Isaac of Nineveh: Discourse 11

ܙܵܕܹܩ ܠܹܗ ܠܝܼܚܝܼܕܼܵܝܵܐ: ܕܡ̣ܢ ܟܠܗܘܿܢ ܚܘܼܕܼܪ̈ܵܘܗܝ: ܚܙܵܬܼܵܐ ܕܓܼܘܼܪܵܓܼܵܐ ܢܸܗܘܸܐ ܠܚܲܙܵܝܵܘ̈ܗܝ. ܐܲܝܟܲܢܵܐ ܕܡ̣ܢ ܫܘܼܦܪ̈ܵܘܗܝ ܤܲܓܝܼ̈ܐܹܐ: ܕܐܲܝܟܼ ܙܲܠܝܼ̈ܩܲܝ ܫܸܡܫܵܐ ܡܲܒܼܪܩܝܼܢ ܡ̣ܢ ܟܠ ܚܘܼܕܼܪ̈ܵܘܗܝ: ܐܵܦ ܒܥܸܠܕܒܼܵܒܼܵܘ̈ܗܝ ܕܲܫܪܵܪܵܐ: ܟܲܕܼ ܠܵܐ ܨܵܒܹ̇ܝܢ ܢܵܘܕܘܿܢ: ܕܐܝܼܬܼ ܤܲܒܼܪܵܐ ܫܲܪܝܼܪܵܐ ܠܲܟܼܪܸ̈ܤܛܝܵܢܹܐ. ܘܡ̣ܢ ܟܠ ܕܘܟܼ: ܠܘܵܬܼܗܘܿܢ ܢܸܪܗܛܘܼܢ ܠܒܹܝܬܼ ܓܵܘܤܵܐ: ܘܢܸܬܿܬܿܪܝܼܡ ܪܹܫܵܗ̇ ܕܥܹܕܼܬܵܐ ܥܲܠ ܒܥܸܠܕܒܼܵܒܹ̈ܝܗ̇. ܐܲܝܟܲܢܵܐ ܕܫܘܼܒܼܚܵܐ ܕܲܥܒܼܵܕܼܵܘ̈ܗܝ: ܓܘܼܪܵܓܼܵܐ ܢܲܪܡܸܐ ܒܤܲܓܿܝܼ̈ܐܹܐ ܠܡܲܦܲܩܬܼܵܐ ܕܡ̣ܢ ܥܵܠܡܵܐ. ܘܕܲܗܘ̤ܵܐ ܕܚܝܼܠ ܡ̣ܢ ܟܠ: ܡ̣ܢ ܗܸܕܼܪܵܐ ܕܲܡܝܲܬܿܪܘܼܬܹܗ. ܐܲܝܟܲܢܵܐ ܕܡܸܛܠܵܬܹܗ: ܢܸܗܘܸܐ ܦܬܼܝܼܚ ܦܘܼܡܗܘܿܢ ܕܲܒܼ̈ܢܲܝ ܥܹܕܬܵܐ: ܘܲܡܪܲܝܲܡ ܪܹܫܢܗܘܿܢ ܥܲܠ ܟܠܗܹܝܢ ܕܸܚ̈ܠܵܬܼܵܐ. ܫܘܼܒܼܗܵܪܵܐ ܕܥܹܕܬܹܗ ܕܲܡܫܝܼܚܵܐ: ܕܘܼܒܵܪܵܐ ܐܝܼܬܼܵܘܗܝ ܕܝܼܚܝܼ̈ܕܼܵܝܹܐ. ܡܸܛܠܗܵܢܵܐ ܙܵܕܹܩ ܠܹܗ ܠܝܼܚܝܼܕܼܵܝܵܐ: ܡ̣ܢ ܟܠܗܘܿܢ ܓܲܒܵܘ̈ܗܝ: ܗܘ̤ܵܘ ܕܢܝܼܚܝܼܢ ܫܘܼܦܪܹ̈ܐ ܕܐܸܤܟܹܡܹܗ: ܒܲܟܼܢܝܼܟܼܘܼܬܼܵܐ ܕܗܲܕܵܡܵܘ̈ܗܝ: ܒܤܘܼܡܥܵܠܵܐ ܕܐܸܤܟܹܡܹܗ: ܒܲܡܥܲܠܝܘܼܬܹܗ ܕܡ̣ܢ ܡܸܬܼܚܲܙܝܵܢ̈ܝܵܬܼܵܐ: pb. 120 ܒܚܲܬܿܝܼܬܼܘܼܬܼܵܐ ܕܲܡܤܲܪܩܘܼܬܹܗ: ܒܒܲܤܝܘܼܬܹܗ ܓܡܝܼܪܬܵܐ ܕܥܲܠ ܦܲܓܼܪܑܵܐ: ܒܲܥܡܝܼܠܘܼܬܼܵܐ ܕܨܵܘܡܹܗ: ܒܫܸܬܼܩܹܗ ܐܲܡܝܼܢܵܐ: ܒܲܡܛܲܟܿܤܘܼܬܼܵܐ ܕܪܸ̈ܓܼܫܵܘܗܝ. ܒܲܢܛܝܼܪܘܼܬܼܵܐ ܕܲܚܙܵܬܹܗ: ܒܠܵܐ ܚܸܪܚܵܘܼܬܹܗ ܕܲܒܼܚܲܕܼ ܡ̣ܢ ܨܒܼܘܼ ܕܒܲܒܼܪܝܼܬܼܵܐ: ܡ̣ܢ ܙܥܘܿܪܘܼܬܼܵܐ ܕܡܸܠܬܹܗ: ܡ̣ܢ ܕܲܟܲܝܘܼܬܹܗ ܕܡ̣ܢ ܐܲܟܿܬܼܵܐ: ܡ̣ܢ ܦܫܝܼܛܘܼܬܹܗ ܕܦܘܼܪܫܵܢܵܐ. ܘܲܕܼܢܸܗܘܸܐ ܝܑܼܕܼܝܼܥ ܕܝܲܬܝܼܪܵܐ ܐܝܼܬܼܵܘܗܝ ܠܗܵܠܹܝܢ ܚܲܝܹ̈ܐ ܚܲܒܿܝܼ̈ܠܹܐ ܘܦܵܪ̈ܘܿܚܹܐ: ܘܩܲܪܝܼܒܼܵܐ ܠܗܵܢܘܿܢ ܫܲܪܝܼܪܹ̈ܐ ܘܪ̈ܘܼܚܵܢܹܐ: ܡ̣ܢ ܐܲܡܝܼܢܘܼܬܼܵܐ ܕܠܲܘܵܬܼ ܢܲܦܫܹܗ: ܘܡ̣ܢ ܠܵܐ ܝܑܼܕܼܝܼܥܘܼܬܹܗ ܕܒܹܝܬܼ ܒܢܲܝ̈ܢܵܫܵܐ: ܘܠܵܐ ܐܲܤܝܼܪܘܼܬܹܗ ܕܲܒܼܐ̄ܢܵܫ ܚܲܒܼܪܵܐܝܼܬܼ ܘܲܡܚܲܝܕܼܵܐܝܼܬܼ: ܘܡ̣ܢ ܐܲܬܼܪܵܐ ܫܲܠܝܵܐ ܕܥܘܼܡܪܹܗ: ܘܡ̣ܢ ܩܦܝܼܤܘܼܬܼܵܐ ܕܡܵܘܬܿܒܹܗ: ܘܡ̣ܢ ܙܥܘܿܪܘܼܬܼܵܐ ܘܲܒܼܤܝܼܪܘܼܬܼܵܐ ܕܨܸܒܼ̈ܘܵܬܹܗ: ܘܡ̣ܢ ܥܪܘܼܩܝܹܗ ܕܡ̣ܢ ܒܢܲܝ̈ܢܵܫܵܐ: ܘܡ̣ܢ ܐܲܡܝܼܢܘܼܬܹܗ ܕܒܲܨܠܘܿܬܼܵܐ: ܘܡ̣ܢ ܤܸܢ̱ܐܬܹܗ ܘܲܥܪܘܼܩܝܹܗ ܕܡ̣ܢ ܐܝܼܩܵܪܵܐ: ܘܡ̣ܢ ܠܵܐ ܐܲܤܝܼܪܘܼܬܹܗ ܕܲܒܼܚܲܝܹ̈ܐ ܕܙܲܒܼܢܵܐ: ܘܡ̣ܢ ܥܘܼܡܩܵܐ ܪܲܒܵܐ ܕܲܡܤܲܝܒܿܪܵܢܘܼܬܹܗ: ܘܡ̣ܢ ܚܘܼܡܤܵܢܹܗ ܕܲܒܼܢܸܤ̈ܝܘܿܢܹܐ: ܘܡ̣ܢ ܚܤܝܼܟܼܘܼܬܹܗ ܕܡ̣ܢ ܫܸܡ̈ܥܹܐ ܘܥܘܼ̈ܩܵܒܹܐ ܕܫܲܪ̈ܒܲܝ ܥܵܠܡܵܐ: ܘܡ̣ܢ ܡܲܪܢܝܼܬܹܗ ܐܲܡܝܼܢܬܼܵܐ ܘܗܸܪܓܹܗ ܕܲܒܼܗܵܘ̇ ܐܲܬܼܪܹܗ ܫܲܪܝܼܪܵܐ. ܕܡܸܫܬܵܘܥܵܐ ܡ̣ܢ ܠܵܐ ܦܨܝܼܚܘܼܬܼܵܐ ܕܦܲܪܨܘܿܦܹܗ ܘܲܡܚܲܪܟܼܘܼܬܼܵܐ ܕܐܲܦܵܘ̈ܗܝ: ܘܡ̣ܢ ܒܸܟܼܝܹܗ ܐܲܡܝܼܢܵܐ ܕܠܹܠܲܝ ܐܝܼܡܵܩ. ܘܝܲܬܝܼܪ ܡ̣ܢ ܟܠܡܸܕܸܡ: ܡ̣ܢ ܙܗܝܼܪܘܼܬܼܵܐ ܕܲܒܼܢܲܟܼܦܘܼܬܹܗ: ܘܡ̣ܢ ܚܲܤܝܘܼܬܹܗ ܕܡ̣ܢ ܝܲܥܢܘܼܬܼܵܐ. ܒܙܲܥܘܿܪ̈ܝܵܬܼܵܐ: ܘܲܥܕܲܡܵܐ ܠܪܵܘܪ̈ܒܼܵܬܼܵܐ. ܘܗܵܠܹܝܢ ܐܸܢܘܿܢ ܐܲܝܟܼ ܕܲܒܼܪ̈ܘܼܫܡܹܐ ܕܦܵܤܝܼ̈ܩܵܬܼܵܐ ܫܘܼܦܪܹ̈ܐ ܓܠܲܝ̈ܵܐ ܕܝܼܚܝܼܕܼܵܝܵܐ: ܕܤܵܗ̇ܕܝܼܢ ܥܲܠ ܡܝܼܬܼܘܼܬܹܗ ܓܡܝܼܪܬܵܐ pb. 121 ܕܡ̣ܢ ܥܵܠܡܵܐ: ܘܩܲܪܝܼܒܼܘܼܬܹܗ ܕܲܠܘܵܬܼ ܐܲܠܵܗܵܐ. ܘܙܵܕܹܩ ܕܲܒܼܗܵܠܹܝܢ ܢܸܪܢܸܐ ܐܲܡܝܼܢܵܐܝܼܬܼ: ܘܢܸܩܢܸܐ ܐܸܢܘܿܢ. ܐܸܢ ܐ̄ܢܵܫ ܕܹܝܢ ܐܵܡܲ݁ܪ: ܕܡܵܢܵܐ ܐܵܠܨܵܐ ܗ̄ܘ̣ܵܬܼ ܥܲܠ ܗܵܠܹܝܢ ܪ̈ܘܼܫܡܹܐ: ܕܠܵܐ ܗ̄ܘ̣ܵܐ ܡܤܲܝܟܼܵܐܝܼܬܼ ܐܸܬܼܐ̱ܡܲܪܘ: ܐܵܡܲ݁ܪܢܵܐ: ܕܤܲܓܝܼ ܐܵܠܵܨܵܐ ܗ̄ܘ̣ܵܬܼ. ܕܟܲܕܼ ܡ̣ܢ ܗܵܠܹܝܢ ܪ̈ܘܼܫܡܹܐ ܢܸܒܼܥܸܐ ܐܸܢܘܿܢ ܠܚܲܕܼ ܚܲܕܼ ܒܢܲܦܫܹܗ: ܐܸܢ ܐܝܼܬܼ ܡܸܕܸܡ ܕܚܲܤܝܼܪ ܠܹܗ ܠܐܲܝܢܵܐ ܕܲܒܼܛܝܼܠ ܠܹܗ ܥܲܠ ܚܲܝܵܘ̈ܗܝ: ܡ̣ܢ ܗܵܠܹܝܢ ܦܘܼܪ̈ܫܵܢܹܐ ܢܲܕܼܪܸܟܼ ܚܲܤܝܼܪܘܼܬܹܗ ܕܲܒܼܟܼܠ ܚܕܼܵܐ ܡ̣ܢ ܡܝܲܬܿܪ̈ܵܬܼܵܐ. ܘܢܸܗܘܘܿܢ ܠܹܗ ܗܵܠܹܝܢ ܪ̈ܘܼܫܡܹܐ: ܕܘܼܟܲܬܼ ܡܥܲܗܕܼܵܢܹ̈ܐ. ܘܡܵܐ ܕܗܵܠܹܝܢ ܟܠܗܹܝܢ ܕܲܪ̈ܫܝܼܡܵܢ ܩܢ̣ܵܐ ܐܸܢܹܝܢ ܒܲܩܢܘܿܡܹܗ: ܐܵܦ ܫܲܪܟܵܐ ܐܲܝܠܹܝܢ ܕܐܸܫܬܿܒܸܩ: ܡܸܬܼܝܲܗܒܵܐ ܠܹܗ ܝܑܼܕܲܥܬܼܝܼܗܹܝܢ: ܘܗܵܘܹ̇ܐ ܥܸܠܲܬܼ ܬܸܫܒܿܘܿܚܬܹܗ ܕܐܲܠܵܗܵܐ ܠܲܒܼܢܲܝ̈ܢܵܫܵܐ ܘܲܠܡܲܠܲܐܟܹ̈ܐ ܩܲܕܝܼ̈ܫܹܐ. ܘܡ̣ܢ ܗܵܪܟܵܐ ܡܛܲܝܸܒܼ ܠܵܗ̇ ܠܢܲܦܫܹܗ ܐܲܬܼܪܵܐ ܕܲܢܝܵܚܬܼܵܐ: ܡ̣ܢ ܩܕܼܵܡ ܡܲܦܩܵܢܹܗ ܕܡ̣ܢ ܗܵܢܵܐ ܥܵܠܡܵܐ.