On the Miracles of Moses - ܥܲܠ ܓܲܒܼܝܘܼܬܹܗ ܕܡܘܼܫܹܐ: ܘܥܲܠ ܢܘܼܪܵܐ ܕܲܚܙܵܐ

1 :ܚܙܵܬܼܵܐ ܚܕܲܬܵܐ ܚܙ̣ܵܐ ܒܲܪ ܥܲܡܪܲܡ ܥܲܠ ܪܹܫ ܛܘܼܪܲܐ 2 ܢܘܼܪܵܐ ܒܣܲܢܝܵܐ ܘܣܲܢܝܵܐ ܒܢܘܼܪܵܐ ܘܠܵܐ ܝܵܩܹ̇ܕܼ ܗ̄ܘ̣ܵܐ ܀ 3 :ܟܝܵܢܵܐ ܪܲܦܝܵܐ ܚܙ̣ܵܐ ܟܲܕܼ ܩܵܐܹ̇ܡ ܒܦܘܼܡ ܝܵܩܹ̇ܕܼܬܵܐ 4 ܘܠܵܐ ܢܵܟܼ̇ܝܵܐ ܗ̄ܘ̣ܵܬܼ ܚܲܡܝܼܡܘܼܬܼܵܗ̇ ܠܪܲܛܝܼܒܼܘܼܬܹܗ ܀ pb. 289 5 :ܐܲܝܟ ܐܲܪܝܘܿܬܼܵܐ ܦܬܼܝܼܚ ܗ̄ܘ̣ܵܐ ܦܘܼܡ̇ܗ̇ ܕܫܲܠܗܹܒܼܝܼܬܼܵܐ 6 ܘܣܲܢܝܵܐ ܩܕܼܵܡܹܝܗ̇ ܒܲܕܡܘܼܬܼ ܐܘܼܟܼܠܵܐ ܘܠܵܐ ܩܵܪܒܵܐ ܠܹܗ ܀ 7 :ܫܝܘܿܠ ܒܵܠܲܥܬܼܵܠܐ ܕܲܟܼܡܸܵܐ ܕܐܵܟܼ̇ܠܵܐ ܬܘܼܒܼ ܡܸܬܼܝܲܥܢܵܐ 8 :ܗܘ̤ܵܬܼ ܨܲܝܵܡܬܵܐ ܒܛܘܼܪܵܐ ܕܚܘܿܪܝܼܒܼ ܕܠܵܐ ܒܲܥܝܵܕܼܵܐ 9 :ܒܠܝܼܠܲܬܼ ܛܲܟܼܣܵܐ ܕܲܫܘܸܐ ܠܵܗ̇ ܟܠ ܠܪܲܒܿܘܼܬܼ ܟܲܪܣܵܗ̇ 10 ܛܲܟܼܣܵܐ ܢܸܛܪܲܬ̤ ܩܕܲܡ ܓܸܠܝܵܢܵܐ ܐܲܠܵܗܵܐ ܀ 11 :ܐܲܠܵܗܵܐܝܼܬܼ ܡܸܬܼܚܵܘܝܵܐ ܗ̄ܘ̣ܵܐ ܠܥܹܢܲܝ ܡܘܼܫܹܐ 12 ܘܟܲܕܼ ܢܵܟܼ̇ܝܵܐ ܗ̄ܘ̣ܵܬܼ ܠܵܐ ܢܵܟܼܝܵ̇ܐ ܗ̄ܘ̣ܵܬܼ ܠܡܸܬܼܢܲܟܼܝܵܢܵܐ ܀ 13 :ܒܐܸܣܟܹܿܝܡ ܢܘܼܪܵܐ ܡܸܬܼܚܵܘܝܵܐ ܗ̄ܘ̣ܵܬܼ ܠܒܲܪ ܥܒܼܪ̈ܵܝܹܐ 14 ܘܟܲܕܼ ܢܘܼܪܵܐ ܗ̣̄ܘܵܬܼ ܘܠܵܐ ܗ̄ܘ̣ܵܬܼ ܢܘܼܪܵܐ ܢܘܼܪܵܢܵܝܵܬܼܵܐ ܀ 15 :ܕܘܼܡܝܵܐ ܕܢܘܼܪܵܐ ܚܙ̣ܵܐ ܟܲܕܼ ܫܲܪܝܵܐ ܒܣܵܘ̈ܟܿܝܼ ܣܲܢܝܵܐ 16 ܘܲܬܼܗܲܪ ܣܲܓܿܝܼ ܕܡܲܢ ܐܲܪܡܝܼ ܒܵܗ̇ ܦܓܼܘܼܕܼܵܐ ܕܫܼܬܼܩܵܐ ܀ 17 :ܒܲܥܪܝܼܪܵܝܬܵܐ ܕܠܵܐ ܐܸܬܼܟܲܒܼܫܲܬ̤ ܣܲܦܝܼܦܘܼܬܼܵܗ̇ 18 ܐܲܝܟ ܕܲܒܼܢܝܼܪܵܐ ܟܕܼܝܼܢ ܗ̄ܘ̣ܵܐ ܥܘܼܙܵܗ̇ ܬܚܹܝܬܼ ܦܘܼܩܕܵܢܵܐ ܀ 19 :ܪܸܡܙܵܐ ܟܲܣܝܵܐ ܪܟܸܒܼ ܐܸܣܟܹܿܡܵܐ ܡܸܬܼܚܲܙܝܵܢܵܐ 20 ܘܐܲܪܡܝܼ ܦܓܼܘܼܪܹ̈ܐ ܕܫܲܠܗܹܒܼܝܼܬܼܵܐ ܒܦܘܼܡ ܡܲܪܟܲܒܼܬܹܗ ܀ 21 :ܥܲܠ ܪܹܫ ܛܘܼܪܵܐ ܟ̣ܠܵܐ ܩܵܪܘܿܟܼܵܐ ܕܩܲܠܝܼܠܘܼܬܹܗ 22 ܘܨܸܗܠܲܬ̤ ܢܘܼܪܵܐ ܕܲܬܼܚܹܝܬܼ ܬܘܼܩܦܹܗ ܒܲܕܼܡܘܼܬܼ ܪ̈ܲܟܼܫܵܐ ܀ 23 :ܨܲܗܠܵܐ ܕܢܘܼܪܵܐ ܫܡ݂ܲܥ ܗ̄ܘ̣ܵܐ ܡܘܼܫܹܐ ܒܦܘܼܡܵܐ ܕܣܲܢܝܵܐ 24 ܘܲܨܒܼܵܐ ܕܢܹܐܠܲܦ ܥܸܠܲܬܼ ܚܸܙܘܵܐ ܕܐܸܬܼܚܵܘܝܼ ܠܹܗ ܀ 25 :ܐܸܣܛܸܐ ܐܸܚܘܸܐ ܚܸܙܘܵܐ ܪܲܒܵܐ ܐܸܡ݂ܲܪ ܦܹܐܩܵܐ 26 ܕܡܸܛܠ ܡ̇ܢܵܐ ܝܵܩܹ̇ܕܼ ܣܲܢܝܵܐ ܟܲܕܼ ܠܵܐ ܝܵܩܹ̇ܕܼ ܀ 27 :ܗܵܘ̇ ܦܘܼܩܕܵܢܵܐ ܕܨܵܪܹܗ ܠܚܸܙܘܵܐ ܩ̣ܪܵܝܗܝ ܟܲܣܝܵܐܝܼܬܼ 28 ܕܲܩܪܘܿܒܼ ܘܫܲܐܸܠ ܕܡ̇ܢܲܐ ܗ̄ܝܼ ܥܸܠܬܼܵܐ ܘܡܸܛܠܡܵܢܵܐ ܀ 29 :ܓܲܪܚܹܗ ܕܢܸܩܪܘܿܒܼ ܠܐܲܦܲܝ̈ ܚܵܙܘܵܐ ܗܲܢܝܼܵܐܝܼܬܼ 30 ܘܲܗܦܲܟ ܕܲܚܠܹܗ ܕܠܵܐ ܢܸܬܼܩܲܪܲܒܼ ܟܲܕܼ ܠܵܐ ܩܲܕܿܝܼܫ ܀ 31 :ܡܘܼܫܹܐ ܡܘܼܫܹܐ ܩ̣ܪܵܝܗܝ ܘܐܸܡ݂ܲܪ ܠܹܗ ܐܲܝܟ ܝܵ̇ܕܲܥ ܠܹܗ 32 ܫܪܝܼ ܠܲܣܐܘܿܢܵܟ ܘܐܲܟܸܿܢ ܬܸܩܪܘܿܒܼ ܠܐܲܝܟܵܐ ܕܐܝܼܬܿܝܼ ܀ 33 ܩܲܕܿܝܼܫܵܐ ܐ̄ܢܵܐ ܘܐܸܬܼܩܲܕܲܫ ܠܹܗ ܛܘܼܪܵܐ ܒܲܫܟܼܝܼܢܬܿܝ 34 ܠܵܐ ܠܲܡ ܬܛܲܡܐܝܼܘܗܝ ܒܲܣܐܘܿܢ ܪܸ̈ܓܼܠܲܝܟ ܠܐܲܬܼܪܵܐ ܕܕܲܟܿܝܼܬܼ ܀ 35 :ܛܲܡܠܵܐ ܚܲܫ̣ܒܹܿܗ ܠܲܣܐܘܿܢ ܪܸ̈ܓܼܠܵܘܗܝ ܠܵܘ ܕܛܲܡܠܵܐ ܗ̄ܘ̣ܵܐ 36 ܐܸܠܵܐ ܕܢܵܘܪܸܒܼ ܪܲܒܘܼܬܼ ܚܸܙܘܵܐ ܩܕܼܵܡ ܓܸܠܝܵܢܹܗ ܀ 37 :ܩܲܕܿܝܼܫܵܐܝܼܬܼ ܐܲܠܦܹܗ ܕܢܸܩܪܘܿܒܼ ܨܹܝܕܼ ܓܸܠܝܵܢܵܐ 38 ܕܢܸܗܘܸܐ ܝܵ̇ܕܲܥ ܠܲܡܩܲܕܵܫܘܼ ܠܲܒܼܢܲܝ̈ ܥܲܡܹܗ ܀ 39 ܒܗܵܕܹܐ ܬܸܢܘܲܝ ܚܵܘܝܹܗ ܚܙܵܬܼܵܐ ܕܫܲܠܗܹܒܼܝܼܬܼܵܐ: pb. 290 40 ܕܢܲܣܸܦ ܢܘܼܪܵܐ ܕܫܸܡ ܒܵܪܘܿܝܵܐ ܒܝܲܥܪܵܐ ܕܛܘܼܥܝܲܝ ܀ 41 :ܒܢܘܼܪܵܐ ܒܲܕܸܿܩ ܚܹܝܠ ܪܲܒܿܘܼܬܹܗ ܕܚܹܝܠ ܟܠ ܡܸܫܟܲܚ 42 ܘܲܒܼܝܲܕܼ ܣܲܢܝܵܐ ܓܠ̣ܵܐ ܥܲܠ ܥܘܼܬܼܪܵܐ ܕܒܲܣܝܼܡܘܼܬܹܗ ܀ 43 :ܐ̄ܪܵܙ ܩܲܫܝܘܼܬܹܗ ܘܒܲܣܝܼܡܘܼܬܹܗ ܨܵܪ ܒܲܚܙܵܬܼܵܐ 44 ܘܐܲܝܼܩ ܐܸܢܹܝܢ ܒܲܕܼܡܘܼܬܼ ܨܲܠܡܵܐ ܩܕܼܵܡ ܒܲܪ ܒܲܝܬܹܿܗ ܀ 45 :ܨܹܝܕܼ ܡܸܨܪ̈ܵܝܹܐ ܘܝܼܣܲܪ̈ܠܵܝܹܐ ܡܫܲܕܲܪ ܗ̄ܘ̣ܵܐ ܠܹܗ 46 ܕܢܸܪܕܸܿܐ ܘܢܸܦܪܘܿܩ ܐܝܟ ܒܘܼܚܪܵܢܵܐ ܕܕܝܼܢܹܗ ܟܹܐܢܵܐ ܀ 47 :ܐܲܝܟ ܕܲܒܼܢܘܼܪܵܐ ܦܫܝܼܩ ܗ̄ܘ̣ܵܐ ܠܪܸܡܙܹܗ ܕܢܸܛܿܝܗ̇ ܠܡܸܨܪܹܝܢ 48 ܘܚܵܘܝܼ ܒܣܲܢܝܵܐ ܕܠܵܐ ܪܵܓܵܐ ܠܹܗ ܒܐܲܒܼܕܵܢ ܐ̄ܢܵܫܵܐ ܀ 49 :ܡ̣ܢ ܓܵܘ ܢܘܼܪܵܐ ܡܲܠܸܠ ܥܲܡܹܗ ܕܲܠܥܸܓܼ ܡܲܡܠܠܵܐ 50 ܟܲܕܼ ܐܵܡܲ݁ܪ ܠܹܗ ܕܐܸܢܵܐ ܫܲܠܝܼܛ ܥܲܠ ܟܠ ܘܲܒܼܟܼܠ ܀ 51 :ܐܸܢܵܐ ܗ̄ܘ̣ ܕܲܒܼܪܹܝܬܼ ܒܪܝܼܬܼܵܐ ܒܪܵܫܝܼܬܼ ܡ̣ܢ ܠܵܐ ܡܸܕܹܿܡ 52 ܘܲܒܼܚܲܝܠܝ ܩܵܐܹ̇̄ܡ ܥܵܠܡܵܐ ܥܒܼܝܼܕܼܵܐ ܕܲܥܒܼܝܼܕܼ ܒܐܝܼܕܲܝ̈ ܀ 53 :ܐ̄ܢܵܐ ܐ̄ܢܵܐ ܕܲܓܼܒܹ̇ܝܬܼ ܠܐܲܒܼܪܵܡ ܠܵܐܝܼܣܚܵܩ ܘܝܲܥܩܘܿܒܼ ܥܲܒܼܕܲܝ̈ 54 ܘܝܲܩܪܹܬܼ ܐܸܢܘܿܢ ܒܲܫܡܵܐ ܪܲܒܵܐ ܕܫܹܡܝ ܝܲܩܝܼܪܵܐ ܀ 55 :ܐ̄ܢܵܐ ܐ̄ܢܵܐ ܕܡܸܠ̇ܟܹܿܬܼ ܐܲܪܥܵܐ ܕܲܟܼܢܲܥ̄ܢ ܠܙܲܪܥܵܐ ܕܡܸܢܗܘܿܢ 56 ܘܐܸܬܹ̇ܝܬܼ ܕܐܸܓܼܡܘܿܪ ܫܘܼܘܕܵܝ ܡܸܠܲܝ̈ ܒܗܘܿܢ ܒܲܥ̇ܒܼܵܕܹ̈ܐ ܀ 57 :ܓܥܵܬܼܵܐ ܕܚܲܫܗܘܿܢ ܕܒܹܝܬܼ ܡܸܨܪ̈ܵܝܹܐ ܥܸܠܲܬ̤ ܨܹܐܕܲܝ 58 ܘܢܸܚܬܹܿܬܼ ܕܐܸܦܪܘܿܩ ܠܲܛܠܝܼܡܘܼܬܼܗܘܿܢ ܡ̣ܢ ܛܵܠܘܿܡܹ̈ܐ ܀ 59 :ܝܵ̇ܕܲܥ ܐ̄ܢܵܐ ܠܹܗ ܠܟܹܐܒܼܵܐ ܕܠܸܒܿܗܘܿܢ ܕܲܟܼܡܵܐ ܡܲܪܝܼܪ 60 ܥܲܠ ܗܵܝ̇ ܡܲܕܿܟܹܬܼ ܣܲܡܵܐ ܕܚܸܙܘܵܐ ܕܐܸܥܨܘܿܒܼ ܐܸܢܘܿܢ ܀ 61 :ܡܦܵܣ ܐ̄ܢܵܐ ܒܥܵܘ̣ܠܵܐ ܕܪ̈ܵܕܼܘܿܝܗܘܿܢ ܕܲܟܼܡܵܐ ܐܲܥܠܝܼܘ 62 ܥܲܠ ܗܵܝ̇ ܫܸܡܛܹ̇ܬܼ ܣܲܝܦܵܐ ܕܪܘܼܚܵܐ ܕܐܸܚܪܘܿܒܼ ܐܸܢܘܿܢ ܀ 63 :ܠܵܟ ܝܵܗܹ̇ܒܼ ܐ̄ܢܵܐ ܙܲܝܢܵܐ ܕܡܸܠܲܬܼܝ ܕܠܵܐ ܡܸܬܼܚܲܣܢܵܐ 64 ܙܸܠ ܡܲܟܸܿܟ ܒܵܗ̇ ܢܒܲܝ̈ ܚܵܡ ܥܲܒܼܕܼܵܐ ܕܫܲܥܒܸܿܕܼ ܚܹܐܪܹ̈ܐ ܀ 65 :ܙܸܠ ܐܸܡܲܪ ܠܹܗ ܠܲܥܒܸܕܼ ܥܲܒܼ̈ܕܹܿܐ ܕܠܝܼܛ ܡ̣ܢ ܐܲܒܼܘܼܗܝ 66 ܕܟܲܕܿܘܼ ܫܲܥܒܸܿܕܿܬܿ ܠܲܒܼܢܲܝ̈ ܟܹܐܢܵܐ ܕܒܲܪܟܹܗ ܐܲܒܼܘܼܗܝ ܀ 67 :ܙܸܠ ܐܲܟܼܪܸܙ ܠܹܗ ܚܹܐܪܘܼܬܼ ܢܲܦܫܵܐ ܠܒܲܪ ܫܹܝܡ ܒܘܼܟܼܪܵܐ 68 ܘܲܫܕܼܝܼ ܡܸܢܹܗ ܢܝܼܪ ܥܲܒܼܕܲܘܼܬܼܵܐ ܕܚܵܡ ܙܲܠܝܼܠܵܐ ܀ 69 :ܫܘܼܘܕܵܝ ܡܸܠܲܝ̈ ܫܲܪܝܼܪ݁ܵܬܼܵܐ ܕܨܹܝܕܼ ܢܘܿܚ ܥܸܗܕܹܿܬܼ 70 ܕܕܲܓܸܿܠ ܐܸܢܹܝܢ ܙܲܪܥܹܗ ܕܲܟܼܢܲܥ̄ܢ ܒܪܵܡܘܼܬܼ ܠܸܒܹܿܗ ܀ 71 :ܐ̄ܢܵܐ ܐ̄ܢܵܐ ܕܒܲܪܟܹܬܼ ܘܐ̄ܢܵܐ ܐ̄ܢܵܐ ܕܠܵܛܹ̇ܬܼ ܠܦܘܼܬܼ ܪܸ̈ܥܝܵܢܹܐ 72 ܘܐ̄ܢܵܐ ܐ̄ܢܵܐ ܕܡܸܠ̇ܟܹܿܬܼ ܕܢܸܗܘܘܿܢ ܥܲܒܼ̈ܕܹܿܐ ܒܢܲܝ̈ ܫܹܝܡ ܠܲܟܼܢܲܥ̄̇ܢ ܀ 73 :ܚܲܟܿܝܼܡܵܐܝܼܬܼ ܒܲܪܟܹܿܬܼ ܘܠܵܛܹ̇ܬܼ ܠܲܬܼܪܹܝܢ ܓܲܒܿܝܼ̈ܢ 74 ܘܕܲܗܦ݂ܲܟ ܐܹܢܹܝܢ ܠܝܼܛܵܐ ܠܒܼܘܼܪ̈ܟܵܬܼܝ ܗܵܦܹ̇ܟ ܐ̄ܢܵܐ ܠܹܗ ܀ 75 ܓܠܝܼ ܟܹܝܬܼ ܚܲܝܠܵܐ ܕܒܼܘܼܪ̈ܟܵܬܼܝ ܠܝܼܣܲܪ̈ܠܵܝܹܐ: pb. 291 76 ܘܲܓܼܠܝܼ ܘܚܵܘܵܐ ܢܸܓܼܕܵܐ ܕܠܵܘ̈ܛܵܬܼܝ ܠܐܵܓܹܒܼܛܵܝܹ̈ܐ ܀ 77 :ܙܸܠ ܐܵܘܒܸܿܠ ܠܗܘܿܢ ܣܒܲܪܬܼܵܐ ܛܵܒܼܬܼܵܐ ܠܲܒܼܢܲܝ̈ ܪ̈ܵܚܡܲܝ 78 ܘܥܲܗܸܕܼ ܐܸܢܘܿܢ ܥܲܠ ܫܘܼܘܕܵܝܹ̈ܐ ܕܐܸܫܬܵܘܕܿܝܼܬܼ ܠܹܗ ܀ 79 :ܫܸܡ ܐܲܠܵܗܵܐ ܕܐܲܒܼܵܗܲܝ̈ܗܘܿܢ ܙܪܘܿܥ ܒܐܸܕܼܢܲܝ̈ܗܘܿܢ 80 ܘܗܵܐ ܡܸܬܿܬܿܥܝܼܪܝܼܢ ܠܩܵܠ ܟܘܼܘܵܢܵܐ ܕܲܚܪܘܼܪ̈ܲܝܗܘܿܢ ܀ 81 :ܫܡ݂ܲܥ ܥܸܒܼܪܵܝܵܐ ܚܪܘܼܪܹ̈ܐ ܕܥܲܡܹܗ ܘܬܵܚܲܬ̤ ܢܲܦܫܹܗ 82 ܘܲܗܦܲܟ ܐܲܟܼܪܝܼ ܕܕܲܠܡܵܐ ܫܸܡܥܵܐ ܗ̄ܘ̣ ܕܠܵܐ ܣܘܼܥܪ̈ܵܢܹܐ ܀ 83 :ܗܵܐ ܐܵܙܹ̇ܠ ܐ̄ܢܵܐ ܥܢ̣ܵܝܗܝ ܡܲܟܿܝܼܟܼܵܐ ܠܩܵܠܵܐ ܕܲܩܪ̣ܵܝܗܝ 84 ܘܲܡܣܲܒܲܪ ܐ̄ܢܵܐ ܠܝܼܣܲܪ̈ܵܠܵܝܹܐ ܣܒܲܪܬܼܵܐ ܕܲܫܡܵܟ ܀ 85 :ܗܵܐ ܡܲܟܼܪܸܙ ܐ̄ܢܵܐ ܫܸܡ ܐܲܠܵܗܵܐ ܒܐܸܕܼܢܲܝ̈ ܥܲܡܵܐ 86 ܘܗܵܐ ܬܵܒܼ̇ܥܝܼܢ ܠܹܗ ܫܡܵܐ ܚܲܬܿܝܼܬܼܵܐ ܘܡ̇ܢܵܐ ܐܹܡܲܪ ܀ 87 :ܫܸܡ ܐܲܠܵܗܹ̈ܐ ܕܠܵܐ ܡܸܢܝܵܢܵܐ ܐܝܼܬܼ ܒܲܒܼܪܝܼܬܼܵܐ 88 ܘܐܸܢ ܡ̇ܘܒܸܿܠ ܐ̄ܢܵܐ ܫܸܡ ܐܲܠܵܗܵܐ ܘܢܹܐܡܪܘܼܢ ܕܐܲܝܢܵܐ ܗ̄ܘ̣ ܀ 89 :ܫܡܵܐ ܩܲܕܼܡ̇ܝܲܬܼ ܬܵܒܼܥ̇ܝܼܢ ܒܐܝܼܕܲܝ̈ ܘܟܸܢ ܣܘܼܥܪ̈ܵܢܹܐ 90 ܘܐܲܝܟܲܢ ܐܸܩܪܹܝܟ ܩܕܼܵܡ ܒܲܥܥܵܝܹ̈ܐ ܕܒܼܵܥܹ̇ܝܢ ܠܲܫܡܵܟ ܀ 91 :ܚܙ̣ܵܝܗܝ ܒܵܪܘܿܝܵܐ ܕܣܲܓܿܝܼ ܬܵܒܲܥ̇ ܬܒܲܥܬܼܵܐ ܕܲܫܡܹܗ 92 ܘܲܓܼܠ̣ܵܐ ܘܚܵܘܝܹܗ ܫܸܡ ܐܝܼܬܼܘܼܬܼܵܐ ܕܲܕܠܵܐ ܫܘܼܪܵܝ ܀ 93 :ܫܸܡ ܐܝܼܬܼܘܼܬܹܗ ܐܲܠܦܹܗ ܠܡܸܓܼܠܵܐ ܩܕܼܵܡ ܥܸܒܼܪ̈ܵܝܹܐ 94 ܕܐܝܼܬܼܵܘܗܝ ܕܠܵܐ ܫܘܼܪܵܝܵܐ ܘܠܵܐ ܫܘܼܠܵܡܵܐ ܀ 95 :ܠܵܘ ܠܲܡ ܒܲܫܡܵܐ ܡܸܬܼܟܲܢܸܐ ܐ̄ܢܵܐ ܡ̣ܢ ܦܲܟܿܝܼܗܹ̈ܐ 96 ܐܸܠܵܐ ܒܚܲܝܠܵܐ ܘܲܒܼܣܘܼܥܪ݁ܵܢܹܐ ܕܥܵܒܼ̇ܘܿܕܼܘܼܬܼܵܐ ܀ 97 :ܐܝܼܬܼܝܵܐ ܐܝܼܬܲܝ ܘܫܸܡ ܐܝܼܬܼܘܼܬܼܝ ܗ̄ܘ̣ ܕܠܵܐ ܡܸܬܿܕܲܪܟܵܐ 98 ܘܠܵܐ ܐ̄ܢܵܫ ܣܵܡ̣ ܠܝܼ ܫܡܵܐ ܢܘܼܟܼܪܵܝܵܐ ܠܒܲܪ ܡ̣ܢ ܕܐܝܼܬܲܝ ܀ 99 :ܐܸܢܗܘ̤ ܕܲܫܡܵܐ ܕܡܲܟܼܪܸܙ ܡ̇ܪܘܼܬܼܝ ܒܵܥܹ̇ܝܬܿ ܕܬܹܐܠܲܦ 100 ܐܲܠܵܗ ܒܲܠܚܘܿܕܼ ܡܸܬܼܟܲܢܸܐ ܐ̄ܢܵܐ ܘܬܼܘܼܒܼ ܥܵܒܼܘܿܕܵܐ ܀ 101 :ܐܵܗܝܼܵܗ ܕܹܝܢ ܐ̄ܫܵܪܵܗܝܼܵܗ ܫܸܡ ܐܝܼܬܼܘܼܬܼܝ ܗ̄ܘ̣ 102 ܘܲܕܼܢܸܫܬܲܪܲܪ ܥܲܦ̣ܹܗ ܠܵܩܵܠܵܐ ܕܬܲܪܬܹܿܝܢ ܙܲܒܼܬܝܼ̈ܢ ܀ 103 :ܫܡ݂ܲܥ ܒܲܪ ܥܲܡܪܲܡ ܫܸܡ ܐܝܼܬܼܘܼܬܼܵܐ ܕܐܝܼܬܹܝܗ̇ ܘܟܲܣܝܵܐ 104 ܘܲܪܢ̣ܵܐ ܕܐܲܝܟܲܢ ܡܗܲܝܡܸܢ ܥܲܡܵܐ ܠܡܸܕܹܿܡ ܕܲܟܼܣܸܐ ܀ 105 :ܙܸܠ ܬܘܼܒܼ ܘܐܸܡܲܪ ܬܢ̣ܵܐ ܘܐܸܡ݂ܲܪ ܠܹܗ ܠܡܸܫܬܲܕܿܪܵܢܵܐ 106 ܕܐܲܠܵܗܵܐ ܐ̄ܢܵܐ ܕܐܲܒܼܵܗܲܝ̈ܟܿܘܿܢ ܕܐܲܒܼܪܵܡ ܘܐܝܼܣܚܵܩ ܀ 107 :ܝܲܬܿܝܼܪ݁ܵܬܼܵܐ ܗ̤ܘܲܝ̈ ܠܹܗ ܠܦܹܐܩܵܐ ܗܵܠܹܝܢ ܕܲܫܡ݂ܲܥ 108 ܘܠܵܐ ܨܒܼܵܐ ܕܢܹܐܙܲܠ ܕܲܠܡܵܐ ܟܹܐܙܲܠ ܘܠܵܐ ܢܸܬܼܗܲܝܡܲܢ ܀ pb. 292 109 :ܗܵܐ ܠܵܐ ܡܗܲܝܡܸܢ ܥܲܡܵܐ ܠܡܸܠܲܝ̈ ܦܲܢܝܼ ܦܹܐܩܵܐ 110 ܘܠܵܐ ܬܘܼܒܼ ܦܸܪܥܘܿܢ ܨܵܐܹ̇ܬܼ ܩܵܠܵܐ ܕܫܸܡ ܐܝܼܬܼܘܼܬܼܵܐ ܀ 111 :ܚܙ̣ܵܝܗܝ ܒܵܪܘܿܝܵܐ ܕܥܸܠܠܹ̈ܐ ܒܵܥܹ̇ܐ ܠܲܡܪܲܟܵܒܼܘ 112 ܘܐܲܚܕܹܿܗ ܠܬܲܪܥܵܐ ܩܕܵܡ ܥܸܠ̈ܠܵܬܼܵܐ ܕܗܸܕܝܘܿܛܘܼܬܹܗ ܀ 113 :ܚܙ̣ܵܐ ܐܸܬܼܟܲܪܗܲܬ̤ ܗܲܝܡܵܢܘܼܬܹܗ ܒܚܲܕܼ ܦܘܼܠܵܓܹ̈ܐ 114 ܘܣܵܡ̣ ܠܹܗ ܣܲܡܵܐ ܕܚܹܝܠ ܐܵܬܼ̈ܘܵܬܼܵܐ ܥܲܠ ܪܸܥܝܵܢܹܗ ܀ 115 :ܡܵܢܵܘ̇ ܗܵܢܵܐ ܕܒܼܐܝܼܕܲܝ̈ܟ ܫܲܐܸܠ ܐܲܝܟ ܠܵܐ ܝܵ̇ܕܲܥ 116 ܘܐܸܡ݂ܲܪ ܚܘܼܛܪܵܐ ܗ̄ܘ̣ ܟܲܕܼ ܠܵܐ ܝܵ̇ܕܲܥ ܕܥܲܠ ܡ̇ܢ ܫܲܐ̣ܠܹܗ ܀ 117 :ܫܲܐ̣ܠܹܗ ܕܢܵܘܕܹܿܐ ܕܡܸܕܸܿܡ ܐܝܼܬܼܵܘܗܝ ܚܘܼܛܪܵܐ ܕܒܼܐܝܼܕܹܗ 118 ܕܡ̇ܐ ܕܐܸܫܬܲܚܠܲܦ ܠܵܐ ܢܸܣܒܲܪ ܠܹܗ ܕܠܵܘ ܡܸܕܹܿܡ ܗ̄ܘ̣ ܀ 119 :ܐܲܠܪܡܵܝܗܝ ܒܐܲܪܥܵܐ ܐܸܡ݂ܲܪ ܖܩܹܐܕܼܵܘܗܝ ܕܡ̇ܪܹܐ ܚܘܼܛܪܵܐ 120 ܘܲܫܕ̣ܵܝܗܝ ܒܐܲܪܥܵܐ ܘܲܗܘ̤ܵܐ ܚܸܘܝܵܐ ܘܫܲܪܝܼ ܪܵܦܹ̇ܬܼ ܀ 121 :ܚܙ̣ܵܝܗܝ ܥܵܒܼܪܵܝܵܐ ܫܘܼܚܠܵܦ ܚܘܼܛܪܹܗ ܘܙܵܥ ܘܐܸܬܼܒܲܠܗܝܼ 122 ܘܲܕܼܚܸܠ ܡܸܢܹܗ ܕܕܲܠܡܵܐ ܢܲܟܹܿܝܘܗܝ ܘܢܵܘܦܘܿܢ ܚܲܝܵܘ̈ܗܝ ܀ 123 :ܠܲܒܿܒܹܗ ܩܵܠܵܐ ܕܡܲܠܸܠ ܥܲܡܹܗ ܕܲܚܙ̣ܵܝܗܝ ܕܐܲܫܦܸܠ 124 ܕܢܹܐܚܘܿܕܼ ܚܸܘܝܵܐ ܐܲܝܟ ܕܠܚܘܼܛܪܵܐ ܘܠܵܐ ܢܸܣܬܲܪܲܕܼ ܀ 125 :ܠܲܒܸܿܒܼ ܙܵܘܥܵܘ̈ܗܝ ܘܐܲܚܕܹܿܗ ܒܐܝܼܕܼܵܘ̈ܗܝ ܐܲܝܟ ܕܐܸܬܼܦܲܩܲܕܼ 126 ܘܲܗܦ݂ܲܟ ܚܸܘܝܵܐ ܘܲܗܘ̤ܵܐ ܚܘܼܛܪܵܐ ܐܲܝܟ ܕܐܝܼܬܼܵܘܗܝ ܗ̄ܘ̣ܵܐ ܀ 127 :ܦܢ̣ܵܐ ܘܐܸܡ݂ܲܪ ܠܹܗ ܐܲܥܸܠ ܐܝܼܕܼܵܟ ܘܣܝܼܡܹܝܗ̇ ܒܥܘܼܒܵܟ 128 ܘܐܲܥܸܠ ܘܐܲܦܸܩ ܘܲܚܙ̣ܵܐ ܕܓܸܪܒܲܬ̤ ܒܲܕܼܡܘܼܬܼ ܬܲܠܓܵܐ ܀ 129 :ܦܲܩܕܹܗ ܕܢܲܗܦܸܟ ܢܲܥܸܠ ܐܝܼܕܹܗ ܕܬܲܪܬܹܿܝܢ ܙܲܒܼܝܼ̈ܢ 130 ܘܐܲܥܸܠ ܘܐܲܦܸܩ ܘܗܸܦܟܲܬ̤ ܘܲܗܘ̤ܵܬܼ ܐܲܝܟ ܕܲܒܼܩܲܕܼܡ̇ܐ ܀ 131 :ܒܚܘܼܛܪܹܗ ܘܒܼܐܝܼܕܹܗ ܐܲܠܦܹܗ ܚܲܝܠܵܗ ܕܣܵܥܲ݁ܪ ܒܐܝܼܕܼܵܘ̈ܗܝ 132 ܕܪܵܕܹܐ ܘܦܵܪܹܩ ܘܕܼܵܠܹ̇ܐ ܒܥܵܘ̣ܠܵܐ ܘܲܡܫܲܬܸܩ ܠܹܗ ܀ 133 :ܒܚܘܼܛܪܵܐ ܚܵܘܝܹܗ ܢܸܓܼ̈ܕܹܿܐ ܩܫܲܝܵ̈ܐ ܕܥܲܠ ܡܸܨܪ̈ܵܝܹܐ 134 ܘܒܼܐܝܼܕܹܗ ܕܓܸܪܒܲܬ̤ ܣܲܢܝܘܼܬܼ ܥܵܘ̣ܠܵܐ ܕܲܒܼܢܲܝ̈ ܥܲܡܹܗ ܀ 135 :ܕܟܹܝܢ ܗ̄ܘ̣ܵܘ ܟܲܕܼ ܥܲܠ̣ܘ ܡ̣ܢ ܚܲܢܦܘܼܬܼܵܐ ܓܼܪܒܼܵܐ ܕܲܬܼܪܹܝܢ 136 ܘܡ̣ܢ ܕܐܸܬܿܚܲܠܲܛܘ ܥܲܡ ܡܸܨܪ̈ܵܝܹܐ ܓܼܪܸܒܼܘ ܒܲܚܛܝܼܬܼܵܐ ܀ 137 :ܒܝܲܕܼ ܡܲܦܲܩܬܵܐ ܕܡ̣ܢ ܓܵܘ ܡܸܨܪܹܝܢ ܡܸܬܿܕܲܟܹܿܝܢ ܗ̄ܘ̣ܵܘ 138 ܒܗܵܘ̇ ܐܸܣܟܹܿܡܵܐ ܕܓܸܪܒܲܬ̤ ܐܝܼܕܹܗ ܘܗܸܦܟܲܬ̤ ܕܸܟܲܝܲܬ̤ ܀ 139 :ܒܲܕܼܡܘܼܬܼ ܚܘܼܛܪܵܐ ܫܲܬܿܝܼܩܝܼܢ ܗ̄ܘ̣ܵܘ ܐܵܦ ܡܸܨܪ̈ܵܝܹܐ 140 ܘܒܼܵܬܲܪ ܙܲܒܼܢܵܐ ܗܘ̤ܵܘ ܐܵܟܹܕܼܢܹ̈ܐ ܒܚܲܪܵܫܘܼܬܼܵܐ ܀ 141 :ܡܸܛܠܵܬܼܗܘܿܢ ܫܲܚܠܸܦ ܚܘܼܛܪܵܐ ܘܲܗܘ̤ܵܐ ܚܸܘܝܵܐ 142 ܕܲܒܼܡܲܪܕܿܘܼܬܹܗ ܢܫܲܠܸܦ ܐܸܢܘܿܢ ܡ̣ܢ ܒܝܼ̈ܫܵܬܼܵܐ ܀ pb. 293 143 :ܒܬܲܪܬܹܿܝܢ ܐܵܬܼ̈ܘܵܢ ܕܪܲܫ ܠܹܗ ܐܘܼܪܚܵܐ ܠܡܸܫܬܲܕܿܪܵܢܵܐ 144 ܟܲܕܼ ܛܵܒܼ ܓܼܠ̈ܝܵܢ ܗ̣̄ܘܲܝ̈ ܥܲܣ̈ܩܵܬܼܵܐ ܩܕܼܵܡ ܪܸܥܝܵܢܹܗ ܀ 145 :ܒܹܝܬܼ ܦܘܼܠܵܓܼ̈ܐ ܩܵܡ̣ܘ ܚܘܼܫܵܒܼܵܘ̈ܗܝ ܥܲܠ ܡܹܐܙܲܠܬܹܿܗ 146 ܘܲܦܢ̣ܵܐ ܘܪܲܟܸܿܒܼ ܥܸܠܬܼܵܐ ܐ̄ܚܪܹܬܼܵܐ ܕܠܲܥܓܿܘܼܬܼ ܡܲܡܠܠܹܗ ܀ 147 :ܐܲܟܿܣܹܗ ܩܵܠܵܐ ܕܡܲܢ̣ܘܼ ܕܲܥܒ݂ܲܕܼ ܦܘܼܡܵܐ ܠܐ̄ܢܵܫܵܐ 148 ܘܡܲܢ ܝܲܗ̣̄ܒܼ ܦܘܼܡ̇ܐ ܠܲܡܠܝܼܠܘܼܬܼܵܐ ܕܬܼܵܒܲ̇ܥ ܡܸܠܹ̈ܐ ܀ 149 :ܐܵܪܵܐ ܚܘܼܛܪܵܐ ܕܲܗܘ̤ܵܐ ܚܸܘܝܵܬܐ ܠܵܐ ܡܲܠܸܦ ܠܵܟ 150 ܕܲܦܫܝܼܩ ܗ̄ܘ̣ ܠܝܼ ܕܲܒܼܠܲܥܓܿܘܼܬܼܵܟ ܬܲܟܼܪܸܙ ܪܲܒܿܘܼܬܼܝ ܀ 151 :ܠܡܵܢ ܣܵܕܲܪ ܐܲܢ̄ܬܿ ܥܸܠܠܹ̈ܐ ܘܡܸܠܹ̈ܐ ܠܘܼܩܒܲܠ ܨܸܒܼܝܵܢܝ 152 ܕܗܵܐ ܐܸܢ ܨܵܒܹ̇ܝܬܼ ܘܐܸܢ ܠܵܐ ܨܵܒܹ̇ܝܬܿ ܡܹܐܙܲܠ ܐܵܙܲܠ̄ܬܿ ܀ 153 :ܙܸܠ ܠܵܐ ܬܸܟܼܪܸܐ ܕܕܲܡ ܠܵܐ ܗܵܘ̈ܝܵܢ ܗܵܠܹܝܢ ܕܲܫܡ݂ܲܥܬܿ 154 ܡܬܼܘܿܚ ܚܘܼܫܵܒܲܝ̈ܟ ܠܘܵܬܼ ܫܘܼܠܵܡܵܐ ܘܲܚܙܝܼ ܕܟܹܐ̈ܢܵܢ ܀ 155 :ܐ̄ܢܵܐ ܗܵܘܹ̇ܐ ܐ̄ܢܵܐ ܡܸܠܬܼܵܐ ܫܪܝܼܬܼܵܐ ܒܠܲܥܓܿܘܼܬܼ ܦܘܼܡ̇ܟ 156 ܘܲܡܬܲܪܓܸܿܡ ܐ̄ܢܵܐ ܥܲܠ ܡܸܨܪ̈ܵܝܹܐ ܘܥܲܠ ܥܵܒܼܪ̈ܵܝܵܐ ܀ 157 :ܚܙ̣ܵܐ ܒܲܪ ܥܲܡܪܲܡ ܕܐܵܘܦܝܼ ܡܸܠܵܘ̈ܗܝ ܘܡܹܐܙܲܠ ܐܵܙܹ̇ܠ 158 ܘܲܕܼܒܲܪ ܥܲܡܹܗ ܐܲܢ̄ܬܿܬܹܗ ܘܲܒܼܢܵܘ̈ܗܝ ܕܢܹܐܙܲܠ ܘܲܢܦܘܼܫ ܀ 159 :ܒܗܵܕܹܐ ܬܼܢܘܲܚ ܚܙ̣ܵܩ ܡ̣ܢ ܡܸܕܼܝܵܢ ܠܒܹܝܬܼ ܡܸܨܪ̈ܵܝܹܐ 160 ܕܐܸܢܗܘ̤ ܕܦܵܪܹܩ ܘܐܸܠܵܐ ܒܩܵܘܸܐ ܨܹܝܕ ܩܲܪ̈ܝܼܒܼܵܘܗܝ ܀ 161 :ܒܵܕܹ̇ܩ ܠܸܒܵܐ ܚܙ̣ܵܝܗܝ ܕܐܸܬܼܪܲܥܲܡ ܠܡܸܬܿܛܲܫܵܝܘܼ 162 ܘܲܓܼܠ̣ܵܐ ܘܒܲܕܼܩܹܗ ܠܢܸܟܼܠܵܐ ܟܲܣܝܵܐ ܕܲܒܼܓܼܵܘ ܠܸܒܹܿܗ ܀ 163 :ܒܐܸܣܟܹܿܝܡ ܚܸܡܬܼܵܐ ܦܓܲܥ ܒܹܗ ܒܐܘܼܪܚܵܐ ܒܡܸܬܼܦܲܠܓܼܵܢܵܐ 164 ܘܐܲܪܝܼܡ ܣܲܝܦܹܗ ܘܦܲܣܩܹܗ ܠܢܸܟܼܠܵܐ ܕܲܢܟܿܘܼܠܬܼܵܢܵܐ ܀ 165 :ܣܲܝܦܵܐ ܐܲܒܼܪܸܩ ܠܘܼܩܒܲܠ ܚܲܝܵܘ̈ܗܝ ܐܲܝܟ ܕܲܠܩܸܛܠܵܐ 166 ܘܲܚܙܵܬ̤ ܐܲܢ̄ܬܿܬܹܗ ܘܢܸܣܒܲܬ̤ ܒܐܲܦܵܘ̈ܗܝ ܓܙܘܼܪܬܵܐ ܕܲܒܼܪܵܗ̇ ܀ 167 :ܓܙܘܼܬܵܐ ܠܸܒܼܟܲܬ̤ ܒܲܕܼܡܘܼܬܼ ܣܲܟܿܪܵܐ ܩܕܼܵܡ ܦܘܼܩܕܵܢܵܐ 168 ܘܲܟܼܠܵܬ̤ ܣܲܝܦܵܐ ܡ̣ܢ ܫܵܘܬܵܦܵܗ̇ ܕܠܵܐ ܢܸܩܪܘܿܒܼ ܠܹܗ ܀ 169 :ܚܲܬܼܢܵܐ ܕܲܕܼܡ̇ܐ ܐܸܡܪܲܬ̤ ܕܐܝܼܬܼ ܠܝܼ ܠܦܘܼܬܼ ܚܘܼܫܵܒܼܵܗ̇ 170 ܘܲܐ̄ܚܝܵܢܬܵܐ ܐ̄ܢܵܐ ܕܗܲܝܡܵܢܘܼܬܼܵܐ ܕܒܹܝܬܼ ܐܲܒܼܪܵܗܵܡ ܀ 171 :ܛܲܒܼܥܵܐ ܕܐܲܒܼܪܵܡ ܠܸܒܼܟܲܬ̤ ܒܐܝܼܕܼܵܗ̇ ܒܲܪ̄ܬܼ ܩܵܨܘܿܡܹ̈ܐ 172 ܕܕܲܡ ܚܵܙܹ̇ܐ ܠܵܗ̇ ܡܵܪܵܐ ܕܐܲܒܼܪܵܡ ܘܡܸܬܼܪܲܥܸܐ ܠܵܗ̇ ܀ 173 :ܐܵܦ ܝܵ̇ܕܲܥ ܟܠ ܚܙ̣ܵܗ̇ ܕܐܸܬܼܓܵܘܣܲܬ̤ ܒܒܹܝܬܼ ܐܲܒܼܪܵܗܵܡ 174 ܘܲܢܣ݂ܲܒܼ ܒܐܲܦܹܝ̈ܗ̇ ܘܲܚܡ݂ܲܠ ܣܲܝܦܹܗ ܘܦܵܫ̣ ܡ̣ܢ ܩܸܛܠܵܐ ܀ 175 :ܠܵܐ ܗ̄ܘ̣ܵܐ ܕܢܸܩܛܘܿܠ ܐܲܪܝܼܡ ܐܝܼܕܹܗ ܐܵܦܸܢ ܐܲܪܝܼܡ 176 ܐܸܠܵܐ ܕܢܸܓܼܠܸܐ ܢܸܟܼܠܵܐ ܕܪܲܟܸܿܒܼ ܡܘܼܫܹܐ ܒܠܸܒܹܿܗ ܀ 177 :ܐܲܝܟ ܓܲܝܵܣܵܐ ܢܦ݂ܲܠ ܦܘܼܩܕܼܵܢܵܐ ܥܲܠ ܡܲܫܪܝܼܬܹܗ 178 ܘܐܲܥܕܲܝ ܡܸܢܹܗ ܕܒܼܵܪܬܹܿܗ ܘܫܲܕܿܪܹܗ ܥܲܪܛܸܠܵܐܝܼܬܼ ܀ 179 ܚܘܼܛܪܵܐ ܒܲܠܚܘܿܕܼ ܝܲܗ̣̄ܒܝ ܠܹܗ ܠܪܵܥܝܵܐ ܕܢܹܐܚܘܿܕܼ ܒܐܝܼܕܹܗ: pb. 294 180 ܕܲܢܚܵܘܸܐ ܒܹܗ ܚܹܝܠ ܐܵܬܼ̈ܘܵܬܼܵܐ ܕܥܲܡܵܐ ܘܥܲܡܡܹ̈ܐ ܀ 181 :ܣܲܝܦܵܐ ܕܪܘܼܚܵܐ ܐܵܘܚܸܕܼ ܒܐܝܼܕܹܗ ܕܲܩܪܲܒܼܬܼܵܢܵܐ 182 ܕܢܹܐܙܲܠ ܢܲܩܪܸܒܼ ܥܲܡ ܚܲܪ̈ܵܫܹܐ ܠܒܼܝܼܫܲܝ̈ ܛܘܼܥܝܲܝ ܀ 183 :ܐܲܝܟ ܓܼܠܘܵܝܵܐ ܥܲܠ̣ ܠܵܗ̇ ܠܡܸܨܪܹܝܢ ܕܲܢܦ݂ܲܩ ܡܸܢܵܗ̇ 184 ܘܐܲܪܝܼܡ ܚܘܼܛܪܹܗ ܘܡܸܠܲܬܼ ܦܘܼܡܹܗ ܘܙܵܥܲܬ̤ ܡܸܢܹܗ ܀ 185 :ܥܲܠ̣ ܘܐܸܫܬܲܥܝܼ ܠܲܒܼܢܲܝ̈ ܥܲܡܹܗ ܚܸܙܘܵܐ ܕܲܚܙܵܐ 186 ܘܢܵܚ̣ܘ ܟܲܕܼ ܠܵܐ ܢܵܚ̣ܘ ܒܲܕܼܠܵܐ ܗܲܝܡܸܢܘ ܫܲܪܝܼܪܵܐܝܼܬܼ ܀ 187 :ܫܲܡ݂ܲܥ ܐܵܦ ܦܸܪܥܘܿܢ ܫܸܡ ܐܲܠܵܗܵܐ ܘܙܵܥ ܟܲܕܼ ܠܵܐ ܙܵܥ 188 ܒܲܕܼܣܵܒܲ݁ܪ ܗ̄ܘ̣ܵܐ ܕܠܲܝܬܿ ܐܲܠܵܗܵܐ ܕܚܵܣܹ̇ܢ ܗ̄ܘ̣ܵܐ ܠܹܗ ܀ 189 :ܟܲܢܸܫ ܫܲܒܼܛܹ̈ܐ ܘܐܲܠܸܦ ܐܸܢܘܿܢ ܩܵܠ ܡܘܼܠܟܵܢܵܐ 190 ܘܥܲܠ̣ ܨܹܝܕܼ ܡܲܠܟܵܐ ܕܲܢܚܵܘܸܐ ܠܹܗ ܫܸܡ ܐܲܠܵܗܵܐ ܀ 191 :ܡ̇ܪܝܵܐ ܕܥܲܠ ܟܠ ܫܲܕܲܪܲܢܝ ܨܹܐܕܲܝܟ ܒܐܝܼܙ ܓܲܕܿܘܼܬܼܵܐ 192 ܕܐܸܦܪܘܼܩ ܥܲܡܹܗ ܡ̣ܢ ܫܘܼܥܒܵܕܼܵܐ ܢܦܸܠܘܿܚ ܠܲܫܡܹܗ ܀ 193 ܒܢܲܝ̈ܐ ܐܸܢܘܿܢ ܝܼܣܲܪ̈ܠܵܝܹܐ ܕܐܲܠܵܗܘܼܬܹܗ. 194 ܘܠܹܗ ܚܲܝܵܒܼܝܼܢ ܚܵܘܒܲܬܼ ܚܘܼܒܵܐ ܕܐܲܒܼܵܐ ܘܡ̇ܪܵܐ ܀ 195 :ܗܘ̤ ܐܸܡ݂ܲܪ ܠܝܼ ܕܙܸܠ ܘܐܸܡܲܪ ܠܹܗ ܠܦܸܪܥܘܿܢ ܡܲܠܟܵܐ 196 ܫܲܕܲܪ ܠܝܼ ܒܹܪܝ ܒܘܼܟܼܪܵܐ ܕܝܸ̇ܠܕܹܿܬܼ ܒܲܗܒܼܵܕܼ̇ ܐܝܼ̈ܕܲܝ ܀ 197 :ܒܹܪܝ ܒܘܼܟܼܪܵܐ ܐ̄ܡ݂ܲܪ ܡܘܼܫܹܐ ܒܘܼܟܼܪܵܐ ܕܪܘܼܚ ܓܸܠܝܵܢܹ̈ܐ 198 ܘܠܵܐ ܐܸܬܼܩܲܒܲܠ ܫܘܼܘܕܵܝ ܡܸܠܵܘ̈ܗܝ ܒܐܸܕܼܢܲܝ̈ ܦܸܪܥܘܿܢ ܀ 199 :ܡܲܢ̣ܘܼ ܡ̇ܪܝܵܐ ܘܡܲܢ̣ܘܼ ܥܲܡܹܗ ܠܵܐ ܝܵ̇ܕܲܥ ܐ̄ܢܵܐ 200 ܘܠܵܐ ܠܝܼܣܪܵܝܼܠ ܡܨܸܐ ܦܵܪܹܩ ܐ̄ܢܵܫ ܡ̣ܢ ܥܲܒܼܕܿܘܼܬܼܵܐ ܀ 201 :ܙܸܠ ܠܵܟ ܡܘܼܫܹܐ ܠܵܐ ܬܲܛܥܸܐ ܒܗܘܿܢ ܒܲܒܼܢܲܝ̈ ܥܲܡܵܟ 202 ܕܲܠܡܵܐ ܬܵܘܣܸܦ ܢܝܼܪܵܐ ܥܦܝܼܦܵܐ ܥܲܠ ܨܵܘܪ̈ܲܝܗܘܿܢ ܀ 203 :ܙܸܠ ܠܵܟ ܦܹܐܩܵܐ ܣܲܓܿܝܼ ܠܲܓܼܠܸܓܼܬܿ ܩܕܼܵܡ ܣܹܘܦܲܣܛܵܐ 204 ܠܵܐ ܬܘܼܒܼ ܬܵܘܣܸܦ ܠܲܡܡܲܠܵܠܘܼ ܕܠܵܐ ܬܸܨܛܲܥܲܪ ܀ 205 :ܠܵܐ ܙܵܥ ܡܘܼܫܹܐ ܡ̣ܢ ܠܘܼܚܵܡܹܗ ܕܐܵܓܹܒܼܛܵܝܵܐ 206 ܘܠܵܐ ܐܸܬܼܪܲܦܝܼ ܡ̣ܢ ܕܲܢܬܵܬܸܐ ܚܹܝܠ ܒܵܪܘܿܝܵܐ ܀ 207 :ܦܢ̣ܵܐ ܘܐܸܡ݂ܲܪ ܠܹܗ ܒܲܪ ܐܲܒܼܪܵܗܵܡ ܠܒܲܪ ܚܵܡ ܥܲܒܼܕܵܐ 208 ܕܐܝܼܙ ܓܼܕܵܐ ܐ̄ܢܵܐ ܕܫܲܕܲܪܲܢܝ ܟܲܣܝܵܐ ܠܒܹܝܬܼ ܐܲܪ̈ܥܵܢܹܐ ܀ 209 :ܣܲܩܪܵܐ ܕܲܫܡܹܗ ܝܲܗ̣̄ܒܼ ܠܝܼ ܕܐܲܝܬܸܿܐ ܠܲܒܲܢܲܝ̈ ܥܲܡܹܗ 210 ܩܪܝܼ ܘܐܸܣܬܲܟܲܠ ܘܲܚܙܝܼ ܕܫܲܪܝܼܪ ܡܸܕܸܿܡ ܕܐܸܡ̇ܪܹܬܼ ܀ 211 :ܦܲܬܼܚܹܗ ܡܘܼܫܹܐ ܠܲܦܪܸܣܛܸܓܼܡܵܐ ܕܫܸܡ ܐܝܼܬܼܘܼܬܼܵܐ 212 ܘܫܲܪܝܼ ܗܵܓܹ̇ܐ ܒܚܘܼܩܵܐ ܩܲܕܼܿܡܵܐ ܕܫܘܼܚܠܵܦ ܚܘܼܛܪܵܐ ܀ 213 :ܚܘܼܛܪܵܐ ܐܲܪܡܝܼ ܝܼܣܲܪܠܵܝܵܐ ܩܕܼܲܡ ܡܸܨܪܵܝܵܐ 214 ܘܲܗܘ̤ܵܐ ܚܸܘܝܵܐ ܠܵܘ ܒܐܸܣܟܹܿܡܵܐ ܐܸܠܵܐ ܒܩܘܼܫܬܵܐ ܀ 215 :ܠܵܐ ܙܵܥ ܦܸܪܥܘܿܢ ܒܫܘܼܚܠܵܦ ܚܘܼܛܪܵܐ ܕܲܗܘ̤ܸܵܐ ܚܸܘܝܵܐ 216 ܕܲܡܥܲܝܼܕܼ ܗ̄ܘ̣ܵܐ ܒܦܲܢܛܵܣܝܼܵܐ ܕܚܲܪܵܫܘܼܬܼܵܐ ܀ pb. 295 217 :ܣܵܒܲ݁ܪ ܗ̄ܘ̣ܵܐ ܓܹܝܪ ܕܐܲܝܟ ܚܲܪ݁ܵܫܹܐ ܡܲܛܥܸܐ ܒܛܘܼܥܝܲܝ 218 ܘܲܠܥܹܝܢ ܐ̄ܢܵܫܵܐ ܡܚܵܘܸܐ ܚܙܵܬܼܵܐ ܕܠܵܐ ܫܲܪܝܼܪܵܐ ܀ 219 :ܩܪ̣ܵܐ ܚܪ̈ܵܫܹܿܐ ܕܢܹܐܬܼܘܿܢ ܢܲܛܥܘܿܢ ܒܐܸܣܟܹܿܡܲܝ̈ܗܘܿܢ 220 ܘܐܲܪܡܝܼܘ ܚܘܼܛܪܹ̈ܐ ܘܠܵܘ ܣܠܸܩ ܩܸܨܡ̇ܐ ܕܚܘܼܫܵܒܲܝ̈ܗܘܿܢ ܀ 221 :ܥܒ݂ܲܕܼܘ ܐܵܦ ܗܸܢܘ̣ܿܢ ܒܲܕܼܡܘܼܬܼ ܡܘܼܫܹܐ ܠܵܘ ܒܲܫܪܵܪܵܐ 222 ܘܐܸܬܿܬܿܪܝܼܡ ܩܘܼܫܬܵܐ ܘܲܒܼܠܲܥ ܐܸܢܘܿܢ ܠܐܸܣܟܹܿܡܲܝ̈ܗܘܿܢ ܀ 223 :ܚܸܘܝܵܐ ܕܩܘܼܫܬܵܐ ܒܲܠ̣ܥܹܗ ܠܙܹܐܦܵܐ ܘܲܛܠܸ݂ܩ ܘܐܵܘܦܝܼ 224 ܘܠܵܐ ܐܸܬܼܟܲܚܲܕܼܘ ܙܹܐܦܵܢܝܹ̈ܐ ܡ̣ܢ ܫܲܪܝܼܪܵܐ ܀ 225 :ܣܲܒ݂ܲܪܘ ܚܲܪ̈ܵܫܹܐ ܕܲܒܼܚܲܪ̈ܫܲܝܗܘܿܢ ܡܲܛܥܸܐ ܡܘܼܫܹܐ 226 ܒܗܵܝ̇ ܕܲܪܕܸܐ ܗ̄ܘ̣ܵܐ ܒܐܘܼܡ̇ܢܘܼܬܼܗܘܿܢ ܡ̣ܢ ܛܲܠܝܘܼܬܹܗ ܀ 227 :ܩܲܫܝܼܘ ܠܸܒܿܗܘܿܢ ܩܲܫ̈ܝܲܝ ܠܸܒܵܐ ܘܠܵܘ ܨܵܬܘܼ ܡܸܠܵܘ̈ܗܝ 228 ܘܲܗܦ݂ܲܟ ܐܲܝܬܿܝܼ ܣܲܩܪܵܐ ܐ̄ܚܪܹܢܵܐ ܕܢܸܓܼܕܵܐ ܐ̄ܚܪܹܢܵܐ ܀ 229 :ܐܲܪܝܼܡ ܐܝܼܕܹܗ ܒܫܸܡ ܒܵܪܘܿܝܵܐ ܘܲܡ̣ܚܵܐ ܠܢܲܗܪܵܐ 230 ܘܲܗܘ̤ܵܘ ܡܲܝ̈ܵܐ ܚܠܲܚ̈ܵܐ ܕܢܲܗܪܵܐ ܕܡ̇ܐ ܡܲܪܝܼܪܵܐ ܀ 231 :ܩܲܫܝܘܼܬܼ ܢܸܓܼܕܵܐ ܗܲܦܟܲܬ̤ ܐܸܬܘܿܢ ܠܡܲܝܵ̈ܐ ܠܲܕܼܡ̇ܐ 232 ܕܢܹܐܠܲܦ ܦܸܪܥܘܿܢ ܕܡܸܛܠܵܬܹܗ ܒܠܲܥܘ̣ ܫܲܬܿܝܼܩܹ̈ܐ ܀ 233 :ܐܘܿܢ ܒܵܪܘܿܝܵܐ ܕܩܲܕܿܝܼܩ ܕܝܼܢܹܗ ܠܲܥ̇ܒܼܵܕܼ ܐܝܼܕܼܵܘ̈ܗܝ 234 ܠܡܵܢ ܪܵܕܹܐ ܐܲܢ̄ܬܿ ܠܲܕܼܠܵܐ ܐܲܣܟܸܿܠܘ ܚܠܵܦ ܚܲܝܵܒܹ̈ܐ ܀ 235 :ܦܸܪܥܘܿܢ ܚܲܝܵܒܼ ܢܸܓܼܕܵܐ ܥܦܝܼܦܵܐ ܕܠܵܐ ܨܵܬܼ ܡܸܠܲܝ̈ܟ 236 ܘܠܵܘ ܫܲܬܿܝܼܩܹ̈ܐ ܕܠܵܐ ܡܦܵܣܝܼܢ ܒܵܟ ܐܵܦܠܵܐ ܡ̇ܢ ܐܲܢ̄ܬܿ ܀ 237 :ܐܲܪܝܼܡ ܫܲܒܼܛܵܟ ܘܲܡܚܝܼ ܠܕܼܐܣܟܸܿܠ ܚܠܵܦ ܣܲܟܼܠܘܼܬܹܗ 238 ܕܠܵܐ ܬܘܼܒܼ ܢܲܣܟܸܿܠ ܘܲܢܒܲܙܲܚ ܒܵܟ ܡܲܪܵܚܵܐܝܼܬܼ ܀ 239 :ܐܘܿ ܪܸܥܝܵܢܵܐ ܠܵܐ ܬܸܬܼܥܲܕܲܠ ܡܲܪܵܚܵܐܝܼܬܼ 240 ܒܗܵܝ̇ ܝܼܕܲܥܥܬܼܵܐ ܕܟܹܐܝܢ ܒܘܼܚܪܵܢܵܗ̇ ܨܹܝܕܼ ܬܘܼܩܵܢܵܗ̇ ܀ 241 :ܫܲܦܝܼܪ ܪܵܕܹܐ ܠܲܕܼܠܵܐ ܩܵܠܵܐ ܚܠܵܦ ܡܲܠܵܠܹ̈ܐ 242 ܕܢܵܘܕܲܥ ܐܸܢܘܿܢ ܪܲܒܿܘܼܬܼ ܚܘܼܒܹܿܗ ܕܲܠܘܵܬܼ ܐ̄ܢܵܫܵܐ ܀ 243 :ܗܵܕܹܐ ܐܸܡ݂ܲܪ ܕܐܸܝܵܐ ܩܲܫܝܼܬܼ ܠܸܒܹܿܗ ܕܦܸܪܥܘܿܢ 244 ܠܵܐ ܗ̄ܘ̣ܵܐ ܕܩܲܫܝܼ ܐܸܠܵܐ ܕܛܲܥܢܹܗ ܒܡܲܓܿܪܲܬܼ ܪܘܼܚܹܗ ܀ 245 :ܡܨܸܐ ܗ̄ܘ̣ܵܐ ܕܢܸܪܕܹܿܝܘܗܝ ܘܢܵܘܦܘܿܢ ܚܲܝܵܘ̈ܗܝ ܒܲܚܕܼܵܐ ܫܵܥܵܐ 246 ܐܸܠܵܐ ܗܵܕܹܐ ܠܵܐ ܦܲܐܝܵܐ ܗ̄ܘ̣ܵܬܼ ܠܒܲܣܝܼܡܘܼܬܹܗ ܀ 247 :ܒܲܣܝܼܡܵܐܝܼܬܼ ܛܲܥ̣ܢܹܗ ܠܥܲܛܠܵܐ ܕܠܵܐ ܒܘܼܝܵܢܵܐ 248 ܥܕܲܡ̇ܐ ܕܗܘ̤ ܠܹܗ ܛܲܒܲܥ ܢܲܦܫܹܗ ܒܗܵܘܬܼܵܐ ܕܥܵܘ̣ܠܵܐ ܀ 249 :ܠܢܲܗܪܵܐ ܢܦܲܩ̣ ܗ̄ܘ̣ܵܐ ܥܛܸܠ ܪܸܝܵܢܵܐ ܕܲܢܕܲܒܲܚ ܗ̄ܘ̣ܵܐ 250 ܘܐܲܪܥܹܗ ܡܘܼܫܹܐ ܘܚܵܘܝܹܗ ܢܸܓܼܕܵܐ ܕܲܥܬܼܝܼܕܼ ܕܢܸܒܼܠܲܥ ܀ 251 :ܩܕܼܵܡ ܕܲܢܢܲܓܸܿܕܼ ܓܠ̣ܵܐ ܥܲܠ ܢܸܓܼܕܵܘ̈ܗܝ ܓܲܙܵܐ ܕܢܸܓܼ̈ܕܹܿܐ 252 ܕܢܲܠܸܦ ܐܸܢܘܿܢ ܠܡܸܬܼܢܲܓܿܕܼܵܢܹ̈ܐ ܕܡܸܢܹܗ ܒܵܠܿܥܝܼܢ܀ pb. 296 253 :ܐܲܪܝܼܡ ܐܝܼܕܹܗ ܘܲܡܼܚܵܗܿ ܠܐܲܪܥܵܐ ܘܲܡܠܵܬ̤ ܩܲܡܨܵܐ 254 ܘܲܢܦܲܩ ܐܘܼܪ̈ܕܥܹܐ ܕܠܵܐ ܡܸܢܝܵܢܵܐ ܘܟܲܣܝܼ ܐܲܦܹ̈ܝܗ̇ ܀ 255 :ܚܙ̣ܵܐ ܡܲܪܵܚܵܐ ܘܐܲܓܲܡܸܕܼ ܘܲܩܪ̣ܵܐ ܠܲܕܼܠܵܐ ܐܲܠܵܗ 256 ܘܲܥܒ݂ܲܕܼܘ ܐܘܼܪ̈ܕܿܥܹܐ ܟܲܕܵܒܼܵܝܼܬܼ ܟܲܕܼ ܠܲܝܬܿ ܐܸܢܹܝܢ ܀ 257 :ܕܡܘܼܫܹܐ ܒܩܘܼܫܬܵܐ ܫܲܪܝܼܪ݁ܵܢ ܗ̣̄ܘܲܝ̈ ܒܲܕܼܡܘܼܬܼ ܓܘܼܫܡܵܐ 258 ܘܲܕܚܲܪ̈ܵܫܹܐ ܐܲܝܟ ܛܸܠܵܠܵܐ ܕܠܲܝܬܵܘܗܝ ܡܸܕܹܿܡ ܀ 259 :ܣܸܪܝܲܬ̤ ܐܲܪܥܵܐ ܕܐܵܓܹܒܼܛܵܝܹ̈ܐ ܒܐܘܼܪ̈ܕܿܥܵܘܗܝ ܕܡܘܼܫܹܐ 260 ܘܚܲܫ̣ ܡܵܪܘܿܕܼܵܐ ܘܲܒܼܥ̣ܵܐ ܘܐܲܦܝܼܣ ܠܵܘ ܒܲܫܪܵܪܵܐ ܀ 261 :ܫܐܲܠ ܠܵܟ ܙܲܒܼܢܵܐ ܥܢܵܝ̣ܗܝ ܡܲܟܿܝܼܟܼܵܐ ܠܲܚܬܼܝܼܪ ܢܲܦܫܵܐ 262 ܘܐܸܡ݂ܲܪ ܕܲܡܚܵܪ ܘܨܲܠܝܼ ܟܹܐܢܵܐ ܘܲܛܠܸ݂ܩ ܐܘܼܪ̈ܕܿܥܹܐ ܀ 263 :ܗ̣ܦܲܟ ܡܵܪܘܿܕܼܵܐ ܘܲܥܛ̣ܵܐ ܠܸܒܹܿܗ ܡ̣ܢ ܬܘܼܪܵܨܵܐ 264 ܘܲܗܦ݂ܲܟ ܡܘܼܫܹܐ ܘܚܵܘܝܹܗ ܢܸܓܼܕܼܵܐ ܕܲܡܠܸܐ ܩܲܠܡܵܐ ܀ 265 :ܓܠ̣ܵܐ ܠܹܗ ܠܘܼܩܕܲܡ ܕܗܵܐ ܥܵܒܼ̇ܕܼ ܐ̄ܢܵܐ ܘܐܲܟܸܿܢ ܣܲܥ̣ܵܪܵܗ̇ 266 ܕܢܸܗܘܸܐ ܝܵ̇ܕܲܥ ܕܠܵܘ ܛܘܼܥܝܲܝ ܗ̄ܝܼ ܐܸܠܵܐ ܫܪܵܪܵܐ ܀ 267 :ܒܚܘܼܛܪܵܐ ܚܲܪܫܵܐ ܒܸܠܥܲܬ̤ ܐܲܪܥܵܐ ܡ̣ܢ ܡܲܠܵܠܵܐ 268 ܘܦܸܪܚܲܬ̤ ܩܲܠܡܵܐ ܒܲܒܼܢܲܝ̈ܢܵܫܵܐ ܘܲܒܼܚܲܝ̈ܘܵܬܼܵܐ ܀ 269 :ܒܓܼܘܼܫܡܹ̈ܐ ܣܸܒܼܟܲܬ̤ ܩܲܠܡܵܐ ܕܲܥܒ݂ܲܕܼ ܝܼܣܲܪܠܵܝܵܐ 270 ܥܕܲܡܵܐ ܕܐܲܝܠܸܠܘ ܐܵܦ ܡܸܨܪ̈ܵܝܹܐ ܡ̣ܢ ܒܲܫܝܘܼܬܼܵܗ̇ ܀ 271 :ܢܸܓܼܕܵܐ ܩܲܫܝܵܐ ܒܠܲܥ̣ ܡܸܨܪܵܝܵܐ ܡ̣ܢ ܥܸܒܼܪܵܝܵܐ 272 ܘܚܵܒܼ݂ܘ ܚܲܪ݁ܫܹܐ ܘܲܙܩܲܦ̣ܘ ܨܸܒܼܥܵܐ ܩܕܼܵܡ ܐܲܠܵܗܵܐ ܀ 273 :ܨܸܒܼܥܵܐ ܗ̄ܝܼ ܗܵܕܹܐ ܕܐܵܠܵܗ ܟܠܵܐ ܠܦܸܪܥܘܿܢ ܐܸܡ݂ܲܪܘ 274 ܘܠܵܐ ܨܵܬܼ ܐܸܢܘܿܢ ܝܲܩܝܼܪ ܠܸܒܵܐ ܠܲܒܼܢܲܝ̈ ܛܘܼܥܝܲܝ ܀ 275 :ܗܦ݂ܲܟ ܒܵܪܘܿܝܵܐ ܘܫܲܕܲܪ ܨܹܐܕܼܵܘܗܝ ܕܚܲܡܸܫ ܙܲܒܼܢܝܼ̈ܢ 276 ܕܫܲܕܲܪ ܠܝܼ ܥܲܡܝ ܘܐܸܠܵܐ ܩܲܒܸܿܠ ܢܸܓܼܕܵܐ ܐ̄ܚܪܹܢܵܐ ܀ 277 :ܗܵܐ ܡܫܲܕܲܪ ܐ̄ܢܵܐ ܥܠܲܝܟ ܥܲܪܘܼܒܼܵܐ ܕܟܼܠ ܓܸܢܣܵܢܝܼ̈ܢ 278 ܕܲܚܠܝܼܛ ܘܲܒܼܠܝܼܠ ܘܲܡܚܲܒܸܿܠ ܟܠ ܕܠܵܐ ܚܵܘܣܵܢܵܐ ܀ 279 :ܘܲܕܼܫܲܪܝܼܪܵܐ ܕܡܸܠܲܬܼܝ ܪܵܗܛܵܐ ܩܕܼܵܡ ܡܹܐܬܼܝܼܬܹܗ 280 ܗܵܐ ܦܵܪܹ̇ܫ ܐ̄ܢܵܐ ܒܹܝܬܼ ܥܲܡܝ ܠܥܲܡܵܟ ܕܠܵܐ ܢܸܩܪܘܿܒܼ ܠܹܗ ܀ 281 :ܗܵܐ ܡܲܩܢܸܐ ܐ̄ܢܵܐ ܛܲܟܼܣܵܐ ܪܲܒܵܐ ܠܲܒܼܠܝܼܠܘܼܬܹܗ 282 ܘܟܲܕܼ ܠܵܐ ܦܵܪܹܫ ܗܵܘܹ̇ܐ ܦܵܪܹܫ ܝܲܬܿܝܼܪ ܡܸܢܵܟ ܀ 283 :ܡܢܲܩ݂ ܥܲܪܘܼܒܼܵܐ ܘܟܲܣܝܼ ܐܲܦܹ̈ܝܗ̇ ܕܟܼܠܵܗ̇ ܐܲܪܥܵܐ 284 ܘܚܲܒܸܿܠ ܐܲܟܲܚ̄ܕܼ ܙܲܪ̈ܥܹܐ ܘܦܹܐܪܹ̈ ܕܟܼܠ ܐܝܼܠܵܢܝܼ̈ܢ ܀ 285 :ܚܲܫ̣ ܡܵܪܘܿܕܼܵܐ ܒܲܡܠܸܐ ܙܲܒܼܢܵܐ ܟܲܕܼ ܡܸܬܼܩܲܫܸܐ 286 ܘܲܩܪ̣ܵܐ ܠܡܘܼܫܹܐ ܕܢܸܟܼܠܸܐ ܐܝܼܕܹܗ ܡ̣ܢ ܕܲܠܡܸܡܚܵܐ ܀ 287 :ܟܠܝܼ ܢܸܓܼܕܲܝ̈ܟ ܒܲܪ ܥܸܒܼܪܵܝܹܐ ܣܲܓܿܝܼ ܪܕܲܝܬܵܢܝ 288 ܐ̄ܢܵܐ ܝܵܗܹ̇ܒܼܢܵܐ ܥܲܡܵܐ ܕܲܒܼܥ݂ܲܝܬܿ ܕܢܹܐܙܲܠ ܥܲܟܵܟ ܀ 289 ܐܲܪܝܼܡ ܡܘܼܫܹܐ ܫܲܒܼܛܵܐ ܕܢܸܓܼܕܵܐ ܡ̣ܢ ܡܲܪܵܚܵܐ: pb. 297 290 ܘܲܗܦ݂ܲܟ ܕܿܓܸܿܠ ܘܠܵܐ ܝܲܗ̣̄ܒܼ ܥܲܡܵܐ ܐܲܝܟ ܕܐܸܫܬܵܘܕܲܝܼ ܀ 291 :ܘܐܸܡ݂ܲܪ ܡ̇ܪܝܵܐ ܠܡܘܼܫܹܐ ܥܲܒܼܕܹܿܗ ܦܬܲܚ ܒܹܝܬܼ ܐܲܪ݁ܟܹܿܐ 292 ܘܐܲܦܸܩ ܢܸܓܼ̈ܕܹܿܐ ܥܲܠ ܡܲܪ݁ܲܚܹܐ ܕܫܵܛ̣ܘ ܠܘܼܚܵܡܵܝ̈ ܀ 293 :ܡ̇ܘܬܵܐ ܪܗܝܼܒܼܵܐ ܢܦܲܩ̣ ܥܲܡ ܡܸܠܬܹܗ ܕܒܲܪ ܥܸܒܼܪ̈ܵܝܹܐ 294 ܘܣܵܦܲܬ̤ ܒܥܝܼܪ݁ܵܐ ܟܠܵܗ̇ ܡܸܢܫܹܠܝ ܕܐܲܪܲܥ ܡܸܨܪܹܝܢ ܀ 295 :ܡܝܼܬܼ ܚܲܝ̈ܘܵܬܼܵܐ ܘܠܵܐ ܡܝܼܬܼ ܥܵܘ̣ܠܹܗ ܥܵܘ̣ܠܵܐ 296 ܘܲܚܙ̣ܵܐ ܡ̇ܪܝܵܐ ܘܐܲܪܝܼܡ ܐܝܼܕܹܗ ܒܝܲܕܼ ܒܲܪ ܒܲܝܬܹܿܗ ܀ 297 :ܒܫܘܼܚܢܵܐ ܒܝܼܫܵܐ ܦܲܩܕܹܿܗ ܕܢܸܡܚܹܝܘܗܝ ܠܲܩܫܹܐ ܩܕܼܵܠܵܐ 298 ܕܲܒܼܝܲܕܼ ܦܲܓܼܪܹܗ ܢܡܲܟܸܿܟ ܢܲܦܫܹܗ ܡ̣ܢ ܪܵܡܘܼܬܼܵܐ ܀ 299 :ܩܸܛܡܵܐ ܕܵܪܹܐ ܠܐܲܦܲܝ̈ ܪܵܘܡ̇ܐ ܐܲܪܥܵܢܵܝܵܐ 300 :ܘܕܲܠܚܹܗ ܠܐܵܐܲܪ ܘܲܢܦܲܩ̣ܘ ܫܘܼܚܢܹ̈ܐ ܒܲܒܼܢܲܝ̈ܢܵܫܵܐ 301 :ܒܫܘܼܚܢܵܐ ܕܢܘܼܦܚܹ̈ܐ ܢܦܲܠ̣ܘ ܡܲܪ݁ܚܹܐ ܠܒܼܝܼܫܲܝ̈ ܚܘܼܬܼܪܵܐ 302 ܘܠܵܐ ܨܒܼܵܘ ܫܲܠܚ̣ܘܼܗܝ ܠܫܘܼܚܢܵܐ ܒܝܼܫܵܐ ܕܪ̈ܥܝܵܢܲܝܗܘܿܢ ܀ 303 :ܒܢܸܓ̈ܕܹܿܐ ܩ̈ܫܲܝܵܐ ܒܠܲܥ̣ܘ ܘܐܸܬܼܒܲܣܒܲܣܘ ܗܲܕܵܡܲܝ̈ܗܘܿܢ 304 ܘܥܲܕܼ ܩܲܝܵܡܵܐ ܡܚܘܿܬܼܵܐ ܕܢܘܼܦܚܹ̈ ܥܩܲܒܼܬܼܵܗ̇ ܐ̄ܚܪܹܬܵܐ ܀ 305 :ܠܦܘܼܬܼ ܟܘܼܪܗܵܢܗܘܿܢ ܛܲܝܸܒܼ ܐܘܼܟܼܠܵܐ ܟܘܵܝܹ̈ܐ ܩ̈ܫܲܝܵܐ 306 ܕܢܸܓܼܙܘܼܪ ܡܸܢܗܘܿܢ ܟܹܐܒܼܵܐ ܕܥܵܘ̣ܠܵܐ ܕܒܲܣܒܸܿܣ ܐܸܢܘܿܢ ܀ 307 :ܪܡܲܙ ܠܹܗ ܠܐܵܐܲܪ ܠܐ ܒܐܝܼ̈ܕܲܝ ܡܘܼܫܹܐ ܕܢܲܡܛܲܪ ܒܲܪܕܼܵܐ 308 ܘܥܲܡܵܗ̇ ܕܡܸܠܬܼܵܐ ܗܘ̤ܵܐ ܣܘܼܪ̈ܵܢܵܐ ܕܠܵܐ ܫܘܼܘܚܵܪܵܐ ܀ 309 :ܬܠ̣ܵܐ ܝܲܡܝܼܢܹܗ ܥܲܦܪܵܢܵܝܵܐ ܠܐܲܦܲܝ̈ ܪܵܘܡ̇ܐ 310 ܘܲܢܚܸܬܼ ܒܲܪܕܼܵܐ ܕܲܚܠܝܼܛܵܐ ܒܹܗ ܢܘܼܪܵܐ ܕܪܘܼܓܼܙܵܐ ܀ 311 :ܒܲܪܕܼܵܐ ܘܢܘܼܪܵܐ ܚܠܲܛ̣ܘ ܒܲܚܕܵܕܹ̈ܐ ܬܪܹܝܢ ܕܲܠܩܘܼܒܼܠܹ̈ܐ 312 ܘܲܢܚܸܬܼܘ ܘܐܲܩܪܸܒܼܘ ܥܲܡ ܥܵܘܵܠܹ̈ܐ ܚܠܵܦ ܒܵܪܘܿܝܵܐ ܀ 313 :ܩܪ̈ܵܒܹܐ ܩ̈ܫܲܝܵܐ ܥܒ݂ܲܕܼܘ ܫܲܬܿܝܼܩܹ̈ܐ ܥܲܡ ܥܵܘܵܠܹ̈ܐ 314 ܘܲܬܼܒܲܥ̣ܘ ܡܸܢܗܘܿܢ ܥܝܵܪܬܵܐ ܘܨܲܥܪܵܐ ܕܫܸܡ ܐܲܠܵܗܵܐ ܀ 315 :ܐܹܝܘ ܬܲܟܼܬܿܘܼܫܵܐ ܕܲܡܫܲܓܼܢܲܝ ܗ̄ܘ̣ܵܐ ܡ̣ܢ ܬܲܟܼܬܿܘܼܫܹ̈ܐ 316 ܕܲܒܼܥܸܠܕܲܒܵܒܹ̈ܐ ܪܚܸܡ̣ܘ ܫܲܘܝܘܼܬܼܵܐ ܡܸܛܠܵܬܹܗ ܀ 317 :ܡܲܢ̣ܘܼ ܡ̣̤ ܡܬܼܘܿܡ ܚܙ̣ܵܐ ܠܐܸܣܛܘܼܟܼܣܹ̈ܐ ܬܪܹܝܢ ܕܲܠܩܘܼܠܹ̈ܐ 318 ܕܟܲܕܼ ܢܘܼܟܼܪܵܝܝܼܢ ܪܚܸܡ̣ܘ ܫܲܘܝܘܼܬܼܵܐ ܕܠܵܐ ܒܲܥܝܵܕܼܵܐ ܀ 319 :ܡܲܢ ܐܸܫܬܿܠܲܛ̣ ܥܲܠ ܒܸܪ݁ܝܵܬܼܵܐ ܐܲܝܟ ܒܲܪ ܥܲܡܪܲܡ 320 ܕܲܥܨ̣ܵܐ ܟܝܵܢܹ̈ܐ ܘܫܲܥܒܸܿܕܼ ܐܸܢܘܿܢ ܒܡܸܠܲܬܼ ܦܘܼܡܹܗ ܀ 321 :ܗܵܪܟܵܐ ܫܸܠܡܲܬ̤ ܗܵܝ̇ ܕܐܸܡ݂ܲܪ ܠܹܗ ܕܐܲܠܵܗ ܬܸܗܘܸܐ 322 ܘܐܲܝܟ ܐܲܠܵܗܵܐ ܦܩ݂ܲܕܼ ܠܲܟܼܝܵܢܹ̈ܐ ܘܨܵܬܼܘ ܦܘܼܩܕܵܢܹܗ ܀ 323 :ܚܲܪ̈ܫܹܐ ܫܲܡ̣ܥܘܼܗܝ ܘܠܵܐ ܐܸܬܼܥܲܣܲܩܘ ܠܡܸܓܼܡܲܪ ܡܸܠܵܘ̈ܗܝ 324 ܘܩܲܢܝܲܝ̈ ܡܸܠܬܼܵܐ ܡ̣ܪܲܕܼܘ ܒܲܫܩܝܼܦܵܐ ܕܚܸܪܚܵܘܼܬܼܵܐ ܀ pb. 298 325 :ܠܡܵܪܘܿܕܼܘܼܬܼܗܘܿܢ ܫܲܚܠܸܦ ܢܸܓܼ̈ܕܹܿܐ ܕܟܼܠ ܐܸܣܟܹܿܡܝܼ̈ܢ 326 ܘܲܣܕ݂ܲܪ ܐܸܢܘܿܢ ܚܲܕܼ ܒܵܬܲܪ ܚܲܕܼ ܩܲܠܝܼܠܵܐܝܼܬܼ ܀ 327 :ܒܵܬܲܪ ܒܲܪܕܼܵܐ ܐܲܝܬܿܝܼ ܩܲܡܨܵܐ ܕܬܲܩܝܼܦ ܘܲܩܫܸܐ 328 ܘܟܲܣܝܵܗ̇ ܠܐܲܪܥܵܐ ܐܵܝܟ ܕܲܒܼܢܲܚܬܵܐ ܘܠܵܐ ܐܸܬܼܚܲܙܝܲܬ̤ ܀ 329 :ܬܲܩܝܼܦ ܗ̄ܘ̣ܵܐ ܛܵܒܼ ܗ̄ܘ̣ܵܐ ܐ̄ܟܼܘܵܬܹܗ ܘܠܵܐ ܬܘܼܒܼ ܗܵܘܹ̈ܐ 330 ܘܲܕܼܠܵܐ ܚܵܘܣܵܢ ܚܲܒܸܿܠ ܘܐܵܘܒܸܿܕܼ ܦܹܐܪܹ̈ܐ ܘܙܲܪ̈ܥܹܐ ܀ 331 :ܚܵܪܒܲܬ̤ ܘܲܨܕܼܵܬܬ̤ ܐܲܪܥܵܐ ܕܡܸܨܪܹܝܢ ܡ̣ܢ ܟܠ ܛܵܒܼ̈ܢ 332 ܘܠܸܒܵܐ ܕܲܒܼܢܹ̈ܝܗ̇ ܥܕܲܟܹܿܝܠ ܩܵܐܹ̇ܡ ܒܲܛܪܘܼܢܘܼܬܼܵܐ ܀ 333 :ܐܵܦ ܡ̇ܪܹܟܿܠ ܐܲܪܝܼܡ ܐܝܼܕܹܗ ܥܲܠ ܪܵܡܘܼܬܼܗܘܿܢ 334 ܘܒܼܵܬܲܪ ܩܲܡܨܵܐ ܩܲܦܲܚ ܐܸܢܘܿܢ ܒܢܸܓܼܕܵܐ ܕܚܸܫܟܵܐ ܀ 335 :ܬܠܵܬܼܵܐ ܝܵܘܡܝܼ̈ܢ ܗܘ̤ܵܐ ܚܸܫܟܼܵܐ ܒܹܝܬܼ ܡܲܥܡܲܪܗܘܿܢ 336 ܘܠܵܐ ܦܪ̈ܝܼܫܵܢ ܗ̣̄ܘܲܝ̈ ܫܵܥܹ̈ܐ ܕܠܸܠܝܵܐ ܡ̣ܢ ܕܐܝܼܡܵܡܵܐ ܀ 337 :ܒܚܸܫܟܵܐ ܪܲܒܵܐ ܕܠܵܐ ܝܼܕܲܥܬܼܵܐ ܝ̄ܬܼܒܼܘ ܚܸܫܘܿܟܹ̈ܐ 338 ܘܲܓܼܠܝܼܙܝܼܢ ܗ̄ܘ̣ܵܘ ܡ̣ܢ ܢܲܗܝܼܪܵܐ ܘܡ̣ܢ ܒܘܼܝܵܢܵܐ ܀ 339 :ܒܫܘܼܠܵܡ ܢܸܓܼ̈ܕܹܿܐ ܐܲܪܝܼܡ ܐܝܼܕܼܵܐ ܪܸܡܙܵܐ ܒܡܘܼܫܹܐ 340 ܘܢܲܓܸܿܕܼ ܐܸܢܘܿܢ ܒܡܵܘܬܵܐ ܕܒܼܘܼܟܼܪܹ̈ܐ ܕܡܲܪܝܼܪ ܐܸܒܼܠܹܗ ܀ 341 :ܒܠܸܠܝܵܐ ܥܒ݂ܲܪ ܗ̄ܘ̣ܵܐ ܡܲܠܲܐܟ ܡ̇،ܬܵܐ ܒܡܲܠܝܲܬܼ ܥܵܘ̣ܠܵܐ 342 ܘܩܲܛܸܠ ܐܲܟܲܚ̄ܕܼ ܒܘܼܟܼܪܹ̈ܐ ܕܐ̄̇ܚܢܵܫܵܐ ܘܲܕܼܚܲܝ̈ܘܵܬܼܵܐ ܀ 343 :ܣܲܝܦܵܐ ܐܲܒܼܪܸܩ ܥܝܼܪܵܐ ܕܪܘܼܚܵܐ ܩܕܼܵܡ ܥܲܝܢܲܝ̈ܗܘܿܢ 344 ܘܙܵܥ ܢܲܦܫܬܼܵܐ ܘܫܲܢܝ ܘܲܥܪ݂ܲܩ ܡ̣ܢ ܗܲܕܵܡܹ̈ܐ ܀ 345 :ܩܲܠܝܼܠܵܐܝܼܬܼ ܛܵܣ ܥܲܠܐ ܦܲܓܼܪܹ̈ܐ ܒܲܕܼܡܘܼܬܼ ܒܲܪܩܵܐ 346 ܘܐܲܝܟ ܓܲܢܵܒܼܵܐ ܦܠܲܫ̣ ܗܲܕܵܡܹ̈ܐ ܘܚܲܠܸܨ ܢܲܦܫܵܐ ܀ 347 :ܡܘܼܬܼܘ ܟܠ ܒܘܼܟܼܪܹ̈ܐ ܕܚܹܐܪܹ̈ܐ ܘܥܲܒܼ̈ܕܹܿܐ ܘܲܕܼܡܸܣܟܹܿܢܹ̈ܐ 348 ܘܠܵܐ ܦܵܫ̣ ܒܲܝܬܵܐ ܕܠܵܐ ܐܸܬܼܚܲܠܲܨ ܒܡܵܘܬܵܐ ܕܡ̣ܢ ܫܹܠܝ ܀ 349 :ܩܛ݂ܲܪ ܝܲܠ̈ܠܵܬܼܵܐ ܡܲܪܝܼܪ̈ܵܬܼܵܐ ܒܟܼܠܵܗ̇ ܡܸܨܪܹܝܢ 350 ܘܐܲܝܠܸܠܘ ܘܲܒܼܟܼܵܘ ܪܵܥܘܿܡ̇ܐܝܼܬܼ ܥܲܠ ܒܘܼܟܼܪ̈ܲܝܗܘܿܢ ܀ 351 :ܩܵܠܹ̈ܐ ܚܢܝܼܓܹ̈ܐ ܪܲܟܸܿܒܼܘ ܘܲܩܓ̣ܵܘ ܥܲܠ ܥܲܢܝܼܕܹ̈ܐ 352 ܘܚܲܫ̣ܘ ܘܐܸܬܿܢܲܚܘ ܪܵܥܘܿܡ̇ܐܝܼܬܼ ܥܲܠ ܝܲܠܕܲܝ̈ܗܘܿܢ ܀ 353 :ܠܸܠܝܵܐ ܕܐܸܒܼܠܵܐ ܐܲܟܼܡܲܪ ܐܸܢܘܿܢ ܥܲܠ ܒܘܼܟܼܪ̈ܲܝܗܘܿܢ 354 ܘܠܝܼܣܲܪ̈ܠܵܝܹܐ ܐܲܦܨܲܚ ܐܸܢܘܿܢ ܒܐ̄ܪܵܙ ܦܘܼܪܩܵܢܵܐ ܀ 355 :ܒܲܕܼܡ̇ܐ ܕܐܸܡܪܵܐ ܪܫܲܡ̣ ܦܘܼܪܩܵܢܵܐ ܕܲܚܪܘܼܪ̈ܲܝܗܘܿܢ 356 ܕܠܵܐ ܢܸܫܬܲܠܲܛ ܡܲܠܲܐܟ ܡ̇ܘܬܼܵܐ ܥܲܠ ܒܘܼܟܼܪ̈ܲܝܗܘܿܢ ܀ 357 :ܕܡ̇ܐ ܫܲܬܿܝܼܩܵܐ ܪܲܣܘ ܡܲܠܵܠܹ̈ܐ ܥܲܠ ܬܲܪ̈ܥܲܝܗܘܿܢ 358 ܘܲܚ̣ܙܵܝܗܝ ܥܝܼܪܵܐ ܘܐܲܣܛܝܼ ܘܲܥܒ݂ܲܪ ܡ̣ܢ ܒܵܬܲܝ̈ܗܘܿܢ ܀ 359 ܐܪܵܐ ܚܲܪܫܵܐ ܒܐܲܝܢܵܐ ܚܲܝܠܵܐ ܙܟܲܝ̣ܬܿ ܠܪܘܼܚܵܢܵܐ: pb. 299 360 ܘܐܲܟܸܿܢ ܐܲܫܦܸܠ ܘܲܕܼܚܸܠ ܡܸܢܵܟ ܢܘܼܪܵܐ ܘܪܘܼܚܵܐ ܀ 361 :ܟܠܵܗ̇ ܡܸܨܪܹܝܢ ܙܵܥܲܬ̤ ܢܵܕܼܵܬ̤ ܡ̣ܢ ܩܲܫܝܘܼܬܹܗ 362 ܘܐܲܢ̄ܬܿ ܫܲܬܿܝܼܩܵܐ ܒܐܲܝܢܵܐ ܚܲܝܠܵܐ ܚܣܲܢ̣ܬܿ ܓܲܢ̄ܒܵܪܵܐ ܀ 363 :ܠܵܘ ܕܝܼܠܵܟ ܗ̄ܝܼ ܗܵܕܹܐ ܕܲܣܥܲܪܬܿ ܕܡ̇ܐ ܚܲܠܵܫܵܐ 364 ܐ̄ܪܵܙ ܗܵܘ̇ ܕܐܵܬܹܿܐ ܚܙ̣ܵܐ ܵܟ ܥܝܼܪܵܐ ܘܚܵܓܼ ܡ̣ܢ ܩܘܼܕܼܡ̇ܘܗܝ ܀ 365 :ܕܡ̇ܐ ܡܲܠܵܠܵܐ ܥܬܼܝܼܕܼ ܕܲܢܚܲܪܲܪ ܠܟܼܠܗܘܿܢ ܥܲܡܡܹ̈ܐ 366 ܘܩܲܕܸܿܡ ܨܵܪ ܒܵܟ ܐ̄ܪܵܙ ܡܹܐܬܼܝܼܬܹܗ ܒܦܘܼܩܵܢ ܥܲܡܵܐ ܀ 367 :ܐ̄ܪܵܙܵܐ ܕܩܘܼܫܬܵܐ ܚܲܪܲܪ ܐܸܢܘܿܢ ܠܲܒܼܢܲܝ̈ ܝܲܥܩܘܿܒܼ 368 ܘܐܲܠܸܦ ܐܸܢܘܿܢ ܕܲܢܝܲܒܿܠܘܼܢܵܝܗܝ ܥܕܲܡ̇ܐ ܕܐܵܬܹ̇ܐ ܀ 369 :ܒܐܲܪܒܲܥܸܣܪܵܐ ܒܢܝܼܣܵܢ ܝܲܪܚܵܐ ܪܫܲܡ̣ ܥܘܼܗܕܵܢܹܗ 370 ܕܠܵܐ ܢܸܛܥܘܿܢܵܝܗܝ ܠܗܵܢ ܦܘܼܪܩܵܢܵܐ ܕܲܚܪܘܼܪ̈ܲܝܗܘܿܢ ܀ 371 :ܡ̣ܢ ܪܹܫܝܼܬܼܵܐ ܢܛܝܼ ܗ̄ܘ̣ܵܐ ܐ̄ܪܵܙܵܐ ܕܗܵܢܵܐ ܝܵܘܡ̇ܐ 372 ܘܝܵ̇ܕܲܥ ܗ̄ܘ̣ܵܐ ܠܹܗ ܩܕܼܵܡ ܕܲܢܬܲܩܸܢ ܒܪܝܼܬܼܵܐ ܒܪܵܫܝܼܬܼ ܀ 373 :ܒܹܗ ܦܪ݂ܲܩ ܐܸܢܘܿܢ ܠܲܒܼܢܲܝ̈ ܐܲܒܼܪܵܡ ܡ̣ܢ ܫܘܼܥܒܵܕܼܵܐ 374 ܘܲܟܼܬܲܒܼ ܣܵܡܹܗ ܩܕܼܵܡ ܥܲܝܢܲܝ̈ܗܘܿܢ ܕܢܸܬܼܒܲܩܘܿܢ ܒܹܗ ܀ 375 :ܒܚܹܝܠ ܦܘܼܪܩܵܢܗܘܿܢ ܕܝܼܣܲܪ̈ܠܵܝܹܐ ܬܗܲܪܘ ܡܸܪ̈ܵܝܹܐ 376 ܘܲܙܩܲܦ̣ܘ ܨܸܒܼܥܵܐ ܘܝܲܗ̣̄ܒܼܘ ܙܵܟܼܘܼܬܼܵܐ ܠܫܸܡ ܒܪܘܿܝܵܐ ܀ 377 :ܩܪ̣ܵܐ ܠܲܡ ܦܸܪܥܘܿܢ ܠܡܘܼܫܹܐ ܘܐܸܡ݂ܲܪ ܕܩܘܼܡ ܦܘܼܩ ܡܸܟܵܐ 378 ܘܲܕܼܒܼܘܿܒܼ ܥܲܡܵܟ ܢܹܐܙܲܠ ܢܸܠܦܘܿܚ ܩܕܼܵܡ ܐܲܠܵܗܹܗ ܀ 379 :ܦܘܿܩ ܡ̣ܢ ܓܵܘ ܥܲܡܝ ܐܸܡ݂ܲܪ ܒܲܪ ܚܵܡ ܠܒܲܪ ܐܲܒܼܪܵܗܵܡ 380 ܘܟܲܕܼ ܠܵܐ ܨܵܒܹ̇ܐ ܒܥ̣ܵܐ ܘܐܸܬܼܟܲܫܲܦ ܥܲܠ ܣܘܼܪܚܵܢܹܗ ܀ 381 :ܡܟܵܐ ܕܥܲܨܝܼ ܗܘ̤ ܡ̣ܢ ܫܘܼܪܵܝܵܐ ܠܘܼܩܒܲܠ ܩܘܼܫܬܵܐ 382 ܗܵܟܲܢ ܐܲܦܝܼܣ ܒܫܘܼܠܵܡ ܢܸܓܼ̈ܕܹܿܐ ܕܢܸܦܘܿܩ ܥܲܡܵܐ ܀ 383 :ܩܲܠܝܼܠܵܐܝܼܬܼ ܣܲܪܗܸܒܼ ܐܸܢܘܿܢ ܥܲܠ ܡܲܦܲܩܬܵܐ 384 ܘܠܵܘ ܕܝܼܠܹܗ ܗ̣̄ܘܵܬܼ ܐܸܠܵܐ ܕܪܸܡܙܵܐ ܕܥܵܨܹ̇ܐ ܗ̄ܘ̣ܵܐ ܠܹܗ ܀ 385 :ܪܸܡܙܵܐ ܟܲܣܝܵܐ ܡܣܲܪܗܸܒܼ ܗ̄ܘ̣ܵܐ ܠܹܗ ܕܢܲܦܸܩ ܐܸܢܘܿܢ 386 ܕܠܵܐ ܢܸܬܼܥܵܘܲܟ ܝܵܘܡ̇ܐ ܕܐ̄ܪܵܙܵܐ ܕܡܸܬܼܥܲܗܲܕܼ ܗ̄ܘ̣ܵܐ ܀ 387 :ܒܲܪܗܝܼܒܼܘܼܬܼܵܐ ܢܦܲܩ̣ܘ ܥܵܒܼܪ̈ܵܝܹܐ ܡ̣ܢ ܓܵܘ ܡܨܸܪܹܝܢ 388 ܘܠܵܐ ܗܘ̤ܵܬܼ ܐܲܦܬܼܵܐ ܕܢܸܚܡܲܥ ܠܲܝܫܵܐ ܕܲܙܘܵܕܲܝ̈ܗܘܿܢ ܀ 389 :ܢܦܲܩ̣ܘ ܟܲܕܼ ܚܵܕܹܝܢ ܕܚܲܝܠܸܨܘ ܥܘܼܬܼܪܵܐ ܕܪ̈ܵܕܼܘܿܦܲܝܗܘܿܢ 390 ܘܲܗܦ݂ܲܟ ܦܸܪܥܘܿܢ ܐܲܟܼܪܝܼ ܣܲܓܿܝܼ ܕܦ̣ܵܫ ܡܸܣܟܹܿܢܵܐ ܀ 391 :ܛܢܵܢܵܐ ܣܲܟܼܠܵܐ ܫܲܓܼܪܹܗ ܠܣܲܟܼܠܵܐ ܕܠܵܐ ܒܘܼܝܵܢܵܐ 392 ܘܙܲܝܸܢ ܚܲܝܠܹܗ ܘܐܲܩܠܝܼ ܘܲܢܦ݂ܲܩ ܒܵܬܲܪ ܥܲܡܵܐ ܀ 393 :ܟܠܹܗ ܥܲܡܵܐ ܕܒܲܪ̣ ܡ̇ܪܘܿܕܼܵܐ ܘܲܢܦ݂ܲܩܘ ܥܲܡܹܗ 394 ܕܥܲܡܹܗ ܢܩܲܒܿܠܘܼܢ ܚܲܝ̈ܠܵܘܵܬܹܗ ܬܒܲܥܬܼܵܐ ܕܕܼܝܼܢܵܐ ܀ 395 :ܥܝܵܪܬܵܐ ܕܥܵܘ̣ܠܹ̈ܐ ܕܥܘܸܠܹ݁̈ܐ ܕܐܸܒܲܕܼܘ ܚܲܝܵܒܼܝܼܢ ܗ̄ܘ̣ܵܘ 396 ܘܟܲܢܸܫ ܐܸܢܘܿܢ ܪܸܡܙܵܐ ܟܲܣܝܵܐ ܠܚܲܕܼ ܐܲܒܼܕܵܢܵܐ ܀ 397 ܒܣܲܝܦܵܐ ܕܡܲܝ̈ܵܐ ܩܲܛܠܸܘ ܥܘܸܠܹ̈ܐ ܚܲܪܡ̇ܢܵܐܝܼܬܼ: pb. 300 398 ܘܠܵܗ̇ ܠܲܬܼܒܲܥܬܼܵܐ ܛܲܝܸܒܼ ܐܸܢܘܿܢ ܐܲܟܼܡܵܐ ܕܲܣܥ݂ܲܪܘ ܀ 399 :ܒܪ̈ܲܟܼܫܵܐ ܘܙܲܝܢܵܐ ܢܦܲܩܘ̣ ܕܲܢܨܘܼܕܼܘܼܢ ܠܝܼܣܲܪ̈ܠܵܝܹܐ 400 ܘܩܲܠܝܼܠܵܐܝܼܬܼ ܪܕܲܦܘ̣ ܒܵܬܲܪܗܘܿܢ ܥܕܲܡ̇ܐ ܠܝܲܡܵܐ ܀ 401 :ܚܙ̣ܵܘ ܥܸܒܼܪ̈ܵܝܹܐ ܠܪ̈ܵܕܼܘܿܦܲܝܗܘܿܢ ܘܡܝܼܬܼ ܡ̣ܢ ܩܸܢܛܵܐ 402 ܘܲܦܣܲܩ̣ܘ ܣܲܒܼܪܵܐ ܕܠܵܐ ܬܘܼܒܼ ܡܲܨܝܵܐ ܠܡܸܢܼܦܲܨܵܝܘܼ ܀ 403 :ܚܙ̣ܵܘ ܟܲܕܼ ܢܵܗܹ̇ܡ ܝܲܡܵܐ ܕܚܝܼܠܵܐ ܩܕܼܵܡ ܥܲܝܢܲܝ̈ܗܘܿܢ 404 ܘܦܸܪܥܘܿܢ ܡܲܠܟܵܐ ܐܲܝܟ ܬܲܢܝܼܢܵܐ ܡ̣ܢ ܒܸܣܬܲܪܗܘܿܢ ܀ 405 :ܦܢ̣ܵܘ ܨܹܝܕܼ ܡܘܼܫܹܐ ܕܢܦܝܼܣܘܼܢܵܝܗܝ ܠܵܐ ܗ̄ܘ̣ܵܐ ܒܚܘܼܒܵܐ 406 ܐܸܠܵܐ ܒܪܸܛܢܵܐ ܘܲܒܼܦܘܼܠܵܓܼܵܐܬ ܕܪܸ̈ܥܝܵܢܲܗܘܿܢ ܀ 407 :ܠܡܵܢ ܐܲܦܸܩܬܵܢ ܡ̣ܢ ܓܵܘ ܡܸܨܪܹܝܢ ܕܲܢܡܘܼܬܼ ܗܵܪܟܵܐ 408 ܦܲܩܵܚ ܗ̄ܘ̣ܵܐ ܠܲܢ ܥܲܒܼܕܿܘܼܬܼ ܐ̄ܢܵܫܵܐ ܛܵܒܼ ܡ̣ܢ ܡ̇ܘܬܵܐ ܀ 409 :ܨܲܠܝܼ ܡܘܼܫܹܐ ܕܲܚܙ̣ܵܐ ܪܸܛܢܹܗ ܕܥܲܡܵܐ ܣܲܟܼܠܵܐ 410 ܘܲܥܢܵܝܗܝ ܡ̇ܪܵܝܵܐ ܗܵܘ̇ ܕܲܥܢܸܐ ܠܹܗ ܩܕܲܡ ܕܲܢܨܲܠܸܐ ܀ 411 :ܥܒ݂ܲܕܼ ܚܸܫܘܿܟܼܵܐ ܒܲܕܼܡܘܼܬܼ ܫܘܼܪܵܐ ܡ̣ܢ ܒܸܣܬܲܪܗܘܿܢ 412 ܘܲܩܕܼܵܡܲܝܗܘܿܢ ܢܘܼܗܪܵܐ ܪܲܒܵܐ ܐܲܝܟ ܥܲܡܘܼܕܼܵܐ ܀ 413 :ܠܥܹܝܢ ܪ̈ܵܘܼܘܿܦܹܐ ܥܲܒܼ݂ܕܹܿܗ ܠܚܸܫܟܵܐ ܚܸܫܟܵܐ ܥܦܝܼܦܵܐ 414 ܘܲܠܒܥܹܢܲܝܗܘܿܢ ܥܲܦܹܗ ܠܢܘܼܗܪܵܐ ܒܫܵܥܹ̈ܐ ܕܚܸܫܟܵܐ ܀ 415 :ܟܠܹܗ ܠܸܠܝܵܐ ܩܵܢܝܼ ܚܸܫܟܵܐ ܡ̣ܢ ܒܸܣܬܲܪܗܘܿܢ 416 ܘܟܼܠܹܗ ܠܸܠܝܵܐ ܢܗ݂ܲܪ ܥܲܡܘܼܕܼܵܐ ܕܲܩܕܼܵܡܲܝܗܘܿܢ ܀ 417 :ܠܸܠܝܵܐ ܕܚܸܫܟܵܐ ܘܲܕܼܢܲܗܝܼܪܹ̈ܐ ܗܘ̤ܵܐ ܗܵܘ̇ ܠܸܠܝܵܐ 418 ܠܥܲܡܵܐ ܢܘܼܗܪܵܐ ܘܲܠܡܸܨܪ݁ܵܝܹܐ ܚܸܫܟܵܐ ܥܦܝܼܦܵܐ ܀ 419 :ܒܩܸܢܛܵܐ ܫܪܹܝܢ ܗ̄ܘ̣ܵܘ ܓܼܒܹܿܐ ܬܪ̈ܲܝܗܘܿܢ ܩܕܼܵܡ ܬܸܕܼܡܘܼܪܬܵܐ 420 ܘܲܠܙܵܟܼܘܼܬܼܵܐ ܡܸܬܼܝܲܐܲܒܼ ܗ̄ܘ̣ܵܐ ܥܲܡܵܐ ܘܦܸܪܗܘܿܢ ܀ 421 :ܡܘܼܫܹܐ ܒܣܲܒܼܪܵܐ ܕܚܹܝܠ ܐܵܬܼ̈ܘܵܬܼܵܐ ܡܸܬܼܠܲܒܲܒܼ ܗ̄ܘ̣ܵܐ 422 ܘܨܹܝܕܼ ܒܵܪܘܿܝܵܐ ܬܠܸܐ ܗ̄ܘ̣ܵܐ ܚܝܵܪܵܐ ܕܗܲܪܝܡܲܢܘܼܬܼܵܐ ܀ 423 :ܐܵܦ ܒܵܪܘܿܝܵܐ ܨܹܐܕܼܵܘܗܝ ܒܲܠܚܘܿܕܼ ܡܸܬܼܢܲܚܲܬܼ ܗ̄ܘ̣ܵܐ 424 ܘܐܲܝܟ ܕܲܠܫܲܒܼܪܵܐ ܡܚܲܟܸܿܡ ܗ̄ܘ̣ܵܐ ܠܹܗ ܒܲܣܬܼܝܼܪ݁ܵܬܼܵܐ ܀ 425 :ܚܙ̣ܵܝܗܝ ܗܵܘ̇ ܪܸܡܙܵܐ ܕܲܚܙ̣ܵܐ ܗ̄ܘ̣ܵܐ ܠܹܗ ܕܲܟܼܡܵܐ ܐܲܦܝܼܣ 426 ܘܡܲܠܸܠ ܥܲܡܹܗ ܐܲܝܟ ܕܥܲܡ ܪܵܚ̇ܡܵܐ ܕܫܲܪܝܼܪ ܚܘܼܒܹܿܗ ܀ 427 :ܡ̇ܢܵܐ ܡܨܲܠܹܝܬܿ ܐܸܡܹܲܪ ܨܹܐܕܼܵܘܗܝ ܡ̇ܪܵܐ ܠܥܲܒܼܕܹܿܗ 428 ܐܲܪܝܼܡ ܐܝܼܕܼܵܟ ܘܲܦܠܘܿܓܼ ܝܲܡܵܐ ܘܢܸܥܒܲܪ ܥܲܡܵܐ ܀ 429 :ܒܚܘܼܛܪܵܐ ܕܲܪܕܲܝܬܿ ܠܐܵܓܹܒܼܛܵܝܹ̈ܐ ܩܲܫܝܼܝ̈ ܠܸܒܵܐ 430 ܒܹܗ ܢܲܓܸܿܕܲܝܗܝ ܒܝܲܡܵܐ ܫܓܸܝܼܫܵܐ ܘܢܹܐܠܲܦ ܛܲܟܼܣܵܐ ܀ 431 :ܒܵܟ ܡܲܠܸܦ ܐ̄ܢܵܐ ܛܲܟܼܣܵܐ ܠܚܲܪ̈ܫܹܐ ܘܲܠܡܲܠܵܠܹ̈ܐ 432 ܕܢܗܘܘܿܢ ܝܵ̇ܕܼܥܝܼܢ ܚܹܝܠ ܥܵܒܼ̇ܘܿܕܼܵܐ ܕܬܲܩܸܢ ܐܸܢܘܿܢ ܀ 433 :ܟܐܝܼ ܒܹܗ ܒܝܲܡܵܐ ܘܢܸܫܠܸܐ ܪܲܗܛܵܐ ܫܓܼܝܼܫܵܐ ܕܓܼܠ̈ܠܵܘܗܝ 434 ܘܢܸܚܙܘܿܢ ܪܲܒܿܘܼܬܼܝ ܝܼܣܲܪ̈ܠܵܝܹܐ ܘܐܵܓܹܒܼܛܵܝܹ̈ܐ ܀ pb. 301 435 :ܩܥܝܼ ܒܹܗ ܒܚܲܪܫܵܐ ܘܗܵܐ ܨܵܐܹ̇ܬܼ ܠܵܟ ܐܲܝܟ ܡܲܠܵܠܵܐ 436 ܬܲܪܓܸܿܡ ܠܹܗ ܫ݂ܡܝ ܘܗܵܐ ܡܸܣܬܲܟܲܠ ܚܲܝܠܵܬ ܕܐܝܼܬܼܘܼܬܼܝ ܀ 437 :ܠܲܓܼܠܸܓܼ ܠܲܥܓܵܐ ܥܲܡ ܫܲܬܿܝܼܩܵܐ ܐܲܝܟ ܕܐܸܬܼܦܲܩܲܕܼ 438 ܘܫܲܡ̣ܥܹܗ ܚܲܪܫܵܐ ܘܲܓܼܡܲܪ ܡܸܠܬܹܗ ܒܝܲܕܼ ܣܘܼܥܪ̈ܵܢܹܐ ܀ 439 ܐܘܼܪܚܵܐ ܦܬܼܝܼܬܼܵܐ ܥܒ݂ܲܕܼ ܒܲܡܨܲܥܬܹܗ ܕܢܸܥܒܲܪ ܥܲܡܵܐ ܀ 440 ܘܒܲܕܼܡܘܼܬܼ ܫܘܼܪܵܐ ܩܵܡ̣ܘ ܗ̄ܘ̣ܵܘ ܡܲܝ̈ܵܐ ܠܲܬܼܝܼ̈ܢ ܀ 441 :ܬܲܗܪܵܐ ܪܲܒܵܐ ܣܥܲܪ ܗ̄ܘ̣ܵܐ ܡܘܼܫܹܐ ܠܵܐ ܗ̄ܘ̣ܵܐ ܡܘܼܫܹܐ 442 ܐܸܠܵܐ ܪܸܡܙܵܐ ܕܚܹܝܠ ܒܵܪܘܿܝܵܐ ܕܡܲܠܸܠ ܗ̄ܘ̣ܵܐ ܒܹܗ ܀ 443 :ܚܙܵܬܼܵܐ ܚܕܲܬܵܐ ܚ̣ܙܵܘ ܚܲܙܵܝܹ̈ܐ ܒܝܲܕܼ ܚܲܙܵܝܵܐ 444 ܟܝܵܢܵܐ ܚܲܪܫܵܐ ܕܢܵܛܲܪ ܛܲܟܼܣܵܐ ܘܠܵܐ ܫܵܪܹܐ ܠܹܗ ܀ 445 :ܦܓܼܘܼ̈ܕܹܐ ܕܫܸܬܼܩܵܐ ܡܲܪܡܹܝܢ ܗ̄ܘ̣ܵܘ ܒܹܗ ܒܒܲܥܪܝܼܪܵܝܵܐ 446 ܘܠܵܐ ܒܵܥܹ̇ܿܛ ܗ̄ܘ̣ܵܐ ܒܪܸ̈ܓܼܠܹܐ ܕܓܲܠܠܵܘ̈ܗܝ ܐܲܝܟ ܕܲܒܼܩܲܕܼܡ̇ܐ ܀ 447 :ܗܵܘ̇ ܦܘܼܩܕܵܢܵܐ ܕܟܲܢܸܫ ܐܸܢܘܿܢ ܠܡܲܝ̈ܵܐ ܒܪܵܫܝܼܬܼ 448 ܗܘ̤ ܦܠܲܓܼ ܐܸܢܘܿܢ ܘܐܲܦܸܠ ܐܸܢܘܿܢ ܠܡܸܛܲܪ ܛܲܟܼܣܵܐ ܀ 449 :ܗܵܝ̇ ܒܲܪ̄ܬܼ ܩܵܠܵܐ ܕܲܒܼܪܵܬ̤ ܐܸܢܘܿܢ ܫܡܲܥ̣ܘ ܫܲܬܿܝܼܩܹ̈ܐ 450 ܘܝܲܗ̣̄ܒܼܘ ܗ̄ܘ̣ܵܘ ܐܲܬܼܪܵܐ ܕܢܸܬܼܒܲܪ ܥܲܡܵܐ ܒܹܝܬܼ ܓܲܠܠܲܝ̈ܗܘܿܢ ܀ 451 :ܒܚܘܼܛܪܵܐ ܓܼܠܝܵܐ ܚ̣ܙܵܘ ܚܹܝܠ ܟܲܣܝܵܐ ܘܲܕܼܚܸܠܘ ܡܸܢܹܗ 452 ܘܩܵܡ̣ܘ ܐܲܝܟ ܥܲܒܼ̈ܕܹܿܐ ܡ̣ܢ ܝܲܡܝܼܢܵܐ ܘܡ̣ܢ ܣܸܡܵܠܵܐ ܀ 453 :ܐܵܦ ܡܲܠܵܠܹ̈ܐ ܕܲܚܙ̣ܵܘ ܚܲܪ̈ܫܹܐ ܕܨܵܬܼܘ ܦܘܼܩܕܵܢܵܐ 454 ܩ̣ܢܵܘ ܠܘܼܒܵܒܼܵܐ ܠܚܹܝܠ ܥܵܒܼܘܿܕܵܐ ܕܚܹܝܠ ܟܠ ܡܸܫܟܲܚ ܀ 455 :ܥܲܡܵܐ ܪܲܦܝܵܐ ܚܙ̣ܵܐ ܕܐܸܬܿܕܪܫܲܬ̤ ܐܘܼܪܚܵܐ ܒܡܲܝ̈ܵܐ 456 ܘܫܲܪܝܼ ܪܵܕܹܐ ܒܲܬܼܟܼܝܼܠܘܼܬܼܵܐ ܒܹܝܬܼ ܡܲܚܫܘܼܠܹ̈ܐ ܀ 457 :ܐܲܝܟ ܕܲܒܼܝܲܫܵܐ ܪܕܵܘ ܒܲܬܼܗܘܿܡܹ̈ܐ ܒܢܲܝ̈ ܐܲܒܼܪܵܗܵܡ 458 ܘܟܲܕܼ ܪܸܕܹܝܢ ܗ̄ܘ̣ܵܘ ܠܵܐ ܣܵܒܼ̇ܥܝܼܢ ܗ̄ܘ̣ܵܘ ܠܲܡܗܲܠܵܟܼܘܼ ܀ 459 :ܗܠܲܟܼܬܼܵܐ ܚܕܲܬܵܐ ܚܙ̣ܵܘ ܗܲܠܵܟܹ̈ܐ ܕܠܵܐ ܒܲܥܝܵܕܼܵܐ 460 ܘܫܲܪܝܼܪܵܐ ܗ̣̄ܘܵܬܼ ܘܠܵܐ ܫܲܪܝܼܪܵܐ ܠܪܸ̈ܥܝܵܢܲܝܗܘܿܢ ܀ 461 :ܐܲܝܟ ܕܲܒܼܚܸܠܡܵܐ ܚܵܙܹ̇ܝܢ ܗ̄ܘ̣ܵܘ ܒܵܗ̇ ܒܗܵܝ̇ ܡܲܥܒܲܪܬܵܐ 462 ܘܐܝܼܬܹܝܗ̇ ܘܠܲܝܬܹܿܝܗ̇ ܡܸܬܼܪܲܢܹܝܢ ܗ̄ܘ̣ܵܘ ܥܲܠ ܚܘܼܕܼܵܬܼܵܗ̇ ܀ 463 :ܐܵܦ ܡܸܨܪ̈ܝܹܐ ܒܹܝܬܼ ܦܘܼܠܵܓܹ̈ܐ ܩܵܡ̣ܘ ܥܲܠ ܬܲܗܪܵܗ̇ 464 ܕܲܜܠܝܼܓܼ ܝܲܡܵܐ ܐܵܘ ܕܲܠܡܵܐ ܠܵܐ ܡܸܬܼܚܲܫܒܼܝܼܢ ܗ̄ܘ̣ܵܘ ܀ 465 :ܪܸܡܙܵܐ ܟܲܣܝܵܐ ܕܣܲܥ̣ܪܵܗ̇ ܠܗܵܕܹܐ ܚܲܦܸܛ ܐܸܢܘܿܢ 466 ܠܥܲܡܵܐ ܠܡܸܥܒܲܪ ܘܲܠܡܸܨܪ̈ܵܝܹܐ ܠܡܸܬܿܛܲܒܵܥܘܼ ܀ 467 :ܠܵܐ ܥܸܒܼܪ̈ܵܝܹܐ ܥܒ݂ܲܪܘ ܒܲܬܼܟܼܝܼܠܘܼ ܒܗܲܝܡܵܢܘܼܬܼܵܐ 468 ܘܠܵܐ ܡܸܨܪ̈ܵܝܹܐ ܩܢ݂ܲܛܘ ܟܲܕܼ ܥܵܐ̇̄ܠܝܼܢ ܒܲܝܢܵܬܼ ܓܼܠܠܹ̈ܐ ܀ 469 :ܐܲܝܟ ܕܠܲܣܡܲܝ̈ܵܐ ܢܵܓܹ̇ܕܼ ܗ̄ܘ̣ܵܐ ܠܗܘܘܿܢ ܪܸܡܙܵܐ ܒܚܲܡܵܐ 470 ܘܠܵܐ ܦܵܪܫܝܼܢ ܗ̄ܘ̣ܵܘ ܠܡܸܣܬܲܟܵܠܘܼ ܚܹܝܠ ܬܸܕܡܘܼܪܬܵܐ ܀ 471 ܠܵܐ ܝܼܕܲܥܬܼܵܐ ܦ̣ܪܲܣ ܥܲܠ ܦܸܪܥܘܿܢ ܘܥܲܠ ܡܲܫܪܝܼܬܹܗ: pb. 302 472 ܘܥܲܠ̣ܘ ܩܵܡ̣ܘ ܣܲܟܼܠܹ̈ܐ ܡܸܨܥܲܬܼ ܦܲܚܹ̈ܐ ܘܠܵܐ ܐܸܬܼܒܲܝܲܢܘ ܀ 473 :ܐܲܝܟ ܨܲܝܵܕܼܵܐ ܓܼܪܸܓܼ ܐܸܢܘܿܢ ܠܫܲܒܼܪ̈ܲܝ ܠܸܒܵܐ 474 ܘܐܲܟܼܪܸܟ ܐܸܢܘܿܢ ܢܸܫ̈ܒܹܿܐ ܕܡܲܝ̈ܵܐ ܡ̣ܢ ܟܠ ܓܼܒܿܝܼ̈ܢ ܀ 475 :ܥܲܠ̣ ܚܸܪܝܵܝܵܐ ܘܟܼܠܹܗ ܚܲܝܠܹܗ ܘܩܵܡ̣ܘ ܒܲܬܼܗܘܿܡ̇ܐ 476 ܘܠܵܐ ܪܢ̣ܵܐ ܥܲܛܠܵܐ ܕܦܲܪܟܼܪܘܼܗܝ ܚܵܘܒܵܘ̈ܗܝ ܒܚܲܒܼܠܹ̈ܐ ܩ̈ܫܲܝܵܐ ܀ 477 :ܒܛܲܟܼܣܹܗ ܩܵܘܝܼ ܦܠܵܓܹܗ ܕܝܲܡܵܐ ܥܕܲܡ̇ܐ ܠܨܲܦܪܵܐ 478 ܘܥܸܕܵܢ ܨܲܦܪܵܐ ܪܡ݂ܲܙ ܠܹܗ ܠܡܘܼܫܹܐ ܕܲܢܪܝܼܡ ܐܝܼܕܹܗ ܀ 479 :ܚܸܙܘܵܐ ܩܲܫܝܵܐ ܚܙ̣ܵܘ ܡܸܨܪ̈ܵܝܹܐ ܒܗܵܘ̇ ܥܸܕܵܢܵܐ 480 ܘܚܲܝܸܨܘ ܓܝܼܓܼܠܹ̈ܐ ܕܩܵܪ̈ܘܿܟܲܝܗܘܿܢ ܐܲܝܟ ܕܲܠܡܸܥܪܲܩ ܀ 481 :ܠܵܐ ܟܲܕܼ ܥܲܠ̣ܘ ܗ̄ܘ̣ܵܘ ܠܡܸܨܥܲܬܼ ܝܲܡܵܐ ܗܸܢܘ̣ܿܢ ܥܲܠ̣ܘ ܗ̄ܘ̣ܵܘ 482 ܘܐܵܦܠܵܐ ܗܵܕܹܐ ܕܐܲܫܦܸܠܘ ܘܲܕܼܚܸܠܘ ܗܵܢܘ̣ܿܢ ܦܲܪܫܘܼܗ̇ ܀ 483 :ܦܘܼܩܕܵܢ ܟܲܣܝܵܐ ܐܲܥܸܠ ܐܸܢܘܿܢ ܟܲܕܼ ܠܵܐ ܨܵܒܹ̇ܝܢ 484 ܘܬܼܘܼܒܼ ܗܘ̤ ܐܲܪܡܝܼ ܩܸܫܢܛܵܐ ܕܚܝܼܠܵܐ ܒܪܸ̈ܥܝܵܢܲܝܗܘܿܢ ܀ 485 :ܐܲܗܦܸܟ ܐܲܦܵܘ̈ܗܝ ܒܲܪ ܥܸܒܼܪ̈ܵܝܹܐ ܘܚܵܪ̣ ܒܲܬܼܗܘܿܡ̇ܐ 486 ܘܗܲܠܸܕܼܘ ܡܲܝ̈ܵܐ ܘܟܲܣܝܼܘ ܠܪ̈ܲܟܼܫܵܐ ܘܲܠܪ̈ܵܟܼܒܲܝܗܘܿܢ ܀ 487 :ܛܒܲܥ̣ܘ ܝܲܩܝܼܪܹ̈ܐ ܐܲܝܟ ܐܲܒܼܵܪܵܐ ܒܲܚܛܵܗܲܝ̈ܗܘܿܢ 488 ܘܠܵܐ ܦܵܫ̣ ܡܸܢܗܘܿܢ ܣܪܝܼܕܼܵܐ ܕܫܲܪܝܼܪ ܕܠܵܐ ܐܸܬܼܚܲܒܲܠ ܀ 489 :ܟܠܗܘܿܢ ܐܸܒܲܕܼܘ ܥܲܠ ܕܲܫܘܹܝܢ ܗ̄ܘ̣ܵܘ ܒܚܲܕܼ ܪܸܥܝܵܢܵܐ 490 ܠܡܸܚܢܲܩ ܫܲܒܼܪܹ̈ܐ ܕܝܼܣܲܪ̈ܠܵܝܹܐ ܒܡܲܝ̈ܵܐ ܕܢܲܗܪܵܐ ܀ 491 :ܒܢܲܚܬܵܐ ܕܡܲܝܵ̈ܐ ܡܝܼܬܼܘ ܥܵܘܵܠܹ̈ܐ ܕܠܵܐ ܢܸܬܼܥܲܦܘܿܢ 492 ܒܗܵܘ̇ ܐܸܣܟܹܿܡܵܐ ܕܡܝܼܬܼܘ ܝܲܠܘܼ̈ܕܹܐ ܕܠܵܐ ܥܘܼܦܵܝܵܐ ܀ 493 :ܐܲܟܼܡܵܐ ܕܲܣܥ݂ܲܪܘ ܣܥ݂ܲܪ ܨܹܐܕܲܝܗܘܿܢ ܒܚܲܪ ܟܠܵܐ 494 ܘܚܘܼܒܼܠܹ̈ܐ ܕܐܲܪܡܝܼܘ ܥܲܠ ܚܲܒܼܪ̈ܲܝܗܘܿܢ ܬܒܲܥ̣ ܒܐܝܼܕܲܝ̈ܗܘܿܢ ܀ 495 ܚܙ̣ܵܘ ܥܸܒܼܪ̈ܵܝܹܐ ܠܲܫܠܲܕܲܝ̈ܗܘܿܢ ܒܲܣܦܵܪ ܝܲܡܵܐ ܀ 496 ܘܥܲܗܸܕܼܘ ܐܸܢܘܿܢ ܫ̈ܠܲܕܹܿܐ ܕܥܘܸܠܹ̈ܐ ܕܛܵܦ̣ܘ ܥܲܠ ܢܲܗܪܵܐ ܀ 497 :ܚܕܼܝܼܘ ܘܐܸܬܼܒܲܝܲܐܘ ܒܢܲܝ̈ ܐܲܒܼܪܵܗܵܡ ܒܡܵܪܹܗ ܕܐܲܒܼܪܵܡ 498 ܕܫܲܡܠܝܼ ܘܲܓܼܡ݂ܲܪ ܡܘܼܠܟܵܢ ܡܸܠܵܘ̈ܗܝ ܕܲܠܘܵܬܼ ܐܲܒܼܪܵܡ ܀ 499 :ܫܲܒܲܚܘ ܘܐܵܘܪܸܒܼܘ ܠܚܹܝܠ ܒܵܪܘܿܝܵܐ ܕܚܲܪܲܪ ܐܸܢܘܿܢ 500 ܘܗܲܝܡܸܢܘ ܒܲܫܡܹܗ ܘܐܲܚܸܒܼܘ ܘܝܲܩܲܪܘ ܠܡܘܼܫܹܐ ܥܲܒܼܕܹܿܗ ܀