Narsai: On the Soul - ܥܲܠ ܡܝܲܬܿܪܘܼܬܼܵܐ ܕܢܲܦܫܵܐ ܘܕܲܐܝܼܟܲܢܵܐ ܡܦܲܪܢܣܵܐ

1 :ܪܹܫ ܚܸܟܼܡܬܼܵܐ ܚܸܟܼܡܲܬܼ ܩܘܼܫܬܵܐ ܗ̄ܝܼ ܕܚܹܝܠ ܒܼܵܘܿܝܵܐ 2 ܕܡ̣ܢ ܠܵܐ ܡܸܕܼܿܡ ܒܪ̣ܵܐ ܟܠܡܸܕܸܿܡ ܕܲܟܼܣܸܐ ܘܲܓܼܠܸܐ ܀ 3 :ܪܹܫ ܣܘܼܟܵܠܵܐ ܠܡܸܣܬܲܟܵܠܘܼ ܒܒܼܵܪܘܿܝܘܼܬܹܗ 4 ܕܠܵܐ ܠܲܢܝܵܚܹܗ ܒܪ̣ܵܐ ܒܸܪ̈ܝܵܬܼܵܐ ܐܸܠܵܐ ܒܚܘܼܒܹܿܗ ܀ 5 :ܪܹܫ ܒܘܼܝܵܢܵܐ ܠܡܸܬܼܒܲܩܵܝܘܼ ܒܪܲܒܿܘܼܬܼ ܚܲܝܠܹܗ 6 ܕܲܛܥܝܼܢ ܥܵܠܡܵܐ ܘܲܡܕܲܒܲܪ ܠܹܗ ܐܲܝܟ ܨܸܒܼܝܵܢܹܗ ܀ 7 :ܪܹܫ ܝܼܕܲܥܬܼܵܐ ܠܡܸܕܲܥ ܚܘܼܒܹܿܗ ܕܨܹܝܕܼ ܬܘܼܩܵܢܵܘ̈ܗܝ 8 ܕܟܲܕܼ ܛܵܠܘܿܡܝܼܢ ܠܵܐ ܡܸܬܼܢܲܩܲܡ ܡ̣ܢ ܛܵܠܘ̇ܘ̈ܗܝ ܀ 9 :ܪܹܫ ܟܹܐܢܘܼܬܼܵܐ ܠܲܡܙܲܕܵܩܘܼ ܠܒܼܘܼܚܪܵܢ ܕܝܼܢܹܗ 10 ܕܟܲܕܼ ܛܵܒܼ ܡܲܗܡܸܐ ܠܵܐ ܛܵܥܹ̇ܐ ܠܹܗ ܪܸܡܙܵܐ ܕܥܲܝܢܹ̈ܐ ܀ 11 :ܪܹܫ ܛܲܝܒܿܘܼܬܼܵܐ ܠܡܸܣܪܲܓܼ ܣܲܓܿܝܼ ܒܒܲܣܝܼܡܘܼܬܹܗ 12 ܕܟܲܕܼ ܛܵܒܼ ܢܵܒܲܥ̇ ܡܙܝܼܓܼ ܚܵܘܣܵܢܵܐ ܒܩܲܫܝܼܘܼܬܼ ܢܸܓܼܕܘ̈ܗܝ ܀ 13 :ܪܹܫ ܦܘܼܪܫܵܢܵܐ ܕܦܵܪܘܿܫܘܼܬܼܵܐ ܠܡܸܦܪܲܫ ܫܲܦܝܼܪ 14 ܕܐܲܝܕܵܐ ܦܲܐܝܵܐ ܠܲܡܠܝܼܠܘܼܬܼܵܐ ܡ̇ܪܲܬܼ ܚܲܪ̈ܫܹܐ ܀ 15 :ܪܹܫ ܟܠܡܸܕܸܿܡ ܠܡܸܟܲܪ ܛܲܟܼܣܵܐ ܕܣܝܼܡ ܒܲܟܼܝܵܢܵܐ 16 ܕܢܸܗܘܸܐ ܫܵܠܹ̇ܡ ܟܝܵܢ ܡܲܠܵܠܹ̈ܐ ܠܡܸܠܬܼܵܐ ܕܲܒܼܗܘܿܢ ܀ 17 :ܪܹܫ ܢܵܡܘܿܣܵܐ ܠܡܸܬܼܗܲܓܵܝܘܼ ܒܢܵܡܘܿܣ ܪܘܼܚܵܐ 18 ܠܲܡܫܲܡܠܵܝܘܼ ܟܠ ܕܲܟܼܬܼܝܼ̈ܒܼܵܢ ܡ̣ܢ ܦܘܼܡ ܟܲܣܝܵܐ ܀ 19 :ܪܹܫ ܦܘܼܪܥܵܢܵܐ ܠܡܸܦܪܲܥ ܚܘܼܒܵܐ ܠܡܲܬܼܩܸܢ ܟܠܵܐ 20 ܕܝܲܩܲܪ ܡ̣ܢ ܟܠ ܨܠܸܡ ܒܲܪܢܵܫܵܐ ܘܲܩܪ̣ܵܝܗܝ ܀ 21 :ܚܵܘܼܒܵܐ ܚܲܝܵܒܼ ܟܠܢܵܫ ܠܡܬܲܩܢܵܢܹܗ 22 ܕܝܲܗ̣̄ܒܼ ܢܵܡܘܿܣܵܐ ܘܥܲܒܼ݂ܕܹܿܗ ܡ̇ܪܵܐ ܥܲܠ ܩܸܢܝܵܢܵܘ̈ܗܝ ܀ 23 :ܒܐܲܥܦܹ̈ܐ ܚܲܝܵܒܼ ܠܡܸܦܪܲܥ ܫܘܼܒܼܚܵܐ ܡ̣ܢ ܟܠ ܕܲܗܘ̤ܵܘ 24 ܕܗܘ̤ ܒܲܠܚܘܿܕܼܵܘܗܝ ܡܫܲܡܲܗ ܒܲܫܡܵܐ ܕܪܵܡ ܡ̣ܢ ܟܠܵܐ ܀ 25 ܠܹܗܘ̣ ܘܵܠܹ̇ܐ ܠܡܸܕܲܥ ܚܲܝܠܵܐ ܕܪܸܡܙܵܐ ܕܲܒܼܪ̣ܵܝܗܝ: pb. 239 26 ܕܩܵܡ̣ ܘܐܸܬܼܡܲܠܲܟ ܥܲܠ ܬܘܼܩܵܢܹܗ ܘܐܲܟܸܿܢ ܓܲܒܼܠܹܗ ܀ 27 :ܠܹܗܘ̣ ܦܲܐܝܵܐ ܠܲܡܙܲܕܵܩܘ̣ ܠܚܹܝܠ ܓܵܒܼܘܼܠܹܗ 28 ܕܒܼܐܝܼܕܼܘ ܓܲܒܼܠܹܗ ܘܡ̣ܢ ܪܘܼܚ ܦܘܼܡܹܗ ܢܦܲܚ̣ ܒܹܗ ܢܲܦܫܵܐ ܀ 29 :ܡܵܐܢܵܐ ܥܦܝܼܪܵܐ ܪܲܟܸܿܒܼ ܥܲܒܼ݂ܕܹܿܗ ܐܘܼܡ̇ܢܵܐܝܼܬܼ 30 ܦܲܓܼܪܵܐ ܓܼܠܝܵܐ ܘܢܲܦܫܵܐ ܟܣܝܼܬܼܵܐ ܚܲܕܼ ܒܲܪܢܵܫܵܐ ܀ 31 :ܒܲܕܼܡܘܼܬܼ ܨܲܠܡܵܐ ܨܵܪ ܒܹܗ ܚܲܝܠܵܐ ܕܒܼܵܪܘܿܝܘܼܬܹܗ 32 ܚܲܪ݁ܫܹܐ ܒܦܲܓܼܪܹܗ ܐܵܦ ܡܲܠܵܠܹ̈ܐ ܒܬܼܘܼܩܵܢ ܢܲܦܫܹܗ ܀ 33 :ܒܦܲܓܼܪܹܗ ܣܲܝܸܟ ܟܝܵܢ ܟܠܡܸܕܸܿܡ ܡܸܬܼܚܲܙܝܵܢܵܐ 34 ܘܲܒܼܓܼܵܘ ܢܲܦܫܹܗ ܟܸܬܫܲܝ̈ ܪܵܘܡ̇ܐ ܕܠܵܐ ܪܘܼܟܵܒܼܵܐ ܀ 35 :ܐ̄ܚܝܵܢܵܐ ܥܲܒܼ݂ܕܹܿܗ ܠܲܡܫܲܝܵܢܹ̈ܐ ܘܠܲܐܪ̈ܥܵܢܵܝܹܐ 36 ܘܐܲܝܟ ܕܲܒܼܢܵܘܣܵܐ ܐܲܡܥܲܪ ܒܹܗ ܟܠܝܼܠܹ̈ܐ ܘܚܲܪ̈ܫܹܐ ܀ 37 :ܡܲܫܟܿܢܵܐ ܕܚܘܼܒܵܐ ܢܲܩ̣ܫܹܗ ܒܐܲܪܥܵܐ ܚܲܟܿܝܼܡܵܐܝܼܬܼ 38 ܘܐܲܣܸܢ ܘܲܡ̣ܠܵܝܗܝ ܚܹܝܠ ܚܸܟܼ̈ܡܸܵܬܼܵܐ ܠܲܕܼܥܵܡܲ݁ܪ ܒܹܗ ܀ 39 :ܒܢܲܦܫܹܗ ܣܵܡܹ݂ܗ ܠܓܲܙܵܐ ܪܲܒܵܐ ܕܒܼܵܪܘܿܝܘܼܬܹܗ 40 ܕܡܸܢܵܗ̇ ܢܸܫܐܲܠ ܟܠ ܕܲܥܒܼܝܼܕܼܵܐ ܗ̄ܘ̣ ܣܘܼܢܩܵܢ ܚܲܝܵܘ̈ܗܝ ܀ 41 :ܣܝܼܡܲܬܼ ܓܲܙܵܐ ܗ̄ܝܼ ܕܲܣܬܼܝܼܪ̈ܵܬܼܵܐ ܢܲܦܫܵܐ ܕܐ̄ܢܵܫܵܐ 42 ܕܒܼܵܗ̇ ܗ̄ܘ̣ ܡܣܲܝܲܟ ܚܹܝܠ ܒܵܪܘܿܝܵܐ ܕܠܵܐ ܡܸܣܬܲܝܲܟ ܀ 43 :ܐ̄ܪ̈ܵܙܹܐ ܟܣܲܝܵ̈ܐ ܟܣܹܝܢ ܒܲܒܼܥܵܬܼܵܗ̇ ܕܥܲܠ ܬܘܼܩܵܢܵܗ̇ 44 ܘܠܵܐ ܡܸܬܼܒܲܕܿܩܝܼܢ ܐܸܠܵܐ ܒܚܲܝܠܵܐ ܕܒܼܵܪܘܿܝܘܼܬܼܵܗ̇ ܀ 45 :ܐ̄ܪܵܙ ܒܘܼܕܵܩܵܐ ܕܫܸܡ ܐܝܼܬܼܘܼܬܼܵܐ ܐܝܼܬܼ ܒܹܗ ܒܫܲܪܒܵܗ̇ 46 ܘܲܬܼܠܝܼܬܼܵܐܝܼܬܼ ܨܝܼܪ ܬܘܼܩܵܢܵܗ̇ ܒܡܸܠܬܼܵܐ ܘܚܲܝܠܵܐ ܀ 47 :ܕܵܡܹ̇ܐ ܗ̄ܘ̣ ܕܘܼܡܝܵܗ̇ ܒܡܸܕܸܿܡ ܩܲܠܝܼܠ ܠܒܼܘܼܕܵܩ ܩܢܘܿܡܹ̈ܐ 48 ܟܝܢܵܗ̇ ܠܐܲܒܼܵܐ ܘܡܸܠܬܼܵܗ̇ ܠܲܒܼܪܵܐ ܘܚܲܝܹܝܗ̇ ܠܪܘܼܚܵܐ ܀ 49 :ܠܵܘ ܒܲܟܼܝܵܢܵܗ̇ ܕܵܡܹ̇ܐ ܟܝܵܢܵܗ̇ ܠܲܟܼܝܵܢ ܟܲܣܝܵܐ 50 ܐܸܠܵܐ ܒܐ̄ܪܵܙܵܐ ܠܦܘܼܬܼ ܬܲܚܘܝܼܬܼܵܐ ܕܝܲܩܝܼܪܘܼܬܼܵܗ̇ ܀ 51 :ܒܨܝܼܪܵܐ ܗ̄ܝܼ ܣܲܓܿܝܼ ܡ̣ܢ ܐܝܼܬܼܘܼܬܼܵܐ ܕܠܵܐ ܡܘܼܫ̈ܚܵܬܼܵܐ 52 ܐܲܝܟ ܡ̇ܐ ܕܲܒܼܨܝܼܪ ܛܸܠܵܠ ܓܘܼܫܡܵܐ ܡܸܢܹܗ ܕܓܼܘܼܫܡܵܐ ܀ 53 :ܐܝܼܬܼܝܵܐ ܐܝܼܬܼܵܘܗܝ ܘܠܲܝܬܿ ܫܘܼܪܵܝܵܐ ܠܐܲܡܝܼܢܘܼܬܹܗ 54 ܘܗ̤ܝ ܡܲܣܲܝܲܕܼܬܵܐ ܗ̄ܝܼ ܘܲܬܼܚܹܝܬܼ ܙܲܒܼܢܵܐ ܚܒܼܝܼܫ ܪܘܼܟܵܒܼܵܗ̇ ܀ 55 :ܚܹܝܠ ܒܵܪܘܿܝܵܐ ܝܲܗ̣̄ܒܼ ܒܵܗ̇ ܚܲܝܠܵܐ ܕܲܡܠܝܼܠܘܼܬܼܵܐ 56 ܕܬܸܚܸܐ ܘܬܲܚܸܐ ܠܦܲܓܼܪܵܐ ܡܝܼܬܼܵܐ ܕܲܡܕܲܝܪܵܐ ܒܹܗ ܀ 57 :ܒܲܕܼܡܘܼܬܼ ܢܸܒܼܥܵܐ ܕܡܲܪܕܸܿܐ ܚܲܝܹ̈ܐ ܣܵܡ̣ܵܗ̇ ܒܓܼܘܼܫܡܵܐ 58 ܒܵܗ̇ ܡܸܬܼܪܲܓܸܿܝܢ ܪܸ̈ܓܼܫܹܐ ܚܲܪ̈ܫܹܐ ܠܡܸܬܲܠ ܦܹܐܪܹ̈ܐ ܀ 59 :ܒܝܲܕܼ ܫܵܩܘܼܬܼܵܐ ܕܲܡܠܝܼܠܘܼܬܼܵܗ̇ ܡܪܲܟܲܒܼ ܦܲܓܼܪܵܐ 60 ܘܡܲܦܪܲܥ ܝܵܗܹ̇ܒܼ ܩܵܠ ܬܵܘܕܲܝܼܬܼܵܐ ܠܲܡܬܲܩܢܵܢܹܗ ܀ 61 :ܒܚܹܝܠ ܚܲܝܘܼܬܼܵܗ̇ ܚܲܝ ܘܲܡܗܲܠܸܟ ܒܚܲܝܹ̈ܐ ܕܙܲܒܼܢܵܐ 62 ܘܥܲܡܸܗ̇ ܡܣܲܟܸܿܐ ܕܢܹܐܪܲܬܼ ܚܲܝܹ̈ܐ ܠܵܐ ܡ̇ܝܘܿܬܹ̈ܐ: pb. 240 63 :ܒܢܘܼܗܪܵܗ̇ ܚܵܙܹ̇ܐ ܢܘܼܗܪܵܐ ܦܲܐܝܵܐ ܕܫܸܡ ܒܵܪܼܘܿܝܵܐ 64 ܘܥܲܡ ܗܲܠ̈ܟܼܵܬܼܵܗ̇ ܚܵܙܹ̇ܩ ܘܡ̇ܛܹ̇ܐ ܠܘܵܬܼ ܐܝܼܬܘܼܬܼܵܐ ܀ 65 :ܒܲܡܗܝܼܪܘܼܬܼܵܗ̇ ܩܵܢܹ̇ܐ ܛܲܥܡܵܐ ܠܡܸܦܪܲܫ ܫܲܦܝܼܪ 66 ܘܐܲܝܟ ܡܲܠܵܠܵܐ ܡܛܲܟܸܿܣ ܪܲܗܛܵܐ ܕܡܲܠܝܼܠܘܼܬܹܗ ܀ 67 :ܫܸܡܫܵܐ ܗ̄ܝ̣ ܕܲܬܼܪܹܝܢ ܒܲܡܫܲܝ̈ ܓܘܼܫܡܵܐ ܡܸܬܼܚܲܒܿܠܵܢܵܐ 68 ܘܲܒܼܙܲܠܝܼܩܹܝ̈ܗ̇ ܦܵܠܲ݁ܚ ܒܐܲܪܥܵܐܠ ܘܪܵܕܹܐ ܒܐܘܼܪܚܵܐ ܀ 69 :ܡܸܠܚܵܐ ܗ̄ܘ̣ ܗܵܘܢܵܗ̇ ܠܦܲܟܿܝܼܗܘܼܬܼܵܐ ܕܲܪ̈ܓܼܝܼܓܼܵܬܹܗ 70 ܘܒܼܵܗ̇ ܡܸܬܼܡܲܕܲܟ ܘܐܲܟܸܿܢ ܚܵܫܲ̇ܚ ܒܲܪܢܵܫܵܐ ܀ 71 :ܥܘܼܬܼܪܵܐ ܗ̄ܘ̣ ܝܲܨܪܵܐ ܪܵܗ̇ ܠܡܸܣܟܹܿܢܘܼܬܼܵܐ ܕܥܲܦܪܹܗ ܫܝܼܛܵܐ 72 ܘܲܒܼܚܸܟܼ̈ܡܵܬܼܵܗ̇ ܡܦܲܪܢܸܣ ܚܲܝܵܘ̈ܗܝ ܐܲܝܟ ܥܲܬܿܝܼܪܵܐ ܀ 73 :ܒܡܸܠܬܼܵܐ ܕܡܸܢܵܗ̇ ܡܪܝܼܡ ܒܲܪ̄̇ܬܼ ܩܵܠܹܗ ܥܲܠ ܒܸܪ̈ܝܵܬܼܵܐ 74 ܘܲܒܼܫܘܼܠܛܵܢܵܗ̇ ܡܬܼܝܼܚ ܫܘܼܠܛܵܢܹܗ ܥܲܠ ܘܲܒܼܟܼܠ ܀ 75 :ܒܪܸܡܙܵܗ̇ ܦܵܩܹ̇ܕܼ ܠܐܲܪ̈ܗܵܢܵܝܹܐ ܕܢܸܫܬܲܡܥܘܼܢ ܠܹܗ 76 ܘܲܒܼܣܘܼܟܼܠܵܗ̇ ܡܲܪܟܸܿܢ ܨܹܐܕܼܵܘܗܝ ܠܲܫܡܲܝܵܢܹ̈ܐ ܀ 77 :ܒܩܲܠܝܼܠܘܼܬܼܵܗ̇ ܥܵܒܲ̇ܪ ܝܲܡܵܐ ܐܲܝܟ ܕܲܒܼܝܲܒܼܫܵܐ 78 ܘܠܵܐ ܡܸܬܿܛܲܒܲܥ ܝܘܼܩܪܵܐ ܕܦܲܓܼܪܹܗ ܒܹܝܬܼ ܡܲܚܫܘܼܠܹ̈ܐ ܀ 79 :ܠܲܝܟ ܐܹܘܩܝܼܢܵܐ ܬܲܠܝܵܐ ܒܐܸܠܦܵܐ ܕܦܲܓܼܪܵܢܘܼܬܹܗ 80 ܘܲܡܢܲܛܪܵܐ ܠܹܗ ܡ̣ܢ ܢܸܟܼܝܵܢܹ̈ܐ ܕܠܵܐ ܢܸܬܼܚܲܒܲܠ ܀ 81 :ܠܘܲܥܕܵܗ̇ ܪܵܕܹܐ ܐܲܝܟ ܡܲܠܵܝܵܐ ܒܟܼܵܘܟܿܒܼ ܢܘܼܗܪܵܐ 82 ܘܗ̤ܝ ܬܵܪܨܵܐ ܠܹܗ ܫܒܼܝܼܠ ܡܲܪܕܲܝܼܬܵܐ ܠܲܠܡܹܐܝܢ ܫܲܝܢܵܐ ܀ 83 :ܒܐܘܼܡ̇ܢܘܿܬܼܵܗ̇ ܡܲܠܸܦ ܚܲܪ̈ܫܹܐ ܕܲܢܫܲܡܫܘܼܢܵܝܗܝ 84 ܘܲܒܼܒܼܘܼܝܵܢܵܗ̇ ܡܲܩܢܸܐ ܛܲܟܼܣܵܐ ܠܲܕܼܠܵܐ ܛܲܟܼܣܵܐ ܀ 85 :ܒܲܥܪܝܼܡܘܼܬܼܵܗ̇ ܡܚܲܟܸܿܡ ܗܘ̤ ܠܹܗ ܥܲܠ ܫܲܬܿܝܼܩܹ̈ܐ 86 ܘܲܒܼܨܸܢ̈ܥܵܬܼܵܗ̇ ܡܲܪܡܸܐ ܦܓܼܘܼ̈ܕܹܐ ܒܒܲܥܪܝܼܪ̈ܵܝܹܐ ܀ 87 :ܐܲܝܟ ܗܸܢܝܘܿܟܼܵܐ ܪܟܼܝܼܒܼ ܥܲܠ ܥܠܵܡܵܐ ܒܲܥܪܝܼܪܵܝܵܐ 88 ܘܲܡܛܲܟܸܿܣ ܠܹܗ ܕܠܵܐ ܢܸܬܼܒܲܥܪܵܪ ܬܚܹܝܬܼ ܗܲܠܟܼܵܬܹ̈ܐ ܀ 89 :ܢܲܦܫܵܐ ܟܕܲܢܬܼܵܗ̇ ܠܟܼܠܵܗ̇ ܒܪܝܼܬܼܵܐ ܬܚܹܝܬܼ ܫܘܼܠܛܵܢܹܗ 90 ܘܗ̤ܝ ܐܵܘܬܸܿܒܼܬܹܗ ܒܲܕܼܡܘܼܬܼ ܡܲܠܟܵܐ ܥܲܠ ܡܲܪܟܲܒܼܬܼܵܐ ܀ 91 :ܒܥܲܪ̈ܩܹܐ ܕܙܵܘܥܹ̈ܝܗ̇ ܐܲܚܝܼܕܼ ܒܐܝܼܕܼܵܘ̈ܗܝ ܫܡܲܝܵܐ ܘܐܲܪܥܵܐ 92 ܘܠܲܐܝܟܵܐ ܕܨܒܹ̇ܐ ܡܚܝܼܪ ܨܸܒܼܝܵܢܵܐ ܕܪܹܫܢܘܼܬܹܗ ܀ 93 :ܐܘܿ ܒܲܪܢܵܫܵܐ ܕܲܫܡܹܗ ܥܲܦܪܵܐ ܗ̄ܘ̣ ܡ̣ܢ ܟܠܵܐ 94 ܟܡܵܐ ܐܸܬܼܥܲܠܝܼ ܡܸܕܼܪܵܟ ܫܝܼܛܵܐ ܠܥܸܠ ܡ̣ܢ ܟܠܵܐ ܀ 95 :ܐܘܿܢ ܒܵܪܘܿܝܵܐ ܕܪܲܒܿ ܘܲܡܥܲܠܲܝ ܡ̣ܢ ܟܠ ܒܸܪ̈ܝܵܢ 96 ܟܡܵܐ ܐܸܬܼܢܲܚܲܬܼ ܨܸܒܼܝܵܢ ܚܘܼܒܵܟ ܨܹܝܕܼ ܡܘܼܟܵܟܼܵܢ ܀ 97 :ܪܸܡܙܵܟ ܪܲܡܪܸܡ ܫܝܼܛܘܼܬܼ ܡܸܕܼܪܲܢ ܠܥܸܠ ܡ̣ܢ ܟܠܵܐ 98 ܘܐܲܢ̄ܬܿ ܐܵܘܚܸܕܲܬܵܢ ܫܲܒܼܛܵܐ ܕܪܸܡܙܵܟ ܠܡܸܪܕܵܐ ܠܟܼܠܵܐ ܀ pb. 241 99 :ܚܹܝܠ ܚܸܟܼ̈ܡܵܬܼܵܟ ܣܵܡ̣ܬܿ ܒܲܟܼܝܵܢܲܢ ܡܸܣܟܹܿܝܢ ܚܲܝܹ̈ܐ 100 ܘܫܲܪܝܼ ܡܲܪܸܕܸܿܐ ܬܲܦܹ̈ܐ ܕܡܸܠܹ̈ܐ ܒܕܼܘܼܡܝܵܐ ܕܝܼܠܵܟ ܀ 101 :ܕܝܼܠܵܟ ܐܝܼܬܼܵܘܗܝ ܓܵܙܵܐ ܕܡܸܠܹ݁̈ܐ ܕܲܒܼܓܼܵܘ ܢܲܦܫܵܐ 102 ܘܒܼܵܟ ܡܬܼܚܲܟܿܡܵܐ ܠܲܡܕܲܡ̇ܝܘܼ ܡܸܠܹ̈ܝܗ̇ ܒܡܸܠܬܼܵܟ ܀ 103 :ܡܸܠܬܼܵܟ ܐܲܡܫܲܥܬܿ ܒܪܵܫܝܼܬܼ ܕܲܒܼܪ̣ܵܝܬܿ ܠܵܗ̇ ܘܲܠܟܼܠܵܐ 104 ܘܢܵܕܲܬ̤ ܩܵܡܲܬ̤ ܠܩܵܠ ܦܘܼܩܕܵܢܵܟ ܘܲܩܢܵܬ̤ ܚܲܝܹ̈ܐ ܀ 105 :ܚܲܝܹ̈ܐ ܡܲܕܸܿܟܼܬܿ ܥܲܡ ܬܘܼܩܵܢܵܗ̇ ܟܲܕܼ ܬܲܩܸܢܬܵܗ̇ 106 ܘܟܲܣܝܼܬܿ ܐܸܢܘܿܢ ܒܢܲܚܬܵܐ ܕܦܲܓܼܪܵܐ ܡܸܬܼܚܲܙܝܵܢܵܐ ܀ 107 :ܗܲܝܟܲܠ ܦܲܓܼܪܵܐ ܒܢ̣ܵܐ ܨܸܒܼܝܵܢܵܟ ܝܵܬܼܵܗ̇ 108 ܘܥܸܠܲܬ̤ ܩܵܡܲܬ̤ ܒܲܕܼܡܘܼܬܼ ܡܲܠܟܵܐ ܒܓܼܵܘ ܦܵܠܵܛܝܼܢ ܀ 109 :ܐܲܝܟ ܟܸܢܵܪܵܐ ܪܲܟܿܒܲܬ̤ ܪܸ̈ܓܼܫܹܐ ܡܸܬܼܚܲܙܝܵܢܹ̈ܐ 110 ܘܢܸܩܫܲܬ̤ ܨܸܒܼܥܵܐ ܕܲܡܗܝܼܪܘܼܬܼܵܗ̇ ܒܡܸܠܬܼܵܐ ܘܫܸܡܥܵܐ ܀ 111 :ܐܲܝܟ ܐܲܒܿܘܼܒܼܵܐ ܡܚܲܒܸܿܠ ܪܘܼܚܵܐ ܗܘ̤ܵܐ ܠܵܗ̇ ܦܘܼܡ̇ܐ 112 :ܘܙܸܡܪܲܬ̤ ܒܹܗ ܗܝ̤ ܩܵܠ ܢܸܥ̈ܡܵܬܼܵܐ ܒܲܣܝܼ̈ܡܵܬܼܵܐ 113 :ܒܩܲܢܝܵܐ ܚܠܝܼܠܵܐ ܙܵܡ̇ܪܵܐ ܟܠܫܵܥ ܩܵܠܹ̈ܐ ܪ̈ܓܼܝܼܓܹܐ 114 ܘܲܡܚܲܕܲܝܵܐ ܠܹܗ ܠܲܟܼܪܸܐ ܚܲܝܹ̈ܐ ܒܚܲܝܘܼܬܼ ܚܲܚܹ̈ܝܗ̇ ܀ 115 :ܒܪܘܼܚ ܚܲܝܘܼܬܼܵܗ̇ ܡܗܲܠܸܠ ܡܝܼܬܼܵܐ ܩܵܠܹ̈ܐ ܚܠܲܝ̈ܵܐ 116 ܘܐܲܝܟ ܕܲܒܼܕܼܝܼܠܹܗ ܚܬܼܝܼܪ ܒܲܐ̄ܚܪܹܢܵܐ ܕܲܡܬܲܪܓܸܿܡ ܒܹܗ ܀ 117 :ܗܘ̤ ܐܲܝܟ ܩܲܢܝܵܐ ܓܠܝܼܙ ܡ̣ܢ ܩܵܠܵܐ ܘܡ̣ܢ ܚܲܝܘܼܬܼܵܐ 118 ܘܡ̇ܐ ܕܙܸܡܪܲܬ̤ ܒܹܗ ܢܲܦܫܵܐ ܚܲܝܬܼܵܐ ܩܢ̣ܵܐ ܚܲܝܘܼܬܼܵܐ ܀ 119 :ܢܦܫܵܐ ܗ̄ܝܼ ܚܲܝܵܘ̈ܗܝ ܘܗ̤ܝ ܢܵܛ̇ܪܵܐ ܠܹܗ ܒܚܲܝܹ̈ܐ ܕܙܲܒܼܪܵܐ 120 ܘܡ̇ܐ ܕܐܲܪܦܝܵܬܹܗ ܢܦ݂ܲܟ ܠܲܟܼܝܵܢܹܗ ܘܲܗܘ̤ܵܐ ܡܸܕܼܪܵܐ ܀ 121 :ܠܵܐ ܩܢܸܐ ܡܸܕܸܿܡ ܒܐܲܝܠܹܝܢ ܕܲܩܢܹܐ ܕܠܵܘ ܕܝܼܠܗ̇ ܗ̄ܘ̣ 122 ܘܠܵܐ ܡܸܢܼܩܲܝܲܡ ܒܸܠܥܵܕܼ ܚܲܝܠܵܐ ܕܣܵܥܘܿܪܘܼܬܼܵܥܗ̇ ܀ 123 :ܒܲܕܼܡܘܼܬܼ ܡ̇ܪܬܵܐ ܝܵܬܲܒܵܐ ܒܓܼܵܘܘܹܗ ܘܠܵܐ ܚܵܙܹ̇ܐ ܠܵܗ̇ 124 ܘܗܘ̤ ܐܲܝܟ ܥܲܒܼܪܵܐ ܡܫܲܡܸܫ ܘܫܵܠܹ̇ܐ ܩܕܼܵܡ ܚܹܐܪܘܼܬܼܵܗ̇ ܀ 125 :ܫܲܦܝܼܪ ܡ̇ܕܹܝܢ ܒܢ̣ܵܝܗܝ ܒܵܪܘܿܝܵܐ ܐܲܝܟ ܕܲܠܒܲܝܬܵܐ 126 ܘܟܸܢ ܥܸܠܲܬ̤ ܗ̤ܝ ܕܲܬܿܕܲܝܲܪ ܒܹܗ ܐܲܝܟ ܒܲܪ̄ܬܼ ܡܲܠܟܵܐ ܀ 127 :ܦܲܓܼܪܵܐ ܠܘܼܩܵܕܼܵܡ ܡܪܲܟܸܿܒܼ ܪܸܡܙܵܐ ܒܬܼܘܼܩܵܢ ܐ̄ܢܵܫܵܐ 128 ܘܒܼܵܬܲܪ ܙܲܒܼܢܵܐ ܨܵܐܲܪ ܢܲܦܫܵܐ ܘܡܲܫܪܸܐ ܒܓܼܵܘܹܗ ܀ 129 :ܒܹܝܬܼ ܡܲܠܟܿܘܼܬܼܵܐ ܡܪܲܫܸܡ ܒܵܢܹ̇ܐ ܒܐܲܦܲܝ̈ ܒܸܣܪܵܐ 130 ܘܡ̇ܐ ܕܐܸܫܬܲܟܼܠܲܠ ܩܪ̣ܵܐ ܥܵܡܘܿܪܹܗ ܕܲܢܟܲܝܲܪ ܒܹܗ ܀ 131 :ܒܥܲܪ̈ܩܲܝ ܦܲܓܼܪܵܐ ܒܵܢܹ̇ܐ ܒܲܝܬܵܐ ܦܲܓܼܪܵܢܵܝܵܐ 132 ܘܒܹܝܬܼ ܫܸܪ̈ܝܵܢܘܵܗܝ ܡܲܪܡܸܐ ܡܠܵܛܵܐ ܕܡ̇ܐ ܪܲܛܝܼܒܼܵܐ ܀ 133 :ܐܲܝܟ ܫܲܬܼܐܸܣܬܼܵܐ ܣܵܐܹ̇ܡ ܙܲܪܥܵܐ ܒܡܲܪܒܲܥ ܓܘܼܫܡܵܐ 134 ܘܲܡܕܲܪܸܓܼ ܠܹܗ ܐܲܝܟ ܒܸܢܝܵܢܵܐ ܠܘܵܬܼ ܫܘܼܟܼܠܵܠܵܐ ܀ 135 :ܡܠܘܿܠܵܐ ܗܵܘܹ̇ܐ ܙܲܪܥܵܐ ܠܦܲܓܼܪܵܐ ܘܐܲܟܸܿܢ ܗܵܘܹ̇ܐ 136 ܘܡܸܢܹܗ ܕܦܲܓܼܪܵܐ ܝܵܥܹ̇ܐ ܦܲܓܼܪܵܐ ܕܕܼܵܡܹ̇ܐ ܠܦܲܓܼܪܵܐ ܀ pb. 242 137 :ܠܢܲܦܫܵܐ ܠܲܝܬܿ ܠܵܗ̇ ܙܲܪܥܵܐ ܕܬܼܵܘܥܸܐ ܐ̄ܚܪܹܬܼܵܐ 138 ܘܠܵܘ ܒܲܡܠܘܿܐܵܗ̇ ܝܵܥܹ̇ܐ ܟܝܵܢܵܗ̇ ܒܓܼܵܘ ܗܲܕܵܗܹ̈ܐ ܀ 139 :ܡ̣ܢ ܠܵܐ ܡܸܕܸܿܡ ܨܵܐܲܪ ܝܵܬܼܵܗ̇ ܪܸܡܙܵܐ ܟܲܣܝܵܐ 140 ܘܒܵܘ̇ ܐܸܣܟܹܿܡܵܐ ܕܨܵܪ ܗܵܝ̇ ܕܐܵܕܼܵܡ ܒܪܘܼܚ ܨܼܒܼܝܵܢܹܗ ܀ 141 :ܡ̣ܢ ܠܵܐ ܡܸܕܸܿܡ ܐܵܬܹ̇ܐ ܟܝܵܢܵܗ̇ ܠܘܵܬܼ ܬܘܼܩܵܢܵܐ 142 ܟܡܵܐ ܐܸܢ ܐܝܼܬܹܝܗ̇ ܐ̄ܚܝܵܢܬܵܐ ܕܥܝܼܪܹ̈ܐ ܘܪ̈ܘܼܚܵܢܵܝܹܐ ܀ 143 :ܪܘܼܚܵܐ ܗܝܼ ܐܵܦ ܗܝ̤ ܐܲܝܟ ܪ̈ܘܼܚܵܢܹܐ ܕܠܵܐ ܪܘܼܟܵܒܼܵܐ 144 ܘܲܫܘܸܐ ܟܝܵܢܵܗ̇ ܐܵܦ ܬܘܼܩܵܢܵܗ̇ ܠܗܵܘ̇ ܕܲܗܘ̤ܵܘ ܒܹܗ ܀ 145 :ܡ̣ܢ ܠܵܐ ܡܸܕܸܿܡ ܗܘ̤ܵܘ ܪ̈ܘܼܚܵܢܹܐ ܒܪܵܫܝܼܬܼ ܕܵܗܘ̤ܵܘ 146 ܘܡ̣ܢ ܠܵܐ ܡܸܕܸܿܡ ܪܵܕܹܐ ܗܘܵܝܵܗ̇ ܒܟܼܠܗܘܿܢ ܕܵܪܹ̈ܐ ܀ 147 :ܒܵܬܲܪ ܦܲܓܼܪܵܐ ܗܘ̤ܵܐ ܬܘܼܩܵܢܵܗ̇ ܒܬܼܘܼܩܵܢ ܐܵܕܼܵܡ 148 ܘܗܘ̤ ܗܵܘ̇ ܛܲܟܼܣܵܐ ܪܵܕܹܐ ܟܠܝܘܿܡ ܒܵܗ̇ ܘܲܒܼܦܲܓܼܪܵܐ ܀ 149 :ܨܠܸܡ ܗܲܕܿܡܹ̈ܐ ܨܵܐܲܪ ܠܘܼܩܕܼܵܡ ܪܲܒܿ ܨܲܝܵܪܹ̈ܐ 150 ܘܟܸܢ ܢܵܦܲܚ̇ ܒܹܗ ܪܘܼܚ ܚܲܝܘܼܬܼܵܐ ܘܗܵܘܹ̇ܐ ܠܲܢܦܸܫ ܀ 151 :ܢܲܚܬܵܐ ܕܒܸܣܪܵܐ ܙܵܩܲܪ ܒܐܝܼܕܼܵܐ ܪܘܼܚܵܢܵܝܬܼܵܐ 152 ܘܟܸܢ ܦܵܪܹܣ ܠܹܗ ܐܲܝܟ ܐܲܪ̈ܓܿܘܵܢܹܐ ܠܥܸܠ ܡ̣ܢ ܢܲܦܫܵܐ ܀ 153 :ܒܓܼܵܘ ܚܸܫܘܿܟܼܵܐ ܡܪܲܟܼܵܒܼ ܦܲܓܼܪܵܐ ܘܒܼܵܪܹ̈ܐ ܢܲܦܫܵܐ 154 ܐܲܟܼܡܵܐ ܕܲܒܼܪ̣ܵܐ ܒܪܵܫܝܼܬܼ ܘܣܵܡ̣ܵܗ̇ ܒܚܸܫܟܵܐ ܀ 155 :ܐܲܝܟ ܕܲܒܼܐ̄ܪܵܙܵܐ ܡܚܵܘܸܐ ܠܐ̄ܢܵܫܵܐ ܒܬܼܘܼܩܵܢ ܐ̄ܢܵܫܵܐ 156 ܥܲܠ ܗܵܘ̇ ܛܲܟܼܣܵܐ ܕܒܼܵܪܘܿܝܘܼܬܹܗ ܕܡ̣ܢ ܠܵܐ ܡܸܕܸܿܡ ܀ 157 :ܪܲܒܿܘܼܬܼ ܚܲܝܠܹܗ ܡܲܟܼܪܸܙ ܟܠܫܵܥ ܒܲܓܼܒܼܝܼܠܘܼܬܲܢ 158 ܒܝܲܕܼ ܬܘܸܩܵܢܵܐ ܕܦܲܓܼܪܵܐ ܘܢܲܦܫܵܐ ܕܗܵܘܹ̇ܐ ܟܠܝܘܿܡ ܀ 159 :ܒܪܘܼܟܵܒܼ ܦܲܓܼܪܵܐ ܡܚܵܘܸܐ ܒܪܝܼܬܼܵܐ ܕܡܸܬܼܪ̈ܲܓܼܫܵܢܹܐ 160 ܘܒܲܗܘܵܝ ܢܲܦܫܵܐ ܗܘܵܝܵܐ ܕܟܸܢܫܹ̈ܐ ܡܸܬܼܝܲܕܼܥܵܢܹ̈ܐ ܀ 161 :ܟܠܵܗ̇ ܒܪܝܼܬܼܵܐ ܡܚܲܕܸܿܬܼ ܟܠܫܵܥ ܒܝܲܕܼ ܬܘܼܩܵܢܲܢ 162 ܘܲܡܚܲܕܹܿܐ ܠܵܗ̇ ܐܲܝܟ ܝܵܠܹܕܿܬܵܐ ܒܝܘܿܡ ܡ̇ܘܠܵܕܲܢ ܀ 163 :ܒܲܢ ܡܸܬܼܒܲܩܹܝܢ ܟܝܢܹ̈ܐ ܚܲܪ̈ܫܹܐ ܐܵܦ ܡܲܠܵܠܹ̈ܐ 164 ܒܚܹܝܠ ܥܵܒܼܘܿܕܼܵܐ ܕܲܡܚܲܕܸܿܬܼ ܒܲܢ ܠܲܟܼܝܵܢܲܝ̈ܗܘܿܢ ܀ 165 :ܬܲܗܪܵܐ ܪܲܒܵܐ ܚܵܙܹ̇ܝܢ ܟܠܫܵܥ ܒܲܓܼܒܼܝܼܠܘܼܬܲܢ 166 ܕܝܵܥܹ̇ܝܢ ܐ̄ܢܵܫܵܐ ܒܲܕܼܡܘܼܬܼ ܐ̄ܢܵܫܵܐ ܡ̣ܢ ܓܵܘ ܙܲܪ̈ܥܹܐ ܀ 167 :ܚܵܙܹ̇ܝܢ ܙܲܪܥܵܐ ܕܡܲܪܡܹܝܢ ܐ̄ܢܵܫܵܐ ܒܐܲܪܥܵܐ ܕܐ̄ܢܵܫܵܐ 168 ܘܟܲܕܼ ܫܝܼܛ ܘܲܒܼܣܸܐ ܗܵܦܹ̇ܟ ܗܵܘܹ̇ܐ ܡ̇ܐܢܵܐ ܫܒܼܝܼܚܵܐ ܀ 169 :ܚܵܙܹ̇ܝܢ ܦܲܓܼܪܵܐ ܟܲܕܼ ܡܸܬܼܪܲܟܲܒܼ ܐܲܝܟ ܗܵܘ̇ ܩܲܕܼܡ̇ܐ 170 ܘܬܼܘܼܒܼ ܐܵܦ ܢܲܦܫܵܐ ܕܥܵܡ̇ܪܵܐ ܒܓܼܵܘܹܗ ܐܲܝܟ ܗܵܝ̇ ܕܐܵܕܼܵܡ ܀ 171 :ܘܗܵܝܲܢ ܣܵܗܹ̇ܕܼ ܥܲܠ ܗܵܘ̇ ܩܵܠܵܐ ܕܝܵܘܡ̇ܐ ܕܸܫܬܵܐ 172 ܟܲܕܼ ܡܸܬܼܡܲܠܲܠ ܒܟܼܠܗܘܿܢ ܝܵܘܡܹ̈ܐ ܕܢܸܥܒܸܿܕܼ ܐ̄ܢܵܫܵܐ ܀ 173 :ܗܘ̤ܝܘܼ ܟܲܕܼ ܗܘ̤ ܗܵܘ̇ ܦܘܼܩܕܵܢܵܐ ܕܲܓܼܒ݂ܲܠ ܠܐܵܕܼܵܡ 174 ܕܓܼܵܒܹ̇ܠ ܦܲܓܼܪܵܐ ܘܐܵܦܲ݁ܚ ܒܐܲܦܲܘ̈ܗܝ ܪܘܼܚ ܚܲܝܘܼܬܼܵܐ ܀ 175 ܪܘܼܚܵܐ ܚܲܝܬܼܵܐ ܒܵܪܹܐ ܒܦܲܓܼܪܵܐ ܡ̇ܐ ܕܡܸܬܼܪܲܟܲܒܼ: pb. 243 176 ܘܪܵܚ̇ܫܝܼܢ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܒܡܵܝܘܿܬܼܘܼܬܹܗ ܀ 177 :ܝܲܪ̈ܚܹܐ ܬܸܫܥܵܐ ܒܒܲܝܬܵܐ ܥܵܡܲ̇ܪ ܕܲܠܡܸܐ ܚܸܫܟܵܐ 178 ܘܒܼܵܬܲܪ ܙܲܒܼܪܵܐ ܢܵܦܹ̇ܩ ܘܚܵܙܹ̇ܐ ܒܪܝܼܬܼܵܐ ܦܐܝܼܬܼܵܐ ܀ 179 :ܡ̣ܢ ܚܸܫܘܿܟܼܵܐ ܢܵܦܹ̇ܿܩ ܐ̄ܢܵܫܵܐ ܡ̣ܢ ܓܵܘ ܐ̄ܢܵܫܵܐ 180 ܘܚܵܘܹ̇ܐ ܢܘܼܗܪܵܐ ܘܡܲܫܡܲܥ ܩܵܠܵܐ ܘܡܲܒܲܥ ܡܸܠܹ̈ܐ ܀ 181 :ܒܚܲܠܕܹܿܗ ܬܵܗ̇ܪܝܼܢ ܟܸܢܫܲܝ̈ ܪܵܘܡ̇ܐ ܕܲܟܼܡܵܐ ܝܲܩܝܼܪ 182 ܐܲܟܼܟܵܐ ܕܲܬܼܗܲܪܘ ܒܝܵܘܡ̇ܐ ܩܲܕܼܡ̇ܐ ܕܲܗܘ̤ܵܐ ܢܘܼܗܪܵܐ ܀ 183 :ܐܲܝܟ ܢܲܗܝܼܪܵܐ ܐܲܦܨܲܚ ܠܐܲܪܥܵܐ ܕܟܼܡܝܼܪܵܐ ܗ̄ܘ̣ܵܬܼ 184 ܕܪܵܕܿܦ ܐܵܦ ܗܘ̤ ܚܸܫܟܵܐ ܕܚܲܫܹ̈ܐ ܡ̣ܢ ܓܵܠܹܕܼܬܹܿܗ ܀ 185 :ܒܦܲܓܼܪܵܐ ܘܢܲܦܫܵܐ ܢܵܦܹ̇ܩ ܐ̄ܢܵܫܵܐ ܡ̣ܢ ܓܵܘ ܟܲܪܣܵܐ 186 ܦܲܓܼܪܵܐ ܓܲܠܝܵܐ ܘܢܲܦܫܵܐ ܟܣܝܼܬܼܵܐ ܡ̇ܐܢܵܐ ܥܦܝܼܦܵܐ ܀ 187 :ܐܘܼܡ̇ܢܵܐܝܼܬܼ ܨܝܼܪ ܪܘܼܟܵܒܹܗ ܒܬܲܪܬܹܿܝܢ ܕܸܡ̈ܘܵܢ 188 ܦܲܓܼܪܵܐ ܥܲܦܪܵܐ ܘܢܲܦܫܵܐ ܪܘܼܚܵܐ ܬܪܹܝܢ ܚܲܕܼ ܐ̄ܢܵܫܵܐ ܀ 189 ܚܲܕܼ ܒܲܪܢܵܫܵܐ ܡܟܲܢܹܝܢ ܐ̄ܢܵܫܵܐ ܠܦܲܓܼܪܵܐ ܘܢܲܦܫܵܐ ܀ 190 ܡܸܛܠ ܚܘܼܒܵܐ ܕܗܵܘ̇ ܒܵܪܘܿܝܵܐ ܕܙܵܘܸܓܼ ܐܵܢܘܿܢ ܀ 191 :ܚܲܕܼ ܗ̄ܘ̣ ܦܲܓܼܪܵܐ ܘܲܚܕܵܐ ܢܲܦܫܵܐ ܕܚܲܕܼ ܒܲܪܢܵܫܵܐ 192 ܘܚܲܕܼ ܗ̄ܘ̣ ܪܸܡܙܵܐ ܕܨܵܐܲܪ ܟܠܝܘܿܡ ܐ̄ܢܵܫܵܐ ܒܐ̄ܢܵܫܵܐ ܀ 193 :ܡܸܢܹܗ ܕܦܲܓܼܪܵܐ ܨܵܐܲܪ ܪܸܡܙܵܐ ܦܲܓܼܪܵܐ ܐ̄ܚܪܹܢܵܐ 194 ܘܐܲܝܟ ܗܵܝ̇ ܢܲܦܫܵܐ ܕܚܲܕܼ ܒܲܪܢܵܫܵܐ ܟܠ ܢܲܦ̈ܫܵܬܼܵܐ ܀ 195 :ܣܲܓܿܝܼ ܕܵܡܹ̇ܐ ܦܲܓܼܪܵܐ ܠܦܲܓܼܪܵܐ ܘܢܲܦܫܵܐ ܠܢܲܦܫܵܐ 196 ܐܲܟܼܡܵܐ ܕܕܼܵܡܹ̇ܐ ܗܘܵܝܵܐ ܕܟܼܠܝܘܿܡ ܠܝܵܘܡܵܐ ܩܲܕܼܡ̇ܐ ܀ 197 :ܠܵܘ ܚܲܕܼܬܼܵܐܝܼܬܼ ܒܵܪܹܐ ܐ̄ܢܵܫܵܐ ܡܲܬܼܩܸܢ ܟܠܵܐ 198 ܕܗܵܐ ܡ̣ܢ ܐ̄ܢܵܫܵܐ ܕܲܒܼܪ̣ܵܐ ܒܪܵܫܝܼܬܼ ܪܵܕܹܝܢ ܐ̄ܢܵܫܵܐ ܀ 199 :ܡ̣ܢ ܚܲܕܼ ܦܲܓܪܵܐ ܗܘ̤ܵܘ ܟܠ ܦܲܓܼܪ̈ܝܼܢ ܕܲܗܘ̤ܵܘ ܘܗܵܘܹ̇ܝܢ 200 ܐܵܦ ܢܲܦܫܵܬܼܵܐ ܚܲܕܼܘ ܟܝܵܢܗܹܝܢ ܐܲܝܟ ܗܵܝ̇ ܕܲܗܘ̤ܵܬܼ ܀ 201 :ܚܲܕܼܘܼ ܪܡܙܵܐ ܕܲܒܼܪ̣ܵܐ ܒܪܵܫܝܼܬܼ ܦܲܓܼܪܵܐ ܘܢܲܦܫܵܐ 202 ܘܚܲܝܠܹܗ ܪܵܗܹ̇ܛ ܥܲܡ ܬܘܼܩܵܢܵܘ̈ܗܝ ܥܕܲܡ̇ܐ ܠܚܲܪܬܼܵܐ ܀ 203 :ܫܘܸܐ ܗ̄ܘ̣ ܬܘܼܩܵܢܹܗ ܕܲܒܼܟܼܠ ܝܵܘܡܝܼ̈ܢ ܐܲܝܟ ܕܲܒܼܩܲܕܼܡ̇ܐ 204 ܘܣܵܗܹ̇ܕܼ ܦܲܓܼܪܵܐ ܕܕܼܵܡܹ̇ܐ ܠܦܲܓܼܪܵܐ ܘܢܲܦܫܵܐ ܠܢܲܦܫܵܐ ܀ 205 :ܐܲܝܟ ܟܲܪܘܿܙܵܐ ܩܵܥ̇ܝܵܐ ܢܲܦܫܵܐ ܒܓܼܵܘ ܗܲܕܼܡܹ̈ 206 ܕܲܚܙܵܘ ܐ̄ܢܵܫܵܐ ܕܲܟܼܡܵܐ ܕܵܡܹ̇ܝܢ ܐ̄̇ܢܵܫܵܐ ܠܐ̄ܢܵܫܵܐ ܀ 207 :ܚܒܼܝܼܫܵܐ ܒܦܲܓܼܪܵܐ ܘܠܵܐ ܡܸܬܼܚܲܙܝܵܐ ܓܘܼܫܡܵܢܵܐܝܼܬܼ 208 ܘܢܲܗܝܼܪ ܩܵܠܵܗ̇ ܛܵܒܼ ܡ̣ܢ ܫܸܡܫܵܐ ܠܥܲܝܢܲܝ̈ ܦܲܓܼܪܵܐ ܀ 209 :ܠܓܼܵܘ ܡ̣ܢ ܦܲܓܼܪܵܐ ܟܲܣܝܵܐ ܚܙܵܬܼܵܐ ܕܝܲܩܝܼܪܘܼܬܼܵܗ̇ 210 ܘܲܡܢܲܟܿܦܵܐ ܠܹܗ ܕܠܵܐ ܢܸܙܕܲܠܲܠܐ ܠܥܹܝܢ ܚܲܙܵܝܹ̈ܐ ܀ 211 :ܫܲܪܝܵܐ ܒܓܼܵܘܹܗ ܘܟܲܣܝܵܐ ܡܸܢܹܗ ܒܥܵܬܼܵܐ ܕܲܥܠܹܝܗ̇ 212 ܘܲܟܼܕܼ ܚܲܙܝܵܐ ܠܹܗ ܠܵܐ ܚܲܙܝܵܐ ܠܹܗ ܕܐܲܝܟܲܢ ܘܲܟܼܡܵܐ ܗ̄ܝܼ ܀ 213 ܟܝܵܢܵܗ̇ ܒܓܼܵܘܵܗ̇ ܘܣܵܥܘܿܪܘܼܬܼܵܗ̇ ܠܒܲܪ ܒܲܥܒܼܵܕܹ̈ܐ: pb. 244 214 ܘܟܲܕܼ ܛܵܒܼ ܒܵܗ̇ ܗ̄ܝܼ ܦܪܝܼܫ ܗ̄ܘ̣ ܡܸܢܵܗ̇ ܘܗ̤ܝ ܬܘܼܒܼ ܡܸܢܹܗ ܀ 215 :ܠܵܐ ܗ̄ܘ̣ܵܐ ܒܟܼܠܹܗ ܡܙܝܼܓܼ ܬܘܼܩܵܢܵܐ ܕܩܲܛܝܼܢܘܼܬܼܵܗ̇ 216 ܕܗܘ̤ ܚܲܕܼ ܐܝܼܬܼܵܘܗܝ ܘܗ̤ܝ ܚܲܕܼ ܐܝܼܬܹܝܗ̇ ܕܠܵܐ ܡܘܼܙܵܓܼܵܐ ܀ 217 :ܨܹܝܕܼ ܗܲܕܸܵܡܹ̈ܐ ܟܣܲܝܵܐ ܟܲܣܝܵܐ ܒܲܚܕܼܵܐ ܕܘܼܟܵܐ 218 ܘܚܹܝܠ ܚܲܝܘܼܬܼܵܗ̇ ܦܪܝܼܣ ܥܲܠ ܪܸ̈ܓܼܫܹܐ ܕܠܵܓܼܵܘ ܘܕܲܠܒܲܪ ܀ 219 :ܒܠܸܒܵܐ ܝܵ̇ܬܼܒܵܐ ܐܲܝܟ ܕܲܒܼܢܵܘܣܵܐ ܒܡܸܨܥܲܬܼ ܒܲܝܬܵܐ 220 ܕܢܸܢܗܘܘܿܢ ܨܵܝ̇ܬܿܝܼܢ ܥܸܢܝܵܢ ܚܘܼܒܵܗ̇ ܟܠܗܘܿܢ ܪܸ̈ܓܼܫܹܐ ܀ 221 :ܒܡܸܨܥܲܬܼ ܒܲܝܬܵܐ ܝܵ̇ܬܼܒܵܐ ܒܒܲܝܬܵܗ̇ ܡ̇ܪܲܬܼ ܒܲܝܬܵܐ 222 ܘܲܟܼܪܝܼܟܼܝܼܢ ܠܵܗ̇ ܪܸ̈ܓܼܫܲܝ ܦܲܓܼܪܵܐ ܐܲܝܟ ܝܲܠܘܼܕܹ̈ܐ ܀ 223 :ܚܲܠܒܼܵܐ ܕܙܵܘܥܹ̈ܝܗ̇ ܝܵ̇ܢܹܩ ܦܲܓܼܪܵܐ ܫܒܲܪ ܪܸܥܝܵܢܵܐ 224 ܘܐܲܝܟ ܕܥܲܠ ܒܘܼܪ̈ܟܹܿܐ ܡܸܬܼܪܲܒܸܿܐ ܒܵܗ̇ ܕܠܵܐ ܩܘܼܛܵܥܵܐ ܀ 225 :ܐܲܝܟ ܡܲܝܢܲܩܬܵܐ ܛܥܝܼܢܵܐ ܥܲܝܛܹ̈ܐ ܕܫܲܒܼܪܘܼܬܼ ܠܸܒܵܐ 226 ܘܲܠܦܘܼܬܼ ܚܲܝܠܹܗ ܝܵܗ̇ܒܵܐ ܐܘܼܟܼܠܵܐ ܕܢܸܬܿܬܲܪܣܸܐ ܒܹܗ ܀ 227 :ܥܲܡ ܡܘܼܫܚܵܬܹ̈ܗ ܪܵܒܼܝܵܐ ܐܵܦ ܗܝ̤ ܟܲܕܼ ܠܵܐ ܪܵܒܼܝܵܐ 228 ܘܐܲܝܟ ܝܲܠܘܼܕܼܵܐ ܡܠܲܓܼܠܸܓܼ ܚܘܼܒܵܗ̇ ܫܲܒܼܪܘܼܬܹܗ ܀ 229 :ܓܡܝܼܪ ܬܘܼܩܵܢܵܗ̇ ܡ̣ܢ ܫܘܼܪܵܝܵܐ ܟܲܕܼ ܡܸܬܼܪܲܒܿܝܵܐ 230 ܘܠܵܐ ܡܸܬܼܚܲܫܚܵܐ ܒܲܓܼܡܝܼܪܘܼܬܼܵܗ̇ ܒܸܠܥܵܕܼ ܦܲܓܼܪܵܐ ܀ 231 :ܒܵܗ̇ ܗ̄ܝܼ ܡܸܠܬܼܵܐ ܕܲܡܠܝܼܠܘܼܬܼܵܗ̇ ܡ̣ܢ ܝܘܿܡ ܕܲܗܘ̤ܵܬܼ 232 ܘܲܚܓܼܝܼܪ ܪܲܗܛܵܐ ܕܩܲܠܝܼܠܘܼܬܼܵܗ̇ ܠܦܘܼܬܼ ܗܲܕܿܡܹ̈ܐ ܀ 233 :ܝܵ̇ܕܼܥܵܐ ܠܡܸܙܡܲܪ ܩܵܠ ܢܸܥ̈ܡܵܬܼܵܐ ܒܲܣܝܼ̈ܡܵܬܼܵܐ 234 ܘܲܟܼܡܵܐ ܕܲܡܚܝܼܠ ܐܲܒܿܘܼܒܼ ܒܸܣܪܵܐ ܡܚܝܼܠܵܐ ܐܵܦ ܗܝ̤ ܀ 235 :ܠܒܼܝܼܟܼܵܐ ܗ̄ܝܼ ܛܲܟܼܣܵܐ ܠܡܸܩܲܫ ܫܲܦܝܼܪ ܒܟܸܢܵܪ ܝܵܬܼܵܗ̇ 236 ܘܕܼܵܚ̇ܠܵܐ ܕܬܸܡܬܿܘܿܚ ܡܸܢܲܝ̈ ܦܲܓܼܪܵܐ ܕܠܵܐ ܢܸܬܼܦܲܣ̈ܩܵܢ ܀ 237 :ܩܲܢܝܵܐ ܗ̄ܝܼ ܚܲܝܠܵܐ ܕܦܵܪܘܿܫܘܼܬܼܵܐ ܠܡܸܬܲܟܵܠܘܼ 238 ܘܠܵܐ ܥܵܢܹ̇ܝܢ ܠܵܗ̇ ܪܸ̈ܓܼܫܲܝ ܦܲܓܼܪܵܐ ܠܡܸܩܲܫ ܫܲܦܝܼܪ ܀ 239 :ܚܲܟܿܝܼܡܵܐܝܼܬܼ ܢܵܛ̇ܪܵܐ ܓܲܙܹ̈ܝܗ̇ ܠܒܲܪ ܡ̣ܢ ܫܸܬܼܩܵܐ 240 ܥܲܕܼ ܡܸܬܪܲܒܸܿܐ ܦܲܓܼܪܵܐ ܫܲܒܼܪܵܐ ܘܝܵܪܹܬܼ ܢܸܟܼܣܵܘ̈ܗܝ ܀ 241 :ܐܲܝܟ ܐܲܒܼܵܗܹ̈ܐ ܣܵܥ̇ܪܵܐ ܐܵܦ ܗܝ̤ ܨܹܝܕܼ ܗܲܕܿܡܹ̈ܐ 242 ܕܲܟܼܡܵܐ ܕܲܛܠܹܝܢ ܝܵܪ̈ܘܿܬܲܝܗܘܿܢ ܠܵܐ ܡܸܫܬܿܠܛܝܼܢ ܀ 243 :ܒܐܲܠܵܗ ܟܠܵܐ ܡܕܲܡܝܵܐ ܒܟܸܣܦܵܐ ܕܣܵܥܘܼܪܘܼܬܼܵܗ̇ 244 ܕܡ̣ܢ ܡ̇ܟܵܬܼ̈ܐ ܪ̈ܡ̇ܬܼܵܐ ܡܕܸܿܪܸܓܼ ܐ̄ܢܵܫܵܐ ܀ 245 ܥܲܡ ܬܲܪܒܿܝܼܢܬܹܗ ܣܵܠ̇ܩܵܐ ܠܕܲܪܓܼܵܐ ܕܲܥܠܲܝܡܘܼܬܼܵܐ: pb. 245 246 ܘܥܲܡ ܣܲܝܒܿܘܼܬܹܗ ܢܵܚ̇ܬܵܐ ܠܕܲܪܓܼܵܐ ܕܲܡܚܝܼܠܘܼܬܼܵܐ ܀ 247 :ܥܲܡ ܚܘܼܠܡܵܢܹܗ ܚܠܝܼܡ ܒܘܼܚܪܵܢܵܐ ܕܦܵܪܘܿܫܘܼܬܼܵܗ̇ 248 ܘܥܲܡ ܟܘܼܪܗܢܹܗ ܟܪܝܼܗ ܒܘܼܝܵܢܵܗ̇ ܡ̣ܢ ܘܵܠܝܼܬܼܵܐ ܀ 249 :ܒܝܘܿܡ ܛܵܒܼܵܬܹ̈ܗ ܡܢܵܚ ܪܸܥܝܵܢܵܗ̇ ܘܢܲܗܝܼܪ ܩܵܠܵܗ̇ 250 ܘܲܒܼܝܘܿܡ ܐܸܒܼܠܹܗ ܟܡܝܼܪ ܚܘܼܫܵܒܼܵܗ̇ ܘܲܙܥܘܿܪ ܩܵܠܵܗ̇ ܀ 251 :ܣܵܒܲܥܵܐ ܒܣܲܒܼܥܹܗ ܟܲܕܼ ܠܵܐ ܡܩܲܒܸܿܠ ܟܝܵܢܵܗ̇ ܐܘܼܟܼܠܵܐ 252 ܘܟܼܵܦ̇ܢܵܐ ܒܟܲܦܢܹܗ ܟܲܕܼ ܠܵܐ ܣܢܝܼܩܵܐ ܥܲܠ ܡܹܐܟܼܘܼܠܬܵܐ ܀ 253 :ܥܝܼܪܵܐ ܒܥܲܡܠܹܗ ܟܲܕܼ ܡܸܬܼܗܲܦܲܟ ܒܐܲܪ̈ܥܵܢܝܵܬܼܵܐ 254 ܘܕܼܵܡ̇ܟܵܐ ܒܫܸܢܬܹܗ ܟܲܕܼ ܠܵܐ ܕܵܡܹ̇ܝܟ ܗܵܘܢܵܗ̇ ܥܝܼܪܵܐ ܀ 255 :ܚܵܕܼ̇ܝܵܐ ܒܚܲܝܵܘ̈ܗܝ ܟܲܕܼ ܗܘ̤ ܡܝܼܬܼ ܗ̄ܘ̣ ܕܠܵܐ ܚܲܝܘܼܬܼܵܐ 256 ܘܲܡܥܵܩܵܐ ܬܘܼܒܼ ܒܝܘܿܡ ܥܘܼܢܕܵܢܹܗ ܟܲܕܼ ܗܝ̤ ܚܲܝܬܼܵܐ ܗ̄ܝܼ ܀ 257 :ܡܲܝܒܼܵܐ ܚܘܼܒܹܿܗ ܟܲܕܼ ܛܵܒܼ ܦܲܟܿܝܼܗ ܡ̣ܢ ܒܘܼܝܵܢܵܐ 258 ܘܣܵܢ̇ܝܵܐ ܚܲܫܵܘ̈ܗܝ ܟܲܕܼ ܠܵܐ ܚ̇ܵܫܵܐ ܒܚܵܫܘܿܫܘܼܬܹܗ ܀ 259 :ܒܚܘܼܒܵܐ ܗ̄ܘ̣ ܚܵܫܹ̇ܐ ܥܲܡ ܚܲܒܿܝܼܒܼܵܗ̇ ܠܵܘ ܒܲܟܼܝܵܢܵܐ 260 ܕܪܵܡ ܗ̄ܘ̣ ܟܝܵܢܵܗ̇ ܡ̣ܢ ܟܠ ܚܲܫܝܼ̈ܢ ܦܲܓܼܪ̈ܵܢܵܝܹܐ ܀ 261 :ܒܚܘܼܒܵܐ ܛܥܝܼܢܵܐ ܥܲܣܩܘܼܬܼ ܟܹܐܒܼܵܐ ܕܡ̇ܝܘܿܬܼܘܼܬܹܗ 262 ܘܐܲܝܟ ܡܲܟܼܐܲܒܼܬܵܐ ܡܢܵܘܲܠ ܩܠܵܗ̇ ܒܝܘܿܡ ܟܘܼܪܢܹܗ ܀ 263 :ܒܚܘܼܒܵܐ ܟܕܼܝܼܢܵܐ ܠܓܼܵܘ ܡ̣ܢ ܪܸ̈ܓܼܫܵܘܗܝ ܐܲܝܟ ܕܲܒܼܢܝܼܪܵܐ 264 ܘܠܵܐ ܗܲܢܝܼ ܠܵܗ̇ ܦܘܼܠܚܵܢ ܥܲܡܠܵܐ ܕܲܪ̈ܓܼܝܼܓܼܵܬܹܗ ܀ 265 :ܡܸܛܠ ܚܘܿܒܹܿܗ ܪܚܝܼܡ ܠܵܗ̇ ܚܘܼܒܵܐ ܐܲܪܥܵܢܵܝܵܐ 266 ܘܟܲܕܼ ܗܝ̤ ܪܘܼܚܵܐ ܗ̄ܝܼ ܗܲܢܝܼ̈ܐܵܢ ܠܵܗ̇ ܦܲܓܼܪ̈ܵܢܝܵܬܼܵܐ ܀ 267 :ܡܸܛܠ ܚܘܼܒܹܿܗ ܢܵܚ̇ܬܵܐ ܥܲܡܹܗ ܠܘܵܬܼ ܫܝܼ̈ܛܵܬܼܵܐ 268 ܘܟܲܕܼ ܠܵܐ ܣܵܥ̇ܪܵܐ ܡܸܕܸܿܡ ܕܢܘܼܟܼܪܵܝ ܠܲܫܡܵܗ̇ ܀ 269 :ܠܲܝܬܿ ܠܲܟܼܝܵܢܵܗ̇ ܪܸܓܲܬܼ ܒܸܣܪܵܐ ܕܫܵܘܬܵܦܘܼܬܼܵܐ 270 ܘܡܵܐ ܕܐܸܬܼܪܲܓܼܪܲܓܼ ܒܸܣܪܵܐ ܠܒܹܣܪܵܐ ܗܘ̤ܵܬܼ ܠܵܗ̇ ܡܸܢܹܗ ܀ 271 :ܠܲܝܬܿ ܠܵܗ̇ ܕܬܹܐܟܼܘܿܠ ܐܘܼܟܼܠܵܐ ܓܫܝܼܡܵܐ ܒܲܕܼܡܘܼܬܼ ܦܲܓܼܪܵܐ 272 ܘܐܸܢ ܗܘ̤ ܕܟܼܵܦܹ̇ܝܢ ܟܸܦܢܲܬ̤ ܥܲܡܹܗ ܘܐܸܟܼܠܲܬ̤ ܥܲܡܹܗ ܀ 273 :ܠܵܐ ܕܡܸܟ ܡܸܡܬܼܘܿܡ ܗܵܘܢܵܗ̇ ܥܝܼܪܵܐ ܘܠܵܐ ܬܘܼܒܼ ܕܵܡܹ̇ܟ 274 ܘܡ̇ܐ ܕܐܸܬܿܛܲܒܲܥܘ ܪܸ̈ܓܼܫܵܘܗܝ ܒܫܸܢܬܼܵܐ ܦܗ̣ܵܘ ܚܘܼܫܵܒܹ̈ܗ̇ ܀ 275 :ܕܲܡܝܼܟ ܦܲܓܼܪܵܐ ܘܕܼܵܡ̇ܟܵܐ ܗ̄ܝܼ ܥܲܡܹܗ ܟܲܕܼ ܠܵܐ ܕܵܡ̇ܟܵܐ 276 ܕܲܡܝܼܟ ܩܵܠܵܗ̇ ܘܥܝܼܪ ܪܸܥܝܵܢܵܗ̇ ܘܪܵܦܹ̇ܬܼ ܗܵܘܢܵܗ̇ ܀ 277 :ܕܦܲܓܼܪܵܐ ܗ̄ܝܼ ܫܸܢܬܼܵܐ ܐܵܦ ܡܹܐܟܼܘܼܠܬܵܐ ܐܵܦ ܙܘܼܘܵܓܼܵܐ 278 ܘܒܲܫܡܵܐ ܫܐܝܼܠܵܐ ܡܫܵܘܬܲܦ ܝܲܨܪܵܗ̇ ܒܲܕܼܠܵܐ ܕܝܼܠܵܗ̇ ܀ 279 :ܦܪܝܼܫܝܼܢ ܚܲܫܹ̈ܐ ܕܐܝܼܬܼ ܠܲܟܼܝܵܢܵܗ̇ ܘܠܲܟܼܝܵܢ ܦܲܓܼܪܵܐ 280 ܘܡܸܛܠ ܚܘܼܒܵܐ ܗܵܐ ܡܸܬܼܐܲܡܪܝܼܢ ܕܚܲܕܼܘܼ ܐ̄ܢܵܫܵܐ ܀ 281 :ܕܝܼܠܵܗ̇ ܚܣܵܡܵܐ ܓܵܪܣܵܐ ܕܪܲܒܿܝܼܥ ܒܹܝܬܼ ܚܘܼܫܵܒܹ̈ܐ 282 ܘܕܼܝܼܠܵܗ̇ ܚܸܡܬܼܵܐ ܡܬܼܝܼܠܲܬܼ ܒܐܸܣܦܸܣ ܚܲܪܡܵܢܝܼܬܼܵܐ ܀ 283 ܕܝܼܠܵܗ̇ ܚܘܼܬܼܪܵܐ ܥܪܵܕܼܵܐ ܕܲܡ̣ܪܵܕܼ ܡ̣ܢ ܫܘܼܥܒܵܕܼܵܐ: pb. 246 284 ܘܪܸܚܡܲܬܼ ܫܘܼܒܼܚܵܐ ܬܲܥܠܵܐ ܡܲܗܸܠ ܒܐܲܪ̈ܝܵܘܵܬܼܵܐ ܀ 285 :ܕܝܼܠܵܗ̇ ܪܸܛܢܵܐ ܣܵܣܵܐ ܕܒܼܵܪܹܡ ܢܲܚܬܵܐ ܕܚܘܼܒܵܐ 286 ܘܡܹܐܟܲܠܩܲܪܨܵܐ ܦܲܚܵܐ ܕܨܵܐܹ̇ܕܼ ܠܫܲܦܝܲܝ̈ ܠܸܒܵܐ ܀ 287 :ܕܝܼܠܵܗ̇ ܐܲܟܿܬܼܵܐ ܘܕܝܼܠܵܗ̇ ܪܘܼܓܼܙܵܐ ܘܕܝܼܠܵܗ̇ ܩܸܛܠܵܐ 288 ܘܗ̤ܝ ܡܸܨܛܲܢܥܵܐ ܠܡܸܦܪܲܥ ܚܘܼܒܼܠܹ̈ܐ ܠܕܼܡܲܒܼܐܸܫ ܠܵܗ̇ ܀ 289 :ܕܝܼܠܵܗ̇ ܚܲܫܵܐ ܘܲܬܼܘܵܬܼ ܢܲܦܫܵܐ ܕܥܲܠ ܣܘܼܥܪ̈ܵܢܹܝܗ̇ 290 ܘܗ̤ܝ ܡܸܬܼܟܲܫܦܵܐ ܠܡܸܫܐܲܠ ܪ̈ܲܚܡܹܐ ܚܠܵܦ ܚܵܘ̈ܒܵܬܼܵܗ̇ ܀ 291 :ܕܦܲܓܼܪܵܐ ܐܘܼܟܼܠܵܐ ܕܦܲܓܼܪܵܐ ܫܸܢܬܼܵܐ ܘܫܵܘܬܵܦܘܼܬܼܵܐ 292 ܘܗ̤ܝܘܼ ܕܐܲܣܝܼܪ ܒܐܲܪ̈ܥܵܢܝܵܬܼܵܐ ܠܦܘܼܬܼ ܣܘܼܢܩܵܢܹܗ ܀ 293 :ܕܝܼܠܹܗ ܐܸܢܘܿܢ ܚܲܫܹ̈ܐ ܘܟܹܐܒܹ̈ܐ ܕܡ̇ܝܘܿܬܼܘܼܬܼܵܐ 294 ܘܗ̤ܘ ܬܘܼܒܼ ܗܵܦܹ̇̄ܝܟ ܘܗܵܘܹ̇ܐ ܡܼܕܼܪܵܐ ܒܝܘܿܡ ܥܘܼܕܵܢܹܗ ܀ 295 :ܗܘ̤ ܥܲܡ ܢܲܦܫܵܐ ܗ̄ܘ̣ ܘܠܵܐ ܡܸܬܼܚܲܠܲܛ ܒܩܲܛܝܼܢܘܼܬܼܵܗ̇ 296 ܘܢܲܦܫܵܐ ܒܓܼܵܘܹܗ ܘܠܵܐ ܡܼܬܼܦܲܓܿܕܼܵܐ ܥܲܡ ܪܘܼܟܵܒܹܗ ܀ 297 :ܛܥܝܼܢ ܠܵܗ̇ ܒܪܸ̈ܓܼܫܵܘܗܝ ܘܠܵܐ ܪܓܼܝܼܫ ܕܐܲܝܕܼܵܐ ܗ̄ܝܼ ܒܲܕܼܠܵܐ ܝܵ̇ܕܲܥ 298 ܘܛܲܥܝܼܢܵܐ ܠܹܗ ܘܠܵܐ ܡܸܬܼܒܲܩܸܐ ܒܩܲܠܝܼܠܘܼܬܼܵܗ̇ ܀ 299 :ܒܲܕܼܡܘܼܬܼ ܪ̈ܲܟܼܫܵܐ ܟܕܼܝܼܢܝܼܢ ܪܸ̈ܓܼܫܵܘܗܝ ܬܚܹܝܬܼ ܫܘܼܠܛܵܢܵܗ̇ 300 ܘܠܵܐ ܡܸܣܬܲܟܲܠ ܕܡ̇ܢܲܐ ܗ̄ܝܼ ܥܸܠܬܼܵܐ ܕܲܟܼܕܼܝܼܢܘܼܬܹܗ ܀ 301 :ܐܲܝܟ ܗܸܢܝܘܿܟܼܵܐ ܪܟܼܝܼܒܼ ܨܼܒܼܝܵܢܵܗ̇ ܠܥܸܠ ܡ̣ܢ ܦܲܓܼܪܹܗ 302 ܘܠܲܐܝܟܵܐ ܕܨܵܒܼ̇ܝܵܐ ܡܚܝܼܪܵܐ ܐܸܠܦܵܐ ܕܦܲܓܼܪܵܢܘܼܬܹܗ ܀ 303 :ܐܲܝܟ ܕܲܒܼܥܲܪ̈ܩܹܐ ܠܒܼܝܼܟܼܵܐ ܒܙܵܘܥܹ̈ܐ ܫܒܼܝܼܠ ܣܘܼܥܪ݁ܵܢܵܘܗܝ 304 ܘܲܡܛܲܟܿܣܵܐ ܠܹܗ ܕܠܵܐ ܢܸܬܿܬܲܩܲܠ ܒܲܪ̈ܓܼܝܼܓܼܵܬܼܵܐ ܀ 305 :ܡܸܠܬܼܵܐ ܕܡܸܢܵܗ̇ ܪܵܡܝܵܐ ܒܦܘܼܡܹܗ ܒܲܕܼܡܘܼܬܼ ܩܹܐܡ̇ܐ 306 ܘܠܵܘ ܝܵܗ̇ܒܵܐ ܠܹܗ ܕܢܲܟܸܿܐ ܗܘ̤ ܠܹܗ ܘܠܲܟܼܢܵܘܵܬܹ̈ܗ ܀ 307 :ܫܲܒܼܛܵܐ ܕܕܝܼܢܵܐ ܡܪܝܼܡܵܐ ܟܠܫܵܥ ܥܲܠ ܫܲܒܼܪܘܼܬܹܗ 308 ܘܲܡܥܲܗܕܼܵܐ ܠܹܗ ܥܲܠ ܠܘܼܚܵܡܹ̈ܐ ܘܢܸܓܼ̈ܕܹܿܐ ܕܲܠܗܲܠ ܀ 309 :ܣܦܪ ܥܘܼܗܕܵܢܵܐ ܕܛܘܼܒܹ̈ܐ ܘܢܸܓܼ̈ܕܹܿܐ ܠܒܼܝܼܟܼܵܐ ܒܐܝܼܕܼܵܗ̇ 310 ܘܲܡܗܲܓܿܝܵܐ ܠܹܗ ܒܲܣܬܼܝܼܪ̈ܵܬܼܵܐ ܕܠܵܐ ܚܲܙ̈ܝܵܡ ܠܹܗ ܀ 311 :ܕܚܲܠ ܡ̇ܝܘܿܬܼܵܐ ܩܵܥܝܵܐ ܒܦܘܼܡܹܗ ܘܲܡܙܲܗܪܵܐ ܠܹܗ 312 ܕܗܵܐ ܫܘܼܢܵܩܵܐ ܕܠܵܐ ܫܘܼܠܵܡܵܐ ܢܛܝܼܪ ܠܲܕܼܡܲܥܘܸܠ ܀ 313 :ܒܚܘܼܒܵܐ ܡܚܲܦܛܵܐ ܗܝ̤ ܠܲܩܢܘܿܡ̇ܗ̇ ܘܲܠܫܵܘܬܵܦܵܗ̇ 314 ܕܠܵܐ ܢܸܬܼܪܲܦܘܿܢ ܡ̣ܢ ܬܲܟܼܬܿܘܼܫܵܐ ܕܲܚܠܵܦ ܩܘܼܫܬܵܐ ܀ 315 ܒܲܕܼܡܘܼܬܼ ܕܵܘܩܵܐ ܩܵܥ̇ܝܵܐ ܠܪܸ̈ܓܼܫܹܐ ܘܲܠܚܘܼܫܵܒܹ̈ܐ ܀ 316 ܕܩܘܼܡܘ ܐܸܬܼܟܲܫܲܪܘ ܥܲܠ ܦܘܼܠܚܵܢܵܐ ܕܫܲܦܝܝܼܪ݁ܵܬܼܵܐ ܀ 317 :ܥܕܲܡ̇ܐ ܠܐܸܡܲܬܼܝ ܕܵܡ̇ܟܲܬܿ ܦܲܓܼܪܵܐ ܘܝܲܨܪܵܐ ܥܝܼܪܵܐ 318 ܩܘܼܡܘ ܐܸܬܼܚܲܡܘ ܘܲܚܙܵܘ ܨܲܦܪܵܐ ܕܙܲܕܿܝܼܩܘܬܼܵܐ ܀ 319 :ܒܩܵܠ ܠܘܼܚܵܡܹ̈ܐ ܡܥܝܼܪܵܐ ܗܝ̤ ܠܵܗ̇ ܘܲܠܗܲܕܵܡܹ̈ܐ 320 ܕܠܵܐ ܢܸܬܿܛܲܒܿܥܘܼܢ ܒܲܪ̈ܓܼܝܼܓܵܬܼܵܐ ܐܲܝܟ ܕܲܒܼܫܸܢܬܼܵܐ ܀ pb. 247 321 :ܫܸܢܬܼܵܐ ܕܥܵܘ̣ܠܵܐ ܪܵܕܹܦܵܐ ܡܸܢܵܗ̇ ܘܡ̣ܢ ܚܲܒܿܝܼܒܼܵܗ̇ 322 ܕܢܸܗܘܘܿܢ ܥܝܼܪܝܼܢ ܠܲܡܟܲܢܵܫܘ̣ ܦܹܐܪܹ̈ܐ ܡܠܝܼܠܹ̈ܐ ܀ 323 :ܒܲܡܠܝܼܠܘܼܬܼܵܗ̇ ܐܝܼܬܼܵܘܗܝ ܗܸܪܓܵܗ̇ ܠܹܠܲܝ ܐܝܼܡܵܡ 324 ܘܚܹܝܠ ܚܲܝܘܼܬܼܵܐ ܡܲܪܕܹܿܝܢ ܙܵܘܥܹ̈ܝܗ̇ ܕܠܵܐ ܫܘܼܠܵܡܵܐ ܀ 325 :ܢܸܒܼܥܵܐ ܕܚܲܝܹ̈ܐ ܣܵܡ̣ ܒܲܟܼܝܵܢܵܗ̇ ܡ̇ܪܹܐ ܟܝܵܢܹ̈ܐ 326 ܘܠܵܐ ܬܘܼܒܼ ܩܵܛ̇ܲܥ ܪܸܕܸܝܵܐ ܕܚܲܝܹ̈ܐ ܡ̣ܢ ܚܲܝܘܼܬܼܵܗ̇ ܀ 327 :ܚܡܝܼܪ ܚܲܝܘܼܬܼܵܐ ܕܠܵܐ ܡ̇ܝ̈ܘܿܬܹ̈ܐ ܛܡܝܼܪ ܒܲܒܼܪܝܼܬܼܵܗ̇ 328 ܕܢܵܓܹ̇ܕܼ ܗܘ̤ ܠܹܗ ܠܦܲܓܼܪܵܐ ܡܝܼܬܼܵܐ ܠܘܵܬܼ ܚܲܝܘܼܬܼܵܐ ܀ 329 :ܚܹܝܠ ܚܲܝܘܼܬܼܵܗ̇ ܪܵܕܹܐ ܒܬܲܦܹ̈ܐ ܕܡ̇ܝܘܿܬܼܘܼܬܼܵܗ̇ 330 ܘܡܲܪܕܹܿܐ ܡܸܠܹ̈݁ܐ ܢܘܼܟܼܪ̈ܵܝܵܬܼܵܐ ܕܢܘܼܟܼܪܵܝܝܼܢ ܠܹܗ ܀ 331 :ܐܲܝܟ ܡܲܠܵܠܵܐܠ ܡܡܲܠܸܠ ܚܲܪܫܵܐ ܒܲܕܼܠܵܐ ܕܝܼܠܹܗ 332 ܘܲܛܥܝܼܢ ܦܹܐܪܹ̈ܐ ܕܲܡܠܝܼܠܘܼܬܼܵܐ ܒܣܘܼܟܵܝ ܦܲܓܼܪܹܗ ܀ 333 :ܦܹܐܪܹ̈ܐ ܕܢܲܦܫܵܐ ܛܥܝܼܢ ܫܲܬܿܝܼܩܵܐ ܒܪܹܫ ܗܲܕܵܡܵܘ̈ܗܝ 334 ܘܦܵܐ̇ܲܚ ܡܸܢܹܗ ܪܹܝܚ ܚܲܝܘܼܬܼܵܐ ܕܠܵܐ ܚܲܙܝܵܐ ܠܹܗ ܀ 335 :ܨܸܒܼܥܵܐ ܕܚܲܝܹ̈ܐ ܢܲܩ̇ܫܵܐ ܟܠܫܵܥ ܒܪܘܼܟܵܒܼ ܦܲܓܼܪܹܗ 336 ܘܲܡܚܲܕܹܿܐ ܠܹܗ ܠܥܵܠܡܵܐ ܟܡܝܼܪܵܐ ܒܩܵܠ ܚܸܟܼܡܵܬܹ̈ܐ ܀ 337 :ܐܘܿ ܟܸܢܵܪܵܐ ܕܡܸܢܲܝ̈ ܒܸܣܪܵܐ ܡܸܬܼܚܲܒܿܠܵܢܵܐ 338 ܕܟܲܕܼ ܗܘ̤ ܒܸܣܪܵܐ ܗ̄ܘ̣ ܙܵܡܲ݁ܪ ܩܵܠܹ̈ܐ ܪ̈ܘܼܚܵܢܵܝܹܐ ܀ 339 :ܐܘܿ ܐܲܒܿܘܼܒܼܵܐ ܕܩܲܢܝܵܐ ܪܥܝܼܪܵܐ ܡܠܸܐ ܩܸܛܪ̈ܵܬܼܵܐ 340 ܕܡܸܬܼܝܲܒܿܠܝܼܢ ܒܹܗ ܩܵܠܹ̈ܐ ܦܫܝܼܛܹ̈ܐ ܕܠܵܐ ܥܘܼܟܵܪܵܐ ܀ 341 :ܐܘܿ ܟܘܿܬܿܝܼܢܵܐ ܡܲܠܝܲܬܼ ܣܵܣܵܐ ܕܚܲܫܹ̈ܐ ܫܝܛܹ̈ܐ 342 ܕܲܠܒܼܝܼܫܵܐ ܠܵܗ̇ ܢܲܦܫܵܐ ܚܲܝܬܼܵܐ ܐ̄ܚܝܵܢܬܼܵܐ ܕܥܝܼܪܹ̈ܐ ܀ 343 :ܐܘܿ ܚܲܝܘܼܬܼܵܐ ܕܟܲܕܼ ܠܵܐ ܣܢܝܼܩܵܐ ܥܲܠ ܬܲܟܼܣܝܼܬܼܵܐ 344 ܥܛܝܼܦܵܐ ܠܒܼܘܼܫܵܐ ܡܸܬܼܚܲܒܿܠܵܢܵܐ ܘܲܚܬܼܝܼܪܵܐ ܒܹܗ ܀ 345 :ܐܘܿ ܦܵܪܲܚܬܼܵܐ ܕܩܲܠܝܼܠ ܓܸܦܵܗܗ̇ ܡ̣ܢ ܦܲܪܲܚܬܼܵܐ 346 ܕܡܲܩܢܵܐ ܒܓܼܘܼܫܡܵܐ ܘܠܵܐ ܪܵܓܵܐ ܠܵܗ̇ ܠܡܸܦܪܲܚ ܡܸܢܹܗ ܀ 347 :ܐܘܿ ܕܲܚܒܼܝܼܫܵܐ ܒܒܹܝܬܼ ܐܲܣܝܼܪܹ̈ܐ ܡܠܸܐ ܚܸܫܘܿܟܼܵܐ 348 ܘܗܲܢܝܼܐܝܼܢ ܠܵܗ̇ ܟܲܒܼ̈ܠܹܐ ܩܫܲܝܵ̈ܐ ܕܚܵܫܘܿܫܘܼܬܼܵܐ ܀ 349 :ܐܘܿ ܦܘܼܩܵܕܵܢܵܐ ܕܲܚ̣ܒܲܫ ܚܲܝܵܐ ܒܒܲܝܬܵܐ ܡܝܼܬܼܵܐ 350 ܘܦܵܚ̣ ܪܹܝܚܵܐ ܕܚܲܝܘܼܬܼ ܓܲܝܹ̈ܐ ܘܲܩܢ̣ܵܐ ܩܵܠܵܐ ܀ 351 :ܐܘܿ ܐܘܼܡܵܢܵܐ ܕܨܵܪ ܚܲܝܘܼܬܼܵܐ ܒܢܲܚܬܵܐ ܪܲܦܝܵܐ 352 ܘܲܛܒ݂ܲܥ ܒܐܲܦ̈ܝܗ̇ ܕܠܵܐ ܢܸܚܙܘܿܢܵܗ̇ ܦܲܓܼܪܵܢܵܝܹܐ ܀ 353 :ܐܘܿ ܨܲܝܵܪܵܐ ܟܡܵܐ ܚܲܟܿܝܼܡܵܐ ܒܵܪܘܿܝܘܼܬܼܵܟ 354 ܕܼܒܼܒܲܪܢܵܫܵܐ ܓܠ݂ܲܝܬܿ ܪܲܒܿܘܼ.ܬܼܵܟ ܠܲܥܒܼܵܕܼ ܐܝܼܕܼܵܝ̈ܟ ܀ 355 :ܐܲܝܟ ܕܲܒܼܕܲܦܵܐ ܨܵܪܬܵܝܗܝ ܠܥܵܠܡܵܐ ܒܦܲܓܼܪܹܗ ܘܢܲܦܫܹܗ 356 ܕܢܸܬܼܒܲܩܘܿܢ ܒܵܟ ܫܡܲܝ̈ܵܐ ܘܐܲܪܥܵܐ ܒܝܲܕܼ ܓܼܠܝܘܼܬܹܗ ܀ 357 ܒܹܗ ܚܵܙܹ̇ܝܢ ܠܵܟ ܐܲܪ̈ܥܵܢܵܝܹܐ ܘܲܫܡܲܝܵܢܹ̈ܐ: pb. 248 358 ܘܟܲܕܼ ܪܲܚܝܼܩ ܐܲܢ̄ܬܿ ܒܹܗ ܡܸܣܬܲܓܼܕܿܬܿ ܐܲܝܟ ܩܲܪܝܼܒܼܵܐ ܀ 359 :ܒܦܲܓܼܪܵܐ ܘܢܲܦܫܵܐ ܨܵܪܬܿ ܖܲܒܸܿܬܿܬܵܝܗܝ ܠܲܨܠܸܡ ܨܲܠܡܲܢ 360 ܘܡ̣ܢ ܟܠ ܒܸܪ̈ܝܵܢ ܡܲܕܸܿܟ ܪܸܡܙܵܟ ܥܲܡ ܬܘܼܩܵܢܹܗ ܀ 361 :ܡܲܫܟܿܢܵܐ ܕܚܘܼܒܵܐ ܢܩܲܫܬ̣ܵܝܗܝ ܒܐܲܪܥܵܐ ܒܲܬܼܪܹܝܢ ܛܘܼܢ̈ܒܹܿܐ 362 ܕܲܢܕܲܝܪܘܼܢ ܒܹܗ ܐܲܪ̈ܥܵܢܵܝܹܐ ܘܲܡܫܲܝܵܢܹ̈ܐ ܀ 363 :ܒܦܲܓܼܪܵܐ ܘܢܲܦܫܵܐ ܒܢܲܝܬܿ ܫܲܟܼܠܸܠܬܵܝܗܝ ܠܗܲܝܟܲܠ ܚܲܝܵܘ̈ܗܝ 364 ܕܲܢܩܲܪܒܼܘܼܢ ܒܹܗ ܡܠܝܼܠܹ̈ܐ ܘܚܲܪ̈ܫܹܐ ܚܕܹܵܐ ܬܵܘܕܲܝܼܬܼܵܐ ܀ 365 :ܢܲܚܬܵܐ ܕܦܲܓܼܪܹܗ ܙܩܲܪ̣ ܨܸܒܼܝܒܵܢܵܟ ܡ̣ܢ ܕܲܚܝܼܚܵܐ 366 ܘܒܲܕܼܡܘܼܬܼ ܛܲܒܼܥܵܐ ܛܒܲܥܬ̣ܿ ܒܹܗ ܢܲܦܫܵܟ ܦܲܢܝܼܬܼ ܚܲܝܹ̈ܐ ܀ 367 :ܒܚܲܝܘܼܬܼ ܢܲܦܫܹܗ ܚܲܝ ܘܲܡܗܲܠܸܟ ܥܵܠܡܵܐ ܡܝܼܬܼܵܐ 368 ܘܲܒܼܢܲܗܝܼܪܵܗ̇ ܪܵܕܹܐ ܠܘܲܥܕܵܐ ܕܲܠܡܹܐܝܢ ܫܲܝܢܵܐ ܀ 369 :ܐܲܝܟ ܩܲܢܕܹܿܝܠܵܐ ܬܲܠܝܵܐ ܢܲܦܫܵܐ ܒܗܲܝܟܲܠ ܦܲܓܼܪܵܐ 370 ܘܕܼܵܠܩܵܐ ܒܡܸܫܚܵܐ ܕܚܲܝܹ̈ܐ ܡܠܝܼܠܹ̈ܐ ܘܠܵܐ ܡܵܝ̈ܘܿܬܹܐ ܀ 371 :ܛܲܟܼܣܵܐ ܕܢܘܼܗܪܵܐ ܡܡܲܠܹܝܢ ܚܲܝܹܝܗ̇ ܠܦܲܓܼܪܵܐ ܡܝܼܬܼܵܐ 372 ܘܡ̇ܐ ܕܐܲܪܝܼܡܘܼܬܹܗ ܐܲܡܠܸܟ ܚܸܫܟܵܐ ܥܲܠ ܗܲܕܵܡ̇ܘ̈ܗܝ ܀ 373 :ܫܪܵܓܼܵܐ ܗ̄ܝܼ ܡܸܠܬܼܵܗ̇ ܘܲܡܚܵܘܝܵܐ ܠܹܗ ܢܘܼܗܪܵܐ ܕܚܲܝܹ̈ܐ 374 ܘܲܒܼܪܹܫ ܕܘܼܫܡܹܗ ܕܵܠܹ݂̇ܩ ܩܵܠܵܗ̇ ܐܲܝܟ ܠܲܗܦܹܝܕܼܵܐ ܀ 375 :ܒܢܘܼܗܪܵܗ̇ ܚܵܙܹ̇ܐ ܒܩܵܠܵܗ̇ ܫܵܡܲ݁ܪ ܒܡܸܠܵܬܼܵܗ̇ ܡܬܲܪܓܸܿܡ 376 ܘܒܼܐܘܼܡ̇ܢܘܼܬܼܵܗ̇ ܦܵܠܲܚ ܒܐܲܪܥܵܐ ܒܟܼܠ ܐܘܼܡ̇ܢ̈ܘܵܢ ܀ 377 :ܒܚܲܝܠܵܗ̇ ܡܲܩܪܸܒܼ ܚܘܼܬܼܚܵܬܹ̈ܐ ܕܲܪ̈ܓܼܝܼܓܼܵܬܹܗ 378 ܘܲܒܼܥܘܼܕܼܪܵܢܵܗ̇ ܙܟܹ̇ܐ ܠܚܲܫܹ̈ܐ ܕܡܵܝܝܘܿܬܹܗ ܀ 379 :ܒܵܗ̇ ܡܸܬܼܢܲܨܲܚ ܒܐܵܓܼܘܿܢ ܥܲܡܠܹ̈ܐ ܕܙܲܕܿܝܼܩܘܼܬܼܵܐ 380 ܘܗ̤ܝ ܝܵܗ̇ܒܵܐ ܠܹܗ ܟܠܝܼܠ ܙܵܟܼܘܼܬܼܵܐ ܚܠܵܦ ܚܘܼܡܣܵܢܹܗ ܀ 381 :ܗܝ̤ ܡܲܠܦܵܐ ܠܹܗ ܠܡܹܐܚܲܕܼ ܕܲܪܵܐ ܪܘܼܚܵܢܵܐܝܼܬܼ 382 ܘܲܡܠܲܒܿܒܼܵܐ ܠܹܗ ܕܠܵܐ ܢܸܬܼܪܲܦܸܐ ܩܕܼܵܡ ܕܲܠܩܘܼܒܼܠܵܐ ܀ 383 :ܟܠܝܼܠܵܐ ܕܚܲܝܹ̈ܐ ܠܵܐ ܡ̇ܝܘܿܬܹ̈ܐ ܠܒܼܝܼܟܼܵܐ ܒܗܵܘܢܵܗ̇ 384 ܘܲܡܓܲܪܓܼܵܐ ܠܹܗ ܐܲܝܟ ܕܲܠܫܲܒܼܪܵܐ ܕܲܩܪܘܿܒܼ ܘܩܲܒܸܿܠ ܀ 385 :ܥܲܡܹܗ ܢܵܚ̇ܬܵܐ ܠܟܼܠ ܬܲܟܼܬܿܘܼܫܝܼ̈ܢ ܕܲܪ̈ܓܼܝܼܓܼܵܬܼܵܐ 386 ܘܐܲܝܟ ܐܲܬܼܠܹܝܛܹ̈ܐ ܡܫ̇ܚܵܐ ܪܸ̈ܓܼܫܵܘܗܝ ܕܠܵܐ ܢܸܬܿܬܲܚܕܲܘܼܢ ܀ 387 :ܡ̇ܘܬܵܐ ܒܲܠܚܘܿܕܼ ܡܨܸܐ ܦܵܪܹܫ ܠܵܗ̇ ܡ̣ܢ ܥܸܢܝܵܢܹܗ 388 ܘܠܵܐ ܡܸܬܼܡܲܨܝܵܐ ܠܡܹܐܚܲܕܼ ܕܲܪܵܐ ܥܲܡ ܕܵܒܼܘܿܪܵܗ̇ ܀ 389 :ܩܲܣܛܘܼܢܪܵܐ ܕܪܸܡܙܵܐ ܟܲܣܝܵܐ ܡܕܝܼܩ ܡ̣ܢ ܫܸܠܝܵܐ 390 ܘܲܡܒܲܠܗܸܐ ܠܵܗ̇ ܐܲܝܟ ܝܵܠܹܕܿܬܵܐ ܒܝܘܼܡ ܡܵܘܠܵܕܵܗ̇ ܀ 391 :ܚܸܒܼܠܹ̈ܐ ܕܚܝܼܠܹ̈ܐ ܡ̇ܚܹ̇ܝܢ ܐܵܦ ܠܵܗ̇ ܒܥܸܕܵܢ ܡܲܘܬܵܐ 392 ܟܲܕܼ ܟܵܪܕܲܝܿܢ ܠܵܗ̇ ܐܲܝܟ ܕܲܠܥܘܸܠܵܐ ܡ̣ܢ ܓܵܘ ܦܲܓܼܪܵܐ ܀ 393 :ܐܲܝܟ ܫܲܒܵܝܵܐ ܥܵܐܹ̇ܠ ܡ̇ܘܬܵܐ ܠܗܲܝܟܲܠ ܥܘܼܡܪܵܗ̇ 394 ܘܲܡܫܲܠܲܚ ܠܵܗ̇ ܡ̣ܢ ܓܵܘ ܦܲܓܼܪܵܐ ܕܲܟܼܢܝܼܟܼܘܼܬܼܵܗ̇ ܀ pb. 249 395 :ܥܲܪܛܸܠ ܢܵܦܩܵܐ ܡ̣ܢ ܓܵܘ ܒܲܝܬܵܗ̇ ܡ̇ܪܲܬܼ ܦܲܓܼܪܵܐ 396 ܘܐܲܝܟ ܓܼܠܵܘܝܵܬܵܐ ܡܫܲܢܝܵܐ ܡܵܢܹܗ ܠܐܲܬܼܪܵܐ ܐ̄ܚܪܹܢܵܐ ܀ 397 :ܐܸܒܼܠܵܐ ܪܲܒܵܐ ܛܥܝܼܢ ܪܸܥܝܵܢܵܗ̇ ܒܝܘܿܡ ܡܲܦܲܩܬܵܗ̇ 398 ܕܚܵܙ̇ܝܵܐ ܥܘܼܡܪܵܗ̇ ܕܲܡܚܲܒܸܿܠ ܠܹܗ ܡ̇ܘܬܵܐ ܪܗܝܼܒܼܵܐ ܀ 399 :ܒܩܵܠ ܚܸܢ̈ܓܼܬܼܵܐ ܡܒܲܟܿܝܵܐ ܗܝ̤ ܠܵܗ̇ ܘܲܠܚܲܒܿܝܼܒܼܵܗ̇ 400 ܕܗܵܘ̇ ܡܸܬܼܚܲܒܲܠ ܘܕܝܼܠܵܗ̇ ܒܵܛܹ̇ܠ ܩܵܠ ܢܸܥ̈ܡܵܬܼܵܗ̇ ܀ 401 :ܪܵܥܘܿܡ̇ܐܝܼܬܼ ܒܵܟܲܝܵܐ ܒܫܸܬܼܩܵܐ ܥܲܠ ܡ̇ܐ ܕܲܗܘ̤ܵܗ̇ 402 ܕܠܵܐ ܬܘܼܒܼ ܙܵܡ̇ܪܵܐ ܩܵܠܹ̈ܐ ܚܢܝܼܓܹ̈ܐ ܒܟܸܢܵܪ ܚܘܼܒܵܗ̇ ܀ 403 :ܣܲܓܼܝܼ ܡܥܵܩܵܐ ܡ̇ܐ ܕܡܸܬܼܦܲܣ̈ܩܵܢ ܡܸܢܲܝ̈ ܪܸ̈ܓܼܫܵܘܗܝ 404 ܘܲܚܠܵܦ ܗܵܘܢܵܗ̇ ܙܵܡܲ݁ܪ ܣܵܣܵܐ ܒܓܼܵܘ ܗܲܕܵܡ̇ܘ̈ܗܝ ܀ 405 :ܛܵܒܼ ܟܵܪܝܵܐ ܠܵܗ̇ ܥܲܠ ܦܘܼܪܫܵܢܵܗ̇ ܕܡ̣ܢ ܨܹܝܕܼ ܚܘܼܒܹܿܗ 406 ܘܟܲܕܼ ܛܵܒܼ ܝܵ̇ܕܲܥܵܐ ܕܩܲܝܵܡ ܣܲܒܼܪܵܐ ܕܬܸܦܢܸܐ ܨܹܐܕܼܵܘܗܝ ܀ 407 :ܪܸܡܙܵܐ ܕܲܒܼܪ̣ܵܗ̇ ܝܲܗ̣̄ܒܼ ܒܵܗ̇ ܚܲܝܠܵܐ ܠܡܸܕܲܥ ܗܵܠܹܝܢ 408 ܘܗܘ̤ ܐܲܫܪܝܼ ܒܵܗ̇ ܚܹܝܠ ܚܸܟܼ̈ܡܵܬܼܵܐ ܕܦܵܘܿܫܘܼܬܼܵܐ ܀ 409 :ܗܵܘ̇ ܦܘܼܩܕܵܢܵܐ ܕܐܲܥܸܠ ܚܵܒܼܫܵܗ̇ ܒܓܼܵܘܼ ܗܲܕܵܡܹ̈ܐ 410 ܗܘ̤ ܡܲܦܸܩ ܠܵܗ̇ ܐܲܟܼܡܵܐ ܕܥܸܠܲܬ̤ ܕܠܵܐ ܢܸܟܼܝܵܢܵܐ ܀ 411 :ܠܵܐ ܡܸܬܼܡܲܟܿܝܵܐ ܒܚܵܫܘܿܫܘܼܬܼܵܐ ܕܚܲܫܲܝܝ̈ ܦܲܓܼܪܵܐ 412 ܘܠܵܐ ܡܸܬܼܚܲܒܿܠܵܐ ܟܲܕܼ ܡܸܬܼܚܲܒܲܠ ܠܒܼܘܼܫ ܬܲܟܼܣܝܼܬܼܵܗ̇ ܀ 413 :ܪܵܡܲܐ ܗ̄ܝܼ ܣܲܓܿܝܼ ܠܥܸܠ ܡ̣ܢ ܡ̇ܘܬܵܐ ܘܡ̣ܢ ܢܸܟܼܝܵܢܹ̈ܐ 414 ܘܠܵܐ ܡܸܬܼܚܲܙܝܵܐ ܘܠܵܐ ܡܸܬܿܬܿܚܕܼܵܐ ܓܘܼܫܡܵܢܵܐܝܼܬܼ ܀ 415 :ܪܘܼܚܵܐ ܗ̄ܝܼ ܚܲܝܵܐ ܘܩܲܠܝܼܠ ܓܸܦܵܗ̇ ܠܡܸܦܪܲܚ ܒܐܵܐܲܪ 416 ܘܠܵܐ ܡܸܬܿܬܿܚܕܵܐ ܒܢܸܫܒܲܝ̈ ܡ̇ܘܬܵܐ ܐܲܝܟ ܗܲܕܵܡܹ̈ܐ ܀ 417 :ܚܲܕܼ ܡ̣ܢ ܥܝܼܪܹ̈ܐ ܢܵܚܹ̇ܬܼ ܨܹܐܕܹܝܗ̇ ܒܝܘܿܡ ܥܘܼܢܕܵܢܵܗ̇ 418 ܘܲܡܫܲܢܸܐ ܠܵܗ̇ ܠܐܲܝܵܟܵܐ ܕܲܦܩܝܼܕܼ ܡ̣ܢ ܒܵܪܘܿܝܵܐ ܀ 419 :ܐܲܝܟ ܗܲܕܿܝܼܠܵܐ ܡܕܲܒܲܪ ܪܘܼܚܵܐ ܠܪܘܼܚܵܢܝܼܬܼܵܐ 420 ܥܕܲܡܵܐ ܕܥܵܐܠܵܐ ܠܒܹܝܬܼ ܐܵܘܢܹ̈ܐ ܠܘܵܬܼ ܚܲܒܼܪ̈ܵܬܼܵܗ̇ ܀ 421 :ܗܵܘ̇ ܡܲܠܲܐܟܼܵܐ ܕܢܵܛ̇ܲܪ ܗ̄ܘ̣ܵܐ ܠܵܗ̇ ܒܚܲܝܹ̈ܐ ܕܲܬܼܢܵܢ 422 ܗܘ̤ ܡܚܵܘܹܐ ܠܵܗ̇ ܕܐܲܝܟܵܐ ܬܕܲܝܲܪ ܥܲܕܼ ܢܘܼܚܵܡܵܐ ܀ 423 :ܒܐܲܪܥܵܐ ܦܩܝܼ̈ܕܵܢ ܠܲܡܕܲܝܵܪܘܼ ܟܠ ܢܲܦܫܵܬܼ̈ܐ 424 ܡܸܢܗܹܝܢ ܒܲܥܕܹܢ ܘܡܸܢܗܹܝܢ ܒܐܲܬܼܪܵܐ ܕܐܸܫܬܲܕܲܪ ܠܹܗ ܀ 425 :ܒܐܲܬܼܪܵܐ ܕܲܥܕܹܢ ܫܵܪܝܵܐ ܢܲܦܫܵܐ ܕܪ̈ܵܚܡܲܝ ܩܘܼܫܬܵܐ 426 ܘܲܕܼܥܵܘ̇ܠܹ̈ܐ ܒܐܲܬܼܪ̈ܵܘܵܬܼܵܐ ܕܠܗܲܠ ܡܸܢܹܗ ܀ 427 :ܒܓܼܵܘ ܦܲܪܕܲܝܣܵܐ ܫܪܹܝܢ ܙܲܕܿܝܼܩܹ̈ܐ ܒܪܘܼܚ ܠܵܘ ܒܲܦܓܲܪ 428 ܟܲܕܼ ܡܸܢܼܝܲܐܒܼܝܼܢ ܠܗܵܘ̇ ܬܘܼܩܵܢܵܐ ܕܡܲܠܟܿܘܼܬܼ ܪܵܘܡ̇ܐ ܧ 429 :ܒܐܲܬܼܪܵܐ ܦܲܐܬܝܵܐ ܨܒܼܵܠ ܕܲܢܕܲܝܪܘܼܢ ܒܢܲܝ̈ ܡܲܠܟܿܘܼܬܼܵܐ 430 ܕܢܹܐܠܲܦ ܟܠܢܵܫ ܕܫܲܪܝܼܪ ܣܲܒܼܪܵܐ ܕܲܡܣܲܟܹܿܝܢ ܠܹܗ ܀ 431 :ܠܵܐ ܗ̄ܘ̣ܵܐ ܕܐܲܓܼܪܵܐ ܢܵܣ̇ܒܿܚܢ ܬܲܡ̇ܢ ܚܠܵܦ ܥܲܡܠܲܝ̈ܗܘܿܢ 432 ܐܸܠܵܐ ܕܢܸܓܼܠܸܐ ܥܲܠ ܦܘܼܪܫܵܢܵܐ ܕܗܵܘܹ̇ܐ ܒܚܲܪܬܼܵܐ ܀ pb. 250 433 :ܐܵܦܠܵܐ ܠܒܼܝܼܫܹ̈ܐ ܠܵܘ ܫܘܼܢܵܫܵܐ ܗ̄ܘ̣ ܐܲܬܼܪܵܐ ܕܲܠܒܲܪ 434 ܐܸܠܵܐ ܕܢܵܘܕܲܥ ܕܠܵܐ ܡܸܬܼܥܲܠܹܝܢ ܠܐܲܦܲܝ̈ ܪܵܘܡ̇ܐ ܀ 435 :ܐܲܝܟ ܪܲܗܒܼܘܿܢܵܐ ܝܲܗ̣̄ܒܼ ܦܲܪܕܲܝܣܵܐ ܠܫܘܼܪܵܪ ܡܸܵܠܵܘ̈ܗܝ 436 ܕܲܒܼܫܝܼ̈ܛܵܬܼܵܐ ܢܫܲܪܲܪ ܚܲܝܠܵܐ ܕܲܫܒܼܝܼ̈ܚܵܬܹܗ ܀ 437 :ܠܦܘܼܬܼ ܫܲܒܼܪܘܼܬܼܵܐ ܕܚܲܝܹ̈ܐ ܕܙܲܒܼܢܵܐ ܝܲܩܲܪ ܙܲܒܼܢܹܗ 438 :ܕܲܒܼܝܲܕܼ ܥܸܠܬܹܗ ܢܓܲܪܸܓܼ ܐ̄ܢܵܫܵܐ ܠܘܵܬܼ ܕܲܥܬܼܝܼ̈ܕܼܵܢ 439 :ܡܢܵܬܼܵܐ ܗ̄ܘ̣ ܕܐܲܪܥܵܐ ܐܵܦ ܦܲܪܕܲܝܣܵܐ ܟܡܵܐ ܐܸܢ ܫܲܦܝܼܪ 440 ܘܡܸܬܼܚܲܒܿܠܵܢܵܐ ܗ̄ܘ̣ ܐܘܼܟܼܠܵܐ ܕܦܹܐܪ̈ܵܘܗܝ ܐܲܝܟ ܟܠ ܦܹܐܪ̈ܝܼܢ ܀ 441 :ܛܢܵܢܵܐ ܐܲܡܪܝܼ ܒܹܝܬܼ ܡ̇ܝܘܿܬܹ̈ܐ ܒܝܲܕܼ ܬܲܫܥܝܼܬܹܗ 442 ܘܚܲܦܸܛ ܐܸܢܘܿܢ ܠܡܸܪܲܓܼ ܚܲܝܹ̈ܐ ܠܵܐ ܡ̇ܝܘܿܬܹ̈ܐ ܀ 443 :ܒܗܵܕܹܐ ܬܸܢܘܲܝ ܦܬ݂ܲܚ ܡܲܥܲܠܬܹܿܗ ܩܕܼܵܡ ܦܵܪܘܿܩܲܢ 444 ܕܗܘ̤ ܩܲܕܼܡ̇ܝܑܬܼ ܢܸܕܪܘܿܫ ܐܘܼܪܚܵܐ ܩܕܼܵܡ ܥܵܠܘܼܠܹ̈݁ܐ ܀ 445 :ܐܵܕܼܵܡ ܩܲܕܼܡ̇ܐ ܐܸܚܲܕܼ ܬܲܪܥܹܗ ܒܐܲܦܲܝ̈ ܐ̄ܢܵܫܵܐ 446 ܘܐܵܕܼܵܡ ܕܲܬܼܪܹܝܢ ܦܲܬܼ̣ܚܹܗ ܠܬܲܪܥܹܗ ܘܥܲܠ̣ ܓܼܝܵܣܵܐ ܀ 447 :ܬܲܪܬܹܿܝܢ ܢܲܦܫܵ̈ܢ ܥܲܠ̣ ܠܹܗ ܠܘܼܩܕܹܿܡ ܐܲܝܟ ܕܲܒܼܐ̄ܪܵܙܵܐ 448 :ܒܗܵܘ̇ ܐܸܣܟܹܿܡܵܐ ܕܲܢܦܲܩ̣ܘ ܡܸܢܹܗ ܚܵܘܵܐ ܘܐܵܕܼܵܡ 449 :ܬܪܹܝܢ ܕܲܝܲܪܘ ܒܹܗ ܒܪܹܫ ܬܘܼܩܵܢܵܐ ܐܲܪܥܵܢܵܝܵܐ 450 ܘܲܬܪܹܝܢ ܥܲܠ̣ܘ ܠܹܗ ܒܐ̄ܪܵܙܵܐ ܬܲܩܝܵܐ ܕܠܵܐ ܡܸܬܼܚܲܒܲܠ ܀ 451 :ܠܲܬܼܪܹܝܢ ܐܲܦܸܩ ܥܒܼܵܪ ܦܘܼܩܕܵܢܵܐ ܕܪܸܓܲܬܼ ܦܹܐܪܵܐ 452 ܘܠܲܬܼܪܹܝܢ ܐܲܥܸܠ ܢܛܵܪ ܦܘܼܩܕܵܢܵܐ ܕܙܲܕܼܝܼܩܘܼܬܼܵܐ ܀ 453 :ܚܛܝܼܬܵܐ ܣܵܓܼܬܹܗ ܩܕܼܵܡ ܚܲܛܵܝܹ̈ܐ ܕܕܼܵܡܹ̇ܝܢ ܠܐܵܕܼܵܡ 454 ܘܙܲܕܿܝܼܩܘܼܬܼܵܐ ܦܬܲܚܬܹܗ ܠܐܵܕܼܵܡ ܘܲܠܓܲܝܵܣܵܐ ܀ 455 :ܥܲܡ ܙܲܕܿܝܼܩܵܐ ܥܲܠ̣ ܚܲܛܵܝܵܐ ܠܓܼܵܘ ܦܲܪܕܿܝܣܵܐ 456 ܕܢܸܬܸܿܠ ܐܝܼܕܼܵܐ ܠܲܚܒܸܢܵܢܹܐ ܠܡܸܬܼܟܲܫܵܪܘܼ ܀ 457 :ܒܝܲܕܼ ܓܲܝܵܣܵܐ ܚܵܘܝܼ ܕܡܲܨܝܵܐ ܗ̄ܝܼ ܠܡܸܙܕܲܕܵܩܘܼ 458 ܕܠܵܐ ܥܵܘܸܟܼܬܹܗ ܪܲܒܿܘܼܬܼ ܥܵܘ̣ܠܹܗ ܡ̣ܢ ܕܲܠܡܸܥܲܠ ܀ 459 :ܒܲܚܕܼܵܐ ܢܲܦܫܵܐ ܕܥܸܠܲܬ̤ ܥܲܡܹܗ ܓܠ̣ܵܐ ܥܲܠ ܟܠܢܵܫ 460 ܕܐܸܢܗܘ̤ ܕܨܵܒܹ̇ܝܢ ܠܵܐ ܡܸܬܼܥܵܘܟܼܝܼܢ ܡ̣ܢ ܕܲܠܡܸܥܲܠ ܀ pb. 251 461 :ܢܲܦܫܹܗ ܕܡܪܲܢ ܘܕܓܲܝܵܣܵܐ ܥܲܠ̣ ܩܲܕܡ̇ܝܑܬܼ 462 ܘܟܸܢ ܐܸܬܿܕܵܪܫܲܬ̤ ܐܘܼܪܚܵܐ ܠܡܸܪܕܵܐ ܠܐܲܬܼܪܵܐ ܕܲܥܕܹܢ ܀ 463 :ܠܲܥܕܹܢ ܥܵܐ̈ܠܵܢ ܟܠ ܢܲܦܫ̈ܬܼܵܢ ܕܣܲܝܒܲܪ ܚܲܫܹ̈ܐ 464 ܘܬܲܡ̇ܢ ܢܵܚ̈ܢ ܐܲܝܟ ܕܲܒܼܥܲܪܣܵܐ ܕܗܲܢܝܼܐܘܼܬܼܵܐ ܀ 465 :ܐܲܝܟ ܕܲܒܼܫܸܢܬܼܵܐ ܫܲܠ݁̈ܝܵܢ ܬܲܡ̇ܢ ܡ̣ܢ ܣܘܼܥܪ̈ܵܢܹܐ 466 ܘܠܵܐ ܡܼܬܼܚܲܫ̈ܚܵܢ ܒܲܡܠܝܼܠܘܼܬܼܵܐ ܕܚܲܝܠܵܐ ܕܲܒܼܗܹܝܢ ܀ 467 :ܡܸܫܠܵܐ ܫܵ̈ܠ̈ܝܵܢ ܡ̣ܢ ܥܸܢܝܵܢܵܐ ܕܫܲܦܝܼܪ ܘܲܣܢܸܐ 468 ܘܠܵܐ ܡܸܬܼܟܲܬܿܫܵܢ ܒܐܵܓܼܘܿܢ ܥܵܡܠܹ̈ܐ ܕܙܲܕܿܝܼܩܘܼܬܼܵܐ ܀ 469 :ܠܵܐ ܗ̄ܘ̣ܵܐ ܕܒܲܛܝܼܠ ܚܲܝܠܵܐ ܕܲܒܼܗܹܝܢ ܡ̣ܢ ܚܲܝܘܼܬܼܵܐ 470 ܐܸܠܵܐ ܕܠܲܝܬܵܘܗܝ ܡ̇ܐܢܵܐ ܕܓܼܘܼܫܡܵܐ ܡܝܲܒܸܿܠ ܡܸܠܹ̈ܐ ܀ 471 :ܠܵܐ ܗ̄ܘ̣ܵܐ ܪܸܕܝܵܐ ܕܦܵܪܘܿܫܘܼܬܼܵܐ ܓܵܙ ܘܐܸܬܼܝܲܒܲܫ 472 ܐܸܠܵܐ ܕܠܲܝܬܵܘܗܝ ܐܝܼܠܵܢ ܦܲܓܼܪܵܐ ܣܢܝܼܩ ܥܲܠ ܫܸܩܝܵܐ ܀ 473 :ܠܵܐ ܗ̄ܘ̣ܵܐ ܝܲܨܪܵܐ ܙܥܲܪ̣ ܚܸܟܼܡܵܬܹ̈ܗ ܘܐܵܘܦܝܼܘ ܓܲܙܵܘ̈ܗܝ 474 ܐܸܠܵܐ ܕܠܲܝܬܵܘܗܝ ܐܲܦܸܛܪܘܿܦܵܐ ܕܢܸܬܸܿܠ ܒܐܝܼܕܼܵܘ̈ܗܝ ܀ 475 :ܠܐܵ ܗ̄ܘ̣ܵܐ ܗܵܘܢܵܐ ܒܛܸܠ̣ ܡ̇ܢ ܪܲܗܛܵܐ ܕܩܲܠܝܼܠܘܼܬܹܗ 476 ܐܸܠܵܐ ܕܠܲܝܬܵܘܗܝ ܦܲܓܼܪܵܐ ܪܟܼܘܼܒܼܵܐ ܕܲܛܥܝܼܢ ܗ̄ܘ̣ܵܐ ܠܹܗ ܀ 477 :ܠܵܐ ܗ̄ܘ̣ܵܐ ܙܵܘܥܹ̈ܐ ܨܸܡܚܹ̈ܐ ܕܢܘܼܗܪܵܐ ܚ̣ܫܸܟܼܘ ܕܸܠܩܲܝ̈ܗܘܿܢ 478 ܕܗܵܐ ܒܒܼܵܬܼ̈ܐ ܠܵܐ ܥܢܲܝ̈ ܐܼܢܹܝܢ ܠܡܸܚܙܵܐ ܫܲܦܝܼܪ ܀ 479 :ܠܵܐ ܗ̄ܘ̣ܵܐ ܡܸܫܬܲܩ ܫܸܬܼܩܲܬ̤ ܡܸܠܬܼܵܐ ܫܝܼܦܘܿܪ ܩܵܠܹ̈ܐ 480 ܐܸܠܵܐ ܕܦܘܼܡ̇ܐ ܡܝܲܒܸܿܠ ܡܸܠܹ̈ܐ ܣܲܟܼܪܹܗ ܡ̇ܘܬܵܐ ܀ 481 :ܠܵܘ ܚܹܐܪܘܼܬܼܵܗ̇ ܛܥܵܬ̤ ܒܲܪ̄ܬܼ ܚܹܐܪܹ̈ܐ ܥܲܠ ܗܵܝ̇ ܫܸܬܼܩܲܬ̤ 482 ܐܸܠܵܐ ܕܲܫܬܸܩ ܦܲܓܼܪܵܐ ܕܚܘܼܒܵܗ̇ ܥܲܠ ܗܵܝ̇ ܫܸܬܼܦܲܬ̤ ܀ 483 :ܐܸܒܼܠܵܐ ܠܒܼܝܼܟܼܵܐ ܥܲܠ ܚܲܒܿܝܼܒܼܵܗ̇ ܕܲܦܪܲܫ ܡܸܢܸܗ̇ 484 ܘܠܵܐ ܡܸܬܼܚܲܫܚܵܐ ܒܲܪ̈ܓܼܝܼܓܼܵܬܼܵܐ ܐܲܪ̈ܥܵܢܵܝܵܬܼܵܐ ܀ 485 :ܫܸܬܼܩܵܐ ܢܵܛ̇ܪܵܐ ܥܲܠ ܥܘܼܢܕܵܢܹܗ ܚܲܟܿܝܼܡܵܐܝܼܬܼ 486 ܥܕܲܡ̇ܐ ܕܫܵܡ̇ܥܵܐ ܩܵܠܵܐ ܕܩܵܪܹܐ ܠܡܵܝܘܿܬܼܘܼܬܹܗ ܀ 487 :ܠܵܐ ܓܹܝܪ ܡܲܨܝܵܐ ܕܬܸܣܥܥܘܿܪ ܡܕܸܿܡ ܡ̣ܢ ܒܸܠܥܵܕܵܘܗܝ 488 ܐܲܟܼܡܵܐ ܕܐܵܦ ܗܘ̤ ܠܲܝܬܵܘܗܝ ܡܸܕܸܿܡ ܡ̣ܢ ܒܸܠܥܵܕܼܝܹܗ̇ ܀ 489 :ܚܲܕܼ ܒܲܪܢܵܫܵܐ ܐܲܬܼܩܸܢ ܐܸܢܘܿܢ ܡܲܬܼܩܸܢ ܟܠܵܐ 490 ܡܸܫܬܲܡܠܸܐ ܦܸܠܓܿܘܼܬܼ ܐ̄̇ܢܵܫܵܐ ܒܸܠܥܵܕܼ ܦܸܠܓܹܿܗ ܀ 491 :ܦܸܠܓܿܘܼܬܼ ܐ̄ܢܵܫܵܐ ܗ̄ܝܼ ܢܲܦܫܵܐ ܟܡܵܐ ܐܸܢ ܚܲܝܵܐ ܗ̄ܝܼ 492 ܘܠܵܐ ܡܸܬܼܩܲܝܡܵܐ ܣܵܥܘܿܪܘܼܬܼܵܗ̇ ܒܸܠܥܵܕܼ ܓܘܼܫܡܵܐ ܀ 493 :ܠܵܗ̇ ܘܲܠܓܼܘܼܫܡܵܐ ܨܒܼܵܐ ܒܼܵܘܿܝܵܐ ܕܢܸܩܪܸܐ ܨܲܠܡܹܗ 494 ܘܐܲܝܟܲܢ ܡܲܨܝܵܐ ܕܒܸܠܥܵܕܼ ܓܘܼܫܡܵܐ ܬܨܘܼܪ ܣܘܼܥܪ̈ܵܢܹܐ ܀ 495 ܒܓܼܘܼܫܡܵܐ ܝܲܗ̣̄ܒܼ ܠܵܗ̇ ܠܲܡܚܵܘܵܝܘܼ ܚܹܝܠ ܚܸܟܼ̈ܡܵܬܼܵܗ̇: pb. 252 496 ܘܠܵܐ ܐܵܦܸܣ ܠܵܗ̇ ܐܵܦܠܵܐ ܒܫܸܢܬܹܗ ܕܬܸܣܥܘܿܪ ܡܸܕܸܿܡ ܀ 497 :ܕܵܡܝܼܟ ܦܲܓܼܪܵܐ ܐܵܦ ܗܝ̤ ܥܲܡܹܗ ܟܲܕܼ ܠܵܐ ܕܵܡ̇ܝܵܐ 498 ܥܕܲܡ̇ܐ ܕܩܵܐܹ̇ܡ ܠܵܐ ܡܸܬܿܬܿܥܝܼܪܵܐ ܠܵܘܵܬܼ ܦܘܼܠܚܵܢܵܗ̇ ܀ 499 :ܘܐܸܢܗܘ̤ ܕܕܲܡܝܼܟ ܠܵܐ ܐܸܬܼܡܲܨܝܲܬ̤ ܕܐܸܣܥܘܿܪ ܡܸܕܸܿܡ 500 ܐܲܝܟܲܢ ܡܲܨܝܵܐ ܗܵܫܵܐ ܕܵܛܒܼܝܼܥ ܒܫܸܢܬܼܵܐ ܕܡ̇ܘܬܵܐ ܀ 501 :ܐܸܢ ܟܲܕܼ ܫܲܪܝܼܪ ܪܘܼܟܵܒܼ ܦܲܓܼܪܹܗ ܠܵܐ ܙܸܡܪܲܬ ܒܹܗ 502 ܠܲܝܟܲܢ ܙܵܡ̇ܪܵܐ ܗܵܫܵܐ ܕܥܒܼܝܼܕܼ ܡܸܕܼܪܵܐ ܫܝܼܛܵܐ ܀ 503 :ܐܸܢ ܟܲܕܼ ܒܹܗ ܗ̄ܘ̣ܵܬܼ ܚܓܝܼܪ ܗ̄ܘ̣ܵܐ ܪܵܗܛܵܗ̇ ܒܫܸܢܬܼܵܐ ܕܟܹܿܐܒܹ̈ܐ 504 ܟܡܵܐ ܟܲܝ ܫܵܠ̇ܝܵܐ ܗܵܫܵܐ ܕܢܸܦܩܲܬ̤ ܡ̣ܢ ܗܲܕܵܡ̇ܘ̈ܗܝ ܀ 505 :ܕܫܵܠ̇ܝܵܐ ܐܸܡ̇ܪܹܬܼ ܡ̣ܢ ܣܘܼܥܪ݁ܵܢܹܐ ܠܵܘ ܡ̣ܢ ܚܲܝܹ̈ܐ 506 ܕܠܲܝܬܿ ܠܲܟܼܝܵܢܵܗ̇ ܕܢܵܘܦܸܐ ܡܸܢܵܗ̇ ܚܹܝܠ ܚܲܝܘܼܬܼܵܐ ܀ 507 :ܒܵܗ̇ ܗ̄ܘ̣ ܥܘܼܬܼܪܵܐ ܟܡܵܐ ܐܸܢ ܢܸܦܩܲܬ̤ ܡ̣ܢ ܓܵܘ ܒܲܝܬܵܗ̇ 508 ܡܸܣܟܹܿܢܵܐ ܠܲܝܬܿ ܕܲܬܼܦܲܪܢܸܣ ܒܹܗ ܐܲܝܟ ܕܲܒܼܩܲܕܼܡ̇ܐ ܀ 509 :ܒܵܗ̇ ܗ̄ܝܼ ܡܸܠܬܼܵܐ ܟܡܵܐ ܐܸܢ ܫܵܠ̇ܝܵܐ ܡ̣ܢ ܣܘܼܥܪ݁ܵܢܹܐ 510 ܠܸܫܢܵܐ ܠܲܝܬܼܿ ܕܲܬܿܬܲܪܓܸܿܡ ܒܹܗ ܚܹܝܠ ܚܸܟܼ̈ܡܵܬܼܵܗ̇ ܀ 511 :ܒܵܗ̇ ܗ̄ܘ̣ ܗܵܘܢܵܐ ܢܸܫܪܵܐ ܕܲܩܢܸܐ ܦܵܪܘܿܚܘܼܬܼܵܐ 512 ܗܲܕܵܡܹ̈ܐ ܠܲܝܬܿ ܕܢܸܗܘܘܿܢ ܓܸܦܹ̈ܐ ܠܩܲܠܝܼܠܘܼܬܼܵܗ̇ ܀ 513 :ܒܵܗ̇ ܗ̄ܘ̣ ܒܲܨܪܵܐ ܩܹܘܒܲܪܢܹܝܛܵܐ ܡܗܝܼܪ ܒܹܝܬܼ ܓܼܠܠܹ̈ܐ 514 ܐܲܪܡܹܢܘܿܢ ܠܲܝܬܿ ܕܚܵܒܹ̇ܫ ܪܘܼܚܵܐ ܠܓܼܵܘ ܡ̣ܢ ܥܘܼܒܹܿܗ ܀ 515 :ܒܵܗ̇ ܐܝܼܬܲܝܗܘܿܢ ܙܵܘܥܹ̈̄ܐ ܥܘܼ̈ܒܹܿܗ ܩܲܢܝܲܝ̈ ܪܘܼܚܵܐ 516 ܡܲܠܵܚܵܐ ܠܲܝܬܿ ܕܢܚܘܼܪ ܫܲܦܝܼܪ ܠܘܵܬܼ ܘܲܥܕܲܝ̈ܗܘܿܢ ܀ 517 :ܒܵܗ̇ ܟܠ ܡܸܕܸܿܡ ܕܐܝܼܬܼ ܠܲܟܼܝܵܢܵܗ̇ ܕܠܵܐ ܫܘܼܓܼܢܵܝܵܐ 518 ܟܝܵܢܵܐ ܘܡܸܠܬܼܵܐ ܘܚܹܝܠ ܚܲܝܘܼܬܼܵܐ ܟܲܕܸ ܫܲܬܿܝܼܩܝܼܢ ܀ 519 :ܟܲܕ ܫܲܬܿܝܼܩܼܝܼܢ ܠܵܘ ܟܠ ܟܠܹܗ ܒܲܕܼܡܘܼܬܼ ܦܲܓܼܪܵܐ 520 ܐܸܠܵܐ ܕܲܫܠܹܝܢ ܡ̣ܢ ܣܘܼܥܪ̈ܵܢܹܐ ܕܲܒܼܝܲܕܼ ܪ̈ܚܼܫܹܐ ܀ 521 :ܫܠܹܝܢ ܠܵܘ ܫܵܠܵܝܵܐ ܕܠܵܐ ܦܘܼܪܫܵܢܵܐ ܐܲܝܟ ܗܲܕܵܡܹ̈ܐ 522 ܐܸܠܵܐ ܥܝܼܪܝܼܢ ܘܐܵܦ ܡܸܬܼܚܲܫܒܼܝܼܢ ܘܠܲܝܬܼ ܦܘܼܠܚܵܢܵܐ ܀ 523 :ܕܠܵܐ ܦܘܼܠܚܵܢܵܐ ܡܩܵܘܝܵܐ ܢܲܦܫܵܐ ܡ̇ܐ ܕܐܸܬܿܕܲܒܼܪܲܬ̤ 524 ܒܲܕܼ ܠܲܝܬܿ ܡ̇ܐܝܣܵܐ ܕܐܘܼܡ̇ܢܘܼܬܼܵܐ ܕܬܸܬܼܚܲܫܲܚ ܒܹܗ ܀ 525 :ܠܲܝܬܿ ܢܲܓܵܪܵܐ ܕܲܡܨܸܐ ܦܵܠܲܚ̇ ܒܸܠܥܵܕܼ ܥܸܫܦܵܐ 526 ܘܠܵܘ ܩܲܝܢܵܝܵܐ ܕܐܵܪܹܫ ܒܐܝܼܕܼܵܘ̈ܗܝ ܕܠܵܐ ܐܲܪܙܲܦܬܵܐ ܀ 527 :ܠܲܝܬܿ ܡܲܠܵܚܵܐ ܕܪܵܕܹܐ ܒܝܲܡܵܐ ܒܸܠܥܵܕܼ ܐܸܠܦܵܐ 528 ܘܠܵܐ ܨܵܝܵܕܼܵܐ ܕܨܵܐܹ̇ܕ ܢܘܼܢܹ̈ܐ ܕܠܵܐ ܟܸܬܵܢܹ̈ܐ ܀ 529 :ܠܵܐ ܐܝܼܬܼ ܠܢܲܦܫܵܐ ܐܸܠܦܵܐ ܕܩܲܝܣܹ̈ܐ ܦܲܓܼܪ̈ܵܢܵܝܹܐ 530 ܥܲܠ ܗܵܝ̇ ܫܲܠܝܵܐ ܡ̣ܢ ܡܲܪܕܿܝܼܬܼܵܐ ܕܝܲܡܵܐ ܡܠܝܼܠܵܐ ܀ 531 :ܠܲܝܬܿ ܠܵܗ̇ ܥܸܫܦܵܐ ܒܸܣܪܵܢܵܝܬܵܐ ܨܒܼܝܼܥܲܬܼ ܒܲܕܼܡ̇ܐ 532 ܥܲܠ ܗܵܝ̇ ܒܲܛܝܼܠ ܪܘܼܟܵܒܼ ܩܲܝܣܹ̈ܐ ܕܦܵܪܘܿܫܘܼܬܼܵܗ̇ ܀ 533 ܒܵܗ̇ ܩܲܝܡܵܐ ܐܘܼ ܡ̇ܢܘܼܬܼܵܗ̇ ܐܲܝܟ ܕܲܒܼܦܲܓܼܪܵܐ: pb. 253 534 ܐܲܝܟ ܐܘܿ ܡ̇ܢܵܐ ܕܢܵܛܲܪ ܗܵܘܢܹܗ ܠܐܘܼܡ̇ܢܘܼܬܹܗ ܀ 535 :ܗܵܟܲܢ ܫܸܦܪܵܬ̤ ܠܗܵܘ̇ ܠܐܘܼܡ̇ܢܵܐ ܪܲܒܿ ܐܘܼ ܡ̇ܢܹ̈ܐ 536 ܕܒܸܠܥܵܕܼ ܦܲܓܼܪܵܐ ܠܵܐ ܬܸܬܲܓܲܪ ܒܐܲܪ̈ܥܵܢܝܵܬܼܵܐ ܀ 537 :ܠܵܗ̇ ܘܲܠܦܲܓܼܪܵܐ ܡ̣ܠܲܟ ܦܘܼܪܥܵܢܵܐ ܘܲܓܼܙܵܪ ܕܝܼܢܵܐ 538 ܘܐܲܟܚ̄ܕܼ ܚܵܪܬܿܝܼܢ ܛܘܼܒܹ̈ܐ ܕܪܵܘܡ̇ܐ ܘܢܸܓܼ̈ܕܹܿܐ ܕܐܲܪܥܵܐ ܀ 539 :ܠܗܵܘ̇ ܦܘܼܪܥܵܢܵܐ ܡܣܲܟܹܿܝܢ ܐܲܟܲܚ̄ܕܼ ܗܝ̤ ܘܲܪܚܘܼܡ̇ܗ̇ 540 ܘܲܟܼܡܵܐ ܕܫܲܬܿܝܼܩ ܦܲܓܼܪܵܐ ܒܩܲܒܼܪܵܐ ܐܵܦ ܗܝ̤ ܒܚܲܝܹ̈ܐ ܀ 541 :ܒܚܲܝܹ̈ܐ ܚܓܼܝܼܪܹ̈ܐ ܫܲܠܝܵܐ ܗܵܫܵܐ ܕܠܵܐ ܗܲܠ̈ܟܼܵܬܼܵܐ 542 ܒܗܵܘ̇ ܐܸܣܟܹܿܡܵܐ ܕܟܲܕܼ ܐܝܼܬܲܝܗܘܿܢ ܥܘܸܠܹ̈ܐ ܒܟܲܪܣܵܐ ܀ 543 :ܗܘ̤ܝܘܼ ܟܲܕܼ ܗܘ̤ ܚܲܝܠܵܐ ܕܩܲܢܝܵܐ ܒܟܲܪܣܵܐ ܘܲܠܒܲܪ 544 ܘܲܟܼܡܵܐ ܕܐܲܚܝܼܕܼ ܬܪܲܥ ܡܲܦܲܩܬܵܐ ܟܠܝܵܐ ܐܵܦ ܗܝ̤ ܀ 545 :ܗܝ̤ ܗ̄ܝܼ ܒܟܲܪܣܵܐ ܘܲܒܼܓܼܵܘ ܫܸܢܬܼܵܐ ܘܲܒܼܓܼܵܘ ܩܲܒܼܪܵܐ 546 ܘܚܲܟܿܝܼܡܵܐܝܼܬܼ ܢܵܛ̇ܪܵܐ ܛܲܟܼܣܵܐ ܕܝܼܠܵܗ̇ ܘܕܼܝܼܠܹܗ ܀ 547 :ܠܲܝܬܼ ܠܵܗ̇ ܕܬܸܚܛܹܐ ܘܠܵܐ ܕܬܸܙܕܲܕܲܩ ܐܸܠܵܐ ܐܸܢ ܒܹܗ 548 ܘܠܵܐ ܕܲܬܼܪܲܟܸܿܒܼ ܦܚܵܣܵܐ ܘܡܸܠܹ̈ܐ ܡ̣ܢ ܒܸܠܥܵܕܵܘܗܝ ܀ 549 :ܐܸܠܘܼ ܡܲܨܝܵܐ ܗܝ̤ ܒܲܠܚܘܿܕܹܝܗ̇ ܠܡܸܙܕܲܕܵܩܘ̣ 550 ܗܵܐ ܡ̣ܢ ܟܲܕܿܘܼ ܦܪ݂ܲܥ ܗ̄ܘ̣ܵܐ ܥܵܘ̣ܠܵܐ ܕܕܼܵܪܹ̈ܐ ܩܲܕܼܡܹ̈ܐ ܀ 551 :ܐܸܠܘ̣ ܦܫܝܼܩ ܗ̄ܘ̣ܵܐ ܠܢܲܦܫܹܗ ܕܐܵܕܼܵܡ ܠܡܸܦܪܲܥ ܕܲܚܛܵܬ̤ 552 ܠܲܝܬܿ ܗ̄ܘ̣ܵܐ ܫܲܪܒܵܐ ܡ̣ܢ ܣܲܟܼܠܘܼܬܼܵܐ ܕܲܒܼܦܲܪܣܣܵܐ ܀ 553 :ܘܐܸܠܘ̣ ܦܪ݂ܲܥ ܗ̄ܘ̣ܵܐ ܐ̄ܫܛܵܪ ܝܵܘ̈ܒܵܬܼܵܐ ܕܐܲܝܠܹܝܢ ܕܲܥܢܲܕܘ 554 ܠܲܝܬܿ ܗ̄ܘ̣ܵܐ ܕܝܼܢܵܐ ܘܠܵܐ ܬܲܒܼ̈ܥܵܬܼܵܐ ܥܲܡ ܩܲܕܼܡ̇ܝܹ̈ܐ ܀ 555 ܕܩܲܝܵܡ ܕܝܼܢܵܐ ܣܸܦܪܹ̈ܐ ܩܵܥܹ̇ܝܢ ܐܲܝܟ ܫܝܼܦܘܼܪܹ̈ܐ: pb. 254 556 ܘܲܕܼܠܲܝܬܿ ܥܲܡܠܹ̈ܐ ܠܢܲܦܫܵܐ ܠܚܘܿܕܹܝܗ̇ ܟܝܵܢܵܐ ܣܵܗܹ̇ܕܼ ܀ 557 :ܡ̇ܕܹܝܢ ܚܲܝܵܒܼ ܦܲܓܼܪܵܐ ܘܢܲܦܫܵܐ ܠܡܸܦܪܲܥ ܕܲܚܛܵܘ 558 ܥܲܕܼܠܵܐ ܦܵܪ݁ܫܝܼܢ ܚܲܕܼ ܡ̣ܢ ܚܵܒܼܪܹܗ ܘܒܼܵܛܹ̇ܠ ܥܲܡܠܵܐ ܀ 559 :ܡ̇ܕܹܝܢ ܙܵܕܹܿܩ ܠܡܸܙܕܲܕܵܩܘܼ ܠܟܼܠܹܗ ܐ̄ܢܵܫܵܐ 560 ܥܲܕܼܠܵܐ ܐܵܬܹܿܐ ܡ̇ܘܬܵܐ ܝܲܥܢܵܐ ܘܒܼܵܠܲܥ ܦܲܓܼܪܹܗ ܀ 561 :ܬܵܘ ܡ̇ܝܘܼܿܬܹ̈ܐ ܠܦܘܼܚܘ ܙܸܕ̈ܩܵܬܼܵܐ ܥܲܕܼ ܚܲܝܝܼܢ ܐ̄̇ܢܬܿܘܿܢ 562 ܕܒܼܵܬܲܪ ܡ̇ܘܬܵܐ ܠܲܝܬܿ ܦܘܼܠܚܵܢܵܐ ܕܫܲܦܝܼܪ ܘܲܣܢܹܐ ܀ 563 :ܬܵܘ ܢܸܬܼܟܲܫܲܦ ܒܦܲܓܼܪܵܐ ܘܢܲܦܫܵܐ ܠܪ̈ܲܚܡܹܐ ܕܓܲܒܼ݂ܠܘܼܢ 564 ܕܲܢܦܲܨܘܿܢܵܢ ܡ̣ܢ ܫܘܼܢܵܩܵܐ ܕܠܵܐ ܫܘܼܠܵܡܵܐ ܀