Narsai: On Joseph - ܥܲܠ ܝܵܘܣܸܦ ܟܲܕܼ ܙܲܒܿܢܘܼܗܝ ܐܲܚܵܘ̈ܗܝ

1 :ܪܸܚܡܲܬܼ ܟܹܐܢܹ̈ܐ ܩܪܵܬܲܢܝܼ ܕܐܸܚܙܘܿܩ ܒܲܫܒܼܝܼܠ ܟܹܐܢܹ̈ܐ 2 ܘܐܸܪܕܸܿܐ ܒܗܵܘܢܵܐ ܒܐܘܼܪܚܵܐ ܫܦܝܼܪܬܼܵܐ ܕܕܼܘܼܒܵܪ̈ܲܝܗܘܿܢ ܀ 3 :ܚܘܼܒܿܗܘܿܢ ܓܲܪܓܲܢܝ ܐܲܝܟ ܕܲܠܫܲܒܼܪܵܐ ܠܘܵܬܼ ܝܘܼܠܦܵܢܵܐ 4 ܕܩܘܼܡ ܒܲܛܝܼܠܵܐ ܚܙܘܿܩ ܒܲܠܘܝܼܬܼܵܐ ܕܥܲܡ ܟܲܫܝܼܪܹ̈ܐ ܀ 5 :ܨܼܡܚܵܐ ܦܲܐܝܝܵܐ ܕܕܘܼܒܵܪ̈ܲܝܗܘܿܢ ܬܪܝܼܨ ܠܝܼ ܢܝܼܫܵܐ 6 ܕܐܸܚܢܸܐ ܠܩܘܼܒܼܠܹܗ ܒܝܲܕܼ ܦܸܬܼܓܼܵܡܲܝ̈ ܐܸܢ ܡܸܫܟܲܚ ܐ̄ܢܵܐ ܀ 7 :ܒܢܸܨܚܵܢܲܝ̈ܗܘܿܢ ܪ̈ܘܼܚܵܢܵܝܹܐ ܬܗܲܪܘ ܚܘܼܫܵܒܲܝ̈ 8 ܕܲܟܼܡܵܐ ܥܲܙܝܼܘ ܘܠܵܐ ܐܸܬܼܪܲܦܝܼܘ ܩܕܼܵܡ ܕܲܡܥܝܼ̈ܩܵܢ ܀ 9 :ܒܡܵܝܘܿܬܼܘܼܬܼܵܐ ܕܲܠܒܼܝܼܫܝܼܢ ܗ̄ܘ̣ܵܘ ܡܸܬܼܒܲܩܸܐ ܗ̄ܘܹ̇ܝܬܼ 10 ܕܐܲܝܟܲܢ ܙܵܟܹ̇ܐ ܦܲܓܼܪܵܐ ܫܝܼܛܵܐ ܘܚܵܣܹ̇ܢ ܚܲܫܵܘ̈ܗܝ ܀ 11 :ܠܲܝܬܿ ܠܲܟܼܝܵܢܵܐ ܥܲܦܪܵܢܵܝܵܐ ܠܡܸܙܟܵܐ ܒܕܼܝܼܠܹܗ 12 ܘܐܲܝܟܲܢ ܥܲܙܝܼܘ ܦܲܓܼܪ̈ܵܢܵܝܹܐ ܒܐܵܓܼܘܿܢ ܪܘܼܚܵܐ ܀ 13 :ܠܵܐ ܡܨܸܐ ܒܸܣܪܵܐ ܠܡܸܬܼܢܲܨܵܚܘܼ ܒܚܹܝܠ ܗܲܕܵܡܹ̈ܐ 14 ܘܡܲܢ ܟܲܝ ܚܲܗ̣̄ܒܼ ܠܹܗ ܠܲܡܚܝܼܠ ܚܲܝܠܵܐ ܙܵܟܼܘܼܬܼܵܐ ܀ 15 :ܪܸܡܙܵܐ ܕܓܼܒܼܠܹܗ ܡ̣ܢ ܕܲܚܝܼܚܵܐ ܘܲܩܪ̣ܵܝܗܝ ܨܲܠܡܹܗ 16 ܗܘ̤ ܐܲܫܪܝܼ ܒܹܗ ܚܹܝܠ ܟܸܪܼ̈ܡܵܬܼܵܐ ܘܚܵܣܹ̇ܝܢ ܚܲܫܵܘ̈ܗܝ ܀ 17 :ܡ̇ܪܵܐ ܕܥܲܒܼ݂ܕܕܹܿܗ ܕܢܸܗܘܸܐ ܡ̇ܪܵܐ ܠܲܟܼܢܵܘܵܬܹ̈ܐ 18 ܗܘ̤ ܝܲܗ̣̄ܒܼ ܚܲܝܠܵܐ ܒܲܡܝܼܠܘܼܬܹܗ ܘܙܲܟܿܝܹܗ ܒܚܲܝܠܹܗ ܀ 19 :ܒܚܹܝܠ ܥܘܼܕܼܪܵܢܵܐ ܐܲܠܵܗܵܝܵܐ ܢܨܲܚ̣ܘ ܐܲܬܼܠܹܝܛܹ̈ܐ 20 ܘܝܲܗ̣̄ܒܼ ܠܹܗ ܛܵܒܼܵܐ ܠܚܹܝܠ ܥܘܼܕܼܪܵܢܹܗ ܠܨܸܒܼܝܵܢܲܝ̈ܗܘܿܢ ܀ 21 :ܒܕܼܝܼܠܹܗ ܙܲܟܿܝܼ ܠܲܒܼܢܲܝ̈ ܒܲܝܬܹܿܗ ܕܲܪܚܸܡ̣ܘ ܚܘܼܒܹܿܗ 22 ܘܐܲܩܨܹܗ ܒܚܘܼܒܵܐ ܠܪܲܒܿܘܼܬܼ ܚܲܝܠܹܗ ܥܲܠ ܥܲܡܠܲܝ̈ܗܘܿܢ ܀ pb. 266 23 :ܐܲܪܡܝܼ ܡܠܘܿܠܵܐ ܕܙܵܘܥܹܗ ܟܲܣܝܵܐ ܒܙܵܘܥܹ̈ܐ ܕܲܒܼܗܘܿܢ 24 ܘܚܲܦܸܛ ܐܸܢܘܿܢ ܠܡܸܬܿܬܲܓܵܪܘܼ ܒܟܸܣܦܵܐ ܕܡܸܠܵܘ̈ܗܝ ܀ 25 :ܩܲܨ̣ ܕܹܝܢܵܪܵܐ ܠܐܲܒܼܪܵܡ ܘܠܐܝܼܣܚܵܦܩ ܘܲܒܼܪܹܗ ܝܲܥܩܘܿܒܼ 26 ܕܢܸܗܘܘܿܢ ܦܵܠܚ̇ܝܼܢ ܪܘܼܚܵܢܵܐܝܼܬܼ ܒܟܲܪܡ̇ܐ ܕܚܘܼܒܹܿܗ ܀ 27 :ܬܠܵܬܼܵܐ ܦܵܥܠܹ̈ܐ ܓܼܒ̣ܵܐ ܒܵܪܘܿܝܵܐ ܠܦܘܼܠܚܵܢ ܟܲܪܡܹܗ 28 ܘܲܒܼܡܸܢܝܵܢܗܘܿܢ ܓܠ̣ܵܐ ܒܘܼܕܵܩܵܐ ܕܫܸܡ ܐܝܼܬܼܘܼܬܹܗ ܀ 29 :ܐܲܠܸܦ ܐܸܢܘܿܢ ܠܡܸܦܠܲܚ ܥܲܡܹܗ ܐܲܝܟ ܨܼܒܼܝܵܢܹܗ 30 ܘܐܲܡܝܼܘ ܟܸܣܦܹܗ ܥܲܠ ܦܵܬܼܘܿܪܵܐ ܕܙܵܘܥܲܝ̈ ܢܲܦܫܵܐ ܀ 31 :ܟܲܢܸܫܘ ܦܹܐܪܹ̈ܐ ܪ̈ܘܼܚܵܢܸܵܝܹܐ ܒܝܲܕܼ ܡܸܠܵܝ̈ܗܘܿܢ 32 ܘܝܲܗ̣̄ܒܼܘ ܠܲܒܼܢܲܝ̈ܗܘܿܢ ܦܘܼܠܚܵܢܲܝ̈ܗܘܿܢ ܘܡܝܼܬܼܘ ܟܲܕܼ ܠܵܐ ܡܝܼܬܼܘ ܀ 33 :ܐܲܒܼܪܵܡ ܐܲܫܠܹܗ ܪܲܗܛܹܗ ܠܐܝܼܪܚܵܩ ܕܢܸܬܿܬܲܓܲܪ ܒܹܗ 34 ܘܐܝܼܣܚܵܩ ܚܵܘܝܼ ܫܒܼܝܼܠ ܦܘܼܠܚܵܢܹܗ ܠܝܲܥܩܘܿܒܼ ܓܼܒܼܝܵܐ ܀ 35 :ܝܲܥܩܘܿܒܼ ܐܲܦܪܝܼ ܡ̣ܢ ܗܲܕܵܡ̇ܘ̈ܗܝ ܬܪܸܥܣܲܪ ܦܹܐܪܹ̈ܐ 36 ܘܩܲܪܸܒܼ ܐܸܢܘܿܢ ܐܲܝܟ ܪܹ̈ܫܝܵܬܼܵܐ ܠܡܵܪܹܡ̇ܐ ܀ 37 :ܬܪܸܥܣܲܪ ܐܵܘܠܸܕܼ ܡ̣ܢ ܥܸܩܵܪܵܐ ܫܲܘܝܵܐ ܕܦܲܓܼܪܹܗ 38 ܘܟܲܕܼ ܗܘ̤ ܫܘܸܐ ܗ̄ܘ̣ܵܐ ܠܦܝܼܓܼ ܗ̄ܘ̣ܵܐ ܠܸܒܵܐ ܕܦܹܐܪܹ̈ܐ ܕܡܸܢܹܗ ܀ 39 :ܡܸܢܗܘܿܢ ܕܲܡܝܼܘ ܘܲܪܕܼܵܘ ܒܐܘܼܪܚܵܐ ܕܦܘܼܠܚܵܢ ܥܲܡܠܵܘ̈ܗܝ 40 ܒܬܸܢܘܲܝ ܕܐܲܓܼܪܵܐ ܕܫܸܡ ܕܸܝܢܵܪܵܐ ܕܚܲܝܹ̈ܐ ܡܠܝܼܟܹ̈ܐ ܀ 41 :ܝܵܘܣܸܦ ܐܲܠܲܚ ܪܘܼܚܵܢܵܐܝܼܬܼ ܒܛܘܼܦܣܵܐ ܕܐܲܒܼܘܼܗܝ 42 ܘܲܛܒ݂ܲܥ ܢܲܦܫܹܗ ܒܛܲܒܼܥܵܐ ܕܪܘܼܚܵܐ ܠܡܸܬܼܟܲܬܵܫܘܼ ܀ 43 :ܒܕܲܪܓܼܵܐ ܕܪܘܼܚܵܐ ܨܒܼܵܐ ܒܲܪ ܪܵܚܹܝܠ ܠܲܡܫܲܡܵܫܘܼ 44 ܘܐܲܝܟ ܐܲܒܼܵܗܵܘ̈ܗܝ ܕܲܡܝܼ ܒܚܘܼܒܹܿܗ ܠܘܵܬܼ ܒܵܪܘܿܝܵܐ ܀ 45 :ܒܗܘܿܢ ܐܸܬܿܕܲܡܝܼ ܒܪܲܗܛܵܐ ܕܐܘܼܪܚܹܗ ܠܘܵܬܼ ܟܹܐܢܘܼܬܼܵܐ 46 ܘܒܲܫܒܼܝܼܠܲܝ̈ܗܘܿܢ ܬܦܲܩ̣ ܒܲܒܼܥܵܬܼܵܐ ܕܗܲܝܡܵܢܘܼܬܼܵܐ ܀ 47 :ܚܘܼܒܵܐ ܬܪܲܨ ܠܹܗ ܢܝܼܫܵܐ ܠܥܲܡܠܹ̈ܐ ܪ̈ܘܼܚܵܢܹܵܐ 48 ܘܲܚ̣ܢܵܐ ܒܣܲܒܼܪܵܐ ܠܘܵܬܼ ܣܘܼܟܵܝܵܐ ܕܲܥܬܼܝܼ̈ܕܼܵܬܼܵܐ ܀ 49 :ܒܗܲܝܡܵܢܘܼܬܼܵܐ ܡܸܬܼܚܲܙܲܩ ܗ̄ܘ̣ܵܐ ܐܲܝܟ ܕܲܒܼܙܲܝܢܵܐ 50 ܘܲܒܼܪܸܥܝܵܢܹܗ ܠܒܼܝܼܟ ܗ̄ܘ̣ܵܐ ܣܲܝܦܵܐ ܕܡܸܠܲܬܼ ܡ̇ܪܹܗ ܀ 51 :ܐܵܦ ܝܵܠܘܿܕܹܗ ܚ̣ܙܵܝܗܝ ܕܲܡܙܲܝܲܢ ܒܕܼܘܼܡܝܵܐ ܕܝܼܠܹܗ 52 ܘܐܲܫܦܲܥ ܚܘܼܒܵܐ ܘܡܲܫܚܹܗ ܒܪ̈ܲܚܡܹܐ ܕܬܼܘܼܒܼ ܢܸܬܼܓܲܢ̄ܒܲܪ ܀ 53 :ܒܪ̈ܲܚܡܹܐ ܡܲܫܚ̣ܹܗ ܐܲܝܟ ܕܲܒܼܡܸܫܚܵܐ ܠܡܹܐܚܲܕܼ ܕܲܪܵܐ 54 ܘܲܙܟܼܵܐ ܠܚܲܫܹ̈ܐ ܕܪܸܓܲܬܼ ܦܲܓܼܪܵܐ ܒܪܸܚܡܲܬܼ ܡ̇ܪܹܗ ܀ 55 :ܠܡܵܢ ܟܲܝ ܦܲܠܓܹܗ ܟܹܐܢܵܐ ܠܚܘܼܒܹܿܗ ܠܘܵܬܼ ܝܲܠܕܵܬܹ̈ܗ 56 ܘܲܠܚܲܕܼ ܡܲܫܚܹܗ ܒܡܸܫܚܵܐ ܕܚܘܼܒܵܐ ܛܵܒܼ ܡ̣ܢ ܚܲܒܼܪ݁ܵܘܗܝ ܀ 57 :ܠܡܵܢ ܟܲܝ ܦܲܪܫܵܗ̇ ܠܐܵܘܝܘܼܬܼ ܚܘܼܒܵܐ ܕܣܝܼܡ ܒܲܟܼܝܵܢܵܐ 58 ܘܐܲܪܡܝܼ ܗܸܪܬܼܵܐ ܒܲܬܼܪܸܥܣܲܪܬܵܐ ܕܦܹܐܪ̈ܲܝ ܟܲܪܣܹܗ ܀ 59 ܠܡܵܢܵܐ ܝܲܩܲܪ ܚܲܕܼ ܗܲܕܵܡ̇ܐ ܘܲܩܪ̣ܵܝܗܝ ܕܝܼܠܹܗ: pb. 267 60 ܘܗܵܐ ܕܝܼܠܹܗ ܗ̄ܘ̣ ܟܠܹܗ ܓܘܼܫܡܵܐ ܕܪܘܼܟܵܒܼ ܝܲܠܕܵܘ̈ܗܝ ܀ 61 :ܠܡܵܢܵܐ ܣܲܕܿܩܵܗ̇ ܠܐܲܣܝܼܪܘܼܬܼܵܐ ܕܪ̈ܲܚܡܹܐ ܘܫܲܝܵ̈ܐ 62 ܘܲܠܚܲܕܼ ܐܵܘܪܸܬܼ ܝܼܵܬܿܘܼܬܼ ܚܘܼܒܵܐ ܕܥܵܠܹ̇ܒܼ ܠܐܲܚܵܘ̈ܗܝ ܀ 63 :ܚܲܕܼ ܗ̄ܘ̣ ܟܝܵܢܵܐ ܐܘܿ ܙܲܕܿܝܼܩܵܐ ܘܚܲܕܼ ܗ̄ܘ̣ ܝܲܠܕܵܐ 64 ܘܚܲܕܼ ܗ̄ܘ̣ ܪܸܡܙܵܐ ܕܨܵܪ ܝܵܠܹܕܿܬܵܟ ܒܣܲܡܵܐ ܕܙܲܪܥܵܟ ܀ 65 :ܕܚܲܕܼ ܗ̄ܘ̣ ܟܝܵܢܵܐ ܐ̄ܢܵܐ ܝܵܕܲ݁ܥ ܐ̄ܢܵܐ ܘܲܟܼܝܵܢܝ ܣܵܗܹ̇ܕܼ 66 ܐܸܠܵܐ ܠܵܐ ܫܘܸܐ ܨܼܒܼܝܵܢ ܢܲܦܫܵܐ ܥܲܡ ܬܘܼܩܵܢܵܐ ܀ 67 :ܖܼܒܼܝܵܢ ܢܲܦܫܵܐ ܗ̄ܘ̣ ܕܲܡܫܲܚܠܸܦ ܠܹܗ ܠܚܘܼܒܵܐ ܫܲܘܝܵܐ 68 ܘܗܘ̤ ܥܵܒܹ̇ܕܼ ܠܹܗ ܕܲܠܚܲܕܼ ܢܸܣܢܸܐ ܘܲܠܚܲܕܼ ܢܸܪܚܲܡ ܀ 69 :ܚܲܝܠܵܐ ܪܲܒܵܐ ܕܦܵܪܘܿܫܘܼܬܼܵܐ ܪܟܼܝܼܒܼ ܠܲܟܼܝܵܢܵܐ 70 ܘܲܡܕܲܒܲܪ ܠܹܗ ܐܲܝܟ ܗܸܢܘܿܟܼܵܐ ܠܐܲܝܝܟܵܐ ܕܨܵܒܹ̇ܐ ܀ 71 :ܚܹܝܝܠ ܨܼܒܼܝܵܢܲܢ ܥܵܨܹ̇ܐ ܠܚܘܼܒܵܐ ܒܚܹܝܠ ܨܸܒܼܝܵܢܹܗ 72 ܘܗܘ̤ ܢܵܓܹ̇ܕܼ ܠܹܗ ܐܲܝܟ ܗܲܕܿܝܼܠܵܐ ܠܲܠܡܹܐܝܢ ܫܲܝܢܵܐ ܀ 73 :ܗܵܢܵܐ ܚܲܝܠܵܐ ܪܡ݂ܲܙ ܠܝܼ ܒܟܸܣܝܵܐ ܦܵܪܘܿܫܵܐܝܼܬܼ 74 ܕܚܘܼܪ ܬܲܩܢܵܐܝܼܬܼ ܘܲܚܙܲܝܼ ܟܝܵܢܵܐ ܕܲܫܘܸܐ ܘܲܦܠܝܼܓܼ ܀ 75 :ܫܘܸܐ ܒܲܟܼܝܵܢܹܗ ܕܚܲܕܼ ܗ̄ܘ̣ ܟܝܵܢܵܐ ܘܪܸܡܙܵܐ ܕܓܼܒܼ݂ܠܹܗ 76 ܘܲܣܕܼܝܼܩ ܘܲܦܠܝܼܓܼ ܨܼܒܼܝܵܢ ܢܲܦܫܹܗ ܒܝܲܕܼ ܚܹܐܪܘܼܬܹܗ ܀ 77 :ܫܲܠܝܼܛ ܡ̇ܕܹܝܢ ܥܲܠ ܨܸܒܼܝܵܢܹܗ ܟܡܵܐ ܕܲܡܠܝܼܠܵܐ ܗ̄ܘ̣ 78 ܘܲܒܼܚܹܐܪܘܼܬܹܗ ܓܵܒܹ̇ܐ ܘܡܲܣܠܸܐ ܠܐܲܝܢܵܐ ܕܨܵܒܹ̇ܐ ܀ 79 :ܚܘܼܒܹܿܗ ܕܟܹܐܢܵܐ ܕܲܠܘܵܬܼ ܝܲܠܕܵܘ̈ܗܝ ܓܠ̣ܵܐ ܘܒܲܕܸܿܩ ܠܝܼ 80 ܕܦܵܪܘܿܫܘܼܬܼܵܐ ܕܒܲܢ ܫܲܠܝܼܛܵܐ ܗ̄ܝܼ ܒܙܵܘܥܹ̈ܐ ܘܪܸܓܵܬܼܵܐ ܀ 81 :ܠܵܐ ܗ̄ܘ̣ܵܐ ܚܘܼܒܹܿܗ ܕܝܲܥܗܥܩܘܿܒܼ ܟܹܐܢܵܐ ܦܠܝܼܓܼ ܗ̄ܘ̣ܵܐ ܘܲܣܕܼܝܼܩ 82 ܚܹܝܠ ܨܸܒܼܝܵܢܵܐ ܢܲܓܼܕܹܿܗ ܠܚܘܼܒܵܐ ܠܵܘ ܛܘܼܝܵܒܹܗ ܀ 83 :ܠܵܐ ܫܲܘܝܝܘܼܬܼܵܐ ܕܨܸܒܼܝܵܢ ܝܲܠܕܵܘ̈ܗܝ ܣܕܲܩܬܹܗ ܠܚܘܼܒܹܿܗ 84 ܘܪܵܚܹ̇ܡ ܘܣܵܢܹ̇ܐ ܒܦܵܪܘܿܫܘܼܬܼܵܐ ܕܨܸܒܼܝܵܢ ܢܲܦܫܹܗ ܀ 85 :ܛܢܵܢܵܐ ܐܲܪܡܝܼ ܒܪܸܥܝܵܢ ܝܲܠܕܵܘ̈ܗܝ ܠܘܵܬܼ ܟܹܐܢܘܿܬܼܵܐ 86 ܕܐܸܢ ܡܸܙܕܲܕܲܩܝܼܢ ܐܵܦ ܡܸܬܼܪܲܚܡܝܼܢ ܒܲܕܼܡܘܼܬܼ ܝܵܘܣܸܦ ܀ 87 :ܚܘܼܒܹܿܗ ܕܝܵܘܣܸܦ ܥܲܒܼ݂ܕܹܿܗ ܪܚܝܼܡܵܐ ܠܨܸܒܼܝܵܢ ܐܲܒܼܘܼܗܝ 88 ܘܕܲܪܚܸܡ ܩܘܼܫܬܵܐ ܪܲܚ̣ܡܹܗ ܟܹܐܢܵܐ ܛܵܒܼ ܡ̣ܢ ܐܲܚܵܘ̈ܗܝ ܀ 89 :ܚܘܼܒܹܿܗ ܥܲܒܼܕܹܿܗ ܠܙܲܥܘܿܪ ܐܲܚܵܘ̈ܗܝ ܠܥܸܠ ܡ̣ܢ ܐܲܚܵܘ̈ܗܝ 90 ܘܗܘ̤ ܐܲܪܝܼܡܹܗ ܠܕܲܪܓܼܵܐ ܕܲܟܼܣܸܐ ܒܦܘܼܪܥܵܢ ܐܲܓܼܪܵܐ ܀ 91 :ܚܘܼܒܵܐ ܕܚܵܘܝܼ ܠܘܵܬܼ ܝܵܠܘܿܕܹܗ ܘܨܹܝܕܼ ܓܵܒܼܘܼܠܹܗ 92 ܗܘ̤ ܦܲܢܝܼ ܠܹܗ ܟܠܝܼܠ ܙܵܟܼܘܼܬܼܵܐ ܕܓܲܕܼܠܘܼܗܝ ܪ̈ܲܚܡܹܐ ܀ 93 :ܟܝܵܢܵܐ ܪܡ݂ܲܙ ܠܹܗ ܕܢܸܪܚܲܡ ܠܐܲܒܼܘܼܗܝ ܘܲܠܓܼܵܒܼܘܿܠܹܗ 94 ܘܲܒܼܕܼܘܼܒܵܪ̈ܵܘܗܝ ܦܪ݂ܲܥ ܠܐܲܠܵܗܵܐ ܘܲܠܝܵܠܘܿܕܹܗ ܀ pb. 268 95 :ܒܫܲܘܝܘܼܬܼ ܚܘܼܒܹܿܗ ܦܲܠܓܹܗ ܠܚܘܼܒܵܐ ܕܣܝܼܡ ܒܲܟܼܝܵܢܵܐ 96 ܘܪܸܚܡܲܬܼ ܢܲܦܫܹܗ ܥܨܵܬܹܗ ܠܝܲܨܪܵܐ ܠܡܸܪܚܲܡ ܣܲܓܿܝܼ ܀ 97 :ܕܵܡܹ̇ܐ ܚܘܼܒܵܐ ܕܲܠܘܵܬܼ ܝܵܘܣܸܦ ܡ̣ܢ ܝܵܠܘܿܕܹܗ 98 ܠܗܵܘ̇ ܕܲܡܫܝܼܚܵܐ ܠܘܵܬܼ ܝܘܿܚܲܢܵܢ ܪܵܚܹ̇ܡ ܡ̇ܪܹܐ ܀ 99 :ܬܪܸܥܣܲܪ ܐܵܘܠܸܕܼ ܐܵܦ ܦܵܪܘܿܩܲܢ ܪܘܼܚܵܢܵܐܝܼܬܼ 100 ܘܲܠܚܲܕܼ ܡܸܢܗܘܿܢ ܝܲܩܲܪ ܒܚܘܼܒܹܿܗ ܛܵܒܼ ܡ̣ܢ ܚܲܒܼܪ݁ܵܘܗܝ ܀ 101 :ܒܛܲܟܼܣܵܐ ܕܝܲܥܩܘܿܒܼ ܕܐܵܘܠܸܕܼ ܫܲܒܼܛܹ̈ܐ ܒܡܸܢܝܵܢ ܝܲܪ̈ܚܹܐ 102 ܒܹܗ ܐܵܦ ܡ̇ܪܲܢ ܓܒܼ݂ܵܐ ܬܲܠܡܝܼܕܹ̈ܐ ܠܝܘܼܦܵܢ ܐ̄ܢܵܫܵܐ ܀ 103 :ܐܲܝܟ ܡܸܢܝܵܢܵܐ ܕܲܒܼܢܲܝ̈ ܝܲܥܩܘܿܒܼ ܛܲܟܸܿܣ ܐܸܢܘܿܢ 104 ܕܢܸܗܘܘܿܢ ܕܵܡܹ̇ܿܝܢ ܐ̄ܪ̈ܵܙܹܐ ܕܥܲܡܵܐ ܠܦܘܼܪܩܵܢ ܥܲܡܡܹ̈ܐ ܀ 105 :ܒܐ̄ܪܵܙ ܦܵܪܘܿܩܲܢ ܐܵܘܠܸܕܼ ܝܲܥܩܘܿܒܼ ܬܪܸܥܣܲܪ ܫܲܒܼܛܝܼ̈ܢ 106 ܘܨܵܪ ܦܸܠ̈ܐܵܬܼܵܐ ܕܲܬܼܥܣܲܪܬܵܐ ܕܲܓܼܒܼܵܐ ܡܫܝܼܚܵܐ ܀ 107 :ܕܲܡܝܼ ܒܚܘܼܒܹܿܗ ܕܲܠܘܵܬܼ ܝܵܘܣܸܦ ܐܲܝܟ ܪܹܫܝܼܬܲܢ 108 ܕܲܥܠ݂ܲܒܼ ܚܘܼܒܹܿܗ ܠܘܵܬܼ ܨܼܒܼܝܵܢܵܐ ܕܪܵܚܹ̇ܡ ܚܘܼܒܵܐ ܀ 109 :ܒܚܘܼܒܵܐ ܕܲܒܼܪܹܗ ܪܫܲܡ̣ ܬܲܚܘܝܼܬܼܵܐ ܕܪܵܚܡܹܗ ܕܚܲܬܼܢܵܐ 110 ܕܲܪܚܸܡ ܐܵܦ ܗܘ̤ ܠܚܲܕܼ ܡ̣ܢ ܝܲܠܕܵܘ̈ܗܝ ܒܐ̄ܪܵܙ ܝܘܿܚܲܢܵܢ ܀ 111 :ܚܘܼܒܵܐ ܠܝܵܘܣܸܦ ܢܲܟܼܦܵܐ ܪܚܝܼܡ ܥܲܠ ܐܲܒܼܘܼܗܝ 112 ܗܘ̤ ܐܲܪܝܼܡܹܗ ܐܵܦ ܠܲܫܠܝܼܚܵܐ ܠܥܸܠ ܡ̣ܢ ܚܲܒܼܪ݁ܵܘܗܝ ܀ 113 :ܚܘܼܒܹܿܗ ܕܝܵܘܣܸܦ ܢܲܓܼܕܹܿܗ ܠܐܲܒܼܘܼܗܝ ܒܵܬܲܪ ܚܘܼܒܹܿܗ 114 ܘܲܓܼܠ̣ܵܐ ܘܒܲܕܸܿܩ ܕܚܘܼܒܵܐ ܗ̄ܘ̣ ܦܵܪܲ̇ܥ ܚܘܼܒܵܐ ܠܚܘܼܒܵܐ ܀ 115 :ܒܝܵܘܣܸܦ ܡ̇ܕܹܝܢ ܢܚܘܼܪ ܐܵܦ ܐܲܝܢܵܐ ܕܫܵܐܹ̇ܠ ܪ̈ܲܚܡܹܐ 116 ܕܲܪܚܸܡ ܡ̇ܪܹܗ ܦܲܪ݂ܥܹܗ ܚܘܼܒܵܐ ܕܛܵܒܼ ܡ̣ܢ ܕܝܼܠܹܗ ܀ 117 :ܐܵܦ ܝܵܠܘܿܕܼ ܡܸܛܠ ܗܵܕܹܐ ܐܲܣܓܿܝܼ ܪܲܚ̣ܡܹܗ 118 ܕܲܚ̣ܙܵܐ ܕܐܲܣܝܼܪ ܚܘܼܒܵܐ ܕܢܲܦܫܹܗ ܠܘܵܬܼ ܥܵܒܼܘܿܕܹܗ ܀ 119 :ܪܲܚ̣ܡܹܗ ܣܲܓܿܝܼ ܛܵܒܼ ܡ̣ܢ ܐܲܚܵܘ̈ܗܝ ܘܐܲܛܸܢ ܠܐܲܝܵܘ̈ܗܝ 120 ܕܢܸܗܘܘܿܢ ܪܵܗ̇ܛܝܼܢ ܠܲܬܼܪܲܥ ܟܲܣܝܵܐ ܕܢܸܪܚܲܡ ܐܸܢܘܿܢ ܀ 121 :ܘܟܲܕܼ ܚܲܕܼ ܐܲܒܼܵܐ ܘܚܲܕܼ ܒܵܪܘܿܝܵܐ ܕܦܲܓܼܪܵܐ ܘܢܲܦܫܵܐ 122 ܢܬ݂ܲܥ ܨܼܒܼܝܵܢܵܐ ܕܚܲܕܼ ܗܲܕܵܡ̇ܐ ܘܙܲܠ̣ܘ ܣܲܓܿܝܼ̈ܠܹܐ ܀ 123 :ܚܦܝܼܛ ܗ̄ܘ̣ܵܐ ܝܵܘܣܸܦ ܘܐܲܡܝܼܢ ܟܠܫܵܥ ܒܲܬܼܪܲܥ ܟܲܣܝܵܐ 124 ܕܲܢܦܲܢܸܐ ܠܹܗ ܐܲܝܟ ܐܲܓܼܪܵܐ ܠܥܲܡܠܵܘ̈ܗܝ ܚܘܼܒܵܐ ܘܪ̈ܲܡܹܐ ܀ 125 :ܒܚܘܼܒܵܐ ܘܪ̈ܲܚܡܹܐ ܟܕܼܝܼܢ ܗ̄ܘ̣ܵܐ ܚܘܼܒܹܿܗ ܒܢܝܼܪܵܐ ܕܡ̇ܪܹܐ 126 ܘܲܒܼܝܵܠܕܹܗ ܡܙܲܝܲܚ ܗ̄ܘ̣ܵܐ ܠܵܗ̇ ܠܡܸܠܲܬܼ ܟܲܣܝܵܐ ܀ 127 :ܒܐܝܼܩܵܪ ܐܲܒܼܘܼܗܝ ܡܸܬܼܪܲܥܸܐ ܗ̄ܘ̣ܵܐ ܦܵܪܲ̇ܥ ܗ̄ܘ̣ܵܐ ܠܹܗ 128 ܠܚܘܼܒܹܿܗ ܚܘܼܒܵܐ ܕܦܵܪܲܥ ܟܠܫܵܥ ܠܲܡܬܲܩܢܵܢܹܗ ܀ 129 ܩܲܕܸܿܡ ܒܲܟܲܪ ܨܼܒܼܝܵܢ ܢܵܦܫܹܗ ܩܕܼܵܡ ܢܵܡܘܿܣܵܐ: pb. 269 130 ܕܒܼܵܬܲܪ ܙܲܒܼܢܵܐ ܥܬܼܝܼܕܼ ܗ̄ܘ̣ܵܐ ܕܲܢܣܝܼܡ ܙܘܼܗܪܵ ܡܸܠܵܘ̈ܗܝ ܀ 131 :ܡ̇ܕܹܝܢ ܓܼܠܝܵܐ ܗ̄ܝܼ ܕܠܵܘ ܢܵܡܘܿܣܵܐ ܐܲܠܸܦ ܟܹܐܢܹ̈ܐ 132 ܐܸܠܵܐ ܗܘ̤ܵܘ ܢܵܡܘܿܣܵܐ ܠܦܘܼܠܚܵܢ ܩܘܼܫܬܵܐ ܀ 133 :ܫܲܦܝܼܪ ܬܲܪܓܸܿܡ ܐܵܦ ܟܵܪܘܿܙܵܐ ܕܡܼܠܲܬܼ ܩܘܼܫܬܵܐ 134 ܕܲܠܥܵܘܠܹ̈ܐ ܣܝܼܡ ܢܵܡܘܿܣܵܐ ܠܵܐ ܗ̄ܘ̣ܵܐ ܠܟܹܐܢܹ̈ܐ ܀ 135 :ܟܹܐܢܹ̈ܐ ܠܘܼܩܕܸܿܡ ܗܘ̤ܵܘ ܢܵܡܘܿܣܵܐ ܠܪܸ̈ܥܝܵܢܲܝܗܘܿܢ 136 ܘܗܸܢܘ̣ܿܢ ܚܵܘܝܼܘ ܫܒܼܝܼܠ ܢܵܡܘܿܣܵܐ ܒܕܼܘܼܒܵܪ̈ܲܝܗܘܿܢ ܀ 137 :ܩܲܕܿܝܼܡ ܝܲܨܪܵܐ ܕܦܵܪܘܿܫܘܼܬܼܵܐ ܠܟܼܠ ܢܵܡܘܿܣܝܼ̈ܢ 138 ܗܘ̤ܝܘܼ ܪܲܒܵܐ ܕܟܼܵܬܹ̇ܒܼ ܘܡܲܗܓܸܿܐ ܠܡܲܠܝܼܠܘܼܬܼܵܐ ܀ 139 :ܝܲܨܪܵܐ ܟܬ݂ܲܒܼ ܠܹܗ ܣܸܦܪܵܐ ܠܝܵܘܣܸܦ ܥܲܠ ܪܸܥܝܵܢܹܗ 140 ܘܲܩܪ̣ܵܐ ܒܗܵܘܢܵܐ ܘܦܲܫܸܩ ܣܸܦܪܵܐ ܕܣܸܓܼܕܲܬܼ ܟܲܣܝܵܐ ܀ 141 :ܬܲܪܬܹܿܝܢ ܝܼܠܸܦ̣ ܡ̣ܢ ܢܵܡܘܿܣܵܐ ܕܦܵܪܘܿܫܘܼܬܼܵܐ 142 ܕܚܲܝܵܒܼ ܐ̄ܢܵܫܵܐ ܦܘܼܪܥܵܢ ܚܘܼܒܵܐ ܠܡܵܪܹܗ ܘܐܲܒܼܘܼܗܝ ܀ 143 :ܬܲܪܬܹܿܝܢ ܦܲܢܝ̣ ܐܵܦ ܗܘ̤ ܒܚܘܼܒܹܿܗ ܐܲܝܟ ܦܵܪܘܿܫܵܐ 144 ܣܸܓܼܕܲܬܼ ܚܘܼܒܵܐ ܠܡܵܪܵܐ ܕܥܲܕܕܹܿܗ ܘܲܠܝܵܠܘܿܕܹܗ ܀ 145 :ܘܕܲܚ̣ܙܵܐ ܐܲܒܼܘܼܗܝ ܕܲܚܦܝܼܛ ܦܵܪܲܥ ܐܲܝܟ ܚܲܝܒܼܵܐ 146 ܦܲܪ̣ܥܹܗ ܐܵܦ ܗܘ̤ ܐܲܓܼܪܵܐ ܕܚܘܼܒܵܐ ܠܘܵܬܼ ܨܸܒܼܝܵܢܹܗ ܀ 147 :ܪܲܚ̣ܡܹܗ ܒܟܸܣܝܵܐ ܕܲܚ̣ܙܵܐ ܕܲܟܼܣܸܐ ܒܚܘܼܒܹܿܗ 148 ܘܝܲܩܪܹܗ ܒܓܸܠܝܵܐ ܕܢܲܟܸܿܦ ܪܼ̈ܓܼܫܵܘܗܝ ܥܲܡ ܨܼܒܼܝܵܢܹܗ ܀ 149 :ܒܢܲܚ̈ܬܹܿܐ ܨܲܒܸܿܬܼ ܦܲܓܼܪܹܗ ܠܦܘܼܬܼ ܨܸܒܼܝܵܢܹܗ 150 ܘܲܒܼܚܘܼܫܵܒܼܵܘ̈ܗܝ ܙܲܝܲܚ ܢܲܦܫܹܗ ܡܲܠܝܲܬܼ ܚܘܼܒܵܐ ܀ 151 :ܐܵܦ ܒܵܪܘܿܝܵܐ ܐܲܣܓܿܝܼ ܪܲܚ̣ܡܹܗ ܛܵܒܼ ܡ̣ܢ ܐܲܚܵܘ̈ܗܝ 152 ܕܲܚܙ̣ܲܐ ܕܐܲܣܝܼܪ ܚܘܼܒܵܐ ܕܢܲܦܫܹܗ ܠܘܵܬܼ ܟܲܣܝܘܼܬܹܗ ܀ 153 :ܝܲܗ̣̄ܒܼ ܒܹܗ ܚܲܝܠܵܐ ܡ̣ܢ ܟܲܣܝܘܼܬܹܗ ܠܡܸܚܙܵܐ ܕܟܲܣ̈ܝܵܢ 154 ܘܚܲܝܸܠ ܙܵܘܥܵܘ̈ܗܝ ܠܡܸܬܼܒܲܩܵܝܘܼ ܒܲܥܬܼܝܼ̈ܕܼܵܬܼܵܐ ܀ 155 :ܟܲܣܝܵܐ ܬܲܪܓܸܿܡ ܪܸܡܙܵܐ ܕܚܲܝܠܹܗ ܒܙܵܘܥܲܝ̈ ܢܲܦܫܵܐ 156 ܘܒܲܕܿܩܹܗ ܒܓܸܠܝܵܐ ܠܚܹܝܠ ܟܲܣܝܘܼܬܹܗ ܕܲܓܼܠܸܐ ܠܹܗ ܟܠ ܀ 157 :ܒܚܸܠܡܹܗ ܓܠ̣ܵܐ ܠܹܗ ܥܲܠ ܪܘܼܡܪܵܡܹܗ ܘܡܘܼܟܵܟ ܐܲܚܵܘ̈ܗܝ 158 ܘܚܵܘܝܹܗ ܒܟܸܣܝܵܐ ܕܲܡܪܝܼܡ ܫܲܒܼܛܹܗ ܥܲܠ ܣܵܩܘܿܪ̈ܵܘܗܝ ܀ 159 :ܚ̣ܙܵܐ ܠܲܡ ܝܵܘܣܸܦ ܚܸܠܡܵܐ ܒܟܸܣܝܵܐ ܘܚܵܘܝܼ ܠܐܲܝܵܘ̈ܗܝ 160 ܘܐܲܠܸܦ ܐܸܢܘܿܢ ܥܲܠ ܫܘܼܠܛܵܢܹܗ ܕܪܵܕܹܐ ܘܕܼܵܐܹ̇ܝܢ ܀ 161 :ܚܙܹ̇ܝܬܼ ܠܲܡ ܕܐܝܼܬܲܝ ܐܸܢܵܐ ܘܐܲܢ̄ܬܿܘܿܢ ܒܦܘܼܠܚܵܢ ܐܲܪܥܵܐ 162 ܟܲܕܼ ܐܵܣ̇ܪܝܼܢܲܢ ܟܲܦܹ̈ܿܐ ܒܚܲܩܠܵܐ ܠܡܵܙܘܿܢ ܙܲܒܼܢܵܐ ܀ 163 :ܚܙܹ̇ܝܬܼ ܕܐܸܙܕܲܩܦܲܬ̤ ܟܲܦܵܐ ܕܲܩܢܘܿܡܝ ܘܬܸܪܨܲܬ̤ ܩܵܡܲܬ̤ 164 ܘܲܚܙܹ̇ܝܬܼ ܟܲܦܹ̈ܐ ܕܲܩܢܘܿܡܲܝ̈ܟܿܘܿܢ ܟܲܕܼ ܣܵܓܼ̈ܕܵܢ ܠܝܼ ܀ pb. 270 165 :ܒܟܲܦܹ̈ܐ ܚܵܘܝܹܗ ܟܲܦܢܵܐ ܕܪܵܕܹܐ ܘܲܡܩܲܦܲܚ ܟܠ 166 ܘܲܒܼܣܸܓܼ̈ܕܵܬܼܗܹܝܢ ܫܘܼܥܒܵܕܼ ܐܲܚܵܘ̈ܗܝ ܕܲܣܓܸܕܼܘ ܩܘܼܕܸܡܵܘܗܝ ܀ 167 :ܚܕܲܥܣܲܪ ܟܲܦܝܼ̈ܢ ܟܲܦ̣ ܪܹ̈ܫܲܝܗܘܿܢ ܘܲܣܓܸܕܼ ܠܲܚܕܼܵܐ 168 ܘܦܸܫܛܲܬ̤ ܐܝܼܕܼܵܐ ܘܲܪܕܵܬܼ ܐܸܢܹܝܢ ܘܲܙܟܼܵܬ̤ ܐܹܢܝܢ ܀ 169 :ܐܘܿ ܬܸܕܼܡܘܼܪܬܵܐ ܕܲܒܼܝܲܕܼ ܟܲܦܹ̈ܐ ܡܸܬܼܚܵܘܝܵܐ ܗ̄ܘ̣ܵܬܼ 170 ܕܟܲܦܢܵܐ ܘܣܲܒܼܥܵܐ ܬܪܸܥܣܲܪ ܡܸܬܼܒܲܕܲܩ ܗ̄ܘ̣ܵܐ ܀ 171 :ܐܹܝܘ ܡܸܢܝܵܢܵܐ ܕܝܲܪ݁ܚܹܐ ܚܕܲܥܣܲܪ ܕܚܵܒܼܘ ܘܐܸܬܼܡܲܣܟܲܢܘ 172 ܘܐܲܣܢܸܩ ܐܸܢܘܿܢ ܪܸܡܙܵܐ ܟܲܣܝܵܐ ܥܲܠ ܚܲܕܼ ܝܲܪܝܵܐ ܀ 173 :ܐܘܿ ܡ̇ܙܘܿܢܵܐ ܕܟܲܕܼ ܗܘ̤ ܙܵܐܹ̇ܢ ܫܐܸ݂ܠ ܡ̇ܙܘܿܢܵܐ 174 ܒܟܲܦܹ̈ܐ ܬܪܸܥܣܲܪ ܕܡܸܬܼܟܲܫ̈ܦܵܢ ܗ̣̄ܘܲܝ̈ ܟܲܦܵܐ ܀ 175 :ܐܹܝܘ ܠܲܟܼܝܵܢܵܐ ܕܲܫܘܸܐ ܟܠܹܗ ܘܲܦܠܝܼܓܼ ܟܠܹܗ 176 ܘܡܸܢܹܗ ܟܲܦܢܵܐ ܐܵܦ ܡܵܙܘܿܢܵܐ ܚܲܣܝܼܪ ܘܲܓܼܡܝܼܪ ܀ 177 :ܚܲܕܼ ܗ̄ܘ̣ ܟܝܵܢܵܐ ܘܲܫܘܸܐ ܟܠܹܗ ܒܟܼܠܡܵܐ ܕܲܩܢܸܐ 178 ܘܲܦܠܝܼܓܼ ܟܠܹܗ ܒܝܲܕܼ ܨܸܒܼܝܵܢܵܐ ܕܦܵܪܘܿܫܘܼܬܹܗ ܀ 179 :ܡ̣ܢ ܚܲܕܼ ܢܸܒܼܥܵܐ ܪܕܼܵܘ ܗܲܕܵܡܹ̈ܐ ܐܲܝܟ ܡܲܒܿܘܼܥܹ̈ܐ 180 ܘܲܚܕܲܥܣܲܪ ܓܵܙ̣ܘ ܘܚܲܕܼ ܐܸܫܬܲܦܲܥ ܒܪܸܕܼܝܵܐ ܕܚܘܼܒܹܿܗ ܀ 181 :ܒܲܕܼܡܘܼܬܼ ܓܝܼܚܘܿܢ ܚܵܘܝܼ ܪܸܕܼܝܹܗ ܒܐܲܪܲܥ ܡܸܨܪܹܝܢ 182 ܘܚܲܕܿܝܼ ܫܸܩܝܵܐ ܕܲܡܠܝܼܠܘܼܬܹܗ ܛܵܒܼ ܡ̣ܢ ܚܲܪܫܵܐ ܀ 183 :ܓܝܼܚܘܿܢ ܝܼܒܸܫ̣ ܕܲܟܼܠܵܝܗܝ ܥܵܘ̣ܠܵܐ ܠܪܸܕܼܝܹܗ ܪܲܒܵܐ 184 ܘܝܵܘܣܸܦ ܐܲܪܕܲܝܼ ܫܸܦܥܵܐ ܚܲܠܝܵܐ ܒܝܲܕܼ ܡ̇ܙܘܿܢܵܐ ܀ 185 :ܒܚܸܠܡܵܐ ܕܲܚܙ̣ܵܐ ܒܲܕܸܿܩ ܠܐܲܚܵܘ̈ܗܝ ܥܲܠ ܬܲܪ̈ܬܲܝܗܹܝܢ 186 ܕܕܲܡ ܢܸܬܼܟܲܚܕܼܘܼܢ ܡ̣ܢ ܒܘܼܕܵܩܵܐ ܕܲܒܼܝܲܕܼ ܟܲܦܹ̈ܐ ܀ 187 :ܗܘ̤ܵܐ ܝܲܬܿܝܼܪܵܐ ܒܘܼܕܵܩ ܐ̄ܪ݁ܵܙܹܐ ܠܒܼܝܼܫܘܼܬܼ ܝܲܨܵܪܵܐ 188 ܘܲܛܠܲܡ̣ܘ ܐܸܢܹܝܢ ܠܲܣܬܼܝܼܪ݁ܵܬܼܵܐ ܕܲܓܼܠ̣ܵܐ ܒܟܲܦܹ̈ܐ ܀ 189 :ܠܵܐ ܐܸܬܼܥܲܕܵܪܘ ܐܲܚܲܝ̈ ܝܵܘܣܸܦ ܡ̣ܢ ܒܘܼܕܵܩܵܘ̈ܗܝ 190 ܐܸܠܵܐ ܕܐܵܘܣܸܦܘ ܡܸܪܲܬܼ ܢܲܦܫܵܐ ܠܘܼܩܒܲܠ ܚܸܠܡܵܘ̈ܗܝ ܀ 191 :ܐܲܣܓܿܝܼܘ ܣܲܩ̣ܪܘܼܗܝ ܡܸܛܠ ܫܘܼܦܪ̈ܵܘܗܝ ܐܲܝܟ ܚܲܣܵܡܹ̈ܐ 192 ܕܡܸܛܠ ܡ̇ܢܵܐ ܦܠܸܐ ܥܲܡ ܫܘܼܦܪܹܗ ܐܵܦ ܪܸܥܝܵܢܹܗ ܀ 193 :ܘܲܟܼܡܵܐ ܕܗܸܢܘ̣ܿܢ ܐܲܣܓܿܝܼܘ ܣܲܩ̣ܪܘܼܗܝ ܥܲܠ ܪܘܼܡܪܵܡܹܗ 194 ܥܲܒܼ݂ܕܹܿܗ ܡܵܪܹܗ ܢܸܒܼܥܵܐ ܕܡܲܪܕܸܿܐ ܚܹܝܠ ܟܲܣ̈ܝܵܬܼܵܐ ܀ 195 :ܗܦ݂ܲܟ ܘܲܓܼܠ̣ܵܐ ܒܹܗ ܒܚܸܙܘܵܐ ܕܲܬܼܪܹܝܢ ܐ̄ܪܵܙܵܐ ܐ̄ܚܪܹܢܵܐ 196 ܕܩܵܥܹ̇ܐ ܒܚܲܝܠܹܗ ܐܲܝܟ ܟܵܪܘܿܙܵܐ ܥܲܠ ܫܘܼܠܛܵܢܹܗ ܀ 197 ܚܙܹ̇ܝܬܼ ܠܲܡ ܚܸܠܡܵܐ ܬܢ̣ܵܐ ܡܲܟܼܝܼܟܼܵܐ ܠܐܲܒܼܘܼܗܝ ܘܠܐܲܚܵܘ̈ܗܝ: pb. 271 198 ܘܗܵܐ ܢܲܗܝܼܪܹ̈ܐ ܫܸܡܫܵܐ ܘܣܲܗܪܵܐ ܣܵܓܼ̇ܕܲܝܼܢ ܩܘܼܕܼܡܲܝ ܀ 199 :ܥܲܡ ܐܸܣܦܹܪܵܐ ܕܫܸܡܫܵܐ ܪܲܒܵܐ ܘܣܲܗܪܵܐ ܪܲܓܼܝܵܐ 200 ܚܕܲܥܣܲܪ ܟܵܘܟܿܒܹ̈ܐ ܚܙܹ̇ܝܬܼ ܕܲܟܼܕܼܝܼܢܝܼܢܝܼܢ ܒܢܝܼܪܵܐ ܕܣܸܓܼܕܲܬܼܝ ܀ 201 :ܚܙܹ̇ܐ ܝܵܠܘܿܕܹܗ ܕܚܸܠܡܹܗ ܐܵܬܼܵܐ ܗ̄ܘ̣ ܕܫܸܡ ܫܘܼܠܛܵܢܹܗ 202 ܘܲܬܼܡܲܗ ܣܲܓܿܝܼ ܕܪܲܒܵܐ ܗ̄ܝܼ ܡܸܢܹܗ ܐܲܝܕܵܐ ܕܒܲܕܸܿܩ ܀ 203 :ܓܠ̣ܵܐ ܠܹܗ ܠܲܒܼܪܹܗ ܚܲܝܠܵܐ ܕܲܟܼܣܸܐ ܒܓܼܵܘ ܦܸܠܐܬܼܵܐ 204 ܕܐ̄ܢܵܐ ܠܲܡ ܘܐܸܡ̇ܟ ܘܐܲܚܲܝ̈ܟ ܢܹܐܬܸܐ ܘܢܸܣܓܿܘܿܕܼ ܩܘܼܕܼܡܲܝܟ ܀ 205 :ܒܬܲܗܪܵܐ ܪܲܒܵܐ ܩܵܡ̣ ܙܲܕܼܝܼܩܵܐ ܒܐܲܝܠܹܝܢ ܕܲܡܫܲܥ̣ 206 ܘܲܪܢ̣ܵܐ ܣܲܓܿܝܼ ܕܕܲܠܡܵܐ ܚܣܵܡܵܐ ܢܥܵܘܸܟ ܚܘܼܒܵܐ ܀ 207 :ܒܨܸܒܼܝܵܢ ܐܲܚܵܘ̈ܗܝ ܡܸܬܼܒܲܩܸܐ ܗ̄ܘ̣ܵܐ ܐܲܝܟ ܝܵܕܼܘܿܥܵܐ 208 ܕܕܲܠܡܵܐ ܡܸܪܬܼܵܐ ܘܒܼܝܼܫܘܼܬܼ ܢܸܟܼܠܵܐ ܫܵܪܹܐ ܠܚܸܠܡܹ̈ܐ ܀ 209 :ܘܲܟܼܡܵܐ ܕܝܲܩܘܿܒ ܒܐܲܝܕܵܐ ܕܟܹܐܢܵܐ ܡܸܬܼܒܲܩܸܐ ܗ̄ܘ̣ܵܐ 210 ܝܲܨܪܵܐ ܕܲܒܼܢܵܘ̈ܗܝ ܢܸܟܼܠܵܐ ܒܟܸܣܝܵܐ ܡܸܨܛܲܢܲܥ ܗ̄ܘ̣ܵܐ ܀ 211 :ܚܣܲܡ̣ܘ ܡܲܪ̈ܵܚܹܐ ܘܲܣܢ̣ܵܘ ܣܲܓܿܝܼ ܠܡܲܡܝܼܡ ܢܲܦܫܵܐ 212 ܕܲܚܙ̣ܵܘ ܕܝܼܪܸܒܼ ܒܝܲܕܼ ܓܸܠܝܵܢܹ̈ܐ ܪ̈ܘܼܚܵܢܵܝܹܐ ܀ 213 :ܗܘ̤ ܥܲܡ ܐܲܚܵܘ̈ܗܝ ܡܸܬܼܪܲܒܸܿܐ ܗ̄ܘ̣ܵܐ ܘܐܲܚܵܘ̈ܗܝ ܥܲܡܹܗ 214 ܘܟܲܕܼ ܗܘ̤ ܫܘܸܐ ܗ̄ܘ̣ܵܐ ܠܸܒܵܐ ܕܐܲܚܵܘ̈ܗܝ ܠܦܝܼܓܼ ܗ̄ܘ̣ܵܐ ܘܲܣܕܼܝܼܩ ܀ 215 :ܗܘ̤ ܐܲܣܝܼܪ ܗ̄ܘ̣ܵܐ ܒܚܘܼܒܵܐ ܕܐܲܒܼܘܼܗܝ ܘܕܲܩܢܘܿܡܲܝ̈ܗܘܿܢ 216 ܘܗܸܢܘ̣ܿܢ ܥܵܩ̇ܪܝܼܢ ܒܸܢܝܵܢ ܚܘܼܒܵܐ ܒܢܲܝ̈ܐ ܕܢܸܟܼܠܵܐ ܀ 217 :ܗܘ̤ ܥܲܡ ܐܲܒܼܘܼܗܝ ܚܙܝܼܩ ܒܐܵܘܝܘܼܬܼܵܐ ܕܣܘܼܢܩܵܢܲܝ̈ܗܘܿܢ 218 ܘܗܸܢܘ̣ܿܢ ܣܵܬܼ̇ܪܝܼܢ ܚܘܼܒܵܐ ܕܝܼܠܹܗ ܘܲܕܼܝܵܠܘܿܕܹܗ ܀ 219 :ܚܣܵܡܵܐ ܣܲܡܝܵܐ ܣܲܡܝܼ ܐܸܢܘܿܢ ܠܐܲܚܲܝ̈ ܝܵܘܣܸܦ 220 ܘܠܵܐ ܚܙ̣ܵܘ ܢܘܼܗܪܵܐ ܕܙܲܕܿܝܼܩܘܼܬܼܵܐ ܕܲܟܼܣܸܐ ܒܚܸܠ̈ܡܵܘܗܝ ܀ 221 :ܚܣܵܡܵܐ ܗܘ̤ܵܐ ܠܗܘܿܬ ܐܲܝܟ ܬܲܚܦܝܼܬܼܵܐ ܩܕܼܵܡ ܥܲܝܢܲܝ̈ܗܘܿܢ 222 ܘܠܵܐ ܐܸܬܼܒܲܩܝܼܘ ܕܥܸܠܲܬܼ ܚܸܠܡܵܐ ܠܗܘܿܢ ܥܘܼܕܼܪܵܢܵܐ ܗ̄ܝܼ ܀ 223 :ܚܣܵܡܵܐ ܡܝܼܬܼܵܐ ܕܡܝܼܬܼ ܟܲܕܼ ܠܵܐ ܡܝܼܬܼ ܘܚܲܝ ܟܲܕܼ ܠܵܐ ܚܲܝ 224 ܡܝܼܬܼ ܠܲܫܪܵܪܵܐ ܘܚܲܝ ܠܲܚܛܝܼܬܼܵܐ ܘܠܲܝܬܵܘܗܝ ܘܐܝܼܬܼܵܘܗܝ ܀ 225 :ܐܲܝܢܵܘ ܒܝܼܫܵܐ ܕܒܼܝܼܫ ܘܲܡܕܲܪܲܡ ܡ̣ܢ ܒܝܼܫܘܼܬܹܗ 226 ܘܡܲܢ̣ܘܼ ܕܲܓܼܠܝܼܙ ܡ̣ܢ ܢܲܗܝܼܪܵܐ ܐܲܝܟ ܣܲܟܼܠܘܼܬܹܗ ܀ 227 :ܩܪ̣ܵܐ ܠܲܡ ܝܲܥܩܘܿܒܼ ܘܐܸܡ݂ܲܪ ܠܲܒܼܪܹܗ ܝܵܘܣܸܦ ܢܲܟܼܦܵܐ 228 ܕܬܼܵܐ ܙܸܠ ܘܲܚܙܝܼ ܫܠܵܡܵܐ ܕܐܲܚܲܝ̈ܟ ܘܲܕܡܲܪܥܝܼܬܼܵܐ ܀ 229 :ܚ̣ܙܲܩ ܬܲܡܼܝܼܡܵܐ ܐܲܝܟ ܕܐܸܬܼܦܲܩܲܕܼ ܡ̣ܢ ܝܵܠܘܿܕܹܗ 230 ܘܥܲܡ ܗܲܕܵܡ̇ܘ̈ܗܝ ܐܵܦ ܪܸܥܝܵܢܹܗ ܒܲܦܫܝܼܛܘܼܬܼܵܐ ܀ 231 :ܚܙ̣ܵܐܘܼܗܝ ܕܐܵܬܹ̇ܐ ܘܲܚܘܝܼܚ ܟܹܐܢܵܐ ܫܦܝܼܥܵܐ 232 ܘܲܠܛܲܫܘ̣ ܣܲܝܦܵܐ ܕܪܸ̈ܥܝܵܢܲܝܗܘܿܢ ܕܲܢܡܝܼܬܼܘܢܵܝܗܝ ܀ 233 ܗܵܐ ܠܲܡ ܐܵܬܹ̇ܐ ܚܵܠܹ̇ܡ ܚܸܠܡܹ̈ܐ ܥ̣ܢܵܘ ܡܲܪ̈ܵܚܹܐ: pb. 272 234 ܬܵܘ ܕܲܢܪܝܼܡܝܼܘܗܝ ܡ̣ܢ ܚܲܝܘܼܬܼܵܐ ܘܢܸܫܪܸܐ ܚܸܠܡܵܘ̈ܗܝ ܀ 235 :ܢܫܲܬܸܿܩ ܚܲܝܵܘ̈ܗܝ ܕܠܵܐ ܬܘܼܒܼ ܢܸܗܪܘܿܓܼ ܒܲܫܒܼܝܼ̈ܚܵܬܼܵܐ 236 ܕܕܲܠܡܵܐ ܢܲܡܠܸܟ ܘܲܢܫܲܥܒܸܿܕܼ ܠܲܢ ܐܲܝܟ ܡ̇ܐ ܕܲܚܙ̣ܵܐ ܀ 237 :ܩ̣ܪܸܒܼ ܬܲܡܝܼܡܵܐ ܫܐܸܠ̣ ܒܲܫܠܵܡܵܐ ܕܡܲܠܝܲܝ̈ ܪܘܼܓܼܙܵܐ 238 ܘܠܵܐ ܦܲܢܝܼܘ ܠܹܗ ܐܲܝܕܵܐ ܕܦܲܐܝܵܐ ܠܚܘܼܒܵܐ ܕܐܲܚܹ̈ܐ ܀ 239 :ܩܲܒܸܿܠܘ ܡܸܢܹܗ ܡܙܘܿܢ ܙܲܒܼܢܵܐ ܕܚܲܝܹ̈ܐ ܕܙܲܒܼܢܵܐ 240 ܘܛܲܒܲܥܘ ܓܘܼܫܡܹܗ ܒܢܸܟܼܠܵܐ ܕܡ̇ܘܬܵܐ ܕܲܢܡܝܼܬܼܘܢܵܝܗܝ ܀ 241 :ܫܐܸ݂ܠ ܒܲܫܠܵܡܗܘܿܢ ܒܚܘܼܒܵܐ ܘܪ̈ܲܚܡܹܐ ܘܢܲܫܸܩ ܐܸܢܘܿܢ 242 ܘܠܵܐ ܦܲܢܝܼܘܼ ܠܹܗ ܫܠܵܡܵܐ ܕܝܲܗ̣̄ܒܼ ܠܗܘܿܢ ܐܲܟܼܡܵܐ ܕܘܵܠܹ̇ܐ ܀ 243 :ܐܸܟܲܠ̣ܘ ܠܲܚܡܵܐ ܕܐܸܫܬܲܕܲܪ ܠܗܘܿܢ ܡ̣ܢ ܐܲܒܼܘܼܗܘܿܢ 244 ܘܫܲܪܝܼܘ ܡܪܲܟܿܒܼܝܼܢ ܦܘܼܪ̈ܣܹܐ ܨܢܝܼܥܹ̈ܐ ܐܲܝܟ ܕܢܵܘܒܿܘܼܢܵܝܗܝ ܀ 245 :ܟܲܕܼ ܚܙ̣ܵܐܘܼܗܝ ܗ̄ܘ̣ܵܘ ܟܠܗܘܿܢ ܐܲܚܵܘ̈ܗܝ ܗܵܟܲܢ ܐܸܡ݂ܲܪܘ 246 ܕܗܵܐ ܠܲܡ ܡܲܛܝܼ ܝܵܠܹ̇ܡ ܚܸܠܡܹ̈ܐ ܘܡ̇ܘܕܲܥ ܐ̄ܪ̈ܵܙܹܐ ܀ 247 :ܗܵܢܵܘ̇ ܝܵܪܬܵܐ ܕܒܲܣܝܼܡ ܪܹܝܚܹܗ ܩܕܼܵܡ ܝܵܠܘܿܕܹܗ 248 ܢܢܲܛܪ ܐܸܒܼܠܹܗ ܒܓܼܵܘ ܣܵܚܪ̈ܵܬܲܢ ܘܲܩܕܼܵܡ ܐܲܒܼܘܼܗܝ ܀ 249 :ܗܵܢܵܘ̇ ܕܲܥܬܼܝܼܕܼ ܕܢܸܗܘܸܐ ܡ̇ܪܵܐ ܘܲܢܫܲܥܒܸܿܕܼ ܠܲܢ 250 ܘܒܲܕܼܡܘܼܬܼ ܡ̇ܪܵܐ ܢܸܣܓܿܘܿܕܼ ܩܘܼܕܼܡ̇ܘܗܝ ܘܢܸܫܬܲܥܒܲܕܼ ܠܹܗ ܀ 251 :ܐܸܬܼܚܲܫܲܒܼܘ ܗ̄ܘ̣ܵܘ ܐܲܚܵܘ̈ܗܝ ܕܝܵܘܣܸܦ ܟܲܕܼ ܐܵܡ̇ܪܝܼܢ ܗ̄ܘ̣ܵܘ 252 ܕܒܲܐܝܼܠܹܝܢ ܦܘܼܪ̈ܣܹܐ ܢܸܕܼܚܩܘܼܢܵܝܗܝ ܡ̣ܢ ܒܹܝܬܼ ܐܲܒܼܘܼܗܝ ܀ 253 :ܘܕܲܚ̣ܙܵܐ ܐܸܢܘܿܢ ܝܵܘܣܸܦ ܠܐܲܚܵܘ̈ܗܝ ܕܲܟܼܡܝܼܪܝܼܢ ܗ̄ܘ̣ܵܘ 254 ܩ̣ܪܸܒ ܨܹܐܕܲܝܗܘܿܢ ܘܫܲܐܸܠ ܐܸܢܘܼܢ ܕܡ̇ܢ ܟܵܪܝܵܐ ܠܟܼܘܿܢ ܀ 255 :ܕܲܠܡܵܐ ܐܲܪܝܵܐ ܢܦ݂ܲܠ ܒܲܓܼܙܵܪܵܐ ܘܐܲܥܕܲܝܼ ܓܸܙܪܵܐ 256 ܘܕܲܠܡܵܐ ܕܹܐܒܹ̈ܐ ܦܣܲܩ̣ܘ ܒܲܛ̈ܢܵܬܼܵܐ ܘܦܲܪܪܸܬܘܼ ܐܸܢܹܝܢ ܀ 257 :ܕܲܠܡܵܐ ܓܼܝܣܵܐ ܦܣܲܩ̣ ܡ̣ܢ ܥܵܢ̈ܵܐ ܘܲܕܼܒܲܪ ܘܐܸܙܲܠ 258 ܘܡܸܛܠ ܗܵܕܹܐ ܕܲܗܘ̤ܵܬܼ ܝܵܘܡ̇ܢ ܗܵܐ ܟܲܪܝܵܐ ܠܟܼܘܿܢ ܀ 259 :ܠܵܐ ܐܸܟܼܪܸܐ ܠܟܼܘܿܢ ܐܸܢܗܘ̤ ܕܓܼܕܼܫܲܬ̤ ܗܵܕܹܐ ܥܸܠܬܼܵܐ 260 ܕܐܝܼܬܼ ܒܹܝܬܼ ܐܲܒܼܘܼܢ ܥܘܼܬܼܪܵܐ ܪܲܒܵܐ ܕܠܵܐ ܡܸܣܬܲܝܲܟ ܀ 261 :ܙܲܠܝܼܠܵܐܝܼܬܼ ܦܩܲܪܘ ܙܲܠܝܼܠܹ̈ܐ ܒܗܵܢܵܐ ܫܲܪܒܵܐ 262 ܘܲܙܥܝܼܦܵܐܝܼܬܼ ܡܦܲܢܹܝܢ ܗ̄ܘ̣ܵܘ ܠܹܗ ܦܸܬܼܓܼܵܡ ܥܵܘ̣ܠܵܐ ܀ 263 :ܒܲܪ ܓܼܢܵܒܼܬܵܐ ܠܡܵܢ ܡܡܲܠܸܠ ܐܲܢ̄ܬܿ ܩܵܠܹ̈ܐ ܚܢܝܼܓܹ̈ܐ 264 ܕܡܸܛܠܵܬܼܵܟ ܗܵܐ ܡܸܬܿܬܿܥܝܼܩܝܼܢ ܥܸܣܪܵܐ ܓܼܒܼܪ̈ܝܼܢ ܀ 265 :ܩܪܝܼ ܠܗܘܿܢ ܠܚܸܠܡܹ̈ܐ ܗܵܢܘܿ݁ܢ ܕܲܚܠܲܡ̣ܐܼ ܒܟܼܠܗܘܿܢ ܝܵܘܡܲܝ̈ܟ 266 ܘܲܢܦܲܨܘܿܢܵܟ ܡ̣ܢ ܐܘܼܠܨܵܢܹ̈ܐ ܕܗܵܐ ܡܲܛܝܼ ܠܵܟ ܀ 267 :ܪܗܸܛ ܝܼܗܘܼܕܼܵܐ ܘܲܫܡ݂ܲܛ ܣܲܝܦܵܐ ܐܲܝܟ ܕܢܡܝܼܬܼܝܼܘܼܗܝ 268 ܘܪܘܼܒܹܝܠ ܛܲܝܸܒܼ ܓܘܼܒܵܐ ܣܦܝܼܩܵܐ ܕܢܸܣܬܲܬܲܪ ܒܹܗ ܀ 269 ܫܕܼܵܐܘܼܗܝ ܐܲܚܵܘ̈ܗܝ ܟܲܕܼ ܒܵܟ݂ܹ̇ܐ ܗ̄ܘ̣ܵܐ ܘܲܡܪܝܼܡ ܩܵܠܹܗ: pb. 273 270 ܕܡ̇ܢܵܐ ܥܸܒܼ̇ܕܹܿܬܼ ܘܡ̇ܢܵܐ ܗ̄ܝܼ ܣܲܟܼܠܘܼܬܼܗܝ ܕܗܵܐ ܦܪܲܥܬܿܘܿܢܵܢܝ ܀ 271 :ܨܲܠܝܼ ܝܵܘܣܸܦ ܒܐܸܫܬܹܿܗ ܕܓܼܘܼܒܵܐ ܘܲܩ̣ܪܵܐ ܠܡܵܪܹܗ 272 ܕܵܐܹ̇ܝܢ ܒܩܘܼܫܬܵܐ ܕܘܼܢ ܟܹܐܢܵܐܝܼܬܼ ܒܹܝܬܼ ܠܝܼ ܘܠܲܐܚܲܝ̈ ܀ 273 :ܚܵܪ̣ ܗ̄ܘ̣ܵܐ ܝܵܘܣܸܦ ܠܪܵܘܡ̇ܐ ܘܥܘܼܡܩܵܐ ܘܠܲܝܬܿ ܕܲܡܥܲܕܲܪ 274 ܘܗܵܐ ܬܲܓܵܪܹ̈ܐ ܐܸܬܿܛܲܝܲܒܼܘ ܠܹܗ ܡ̣ܢ ܐܲܠܵܗܵܐ ܀ 275 :ܗܝ̤ ܟܹܐܢܘܼܬܼܵܐ ܛܲܝܒܲܬ̤ ܐܸܢܘܿܢ ܠܐܲܦܲܝ̈ ܓܘܼܒܵܐ 276 ܕܢܹܐܬܼܘܿܢ ܢܦܲܝܓܼܘܼܢ ܬܲܡ̇ܢ ܛܲܗܪܵܐ ܡܸܛܠܵܬܹܗ ܀ 277 :ܩ̣ܪܸܒܼܘ ܬܲܓܵܪܹ̈ܐ ܠܐܲܦܲܝ̈ ܓܘܼܒܵܐ ܘܐܲܩܲܪܘ ܛܲܗܪܵܐ 278 ܪܗܸܛܘ̣ ܣܵܪ̈ܘܿܚܹܐ ܠܐܲܦܲܝ̈ ܓܘܼܒܵܐ ܕܢܸܙܘܿܢ ܐܸܢܘܿܢ ܀ 279 :ܐܲܣܩܘܼܗܝ ܠܝܵܘܣܸܦ ܡ̣ܢ ܓܵܘ ܓܘܼܒܵܐ ܘܕܲܒܼܪܘܼܗܝ ܘܐܸܙܲܠܘ̣ 280 ܘܫܲܪܝܼܘ ܒܵܥܹ̇ܝܢ ܠܘܸܝܵܐ ܒܐܘܼܪܚܵܐ ܕܢܹܐܙܲܠ ܥܲܡܗܘܿܢ ܀ 281 :ܩ̣ܪܸܒܼܘ ܣܵܪ̈ܘܿܚܹܐ ܠܘܵܬܼ ܬܲܓܵܪܹ̈ܐ ܘܫܲܐܸܠܘ ܐܸܢܘܿܢ 282 ܕܐܸܢ ܒܵܥܹ̇ܝܢ ܐ̄ܢܬܿܘܿܢ ܥܲܒܼܕܵܐ ܠܡܸܙܒܲܢ ܐܝܼܬܼ ܗ̄ܘ̣ ܨܹܐܕܲܝܢ ܀ 283 :ܛܲܠܝܵܐ ܥܠܲܝܡܵܐ ܕܫܲܦܝܼܪ ܚܸܙܘܹܗ ܘܲܪܓܼܝܼܓܼ ܣܲܓܿܝܼ 284 ܕܚܲܟܿܝܼܡ ܘܝܵ̇ܕܲܥ ܠܲܡܫܲܡܵܫܘܼ ܥܒܝܼܪܵܐ ܘܐ̄ܢܵܫܵܐ ܀ 285 :ܡܲܝܬܹܿܝܢܲܢ ܠܹܗ ܘܚܵܙܹ̇ܝܢ ܐ̄ܢܬܿܘܿܢ ܠܹܗ ܩܘܿܨܘܼܢ ܛܝܼܡܵܘ̈ܗܝ 286 ܗܲܒܼܘ ܠܲܢ ܛܝܼܡܹ̈ܐ ܘܲܕܼܒܲܪܘ ܥܲܒܼܕܵܐ ܘܙܸܠܘ ܒܲܫܠܵܡܵܐ ܀ 287 :ܪܗܸܛܘ̣ ܡܲܪ̈ܲܚܹܐ ܥܲܠ ܡܲܟܿܝܼܟܼܵܐ ܕܲܢܙܲܒܿܢܘܼܢܵܝܗܝ 288 ܐܲܝܟ ܡ̇ܐ ܕܲܪܗܸܛܘ ܐܵܦ ܝܗ̄ܘܼܕܵܝܹ̈ܐ ܥܲܠ ܦܵܪܘܿܩܲܢ ܀ 289 :ܣܲܓܿܝܼ ܕܵܡܹ̇ܐ ܫܲܪܒܹܿܗ ܕܝܵܘܣܸܦ ܠܲܕܼܦܵܘܿܩܲܢ 290 ܕܟܲܕܼ ܠܵܐ ܐܲܣܟܸܿܠ ܬܠܵܐ̣ܘܼܗܝ ܒܝܼܫܹ̈ ܠܥܸܠ ܡ̣ܢ ܩܲܝܣܵܐ ܀ 291 :ܚܲܪܡ̇ܢܵܐܝܼܬܼ ܣܥ݂ܲܪܘ ܡܲܪ̈ܵܚܹܐ ܒܗܵܘ̇ ܬܲܡܝܼܡܵܐ 292 ܘܲܕܼܠܵܐ ܚܵܘܣܵܢ ܨܵܕܼܘ ܗ̄ܘ̣ܵܘ ܘܐܲܝܬܿܝܘܼܗܝ ܨܹܝܕܼ ܬܲܓܵܪܹ̈ܐ ܀ 293 :ܚܙ̣ܵܘ ܬܲܓܵܪܹ̈ܐ ܠܫܘܼܦܪܹܗ ܕܝܵܘܣܸܦ ܘܐܸܬܼܪܲܓܼܪܲܓܼܘ ܠܹܗ 294 ܟܲܕܼ ܣܵܒܲܪܝܼܢ ܗ̄ܘ̣ܵܘ ܕܟܸܣܦܵܐ ܣܲܓܿܝܼ ܒܵܥܹ̇ܝܢ ܗ̄ܘ̣ܵܘ ܒܹܗ ܀ 295 :ܥܢ̣ܵܘ ܡܲܪ̈ܵܚܹܐ ܕܥܸܣܪܝܼܢ ܕܟܸܣܦܵܐ ܒܵܥܹ̇ܝܢܲܢ ܒܹܗ 296 ܘܠܵܐ ܣܲܓܿܝܼܐܝܼܢ ܐܘܼܟܼܠܵܐ ܗ̄ܘ̣ ܕܝܵܘܡ̇ܐ ܗܲܒܼܘܼܢ ܘܣܲܒܼܘܼܢ ܀ 297 :ܡ̣ܢ ܕܲܚܙ̣ܵܐ ܗ̄ܘ̣ܵܐ ܝܵܘܣܸܦ ܛܲܠܝܵܐ ܕܗܵܕܹܐ ܦܣܲܩ̣ܘ ܠܹܗ 298 ܘܡܸܬܼܢܲܟܼܪܸܐ ܠܹܗ ܡ̣ܢ ܒܹܝܬܼ ܐܲܒܼܘܼܗܝ ܘܡ̣ܢ ܒܹܝܬܼ ܐܲܚܵܘ̈ܗܝ ܀ 299 :ܒܪܲܟ ܗ̄ܘ̣ܵܐ ܘܲܣܓܸܕܼ ܩܘܼܕܼܡܲܬܼ ܐܲܚܵܘ̈ܗܝ ܟܲܕܼ ܒܵܟܹ̇ܐ ܗ̄ܘ̣ܵܐ 300 ܘܫܵܦ̈ܥܵܢ ܕܸܡܥܵܘ̈ܗܝ ܥܲܠ ܟܲܬܼܦܵܬܼܗܘܿܢ ܘܒܼܵܥܹܐ ܡܸܢܗܘܿܢ ܀ 301 :ܐܹܡܘܼܬܼ ܗܵܪܟܵܐ ܡ̣ܢ ܐܝܼܕܲܝ̈ܟܿܘܿܢ ܒܗܵܢ ܥܸܕܵܢܵܐ 302 ܘܠܵܐ ܐܸܙܕܲܒܲܢ ܘܐܸܗܘܸܐ ܥܲܒܼܪܵܐ ܒܒܹܝܬܼ ܢܘܼܟܼܪ̈ܵܝܹܐ ܀ 303 :ܡ̇ܘܡܸܐ ܐ̄ܢܵܐ ܠܟܼܘܿܢ ܒܗܵܘ̇ ܐܲܠܵܗܵܐ ܕܒܝܹܬܼ ܐܲܒܼܪܵܗܵܡ 304 ܠܵܐ ܬܫܲܕܿܪܘܼܢܵܢܝ ܠܐܲܬܼܪ̈ܵܘܵܬܼܵܐ ܕܠܵܐ ܡܕܲܪܲܫ ܐ̄ܢܵܐ ܀ 305 ܡܸܛܠ ܝܲܥܩܘܿܒܼ ܗܵܐ ܟܲܪܝܵܐ ܠܝܼ ܕܫܵܒܹ̇ܩ ܐ̄ܢܵܐ ܠܹܗ: pb. 274 306 ܘܓܼܵܥ̇ܝܵܐ ܥܠܲܝܟܿܘܿܢ ܐܵܦ ܣܲܝܒܲܘܼܬܹܗ ܘܛܲܠܝܘܼܬܼܝ ܥܲܡܹܗ ܀ 307 :ܪܘܼܒܹܝܠ ܒܘܼܟܼܪܵܐ ܝܵ̇ܕܪܬܵܐ ܪܚܝܼܡܵܐ ܚܘܼܣ ܥܲܠ ܐܲܚܘܼܟ 308 ܘܠܵܐ ܬܲܚܬܼܘܼܢܵܝܗܝ ܠܐܲܒܼܘܼܢ ܣܵܒܼܵܐ ܒܒܼܝܼܫܬܵܐ ܠܲܫܝܘܿܠ ܀ 309 :ܫܸܡܥܘܿܢ ܫܡܲܥܲܝܢܝ ܘܚܘܼܣ ܥܲܠ ܐܲܚܘܼܟ ܒܗܵܢ ܥܸܕܵܢܵܐ 310 ܘܠܵܐ ܐܸܙܕܲܒܲܢ ܘܐܸܗܘܸܐ ܥܲܒܼܕܵܐ ܠܒܹܝܬܼ ܢܘܼܟܼܪ̈ܵܝܹܐ ܀ 311 :ܝܗ̄ܘܼܕܼܵܐ ܙܪܝܼܙܵܐ ܘܓܼܘܼܪܝܵܐ ܕܐܲܝܵܐ ܢܛܘܼܠܘܼܢ ܪ̈ܲܚܡܲܝܟ 312 ܘܠܵܐ ܬܥܝܼܩܘܼܢܵܝܗܝ ܠܐܲܒܼܘܼܢ ܣܵܒܼܵܐ ܒܒܼܝܼܫܬܵܐ ܩܫܝܼܬܼܵܐ ܀ 313 :ܣܲܚܦܹܗ ܪܘܼܒܹܝܠ ܕܲܚܩܹܗ ܫܸܡܥܘܿܢ ܙܥܲܩ̣ ܒܹܗ ܝܗ̄ܘܼܕܵܐ 314 ܐܵܦ ܢܲܦܬܵܠܝ ܛܲܝܸܒܼ ܘܐܲܝܬܿܝܼ ܦܟܼܵܪܹ̈ܐ ܠܐܝܼܕܼܵܘ̈ܗܝ ܀ 315 :ܙܒܼܘܼܠܘܿܢ ܐܸܵܡܲ݁ܪ ܕܠܵܐ ܡܸܬܼܒܲܥ̈ܝܵܢ ܣܘܿܓܼܠܵܐ ܕܡܸܠܹ̈ܐ 316 ܦܘܼܟܼܪܘܼܗܝ ܠܛܲܠܝܵܐ ܘܐܲܫܠܡܘܼܢܵܝܗܝ ܘܦܘܼܫܘܼܢ ܡܸܢܹܗ ܀ 317 :ܡ̣ܢ ܕܲܚܙ̣ܵܐ ܗ̄ܘ̣ܵܐ ܝܵܘܣܸܦ ܛܲܠܝܵܐ ܕܠܲܝܬܿ ܬܘܼܒܼ ܡܸܠܹ̈ܐ 318 ܬܠ̣ܵܐ ܗ̄ܘ̣ܵܐ ܥܲܝܢܵܘ̈ܗܝ ܠܐܲܦܲܝ̈ ܪܵܘܡ̇ܐ ܘܗܵܟܲܢ ܐܸܡ̣ܲܪ ܀ 319 :ܡܲܢ ܕܹܝܢ ܥܲܒܼ݂ܕܲܢܝ ܐܲܝܟ ܦܵܪܲܚܬܼܵܐ ܩܲܠܝܼܠ ܓܸܦܹ̈ܐ 320 ܘܦܸܪܚܹ̇ܬܼ ܘܫܲܪܹܝܬܼ ܘܲܚܙܹ̇ܬܼ ܝܘܼܩܢܵܐ ܕܗܵܝ̇ ܣܲܝܒܲܘܼܬܼܵܐ ܀ 321 :ܡܲܢ ܕܹܝܢ ܝܲܗ̣̄ܒ ܠܝܼ ܩܵܠܵܬ ܕܪܲܥܡܵܐ ܕܚܲܣܝܼܢ ܡ̣ܢ ܟܠ 322 ܘܲܩܥܹ̇ܝܬܼ ܡ̣ܢ ܫܹܠܝ ܘܲܫܡ݂ܲܥ ܐܲܒܼܘܼܢ ܩܵܠ ܪ̈ܘܼܥܵܡܲܝ ܀ 323 :ܡܲܢ̣ܘܼ ܢܹܐܙܲܠ ܢܲܦܸܠ ܒܐܸܕܼܡܵܗ̇ ܕܗܵܝ̇ ܣܲܝܒܿܘܼܬܼܵܐ 324 ܕܗܵܐ ܒܲܪ ܢܸܕܪ̈ܲܝܟ ܗܵܐ ܡܸܬܿܛܲܪܲܦ ܒܐܲܢܼܪ̈ܵܘܵܬܼܵܐ ܀ 325 :ܡܲܢ̣ܘܼ ܩܵܪܸܒܼ ܠܪܵܘܡ̇ܐ ܪܲܒܵܐ ܕܙܲܠܝܼܠܘܼܬܼܵܐ 326 ܘܲܡܚܵܙܹܐ ܠܵܗ̇ ܠܗܵܝ̇ ܟܘܿܬܿܝܼܢܵܐ ܩܕܼܵܡ̇ܘܗܝ ܕܝܲܥܩܘܼܒܼ ܀ 327 :ܫܩ݂ܲܠܘ ܣܵܪ̈ܘܿܚܹܐ ܠܟܼܘܿܬܿܝܼܢ ܝܵܘܣܸܦ ܘܲܢܟ݂ܲܣܘ ܓܲܕܼܝܵܐ 328 ܘܲܠܟܼܘܿܬܿܝܼܢܵܐ ܦܲܠܦܲܠܘܗ̇ ܒܲܕܼܡ̇ܐ ܘܫܲܕܿܪܘܼܗ̇ ܠܐܲܒܼܘܼܗܝ ܀ 329 :ܟܲܕܼ ܥܸܠܲܬ̤ ܗ̄ܘ̣ܵܬܼ ܗܵܒ̇ ܟܘܿܬܿܝܼܢܵܐ ܩܕܼܵܡ̇ܘܗܝ ܕܝܲܥܩܘܿܒܼ 330 ܘܐܸܡ݂ܲܪܘ ܗ̄ܘ̣ܵܘ ܠܹܗ ܣܲܒܼ ܐܸܫܬܵܘܕܲܥ ܠܵܟ ܟܘܿܬܿܝܼܢܵܐ ܀ 331 :ܐܸܢ ܕܲܒܼܪܵܟ ܗ̄ܝܼ ܘܐܸܢ ܕܚܲܒܿܝܼܒܼܵܟ ܠܵܐ ܝܵ̇ܕܲܥܝܼܢܲܢ 332 ܕܲܒܼܓܼܵܘ ܚܘܼܪܒܐ ܚܢܲܢ ܐܸܫܟܲܚܢܵܗ̇ ܟܲܕܼ ܦܵܗܹ̇ܝܢܲܢ ܀ 333 :ܡܸܕܼܡ̇ܐ ܠܟܼܘܿܬܿܝܼܢ ܝܵܘܣܸܦ ܠܵܐ ܝܵܕܼܥ̇ܝܼܢܲܢ 334 ܘܐܸܠܘܼܗܵܕܿܐ ܗ̄ܝܼ ܠܵܐ ܬܸܬܼܚܲܡܲܬܼ ܥܲܠ ܕܣܲܒܲܪܢܵܟ ܀ 335 :ܚܙ̣ܵܐ ܗ̄ܘ̣ܵܐ ܝܲܥܩܘܿܒܼ ܠܟܼܘܿܬܿܝܼܢ ܝܵܘܣܸܦ ܕܒܲܕܼܡ̇ܐ ܨܒܼܝܼܥܵܐ 336 ܘܐܲܚܕܹܿܗ ܓܘܼܢܚܵܐ ܘܐܲܝܠܸܠ ܘܲܒܼܟܼܵܐ ܡܲܪܝܼܪܵܐܝܼܬܼ ܀ 337 :ܡܲܢ̣ܘܼ ܬܲܒܿܪܹܗ ܠܚܘܼܛܪܵܐ ܕܣܲܝܒܿܘܼܬܼܝ ܣܵܡܹ̇ܟ ܠܐܲܒܼܘܼܗܝ 338 ܕܢܸܦܠܹ̇ܬܼ ܡܸܟܹܿܝܠ ܘܠܲܝܬܿ ܬܘܼܒܼ ܕܐܵܚܹ̇ܕܼ ܘܲܡܥܲܕܿܪ ܠܝܼ ܀ 339 :ܡܲܢ̣ܘܼ ܕܲܥܸܟ ܫܪܵܓܼܵܐ ܕܐܲܒܼܘܼܗܝ ܕܲܦܠܸܐ ܢܘܼܗܪܹܗ 340 ܘܲܒܼܟܲܪܝܘܼܬܹܗ ܡܸܬܿܬܲܩܲܠ ܐ̄ܢܵܐ ܐܲܝܟ ܕܲܒܼܚܸܫܟܵܐ ܀ pb. 275 341 :ܡܲܢ̣ܘܼ ܩܲܛܦܹܗ ܠܦܸܩܚܵܐ ܪܓܼܝܓܼܵܐ ܕܒܲܣܝܼܡ ܪܹܚܹܗ 342 ܘܲܓܼܕܲܠ ܝܲܗ̣̄ܒ ܠܝܼ ܟܠܝܼܠܵܐ ܕܟܼܘܼ̈ܒܹܿܐ ܒܟܼܠܗܘܿܢ ܝܵܘܡܲܝ̈ ܀ 343 :ܡܲܢ̣ܘܼ ܢܩ݂ܲܫ ܠܝܼ ܓܢܘܿܢܵ ܕܐܸܒܼܠܵܐ ܒܗܵܢܵܐ ܙܲܒܼܢܵܐ 344 ܘܲܚܠܵܦ ܪܸܩܕܼܵܐ ܗܵܐ ܡܲܪܩܸܕܼ ܐ̄ܢܵܐ ܘܲܡܒܲܟܸܿܐ ܐ̄ܢܵܐ ܀ 345 :ܣܕܲܩ ܗ̄ܘ̣ܵܐ ܡ̇ܐܢܵܘ̈ܗܝ ܘܲܠܒܸ݂ܫ ܣܲܩܵܐ ܘܝܼܬܼܒܼ ܒܐܸܒܼܠܵܐ 346 ܘܲܦܪ݂ܲܣ ܩܕܼܵܡ̇ܘܗܝ ܠܟܼܘܿܬܼܝܼܢ ܝܵܘܣܸܦ ܘܡܸܬܼܝܒܲܩܸܐ ܒܵܗ̇ ܀ 347 :ܐܲܝܟܲܢ ܐܸܣܒܲܪ ܥܲܠ ܡܲܦܲܩܬܵܟ ܠܵܐ ܝܵ̇ܕܲܥ ܐ̄ܢܵܐ 348 ܘܒܲܐܝܠܹܝܢ ܦܘܼܪ̈ܣܹܐ ܦܪܲܫܬܿ ܒܲܪ ܢܸܕܼܪ̈ܲܝ ܡ̣ܢ ܒܹܝܬܼ ܐܲܒܼܘܼܟ ܀ 349 :ܐܸܢ ܗܘ̤ ܕܐܲܝܵܐ ܬܲܒܼܪܵܟ ܒܐܘܼܪܚܵܐ ܠܵܐ ܫܲܪܝܼܪܵܐ 350 ܕܥܲܡ ܟܘܿܬܿܝܼܢܵܟ ܐܵܦ ܥܲܠ ܡ̇ܘܬܵܟ ܥܲܠ ܐܸܬܼܒܲܕܲܩ ܀ 351 :ܕܲܠܡܵܐ ܕܓܼܣܵܐ ܦܲܪܫܹܗ ܠܲܪܘܼܡܝ ܡ̣ܢ ܒܹܝܬܼ ܐܲܒܼܘܼܗܝ 352 ܘܠܵܐ ܐܸܫܬܿܡܥܲܬ̤ ܕܐܸܬܵܐ ܓܼܝܣܵܐ ܠܐܲܬܼܪܵܐ ܗܵܢܵܐ ܀ 353 :ܕܲܠܡܵܐ ܚܣܵܡܵܐ ܦܲܪ̣ܫܹܗ ܠܚܲܒܿܝܼܒܼܝ ܡ̣ܢ ܒܹܝܬܼ ܐܲܒܼܘܼܗܝ 354 ܐܝܼܬܼ ܬܘܼܟܼܠܵܢܵܐ ܥܲܠ ܟܹܐܢܘܼܬܼܵܐ ܕܬܼܵܒܼ̇ܥܵܐ ܕܝܼܠܵܗ̇ ܀ 355 :ܫܲܕܲܪ ܝܼܥܩܘܿܒܼ ܘܐܲܝܬܿܝܼ ܠܲܒܼܢܵܘ̈ܗܝ ܡ̣ܢ ܠܘܵܬܼ ܥܵܢܵܐ 356 ܘܫܲܐܸܠ ܐܸܢܘܿܢ ܡܸܛܠ ܝܵܘܣܸܦ ܕܡ̇ܢܵܐ ܓܲܕܼܫܹܗ ܀ 357 :ܓܲܙ̣ ܗ̄ܘ̣ܵܐ ܘܲܫܕܼܵܐ ܚܸܘܵܪ̈ܵܬܹܗ ܩܕܼܵܡ ܥܲܝܢܲܝ̈ܗܘܿܢ 358 ܟܲܕܼ ܒܵܟܹ̇ܐ ܗ̄ܘ̣ܵܐ ܘܡܸܬܼܟܲܫܲܦ ܗ̄ܘ̣ܵܐ ܘܒܼܵܥܹ̇ܐ ܡܸܢܗܘܿܢ ܀ 359 :ܡ̇ܘܡܸܐ ܐ̄ܢܵܐ ܠܟܼܘܿܢ ܒܗܵܘ̇ ܐܲܠܵܗܵܐ ܕܠܵܐ ܡܸܬܿܕܲܓܼܠ 360 ܕܡ̇ܢܵܐ ܓܼܕܫܹܗ ܠܝܵܘܸܣܦ ܕܐܸܬܼܵܐ ܨܹܝܕܼ ܡܲܪܥܝܼܬܼܵܐ ܀ 361 :ܥܢ̣ܵܐܘܼܗܝ ܗܸܢܘ̣ܿܢ ܟܲܕܼ ܒܵܪܹܝܢ ܗ̄ܘ̣ܵܘ ܕܲܓܵܠܵܐܝܼܬܼ 362 ܘܲܒܼܡܵܘ̈ܡܵܬܼܵܐ ܡܸܬܼܚܲܫܚܝܼܢ ܠܹܗ ܕܠܵܐ ܝܵ̇ܕܲܥܝܼܢܲܢ ܀ 363 :ܥܵܘܠܵܐܝܼܬܼ ܒܵܟܹ̇ܝܢ ܐܸܢܘܿܢ ܩܕܼܵܡ ܐܲܒܼܘܼܗܘܿܢ 364 ܘܗܲܝܡܸܢ ܐܸܢܘܿܢ ܝܲܥܩܘܿܒܼ ܣܵܒܼܵܐ ܕܠܵܐ ܝܵ̇ܕܲܥܝܼܢܲܢ ܀ 365 :ܠܬ̣ܵܐ ܗ̄ܘ̣ܵܐ ܝܲܥܩܘܿܒܼ ܥܲܝܢܵܘ̈ܗܝ ܘܚܵܪ̣ ܗ̄ܘ̣ܵܐ ܠܐܲܦܲܝ̈ ܪܵܘܡ̇ܐ 366 ܘܲܡܨܲܠܸܐ ܗ̄ܘ̣ܵܐ ܩܕܼܵܡ ܐܲܠܵܗܵܐ ܘܒܼܵܥܹ̇ܐ ܡܸܢܹܗ ܀ 367 :ܐܲܢ̄ܬܿ ܐܲܠܵܗܵܐ ܥܵܢܹ̇ܐ ܠܟܹܐܢܹ̈ܐ ܐܲܝܟ ܛܲܝܒܿܘܼܬܹܗ 368 ܥܢܝܼܘܗܝ ܐܲܢ̄ܬܿ ܠܲܪܚܘܼܡܝ ܐܵܦ ܢܲܛܲܪܲܝܗܝ ܐܲܝܟܵܐ ܕܐܝܼܬܼܵܘܗܝ ܀ 369 :ܦܪܘܿܣ ܠܹܗ ܟܸܢܦܵܟ ܕܢܸܣܬܲܬܲܪ ܒܹܗ ܡ̣ܢ ܢܸܟܼܝܵܢܹ̈ܐ 370 ܘܥܲܕܼ ܩܲܝܵܡ ܐ̄ܢܵܐ ܐܲܫܘܵܢܝ ܕܐܸܚܙ̣ܐ ܩܢܘܿܡܹܗ ܦܲܬܝܵܐ ܀ 371 :ܥܲܕܼܠܵܐ ܐܸܚܘܿܬܼ ܠܘܵܬܼ ܥܲܢܝܼ̈ܕܹܐ ܐܲܫܘܵܢܝ ܕܐܸܚܙܹܝܘܗܝ 372 ܘܐܹܣܝܼܡ ܣܸܦܘܵܬܼܝ ܥܲܠ ܣܸܦܘܿܬܹܗ ܘܗܵܝܕܹܿܝܢ ܐܹܡܘܼܬܼ ܀ pb. 276 373 :ܥܲܠ̣ܘ ܬܲܠܵܪܹ̈ܐ ܠܒܹܝܬܼ ܡܸܨܪ̈ܵܝܹܐ ܘܝܵܘܣܸܦ ܥܲܡܗܘܿܢ 374 ܟܲܕܼ ܚܵܕܹܝܢ ܗ̄ܘ̣ܵܘ ܘܡܸܬܿܕܲܡܪܝܼܢ ܗ̄ܘ̣ܵܘ ܡܸܛܠܵܬܹܗ ܀ 375 :ܫܲܝܢܵܐ ܚܙ݂ܲܩ ܒܵܗ̇ ܒܐܘܼܪܚܲܢ ܡ̣ܢ ܗܵܘ̇ ܝܵܘܡ̇ܐ 376 ܕܗܵܢܵܐ ܥܲܒܼܕܵܐ ܕܐܸܣܬܲܩܒܲܠ ܠܲܢ ܕܢܹܐܙܲܠ ܥܲܡܲܢ ܀ 377 :ܥܒܼܵܕܵܘ̈ܗܝ ܕܡ̇ܪܝܵܐ ܐܝܼܬܼ ܒܲܠܝܘܼܬܹܗ ܕܗܵܢܵܐ ܛܲܠܝܵܐ 378 ܕܡܸܬܼܢܲܛܪܝܼܢܲܢ ܡ̣ܢ ܢܸܟܼܝܵܢܹ̈ܐ ܡܸܛܠܵܬܹܗ ܀ 379 :ܕܠܵܐ ܗܘ̤ܵܐ ܥܲܒܼܕܵܐ ܗ̄ܘ̣ ܚܢܲܢ ܝܵܕܼܥ̇ܝܼܢܲܢ ܫܲܪܝܼܪܵܐܝܼܬܼ 380 ܘܠܵܐ ܘܵܠܹ̇ܐ ܠܹܗ ܕܒܲܕܡܘܼܬܼ ܥܲܒܼܕܸܵܐ ܢܸܫܬܲܥܒܲܕܼ ܠܹܗ ܀ 381 :ܥܲܠ̣ܘ ܬܲܓܼܵܪܹ̈ܐ ܠܲܩܕܼܵܡ ܝܵܘܣܸܦ ܘܲܒܼܥ̣ܵܘ ܡܸܢܹܗ 382 ܕܐܲܟܼܘܿܠ ܝܵܘܣܸܦ ܘܐܸܫܬܲܝ ܥܲܡܲܢ ܘܐܲܥܒܲܪ ܐܸܒܼܠܵܐ ܀ 383 :ܠܵܐ ܬܸܟܼܪܸܐ ܠܵܟ ܡܸܛܠ ܙܲܒܼܢܵܐ ܕܐܸܣܬܲܩܒܲܠ ܠܵܟ 384 ܕܒܲܪ ܚܹܐܪܹ̈ܐ ܐܲܢ̄ܬܿ ܘܠܵܘ ܦܠܼܓܼܝܼܢܲܢ ܐܵܦ ܥܲܠ ܗܵܕܹܐ ܀ 385 :ܢܦܲܩ̣ ܦܘܼܛܝܼܦܵܪ ܘܲܚܙ̣ܵܝܗܝ ܠܝܵܘܣܸܦ ܨܹܝܕܼ ܬܲܓܵܪܹ݁ܐ 386 ܘܐܸܬܼܪܲܓܼܪܲܓܼ ܠܹܗ ܠܫܘܼܦܪܹܗ ܦܲܐܝܵܐ ܘܫܲܪܝܼ ܕܢܹܐܡܲܪ ܀ 387 :ܕܲܠܡܵܐ ܥܲܒܼܕܵܐ ܗ̄ܘ̣ ܗܵܢܵܐ ܛܲܠܝܵܐ ܗܲܒܼܘܼܢܵܝܗܝ ܠܝܼ 388 ܘܐ̄ܢܵܐ ܝܵܗܹ̇ܒܼ ܐ̄ܢܵܐ ܛܝܼܡܵܘ̈ܗܝ ܣܲܓܿܝܼ ܒܚܲܕܼܘܵܐ ܪܲܒܵܐ ܀ 389 :ܐ̄ܡܲܪܘ ܬܲܓܵܪܹ̈ܐ ܕܐܸܢ ܗܘ̤ ܕܨܵܒܹ̇ܐ ܕܢܹܐܙܲܠ ܥܲܡܵܟ 390 ܡ̇ܢ ܟܵܠܹ̇ܐ ܠܹܗ ܥܸܣܪܝܼܢ ܕܟܸܣܦܵܐ ܗ̄ܘ̣ ܢܹܐܙܲܠ ܥܲܡܵܟ ܀ 391 :ܫܩܲܠܘ̣ ܬܲܓܵܪܹ̈ܐ ܛܝܼܡܵܘ̈ܗܝ ܕܝܵܘܣܸܦ ܡ̣ܢ ܦܘܿܛܝܼܦܵܪ 392 ܘܲܩ̣ܪܸܒܼܘ ܨܹܐܕܼܵܘܗܝ ܘܲܡܢܲܫܩܝܼܢ ܠܹܗ ܘܒܼܵܥܹ̇ܝܢ ܡܸܢܹܗ ܀ 393 :ܠܵܐ ܬܸܟܼܪܸܐ ܠܵܟ ܝܵܘܣܸܦ ܛܲܠܝܵܐ ܡܸܛܠ ܗܵܕܹܐ 394 ܘܠܵܐ ܬܸܬܼܚܲܡܲܬܼ ܕܲܫܩ݂ܲܠܢ ܛܝܼܡܲܝ̈ܟ ܕܲܨܪܝܼܟܼܝܼܢܲܢ ܀ 395 :ܐܸܡ̣ܲܪ ܝܵܘܣܸܦ ܐܘܿ ܬܲܓܼܵܪܹ̈ܐ ܙܸܠܘ ܒܲܫܠܵܡܵܐ 396 ܡ̇ܪܝܵܐ ܢܒܲܪܸܟ ܡܲܪ̈ܗܵܛܲܝܟܿܘܿܢ ܥܕܲܡ̇ܐ ܠܥܵܠܲܡ ܀ 397 :ܗ̤ܝ ܟܹܐܢܘܼܬܼܵܐ ܩܪܵܬ̤ ܠܦܘܿܛܝܼܦܵܪ ܡ̣ܢ ܓܵܘ ܒܲܝܬܹܿܗ 398 ܕܢܹܐܬܸܐ ܘܢܸܙܒܸܿܢ ܥܲܒܼܕܵܐ ܕܡܲܡܐܠܸܟ ܥܲܠ ܡܸܨܪ̈ܵܝܹܐ ܀ 399 :ܕܒܲܪ̣ ܦܘܿܛܝܼܦܵܪ ܥܲܒܼܕܵܐ ܘܲܢܦܼ݂ܩ ܡ̣ܢ ܒܹܝܬܼ ܫܘܼܩܹ̈ܐ 400 ܘܐܲܫܠܸܡ ܒܐܝܼܕܹܗ ܟܠܹܗ ܒܲܝܬܹܿܗ ܠܲܡܕܲܒܵܪܘܼ ܀ 401 :ܝܲܗ̣̄ܒܼܠܹܗ ܘܙܲܗܪܹܗ ܕܟܼܠܹܗ ܓܲܙܹܗ ܕܫܲܠܝܼܛ ܗ̄ܘ̣ܵܐ ܒܹܗ 402 ܕܲܚܙܝܼ ܘܕܲܒܲܪ ܚܲܟܿܝܼܡܵܐܝܼܬܼ ܐܲܝܟ ܨܸܒܼܝܵܢܵܟ ܀ 403 :ܪܗܸܛ ܗ̄ܘ̣ܵܐ ܘܣܲܒܲܪ ܠܲܒܼܢܲܝ̈ ܒܲܝܬܹܿܗ ܟܲܕܼ ܐܵܡܲ݁ܪ ܠܗܘܿܢ 404 ܕܬܼܵܘ ܦܘܼܩܘ ܘܲܚܙܵܘ ܥܲܒܼܕܵܐ ܦܲܐܝܵܐ ܕܐܸܣܬܲܩܒܲܠ ܠܲܢ ܀ 405 :ܫܲܦܝܼܪ ܚܸܙܘܹܗ ܘܲܦܠܸܐ ܓܵܘܢܹܗ ܡܗܝܼܪ ܦܲܪܨܘܿܦܹܗ 406 ܠܘܲܪܕܵܐ ܕܵܡܹ̇ܐ ܘܲܠܫܘܿܫܲܢܹ̈ܐ ܒܙܲܒܼܢܲܝ̈ ܢܝܼܣܵܢ ܀ 407 ܚܙܵܬ̤ ܫܵܛܝܼܬܼܵܐ ܠܫܘܼܦܪܹܗ ܕܝܵܘܣܸܦ ܘܐܸܬܼܪܲܓܼܪܓܲܬ̤ ܠܹܗ: pb. 277 408 ܘܒܲܕܼܡܘܼܬܼ ܢܘܼܪܵܐ ܣܸܦܲܬ̤ ܗ̄ܘ̣ܵܬܼ ܒܵܗ̇ ܪܸܓܲܬܼ ܦܲܓܼܪܹܗ ܀ 409 :ܐܲܝܟ ܐܲܪܝܘܿܬܼܵܐ ܫܸܘܪܲܬ̤ ܥܲܠ ܬܲܡܝܼܡܵܐ 410 ܠܲܡܢܲܟܵܬܼܘܼ ܦܲܓܼܪܹܗ ܘܢܲܦܫܹܗ ܒܙܲܠܝܼܠܘܼܬܼܵܗ̇ ܀ 411 :ܕܼܚܠܲܬ̤ ܥܲܝܢܵܢ̈ܗ̇ ܒܚܸܟܼܠܵܐ ܨܕܼܝܼܕܼܵܐ ܕܢܲܗܝܼܪ ܣܲܓܿܝܼ 412 ܘܓܸܕܼܠܲܬ̤ ܪܹܫܵܗ̇ ܒܐܘܼܡ̇ܢܘܼܬܼܵܐ ܘܩܵܡܲܬ̤ ܩܘܼܕܼܡ̇ܘܗܝ ܀ 413 :ܡܲܪܩܲܬ̤ ܓܘܼܫܡܵܗ̇ ܣܵܡܲܬ̤ ܪܹܝܚܵܗ̇ ܘܲܬܼܠܵܬ̤ ܕܲܗܒܼܵܐ 414 ܘܩܵܡܲܬ̤ ܩܘܼܡ̇ܘܗܝ ܕܠܵܐ ܟܘܼܚܵܕܼܵܐ ܒܙܲܠܝܼܠܘܼܬܼܵܐ ܀ 415 :ܠܸܒܲܫܲܬ̤ ܒܘܼܨܵܐ ܥܲܡ ܫܹܐܪ̈ܝܹܐ ܬܠܵܬܼ ܗܲܡܢܝܼܪܹ̈ܐ 416 ܘܬܸܪܨܲܬ̤ ܠܩܘܼܒܼܠܹܗ ܘܲܡܫܲܓܿܫܵܐ ܠܹܗ ܟܲܕܼ ܐܵܡܪܵܐ ܠܹܗ ܀ 417 :ܚܘܼܪ ܒܝܼ ܝܵܘܣܸܦ ܕܫܲܦܝܼܪܵܐ ܐ̄ܢܵܐ ܘܛܵܒܼ ܦܲܐܝܵܐ ܐ̄ܢܵܐ 418 ܘܲܪܓܼܝܼܓܼܵܐ ܐ̄ܢܵܐ ܘܲܛܥܝܼ ܥܲܡܵܟ ܘܲܕܼܒܹܝܬܼ ܐܲܒܼܘܼܟ ܀ 419 :ܩܪܵܬܹܗ ܕܢܹܐܟܼܘܿܠ ܘܠܵܐ ܒܸܣܡܲܬ̤ ܠܹܗ ܕܢܹܐܟܼܘܿܠ ܥܲܡܵܗ̇ 420 ܘܡܸܙܓܲܬ̤ ܚܲܡܪܵܐ ܘܒܲܣܲܪ ܘܲܫܕܼ݂ܵܗ̇ ܠܙܲܠܝܼܠܘܼܬܼܵܗ̇ ܀ 421 :ܡ̇ܐ ܕܩܵܪܝܵܐ ܗ̄ܘ̣ܵܬܼ ܘܠܵܐ ܥܵܢܹ̇ܐ ܠܵܗ̇ ܚܵܪܲܬ̤ ܒܐܲܪܥܵܐ 422 ܘܡ̇ܐ ܕܐܵܡܪܵܐ ܠܹܗ ܘܠܵܐ ܡܦܲܢܸܐ ܠܵܗ̇ ܐܲܝܠܸܠ ܦܘܼܡ̇ܗ̇ ܀ 423 :ܡ̇ܐ ܕܚܵܝܪܵܐ ܒܹܗ ܬܠܸܐ ܗ̄ܘ̣ܵܐ ܚܝܵܪܹܗ ܠܐܲܦܲܝ̈ ܪܵܘܡ̇ܐ 424 ܘܡ̇ܐ ܕܪܵܡܙܵܐ ܠܹܗ ܐܲܢܝܼܕܼ ܪܹܫܹܗ ܢܦܲܩ̣ ܠܲܥܒܼܵܕܹܗ ܀ 425 :ܥܵܐܹ̇ܠ ܘܢܵܦܹ̇ܩ ܫܵܪܹܐ ܘܫܵܩܹ̇ܠ ܗܝ̤ ܒܲܠܘܝܼܬܹܗ 426 ܘܠܵܐ ܡܸܫܬܲܐܠܵܐ ܠܡܸܦܲܫ ܡܸܢܹܗ ܐܵܦܠܵܐ ܩܲܠܝܼܠ ܀ 427 :ܫܲܪܝܲܬ̤ ܕܬܹܐܡܲܪ ܗܵܝ̇ ܫܵܛܝܼܬܼܵܐ ܕܠܵܐ ܟܘܼܚܵܕܼܵܐ 428 ܟܲܕܼ ܠܵܐ ܒܵܗ̇ܬܵܐ ܙܲܠܝܼܠܘܼܬܼܵܗ̇ ܡ̣ܢ ܫܡܘܿܥܹ̈ܐ ܀ 429 :ܝܵܘܣܸܦ ܠܵܐ ܬܸܒܼܣܸܐ ܒܝܼ ܕܡ̇ܪܬܵܟ ܐܝܼܬܲܝ 430 ܘܠܵܐ ܬܸܬܼܚܲܡܲܬܼ ܕܥܲܒܼܕܲܢ ܐܝܼܬܿܝܟ ܕܠܵܐ ܦܘܼܠܵܓܼܵܐ ܀ 431 :ܐܸܢܗܘ̤ ܕܬܸܬܿܟܦܝܼܣ ܘܬܸܥܒܸܿܕܼ ܨܼܒܼܝܵܢܝ ܕܐܸܡ̇ܪܹܬܼ ܠܵܟ 432 ܥܒܼ̇ܕܵܐ ܐ̄ܢܵܐ ܠܵܟ ܡ̇ܪܵܐ ܠܢܸܟܼܣܲܝ̈ ܘܲܠܩܸܢܝܵܢܲܝ̈ ܀ 433 :ܐܸܢ ܕܵܚܹ̇ܠ ܐܲܢ̄ܬܿ ܡ̣ܢ ܦܘܿܛܝܼܦܵܪ ܡ̇ܪܹܗ ܕܒܲܝܬܵܐ 434 ܥܵܒܼ̇ܕܵܐ ܐ̄ܢܵܐ ܠܵܟ ܦܘܼܪܣܵܐ ܐ̄ܚܪܹܢܵܐ ܘܠܵܐ ܕܵܚܹ̇ܠ ܐܲܢ̄ܬܿ ܀ 435 :ܐܹܫܲܕܲܪ ܠܹܗ ܣܲܡܵܐ ܘܐܸܩܛܠܝܼܘܗܝ ܐܲܝܟܵܐ ܕܐܝܼܬܼܵܘܗܝ 436 ܘܐܲܢ̄ܬܿ ܬܸܗܘܸܐ ܠܝܼ ܓܲܒܼܪܵܐ ܘܡ̇ܪܵܐ ܘܐܵܦ ܝܵܪܘܿܬܼܵܐ ܀ 437 :ܐܵܡ̇ܪܵܐ ܐ̄ܢܵܐ ܠܵܟ ܐ̄̇ܪܵܙܵܐ ܐ̄ܚܪܹܢܵܐ ܕܒܹܝܬܼ ܠܝܼ ܘܐܵܦ ܠܵܟ 438 ܕܐܝܼܬܼ ܗ̄ܘ̣ ܨܹܐܕܲܝ ܓܲܙܵܐ ܪܲܒܵܐ ܕܠܵܐ ܡܸܣܬܲܝܲܟ ܀ 439 :ܫܡ݂ܲܥ ܗ̄ܘ̣ܵܐ ܝܵܘܣܸܦ ܫܲܪܒܵܐ ܗܵܢܵܐ ܘܙܵܥܲܬ̤ ܢܲܦܫܹܗ 440 ܘܫܲܪܝܼ ܡܢܲܦܸܨ ܡ̇ܐܢܵܘ̈ܗܝ ܘܩܵܥܹ̇ܐ ܕܠܵܐ ܒܵܥܹ̇ܢܵܐ ܀ 441 :ܠܵܐ ܡ̇ܘܬܲܪ ܠܝܼ ܥܘܼܬܼܪܵܐ ܕܲܕܡ̇ܐ ܡܸܬܼܐܫܵܕܼ ܒܹܗ 442 ܘܠܵܐ ܩܵܢܹ̇ܐ ܐ̄ܢܵܐ ܩܸܢܝܵܢ ܥܵܘ̣ܠܵܐ ܕܠܵܐ ܡܸܬܼܩܲܕܹܿܐ ܀ pb. 278 443 :ܟܦܝܼܪ ܒܹܗ ܒܥܘܼܬܼܪܵܐ ܕܥܵܘ̣ܠܵܐ ܡܫܲܟܸܿܢ ܠܲܕܼܚܵܐܲ݁ܪ ܒܹܗ 444 ܘܠܵܐ ܡܸܬܼܩܲܕܲܝܵܢ ܐܵܦ ܣܝܼ̈ܡܵܬܼܵܐ ܕܲܕܡ̇ܐ ܝܵܗ̈ܒܵܢ ܀ 445 :ܠܵܐ ܚܵܫܹ̇ܠ ܐ̄ܢܵܐ ܢܸܟܼܠܵܐ ܕܥܵܘ̣ܠܵܐ ܥܲܠ ܬܲܡܝܼܡܵܐ 446 ܘܠܵܐ ܡܛܲܡܲܐ ܐܢܵܐ ܥܲܪܣܵܐ ܕܟܼܝܼܬܼܵܐ ܕܫܵܘܬܵܦܘܼܬܼܵܐ ܀ 447 :ܐܝܼܬܼ ܗ̄ܘ̣ ܨܹܐܕܲܝ ܡܲܠܟܵܐ ܫܒܼܝܼܚܵܐ ܕܥܵܡܲ݁ܪ ܒܪܵܘܡ̇ܐ 448 ܕܐܸܢ ܗܘ̤ ܕܚܵܙܹ̇ܐ ܕܐܸܥܒܸܿܕܼ ܗܵܕܹܐ ܗܵܐ ܫܵܐܹ̇ܛ ܠܝܼ ܀ 449 :ܬܠܵܐ̣ ܗ̄ܘ̣ܵܐ ܝܵܘܣܸܦ ܥܲܝܢܵܘ̈ܗܝ ܘܚܵܪ̣ ܗ̄ܘ̣ܵܐ ܠܐܲܦܲܝ̈ ܪܲܘܡ̇ܐ 450 ܘܲܡܨܲܠܸܐ ܗ̄ܘ̣ܵܐ ܩܕܼܵܡ ܐܲܠܵܗܵܐ ܘܒܼܵܥܹ̇ܐ ܡܸܢܹܗ ܀ 451 :ܐܲܢ̄ܬܿ ܐܲܣܸܩܬܵܢܝ ܡ̣ܢ ܓܵܘ ܓܼܘܒܵܐ ܕܲܫܕܼܵܢܝ ܪܘܼܒܹܝܠ 452 ܘܐܲܢ̄ܬܿ ܦܲܨܝܼܬܵܢܝ ܡ̣ܢ ܣܲܦܣܹܪܵܐ ܕܲܠܛܝܼܫܵܐ ܗ̄ܘ̣ܵܬܼ ܀ 453 :ܐܲܢ̄ܬܿ ܐܲܥܸܠܬܵܢܝ ܠܒܹܝܬܼ ܡܸܨܪ̈ܵܝܹܐ ܒܚܲܝܠܵܟ ܪܲܒܵܐ 454 ܩܘܼܡ ܠܝܼ ܗܵܫܵܐ ܐܵܦ ܥܲܕܲܪܲܝܢܝ ܡ̣ܢ ܡܸܨܪܵܝܬܵܐ ܀ 455 :ܥܲܠ̣ ܗ̄ܘ̣ܵܐ ܝܵܘܣܸܦ ܠܲܡܨܲܠܵܝܘܼ ܒܓܼܵܘ ܬܵܘܢܵܐ 456 ܘܥܸܠܲܬ̤ ܒܵܬܼܪܹܗ ܗܝ̤ ܫܵܛܝܼܬܼܵܐ ܘܐܸܚܕܲܬ̤ ܬܲܪܥܵܐ ܀ 457 :ܥܦܲܩܬܹܗ ܢܫܲܩܬܹܗ ܘܒܼܵܟܼܝܵܐ ܩܘܼܕܼܡ̇ܘܗܝ ܘܒܼܵܥ̇ܝܵܐ ܡܸܢܹܗ 458 ܕܐܸܠܵܐ ܪܚܸܡܬܼܵܟ ܚܙܝܼ ܠܵܐ ܬܲܣܠܹܝܢܝ ܒܲܪ ܥܸܒܼܪ̈ܵܝܹܐ ܀ 459 :ܘܐܸܢ ܠܵܐ ܬܸܬܿܛܦܝܼܣ ܘܬܸܥܒܸܿܕܼ ܨܼܒܼܝܵܢ ܒܡܵܢ ܕܐܹܡ݂ܲܪ ܠܵܟ 460 ܚܵܒܲܫܵܐ ܐ̄ܢܵܐ ܠܵܟ ܒܓܼܘܼܒܵܐ ܪܲܒܵܐ ܕܒܹܝܬܼ ܐܲܣܝܼܪܹ̈ܐ ܀ 461 :ܘܐܸܢ ܗܘ̤ ܕܬܸܬܿܛܦܝܼܣ ܘܬܲܪܟܸܿܢ ܪܹܫܵܟ ܠܡܸܠܲܝ̈ ܘܲܦܝܵܣܝ 462 ܥܵܒܼ̇ܕܵܐ ܐ̄ܢܵܐ ܠܵܟ ܪܹܫܵܐ ܘܡ̇ܪܵܐ ܠܟܼܠܵܗ̇ ܡܸܨܪܹܝܢ ܀ 463 :ܚܵܪ̣ ܗ̄ܘ̣ܵܐ ܝܵܘܣܸܦ ܠܪܵܘܡ̇ܐ ܘܥܘܼܡܩܵܐ ܘܠܲܝܬܿ ܕܲܡܥܲܕܲܪ 464 ܘܗܵܐ ܥܘܼܕܼܪܵܢܵܐ ܐܸܬܿܛܲܝܲܒܼ ܠܹܗ ܡ̣ܢ ܐܲܠܵܗܵܐ ܀ 465 :ܢܲܦܨܵܗ̇ ܘܫܲܕܼ݂ܵܗ̇ ܠܲܡܫܵܘܚܲܕܿܬܵܐ ܒܚܲܝܠܵܐ ܕܦܲܓܼܪܹܗ 466 ܘܐܲܪܦܝܼ ܘܲܫܕܼܵܗ̇ ܘܲܦܬ݂ܲܚ ܬܲܪܥܵܐ ܘܲܦܠܲܛ ܡܸܢܵܗ̇ ܀ 467 :ܚܙܵܬ̤ ܐܲܪܝܘܿܬܼܵܐ ܕܐܸܬܼܦܲܠܲܛ ܠܹܗ ܓܸܙܪܵܐ ܡܸܢܵܗ̇ 468 ܘܫܲܪܝܲܬ̤ ܢܵܗ̇ܡ̇ܐ ܩܵܠܹ̈ܐ ܚܢܝܼܓܹ̈ܐ ܒܓܼܵܘ ܬܵܘܢܵܐ ܀ 469 :ܫܡ݂ܲܥܘ ܗ̄ܘ̣ܵܘ ܥܲܒܼ̈ܕܹܿܐ ܘܲܒܼܢܲܝ̈ ܚܹܐܪܹ̈ܐ ܒܩܵܠܵܗ̇ ܪܵܡ̇ܐ 470 ܘܲܟܼܢܲܫ̣ܘ ܟܠܗܘܿܢ ܘܲܡܫܲܐܠܝܼܢ ܠܵܗ̇ ܕܡ̇ܢܵܐ ܓܼܕܼܫܹܟܼܝ ܀ 471 :ܫܲܪܝܲܬ̤ ܕܬܹܐܡܲܠ ܗܵܝ̇ ܫܵܛܝܼܬܼܵܐ ܕܠܵܐ ܟܘܼܚܵܕܼܵܐ 472 ܟܲܕܼ ܠܵܐ ܒܵܗ̇ܬܵܐ ܙܲܠܝܼܠܘܼܬܼܵܗ̇ ܡ̣ܢ ܚܲܒܼܪ̈ܵܬܼܵܗ̇ ܀ 473 :ܚܵܐܹ̇ܐ ܥܲܒܼܕܵܐ ܕܲܙܒܸܢ ܘܐܲܝܬܿܝܼ ܡ̇ܪܹܐ ܒܲܝܬܵܐ 474 ܘܐܲܝܟ ܙܵܢܝܼܬܼܵܐ ܚܲܫܒ݂ܲܢܝ ܘܲܨܒܼܵܐ ܕܲܢܓܲܚܸܟ ܒܝܼ ܀ 475 :ܐܲܝܟ ܢܲܟܼ̈ܦܵܬܼܵܐ ܝܲܬܿܝܼܒܼܵܐ ܗ̄ܘܹ̇ܝܬܼ ܒܓܼܵܘ ܬܵܘܢܵܐ 476 ܘܲܦܬ݂ܲܚ ܬܲܪܥܵܐ ܕܢܸܥܘܿܠ ܥܠܲܝ ܠܲܡܨܲܥܵܪܘܼܬܼܝ ܀ 477 :ܐܸܢܵܐ ܚܙܹ̇ܝܬܹܗ ܕܲܦܬ݂ܲܚ ܬܲܪܥܵܐ ܕܢܸܥܘܿܠ ܥܠܲܝ 478 ܘܫܲܪܝܼܬܼ ܘܨܸܘ̇ܚܹܝܬܼ ܘܢܸܦܒܹ̇ܬܼ ܠܐܘܼܪܥܹܗ ܐܲܝܟ ܝܵܪܘܿܪܵܐ ܀ 479 ܡ̇ܐ ܕܲܚܙ̣ܵܐ ܗ̄ܘ̣ܵܐ ܥܲܒܼܕܵܐ ܢܟܼܝܼܠܵܐ ܕܗܵܐ ܐܸܬܼܚܒܸܫ ܠܹܗ: pb. 279 480 ܣܵܡ̣ ܠܲܠܒܼܘܼܫܹܗ ܘܲܦܬ݂ܲܚ ܘܲܢܦܲܩ̣ ܐܲܝܟ ܙܲܟܵܝܵܐ ܀ 481 :ܚܙ̣ܵܘ ܡ̇ܢ ܦܲܪܥܹܗ ܗܵܢܵܐ ܥܲܒܼܕܵܐ ܠܡܵܪܵܐ ܛܵܒܼܵܐ 482 ܚܠܵܦ ܐܝܼܩܵܪܵܐ ܘܟܼܠܹܗ ܒܲܝܬܹܿܗ ܕܐܲܫܠܸܡ ܒܐܝܼܕܼܵܘ̈ܗܝ ܀ 483 :ܐ̄ܡ݂ܲܪ ܦܘܿܛܝܼܦܵܪ ܕܡܲܢ̣ܘܼ ܣܵܗܕܹܿܟܼܝ ܕܲܥܒ݂ܲܕܼ ܗܵܕܹܐ 484 ܕܐܹܕܿܘܼܢ ܥܲܡܹܗ ܥܵܘ̇ܠܵܐܝܼܬܼ ܠܵܐ ܨܵܒܹ̇ܐ ܐ̄ܢܵܐ ܀ 485 :ܠܒܼܵܫܹܗ ܒܐܝܼܕܲܝ̈ܟܿܝ ܘܐܲܢ̄ܬܿܝ ܗܵܐ ܩܵܥ̇̄ܝܵܐ ܕܚܲܝܵܒܼܵܐ ܐܲܢ̄ܬܿܝ 486 ܘܠܵܐ ܨܵܒܹ̇ܐ ܕܠܹܟܼܝ ܐܹܗܲܝܡܸܢ ܕܠܵܐ ܫܲܪܝܼܪܵܐ ܐ̄ܢܬܿܝ ܀ 487 :ܫܡ݂ܲܥ ܡܸܨܪܵܝܵܐ ܡܸܠܹ̈ܐ ܕܐܲܢ̄ܬܿܬܹܗ ܘܛܲܢ ܘܐܸܬܼܥܲܙܲܙ 488 ܘܚܲܒܼ݂ܫܹܗ ܠܝܵܣܸܦ ܒܹܝܬܼ ܐܲܣܝܼܪܹ̈ܐ ܐܲܝܟ ܣܵܣܘܿܚܵܐ ܀ 489 :ܢܦ݂ܲܠ ܙܲܕܿܝܼܩܵܐ ܒܓܼܘܼܒܵܐ ܩܲܫܝܵܐ ܕܚܲܦܪܹ݂ܗ ܢܸܟܼܠܵܐ 490 ܘܲܛܒ݂ܲܥ ܦܲܓܼܪܹܗ ܘܠܵܐ ܛܒ݂ܲܥ ܚܘܼܒܹܿܗ ܒܩܲܫܝܘܼܬܼ ܚܲܫܹ̈ܐ ܀ 491 :ܥܲܠ̣ ܗ̄ܘ̣ܵܐ ܝܵܘܣܸܦ ܠܒܹܝܬܼ ܚܸܫܘܿܟܹ̈ܐ ܘܐܲܦܨܲܚ ܐܸܢܘܿܢ 492 ܘܐܲܩܸܠ ܡܸܢܗܘܿܢ ܝܘܼܩܪܵܐ ܕܚܲܫܹ̈ܐ ܘܟܲܪܝܘܼܬܼ ܢܲܦܫܵܐ ܀ 493 :ܝܵܘܣܸܦ ܒܲܠܚܘܿܕܼ ܠܵܐ ܫܵܘܹ̇ܐ ܗ̄ܘ̣ܵܐ ܠܗܵܢ ܣܘܼܟܵܝܵܐ 494 ܘܡܲܓܵܢ ܚܲܒܼܫܹܗ ܚܣܵܡܵܐ ܣܲܡܝܵܐ ܕܠܵܐ ܒܘܼܝܵܢܵܐ ܀ 495 :ܚܒܼܝܼܫ ܗ̄ܘ̣ܵܐ ܢܲܟܦܵܐ ܘܲܡܕܲܝܲܪ ܗ̄ܘ̣ܵܐ ܥܲܡ ܙܲܠܝܼ̈ܠܹܐ 496 ܐܲܝܟ ܦܵܪܘܿܩܲܢ ܫܲܦܝܵܐ ܘܕܲܟܼܝܵܐ ܒܹܝܬܼ ܓܲܝܵܣܹ̈ܐ ܀ 497 :ܬܪܹܝܢ ܣܵܪ̈ܘܿܚܹܐ ܥܲܒܼ̈ܕܲܝ ܡܲܠܟܵܐ ܥܲܡ ܙܲܕܿܝܼܩܵܐ 498 ܐܲܝܟ ܓܼܝܵܣܵܐ ܕܡ̣ܢ ܝܲܡܝܼܢܵܐ ܘܡ̣ܢ ܣܸܡܵܠܵܐ ܀ 499 :ܪܡܹܝܢ ܗ̄ܘ̣ܵܘ ܥܲܒܼ̈ܕܹܿܐ ܒܹܝܬܼ ܐܲܣܝܼܪܹ̈ܐ ܡܸܛܠ ܕܐܲܣܟܸܿܠ 500 ܐܲܝܟ ܓܼܝܵܣܹ̈ܐ ܕܲܙܩܲܦܘ̣ ܐܸܢܘܿܢ ܣܘܼܥܪ݁ܵܢܲܝܗܘܿܢ ܀ 501 :ܝܵܘܣܸܦ ܒܲܠܚܘܿܕܼ ܚܒܼܝܼܫ ܗ̄ܘ̣ܵܐ ܬܲܡ̇ܢ ܕܠܵܐ ܪܹܫܝܵܢܵܐ 502 ܒܐ̄ܪܵܙ ܡܲܚܸܐ ܟܠ ܕܲܕܼܠܵܐ ܣܲܟܼܠܘܼ ܨܲܠܒܹ݂ܗ ܚܣܵܡܵܐ ܀ 503 :ܚܠܲܡ̣ܘ ܡܸܨܪ̈ܵܝܹܐ ܬܪ̈ܲܝܗܘܿܢ ܐܲܟܲܚ̄ܕܼ ܚܸܠܡܹ̈ܐ ܦܪ̈ܝܼܫܹܐ 504 ܒܚܲܕܼ ܦܘܼܪܩܵܢܵܐ ܘܒܲܐ̄ܚܪܹܝܢ ܡ̇ܘܬܵܐ ܕܲܒܼܪܹܫ ܩܲܝܣܵܐ ܀ 505 :ܐܲܟܼܡܲܪܘ ܐܸܢܘܿܢ ܚܸܠܡܹ̈ܐ ܕܲܚܙ̣ܵܘ ܠܒܲܪ ܡ̣ܢ ܛܲܟܼܣܵܐ 506 ܘܥܲܠ̣ ܥܸܒܼܪܵܝܵܐ ܕܢܲܦܨܲܚ ܐܸܢܘܿܢ ܒܣܘܼܟܵܠ ܡܸܠܵܘ̈ܗܝ ܀ 507 :ܚܙ̣ܵܐ ܕܲܟܼܡܝܼܪܝܼܢ ܡ̣ܢ ܥܘܼܗܕܵܢܵܐ ܕܚܸܠܡܹ̈ܐ ܕܲܚܙ̣ܵܘ 508 ܘܡ̣ܢ ܐܲܦܲܝ̈ܗܘܿܢ ܐܲܕܼܪܸܟ ܚܲܫܹ̈ܐ ܕܪܸ̈ܥܝܵܢܲܝܗܘܿܢ ܀ 509 :ܫܲܐܸܠ ܐܸܢܘܿܢ ܐܲܝܟ ܠܵܐ ܝܵ̇ܕܲܥ ܕܠܵܐ ܗ̄ܘ̣ܵܐ 510 ܘܝܼܠܸܦ ܡܸܢܗܘܿܢ ܘܐܲܠܸܦ ܐܸܢܘܿܢ ܒܪܘܼܚ ܓܸܠܝܵܢܵܐ ܀ 511 :ܒܫܲܩܝܵܐ ܕܣܲܬܵܐ ܘܚܲܡܪܵܐ ܕܡܸܢܵܗ̇ ܚܙ̣ܵܐ ܦܘܼܪܩܵܢܹܗ 512 ܘܚܲܕܿܝܹܗ ܝܵܘܣܸܦ ܐܲܝܟ ܕܲܒܼܚܲܡܪܵܐ ܒܦܲܪܨܘܿܦ ܡܸܠܵܘ̈ܗܝ ܀ 513 :ܐܵܦ ܢܲܚܬܿܘܼܡܵܐ ܒܐܘܼܟܼܠܵܐ ܕܡܲܠܟܵܐ ܚܙ̣ܵܐ ܫܘܼܢܵܩܹܗ 514 ܘܐܲܠܦܹܗ ܟܹܐܢܵܐ ܕܲܒܼܝܲܕܼ ܐܘܼܟܼܠܵܐ ܐܘܼܟܼܠܵܐ ܗܵܘܹ̇ܐ ܀ 515 ܬܠܵܐܼ ܠܲܡ ܫܒܸܫ̈ܬܿܝܼܢ ܬܠܵܬܼܵܐ ܝܵܘܡܝܼ̈ܢ ܨܵܪ ܙܲܕܿܝܼܩܵܐ: pb. 280 516 ܘܣܲܠܹ̈ܐ ܬܠܵܬܼܵܐ ܝܵܘܡܹ̈ܐ ܬܠܵܬܼܵܐ ܕܚܲܝܹ̈ܐ ܘܡ̇ܘܬܵܐ ܀ 517 :ܐܹܝܘ ܚܸܟܼܡܬܼܵܐ ܕܡܲܫܪܸܐ ܟܲܣܝܵܐ ܒܲܒܼܢܲܝ̈ ܒܲܝܬܹܿܗ 518 ܘܲܒܼܓܲܠܝܘܼܬܼܗܘܿܢ ܡܚܵܘܸܐ ܚܲܝܠܵܐ ܕܪܸܡܙܹܗ ܟܲܣܝܵܐ ܀ 519 :ܫܠܸ݂ܡ ܒܲܥܒܼܵܕܼܵܐ ܡܸܠܲܝ̈ ܝܵܘܣܸܦ ܐܲܝܟ ܡ̇ܐ ܕܦܲܫܸܩ 520 ܘܲܚܝ̣ܵܐ ܫܵܩܝܵܐ ܘܡܝܼܬܼ ܢܲܚܬܿܘܼܡ̇ܐ ܐܲܝܟ ܡܸܠܲܝ̈ܗܘܿܢ ܀ 521 :ܛܥ̣ܵܝܗܝ ܠܲܬܼܪܝܼܨܵܐ ܫܵܩܝܵܐ ܕܲܛܥ̣ܵܐ ܐܲܝܟ ܛܵܠܘܿܡ̇ܐ 522 ܥܕܲܡ̇ܐ ܕܐܲܥܝܼܪ ܚܸܠܡܵܐ ܠܡܲܠܟܵܐ ܘܟܸܢ ܐܸܬܿܕܲܟܼܪܹܗ ܀ 523 :ܚܙ̣ܵܐ ܠܲܡ ܦܸܪܥܘܿܢ ܡܲܠܟܵܐ ܕܡܸܨܪܹܝܢ ܚܸܠܡܵܐ ܘܲܬܼܡܲܗ 524 ܘܫܲܐܸܠ ܠܥܲܒܼܕܼܵܘ̈ܗܝ ܘܠܵܐ ܦܲܢܝܼܘ ܠܹܗ ܦܘܼܫܵܩ ܡܸܠܵܘ̈ܗܝ ܀ 525 :ܚܙ̣ܵܐ ܬܵܘܪ̈ܵܬܼܵܐ ܫܲܡܝܼ̈ܢܵܬܼܵܐ ܥܲܠ ܓܹܢ̄ܒܼ ܢܲܗܪܵܐ 526 ܕܦܲܐ̈ܝܵܢ ܗ̣̄ܘܲܝ̈ ܛܵܒܼ ܘܲܪ̈ܓܼܝܼܓܼܵܢ ܗ̣̄ܘܲܝ̈ ܠܥܹܝܢ ܚܲܙܵܝܹ̈ܐ ܀ 527 :ܫܒܲܥ ܬܵܘܪ̈ܵܬܼܵܐ ܫܲܡܝܼ̈ܢܵܬܼܵܐ ܚܙ̣ܵܐ ܩܲܕܼܡ̇ܝܲܬܼ 528 ܘܡ̣ܢ ܒܵܬܲܪܗܹܝܢ ܫܒܲܥ ܒܝܼ̈ܫܵܬܼܵܐ ܣܲܓܿܝܼ ܀ 529 :ܚܙ̣ܵܐ ܡܚܝܼ̈ܠܵܬܼܵܐ ܕܲܣܥܲܝ̈ ܘܲܒܼܠ݂ܲܥ ܠܫܲܡܝܼ̈ܢܵܬܼܵܐ 530 ܘܥܲܠ̣ ܘܐܸܬܿܛܲܠܲܩ ܘܠܵܐ ܦܵܫ̣ ܫܲܪܟܵܐ ܡ̣ܢ ܓܘܼܫܡܗܹܝܢ ܀ 531 :ܚܙ̣ܵܐ ܬܘܼܒܼ ܫܸܒܿܠܹ̈ܐ ܫܒ݂ܲܥ ܟܲܕܼ ܣܵܠ̈ܩܵܢ ܒܪܹܫܹܗ ܕܩܲܢܝܵܐ 532 ܘܫܲܡܝܼ̈ܢܵܢ ܗ̣̄ܘܲܝ̈ ܐܲܝܟ ܬܵܘܪ̈ܵܬܬܼܵܐ ܩܲܕܼ̈ܡܵܝܵܬܼܵܐ ܀ 533 :ܒܫܘܼܠܵܡ ܚܸܠܡܹܗ ܚܙ̣ܵܐ ܬܘܼܒܼ ܫܸܒܿܠܹ̈ܐ ܕܲܫܩܝܼ̈ܦܵܢ ܗ̣̄ܘܲܝ̈ 534 ܘܕܼܵܡ̇ܝܵܐ ܚܙܵܬܼܗܹܝܢ ܠܲܕܿܬܵܘܪ̈ܵܬܼܵܐ ܕܲܡܚܝܼ̈ܠܵܢ ܗ̣̄ܘܲܝ̈ ܀ 535 :ܚܙ̣ܵܐ ܟܲܕܼ ܒܵܠ̈ܥܵܢ ܫܸܒܿܠܹ̈ܐ ܠܫܸܒܿܠܹ̈ܐ ܐܘܼܟܼܠܵܐ ܠܐܘܼܟܼܠܵܐ 536 ܐܲܝܟ ܬܵܘܪ̈ܵܬܼܵܐ ܕܲܒܼܠ݂ܲܥ ܒܸܣܪܵܐ ܠܒܸܫܪܵܐ ܟܢܵܬܹܗ ܀ 537 :ܬܡܲܗ ܘܐܸܬܿܕܲܡܲܪ ܦܸܪܥܘܿܢ ܡܲܠܟܵܐ ܒܚܸܠܡܵܐ ܕܲܚܙ̣ܵܐ 538 ܕܲܡܫܲܓܼܢܲܝ ܗ̄ܘ̣ܵܐ ܡ̣ܢ ܟܠ ܚܸܠܡ̈ܝܼܢ ܕܲܒܼܝܲܕܼ ܦܸܗܝܵܐ ܀ 539 :ܩܪ̣ܵܐ ܚܲܪ̈ܲܫܹܐ ܘܝܵ̇ܕܼܥܲܝ̈ ܢܸܚܫܹ̈ܐ ܘܫܲܐܸܠ ܐܸܢܘܿܢ 540 ܘܟܲܣܝܹܗ ܪܸܡܙܵܐ ܠܚܹܝܠ ܣܘܼܟܵܠܵܐ ܡ̣ܢ ܥܲܝܢܲܝ̈ܗܘܿܢ ܀ 541 :ܐܲܟܼܪܝܼ ܡܲܠܟܵܐ ܘܝܼܬܸܒܼ ܒܐܸܒܼܠܵܐ ܕܠܵܐ ܒܘܼܝܵܢܵܐ 542 ܕܲܚ̣ܙܵܐ ܕܡ̣ܪܲܕܼ ܚܲܝܠܵܐ ܕܚܸܠܡܵܘ̈ܗܝ ܡ̣ܢ ܚܲܪ̈ܵܫܹܐ ܀ 543 :ܫܵܩܝܵܐ ܕܡܲܠܟܵܐ ܚܙ̣ܵܐ ܟܲܪܝܘܼܬܹܗ ܕܡܲܠܟܵܐ ܘܲܥܗ݂ܲܕܼ 544 ܘܫܲܪܝܼ ܡܲܕܼܟܲܪ ܥܲܠ ܣܘܼܪܚܵܢܹܗ ܟܲܕܼ ܠܵܐ ܨܵܒܹ̇ܐ ܀ 545 :ܓܠ̣ܵܐ ܣܘܼܪܚܵܢܹܗ ܥܲܒܼܕܵܐ ܠܡܵܪܹܗ ܘܚܸܠܡܵܐ ܕܲܚܙ̣ܵܐ 546 ܘܐܸܫܬܲܥܝܼ ܠܹܗ ܥܲܠ ܥܸܒܼܪܵܝܵܐ ܕܦܲܫܸܩ ܚܸܠܡܵܘ̈ܗܝ ܀ 547 :ܡ̇ܪܝ ܠܲܡ ܦܸܪܥܘܿܢ ܪܓܸܙ ܥܲܠ ܥܲܒܼܕܵܘ̈ܗܝ ܡܸܛܠ ܕܐܲܣܟܸܿܠܘ 548 ܘܲܚܒ݂ܲܫ ܐܸܢܘܿܢ ܒܒܹܝܠ ܐܲܣܝܼܪܹ̈ܐ ܒܹܝܬܼ ܪܲܒܿ ܕܲܚܫܹ̈ܐ ܀ 549 :ܚܙ݂ܲܝܢ ܠܲܡ ܚܸܠܡܹ̈ܐ ܕܲܡܠܹܝܢ ܚܲܫܹ̈ܐ ܐܸܢܵܐ ܘܲܟܼܢܵܬܼܝ 550 ܘܩܲܪܸܒܼܢ ܐܸܢܘܿܢ ܠܚܲܕ ܥܸܒܼܪܵܝܵܐ ܘܦܲܫܸܩ ܐܸܢܘܿܢ ܀ pb. 281 551 :ܫܲܪܝܼܪ ܗ̄ܘ̣ܵܐ ܛܵܒܼ ܚܹܝܠ ܦܘܼܫܵܩܵܐ ܒܐܸܕܼܢܲܝ̈ܢ 552 :ܘܫܸܠܡܲܬ̤ ܡܸܠܬܹܗ ܒܝܲܕܼ ܣܘܼܥܪ̈ܵܢܹܐ ܕܚܲܝܹ̈ܐ ܘܡܵܘܬܵܐ 553 :ܐܸܬܿܬܿܥܝܼܪ ܦܸܪܥܘܿܢ ܐܲܝܟ ܕܡ̣ܢ ܫܸܢܬܼܵܐ ܠܘܵܬܼ ܥܸܒܼܪܵܝܵܐ 554 ܘܣܲܪܗܸܒܼ ܐܸܢܘܿܢ ܠܲܡܫܲܡܫܵܢܵܘ̈ܗܝ ܠܡܸܩܪܵܐ ܠܝܵܘܣܸܦ ܀ 555 :ܚܸܠܡܵܐ ܕܲܚܙ̣ܵܐ ܢܵܓ݂̇ܕܼ ܗ̄ܘ̣ܵܐ ܠܹܗ ܒܵܬܲܪ ܚܲܝܠܹܗ 556 ܘܒܲܕܼܡܘܼܬܼ ܟܲܦܢܵܐ ܡܚܲܬܼܚܸܬܼ ܗ̄ܘ̣ܵܐ ܠܹܗ ܠܘܵܬܼ ܣܘܼܟܵܠܹܗ ܀ 557 :ܫܲܕܲܪ ܒܲܪ ܚܵܡ ܘܲܩܪ̣ܵܐ ܠܒܲܪ ܫܹܝܡ ܥܲܒܼܕܵܐ ܠܡܵܪܵܐ 558 ܕܢܹܐܬܸܐ ܢܸܓܼܠܸܐ ܚܹܝܠ ܦܸܠ̈ܐܵܬܼܵܐ ܡܒܲܪܟܼܵܐ ܠܠܝܼܛܵܐ ܀ 559 :ܥܲܠ̣ ܒܲܪ ܐܲܒܼܪܵܡ ܥܲܠ ܡܸܨܪܵܝܵܐ ܘܲܚܙ̣ܵܝܗܝ ܕܲܟܼܡܝܼܪ 560 ܘܲܪܕܲܦ ܡܸܢܹܗ ܟܲܪܝܘܼܬܼ ܢܲܦܫܵܐ ܒܩܵܠ ܦܸܬܼܓܼܵܡܘ̈ܗܝ ܀ 561 :ܬܢܵܐ ܠܹܗ ܒܲܪ ܚܵܡ ܠܒܲܪ ܐܲܒܼܪܵܗܵܡ ܚܸܠܡܵܐ ܕܲܚܙ̣̰ܵܐ 562 ܘܒܲܕܸܿܩ ܠܹܗ ܬܘܼܒܼ ܕܲܡܪܲܕܼܘ ܚܸܠܡܵܘ̈ܗܝ ܚܲܪ݁ܵܫܵܘܗܝ ܀ 563 :ܫܲܪܝܼ ܝܵܘܣܸܦ ܒܪܘܼܚ ܓܸܠܝܵܢܵܐ ܕܲܢܦܲܫܸܩ ܠܹܗ 564 ܘܢܲܕܼܢܲܚ ܚܲܝܠܵܐ ܕܲܣܬܼܝܼܪ̈ܵܬܼܵܐ ܩܕܼܵܡ ܪܸܥܝܵܢܹܗ ܀ 565 :ܫܡܲܥ ܠܲܡ ܡܲܠܟܵܐ ܘܝܼܠܲܦ ܚܲܝܠܵܐ ܕܚܹܝܠ ܒܵܪܘܿܝܵܐ 566 ܕܕܝܼܠܹܗ ܐܸܢܘܿܢ ܚܸܠܡܹ̈ܐ ܘܚܸܙܘܹ̈ܐ ܠܲܡܒܲܕܵܩܘ̣ ܀ 567 :ܠܵܘ ܕܝܼܠܝ ܐܝܼܬܹܝܗ̇ ܕܐܸܓܼܠܸܐ ܚܲܝܠܵܐ ܕܲܟܼܣܸܐ ܒܚܸܠܟܲܝ̈ܟ 568 ܗܘ̤ ܒܲܕܸܿܩ ܠܝܼ ܕܐܲܠܦܵܟ ܚܲܝܠܵܐ ܕܲܣܬܼܝܼܪ̈ܵܬܹܗ ܀ 569 :ܫܡܲܥ ܚܹܝܠ ܚܸܠܡܲܝ̈ܟ ܡܸܢܹܗ ܒܐܝܼܕܲܝ̈ ܐܲܝܟ ܡܸܨܥܵܝܵܐ 570 ܘܕܲܥ ܘܐܸܬܼܒܲܝܲܢ ܕܪܸܡܙܹܗ ܡܚܲܟܸܿܡ ܠܲܒܼܢܲܝ̈ ܒܲܝܬܹܿܗ ܀ 571 :ܫܒܲܥ ܬܵܘܪ̈ܵܬܼܵܐ ܫܢܲܝ̈ܵܐ ܐܸܢܹܝܢ ܫܒܲܥ ܛܵܒܼܵܬܼܵܐ 572 ܘܲܡܚܝܼ̈ܠܬܼܵܐ ܫܒܲܥ ܒܝܼ̈ܫܬܼܵܐ ܫܢܲܝ̈ܵܐ ܕܟܲܦܢܵܐ ܀ 573 :ܫܒܲܥ ܬܘܼܒܼ ܫܸܒܿܠܹ̈ܐ ܫܲܡܝܼ̈ܢܵܬܼܵܐ ܫܢܲܝ̈ܵܐ ܐܸܢܹܝܢ 574 ܘܲܫܒܲܥ ܕܝܼܒܸܫ ܒܪܘܼܚܵܐ ܕܫܵܘܒܵܐ ܟܲܦܢܵܐ ܕܲܫܒܲܥ ܀ 575 :ܒܝܲܕܼ ܬܵܘܪ̈ܵܬܼܵܐ ܫܲܡܝܼ̈ܢܵܬܼܵܐ ܓܠ̣ܵܐ ܥܲܠ ܣܲܒܼܥܵܐ 576 ܘܒܲܡܚܝܼ̈ܠܵܬܼܵܐ ܕܲܒܼܠ݂ܲܥ ܐܸܢܹܝܢ ܒܲܕܸܿܩ ܟܲܦܢܵܐ ܀ 577 :ܒܵܗ̇ ܒܬܼܵܘܕܲܝܼܬܼܵܐ ܨܵܪ ܐܵܦ ܫܸܒܿܠܹ̈ܐ ܫܲܡܝܼ̈ܢܵܬܼܵܐ 578 ܕܟܲܕܼ ܛܵܒܼ ܛܵܒܼ̈ܢ ܡܸܬܿܛܲܠ̈ܩܵܢ ܗ̣̄ܘܲܝ̈ ܒܲܡܚܝܼ̈ܠܵܬܼܵܐ ܀ 579 :ܒܫܸܒܿܠܹ̈ܐ ܕܚܲܩܠܵܐ ܪܲܫܡܹ݂ܗ ܠܣܲܒܿܥܵܐ ܐܵܦ ܠܹܗ ܠܟܲܦܢܵܐ 580 ܘܐܲܠܸܦ ܐ̄ܢܵܫܵܐ ܕܠܵܐ ܡܨܸܝܢ ܚܵܐܹ̇ܝܢ ܒܸܠܥܵܕܼ ܪܸܡܙܵܐ ܀ 581 :ܐܸܢܗܘ̤ ܕܠܲܚܡܵܐ ܝܵܗܹ̇ܒܼ ܚܲܝܹ̈ܐ ܗܘ̤ ܒܲܟܼܵܢܹܗ 582 ܡܸܛܠܡܵܢܵܐ ܠܵܐ ܫܘܸܐ ܚܲܝܠܹܗ ܒܣܲܒܼ ܥܵܐ ܘܟܲܦܢܵܐ ܀ 583 :ܠܵܐ ܗ̄ܘ̣ܵܐ ܠܲܚܡܵܐ ܡܲܚܸܐ ܒܚܲܝܠܹܗ ܠܡܵܝܘܿܬܼܘܼܬܼܵܐ 584 ܐܸܠܵܐ ܪܸܡܙܵܐ ܝܵܗܹ̇ܒܼ ܚܲܝܠܹܗ ܒܥܸܠܲܬܼ ܠܲܚܡܵܐ ܀ 585 :ܣܲܒܼܥܵܐ ܘܟܲܦܢܵܐ ܕܲܥܬܼܝܼܕܼ ܕܢܹܐܬܸܐ ܒܲܕܸܿܩ ܝܵܘܣܸܦ 586 ܒܚܹܝܠ ܗܵܘ̇ ܪܸܡܙܵܐ ܕܡܲܚܸܐ ܘܲܡܡܝܼܬܼ ܒܝܲܕܼ ܥܸܠ̈݁ܠܵܬܼܵܐ ܀ 587 ܗܵܐ ܠܲܡ ܣܲܒܼܥܵܐ ܪܲܒܵܐ ܗܵܘܹ̇ܐ ܓܠ̣ܵܐ ܙܲܕܲܝܼܩܵܐ: pb. 282 588 ܘܐܸܬܹ̇ܐ ܟܲܦܢܵܐ ܒܵܬܲܪ ܙܲܒܼܢܵܐ ܫ̈ܢܲܝܵܐ ܕܐܸܡ̇ܪܹܬܼ ܀ 589 :ܐܲܝܟ ܬܵܘܪ̈ܵܬܼܵܐ ܕܲܡܚܝܼ̈ܠܵܢ ܗ̣̄ܘܲܝ̈ ܘܲܒܼܠܲܥ̣ ܠܲܫܒܲܥ 590 ܗܵܟܲܢ ܒܵܠܲ݁ܥ ܟܲܦܢܵܐ ܠܣܲܒܼܥܵܐ ܘܲܡܛܲܠܸܩ ܠܹܗ ܀ 591 :ܘܡܸܛܠ ܗܵܕܹܐ ܥܲܦܹܗ ܠܚܸܠܡܵܐ ܠܬܲܪܬܹܿܝܢ ܙܲܒܼܢܝܼ̈ܢ 592 ܘܲܡܣܲܪܗܸܒܼ ܗ̄ܘ̣ܵܐ ܛܵܒܼ ܦܸܬܼܓܸܵܡܵܐ ܘܲܥܬܼܝܼܕܼ ܕܢܸܗܘܸܐ ܀ 593 :ܘܗܵܫܵܐ ܢܸܚܙܸܐ ܦܸܪܥܘܿܢ ܓܲܒܼܪܵܐ ܐܸܡ݂ܲܪ ܝܵܘܣܸܦ 594 ܐܲܝܢܵܐ ܕܝܵ̇ܕܲܥ ܠܲܡܦܲܪܢܵܣܘܼ ܟܲܦܢܵܐ ܒܣܲܒܼܥܵܐ ܀ 595 :ܢܦܲܠ݂ ܡܸܨܪܵܝܵܐ ܕܲܩܛܝܼܪ ܬܵܓܼܵܐ ܩܕܵܡ ܥܸܒܼܪܵܐ 596 ܘܲܣܓܸܕܼ ܒܲܪ ܚܵܡ ܠܒܲܪ ܐܲܒܼܪܵܗܵܡ ܟܲܕܼ ܠܵܐ ܨܵܒܹ̇ܐ ܀ 597 :ܠܲܝܬܿ ܠܲܡ ܓܲܒܼܪܵܐ ܕܚܲܟܿܝܼܡ ܘܲܨܢܝܼܥ ܝܲܬܿܝܼܪ ܡܸܢܵܟ 598 ܘܠܵܐ ܐ̄ܢܵܫ ܝܵ̇ܕܲܥ ܠܲܡܦܲܪܢܵܣܘܼ ܐܲܝܟ ܚܸܟܼܡܬܼܵܟ ܀ 599 :ܐܲܢ̄ܬܿ ܠܲܡ ܬܸܗܘܸܐ ܡ̇ܪܵܐ ܥܲܠ ܒܲܝܬܿܝ ܐܵܦ ܫܲܠܝܼܛܵܐ 600 ܘܡܸܠܲܬܼ ܦܘܼܡ̇ܟ ܬܲܡܠܸܟ ܘܲܬܿܕܼܘܼܢ ܥܲܒܼ̈ܕܹܿܐ ܘܚܹܐܪܹ̈ܐ ܀ 601 :ܒܲܠܚܘܿܕܼ ܒܲܫܡܵܐ ܕܫܸܡ ܡܲܠܟܿܘܼܬܼܵܐ ܐܲܪܲܒܼ ܡܸܢܵܟ 602 ܘܐܲܢ̄ܬܿ ܬܸܫܬܲܠܲܛ ܠܲܡܕܲܒܵܪܘܼ ܐܲܝܟ ܨܸܒܼܝܵܢܵܟ ܀ 603 :ܓܡ݂ܲܪ ܫܘܼܘܕܵܝܹܗ ܡܲܠܟܵܐ ܕܡܸܨܪܹܝܢ ܘܥܲܒܼ݂ܕܹܿܗ ܡ̇ܪܵܐ 604 ܘܙܲܝܚܹܗ ܒܢܲܚ̈ܬܹܿܗ ܕܲܠܒܼܘܼܫ ܡܲܠܟܵܐ ܐܲܝܟ ܒܲܪ ܡܲܠ̈ܟܹܿܐ ܀ 605 :ܪܟܸܒܼ ܒܲܪ ܝܲܥܩܘܿܒܼ ܥܲܠ ܡܲܪܟܲܒܼܬܼܵܐ ܕܲܡܠܸܟ ܡܸܨܪܹܝܢ 606 ܘܫܲܪܝܼ ܡܦܲܩܸܕܼ ܒܲܪ ܐܲܒܼܪܵܗܵܡ ܠܲܒܼܢܵܘ̈ܗܝ ܕܲܟܼܢܲܥܢ ܀ 607 :ܫܠܸܡ̣ܘ ܒܲܥܒܼܵ̇ܕܼܵܐ ܚܸܠܡܹ̈ܐ ܕܲܚܠ݂ܲܡ ܒܹܝܬܼ ܐܲܒܼܵܗܵܘ̈ܗܝ 608 ܘܐܲܝܼܡ ܫܲܒܼܛܹܗ ܒܲܕܼܡܘܼܬܼ ܟܲܦܵܐ ܕܙܲܩܦܲܬ̤ ܢܲܦܫܵܐ ܀ 609 :ܫܩ݂ܲܠ ܫܘܼܠܵܡܵܐ ܐܵܦ ܦܸܠ̈ܐܬܼܵܐ ܕܦܘܼܫܵܩ ܡܸܠܵܘ̈ܗܝ 610 ܣܲܒܼܥܵܐ ܘܟܲܦܢܵܐ ܕܐܸܬܼܵܐ ܠܓܸܠܝܵܐ ܐܲܝܟ ܕܐܸܫܬܵܘܕܲܝܼ ܀ 611 :ܟܲܦܢܵܐ ܥܸܠܬܼܵܐ ܗ̄ܘ̣ ܕܗܵܝ̇ ܒܲܪ̄ܬܼ ܩܵܠܵܐ ܕܲܠܘܵܬܼ ܐܲܒܼܪܵܡ 612 ܕܡܸܕܲܥ ܬܸܕܲܥ ܕܥܲܒܼ̈ܕܹܿܐ ܢܸܗܘܘܿܢ ܝܲܠ̈ܕܹܿܐ ܕܙܲܪܥܵܟ ܀ 613 :ܒܗܵܕܹܐ ܢܸܢܘܲܝ ܐܸܫܬܿܕܲܪ ܗ̄ܘ̣ܵܐ ܐܵܦ ܒܲܪ ܝܲܥܩܘܿܒܼ 614 ܕܢܸܚܘܿܬܼ ܢܲܬܼܩܸܢ ܐܲܬܼܪܵܐ ܕܲܦܠܸܐ ܠܙܲܪܥܹܗ ܕܐܲܒܼܪܵܡ ܀ 615 :ܐܵܦܸܢ ܐܲܚܵܘ̈ܗܝ ܠܒܼܝܼܫܘܼ ܫܕܼܵܐܘܼܗܝ ܐܲܝܟ ܕܲܠܒܼܝܼܫܵܐ 616 ܐܸܠܵܐ ܪܸܡܙܵܐ ܕܲܓܼܠܸܐ ܠܹܗ ܟܠ ܣܲܥܪܵܗ̇ ܠܗܵܕܹܐ ܀ 617 :ܒܝܼܫܹ̈ܐ ܡܲܠܝܼܘ ܪܸܓܼܬܼ ܢܲܦܫܵܐ ܕܚܘܼܫܵܒܲܝ̈ܗܘܿܢ 618 ܘܝܵܕܲܥ ܟܠܵܐ ܓܡ݂ܲܪ ܨܒܼܝܵܢܵܐ ܕܣܵܥܘܿܪܘܼܬܹܗ ܀ 619 :ܓܲܠ݁̈ܠܝܵܢ ܗ̣̄ܘܲܝ̈ ܠܹܗ ܗܠܹܝܢ ܕܲܣܥ݂ܲܪ ܒܐܝܼ̈ܕܲܝ ܝܵܘܣܸܦ 620 ܘܦܲܫܸܩ ܐܸܢܹܝܢ ܒܝܲܕܼ ܒܲܪ ܒܲܝܬܹܿܗ ܐܲܝܟ ܚܲܟܿܝܼܡܵܐ ܀ 621 :ܒܟܼܠܵܗ̇ ܐܲܪܥܵܐ ܐܲܡܠܸܟ ܟܲܦܢܵܐ ܘܐܸܚܲܕܼ ܢܘܼܡܹܗ 622 ܘܐܲܣܸܩ ܐܸܢܘܿܢ ܠܲܒܼܢܵܘ̈ܗܝ ܕܐܲܒܼܪܵܡ ܥܲܠ ܡܸܨܪ̈ܵܝܹܐ ܀ 623 ܫܲܥܒܸܿܕܼ ܐܸܢܘܿܢ ܟܲܦܢܵܐ ܩܲܫܝܵܐ ܠܲܒܼܢܲܝ̈ ܝܲܥܩܘܿܒܼ: pb. 283 624 ܘܟܲܕܼ ܠܵܐ ܨܵܒܹ̇ܝܢ ܢܚܸܬܼܘ ܕܲܢܡܲܠܘܿܢ ܚܵܘܒܲܬܼ ܚܸܠܡܹ̈ܐ ܀ 625 :ܕܠܵܐ ܦܲܢܝܼܘ ܠܹܗ ܐܲܓܼܪܵܐ ܠܟܹܐܢܵܐ ܚܠܵܦ ܦܸܠ̈ܐܵܬܹܗ 626 ܦܲܪܥܘܼܗܝ ܪܹܫܵܐ ܐܵܦ ܪܸܒܿܝܼܬܼܵܐ ܕܬܲܪܬܹܿܝܢ ܙܲܒܼܢܝܼ̈ܢ ܀ 627 :ܬܲܪܬܹܿܝܢ ܙܲܒܼܢܝܼ̈ܢ ܦܪܲܥ̣ܘ ܒܘܼܕܵܩܵܐ ܕܲܬܼܪܹܝܢ ܚܸܠܡܵܘ̈ܗܝ 628 ܒܟܼܵܘܟܿܒܹ̈ܐ ܘܟܲܦܹ̈ܐ ܕܚܵܘܝܼ ܐܸܢܘܿܢ ܐ̄ܪܵܙܵܢܵܐܝܼܬܼ ܀ 629 :ܢܚܸܬܼܘ ܥܸܒܼܪ̈ܵܝܹܐ ܠܘܵܬܼ ܡܸܨܪ̈ܵܝܹܐ ܠܡܸܙܒܲܢ ܠܲܚܡܵܐ 630 ܘܨܵܕܲܬ̤ ܐܸܢܘܿܢ ܗܵܝ̇ ܟܹܐܢܘܼܪܵܐ ܕܛܲܠܡ̣ܘܼܗ̇ ܒܝܵܘܣܸܦ ܀ 631 :ܦܸܟܼܪܲܬ̤ ܐܸܢܘܼܢ ܠܲܡܙܲܒܿܢܵܢܹ̈ܐ ܩܕܼܵܡ ܚܲܒܿܝܼܒܼܵܗ̇ 632 ܘܫܸܡܛܲܬ̤ ܣܲܝܦܵܐ ܕܢܸܓܼܕܵܗ̇ ܩܲܫܝܵܐ ܥܲܠ ܨܵܘܪ̈ܲܝܗܘܿܢ ܀ 633 :ܫܵܘܕܲܥ ܐܸܢܘܿܢ ܩܛܝܼܠ ܒܲܚܣܵܡܵܐ ܠܲܡܙܲܒܿܢܵܢܵܘ̈ܗܝ 634 ܘܠܑܵܐ ܦܪ݂ܲܥ ܐܸܢܘܿܢ ܚܘܼܒܼܠܵܐ ܕܫܵܘܹ̇ܐ ܠܣܘܼܥܪ̈ܵܢܲܝܗܘܿܢ ܀ 635 :ܐܸܣܟܹܿܝܡ ܩܘܼܫܬܵܐ ܠܒܸ݂ܫ ܙܲܕܲܝܩܵܐ ܠܘܼܩܒܲܠ ܐܲܚܵܘ̈ܗܝ 636 ܘܐܲܥܸܠ ܐܸܢܘܿܢ ܐܲܝܟ ܕܲܠܟܼܘܼܪܵܐ ܠܒܼܘܼܚܪܵܢ ܡܸܠܵܘ̈ܗܝ ܀ 637 :ܓܵܫܘܿܫܹ̈ܐ ܐ̄ܢܬܿܘܿܢ ܐܸܡ݂ܲܪ ܝܵܘܣܸܦ ܠܘܵܬܼ ܙܵܒܼܘܿܢܹ̈ܐ 638 ܠܡܸܓܲܫ ܠܐܲܪܥܵܐ ܢܚܸܬܿܬܿܘܿܢ ܐ̄ܢܵܫܵܐ ܠܵܘ ܥܲܠ ܠܲܡܚܵܐ ܀ 639 :ܒܚܲܝܲܝ̈ ܦܸܪܥܘܿܢ ܚ̣̄ܡܵܐ ܗ̄ܘ̣ܵܐ ܢܲܟܼܦܵܐ ܘܐܲܪܗܸܒܼ ܐܸܢܘܿܢ 640 ܘܙܵܘܥܘ̣ ܘܐܸܬܼܒܲܠܗܝܼܘ ܕܠܲܝܬܿ ܬܘܼܒܼ ܣܲܒܼܪܵܐ ܠܡܸܦܲܨܵܝܘܼ ܀ 641 :ܟܹܐܢܹ̈ܐ ܚܢܲܢ ܠܲܡ ܠܵܘ ܥܵܘܵܠܹ̈ܐ ܥܢ̣ܵܘ ܚܲܣܵܡܹ̈ܐ 642 ܘܟܲܕܼ ܡܸܬܼܓܵܘܣܝܼܢ ܒܫܸܡ ܐܝܼܬܼܘܼܬܼܵܐ ܨܵܕܲܬ̤ ܐܸܢܘܿܢ ܀ 643 :ܓܠܵܘ̣ ܕܲܚܕܲܥܣܲܪ ܗܵܘܹ̇ܝܢ ܐܸܢܘܿܢ ܘܚܲܕܼ ܐܲܒܼܘܼܗܘܿܢ 644 ܘܚܲܕܼ ܠܲܡ ܕܐܸܒܲܕܼ ܘܲܚܣ݂ܲܪ ܒܐܝܼܕܹܗ ܡܸܢܝܵܢ ܝܲܪ̈ܚܹܐ ܀ 645 :ܥܸܣܪܵܐ ܢܚܸܬܼܢܲܢ ܠܡܸܙܒܲܢ ܠܲܚܡܵܐ ܘܦܵܫ̣ ܚܲܕܼ ܙܥܘܿܪܵܐ 646 ܥܲܩܸܒܼ ܘܲܚܙܝܼ ܕܗܵܟܲܢ ܐܝܼܬܹܝܗ̇ ܐܲܝܟ ܕܐܸܡܪ̣ܢܲܢ ܀ 647 :ܢܦܲܠ̣ܘ ܗ̄ܘ̣ܵܘ ܒܦܲܚܵܐ ܕܲܨܠܵܘ ܗܸܢܘ̣ܿܢ ܒܝܲܕܼ ܡܸܠܲܝ̈ܗܘܿܢ 648 ܘܲܦܟ݂ܲܪ ܐܸܢܘܿܢ ܪܸܡܙܵܐ ܟܲܣܝܵܐ ܡ̣ܢ ܟܠ ܓܼܒܿܝܼ̈ܢ ܀ 649 :ܠܦܘܼܬܼ ܡܸܠܲܝ̈ܗܘܿܢ ܬܒܲܥ̣ ܒܐܝܼ̈ܕܲܝܗܘܿܢ ܐܲܝܟ ܕܐܸܫܬܵܘܕܲܝܼܘ 650 ܘܚܵܘܝܼ ܕܟܹܐܢܵܐ ܗ̄ܘ̣ ܘܠܲܐܠܵܗ ܟܠܵܐ ܕܵܚܹ̇ܠ ܐܵܦ ܗܘ̤ ܀ 651 :ܗܵܟܲܢ ܬܸܗܘܸܐ ܐܲܝܟ ܕܐܸܡܲܪ̣ܬܿܘܿܢ ܥܢ̣ܵܐ ܙܲܕܿܝܼܩܵܐ 652 ܚܵܘܵܘ ܒܘܼܩܝܵܐ ܕܗܘܼܦܵܟܲܝ̈ܟܿܘܿܢ ܘܡܸܬܼܦܲܨܹܝܢ ܐ̄ܢܬܿܘܿܢ ܀ 653 :ܙܸܠܘ ܐܲܝܬܵܘ ܠܝܼ ܐ̄ܚܘܼܟܼܘܿܢ ܙܥܘܿܪܵܐ ܕܐܸܡ݂ܲܪܬܿܘܿܢ ܕܐܝܼܬܼ 654 ܘܫܵܪܹܐ ܐ̄ܢܵܐ ܠܟܼܘܿܢ ܥܲܡ ܐܲܚܘܼܟܼܘܿܢ ܠܘܵܬܼ ܐܲܒܼܘܼܟܼܘܿܢ ܀ 655 :ܣܝܼܡܘ ܡܸܫܟܵܢܵܐ ܠܦܘܼܬܼ ܣܘܼܥܪܵܢܵܐ ܕܲܢܦܲܠ̣ܬܿܘܿܢ ܒܹܗ 656 ܘܐܲܢ̄ܬܿܘܿܢ ܐܵܘܒܸܿܠܘ ܠܲܚܡܵܐ ܠܟܲܦܢܹ̈ܐ ܕܲܒܼܒܼܵܬܲܝ݁ܟܿܘܿܢ ܀ 657 :ܟܠ̣ܵܐ ܚܲܕܼ ܡܸܢܗܘܿܢ ܘܐܲܣܪܹ݂ܗ ܒܙܲܝܢܵܐ ܒܲܡܠܸܐ ܙܲܒܼܢܵܐ 658 ܘܙܵܘܕ ܐܸܢܘܿܢ ܒܟܸܣܦܵܐ ܘܠܲܚܡܵܐ ܕܲܒܼܛܲܥܢܲܝ̈ܗܘܿܢ ܀ 659 :ܚܙ݂ܲܩܘ ܡ̣ܢ ܡܸܨܪܹܝܢ ܘܐܸܬܼܵܘ ܘܲܦܢ̣ܵܘ ܠܘܵܬܼ ܐܲܒܼܘܼܗܘܿܢ 660 ܘܐܸܫܬܲܥܝܼܘ ܠܹܗ ܡܸܕܹܿܡ ܕܲܓܼܕܲܫ̣ ܘܬܸܢܘܲܝ ܕܲܗܘ̤ܵܬܼ ܀ pb. 284 661 :ܬ̣ܡܲܗ ܙܲܕܿܝܼܩܵܐ ܘܐܸܬܿܕܲܡܲܪ ܗ̄ܘ̣ܵܐ ܡ̣ܢ ܡܸܠܲܝ̈ܗܘܿܢ 662 ܘܲܪܫܵܐ ܠܲܒܼܢܵܘ̈ܗܝ ܕܡܸܛܠ ܡܵܢܵܐ ܓܠ݂ܲܝܬܿܘܿܢ ܗܵܕܹܐ ܀ 663 :ܠܡܵܢ ܚܵܘܝܼܬܿܘܿܢ ܡܸܢܝܵܢ ܝܲܠܕܲܝ̈ ܕܲܟܼܡܵܐ ܗܵܘܹ̇ܝܢ 664 ܕܲܥܬܼܝܼܕܼ ܓܲܒܼܪܵܐ ܕܢܸܬܼܒܲܥ ܡܸܢܟܼܘܿܢ ܐܵܦ ܗܵܘ̇ ܕܐܸܒܲܕܼ ܀ 665 :ܢܵܚ̣ܘ ܡ̣ܢ ܡܸܠܹ̈ܐ ܘܟܲܦܢܵܐ ܠܵܐ ܢܵܚ̣ ܡ̣ܢ ܩܲܫܝܘܼܬܹܗ 666 ܘܫܲܥܒܸܿܕܼ ܐܸܢܘܿܢ ܠܡܸܦܢܵܐ ܠܡܸܨܪܹܝܢ ܟܲܕܼ ܠܵܐ ܨܵܠܒܹ̇ܝܢ ܀ 667 :ܕܒܲܪ̣ܘ ܠܐܲܚܘܼܗܘܿܢ ܐܲܝܟ ܕܐܸܫܬܵܘܕܲܝܼܘ ܕܠܵܐ ܢܸܬܿܕܲܓܿܠܘܼܢ 668 ܘܛܲܝܸܒܼܘ ܕܵܫܢܹ̈ܐ ܠܝܵܘܣܸܦ ܟܹܐܢܵܐ ܕܕܲܡ ܢܸܬܼܪܲܥܸܐ ܀ 669 :ܫܩܲܠ̣ܘ ܡ̣ܢ ܛܘܼܒܼܵܐ ܕܐܲܪܥܵܐ ܕܲܟܼܢܲܥܢ ܨܲܪܘܵܐ ܘܕܸܒܼܫܵܐ 670 ܘܟܸܦܵܐ ܐܲܥܦܵܐ ܥܲܠ̣ ܩܲܕܼܡܵܝܵܐ ܕܝܲܗ̣̄ܒܼܘ ܘܐܸܬܼܦܲܢܝܼ ܀ 671 :ܚ̣ܙܲܩܘ ܟܲܕܼ ܪܵܕܹܝܢ ܒܐܲܝܕܵܐ ܕܲܗܘ̤ܵܬܼ ܕܚܸܒܼܫܲܬ̤ ܐܸܢܘܿܢ 672 ܕܲܠܡܵܐ ܬܸܫܠܲܡ ܒܝܲܕܼ ܣܘܼܥܪ݁ܵܢܹܐ ܘܬܼܵܘܒܸܿܕܼ ܐܸܢܘܿܢ ܀ 673 :ܩܸܢܛܵܐ ܡܠܹܝܢ ܗ̄ܘ̣ܵܘ ܟܲܕܼ ܪܵܕܹܝܢ ܗ̄ܘ̣ܵܘ ܐܲܝܟ ܚܲܝܵܒܹ̈ܐ 674 ܕܕܲܡ ܠܵܐ ܢܸܣܦܲܩ ܦܝܵܣܵܐ ܘܡܸܠܹ̈ܐ ܠܘܵܬܼ ܬܲܪܥܘܼܬܼܵܐ ܀ 675 :ܟܡܵܐ ܕܩܵܪܒܿܝܼܢ ܗ̄ܘ̣ܵܘ ܠܐܲܦܲܝ̈ ܡܸܨܪܹܝܢ ܬܘܼܒܼ ܚܵܫ̇ܝܼܢ ܗ̄ܘ̣ܵܘ 676 ܘܡܸܬܼܒܲܗܹܝܢ ܗ̄ܘ̣ܵܘ ܚܘܼܫܵܒܲܝ̈ܗܘܿܢ ܒܝܲܕܼ ܣܘܼܥܪ݁ܵܢܹܐ ܀ 677 :ܡܲܛܝܼܘ ܠܐܲܬܼܪܵܐ ܘܡܲܛܝܼܘ ܐܸܢܘܿܢ ܚܸܒܼܠܹ̈ܐ ܕܡ̇ܘܬܵܐ 678 ܘܚܲܫ̣ܘ ܘܐܸܬܼܒܲܠܗܘܿܝܼܘ ܐܲܝܟ ܝܵܠܹܕܿܬܵܐ ܕܚܲܣܢܘܼܗ̇ ܟܹܐܒܹ̈ܝܗ̇ ܀ 679 :ܛܲܝܼܒܼܘ ܕܵܫܢܹ̈ܐ ܘܥܲܠ̣ܘ ܕܲܢܦܲܝܼܣܘܼܢ ܩܕܼܵܡ ܬܲܪܥܘܼܬܼܵܐ 680 ܘܐܲܥܸܠܘ ܥܲܡܗܘܿܢ ܐܵܦ ܒܸܢܝܵܡܹܝܢ ܠܫܘܼܪܵܪ ܡܸܠܹ̈ܐ ܀ 681 :ܢܦܲܠ̣ܘ ܥܲܠ ܐܲܪܥܵܐ ܚܕܲܥܣܲܪ ܟܲܦܹ̈ܐ ܡܲܠܵܠܵܬܼܵܐ 682 ܘܲܫܠܸܡ̣ܘ ܚܸܠܡܹ̈ܐ ܕܲܚܠ݂ܲܡ ܟܸܐܢܵܐ ܒܝܲܕܼ ܣܘܼܥܪ̈ܵܢܹܐ ܀ 683 :ܦܪܲܥ̣ܘ ܚܲܣܡܹ̈ܐ ܟܲܕܼ ܠܵܐ ܨܵܒܹ̇ܝܢ ܚܵܘܒܲܬܼ ܚܘܼܒܵܐ 684 ܘܫܲܡܠܝܼܘ ܐ̄ܪܵܙܵܐ ܕܐ̄ܪܵܙ ܓܸܠܝܵܢܵܐ ܒܐܵܬܼܵܐ ܕܟܲܦܹ̈ܐ ܀ 685 :ܡܲܠܸܠ ܥܲܡܗܘܿܢ ܚܲܟܿܝܼܡܵܐܝܼܬܼ ܐܲܝܟ ܚܲܟܿܝܼܡܵܐ 686 ܕܲܚܙ̣̱ܵܐ ܕܲܢܩܸ݂ܦ ܥܒܼܵܕܹ̈ܐ ܠܡܸܠܹ̈ܐ ܒܩܘܼܫܬܵܐ ܠܚܸܘܙܵܐ ܀ 687 :ܫܲܐܸܠ ܐܸܢܘܿܢ ܥܲܠ ܐܲܒܼܘܼܗܘܿܢ ܕܩܲܝܵܡ ܟܹܐܢܵܐ 688 ܘܲܚ̣ܙܵܐ ܠܐܲܚܘܼܗܝ ܘܐܸܡ݂ܲܪ ܗܵܢܵܘ̇ ܗܵܘ̇ ܕܐܸܡ݂ܲܪܬܿܘܿܢ ܀ 689 :ܐܸܚܲܕܼ ܪ̈ܵܚܡܵܘܗܝ ܘܲܥܨ̣ܵܐ ܟܝܵܢܹܗ ܕܢܸܒܼܩܸܐ ܐܸܢܘܿܢ 690 ܘܲܒܼܢܸܣܝܵܢܵܐ ܢܹܐܠܲܦ ܢܝܼܫܵܐ ܕܪܸ̈ܥܝܵܢܲܝܗܘܿܢ ܀ 691 :ܝܲܩܲܪ ܐܸܢܘܿܢ ܒܐ̄ܢܵܫܵܝ̈ܬܼܵܐ ܐܲܝܟ ܪܸܓܲܬܼܗܘܿܢ 692 ܘܚܵܘܝܼ ܐܸܢܘܿܢ ܕܝܵ̇ܕܲܥ ܛܲܟܼܣܵܐ ܕܩܲܫܝܼܫ ܘܲܛܠܸܐ ܀ 693 :ܦܩܲܕܼ ܠܪܲܒܿܒܲܝܬܹܿܗ ܕܢܸܫܪܸܐ ܐܸܢܘܿܢ ܒܐܸܣܟܹܿܝܡ ܚܘܼܒܵܐ 694 ܘܲܢܣܝܼܡ ܟܵܣܵܐ ܒܦܘܼܡ ܛܲܥܢܲܝ̈ܗܘܿܢ ܘܢܲܚܸܫ ܐܸܢܘܿܢ ܀ pb. 285 695 :ܟܵܣܵܐ ܕܝܼܠܹܗ ܦܩ݂ܲܕ ܕܲܢܣܝܼܡܝܼܘܗܝ ܒܛܲܥܢܵܐ ܕܐܲܚܘܼܗܝ 696 ܕܲܒܼܝܲܕܼ ܟܠܗܹܝܢ ܢܸܒܼܩܸܐ ܚܘܼܒܵܐ ܕܐܲܚܹ̈ܐ ܢܟܼܝ̈ܠܹܐ ܀ 697 :ܚܙܲܩܘ̣ ܡ̣ܢ ܨܹܐܕܼܵܘܗܝ ܟܲܕܼ ܚܵܕܹܝ̇ܢ ܗ̄ܘ̣ܵܘ ܐܲܝܟ ܙܲܟܵܝܹ̈ܐ 698 ܘܥܲܕܼ ܡܸܬܼܝܲܐܒܼܝܼܢ ܪܗܸܛ ܦܘܼܩܕܵܢܵܐ ܘܐܲܪܗܸܒܼ ܐܸܢܘܿܢ ܀ 699 ܘܥܲܦ ܗ̄ܘ̣ܵܐ ܐܸܒܼܠܵܐ ܒܲܕܼܡܘܼܬܼ ܢܲܚ̈ܬܹܿܐ ܥܲܠ ܪܸܥܝܵܢܵܐ ܀ 700 :ܠܡܵܢܵܐ ܦܪ݂ܲܥܬܿܘܿܢ ܚܘܼܒܼܠܹ̈ܐ ܕܨܲܥܪܵܐ ܚܠܵܦ ܐܝܼܩܵܪܵܐ 701 ܘܠܵܐ ܩܵܘܝܼܬܵܢ ܒܐܲܝܕܵܐ ܕܦܲܐܝܵܐ ܠܲܒܼܢܲܝ̈ ܚܹܐܪܹ̈ܐ ܀ 702 :ܒܲܨܝܼ ܐܸܢܘܿܢ ܐܲܝܟ ܠܵܐ ܝܵ̇ܕܲܥ ܒܐܲܝܕܵܐ ܕܲܗܘ̤ܵܬܼ 703 ܘܐܸܫܟܲܚ ܟܵܣܵܐ ܐܲܝܟܵܐ ܕܣܵܡܹ݂ܗ ܠܘܵܬܼ ܒܸܢܝܵܡܹܝܢ ܀ 704 :ܥܛܲܦܘ ܟܲܕܼ ܒܵܟܹ̇ܝܢ ܘܲܦܪܝܼܣ ܐܸܒܼܠܵܐ ܥܲܠ ܪܹ̈ܫܲܝܗܘܿܢ 705 ܕܗܲܦܟ݂ܵܗ̇ ܐܸܒܼܠܵܐ ܠܚܲܕܼܘܲܬܼ ܠܸܒܵܐ ܠܘܵܬܼ ܟܲܪ ܝܘܼܬܼܵܐ ܀ 706 :ܢܦܲܠܘ̣ ܘܐܸܬܼܓܲܪܓܲܚܘ ܟܲܕܼ ܡܸܬܼܟܲܫܦܝܼܢ ܥܲܠ ܡ̇ܐ ܕܓܼܕܲܫ 707 ܘܐܵܘܕܲܝܼܘ ܘܐܸܡ̣ܪܘ ܕܠܲܝܬܿ ܙܵܟܼܘܼܬܼܵܐ ܠܚܲܝܵܒܼܘܼܬܲܢ ܀ 708 :ܚܙ̣ܵܐ ܙܲܕܲܝܼܩܵܐ ܚܲܫܵܐ ܕܐܲܚܵܘ̈ܗܝ ܘܚܲܫ̣ ܠܘܼܩܒܲܠܗܘܿܢ 709 ܘܠܵܐ ܬܘܼܒܼ ܚܲܡܣܸܢ ܡ̣ܢ ܟܲܪܝܘܼܬܼܵܐ ܕܫܸܚܩܲܬ̤ ܢܲܦܫܹܗ ܀ 710 :ܥܨ̣ܵܝܗܝ ܓܹܝܪ ܚܘܼܒܵܐ ܕܦܵܪܘܿܫܘܼܬܼܵܐ ܕܣܝܼܡ ܒܲܟܼܝܵܢܵܐ 711 ܘܲܗ̤ܘܲܝ̈ ܕܸܡܥܹ̈ܐ ܐܲܝܟ ܫܘܼܒܼܩܵܢܵܐ ܠܘܵܬܼ ܟܲܪܝܘܼܬܼܵܐ ܀ 712 :ܒܟ݂ܵܐ ܠܘܼܩܒܲܠܗܘܿܢ ܕܲܟܼܡܵܐ ܚܲܫ̣ܘ ܗ̄ܘ̣ܵܘ ܒܠܵܐ ܝܼܕܲܥܬܼܵܐ 713 ܘܚܵܘܝܼ ܚܘܼܒܹܿܗ ܕܠܵܐ ܦܪ݂ܲܥ ܐܸܢܘܿܢ ܣܘܼܥܪ̈ܵܢܲܝܗܘܿܢ ܀ 714 :ܪ̈ܲܚܡܹܐ ܙܲܩܬ̣ܿܘܼܗܝ ܒܲܕܼܡܘܼܬܼ ܥܘܼܖܣܵܐ ܠܘܵܬܼ ܬܲܪܥܘܼܬܼܵܐ 715 ܘܐܵܘܕܲܥ ܐܸܢܘܿܢ ܕܗܘ̤ܝܘܼ ܕܙܲܒܿܢܹܗ ܚܣܵܡܵܐ ܢܟܼܝܼܠܵܐ ܀ 716 :ܐ̄ܢܵܐ ܐ̄ܢܵܐ ܝܵܘܣܸܦ ܥܲܒܼܕܵܐ ܚܣܵܡܵܐ ܕܲܒܼܟܼܘܿܢ 717 ܘܗܵܐ ܐܲܪܝܼܡܲܢܝ ܨܸܒܼܝܵܢ ܟܲܣܝܵܐ ܕܲܓܼܠܸܐ ܠܹܗ ܟܠ ܀ 718 :ܐ̄ܢܵܐ ܐ̄ܢܵܐ ܚܣܝܼܡܵܐ ܕܛܲܪܕܲܢܝ ܢܸܟܼܠܵܐ ܠܒܲܪ ܡ̣ܢ ܫܲܝܢܵܐ 719 ܘܗܵܐ ܫܲܝܸܢ ܒܝܼ ܐܲܠܵܗ ܟܠܵܐ ܥܲܡܵܐ ܦܠܝܼܓܼܵܐ ܀ 720 :ܐ̄ܢܵܐ ܗ̄ܘ̣ ܗܲܕܵܡܵܐ ܕܲܦܣܲܩܬܿܘܿܢܵܢܝ ܡ̣ܢ ܓܘܼܫܡܲܝ̈ܟܿܘܿܢ 721 ܬܵܘ ܢܸܬܼܚܲܢܲܢ ܐܵܦܸܢ ܗܵܫܵܐ ܠܘܵܬܼ ܫܲܘܝܘܼܬܼܵܐ ܀ 722 :ܐ̄ܢܵܐ ܐ̄ܢܵܐ ܕܲܚܙܹ̇ܝܬܼ ܟܲܦܹ̈ܐ ܚܕܲܥܣܲܪ ܘܲܚܕܼܵܐ ܕܲܩܬܢܘܿܡܝ 723 ܘܗܵܐ ܐܸܬܼܦܲܫܲܩ ܚܲܝܠܵܐ ܕܡܸܠܲܝ̈ ܒܕܲܣܓܸܕܿܬܿܘܿܢ ܠܝܼ ܀ 724 :ܙܸܠܘ ܠܹܗ ܠܟܹܐܢܵܐ ܝܲܥܩܘܿܒܼ ܕܩܲܝܵܡ ܝܵܘܣܸܦ 725 ܬܵܐ ܚܘܿܬܼ ܒܲܥܓܲܠ ܘܲܦܪܘܿܥ ܐܵܦ ܐܲܢ̄ܬܿ ܚܵܘܒܲܬܼ ܚܸܠܡܹ̈ܐ ܀ 726 :ܙܸܠܘ ܐܸܡܲܪܘ ܠܹܗ ܕܩܲܝܵܡ ܫܲܒܼܛܵܐ ܕܣܵܡ̇ܟ ܗ̄ܘ̣ܵܐ ܠܵܟ 727 ܬܵܐ ܠܒܼܘܿܟ ܒܐܝܼܕܼܵܐ ܚܘܼܛܪܵܐ ܕܲܩܢܘܿܡܝ ܘܐܸܬܼܒܲܝܲܐ ܒܹܗ ܀ 728 :ܙܸܠܘ ܒܲܕܹܿܩܘ ܠܹܗ ܐܝܼܩܵܪܝ ܘܫܘܼܠܛܵܢܝ ܕܒܹܝܬܼ ܡܸܨܪ̈ܵܝܹܐ 729 ܘܐܲܢܝܼܚܘ ܢܲܦܫܹܗ ܒܲܠܡܹܐܝܢ ܛܸܒܵܐ ܕܚܲܝܹ̈ܐ ܕܲܩܢܘܿܡܝ ܀ pb. 286 730 :ܙܸܠܘ ܐܸܡܲܪܘ ܠܹܗ ܕܥܲܒܼ݂ܕܲܢܝ ܐܲܠܵܗܝ ܡܵܪܵܐ ܠܡܸܨܪܹܝܢ 731 ܘܡܲܡܠܸܟ ܫܘܼܠܛܵܢܝ ܘܪܵܕܹܐ ܠܥܲܒܼ̈ܕܹܿܐ ܘܠܲܒܼܢܲܝ̈ ܚܹܪܹ̈ܐ ܀ 732 :ܓܠܵܘ ܚܵܘܵܘ ܠܹܗ ܐܵܦ ܚܹܝܠ ܟܲܣܝܵܐ ܙܵܘܥܲܝ̈ 733 ܘܐܲܫܪܝܼ ܒܡܲܕܲܥܝ ܚܸܟܼܡܲܬܼ ܩܘܼܫܬܵܐ ܕܲܣܬܼܝܼܪ݁ܵܬܼܵܐ ܀ 734 :ܙܸܠܘ ܐܸܡܲܪܘ ܠܹܗ ܕܩܲܝܵܡ ܟܲܦܢܵܐ ܫ̈ܢܲܝܵܐ ܚܲܡܸܫ 735 ܬܵܐ ܐܹܬܲܪܣܹܝܟ ܕܲܠܡܵܐ ܬܹܐܒܲܕܼ ܐܲܢ̄ܬܿ ܥܲܡ ܕܝܼܠܵܟ ܀ 736 :ܐܵܦ ܗܘ̤ ܝܵܘܣܸܦ ܒܗܵܕܹܐ ܡܸܠܬܼܵܠ ܒܲܝܲܐ ܠܐܲܚܵܘ̈ܗܝ 737 ܕܐܲܠܵܗܵܝ ܫܲܕܲܪܲܢܝ ܕܐܸܗܘܸܐ ܙܵܐܹ̇ܢ ܠܟܼܘܿܢ ܡ̣ܢ ܟܲܦܢܵܐ ܀ 738 :ܒܗܵܕܹܐ ܬܸܢܘܲܝ ܡܓܲܪܸܓܼ ܗ̄ܘ̣ܵܐ ܠܹܗ ܠܝܲܩܘܿܒܼ ܐܲܒܼܘܼܗܝ 739 ܕܲܒܼܡܲܚܲܬܿܬܹܿܗ ܢܚܲܬܸܿܡ ܡܸܠܹ̈ܐ ܕܲܠܘܵܬܼ ܐܲܒܼܪܵܡ ܀ 740 :ܒܝܲܕܼ ܫܘܼܘܕܵܝܵܐ ܕܲܢܒܼܝܼܘܼܬܼܵܐ ܐܲܦܝܼܣ ܠܐܲܚܵܘ̈ܗܝ 741 ܕܠܵܐ ܢܸܬܼܥܵܘܟܼܘܼܢ ܡ̣ܢ ܡܹܐܬܼܝܼܬܼܵܐ ܕܲܠܘܵܬܼ ܚܘܼܒܹܿܗ ܀ 742 :ܐܲܪܡܝܼ ܥܠܲܝܗܘܿܢ ܩܸܢܛܵܐ ܕܟܲܦܢܵܐ ܘܕܲܚܸܠ ܐܸܢܘܿܢ 743 ܕܬܼܘܼܒܼ ܠܲܡ ܩܲܝܵܡ ܫܲܒܼܛܵܐ ܕܟܲܦܢܸܵܐ ܫܢܲܝܵ̈ܐ ܚܲܡܸܫ ܀ 744 :ܒܗܵܠܹܝܢ ܩܵܠܹ̈ܐ ܫܲܓܲܫ ܐܸܢܘܿܢ ܠܡܸܚܲܬܼ ܨܖܹܕܼܵܘܗܝ 745 ܘܲܟܼܬ݂ܲܒܼ ܐܸܢܘܿܢ ܒܪܸ̈ܥܝܵܢܲܝܗܘܿܢ ܐܲܝܟ ܕܲܒܼܠܘܼܚܹ̈ܐ ܀ 746 :ܫܡ݂ܲܥ ܡܸܨܪܵܝܵܐ ܦܸܪܥܘܿܢ ܡܲܠܟܵܐ ܒܗܵܠܹܝܢ ܕܲܗ̤ܘܲܝ̈ 747 ܘܲܚܕܼܝܼ ܣܲܓܿܝܼ ܒܛܸܒܵܐ ܕܓܸܢܣܹܗ ܕܒܲܪ ܥܸܒܼܪ̈ܵܝܹܐ ܀ 748 :ܩܪ̣ܵܐ ܠܲܡ ܦܸܪܥܘܿܢ ܠܝܵܘܣܸܦ ܘܐܸܡ݂ܲܪ ܕܲܥܒܸܕܼ ܗܵܕܹܐ 749 ܘܐܲܝܬܵܐ ܠܥܲܡܵܟ ܘܐܲܢܝܼܚ ܐܸܢܘܿܢ ܒܛܘܼܒܹ̈ܐ ܕܡܲܠܟܿܘܼܬܼܝ ܀ 750 :ܙܵܘܸܕܼ ܠܐܲܚܲܝ̈ܟ ܘܫܲܕܲܪ ܐܸܢܘܿܢ ܠܒܹܝܬܼ ܐܲܒܼܘܼܗܘܿܢ 751 ܕܢܹܐܬܸܐ ܢܸܚܙܸܐ ܘܢܸܚܕܹܿܐ ܒܚܲܝܲܝ̈ܟ ܘܲܒܼܫܘܼܠܛܵܢܵܟ ܀ 752 :ܩܲܒܸܿܠܘ ܘܲܫܠܸܡ̣ܘ ܐܲܚܵܘ̈ܗܝ ܕܝܵܘܣܸܦ ܒܗܵܕܹܐ ܕܲܗܘ̤ܵܬܼ 753 ܘܲܚܙ݂ܲܩܘ ܠܐܲܬܼܪܵܐ ܕܒܹܝܬܼ ܡܲܥܡܲܪܗܘܿܢ ܟܲܕܼ ܚܵ̇ܕܹܝܢ ܗ̄ܘ̣ܵܘ ܀ 754 :ܡܲܢܲܥܘ ܘܲܡ̣ܛܵܘ ܫܲܒܼܛܲܝ̈ ܟܹܐܢܵܐ ܠܘܵܬܼ ܐܲܒܼܘܼܗܘܿܢ 755 ܘܲܛܥܝܼܢܝܼܢ ܗ̄ܘ̣ܵܘ ܥܘܼܬܼܪܵܐ ܕܙܲܒܼܢܵܐ ܘܐܵܬܼܵܐ ܕܫܲܝܢܵܐ ܀ 756 :ܚܵܕܝܼܘ ܕܵܫܢܹ̈ܐ ܕܫܲܕܲܪܘ ܝܵܘܣܸܦ ܘܦܸܪܥܘܿܢ ܡܲܠܟܵܐ 757 ܘܝܲܗ̣̄ܒܼܘ ܠܹܗ ܣܒܲܪܬܼܵܐ ܕܚܲܝܹ̈ܐ ܕܲܒܼܪܹܗ ܘܲܕܼܫܘܼܠܛܵܢܹܗ ܀ 758 :ܬܗܲܪ ܘܐܸܕܲܡܲܪ ܒܐܲܝܕܵܐ ܕܲܗܘ̤ܵܬܼ ܕܠܵܐ ܣܘܼܟܵܝܵܐ 759 ܘܐܵܘܚܸܠ ܘܐܸܡ݂ܲܪ ܕܪܲܒܵܐ ܗ̄ܝܼ ܣܲܓܿܝܼ ܐܸܢ ܫܲܪܝܼܪܵܐ ܀ 760 :ܚܙ̣ܵܐ ܥܸܓܼ̈ܠܵܬܼܵܐ ܕܫܲܕܲܪ ܦܸܪܥܘܿܢ ܘܢܵܚ̣ ܪܸܥܝܵܢܹܗ 761 ܘܲܩܢ̣ܵܐ ܣܲܒܼܪܵܐ ܠܘܵܬܼ ܣܘܼܟܵܝܵܐ ܕܐܲܝܠܹܝܢ ܕܲܫܡ݂ܲܥ ܀ 762 :ܪܲܒܵܐ ܗܝ̤ ܠܲܡ ܕܩܲܝܵܡ ܝܵܘܣܸܦ ܐܸܡ݂ܲܪ ܟܹܐܢܵܐ 763 ܐܸܚܘܿܬܼ ܐܸܚܙܹܝܘܗܝ ܘܐܸܚܕܸܿܐ ܒܚܵܝܵܘ̈ܗܝ ܥܲܕܼܠܵܐ ܐܹܡܘܼܬ ܀ 764 :ܐܹܙܲܠ ܐܲܢܚ̣ ܚܲܫܲܝ̈ ܥܲܝܢܲܝ̈ ܒܲܠܡܹܐܝܢ ܦܲܓܼܪܹܗ 765 ܘܐܲܫܠܲܚ ܟܲܪܝܘܼܬܼܝ ܒܝܲܕܼ ܥܸܢܝܵܢܵܐ ܕܡܸܠܲܝ̈ ܦܘܼܡܹܗ ܀ pb. 287 766 :ܐܹܙܠ ܐܸܦܪܘܿܥ ܚܵܘܒܲܬܼ ܚܸܠܡܹ̈ܐ ܕܚܲܝܵܒܼ ܐ̄ܢܵܐ ܠܹܗ 767 ܘܐܹܡܲܠܸܐ ܠܹܗ ܣܸܓܼܓܲܬܼ ܚܘܼܒܵܐ ܕܲܚܙ̣ܵܐ ܒܫܸܡܫܵܐ ܀ 768 :ܐܹܙܲܠ ܐܸܚܙܹܝܘܗܝ ܟܲܕܼ ܡܸܬܼܝܲܩܲܪ ܒܹܝܬܼ ܡܸܨܪ̈ܵܝܹܐ 769 ܘܬܼܘܼܒܼ ܢܸܫܬܲܪܲܪ ܒܝܼ ܡܘܼܠܟܵܢܵܐ ܕܐܲܒܼܪܵܡ ܘܕܐܝܼܣܚܵܩ ܀ 770 :ܚܙ݂ܲܩ ܝܼܣܪܵܝܹܠ ܒܐܘܼܪܚܵܐ ܕܐܲܚܙ̣ܩ ܟܲܣܝܵܐ ܠܐܲܒܼܘܼܗܝ 771 ܘܥܲܠ̣ ܥܲܡ ܙܲܪܥܹܗ ܠܐܲܪܥܵܐ ܕܡܸܨܪܹܝܢ ܘܫܲܪ̣ ܡܘܼܠܟܵܢܵܐ ܀ 772 :ܚܙ̣ܵܘ ܠܲܚܕܼܵܕܹ̈ܐ ܐܲܒܼܵܐ ܠܲܒܼܪܹܗ ܟܹܐܢܵܐ ܠܟܹܐܢܵܐ 773 ܘܲܦܪܲܥܘ̣ ܚܘܼܒܵܐ ܘܫܲܡܠܝܼܘ ܐ̄ܪ݁ܵܙܹܐ ܕܲܒܼܝܲܕܼ ܚܸܠܡܹ̈ܐ ܀ 774 :ܣܓܸܕܼ ܙܲܕܿܝܼܩܵܐ ܩܕܼܵܡ ܙܲܕܿܝܼܩܵܐ ܗܘ̤ ܥܲܡ ܝܲܠܕܵܘ̈ܗܝ 775 ܘܟܲܕܼܢܹܗ ܒܢܝܼܪܵܐ ܬܚܹܝܬܼ ܥܲܒܼܕܿܘܼܬܼܵܐ ܕܡܪܹܗ ܘܲܒܼܪܹܗ ܀ 776 :ܒܣܸܓܼܕܲܬܼ ܝܵܘܣܸܦ ܟܕܲܢ ܒܵܪܘܿܝܵܐ ܟܠܝܼܠܹ̈ܐ ܘܚܲܪ݁ܫܹܐ 777 ܒܐ̄ܪܵܙ ܦܵܪܘܿܩܲܢ ܕܩܲܒܸܿܠ ܡ̣ܢ ܟܠ ܣܸܓܼܕܲܬܼ ܚܘܼܒܵܐ ܀ 778 :ܒܗܵܕܹܐ ܬܸܢܘܲܝ ܝܲܩܪܹܗ ܠܟܹܐܢܵܐ ܒܣܸܓܼܕܲܬ ܓܸܢܣܹܗ 779 ܕܠܵܐ ܐ̄ܢܵܫ ܢܸܬܼܡܲܗ ܒܣܸܓܼܕܲܬܼ ܟܠܵܐ ܕܨܹܝܕܼ ܪܹܫܝܼܬܲܢ ܀ 780 :ܒܝܵܘܣܸܦ ܐܲܠܸܦ ܣܸܓܼܕܲܬܼ ܟܠܵܐ ܕܲܠܘܵܬܼ ܐ̄ܢܵܫܵܐ 781 ܕܣܵܓ̇ܿܕܲܝܼܢ ܐܲܟܲܚ̄ܕܼ ܥܝܼܪܹ̈ܐ ܘܐܵܢܵܫܵܐ ܠܲܨܠܸܡ ܐ̄ܢܵܫܵܐ ܀ 782 :ܐ̄ܢܵܫܵܐ ܥܬܼܝܼܕܼ ܗ̄ܘ̣ܵܐ ܕܢܸܣܲܒܼ ܟܲܣܝܵܐ ܘܢܸܣܥܘܿܪ ܒܹܗ ܟܠ 783 ܘܒܲܐܦܲܝ̈ ܢܩܲܒܸܿܠ ܡ̣ܢ ܟܠ ܣܸܓܼܕܲܬܼ ܟܠܵܐ ܀ 784 :ܒܗܵܕܹܐ ܨܵܐܲܪ ܐܵܦ ܦܸܠ̈ܐܵܬܼܵܐ ܒܕܼܘܼܒܵܪ ܟܹܐܢܹ̈ܐ 785 ܕܠܵܐ ܢܸܬܼܢܲܟܼܪܸܐ ܟܲܕܼ ܡܸܬܼܒܲܕܲܩ ܫܪܵܪ ܓܸܠܝܵܢܹܗ ܀ 786 :ܓܠ̣ܵܐ ܥܲܠ ܕܸܒܼܚܹܗ ܒܕܼܒܼܚܵܐ ܕܐܸܡܪܵܐ ܕܦܲܨܝܼ ܠܐܝܼܣܚܵܩ 787 ܕܗܵܟܲܢ ܦܵܪܹܩ ܐܵܦ ܗܘ̤ ܠܓܸܢܣܹܗ ܒܕܸܒܼܚܵܐ ܕܦܲܓܼܪܹܗ ܀ 788 ܚܵܘܝܼ ܒܝܵܘܣܸܦ ܕܠܹܗ ܡܸܬܼܩܲܪܒܼܵܐ ܣܸܓܼܕܲܬܼ ܟܠܵܐ ܀ 789 :ܨܵܪ ܪܲܒܿܘܼܬܹܗ ܘܲܪܫܲܡ̣ ܐ̄ܪ̈ܵܙܵܘܗܝ ܒܟܹܐܢܹ̈ܐ ܘܡܲܠ݁̈ܟܹܿܐ 790 ܘܚܵܘܝܹܗ ܠܚܲܪܬܼܵܐ ܘܒܲܝܐܹܗ ܒܹܗ ܟܠ ܐ̄ܚܪ̈ܵܝܹܐ ܘܩܲܕܼܡܹ̈ܐ ܀ 791 :ܡܲܢ ܠܵܐ ܢܸܬܼܗܲܪ ܒܕܼܘܼܒܵܪ ܟܹܐܢܹ̈ܐ ܘܚܘܼܡܣܵܢܲܝ̈ܗܘܿܢ 792 ܕܲܕܼܪܲܫܘ ܐܘܼܪܚܵܐ ܒܝܲܕܼ ܥܲܡܠܲܝ̈ܗܘܿܢ ܠܘܵܬܼ ܐܝܼܬܼܘܼܬܼܵܐ ܀ 793 :ܡܲܢ ܠܵܐ ܢܸܫܠܲܡ ܠܐ̄ܪ̈ܵܙܹܐ ܘܛܘܼܦܣܹ̈ܐ ܕܲܩܢܘܿܡܲܝ̈ܗܘܿܢ 794 ܘܢܵܘܕܸܿܐ ܒܚܲܝܠܵܐ ܕܚܲܝܵܠ ܐܸܢܘܿܢ ܒܲܥܬܼܝܼ̈ܕܼܵܬܼܵܐ ܀ 795 :ܡܲܢ ܠܵܐ ܢܵܘܕܸܿܐ ܐܲܝܟ ܬܲܪܥܝܼܬܼܵܐ ܕܪܸ̈ܥܝܵܢܲܝܗܘܿܢ 796 ܕܗܲܝܡܸܢܘ ܘܐܲܚܸܒܼܘ ܘܲܣܒ݂ܲܪܘ ܘܲܫܠܸܡ̣ܘ ܠܗܵܘ̇ܡ̇ܐ ܕܣܲܟܿܝܼܘ ܀ 797 :ܡܲܢ ܠܵܐ ܢܸܩܘܿܫ ܒܲܬܼܪܲܥ ܚܘܼܒܵܐ ܕܒܹܗ ܥܲܠ̣ܘ ܘܐܲܡܠܸܟܼܘ 798 ܘܢܲܡܠܸܟ ܐܵܦ ܗܘ̤ ܒܕܼܘܼܡܝܵܐ ܢܲܟܼܦܵܐ ܕܚܵܘܝܼܘ ܒܐܲܪܥܵܐ ܀ 799 :ܒܝܵܘܣܸܦ ܢܹܚܘܼܪ ܐܲܝܢܵܐ ܕܨܵܒܹ̇ܬܼ ܠܡܸܬܼܢܲܟܵܦܘܼ 800 ܘܢܸܚܙܸܐ ܩܢܘܿܡܹܗ ܕܠܵܐ ܢܸܬܼܟܲܬܲܡ ܒܪܸܓܲܬܼ ܦܲܓܼܪܵܐ ܀ pb. 288 801 :ܒܹܗ ܢܸܬܼܒܲܩܸܐ ܐܲܝܢܵܐ ܕܪܵܗܹ̇ܛ ܪܘܼܚܵܢܵܐܝܼܬܼ 802 ܘܢܲܪܡܸܐ ܦܓܼܘܼ̈ܕܹܐ ܒܪܸ̈ܓܼܫܲܝ ܦܲܓܼܪܹܗ ܕܠܵܐ ܢܸܬܼܒܲܥܪܲܪ ܀ 803 :ܒܕܘܼܡܝܵܐ ܕܝܼܠܹܗ ܢܹܐܚܘܿܕܼ ܕܲܪܵܐ ܥܲܡ ܚܘܼ̈ܬܼܚܵܬܹܐ 804 ܕܬܸܕܲܥܲܟ ܢܘܼܪܵܐ ܕܲܒܼܗܲܕܵܡܵܘ̈ܗܝ ܒܚܘܼܡܣܵܢ ܢܲܦܫܹܗ ܀ 805 :ܥܲܡܹܗ ܢܸܚܘܿܬܼ ܠܐܸܣܛܵܕܼܝܼܘܿܢ ܡܲܠܝܲܬܼ ܚܲܫܹ̈ܐ 806 ܕܢܸܣܲܩ ܥܲܡܹܗ ܠܘܵܬܼ ܙܵܟܼܘܼܬܼܵܐ ܕܦܘܼܪܥܵܢ ܐܲܓܼܪܵܐ ܀ 807 :ܫܘܼܒܼܚܵܐ ܠܡܵܪܝܵܐ ܕܲܒܼܝܲܕܼ ܚܘܼܒܹܿܗ ܫܲܡܠܝܼ ܘܲܓܼܡܲܪ 808 ܐ̄ܪܵܙ ܦܸܠ̈ܐܵܬܼܵܐ ܕܲܚܙ̣ܵܘ ܥܒܼܵܕܵܘ̈ܗܝ ܒܫܸܡ ܐܝܼܬܼܘܼܬܼܵܐ ܀