Isaac of Nineveh: Discourse 12

ܬܠܵܬܼܵܐ ܐܸܢܘܿܢ ܛܲܟܼܤܹ̈ܐ: ܕܲܒܼܗܘܿܢ ܡܸܬܿܕܲܪܲܓܼ ܟ̱ܠܹܗ ܪܲܗܛܵܐ ܕܒܲܪܢܵܫܵܐ. ܛܲܟܼܤܵܐ ܕܫܲܪܘܵܝܘܼܬܼܵܐ: ܘܡܸܨܥܵܝܘܼܬܼܵܐ: ܘܲܓܼܡܝܼܪܘܼܬܼܵܐ. pb. 122 ܘܛܲܟܼܤܵܐ ܩܲܕܼܡܵܝܵܐ: ܟ̱ܠܹܗ ܥܸܢܝܵܢܹܗ ܘܥܘܼܗܕܵܢܹܗ. ܐܵܦܸܢ ܠܘܵܬܼ ܡܝܲܬܿܪܘܼܬܼܵܐ ܢܚܝܼܪ ܪܸܥܝܵܢܹܗ: ܒܚܲܫܵܐ ܐܝܼܬܼܵܘܗܝ܀ ܘܕܲܬܼܪܹܝܢ: ܡܸܨܥܵܝܵܐ ܐܝܼܬܼܵܘܗܝ: ܒܹܝܬܼ ܚܵܫܘܿܫܘܼܬܼܵܐ ܠܪܘܼܚܵܢܘܼܬܼܵܐ. ܘܚܘܼ̈ܫܵܒܹܐ ܕܝܲܡܝܼܢܵܐ ܘܲܕܼܤܸܡܵܠܵܐ: ܫܲܘܝܵܐܝܼܬܼ ܢܵܒܼܗ̇ܝܼܢ ܒܹܗ. ܘܠܵܐ ܓܵܐܹ̇ܙ ܡܲܒܿܘܼܥܵܐ ܕܢܘܼܗܪܵܐ ܘܲܕܸܚܫܘܿܟܼܵܐ ܕܲܬܼܪ̈ܲܝܗܘܿܢ ܓܲܒܹ̈ܐ ܤܵܟܼ: ܐܲܝܟܼ ܕܐܲܡܝܼܪ. ܐܸܢܕܹܝܢ ܢܦܘܼܫ ܐܵܦܸܢ ܩܲܠܝܼܠ ܡ̣ܢ ܗܸܪܓܵܐ ܕܠܵܐ ܢܵܘܚܵܐ ܕܒܲܟܼܬܼܝܼ̈ܒܵܬܼܵܐ ܕܪܘܼܚ ܘܲܫܪܲܓܼܪ̈ܵܓܼܝܼܬܼܵܐ ܕܲܒܼܗܵܠܹܝܢ ܐܲܠܵܗܵܝ̈ܵܬܼܵܐ: ܕܲܒܼܗܲܓܵܓܲܝ̈ܗܹܝܢ ܢܸܫܬܲܠܗܲܒܼ ܢܘܼܪܵܢܵܐܝܼܬܼ ܒܢܝܼܫܵܐ ܕܚܵܢܹ̇ܐ ܠܲܫܪܵܪܵܐ: ܥܲܡ ܢܛܘܼܪܬܵܐ ܕܲܠܒܲܪ ܐܲܝܟܼ ܚܲܝܠܹܗ. ܕܡܸܢܵܗ̇ ܘܗܵܝ̇ ܕܲܠܓܼܵܘ ܘܥܲܡܠܵܐ ܕܤܵܦܹ̇ܩ: ܠܘܵܬܼ ܓܲܒܵܐ ܕܚܲܫܹ̈ܐ ܡܸܬܼܓܪܸܦ. ܘܐܸܢ ܢܬܲܪܤܸܐ ܠܚܲܡܝܼܡܘܼܬܹܗ ܟܝܵܢܵܝܬܼܵܐ ܒܗܵܠܹܝܢ ܕܐܸܡ̇ܪܹܬܼ: ܘܡ̣ܢ ܒܥܵܬܼܵܐ ܘܥܘܼܩܵܒܼܵܐ ܠܵܐ ܢܦܘܼܫ. ܘܢܸܤܘܲܚ ܐܸܢܹܝܢ ܡ̣ܢ ܪܘܼܚܩܵܐ ܟܲܕܼ ܠܵܐ ܚܲܙ̈ܝܵܢ ܠܹܗ: ܐܸܠܵܐ ܐܸܢ ܪܸ̈ܡܙܲܝܗܹܝܢ ܕܒܲܟܼܬܼܵܒܹ̈ܐ. ܘܲܢܪܲܒܸܐ ܐܸܢܘܿܢ ܠܚܘܼܫܵܒܼܵܘ̈ܗܝ ܘܲܢܦܲܓܸܕܼ ܐܸܢܘܿܢ ܒܗܵܠܹܝܢ ܕܠܵܐ ܢܸܨܛܠܘܿܢ ܠܤܸܡܵܠܵܐ: ܐܵܘ ܢܩܲܒܿܠܘܼܢ ܙܲܪܥܵܐ ܡܸܕܸܢ ܕܦܲܢܛܵܤ̈ܝܼܵܣ ܡ̣ܢ ܫܹܐܕܹ̈ܐ ܕܘܲܟܲܬܼ ܫܪܵܪܵܐ. ܐܸܠܵܐ ܢܸܬܼܝܲܐܲܒ̣ ܘܢܸܛܲܪ ܢܲܦܫܹܗ: ܘܲܢܦܝܼܣ ܠܐܲܠܵܗܵܐ ܒܲܨܠܘܿܬܼܵܐ ܕܚܲܫܵܐ ܕܡ̣ܢ ܢܲܓܝܼܪܘܼܬܼ ܪܘܼܚܵܐ. ܡܵܐ ܕܠܲܐܠܵܗܵܐ ܫܸܦܪܲܬ̤ ܠܡܸܬܲܠ ܠܹܗ: ܦܵܬܲܚ ܬܲܪܥܵܐ ܩܕܼܵܡܵܘܗܝ. ܝܲܬܝܼܪܵܐܝܼܬܼ: ܡܸܛܠ ܡܲܟܿܝܼܟܼܘܼܬܹܗ. ܕܲܠܡܲܟܿܝܼ̈ܟܹܐ: ܐ̄ܪ̈ܵܙܹܐ ܡܸܬܼܓܝܹܝܢ. ܐܸܢܕܹܝܢ ܒܹܗ ܒܗܵܢܵܐ ܤܘܼܟܵܝܵܐ ܡܵܐܹ̇ܬܼ: ܟܲܕܼ ܠܵܐ ܚ̣ܙܵܗ̇ ܠܐܲܪܥܵܐ ܗܵܝ̇ ܡ̣ܢ ܩܘܼܪܒܵܐ: ܤܵܒܲܪ ܐ̄ܢܵܐ ܕܝܵܪܬܘܼܬܹܗ ܥܲܡ ܟܹܐܢܹ̈ܐ ܩܲܕܸܡܵܝܹ̈ܐ ܗܵܘ̇ܝܵܐ: ܐܲܝܠܹܝܢ ܕܤܲܟܿܝܼܘ ܠܲܓܼܡܝܼܪܘܼܬܼܵܐ: ܐܲܝܟܼ ܡܸܠܬܹܗ ܕܲܫܠܝܼܚܵܐ: ܘܠܵܐ pb. 123 ܚܙ̣ܵܘ: ܘܥܲܠ ܤܲܒܼܪܵܗ̇ ܥܡܲܠ̣ܘ ܟܠܗܘܿܢ ܝܵܘ̈ܡܵܬܼܵܐ ܘܲܕܼܡܸܟܼܘ. ܐܸܠܵܐ ܡܵܢܵܐ ܢܹܐܡܲܪ: ܐܸܢ ܠܵܐ ܢܸܡܛܸܐ ܐ̄ܢܵܫ ܠܗܵܝ̇ ܕܢܸܥܘܿܠ ܠܐܲܪܥܵܐ ܕܡܘܼܠܟܵܢܵܐ ܕܐܝܼܬܼܵܘܗܝ ܛܲܟܼܤܵܐ ܕܲܓܼܡܝܼܪܹ̈ܐ: ܘܢܸܫܟܲܚ ܠܲܫܪܵܪܵܐ ܥܹܝܢ ܒܲܓܼܠܸܐ ܟܡܵܐ ܕܤܸܦܹ̇ܩ ܟܝܵܢܵܐ: ܢܦܘܼܫ ܡܸܟܹܝܠ ܘܡ̣ܢ ܗܵܢܵܐ ܒܛܲܟܼܤܵܐ ܗܵܘ̇ ܬܲܚܬܵܝܵܐ: ܕܟܼܠܹܗ ܒܡܸܡܵܠܵܐ ܥܢܸܐ. ܘܡܸܛܠ ܗܵܝ̇ ܕܠܵܐ ܐܸܫܟܲܚ ܠܲܫܪܵܪܵܐ ܟ̱ܠܹܗ: ܐܵܪܵܐ ܢܩܵܘܸܐ ܒܬܲܚܬܵܝܘܼܬܼܵܐ ܕܠܵܐ ܝܵܕܲܥ̇ ܐܵܦܠܵܐ ܠܡܸܪܲܓܼ ܗܵܠܹܝܢ: ܐܵܘ ܢܸܬܼܥܲܠܸܐ ܠܗܵܢܵܐ ܡܸܨܥܵܝܵܐ ܕܐܸܡ̇ܪܹܬܼ: ܐܵܦܸܢ ܠܵܐ ܢܸܚܙܸܐ ܐܲܝܟܼ ܕܲܒܼܡܲܚܙܝܼܬܼܵܐ: ܐܸܠܵܐ ܡ̣ܢ ܪܘܼܚܩܵܐ ܡܤܲܟܸܐ ܠܹܗ: ܘܒܹܗ ܒܤܘܼܟܵܝܵܐ ܡܸܬܼܟܢܸܫ ܠܘܵܬܼ ܐܲܒܼܵܘ̈ܗܝ؟ ܘܐܵܦܸܢ ܠܵܐ ܢܸܫܬܿܘܸܐ ܠܗܵܝ̇ ܟ̱ܠܵܗ̇ ܛܲܝܒܿܘܼܬܼܵܐ ܬܢܵܢ: ܐܸܠܵܐ ܒܥܸܢܝܵܢܵܐ ܕܥܲܡܵܗ̇ ܟܲܕܼ ܪܲܚܝܼܩ: ܢܲܦܗܸܐ ܗܵܘܢܹܗ. ܘܲܒܼܓܼܘܼܪ̈ܵܓܹܐ ܕܝܼܠܵܗ̇ ܟܡܵܐ ܕܚܲܝ ܢܸܦܤܘܿܩ ܢܲܡܸܕܼ ܡ̣ܢ ܚܘܼ̈ܫܵܒܹܐ ܒܝܼ̈ܫܹܐ. ܘܲܒܼܗܵܢܵܐ ܤܲܒܼܪܵܐ: ܟܲܕܼ ܡܠܸܐ ܠܸܒܹܗ ܡ̣ܢ ܐܲܠܵܗܵܐ: ܡܫܲܢܸܐ ܡ̣ܢ ܥܵܠܡܵܐ ܗܵܢܵܐ. ܟܠ ܡܸܕܸܡ ܕܲܒܼܡܲܟܿܝܼܟܼܘܼܬܼܵܐ ܗܵܘܹ̇ܐ: ܫܲܦܝܼܪ ܗ̄ܘ̣. ܗܲܓܵܓܹ̈ܐ ܠܵܐ ܓܫܝܼ̈ܡܹܐ ܕܡܲܕܥܵܐ ܒܢܝܼܫܵܐ ܕܪܸܚܡܲܬܼ ܐܲܠܵܗܵܐ ܒܤܘܼ̈ܟܵܠܹܐ ܕܲܟܿܬܼܵܒܹ̈ܐ: ܤܵܝ̇ܓܝܼܢ ܠܡܲܥ̈ܠܵܢܹܐ ܕܢܲܦܫܵܐ ܩܕܼܵܡ ܚܘܼ̈ܫܵܒܹܐ ܢܘܼܟܼܪ̈ܵܝܹܐ: ܘܢܵܛ̇ܪܝܼܢ ܠܪܸܥܝܵܢܵܐ ܠܥܘܼ̈ܗܕܵܢܹܐ ܕܨܸܒܼ̈ܘܵܬܼܵܐ: ܘܡ̣ܢ ܗܵܠܹܝܢ ܬܸܫܬܲܗܸܐ ܚܲܡܝܼܡܘܼܬܼܵܐ ܕܙܵܘܥܹܗ: ܘܢܸܦܸܠ ܒܲܪܓܼܝܼܓܼܵܬܼܵܐ.