Narsai: On Creation VI - ܥܲܠ ܕܘܼܒܵܪܵܐ ܕܡܲܠܲܐܟܹ̈ܐ

1 :ܥܵܠܡܵܐ ܕܙܲܒܼܢܵܐ ܚܙܹ̇ܝܬܼ ܟܲܕܼ ܪܵܗܹ̇ܛ ܒܐܲܡܝܼܢܘܼܬܼܵܐ 2 ܘܲܨܒܹ̇ܝܬܼ ܕܐܹܠܲܦ ܕܡܲܢ ܡܲܪܗܸܛ ܠܵܗ̇ ܠܫܲܬܿܝܼܩܘܼܬܹܐ ܀ 3 :ܪܲܗܛܹܗ ܘܫܸܬܼܩܹ ܚܙܹ̇ܝܬܼ ܕܲܡܛܲܟܲܣ ܚܲܟܿܝܼܡܵܐܝܼܬܼ 4 ܘܐܸܡ̇ܪܹܬܼܐܸܢܵܐ ܕܡܲܢ ܟܲܝ ܚܲܟܿܡܹܗ ܠܡܸܪܕܵܐ ܒܛܲܟܼܣܵܐ ܀ 5 :ܒܫܘܼܚܠܵܦ ܙܲܒܼܢܵܘ̈ܗܝ ܬܸܗ̇ܪܹܬܼ ܣܲܓܿܝܼ ܕܲܟܼܣܡܵܐ ܫܚܝܼܩܝܼܢ 6 ܘܲܒܼܥܹ̇ܝܬܼ ܕܐܸܕܲܥ ܕܡܲܢ ܫܵܚܹ̇ܩ ܠܹܗ ܘܲܡܢܲܟܲܪ ܠܹܗ ܀ 7 :ܒܹܝܬܼ ܫܘܼܚܠܵܦܵܘ̈ܗܝ ܥܸܠܹ̇ܬܼ ܩܵܡܹ̇ܬܼ ܐܲܝܟ ܕܒܼܵܐܓܼܘܿܢܵܐ 8 ܕܐܹܚܘܼܪ ܫܲܦܝܼܪ ܕܐܲܝܟܲܢ ܥܵܠ̇ܒܿܝܼܢ ܐܵܦ ܡܸܬܼܥܲܠܒܿܝܼܢ ܀ 9 :ܥܲܡ ܡܲܪܕܿܝܼܬܹܗ ܨܒܼܵܘ ܚܘܼܫܵܒܲܝܝ̈ ܠܲܡܗܲܠܵܟܼܘܼ 10 ܕܐܸܕܕܲܥ ܕܐܲܝܢܵܘ ܫܘܼܪܵܝ ܐܘܼܪܚܹܗ ܘܫܘܼܠܵܡ ܪܲܗܛܹܗ ܀ pb. 223 11 :ܪܲܗܛܹܗ ܘܛܲܟܼܣܹܗ ܥܲܒܼ݂ܕܿܘܼܢܝ ܕܐܸܒܼܥܸܐ ܒܥܵܬܼܵܐ ܕܲܥܠܵܘܗܝ 12 ܕܡ̇ܐ ܕܲܒܼܥܹܝܬܹܗ ܐܸܕܲܥ ܘܐܵܘܕܲܥ ܠܲܕܒܼܵܥܹ̇ܝܢ ܠܹܗ ܀ 13 :ܒܗܵܬܹܗ ܫܚܲܩ̣ܬܲܢܝ ܐܲܝܟ ܕܲܠܟܲܦܢܵܐ ܒܪܸܓܲܬܼ ܠܲܚܡܵܐ 14 ܘܡܸܬܼܝܲܐܲܒܼܢܵܐ ܕܐܸܡܠܸܐ ܪܸܥܝܵܢܝ ܡ̣ܢ ܦܲܪ̈ܟܿܘܼܟܼܵܘܗܝ ܀ 15 :ܫܘܼܦܪܹܗ ܓܲܪܓܼܢܝ ܕܐܸܩܪܘܿܒܼ ܨܹܐܕܼܵܘܗܝ ܘܐܸܬܼܒܲܩܸܐ ܒܹܗ 16 ܕܛܵܟ ܬܸܫܦܲܪ ܒܹܗ ܣܲܢܝܘܼܬܼ ܡܸܠܲܬܼܝ ܡܲܠܝܲܬܼ ܚܲܫܹ̈ܐ ܀ 17 :ܒܡܸܠܹ̈ܐ ܕܲܥܠܵܘܗܝ ܪܓܼܝܓܼ ܐ̄ܢܵܐ ܕܐܸܗܘܸܐ ܚܲܒܼܪܵܐ ܒܫܘܼܦܪܹܗ 18 ܘܲܡܛܲܝܲܒܼ ܐ̄ܢܵܐ ܕܐܲܝܬܸܿܐ ܠܓܸܠܝܵܐ ܪܸܓܲܬܼ ܪܸܥܝܵܢܝ ܀ 19 :ܪܸܓܿܬܹܗ ܕܥܵܠܠܡܵܐ ܫܚܲܩܬܹܗ ܠܪܸܥܝܵܢܝ ܠܒܲܪ ܡ̣ܢ ܛܲܟܼܣܵܐ 20 ܘܗܵܐ ܥܵܨ̇ܝܵܐ ܠܝܼ ܕܐܵܘܠܸܕܼ ܡܸܠܹ̈ܐ ܒܲܕܼܡܘܼܬܼ ܘܥܸܠܹ̈ܐ ܀ 21 :ܐܲܝܟ ܝܵܠܹܕܿܬܵܐ ܡܚܲܒܸܿܠ ܡܲܕܲܥܝ ܒܥܸܠܬܼܵܐ ܕܲܥܠܵܘܗܝ 22 ܕܐܸܡܲܬܼܝ ܢܵܘܠܸܕܼ ܥܘܼܠܹ̈ܐ ܕܡܹܐܡܪܵܐ ܩܕܼܵܡ ܫܵܡܘܿܥܹ̈ܐ ܀ 23 :ܥܸܠܲܬܼ ܥܵܠܡܵܐ ܐܝܼܬܹܝܗ̇ ܥܸܠܬܼܵܐ ܕܝܸܠܕܲܬ̤ ܬܲܪܥܝܼܬܼܝ 24 ܘܡܲܢ̣ܘ ܡܙܝܼܥ ܠܹܗ ܘܡܫܲܚܠܸܦ ܠܹܗ ܟܲܕܼ ܗܘ̤ ܚܲܪܫܵܐ ܗ̄ܘ̣ ܀ 25 :ܡܲܢ̣ܘܼ ܡܫܲܚܠܸܦ ܩܲܝܛܵܐ ܠܣܲܬܼܘܵܐ ܘܣܲܬܼܘܵܐ ܠܩܲܝܛܵܐ 26 ܘܡܲܢ̣ܘܼ ܡܲܗܦܸܟ ܩܲܪܝܼܪܘܼܬܹܗ ܠܚܲܡܝܼܡܘܼܬܼܵܐ ܀ 27 :ܡܲܢ ܡܲܕܼܢܲܚ ܠܹܗ ܠܐܸܣܦܹܝܪ ܫܸܡܫܵܐ ܒܥܸܕܵܢ ܨܲܦܪܵܐ 28 ܘܡܲܢ̣ܘܼ ܡܛܲܫܸܐ ܦܲܐܝܘܼܬܼ ܢܘܼܗܪܹܗ ܒܥܸܕܵܢ ܪܲܡܫܵܐ ܀ 29 :ܡܲܢ ܡܲܪܗܸܛ ܠܹܗ ܒܐܲܦܲܝ̈ ܪܵܘܡ̇ܐ ܩܲܠܝܼܠܵܐܝܼܬܼ 30 ܘܡܲܢ ܐܲܚܝܼܕܼ ܠܹܗ ܕܠܵܐ ܢܸܬܼܪܲܦܸܐ ܘܢܸܦܸܠ ܒܐܲܪܥܵܐ ܀ 31 :ܡܲܢ ܥܵܒܹ̇ܕܼ ܠܹܗ ܠܣܲܗܪܵܐ ܙܥܘܿܪܵܐ ܒܲܪ ܚܲܕܼ ܝܵܘܡ̇ܐ 32 ܘܡܲܢ ܡܲܣܸܩ ܠܹܗ ܒܸܦܠܠܓܿܘܼܬܼ ܝܲܪܚܵܐ ܠܲܥܠܲܝܡܘܼܬܼܵܐ ܀ 33 :ܡܲܢ ܡܲܪܡܸܐ ܒܵܗ̇ ܒܫܲܬܿܝܼܩܘܼܬܹܗ ܦܓܼܘܼ̈ܕܹܐ ܕܛܲܟܼܣܵܐ 34 ܕܠܵܐ ܢܸܬܿܕܵܘܲܕ ܛܲܟܼܣܵܐ ܪܲܒܵܐ ܕܠܹܠܲܝ ܐܝܼܡܵܩ ܀ 35 :ܡܲܢ̣ܘܼ ܡܲܪܗܸܛ ܟܵܘܟܿܒܹ̈ܐ ܒܛܲܟܼܣܵܐ ܚܲܕܼ ܒܵܬܲܪ ܚܲܕܼ 36 ܘܲܡܚܵܘܸܐ ܠܗܘܿܢ ܫܒܼܝܼܠ ܡܲܪܕܲܝܼܬܼܵܐ ܕܠܵܐ ܡܸܬܼܦܲܣܩܵܐ ܀ 37 :ܡܢ̣ܘܼ ܡܙܝܼܥ ܠܹܗ ܠܐܵܐܲܪ ܚܲܪܫܵܐ ܠܘܵܬܼ ܬܸܫܡܸܫܬܲܢ 38 ܘܡܲܢ ܡܲܩܩܥܸܐ ܠܵܗ̇ ܠܫܲܬܿܝܼܩܘܼܬܹܗ ܩܵܠܹ̈ܐ ܓܫܝܼܡܹ̈ܐ ܀ 39 :ܡܲܢ̣ܘܼ ܡܩܲܫܸܐ ܘܲܡܥܲܒܸܿܐ ܠܵܗ̇ ܠܩܲܛܝܼܢܘܼܬܹܗ 40 ܘܡܲܢ ܡܲܛܥܸܢ ܠܹܗ ܫܸܦܥܹ̈ܐ ܕܡܲܝ̈ܵܐ ܘܪܵܐܹ̇ܣ ܒܐܲܪܥܵܐ ܀ 41 :ܡܲܢ̣ܘܼ ܡܪܝܼܡ ܠܹܗ ܐܲܝܟ ܕܲܠܫܲܒܼܛܵܐ ܠܥܸܠ ܡ̣ܢ ܝܲܡܵܐ 42 ܘܲܡܬܲܚܬܸܿܐ ܠܹܗ ܠܝܲܨܪܹܗ ܪܲܓܼܝܵܐ ܒܝܲܕܼ ܥܲܠܥܵܠܵܘ̈ܗܝ ܀ 43 :ܡܲܢ̣ܘܼ ܡܫܲܠܸܐ ܠܲܟܼܬܼܝܼܫܘܼܬܹܗ ܡ̇ܐ ܕܡܸܬܼܒܲܥܪܲܪ 44 ܘܡܢ̣ܘܼ ܦܵܢܹ̇ܐ ܘܲܡܒܲܥܪܲܪ ܠܹܗ ܡ̇ܐ ܕܡܸܫܬܲܝܲܢ ܀ 45 :ܐܲܝܟܵܐ ܕܐܝܼܬܼܵܘܗܝ ܡܲܫܒܹܗ ܩܲܫܝܵܐ ܡ̇ܐ ܕܠܵܐ ܢܵܫܹ̇ܒܼ 46 ܘܡ̣ܢ ܐܲܝܡܸܟܵܐ ܐܵܬܹ̇ܐ ܡܸܢܫܹܠܝ ܒܚܹܐܦܵܐ ܩܲܫܝܵܐ ܀ pb. 224 47 :ܡܲܢ̣ܘܼ ܡܲܣܸܦ ܢܘܼܪܵܐ ܕܒܲܪ̈ܩܹܐ ܡ̣ܢ ܪܲܥܕܲܘܼܬܹܗ 48 ܘܡܲܢ̣ܘܼ ܕܡܲܫܡܲܥ ܩܵܠܹ̈ܐ ܕܪ̈ܲܥܡܹܐ ܡ̣ܢ ܫܲܠܝܘܼܬܹܗ ܀ 49 :ܡܲܢ̣ܘܼ ܡܡܲܙܸܓܼ ܩܲܪܝܼܪܘܼܬܹܗ ܒܚܲܡܝܼܡܘܼܬܼܵܐ 50 ܕܢܸܗܘܸܐ ܫܸܩܝܵܐ ܕܡܸܢܹܗ ܠܦܹܐܪܹ̈ܐ ܕܐܲܪܥܵܐ ܀ 51 :ܡܲܢ ܢܵܛܲ̇ܪ ܠܹܗ ܡ̇ܐ ܕܡܸܬܼܚܲܠܲܛ ܒܓܼܘܼܫܡܹ̈ܐ ܥܒܲܝܵ̈ܐ 52 ܕܠܵܐ ܢܸܬܿܛܲܠܲܩ ܡ̣ܢ ܐܸܣܛܘܼܟܼܣܹ̈ܐ ܕܢܘܼܟܼܪܵܝܝܼܢ ܠܹܗ ܀ 53 :ܗܵܠܹܝܢ ܥܲܒܼܕܿܘܼܢܝ ܕܐܸܒܼܥܸܐ ܕܫܘܼܚܠܵܦܲܝ̈ܗܘܿܢ 54 ܕܕܝܼܠܗܘܿܢ ܐܝܼܬܼܵܘܗܝ ܚܹܝܠ ܫܘܼܚܠܵܦܵܐ ܐܵܘ ܕܲܐ̄ܚܪ̈ܵܢܹܐ ܀ 55 :ܗܸܢܘ̣ܿܢ ܚܲܪ̈ܫܹܐ ܩܢܹܝܢ ܗ̄ܘ̣ܵܘ ܡܸܠܬܼܵܐ ܒܲܟܼܝܵܢܲܝ̈ܗܘܿܢ 56 ܐܵܘ ܕܲܠܡܵܐ ܟܲܝ ܡܠܝܼܠܹ̈ܐ ܡܙܝܼܥܝܼܢ ܠܲܕܼܠܵܐ ܡܸܠܬܼܵܐ ܀ 57 :ܩܲܢ̈ܝܲܝ ܡܸܠܬܼܵܐ ܩܢܹܝܢ ܟܲܝ ܚܲܝܠܵܐ ܠܡܸܣܥܲܪ ܗܵܕܹܐ 58 ܐܵܘ ܕܲܠܡܵܐ ܬܘܼܒܼ ܒܚܹܝܠ ܒܵܪܘܿܝܵܐ ܡܨܹܝܢ ܡܸܬܼܚܲܝܠܝܼܢ ܀ 59 :ܪܸܢܝܵܐ ܕܗܵܠܹܝܢ ܐܲܪܡܝܼ ܒܪܸܥܝܵܢܝ ܪܸܥܝܵܐ ܕܗܵܠܹܝܢ 60 ܘܲܪܢܹ̇ܝܬܼ ܕܚܲܕܼ ܗ̄ܘ̣ ܣܵܥܲ̇݁ܪ ܗܵܠܹܝܢ ܒܚܹܝܠ ܨܸܒܼܝܵܢܹܗ ܀ 61 :ܚܲܕܼܘܼ ܚܲܝܠܵܐ ܕܣܵܥܲ݁ܪ ܚܚܲܝܠܹܗ ܒܝܲܕܼ ܪ̈ܘܼܚܵܢܹܐ 62 ܘܗܘ̤ܝܘܼ ܡܛܲܟܸܿܣ ܠܲܥܒܼܵܕܼ݁ ܐܝܼܕܼܵܘ̈ܗܝ ܒܲܥܒܼܵܕܼ̇ ܐܝܼܕܼܵܘ̈ܗܝ ܀ 63 :ܒܝܲܕܼ ܡܲܠܵܠܹ̈ܐ ܡܙܝܼܥ ܠܲܟܼܝܵܢܹ̈ܐ ܠܵܐ ܪ̈ܵܓܼܘܿܫܹܐ 64 ܘܲܒܼܪ̈ܘܼܚܵܢܹܐ ܓܵܡܲ݁ܪ ܚܘܼܒܹܿܗ ܨܹܝܕܼ ܒܸܪ̈ܝܵܬܼܵܐ ܀ 65 :ܠܲܡܠܝܼܠܘܼܬܼܗܘܿܢ ܐܲܓܼܥܸܠ ܥܵܠܡܵܐ ܡ̣ܢ ܫܘܼܪܵܝܵܐ 66 ܢܸܗܘܘܿܢ ܢܵܛ̇ܪܝܼܢ ܫܘܼܚܠܵܦ ܙܲܒܼܢܹ̈ܐ ܕܠܵܐ ܕܘܼܘܵܕܼܵܐ ܀ 67 :ܠܗܘܿܢ ܠܡܲܠܲܐܟܹ̈ܐ ܥܒ݂ܲܕܼ ܓܹܐܙܲܒܼܪܹ̈ܐ ܕܒܲܣܝܼܡܘܼܬܹܗ 68 ܕܲܢܦܲܠܓܼܘܼܢܵܝܗܝ ܠܓܲܙܵܐ ܕܪ̈ܲܚܡܵܘܗܝ ܠܐܲܪ̈ܥܵܢܵܝܹܐ ܀ 69 :ܠܗܘܿܢ ܗ̄ܘ̣ ܐܲܩܝܼܡ ܐܲܦܸܛܪ̈ܘܿܦܹܐ ܥܲܠ ܬܸܫܡܸܫܬܹܿܗ 70 ܕܢܸܗܘܘܿܢ ܝܵܗ̇ܒܿܝܼܢ ܦܵܪܣܵܐ ܒܙܲܒܼܢܹܗ ܠܲܒܼܢܲܝ̈ ܒܲܝܬܹܿܗ ܀ 71 :ܠܗܘܿܢ ܗ̄ܘ̣ ܝܗ̣̄ܒܹܿܗ ܥܵܠܡܵܐ ܫܲܒܼܪܵܐ ܐܲܝܟ ܕܲܠܪܲܒܵܐ 72 ܕܲܢܚܲܟܿܡܘܼܢܵܝܗܝ ܡ̣ܢ ܫܲܒܼܪܘܼܬܼܵܐ ܠܲܓܼܡܝܼܪܘܼܬܼܵܐ ܀ 73 :ܠܪܲܒܵܢܘܼܬܼܗܘܿܢ ܐܲܫܠܸܡ ܪܲܗܛܵܐ ܕܩܲܠܝܼܠܘܼܬܹܗ 74 ܕܲܢܛܲܟܿܣܘܼܢܵܝܗܝ ܡ̣ܢ ܣܘܼܥܪ̈ܵܢܹܐ ܕܙܲܠܝܼܠܘܼܬܼܵܐ ܀ 75 :ܦܹܕܵܓܼܘܿܓܹ̈ܐ ܗܵܘܢܵܐ ܥܒ݂ܲܕܼ ܠܹܗ ܠܣܲܟܼܠܵܐ 76 ܕܠܵܐ ܢܸܬܿܐܠܘܼܢ ܠܹܗ ܠܲܡܗܲܠܵܟܼܘܼ ܐܲܝܟ ܨܸܒܼܝܵܢܹܗ ܀ pb. 225 77 :ܣܟܲܠ ܗ̄ܘ̣ܵܐ ܣܲܓܿܝܼ ܡ̣ܢ ܒܘܝܵܢܵܐ ܐܲܟܼܡܵܐ ܕܲܣܟܲܠ 78 ܥܲܠ ܗܵܝ̇ ܐܲܩܝܼܡ ܥܪ݁ܝܼܡܲܝ ܗܵܢܘܵܐ ܥܲܠ ܬܸܫܡܸܫܬܹܿܗ ܀ 79 :ܠܫܘܼܠܛܵܢܲܝ̈ܗܘܿܢ ܐܲܓܼܥܸܠ ܥܘܼܬܼܪܵܐ ܕܚܵ̇ܫܲܚ ܗ̄ܘ̣ܵܐ ܠܹܗ 80 ܕܢܸܗܘܘܿܢ ܝܵܨ̇ܦܝܼܢ ܕܲܣܢܝܼܩܘܼܬܹܗ ܝܵܘܡ̇ܐ ܒܝܵܘܡ̇ܐ ܀ 81 :ܐܵܣܘܿܛܵܐܝܼܬܼ ܪܓܼܝܼܓܼ ܗ̄ܘ̣ܵܐ ܝܲܥܢܵܐ ܕܢܹܐܟܼܘܿܠ ܘܲܢܗܘܼܬܼ 82 ܘܣܵܡ̣ܹܗ ܠܐܘܼܟܼܠܵܐ ܒܐܝܼܕܼܵܐ ܕܬܲܩܢܹ̈ܐ ܕܲܢܦܲܪܣܘܼܢܵܝܗܝ ܀ 83 :ܒܐܝܼܕܼܵܐ ܕܬܲܩܢܹ̈ܐ ܨܒܼܵܐ̣ ܕܲܢܛܲܟܸܿܣ ܠܐܵܣܘܿܛܘܼܬܹܗ 84 ܕܠܵܐ ܡ̇ܐ ܕܐܵܟܹ̇ܠ ܐܵܣܘܿܛܵܐܝܼܬܼ ܢܡܘܼܬܼ ܒܝܼܫܵܐܝܼܬܼ ܀ 85 :ܚܲܟܿܝܼܡ ܛܵܒܼܵܐ ܡ̇ܪܹܗ ܕܥܵܠܡܵܐ ܒܲܥܪܝܼܪܵܝܵܐ 86 ܘܚܲܟܿܝܼܡܵܐܝܼܬܼ ܚܲܟܿܡܹܗ ܒܡܸܠܬܼܵܐ ܕܲܒܼܡܠܵܠܹ̈ܐ ܀ 87 :ܡܠܝܼܠܹ̈ܐ ܐܲܩܝܼܡ ܥܲܠ ܬܸܫܡܸܫܬܹܿܗ ܕܠܵܐ ܡܲܠܵܠܐ 88 ܕܲܢܚܲܟܿܡܘܼܢܵܗ̇ ܠܲܒܼܪܝܼܪܘܼܬܹܗ ܒܲܥܪܝܼܡܘܼܬܼܗܘܿܢ ܀ 89 :ܒܗܘܿܢ ܒܲܡܠܝܼܠܹ̈ܐ ܡܕܲܒܲܪ ܟܠܵܐ ܡܲܬܼܩܸܢ ܟܠܵܐ 90 ܘܠܲܝܬܿ ܒܲܥܒܼܝܼ̈ܕܹܐ ܕܠܵܘ ܒܐܝܼ̈ܕܲܝܗܘܿܢ ܡܲܫܠܲܡ ܪܲܗܛܹܗ ܀ 91 :ܠܗܘܿܢ ܗ̄ܘ̣ ܡܲܫܠܲܡ ܪܲܗܛܵܐ ܕܚܲܪ̈ܫܹܐ ܘܲܕܡܲܠܵܠܹ̈ܐ 92 ܘܐܲܝܟ ܡܸܠܲܬܼܗܘܿܢ ܡܬܲܪܓܸܿܡ ܟܲܣܝܵܐ ܥܲܡ ܬܘܼܩܵܢܵܘ̈ܗܝ ܀ 93 :ܒܡܸܨܥܵܝܘܼܬܼܗܘܿܢ ܡܚܵܘܸܐ ܚܘܼܒܹܿܗ ܐܵܦ ܠܘܼܚܵܡܹܗ 94 ܘܝܵܗܹ̇ܒܼ ܛܘܼܒܹ̈ܐ ܘܡܲܣܪܲܚ ܢܸܓܼ̈ܕܹܿܐ ܠܡܸܬܼܢܲܓܿܕܵܢܹ̈ܐ ܀ 95 :ܒܐܝܼܙܓܲܕܿܘܼܬܼܗܘܿܢ ܣܵܥܲ̄݁ܪ ܟܠܵܐ ܗܘ̤ ܡ̇ܪܹܟܿܠ 96 ܘܓܼܵܒܹ̇ܐ ܘܡܲܣܠܸܐ ܐܲܟܼܡܵܐ ܕܲܚܙܸܐ ܠܪܸܡܙܹܗ ܡܸܡܬܼܘܿܡ ܀ 97 :ܠܗܘܿܢ ܗ̄ܘ̣ ܡܫܲܕܵܪ ܒܐܝܼܙܓܲܕܿܘܼܬܼܵܐ ܠܘܵܬܼ ܐܲܪ̈ܥܵܢܹܐ 98 ܘܗܸܢܘ̣ܿܢ ܦܵܢܹ̇ܝܢ ܘܲܡܚܵܘܹܝܢ ܠܹܗ ܐܲܟܼܡܵܐ ܕܝܵ̇ܕܲܥ ܀ 99 :ܡܸܢܗܘܿܢ ܬܵܒܲܥ̇ ܡܸܢܝܵܢ ܐ̄ܢܵܫܵܐ ܘܫܘܼܚܠܵܦ ܙܲܒܼܢܹ̈ܐ 100 ܘܲܚܦܝܼܛܝܼܢ ܛܵܒܼ ܠܡܸܛܲܪ ܛܲܟܼܣܵܐ ܕܡܝܼܡ ܒܐܝܼܕܲܝ̈ܘܗܘܿܢ ܀ 101 :ܒܗܘܿܢ ܗ̄ܘ̣ ܣܵܥܲ݁ܪ ܣܵܥܘܿܪܘܼܬܼܵܐ ܕܣܵܥܘܿܪܘܼܬܹܗ 102 ܘܒܲܙܒܲܢ ܪܵܕܹܐ ܘܒܲܙܒܲܢ ܩܵܢܹ̇ܐ ܐܲܝܟ ܕܲܢܥܲܕܲܪ ܀ 103 :ܒܗܘܿܢ ܗ̄ܘ̣ ܦܵܪܹܩ ܠܪ̈ܵܚܡܲܝ ܚܘܼܒܹܿܗ ܡ̇ܐ ܕܡܸܢܼܐܲܠܨܝܼܢ 104 ܘܲܒܼܗܘܿܢ ܪܵܕܹܐ ܠܲܡܒܲܣܪ̈ܵܢܹܐ ܡ̇ܐ ܕܡܸܫܬܲܥܠܹܝܢ ܀ 105 :ܒܗܘܿܢ ܗ̄ܘ̣ ܡܕܲܒܲܪ ܫܘܼܠܛܵܢ ܡܲܠ̈ܟܹܿܐ ܘܦܘܼܠܵܓܼ ܥܲܡܡܹ̈ܐ 106 ܘܒܲܚܠܝܼܨܘܼܬܗܘܿܢ ܣܵܕܲ̇ܪ ܩܹܐܪ̈ܣܹܐ ܘܡܲܥܒܲܪ ܩܹܐܪ̈ܣܹܐ ܀ 107 :ܐܲܝܟ ܗܸܢܝܘܿܟܼܵܐ ܪܟܼܝܼܒܼ ܦܘܼܩܕܵܢܹܗ ܥܲܠ ܙܵܘܥܲܝ̈ܗܘܿܢ 108 ܘܒܲܕܼܡܘܼܬܼ ܪ̈ܲܟܼܫܵܐ ܟܕܼܝܝܼܢܝܼܢ ܗܸܢܘ̣ܿܢ ܘܦܵܪܚܝܼܢ ܒܐܵܐܲܪ ܀ 109 :ܐܹܝܘ ܡܲܪܟܲܒܼܬܼܵܐ ܪܘܼܚܵܢܵܝܬܼܵܐ ܕܐܲܠܵܗ ܟܠܵܐ 110 ܕܲܟܼܕܼܝܼܢܝܼܢ ܒܵܗ̇ ܪ̈ܲܟܼܫܵܐ ܕܪܘܼܚܵܐ ܒܥܲܪ̈ܩܹܐ ܕܪܘܼܚܵܐ ܀ 111 ܐܹܝܘ ܗܸܢܝܘܿܟܼܵܐ ܕܐܲܚܝܼܕܼ ܥܵܠܡܵܐ ܠܵܐ ܒܐܝܼ̈ܕܲܝܵܐ: pb. 226 112 ܕܡܲܪܗܸܛ ܟܸܢܫܹ̈ܐ ܕܲܡܫܲܝܵܢܹ̈ܐ ܒܐܲܦܲܝ̈ ܪܵܘܡ̇ܐ ܀ 113 :ܐܹܝܘ ܩܵܪܘܿܟܼܵܐ ܕܪܵܡ ܪܘܼܟܵܒܹܗ ܡ̣ܢ ܪܘܼܟܵܒܼܵܐ 114 ܕܡܲܪܗܸܛ ܪܲܗܛܵܐ ܕܠܵܐ ܗܲܕܵܡܹ̈ܐ ܡܸܬܼܚܲܙܝܵܢܹ̈ܐ ܀ 115 :ܡܡܲܢ̣ܘܼ ܡܸܡܬܼܘܿܡ ܪܟܸܒܼ ܥܲܠ ܡܸܕܹܿܡ ܕܠܵܐ ܡܸܬܼܪܟܸܒܼ 116 ܘܲܟܼܕܼܝܼܢ ܬܚܘܿܬܼܵܘܗܝ ܟܝܵܢܵܐ ܕܠܵܐ ܟܕܼܝܼܢ ܬܲܚܬܲܝ ܪܸ̈ܓܼܫܹܐ ܀ 117 :ܡܲܢ ܠܵܐ ܢܸܬܼܗܲܪ ܒܪܲܗܛܵܐ ܪܲܒܵܐ ܕܛܵܘܪܵܐ ܪܲܒܵܐ 118 ܕܗܵܐ ܒܨܝܼܪ ܩܲܠܝܼܠ ܐܲܠܦܹ̈ܐ ܐܸܫܬܵܐ ܕܚܲܕܼ ܗ̄ܘ̣ ܪܲܗܛܹܗ ܀ 119 :ܡܲܢ ܠܵܐ ܢܹܐܡܲܪ ܕܗܵܘ̇ ܕܲܒܼܪܵܐ ܟܠ ܗܘ̤ ܡܲܪܗܸܛ ܠܹܗ 120 ܘܚܲܝܠܹܗ ܡܚܲܝܸܠ ܠܲܡܚܝܼܠܘܼܬܼܵܐ ܕܲܥܒܼܵܕܼ ܐܝܼܕܼܵܘ̈ܗܝ ܀ 121 :ܚܲܝܠܹܗ ܡܲܪܛܗܸܛ ܠܲܫܡܲܝܵܢܹ̈ܐ ܬܚܹܝܬܼ ܦܘܼܩܕܵܢܹܗ 122 ܘܒܹܗ ܒܦܘܼܩܕܵܢܹܗ ܡܲܪܗܸܛ ܥܵܠܡܵܐ ܬܚܹܝܬܼ ܫܲܡܵܫܵܘ̈ܗܝ ܀ 123 :ܐܘܿ ܠܬܼܕܼܡܘܼܪܬܵܐ ܕܲܒܼܬܼܕܡܘܼܪܬܵܐ ܥܦܝܼܲܬܼ ܬܲܗܪܵܐ 124 ܕܲܟܼܕܼܝܼܢ ܥܵܠܡܵܐ ܬܚܹܝܬܼ ܒܵܪܘܿܝܵܐ ܘܲܟܼܢܵܘܵܬܹ̈ܐ ܀ 125 :ܟܕܼܝܼܢܝܼܢ ܥܝܼܪܹ̈ܐ ܬܚܹܝܬܼ ܗܵܘ̇ ܪܸܡܙܵܐ ܕܐܲܬܼܩܸܢ ܐܸܢܘܿܢ 126 ܘܲܟܼܕܼܝܼܢ ܥܵܠܡܵܬ ܬܚܹܝܬܼ ܫܘܼܠܛܵܢܵܐ ܕܐܲܫܠܸܛ ܐܸܢܘܿܢ ܀ 127 :ܒܢܝܼܪܵܐ ܕܚܘܼܒܹܿܗ ܟܕܼܝܼܢܵܐ ܒܪܝܼܬܼܵܐ ܬܚܹܝܬܼ ܪ̈ܘܼܚܵܢܹܐ 128 ܘܫܘܼܠܛܵܢܲܝ̈ܗܘܿܢ ܠܥܸܠ ܡ̣ܢ ܚܲܨܵܗ̇ ܐܲܝܟ ܗܸܢܝܘܿܟܼܵܐ ܀ 129 :ܒܥܲܪ̈ܩܹܐ ܕܪܘܼܚܵܐ ܠܒܼܝܼܟܼܝܼܢ ܠܐܵܐܲܪ ܠܵܐ ܡܓܼܫܲܡܬܵܐ 130 ܘܲܡܕܲܒܿܪܝܼܢ ܠܵܗ̇ ܐܲܝܟ ܨܸܒܼܝܵܢܵܐ ܕܡܲܕܲܒܲܪ ܟܠ ܀ 131 :ܟܠ ܥܲܡ ܟܠܵܐ ܟܕܼܝܼܢ ܘܲܡܫܲܥܒܲܕܼ ܠܫܘܼܠܛܵܢܲܝ̈ܗܘܿܢ 132 :ܘܥܲܡ ܟܠ ܪܵܗ̇ܛܝܼܢ ܘܲܠܟܼܠ ܢܵܛ̇ܪܝܼܢ ܕܠܵܐ ܢܸܟܼܝܵܢܹ̈ܐ 133 :ܒܲܡ̈ܢܵܘܵܬܼܵܐ ܕܫܘܼܛܵܢܲܝ̈ܗܘܿܢ ܦܲܠܓܹܗ ܠܥܵܠܡܵܐ 134 ܘܟܼܚܲܕܼ ܡܸܢܗܘܿܢ ܙܗܝܼܪ ܒܲܥܒܼܵܕܲ݁ܐ ܕܡܲܓܼܥܲܠ ܒܐܝܼܕܼܵܘ̈ܗܝ ܀ 135 :ܐܝܼܬܼ ܕܲܠܫܸܡܫܵܐ ܠܒܼܝܼܟ ܒܐܝܝܼ̈ܕܲܝܵܐ ܕܠܵܐ ܪܘܼܟܵܒܼܵܐ 136 ܘܲܡܚܵܘܸܐ ܠܹܗ ܫܒܼܝܼܠ ܡܲܪܕܲܝܼܬܼܵܬ ܕܠܵܐ ܕܘܼܪ̈ܟܵܬܼܵܐ ܀ 137 :ܥܲܡܹܗ ܕܚܲܪܫܵܐ ܪܵܗܹ̇ܛ ܥܝܼܪܵܐ ܩܲܠܝܼܠܵܐܝܼܬܼ 138 ܘܲܡܛܲܟܸܿܣ ܠܹܗ ܕܠܵܐ ܢܸܬܿܕܵܘܲܕܼ ܫܒܼܝܼܠ ܡܲܪܕܿܝܼܬܹܗ ܀ 139 :ܥܲܡ ܫܲܪܝܘܼܬܹܗ ܐܲܡܝܼܢ ܦܵܪܲܚ ܩܲܠܝܼܠ ܗܵܘܢܵܐ 140 ܘܲܡܣܲܝܸܟ ܠܹܗ ܠܚܘܼܕܼܪܵܐ ܕܐܲܪܥܵܐ ܠܹܠܲܝ ܐܝܼܡܵܡ ܀ 141 :ܐܝܼܬܼ ܕܲܠܣܲܗܪܵܐ ܛܥܝܼܢ ܥܲܠ ܟܲܬܼܦܹܗ ܠܵܐ ܡܓܲܫܲܡܬܵܐ 142 ܘܲܡܕܲܒܲܪ ܠܹܗ ܒܝܲܕܼ ܫܘܼܠܵܦܹ̈ܐ ܐܲܝܟ ܕܲܠܫܲܒܼܪܵܐ ܀ 143 :ܒܗܵܘܢܵܐ ܛܥܝܼܢ ܠܹܗ ܡܗܵܘܸܐ ܠܠܵܐ ܦܵܪܘܿܫܵܐ 144 ܘܲܡܕܲܒܲܪ ܠܹܗ ܕܠܵܐ ܢܸܬܿܕܲܒܲܪ ܒܲܥܪܝܼܪܵܐܝܼܬܼ ܀ 145 :ܛܲܟܼܣܹ̈ܐ ܘܕܲܪ̈ܓܹܐ ܣܵܐܹ̇ܡ ܩܘܼܡ̇ܘܗܝ ܐܲܝܟ ܝܵܠܘܿܦܵܐ 146 ܕܢܸܗܘܸܐ ܝܵ̇ܕܲܥ ܕܲܟܼܡܵܐ ܘܲܟܼܡܵܐ ܢܵܚܹ̇ܬܼ ܘܣܵܠܹ̇ܩ ܀ 147 :ܐܝܼܬܼ ܕܲܠܨܡܚܵܐ ܕܟܼܵܘܟܿܒܹ̈ܐ ܠܒܼܝܼܟܼܝܼܢ ܐܲܝܟ ܠܲܡܦܹܝܕܹ̈ܐ 148 ܘܲܒܼܨܸܡܚܲܝ̈ܗܘܿܢ ܪܵܕܹܦܝܼܢ ܚܸܫܟܵܐ ܕܠܲܝܝ̈ܠܵܘܵܬܼܵܐ ܀ pb. 227 149 :ܐܘܼܪܚܵܐ ܫܘܝܼܬܼܵܐ ܡܫܵܘܹܝܢ ܒܐܵܐܲܪ ܡܠܝܼܠܹ̈ܐ ܠܚܲܪ̈ܫܹܐ 150 ܘܐܲܡܝܼܢܝܼܢ ܒܵܗ̇ ܘܠܵܐ ܡܸܬܼܪܲܦܹܝܢ ܡ̣ܢ ܡܲܪܕܲܝܼܬܼܵܗ̇ ܀ 151 :ܣܸܕܼܪ̈ܝܼܢ ܣܸܕܼܪ̈ܝܼܢ ܪܵܕܹܝܢ ܒܐܘܼܚܵܐ ܠܵܐ ܪ̈ܵܓܼܘܿܫܹܐ 152 ܘܲܫܡܲܝܵܢܹ̈ܐ ܒܪܹܫ ܣܸܕܼܪ̈ܲܝܗܘܿܢ ܐܲܝܟ ܗܲܕܿܝܼ̈ܠܹܐ ܀ 153 :ܠܡܲܫܪܝܼܬܼ ܡܲܠܟܵܐ ܕܵܡܹ̇ܝܢ ܛܲܟܼܣܹ̈ܐ ܘܛܘܼܟܵܣܲܝ̈ܗܘܿܢ 154 ܘܪ̈ܘܼܚܵܢܵܝܹܐ ܪ̈ܲܒܲܝ ܚܲܝܠܹ̈ܐ ܕܠܵܐ ܡܸܣܬܲܝܟܼܘܼܢ ܀ 155 :ܐܝܼܬܼ ܕܥܲܠ ܐܵܐܲܪ ܡܸܬܿܬܿܙܝܼܥܵܢܵܐ ܦܩܝܼܕܼܝܼܢ ܠܲܡܩܵܡ 156 ܘܲܡܙܲܝܥܝܼܢ ܠܹܗ ܒܙܵܘܥܹ̈ܐ ܟܣܲܝܵ̈ܐ ܕܪܸ̈ܥܝܵܢܲܝܗܘܿܢ ܀ 157 :ܒܙܵܘܥܵܐ ܡܙܝܼܥܝܼܢ ܠܵܐ ܦܲܓܼܪ̈ܵܢܹܐ ܠܠܵܐ ܦܲܓܼܪܵܢܵܐ 158 ܘܲܡܪܲܟܿܒܼܝܼܢ ܠܹܗ ܟܲܕܼ ܗܘ̤ ܟܝܵܢܹܗ ܕܠܵܐ ܪܘܼܟܵܒܼܵܐ ܗ̄ܘ̣ ܀ 159 :ܠܵܐ ܓܘܼܫܡܵܢܹ̈ܐ ܡܸܬܿܬܲܠܹܝܢ ܒܹܗ ܒܠܵܐ ܓܘܼܫܡܵܢܵܐ 160 ܘܲܡܬܲܠܚܝܼܢ ܠܹܗ ܒܲܡ̈ܢܵܘܵܬܼܵܐ ܠܲܝܟ ܕܠܲܓܼܫܝܝܼܡܵܐ ܀ 161 :ܡ̣ܢ ܠܵܐ ܓܫܝܼܡܵܐ ܥܵܒܼ̇ܕܿܝܼܢ ܓܘܼܫܡܵܐ ܠܵܐ ܓܘܼܫܡܵܢܹ̈ܐ 162 ܕܒܲܓܼܫܝܼܡܘܼܬܹܗ ܢܸܛܥܲܢ ܓܘܼܫܡܵܐ ܕܡܲܝ̈ܵܐ ܓܫܝܼܡܹ̈ܐ ܀ 163 :ܢܲܚ̈ܬܹܿܐ ܠܒܼܝܼܕܹ̈ܐ ܙܵܩ̇ܪܝܼܢ ܡܸܢܵܗ̇ ܕܩܲܛܝܼܢܘܼܬܹܗ 164 ܕܒܲܠܒܼܝܼܕܼܘܼܬܼܗܘܿܢ ܢܹܐܚܕܿܘܼܢ ܡܲܝ̈ܵܐ ܡܸܢܼܐܲܫܕܵܢܹ̈ܐ ܀ 165 :ܥܢܵܢܹ̈ܐ ܦܵܪܣܝܼܢ ܒܡܸܨܥܲܬܼ ܚܘܼܕܼܪܵܐ ܕܪܵܘܡ̇ܐ ܘܥܘܼܡܩܵܐ 166 ܘܲܠܥܸܠ ܡܸܢܗܹܝܢ ܟܵܫܹ̇ܝܢ ܡܲܝ̈ܵܐ ܐܲܝܟ ܬܲܛܠܝܵܠܵܐ ܀ 167 :ܒܡܲܝ̈ܵܐ ܘܪܘܼܚܵܐ ܡܛܲܠܠܝܼܢ ܒܲܝܬܵܐ ܕܣܘܼܢܩܩܵܢ ܚܲܝܲܝ̈ܢ 168 ܘܡ̣ܢ ܬܲܛܠܝܼܠܹܗ ܡܲܚܬܝܼܢ ܡܲܝ̈ܵܐ ܘܪܵܣܝܼܢ ܒܐܲܪܥܵܐ ܀ 169 :ܐܝܼܬܼ ܕܲܠܪ݁ܲܥܡܹܐ ܡܲܩܢܹܝܢ ܚܲܝܠܵܐ ܕܲܕܼܚܝܼܠ ܩܵܠܹܗ 170 ܘܲܡܙܝܼܥܝܼܢ ܠܵܗ̇ ܠܐܲܪܥܵܐ ܒܩܵܠܵܐ ܕܩܲܠܝܼܠܘܼܬܹܗ ܀ 171 :ܒܹܗܘ̣ ܒܐܵܐܲܪ ܗܸܢܘܿܢ ܥܵܒܼ̇ܕܿܝܼܢ ܓܘܼ̈ܒܹܿܗ ܕܡܲܝ̈ܵܐ 172 ܘܝܵܗ̇ܒܿܝܼܢ ܩܵܠܵܐ ܡ̇ܐ ܕܡܸܬܼܢܲܣܟܿܝܼܢ ܡܲܝܵ̈ܐ ܒܡܲܝܵ̈ܐ ܀ 173 :ܩܵܠܵܐ ܕܪܘܼܚܵܐ ܥܵܒܲ̇ܪ ܡܸܢܫܹܠܝ ܒܩܸܒܼܝܵܐ ܕܡܲܝ̈ܵܐ 174 ܘܲܡܒܲܕܲܪ ܠܹܗ ܠܟܸܢܫܵܐ ܕܡܲܝ̈ܵܐ ܕܐܝܼܬܼ ܒܲܥܢܵܢܹ̈ܐ ܀ 175 :ܡܲܝ̈ܵܐ ܫܪ̈ܲܝܵܐ ܡܲܠܝܵܐ ܥܢܵܢܵܐ ܙܸܩܵܐ ܕܪܘܼܚܵܐ 176 ܘܡ̇ܐ ܕܥܵܒܲ݁ܪ ܒܵܗ̇ ܩܵܠܵܐ ܕܪܲܥܡܵܐ ܨܪܵܬ̤ ܘܐܸܬܼܐܲܫܕܲܬ̤ ܀ 177 :ܐܹܝܘ ܬܲܟܼܬܿܘܼܫܵܐ ܕܲܬܼܪܹܝܢ ܚܲܪ̈ܫܹܐ ܘܚܲܕܼ ܡܲܠܵܠܵܐ 178 ܕܟܲܣܝܵܐ ܒܓܼܵܘܹܗ ܥܸܠܲܬܼ ܫܲܝܢܵܐ ܕܥܝܼܪܹ̈ܐ ܘܐ̄ܢܵܫܵܐ ܀ 179 :ܠܥܸܠܲܬܼ ܫܲܝܢܵܐ ܡܲܠܦܝܼܢ ܥܝܼܪܹ̈ܐ ܩܪܵܒܼܵܐ ܠܲܪܫܵܐ 180 ܕܠܵܐ ܫܲܘܝܘܬܼܗܘܿܢ ܬܚܲܒܸܿܠ ܫܲܝܢܵܐ ܕܦܹܐܪܹ̈ܐ ܘܙܲܪ̈ܥܹܐ ܀ 181 ܐܘܼܡ̇ܢܵܐܝܼܬܼ ܡܲܠܦܝܼܢ ܩܹܐܪ̈ܣܹܐ ܡܠܝܼܠܹ̈ܐ ܠܚܲܪ̈ܫܹܐ: pb. 228 182 ܘܡܸܢܹܗ ܕܐܵܐܲܪ ܚܸܫ̇ܠܝܼܢ ܙܲܝܢܵܐ ܕܡܸܙܕܲܝܢܝܼܢ ܒܹܗ ܀ 183 :ܓܹܐܪܹ̈ܐ ܕܢܘܼܪܵܐ ܚܵܫ̇ܠܝܼܢ ܡܸܢܹܗ ܡ̇ܐ ܕܡܸܬܼܥܲܒܸܿܐ 184 ܘܲܡܫܲܕܿܪܝܼܢ ܠܗܘܿܢ ܒܐܲܦܲܝܝ̈ ܪܵܘܡ̇ܐ ܒܚܹܐܦܵܐ ܩܲܫܝܵܐ ܀ 185 :ܐܲܝܟ ܕܠܦܲܪܙܠܵܐ ܢܵܩ̇ܫܝܼܢ ܚܹܐܦܵܘ̈ܗܝ ܒܚܹܐܦܵܐ ܩܲܫܝܵܐ 186 ܘܢܵܦ̇ܩܝܼܢ ܡܸܢܹܗ ܒܠܹܨܘܿܨ̈ܝܵܬܼܵܐ ܢܲܗܝܼܪ̈ܵܬܼܵܐ ܀ 187 :ܢܲܗܝܼܪܵܐܝܼܬܼ ܡܲܢܗܲܪ ܡܸܢܫܹܠܝ ܒܡܸܨܥܲܬܼ ܢܘܼܗܪܹܐ 188 ܘܩܲܠܝܼܠܵܐܝܼܬܼ ܡܚܵܘܹܐ ܢܘܼܗܪܹܐ ܘܲܡܛܲܫܸܐ ܠܹܗ ܀ 189 :ܬܲܗܪܵܐ ܡܲܠܝܵܐ ܚܙܵܬܼܵܐ ܕܢܘܼܗܪܹܐ ܠܲܕܼܚܵܐܲܪ ܒܹܗ 190 ܕܥܲܡ ܫܘܼܪܵܝܹܗ ܐܵܦ ܫܘܼܠܵܡܹܗ ܕܠܠܵܐ ܬܘܼܗܵܝܵܐ ܀ 191 :ܠܵܐ ܡܲܪܦܸܐ ܠܹܗ ܠܲܕܼܚܵܫܲܪ ܒܹܗ ܕܲܢܚܘܼܪ ܫܲܦܝܼܪ 192 ܕܥܲܡ ܚܵܐܲܪ ܒܹܗ ܩܲܦ̣ܣܹܗ ܠܢܘܼܗܪܹܗ ܡ̣ܢ ܒܵܒ̣ܵܬܹ̈ܗ ܀ 193 ܐܹܝܘ ܩܲܠܝܼܠܵܐ ܕܠܹܗ ܠܵܐ ܚܵܙ̇ܝܵܐ ܩܲܠܝܼܠܘܼܬܼܵܐ ܀ 194 ܘܠܲܢ ܕܲܚܙ݂ܲܝܢܵܝܗܝ ܠܵܐ ܡܲܪܦܸܐ ܠܲܢ ܕܲܢܚܘܼܪ ܫܲܦܝܼܪ ܀ 195 :ܫܒܼܘܿܩ ܠܲܢ ܚܲܪܫܵܐ ܕܲܢܚܘܼܪ ܒܫܘܼܦܪܵܐ ܕܫܲܬܿܝܼܩܘܼܬܼܵܟ 196 ܠܵܐ ܬܚܲܬܼܚܸܬܼ ܠܲܢ ܒܩܲܠܝܼܠܘܼܬܼܵܐ ܕܠܵܘ ܕܝܼܠܵܟ ܗ̄ܝܼ ܀ 197 :ܠܵܘ ܕܝܼܠܹܗ ܗ̄ܝܼ ܕܒܲܪܩܵܐ ܕܢܸܪܗܲܛ ܩܲܠܝܼܠܐܝܼܬܼ 198 ܡܠܝܼܠܵܐ ܗ̄ܘ̣ ܕܡܲܪܗܸܛ ܫܲܬܿܝܼܩܘܼܬܹܗ ܟܲܕܼ ܗܘ̤ ܠܵܐ ܪܓܼܝܼܫ ܀ 199 :ܥܝܼܪܵܐ ܗ̄ܘ̣ ܕܡܲܪܟܸܿܢ ܥܢܵܢܹ̈ܐ ܠܝܲܡܵܐ ܩܲܠܝܼܠܵܐܝܼܬܼ 200 ܘܛܵܥ̈ܢܵܢ ܡܲܝ̈ܵܐ ܘܠܵܐ ܡܸܬܿܛܲܒ̈ܥܥܵܢ ܒܝܘܼܩܪܵܐ ܕܡܲܝ̈ܵܐ ܀ 201 :ܒܲܕܼܡܘܼܬܼ ܐܸܠܦܵܐ ܛܥܝܼܢܵܐ ܥܢܵܢܵܐ ܓܼܙܵܐ ܕܡܲܝ̈ܵܐ 202 ܘܣܵܠ̇ܩܵܐ ܩܵܝ̇ܡܵܐ ܒܐܲܦܲܝ̈ ܪܵܘܡ̇ܐ ܘܟܸܢ ܡܸܬܼܦܲܬܼܚܵܐ ܀ 203 :ܠܹܩܹ̈ܐ ܕܪܘܼܚܵܐ ܠܒܼܝܼܟ ܪܘܼܚܵܢܵܐ ܘܲܡܕܵܒܲܪ ܠܵܗ̇ 204 ܕܠܵܐ ܬܸܬܿܛܲܒܲܥ ܒܝܘܼܒܪܵܐ ܕܡܲܝ̈ܵܐ ܕܲܒܒܸܐ ܒܓܵܪܘ̇ܗ̇ ܀ 205 :ܐܹܝܘ ܡܲܠܵܚܵܐ ܕܡܲܪܗܸܛ ܐܸܠܦܹܗ ܕܐܵܐܲܪ ܒܐܵܐܲܪ 206 ܘܲܚܠܵܦ ܠܹܩܹ̈ܐ ܛܥܝܼܢ ܠܵܗ̇ ܒܙܵܘܥܹ̈ܐ ܪ̈ܘܼܚܵܢܵܝܹܐ ܀ 207 :ܒܙܵܘܥܹ̈ܐ ܛܥܝܼܢ ܠܵܗ̇ ܪܘܼܚܵܢܵܝܵܐ ܠܪܘܼܚܵܐ ܕܐܵܐܲܪ 208 ܘܡ̇ܐ ܕܡܸܙܕܲܥܙܥܵܐ ܝܵܗ̇ܒܵܐ ܩܵܠܵܐ ܕܲܡܙܝܼܥ ܠܐܲܪܥܵܐ ܀ 209 ܐܲܝܟ ܕܲܠܢܲܚܬܵܐ ܐܲܚܝܼܕܼ ܠܟܸܢܦܹ̈ܐ ܕܩܲܠܝܼܠܘܼܬܼܵܗ̇. 210 ܘܲܡܬܿܚܬܸܿܐ ܠܵܗ̇ ܠܐܲܦܦܲܝ̈ ܐܲܪܥܵܐ ܟܲܕܼ ܠܵܐ ܨܵܒܼܝܵܐ ܀ 211 :ܐܘܿ ܩܲܠܝܼܠܵܐ ܕܠܵܐ ܪܵܓܵܐ ܠܹܗ ܕܲܢܦܘܼܫ ܒܐܲܪܥܵܐ 212 ܕܐܲܡܝܼܢ ܪܵܕܹܐ ܒܐܲܦܲܝ̈ ܪܵܘܡ̇ܐ ܐܲܝܟ ܝܲܩܝܼܪܵܐ ܀ 213 :ܐܹܝܘ ܟܡܵܐ ܪܲܒܵܐ ܒܛܝܼܠܘܼܬܼ ܛܵܒܼܵܐ ܕܲܠܘܵܬܼ ܓܸܢܣܲܢ 214 ܕܥܵܨܹ̇ܐ ܟܝܵܢܹ̈ܐ ܡܸܛܠܵܬܲܢ ܠܒܲܪ ܡ̣ܢ ܛܲܟܼܣܵܐ ܀ 215 :ܟܝܵܢܹܗ ܕܐܸܐܲܪ ܦܵܪܘܿܚܘܼܬܼܵܐ ܩܢܸܐ ܒܲܟܼܝܵܢܹܗ 216 ܘܗܵܢܵ̇ܘ ܬܲܗܪܵܐ ܕܣܵܠܹ̇̄ܩ ܠܪܵܘܡ̇ܐ ܘܢܵܚܹ̇ܬܼ ܨܹܐܕܲܝܢ ܀ 217 :ܚܹܝܠ ܡܲܠܲܐܟܼܵܐ ܥܵܨܹ̇ܐ ܠܲܚܝܠܵܐ ܕܦܵܪܘܿܚܘܼܬܹܗ 218 ܘܲܡܬܲܚܬܸܿܐ ܠܹܗ ܠܪܵܗܛܵܐ ܪܵܡ̇ܐ ܠܘܵܬܼ ܡ̇ܟܵܬ̈ܲܢ ܀ 219 ܚܲܕܼ ܡܲܠܲܐܟܼܵܐ ܥܒܼܝܼܕܼ ܪܲܒܿܚܲܝܠܵܐ ܥܲܠ ܡܲܫܪܝܼܬܹܗ: pb. 229 220 ܘܲܡܕܲܒܲܪ ܠܵܗ̇ ܒܝܲܕܼ ܫܘܼܚܠܵܦܹ̈ܐ ܕܟܼܠ ܐܸܣܟܹܿܡܝܼ̈ܢ ܀ 221 :ܚܲܕܼܘܼ ܕܥܵܒܹ̇ܕܼ ܪܹܫܢܘܼܬܼܵܐ ܥܲܠ ܫܘܼܚܠܵܦܵܘ̈ܗܝ 222 ܟܲܕܼ ܐܝܼܬܼ ܥܲܡܹܗ ܒܢܲܝ̈ ܦܵܠܚܘܼܬܼܵܐ ܕܡܸܫܬܲܡܥܝܼܢ ܠܹܗ ܀ 223 :ܚܠܵܦ ܣܵܛܵܢܵܐ ܕܲܣܛܵܐ ܘܲܢܦ݂ܲܠ ܥܒܼܝܼܕܼ ܩܲܕܿܝܼܫܵܐ 224 ܘܦܵܠܚܹ̈ܐ ܕܥܲܡܹܗ ܚܠܵܦ ܠܸܓܼܝܘܿܢܹ̈ܐ ܕܫܹܐܕܹ̈ܐ ܛܪ̈ܘܼܢܹܐ ܀ 225 :ܗܘ̤ ܘܲܕܼܥܲܡܹܗ ܡܛܲܟܿܣܝܼܢ ܠܐܵܐܲܪ ܒܲܥܪܝܼܪܵܝܵܐ 226 ܘܟܸܢܫܹ̈ܐ ܝ̇ܚܪ̈ܵܢܹܐ ܡܕܲܒܿܪܝܼܢ ܡܸܕܸܿܡ ܕܲܦܩܝܼܪܝܼܢ ܒܹܗ ܀ 227 :ܒܛܲܟܼܣܹ̈ܐ ܡܦܲܠܓܼܝܼܢ ܫܘܼܠܛܵܢܲܝ̈ܗܘܿܢ ܕܫܲܠܝܼܛܵܢܹ̈ܐ 228 ܘܲܡܛܲܟܿܣܵܐܝܼܬܼ ܪܵܕܹܝܢ ܒܐܘܼܪܚܵܐ ܕܣܘܼܥܪ̈ܵܢܲܝܗܘܿܢ ܀ 229 :ܐܝܼܬܼ ܕܲܠܡܲܠ̈ܟܹܿܐ ܘܐܘܼܚܕܵܢܲܝ̈ܗܘܿܢ ܦܩܝܼܪ ܕܲܢܛܲܟܸܿܣ 230 ܘܒܲܙܒܲܢ ܡܲܡܠܸܟ ܘܒܲܙܒܲܢ ܫܵܪܹܐ ܡ̣ܢ ܫܘܼܠܛܵܢܵܐ ܀ 231 :ܐܝܼܬܼ ܕܲܩܪܵܒܼܵܐ ܡܦܲܠܸܓܼ ܝܵܗܹ̇ܒܼ ܠܲܩܪ̈ܲܒܼܬܼܵܢܹܐ 232 ܘܐܲܝܟ ܒܘܼܪܵܢܹܗ ܡܙܲܟܸܿܐ ܠܛܵܒܹ̈ܐ ܘܪܵܕܹܐ ܠܒܼܝܼܫܹ̈ܐ ܀ 233 :ܐܝܼܬܼ ܕܲܠܐ̄ܢܵܫܵܐ ܢܵܛ̇ܪܝܼܢ ܟܠܝܘܿܡ ܡ̣ܢ ܢܸܟܼܝܵܢܹ̈ܐ 234 ܘܪܵܕܼܦܝܼܢ ܡܸܢܗܘܿܢ ܚܲܝ̈ܠܵܘܵܬܼܵܐ ܕܫܹ̈ܐܕܹܐ ܛܪ̈ܘܼܢܹܐ ܀ 235 :ܚܲܕܼ ܡܲܠܲܐܟܼܵܐ ܠܘܸܐ ܠܟܼܠ ܒܲܪܢܵܫ ܠܘܼܝܼܬܼܵܐ ܕܚܘܼܒܵܐ 236 ܘܥܲܡܹܗ ܐܝܼܬܼܵܘܗܝ ܡ̣ܢ ܝܘܿܡ ܝܝܲܠܕܹܿܗ ܥܕܲܡ̇ܐ ܠܡܵܘܬܹܿܗ ܀ 237 :ܥܲܡ ܚܲܝܘܼܬܹܗ ܕܲܟܼܪܸܐ ܚܲܝܹ̈ܐ ܪܵܗܹ̇ܛ ܚܲܝܵܐ 238 ܘܥܲܠ ܓܢܹ̄ܒܼ ܥܲܪܣܹܗ ܐܲܡܝܼܢ ܩܵܐܹ̇ܡ ܒܝܘܿܡ ܥܘܼܢܕܵܢܹܗ ܀ 239 :ܗܘ̤ ܦܵܪܹܫ ܠܵܗ̇ ܠܢܲܦܫܵܐ ܐ̄ܚܝܵܢܬܹܿܗ ܡ̣ܢ ܗܲܕܲܡܹ̈ܐ 240 ܕܗܘ̤ ܡ̇ܘܒܹܿܠ ܠܵܗ̇ ܠܐܲܝܟܵܐ ܕܲܦܩܝܼܕܼ ܡ̣ܢ ܒܵܪܘܿܝܵܐ ܀ 241 :ܬܚܹܝܬܼ ܦܘܼܩܕܵܢܵܐ ܕܒܼܵܘܿܝܼܬܼܵܐ ܟܕܼܝܼܢ ܘܲܡܫܲܥܒܲܕܼ 242 ܘܠܵܘ ܕܝܼܠܹܗ ܗ̄ܝܼ ܠܡܸܣܥܲܪ ܗܵܕܹܐ ܕܡܸܣܬܲܥܪܵܐ ܒܹܗ ܀ 243 :ܠܵܘ ܗܘ̤ ܝܵܗܹ̇ܒܼ ܡܸܬܼܚܵܐ ܕܚܲܝܹ̈ܐ ܘܙܲܒܼܢܵܐ ܟܲܪܝܵܐ 244 ܘܠܵܐ ܫܲܠܝܼܛ ܠܹܗ ܕܢܵܘܣܸܦ ܫܵܥܵܐ ܘܢܲܒܼܨܲܪ ܫܵܥܵܐ ܀ 245 :ܘܐܵܦ ܠܹܗ ܠܐ̄ܢܵܫܵܐ ܠܵܘ ܒܲܩܛܝܼܪܵܐ ܡܕܲܒܲܪ ܚܲܝܵܘ̈ܗܝ 246 ܘܠܵܐ ܡܨܸܐ ܕܢܸܥܨܹܝܘܗܝ ܠܵܐ ܠܡܲܛܐܵܒܼܘܼ ܘܠܵܐ ܠܡܲܒܼܐܵܫܘܼ ܀ 247 :ܚܹܐܪܘܼܬܼ ܢܲܦܫܵܐ ܩܢܸܐ ܒܲܪܢܵܫܵܐ ܒܕܼܘܼܡܝܵܐ ܕܝܼܠܹܗ 248 ܘܲܡܨܸܐ ܕܢܸܚܛܸܐ ܘܐܵܦ ܕܢܸܙܕܲܕܲܩ ܐܲܝܟ ܦܵܪܘܿܫܵܐ ܀ 249 :ܠܵܐ ܡܸܢܼܥܲܨܪܵܐ ܚܹܐܪܘܼܬܼ ܢܲܦܫܵܐ ܕܲܒܼܒܲܪܢܵܫܵܐ 250 ܘܠܵܐ ܡܸܬܿܕܲܒܼܪܵܐ ܠܡܸܣܥܲܪ ܡܸܕܸܿܡܡ ܟܲܕܼ ܠܵܐ ܡܢܵܚܵܐ ܀ 251 ܚܲܕܼܘܼ ܟܝܵܢܵܐ ܕܢܲܦܫܵܐ ܕܐ̄ܢܵܫܵܐ ܘܲܕܼܪ̈ܘܼܚܵܢܹܐ. 252 ܘܠܵܐ ܡܸܬܼܚܲܣܢܵܐ ܐܸܠܵܐ ܚܣܲܢܬܹܗ ܗ̤ܝ ܠܲܩܢܘܿܡ̇ܗ̇ ܀ 253 :ܒܢܘܿܡ̇ܐ ܓܡܝܼܪܵܐ ܩܲܢܝܵܐ ܒܝܵܬܼܵܗ̇ ܡ̣ܢ ܫܘܼܪܵܝܵܐ 254 ܐܲܟܼܡܵܐ ܕܲܓܼܡܝܼܪ ܐܵܦ ܬܘܼܩܵܢܵܐ ܕܲܡܫܲܝܵܢܹ̈ܐ ܀ 255 ܐ̄ܚܝܵܢܹ̈ܝܗ̇ ܐܸܢܘܿܢ ܘܡܸܢܹܗ ܕܛܘܿܗܡ̇ܐ ܕܝܼܠܗܘܿܢ ܐܝܼܬܹܝܗ̇: pb. 230 256 ܘܠܲܐ̄ܚܝܵܢܘܼܬܼܵܗ̇ ܡܚܲܒܿܒܼܝܼܢ ܟܠܫܵܥ ܒܣܘܼܥܪ̈ܵܢܲܝܗܘܿܢ ܀ 257 :ܠܗܵܝ̇ ܒܲܪ̄ܬܼ ܩܵܠܵܐ ܕܲܩܪܵܬ̤ ܠܐ̄ܢܵܫܵܐ ܒܫܸܡ ܟܲܣܝܘܼܬܼܵܐ 258 ܠܵܗ̇ ܗ̄ܘ̣ ܡܝܲܩܪܝܼܢ ܒܝܲܕܼ ܐܝܼܩܵܪܵܐ ܕܨܹܝܕܼ ܒܲܪܢܵܫܵܐ ܀ 259 :ܒܐ̄̇ܢܵܫܵܐ ܡܚܵܘܹܝܢ ܚܘܼܒܿܗܘܿܢ ܪܲܒܵܐ ܕܨܹܝܕܼ ܒܵܪܘܿܝܵܐ 260 ܥܲܠ ܗܵܝ̇ ܠܵܐܹ̇ܝܢ ܒܡܵܙܘܿܢ ܚܲܝܲܝ̈ܢ ܘܲܒܼܬܸܫܡܸܫܬܲܢ ܀ 261 :ܡܸܠܛܵܬܲܢ ܫܚܝܼܩܝܼܢ ܣܲܓܿܝܼ ܐܵܦ ܡܸܫܬܲܚܩܝܼܢ 262 ܘܠܵܐ ܡܸܬܿܬܿܢܝܼܚܝܼܢ ܠܕܲܡ̇ܐ ܕܢܵܝ̇ܚܝܼܢ ܒܠܡܹܐܝܢ ܒܘܼܒܵܐ ܀ 263 :ܡܸܛܠܵܬܲܢ ܪܡܹܝܢ ܒܐܵܓܼܘܿܢܵܐ ܕܫܘܼܚܠܵܦ ܙܲܒܼܢܹ̈ܐ 264 ܕܲܒܼܫܘܼܚܠܵܦܗܘܿܢ ܢܸܥܗܲܕܼ ܚܲܝܹ̈ܐ ܕܠܵܐ ܫܘܼܠܵܡܵܐ ܀ 265 :ܡܸܛܠܵܬܲܢ ܠܐܹܝܢ ܘܲܥܡܝܼܠܝܼܢ ܒܲܥܡܝܼ̈ܠܬܼܵܐ 266 ܘܟܲܕܼ ܠܵܐ ܠܵܐܹ̇ܝܢ ܥܲܡܲܢ ܕܲܚܢܲܢ ܢܸܬܿܬܿܢܝܼܚ ܀ 267 :ܡܸܛܠܵܬܲܢ ܡܙܝܝܼܥܝܼܢ ܠܐܵܐܲܪ ܒܙܵܘܥܵܐ ܕܲܒܼܗܘܿܢ 268 ܕܲܒܼܝܲܕܼ ܡܲܫܒܼܵܘ̈ܗܝ ܒܩܝܼܡܘܼܢ ܙܲܪ̈ܥܹܐ ܕܩܘܼܝܵܡ ܚܲܝܲܝ̈ܢ ܀ 269 :ܡܸܛܠ ܚܲܝܲܝ̈ܢ ܡܛܲܟܿܣܝܼܢ ܪܲܗܛܵܐ ܕܝܲܪ̈ܝܲܝ ܫܲܢ̄ܬܵܐ 270 ܕܠܵܐ ܢܸܬܿܕܵܘܲܪ ܘܢܸܛܥܸܐ ܛܲܟܼܣܵܐ ܕܦܵܪܘܿܫܘܼܬܲܢ ܀ 271 :ܡܸܛܠܵܬܲܢ ܡܚܵܘܹܝܢ ܐܘܼܪܚܵܐ ܠܫܸܡܫܵܐ ܘܣܲܗܪܵܐ 272 ܕܠܵܐ ܬܘܼܒܼ ܢܸܛܥܸܐ ܫܒܼܝܼܠ ܡܲܪܕܲܝܼܬܿܢ ܕܨܹܝܕܼ ܒܵܪܘܿܝܵܐ ܀ 273 :ܡܸܛܠܵܬܲܢ ܡܦܲܠܓܼܝܼܢ ܫܵܥܹ̈ܐ ܠܢܘܼܗܪܵܐ ܘܚܸܫܟܵܐ 274 ܕܠܵܐ ܢܸܬܼܦܲܠܓܼܘܼܢ ܥܲܠ ܒܵܪܝܵܐ ܕܲܒܼܪܵܐ ܐܸܢܘܿܢ ܀ 275 :ܡܸܛܠ ܕܲܪܓܹܗ ܩܢ̣ܵܘ ܫܘܼܠܛܵܢܵܐ ܕܕܲܪ̈ܓܹܐ ܘܛܲܟܼܣܹ̈ܐ 276 ܘܚܵܘܝܼܘ ܕܦܵܩ̇ܕܿܝܼܢ ܐܵܦ ܡܸܬܼܦܲܩܕܿܝܼܢ ܕܕܲܪܓܹܗ ܢܹܐܪܲܒܼ ܀ 277 :ܠܝܲܩܝܼܪܘܼܬܹܗ ܡܝܲܩܪܝܼܢ ܛܲܟܼܣܹ̈ܐ ܕܫܘܼܠܛܵܢܲܝ̈ܗܘܿܢ 278 ܘܡܸܛܠ ܛܲܟܼܣܹܗ ܡܲܡܠܸܟ ܛܲܟܼܣܵܐ ܒܹܝܬܼ ܣܸܕܼܪ̈ܲܝܗܘܿܢ ܀ 279 :ܛܲܟܼܟܼܣܵܐ ܪܲܒܵܐ ܫܪܸܐ ܒܛܲܛܼܣܲܝ̈ܗܘܿܢ ܕܲܡܛܲܟܿܣܵܢܹ̈ܐ 280 ܘܟܲܕܼ ܚܲܕܼ ܐܸܢܘܿܢ ܐܝܼܬܼ ܗ̄ܘ̣ ܕܦܵܩ̇ܕܿܝܼܢ ܐܵܦ ܡܸܬܼܦܲܩܕܿܝܼܢ ܀ 281 :ܒܦܵܩܘܿܕܼܘܼܬܼܗܘܿܢ ܚܵܪܟܵܪܘܿܙܵܐ ܪܲܒܵܐ ܕܥܲܡܡܹ̈ܐ 282 ܘܟܼܢܝܝܼ ܐܸܢܘܿܢ ܒܫܸܡ ܫܘܼܠܛܵܢܵܐ ܕܫܘܼܠܛܵܢܲܝ̈ܗܘܿܢ ܀ 283 :ܘܡܸܛܠ ܚܫܲܚܬܲܢ ܟܬ݂ܲܒܼ ܕܡܸܬܿܬܿܢܝܼܚܝܼܢ ܘܐܵܦ ܕܡܲܚܲܒܿܠܝܼܢ 284 ܕܐܸܡܲܬܼܝ ܡܸܫܠܲܚ ܚܵܫܘܿܫܘܼܬܼܵܐ ܘܢܸܠܒܲܫ ܫܘܼܒܼܚܵܐ ܀ 285 :ܟܠܵܗ̇ ܒܪܝܼܒܿܠܵܐ ܥܲܡܒܿܠܵܐ ܥܲܡܗܘܿܢ ܘܗܸܢ̣ܘܿܢ ܥܲܡܵܗ̇ 286 ܕܐܸܡܲܬܼܝ ܢܹܐܬܸܐ ܝܘܿܡ ܡ̇ܘܠܵܕܼܵܐ ܕܡ̣ܢ ܒܹܝܬܼ ܡܝܼܬܹ̈ܐ ܀ 287 :ܥܲܡ ܒܼܪ̈ܝܵܬܼܵܐ ܫܲܬܿܝܼ̈ܩܵܬܼܵܐ ܥܢܹܝܢ ܘܲܥܡܝܼܠܝܼܢ 288 ܥܲܠ ܗܵܘ̇ ܡܲܒܼܪܵܐ ܕܐܝܼܬܼ ܗ̄ܘ̣ ܣܲܒܼܪܵܐ ܠܐܲܒܿܝܼܕܼܘܼܬܹܗ ܀ 289 :ܒܣܲܒܼܪܵܐ ܕܣܲܒܼܪܹܗ ܬܲܠܝܵܐ ܒܪܝܼܬܼܵܐ ܘܝܲܬܿܝܼܪ ܥܝܼܪܹ݁ܐ 290 ܒܗܵܝ̇ ܕܲܡܦܵܣܝܼܢ ܒܪ̈ܲܒܿܘܼܬܼ ܣܲܒܼܪܵܐ ܕܡܲܛܲܝܲܒܼ ܠܵܗ̇ ܀ 291 ܒܣܲܒܼܪܵܐ ܛܵܒܼܵܐ ܕܦܘܼܪܩܵܢ ܚܲܝܲܝ̈ܢ ܡܣܲܟܹܿܝܢ ܟܠܝܿܡ: pb. 231 292 ܘܫܲܪܝܼܪܵܐ ܠܗܘܿܢ ܕܲܡܩܲܒܿܠܝܼܢ ܠܹܗ ܒܝܲܕܼ ܣܘܼܥܪ݁̈ܵܢܹܐ ܀ 293 :ܡܸܛܠ ܣܲܒܼܪܹܗ ܟܬ݂ܲܒܼ ܕܐܸܫܥܒܲܕܼܘ ܠܲܣܪܝܼܩܘܼܬܼܵܐ 294 ܘܩܲܒܸܿܠ ܥܵܠܡܵܐ ܬܸܢܘܲܝ ܕܐܲܓܼܪܵܐ ܒܝܘܿܡ ܚܘܼܕܵܬܹܗ ܀ 295 :ܫܲܪܝܼܪ ܥܲܡܠܵܐ ܕܥܵܡ̇ܠܝܼܢ ܥܝܼܪܹ̈ܐ ܚܠܵܦ ܒܲܪܢܵܫܵܐ 296 ܘܗܵܐ ܬܲܚܘܝܼܬܼܵܐ ܕܫܲܪܝܼܪܘܼܬܹܗ ܒܫܘ̣ܚܠܵܦ ܙܲܒܼܢܹ̈ܐ ܀ 297 :ܙܲܒܼܢܹ̈ܐ ܣܵܗ̇ܕܿܝܼܢ ܥܲܠ ܥܲܡܠܲܝ̈ܗܘܿܢ ܕܲܡܫܲܝܵܢܹ̈ܐ 298 ܘܲܚܠܵܦ ܦܘܼܡ̇ܐ ܒܫܸܬܼܩܵܐ ܩܵܥܹ̇ܝܢ ܕܲܟܼܡܵܐ ܫܚܝܼܩܝܼܢ ܀ 299 :ܒܫܸܬܼܩܵܐ ܩܵܥܹ̇ܝܢ ܟܝܵܢܹ̈ܐ ܚܲܪ̈ܫܹܐ ܥܲܡ ܒܲܪܢܵܫܵܐ 300 ܕܚܘܼܪ ܒܲܪܢܵܫܵܐ ܡܸܛܠܵܬܼܵܟ ܫܚܝܼܩܝܼܢ ܥܝܼܪܹ̈ܐ ܀ 301 :ܡܸܛܠܵܬܼܵܟ ܪܡܹܝܢ ܒܲܫܚܵܩܵܐ ܡܠܝܼܠܹ̈ܐ ܘܚܲܪ̈ܫܹܐ 302 ܘܗܘ̤ ܒܲܪܢܵܫܵܐ ܠܵܐ ܪܓܼܝܼܫ ܕܟܼܡܵܐ ܫܚܝܼܩܝܼܢ ܚܠܵܦܵܘܗܝ ܀ 303 :ܚܘܼܪ ܒܲܪܢܵܫܵܐ ܒܲܥܡܝܼܠܘܼܬܼܗܘܿܢ ܐܵܦܸܢ ܩܲܠܝܼܠ 304 ܘܐܲܥܡܸܠ ܢܲܦܫܵܟ ܒܗܸܪܓܵܐ ܛܵܒܼܵܐ ܕܥܝܼܪܹ̈ܐ ܐ̄ܚܝܵܢܲܝܟ ܀ 305 :ܚܙܝܼ ܕܲܚܠܵܦܲܝܟ ܫܚܝܼܩܝܼܢ ܣܲܓܿܝܼ ܘܐܵܦ ܡܸܫܬܲܚܩܝܼܢ 306 ܘܥܲܡ ܬܲܪܒܿܝܼܬܼܵܟ ܡܪܲܒܹܿܝܢ ܦܹܐܪܹ̈ܐ ܠܲܣܢܝܼܩܘܼܬܼܵܟ ܀ 307 :ܕܝܼܠܗܘܿܢ ܐܝܼܬܹܝܗ̇ ܬܲܪܒܿܝܼܬܼ ܦܹܐܪܹ̈ܐ ܘܡ̇ܘܥܝܼܬܼ ܙܲܪ̈ܥܹܐ 308 ܘܲܒܼܡܸܠܲܬܼܗܘܿܢ ܡܛܲܟܲܣ ܪܲܗܛܵܐ ܕܝܲܪ̈ܝܲܝ ܫܲܢ̄ܬܵܐ ܀ 309 :ܩܲܠܝܼܠܵܐܝܼܬܼ ܪܵܗ̇ܛܝܼܢ ܒܐܵܐܲܪ ܥܲܡ ܙܵܘܥܲܝ̈ܗܘܿܢ 310 ܘܗܲܢܝܼܠܵܐ ܠܗܘܿܢ ܝܲܦܝܼܪܘܼܬܼܵܐ ܕܲܒܼܥܲܡ̈ܠܲܝܗܘܼܢ ܀ 311 :ܗܲܢܝܼܐܵܝܼܬܼ ܣܵܥ̇ܪܝܼܢ ܟܠܵܐ ܘܢܵܛ̇ܪܝܼܢ ܟܠܵܐ 312 ܘܲܒܼܣܘܼܥܪܵܢܗܘܿܢ ܦܵܪܥܝܼܢ ܫܘܼܒܼܚܵܐ ܠܡܲܬܼܩܸܢ ܟܠܵܐ ܀ 313 :ܫܘܼܒܼܚܵܐ ܩܵܥܹ̇ܝܢ ܡ̇ܐ ܕܡܸܫܬܲܠܚܝܼܢ ܒܣܘܼܥܪ݁ܵܢܲܝܗܘܿܢ 314 ܘܗܵܢܵܘ̇ ܬܲܗܪܵܐ ܕܥܲܡ ܣܘܼܥܪܵܢܵܐ ܐܵܦ ܬܸܫܒܿܘܿܚܬܵܐ ܀ 315 :ܬܲܪܬܹܿܝܢ ܒܲܚܕܼܵܐ ܓܵܡ̇ܪܝܼܢ ܟܠܢܵܫ ܕܠܵܐ ܬܘܼܗܪܵܝܵܐ 316 ܣܵܥܘܿܪܘܼܬܼܵܐ ܕܲܚܠܵܦ ܐ̄ܢܵܫܵܐ ܘܫܘܼܒܼܚܵܐ ܠܟܲܣܝܵܐ ܀ 317 :ܐܹܝܘ ܣܵܥܘܿܪܹ̈ܐ ܕܣܵܥܘܿܪܘܼܬܼܵܐ ܐܲܠܵܗܵܝܬܵܐ 318 ܕܠܵܐ ܡܸܬܼܥܵܘܟܼܝܼܢ ܠܲܡܡܲܠܵܝܘܼ ܬܲܪܬܹܿܝܢ ܒܲܚܕܵܐ ܀ 319 :ܐܹܝܘ ܡܫܲܡܫܵܢܹ̈ܐ ܡܫܲܡܫܲܝ̈ ܟܠܵܐ ܕܡ̇ܪܹܐ ܟܠܵܐ 320 ܕܓܼܡܝܼܪ ܚܘܼܒܹܿܗܘܿܢ ܨܹܝܕܼ ܒܵܪܘܿܝܵܐ ܕܨܹܝܕܼ ܒܸܪ̈ܝܵܬܹܗ ܀ 321 :ܐܹܝܘ ܐܝܼܙܓܲܕܹܿܐ ܕܲܡܠܸܟ ܡܲܠ̈ܟܹܿܐ ܠܵܐ ܡ̇ܝܘܿܬܼܵܐ 322 ܕܒܼܐܝܼܙ ܓܲܕܿܘܼܬܼܗܘܿܢ ܢܵܛ̇ܪܝܼܢ ܚܲܝܹ̈ܐ ܕܡ̇ܝܘܿܬܼܘܼܬܼܵܐ ܀ 323 :ܐܹܝܘ ܡܫܲܝܢܵܢܹ̈ܐ ܘܪ̈ܵܚܡܲܝ ܫܲܝܢܵܐ ܕܲܕܼܟܼܠ ܘܲܒܼܟܼܠ 324 ܕܲܡܚܲܝܨܝܼܢ ܠܹܗ ܠܫܲܝܢܵܐ ܕܐ̄ܢܵܫܵܐ ܒܚܘܼܒܵܐ ܕܲܒܼܗܘܿܢ ܀ 325 :ܐܹܝܘ ܟܵܪ̈ܘܿܙܹܐ ܕܚܹܝܠ ܒܵܪܘܿܝܵܐ ܕܨܹܝܕܼ ܒܸܪ̈ܝܵܬܹܐ 326 ܕܕܲܠܵܐ ܩܵܠܵܐ ܨܵܝ̇ܬܿܝܼܢ ܩܵܠܵܐ ܟܝܵܢܹ̈ܐ ܚܲܪ̈ܫܹܐ ܀ 327 :ܐܹܝܘ ܟܡܵܐ ܪܲܒܵܐ ܡ̣ܢ ܬܲܫܥܝܼܬܼܵܐ ܡܸܠܬܼܵܐ ܕܲܒܼܗܘܿܢ 328 ܕܐܵܦ ܫܲܬܿܝܼܩܹ̈ܐ ܨܵܝ̇ܬܿܝܼܢ ܩܵܠܹ̈ܐ ܕܬܼܪ̈ܓܵܡܲܝܗܘܿܢ ܀ 329 ܕܠܵܐ ܒܲܪ̄ܬܼ ܩܵܠܵܐ ܠܵܥ̇ܙܝܼܢ ܟܠܢܵܫ ܥܲܡ ܫܲܬܿܝܼܩܹ̈ܐ: pb. 232 330 ܘܟܲܕܼ ܠܲܝܬܼ ܡܸܠܬܼܵܐ ܓܵܡ̇ܪܝܼܢ ܡܸܠܹ̈ܐ ܒܝܲܕܼ ܣܘܼܥܪ̈ܵܢܹܐ ܀ 331 :ܒܟܸܣܝܵܐ ܠܵܥܙ̇ܝܼܢ ܥܲܡ ܐܸܣܛܘܼܟܼܣܹ̈ܐ ܠܵܐ ܪ̈ܵܓܼܘܿܫܹܐ 332 ܘܝܵܗ̇ܒܿܝܼܢ ܩܵܠܹ̈ܐ ܡܸܬܼܪ̈ܲܓܼܫܵܢܹܐ ܐܲܝܟ ܪ̈ܓܼܘܿܫܹܐ ܀ 333 :ܘܐܲܝܟ ܕܒܼܐܝܼ̈ܕܲܝܵܐ ܠܒܼܝܼܟܼܝܼܢ ܠܐܵܐܲܪ ܒܐܲܪܒܲܥ ܟܸܢܦܵܘ̈ܗܝ 334 ܘܦܵܪܣܝܼܢ ܚܹܐܦܵܐ ܕܩܲܠܝܼܠܘܼܬܹܗ ܠܐܲܪܒܲܥ ܦܸܢ̈ܝܵܢ ܀ 335 :ܒܡܲܫܒܼܵܘ̈ܗܝ ܢܚܹܝܹ̈ܐ ܡܢܝܼܚܝܼܢ ܐ̄ܢܵܫܵܐ ܘܐܵܦ ܚܲܝ̈ܘܵܬܼܵܐ 336 ܘܒܼܪܵܓܼܝܘܼܬܹܗ ܡܪܲܓܹܿܝܢ ܠܐܲܪܥܵܐ ܕܬܸܬܸܿܠ ܦܹܐܪܹ̈ܐ ܀ 337 :ܐܘܼܡܵܢܵܐܝܼܬܼ ܥܵܨ̇ܒܼܝܼܢ ܟܹܐܒܼܵܘ̈ܗܝ ܕܥܵܠܡܵܐ ܟܪܝܼܗܵܐ 338 ܒܩܲܪܝܼܪܘܼܬܼܵܐ ܘܚܲܡܝܼܡܘܼܬܼܵܐ ܬܪܹܝܢ ܕܲܠܩܘܼܒܼܠܹ̈ܐ ܀ 339 :ܠܩܲܪܝܼܪܘܼܬܹܗ ܡܡܲܕܿܟܼܝܼܢ ܟܠܫܵܥ ܒܚܲܡܝܼܡܘܼܬܼܵܐ 340 ܘܟܸܢ ܣܵܝ̇ܪܝܼܢ ܠܹܗ ܐܲܝܟ ܣܲܡܡܵܢܹ̈ܐ ܠܟܹܐܒܹ̈ܐ ܢܣܝܼܣܹ̈ܐ ܀ 341 :ܐܹܝܘ ܠܐܵܣܝܼܘܼܬܼܵܐ ܠܵܐ ܡܓܼܫܲܡܬܵܐ ܕܠܵܐ ܓܘܼܫܡܵܢܹ̈ܐ 342 ܕܲܡܡܲܕܿܟܼܝܼܢ ܠܵܗ̇ ܪ̈ܘܼܚܵܡܵܝܹܐ ܘܚܵܫ̇ܚܵܐ ܠܓܼܘܼܫܡܲܢ ܀ 343 :ܠܐܘܼܡ̇ܢܘܼܬܼܗܘܿܢ ܝܲܗ̣̄ܒܹܿܗ ܠܥܵܠܡܵܐ ܡ̇ܪܹܐ ܕܥܵܠܡܵܐ 344 ܕܲܚܙ̣ܵܐ ܕܝܵܥ̇ܝܼܢ ܠܡܸܥܨܲܒܼ ܟܹܐܒܹ̈ܐ ܕܲܢܣܝܝܼܣܘܼܬܹܗ ܀ 345 :ܚܹܝܠ ܨܸܒܼܝܵܢܹܗ ܣܵܡ̣ ܒܲܟܼܝܵܢܗܘܿܢ ܡ̣ܢ ܫܘܼܪܵܝܵܐ 346 ܕܢܸܗܘܘܿܢ ܣܵܦ̇ܩܝܼܢ ܠܡܸܣܥܲܪ ܥܵܠܡܵܐ ܟܪܝܼܗ ܒܲܚܛܝܼܬܼܵܐ ܀ 347 :ܡܸܢܹܗ ܝܲܠܦܘܼܗ̇ ܠܐܘܼܡܵܢܘܼܬܼܵܐ ܘܟܸܢ ܐܸܬܼܢܲܨܲܚܘ 348 ܘܚܹܝܠ ܥܘܼܕܼܪܵܢܹܗ ܣܵܗܹ̇ܛ ܥܲܡܗܘܿܢ ܥܕܲܡ̇ܐ ܠܚܲܪܬܼܵܐ ܀ 349 :ܥܲܡܗܘܿܢ ܪܵܗܹ̇ܛ ܚܹܝܠ ܒܼܵܘܿܝܵܐ ܩܲܠܝܼܠܵܐܝܼܬܼ 350 ܘܥܲܡܹܗ ܪܵܕܹܝܢ ܕܠܵܐ ܡܘܼܫ̈ܚܵܬܼܵܐ ܕܲܦ̈ܣܵܥܵܬܼܵܐ ܀ 351 :ܩܲܛܝܼܢܵܐܝܼܬܼ ܪܵܡܹ̇ܙ ܪܸܡܙܹܗ ܕܠܵܐ ܒܲܪ̄ܬܼ ܩܵܠܵܐ 352 ܘܨܵܝ̇ܬܿܝܼܢ ܩܵܠܹܗ ܕܠܵܐ ܡܲܫܡܲܥܬܼܵܐ ܓܼܘܫܡܵܢܵܝܬܵܐ ܀ 353 :ܠܦܘܼܬܼ ܡܲܫܡܲܥܬܼܵܐ ܕܐܲܩܢܝܼ ܐܸܢܘܿܢ ܡܬܲܪܓܸܿܡ ܥܲܡܗܘܿܢ 354 ܕܢܸܗܘܘܿܢ ܣܵܦ̇ܩܝܼܢ ܠܲܡܨܵܬܼ ܒܗܵܘܢܵܐ ܩܵܠܵܐ ܟܲܣܝܵܐ ܀ 355 :ܒܗܵܘܢܵܐ ܨܵܝ̇ܬܿܝܼܢ ܠܗܵܝ̇ ܒܲܪ̄ܬܼ ܩܵܠܵܐ ܕܟܼܠܵܗ̇ ܗܵܕܹܐ ܗ̄ܝܼ 356 ܘܲܒܼܒܼܘܼܝܵܢܵܐ ܡܸܬܼܒܲܝܢܝܼܢ ܒܵܗ̇ ܟܲܕܼ ܬܲܗܝܼܪܝܼܢ ܀ 357 :ܐܹܝܘ ܟܡܵܐ ܪܲܒܵܐ ܪܲܒܿܘܼܬܼ ܬܲܗܪܵܐ ܕܲܒܼܪ̈ܘܼܚܵܢܹܐ 358 ܘܲܙܥܘܿܪ ܦܘܼܡܵܐ ܕܟܼܠܵܗ̇ ܒܪܝܼܬܼܵܐ ܕܢܸܬܼܢܸܐ ܬܲܗܪܵܗ̇ ܀ 359 :ܐܹܝܘ ܟܡܵܐ ܚܲܪܝܼܦ ܗܵܘܢܵܐ ܕܲܩܐܹܝܢ ܦܲܢ̈ܝܲܝ ܗܵܘܢܵܐ 360 ܕܣܵܦܹ̇ܩ ܠܲܡܨܵܬܼ ܩܵܠܵܐ ܕܩܲܛܝܼܢ ܡ̣ܢ ܟܠ ܗܵܘܢܵܝܼ̈ܢ ܀ 361 :ܐܹܝܘ ܟܡܵܐ ܩܲܠܝܼܠ ܗܵܘ̇ ܒܘܼܝܵܢܵܐ ܕܡܸܬܼܒܲܝܢܝܼܢ ܒܹܗ 362 ܕܟܲܕܼ ܠܲܝܬܼ ܡܸܕܹܿܡ ܡܸܬܼܚܲܙܝܵܢܵܐ ܠܗܘܿܢ ܫܲܪܝܼܪܵܐ ܗ̄ܘ̣ ܀ 363 ܐܹܝܘ ܟܡܵܐ ܟܲܣܝܵܐ ܗܵܝ̇ ܟܲܣܝܘܼܬܼܵܐ ܕܲܠܥܸܠ ܡܸܢܗܘܿܢ: pb. 233 364 ܘܲܟܼܡܵܐ ܓܼܠܝܵܐ ܣܵܥܘܿܪܘܼܬܼܵܐ ܩܕܼܵܡ ܥܲܝܢܲܝ̈ܗܘܿܢ ܀ 365 :ܐܹܝܘ ܟܡܵܐ ܫܲܪܝܼܪ ܫܪܵܪܵܐ ܟܲܣܝܵܐ ܕܪܸ̈ܥܝܵܢܲܝܗܘܿܢ 366 ܘܠܵܐ ܡܸܬܼܦܲܓܼܝܼܢ ܠܡܸܒܼܥܵܐ ܒܥܵܬܼܵܐ ܕܗܵܝ̇ ܟܲܣܝܘܼܬܼܵܐ ܀ 367 :ܟܲܣܝܵܐ ܡܸܢܗܘܿܢ ܐܲܝܟ ܡ̇ܐ ܕܟܲܣܝܵܐ ܡ̣ܢ ܟܠ ܒܸܪ̈ܝܵܢ 368 ܘܗܵܢܵܘ̇ ܬܲܗܪܵܐ ܕܲܟܼܡܵܐ ܕܟܲܣܝܵܐ ܠܗܘܿܢ ܐܲܝܟ ܓܲܠܝܵܐ ܗ̄ܝܼ ܀ 369 :ܒܗܲܝܡܵܢܘܼܬܼܵܐ ܚܵܙܹ̇ܝܢ ܚܙܵܬܼܵܐ ܕܠܵܐ ܡܸܬܼܚܲܙܝܵܐ 370 ܘܲܒܼܠܵܐ ܚܙܵܬܼܵܐ ܨܲܕܿܝܼܕܼ ܗܵܘܢܵܐ ܕܪܸ̈ܥܝܵܢܲܝܗܘܿܢ ܀ 371 :ܒܗܲܝܡܵܢܘܼܬܼܵܐ ܨܵܝ̇ܬܿܝܼܢ ܩܵܠܵܐ ܕܠܵܐ ܒܲܪ̄ܬܼ ܩܵܠܵܐ 372 ܘܲܡܩܲܒܿܠܝܼܢ ܠܹܗ ܒܸܠܥܵܕܼ ܪܼ̈ܓܼܫܹܐ ܡܸܬܼܪ̈ܲܓܼܫܵܢܹܐ ܀ 373 :ܒܗܲܝܡܵܢܘܼܬܼܵܐ ܫܲܠܸܡܘ ܪܲܗܟܵܐ ܕܗܲܝܡܵܢܘܼܬܼܵܐ 374 ܘܗܲܝܡܸܢܘ ܕܡܲܨܝܵܐ ܠܲܡܗܲܝܡܵܢܘܼ ܫܒܸܡ ܒܵܪܘܿܝܵܐ ܀ 375 :ܒܗܲܝܡܵܢܘܼܬܼܵܐ ܫܲܠܸܡܘ ܪܲܗܛܵܐ ܕܗܲܝܡܵܢܘܼܬܼܵܐ 376 ܘܗܲܝܡܸܢܘ ܕܡܲܨܝܵܐ ܠܲܡܗܲܝܢܵܡܘܼ ܒܫܸܡ ܒܵܪܘܿܝܵܐ ܀ 377 :ܒܗܲܝܡܵܢܘܼܬܼܵܐ ܩܵܡ̣ܘ ܕܲܢܛܲܟܿܣܝܼܢ ܚܹܝܠ ܐܸܣܛܘܼܣܹ̈ܐ 378 ܘܒܼܵܗ̇ ܗ̄ܘ̣ ܚܲܣܢ̣ܢܘܼܗܝ ܠܚܲܝܠܵܐ ܩܲܫܝܵܐ ܕܲܟܼܬܼܝܼܫܘܼܬܼܗܘܿܢ ܀ 379 :ܒܗܲܝܡܵܢܘܼܬܼܵܐ ܩܢ̣ܵܘ ܬܸܫܡܸܫܬܵܐ ܕܨܹܝܕܼ ܒܲܪܢܵܫܵܐ 380 ܘܠܵܐ ܐܸܬܼܦܲܠܲܓܼܘ ܥܲܠ ܗܵܘ̇ ܩܵܠܵܐ ܕܲܩܪ̣ܵܝܗܝ ܨܲܠܡܹܗ ܀ 381 :ܗܲܝܡܵܢܘܼܬܼܵܐ ܟܸܕܼܢܲܬ̤ ܐܸܢܘܿܢ ܒܥܲܡܠܵܐ ܕܚܲܝܵܘ̈ܗܝ 382 ܘܲܡܬܲܪܣܹܝܢ ܠܹܗ ܕܠܵܐ ܢܫܘܼܛܘܼܢܵܗ̇ ܠܗܲܝܢܵܡܘܼܬܼܵܐ ܀ 383 :ܗܲܝܡܵܢܘܼܬܼܵܐ ܫܲܕܿܪܲܬ̤ ܐܸܢܘܿܢ ܠܲܐ̄ܚܝܵܢܘܼܬܹܗ 384 ܘܒܼܵܗ̇ ܐܸܬܼܒܲܩܝܼܘ ܒܟܲܣܝܘܼܬܼ ܢܲܦܫܹܗ ܪܘܼܚܵܢܵܝܬܵܐ ܀ 385 :ܪܘܼܚܵܢܵܝܬܵܐ ܘܠܵܐ ܡ̇ܝܟܿܬܿܬܵܐ ܗܲܝܡܸܢܘ ܕܐܝܼܬܹܝܗ̇ 386 ܐܲܝܟ ܕܐܵܦ ܗܸܢܘ̣ܿܢ ܪ̈ܘܼܚܵܢܵܝܹܐ ܘܠܵܐ ܡ̇ܝܘܿܬܹ̈ܐ ܀ 387 :ܡ̣ܢ ܗܵܘ̇ ܓܸܢܣܵܐ ܕܓܼܢܸܣ ܓܸܢܣܹ̈ܐ ܐܝܼܬܼܵܘܗܝ ܓܸܢܣܵܗ̇ 388 ܘܐܝܼܬܹܝܗ̇ ܐܵܦ ܗܝ̤ ܕܠܵܐ ܪܘܼܟܵܒܼܵܐ ܘܲܕܼܠܵܐ ܚܙܵܬܼܵܐ ܀ 389 :ܡ̣ܢ ܗܵܘ̇ ܛܘܿܗܡ̇ܐ ܪܵܕܹܐ ܛܘܿܗܡ̇ܗ̇ ܕܠܵܐ ܝܘܼܒܵܠܵܐ 390 ܘܗܵܘ̇ܝܵܐ ܐܵܦ ܗܝ̤ ܒܗܵܘ̇ ܐܸܣܟܹܿܡܵܐ ܕܡ̣ܢ ܠܵܐ ܡܸܕܸܿܡ ܀ 391 :ܐܹܝܘ ܠܲܟܼܝܵܢܵܐ ܕܢܲܦܫܵܐ ܕܐ̄ܢܵܫܵܐ ܘܲܕܼܪ̈ܘܼܚܵܢܹܐ 392 ܕܲܩܢܹܝܢ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܐܲܝܟ ܥܵܒܼܘܿܕܼܗܘܿܢ ܀ 393 :ܐܘܿܗ ܡ̣ܢ ܐ̄ܢܵܫܵܐ ܕܢܲܦܫܵܐ ܕܲܒܼܗܘܿܢ ܠܵܐ ܡ̇ܝܘܿܬܼܵܐ ܗ̄ܝܼ 394 ܕܲܠܗܵܘ̇ ܕܲܒܼܪܵܗ̇ ܩ̣ܪܵܐܘܼܗܝ ܡܝܼܬܼܵܐ ܒܚܸܪ̈ܝܵܢܲܝܗܘܿܢ ܀ 395 :ܐܘܿܗ ܡ̣ܢ ܥܵܘ̣ܠܵܐ ܕܲܓܼܠܸܐ ܥܵܘ̣ܠܹܗ ܐܵܦ ܠܲܣ̈ܡܲܝܵܐ 396 ܕܲܡܚܲܦܹܝܢ ܠܵܗ̇ ܒܢܲܝ̈ ܚܸܪܝܵܢܵܐ ܒܐܸܣܟܹܿܝܡ ܚܘܼܒܵܐ ܀ 397 :ܐܘܿ ܛܵܥܝܘܼܬܼܵܐ ܕܐܲܒܲܥ ܛܵܥ̇ܝܵܐ ܒܼܒܼܢܲܝ̈ ܛܘܼܥܝܲܝ 398 ܕܕܼܵܡܹ̇ܐ ܕܘܼܡܝܵܗ̇ ܠܗܵܝ̇ ܛܵܥܝܘܼܬܼܵܐ ܕܲܒܼܦܲܪܕܲܝܣܵܐ ܀ 399 ܚܲܕܼܘ ܢܝܼܫܵܐ ܕܲܢܟܼܝܼܠܘܼܬܼܵܐ ܕܗܵܝ̇ ܘܲܕܼܗܵܕܹܐ: pb. 234 400 ܘܗܘ̤ܝܘܼ ܢܟܼܝܼܠܵܐ ܕܲܢ̣ܟܲܠ ܬܲܡ̇ܢ ܘܐܲܛܥܝܼ ܗܵܪܟܵܐ ܀ 401 :ܪܲܓܿܝܼ ܕܵܡ̇ܝܵܐ ܗܵܕܹܐ ܛܘܼܥܝܲܝ ܕܡ̇ܝܘܿܬܼܘܼܬܼܵܐ 402 ܠܗܵܝ̇ ܛܵܥܝܘܼܬܼܵܐ ܕܚܵܣܘܿܡܘܼܬܼܵܐ ܘܲܕܼܒܼܝܼܫܘܼܬܼܵܐ ܀ 403 :ܡ̣ܢ ܒܝܼܫܘܼܬܼܵܐ ܐܸܡ̣ܲܪ ܕܲܟܼܠ̣ܵܐ ܠܐܘܼܟܼܠܵܐ ܕܦܹܐܪܵܐ 404 ܘܲܒܼܪܵܚܡܘܼܬܼܵܐ ܐܲܛܥܝܼ ܗܵܫܵܐ ܕܩܲܒܸܿܠ ܕܲܢܡܘܼܬܼ ܀ 405 :ܒܚܘܼܒܵܐ ܠܲܡ ܡ̣ܝܼܬܼ ܡܲܬܼܩܸܢ ܐ̄ܢܵܫܵܐ ܡܸܛܠ ܐ̄ܢܵܫܵܐ 406 ܗܵܐ ܛܵܥܝܘܼܬܼܵܐ ܕܡܲܠܝܵܐ ܛܘܼܥܝܲܝ ܕܠܵܐ ܡܘܼܫ̈ܚܵܬܼܵܐ ܀ 407 :ܥܲܣܩܵܐ ܡܫܘܼܚܬܼܵܐ ܕܗܵܕܹܐ ܛܘܼܥܝܲܝ ܡ̣ܢ ܡܘܼܫ̈ܚܵܬܼܵܐ 408 ܘܲܟܼܡܵܐ ܕܢܵܘܪܸܟ ܫܲܪܒܵܐ ܕܡܸܠܹ̈ܐ ܟܲܪ̈ܝܵܢ ܡܸܢܵܗ̇ ܀ 409 :ܡܲܓܿܝܼܐܘܼܬܼܵܗ̇ ܥܨ̣ܵܬܲܢܝ ܕܐܲܣܓܹܐ ܡܸܠܲܬܼܝ ܨܹܐܕܹܝܗ̇ 410 ܘܫܸܒܼܩܹ̇ܬܼ ܡܸܠܬܼܵܐ ܕܥܲܠ ܡܲܠܲܐܟܹ̈ܐ ܘܐܸܡ̇ܪܹܬܼ ܥܠܹܝܗ̇ ܀ 411 :ܣܲܓܿܝܼܐܘܼܬܼܵܗ̇ ܚܙܹ̇ܝܬܼ ܕܲܕܼܠܲܚܬܹܗ ܠܫܲܝܢܵܐ ܕܐ̄̇ܢܵܫܵܐ 412 ܥܲܠ ܗܵܝ̇ ܚܸܠܛܹ̇ܬܼ ܫܲܪܒܵܗ̇ ܒܫܲܪܒܵܐ ܕܲܡܫܲܝܵܢܹ̈ܐ ܀ 413 :ܠܲܫܡܲܝܵܢܹ̈ܐ ܚܙܹ̇ܝܬܼ ܕܲܡܥܲܠܹܝܢ ܡ̣ܢ ܟܠ ܚܲܫܝܼ̈ܢ 414 ܘܚܸܫܹ̇ܬܼ ܣܲܓܼܝܼ ܕܠܲܡܟܲܝܢܵܢܗܘܿܢ ܡܲܚܫܝܼܢ ܣܲܟܼܠܹ̈ܐ ܀ 415 :ܒܚܲܫܵܐ ܕܲܥܠܵܘܗܝ ܚܸܫܹ̇ܬܼ ܣܲܓܿܝܼ ܘܲܡܠܹ̇ܝܬܼ ܚܲܫܵܐ 416 ܘܫܸܒܼܩܹ̇ܬܼ ܐܘܼܪܚܵܐ ܘܲܪܕܹܝܬܼ ܒܐܘܼܪܚܵܐ ܕܲܪܕܼܵܘ ܥܲܛܠܹ̈ܐ ܀ 417 :ܦܵܢܝ ܢܲܦܫܝ ܠܡܸܠܬܹܟܼܝ ܠܐܘܼܪܚܵܐ ܕܡܸܠܬܼܵܐ ܕܥܲܠ ܪ̈ܘܼܚܵܢܹܐ 418 ܘܠܵܐ ܬܸܬܲܩܠܝܼܢ ܒܲܫܒܼܝܼܠ ܙܹܐܦܵܐ ܕܪ̈ܵܚܡܲܝ ܚܲܫܵܐ ܀ 419 :ܕܕܼܵܝ ܬܲܩܢܵܐܝܼܬܼ ܒܫܲܢܵܐܝܼܬܼ ܒܫܲܪܒܵܐ ܬܲܩܢܵܐ ܕܬܲܩܢܲܝ̈ ܗܵܘܢܵܐ 420 ܘܲܒܼܥܵܝ ܫܲܦܝܼܪ ܒܥܵܬܼܵܐ ܦܐܝܼܬܼܵܐ ܕܣܘܼܥܪ݁ܵܢܲܝܗܘܿܢ ܀ 421 :ܒܥܸܵܝ ܠܲܡ ܕܐܲܝܟܲܢ ܡܨܹܝܢ ܕܲܢܙܝܼܥܘܼܢ ܟܝܵܢܹ̈ܐ ܚܲܪ̈ܫܹܐ 422 ܘܒܲܐܝܢܵܐ ܚܲܝܠܵܐ ܚܵܣ̇ܢܝܼܢ ܚܲܝܠܵܐ ܕܚܹܝܠ ܐܸܣܛܘܼܟܼܣܹ̈ܐ ܀ 423 :ܐܲܝܟܲܢܵܐ ܟܲܝ ܡܓܲܫܡܝܼܢ ܠܐܵܐܲܪ ܠܵܐ ܓܘܼܫܡܵܢܵܐ 424 ܘܦܵܢܹ̇ܝܢ ܘܥܵܒܼ̇ܕܲܝܼܢ ܓܘܼܫܡܵܢܘܼܬܹܗ ܪܘܼܚܵܢܝܵܬܼܵܐ ܀ 425 :ܐܲܝܟܲܢܵܐ ܟܲܝ ܚܵܠ̇ܛܝܼܢ ܥܲܪܝܹܗ ܒܚܲܡܝܼܡܘܼܬܼܵܐ 426 ܘܬܼܘܼܒܼ ܦܵܪܫܝܼܢ ܠܹܗ ܘܲܡܩܝܼܡܝܼܢ ܠܹܗ ܒܛܲܟܼܣܵܐ ܩܲܕܼܡ̇ܐ ܀ 427 :ܐܲܝܟܲܢ ܥܵܒܼ̇ܪܵܐ ܩܲܛܝܼܢܘܼܬܼܗܘܿܢ ܒܩܲܛܝܼܢܘܼܬܹܗ 428 ܟܲܕܼ ܬܲܠܝܵܐ ܒܗܘܿܢ ܝܲܩܝܼܪܘܼܬܼܵܐ ܕܫܸܡܫܵܐ ܘܣܲܗܪܵܐ ܀ 429 :ܟܡܵܐ ܟܲܝ ܡܲܩܲܬܼ ܚܵܘܪܵܐ ܕܲܒܼܗܘܿܢ ܒܣܘܼܥܪ̈ܵܢܲܝܗܘܿܢ 430 ܘܠܵܐ ܡܸܬܿܕܵܘܲܕܼ ܡܲܬܼܩܵܠ ܛܲܟܼܣܵܐ ܕܲܒܼܢܲܗܝܼܪܹ̈ܐ ܀ 431 :ܟܡܵܐ ܟܲܝ ܦܵܪܚ̇ܝܼܢ ܡ̣ܢ ܟܲܪ ܕܐܝܼܬܼܵܘܗܝ ܚܘܼܕܼܪܵܐ ܕܐܲܪܥܵܐ 432 ܘܐܲܝܟܲܢ ܡ̇ܛܹ̇ܝܢ ܠܟܸܕܵܢ ܪܵܡܫܵܐ ܠܚܘܼܕܼܪܵܐ ܐ̄̇ܚܪܹܢܵܐ ܀ 433 :ܐܲܝܟܲܢ ܬܵܩ̇ܠܝܼܢ ܫܵܥܹ̈ܐ ܕܠܸܠܝܵܐ ܐܵܦ ܕܐܝܼܡܵܡܵܐ 434 ܘܠܵܐ ܛܥܵܘ ܘܛܵܥܹ̇ܝܢ ܛܲܟܼܣܵܐ ܕܩܲܒܸܿܠܘ ܡ̣ܢ ܫܘܼܪܵܝܵܐ ܀ 435 :ܟܡܵܐ ܟܲܝ ܗܵܘܹ̇ܐ ܡܸܢܝܵܢ ܐܲܠܦܹ̈ܐ ܕܠܸܓܼܝܘܿܢܲܝ̈ܗܘܿܢ 436 ܕܗܸܢܘ̣ܿܢ ܥܲܡ ܟܠ ܘܟܼܠܵܐ ܥܲܡܗܘܿܢ ܘܟܼܠ ܒܐܝܼܕܲܝ̈ܗܘܿܢ ܀ 437 ܡܲܢ̣ܘܼ ܣܵܦܹ̇ܩ ܕܢܸܡܢܹܐ ܟܵܘܟܿܒܹ̈ܐ ܘܡܸܢܝܵܢ ܐ̄ܢܵܫܵܐ: pb. 235 438 ܕܗܵܐ ܟܠ ܟܵܘܟܿܒܼܵܐ ܘܟܼܠ ܒܲܪܢܵܫܵܐ ܚܲܕܼ ܐܝܼܬܼ ܥܲܡܹܗ ܀ 439 :ܡܲܢ̣ܘܼ ܝܵ̇ܕܲܥ ܕܲܢܚܘܼܪ ܫܲܦܝܼܪ ܒܟܼܠ ܫܘܼܚܠܵܦܝܼ̈ܢ 440 ܕܗܵܐ ܠܵܐ ܗܵܘܹ̇ܐ ܚܲܕܼ ܫܘܼܚܠܵܦܵܐ ܕܠܵܘ ܗܸܢܘ̣ܿܢ ܒܹܗ ܀ 441 :ܡܲܢ ܡܸܣܬܲܟܲܠ ܒܫܘܼܠܛܵܢ ܡܲܠ̈ܟܹܿܐ ܘܕܼܘܼܒܵܪ ܥܲܡܡܹ̈ܐ 442 ܕܗܵܐ ܠܣܘܼܥܪܵܢܗܘܿܢ ܡܲܓܼܥܲܠ ܛܲܟܼܣܵܐ ܕܣܘܼܥܪ݁ܵܢܲܝܗܘܿܢ ܀ 443 :ܡܲܢ̣ܘܼ ܫܡܝܼܥ ܠܹܗ ܡܸܠܲܬܼ ܕܵܘܝܼܕܼ ܥܲܠ ܩܘܼܕܵܫܗܘܿܢ 444 ܕܲܡܩܲܕܿܫܵܢܹ̈ܐ ܘܡܫܲܒܿܚܵܢܹ̈ܐ ܟܲܢܝܲܬ̤ ܐܸܢܘܿܢ ܀ 445 :ܒܲܚܕܼܵܐ ܡܸܠܬܼܵܐ ܚܵܘܝܲܬ̤ ܐܸܢܘܿܢ ܪܘܼܚܵܐ ܕܩܘܼܕܼܫܵܐ 446 ܘܚܵܘܝܲܬ̤ ܕܲܡܨܵܝܢ ܠܲܡܫܲܒܵܚܘܼ ܒܗܵܝ̇ ܕܲܡܫܲܒܿܚܝܼܢ ܀ 447 :ܡܲܢ ܟܲܝ ܡܸܫܟܲܚ ܠܡܹܐܚܲܕܼ ܛܲܟܼܣܵܐ ܕܣܘܼܥܪ̈ܵܢܲܝܗܘܿܢ 448 ܕܠܲܝܬܿ ܡܸܢܝܵܢܵܐ ܠܲܡ̈ܢܵܘܵܬܼܵܐ ܕܗܸܢܘ̣ܿܢ ܡܵܢܹ̇ܝܢ ܀ 449 :ܚܲܕܼܘܼ ܒܲܠܚܘܿܕܼ ܕܡ̇ܢܹ̇ܐ ܘܚܵܫܹ̇ܒܼ ܥܲܕܼܠܵܐ ܢܸܗܘܘܿܢ 450 ܘܐܲܝܟ ܡܸܡܝܵܗܘܿܢ ܠܒ݂ܲܟ ܗ̄ܘ̣ܵܐ ܣܵܟ̣ܵܐ ܕܣܘܼܥܪ̈ܵܢܲܝܗܘܿܢ ܀ 451 :ܝܵ̇ܕܲܥ ܗ̄ܘ̣ܵܐ ܠܗܘܿܢ ܕܲܟܼܡܵܐ ܗܵܘܹ̇ܝܢ ܘܐܲܝܟܲܢ ܐܸܢܘܿܢ 452 ܘܲܡܛܲܟܿܣܝܼܢ ܠܹܗ ܥܲܕܼܠܵܐ ܢܩܘܼܡܘܼܢ ܥܲܠ ܫܘܼܠܛܵܢܵܐ ܀ 453 :ܒܚܝܼܪܝܼܢ ܗ̄ܘ̣ܵܘ ܠܹܗ ܒܟܼܘܼܪ ܒܘܼܚܪܵܢܹܗ ܥܲܕܼܠܵܐ ܢܹܐܬܼܘܿܢ 454 ܘܲܓܼܠܸܐ ܗ̄ܘ̣ܵܐ ܠܹܗ ܫܪܵܪܵܐ ܕܲܒܼܗܘܿܢ ܘܙܹܐܦܵܐ ܕܲܒܼܗܘܿܢ ܀ 455 :ܓܠܸܐ ܗ̄ܘ̣ܵܐ ܠܪܸܡܙܹܐ ܕܲܟܼܡܵܐ ܡܸܢܗܘܿܢ ܡܩܵܘܹܝܢ ܨܹܐܕܼܵܘܗܝ 456 ܘܲܟܼܡܵܐ ܢܵܦ̇ܩܝܼܢ ܠܒܲܪ ܡ̣ܢ ܢܝܼܫܵܐ ܕܦܵܩܘܿܕܼܘܼܬܹܗ ܀ 457 :ܛܪܝܼܕܼܝܼܢ ܗ̄ܘ̣ܵܘ ܠܹܗ ܫܹܐܕܹ̈ܐ ܛܪ̈ܘܼܢܹܐ ܥܲܕܼܠܵܐ ܢܸܛܥܘܿܢ 458 ܘܲܥܲܠܹܝܢ ܗ̄ܘ̣ܵܘ ܥܝܼܪ̈ܲܝ ܪܵ.ܡ̇ܐ ܠܒܲܝܬܵܝܘܼܬܹܗ ܀ 459 :ܫܪܸܐ ܗ̄ܘ̣ܵܐ ܣܵܥܠܵܐ ܪܹܫܵܐ ܕܐܵܐܲܪ ܡ̣ܢ ܫܘܼܠܛܵܢܹܗ 460 ܘܲܡܩܲܝܡܝܼܢ ܗ̄ܘ̣ܵܘ ܕܒܹܝܬܼ ܓܲܒܼܪܝܹܠ ܒܼܕܼܘܼܟܲܬܼ ܕܲܪܓܹܗ ܀ 461 :ܡܝܲܩܪܝܼܢ ܗ̄ܘ̣ܵܘ ܠܹܗ ܒܛܲܟܼܣܵܐ ܘܕܲܪܓܵܐ ܒܵܬܸܿܪ ܙܲܒܼܢܹ̈ܐ 462 ܘܠܲܝܬܿ ܗ̄ܘ̣ܵܐ ܛܲܟܼܣܵܐ ܕܚܲܣܝܼܪ ܛܲܟܼܟܵܣܵܘ̈ܗܝ ܀ 463 :ܥܲܡ ܐܝܼܬܼܘܼܬܼܵܐ ܐܝܼܬܲܝܗܘܿܢ ܗ̄ܘ̣ܵܘ ܗܵܠܹܝܢ ܕܲܬܼܢܹܝ̇ܬܼ 464 ܠܵܘ ܒܐܝܼܬܼܘܼܬܼܵܐ ܐܸܠܵܐ ܒܐ̄ܪܵܙܵܐ ܕܲܥܬܼܝܼ̈ܕܼܵܬܼܵܐ ܀ 465 :ܒܲܥܬܼܝܼ̈ܕܼܵܬܼܵܐ ܐܝܼܬܲܝܗܹܝܢ ܗ̣̄ܘܲܝ̈ ܠܵܘ ܒܲܥ̇ܒܼܵܕܹ̈ܐ 466 ܘܝܼܕܼܵܝܼ̈ܥܵܢ ܗ̣̄ܘܲܝ̈ ܘܝܼܗܝܼ̈ܒܵܢ ܗ̣̄ܘܲܝ̈ ܐܲܟܼܡܵܐ ܕܝܵ̇ܕܲܥ ܀ 467 :ܝܼܕܲܝܼ̈ܥܵܢ ܗ̣̄ܘܝ̈ ܠܗܵܝ̇ ܝܼܕܲܥܬܼܵܐ ܕܲܒܼܪܵܬ̤ ܐܸܢܹܝܢ 468 ܠܙܲܒܼܢܵܐ ܕܝܸܕܼܥܲܬ̤ ܕܡܸܬܼܒܲܥ̈ܝܵܢ ܗ̣̄ܘܲܝ̈ ܒܙܲܒܼܢܵܐ ܕܥܵܕܲܪ ܀ 469 :ܒܙܲܒܼܢܵܐ ܕܥܵܕܲܪ ܒܪ̣ܵܐ ܒܵܪܘܿܝܵܐ ܒܪܝܼܬܼܵܐ ܕܲܒܼܪ̣ܵܐ 470 ܘܚܵܘܝܼ ܐܘܼܪܚܵܐ ܒܝܲܕܼ ܡܲܠܲܐܟܹ̈ܐ ܕܬܸܪܕܸܿܐ ܨܹܐܕܼܵܘܗܝ ܀ 471 :ܒܝܲܕܼ ܡܵܠܲܐܟܹ̈ܐ ܐܲܠܦܹܗܥ ܠܥܵܠܡܵܐ ܥܲܠ ܡ̇ܪܘܼܬܹܗ 472 ܕܲܒܼܗܘܿܢ ܪܵܕܹܐ ܘܲܡܚܲܟܼܵܡ ܠܹܗ ܥܕܲܡ̇ܐ ܠܚܲܪܬܼܵܐ ܀ 473 :ܥܲܡ ܚܲܝܘܼܬܹܗ ܣܵܥܲ݁ܪ ܚܲܝܹ̈ܐ ܕܲܟܼܪܸܐ ܚܲܝܹ̈ܐ 474 ܘܠܵܐ ܡܲܪܦܸܐ ܠܹܗ ܕܢܸܣܥܘܿܪ ܡܸܕܸܿܡ ܒܸܠܥܵܕܲܝܗܗܘܿܢ ܀ pb. 236 475 :ܠܲܝܬܿ ܠܹܗ ܠܥܵܠܡܵܐ ܡܸܕܹܿܡ ܕܲܟܼܣܸܐ ܡ̣ܢ ܡܲܠܲܐܟܹ̈ܐ 476 ܘܠܵܐ ܠܡܲܠܲܐܟܹ̈ܐ ܐܝܼܬܼ ܫܘܼܠܛܵܢܵܐ ܠܒܲܪ ܡ̣ܢ ܪܲܗܛܹܗ ܀ 477 :ܐܹܗܘ̣ ܪܵܗ̇ܛܝܼܢ ܪܲܗܛܝܼܢ ܪܲܗܛܵܐ ܟܠܝܼܠ ܙܵܟܼܘܼܬܼܵܐ 478 ܘܛܵܒܼ ܡܸܬܼܝܲܐܒܼܝܼܢ ܕܲܢܛܲܟܿܣܘܼܢܵܝܗܝ ܕܠܵܐ ܪܹܫܝܝܵܢܵܐ ܀ 479 :ܒܥܲܡܠܹܗ ܕܥܵܠܡܵܐ ܐܲܥܢܝܼ ܐܸܢܘܿܢ ܡ̇ܪܹܐ ܕܥܵܠܡܵܐ 480 ܕܢܸܗܘܘܿܢ ܥܵܬܼܪܝܼܢ ܡ̣ܢ ܡܸܣܟܹܿܢܵܐ ܕܡܲܬܲܪܣܹܝܢ ܠܹܗ ܀ 481 :ܠܲܣܢܝܼܩܘܼܬܼܗܘܿܢ ܣܘܼܢܩܵܢ ܚܲܝܵܘ̈ܗܝ ܡܡܲܠܹܝܢ ܟܠܫܵܥ 482 ܘܡ̇ܐ ܕܝܵܗ̇ܒܿܝܼܢ ܠܹܗ ܢܵܣ̇ܒܿܝܼܢ ܡܸܢܹܗ ܐܲܝܟ ܚܲܣܝܼܪܹ̈ܐ ܀ 483 :ܠܵܘ ܣܘܼܢܩܵܢܵܐ ܕܐܲܠܵܗ ܟܠܵܐ ܡܡܲܠܹܝܢ ܒܐܝܼܕܼܵܘ̈ܗܝ 484 ܕܠܵܘ ܗܘ̤ ܥܵܠܡܵܐ ܚܵܫܲ̇ܚ ܪܲܗܛܹܗ ܠܲܡܬܲܩܢܵܢܹܗ ܀ 485 :ܠܵܐ ܒܨܝܼܪ ܚܲܝܠܵܐ ܕܲܒܼܪ̣ܵܐ ܒܪܝܼܬܼܵܐ ܡ̣ܢ ܠܵܐ ܡܸܕܸܿܡ 486 ܠܲܡܕܲܒܵܪܘܼ ܠܲܥܒܼܵܕܼ̇ ܐܝܼܕܼܵܘ̈ܗܝ ܒܸܠܥܵܕܼ ܥܝܼܪܹ̈ܐ ܀ 487 :ܠܹܗ ܘܲܠܥܲܒܼܕܵܘ̈ܗܝ ܡܝܲܩܪܝܼܢ ܒܐܝܼܕܼܵܘ̈ܗܝ ܣܥ݂ܲܕ ܒܐܝܼܕܲܝ̈ܗܘܿܢ 488 ܘܲܠܫܝܼܛܘܼܬܹܗ ܡܪܝܼܡ ܘܲܡܥܲܠܸܐ ܨܹܝܕܼ ܪܲܒܿܘܼܬܹܗ ܀ 489 :ܛܲܝܒܿܘܼ ܦܵܪܥܝܼܢ ܟܸܢܫܲܝ̈ ܪܵܘܡ̇ܐ ܒܣܘܼܥܪ̈ܵܢܲܝܗܘܿܢ 490 ܘܡ̇ܢ ܐܸܡܲ̇ܪ ܐ̄ܢܵܐ ܕܦܵܪܥܝܼܢ ܠܵܐ ܡܨܹܝܢ ܦܵܪܥܝܼܢ ܀ 491 :ܙܥܘܿܪ ܦܘܼܪܥܵܢܵܐ ܐܸܢ ܢܸܬܼܦܲܚܲܡ ܥܲܡ ܛܲܝܒܿܘܼܬܼܵܐ 492 ܡ̇ܢ ܐܸܡܲ̇ܪ ܐ̄ܢܵܐ ܕܲܙܥܘܿܪ ܘܲܙܥܘܿܪ ܕܟܲܕܼ ܠܵܐ ܐܝܼܬܼܵܘܗܝ ܀ 493 :ܠܲܝܬܵܘܗܝ ܡܸܕܸܿܡ ܦܘܼܪܥܵܢ ܐܲܓܼܪܵܐ ܨܹܝܕܼ ܒܵܪܘܿܝܵܐ 494 ܘܐܸܢܗܘ̤ ܕܐܝܼܬܼܵܘܗܝ ܒܛܲܝܒܿܘܼ ܐܝܼܬܼܵܘܗܝ ܠܵܐ ܗ̄ܘ̣ܵܐ ܒܥܲܡܠܵܐ ܀ 495 :ܠܵܘ ܡ̣ܢ ܥܲܡܠܵܐ ܫܵܘܹ̇ܝܢ ܥܝܼܪܹ̈ܐ ܦܘܼܥܵܢ 496 ܐܸܠܵܐ ܒܛܲܝܒܿܘܼ ܢܵܣ̇ܒܿܝܼܢ ܐܲܓܼܪܵܐ ܡ̣ܢ ܛܲܝܒܿܘܼܬܼܵܐ ܀ 497 :ܡܲܓܵܢ ܐܸܡ̇ܪܹܬܼ ܕܢܵܣ̇ܒܿܝܼܢ ܛܘܼܒܹ̈ܐ ܠܵܐ ܗ̄ܘ̣ܵܐ ܡܲܓܵܢ 498 ܐܸܠܵܐ ܕܠܵܐ ܡܨܸܐ ܥܵܠܡܵܐ ܠܡܸܣܦܲܩ ܠܦܸܚܡܵܐ ܕܛܘܼܒܹ̈ܐ ܀ 499 :ܛܵܒܼ ܫܲܦܪܝܼܪܝܼܢ ܐܵܦ ܥܲܡܠܲܝ̈ܗܘܿܢ ܕܲܫܡܲܝܵܢܹ̈ܐ 500 ܘܠܵܐ ܐ̄ܢܵܫ ܡܸܫܟܲܚ ܠܲܡܨܵܪ ܫܘܼܦܪܵܐ ܕܪܸ̈ܥܝܵܢܲܝܗܘܿܢ ܀ 501 :ܫܲܦܝܼܪܘܼܬܼܗܘܿܢ ܥܸܒܼܕܲܬ̤ ܐܸܢܘܿܢ ܡ̇ܪ̈ܲܝ ܫܘܼܦܪܵܐ 502 ܘܐܸܠܘܼܠܵܐ ܗܘ̤ܵܘ ܠܵܐ ܫܵܦ̇ܪܝܼܢ ܗ̄ܘ̣ܵܘ ܠܝܵܗܹ̇ܒܼ ܫܘܼܦܪܵܐ ܀ 503 :ܪܲܒܿܘܼܬܼ ܚܘܼܒܿܗܘܿܢ ܩܲܪܒܲܬ̤ ܐܸܢܘܿܢ ܡܲܠܟܵܐ 504 ܐܵܦ ܠܹܗ ܠܡܲܠܟܵܐ ܣܲܓܿܝܼ ܫܸܦܪܲܬ̤ ܕܢܵܘܪܸܒܼ ܐܸܢܘܿܢ ܀ 505 :ܐܹܝܘ ܬܸܕܼܡܘܼܪܬܵܐ ܕܡ̣ܢ ܪܲܒܿܘܼܬܼܵܐ ܠܦܘܼܬܼ ܥܵܒܼܘܿܕܼܵܐ 506 ܕܥܲܒܼ̈ܕܹܿܐ ܥܒܼܝܼ̈ܕܹܐ ܩ̣ܢܵܘ ܫܘܼܠܛܵܢܵܐ ܕܥܵܒܼܘܿܕܼܘܼܬܼܵܐ ܀ 507 :ܒܚܹܝܠ ܥܵܒܼܘܿܕܼܵܐ ܡܙܝܼܥܝܼܢ ܟܠܵܐ ܒܝܲܕܼ ܥܵܒܼܘܿܕܼܵܐ 508 ܘܠܵܐ ܛܲܥܝܵܐ ܠܗܘܿܢ ܕܲܒܼܚܹܝܠ ܚܲܝܠܹܗ ܚܵܣ̇ܢܝܼܢ ܟܠܵܐ ܀ pb. 237 509 :ܗܸܢܘܿܢ ܠܵܐ ܛܥ̣ܵܘ ܫܸܡ ܥܵܒܼܘܿܕܼܵܐ ܕܡܸܬܼܚܲܝܠܝܼܢ ܒܹܗ 510 ܘܲܒܼܢܲܝ̈ܢܵܫܵܐ ܛܥ̣ܵܘ ܘܐܸܬܿܕܵܘܲܕܼܘ ܒܗܵܘܵܐ ܕܲܒܼܗܘܿܢ ܀ 511 :ܒܸܫܡ ܥܵܒܼܘܿܕܼܵܐ ܟܲܢܝܼܘ ܐܸܢܘܿܢ ܥܒܼܝܼܕܹ̈ܐ ܕܲܛܥ̣ܵܘ 512 ܘܲܠܫܲܘܼܠܛܵܢܗܘܿܢ ܝܲܗ̣̄ܒܼܘ ܫܘܼܠܛܵܢܵܐ ܕܥܵܒܼܘܿܕܼܬܼܵܐ ܀ 513 :ܠܫܸܡܗܘܿܢ ܦܲܠܓܼܘܼܗܝ ܠܲܫܡܵܐ ܪܲܒܵܐ ܕܐܲܠܵܗܘܼܬܼܵܐ 514 ܕܲܠܚܲܕܼ ܡܸܢܗܘܿܢ ܝܲܗ̣̄ܒܼܘ ܠܹܗ ܡܢܵܬܼܵܐ ܕܒܼܵܪܘܿܝܘܼܬܼܵܐ ܀ 515 :ܠܵܐ ܛܵܥܲܝ̈ܵܐ ܠܵܐ ܬܸܬܿܕܵܘܕܼܘܼܢ ܘܬܸܛܥܘܿܢ ܣܲܓܿܝܼ 516 ܕܐܝܼܬܼܝܵܐ ܚܲܕܼܘܼ ܘܡܸܢܹܗ ܘܲܠܟܼܵܐ ܗܘ̤ܵܘ ܟܠܡܸܕܸܿܡ ܀ 517 :ܚܲܕܼ ܒܵܪܘܿܝܵܐ ܕܠܹܗܘ̣ ܦܲܐܝܵܐ ܒܵܪܘܿܝܘܼܬܼܵܐ 518 ܘܚܲܕܼ ܒܵܪܘܿܝܵܐ ܕܠܹܗ ܕܵܕܩܵܐ ܗ̄ܘ̣ܵܬܼ ܫܸܡ ܐܝܼܬܼܘܼܬܼܵܐ ܀ 519 :ܠܵܐ ܦܠܸܐ ܠܥܲܒܼ̈ܕܹܿܐ ܫܸܡ ܥܵܒܼܘܿܕܼܵܐ ܥܒܼܝܼܪܹ̈ܐ ܕܲܛܥ̣ܵܘ 520 ܘܠܵܐ ܠܥܵܒܼܘܼܕܼܵܐ ܕܢܸܬܸܿܠ ܕܲܪܓܹܗ ܠܲܥ̇ܒܼܵܕܼ ܐܝܼܕܼܵܘ̈ܗܝ ܀ 521 :ܠܵܐ ܡܢܵܚܝܼܢ ܒܵܗ̇ ܪ̈ܘܼܚܵܢܵܝܹܐ ܒܗܵܕܹܐ ܛܘܼܥܝܲܝ 522 ܘܡ̇ܢ ܐܵܡܲ̈ܪ ܐ̄ܢܵܐ ܕܲܡܢܵܚܝܼܢ ܒܵܗ̇ ܘܠܵܐ ܡܢܵܚܝܼܢ ܒܵܗ̇ ܀ 523 :ܒܣܘܼܥܪ̈ܵܢܲܝܗܘܿܢ ܡܚܵܘܹܝܢ ܚܲܝܠܵܐ ܕܥܵܒܼܘܿܕܼܘܼܬܼܵ 524 ܘܐܸܠܘ̣ ܡܲܨܝܵܐ ܒܩܵܠܵܐ ܩܵܥܹ̇ܝܢ ܕܐܝܼܬܼܝܵܐ ܚܲܕܼܘܼ ܀ 525 :ܠܚܲܕܼ ܥܵܒܼܘܿܕܼܵܐ ܝܼܕܲܥܘ̣ ܠܘܼܩܕܲܡ ܟܲܕܼ ܐܸܬܿܬܲܩܲܢܘ 526 ܘܠܵܐ ܬܘܼܒܼ ܝܵ̇ܕܼܥܝܼܢ ܚܲܝܠܵܐ ܐ̄ܚܪܹܢܵܐ ܐܸܠܵܐ ܐܸܢ ܗܘ̤ ܀ 527 :ܒܨܸܒܼܝܵܢ ܚܘܼܒܹܿܗ ܐܲܣܝܼܪ ܚܘܼܒܵܐ ܕܪܸ̈ܥܝܵܢܲܝܗܘܿܢ 528 ܘܣܲܓܿܝܼ ܙܗܝܼܪܝܼܢ ܕܠܵܐ ܢܸܬܼܪܲܦܘܿܢ ܡ̣ܢ ܥܸܢܝܵܢܹܗ ܀ 529 :ܒܗܵܘ̇ ܥܸܢܝܵܢܵܐ ܕܐܲܥܢܝܼ ܐܸܢܘܿܢ ܥܢܹܝܢ ܒܟܼܠܥܸܕܵܢ 530 ܘܠܲܝܬܿ ܥܸܕܵܢܵܐ ܕܠܵܐ ܗܵܪܓܿܝܼܢ ܒܹܗ ܚܘܼܫܵܒܲܝ̈ܗܘܿܢ ܀ 531 :ܗܸܪܓܵܐ ܛܵܒܼܵܐ ܪܡܸܐ ܒܲܝܢܵܬܼܗܘܿܢ ܠܹܠܲܝ ܐܝܼܡܵܡ 532 ܘܲܟܼܡܵܐ ܕܗܵܪܓܿܝܼܢ ܬܘܼܒܼ ܗܵܪܓܿܝܼܢ ܒܹܗ ܕܠܵܐ ܣܲܒܼܥܘܼܬܼܵܐ ܀ 533 :ܒܣܲܒܼܪܵܐ ܛܵܒܼܵܐ ܐܲܣܪܝܼܢ ܗ̄ܘ̣ܵܘ ܒܛܘܼܒܹ̈ܐ ܕܲܥܠܵܘܗܝ 534 ܘܗܵܢܵܘ̇ ܬܲܗܪܵܐ ܕܲܟܼܡܵܐ ܡܙܝܼܥܝܼܢ ܠܵܐ ܡܸܬܼܪܲܦܹܝܢ ܀ 535 :ܠܵܐ ܡܸܣܬܲܒܼܥܵܐ ܪܸܚܡܲܬ ܛܘܼܒܹ̈ܐ ܠܛܵܒܹ̈ܐ ܕܲܒܼܗܘܿܢ 536 ܘܲܛܥ̣ܵܗ̇ ܝܲܨܪܲܢ ܠܪܸܚܡܲܬܼ ܛܘܼܒܹ̈ܐ ܒܪܲܦܝܼܘܼܬܼ ܝܲܨܪܲܢ ܀ 537 :ܛܘܼܒܹ̈ܐ ܛܵܒܹ̈ܐ ܡ̣ܠܲܟ ܒܼܵܘܿܝܵܐ ܠܗܘܿܢ ܘܲܠܐ̄ܢܵܫܵܐ 538 ܛܘܼܒܼ ܠܲܕܼܢܵܛܲܪ ܥܘܼܗܕܵܢ ܛܘܼܒܹ̈ܐ ܒܓܼܵܘ ܪܸܥܝܵܢܹܗ ܀ 539 :ܠܡܲܠܟܿܘܼܬܼ ܪܵܘܡ̇ܐ ܙܲܡܢܹܗ ܠܓܸܢܣܲܢ ܥܲܡ ܟܸܢܫܲܝ̈ܗܘܿܢ 540 ܛܘܼܒܼ ܠܲܕܼܫܵܘܹ̇ܐ ܘܥܵܐܹ̇ܠ ܥܲܡܗܘܿܢ ܠܐܲܝܟܵܐ ܕܥܵܐ̇ܠܝܼܢ ܀ 541 :ܬܵܘ ܡ̇ܝܝܘܿܬܹ̈ܐ ܢܸܗܘܸܐ ܚܲܒܼܪܹ̈ܐ ܠܠܵܐ ܡ̇ܝܘܿܬܹ̈ܐ 542 ܘܢܸܗܘܸܐ ܥܲܡܗܘܿܢ ܒܢܲܝ̈ ܝܵܪܬܿܘܼܬܼܵܐ ܕܛܘܼܒܹ̈ܐ ܡܠܝܼܟܹ̈ܐ ܀