Narsai: On the Tower of Babel - ܥܲܠ ܡܲܓܕܠܵܐ ܕܒܵܒܸܠ ܘܥܲܠ ܦܘܼܠܵܓܼ ܠܸܫܢܹ̈ܐ

1 :ܐܬܸܐ ܕܫܲܝܵܢܵܐ ܝܗ̣ܒ ܒܵܪܝܵܐ ܠܲܟܼܝܵܢ ܐ̄ܢܫܵܐ 2 ܕܠܵܐ ܢܸܬܼܪܲܗܒܼܘܢ ܡ̣ܢ ܛܘܦܢܵܐ ܕܚܒܼܵܠ ܐܢܫܐ: pb. f.257v 3 :ܩܝܵܡܵܐ ܕܚܘܼܒܵܐ ܐܩܝܼܡ ܥܡܗܘܿܢ ܕܒܢܲܝ̈ ܒܸܣܪܵܐ 4 ܕܠܵܐ ܬܘܼܒܼ ܪܵܓܙ ܘܪܕܐ ܒܡܲܝ̈ܐ ܠܣܘܼܥܪ̈ܢܝܗܘܿܢ. 5 :ܒܐܬ̤ܐ ܓܠܝܵܬܐ ܚܘܝܼ ܐܸܢܘܿܢ ܪܒܘܼܬ ܚܘܼܒܹܗ 6 ܕܟܼܡܵܐ ܪܚ̇ܡ ܪܚ̇ܡ ܠܒܢܲܝ̈ ܒܲܝܢܹܗ ܘܣ̇ܢܐ ܠܥܘ̣ܠܐ. 7 :ܐܬ̤ܐ ܕܩܫܬܵܐ ܡܬ̣ܚ ܒܥܢܢܹ̈ܐ ܩܕܵܡ ܥܲܝܢܲܝ̈ܗܘܿܢ 8 ܕܢܚܘܼܪܘܢ ܒܗ̇ ܘܢܣܢܘܿܢ ܠܥܘ̣ܠܵܐ ܕܚܒܸܠ ܐܸܢܘܿܢ. 9 :ܒܩܫܬܼܵܐ ܓܠ̣ܐ ܠܗܘܿܢ ܩܫܝܘܼܬܹܗ ܘܒܲܣܝܼܡܘܼܬܗ 10 ܕܗܘ̤ܝܘ ܕܪܕܐ ܘܗܘܝ̣ܘ ܕܩ̇ܢܐ ܚܲܕܝܼܡܵܐܝܼܬ. 11 :ܩܸܫܬܵܐ ܟܦܝܼܦܵܬܐ ܚܘܝ̣ ܐܢܘܿܢ ܕܠܲܝܬܿ ܒܗ̇ ܝܬܪܵܐ 12 ܕܢܲܠܦ ܐܢܘܿܢ ܕܠܵܐ ܫ̇ܕܐ ܒܗܘܿܢ ܓܸܐܪܹ̈ܐ ܕܡܝ̈ܐ. 13 :ܒܠܥܕ ܐܝܕܐ ܘܒܠܥܕ ܝܬܼܪܐ ܚܘܝܗ̇ ܠܩܸܫܬܼܵܐ 14 ܕܢܘܕܲܥ ܐܢܘܿܢ ܕܠܵܐ ܪܓܼܝܼܓ ܠܡܸܫܕܵܐ ܒܒܢܲܝ̈ ܐ̄ܢܫܵܐ. 15 :ܠܘ ܠܲܫܕܝܐ ܡܸܬܚܵܗ̇ ܒܐܐܲܪܘܐܘܪܸܒܼ ܚܸܙܘܵܗ̇ 16 ܐܠܵܐ ܕܢܪܡܹܐ ܩܸܢܛܵܐ ܘܚܘܼܒܵܐ ܒܪܸܥܝܵܢ ܐ̄ܢܫܐ. 17 :ܩܢܛܵܐ ܘܚܘܼܒܵܐ ܩܒ̣ܥ ܒܥܢܢ̈ܐ ܐܝܟ ܡܚܙܝܼܬܼܵܐ 18 ܕܢܚܘܿܪܘܢ ܒܗ ܘܢܣܢܘܢ ܥܘ̣ܠܵܐ ܘܢܓܒܼܘܢ ܚܘܼܒܵܐ. 19 :ܚܙܬܵܐ ܕܕܡܐ ܘܙܗܪܐ ܕܢܘܼܪܵܐ ܨܝܼܪܝܼܢ ܗ̄ܘ̣ܵܘ ܒܗ̇ 20 ܕܡܒܕ ܩܝܼܢ ܗ̄ܘ̣ܵܘ ܕܟܼܡܵܐ ܠܚܝܼܡܵܐ ܥܲܠ ܥܘ̈̇ܠܐ. 21 :ܫܝܢܵܐ ܘܢܓܼܪ̈ܐ ܘܚܝܹܠ ܐܝܼܬܘܼܬܹܗ ܟܣܐ ܗ̄ܘ̣ܵܐ ܒܚܸܙܘܵܗ̇ 22 ܕܠܦܘܼܬ ܩܫܬܵܐ ܐܦ ܐܚܘܕܗ̇ ܘܓܐܪ̈ܐ ܕܪܘܓܼܙܗ. 23 :ܐܝܟ ܕܒܨܒܥܵܐ ܡܚܘܐ ܗ̄ܘ̣ܵܐ ܠܗܘܿܢ ܒܐܬ̤̈ܐ ܩܫܝܼܬܼܵܐ 24 ܕܗܕܐ ܕܐܚܕܬ ܒܕܪܥܝ ܪܡܵܐ ܒܝܘܿܡ ܛܵܘܦܬܢܵܐ. 25 :ܒܗܕܐ ܡܬܼܚ̇ܬ ܪܡܙܵܐ ܕܨܒܝܵܢܒ ܒܕܡܘܼܬ ܝܲܬܼܪܵܐ 26 ܘܫܪ̣ܝܬ ܘܚ̇ܢܝܬ ܠܘܼܩܒܼܵܠ ܥܘ̣ܠܵܐ ܛܪܘܢܵܐ ܕܒܼܟܘܿܢ. 27 :ܗܕܐ ܠܒܪܬ ܒܐܝܕܵܐ ܕܨܒܼܝܵܢܝ ܓܲܢ̄ܒܵܪܵܐܝܼܬ 28 ܘܲܫܕܝܬ ܓܸܐܪܹ̈ܐ ܕܡܝ̈ܐ ܪ̈ܗܝܼܒܹܐ ܒܣܕܪ̈ܝ ܐ̄ܢܫܐ܆ 29 :ܒܗܵܕܹܐ ܚܨܕܬܵܗ̇ ܠܚܩܠܵܐ ܕܒܝܼ̈ܫܹܐ ܡܠܝܬ̤ ܝܥܪܵܐ 30 ܘܡܩܒܪ̈ܢܐ ܗܘ̤ܘ ܠܝܼ ܓܠ̈ܠܐ ܘܫܡܠܝܼܘ ܨܒܼܝܵܢܝܼ. 31 :ܐܢ̄ܐ ܐܢ̄ܐ ܕܚܨܕܸܬ ܥܡ ܐܢܫܘܼܬܐ ܐܦ ܚܝܘ̈ܬܐ 32 ܘܥܒ̇ܕܬ ܐܢܘܿܢ ܓܲܫܪܵܐ ܕܡܕܪܐ ܡܸܬܚܒܠܵܢܐ. 33 :ܐ̄ܢܐ ܐ̄ܢܐ ܕܫܒ̇ܩܬ ܐܦ ܫܘܟܢܵܐ ܥܲܡ ܢܘܚ ܪܵܘܚܡܝ 34 ܘܐܚܝܼܬ ܥܲܡ ܢܘܚ ܓܸܢܣ̈ܐ ܚܲܪ̈ܫܹܐ ܠܦܘܠܚܵܢ ܐ̄ܢܫܐ. 35 :ܐ̄ܢܐ ܐ̄ܢܐ ܕܢܛܪܸܬ ܒܩܝܣ̈ܐ ܡܝܼ̈ܬܐ ܚ̈ܝܐ ܕܟܠܐ 36 ܘܠܵܐ ܐܬܛܒܲܥܘ ܒܹܝܬ ܡܚܫ̈ܘܠܐ ܘܓܲܠܠܹ̈ܐ ܪ̈ܗܝܒܐ. 37 :ܨܒܝܼܢܝܼ ܩܝܼܡ ܗ̄ܘ̣ܵܐ ܐܝܟ ܡܲܠܚܵܐ ܒܓܼܵܘ ܩܒܹܘܼܬܼܵܐ 38 ܘܐܲܝܟ ܕܲܒܼܠܸܩܹܐ ܡܕܲܒܲܪ ܗ̄ܘ̣ܵܐ ܠܹܗ ܠܲܠܡܐܹܝܢ ܫܲܝܢܵܐ. 39 :ܠܫܝܢܵܐ ܢܓܕܗ ܨܒܼܝܵܢܝ ܟܣܝܐ ܐܝܟ ܕܒܕܒܼ̈ܠܹܐ 40 ܘܐܦܩܗ̇ ܣܡܵܗ̇ ܒܡܨܥܲܬ ܐܪܥܵܐ ܕܠܵܐ ܢܸܟܼܝܵܢܵܐ. 41 :ܗܵܐ ܐܦܩܬܟܼܘܿܢ ܠܲܠܡܹܐܝܢ ܫܲܝܫܵܐ ܐܝܟ ܕܐܫܬܘܕܝܼܬ 42 ܚܙ̣ܵܘ ܠܵܐ ܬܒܣܪܘܿܢ ܥܲܠ ܦܘܼܩܕܢܲܝ̈ ܐܲܝܟ ܩܲܕܡܵܝܹ̈ܐ. 43 :ܗܵܐ ܚܘܼܝܼܬܟܘܿܢ ܩܫܝܘܼܬ ܢܓܕ̈ܐ ܕܒܠܥ̣ܘ ܒܝܼܫܹ̈ܐ 44 ܦܘܫܘ ܡ̣ܢ ܥܘ̣ܠܐ ܕܠܵܐ ܬܬܢܓܼܕܼܘܢ ܐܝܟ ܥܘ̈̇ܠܐ. 45 :ܗܵܐ ܐܲܠܸܦܬܟܘܿܢ ܙܢܲܝ̈ ܟܹܐܢܘܼܬܵܐ ܘܫܸܡ ܛܝܒܘܬܐ 46 ܚܙ̣ܵܘ ܐܬܕܒܲܪܘ ܚܟܝܡܐܝܬ ܥܲܡ ܬܪܬܲܝܗܹܝܢ. 47 :ܗܵܐ ܐܩܝ̇ܡܬ ܩܝܵܡܵܐ ܕܫܝܢܵܐ ܒܹܝܬܼ ܠܝܼ ܘܠܟܼܘܼܢ 48 ܠܵܐ ܬܸܫܪܘܢܵܝܗܝ ܒܪܦܝܘܼܬ ܥܘ̣ܠܵܐ ܕܐܗܦܘܿܟ ܐܪܓܙ. 49 :ܗܵܐ ܚܙܵܘ ܩܫܬܵܐ ܕܡܬܝܼܚܵܐ ܠܝܼ ܒܐܦܲܝ̈ ܪܵܘܡܵܐ 50 ܘܠܲܝܬ ܒܵܗ̇ ܝܬܪܐ ܐܦܠܵܐ ܐܝܼܕܵܐ ܕܡܕܒܪܵܐ ܠܗ̇. 51 :ܚܘܿܪܘ ܘܐܬܒܼܩܵܘ ܕܠܝܘܿܡ ܩܸܐܪܣܵܐ ܚܫܚܵܐ ܩܸܫܬܐ 52 ܘܐ̄ܢܐ ܗܵܐ ܥܒܕܬܵܗ̇ ܐܬ̤ܐ ܕܫܲܝܢܵܐ ܒܹܝܬܼ ܠܝܼ ܠܐ̄ܢܫ̈ܐ. 53 ܠܫܝܢܵܐ ܪܓܝܼܓ ܐ̄ܢܵܐ ܘܠܵܘ ܠܩܵܪܒܼܵܐ ܕܥܲܡ ܐ̄ܢܫܘܵܬܐ: pb. f.258r 54 ܘܡܸܛܠܗܵܢܵܐ ܠܵܐ ܪܡ̇ܝܬ ܝܬܪܵܐ ܒܩܫܬܼܵܐ ܕܚܘܝܼܬ. 55 :ܗܵܐ ܚܵܘܝܬܼܟܘܿܢ ܪܓܬ ܨܒܝܼܵܢܝ ܕܪܚ̇ܡ ܐ̄ܢܫܐ ܗ̄ܘ̣ 56 ܠܵܐ ܬܥܨܘܢܵܢܝ ܠܒܲܪ ܡ̣ܢ ܨܒܼܝܵܢܝ ܠܡܣܥܲܪ ܪܘܓܼܙܵܐ. 57 :ܫܡܝܵܐ ܘܐܪܥܵܐ ܢܗܘܘܿܢ ܣܗܕ̈ܐ ܒܹܝܬܼ ܠܝܼ ܘܠܟܼܘܿܢ 58 ܕܠܵܐ ܪܓ̇ܐ ܠܝܼ ܠܡܩܛܵܠ ܐ̄ܢܫܵܐ ܕܠܵܐ ܣܟܼܠܘܼܬܼܵܐ. 59 :ܗܠܹܝܢ ܩ̈ܠܐ ܐܟܪܸܙ ܟܲܣܝܵܐ ܒܟܸܣܝܵܐ ܠܐ̄ܢܫܐ 60 ܘܟܬܒܼ ܐܢܘܿܢ ܒܕܝܬܩܹܐ ܕܐܬ̤ܵܐ ܕܩܸܫܬܵܐ. 61 :ܒܗܘܿܢ ܐܬܒܩܝܼ ܢܘܿܚ ܗܘ̤ ܘܲܒܼܢܵܘ̈ܗܝ ܐܲܝܟ ܕܒܣܦܪܐ 62 ܘܒܬܲܪ ܙܒܢܵܐ ܛܥ̣ܵܘ ܝܠܕ̈ܬܹܗ ܒܬܲܪ ܛܘܥܝܲܝ. 63 :ܒܡܠܹܐ ܙܒܼܢܵܐ ܩܘܝܼ ܫܝܢܵܐ ܨܹܝܕ ܐܪ̈ܥܢܹܐ 64 ܘܒܬܲܪ ܩܲܠܝܼܠ ܥܲܠ ܚܸܪܝܢܵܐ ܘܐܡܠܸܟ ܒܐܪܥܵܐ. 65 :ܦܢܵܐ ܫܪܟܢܵܐ ܕܦܫ ܡ̣ܢ ܡܲܝ̈ܐ ܨܝܕ ܚܘܼܒܵܠܹܗ 66 ܘܫܪܝܼ ܪܕܐ ܒܐܘܼܪܚܵܐ ܕܬܘܫܐ ܐܲܝܟ ܩܕܡܝܹ̈ܐ. 67 :ܫܒ̣ܩܘ ܝܪܬܘܼܬܼܵܐ ܕܦܘܼܩܕܵܢ ܕܫܲܝܢܵܐ ܕܩܒܸܠܘ ܡ̣ܢ ܢܘܚ 68 ܘܛܥ̣ܘ ܐܬ̤ܐ ܕܝܗܒ̣ ܒܵܪܘܿܝܵܐ ܒܹܝܬܼ ܠܹܗ ܘܠܗܘܿܢ. 69 :ܢܦ̣ܩܘ ܡ̣ܢ ܐܬܼܪܐ ܘܲܫܒܒܘܼܬܼܵܐ ܕܨܝܕ ܩܹܒܘܼܬܼܵܐ 70 ܘܫܪܝܼܘ ܦܗܝܼܢ ܠܲܡܓܲܒܵܝܘܼ ܐܬܪ̈ܘܵܬܼܵܐ. 71 :ܚܙܲܩܘ ܡ̣ܢ ܩܲܪܕܘܼ ܐܝܟܵܐ ܕܢܦ̣ܩܘ ܠܠܡܹܐܝܢ ܫܲܝܢܵܐ 72 ܘܬܪܲܨܘ ܐܘܼܪܚܵܐ ܠܡܸܪܕܵܐ ܠܒܵܒܸܠ ܫܸܡ ܒܘܼܠܒܵܠܐ. 73 :ܚܙ̣ܵܩܘ ܡ̣ܢ ܫܲܝܢܵܐ ܕܫܸܡ ܒܵܪܘܿܝܵܐ ܕܥܬܝܼܪ ܚܘܼܒܹܗ 74 ܘܢܦ̣ܩܘ ܒ̇ܥܝܢ ܝܪܬܘܼܬ ܐܪܥܵܐ ܕܡܣܟܹܝܢ ܥܘܼܒܵܗ̇. 75 :ܒܪܓܬ ܐܪܥܵܐ ܢܦܩ̣ܘ ܐܪ̈ܥܢܹܐ ܡ̣ܢ ܨܝܕ ܫܲܝܢܵܐ 76 ܠܡܐ ܚܲܕ ܢܘܡ̈ܐ ܒܐܬܪ̈ܘܬܵܐ ܕܛܒܝܼ̈ܢ ܘܦܹܐܝܢ. 77 :ܫܘܹܝܢ ܗ̄ܘ̣ܵܘ ܟܠܗܘܿܢ ܟܲܕ ܪܕܹܝܢ ܗ̄ܘ̣ܵܘ ܠܐܦܝ̈ ܒܵܒܸܠ 78 ܘܚܲܕ ܗ̄ܘ̣ܵܐ ܥܡܵܐ ܘܚܲܕ ܠܸܫܢܵܐ ܘܚܲܕ ܚܘܼܫܵܒܼܵܐ. 79 :ܚܲܕ ܨܒܼܝܢܵܐ ܕܒܲܪ ܐܸܢܘܿܢ ܥܕܲܡܵܐ ܠܒܵܒܸܠ 80 ܘܒܓܘܼ ܒܵܒܸܠ ܪܵܓܘ ܗ̄ܘ̣ܵܘ ܪܓܬܐ ܕܥܲܡܠܵܐ ܘܥܘܼܠܵܐ. 81 :ܪܓܬܐ ܣܢܝܬܼܵܐ ܪܓܼܘ ܡܲܪ̈ܚܹܐ ܡܲܪܚܐܝܼܬ 82 ܒܕܡܘܼܬ ܐܕܼܵܡ ܕܪܓ ܘܐܸܬܝܥܢ ܦܠܐܪܵܐ ܘܕܲܪܓܼܵܐ. 83 :ܚܘܼܬܼܪܵܐ ܣܲܟܼܠܵܐ ܚܦܛ ܐܢܘܿܢ ܠܒܼܢܵܘ̈ܗܝ ܕܐܵܕܼܵܡ 84 ܘܒܼܗܝ̇ ܛܘܥܝܲܝ ܛܥ̣ܘ ܐܦ ܗܸܢܘܿܢ ܐܲܝܟ ܐܒܼܘܗܘܿܢ. 85 :ܗܘ̇ ܚܘܫܒܼܵܐ ܕܗܘ̤ܵܐ ܠܐܕܡ ܕܢܗܘܹܐ ܐܠܗ 86 ܗܘ̤ ܗܘ̤ܐ ܠܲܒܼܢܵܘ̈ܗܝ ܠܡܚܛܲܦ ܕܪܓܼܵܐ ܐܲܠܗܵܝܵܐ. 87 :ܒܐܘܪܚܵܐ ܕܐܕܼܵܡ ܪܕܵܘ ܐܵܦ ܝܲܠܕܵܘ̈ܗܝ ܡܲܪܚܐܝܼܬ 88 ܘܡܪܕܐ ܕܥܘ̣ܠܵܐ ܒܥ̣ܘ ܕܢܩܝܼܡܘܿܢ ܥܲܠ ܒܵܪܘܿܝܵܐ. 89 :ܥܲܠ ܥܒܘܿܕܵܐ ܡܪܲܕܘ ܥܲܦܪ݁ܢܹܐ ܒܢܲܝ̈ ܕܚܝܼܚܵܐ 90 ܘܥܬܕܘܙܝܲܢܵܐ ܠܡܬܟܬܫܘܼ ܥܲܡ ܚܲܝܲܝ̈ܗܘܿܢ. 91 :ܙܝܢܵܐ ܕܥܘ̣ܠܐ ܠܒܸܫܘ ܥܘ̈̇ܠܐ ܥܘ̇ܠܐܝܼܬ 92 ܘܫܪܝܼܘ ܫ̇ܕܹܝܢ ܓܐܪ̈ܐ ܕܚܘܼܬܪܐ ܠܘܩܒܼܵܠ ܩܘܼܫܬܼܵܐ. 93 :ܚܘܬܪܐ ܣܟܼܠܵܐ ܠܒܸܫܘ ܗ̄ܘ̣ܵܘ ܣܟܼ̈ܠܹܐ ܒܕܡܘܼܬ ܙܝܢܵܐ 94 ܘܐܲܝܟ ܣܢܘܿܪܬܐ ܣܡ̣ܘ ܫܘܼܒܼܗܪܐ ܒܪܸܫ ܡܕܥܗܘܿܢ. 95 :ܪܘܡܵܐ ܘܥܘܼܡܩܵܐ ܣܒ̣ܪܘ ܕܡܟܒܫܝܼܢ ܬܚܹܝܬ ܐܝܼܕ̈ܝܗܘܿܢ 96 ܘܣܵܠܩܝܼܢ ܘܗܘܹܝܢ ܒܕܪܓܼܐ ܪܡܵܐ ܕܐܲܠܗܘܼܬܵܐ. 97 :ܗܕܝܘܛܐܝܼܬ ܪܢܵܘ ܗܕܝܘ̈ܛܹܐ ܐܝܕܐ ܕܪܢܘ 98 ܘܠܵܐ ܚܪܘ ܫܦܝܼܪ ܠܘܵܬܼ ܫܘܼܠܡܵܐ ܕܣܘܼܥܪ̈ܢܲܝܗܘܿܢ. 99 :ܕܠܵܐ ܒܘܼܝܢܵܐ ܚ̣ܙܲܩܘ ܡ̣ܢ ܐܲܬܼܪܵܐ ܕܫܕܹܝܢ ܗ̄ܘ̣ܵܘ ܒܹܗ 100 ܘܕܠܵܐ ܛܟܼܣܵܐ ܒܥ̣ܵܘ ܕܢܫܪܘܢ ܒܒܸܢܝܵܢ ܥܘ̣ܠܵܐ. 101 :ܡܢܐ ܗܘ̤ܬ ܟܲܝ ܪܓܬܐ ܕܕܠܩܲܬ̤ ܒܚܘܼܫܒܲܝ̈ܗܘܿܢ 102 ܘܡ̇ܢ ܐܬܪܥܝܼܘ ܕܢܪܡܘܢ ܥܲܡܠܵܐ ܕܠܐ ܒܲܡܫܘܚܬ̈ܐ. 103 :ܠܡ̇ܢ ܟܲܝ ܐܪܝܡܘ ܪ̈ܥܝܢܲܝܗܘܿܢ ܠܐܦܝ̈ ܪܵܘܡܵܐ 104 ܘܥܲܠܡܵܢܵܐ ܚܙ̣ܩܘ ܒܐܘܼܪܚܵܐ ܕܥܣܩܵܐ ܡ̣ܢ ܡܝܘ̈ܬܹܐ. 105 :ܪܓܬܐ ܒܝܫܬܼܵܐ ܫܚܩܬ̤ ܐܸܢܘܿܢ ܠܥܛܠܲܝ̈ ܠܸܒܵܐ 106 ܘܥܵܪܥܵܐ ܒܥ̣ܵܘ ܕܢܪܝܡܘܿܢ ܓܦܹ̈ܐ ܠܪܵܘܡܵܐ. 107 :ܚܨܪܵܐ ܕܒܼܗܘܿܢ ܐܥܝܼܪ ܐܸܢܘܿܢ ܐܲܝܟ ܕܡ̣ܢ ܫܸܢܬܼܵܐ 108 ܘܫܪܝܼܘ ܗܵܪܓܝܼܢ ܚܘܼܫܵܒܲܝ̈ܗܘܿܢ ܒܲܕ ܠܵܐ ܦܲܐ̈ܝܵܢ. pb. f.258v 109 :ܐܲܝܟ ܕܒܫܸܢܵܬܐ ܛܒ̣ܥܘ ܪ̈ܓܿܫܲܝܗܘܿܢ ܡ̣ܢ ܘܠܝܼܬܼܵܐ 110 ܘܐܲܝܟ ܟܲܫܝܼܪܹ̈ܐ ܩܡ̣ܘ ܘܐܸܬܼܚܲܦܛܘ ܠܦܘܠܚܵܢ ܐܪܥܵܐ. 111 :ܫܒܼܩܘ ܦܘܼܠܚܢܵܐ ܐܠܗܝܵܐ ܕܡܲܩܢܹܐ ܚܲܝܹ̈ܐ 112 ܘܐܪܡܝܼܘ ܥܡܠܵܐ ܕܠܐ ܝܘܼܬܼܪܢܵܐ ܠܦܓܼܪܐ ܘܢܲܦܫܵܐ. 113 :ܫܛܘ ܡܵܘܡ̈ܬܐ ܕܐܲܠܵܗ ܟܠܐ ܕܠܐ ܡܫܬܪܝܵܐ 114 ܘܕܵܓܠܘܿܗ̇ ܠܐܬ̤ܐ ܡܠܝܼܬ̤ ܫܲܝܢܵܐ ܕܚܵܘܝܼ ܐܸܢܘܿܢ. 115 :ܪܢܵܘ ܕܡܕܓܸܠ ܘܠܵܐ ܡܩܝܼܡ ܡܠܬܹܗ ܐܝܟ ܕܐܸܫܬܵܘܕܝܼ 116 ܘܗ̇ܦܟ ܡܲܝܬܐ ܡܝ̈ܐ ܕܚܝܼ̈ܠܹܐ ܘܡܚܲܒܸܠ ܠܲܢ. 117 :ܠܵܐ ܫܪܝܼܪܵܐ ܚܲܫܒܘܼܗܝ ܣܟܼ̈ܠܐ ܠܫܪܝܼܪ ܡ̣ܢ ܟܠ 118 ܘܥܲܠܗ̇ܝ ܫܪܝܼܘ ܠܡܒܼܢܵܐ ܡܪܕܐ ܥܲܠ ܒܵܪܘܿܝܵܐ. 119 :ܒܗܕܹܐ ܬܸܢܘܵܝ ܫܠܸܡܘ ܠܚܕܪܹ̈ܐ ܚܬܝܼܪ̈ܝ ܠܸܒܵܐ 120 ܘܐܪܡܝܼܘ ܥܡܠܵܐ ܕܠܵܐ ܣ̇ܠܸܩ ܗ̄ܘ̣ܵܐ ܠܘܵܬ ܫܘܼܠܵܡܵܐ. 121 :ܗܵܢ ܚܘܫܒܵܐ ܐܘܸܠܕܘ ܣܟܼܠܹ̈ܐ ܕܠܵܐ ܒܘܼܝܼܢܵܐ 122 ܕܢܒܼܢܘܿܢ ܒܲܝܬܵܐ ܕܢܬܦܨܘܢ ܒܹܗ ܡ̣ܢ ܡܵܡܘܵܠܵܐ. 123 :ܒܗܵܢ ܪܥܝܢܐ ܐܸܙܕܝܲܢܘ ܗ̄ܘ̣ܵܘ ܐܝܟ ܕܒܙܲܝܢܵܐ 124 ܕܢܸܣܕܪܘܢ ܩܸܐܪܣܵܐ ܥܲܡ ܥܒܼܘܕܐ ܒܐܦܝ̈ ܪܘܡܵܐ. 125 :ܬܠܬ ܐܬܚܫܲܒܼܘ ܓܠܝܼܙ̈ܝ ܗܵܘܢܵܐ ܕܛܵܒܼ ܦܟܝܼ̈ܗܵܢ 126 ܘܒܥܠܬܗܝܢ ܥܬܸܕܘ ܙܲܝܢܵܐ ܕܕܵܡ ܙܟ̇ܝܢ ܒܹܗ. 127 :ܚܕܵܐ ܕܢܸܬܦܲܨܘܢ ܡ̣ܢ ܛܘܦܢܵܐ ܕܕܠܡܵܐ ܢܸܗܘܹܐ 128 ܘܚܕܵܐ ܕܢܐܚܕܘܢ ܕܲܪܵܐ ܒܪܵܘܡܵܐ ܥܲܡ ܒܪ̈ܘܿܝܵܐ. 129 :ܗ̇ܝ ܕܹܝܢ ܕܬܠܬܼ ܕܡܵܐ ܕܐܸܬܼܟܲܬܲܫܘ ܘܙܟܼܵܘ ܘܐܡܠܸܟ 130 ܢܪܦܘܢ ܒܐܪܥܵܐ ܫܡ ܫܘܒܼܗܪܵܐ ܐܝܟ ܙܟ̈ܝܹܐ. 131 :ܥܲܠ ܙܟܼܘܬܐ ܡܬܟܬܫܝܼܢ ܗ̄ܘ̣ܵܘ ܒܢܲܝ̈ ܚܝܒ̣ܵܐ 132 ܘܠܵܐ ܝܕܥܝܼܢ ܗ̄ܘ̣ܵܘ ܕܡܚܝܒܼ ܚ̇ܝܒܝܼܢ ܐܝܟ ܐܒܘܼܗܘܿܢ. 133 :ܪܓܘ ܘܐܬܚܫܒܼܘ ܠܡܸܙܟܵܐ ܒܙܲܝܢܵܐ ܕܚܬܝܼܪܘܼܬܼܵܐ 134 ܘܐܦܩܘܼܗܝ ܠܓܠܝܐ ܠܢܟܠܐ ܟܣܝܐ ܕܪ̈ܥܝܵܢܲܝܗܘܿܢ. 135 :ܬܵܘ ܠܲܡ ܢܪܡܐ ܠܒܼܢ̈ܐ ܕܡܸܕܪܵܐ ܘܢܩܩܸܕ ܐܸܢܘܿܢ 136 ܘܢܒܢܹܐ ܡܓܼܕܠܐ ܕܡܵܛܹܐ ܪܫܹܗ ܠܪܘܡܵܐ ܕܲܠܥܸܠ. 137 :ܬܵܘ ܢܬܟܬܲܫ ܥܲܡ ܦܘܼܠܚܢܵܐ ܘܦܘܼܨܵܝ ܚܲܝܲܝ̈ܢ 138 ܬܵܘ ܢܥܒܕ ܠܲܢ ܫܡܵܐ ܒܒܼܪܝܬܐ ܕܛܵܒܼ ܡ̣ܢ ܟܠܢܵܫ. 139 :ܕܢܬܢܘܼܢܵܗ̇ ܕܪ̈ܐ ܕܐܵܬܝܢ ܠܐܟܼܘܬ ܚܲܝܠܲܢ 140 :ܬܘ ܢܬܓ̄ܒܪ ܥܲܠ ܬܟܬܘܫܵܐ ܕܫܸܡ ܥܵܒܼܘܿܕܵܐ 141 ܘܢܥܸܒܼܕ ܥܡܗ ܩܐܪܣܐ ܕܚܝܼܠܵܐ ܒܐܦܝ̈ ܪܵܘܡܵܐ. 142 :ܬܵܘ ܢܙܕܝܲܢܘ ܒܙܝܢܵܐ ܕܦܐܹܐ ܠܩܪ̈ܒܬܼܵܟܹܐ 143 ܘܢܫܕܐ ܓܐܪܹ̈ܐ ܒܐܠܗ ܟܠܐ ܕܚܒܠ ܓܢܣܲܢ. 144 :ܬܘ ܢܬܢܩܡ ܥܝܪܬܐ ܕܕܡܵܐ ܕܟܢܘ̈ܬܢ 145 ܕܚܪܒܼ ܐܢܘܿܢ ܒܣܝܦܐ ܕܡܝ̈ܐ ܕܠܵܐ ܚܵܟܣܵܢܵܐ. 146 :ܬܘ ܢܥܒܸܕ ܠܹܗ ܐܲܝܟ ܡܵܐ ܕܣܥܪ ܒܒܢܲܝ̈ ܥܡܲܢ 147 ܡܬܒܥ ܒܐܝܕܘ̈ܗܝ ܕܡܵܐ ܕܟܝܢܢ ܕܐܫ̣ܕܗ ܡܓܢ. 148 :ܬܵܘ ܢܐܡܪ ܠܹܗ ܡܵܐ ܕܙ̇ܟܝܢܢ ܐܝܟ ܕܒܕܝܼܢܵܐ 149 ܕܥܲܠ ܡ̇ܢ ܚܒܠܬ ܟܝ̈ܢܐ ܚܲܪ̈ܫܹܐ ܥܲܡ ܐ̄ܢܫܘܼܬܼܵܐ. 150 :ܒܕܝܢܵܐ ܘܙܝܢܵܐ ܢܲܩܪܸܒܼ ܥܡܗ ܓܲܢ̄ܒܵܪܐܝܼܬ 151 ܘܢܣܒܼ ܕܪܓܹܗ ܘܫܸܡ ܫܘܠܛܢܹܗ ܘܢܗܘܹܐ ܕܝܼܠܲܢ. 152 :ܢܪܡܐ ܠܒ̈ܢܐ ܘܢܘܩܕ ܐܢܹܝܢ ܒܫܠܗܒܝܼܵܬܐ 153 ܕܠܵܐ ܢܬܬܪ̈ܝܢ ܡܵܐ ܕܡܬܢܣܟܼܝܢ ܡܝ̈ܐ ܥܠܲܝܗܹܝܢ. 154 :ܢܒܢܐ ܚܣܢܐ ܘܢܼܟܼܒܘܿܫ ܢܡܠܝܼܘܗܝ ܙܝܢܵܐ ܘܚܲܝܵܐܐ 155 ܕܢܗܘܹܐ ܣ̇ܦܩ ܠܝܘܿܡ ܬܲܟܼܬܘܼܫܵܐ ܕܡܛܝܲܒܼ ܠܲܢ. 156 :ܢܦܬܐ ܬܣܵܘ̈ܗܝ ܘܢܵܘܪܸܒܼ ܐܢܹܝܢ ܠܦܘܼܬ ܪܲܒܘܼܬܹܗ 157 ܕܠܵܐ ܢܙܝܼܥܘܼܢܵܝܗܝ ܓ̈ܠܠܐ ܕܡܝ̈ܐ ܘܡܫܒܹ̈ܐ ܕܪܘܼܚܵܐ. 158 :ܢܫܪܲܪ ܢܸܒܢܝܼܘܗܝ ܐܘܼܡܢܐܝܬ ܐܲܝܟ ܕܦܲܐܹܐ ܠܲܢ 159 ܕܠܵܐ ܬܬܓܢܐ ܐܘܡܢܘܼܬܲܢ ܒܬܲܪ ܙܒܼܢܵܐ. 160 :ܒܚܨܦ̈ܐ ܫܓܼܝܼܪܹ̈ܐ ܢܒܢܝܼܘܗܝ ܟܠܗ ܐܝܟ ܕܒܟܸܐܦܹ̈ܐ 161 ܘܲܚܠܵܦ ܛܝܼܢܵܐ ܢܪܡܹܐ ܟܸܠܫܵܐ ܒܹܝܬܼ ܫܸܪ̈ܝܵܢܵܘܗܝ. pb. f.259r 162 :ܟܸ̇ܠܫܵܐ ܘܚܸܨܦܹ̈ܐ ܢܚܠܛ ܐܟ̄ܚܕ ܒܒܸܢܝܵܢ ܥܡܠܲܢ 163 ܕܠܵܐ ܢܟܘܢܵܝܗܝ ܫܘܼܚܠܵܦ ܙܒܢܹ̈ܐ ܕܩܘܼܪܵܐ ܘܚܘܼܡܵܐ. 164 :ܘܥܲܡ ܒܢܝܼܢܲܢ ܢܫܲܪܲܪ ܐܟ̄ܚܕ ܐܵܦ ܪܥܝܼܢܲܢ 165 ܘܠܵܐ ܢܬܪܦܐ ܩܕܼܵܡ ܗ̇ܘ ܕܐܬ̇ܐ ܕܢܲܩܪܸܒܼ ܥܡܲܢ. 166 :ܚܙ̣ܵܘ ܠܵܐ ܢܗܡܹܐ ܚܲܕ ܡ̣ܢ ܚܒܼܪܹܗ ܒܥܸܕܵܢ ܩܸܐܪܣܵܐ 167 ܕܠܡܵܐ ܢܒܕܪܢ ܒܲܐܪܥܵܐ ܟܠܵܗ̇ ܗ̇ܘ ܕܠܩܘܒܼܠܲܢ. 168 :ܐܹܝܘ ܠܚܬܝܼܪܹ̈ܐ ܕܟܲܕ ܠܵܐ ܨܵܒܹܝܢ ܦܪܫܘ ܘܬܐܢܒܝܼܘ 169 ܘܩܕܸܡܘ ܒܕܩܘ ܥܲܠ ܒܘܕܵܪܗܘܿܢ ܕܒܬܲܪ ܙܒܼܢܵܐ. 170 :ܐܘ ܠܣܡ̈ܝܐ ܕܟܕ ܠܑܵܐ ܚ̇ܙܝܢ ܚܙ̣ܵܘ ܬܲܩܢܵܐܝܼܬ 171 ܘܚܵܪܘ ܘܬܐܒܝܲܢܘ ܒܗ̇ܝ ܕܲܥܬܝܼܕܵܐ ܐܲܝܟ ܗ̇ܘ ܕܗܘ̣ܬ̤. 172 :ܐܘ ܕܫܘܝܢ ܗ̄ܘ̣ܵܘ ܒܚܲܕ ܚܘܼܫܒܼܵܐ ܒܒܢܝܵܢ ܥܘ̣ܠܵܐ 173 ܕܐܪܡܝܼܘ ܐܝܼܕܵܐ ܒܠܵܐ ܫܲܘܝܘܼܬܵܐ ܕܠܸܫܢܲܝ̈ܗܘܿܢ. 174 :ܗܢܘܿܢ ܐܟܪܸܙܘ ܒܲܕ ܠܵܐ ܕܝܼܠܗܘܿܢ ܥܲܠ ܚܘܒܵܬܼܗܘܿܢ 175 ܘܓܼܠܘ ܘܚܘܝܼܘ ܥܲܠ ܫܘܼܢܲܝܗܘܿܢ ܕܠܟܼܠ ܦܸܢ̈ܝܵܢ. 176 :ܐܪܡܝܼܘ ܐܝܼܕܵܐ ܘܟܬܒܼܘ ܘܫܠܸܡܘ ܕܐܸܢ ܡܬܒܼܕܪܝܼܢ 177 ܘܠܵܐ ܐܬܒܩܝܼܘ ܒܓܹܙܪ ܕܝܼܢܵܐ ܕܐܨܲܚ ܦܘܼܡܗܘܿܢ. 178 :ܟܬܲܒܼܘ ܩܘܼܛܪܓܼܗܘܿܢ ܒܩܢܝܵܐ ܫܪܝܐ ܕܠܸܫܵܢܲܝ̈ܗܘܿܢ 179 ܘܠܵܐ ܦܫܘ ܘܐܲܗܡܝܼܘ ܡ̣ܢ ܚܘܫܒܼܵܐ ܣܟܼܠܐ ܕܐܵܘܠܕܘ. 180 :ܥܡܸܩܘ ܘܚܲܦܪܘ ܘܣܡ̣ܘ ܫܬܐܣܹ̈ܐ ܐܝܟ ܕܠܥܠܲܡ 181 ܘܠܵܐ ܝ̇ܕܥܝܼܢ ܗ̄ܘ̣ܵܘ ܕܩܪܝܼܒ ܙܒܼܢܵܐ ܕܡܣܬܚܦܝܼܢ ܗ̄ܘ̣ܵܘ. 182 :ܫܓܼܪܘ ܩܪ̈ܡܝܕܹܐ ܘܐܘܩܸܕܘ ܟܸܠܫܵܐ ܘܫܲܪܝܼܘ ܒܵܢܝܢ 183 ܘܥܲܡ ܒܢܝܢܗܘܿܢ ܡܬܥܠܝܼܢ ܗ̄ܘ̣ܵܘ ܚܘܼܫܵܒܲܝ̈ܗܘܿܢ. 184 :ܟܡܵܐ ܕܒܢܝܢܵܐ ܡܬܥܠܹܐ ܗ̄ܘ̣ܵܐ ܠܐܦܝ̈ ܪܵܘܡܵܐ 185 ܠܒܗܘܿܢ ܝܲܬܝܼܪ ܡܬܥܠܐ ܗ̄ܘ̣ܵܐ ܒܲܚܬܝܪܘܼܬܼܵܐ.܆ 186 :ܟܡܵܐ ܕܝܘܿܡ ܡ̣ܢ ܝܘܿܡ ܡܬܬܟܣܲܦ ܗ̄ܘ̣ܵܐ ܥܲܠ ܡܘܫܚ̈ܬܹܗ 187 ܥܵܘ̣ܠܵܐ ܕܒܼܗܘܿܢ ܡܬܪܒܹܐ ܗ̄ܘ̣ܵܐ ܕܠܵܐ ܡܘܫܚ̈ܬܐ. 188 :ܥܝܼܪ ܗ̄ܘ̣ܵܐ ܠܸܒܗܘܿܢ ܘܠܵܐ ܕܵܡܸ̇ܟ ܗ̄ܘ̣ܵܐ ܠܠܝ ܐܝܼܡܵܡ 189 ܘܟܲܕ [ܠܐ] ܠܐܹܝܢ ܗ̄ܘ̣ܵܘ ܠܵܐ ܪܓܝܼܫܝܼܢ ܗ̄ܘ̣ܵܘ ܐܲܝܟܵܢ ܠܲܐܹܝܢ. 190 :ܚܦܝܼܛܝܼܢ ܗ̄ܘ̣ܵܘ ܛܵܒܼ ܕܐܡܲܬܝ ܬܣܩ ܠܪܸܫ ܕܓܲܬܗܘܿܢ 191 ܘܡܣܟܝܼܢ ܗ̄ܘ̣ܵܘ ܕܐܸܡܬܝ ܢܚܙܘܿܢ ܫܘܼܠܵܡ ܥܲܡܠܵܐ. 192 :ܠܐܣܒ̣ܥܐ ܗ̄ܘ̣ܵܬ ܪܓܬܐ ܕܒܼܗܘܿܢ ܡ̣ܢ ܕܠܡܸܒܼܢܵܐ 193 ܘܠܵܐ ܡܲܗܡܝܼܢ ܗ̄ܘ̣ܵܘ ܪ̈ܓܫܹܐ ܘܙܵܘܥܹ̈ܐ ܡ̣ܢ ܦܘܼܠܚܵܢܵܐ. 194 :ܚܙ̣ܵܐ ܥܒܘܿܕܵܐ ܗ̇ܘ ܕܚܙܝܢ ܠܹܗ ܥܕܠܵܐ ܢܸܗܘܘܿܢ 195 ܕܣܪܝܩܐܝܼܬ ܠܐܝ̇ܢ ܒܢ̇ܝܢ ܘܡܣܓܝܼܢ ܚܛܝܼܢ. 196 :ܚܙ̣ܵܐ ܕܐܸܢ ܒ̇ܢܝܢ ܠܵܐ ܡܨܝܢ ܒ̇ܢܝܢ ܐܝܟ ܡܵܐ ܕܐܣܒܲܪܘ 197 ܘܚܣܟ ܐܢܘܿܢ ܕܠܵܐ ܢܬܦܫܚܘܿܢ ܒܥܲܡܠܵܐ ܘܥܘ̣ܠܵܐ. 198 :ܚܣ ܘܐܬܪܚܡ ܐܝܟ ܡܵܐ ܕܡܥܕ ܠܡܪܚܡܘܼ 199 ܘܫܪܝܼ ܡܬܪܓܸܡ ܩ̈ܠܐ ܕܚܘܼܒܵܐ ܘܕܠܚܡܵܐ. 200 :ܚܘܒܵܐ ܡܕܟ ܒܓܼܙ ܪܕܝܼܢܵܐ ܕܥܲܠ ܡܪ̈ܚܐ 201 ܘܒܚܘܣܢܵܐ ܓܲܙܪܹܗ ܠܟܹܐܒܵܐ ܕܪ̈ܥܝܢܲܝܗܘܿܢ. 202 :ܡܚܣ ܓܹܝܪ ܚܣ ܥܲܠ ܗ̇ܘ ܥܲܡܠܵܐ ܕܕܠܵܐ ܒܘܼܝܵܢ 203 ܘܒܐܣܟܸܝܡ ܚܡܬܐ ܐܢܝܼܚ ܐܸܢܘܿܢ ܡ̣ܢ ܛܵܘܦܢܐ. 204 :ܐܣܟܝܡܵܐ ܕܪܘܓܼܙܵܐ ܡܠܐ ܗ̄ܘ̣ܵܐ ܩܵܠܐ ܕܐܫܡܲܥ ܐܸܢܘܿܢ 205 ܘܠܓܼܵܘ ܡܢܗ ܟܣܐ ܗ̄ܘ̣ܵܐ ܚܘܼܒܵܐ ܕܠܐ ܡܸܬܼ ܡܠܲܠ. 206 :ܩܵܠܵܐ ܓܠܝܵܐ ܐܫܡܲܥ ܡ̣ܢܫܸܠܝ ܠܐܩܢܐ ܩܵܠܵܐ 207 ܕܡܬܛܝܲܒܼ ܗ̄ܘ̣ܵܐ ܗܘ̤ ܘܕܥܡܹܗ ܡ̣ܢ ܕܠܡܚܬܼ. 208 :ܒܒܢܝ̈ ܡܸܠܟܹܗ ܡܬܡܠܟ ܗ̄ܘ̣ܐ ܝ̇ܕܥ ܟܠܐ 209 ܘܐܲܝܟ ܕܠܥܸܕܪܵܐ ܩ̇ܪܐ ܗ̄ܘ̣ܵܐ ܠܗܘܿܢ ܠܡܸܚܲܬ ܥܲܡܹܗ. 210 :ܗܵܐ ܠܲܡ ܐ̄ܢܫܐ ܗܘ̤ܘ ܚܲܕ ܥܲܡܵܐ ܘܚܲܕ ܠܫܢܵܐ 211 ܘܟܢܫܘ ܐܟ̄ܚܕ ܠܡܸܬܼܡܬܫܘܼ ܠܘܼܩܒܼܵܠ ܨܒܼܝܵܢܝ. 212 ܗܵܐ ܒܢܲܝ̈ ܐܵܕܼܵܡ ܣܥ̣ܵܘ ܥܲܠ ܡܵܪܘܼܬܝ ܐܲܝܟ ܐܒܘܗܘܿܢ: pb. f.259v 213 ܘܒ̇ܥܹܝܢ ܠܡܸܣܲܩ ܠܕܲܪܓܼܐ ܪܵܡܵܐ ܕܐܲܠܗܘܼܬܼܵܐ. 214 :ܗܵܐ ܡܝܘ̈ܬܹܐ ܕܚܸܠܘ ܡ̣ܢ ܡܵܘܬܼܵܐ ܕܚܘܼܒܵܐ ܕܚܘܼܒܵܠ ܡܲܝ̈ܵܐ 215 ܘܒ̣ܢܵܘ ܚܸܣܢܵܐ ܕܢܸܣܬܬܪܘܿܢ ܒܹܗ ܡ̣ܢ ܛܵܘܦܢܵܐ. 216 :ܗܵܐ ܐܪ̈ܥܢܹܐ ܥܲܬܸܕܘ ܙܝܢܵܐ ܘܩܛܲܪܘ ܐ̄ܪܙܵܐ 217 ܕܢܣܩܘܢ ܢܪܡܘܿܢ ܗܪܬܵܐ ܒܪܘܡܵܐ ܒܹܝܬ ܠܝܼ ܘܠܗܘܿܢ. 218 :ܗܵܐ ܣܡ̣ܘ ܬܸܢܵܘܝ ܕܠܵܐ ܢܬܦܠܓܼܘܢ ܚܲܕ ܥܲܠ ܚܒܼܪܹܗ 219 ܥܕܡܵܐ ܕܙ̇ܟܝܢ ܘܗ̇ܘܹܐ ܕܝܠܗܘܿܢ ܪܘܡܵܐ ܘܥܘܼܡܩܵܐ. 220 :ܗܵܐ ܬܢܒܝܼܘ ܟܲܕ ܠܵܐ ܨܒ̇ܝܹܢ ܥܲܠ ܒܘܼܕܵܪܗܘܿܢ 221 ܘܙܵܕܸܩ ܕܬܫܠܡ ܡܠܬܐ ܕܡܠܸܠܘ ܒܝܲܕ ܣܘܥܪ̈ܢܹܐ. 222 :ܬܵܘ ܠܲܡ ܢܚܸܘܬ ܢܦܠܓܼ ܐܢܘܿܢ ܚܲܕ ܡ̣ܢ ܚܒܼܪܹܗ 223 ܕܠܵܐ ܬܘܼܒܼ ܢܨܘܬܘܢ ܡܲܡܠܠܐ ܘܠܸܥܙܵܐ ܕܠܫܢܲܝ̈ܗܘܿܢ. 224 :ܬܵܘ ܢܪܡܐ ܒܗܘܿܢ ܗܪܬܵܐ ܒܫܬܩܵܐ ܟܲܕ ܠܵܐ ܪܓܝܼܫܝܼܢ 225 ܘܢܓܢܘܿܒܼ ܡܢܗܘܢ ܣܝܦܵܐ ܕܡܠܬܐ ܕܚܬܝܼܪܝܢ ܒܹܗ. 226 :ܬܵܘ ܫܘܝܐܝܼܬ ܢܚܘܿܬ ܠܐܪܥܵܐ ܕܠܵܐ ܫܘܼܢܝܵܐ 227 ܘܢܥܒܕ ܩܐܪܣܵܐ ܥܲܡ ܒܣܪ̈ܢܹܐ ܕܠܐ ܒܐܝܼܪ̈ܝܐ. 228 :ܬܵܘ ܢܬܸܠ ܠܗܘܿܢ ܠܥܙܵܐ ܦܪܝܼܫܵܐ ܕܟܼܠ ܠܫܢܝܼ̈ܢ 229 ܘܗܵܐ ܡܬܦܠܓܼܝܢ ܘܒ̇ܛܠ ܩܸܐܪܣܵܐ ܕܚܘܼܫܒܲܝ̈ܗܘܿܢ. 230 :ܬܵܘ ܢܩܠܹܐ ܒܗܘܿܢ ܩܠܵܐ ܚܲܕܬܵܐ ܕܠܵܐ ܡܦܣܝܢ ܒܹܗ 231 ܘܢܫܕܐ ܡܸܢܗܘܿܢ ܠܐܸܟܣܘܪܝܐ ܕܐܬܪ̈ܬܐ. 232 :ܐܘܿܢ ܒܪܘܿܝܵܐ ܡܢܵܘ ܗܢܵܐ ܕܡܬܪܓܸܡ ܐ̄ܢܬ 233 ܕܚܕ̈ܬܹܝܢ ܩ̈ܠܐ ܕܡܫܡܲܥ ܪܸܡܙܵܟ ܥܲܠ ܐܝܼܬܘܼܬܵܟ. 234 :ܠܡ̇ܢ ܩ̇ܪܐ ܐܲܢ̄ܬ ܠܡܚܲܬ ܥܲܡܵܟ ܠܒܹܝܬ ܐܪ̈ܥܬܹܐ 235 ܘܠܡ̇ܢ ܒ̇ܥܐ ܐ̄ܢܬ ܕܢܸܗܘܹܐ ܥܕܪܵܐ ܠܬܩܝܼܦܘܼܬܵܟ. 236 :ܒܡ̇ܢ ܡܬܡܠܟܿܬ ܕܢܗܘܹܐ ܥܡܵܟ ܡܲܡܠܠܵܐ ܠܐ̄ܢܫܵܐ 237 ܘܠܡ̇ܢ ܬܢܐ ܐܲܢ̄ܬ ܕܬܵܘ ܥܲܡܝ ܢܚܘܬ ܢܦܠܓ ܐܸܢܘܿܢ. 238 :ܡܢܘܼ ܗܘ̤ܐ ܠܵܟ ܡ̇ܠܟ ܡܸܠܟܵܐ ܡܸܠܟܵܐ ܒܪܫܝܼܬ ܕܒܪܝܼܬ 239 ܘܠܡ̇ܢ ܒܕܒܬܿ ܐ̄ܪ̈ܙܐ ܟܣܝ̈ܐ ܕܐܠܗܘܼܬܵܟ. 240 :ܡܢܘܼ ܥܕܪܵܟ ܟܕ ܒ̇ܪܐ ܗܘ̣ܝ̇ܬ ܫܡܲܝܵܐ ܘܐܲܪܥܵܐ 241 ܘܡܢܘܼ ܚܝܠܵܟ ܕܬܬܠ ܚܝܠܵܐ ܒܥ̇ܒܕ ܐܝܼܕܲܝ̈ܟ. 242 :ܠܡܢܘܼ ܡܡܬܘܡ ܩ̣ܪܝܬܿ ܐܘ ܩܪܒܬܿ ܠܡܲܡܠܵܠܐ ܕܥܲܡܵܟ 243 ܘܠܡ̇ܢ ܐܫܘܝܼܬ ܠܡܦܣܲܩ ܕܝܼܢܵܐ ܐܲܝܟ ܒܘܚܪܵܢܵܟ. 244 :ܕܡ̇ܐ ܗ̄ܘ̣ ܩܠܵܟ ܠܗ̇ܘ ܩܲܕܡܵܝܵܐ ܕܝܘܡܵܐ ܕܫܬܼܵܐ 245 ܟܕ ܨ̇ܐܪ ܗܘ̣ܝ̇ܬ ܨܠܡܹܗ ܕܐܕܼܵܡ ܒܨܒܼܥܵܐ ܕܪܸܡܙܵܟ. 246 :ܬܡ̇ܢ ܒܲܠܚܘܿܕ ܐܫܡܲܥܬ ܩܠܵܐ ܕܕܡ̇ܐ ܠܗܵܢܵܐ 247 ܗ̇ܝ ܕܬܵܘ ܢܥܒܕ ܐ̄ܢܫܐ ܒܨܠܡܲܢ ܐܲܝܟ ܒܲܕ ܡܘܼܬܲܢ. 248 :ܚܲܕ ܗ̄ܘ̣ ܩܠܵܐ ܘܚܲܕ ܣܘܼܟܵܠܵܐ ܕܗ̇ܝ ܘܲܕܗܵܕܹܐ 249 :ܠܗܠ ܬܵܘ ܢܸܥܒܸܕܼ ܘܗܪܟܵܐ ܢܸܚܘܿܬ ܕܡ̇ܐ ܘܫܪܝܼܪ 250 :ܚܲܕ ܗ̄ܘ̤ ܪܡܙܵܐ ܕܐܟܸܪܙ ܐܸܢܹܝܢ ܠܗ̇ܝ ܘܠܗܵܕܹܐ 251 ܘܚܲܕ ܗ̄ܘ̣ ܟܝܢܵܐ ܕܬܩܢ ܬܡ̇ܢ ܘܦܠܓܼ ܗܪܟܵܐ. 252 :ܠܒܢܲܝ̈ ܡܠܟܹܗ ܩ̣ܪܐ ܒܗ̇ܝ ܕܢܸܚܘܵܬ ܘܒܗܝ̇ ܕܢܸܥܒܸܕ 253 ܘܗܢܘܿܢ ܐܢܘܿܢ ܕܥܒܸܕܘ ܐ̄ܢܫܐ ܘܠܦܓܼܘ ܐ̄ܢܫܐ. 254 :ܐܒܼܐ ܗ̄ܘ̣ ܕܩܪ̣ܐ ܠܒܼܪܐ ܘܪܘܼܚܵܐ ܒܬܘܼܩܵܢ ܐܕܼܵܡ 255 ܘܠܗܘܿܢ ܙܡܢ ܠܘܵܬܼ ܦܘܠܓܼܐ ܕܗ̇ܘ ܡܵܐ ܕܒܼܪܵܘ. 256 :ܒܬܘܼܩܵܢ ܐ̄ܢܫܐ ܘܦܘܠܵܓܼ ܐ̄ܢܫܐ ܨܒܼܐ ܒܵܪܘܿܝܵܐ 257 ܕܢܓܼܠܐ ܐ̄ܪܙܐ ܕܒܘܼܕܵܩ ܩܢܘܿܡܹ̈ܐ ܕܟܣܹܝܢ ܥܲܡܹܗ. 258 :ܠܓܝܵܐ ܗ̇ܝ̣ ܡܕܝܢ ܕܠܲܝܬ ܒܲܥܒܝܼ̈ܕܹܐ ܕܪܲܒܼ ܡ̣ܢ ܐ̄ܢܫܵܐ 259 ܕܗܵܐ ܟܣܝ̈ܬܐ ܕܟܣܝ̈ܢ ܡ̣ܢ ܟܠ ܒܹܗ ܡܬܓܠܝ̈ܢ. 260 :ܘܐܠܵܐ ܢܒܼܥܐ ܕܡܢܐ ܗ̄ܝ̣ ܥܸܠܬܐ ܗ̇ܝ ܕܬܵܘ ܕܐܡܪ 261 ܕܒܬܘܩܢܹܗ ܘܒܦܘ ܠܓܹܗ ܪܫܝܼܘܵܢܐ ܒܲܠܚܘܿܕ. 262 :ܐܸܢ ܠܵܘ ܠܒܼܪܵܐ ܘܪܘܼܚܵܐ ܕܡܸܢܹܗ ܩܪ̣ܐ ܒܬܲܪܬܹܝܗܹܝܢ 263 ܡܢܘܼ ܡܕܝܢ ܕܫܘܐ ܥܲܡܹܗ ܕܡܸܬܡܠܟ ܒܹܗ. pb. f.260r 264 :ܠܫܡܝ̈ܢܹܐ ܠܐ ܦܐܝܵܐ ܗ̄ܘ̣ܵܐ ܗ̇ܝ ܒܪܬ ܩܵܠܵܐ 265 ܕܬܵܘ ܥܡܝ ܢܥܒܸܕ ܘܬܵܘ ܥܲܡܝ ܢܚܘܿܬ ܐܲܝܟ ܫܘܬܦܵܘ̈ܗܝ. 266 :ܐܠܘ ܐܡ̣ܪ ܕܙܸܠܘ ܚܘܬܘ ܦܠܓܼܘ ܠܫܵܢ ܐ̄ܢܫܐ 267 :ܟܒܲܪ ܕܡܝܵܐ ܗ̄ܘ̣ܵܬ ܕܠܪ̈ܘܚܢܹܐ ܩܪ̣ܐ ܐܵܦ ܫܕܪ 268 :ܕܠܵܐ ܚܸܪܝܢܵܐ ܡܕܹܝܢ ܐܝܬܹܝܗ̇ ܕܬܵܘ ܢܸܚܘܿܬ 269 ܕܠܒܼܪܐ ܘܪܘܚܵܐ ܩܢܘܡܹ̈ܐ ܕܥܲܡܹܗ ܡܬܐܡܪܵܐ ܗ̄ܘ̣ܵܬ. 270 :ܠܒܼܪܐ ܘܪܘܼܚܵܐ ܦܐܹܐ ܬܘܩܢܵܐ ܐܵܦ ܦܘܼܠܵܓܐ 271 ܘܥܡܹܗ ܕܐܒܼܵܐ ܒܪܵܘ ܟܠܡܸܕܡ ܘܦܠܓܘ ܐ̄ܢܫ̈ܐ. 272 :ܗܢܘܿܢ ܬܩܸܢܘ ܘܗܢܘܢ ܦܠܓܼܘ ܚܲܟܝܼܡܵܐܝܼܬ 273 ܐܒܼܐ ܘܒܼܪܐ ܘܪܘܼܚܵܐ ܕܩܘܼܕܫܵܐ ܟܝܵܢܵܐ ܫܘܝܵܐ. 274 :ܗܢܘܿܢ ܐܢܘܿܢ ܕܲܢܚܸܬܘ ܗܫܵܐ ܕܠܵܐ ܫܘܼܢܝܵܐ 275 ܕܢܣܒܼܘܢ ܡܡܠܠܵܐ ܘܢܬܠܘܿܢ ܡܡܠܠܵܐ ܠܟܼܝܵܢ ܐ̄ܢܫܐ. 276 :ܒܦܘܠܓܼ ܐ̄ܢܫܐ ܪܫܡܘܼܗܝ ܠܐ̄ܪܙܐ ܕܦܢܘܡܲܝ̈ܗܘܿܢ 277 ܘܦܫܩܘܼܗܝ ܠܚ̇ܪܬܐ ܒܝܲܕ ܡܘܗܒܼܬܐ ܕܒܠܫܢܹ̈ܐ. 278 :ܩܪ̣ܘ ܠܚܕܕܹ̈ܐ ܠܘܵܬܼ ܬܘܼܩܵܢܵܐ ܘܨܝܕ ܦܘܼܠܵܓܼܐ 279 ܕܢܐܠܲܦ ܟܠܢܵܫ ܕܚܲܕ ܗ̄ܘ̣ ܟܝܵܢܵܐ ܕܬܠܬܲܝ̈ܗܘܿܢ. 280 :ܢܚܸܬܘ ܕܬܦܠܓܘܢ ܠܵܘ ܡܚܬ̇ܬܿܐ ܕܒܫܘܼܢܵܝܵܐ 281 ܐܠܵܐ ܒܪܸܡܙܵܐ ܕܠܵܐ ܡܸܬܡܠܠܵܐ ܩܠܝܼܠܘܼܬܹܗ. 282 :ܪܹܡܙܵܐ ܫܪܲܪ ܐܝܟ ܐܝܙܓܕܵܐ ܨܝܕ ܡܲܪ̈ܚܹܐ 283 ܘܩ̣ܥܐ ܡ̣ܢܫܸܠܝܼ ܘܐܪܗܸܒܼ ܐܸܢܘܿܢ ܠܡܠܚ̈ ܚܘܼܬܪܵܐ. 284 :ܪܡܙܵܐ ܗ̄ܘ̣ ܕܢܚܸܬ ܘܫܩܠ ܡܢܗܘܿܢ ܙܲܝܢܵܐ ܕܡܲܡܠܠܐ 285 ܘܐܠܒܸܫ ܐܢܘܿܢ ܙܝܢܵܐ ܐܚܪܹܢܵܐ ܕܡܲܠܠܸܐ ܐ̄ܚܪܹܢܵܐ. 286 :ܒܣܲܝܦܵܐ ܩܲܫܝܵܐ ܦܲܣܩܹܗ ܠܡܲܡܠܠܐ ܕܠܫܢܲܝ̈ܗܘܿܢ 287 ܘܣܡ ܒܗܘܿܢ ܡܡܠܠܵܐ ܕܡܫܓܢܝ ܗ̄ܘ̣ܵܐ ܡ̣ܢ ܩܲܕܼܡܵܝܵܐ. 288 :ܫܩ̣ܠ ܩܲܕܡܵܝܵܐ ܕܢܠܦ ܐܸܢܘܿܢ ܕܗܘ̤ ܬܩܢ ܟܠ 289 ܬܘܼܒܼ ܕܬܪܹܝܢ ܕܢܘܕܲܥ ܐܸܢܘܿܢ ܕܫܲܠܝܼܛ ܥܲܠ ܟܠ. 290 :ܚܲܢܝܼܡܐܝܼܬ ܐܲܩܪܸܒܼ ܥܲܡܗܘܿܢ ܐܲܝܟ ܪܓܲܬܼܗܘܿܢ 291 ܘܚܠܦ ܦܓܼܪܐ ܥܲܡ ܥܢܝܢܵܐ ܥܒܲܕ ܬܟܬܘܼܫܵܐ. 292 :ܐܘܼܡܵܢܵܐܝܼܬ ܐܚܲܕ ܕܪܐ ܥܲܡ ܙܵܘܥܲܝ̈ܗܘܿܢ 293 ܘܦܟܪ ܐܢܘܿܢ ܒܚܒܼ̈ܠܐ ܩܫܝ̈ܐ ܕܠܫܢܲܝ̈ܗܘܿܢ. 294 :ܬܡܝܼܗ ܗ̄ܘ̣ܵܐ ܩܪܒܼܵܐ ܕܥܒܼܕ ܟܲܣܝܵܐ ܥܲܡ ܐܪ̈ܥܢܹܐ 295 ܘܠܵܐ ܡܨܐ ܗܘܢܵܐ ܕܢܬܢܹܐ ܬܗܪܗ ܟܡܵܐ ܐܸܢ ܢܬܢܹܐ. 296 :ܡܢܵܐ ܗ̄ܘ̣ܵܬ ܟܲܝ ܗܵܝ ܣܦܣܪ̈ܐ ܕܐܚܲܕ ܒܐܝܼܕܹܗ 297 ܘܚܪܒܼ ܡܡܠܠܐ ܚܠܦ ܗܕܡܹ̈ܐ ܘܠܵܐ ܚܫ ܦܓܼܪܐ. 298 :ܐܝܟܵܢ ܟܲܝ ܥܲܠ ܪܡܙܵܐ ܟܣܝܵܐ ܠܚܘܼܫܒܲܝ̈ܗܘܿܢ 299 ܘܚܠܨ ܫܩܸܠܹܗ ܠܓܙܵܐ ܕܒܼܗܘܿܢ ܘܠܵܐ ܐܪܓܹܫܘ ܒܹܗ. 300 :ܐܝܟܵܢ ܚܛܦܗ̇ ܠܡܠܬܼܵܐ ܕܦܘܼܡܗܘܿܢ ܩܢܝܼܬ ܚܝܠܵܐ 301 ܘܥܒ̣ܕ ܐܢܘܿܢ ܠܥ̈ܓܐ ܘܦܹܐܩܹ̈ܐ ܚܲܕ ܠܘܩܒܼܵܠ ܚܲܕ. 302 :ܐܝܟܵܢ ܓܝܙ ܡܥܝܼܢ ܚܝܘܼܬܵܐ ܡܡܠܠܵܐ ܩܲܕܡܵܐ 303 ܘܠܵܐ ܪ̈ܕܝ ܡܠ̈ܐ ܒܬܦܐ ܕܦܘܡܵܐ ܐܝܟ ܕܡܥܪ̈ܢ. 304 :ܐܝܟܵܢ ܦܣܩܗ̇ ܠܗ̇ܝ ܡܲܪܕܝܵܬܼܵܐ ܕܚܲܕ ܠܫܢܵܐ 305 ܘܕܪܫ̣ ܐܘܼܪܚܵܐ ܠܗܘܢܵܐ ܠܡܪܕܵܐ ܒܩܵܠ̈ܐ ܚܕܬܹ̈ܐ. 306 :ܐܝܟܵܢ ܘܟܼܡܐ ܢܹܐܡܲܪ ܕܗܘܬ̤ ܗܸܝ̇ ܕܗܘܸܬ 307 ܕܦܣܩ ܡܸܠܬܼܵܐ ܘܐܘܥܝܼ ܡܠܬܼܵܐ ܒܫܘܚܠܦ ܩܵܠܵܐ. 308 :ܠܹܗ ܠܗ̇ܘ ܪܸܡܙܵܐ ܕܣܥ̣ܪ ܗܵܕܹܐ ܢܬܸܠ ܚܝܠܗ̇ 309 ܕܗܘ̤ܝܘ ܝ̇ܕܥ ܕܐܲܝܟܵܢ ܣܥܪܗ̇ ܩܲܠܝܼܠܐܝܼܬ. 310 :ܠܹܗܘ̤ ܓܲܠܝܵܐ ܕܐܝܟܵܢ ܚܠܝܸܨ ܡܠܲܬ ܐ̄ܢܫܐ 311 ܘܝܟܵܢ ܬܘܼܒ ܝܗܒ̣ ܥܘܼܬܪܵܐ ܐܚܪܢܵܐ ܕܦܪܝܫ ܡ̣ܢ ܗ̇ܘ. 312 :ܕܝܼܠܹܗ ܐܝܼܬܵܘܗܝ ܥܘܼܬܪܐ ܕܡܸܠܬܼܵܐ ܐ̄ܚܪܢܵܐ ܘܩܕܡܵܐ 313 ܘܗܘ̤ ܦܣܩ ܡܠܬܐ ܘܐܛܥܸܡ ܡܸܠܬܐ ܒܹܗ ܒܟܼܝܵܢܐ. 314 ܨܒܼܢܵܐ ܕܪܡܙܹܗ ܢܩܫܲܬ̤ ܡ̣ܢܫܸܠܝ ܒܟܸܢܪ ܢܦܫܵܐ: pb. f.260v 315 ܘܫܪܝܼܬ̤ ܙܡܪܵܐ ܩ̈ܠܐ ܚܲܕ̈ܬܹܐ ܕܢܘܟܪ̈ܝܝܼܢ ܠܗ̇. 316 :ܗ̇ܘ ܦܘܼܩܕܵܢܵܐ ܕܢܦܚܵܗ̇ ܒܪܫܝܼܬ ܘܢܩܬ̤ ܩܠܵܐ 317 ܗܘ̤ ܠܥܸܙ ܥܡܗ̇ ܒܡܲܡܠܠܵܐ ܐ̄ܚܪܢܐ ܘܨܬܬ̤ ܩܵܠܹܗ. 318 :ܠܵܘ ܠܟܼܝܢܗ̇ ܫܚܠܸܦ ܘܥܒܲܕ ܟܝܵܢܵܐ ܐ̄ܚܪܹܢܵܐ 319 ܐܸܠܵܐ ܡܡܠܠܵܐ ܩ̣ܢܵܐ ܫܘܼܚܠܦܵܐ ܒܹܗ ܒܕܝܢܹܗ. 320 :ܠܡܠܬܐ ܨܒܼܥ ܦܘܼܩܕܵܢܵܐ ܒܣܡܵܐ ܐܚܪܢܵܐ 321 ܘܩܢܬ̤ ܓܵܘܢܵܐ ܘܚܠܦܬ̤ ܩܠܵܐ ܘܬܗܪܬ̤ ܗ̤ܝ ܒܗ̇. 322 :ܢܚܸܬ ܗ̇ܘ ܩܠܵܐ ܕܐܡ̣ܪ ܢܚܘܬ ܗܘ̤ ܘܕܥܲܡܹܗ 323 ܘܐܪܗܸܒܼ ܐܢܘܿܢ ܠܣܕܪ̈ܝ ܐ̄ܢܫ̈ܐ ܕܒܗ̣ܝܠܝܼܢ ܗ̄ܘ̣ܵܘ. 324 :ܢܚܬ ܟܲܕ ܠܵܐ ܢܚܸܬ ܕܠܲܝܬ ܠܹܗ ܐܬܼܪܐ ܕܢܗܠܸܟ ܒܹܗ 325 ܢܚܸܬ ܦܘܩܕܢܹܗ ܘܫܲܡܠܝܼ ܡܠܬܹܗ ܘܗܘ̤ ܐܝܟ ܕܐܝܼܬܼܵܘܗܝ. 326 :ܢܚܸܬ ܟܲܕ ܐܝܼܬܘܗܝ ܨܝܕ ܟܠ ܘܒܼܟܼܠ ܕܠܵܐ ܣܘܼܝܟܼܵܐ 327 ܕܒܡܝܬܬܹܗ ܢܡܟܟ ܐ̄ܢܫܵܐ ܡ̣ܢ ܪܵܡܘܼܬܵܐ. 328 :ܢܚܸܬ ܘܐܲܙܝܼܥܵܗ̇ ܠܚܬ ܠܚܬܝܼܪܘܼܬܼܵܐ ܘܪ̈ܥܝܢܲܝܗܘܿܢ 329 ܘܫܩ̣ܠ ܡܢܗܘܢ ܙܝܢܵܐ ܕܚܘܼܬܪܵܐ ܕܠܒܼܝܼܫܝܼܢ ܗ̄ܘ̣ܵܘ. 330 :ܬܡܗܵܐ ܪܒܵܐ ܢܦ̣ܠ ܡ̣ܢ ܫܠܝܵܐ ܡܲܪ̈ܚܐ 331 ܘܬܸܒܘ ܟܲܕ ܡܬܕܡܪܝܼܢ ܒܐܝܕܐ ܕܓܸܕܫܲܬ̤. 332 :ܚܪܘ ܒܚܕܕ̈ܐ ܟܲܕ ܬܘܝܼܪܝܼܢ ܚܲܕ ܠܘܼܩܵܒܼܵܠ ܚܲܕ 333 ܕܗܢܘܿܢ ܐܢܘܿܢ ܐܘ ܠܲܠܡܵܐ ܟܝ ܚܙܬܵܐ ܐܚ̄ܪܬܼܵܐ. 334 :ܠܥܸܙܘ ܚܲܕ ܥܲܡ ܚܲܕ ܩܠܐ ܕܢܘܟܼܪܵܝ ܠܡܸܠܬܼܵܐ ܕܒܼܗܘܿܢ 335 ܘܠܵܐ ܐܬܡܨܝܬ̤ ܐܕܢܵܐ ܠܡܸܫܡܲܥ ܚܲܝܠܗ ܕܩܵܠܵܐ. 336 :ܫܡܥܝܼܢ ܗ̄ܘ̣ܵܘ ܓܹܝܪ ܫܡܥܵܐ ܕܐܕܢܵܐ ܕܠܐ ܣܘܼܟܵܠܵܐ 337 ܘܚܵܙܝܢ ܗ̄ܘ̣ܵܘ ܬܘܼܒܼ ܪܬܡܵܐ ܕܦܘܼܡܵܐ ܕܠܵܐ ܒܘܼܝܢܵܐ. 338 :ܒܹܝܬ ܦܘܼܠܓܹ̈ܐ ܩܡ̣ܘ ܚܲܠܫܹ̈ܐ ܥܲܠܡܵܐ ܕܗܘ̤ܵܐ 339 ܘܒܟܼܝܢ ܦܓܼܪܐ ܡܬܒܩܝܼܢ ܗ̄ܘ̣ܵܘ ܕܕܵܡ ܠܵܘ ܗܘ̤ܝܘ. 340 :ܚܙܬܐ ܕܦܓܼܪܐ ܫܪܝܼܪܵܐ ܗ̣̄ܘܵܬ ܠܥܝܢܝ̈ ܦܓܼܪܐ 341 ܘܩܠܵܐ ܕܡܠܬܼܵܐ ܢܘܟܪܼܝ ܗ̄ܘ̣ܵܐ ܛܵܒܼ ܠܫܡܥܵܐ ܕܐܸܕܢܵܐ. 342 :ܬܡܝܼ̈ܗܵܢ ܗܘ̣̈ܝ ܥܝ̈ܢܐ ܘܐܕܢ̈ܐ ܚܕܵܐ ܒܚܒܪܬܵܗ̇ 343 ܕܚܕܵܐ ܚܙܝܐ ܘܚܕܐ ܣܡܝܐ ܡ̣ܬ ܒܘܼܝܵܢܵܐ. 344 :ܦܘܼܡܵܐ ܒܫܬܩܵܐ ܡܬܕܡܲܪ ܗ̄ܘ̣ܵܐ ܒܟܢܝ̈ܬܹܗ 345 ܕܐܲܝܟܵܢ ܠܥܙܝܼܢ ܠܥܙܹ̈ܐ ܦܪ̈ܝܫܐ ܘܗܘ̤ ܠܵܐ ܝ̇ܕܥ. 346 :ܬܗܪܵܐ ܘܬܡܗܵܐ ܪܡܹܐ ܗ̄ܘ̣ܵܐ ܒܙܘ̈ܥܐ ܘܒܗܕܡܹ̈ܐ 347 ܘܡܬܕܡܪܝܼܢ ܗ̄ܘ̣ܵܘ ܢܦܫܵܐ ܒܦܓܼܪܐ ܘܦܓܼܪܐ ܒܢܲܦܫܵܐ. 348 :ܢܦܫܵܐ ܒܦܓܼܪܐ ܬܡܝܗܵܐ ܗ̄ܘ̣ܵܬ ܕܫܡ̇ܥ ܘܫܠܹܐ 349 ܘܦܲܓܼܪܵܐ ܒܢܦܫܵܐ ܡܬܕܡܲܪ ܗ̄ܘ̣ܵܐ ܒܢܘܟܼܪܝ ܠܸܥܙܵܗ̇. 350 :ܢܦܫܵܐ ܝܲܬܝܼܪ ܬܡܝܗܵܐ ܗ̄ܘ̣ܵܬ ܗ̤ܝ ܒܩܬܥ ܡܵܗ̇ 351 ܕܡ̇ܢ ܟܲܝ ܫܚܠܸܦ ܩܵܠ ܢܸܥܡ̈ܬܐ ܕܡܠܝܼܠܘܼܬܵܗ̇. 352 :ܐܢܐ ܐܢܐ ܢܦܫܵܐ ܐܘ ܠܵܐ ܐܢܐ ܐܢܐ ܐܡܪܬ̤ ܗ̤ܝ ܠܗ̇ 353 ܕܠܡܵܐ ܐܒܲܪ ܩܢܘܿܡܝ ܩܲܕܡܝܵܐ ܘܒܡ̇ܬ ܒܐܚܪܝܢ. 354 :ܐܘ ܬܕܡܘܼܪܬܵܐ ܕܪܒܐ ܗ̣̄ܝ ܣܲܓܼܝ ܘܟܼܠܵܗ̇ ܬܗܪܐ ܗ̣̄ܝ 355 :ܕܫܡܥܵܐ ܢܦܫܵܐ ܩܵܠ ܢܥܡ̈ܬܹܗ ܘܠܐ ܡܸܣܬܟܠܵܐ 356 :ܐܘ ܚܕܬܬ̈ܐ ܕܨܝܕ ܡܝܘ̈ܬܹܐ ܡܣܬܥܪ݁ܢ ܗܘ̣̈ܝ 357 ܕܟܲܕ ܐܢܘܿܢ ܒܢܲܦܫܵܐ ܘܦܓܼܪܐ ܗ̄ܘ̣ܵܘ ܣܓܼܝ̈ܠܹܐ. 358 :ܐܘ ܡܠ̈ܠܹܐ ܕܐܵܘܒܸܕܘ ܡܸܠܬܐ ܘܐܫܘܲܚܘ ܡ̈ܠܹܐ 359 ܘܡ̣ܢ ܚܲܕ ܡܡܠܠܐ ܕܚܲܕ ܠܫܢܵܐ ܩܢܵܘ ܣܓܝ̈ܐܐ. 360 :ܩ̈ܠܐ ܚܲܕܬܹܐ ܡܬܡܠܠܝܢ ܗ̄ܘ̣ܵܘ ܒܹܝܬ ܐܪ̈ܥܢܹܐ 361 ܘܡܬܕ ܡܪܝܼܢ ܗ̄ܘ̣ܵܘ ܐ̄ܢܫܐ ܒܐ̄ܬܫܵܐ ܒܫܘܼܚܠܵܦ ܩ̈ܠܐ. 362 :ܩܪ̣ܵܘ ܠܚܕ̈ܕܐ ܐ̄ܢܫܐ ܠܐ̄ܢܫܐ ܘܠܐ ܐ̄ܢܫ ܨܵܐܬ̇ 363 ܘܗܘ̤ܬ ܡܠܬܐ ܐܲܝܟ ܠܵܐ ܡܸܠܬܐ ܠܘܵܬ ܡܲܠܠܹ̈ܐ. 364 :ܩܥ̣ܵܐ ܣܘܼܪܚܵܐ ܠܘܵܬ ܝܘܢܝܵܐ ܕܒܥܢܝܼܘܗܝ ܡܸܠܬܐ 365 ܘܠܐ ܦܢܝܼ ܠܹܗ ܡܸܠܲܬ ܦܘܼܡܵܐ ܠܦܘܼܡܵܐ ܚܒܼܪܗ. 366 ܠܥܸܙ ܪܗܘܿܡܵܝܵܐ ܥܲܡ ܡܸܨܪܵܝܵܐ ܠܒܸܫܵܢ ܒܸܣܪܵܐ: pb. f.261r 367 :ܘܠܵܐ ܣܦ̣ܩ ܠܡܦܪܲܫ ܠܸܠܙܵܐ ܕܒܸ̇ܣܪܵܐ ܟܢܵܬܹܗ 368 :ܪܡܲܙ ܡܕܝܵܐ ܠܐ ܠܢܝܵܐ ܕܒܪܘܿܒܼ ܨܐܕܲܝ 369 ܘܫܬܸܩ ܘܐܲܗܡܝܼ ܐܲܝܟ ܠܵܐ ܫܡܲܥ ܕܠܵܐ ܫܡ̇ܥ ܗ̄ܘ̣ܵܐ. 370 :ܩܪܸܒܼ ܗܢܕܘܝܵܐ ܠܘܵܬ ܗܘܢܝܐ ܕܢܣܬܘܕ ܠܹܗ 371 ܘܗܘ̣̈ܝ ܡܠܲܘ̈ܗܝ ܝܬܝܼܪ̈ܬܐ ܘܠܵܐ ܐܬܘܩܲܠ. 372 :ܗܘ̤ ܥܲܡ ܢܦܲܫܹܗ ܬܪܓܸܡ ܟܠܢܵܫ ܐܲܝܟ ܠܸܫܵܢܹܗ 373 ܘܗ̤ܘ ܦܫܸܩ ܠܹܗ ܚܹܝܠ ܣܘܼܟܠܵܐ ܕܣܡ ܒܹܗ ܪܸܡܙܵܐ. 374 :ܠܐܝܘ ܘܐܬܦܫܚܘ ܟܲܕ ܩ̇ܥܹܝܢ ܗ̄ܘ̣ܵܘ ܚܲܕ ܨܝܕ ܚܒܼܪܹܗ 375 ܘܠܵܐ ܝܗܒ̣ܘ ܐܓܼܪܐ ܕܡܠܲܬܼ ܦܘܼܡܵܐ ܩܠܵܐ ܠܩܠܵܐ. 376 :ܒܚܸܒܠܵܐ ܕܚܲܫܵܐ ܡܬܢܓܼܕܝܢ ܗ̄ܘ̣ܵܘ ܐܲܝܟ ܝܵܠܕܬܵܐ 377 ܘܠܵܐ ܣܦܩܵܐ ܗ̄ܘ̣ܵܐ ܢܦܫܵܐ ܕܬܵܘܠܸܕ ܥܘ̤ܠܐ ܕܡܸܠܬܐ. 378 :ܒܕܡܘܼܬ ܥܘ̤ܠܐ ܡܬܗܦܟ ܗ̄ܘ̣ܵܐ [ܡܕܡ] ܡܡܠܠܵܐ ܒܢܲܦܫܵܐ 379 ܘܐܚܝܼܕܝܢ ܗ̄ܘ̣ܵܘ ܬܪ̈ܥܲܝ ܦܘܼܡܵܐ ܩܕܼܵܡ ܡܲܦܩܬܹܗ. 380 :ܗ̇ܘ ܦܘܼܩܕܢܵܐ ܕܐܘܠܸܕ ܡܠܬܼܵܐ ܒܪܸܥܝܵܢ ܢܦܫܵܐ 381 ܗܘ̤ܝܘ ܕܐܲܚܕܹܗ ܠܬܪܥܵܐ ܒܲܐܦܹܝ̈ܗ̇ ܕܠܐ ܬܘܼܒܼ ܬܸܦܘܿܩ. 382 :ܡܠܬܐ ܫܬܩ ܒܓܼܵܘ ܚܘܫ̈ܒܐ ܘܐܘܥܝܼ ܡܸܠܬܼܵܐ 383 ܗܘ̤ܝ ܗ̣̄ܝ ܕܫܬܩܲܬ̤ ܗܘ̤ܝ ܗ̣̄ܝ ܕܥܬ̤ ܒܓܼܵܘܢܵܐ ܐ̄ܚܪܹܢܵܐ. 384 :ܚܕܵܐ ܗ̄ܘ̣ܵܬ ܡܠܵܬܐ ܗ̇ܝ ܕܐܬܠܓܲܬ̤ ܠܡܢܘ̈ܬܐ 385 ܘܡܸܢܗ̇ ܐܦܪܲܥ ܠܫܵܢ ܥܲܡܡܹ̈ܐ ܒܕܡܘܼܬ ܫܲܒܸܛܵܐ. 386 :ܒܕܡܘܼܬ ܣ̇ܬܐ ܦܪܣܬ̤ ܣܘܟܹ̈ܝܗ̇ ܠܟܼܠ ܐܲܬܼܪ̈ܘܵܢ 387 ܘܗ̤ܝ ܐܝܟ ܕܐܝܼܬܹܝܗ̇ ܩܘܝܼ ܚܲܝܠܵܗ̇ ܒܥܸܩܵܪ ܢܲܦܫܵܐ. 388 :ܐܝܟ ܥܸܩܪܵܐ ܩܘܝܼ ܡܲܡܠܠܵܐ ܨܝܕ ܚܲܕ ܥܲܡܵܐ 389 ܘܗܘ̤ ܒܠܚܘܼܕܵܘܗܝ ܐܬܚܫܲܝܝ ܒܹܗ ܒܗ̇ܘ ܩܕܡܝܵܐ. 390 :ܐܝܟ ܕܒܦܨ̈ܐ ܦܠܠܓܼ ܐܸܢܘܿܢ ܦܘܼܩܕܵܢ ܟܲܣܝܵܐ 391 ܘܡܲܠܸܠ ܟܠܢܵܫ ܒܦܨܬܵܐ ܕܡܸܠܬܐ ܕܣܠܩܲܬ̤ ܒܲܫܡܹܗ. 392 :ܚܘܼܒܵܐ ܘܪ̈ܲܚܡܹܐ ܡܙܝܼܓܼܝܼܢ ܗ̄ܘ̣ܵܘ ܒܗ ܒܗ̇ܘ ܘܟܼܠܦܓܼܵܐ 393 ܘܟܲܕ ܛܵܒܼ ܦܲܠܸܓܼ ܠܵܐ ܣܕܩ̣ ܚܘܼܒܵܐ ܕܣܝܼܡ ܒܲܟܼܝܢܵܐ. 394 :ܚܕܵܐ ܓܝܪ ܦܨܬܵܐ ܡܛܬ̤ ܠܐܒܗܹ̈ܐ ܘܠܝܠܕܲܝܗ̈ܘܿܢ 395 ܘܒܚܕܵܐ ܡܸܠܬܵܐ ܡܲܠܸܠ ܕܲܒܼܪܐ ܘܐܲܢ̄ܬܬܹܗ ܘܲܒܼܢܵܘ̈ܗܝ. 396 :ܒܚܵܟܼܡܵܐ ܘܚܘܼܒܵܐ ܣܲܥܪܗ̇ ܠܗܵܕܹܐ ܗܘ̤ ܡܬܩܢ ܟܠ 397 ܕܠܵܐ ܢܸܫܬܚܲܛ ܟܝܢܵܐ ܘܛܟܼܣܐ ܕܫܵܘܬܦܘܼܬܵܐ. 398 :ܒܛܟܼܣܵܐ ܪܲܒܵܐ ܦܠܓܼ ܐܸܢܘܿܢ ܘܐܲܫܘܝܼ ܐܸܢܘܿܢ 399 ܒܕܡܘܼܬ ܐܲܒܼܵܐ ܕܡܘܪܸܬ ܠܲܒܢܵܘ̈ܗܝ ܥܘܼܬܼܪܵܐ ܕܩܢܐ. 400 :ܒܐܣܟܝܡ ܓܡܬܐ ܝܲܗ̄ܒܹܗ ܠܥܘܼܬܪܐ ܕܒܲܣܝܼܡܘܼܬܗ 401 ܕܢܪܡܹܐ ܩܸܢܛܵܐ ܒܝܪ̈ܬܹܐ ܕܢܣܒܼܘ ܚܹܝܠ ܚܟܼܡ̈ܬܹܗ. 402 :ܘܟܲܕ ܛܵܒܼ ܪܘܓܼܙܵܐ ܡܠܹܐ ܗ̄ܘ̣ܵܐ ܩܵܠܵܐ ܗ̇ܘ ܕܬܵܘ ܢܸܚܘܿܬ 403 ܫܝܢܵܐ ܠܦܓ ܠܲܒܢܝ̈ܫܵܐ ܒܝܲܕ ܡܲܚܬܬܹܗ. 404 :ܐܬ̤ܐ ܕܫܲܝܢܵܐ ܐܫܬܘܕܝܼ ܗ̄ܘ̣ܵܐ ܠܢܘܿܝܝ ܘܠܙܪܥܹܗ 405 ܘܫܚܠܸܦ ܩܵܠܵܐ ܒܐܣܢܹܝܡ ܪܘܼܓܼܙܵܐ ܠܕܘܼܚܵܠ ܐ̄ܢܫ̈ܐ. 406 :ܐܣܟܝܡ ܣܲܝܦܲܐ ܘܩܣܛܘܢܪܵܐ ܥܛܝܼܦ ܗ̄ܘ̣ܵܐ ܩܵܠܵܐ 407 ܘܡ̣ܢ ܕܐܪܝܼܡܹܗ ܐܝܟ ܕܠܡܩܛܠ ܚܲܡܠܹܗ ܒܪ̈ܲܚܡܹܐ. 408 :ܠܵܐ ܗ̄ܘ̣ܵܐ ܠܡܩܛܠ ܐܪܝܼܡ ܣܲܝܦܹܗ ܘܚܲܘܝܼ ܐܸܢܘܿܢ 409 ܐܠܵܐ ܕܢܵܘܕܲܥ ܕܠܵܐ ܗܢܝܼ ܠܹܗ ܕܢܸܚܙܹܐ ܥܘ̣ܠܵܐ. 410 :ܠܵܘ ܥܲܠ ܕܒܢ̣ܘ ܒܢܝܵܢ ܥܘ̣ܠܐ ܦܠܓܼ ܐܸܢܘܿܢ 411 ܐܠܵܐ ܕܢܸܪܕܘܿܦ ܥܵܘܼܠܵܐ ܕܒܼܗܘܿܢ ܒܝܲܕ ܦܘܼܠܵܓܼܵܐ. 412 :ܡܼܢ ܫܘܼܪܝܵܐ ܣܝܼܡܵܐ ܗ̄ܘܼܵܬ ܠܹܗ ܗܕܐ ܕܣܥ݂ܪ 413 ܘܣܥܪܗܿ ܒܚܟܼܡܵܐ ܐܝܟ ܡܵܐ ܕܡܼܥܵܕ ܠܡܣܥܪ ܫܲܦܝܼܪ. 414 :ܝܵܕܥ ܗܼ̄ܘܵܐ ܓܹܝܪ ܩܕܵܡ ܕܢܬܩܸܢ ܡܠܬܵܐ ܒܢܲܦܫܵܐ 415 ܕܡܪܕܐ ܡܢܗܿ ܒܬܲܪ ܙܒܼܢܵܐ ܬܦܵܐ ܕܡܠܹ̈ܐ. 416 ܡܦܠܓܼ ܗ̄ܘܼܵܐ ܠܹܗ ܗܵܢ ܦܘܼܠܵܓܼܵܐ ܩܕܵܡ ܟܠܡܸܕܸܡ: pb. f.261v 417 ܘܒܹܗ ܚܿܐܪ ܗܼ̄ܘܵܐ ܥܲܕܠܵܐ ܢܸܗܘܘܿܢ ܫܡܲܝܵܐ ܘܐܲܪܥܵܐ. 418 :ܠܵܘ ܚܘܫܒܼܵܐ ܚܲܕܬܵܐ ܢܓܼܕܗ ܠܘܵܬ ܦܘܼܠܓܵܐ 419 ܘܠܵܐ ܗ̄ܘܼܵܐ ܚܡܬܵܐ ܙܟܼܬܹܗ ܘܢܚܸܬܼ ܘܝܗܼܒܼ ܠܸܫܢ̈ܐ. 420 :ܒܐܸܣܟܹܝܡ ܚܡܬܵܐ ܡܥܵܕ ܕܢܕܚܸܠ ܠܒܢܲܝ̈ ܒܲܝܬܹܗ 421 ܐܝܟ ܡܵܐ ܕܣܥ̣ܪ ܡ̣ܢ ܫܘܼܪܝܵܐ ܠܕܒܹܝܬ ܐܵܕܼܵܡ. 422 :ܐܵܦ ܓܹܝܪ ܬܲܡ̇ܢ ܒܥܠܬܼ ܦܐܪܐ ܐܥܸܠ ܡܵܘܬܵܐ 423 ܕܢܐܠܸܦ ܐܢܘܿܢ ܠܡܹܐ ܚܲܕ ܥܲܡ ܕܲܪܵܐ 424 :ܚܘܬܚ̈ܬܹܐ ܐܦ ܛܘܦܢܵܐ ܒܥܠܲܬ ܥܘ̣ܠܵܐ ܐܡ̣ܪ ܕܥܒܼܕ 425 ܕܢܪܡܐ ܦܓܘܕ̈ܐ ܒܟܼܝܵܢ ܐ̄ܢܫܵܐ ܕܠܵܐ ܢܸܬܒܥܲܪܲܪ. 426 :ܡܸܛܠ ܥܘ̣ܠܵܐ ܠܵܛܹܗ ܠܟܼܢܥܢ ܘܥܲܒܼܕܗ ܥܲܒܼܕܵܐ 427 ܕܠܵܐ ܐ̄ܢܫ ܢܗܸܠ ܡܲܪܚܐܝܼܬ ܒܐܒܼܵܐ ܕܝܠܕܹܗ. 428 :ܒܗܕܐ ܬܢܘܵܝ ܢܚܸܬ ܐܵܦ ܗܵܫܵܐ ܨܝܕ ܥܲܦܪ̈ܢܹܐ 429 ܕܒܐܣܟܝܡ ܩܠܵܐ ܕܦܘܼܠܵܓܼ ܐܢܫܵܐ ܢܫܝܢ ܐ̄ܢܫܐ. 430 :ܡܸܛܠ ܫܲܝܢܵܐ ܢܚܸܬ ܨܒܝܢܹܗ ܐܝܛ ܗ̇ܘ ܕܲܢܚܸܬ 431 ܘܫܝܢ ܐ̄ܢܫ̈ܐ ܕܟܢܝܼܫܝܼܢ ܗ̄ܘ̣ܵܘ ܐܲܝܟ ܕܠܪܘܓܼܙܵܐ. 432 :ܚܙ̣ܵܐ ܕܚܦܝܼܛܝܼܢ ܠܡܒܼܢܵܐ ܡܸܪܕܵܐ ܡܲܪܚܵܐܝܼܬ 433 ܘܢܚܸܬ ܣܬܪܹܗ ܠܒܢܝܵܢ ܥܘ̣ܠܵܐ ܥܲܕܠܵܐ ܢܥܫܢ. 434 :ܚܙ̣ܵܐ ܕܪܗܝܼܒܝܼܢ ܠܡܣܥܐ ܠܪܵܘܡܵܐ ܠܡܸܣܲܩ ܨܐܕܵܘܗܝ 435 ܘܐܫܡܲܥ ܩܠܐ ܘܒܲܕܲܪ ܐܢܘܿܢ ܕܠܵܐ ܢܸܫܬܲܚܩܘܼܢ. 436 :ܦܩ̣ܕ ܐܲܝܟ ܡܲܠܟܵܐ ܕܝܼܢܵܐ ܥܲܠ ܣܵܪ̈ܘܿܚܹܐ 437 ܘܫܕܼܵܐ ܐܢܘܿܢ ܠܐܟܣܘܼ[...] ܕܐܬܪ̈ܘܬܼܵܐ. 438 :ܢܦ̣ܩ ܦܘܼܩܕܢܵܐ ܕܪܸܡܙܵܐ ܟܣܝܵܐ ܐܲܝܟ ܫܲܠܝܼܛܵܐ 439 :ܘܐܸܣܲܪ ܐܢܘܿܢ ܒܙܲܝܢܵܐ ܩܲܫܝܵܐ ܕܠܲܫܢܲܝ̈ܗܘܿܢ 440 :ܡܠܬܼܵܐ ܐ̄ܚܪܬܵܐ ܐܪܡܝܼ ܒܦܘܼܡܗܘܿܢ ܐܲܝܟ ܫܫܠܬܐ 441 ܘܚܒܲܫ ܐܢܘܿܢ ܒܒܹܝܬ ܐܣܝܪ̈ܐ ܕܠܫܢܲܝ̈ܗܘܿܢ. 442 :ܐܝܟ ܕܠܚܣܢܹ̈ܐ ܫܕܲܪ ܐܢܘܿܢ ܠܐܢܪ̈ܘܵܬܼܵܐ 443 ܕܠܵܐ ܬܘܼܒܼ ܢܩܝܼܡܘܿܢ ܡܸܪܕܵܐ ܕܥܘ̣ܠܵܐ ܥܲܠ ܡܪܘܬܹܗ. 444 :ܡܡܠܠܐ ܚܕܬܵܐ ܠܒܝܼܟ ܗ̄ܘ̣ܵܐ ܪܸܡܙܵܐ ܒܲܕܡܘܼܬ ܫܒܼܛܵܐ 445 ܘܛܲܪܕ ܗ̄ܘ̣ܵܐ ܠܗܘܿܢ ܡ̣ܢ ܓܘܒܵܒܸܠ ܐܲܝܟ ܕܒܪܘܼܓܼܙܵܐ. 446 :ܟܡܵܐ ܕܡ̇ܐ ܗ̄ܘ̣ܵܐ ܗܵܢ ܦܘܼܩܕܵܢܵܐ ܕܥܲܠ ܡܪ̈ܚܹܐ 447 ܠܗ̇ܘ ܦܘܼܩܕܵܢܵܐ ܕܐܲܦܸܩ ܠܐܕܵܡ ܡ̣ܢ ܦܪܕܝܣܵܐ. 448 :ܐܝܟ ܕܒܼܚܡܬܼܵܐ [...] ܐܦܸܩ ܐܸܢܘܿܢ ܠܗܘܿܢ ܥܲܡ ܐܵܕܸܵܡ 449 ܕܒܼܐܕܵܡ ܘܒܼܗܘܿܢ ܢܫܝܼܢ ܐܪܥܵܐ ܠܚ̈ܝܹܐ ܕܐ̄ܢܫܐ. 450 :ܒܗܕܐ ܬܹܢܘܝܵ ܒܕܲܪ ܐܢܘܿܢ ܒܐܬܪ̈ܘܵܬܼܵܐ 451 ܕܠܵܐ ܢܸܙܕܠܗܲܝ ܥܘܡܪܐ ܕܐܪܵܥܵܐ ܡܣܓܐ ܩܛܠܐ. 452 :ܐܠ̣ܘ ܩܘܝܼܘ ܒܲܚܕܵܐ ܕܘܼܟܵܐ ܐܲܝܟ ܕܐܬܪܥܝܼܘ 453 ܣܵܓ̇ܝܹܢ ܗ̄ܘ̣ܵܘ ܛܵܒܼ ܘܣܵܥܹ̇ܝܢ ܠܕܡܵܐ ܒܪܓܲܬܼ ܐܪܥܵܐ. 454 :ܐܠ̣ܘ ܟܬܪܘ ܒܐܪܥ ܒܵܒܸܠ ܡܓܕܠ ܡܪܕܐ 455 ܡܪܕܝܼܢ ܗ̄ܘ̣ܵܘ ܒܵܗ̇ ܥܲܠ ܟܐܢܘܼܬܼܵܐ ܐܝܟ ܪܓܲܬܗܘܿܢ. 456 :ܐܠ̣ܘ ܠܵܐ ܝܗ̣ܒ ܐܦܦܣܝܼܣ ܥܲܠ ܒܘܼܕܪܗܘܿܢ 457 ܥܘ̣ܠܵܐ ܥܦܝܼܦܵܐ ܡܬܬܘܣܲܦ ܗ̄ܘ̣ܵܐ ܒܒܹܝܬ ܡܥܡܪܗܘܿܢ. 458 :ܫܦܝܼܪ ܡܕܝܢ ܠܦܲܓ ܐܢܘܿܢ ܘܒܲܕܲܪ ܐܸܢܘܿܢ 459 ܕܠܵܐ ܟܢܝܼܫܘܼܬܗܘܿܢ ܬܣܓܹܐ ܥܘ̣ܠܵܐ ܘܬܸܕܠܘܿܝܝ ܫܝܢܵܐ. 460 :ܒܦܩ̣ܘ ܡ̣ܢ ܒܒܸܠ ܠܡܦܠܲܝܝ ܐܪܥܵܐ ܕܐܫܬܕܲܪܘ ܠܵܗ̇ 461 ܘܟܼܠ ܚܲܕ ܡܸܢܗܘܿܢ ܐܫܩܸܠ ܠܐܬܪܵܐ ܕܣܵܡܹܗ ܪܸܡܙܵܐ. 462 :ܐܝܟ ܗܕܝܼܠܵܐ ܗܘ̤ܵܐ ܠܗܘܿܢ ܕܲܡܙܵܐ ܐܲܠܵܗܵܝܵܐ 463 ܘܚܵܘܝܼ ܐܢܘܿܢ ܫܒܝܼܠ ܡܪܕܝܼܬܼܵܐ ܕܠܟܼܠ ܦܸܢ̈ܝܵܢ. 464 :ܠܗܘܿܢ ܐܬܠܘܝܼ ܗ̇ܘ ܦܘܼܫܕܵܢܵܐ ܕܦܠܸܓ ܐܸܢܘܿܢ 465 ܡܡܗܘܿܢ ܫܢܝܼ ܠܐܬܼܪ̈ܘܬܐ ܕܒܹܝܬܼ ܡܲܥܡܪܗܘܿܢ. 466 :ܒܕܡܘܼܬ ܪܲܒܵܐ ܗܘ̤ܵܐ ܠܗܘܿܢ ܪܡܙܵܐ ܠܫܒܼܪ̈ܝ ܠܸܒܵܐ 467 ܘܚܟܸܡ ܐܢܘܿܢ ܠܡܥܡܪ ܒܐܲܪܥܵܐ ܕܐܫܬܕܲܪܘ ܠܵܗ̇. 468 :ܣܦܪܐ ܡܗܝܪܐ ܟܬܲܒܼ ܥܲܠ ܠܘܚܹ̈ܐ ܕܪ̈ܥܝܢܲܝܗܘܿܢ 469 ܘܐܠܸܦ ܐܢܘܿܢ ܠܡܸܩܪܵܐ ܫܲܦܝܼܪ ܒܡܸܠܬܼܵܐ ܕܒܼܗܘܿܢ. 470 ܩܪ̣ܘ ܘܐܸܬܼܗܓܵܘ ܒܟܬܝܼܒ̈ܬܐ ܕܚܘܼܫܒܲܝ̈ܗܘܿܢ: pb. f.262r 471 ܘܦܫܩܘ ܚܲܝܠܵܐ ܕܟܼܣܐ ܒܡܲܡܡܠܠܵܐ ܕܠܫܢܲܝ̈ܗܘܿܢ. 472 :ܗܘ̤ܘ ܪ̈ܒܢܹܐ ܠܡܡܠܠܵܐ ܚܲܕܬܵܐ ܕܐܵܘܠܸܕ ܠܸܒܗܘܿܢ 473 ܘܣܡ̣ܘ ܩܢܘܢܹ̈ܐ ܠܕܘܒܵܪ ܚܝܹ̈ܐ ܐܪ̈ܥܢܝܹܐ. 474 ܥܲܡܹܗ ܕܡܡܠܠܐ ܩܢܵܘ ܢܘܣܦܬܼܵܐ ܠܡܚܐ ܒܛܟܼܣܵܐ. 475 ܘܫܪܝܼܘ ܗܪܓܝܼܢ ܒܫܦܝܼܪ̈ܬܐ ܕܦܓܼܪܐ ܘܢܲܦܫܵܐ. 476 :ܠܝܘܬܪܢ ܡܕܝܢ ܗܘ̤ܬ ܗ̇ܝ ܕܲܗܘ̤ܬ ܒܐܣܟܹܝܡ ܚܡܵܬܐ 477 ܘܚܟܝܡܐܝܼܬ ܣܥܪܵܗ̇ ܛܒܼܵܐ ܨܝܕ ܒܝܼܫܘܬܢ. 478 :ܚܘܼܒܵܐ ܘܪ̈ܚܡܹܐ ܡܠܝܵܐ ܟܠܗ̇ ܘܠܵܐ ܐ̄ܢܫ ܝ̇ܕܥ 479 ܘܥܠܲܬܼ ܫܝܢܵܐ ܗ̣̄ܝ ܠܒܢܝ̈ܢܫܐ ܘܠܪ̈ܘܚܢܹܐ. 480 :ܡܠܘܠܵܐ ܕܫܲܝܢܵܐ ܝܗ̣ܒ ܦܘܠܓܼܐ ܕܒܠܫܢܹ̈ܐ 481 ܘܥܬܲܪܘ ܡܢܹܗ ܐܪ̈ܥܢܝܹܐ ܘܫܡܝܢܹ̈ܐ. 482 :ܚܙ̣ܵܘ ܪ̈ܘܚܢܹܐ ܚܘܼܒܵܐ ܕܚܵܘܝܼ ܛܒܼܵܐ ܠܓܸܢܣܲܢ 483 ܘܩܢ̣ܘ ܣܒܼܪܐ ܕܐܝܬ ܗ̄ܘ̣ ܣܒܼܪܐ ܠܐܒܼܝܼܕܘܼܬܲܢ. 484 :ܚ̣ܙܵܘ ܕܬܫܢܚܠܦ ܩܵܠ ܠܘܵܚܵܡܵܐ ܠܘܵܬ ܢܝܼܚܘܼܬܵܐ 485 ܘܗܦܟܼܘ ܢܓܼܕܹ̈ܐ ܗܘ̤ܘ ܒܘܣܡܵܐ ܠܡܬܢܓܕܢܹ̈ܐ. 486 :ܢܓܕ̈ܐ ܩܫܝ̈ܐ ܡܠܹܐ ܗ̄ܘ̣ܵܐ ܩܠܐ ܗ̇ܘ ܕܬܵܘ ܢܚܘܬ 487 ܘܗܦܟܘܼܗܝ ܪ̈ܚܡܹܐ ܘܢܚܸܬܘ ܦܠܓܼܘ ܕܫܢܹ̈ܐ ܕܫܲܝܢܵܐ. 488 :ܫܝܢܵܐ ܦܠܓܼ ܒܐܸܣܟܹܝܡ ܚܡܬܼܵܐ ܪܵܚ̇ܡ ܐ̄ܢܵܫܐ 489 ܕܕܠܡܵܐ ܢܪܢܘܲܢ ܒܢܲܝ̈ ܚܸܪܝܒܵܐ ܕܪܚ̇ܡ ܥܘ̣ܠܵܐ ܗ̄ܘ̣. 490 :ܪܗܒܼܘܢ ܚ̈ܝܐ ܡܙܓ ܥܲܡ ܩܵܠܵܐ ܘܐܫܩܝܼ ܐܸܢܘܿܢ 491 ܕܢܨܘܪ ܐܪܙܐ ܕܗ̇ܝ ܕܥܬܼܝܼܕܼܵܐ ܒܫܘܼܠܵܡ ܙܘܒܼܢܹ̈ܐ. 492 :ܐ̄ܪܙܐ ܨܵܪ ܒܹܗ ܒܗܵܢ ܦܘܼܠܓܼܵܐ ܕܒܐܣܟܹܝܡ ܚܸܡܥܬܼܵܐ 493 ܕܗ̇ܝ ܡܘܗܲܒܼܬܼܵܐ ܕܝܼܗܒ̣ ܠܫܠܝܼܚܹ̈ܐ ܒܐܣܟܹܝܡ ܢܘܼܪܵܐ. 494 :ܗ̇ܝ ܕܥܬܼܝܼܕܼܵܐ ܩܕܡ ܒܕܸܩ ܒܗܵܕܹܐ ܕܗܘ̤ܬ 495 ܕܡܵܐ ܕܡܬܥܓܝܐ ܠܵܐ ܬܬܢܟܼܪܹܐ ܠܥܝܢ ܚܙ̈ܝܹܐ. 496 :ܥܬܝܼܪ ܗ̄ܘ̣ܵܐ ܕܢܓܠܐ ܩܢܘܿܡܹ̈ܐ ܕܥܲܡܹܗ ܒܠܫܵܢ ܐ̄ܢܵܫܵܐ 497 ܘܝܗܒ̣ ܠܫܢܹ̈ܐ ܐܝܟ ܠܫܢܹ̈ܐ ܐܝܟ ܪܗܒ̣ܘܢܵܐ. 498 :ܐܘܼܪܚܵܐ ܕܫܵܝܢܵܐ ܕܪܫ̣ ܠܲܢ ܩܵܠܵܐ ܕܦܠܓ ܐ̄ܢܫܐ 499 ܕܢܪܕܹܐ ܠܘܥܕܵܐ ܕܠܡܐܹܝܢ ܫܝܢܵܐ ܕܐܲܠܗܘܼܬܼܵܐ. 500 :ܒܘܿܕܵܩ ܩܢܘܿܡܹ̈ܐ ܕܒܼܪܐ ܘܪܘܼܚܵܐ ܓ̣ܠܐ ܘܐܠܸܦ ܠܲܢ 501 ܕܥܡܹܗ ܕܐܒܼܵܐ ܦܠܓܼܘ ܥܡܡܹ̈ܐ ܘܝܗ̣ܒܘ ܠܫܢܹ̈ܐ. 502 :ܗܢܘܿܢ ܦܠܓܼܘ ܗ̇ܘ ܦܘܼܠܓܼܵܐ ܕܒܐܣܟܹܝܡ ܪܘܼܓܼܙܵܐ 503 ܘܗܢܘܿܢ ܬܘܼܒ ܝܗܒ̣ܘ ܚܲܝܠܵܐ ܕܡܢܗܘܿܢ ܒܚܸܙܘܵܐ ܕܢܘܼܪܵܐ. 504 :ܚܹܝܠ ܐܝܼܬܘܬܐ ܝܼܠܸܦܘ ܡܝܘ̈ܬܹܐ ܡ̣ܢ ܬܪܬܝܗܹܝܢ 505 ܕܕܝܼܠܹܗ ܐܢܹܝܢ ܩܕܡܝ̈ܬܐ ܘܐ̄ܚܪ̈ܝܬܐ. 506 :ܠܹܗ ܚܝܒܝܼܢ ܚܕܵܐ ܬܵܘܕܝܼܬܼܵܐ ܠܗ̇ܘ ܡܬܩܸܢ ܟܠ 507 ܕܚܘܝܼ ܚܘܼܒܹܗ ܘܚܲܟܸܡ ܐܢܘܿܢ ܒܲܣܬܝܼܪ̈ܬܹܗ܀