹܗ ܀ 411 :ܗܘ̤ ܒܪ̣ܵܐ ܒܪܝܼܬܼܵܐ ܕܡܲܠܝܵܐ ܙ̈ܢܲܝܵܐ ܕܠܵܐ ܡܸܢܝܵܢܵܐ 412 ܘܟܲܕܼ ܣܲܓܿܝܼܐܝܼܢ ܡܢܹܝܢ ܠܝܼܕܲܗܬܹܗ ܥܲܕܼܠܵܐ ܢܸܗܘܘܿܢ ܀ 413 :ܗܘ̤ ܥܒ݂ܲܕܼ ܐܸܢܘܿܢ ܠܪ̈ܘܼܚܵܢܵܝܹܐ ܪ̈ܘܼܚܵܢܵܝܹܐ 414 ܘܗܘ̤ ܣܵܡ̣ ܐܸܢܘܿܢ ܠܲܡܫܲܡܵܫܘܼ ܩܕܼܵܡ ܨܸܒܼܝܵܢܹܗ ܀ 415 :ܦܵܘܠܘܿܣ ܣܵܗܹ̇ܕܼ ܥܲܠ ܬܸܫܡܸܫܬܵܐ ܕܐܲܡܝܼܢܝܼܢ ܒܵܗ̇ 416 ܒܗܵܝ̇ ܕܲܠܟܼܠܗܘܿܢ ܟܲܢܝܼ ܒܲܫܡܡܵܐ ܕܲܡܫܲܡܫܵܢܹ̈ܐ ܀ 417 :ܠܵܐ ܠܲܡ ܟܠܗܘܿܢ ܪ̈ܘܼܚܹܐ ܐܸܢܘܿܢ ܘܲܡܫܲܡܫܵܢܹ̈ܐ 418 ܘܲܟܼܕܲܢ ܐܸܢܘܿܢ ܬܚܹܝܬܼ ܣܘܼܟܵܝܵܐ ܕܦܘܼܪܩܵܢ ܚܲܝܲܝ̈ܢ ܀ 419 :ܒܹܗ ܒܲܗܘܵܝܗܘܿܢ ܩܲܒܸܿܠܘ ܗܵܕܹܐ ܡ̣ܢ ܥܵܒܼܘܿܕܼܵܐ 420 ܘܗܘ̤ ܥܵܒܼܘܿܕܼܵܐ ܠܗܵܕܹܐ ܛܲܟܸܿܣ ܘܐܲܩܝܼܡ ܐܸܢܘܿܢ ܀ 421 :ܠܛܲܟܼܣܵܐ ܕܥܲܡܠܹܗ ܐܲܥܡܸܠ ܐܸܢܘܿܢ ܒܲܥܡܝܼ̈ܠܵܬܼܵܐ 422 ܕܡ̇ܐ ܕܡܸܫܬܲܚܩܝܼܢ ܢܸܗܘܘܿܢ ܝܵ̇ܕܼܥܝܼܢ ܕܲܥܒܼܝܝܼܕܹ̈ܐ ܐ̄ܢܘܿܢ ܀ 423 :ܠܲܥܒܼܝܼܕܼܘܼܗܘܿܢ ܡܲܟܼܪܸܙ ܥܲܡܠܵܐ ܕܲܥܡܝܼܠܝܼܢ ܒܹܗ 424 ܘܐܲܝܟ ܕܲܒܼܨܸܒܼܥܵܐ ܡܚܵܘܸܐ ܠܐ̄ܢܵܫܵܐ ܕܠܵܘ ܐܝܼܬܼܝܹ̈ܐ ܐ̄ܢܘܿܢ ܀ 425 :ܐܲܝܟ ܫܝܼܦܘܿܪܵܐ ܩܵܥܹ̇ܐ ܪܲܗܛܵܐ ܕܣܘܼܥܪ݁ܵܢܲܝܗܘܿܢ 426 ܕܚܘܼܪܘ ܐܲܪ̈ܥܵܢܹܐ ܟܡܵܐ ܫܚܝܼܩ ܬܸܓܼܡܵܐ ܕܲܡܫܲܝܵܢܹ̈ܐ ܀ 427 :ܥܥܲܡܗܘܿܢ ܣܵܗܹ̇ܕܼ ܥܲܡܠܵܐ ܕܲܒܼܗܘܿܢ ܥܲܠ ܥܲܡܠܲܝ̈ܗܘܿܢ 428 ܘܲܠܣܵܗ̇ܕܿܘܼܬܹܗ ܡܚܲܬܿܡܝܼܢ ܗܸܢܘ̣ܿܢ ܕܐܹܝܢ ܫܲܪܝܼܪܵܐ ܀ 429 :ܫܲܪܝܼܪ ܣܵܗ̇ܕܵܐ ܥܲܡܠܹ̈ܐ ܕܥܝܼܪܹ̈ܐ ܘܗܸܢܘ̣ܿܢ ܥܝܼܪܹ̈ܐ 430 ܕܐܲܝܟ ܟܠܡܸܕܹܿܡ ܗܘ̤ܵܘ ܕܲܢܕܲܒܿܪܘܼܢ ܟܠܡܵܐ ܕܲܗܘ̤ܵܐ ܀ 431 :ܗܘܲܝܵ̈ܐ ܐܸܢܘܿܢ ܘܠܵܘ ܥܵܒܼܘܿܕܹ̈ܐ ܕܲܥܒܼܝܼ̈ܕܵܬܼܵܐ 432 ܘܠܲܥܒܼܝܼ̈ܕܼܵܬܼܵܐ ܕܡ̣ܢ ܥܵܒܼܘܿܕܵܐ ܥܒܼܝܼܕܼܝܼܢ ܥܲܒܼ̈ܕܹܿܐ ܀ 433 :ܐܘܿ ܥܲܒܼܕܿܘܼܬܼܵܐ ܕܡܲܠܝܵܐ ܬܲܗܪܵܐ ܕܚܲܕܼ ܥܵܒܼܘܿܕܼܵܐ 434 ܕܲܡܚܵܘܝܵܐ ܠܹܗ ܘܠܵܐ ܡܸܬܼܚܵܘܸܐ ܐܲܟܼܡܵܐ ܕܐܝܼܬܼܵܘܗܝ ܀ 435 :ܐܘܿ ܟܡܵܐ ܪܲܒܵܐ ܥܵܒܼܘܿܕܼܘܼܬܹܗ ܡ̣ܢ ܪܸܥܝܵܢܲܢ 436 ܘܲܟܼܡܵܐ ܒܨܝܼܪܵܐ ܡ̣ܢ ܪܲܒܿܘܼܬܹܗ ܕܠܵܐ ܡܘܼܫ̈ܚܵܬܼܵܐ ܀ 437 :ܕܠܵܐ ܡܘܼܫ̈ܚܵܬܼܵܐ ܪܲܒܵܐ ܡܸܢܲܢ ܘܡ̇ܟܵܐ ܡܸܢܹܗ 438 ܕܗܵܐ ܡܫܝܼܚܵܐ ܠܹܗ ܥܲܕܼܠܵܐ ܢܲܪܡܸܐ ܥܠܹܝܗ̇ ܡܘܼܫ̈ܚܵܬܼܵܐ ܀ 439 :ܡܫܝܼܚܵܐ ܗ̄ܘ̣ܵܬܼ ܠܹܗ ܕܲܟܼܡܵܐ ܗܵܘ̇ܝܵܐ ܥܲܕܼܠܵܐ ܬܸܗܘܸܐ 440 ܘܲܬܼܩܝܼܠ ܗ̄ܘ̣ܵܐ ܠܹܗ ܝܘܼܩܪܵܐ ܕܝܘܼܩܪܵܗ̇ ܒܟܲܦܬܼܵܐ ܕܪܸܡܙܹܗ ܀ 441 :ܓܠܸܐ ܗ̄ܘ̣ܵܐ ܠܪܸܡܙܹܗ ܗܘܵܝܵܐ ܕܟܸܢܫܹ̈ܐ ܪ̈ܘܼܚܵܢܵܝܹܐ 442 ܘܲܡܢܹܝܢ ܗ̄ܘ̣ܵܘ ܠܹܗ ܕܲܟܼܡܵܐ ܗܵܘܹ̇ܝܢ ܘܥܲܠ ܡܲܢ ܗܵܘܹ̇ܝܢ ܀ 443 :ܒܲܪܝܵܐ ܗ̄ܘ̣ܵܬܼ ܠܹܗ ܒܪܝܼܬܼܵܐ ܟܠܵܗ̇ ܡ̣ܢ ܨܸܒܼܝܵܢܹܗ 444 ܘܲܒܼܪܵܗ̇ ܒܬܸܢܝܵܐ ܒܝܲܕܼ ܣܘܼܥܪ݁ܵܢܹܐ ܐܸܡܲܬܼܝ ܕܲܨܒܼܵܐ ܀ pb. 220 445 :ܗܵܢ ܨܼܒܼܝܵܢܵܐ ܩܢܸܐ ܗ̄ܘ̣ܵܐ ܡܸܡܬܼܘܿܡ ܥܲܡ ܐܝܼܬܼܘܼܬܹܗ 446 ܘܐܲܦܩܹܗ ܠܓܸܠܝܵܐ ܒܙܲܒܼܢܵܐ ܕܲܫܦ݂ܲܕ ܠܚܸܟܼܡܲܬܼ ܚܘܼܒܹܿܗ ܀ 447 :ܒܚܘܼܒܵܐ ܪܲܒܵܐ ܓܡ݂ܲܪ ܨܸܒܼܝܵܢܵܐ ܕܨܵܒܹ̇ܐ ܗ̄ܘ̣ܵܐ ܒܹܗ 448 ܘܚܲܟܿܝܼܡܵܐܝܼܬܼ ܛܲܟܸܿܣ ܛܲܟܼܣܵܐ ܕܲܪܫܝܼܡ ܗ̄ܘ̣ܵܐ ܠܹܗ ܀ 449 :ܪܫܝܼܡܝܼܢ ܗ̄ܘ̣ܵܘ ܠܹܗ ܫܡܲܝܵܐ ܘܐܲܪܥܵܐ ܒܦܲܣܬܼܵܐ ܕܐܝܼܕܹܗ 450 ܐܘܼܗ ܡ̇ܢ ܐܸܡܪܹܬܼ ܠܵܐ ܗ̄ܘ̣ܵܐ ܒܐܝܼܕܼܵܐ ܐܸܠܵܐ ܒܪܸܡܙܵܐ ܀ 451 :ܟܬܼܝܼܒܼܝܼܢ ܗ̄ܘ̣ܵܘ ܠܹܗ ܥܵܠܡܹ̈ܐ ܒܣܸܦܪܵܐ ܕܐܲܡܝܼܢܘܼܬܹܗ 452 ܘܫܲܦܝܼܪ ܐܸܡ̇ܪܹܬܼ ܕܐܲܡܝܼܢܝܼܢ ܗ̄ܘ̣ܵܘ ܒܐܲܡܝܼܢܘܼܬܹܗ ܀ 453 :ܡܟܼܝܼܠܵܐ ܗ̄ܘ̣ܵܬܼ ܠܹܗ ܐܲܪܥܵܐ ܘܥܲܦܪܵܗ̇ ܒܲܡܠܸܐ ܙܘܵܪܹܗ 454 ܠܲܝܬܿ ܠܹܗ ܙܘܵܪܵܐ ܐܵܦܸܢ ܐܲܡ̣ܪܵܗ̇ ܢܒܼܝܼܵܐ ܕܐܝܼܬܼ ܠܹܗ ܀ 455 :ܬܩܝܼܠܝܼܢ ܗ̄ܘ̣ܵܘ ܠܹܗ ܛܘܼܪܹ̈ܐ ܪ̈ܵܡܹܐ ܘܟܹܐܦܹ̈ܐ ܕܲܒܼܗܘܿܢ 456 ܬܩܝܼܠܝܼܢ ܗ̄ܘ̣ܵܘ ܠܹܗ ܒܗܵܘ̇ ܡܲܬܼܩܵܠܵܐ ܕܠܵ ܒܐܝܼ̈ܕܲܝܵܐ ܀ 457 :ܐܲܚܝܼܕܼ ܗ̄ܘ̣ܵܐ ܠܹܗ ܪܘܼܚܵܐ ܘܡܲܫ̈ܒܹܐ ܒܚܘܼܦܢܲܝ̈ ܚܲܝܠܹܗ 458 ܘܲܨܪܝܼܪ ܗ̄ܘ̣ܵܐ ܠܹܗ ܩܸܒܼܝܵܐ ܕܡܲܝ̈ܵܐ ܒܫܘܿܫܸܦ ܪܸܡܙܹܗ ܀ 459 :ܡܬܲܚܲܡ ܗ̄ܘ̣ܵܐ ܠܹܗ ܬܚܘܼܡ̇ܐ ܓܼܠܝܵܐ ܕܒܹܝܬܼ ܐܸܣܛܘܼܟܼܣܹ̈ܐ 460 ܘܲܦܩܝܼܕܼ ܗ̄ܘ̣ܵܐ ܠܹܗ ܕܐܲܝܟܲܢ ܢܸܪܕܿܘܿܢ ܕܠܵܐ ܥܘܼܠܒܵܢܵܐ ܀ 461 :ܡ̇ܘܕܲܥ ܗ̄ܘ̣ܵܐ ܠܹܗ ܫܒܼܝܼܠ ܡܲܪܕܲܝܼܬܼܵܐ ܕܫܸܡܫܵܐ ܘܣܲܗܪܵܐ 462 ܘܲܩܨܝܼܨ ܗ̄ܘ̣ܵܐ ܠܹܗ ܪܲܗܛܵܐ ܕܫܵܥܹ̈ܐ ܕܢܘܼܗܪܵܐ ܘܚܸܫܟܵܐ ܀ 463 :ܡܢܹܝܢ ܗ̄ܘ̣ܵܘ ܟܵܘܿܟܿܒܹ̈ܐ ܘܲܣܕܼܝܼܪܝܼܢ ܗ̄ܘ̣ܵܘ ܩܕܼܵܡ ܝܼܕܲܥܬܹܗ 464 ܘܲܡܦܲܠܓܼܝܼܢ ܗ̄ܘ̣ܵܘ ܕܐܲܝܟܲܢ ܢܸܪܕܸܿܐ ܟܠܚܲܕܼ ܡܸܢܗܘܿܢ ܀ 465 :ܒܚܝܼܪܝܼܢ ܗ̄ܘ̣ܵܘ ܠܹܗ ܐܵܦ ܣܘܼܥܪ̈ܵܢܹܐ ܕܥܝܼܪܹ̈ܐ ܘܐ̄ܢܵܫܵܐ 466 ܘܒܲܩܝܵܐ ܗ̄ܘ̣ܵܬܼ ܠܹܗ ܛܵܒܼܬܼܵܐ ܘܒܼܝܼܫܬܵܐ ܕܣܘܼܥܪ݁ܵܢܲܝܗܘܿܢ ܀ 467 :ܦܪܝܼܫܝܼܢ ܗ̄ܘ̣ܵܘ ܠܹܗ ܬܼܓܼܡܹ̈ܐ ܕܫܹܐܕܹ̈ܐ ܡ̣ܢ ܡܲܠܲܐܟܹ̈ܐ 468 ܘܲܡܦܵܣ ܗ̄ܘ̣ܵܐ ܒܗܘܿܢ ܕܡܸܦܪܲܫ ܦܵܪܫܝܼܢ ܡ̣ܢ ܚܲܒܼܪ݁ܲܝܗܘܿܢ ܀ 469 :ܗܵܠܹܝܢ ܟܠܗܹܝܢ ܘܬܼܘܼܒܼ ܕܐܲܟܼܘܵܬܼܗܹܝܢ ܐܸܠܘܼ ܐܝܼܬܼ ܗ̣̄ܘܲܝ̈ 470 ܟܲܣ̈ܝܵܢ ܗ̣̄ܘܲܝ̈ ܒܹܗ ܘܚܲܙ̈ܝܵܢ ܗ̣̄ܘܲܝ̈ ܠܹܗ ܘܡܲܢ̈ܝܵܢ ܗ̣̄ܘܲܝ̈ ܠܹܗ ܀ 471 :ܠܵܐ ܟܹܝܬܼ ܙܵܕܸܩ ܕܲܢܟܲܢܸܐ ܠܹܗ ܫܡܵܗܹ̈ܐ ܡܚܝܼܠܹ̈ܐ 472 ܕܗܵܐ ܒܸܪ̈ܝܵܬܹܗ ܡܚܵܘ̈ܝܵܢ ܚܲܝܠܵܐ ܕܓܼܢ̄ܒܵܪܘܼܬܹܗ ܀ 473 :ܠܵܐ ܢܸܫܬܲܒܼܗܲܪ ܘܢܸܪܢܸܐ ܕܐܲܚܝܼܕܼ ܣܵܟܼܵܐ ܠܣܵܟܹܗ 474 ܕܗܵܐ ܬܘܼܩܵܢܹܗ ܠܵܐ ܡܸܣܬܲܝܲܟ ܡ̣ܢ ܪܸܥܝܵܢܲܢ ܀ 475 :ܠܵܐ ܢܸܬܼܠܲܠܲܓܼ ܘܢܲܥܸܠ ܥܲܡܹܗ ܚܲܝܠܵܐ ܐ̄ܚܪܹܢܵܐ 476 ܕܗܵܐ ܐܵܦ ܥܝܼܪܹ̈ܐ ܕܪܘܼܚܵܐ ܐܸܢܘܿܢ ܥܒܼܵܕܹܗ ܐܸܢܘܿܢ ܀ pb. 221 477 :ܥܒܼܵܕܹܗ ܐܸܢܘܿܢ ܘܐܲܝܟ ܟܠܡܸܕܸܿܡ ܬܲܩܸܢ ܐܸܢܘܿܢ 478 ܘܣܵܗܹ̇ܕ ܕܵܘܝܼܕܼ ܕܐܸܡ݂ܲܪ ܕܲܥܒ݂ܲܕܼ ܡܲܠܲܐܟܼܵܘ̈ܗܝ ܪܘܼܚ ܀ 479 :ܡܲܠܲܐܟܼܵܘ̈ܗܝ ܕܹܝܢ ܟܲܢܝܼ ܐܸܢܘܿܢ ܠܵܐ ܡܲܠܲܐܟܹ̈ܐ 480 ܕܢܹܐܠܲܦ ܟܠܢܵܫ ܕܕܝܼܠܹܗ ܐܸܢܘܿܢ ܒܗܵܝ̇ ܕܲܒܼܪܹܝܢ ܠܹܗ ܀ 481 :ܒܪܝܼܬܹܗ ܐܸܢܘܿܢ ܘܲܬܼܚܹܝܬܼ ܪܸܡܙܹܗ ܟܕܼܝܼܢܝܼܢ ܟܠܢܵܫ 482 ܘܠܵܐ ܛܲܥܝܵܐ ܠܗܘܿܢ ܒܵܪܘܿܝܘܼܬܹܗ ܘܣܵܥܘܿܪܘܼܬܹܗ ܀ 483 :ܛܵܥܲܝ̈ܵܐ ܛܥܵܘ̣ ܘܟܲܢܝܼܘ ܐܸܢܘܿܢ ܐܝܼܬܼܝܹ̈ܐ ܓܢܝܼܙܹ̈ܐ 484 ܘܛܵܟ ܟܲܪܝܵܐ ܠܗܘܿܢ ܠܬܲܩܢܹ̈ܐ ܕܲܒܼܗܘܿܢ ܥܲܠ ܗܵܢ ܥܵܘ̣ܠܵܐ ܀ 485 :ܥܵܘ̣ܠܵܐ ܗ̄ܘ̣ ܪܲܒܵܐ ܕܫܸܡ ܒܵܪܘܿܝܵܐ ܢܸܬܸܿܠ ܠܥܲܒܼ̈ܕܹܿܐ 486 ܘܛܵܟ ܚܲܡܝܼܬܼܝܼܢ ܥܲܒܼ̈ܕܹܿܐ ܛܵܒܹ̈ܐ ܥܲܠ ܗܵܢ ܓܘܼܢܚܵܐ ܀ 487 :ܫܹܐܕܹ̈ܐ ܒܲܠܚܘܿܕܼ ܐܸܟܼܒܲܪ ܚܵ̇ܕܹܝܢ ܟܲܕܼ ܠܵܐ ܚܵ̇ܕܹܝܢ 488 ܕܐܵܦܸܢ ܚܵ̇ܕܹܝܢ ܩܲܠܝܼܠ ܚܵ̇ܕܹܝܢ ܘܗܵܦ̇ܟܿܝܼܢ ܡܲܟܼܪܹܝܢ ܀ 489 :ܩܲܠܝܼܠ ܙܲܒܼܢܵܐ ܚܵ̇ܕܹܝܢ ܫܹܐܕܹ̈ܐ ܘܛܵܥܹ̇ܝܢ ܐ̄ܢܵܫܵܐ 490 ܘܒܼܵܬܲܪ ܙܲܒܼܢܵܐ ܥܵܐ̇ܠܵܐ ܬܘܵܬܼܵܐ ܕܠܵܐ ܡܸܬܿܬܲܢܝܵܐ ܀ 491 :ܬܘܵܬܼܵܐ ܡܢܲܓܿܕܵܐ ܠܡܲܪܵܚܘܼܬܼܵܐ ܕܠܵܐ ܐܸܬܿܬܵܘܝܲܬ̤ 492 ܘܲܠܡܲܠܲܐܟܹ̈ܐ ܕܐܲܟܼܪܝܼܘ ܗܵܪܟܵܐ ܡܚܵܘܝܵܐ ܒܚܘܼܒܵܐ ܀ 493 :ܣܲܓܿܝܼ ܡܲܟܼܪܹܝܢ ܐܸܡܲܬܼܝ ܕܛܵܥܹ̇ܝܢ ܐ̄ܢܵܫܵܐ ܒܫܸܡܗܘܿܢ 494 ܘܣܲܓܿܝܼ ܚܵ̇ܕܿܝܢ ܡ̇ܐ ܕܡܸܬܼܩܲܕܲܫ ܫܸܡ ܒܵܪܘܿܝܵܐ ܀ 495 :ܫܸܡ ܒܵܪܘܿܝܵܐ ܪܚܝܼܡ ܥܲܠ ܙܵܘܥܹ̈ܐ ܕܪܸ̈ܥܝܵܢܲܗܘܿܢ 496 ܘܲܪܓܼܝܼܓܼܝܼܢ ܛܵܒܼ ܕܠܲܫܡܵܐ ܕܩܘܼܕܼܫܹܗ ܢܩܲܕܸܿܫ ܟܠܢܵܫ ܀ 497 :ܩܲܕܿܝܼܫܵܐܝܼܬܼ ܡܩܲܕܿܫܝܼܢ ܢܸܗܘܿܢ ܒܲܚܕܼܵܐ ܫܲܘܝܼܘ 498 ܘܠܵܐ ܡܸܬܼܪܲܦܹܝܢ ܡ̣ܢ ܫܲܘܝܘܼܬܼܵܐ ܕܐܲܡܝܼܢܝܼܢ ܒܵܗ̇ ܀ 499 :ܠܲܥܒܼܝܼܕܼܘܼܬܼܗܘܿܢ ܥܵܗ̇ܕܿܝܼܢ ܟܠܢܵܫ ܥܲܒܼ̈ܕܹܿܐ ܛܵܒܹ̈ܐ 500 ܘܠܵܐ ܡ̇ܐ̇ܢܵܐ ܠܗܘܿܢ ܠܡܸܦܪܲܥ ܫܘܼܒܼܚܵܐ ܠܲܡܬܲܩܢܵܢܗܘܿܢ ܀ 501 :ܒܹܗ ܒܬܼܘܼܩܵܢܗܘܿܢ ܡܲܩܲܬܼ ܗܵܘܢܵܐ ܥܝܼܪܵܐ ܕܲܒܼܗܘܿܢ 502 ܠܵܐ ܝܵܗ̇ܒܿܝܼܢ ܠܹܗ ܕܢܸܫܠܸܐ ܘܢܸܫܟܲܬܼ ܡ̣ܢ ܬܸܫܒܿܘܿܚܬܵܐ ܀ 503 :ܗܵܘܢܵܐ ܥܝܼܪܵܐ ܩܢܹܝܢ ܒܲܟܼܝܝܵܢܵܐ ܕܲܡܟܲܝܢܝܼܢ ܒܹܗ 504 ܘܡܸܛܠ ܗܵܕܹܐ ܟܲܢܝܼ ܐܸܢܘܿܢ ܟܬܼܵܒܼܵܐ ܥܝܼܪܹ̈ܐ ܀ 505 :ܥܝܼܪܹ̈ܐ ܐܸܢܘܿܢ ܕܠܵܐ ܕܡܸܟܼܘ ܡܸܡܬܼܘܿܡ ܘܠܵܐ ܬܘܼܒܼ ܕܵܡ̇ܟܿܝܼܢ 506 ܘܲܒܼܥܝܼܪܘܼܬܼܗܘܿܢ ܡܥܝܼܪܝܼܢ ܐ̄ܢܵܫܵܐ ܠܘܵܬܼ ܝܘܼܠܦܵܢܵܐ ܀ 507 :ܒܒܹܝܬܼ ܝܘܼܠܦܵܢܵܐ ܡܩܲܕܿܡܝܼܢ ܩܵܝ̇ܡܝܼܢ ܐܲܝܟ ܪ̈ܲܒܵܢܹܐ 508 ܘܲܡܚܲܟܿܡܝܼܢ ܠܵܗ̇ ܠܫܲܒܼܪܘܼܬܼ ܐ̄ܢܵܫܵܐ ܒܝܘܼܠܦܵܢܲܝ̈ܗܘܿܢ ܀ 509 :ܡ̣ܢ ܗܵܘ̇ ܪܲܒܵܐ ܕܚܲܟܸܿܡ ܐܸܢܘܿܢ ܩ̣ܢܵܘ ܚܸܟܼ̈ܡܵܬܼܵܐ 510 ܘܲܠܗܵܘ̇ ܢܝܼܫܵܐ ܕܪܲܒܵܢܘܼܬܹܗ ܚܵܢܹ̇ܝܢ ܟܠܢܵܫ ܀ 511 :ܒܗܸܓܼܝܵܢ ܡܸܠܬܹܗ ܥܢܹܝܢ ܘܲܥܡܝܼܠܝܼܢ ܠܹܠܲܝ ܐܝܼܡܵܡ 512 ܘܥܲܡܗܘܿܢ ܕܙܲܒܼܢܹ̈ܐ ܪܸܗ̇ܛܝܼܢ ܒܵܥܹ̇ܝܢ ܒܥܵܬܼ ܥܸܢܝܵܢܹܗ ܀ 513 ܥܸܢܝܵܢ ܚܘܼܒܵܐ ܐܲܠܵܗܵܝܵܐ ܪܚܝܼܡ ܥܲܠ ܥܝܼܪܹ̈ܐ: pb. 222 514 ܬܵܘ ܢܸܗܘܸܐ ܠܗܘܿܢ ܚܲܒܼܪܹ̈ܐ ܒܗܸܪܓܵܐ ܕܐܲܡܝܼܢܝܼܢ ܒܹܗ ܀ 515 :ܠܨܸܒܼܝܵܢ ܟܲܣܝܵܐ ܡܫܲܡܫܝܼܢ ܟܠܝܘܿܡ ܕܠܵܐ ܩܘܼܛܵܥܵܐ 516 ܬܵܘ ܢܸܬܼܐܡܸܢ ܒܐܲܡܝܼܢܘܼܬܼܵܐ ܕܨܹܝܕܼ ܥܵܒܼܘܿܕܼܵܢ ܀ 517 :ܚܠܵܦ ܦܘܼܪܩܵܢܲܢ ܫܚܝܼܩܝܼܢ ܘܲܠܐܹܝܝܢ ܗܵܐ ܡ̣ܢ ܕܲܗܘ̤ܵܘ 518 ܢܥܲܕܲܪ ܐܸܢܘܿܢ ܐܵܦܸܢ ܩܲܠܝܼܠ ܒܥܲܡܠܵܐ ܕܚܲܝܲܝ̈ܢ ܀ 519 :ܡܸܛܠܵܬܲܢ ܡܙܝܼܥܝܼܢ ܠܐܵܐܲܪ ܒܟܼܠ ܫܘܼܚܠܵܦܝܼ̈ܢ 520 ܢܙܝܼܥܥ ܡܲܚܫܲܒܼܬܲܢ ܠܡܸܕܲܥ ܛܲܟܼܣܵܐ ܕܫܘܼܚܠܵܦܲܝ̈ܗܘܿܢ ܀ 521 :ܚܠܵܦܲܝܢ ܪܵܗ̇ܛܝܼܢ ܒܐܸܣܛܵܕܼܝܼܘܿܢ ܪܘܼܚܵܢܵܝܬܵܐ 522 ܢܩܲܠܸܣ ܐܸܢܘܿܢ ܕܢܸܫܘܸܐ ܠܐܲܓܼܪܵܐ ܕܲܟܼܠܝܼܠܲܝ̈ܗܘܿܢ ܀ 523 :ܠܥܘܼܕܼܪܵܢ ܢܲܦܫܲܢ ܪܡܹܝܢ ܒܐܵܓܼܘܿܢܵܐ ܥܲܡ ܚܲܒܼܪ̈ܲܝܗܘܿܢ 524 ܢܠܲܒܸܿܒܼ ܐܸܢܘܿܢ ܕܬܼܘܼܒܼ ܢܸܬܼܟܲܫܪܘܼܢ ܥܲܠ ܙܵܟܼܘܼܬܿܢ ܀ 525 :ܩܪܵܒܼܵܐ ܕܫܹܐܕܹ̈ܐ ܡܫܲܠܹܝܢ ܡܸܢܲܢ ܒܐܵܓܼܘܿܢܲܝ̈ܗܘܿܢ 526 ܢܸܦܪܘܿܥ ܛܲܝܒܿܘܼ ܠܡܵܪܵܐ ܛܵܒܼܵܐ ܕܙܲܝܹܢ ܐܸܢܘܿܢ ܀ 527 :ܠܕܲܝܝܘܹ̈ܐ ܪܵܕܼܦܝܼܢ ܡ̣ܢ ܡܲܫܪܝܼܬܲܢ ܕܠܵܐ ܢܲܟܿܘܿܢܵܢ 528 ܢܫܲܒܲܚ ܠܲܫܡܵܐ ܕܐܸܣܲܪ̣ ܐܸܢܘܿܢ ܒܪܸܚܡܲܬܼ ܢܲܦܫܲܢ ܀