Narsai: On the Blessing of Noah - ܥܲܠ ܒܘܼܪ̈ܟܬܵܐ ܕܝܲܗ̣ܒ ܢܘܿܚ ܠܲܒܢܵܘ̈ܗܝ

1 :ܐ̄ܪܙ ܛܒ̈ܬܐ ܕܠܘܵܬܼ ܐ̄ܢܫܵܐ ܚܙ̇ܝܬ ܒܟܬܒܹ̈ܐ 2 ܕܡܒܕܸܩ ܠܹܗ ܢܒܼܝ̈ܬܐ ܒܪܘܼܚܵܐ ܐ̄ܪܙܢܐܝܼܬ. 3 :ܪܘܼܚ ܓܸܠܝܵܢܐ ܓܠ̣ܐ ܠܒܲܪ ܥܡܪܡ ܪܘܚܢܐܝܼܬ 4 ܕܢܓܠܹܐ ܠܐ̄ܢܫܐ ܐܪܙܐ ܕܟܼܣܹܐ ܒܗܲܕܵܡܲܝ̈ܗܘܿܢ. 5 :ܒܗܕܡܲܝ̈ܗܘܿܢ ܟܣܹܐ ܗ̄ܘ̣ܵܐ ܐ̄ܪܵܙܵܐ ܕܚܘܪܪ̈ܝܗܘܿܢ 6 ܘܥܲܡ ܝܘܼܒܵܠܗܘܿܢ ܡܬܝܒܲܠ ܗ̄ܘ̣ܵܐ ܡ̣ܢ ܚܲܕ ܠܐܚܪܝܢ. 7 :ܒܗܘܿܢ ܣܝܼܡܵܐ ܗ̄ܘ̣ܵܬ ܣܝܡܲܬܼ ܚ̈ܝܹܐ ܕܣܘܼܢܩܵܢܲܝ̈ܗܘܿܢ 8 ܘܲܒܼܚܘܼܬܼܗܘܿܢ ܡܬܝܛܪܝܼܢ ܗ̄ܘ̣ܵܘ ܚܲܝܹ̈ܐ ܕܒܼܗܘܿܢ. 9 :ܚܝܘܼܬ ܚܲܝܹ̈ܐ ܚܛܠ ܒܪܘܿܝܵܐ ܒܡܕܪܹܗ ܕܐܕܼܵܡ 10 ܕܡܵܐ ܕܡܸܬܚܒܲܠ ܢܚܐ ܒܚܝܵܘ̈ܗܝ ܡܝܘܿܬܘܼܬܹܗ. 11 :ܥܡܹܗ ܕܡܕܪܹܗ ܪܕܲܬ̤ ܚܲܝܘܼܬܵܐ ܕܡ̣ܢ ܗܲܕܵܡܵܘ̈ܗܝ 12 ܥܕܡܵܐ ܕܗܘ̤ܬ ܢܒܼܥܵܐ ܕܚܲܝܹ̈ܐ ܠܐ ܡܝܘܬܹ̈ܐ. 13 :ܐ̄ܪܙܵܢܵܐܝܼܬ ܪܕܬ̤ ܟܣܝܐܝܼܬ ܩܕܼܵܡ ܚܙ̈ܝܹܐ 14 ܘܟܲܕ ܚܵܙܹܝܢ ܗ̄ܘ̣ܵܘ ܘܠܵܐ ܚܵܙܹܝܢ ܗ̄ܘ̣ܵܘ ܚܹܝܠ ܚܲܝܘܼܬܵܗ̇܀ 15 :ܒܗܘܪܐܝܼܬ ܚܘܼܝܬ̤ ܕܠܩܗ̇ ܒܐܕܼܵܡ ܘܲܒܼܫܹܝܬ 16 ܘܒܬܲܪ ܩܲܠܝܼܠ ܒܚܢܘܿܟ ܘܲܒܼܠܲܡܟ ܘܒܼܢܘܿܚ ܝܲܠܕܹܗ. 17 :ܒܢܘܿܚ ܐܬܒܕܩ ܚܹܝܠ ܚܝܬܼܐ ܕܒܟܼܝܵܢ ܐ̄ܢܵܫܵܐ 18 ܡܹܗ ܐܬܦܟܗܘܢ ܓܙܪ̈ܝ ܕܝܼܢܵܐ ܕܒܦܪܕܝܣܵܐ. 19 :ܠܡܟ ܐܬܢܒܼܝ ܕܒܢܘܿܚ ܢܐܚ ܥܠܡܵܐ ܫܚܝܼܩܵܐ 20 ܘܒܕܟܝܘܼܬܹܗ ܡܕܟܹܐ ܠܐܪܥܵܐ ܡ̣ܢ ܠܘ̈ܛܬܐ. 21 :ܒܝܲܕ ܣܘܥܪ̈ܢܹܐ ܫܠܡܲܬ̤ ܨܐܕܵܘܗܝ ܡܸܠܬܹܗ ܕܐܲܒܘܼܗܝ 22 ܕܐܢܚܝ ܠܐܪܥܵܐ ܒܝܲܕ ܒܘܼܪ̈ܟܵܬܼܵܐ ܕܒܪܟ ܠܲܒܼܢܵܘ̈ܗܝ. 23 :ܡܫܟܢ ܫܝܢܵܐ ܗܘ̣ܵܘ ܗܲܕܡܵܘ̈ܗܝ ܠܫܝܢܵܐ ܕܐ̄ܢܫܐ 24 ܡܛܪ ܚ̈ܝܹܐ ܕܒܝ̈ ܓܸܢܣܹܗ ܡ̣ܢ ܢܟܼܝܼܢܹ̈ܐ. 25 :ܒܠܡܹܐܝܢ ܦܲܓܼܪܹܗ ܢܚ ܝܘܒܼܠܵܐ ܕܣܝܡܲܬܼ ܚ̈ܝܹܐ 26 ܘܝܗܒܹܗ ܠܒܢܵܘ̈ܗܝ ܕܢܝܒܠܘܢܵܝܗܝ ܠܕܒܬܪܟܸܢ. 27 :ܚܟܝܡܐܝܼܬ ܢܲܛܪܹܗ ܠܓܙܵܐ ܕܒܹܝܬ ܐܲܒܗܵܘ̈ܗܝ 28 ܘܒܒܘܼܝܢܵܐ ܦܬܲܚ ܟܲܣܝܘܼܬܹܗ ܩܕܼܵܡ ܝܠܕ̈ܬܹܗ. 29 :ܪܘܼܚܵܐ ܚܟܡܹܗ ܠܡܛܲܪ ܥܘܼܬܪܹܗ ܒܲܙܗܝܼܪܘܼܬܼܵܐ 30 ܘܗܘ̤ ܬܘܼܒ ܐܠܦܹܗ ܕܲܢܩܝܼܡ ܠܲܒܢܵܘ̈ܗܝ ܥܲܠ ܡܲܪ̈ܗܛܵܘܗܝ. 31 :ܚܝܠܹܗ ܚܲܝܸܠ ܠܡܚܝܠܘܼܬܼܵܐ ܕܙܘܥܲܝ̈ ܢܦܫܹܗ 32 ܘܐܒܲܥ ܡܐܡܪܐ ܕܙܕܝܼܩܘܿܬܵܐ ܡ̣ܢ ܪܸܥܝܵܢܹܗ. 33 :ܐܝܟ ܣܝܠܘ̈ܟܹܐ ܗܘ̤ܵܘ ܗܕܡܵܘ̈ܗܝ ܠܪܕܝܐ ܕܪܘܼܚܵܐ 34 ܘܒܕܡܘܼܬ ܬܦ̈ܐ ܦܲܓܸܓܼ ܡ̈ܐܐ ܕܒܒܘܼܪ̈ܟܵܬܼܵܐ. 35 ܬܦ̈ܐ ܕܡ̈ܠܐ ܪܕܲܘ ܡ̣ܢ ܦܘܼܡܹܗ ܕܦܘܼܡܵܐ ܕܪܘܼܚܵܐ 36 ܘܚܠܦ ܐܪܥܐ ܗܘܬ̤ ܡܫܡܥܬܐ ܕܒܢܝ̈ ܟܪܣܹܐ. 37 :ܙܪܥܵܐ ܛܒܵܐ ܙܪܥ̣ ܙܲܕܝܼܩܵܐ ܒܚܲܩܠܵܐ ܕܒܼܢܵܘܗ̈ܝ 38 ܘܡܬܚܦܲܛ ܗ̄ܘ̣ܵܐ ܕܲܢܩܲܒܠܘܼܢܵܝܗܝ ܒܕܟܝܘܼܬ ܢܦܫܵܐ. 39 :ܕܟܹܐ ܗ̄ܘ̣ܵܐ ܠܸܒܹܗ ܘܦܫܝܼܛܵܐ ܗ̄ܘ̣ܵܬ ܡܠܲܬܼ ܦܘܼܡܹܗ 40 :ܘܒܚܕܘܼܬܼܵܐ ܡܪܝܼܡ ܗ̄ܘ̣ܵܐ ܩܠܹܗ ܠܡܒܪܟܼܘܼ 41 :ܒܪܝܼܟ ܒܪܡܵܐ ܩܥܵܐ ܒܲܪ ܒܲܝܬܵܐ ܕܗܲܝܡܢܘܼܬܵܐ 42 ܕܚܝܠ ܙܘܥܲܝ̈ ܠܡܒܪܟܼܘܼ ܠܝܠܕܝ̈ ܒܲܫܡܹܗ. 43 :ܒܪܝܼܟ ܐܣܝܢ ܒܝܼ ܥܘܬܪܐ ܕܙܵܐܸܢ ܠܥ̇ܒܕ ܐܝܼܕܵܘ̈ܗܝ 44 ܘܥܒܕܢܝ ܢܒܼܥܐ ܕܡܪܕܐ ܚ̈ܝܹܐ ܠܒܢܝ̈ܢܫܵܐ. 45 :ܒܪܝܟ ܕܓܼܠܐ ܒܝܼ ܒܣܝܼܡܘܼܬܹܗ ܕܪܚ̇ܡ ܐ̄ܢܵܫܵܐ 46 ܘܒܕܩ ܒܐܝܼܕ̈ܝ ܫܪܪܐ ܕܲܫܡܹܗ ܕܐܠܗ ܟܠܐ ܗ̄ܘ̣. 47 :ܒܪܝܼܟ ܕܫܪ̣ܐ ܒܝܼ ܣܝܓܐ ܕܚܡܬܐ ܕܒܹܝܬ ܠܹܗ ܠܥܒܕ̈ܘܗܝ 48 ܘܐܚܝܼ ܒܝܲܚܲܝ̈ ܟܝܢܹ̈ܐ ܚܲܪ̈ܫܹܐ ܐܦ ܡܠܠܹ̈ܐ. pb. f.253v 49 :ܒܪܝܼܟ ܕܐܩܝܼܡܵܢܝ ܢܝܼܫܵܐ ܕܫܲܝܢܵܐ ܩܕܼܵܡ ܚܙ̈ܝܹܐ 50 ܕܢܕܡܘܿܢ ܒܝܼ ܠܡܸܩܪܵܐ ܠܫܡܹܗ ܒܕܟܝܘܼܬ ܢܦܫܵܐ. 51 :ܒܪܝܟ ܕܐܫܪܝܼ ܒܝܼ ܚܹܝܠ ܚܟܡ̈ܬܐ ܕܐܲܠܵܗܘܼܬܹܗ 52 ܕܐܒܲܥ ܡ̣ܢ ܦܘܼܡܝ ܡܸܐܪܡܵܐ ܕܡܲܩܢܹܐ ܚ̈ܝܹܐ ܠܐ̄ܢܫܐ. 53 :ܒܪܝܟ ܗ̄ܘ̣ ܕܥܒܼܕܢܝ ܐܕܡ ܕܲܬܼܪܹܝܢ ܠܐܕܡܝܹ̈ܐ 54 ܘܕܡܝܼ ܒܛܟܼܣܵܐ ܕܣܥ̣ܪ ܨܐܕܝ ܠܗܘ̇ ܕܒܪܫܝܼܬ. 55 :ܒܪܝܟ ܕܒܼܪܐ ܒܝܼ ܒܪܝܬܐ ܕܬܢܝܐ ܡ̣ܢ ܗ̇ܝ ܕܗܘ̤ܬ 56 ܕܢܗܘܹܐ ܥܠܡܵܐ ܪܕܐ ܒܛܟܼܣܵܐ ܕܒܼܵܪܘܿܝܘܼܬܹܗ. 57 :ܒܪܝܼܟ ܕܐܩܝܼܡܢܝ ܒܕܪܓܼܐ ܪܡܵܐ ܕܨܠܸܡ ܨܠܡܹܗ 58 ܘܡܬܚ ܫܘܠܛܵܢܝ ܥܲܠ ܩܪ̈ܝܵܬܐ ܒܕܘܼܡܝܵܐ ܕܝܼܠܹܗ. 59 :ܙܥܘܿܪ ܗ̄ܘ̣ ܠܫܵܢܝ ܠܡܪܟܼܘ ܠܫܸܡ ܐܝܼܬܘܼܬܹܗ 60 ܕܐܩܢܝܼ ܠܪܸܥܝܢܝ ܚܹܝܠ ܣܘܼܟܵܠܵܐ ܕܥܬܼܝܼܕ̈ܬܵܐ. 61 :ܒܲܥܬܝܼܕܘܼܬܼܵܐ ܒܪܟ ܟܐܢ̈ܐ ܠܒܢܲܝ̈ ܟܪܣܗ 62 ܥܲܠܗ̇ܝ ܒܪܟ ܠܫܸܡ ܐܠܗܹܗ ܘܐܟܸܢ ܠܲܒܼܢܵܘ̈ܗܝ. 63 :ܒܪܝܟ ܠܲܡ ܡܪܝܐ ܐܲܠܵܗܹܗ ܕܫܹܝܡ ܗܵܐ ܥܬܝܼܕܘܼܬܼܵܐ 64 ܘܥܲܠ ܡܵܢܵܐ ܕܫܝܡ ܘܠܵܐ ܕܝܼܠܵܟ ܐܘ ܙܲܕܝܼܩܵܐ. 65 :ܐܢܬ ܩܫܝܼܫ ܐ̄ܢܬ ܡ̣ܢ ܝܠܕ̈ܬܟ ܐܒܼܵܐ ܟܸܐܢܵܐ 66 ܥܠܲܝܟ ܣܝܼܡ ܠܘܼܩܕܵܡ ܫܡ ܐܠܗܵܟ ܘܟܸܢ ܥܲܠ ܝܲܠܕ̈ܝܟ. 67 :ܚܕܬܵܐ ܗ̣̄ܝ ܕܣܥ̣ܪܬ ܒܲܪ ܠܡܟ ܟܹܐܢܵܐ ܒܐ̄ܪܙ ܒܘܼܪ̈ܟܵܬܵܟ 68 ܘܛܵܟ ܒܘܼܕܩܵܐ ܕܡܸܕܸܡ ܚܕܬܐ ܡܬܒܕܲܩ ܒܵܗ̇. 69 :ܒܪܝܼܟ ܐܠܗܹܢ ܕܫܹܝܡ ܐܸܬܼܢܒܝܼ ܢܒܝܼܵܐ ܕܩܘܼܫܬܵܐ 70 ܘܫܘܬܸܦ ܠܲܒܼܢܵܘ̈ܗܝ ܒܪܒܘܼܬ ܥܘܼܬܼܪܵܐ ܕܐܘܪܸܬ̣ ܠܒܼܪܹܗ. 71 :ܠܝܦܬ ܠܡ ܢܦܬܐ ܘܢܫܪܐ ܒܡܲܫܟܢܵܐ ܕܫܹܝܡ ܩܫܝܼܫܵܐ 72 ܘܠܚܡ ܢܸܥܒܸܕ ܥܒ̣ܕܵܐ ܠܐܲܚܘ̈ܗܝ ܡܢܦܠܘܿܚ ܐܸܢܘܿܢ. 73 :ܠܫܝܼܡ ܒܪܝܟ ܡܵܪܝܵܐ ܘܠܝܦܬ ܢܦܬܐ ܘܠܚܵܡ ܥܒܼܕܐ 74 ܐܣܟܝ̈ܡܹܐ ܬܠܬܐ ܕܒܲܚܕܵܐ ܡܸܠܬܐ ܦܪܝܼܫܝܼܢ ܘܫܘܝܢ. 75 :ܚܲܕ ܫܸܡ ܡܪܝܵܐ ܘܚܲܕ ܫܘܼܪܬܚܵܐ ܘܚܲܕ ܥܒܕܘܼܬܵܐ 76 ܘܠܬܠܬܲܝܗܘܿܢ ܡ̣ܢ ܚܲܕ ܦܘܼܡܵܐ ܒܬܠܬܼ ܡܠܝܼ̈ܢ. 77 :ܠܬܠܬܼ ܡܘ̈ܫܚܵܢ ܦܠܓ ܦܬܓܡܵܘ̈ܗܝ ܡܡܲܠܸܠ ܫܲܦܝܼܪ 78 ܘܟܕܢ ܐܢܝܢ ܒܬܝܪܐ ܫܘܝܵܐ ܕܚܕܵܐ ܡܸܠܬܐ. 79 :ܬܠܬܼܵܐ ܫܒܛܝܼ̈ܢ ܐܵܘܚܸܕ ܠܲܒܼܢܵܘ̈ܗܝ ܐܒܼ̈ܐ ܟܐܢܵܐ 80 ܘܠܚܲܕ ܐܵܘܪܸܟ ܘܠܲܬܼܪܹܝܢ ܚܲܕ ܡ̣ܢ ܚܲܒܼܪܹܗ. 81 :ܬܚܹܝܬ ܩܫܝܼܫܵܐ ܥܒܲܕ ܠܲܙܥܘܿܪܵܐ ܘܲܠܡܨܥܵܝܵܐ 82 ܘܥܲܠ ܝܪܬܘܼܬܹܗ ܐܣܢܸܩ ܐܸܢܘܿܢ ܒܲܬܪܹܝܢ ܐܣܟܹܝܡܝܼ̈ܢ. 83 :ܒܐܣܟܹܝܡ ܡ̈ܠܹܐ ܟܲܣܝܹܗ ܠܚܲܝܠܵܐ ܕܒܓܼܘ ܡܸܠܵܘ̈ܗܝ 84 ܘܣܡ ܫܸܡ ܒܘܼܪܟܬܼܵܐ ܥܲܠ ܩܕܡܝܵܐ ܟܲܕ ܠܵܐ ܒܲܪܟܹܗ. 85 ܠܲܝܬ ܠܹܗ ܒܘܼܪܟܬܐ ܠܫܹܝܡ ܩܲܕܡܵܝܵܐ ܐܸܢ ܐ̄ܢܫ ܢܸܒܼܥܹܐ. 86 :ܕܗܵܐ ܒܪܝܟ ܡܵܪܝܵܐ ܐܡ̣ܪ ܐܲܒܘܼܗܝ ܘܠܵܐ ܗ̄ܘ̣ܵܐ ܒܪܝܟ ܫܹܝܡ 87 ܘܠܵܐ ܬܘܼܒ ܠܵܘܛܬܼܵܐ ܕܠܵܛ ܠܐܚܪܝܵܐ ܩܪܝܼܒܼܵܐ ܠܹܗ. 88 ܕܗܵܐ ܠܟܢܥܬ ܠܵܛ ܕܐܝܼܬܘܗܝ ܒܲܪ ܚܵܡ ܘܠܐ ܗ̄ܘ̣ܵܐ ܠܹܗ ܠܚܵܡ. 89 :ܕܫܝܹܡ ܝܗܒ̣ ܒܘܼܪܟܬܹܗ ܠܫܸܡ ܒܵܪܘܿܝܵܐ ܕܥܸܠܲܝ ܡ̣ܢܟܠ 90 ܘܕܚܡ ܝܗܒܗ̇ ܠܠܘ ܛܬܵܐ ܕܥܘ̣ ܠܹܗ ܠܲܟܼܢܲܥܢ ܒܘܟܼܪܹܗ. 91 :ܥܡ̈ܝܼܠܵܢ ܡܸܠܲܝ̈ܟ ܐܘ ܙܲܕܝܼܩܵܐ ܘܥܡܘܿܛ ܫܲܪܒܵܟ 92 ܘܠܵܐ ܐ̄ܢܵܫ ܩܐܸܡ ܥܲܠ ܣܘܼܟܵܠܵܐ ܕܒܒܘܼܪ̈ܟܵܬܵܟ. 93 :ܟܣܹܐ ܣܘܼܟܠܵܟ ܘܡܲܒܼܠܲܕ ܣܲܓܝܼ ܡ̣ܢ ܒܥ̈ܝܐ 94 ܘܠܐ ܕܲܠܝܼܠܵܐ ܠܹܗ ܒܥܵܬܐ ܕܡܸܠܝ̈ܟ ܠܐܝܢܵܐ ܕܒܥ̇ܐ. 95 :ܠܵܐ ܒܘܼܕ̈ܟܵܬܵܟ ܢܩ̈ܦܢ ܠܲܫܡܵܐ ܕܡܸܬܒܪ̈ܟܢܐ 96 :ܘܠܵܐ ܠܘܛ̈ܬܿܟ ܡܥܝܼ̈ܩܵܢ ܢܲܦܫܵܐ ܕܡܬܠܝܼ̈ܛܢܹܐ 97 :ܒܥܹ̇ܝܬ ܕܬܒܪܟ ܠܫܹܝܡ ܕܠܫܬܡܗ̇ ܒܫܸܡ ܐܠܗܵܐ 98 ܘܡܵܐ ܕܐܬܡܥܲܬ̤ ܒܘܼܪܟܬܵܐ ܠܘܲܥܕܵܗ̇ ܝܗܒܬܵܗ̇ ܠܡܵܪܗ̇. pb. f.254r 99 :ܨܒܹܝܬܼ ܬܘܼܒܼ ܕܬܠܘܛ ܠܚܵܡ ܚܡܝܼܡܵܐ ܚܡ ܒܲܚܛܝܼܬܵܐ 100 ܘܟܲܕ ܡܚܫ ܐܲܢ̄ܬ ܐܚܫܬ ܠܒܼܪܗ ܒܚܲܫܵܐ ܕܝܼܠܹܗ. 101 :ܠܵܐ ܐ̄ܢܫ ܝ̇ܕܥ [ܕ]ܐܝܟܵܢ ܢܩܪܸܝܟ ܠܦܘܼܬ ܣܘܼܥܪܢܵܟ 102 ܠܐ ܡܒܪܟܢܐ ܘܠܵܐ ܠܝܘܿܛܵܐ ܒܕ ܡܬܚܙ̈ܝܢ. 103 :ܕܡ̇ܐ ܐܢܬ [ܗ]ܘ̣ ܠܝܼ ܕܠܵܐ ܫܠܝܼܛ ܐܲܢ̄ܬ ܥܲܠ ܨܒܼܝܢܵܟ 104 ܘܐܲܝܟ ܠܵܘ ܐܲܢ̄ܬ ܗܘ̣ ܕܡܡܠܠ ܐ̄ܢܬ ܐܠܐ ܐ̄ܚܪܢܐ. 105 :ܕܡܝܐ ܕܐ̄ܚܪܹܝܢ ܥ̇ܨܐ ܠܚܲܨܪܵܟ ܠܐܝܕܐ ܕܨ̇ܒܐ 106 ܘܩܛܝܪ ܐܝܼܬ ܢ̇ܬܦ ܗܘܢܵܟ ܠܐܝܟܵܐ ܕܡܢܚ. 107 :[...]ܥܗܕ ܙܲܕܝܼܩܵܐ ܕܪ̈ܡܢ ܡܢܵܟ ܡ̈ܠܹܐ ܕܐܡ̣ܪܬ 108 ܘܐܸܢ ܡܬܬܒܥܬ ܕܬܓܼܠܐ ܐܸܢܹܝܢ ܥܣܩ̈ܢ ܡܸܢܵܟ. 109 :[...ܥ]ܣܩ̈ܢ ܡܢܟ ܠܵܘ ܗ̄ܘ̣ܐ ܕܥܣ̈ܩܢ ܐܠܵܐ ܕܟܣܝ̈ܢ 110 ܘܗܢܵܘ ܬܲܗܪܵܐ ܕܬܢ̇ܐ ܐܢܬ ܡܸܕܸܡ [...]ܟܼܣܹܐ ܡܸܢܵܟ. 111 :ܐ̄ܪܙܵܐ ܪܒܵܐ ܟܣܹܐ ܒܗ̇ ܒܡܸܠܬܵܟ ܓܒܼܪܐ ܟܐܢܵܐ 112 ܘܛܵܟ ܫܝܼܛܘܼܬܼܵܐ ܕܓܸܢܣܵܟ [...]ܫܝܼܛܵܐ ܥܬܝܼܕ ܕܢܪܡܪܸܡ. 113 :ܚܲܠܝܘܼܬ ܚ̈ܝܹܐ ܡܠܹܝܢ ܦܬܓܼܵܡܲܝ̈ܟ ܒܲܪ [ܡ]ܝܘ̈ܬܹܐ 114 ܘܛܟ [...]ܝܠܝܘܬܗܘܿܢ ܡܟܦܪܐ ܡܵܘܬܼܵܐ ܡ̣ܢ ܐ̄ܢܫܘܼܬܼܵܐ. 115 :ܬܗܪܐ ܗ̄ܘ̣ ܡܸܐܡܪܵܐ ܕܐܒܲܥ ܠܸܒܵܟ ܥܲܦܪܹܗ [...]ܒܪܟ 116 ܕܒܒܘܪ̈ܟܬܐ ܚ̣ܠܛܬ ܠܘ̈ܛܬܐ ܘܟܣܝܼܬ ܐܸܢܹܝܢ. 117 :ܒܐܠܗ ܟܠܐ ܡܕܡܝܬ ܓܲܒܼܪܐ ܒܫܲܪܝܘܼܬ [...]ܠܬܵܟ 118 ܕܫܘܝܵܐ ܠܪܸܡܙܹܗ ܛܒܼ̇ܬܐ ܘܒܝܼܫܬܼܵܐ ܠܡܫܚܠܦܘܼ. 119 :ܪܡܙܹܗ ܚܟܡܵܟ ܠܡܕܡܝܘܼ [...]ܕܘܡܝܵܐ ܕܝܼܠܹܗ 120 ܡ̇ܢ ܐܡ̇ܪܢܵܐ ܕܒܹܗ ܡܸܬܕܡܝܼܬ ܒܫܘܼܚܠܵܦ ܡܸܠܲܝ̈ܟ. 121 :ܕܝܼܠܹܗ ܐܝܼܬܹܝܗ̇ ܡܸܠܬܐ [...] ܠܥܙܬ̤ ܒܡܸܠܬ ܦܘܼܡܵܟ 122 ܘܗܘ̤ ܬܪܓܸܡ ܒܵܟ ܩ̈ܐܐ ܦܪ̈ܝܼܫܹܐ ܕܚܲܕ ܣܘܼܟܵܠܵܐ. 123 :ܚܲܕ ܣܘܼܟܵܠܵܐ [...]ܟܣܹܐ ܒܵܗ̇ ܒܡܸܠܬܹܗ ܕܒܪ ܠܲܡ̇ܟ ܟܹܐܢܵܐ 124 ܘܠܚܲܕ ܢܝܼܫܵܐ ܚܢܝܐ ܒܥܵܬܐ ܕܒܦܬܓܼܡܘ̈ܗܝ. 125 :ܢܝܼܫܵܐ [...ܕ]ܩܘܼܫܬܵܐ ܬܪܨ ܠܹܗ ܩܘܼܫܬܵܐ ܠܪܚ̇ܡ ܩܘܼܫܬܵܐ 126 ܘܚ̣ܢܐ ܠܩܘܼܒܼܠܹܗ ܐܲܝܟ ܡܵܐ ܕܲܦܐܹܐ [...ܠ]ܕܚܠܲܬܼ ܩܘܼܫܬܼܵܐ. 127 :ܫܪܪܐ ܓܲܠܝܵܐ ܪܡ݂ܲܙ ܠܹܗ ܕܢܓܠܐ ܫܪܪܐ ܕܲܫܡܹܗ 128 ܕܢܸܚܙܘܢ ܐ̄ܢܫܐ [ܠ]ܫܲܪܝܼܪܘܼܬܹܗ ܒܦܘܼܡ ܒܪܢܫܵܐ. 129 :ܒܦܘܼܡ ܢܘܚ ܢܚܬ̤ ܡܠܬܼ ܩܘܼܫܬܼܵܐ ܕܫܚܝܼܩܵܐ ܗ̄ܘ̣ܵܬ 130 ܘܒܣܦܘ̈ܬܹܗ ܪܬܡܬ̤ ܩ̈ܠܹܐ ܕܬܪܥܘܼܬܼ ܐ̄ܢܫܐ. 131 :ܥܲܡ ܐ̄ܢܫܘܼܬܼܵܐ ܪܕܬ̤ ܡ̣ܢ ܐܕܡ ܪܸܫ ܐ̄ܢܫܘܼܬܼܵܐ 132 ܘܠܵܐ ܢܚ ܪܗܛܗ̇ ܥܕܡܵܐ ܕܡܛܬ̤ ܠܲܠܡܹܐܝܢ ܦܓܼܪܹܗ. 133 :ܒܦܓܼܪܗ ܘܢܲܦܫܹܗ ܫܪܬ̤ ܚܘܬܐ ܡܟܣܬ̤ ܐ̄ܢܫܐ 134 ܘܐܝܟ ܡܲܒܘܿܥܵܐ ܐܫܦܲܥ ܪܵܕܝܼܗ̇ ܥܲܠ ܪܸܫ ܝܲܠܕܵܘ̈ܗܝ. 135 :ܡܫܝܼܚܵܐ ܫܪܐ ܒܹܗ ܡ̇ܢ ܐܡ̇ܪܢܐ ܐ̄ܙܵܢܵܐܝܼܬܼ 136 ܘܝܗܒܹܗ ܠܲܒܼܢܵܘ̈ܗܝ ܒܐܣܟܹܝܡ ܡ̈ܐܐ ܕܲܒܼܒܘܪ̈ܟܵܬܵܐ 137 :ܠܒܘܟܼܪܹܗ ܐܫܠܸܡ ܣܝܡܬܼ ܚܲܝܹ̈ܐ ܕܟܣܝܵܐ ܗ̄ܘ̣ܵܬ ܒܹܗ 138 ܕܚܙ̣ܵܐ ܕܝ̇ܕܥ ܠܡܛܲܪ ܓܲܙܹ̈ܝܗ̇ ܕܠܵܐ ܢܟܝ̈ܢܐ. 139 :ܠܐ ܚܘ̈ܗܝ ܫܥܒܸܕ ܬܚܝܹܬ ܫܘܠܛܢܵܐ ܕܪܫܢܵܘܼܬܹܗ 140 ܕܲܒܼܫܘܼܥܒܵܕܗܘܿܢ ܢܫܵܘܬܸܦ ܐܢܘܿܢ ܒܣܝܡܲܬܼ ܚܲܝܹ̈ܐ. 141 :ܚܝܹ̈ܐ ܦܠܓ ܡ̣ܢ ܚܝܘܼܬܹܗ ܠܲܒܢܲܝ̈ ܟܪܣܗ 142 ܘܐܠܸܦ ܐܸܢܘܿܢ ܠܡܛܪ ܐܪܙܐ ܕܚܲܝܹ̈ܐ ܕܒܼܗܘܿܢ. 143 :ܐ̄ܪܙܢܐܝܼܬ ܚܵܙܝܼ ܐܸܢܘܿܢ ܚܲܝܹ̈ܐ ܕܒܼܗܘܿܢ 144 ܕܠܵܡܵܐ ܕܓܠܝܢ ܢܫܘܛܘܢ ܐܢܝܢ ܒܲܕܠܵܐ ܦܐܝܵܢ. 145 :ܒܗܕܐ ܬܸܢܘܵܝ ܟܘܼܢ ܠܚܵܡ ܘܠܝ̣ܦܬ ܬܚܹܝܬ ܫܹܝܡ ܪܲܒܵܐ 146 ܕܕܲܕ ܠܵܐ ܨ̇ܒܝܢ ܢܝܲܩܪܘܢ ܐ̄ܪܙܐ ܕܒܩܫܝܼܫܵܐ. pb. f.254v 147 :ܠܒܘܟܼܪܬ ܝܩܪ ܠܵܘ ܕܡܝܩܪ ܠܗ̇ܝ ܕܟܼܝܢܵܐ 148 ܐܠܵܐ ܕܢܵܘܪܸܒܼ ܠܗ̇ܘ ܕܡܚܕܬܼ ܟܝܢܵܐ ܕܒܼܠܝܼ. 149 :ܠܵܘ ܠܟܼܝܢܵܐ ܦܠܲܓܼ ܐܝܩܪܵܐ ܡܠܹܐ ܟܐܢܘܼܬܼܵܐ 150 ܐܸ̄ܠܵܐ ܠܐ̄ܪܵܙܵܐ ܕܓܡ̇ܪ ܐ̄ܪ̈ܙܐ ܒܲܓܼܡܝܼܪܘܼܬܹܗ. 151 :ܠܘ ܕܠܵܐ ܦܘܼܪܵܫ ܦܠܓ ܡܸܠܵܘ̈ܗܝ ܠܬܠܬܼ ܡܘܼܫ̈ܚܵܢ 152 ܐܠܐ ܕܒܢܘܐ ܠܪܥܝܵܢ ܝܠܕܘ̈ܗܝ ܒܚܕܵܐ ܡܸܠܬܐ. 153 :ܡܠܬܐ ܐܡ̣ܪ ܘܟܲܕ ܛܵܒܼ ܐܡ̣ܪ ܠܘ ܗܘ̤ ܐܲܡܪܵܗ 154 :ܘܙܗܝܼܪ ܗ̄ܘ̣ܵܐ ܛܵܒܼ ܕܢܐܡܪܝܼܗ̇ ܒܛܲܟܼܣܵܐ ܠܦܘܼܬ ܡܵܐܕܐܡܪܗ̇ 155 :ܘܙܗܝܼܪ ܗ̄ܘ̣ܵܐ ܛܵܒܼ ܡܪܐ ܡܠܬܼܵܐ ܐܝܼܬܼܵܘܗܝ ܐܝܼܬܝܵܐ ܕܫܲܝܼܛ ܥܲܠ 156 ܘܡܝܒܠܢܵܗ̇ ܢܘܚ ܙܕܝܼܩܐ ܡ̇ܛܪ ܐܪ̈ܙܐ. 157 :ܒܫܪܝܼܪܘܼܬܗ ܚܵܪ ܒܵܪܘܿܝܵܐ ܚܵܪ ܒܵܪܘܿܝܵܐ ܕܓܠܐ ܠܹܗ ܟܠ 158 ܘܓܼܠܐ ܘܚܵܘܝܹܗ ܐ̄ܪܙܐ ܪܒܵܐ ܕܦܘܪܩܵܢ ܐ̄ܢܵܫܵܐ. 159 :ܒܘܼܩܝܵܐ ܕܢܦܫܹܗ ܚܙ̣ܵܐ ܕܡܫܪܲܪ ܒܗܲܝܡܢܘܼܬܼܵܐ 160 :ܘܝܗ̣ܒ ܒܹܗ ܝܲܚܠܵܐ ܠܡܸܬܼܢܵܐ ܡ̈ܠܹܐ ܕܗܲܝܡܵܢܘܼ 161 :ܒܗܝܡܢܘܼܬܼܵܐ ܩܒܸܠ ܐܵܦܗܘ̤ ܡܠܲܬܼ ܡܵܪܹܗ 162 :ܘܐܲܪܝܼܡ ܡܠܬܹܗ ܘܐܟܼܪܸܙ ܩܘܼܫܬܼܵܐ ܕܐܬܒܕܩ ܠܹܗ 163 :ܒܚܘܼܒܵܐ ܩܲܒܠܹܗ ܠܐܪܙ ܒܘܕܩܵܐ ܕܐܬܒܕܲܩ ܠܹܗ 164 ܘܢܗܲܪ ܣܓ̣ܝ ܒܪܒܘܼܬܼ ܛܒܼܬܼܵܐ ܕܠܘܵܬܼ ܐ̄ܢܫܵܐ. 165 :ܒܬܗܪܐ ܪܲܒܵܐ ܩܡ ܙܲܕܝܼܩܵܐ ܒܫܘܪܵܝ ܡܸܠܬܹܗ 166 ܕܐܝܟܢ ܡܨܝܵܐ ܕܢܚܙܹܐ ܐ̄ܢܵܫܵܐ ܠܒܢܝ̈ܫܐ. 167 :ܐܲܝܟ ܒܲܪ ܐܝܫܲܝ ܬܗܲܪ ܐܦ ܐܲܒܘܼܗܝ ܕܒܼܪܗ ܕܐܝܼܫܲܝ 168 ܕܠܐ ܕܪܓܵܐ ܣܠܸܩ ܒܪܝܫܵܐ ܟܝܵܫܵܐ ܫܝܼܛܵܐ. 169 :ܒܬܗܪܵܐ ܕܕܡ̇ܐ ܠܗ̇ܘ ܕܒܙܡܝܼܪܬܵܐ ܕܡܪܝܵܐ ܡܪܲܢ 170 ܩܡ ܗ̄ܘ̣ܵܐ ܐܦ ܢܘܚ ܒܼܥܕܵܢ ܐ̄ܪܙܐ ܕܐܬܒܕܲܩ ܠܹܗ. 171 :ܕܘܝܼܕ ܬܗܲܪ ܗ̄ܘ̣ܵܐ ܘܪܟܸܒܼ ܡܠܹ̈ܐ ܒܟܢܵܪ ܡܸ̈ܠܹܐ 172 ܡܘܚ ܐܬܕܡܲܪ ܘܐܘܠܸܕ ܡܸܐܡܪܵܐ ܕܡܪܕܐ ܚܲܝܹ̈ܐ. 173 :ܒܚ̈ܝܐ ܕܢܠܕܹܗ ܬܗ̣ܪ ܘܐܬܕܡܪ ܦܪܘܿܫܐܝܼܬ 174 ܕܟܼܡܵܐ ܪܡ̇ܝܢ ܡ̣ܢ ܚܲܝܘܼܬܵܐ ܕܒܢܝ̈ ܒܸܣܪܵܐ. 175 :ܒܝܗܒ ܚܝܹ̈ܐ ܬܗ̣ܪ ܚܲܟܝܼܡܵܐ ܠܐ ܗ̄ܘ̣ܵܐ ܒܚܲܝܹ̈ܐ 176 :ܘܐܣܛܝܼ ܡܠܬܹܗ ܡ̣ܢ ܡܘܼܗܲܒܼܬܐ ܠܘܵܬܼ ܝܵܗܘܒܼܵܐ 177 :ܦܬܚ ܣܦܘ̈ܬܹܗ ܘܒ̣ܥܐ ܕܢܐܡܲܪ ܒܪܝܼܟ ܒܸܪܝ ܒܘܼܟܼܪܵܐ 178 ܘܗܦܟܗ̇ ܠܡܠܬܼܵܐ ܘܐܡ̣ܪ ܕܒܪܝܟ ܐܠܗܹܗ ܕܫܹܝܡ. 179 :ܡ̣ܢ ܛܘܝܒܹܗ ܠܒܼܪܹܗ ܥܬܝܼܕ ܗ̄ܘ̣ܵܐ ܠܡܒܪܟܘܼ 180 ܡܨܝܗܝ ܬܲܗܪܵܐ ܘܒܪܟ ܠܲܫܡܵܐ ܡܠܹܐ ܒܘܪ̈ܟܵܬܐ. 181 :ܒܪܝܟ ܐܠܗܵܐ ܐܡ̣ܪ ܟܹܐܢܵܐ ܠܟܐܢܵܐ ܕܒܼܪܵܝܗܝ 182 ܘܚܲܒܫܹܗ ܠܲܒܼܪܗ ܠܓܘ ܡ̣ܢ ܡܸܠܬܐ ܕܠܘܵܬ ܡܵܪܹܗ. 183 :ܒܒܘ ܒܒܘܪܟܵܬܐ ܕܡܲܪܗ ܚܠܛ ܙܕܝܼܩܵܐ ܒܘܪܟܵܬܼܵܐ ܕܒܼܪܹܗ 184 ܒܕܡܗܝܡܸܢ ܗ̄ܘ̣ܵܐ ܕܫܸܡ ܐܲܠܗܵܐ ܒܘܪܬܼܵܐ ܗ̄ܘ̣ ܟܠܹܗ. 185 :ܒܪܝܟ ܐܠܗܹܗ ܕܒܸܪܝ ܕܨܒ̣ܵܐ ܒܹܗ ܘܩܪ̣ܝܗܝ ܒܲܫܡܹܗ 186 ܘܲܒܼܪܝܟ ܐܦ ܒܪܸܝ ܕܟܼܣܹܐ ܒܵܓܼܵܘܹܗ ܡܵܪܹܗ ܘܲܒܼܪܗ. 187 :ܒܗ̇ܘ ܕܟܼܣܹܐ ܗ̄ܘ̣ܵܐ ܒܒܪܹܗ ܬܗܪ ܗ̄ܘ̣ܵܐ ܩܐܘܕܝܼ ܘܐܡ̣ܪ 188 ܕܒܼܪܝܟ ܡܵܪܝܵܐ ܕܥܬܝܼܕ ܕܢܓܼܠܹܐ ܒܒܪܝܼ ܡܵܪܘܼܬܹܗ. 189 :ܗ̇ܝ ܕܥܬܝܼܪܵܐ ܓܠ̣ܵܐ ܠܹܗ ܡܵܪܹܗ ܠܥܒܕܐ ܛܒܼܵܐ 190 ܠܘ ܓܠܝܵܐܝܼܬ ܐܠܐ ܒܐ̄ܪܙܐ ܐ̄ܪܙܢܵܐܝܼܬ. 191 :ܡ̣ܢ ܝܠܕ̈ܬܹܗ ܥܬܝܼܕ ܗ̄ܘ̣ܵܐ ܕܢܸܗܘܹܐ ܡܚܪܲܪ ܐ̄ܢܫܐ 192 ܥܸܠܗ̇ܝ ܬܗܲܪ ܗ̄ܘ̣ܵܐ ܕܡܢܘܼ ܠܡܢܘܼ ܥܬܝܼܕ ܕܢܚܲܪܪ. 193 :ܡ̣ܢ ܫܹܝܡ ܥܬܝܼܪ ܗ̄ܘ̣ܵܐ ܕܢܩܘܡ ܡܠܟܵܐ ܕܡܡܠܟ ܥܲܠ ܟܠ 194 ܥܠ ܩܕܡ ܗ̇ܝ ܡܕܢ ܠܐܚܘ̈ܗܝ ܒܢܝܼܪܐ ܕܫܡܹܗ. 195 :ܘܐܸܠܵܐ ܠܡܢܵܐ ܠܵܐ ܝܗ̣ܒ ܒܘܼܪܟܵܬܼܵܐ ܚܝܼܕܵܝܵܬܼܵܐ 196 ܠܐܠܝܲܦܬ ܕܐܲܦܬܝܼ ܘܠܵܐ ܠܚܡ ܕܥܒܼܕ ܥܒܼܕܵܐ ܕܥܒܼܕ̈ܐ. pb. f.255r 197 :ܠܡ̇ܢ ܠܐ ܝܗ̣ܒ ܠܹܗ ܠܝܦܬ ܝܪܬܘܼܬܼܵܐ ܐܲܝܟ ܕܠܟܹܐܢܵܐ 198 ܐܸܠܵܐ ܕܝܗܒ̣ ܠܹܗ ܕܢܦܬܐ ܘܢܐܪܲܒܼ ܒܝܪܬܘܼܬ ܐܲܚܘܼܗܝ. 199 :ܠܡ̇ܢ ܟܲܕ ܠܵܛܹܗ ܠܚܡ ܠܐ ܕܚܩܹܗ ܠܐܬܪܵܐ ܕܪܲܚܝܹܩ 200 ܐܠܵܐ ܕܚܒܼܫܹܗ ܒܓܼܵܘ ܝܪܬܘܼܬܼܵܐ ܕܐܚ̈ܐ ܒܪ̈ܝܼܟܹܐ. 201 :ܠܡ̇ܢ ܠܵܐ ܦܪܫܹܗ ܒܓܼܙܪ ܕܝܼܢܵܐ ܐܝܟ ܕܲܠܩܐܹܝܢ 202 ܘܠܵܐ ܐܦܸܣ ܠܡܬܚܠܛܘܼ ܥܲܡ ܩܲܪ̈ܝܼܒܵܘܗܝ. 203 :ܠܡܢ ܠܵܐ ܫܪܪ ܠܘܛܬܼܵܐ ܕܲܥܠܵܘܗܝ ܐܝܟ ܕܬܐܡܲܪ 204 ܘܡܛܠ ܡܵܢܵܐ ܠܵܐ ܦܠ̣ܚ ܠܐܲܚܘܼܗܝ ܐܝܟ ܕܟܼܬܝܼܒܼܵܐ. 205 :ܟܬܒܼܵܐ ܡܠܸܦ ܕܠܵܐ ܦܠܲܚ̣ ܙܪܥܹܗ ܕܚܲܡ ܠܒܕܘܼܬܼܵܐ 206 ܠܐ ܠܒܼܢܝ̈ ܫܹܝܡ ܒܘܟܼܪܵܐ ܒܪܝܟܼܵܐ ܘܠܐ ܠܒܢܲܝ̈ ܢܦ̣ܬ. 207 :ܒܢܲܝ̈ ܚܵܡ ܐܲܡܝܼܪ ܕܐܡܠܸܕܘ ܠܘܼܩܕܵܡ ܒܪܫܢܘܼܬܼܵܐ 208 ܘܕܫܪܝܼܪܐ ܢܡܪܘܿܕ ܣܗ̇ܕ ܕܒܲܪ ܚܵܡ ܐܝܼܬܼܵܘܗܝ. 209 :ܢܡܪܘܿܕ ܩܒܸܠ ܪܫܢܘܬܐ ܘܡܲܠܟܘܼܬ ܙܒܼܢܵܐ 210 ܘܩܕܡ ܡܪܝܐ ܡܩܝܡ ܠܗ̇ ܟܬܒܵܐ ܠܓܢ̄ܒܪܘܼܬܹܗ. 211 :ܗܘ̤ ܠܲܡ ܢܸܡܪܘܿܕ ܗܘ̤ܵܐ ܠܲܢ̄ܒܪܐ ܢܚܫܝܪܬ̣ܢܐ 212 ܐܝܟ ܐ̄ܢܫ ܢܐܡܲܪ ܝܗ̣ܒ ܠܗ ܪܫܢܘܼܬܼܵܐ. 213 :ܘܐܢܗܘ̤ ܕܡܵܪܝܐ ܥܒܼܕܗ ܠܢܸܡܪܘܿܕ ܓܢ̄ܒܪ ܚܲܝܠܵܐ 214 ܠܘܛܬܵܐ ܡܕܝܢ ܠܵܐ ܫܪܝܪܵܐ ܐܝܟ ܕܐܸܬܡܠܠܲܬ. 215 :ܒܢ̈ܝ ܚܵܡ ܐܸܢܘܿܢ ܐܦ ܡܨܪ̈ܝܐ ܘܲܟܼܢܲܥܢܵܝܼ̈ܐ 216 ܘܠܵܘ ܕܐܫܬܥܒܲܕܘ ܡܚܘܹܐ ܟܬܼܒܼܵܐ ܐܸܠܵܐ ܕܫܲܥܒܸܕܘ. 217 :ܒܢܲܝ̈ ܫܹܝܡ ܐܢܘܿܢ ܝܣܪ̈ܠܝܹܐ ܘܒܼܢܲܝ̈ ܐܒܼܪܵܡ 218 ܘܕܠܵܐ ܢܡܘܿܣ ܠܦ̣ܚܘ ܥܒܕܘܼܬܼܵܐ ܠܒܢܲܝ̈ ܠܝܼܛܵܐ. 219 :ܐܝܟܵܘ ܡܕܝܢ ܕܫܠܡܬ̤ ܡܠܬܐ ܐܲܝܟ ܕܟܬܝܼܒܼܵܐ 220 ܕܗܵܐ ܕܠܩܘܼܒܼܠܐ ܗܘ̤ܘ ܣܘܥܪ̈ܢܹܐ ܠܦܘܼܬ ܕܐܬܡܠܲܠܘ. 221 ܠܦܘܼܬ ܕܐܬܡܠܲܠܘ ܗܘ̤ܘ ܕܲܠܩܘܼܒܠܵܐ ܠܵܘ ܒܲܫܪܪܵܐ. 222 ܒܣܘܼܟܠܵܐ ܕܝܼܢ ܫܪܝܼܪ ܡܲܡܠܠܵܐ ܘܲܡܡܲܠܠܵܢܹܗ. 223 :ܫܪܪܐ ܓܲܠܝܵܐ ܫܪܐ ܒܗ ܒܫܲܪܒܵܐ ܕܬܪܓܸܡ ܟܹܐܢܵܐ 224 ܘܥܲܠ ܣܘܼܟܠܵܐ ܣܢܝܼܩ ܕܢܚܘܝܼܘܗܝ ܠܥܹܝܢܝ̈ ܗܘܢܵܐ. 225 :ܕܠܐ ܣܘܼܟܠܐ ܠܵܐ ܡܬܚܙܝܵܐ ܚܙܵܬܵܐ ܕܫܘܼܦܪܹܗ 226 ܘܕܠܵܐ ܥܡܠܵܐ ܠܵܐ ܡܬܒܚܪܵܐ ܫܪܝܼܪܘܼܬܹܗ 227 :ܥܲܡܠܵܐ ܒܥ̇ܐ ܫܲܪܒܵܐ ܕܲܥܡܝܼܠ ܒܣܬܼܝܼܪ̈ܬܵܐ 228 ܘܐܸܢ̄ܐܢܵܫ ܥܡ̇ܠ ܦܫܝܼܩ ܠܹܗ ܕܢܸܚܙܝܼܘܗܝ ܢܗܝܼܪܐܝܼܬ. 229 :ܣܓܝܼ ܢܗܝܼܪ ܠܕܥܡܸܠ ܒܹܗ ܚܘܼܒܵܢܵܐܝܼܬ 230 ܘܣܓܝܼ ܚܸܫܘܿܟ ܠܕܠܐ ܦ̇ܠܚ ܒܐܫܪܪ ܚܘܼܒܹܗ. 231 :ܒܚܘܼܒܵܐ ܡܨܝܵܐ ܗ̄ܝ̣ ܕܢܸܚܙܝܼܘܗܝ ܟܠܢܵܫ ܐܲܝܟ ܡܵܐ ܕܐܝܼܬܼܵܘܗܝ 232 ܘܒܒܼܘܝܢܵܐ ܦܫܝܼܩ ܕܲܢܬܢܝܘܗܝ ܐܵܦ ܠܐ̄ܚܪ̈ܢܐ. 233 :ܒܚܘܼܒܵܐ ܫܡܥܬܹܗ ܘܒܥܢܝܵܢܵܐ ܪܓܼܝܼܓ ܐ̄ܢܐ ܕܐܸܬܢܝܼܘܗܝ 234 ܕܢܬܒܝܢܘܿܢ ܒܹܗ ܪ̈ܚܡܲܝ ܚܘܼܒܵܐ ܘܢܚܒܒܢܵܝܗܝ. 235 :ܚܲܒܝܼܒ ܫܪܒܵܐ ܕܬܲܪܓܸܡ ܟܹܐܢܵܐ ܥܲܠ ܚܲܒܝܼܒܵܘ̈ܗܝ 236 ܘܚܝܵܒܼ ܟܠܢܫ ܕܢܸܬܒܩܹܐ ܒܹܗ ܚܘܼܒܵܢܐܝܼܬ. 237 :ܝܘܬܪܢ ܐܢܫܐ ܡܠܹܐ ܣܘܼܟܠܵܐ ܕܟܼܣܹܐ ܒܓܘܹܗ 238 ܐܦ ܙܕܝܩܵܐ ܒܗܕܐ ܬܗܲܪ ܕܟܼܡܵܐ ܡܘܬܲܪ. 239 :ܠܦܘܼܬ ܝܘܬܪܢܹܗ ܚܪ ܚܲܟܼܝܼܡܵܐ ܘܡܲܠܠܗ ܒܚܸܟܼܡܵܐ 240 ܕܠܵܐ ܬܬܫܝܼܛ ܠܗ̇ ܝܩܝܼܪܘܼܬܹܗ ܒܥܝܢܲܝ̈ ܣܟܼ̈ܠܹܐ. 241 :ܡܥܕܐ ܗ̄ܝ̣ ܥܝܢܵܐ ܕܣܟܼ̈ܠܠ ܠܡܫܵܛ ܡܕܡ ܕܓܼܠܹܐ 242 ܥܠܗ̇ܝ ܪܡܝܵܐ ܬܚܦܝܼܬ ܡ̈ܠܹܐ ܥܲܠ ܟܠ ܡܠܝܼ̈ܢ. 243 :ܒܢܝܼܫܵܐ ܕܣܟܠܹ̈ܐ ܚܵܪ ܗ̣̄ܘܵܐ ܪܸܡܙܵܐ ܕܡܠܸܠ ܥܲܠܐ ܢܘܿܚ 244 ܘܟܣܝܼ ܐܸܢܹܝܢ ܠܡܠܲܝ̈ ܦܘܼܡܹܗ ܒܢܚܬܐ ܕܡ̈ܠܹܐ. pb. f.255v 245 :ܡܨܐ ܗ̄ܘ̣ܵܐ ܕܢܓܼܠܝܼܘܗܝ ܟܣܝܵܐ ܠܐ̄ܪܙܐ ܕܓܠ̣ܐ ܠܟܒܼܕܗ 246 ܘܦܫܝܼܩ ܗ̄ܘ̣ܵܐ ܠܹܗ ܕܦܫܝܩܐܝܼܬ ܢܚܵܘܼܝ[...] ܚܘܼܒܹܗ. 247 :ܠܵܐ ܕܝܢ ܚܘܝܹܗ ܠܵܘ ܐܝܟ ܚܣܪ ܒܝܘܬܪܵܢ ܐ̄ܢܫܐ 248 ܐܠܵܐ ܕܐ̄ܢܫܐ ܠܐ ܣܦܩܝܼܢ ܗ̄ܘ̣ܵܘ ܠܡܐ ܬܲܪ ܡܸܢܹܗ. 249 :ܐܦܠܵܐ ܠܹܗ ܠܢܘܿܚ ܕܦܠܓܗ ܒܐܝܕܵܘ̈ܗܝ ܠܥܘܼܬܪܹܗ ܕܐ̄ܪܵܙܵܐ 250 ܠܵܘ ܐܲܝܟ ܕܐܝܼܬܘܗܝ ܚܘܝܹܗ ܠܚܲܝܠܹܗ ܚܲܬܝܼܬܐܝܬ. 251 :ܛܸܠܘ ܩܘܼܫܬܵܐ ܚ̣ܙܵܐ ܓܘܼܫܡܵܢܵܐ ܒܓܼܘܫܡܵܐ ܕܒܼܪܹܗ 252 ܘܐܘܕܝܼ ܠܡܵܪܹܗ ܕܚܵܘܝܹܗ ܠܐܪܙܵܐ ܩܕܼܵܡ ܣܘܼܥܪ̈ܢܹܐ. 253 :ܐܲܝܟ ܡܚܙܝܼܬܼܵܐ ܩܒܼܥ ܠܹܗ ܛܘܼܦܣܵܐ ܩܕܼܵܡ ܪܥܝܢܹܗ 254 ܘܣܘܚ̣ ܥܦܩܹܗ ܚܘܼܒܢܵܐܝܼܬ ܕܠܵܐ ܣܒܼܥܘܬܵܐ. 255 :ܕܠܐ ܣܒܗܘܼܬܵܐ ܬܢܐ ܗ̄ܘ̣ܵܐ ܠܵܗ̇ ܠܗ̇ܝ ܒܪܬ ܩܵܠܵܐ 256 ܕܒܪܝܟ ܡܪܝܐ ܐܠܗܹܗ ܕܫܹܝܡ ܕܒܪܟܢ ܒܫܡܗ. 257 :ܐܝܟ ܕܒܝܘܩܢܵܐ ܡܬܒܩܐ ܗ̄ܘ̣ܵܐ ܒܕܪܓܼܐ ܕܒܼܪܹܗ 258 ܘܩ̇ܪܐ ܗ̄ܘ̣ܵܐ ܠܗܘܿܢ ܠܬܪܹܝܢ ܐܲܚܘ̈ܗܝ ܕܬܵܘ ܐܬܒܩܵܘ. 259 :ܒܘܪܟܬܵܐ ܘܠܘܛܬܐ ܪܡ̇ܙ ܗ̄ܘ̣ܵܢ ܠܲܒܢܲܝ̈ ܟܪܪܗ 260 ܕܢܲܩܬܘܿܢ ܚܘܪܵܐ ܕܪ̈ܥܝܢܲܝܗܘܿܢ ܒܐܪܙܵܐ ܕܚܙ̣ܵܐ. 261 :ܠܝܦܬ ܡܠܸܦ ܗ̄ܘ̣ܵܐܢ ܕܢܦܬܐ ܗܵܘܢܹܗ ܘܙܘܥܲܝ̈ ܢܦܫܹܗ 262 :ܕܢܗܘܹܐ ܣܦ̇ܩ ܠܡܐܚܲܕ ܥܘܬܪܵܐ ܕܪܕܹܐ ܡ̣ܢ ܫܝܹܡ 263 :ܠܚܵܡ ܡܲܪܬܹܐ ܗ̄ܘ̣ܵܐ ܕܢܪܵܟܢ ܟܬܦܐ ܕܡܲܪ ܚܘܼܬܹܗ 264 ܩܛܥܢ ܢܝܪܵܐ ܕܦܘܼܠܚܵܢ ܚ̈ܝܹܐ ܕܟܼܣܐ ܒܐܚܘܼܗܝ. 265 :ܒܒܘܪܟܬܼܵܐ ܘܠܘܛܵܬܐ ܡܚܦܛ ܗ̄ܘ̣ܵܐ ܠܗܘܿܢ ܠܡܛܲܪ ܡܠܬܹܗ 266 ܕܡܵܐ ܕܡܬܓܡܪܐ ܒܝܲܕ ܣܘܥܪ̈ܢܹܐ ܢܸܩܢܘܿܢ ܥܘܼܬܪܗ̇. 267 :ܩܕܼܵܡ ܣܘܥܪ̈ܢܹܐ ܪܓܼܝܼܓܼ ܗ̄ܘ̣ܵܐ ܕܢܸܣܥܘܿܪ ܐܝܕܐ ܕܦܐܝܵܐ 268 ܕܡܵܐ ܕܡܸܬܒܲܕܩܝܼܢ ܢܗܘܹܐ ܦܐܝܐ ܒܦܲܐܘܼܬ ܝܼܠܕܵܘ̈ܗܝ. 269 :ܒܦܐܝܘܼܬ ܫܘܼܦܪܵܐ ܕܐ̄ܪܙܐ ܕܚܙ̣ܵܐ ܩܕܡ ܗ̄ܘ̣ܵܐ ܚܵܪ 270 ܘܚܲܦܛ ܠܲܒܼܢܵܘ̈ܗܝ ܕܢܨܘܼܪܘܿ ܢܵܝܗܝ ܩܕܼܵܡ ܥܝܢܲܝ̈ܗܘܿܢ. 271 :ܒܥܝܢܵܐ ܕܗܘܢܵܐ ܚܙ̣ܵܝܗܝ ܚܲܙܵܝܵܐ ܠܐ̄ܪܵܙܵܐ [ܦ]ܦܲܐܝܵܐ 272 ܘܡܸܬܝܲܐܲܒܼ ܗ̄ܘ̣ܵܐ ܕܢܸܚܙܝܘܼܗܝ ܒܦܓܼܪ ܕܠܵܐ ܬܲܚܦܝܼܬܼܵܐ. 273 :ܒܦܓܼܪܵܐ ܕܒܪܹܗ ܡܬܒܝܲܐ ܗ̄ܘ̣ܵܐ ܦܓܼܪܢܝܵܐ 274 ܘܡܗܝܡܢ ܗ̄ܘ̣ܵܐ ܕܠܓܼܵܘ ܡܸܢܹܗ ܟܣܹܐ ܒܘܼܝܵܐܵܐ. 275 :ܐܝܟ ܡܲܚܙܝܬܐ ܣܝܼܡ ܗ̄ܘ̣ܵܐ ܠܹܗ ܫܹܝܡ ܩܕܼܵܡ ܒܒ̈ܬܹܗ 276 ܘܟܼܡܵܐ ܕܚ̇ܐܪ ܬܘܼܒܼ ܚ̇ܐܪ ܗ̄ܘ̣ܵܐ ܕܠܐ ܣܲܒܼܠܘܼܬܵܐ. 277 :ܒܫܹܝܡ ܡܩܬ ܗ̄ܘ̣ܵܐ ܚܝܪܐ ܕܥܲܝܢܵܘ̈ܗܝ ܘܕܪܥܝܢܹܗ 278 ܐܝܟ ܗ̇ܘ ܕܫܘܐ ܒܪܚܡܲܬܼ ܦܓܼܪܐ ܥܢܹܐ ܗ̄ܘ̣ܵܐ ܒܫܲܪܒܹܗ. 279 :ܬܪܬܝܢ ܙܢܝܼ̈ܢ ܥܵܦܹܗ ܠܫܪܒܵܐ ܕܒܒܘܪ̈ܟܵܬܐ 280 ܘܗܕܐ ܒܚܘܒܼܵܐ ܕܠܘܵܬܼ ܝܠܕܹܗ ܣܥ̇ܪ ܗ̄ܘ̣ܵܐ ܠܵܗ̇. 281 :ܥܒܼܕܵܐ ܕܥܒ̇ܕܹܐ ܥܲܒܼܕܗ ܠܟܼܢܥܢ ܬܪܬܹܝܢ ܙܲܒܢܝܼ̈ܢ 282 ܘܗܕܐ ܐܬ̤ܐ ܗ̄ܝ̣ ܕܦܘܪܥܵܢ ܚܘܼܒܵܐ ܕܐܒܼܵܐ ܠܲܒܼܢܵܘ̈ܗܝ. 283 :ܒܚܘܼܒܵܐ ܕܒܼܪܹܗ ܐܣܪ ܐܢܘܿܢ ܟܹܐܢܵܐ ܠܒܢܵܘ̈ܗܝ 284 ܕܢܸܗܘܘܿܢ ܟܕܝܼܢܝܼܢ ܬܚܹܝܬ ܡܵܪܘܼܬܼܵܐ ܕܡܪܗ ܘܲܒܼܪܹܗ. 285 :ܠܡܪܹܗ ܘܲܒܼܪܹܗ ܫܥܒܸܕ ܥܠܡܵܐ ܒܝܲܕ ܚܵܡ ܘܒܲܝܲܦܬ 286 :ܐܝܟ ܡ̇ܢ ܕܢܦܣ ܕܒܝܘܒܠܗܘܿܢ ܡܣܝܟ ܟܠܵܐ 287 :ܟܠ ܥܲܡ ܟܠܐ ܥܬܝܼܕ ܗ̄ܘ̣ܵܐ ܕܢܸܦܠܘܿܚ ܠܝܠܕܵܐ ܕܡܸܢܹܗ 288 ܥܠܗ̇ܝ ܟܕܢܹܗ ܠܨܘܪܵܐ ܕܒܼܢܵܘ̈ܗܝ ܒܢܝܼܪܵܐ ܕܲܒܼܪܹܗ. 289 :ܒܦܠܚܘܼܬ ܡܠܟܵܐ ܕܡ̣ܢ ܝܘܼܒܠܹܗ ܐܦܠܚ ܠܒܼܢܵܘ̈ܗܝ 290 ܘܛܒ̣ܥ ܐܸܢܘܿܢ ܒܲܬܼܪܹܝܢ ܛܲܒܼܥܝܢ ܕܫܘܼܚܠܵܦ ܡܸ̈ܠܹܐ. 291 ܛܒܼܥܵܐ ܕܡܲܠܹ̇ܐ ܐܪܡܝܼ ܒܲܪ ܠܲܡܟ̇ ܥܲܠ ܚܵܡ ܘܥܲܠ ܝܼܦܬܿ: pb. f.256r 292 ܘܫܚܠܹܦ ܐܸܢܹܝܢ ܠܦܘܼܬ ܡܢܝܢܵܐ ܕܦܣܝ̈ܩܬܼܵܐ. 293 :ܐܦܣܘܢܝ̈ܬܐ ܕܒܘܼܪܟܬܼܵܐ ܘܠܵܘܛܵܬܐ ܝܗ̣ܒ ܠܲܬܼܪܝܗܘܿܢ 294 ܟܲܕ ܛܵܒܼ ܦܪ݁ܝܫܵܢ ܒܝܲܕ ܫܘܡܗܵܐ ܒܚܠܵܐ ܫܘ̈ܝܢ. 295 :ܚܲܕ ܗ̄ܘ̣ ܚܲܝܠܵܐ ܕܒܬܪܬܝܗܹܝܢ ܘܚܲܕ ܣܘܼܟܵܠܵܐܐ 296 ܒܗ̇ܝ ܕܐܦ ܚܲܕ ܗ̄ܘ̣ ܕܡܦܠܓܼ ܗ̄ܘ̣ܵܐ ܬܪܬܹܝܢ ܒܲܚܕܵܐ. 297 :ܬܪܬܹܝܢ ܒܚܕܵܐ ܦܠܓ ܟܹܐܢܵܐ ܡ̣ܢ ܚܲܕ ܠܲܬܪܹܝܢ 298 ܛܒܼܬܼܵܐ ܕܡ̣ܢ ܫܹܝܡ ܠܚܵܡ ܙܠܝܼܠܵܐ ܘܠܝܼܦܬ ܢܟܼܦܵܐ. 299 :ܠܥܒܕܵܐ ܚܬܗ ܐܝܟ ܕܠܥܒܼܕܐ ܡ̣ܢ ܒܹܝܬܼ ܡܵܪܹܗ 300 ܘܲܠܒܲܪ ܚܐܪ̈ܐ ܐܝܟ ܡ̇ܢ ܕܣܢܝܼܩ ܥܲܠ ܦܘܼܪܢܣܵܐ. 301 :ܡ̣ܢ ܒܹܝܬ ܓܙܵܐ ܕܫܹܝܡ ܗܬܝܪܐ ܥܬܼܪܚܵܡ ܐܵܦ ܝܲܦ̣ܬ 302 ܘܠܹܗ ܐܫܬܥܒܲܕܘ ܚܘܒܢܵܐܝܼܬ ܘܩܛܝܼܪ ܐܝܼܬ. 303 :ܝܦܬ ܡ̣ܢ ܚܘܼܒܵܐ ܩܒܸܠ ܛܒܼܥܐ ܕܦܠܚܘܼܬ ܐܲܚܘܼܗܝ 304 ܘܚܵܡ ܒܩܛܝܼܪܵܐ ܥܨܝܗܝ ܝܵܠܘܿܕܼܵܗ ܕܢܦܠܘܿܚ ܠܐܲܚܘܼܗܝ. 305 :ܒܫܸܡ ܚܐܪܘܼܬܼܵܐ ܝܗܒ̣ ܚܐܪܘܼܬܐ ܠܡܟܝܼܟ ܢܲܦܫ̇ܐ 306 ܘܒܥܒܕܘܼܬܼܵܐ ܟܕܢ ܠܲܚܬܝܼܪܵܐ ܬܚܹܝܬ ܚܹܐܪܘܼܬܼܵܐ. 307 :ܕܕܡܝܵܐ ܠܗܕܐ ܣܥܪ ܐܦ ܦܘܼܠܘܿܣ ܒܟܬܼܝܼܒܼܵܬܹ̈ܗ 308 ܘܟܒܫ ܥܒܼܕ̈ܐ ܘܒܢܲܝ̈ ܚܸܐܪܹ̈ܐ ܠܡܵܪܝܵܐ ܡܫܝܼܚܵܐ. 309 :ܟܠ ܠܲܡ ܥܒܕܐ ܡܚܪܪܵܐ ܗ̄ܘ̣ ܕܦܪܝܼܩ ܡ̣ܢ ܛܠܝܘܼܬܵܐ 310 ܐܵܦ ܒܲܪ ܚܸܐܪܹ̈ܐ ܥܒܼܕܵܐ ܐܝܼܬܼܵܘܗܝ ܕܡܪܝܵܐ ܡܫܝܼܚܵܐ. 311 :ܘܐܢܗܘ̤ ܕܦܘܼܠܘܿܣ ܟܕܢ ܥܠ ܬܓܡܝ̈ܢ ܬܚܹܝܬ ܚܲܕ ܡܵܪܝܵܐ 312 ܡ̇ܢ ܢܬܦܠܓܼ ܥܲܠ ܡܸܠܬ ܢܘܼܚ ܕܠܵܘܗ ܟܢܵܐ ܗ̣̄ܝ. 313 :ܘܕܗ ܟܢܵܐ ܗ̣̄ܝ ܐܲܝܟ ܕܟܬܝܼܒܵܐ ܟܬܒܼܵܐ ܒܗ̇ܕ 314 ܘܡܪܡܝܢ ܐܝܕܐ ܐܦ ܙܕܝܼ̈ܩܹܐ ܕܒܬܪܒܵܬܲܪ. 315 :ܡ̣ܢ ܒܬܲܪ ܢܘܿܚ ܩܒܸܠ ܐܒܼܪܡ ܡܘܼܠܟܢ ܚܲܝܹ̈ܐ 316 ܘܛܒܥܗ ܠܣܦܪܐ ܕܕܝܬܩܹܐ ܒܲܬܼܪܹܝܢ ܝܲܠܕܵܘ̈ܗܝ. 317 :ܬܪܹܝܢ ܐܘܼܠܸܕ ܗ̄ܘ̣ܵܐ ܡ̣ܢ ܗܕܡܵܘ̈ܗܝ ܡܠܝܢ ܒܘܪܲܟܵܬܼܵܐ 318 ܘܐܫܩܝܼ ܐܸܢܘܿܢ ܪܕܝܵܐ ܕܡܠܹ̈ܐ ܕܕܡ̇ܐ ܠܲܕܢܘܿܚ. 319 :ܠܐܝܣܚܲܩ ܐܫܠܸܡ ܪܫܢܘܼܬܼܵܐ ܕܩܲܒܸܠ ܡ̣ܢ ܫܹܝܡ 320 ܘܠܒܼܪ ܗܓܼܪ ܟܕܢܹܗ ܒܢܝܼܪܵܐ ܕܢܦܠܘܿܚ ܐܝܟ ܚܵܡ. 321 :ܒܢܘܿܚ ܚܵܪ ܟܹܐܢܵܐ ܕܲܠܚܲܕ ܒܪܟ ܘܲܠܚܲܕ ܫܥܒܸܕ 322 ܘܫܠܸܡ ܐܦܗܘ̤ ܕܢܓܡܘܪ ܡܠܹ̈ܐ ܣܘܼܥܪ̈ܟܹܐ. 323 :ܠܹܗ ܠܗܵܢ ܢܝܼܫܵܐ ܚܢܵܐ ܐܦ ܐܝܼܣܚܲܡ ܒܲܪ ܡܘܼܠܟܢܵܐ 324 ܘܚܬܝܬܐܝܼܬ ܕܲܡܝܼ ܒܡܠܹ̈ܐ ܕܒܣܘܼܥܪ̈ܢܹܐ. 325 :ܐܝܟ ܢܘܿܚ ܘܐܒܼܪܡ ܣܥ̣ܪ ܨܝܕ ܝܲܠܕܵܘ̈ܗܝ ܡܘܠܕܸ ܡܸ̈ܠܹܐ 326 ܘܒܹܗ ܒܐܣܟܝܡܵܐ ܬܢ̣ܐ ܒܘܪܵܟܬܼܵܐ ܕܡ̈ܠܝܵܢ ܬܲܗܪܵܐ. 327 :ܠܝܥܩܘܿܒܼ ܝܲܩܲܪ ܒܩܫܝܼܫܘܼܬܼܵܐ ܟܲܕ ܠܵܐ ܩܲܫܝܼܫ 328 ܘܠܩܫܝܫܵܐ ܬܚܬܝܼ ܣܡܹܗ ܒܕܪܓܼܐ ܕܒܹܝܬ ܚܵܡ. 329 :ܠܥܹܣܘܼ ܐܡ̣ܪ ܕܐܢܗܘ̤ ܕܬܬܘܼܒ ܡܬܚܪܲܪ ܐܲܢ̄ܬ 330 ܘܡ̣ܢ ܡܢܵܐ ܟܲܝ ܡܚܪܪ ܗ̄ܘ̣ܵܐ ܠܹܗ ܕܗܵܐ ܡܚܲܪܪ ܗ̄ܘ̣ܵܐ. 331 :ܠܵܐ ܐܫܬܥܒܲܕ ܥܣܘ ܠܝܲܠܩܘܿܒܼ ܒܟܼܠܗܘܿܢ ܚܲܝܵܘ̈ܗܝ 332 ܘܠܵܐ ܬܘܼܒܼ ܙܪܥܹܗ ܦܠ̣ܚ ܥܲܒܼܕܘܼܬܼܵܐ ܠܝܣܪ̈ܠܝܵܐ. 333 :ܒܬܗܪܵܐ ܣܝܼ̈ܡܵܢ ܡܸܠܲܝ̈ ܟܐܢܹ̈ܐ ܕܒܟܬܼܝ̈ܒܵܬܐ 334 ܘܠܐ ܐ̄ܢܫ ܝܕܥ ܠܡܬܗܪ ܫܦܝܼܪ ܒܣܘܼܟܠܲܝܗܹܝܢ. 335 :ܚܝܹܠ ܣܘܼܟܠܐ ܚܝܸܠ ܐܸܢܘܿܢ ܠܡܸܣܬܲܟܠܵܘܼ 336 ܕܐܝܟܵܢ ܢܨܘܪܘܢ ܣܘܼܟܵܠ ܡܸܠܹ̈ܐ ܒܕܦܐ ܕܡ̈ܠܹܐ. 337 :ܐܝܟ ܨܝܪ̈ܐ ܨܝܪ̈ܝ ܨܠܡ̈ܐ ܕܥܬܝܼܕ̈ܬܵܐ 338 ܨܵܪܘ ܕܡܘ̈ܬܐ ܕܠܵܐ ܓܠܝ̈ܬܐ ܒܝܲܕ ܓܠܝܬܵܐ. 339 ܐܘܚܙ̈ܝܹܐ ܚܙܢܝ̈ ܡܸܕܸܡ ܕܠܐ ܡܦܣܝܼܢ ܒܹܗ 340 ܕܟܲܕ ܠܹܐ ܚܙܹܐ ܠܗܘܿܢ ܬܢܵܘ ܕܡܘ̈ܬܹܗ ܩܕܼܵܡ ܚܙ̈ܝܹܐ. pb. f.256v 341 :ܐܹܝܘ ܟܪ̈ܘܙܐ ܕܒܕܩܸܘ ܐ̄ܪ̈ܙܹܐ ܩܕܼܵܡ ܣܘܥܪ݁ܢܹܐ 342 ܘܥܕܠܵܐ ܢܐܬܹܐ ܓܠ̣ܵܘ ܐ̄ܪܙ ܕܢܸܚܹܗ ܒܹܝܬ ܐܪ̈ܥܢܹܐ. 343 :ܐܝܘ ܗܕ̈ܝܐܐ ܕܕܪܫܘ ܐܘܼܪܚܵܐ ܠܡܐܬܝܼܬ ܡܲܠܟܵܐ 344 ܘܣܡ̣ܘ ܒܗ̇ ܡܝ̈ܠܐ ܡ̈ܠܹܐ ܕܡܠܝ̈ܢ ܐܬ̤ܐ ܕܫܲܝܢܵܐ. 345 :ܡܠ̈ܐ ܕܫܝܢܵܐ ܗܘ̣̈ܝ ܡܠܲܝܗ̈ܘܿܢ ܕܡܠܚ̈ ܫܲܝܢܵܐ 346 ܘܒܡܣܝܘ̈ܢܐ ܕܦܬܓܡܝ̈ܗܘܢ ܢܚܘ ܗܠܟܹ̈ܐ. 347 :ܦܘܬܩܵܐ ܕܚܘܼܒܵܐ ܒܢܘ ܒܟܬܒܹ̈ܐ ܠܡܪܕܝܼܬ ܐ̄ܢܫ̈ܐ 348 ܕܠܐ ܢܫܬܚܩܘܿܢ ܒܲܦܣܵܩ ܣܒܼܪܵܐ ܚܘܼܪܒܵܐ ܕܲܬܪܹܝܢ 349 :ܠܚܲܕ ܨܒܝܢܵܐ ܕܚܲܕ ܒܪܘܿܝܵܐ ܫܠܸܡܘ ܫܘܝܐܝܼܬ 350 ܘܠܵܐ ܐܬܦܠܓܼܘ ܥܲܠ ܣܘܼܟܝܵܐ ܕܣܒܼܪܵܐ ܕܫܡܠܘ. 351 :ܣܒܼܪܐ ܛܒܼܵܐ ܫܡ̣ܥܘ ܕܡܬܪܓܸܡ ܒܠܫܢܲܝ̈ܗܘܿܢ 352 :ܘܩܢܵܘ ܣܒܼܪܵܐ ܠܡܣܒܪܘܼ ܠܣܒܼܪܵܐ ܕܥܬܼܝܼܕ 353 :ܢܘܚ ܩܕܡܝ̇ܬ ܕܪܫܵܗ̇ ܠܐܪܘܚܵܐ ܩܕܼܵܡ ܥܝܢܲܝ̈ܗܘܿܢ 354 ܘܡܪܝܼܘ ܟܠܗܘܿܢ ܒܦܣܥ̈ܬܐ ܕܡܠܲܬ ܦܘܼܡܹܗ. 355 :ܒܦܘܡܹܗ ܗܲܠܸܟ ܩܲܠܝܼܠ ܗܘܢܵܐ ܒܐܘܼܪܚܵܐ ܕܣܒܼܪܵܐ 356 ܘܒܼܠܫܢܹܗ ܪܕܵܐ ܒܫܒܝܼܠܵܐ ܕܡܘܼܠܟܵܢ ܚܲܝܹ̈ܐ. 357 :ܐܘ ܗܲܠܟܐ ܕܗܠܟ ܦܘܼܡܹܗ ܚܠܦ ܗܠܟ̈ܬܹܗ 358 ܘܟܲܕ ܠܵܐ ܗܠܟ ܡܫܚܗ̇ ܠܐܪܥܵܐ ܠܸܫܢܹܗ. 359 :ܐܘ ܗܲܕܝܼܐܐ ܕܚܘܝܼ ܐܘܼܪܚܵܐ ܕܠܵܐ ܗܠܟ̈ܬܐ 360 ܘܣܡ ܒܵܗ̇ ܡܝ̈ܐܐ ܕܠܵܐ ܡܬܡܫܚܝܼܢ ܒܦܣܥ̈ܬܐ. 361 :ܐܘ ܠܵܟ ܓܒܼܪܐ ܕܪܕܐ ܦܫܝܼܪ ܒܘܥܕܵܐ ܕܚܲܝܹ̈ܐ 362 ܕܡܢܥܬ̤ ܡܸܠܵܬܵܟ ܠܒܹܝܬ ܐܘܢܵܐ ܕܝ̇ܗܒ ܚܲܝܹ̈ܐ. 363 :ܝܗ̇ܒ ܚܝܹ̈ܐ ܟܣܹܐ ܗ̄ܘ̣ܵܐ ܒܙܪܥܵܟ ܐ̄ܪܙܢܵܐܝܬ 364 ܘܩܕܡ ܚܘܝܟ ܚܹܝܠ ܚܝܘܼܬܹܗ ܒܚܲܕ ܡ̣ܢ ܝܲܠܕܝ̈ܟ. 365 :ܒܒܘܟܪܟ ܫܟܢܬ̤ ܫܟܝܬܼܵܐ ܕܚܲܝܹ̈ܐ ܠܵܐ ܡܝܘܬܹ̈ܐ 366 ܘܬܗܪ ܗܵܘܢܵܟ ܠܡܬܒܩܝܼܘ ܒܚ̈ܝܐ ܕܒ̣ܪܟ. 367 :ܒܬܗܪܵܐ ܪܲܒܵܐ ܩܡ̣ܘ ܚܘܼܫܒܲܝ̈ܟ ܒܦܹܐܪܵܐ ܕܡܸܢܵܟ 368 ܕܚ̇ܙܝܬ ܒܣܘܟܝ̈ ܦܓܼܪܗ ܚ̈ܝܐ ܕܐ̄ܢܫܐ. 369 :ܒܗܘܢܵܐ ܚܪܬ ܒܗ̇ ܒܗ̇ܝ ܚܝܘܬܵܐ ܡܚܝܬ ܟܠܐ 370 ܘܩܪܬ̤ ܠܒܢܝ̈ܟ ܕܲܢܚܘܪܘܢ ܒܵܗ̇ ܗܢܝܼܵܐܝܼܬ. 371 :ܒܚܘܝܼܚܘܼܬܼܵܐ ܚܪܬ̤ ܡܠܬܵܟ ܒܐ̄ܪܙܐ ܕܒܼܫܝܡ 372 ܘܠܘܵܬ ܘܥܕܗ ܟܢܫܬ̤ ܦܒܝܵܐ ܕܚܘܪܐ ܕܐܲܚ̈ܘܗܝ. 373 ܒܦܐܝܘܼܬ ܫܘܼܦܪܹܗ ܐܬܗܪܐ ܐܸܢܘܿܢ ܠܒܢܝ̈ ܟܪܣܵܟ. 374 ܘܟܕ ܠܵܐ ܨܒ̇ܝܢ ܨܵܪܘ ܕܡܘ̈ܬܹܗ ܩܕܼܵܡ ܥܝܢܝ̈ܗܘܿܢ. 375 :ܐܲܝܟ ܕܒܨ ܠܡܵܐ ܡܬܒܩܝܼܢ ܗ̄ܘ̣ܵܘ ܒܡܸܠܲܬܼ ܦܘܼܡܵܟ 376 ܟܕ ܨܝܪܵܐ ܗ̄ܘ̣ܵܬ ܨܠܸܡ ܚܲܝܲܗ̈ܘܿܢ ܒܫܸܡ ܐܠܗܵܐ. 377 :ܐܝܟ ܕܠܩܢܝܵܐ ܠܒܼܝܟ ܗ̄ܘ̣ܵܐ ܗܵܡܵܟ ܫܸܡ ܐܠܗܵܟ 378 ܘܪܫܡ ܗ̄ܘ̣ܵܐ ܒܹܗ ܗ̇ܝ ܒܪܬ ܩܵܠܵܐ ܕܒܼܪܝܟ ܡܵܪܝܵܐ. 379 :ܒܪܝܟܼܘ ܡܪܝܐ ܕܨܵܪ ܒܵܟ ܡܵܪܝܵܐ ܪܒ ܨܝܪܹ̈ܐ 380 ܕܬܨܘܪ ܒܒܢܲܝ̈ܟ ܨܠܸܡ ܬܘܪܝܼܵܬܐ ܕܚܝܒܝܼܢ ܠܹܗ. 381 :ܒܚܵܘܒܲܬ ܚܘܼܒܵܐ ܕܠܘܵܬ ܡܵܪܵܟ ܟܕܢ̇ܬ ܝܠܕܬ̈ܟ 382 ܕܢܗܘܘܿܢ ܦܪܥܝܼܢ ܛܝܒܘܼ ܠܛܵܒܼܵܐ ܕܬܩܢ ܐܸܢܘܿܢ. 383 :ܚܡܝܪܵܐ ܛܒܼܬ ܛܡܪ ܒܟ ܛܒܼܵܐ ܡ̣ܢ ܛܒܘܼܬܹܗ 384 ܘܐܢܬ ܐܪܡܝܬܝܗܝ ܒܦܓܼܪܐ ܕܒܼܢܲܝ̈ܟ ܕܢܛܪ ܐܸܢܘܿܢ. 385 :ܚܟܝܡܐܝܼܬ ܣܥܪܬ ܚܲܟܼܝܼܡܵܐ ܨܝܕ ܝܠܕ̈ܬܟ 386 ܕܣܬܪܬ ܥܘܼܬܪܵܐ ܕܣܘܢܩܢܝܗܘܿܢ ܒܗܕܡܲܝ̈ܗܘܿܢ. 387 :ܡܚܟܡ ܐ̄ܢܫܐ ܚܲܟܸܡ ܙܘܥܲܝ̈ܟ ܠܡܣܥ̣ܪ ܗܵܕܹܐܸ 388 ܕܢܗܘܘܿܢ ܪܵܕܹܝܢ ܥܲܡ ܝܘܒܠܵܟ ܚܝܹ̈ܐ ܕܓܸܢܣܵܟ. 389 :ܪܚܡ ܓܢܣܟ ܣܡ ܒܹܗ ܒܓܸܢܣܵܟ ܣܝܡܲܬܼ ܚܲܝܹ̈ܐ 390 ܘܣܬܪܹܗ ܒܐܪܥܵܟ ܕܬܗܘܸܐ ܢܛܝܼܪܵܐ ܠܫܘܼܠܲܡ ܙܲܒܼܢܹ̈ܐ. 391 ܐܲܝܟ ܬܓܪܹ̈ܐ ܛܥܢܘܼܗ̇ ܪܸ̈ܓܫܐ ܕܡܝܲܒܠܵܢܹܝ̈ܗ̇ 392 ܘܝܲܒܠܘܼܗ̇ ܒܚܘܼܒܵܐ ܡ̣ܢ ܚܲܕ ܠܐ̄ܚܪܹܝܢ ܥܕܲܡܵܐ ܠܡܪܝܲܡ. pb. f.257r 393 :ܐܝܘ ܬܕܡܘܪܬܵܐ ܕܡ̣ܢ ܒܵܪܘܝܵܐ ܠܘܵܬܼ ܒܪܢܫܵܐ 394 ܕܟܲܕ ܡܝܘܬܵܐ ܗ̄ܘ̣ ܗܘ̤ܵܐ ܢܵܛܘܪܵܐ ܠܚܝܘܼܬ ܚܲܝܵܘ̈ܗܝ. 395 :ܐܝܘ ܝܕܥ̈ܬܐ ܕܡܬܩܸܢ ܟܠܐ ܟܡܵܐ ܥܡܝܼ̈ܩܵܢ 396 ܕܣܵܡ ܒܒܪܝܼܬܹܗ ܥܘܼܬܪܵܐ ܕܚ̇ܫܚ ܠܲܣܢܝܩܘܼܬܵܗ̇. 397 ܐܘ ܐܘܡܢܵܐ ܕܡ̣ܢ ܠܐ ܡܕܡ ܥܒܼܕ ܟܠܡܕܡ. 398 ܕܐܣܢ ܘܡܠܗ̇ ܠܐܘܡܢܘܼܬܹܗ ܡ̣ܢ ܚܟܡ̈ܬܹܗ. 399 :ܚܸܟܼܡܲܬܼ ܩܘܼܫܵܬܐ ܕܡ̣ܢ ܚܟܡ̈ܬܹܗ ܣܡ ܒܟܝܵܢܵܢ 400 ܘܗܝ̤ ܚܟܡܬ̣ܗ̇ ܠܒܒܪܘܼܬ ܓܸܿܢܣܲܢ ܠܡܕܲܥ ܠܲܫܡܹܗ. 401 :ܗ̤ܝ ܓܠܬ̤ ܠܐܕܵܡ ܥܲܠ ܟܲܣܝܘܼܬܼܵܐ ܕܨܪܬܗ̇ ܒܓܸܠܝܐ 402 ܘܗ̤ܝ ܐܘܪܥܬܹܗ ܕܐܝܼܬ ܠܗ ܡܵܪܐ ܡܪܝܐ ܕܟ̣ܠܐ. 403 :ܗܝ̤ ܐܣܪܬܹܗ ܠܗܒܹܝܠ ܕܟܼܝܵܐ ܒܪܚܡܲܬܼ ܡܵܪܹܗ 404 ܘܒܓܠܝ̈ܬܐ ܦܪܥ ܬܘܕܝܼܬܼܵܐ ܕܦܲܐܝܵܐ ܠܟܣܝܵܐ. 405 :ܒܗ̇ ܐܬܚܟܲܡ ܚܢܘܟ ܫܦܝܼܪܵܐ ܕܢܲܫܦܪ ܢܲܦܫܹܗ 406 ܘܕܫܦܪ ܣܓܝܼ ܩܘܝܼ ܒܫܘܼܦܪܵܐ ܕܠܵܐ ܡܝܘ̈ܬܹܐ. 407 :ܗܝ̤ ܒܕܩܬ̤ ܠܹܗ ܠܠܡܟ ܥܲܠ ܝܲܠܕܵܐ ܕܗܘ̤ܵܐ ܡܸܢܹܗ 408 ܕܡܢܝܼܚ ܠܲܐܪܥܵܐ ܘܡܥܒܲܪ ܐܒܼܠܵܐ ܕܟܪܝܘܼܬ ܐ̄ܢܵܫܵܐ. 409 :ܗ̤ܝ ܠܥܙܬ̤ ܒܹܗ ܐܦ ܒܹܗ ܒܒܲܪ ܠܡܟ ܠܥܙܵܐ ܚܲܕܬܵܐ 410 ܘܬܲܪܓܸܡ ܦܘܼܡܹܗ ܩ̈ܠܹܐ ܚܕ̈ܬܹܐ ܕܚܘܼܕܲܬ ܐ̄ܢܫܐ. 411 :ܟܠܡܵܐ ܕܐܡܪܬ̤ ܗ̇ܝ ܝܕܥܬܼܵܐ ܡ̣ܢ ܐܠܗܵܐ ܗ̄ܘ̣ 412 ܘܚܟܡܬ̤ ܟܠܐ ܘܗ̤ܝ ܡܚܟܡܵܐ ܟܠ ܥܕܡܵܐ ܠܚܲܪܬܵܐ. 413 :ܡ̣ܢ ܚܟܡ̈ܬܹܗ ܝܠܦܘ ܩܘܼܕܡܝ̈ܐ ܠܡܬܚܟܡܘܼ 414 ܘܗ̤ܝ ܬܘܼܒ ܓܡܪܵܐ ܐܦ ܠܐ̄ܚܪ̈ܢܹܐ ܕܡ̣ܢ ܒܬܪܟܸܢ. 415 :ܢܘܿܚ ܛܵܒܼ ܡ̣ܢ ܟܠ ܐܬܚܟܲܡ ܒܵܗ̇ ܠܡܒܕܩ ܐܪ̈ܙܝܗ̇ 416 ܗܘܝ̤ ܬܘܼܒ ܡ̣ܢܟܠ ܩܪܬ̤ ܩܪܒܼܬܹܗ ܠܒܝܬܝܘܼܬܵܗ̇. 417 :ܐܲܝܟ ܕܠܪܚܡܵܐ ܓܠܬ̤ ܠܹܗ ܐ̄ܪܙܐ ܕܣܬܝܪ̈ܬܵܗ̇ 418 ܐܦ ܗܘ̤ ܒܚܘܒܵܐ ܒܛܲܪ ܦܘܼܩܕܢܗ̇ ܕܪܫܪܝܼܪܘܼܬܼܵܗ̇. 419 :ܫܪܪܐ ܢܛܪ ܠܵܗ̇ ܪܚܡܵܐ ܕܩܘܼܫܬܼܵܐ ܠܕܚܠܲܬܼ ܩܘܼܫܬܐ 420 ܐܵܦ ܗ̤ܝ ܒܩܘܫܬܐ ܦܪܥܬܹܗ ܐܓܼܪܵܐ ܕܛܵܒܼ ܡ̣ܢ ܥܲܡܠܹܗ. 421 :ܐܓܼܪܐ ܛܵܒܼܵܐ ܦܪܥܬܹܗ ܠܟܹܐܢܵܐ ܕܦ̣ܠܚ ܥܲܡܵܗ̇ 422 ܘܝܼܬܪ ܡܸܢܗ̇ ܘܝܗܒܵܗ̇ ܠܲܒܼܢܵܘ̈ܗܝ ܕܢܸܣܬܬܪܘܿܢ ܒܵܗ̇. 423 :ܚܫܚܬܐ ܕܚܲܝܹ̈ܐ ܠܵܐ ܡܝܘܬ̈ܐ ܣܡܬ̤ ܒܐܝܼܕܼܵܘ̈ܗܝ 424 ܘܣܡܗ̇ ܐܦ ܗܘ̤ ܒܐܝܼܕܲܐ ܕܒܵܢܵܘ̈ܗܝ ܕܢܸܚܘܢ ܒܐܘܼܟܼܠܵܗ̇. 425 :ܐܘܟܼܠܵܗ̇ ܕܚ̇ܝܐ ܐܟܠ ܟܹܐܢܵܐ ܘܐܲܟܸ̇ܠ ܠܒܢܵܘ̈ܗܝ 426 ܘܣܡ ܚܝܘܬܹܗ ܦܪ̣ܚ ܒܟܿܝܢܲܢ ܡܛܪܹܗ ܒܝܲܚܹ̈ܐ. 427 :ܚܝܹ̈ܐ ܕܡ̣ܢ ܢܘܿܚ ܪܕܵܘ ܥܲܡ ܓܸܢܣܲܢ ܡ̣ܢ ܢܘܿܚ ܘܲܠܟܼܵܐ 428 ܘܗܢܘܢ ܕܪܝܢ ܥܕܲܡܵܐ ܕܫܠܸܡ ܪܗܛܹܗ ܕܙܒܼܢܵܐ. 429 :ܡܢܲܢ ܫܪܝܼܘ ܚ̈ܝܹܐ ܠܡܪܕܵܐ ܡ̣ܢ ܫܘܼܪܝܵܐ 430 ܘܥܲܡܲܢ ܡܩܵܘܼܝܢ ܒܩܲܪܝܒܘܼܬܵܐ ܕܠܵܐ ܫܘܼܠܵܡܵܐ. 431 :ܚܝܠܐ ܕܒܪܲܢ ܒܪܵܐ ܒܲܢ ܚܲܝܹ̈ܐ ܣܘܬܲܪ ܐܸܢܘܿܢ 432 ܘܟܲܕ ܫܦܪܬ̤ ܠܹܗ ܚܘܝܼ ܐܸܢܘܿܢ ܠܥܹܝܢ ܟܠ ܘܒܼܟܼܠ. 433 :ܒܗ̇ ܒܓܼܒܝܠܬܢ ܛܡܲܪ ܚܝܘܼܬܵܐ ܕܡ̣ܢ ܚܝܘܼܬܹܗ 434 ܘܒܬܲܪ ܙܒܼܢܵܐ ܓ̣ܠܐ ܨܒܼܝܢܹܗ ܕܟܼܣܐ ܗ̄ܘ̣ܵܐ ܒܲܢ. 435 :ܒܟܣܝܵܐ ܘܓܠܝܵܐ ܚܘܝܼ ܚܘܼܒܹܗ ܨܝܕ ܐ̄ܢܫܘܬܲܢ 436 ܘܚܲܟܼܝܼܡܐܝܼܬ ܓܡܲܪ ܨܒܼܝܢܹܗ ܒܐܝܕܢ ܨܝܕ ܟܠ. 437 :ܒܐܝܕܢ ܫܡܠܝܼ ܣܵܥܘܿܪܘܼܬܹܗ ܨܝܕ ܟܠ ܘܒܼܟܼܠ 438 ܬܵܘ ܢܘܕܐ ܠܹܗ ܝܲܬܝܪ ܡ̣ܢܟܠ ܕܪܚܡܢ ܡܢܟܠ܀