Isaac of Nineveh: Discourse 16

ܒܼܪܢܵܫܵܐ ܤܲܓܝܼ ܨܸܦܬܼܵܐ: ܕܢܸܗܘܸܐ ܢܝܼܚܵܐ ܘܲܡܫܲܝܢܵܐ: ܠܵܐ ܡܸܫܟܲܚ. ܗܸܢܹܝܢ ܓܹܝܪ ܥܸܠ̈ܠܵܬܼܵܐ ܐܵܢܲܢ̈ܩܵܝܵܬܼܵܐ ܐܵܐܲܢ̈ܩܵܝܵܬܼܵܐ ܕܢܵܩ̈ܦܵܢ ܠܨܸܒܼ̈ܘܵܬܼܵܐ ܕܬܼܵܥܹ̇ܫ ܒܗܹܝܢ: ܗܸܢܘܿܢ ܥܵܒܼ̈ܕܵܢ ܠܹܗ ܕܢܸܬܿܬܿܙܝܼܥ ܡ̣ܢ ܩܛܝܼܪ: ܘܒܼ̈ܙܵܢ ܠܢܝܼܚܘܼܬܹܗ ܘܲܒܼܗܝܠܘܼܬܹܗ. ܒܸܠܥܵܕܼ ܢܘܼ̈ܬܵܦܹܐ ܕܹܝܢ ܕܢܸܥܘܿܠ ܤܵܛܵܢܵܐ ܥܲܠ ܢܲܦܫܵܐ: ܐܲܬܼܪܵܐ ܠܲܝܬܿ ܠܹܗ. ܙܵܕܹܩ ܠܹܗ ܠܝܼܚܝܼܕܼܵܝܐ: ܕܲܩܕܼܵܡ ܐܲܦܵܘ̈ܗܝ ܕܐܲܠܵܗܵܐ ܢܩܝܼܡ ܢܲܦܫܹܗ ܐܲܡܝܼܢܵܐܝܼܬܼ: ܘܲܠܪܸܡܙܹܗ ܢܲܨܸܕܼ. ܐܸܢ ܐܹܝܢ ܒܲܫܪܵܪܵܐ ܤܝܼܡܵܐ ܠܹܗ ܗܵܘܢܹܗ ܕܢܸܛܲܪ ܒܲܙܗܝܼܪܘܼܬܼܵܐ: ܘܲܠܢܘܼ̈ܩܙܹܐ ܙܥܘܿܪܹ̈ܐ ܕܪܵܦܬܿܝܼܢ ܒܹܗ ܠܡܲܕܼܪܵܟܼܘܼ ܚܲܪܝܼܦܵܐܝܼܬܼ ܨܵܒܹ̇ܐ: ܘܲܠܡܸܕܲܥ ܒܫܲܝܢܵܐ ܕܬܲܪܥܝܼܬܼܵܐ ܠܡܸܦܪܲܫ ܠܲܕܼܥܵܐ̇ܠܝܼܢ ܘܢܵܦ̇ܩܝܼܢ܀ ܥܲܪ̈ܝܵܬܼܵܐ pb. 131 ܤܲܓܝܼ̈ܐܵܬܼܵܐ ܒܝܼܚܝܼܕܼܵܝܵܐ: ܐܵܬ̤ܵܐ ܐܸܢܹܝܢ ܕܲܡܪܲܫܠܘܼܬܹܗ ܡ̣ܢ ܛܘܼܝܵܒܼܵܐ ܕܦܘܼܠܚܵܢܹܗ ܕܲܡܫܝܼܚܵܐ. ܘܝܼܕܲܥܹ̈ܐ ܕܚܲܤܝܼܪܘܼܬܼܵܐ ܕܲܒܼܗܵܠܹܝܢ ܐܲܠܵܗܵܝ̈ܬܼܵܐ ܡܒܲܕ̈ܩܵܢ. ܒܸܠܥܵܕܼ ܡ̣ܢ ܤܦܝܼܩܘܼܬܼܵܐ: ܢܲܗܝܼܪܘܼܬܼܵܐ ܠܵܐ ܬܸܒܼܥܸܐ ܡ̣ܢ ܢܲܦܫܵܟܼ. ܘܠܵܐ ܢܝܼܚܘܼܬܼܵܐ ܘܲܒܼܗܝܼܠܘܼܬܼܵܐ: ܒܐܲܫܝܼܕܼܘܼܬܼܵܐ ܕܪܸ̈ܓܼܫܹܐ. ܘܠܵܐ ܟܢܝܼܫܘܼܬܼܵܐ ܕܪܸ̈ܓܼܫܹܐ: ܥܲܡ ܥܲܪ݁ܝܵܬܼܵܐ ܕܤܘܼܥܪ̈ܵܢܹܐ. ܠܵܐ ܬܲܤܓܸܐ ܥܲܪ̈ܝܵܬܼܵܐ ܠܢܲܦܫܵܟܼ: ܘܠܵܐ ܡܸܫܟܲܚ ܐܲܢ̄ܬܿ ܒܘܼܠܒܵܠܵܐ ܒܗܵܘܢܵܟܼ. ܒܸܠܥܵܕܼ ܬܲܟܼܫܲܦܬܼܵܐ ܐܲܡܝܼܢܬܼܵܐ: ܠܡܸܬܼܩܲܪܵܒܼܘܼ ܠܐܲܠܵܗܵܐ ܠܵܐ ܡܲܨܝܵܐ. ܘܥܲܡ ܥܲܡܠܵܐ ܕܬܲܟܼܫܲܦܬܼܵܐ: ܠܡܸܪܡܵܐ ܠܪܸܥܝܵܢܵܐ ܡܲܪܢܝܼܬܼܵܐ ܐ̄ܚܪܹܬܼܵܐ: ܦܘܼܠܗܵܕܼܵܐ ܗ̣̄ܝ ܕܠܸܒܵܐ. ܙܵܘ̈ܥܹܐ ܚܲܡܝܼ̈ܡܹܐ ܕܐܲܕܼܝܼܩܘ ܥܠܲܝܟ ܒܲܙܒܲܢ ܒܲܛܥܵܡܬܼܵܐ ܕܐܲܠܵܗܵܐ ܒܲܫܓܼܵܪܵܐ ܚܲܪܝܼܦܵܐ ܕܗܵܠܹܝܢ ܕܡܸܛܠܵܬܹܗ: ܘܬܼܘܼܒܼ ܟܲܕܼ ܦܢܲܝܬܿ ܤܥܲܪܬܿ ܐܸܢܘܿܢ: ܐܸܫܟܲܚܬܿ ܐܸܢܘܿܢ ܟܲܕܼ ܦܲܪܝܼܗܝܼܢ ܒܲܛܥܵܡܬܗܘܿܢ ܘܩܲܪܝܼܪܝܼܢ ܒܓܼܵܘ ܢܲܦܫܵܟܼ: ܡܫܵܟܼܘܼܬܼ ܥܸܢܝܵܢܵܐ ܕܒܲܪܢܵܫܵܐ ܓܵܚܲܬ̤ ܥܠܲܝܟ ܡ̣ܢ ܕܘܼܟܼ: ܐܵܘ ܝܲܩܲܪܬܿ ܠܲܥ̇ܒܼܵܕܼܵܐ ܦܲܓܼܪܵܢܵܝܵܐ ܝܲܬܝܼܪ ܡܸܢܗܘܿܢ: ܘܥܲܠ ܗܵܕܹܐ ܩܸܪܲܬ̤ ܫܲܚܝܼܢܘܼܬܼܵܐ ܕܚܘܼ̈ܫܵܒܲܝܟ. ܕܸܡ̈ܥܹܐ ܕܹܝܢ ܘܲܢܩܵܫܹ̈ܐ ܕܪܹܫܵܐ ܕܒܲܨܠܘܿܬܼܵܐ ܘܓܘܼܪ̈ܓܵܚܹܐ ܚܲܡܝܼ̈ܡܹܐ: ܡܥܝܼܪܝܼܢ ܠܵܗ̇ ܬܘܼܒܼ ܠܚܲܡܝܼܡܘܼܬܼܵܐ ܕܚܲܠܝܘܼܬܼܗܘܿܢ ܒܓܼܵܘ ܠܸܒܵܐ. ܘܲܒܼܫܵܢܝܘܼܬܼܵܐ ܡܩܲܠܲܤܬܼܵܐ ܦܵܪܲܚ ܠܸܒܵܐ ܒܵܬܲܪ ܐܲܠܵܗܵܐ ܟܲܕܼ ܓܵܥܹ̇ܐ: ܨܲܗܝܵܐ ܗ̣̄ܝ ܠܵܟܼ ܢܲܦܫܝ ܐܲܠܵܗܵܐ ܚܲܝܵܐ: ܕܐܸܡܲܬܼܝ ܐܹܬܸܐ ܘܐܸܚܙܸܐ ܐܲܦܲܝ̈ܟ. ܐܲܝܢܵܐ ܕܐܸܫܬܿܝܼ ܡ̣ܢ ܗܵܢܵܐ ܚܲܡܪܵܐ ܘܬܼܘܼܒܼ ܐܸܬܼܓܠܸܙ: ܗܵܝܕܹܝܢ ܗ̤ܘܝܘܼ ܒܲܠܚܘܿܕܼܵܘܗܝ ܝܵܕܲܥ̇ ܒܐܲܝܢܵܐ ܛܘܼܪܵܦܵܐ ܐܸܫܬܿܒܸܩ: ܘܡܵܢܵܐ ܐܸܫܬܿܩܸܠ ܡܸܢܹܗ ܡܸܛܠ ܪܲܦܝܘܼܬܹܗ܀ ܐܘܿ ܟܡܵܐ ܒܝܼܫܵܐ ܚܙܵܬܼܵܐ ܘܥܸܢܵܝܵܢܵܐ ܕܐ̄ܢܵܫܵܐ ܠܐܲܝܢܵܐ pb. 132 ܕܡܸܬܿܕܲܒܲܪ ܒܫܸܠܝܵܐ: ܘܐܵܦ ܝܲܬܼܝܼܪ ܡ̣ܢ ܗܵܘ̇ ܕܲܫܪܸܐ ܘܲܫܒܼܝܼܩ. ܫܲܪܝܼܪܵܐܝܼܬܼ ܐܲܝܲܚ̈: ܕܐܲܝܟܼ ܚܹܐܦܵܐ ܥܲܙܝܼܙܵܐ ܕܥܲܪܝܵܐ: ܕܡ̣ܢ ܫܹܠܝ ܥܵܪܹܨ ܥܲܠ ܦܸܪ̈ܥܹܐ ܕܐܝܼܠܵܢܹ̈ܐ: ܘܡܵܘܩܸܕܼ ܪܹ̈ܫܲܝܗܘܿܢ ܙܥܘܿܪܹ̈ܐ ܕܲܒܼܠܲܨ̣ܘ ܡ̣ܢ ܤܵܘ̈ܟܵܬܼܵܐ: ܗܵܟܲܢܵܐ ܥܸܢܝܵܢܵܐ ܕܲܒܼܢܲܝ̈ܢܵܫܵܐ: ܘܐܵܦܸܢ ܛܵܒܼ ܙܥܘܿܪ: ܘܡܸܤܬܿܒܲܪ ܕܲܠܛܵܒܼܬܼܵܐ ܗ̄ܘ̣ ܟܢܘܼܫܝܼܗܘܿܢ: ܡܵܘܒܸܿܫ ܢܘܼܪ݁ܒܹܐ ܕܲܡܝܲܬܿܪ̈ܵܬܼܵܐ ܕܐܲܦܸܩ̣ܘ ܪܹ̈ܫܲܝܗܘܿܢ ܚܲܕܼܬܼܵܐܝܼܬܼ ܡ̣ܢ ܡܡܲܙܓܼܘܼܬܹܗ ܕܐܵܐܲܪ ܕܫܸܠܝܵܐ: ܕܲܟܼܪܝܼܟܼܝܼܢ ܪܲܓܼܝܵܐܝܼܬܼ ܠܐܝܼܠܵܢܵܐ ܕܢܲܦܫܵܐ ܕܐܸܬܼܢܨܸܒܼ ܥܲܠ ܬܲܦܹ̈ܐ ܕܲܬܼܝܵܒܼܘܼܬܼܵܐ. ܘܐܲܝܟܼ ܥܘܼܙܹܗ ܕܲܓܼܝܼܕܼܵܐ: ܕܡܲܕܼܪܸܟܼ ܠܡܵܘ̈ܥܝܵܬܼܵܐ ܚܲܕܼ̈ܬܼܵܬܼܵܐ ܕܥܸܩܵܪܹ̈ܐ: ܘܲܡܩܲܦܲܚ ܪܹ̈ܫܲܝܗܘܿܢ ܘܡܲܥܸܠ ܠܓܼܵܘ ܐܲܪܥܵܐ: ܗܵܟܲܢܵܐ ܥܸܢܝܵܢܵܐ ܕܲܒܼܢܲܝ̈ܢܵܫܵܐ ܠܥܸܩܵܪܵܐ ܕܪܸܥܝܵܢܵܐ: ܕܫܲܪܝܼ ܡܵܘܪܸܩ ܒܥܸܤܒܹ̈ܐ ܕܲܡܝܲܬܿܪ̈ܵܬܼܵܐ: ܡܩܲܦܲܚ ܪܹ̈ܫܲܝܗܹܝܢ: ܘܡܲܥܸܠ ܠܗܹܝܢ ܬܘܼܒܼ ܠܕܘܼܟܲܬܼܗܹܝܢ: ܘܥܵܛܹ̇ܐ ܪܲܥܕܘܼܬܼܗܹܝܢ. ܘܐܸܢ ܥܸܢܝܵܢܵܐ ܕܐܲܝܠܹܝܢ ܕܲܒܼܨܝܼܪ ܩܲܠܝܼܠ ܐܲܚܝܼܕܼܝܼܢ ܢܲܦܫܗܘܿܢ: ܒܥܸܠܲܬܼ ܥܘܼܘܵܟܹ̈ܐ ܒܲܠܚܘܿܕܼ ܕܡ̣ܢ ܦܘܼܠܚܵܢܵܐ ܕܲܥܝܵܕܼܵܐ: ܗܵܢܵܐ ܟ̱ܠܹܗ ܡܲܟܸܿܐ ܠܢܲܦܫܵܐ: ܟܡܵܐ ܝܲܬܿܝܼܪܵܐܝܼܬܼ ܡܲܡܠܠܵܐ ܘܲܚܙܵܬܼܵܐ ܕܦܲܟܝܼ̈ܗܹܐ ܘܗܸܕܼܝܘܿܛܹ̈ܐ: ܕܠܵܐ ܐܹܡܲܪ ܕܥܵܠܡܵܝܹ̈ܐ: ܗܵܘ̇ ܕܐܝܼܬܼܵܘܗܝ ܐܲܝܟܼ ܢܘܼܪܵܐ ܠܥܵܒܼܵܐ. ܘܐܲܟܼܙܢܵܐ ܕܓܲܒܼܪܵܐ ܝܲܩܝܼܪܵܐ ܘܲܗܕܼܝܼܪܵܐ: ܕܛܵܥܹ̇ܐ ܝܵܬܹܗ ܒܡܲܫܬܿܝܵܐ ܤܲܓܝܼܐܵܐ ܕܚܲܡܪܵܐ: ܘܡܸܬܿܕܵܘܕܼܵܐ ܟܢܝܼܟܼܘܼܬܹܗ ܘܡܸܙܕܲܠܠܵܐ ܝܲܩܝܼܪܘܼܬܹܗ: ܘܡ̣ܢ ܚܘܼ̈ܫܒܹܐ ܢܘܼܟܼܪ̈ܝܹܐ ܕܥܵܪܨܝܼܢ ܒܪܸܥܝܵܢܹܗ ܡ̣ܢ ܚܲܝܠܹܗ ܕܚܲܡܪܵܐ: ܡܸܬܼܕܵܘܕܼܵܐ ܢܲܟܼܦܘܼܬܹܗ: ܗܵܟܲܢܵܐ ܡܸܬܿܕܵܘܕܼܵܐ ܟܢܝܼܟܼܘܼܬܼܵܗ̇ ܕܢܲܦܫܵܐ ܒܥܸܢܝܵܢܵܐ ܘܲܚܙܵܬܼܵܐ ܕܲܒܼܢܲܝ̈ܢܵܫܵܐ: pb. 133 ܘܛܵܥ̇ܝܵܐ ܢܝܼܫܵܐ ܕܲܙܗܝܼܪܘܼܬܼܵܗ̇: ܘܡܸܬܼܠܚܸܐ ܡ̣ܢ ܪܸܥܝܵܢܵܗ̇ ܟ̱ܠܹܗ ܢܝܼܫܵܐ ܕܨܸܒܼܝܵܢܵܗ̇: ܘܥܵܒܲܪ ܡ̣ܢ ܫܸܪ̈ܫܹܝܗ̇ ܟ̱ܠܵܗ̇ ܫܲܬܼܐܸܤܬܼܵܐ ܕܕܼܘܼܒܵܪܹ̈ܐ ܫܒܼܝܼܚܹ̈ܐ: ܥܸܢܝܵܢܵܐ ܘܲܪܘܲܚܬܼܵܐ ܘܲܚܫܲܚܬܼܵܐ ܕܦܘܼܪܚܵܓܵܝܵܐ. ܐܵܦܸܢ ܗ̤ܘ ܐ̄ܢܵܫ ܗܘܑ̤ܵܐ ܫܠܸܐ: ܘܒܲܠܚܘܿܕܼ ܩܢܘܿܡܹܗ ܢܸܗܘܸܐ ܤܲܩܘܼܒܼܠܵܐ ܒܘܲܥܕܵܐ ܕܐܲܝܠܹܝܢ ܕܕܲܐܝܟܼ ܗܵܠܹܝܢ ܟܲܕܼ ܢܸܚܙܸܐ ܘܢܸܫܡܲܥ: ܤܵܦܹ̇ܩ ܗ̄ܘ̣ ܡܵܐ ܕܡܲܥܠܝܼܢ ܒܲܠܚܘܿܕܼ ܐܲܪ̈ܥܹܐ ܕܥܲܝܢܵܘ̈ܗܝ ܘܲܕܼܡܲܫܡܲܥܬܹܗ: ܠܫܘܼܗܵܝܵܐ ܕܬܲܪܥܝܼܬܹܗ ܡ̣ܢ ܐܲܠܵܗܵܝ̈ܬܼܵܐ ܘܲܕܼܠܘܼܚܝܵܐ ܤܲܓܝܼܐܵܐ. ܗܵܢܵܘ ܕܹܝܢ: ܗ̤ܘ ܚܸܙܘܵܐ ܒܲܠܚܘܿܕܼ ܕܐ̄ܢܵܫܵܐ ܘܫܸܡܥܵܐ ܤܦܝܼܩܵܐ ܕܡܲܡܠܲܠܗܘܿܢ: ܘܐܸܢܗ̤ܘ ܕܲܡܠܸܐ ܥܸܕܵܢܵܐ ܒܲܠܚܘܿܕܼ ܗܵܢܵܐ ܟ̱ܠܹܗ ܚܘܼܒܵܠܵܬ ܡܸܫܟܲܚ ܥܵܒܹ̇ܕܼ ܒܝܼܚܝܼܕܼܵܝܵܐ ܕܲܢܛܝܼܪ: ܡܵܢܵܐ ܢܹܐܡܲܪ ܥܲܠ ܤܘܼܩ̈ܒܵܠܹܐ ܕܐܲܡܝܼܢܘܼܬܼܵܐ: ܐܵܘ ܥܲܠ ܫܘܼܘܚܵܪܵܐ ܝܲܬܝܼܪܵܐ܀ ܬܸܢܵܢܵܐ ܕܡ̣ܢ ܟܲܪܤܵܐ ܤܵܠܹ̇ܩ ܠܝܼܕܲܥܬܼܵܐ ܕܐܲܠܵܗܵܝܵܬܼܵܐ: ܐܲܝܟ ܥܸܛܪܹ̈ܐ ܕܡ̣ܢ ܪܲܛܝܼܒܼܘܼܬܼܵܐ ܕܐܲܪܥܵܐ ܤܵܠܩ̇ܝܼܢ ܠܐܲܦܲܝ̈ ܫܸܡܫܵܐ. ܪܵܡܘܼܬܼܵܐ: ܠܵܐ ܬܸܤܬܲܟܲܠ ܕܲܒܼܚܸܫܘܿܟܼܵܐ ܪܵܕܼܝܵܐ: ܘܤܘܼܟܵܠܵܐ ܘܚܸܟܼܡܬܼܵܐ ܠܵܐ ܬܸܕܲܥ. ܠܥܸܠ ܡ̣ܢ ܟܠ ܡܸܫܬܲܩܠܵܐ ܒܚܘܼ̈ܫܵܒܹܝܗ̇: ܘܡ̣ܢ ܟܠ ܗ̤ܝ ܡܸܤܟܹܢܝܵܐ ܘܲܡܫܲܦܠܵܐ. ܘܐܘܼܪ̈ܚܵܬܹܗ ܕܐܲܠܵܗܵܐ: ܠܵܐ ܬܸܫܟܲܚ ܠܡܸܕܲܥ. ܘܡܵܪܝܵܐ: ܡܟܲܤܸܐ ܡܸܢܵܗ̇ ܨܸܒܼܝܵܢܹܗ. ܡܸܛܠ ܕܐܘܼܪܚܵܐ ܕܡܲܟܼܝܼ̈ܟܹܐ: ܠܵܐ ܪܸܚܲܡܲܬ̤ ܠܡܹܐܙܲܠ ܒܵܗ̇.