Isaac of Nineveh: Discourse 72

ܕܲܒܼܟܼܠܹܗ ܓܹܝܪ ܟܝܵܢܵܐ ܡܲܠܵܠܵܐ ܥܵܒܼ̇ܪܵܐ ܡܸܨܛܲܠܝܵܢܘܼܬܼܵܐ ܕܠܵܐ ܦܘܼܪܵܫ: ܘܫܘܼܚ̈ܠܵܦܹܐ ܥܵܒܼ̇ܪܝܼܢ ܥܲܠ ܟܠܒܲܪܢܵܫ ܒܟܼܠܗܘܿܢ ܥܸܕܵܢܵܘ̈ܗܝ: ܥܲܡ ܗܵܝ̇ ܕܡ̣ܢ ܤܲܓܝܼ̈ܐܵܬܼܵܐ ܡܸܫܟܲܚ ܦܵܪܘܿܫܵܐ ܠܡܸܤܬܲܟܵܠܘܼ: ܐܸܠܵܐ ܢܸܤ̈ܝܵܢܹܐ ܕܗܘܹ̇ܝܢ ܠܘܵܬܹܗ ܒܟܼܠܝܘܿܡ: ܝܲܬܝܼܪܵܐܝܼܬܼ ܡܸܫܟܚܝܼܢ ܕܲܢܚܲܪܡܘܼܢܵܝܗܝ ܐܸܢ ܐܝܼܬܼܵܘܗܝ ܙܗܝܼܪܵܐ: ܘܲܢܛܝܼܪ ܒܕܼܝܼܠܹܗ. ܘܕܲܟܼܡܵܐ ܫܘܼܚ̈ܠܵܦܹܐ ܕܢܵܘܚܵܐ ܘܕܲܒܼܗܝܼܠܘܼܬܼܵܐ ܡܩܲܒܸܠ ܪܸܥܝܵܢܵܐ ܒܟܼܠܝܘܿܡ: pb. 495 ܘܕܲܐܝܟܲܢ ܡ̣ܢ ܡܫܲܝܢܘܼܬܹܗ ܗܵܦܹ̇ܟܼ ܡܸܢܫܹܠܝ ܠܲܕܼܠܝܼܚܘܼܬܼܵܐ: ܟܲܕܼ ܥܸܠܬܼܵܐ ܡ̣ܢ ܕܘܼܟ ܠܲܝܬܿ ܠܹܗ: ܘܗܵܘܹ̇ܐ ܒܩܹܘܲܢܕܹܝܢܘܿܣ ܪܲܒܵܐ ܕܠܵܐ ܡܸܬܼܡܲܠܲܠ. ܘܠܵܗ̇ ܠܗܵܕܹܐ ܢܲܗܝܼܪܵܐܝܼܬܼ ܡܲܟܼܬܿܒܼܵܐ ܠܛܘܼܒܼܵܢܵܐ ܡܵܩܵܪܝܼܣ: ܒܲܒܼܛܝܼܠܘܼܬܼܵܐ ܤܲܓܝܼܐܬܼܵܐ ܘܲܒܼܝܲܨܝܼܦܘܼܬܼܵܐ: ܠܥܘܼܗܕܵܢܵܐ ܘܲܠܝܘܼܠܦܵܢܵܐ ܕܐܲܚܹ̈ܐ. ܕܠܵܐ ܢܸܤܛܘܿܢ ܠܲܦܤܵܩ ܤܲܒܼܪܵܐ ܒܙܲܒܼ̈ܢܹܐ ܕܫܘܼܚ̈ܠܵܦܹܐ ܕܲܠܩܘܼ̈ܒܼܠܵܝܹܐ: ܐܲܝܠܹܝܢ ܕܼܒܼܛܲܟܼܤܵܐ ܕܕܲܟܼܝܘܼܬܼܵܐ ܩܵܝ̇ܡܝܼܢ: ܐܸܡܲܬܼܝ ܕܗܵܘܹ̇ܐ ܠܘܵܬܼܗܘܿܢ ܓܸܕܼܫܵܐ ܒܲܕܡܘܼܬܼ ܐܵܐܲܪ. ܐܸܢܗ̤ܘ ܕܠܵܘ ܡ̣ܢ ܡܲܗܡܝܵܢܘܼܬܼܵܐ ܘܫܲܪܝܘܼܬܼܵܐ: ܐܸܠܵܐ ܒܛܲܟܼܤܗܘܿܢ ܪܵܕܹܝܢ ܗܵܘܹ̇ܝܢ ܠܘܵܬܼܗܘܿܢ ܓܸܕܼܫܹ̈ܐ ܕܤܘܼܒܵܠܵܐ ܠܢܝܼܫܵܐ ܕܬܲܪܥܝܼܬܼܗܘܿܢ. ܘܟܲܕܼ ܘܐܵܦ ܛܘܼܒܼܵܢܵܐ ܐܹܘܲܓܼܪܝܼܣ ܡܲܤܗܸܕܼ ܥܲܠ ܗܵܕܹܐ: ܐܲܝܟܼ ܕܡ̣ܢ ܢܸܤܝܵܢܵܐ ܚܲܬܝܼܬܼܵܐ. ܤܵܐܹ̇ܡ ܠܵܗ̇ ܒܲܟܼܬܼܵܒܹܗ: ܐܲܝܟܼ ܕܲܠܫܘܼܪܵܪܵܐ ܝܲܬܝܼܪܵܐ. ܕܠܵܐ ܢܸܤܒܲܪ ܐ̄ܢܵܫ ܕܐܲܝܟܼ ܕܐܵܬܼ̇ܝܵܐ: ܘܠܵܘ ܒܒܼܘܼܩܝܵܐ ܫܲܪܝܼܪܵܐ ܤܵܡܵܗ̇ ܛܘܼܒܼܵܢܵܐ ܡܵܩܵܪܝܼܣ ܒܐܸܓܲܪܬܹܗ. ܕܡ̣ܢ ܟܠ ܦܪܘܿܣ. ܐܲܝܟܼ ܕܡ̣ܢ ܬܪܹܝܢ ܤܵܗ̈ܕܹܐ ܫܲܪܝܼܪܹ̈ܐ ܕܐܲܝܟܼ ܗܵܠܹܝܢ: ܢܸܗܘܸܐ ܪܸܥܝܵܢܵܐ ܡܩܲܒܸܠ ܕܠܵܐ ܦܘܼܠܵܓܼ: ܠܒܼܘܼܝܵܐܹܗ ܒܙܲܒܼܢܵܐ ܕܤܘܼܢܩܵܢܵܐ. ܡܵܢܵܐ ܗܵܟܿܝܠ؟ ܫܘܼܚ̈ܠܵܦܹܐ ܠܲܡ ܕܹܝܢ ܗܵܘܹ̇ܝܢ ܠܘܵܬܼ ܟܠܢܵܫ: ܒܲܕܼܡܘܼܬܼ ܐܵܐܲܪ. ܐܸܤܬܲܟܲܠ ܗܵܝ̇ ܕܲܠܘܵܬܼ ܟܠܢܵܫ. ܚܲܕܼ ܗ̄ܘ̣ ܓܹܝܪ ܟܝܵܢܵܐ. ܕܠܵܐ ܬܸܤܒܲܪ ܕܲܠܘܵܬܼ ܒܨܝܼܪܹ̈ܐ ܒܲܠܚܘܿܕܼ ܐܵܡܲ݁ܪ: ܓܡܝܼܪܹ̈ܐ ܕܹܝܢ ܡܚܲܪܪܝܼܢ ܡ̣ܢ ܫܘܼܚ̈ܠܵܦܹܐ: ܘܲܒܼܚܲܕܼ ܛܲܟܼܤܵܐ ܕܠܵܐ ܡܸܨܛܲܠܝܵܢܘܼܬܼܵܐ ܩܵܝ̇ܡܝܼܢ ܕܠܵܐ ܙܵܘܥܵܐ ܕܚܲܫܹ̈ܐ: ܐܲܝܟܼ ܕܐܵܡ̇ܪܝܼܢ ܡܨܲܠܝܵܢܹ̈ܐ. ܡܸܛܠ ܗܵܕܹܐ ܤܵܡܵܗ̇: ܗܵܝ̇ ܕܲܠܘܵܬܼ ܟܠܢܵܫ. ܕܐܲܝܟܼ ܐܲܝܟܲܢܵܐ: ܐܘܿ ܛܘܼܒܼܵܢܵܐ؟ ܒܲܕܼܓܼܘܿܢ: ܐܵܡܲ݁ܪ: ܐܝܼܬܼ: ܕܩܘܼܪܫܵܐ. ܘܒܼܵܬܲܪ ܩܲܠܝܼܠ: ܫܲܚܝܼܢܘܼܬܼܵܐ. pb. 496 ܘܲܟܼܒܲܪ: ܒܲܪܕܵܐ. ܘܒܼܵܬܲܪ ܩܲܠܝܼܠ: ܨܲܚܘܵܐ. ܘܲܠܘܵܬܼ ܕܘܼܪܵܫܲܢ: ܗܵܟܲܢܵܐ. ܩܪܵܒܼܵܐ: ܘܥܘܼܕܼܪܵܢܵܐ ܕܛܲܝܒܿܘܼܬܼܵܐ. ܘܒܲܙܒܲܢ ܗܵܘ̇ܝܵܐ ܢܲܦܫܵܐ ܒܟܼܝܼܡܘܿܢܵܐ: ܘܤܵܥܹ̇ܝܢ ܥܠܹܝܗ̇ ܓܲܠܠܹ̈ܐ ܕܲܩܫܹܝܢ. ܘܬܼܘܼܒܼ ܗܵܘܹ̇ܐ ܫܘܼܚܠܵܦܵܐ: ܘܡܸܤܬܲܥܪܵܐ ܡ̣ܢ ܛܲܝܒܿܘܼܬܼܵܐ. ܘܡܵܠ̇ܝܵܐ ܚܲܕܼܘܼܬܼܵܐ ܠܠܸܒܵܐ ܘܲܫܠܵܡܵܐ ܕܡ̣ܢ ܐܲܠܵܗܵܐ: ܘܚܘܼ̈ܫܵܒܹܐ ܢܲܟܼܦܹ̈ܐ ܕܲܡܫܲܝܢܝܼܢ. ܗܵܝ̇ ܕܲܩܪܝܼܚܵܐܝܼܬܼ ܡܲܕܼܢܲܚ ܗܵܪܟܵܐ ܚܘܼ̈ܫܵܒܹܐ ܢܲܟܼ̈ܦܹܐ: ܥܲܠ ܒܲܥܪܝܼܪܵܝܘܼܬܼܵܐ ܘܛܲܡܐܘܼܬܼܵܐ ܕܐܲܝܠܹܝܢ ܕܡ̣ܢ ܩܕܵܪܡܹܝܗ̇ ܪܵܡܙܵܐ. ܘܲܡܙܲܗܲܪ ܡܵܕܹܝܢ: ܟܲܕܼ ܐܵܡܲ݁ܪ: ܕܒܼܵܬܲܪ ܗܵܠܹܝܢ ܚܘܼ̈ܫܵܒܹܐ ܢܲܟܼ̈ܦܹܐ ܘܲܡܫܲܝ̈ܢܹܐ: ܠܪܸܥܝܵܢܵܐ ܢܸܬܼܟܿܒܼܘܼܢ ܓܸܕܼܫܹ̈ܐ: ܠܵܐ ܢܲܟܼܪܸܐ ܘܢܸܦܤܘܿܩ ܤܲܒܼܪܵܐ. ܘܲܒܼܥܸܕܵܢ ܢܵܘܚܵܐ ܕܡ̣ܢ ܛܲܝܒܿܘܼܬܼܵܐ: ܠܵܐ ܢܸܫܬܲܒܼܗܲܪ. ܐܸܠܵܐ ܒܥܸܕܵܢ ܚܲܕܼܘܼܬܼܵܐ: ܢܚܘܼܪ ܠܐܘܼܠܨܵܢܵܐ. ܗܵܝ̇ ܕܠܵܐ ܢܲܟܼܪܸܐ ܐܸܢܗ̤ܘ ܕܢܸܬܼܟܿܒܼܘܼܢ ܓܸܕܼܫܹ̈ܐ: ܠܵܘ ܕܠܵܐ ܢܩܘܼܡ ܠܘܼܩܒܲܠܗܘܿܢ: ܘܚܵܕܼܝܵܐܝܼܬܼ ܢܩܲܒܸܠ ܐܸܢܘܿܢ ܪܸܥܝܵܢܵܐ ܐܵܡܲ݁ܪ: ܐܲܝܟܼ ܡ̇ܢ ܕܲܟܼܝܵܢܵܝܬܼܵܐ ܗ̣̄ܝ ܡܸܟܹܝܠ ܗܵܕܹܐ ܘܕܼܝܼܠܲܢ ܐܸܢܘܿܢ. ܐܸܠܵܐ ܕܠܵܐ ܬܩܘܼܡ ܒܲܦܤܵܩ ܤܲܒܼܪܵܐ: ܐܲܝܟܼ ܐ̄ܢܵܫ ܕܲܡܤܲܟܸܐ ܗ̄ܘ̣ܵܐ ܠܡܸܕܸܡ ܕܲܡܥܲܠܲܝ ܡ̣ܢ ܬܲܟܼܬܘܼܫܵܐ ܘܲܢܝܵܚܵܐ ܓܡܝܼܪܵܐ ܕܠܵܐ ܫܘܼܚܠܵܦ: ܕܬܼܘܼܒܼ ܠܵܐ ܡܩܲܒܸܠ ܠܵܐ ܐܵܓܼܘܿܢܹ̈ܐ ܘܠܵܐ ܫܚܵܩܹ̈ܐ. ܘܠܵܐ ܗܵܘܹ̇ܐ ܒܹܗ ܙܵܘܥܵܐ ܕܲܚܕܼܵܐ ܡ̣ܢ ܤܲܩܘܼ̈ܒܼܠܵܝܵܬܼܵܐ: ܗܵܝ̇ ܕܠܵܐ ܫܸܦܪܲܬ̤ ܠܹܗ ܠܡܵܪܲܢ ܐܲܠܵܗܵܐ: ܕܢܸܬܸܠ ܠܹܗ ܠܲܟܼܝܵܢܲܢ ܗܵܕܹܐ ܒܥܵܠܡܵܐ ܗܵܢܵܐ: ܕܢܸܗܘܸܐ ܡܸܬܼܒܲܛܠܝܼܢܲܢ ܡ̣ܢ ܥܲܡܠܵܐ ܓܡܝܼܪܵܐܝܼܬܼ. ܘܲܒܼܗܵܢܵܐ ܪܸܥܝܵܢܵܐ ܬܸܬܼܪܫܸܠ ܒܲܦܤܵܩ ܤܲܒܼܪܵܐ: ܘܲܬܼܦܘܼܫ ܡ̣ܢ ܪܲܗܛܵܟ. ܐܸܠܵܐ ܠܲܡ ܕܲܥ: ܕܟܼܠܗܘܿܢ ܩܲܕܝܼ̈ܫܹܐ ܒܗܵܢܵܐ ܥܲܡܠܵܐ ܥܲܡܠܵܐ ܪܡܹܝܢ: ܟܡܵܐ ܕܐܝܼܬܲܝܢ ܒܥܵܠܡܵܐ ܗܵܢܵܐ: ܐܵܦܸܢ ܒܘܼܝܵܐܵܐ ܝܲܬܝܼܪܵܐ ܥܲܡ ܗܵܕܹܐ pb. 497 ܐܝܼܬܼ ܠܲܢ ܒܟܸܤܝܵܐ. ܒܗܵܝ̇ ܕܟܼܠܝܘܿܡ ܘܲܒܼܟܼܠܥܸܕܵܢ ܡܸܬܿܬܲܒܼܥܝܼܢܲܢ ܕܢܸܬܸܠ ܒܘܼܩܝܵܐ ܕܚܘܼܒܲܢ ܠܐܲܠܵܗܵܐ: ܒܬܲܟܼܬܘܼܫܵܐ ܕܠܘܼܩܒܲܠ ܢܸܤܝܼ̈ܘܿܢܹܐ. ܘܗܵܕܹܐ ܗ̣̄ܝ ܗܵܝ̇ ܕܠܵܐ ܢܲܟܼܪܸܐ: ܗܵܢܵܘ ܕܹܝܢ: ܕܠܵܐ ܢܸܬܼܩܲܛܲܥ ܒܐܵܓܼܘܿܢܲܢ: ܘܗܵܟܲܢܵܐ ܡܛܲܝܒܼܵܐ ܐܘܼܪܚܲܢ. ܗܵܘ̇ ܓܹܝܪ ܕܡ̣ܢ ܗܵܢܵܐ ܡܫܲܓܼܢܲܢ: ܡܢܵܬܼܵܐ ܗ̄ܘ̣ ܕܕܹܐܒܹ̈ܐ. ܠܡܸܬܿܕܲܡܵܪܘܼ ܒܗܵܢܵܐ ܩܲܕܝܼܫܵܐ: ܕܲܒܼܡܸܠܬܼܵܐ ܙܥܘܿܪܬܵܐ: ܐܲܝܟܲܢ ܫܲܪܪܹܗ ܠܦܵܤܘܿܩܵܐ ܗܵܢܵܐ ܤܒܼܝܼܣ ܒܤܘܼ̈ܟܵܠܹܐ: ܘܫܲܩܠܹܗ ܠܦܘܼܠܵܓܼܵܐ ܓܡܝܼܪܵܐܝܼܬܼ ܡ̣ܢ ܪܸܥܝܵܢܹܗ ܕܩܵܪܘܿܝܵܐ. ܗܵܘ̇ ܠܲܡ ܕܡ̣ܢ ܗܵܢܵܐ ܡܫܲܓܼܢܲܢ: ܡܢܵܬܼܵܐ ܗ̄ܘ̣ ܕܕܹܐܒܹ̈ܐ. ܟܹܐܡܲܬܼ ܕܲܕܼܠܵܐ ܐܘܼܪܚܵܐ ܡܸܬܼܪܲܥܸܐ ܠܡܸܪܕܵܐ: ܗܵܘ̇ ܡ̇ܢ ܕܗܵܢܵܐ ܡܤܵܡ ܒܪܸܥܝܵܢܵܐ ܩܢܸܐ: ܘܒܲܠܚܘܿܕܼܵܝܘܼܬܼ ܫܒܼܝܼܠܵܐ ܕܠܵܐ ܕܪܝܼܫ ܠܐܲܒܼ̈ܗܵܬܼܵܐ ܨܵܒܹ̇ܐ ܠܡܸܪܕܵܐ. ܕܡܸܛܠܗܵܕܹܐ ܩܲܢܝܼܛ: ܕܲܡܢܵܬܼܵܐ ܗܵܘܹ̇ܐ ܕܕܹܐܒܹ̈ܐ ܥܲܬܝܼ̈ܩܹܐ ܥܛܝܼ̈ܦܝ ܠܒܼܘܼ̈ܫܹܐ ܕܐܸܡܪܹ̈ܐ: ܠܡܸܓܼܢܲܒܼ ܢܲܦ̈ܫܵܬܼܵܐ ܤܲܟܼ̈ܠܵܬܼܵܐ ܒܐܸܤܟܹܡ ܫܪܵܪܵܐ ܠܒܼܝܼܫܘܼܬܼܗܘܿܢ. ܗܵܝ̇ ܕܲܒܼܥܸܕܵܢ ܚܲܕܼܘܼܬܼܵܐ ܢܚܘܼܪ ܠܐܘܼܠܨܵܢܵܐ: ܗܵܕܹܐ ܡܵܘܕܲܥ: ܕܐܸܡܲܬܼܝ ܕܡ̣ܢ ܡܲܥܒܿܕܼܵܢܘܼܬܼܵܐ ܕܛܲܝܒܿܘܼܬܼܵܐ ܡܸܢܫܹܠܝ ܢܵܦ̇ܠܝܼܡ ܒܢܲܦܫܵܟܼ ܙܵܘ̈ܥܹܐ ܪܵܘܪ̈ܒܹܐ: ܘܬܸܡܗܵܐ ܕܲܚܙܵܬܼܵܐ ܕܡܲܕܥܵܐ ܕܥܲܠ ܐܲܝܠܹܝܢ ܕܲܡܥܲܠܹܝܢ ܡ̣ܢ ܟܝܵܢܵܐ: ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ ܐܹܘܲܓܼܪܝܼܣ: ܕܐܸܡܲܬܼܝ ܕܡܲܠܲܐܟܹ̈ܐ ܩܲܕܝܼ̈ܫܹܐ ܩܵܪܒܿܝܼܢ ܨܹܐܕܲܝܢ: ܡܵܠܹ̇ܝܢ ܠܲܢ ܚܙܵܬܼܵܐ ܪܘܼܚܵܢܵܝܬܼܵܐ. ܘܟܼܠܗܘܿܢ ܗܵܢܘܿܢ ܕܕܲܠܩܘܼܒܼܠܵܐ ܡܫܲܢܹܝܢ: ܘܗܵܘܹ̇ܐ ܫܲܝܢܵܐ ܘܒܼܘܼܠܗܵܝܵܐ ܕܠܵܐ ܡܸܬܼܡܲܠܲܠ. ܒܙܲܒܼܢܵܐ ܕܗܵܘܹ̇ܐ ܐܲܢ̄ܬܿ ܠܲܡ ܒܕܲܐܝܟܼ ܗܵܠܹܝܢ: ܕܐܲܓܿܢܲܬ̤ ܛܲܝܒܿܘܼܬܼܵܐ: ܘܩܲܪܝܼܒܼܝܼܢ ܘܲܚܕܼܝܼܪܝܼܢ ܡܲܠܲܐܟܹ̈ܐ ܩܲܕܝܼ̈ܫܹܐ: ܘܡܸܛܠܗܵܕܹܐ ܐܸܬܿܕܚܸܩܘ ܠܗܘܿܢ ܡ̣ܢ ܘܲܥܕܵܟܼܸ ܟܠܗܘܿܢ ܕܲܡܢܲܤܹܝܢ ܠܵܟܼ: ܠܵܐ ܬܸܬܿܪܝܼܡ pb. 498 ܘܬܸܤܒܲܪ ܒܢܲܦܫܵܟܼ: ܐܲܝܟܼ ܗܵܘ̇ ܕܡܲܛ̣ܝܼܬܿ ܠܵܟܼ ܡܸܟܹܝܠ ܠܲܠܡܹܐܢܵܐ ܠܵܐ ܡܸܬܿܬܿܙܝܼܥܵܢܵܐ ܘܠܵܐܐܲܪ ܠܵܐ ܡܸܫܬܲܚܠܦܵܢܵܐ: ܘܲܓܼܡܝܼܪܵܐܝܼܬܼ ܐܸܬܼܥܲܠ̣ܝܼܬܿ ܠܵܟܼ ܡ̣ܢ ܗܵܢܵܐ ܥܘܼܒܵܐ ܘܤܲܩܘܼܒܼܠܵܝܘܼܬܼܵܐ ܕܡܲܫܒܹ̈ܐ ܕܒܼܵܗ̇: ܘܠܲܝܬܿ ܬܘܼܒܼ ܒܥܸܠܕܒܼܵܒܼܵܐ ܐܵܦܠܵܐ ܦܸܓܼܥܹ̈ܐ ܒܝܼ̈ܫܹܐ. ܕܤܲܓܝܼ̈ܐܹܐ ܗܘ̤ܵܘ ܕܗܵܠܹܝܢ ܐܸܬܼܪܲܥܝܼܘ: ܘܲܢܦܲܠܘ ܒܩܹܘܲܢܕܹܝܢܘܿܣ: ܐܲܝܟܼ ܕܐܸܡ݂ܲܪ ܐܹܘܲܓܼܪܝܼܣ: ܐܵܘ ܟܹܝܬܼ ܬܘܼܒܼ ܐܲܝܟܼ ܗܵܘ̇ ܕܡ̣ܢ ܤܲܓܝܼ̈ܐܹܐ ܪܲܒܿ ܐܲܢ̄ܬܿ. ܘܙܵܕܼܩܵܐܝܼܬܼ ܟܹܐܡܲܬܼ ܐܝܼܬܲܝܟ ܒܗܵܠܹܝܢ: ܘܲܐ̄ܚܪ̈ܵܢܹܐ ܠܲܡ ܡܸܛܠ ܒܨܝܼܪܘܼܬܼܵܐ ܕܕܼܘܼܒܵܪ̈ܲܝܗܘܿܢ: ܐܵܘ ܒܲܕܼܠܵܐ ܠܲܡ ܤܵܦ̇ܩܵܐ ܝܑܼܕܲܥܬܼܗܘܿܢ ܓܠܝܼܙܝܼܢ ܡ̣ܢ ܕܐܲܝܟܼ ܗܵܠܹܝܢ. ܐܸܢܵܐ ܠܲܡ ܒܘܵܠܝܼܬܼܵܐ: ܘܡܸܟܹܝܠ ܡܲܛ̇ܝܼܬܼ ܠܢܲܟܼܦܘܼܬܼܵܐ ܓܡܝܼܪܬܵܐ: ܘܲܠܕܲܪܲܓܼܵܐ ܕܪܘܼܚܵܢܘܼܬܼܵܐ: ܘܲܠܚܘܼܕܵܬܼܵܐ ܕܠܵܐ ܫܘܼܚܠܵܦ. ܐܸܠܵܐ ܐܲܝܵܬܼܵܐ ܥܲܠ ܒܵܠܵܟܼ: ܠܚܘܼ̈ܫܵܒܹܐ ܛܲܡ̈ܐܹܐ ܘܲܠܨܲܠܡܹ̈ܐ ܡܫܲܟܿܪܹ̈ܐ ܕܐܸܬܼܩܒܲܥܘ ܒܪܸܢܝܵܢܵܟܼ ܒܲܙܒܲܢ ܟܝܼܡܘܿܢܵܐ: ܘܠܲܫܓܼܘܼ̈ܫܝܹܐ ܘܠܵܐ ܡܛܲܟܿܤܘܼܬܼܵܐ ܕܚܘܼ̈ܫܵܒܹܐ ܕܲܤܥ̣ܵܘ ܥܠܲܝܟܼ ܡ̣ܢ ܩܕܼܵܡ ܩܲܠܝܼܠ: ܒܥܲܡܛܵܢܵܐ ܗܵܘ̇ ܚܲܫܝܼܟܼܵܐ. ܘܕܲܐܝܟܲܢ ܕܠܝܼܠܵܐܝܼܬܼ ܐܸܬܼܪܟܸܢܬܿ ܠܘܵܬܼ ܚܲܫܹ̈ܐ ܘܐܸܬܼܥܢܝܼܬܿ ܥܲܡܗܘܿܢ ܒܲܙܒܲܢ ܕܠܘܼܚܝܵܐ ܕܪܸܥܝܵܢܵܐ: ܘܠܵܐ ܒܗܸܬܬܿ ܡ̣ܢ ܚܵܘܪܵܐ ܐܲܠܵܗܵܝܵܐ: ܘܡ̣ܢ ܡܵܘܗ̈ܒܼܵܬܼܵܐ ܘܫܘܼ̈ܟܵܢܹܐ ܕܩܲܒܸܠܬܿ. ܘܕܲܥ ܕܗܵܠܹܝܢ ܟܠܗܹܝܢ: ܕܬܸܬܼܡܲܟܲܟܼ ܠܲܝܬܿܝܲܬ̤ ܥܠܲܝܟ ܒܛܝܼܠܘܼܬܹܗ ܕܐܲܠܵܗܵܐ: ܗܵܝ̇ ܕܲܡܦܲܪܢܤܵܐ ܠܟܼܠܚܲܕܼ ܚܲܕܼ ܡܸܢܲܢ ܐܲܝܟܼ ܕܥܵܕܼܪܵܐ ܠܹܗ. ܘܐܸܢ ܡܸܬܿܬܿܪܝܼܡ ܐܲܢ̄ܬܿ ܒܡܵܘܗ̈ܒܼܵܬܼܵܗ̇: ܫܵܒܼ̇ܩܵܐ ܠܵܟܼ: ܘܲܓܼܡܝܼܪܵܐܝܼܬܼ ܢܵܦܹ̇ܠ ܐܲܢ̄ܬܿ ܒܤܘܼܥܪ̈ܵܢܹܐ: ܒܗܵܠܹܝܢ ܕܲܒܼܗܹܝܢ ܒܚܘܼ̈ܫܵܒܹܐ ܡܸܬܼܢܲܤܸܐ ܐܲܢ̄ܬܿ. ܡܵܕܹܝܢ: ܕܲܥ: ܕܗܵܕܹܐ ܬܘܼܒܼ ܕܩܝܼܡ ܐܲܢ̄ܬܿ: ܠܵܐ ܕܝܼܠܵܟܼ ܐܝܼܬܹܝܗ̇: ܘܠܵܐ ܕܲܡܝܲܬܿܪܘܼܬܼܵܟܼ. ܐܸܠܵܐ ܛܲܝܒܿܘܼܬܼܵܐ ܗ̣̄ܝ ܕܲܛܥܝܼܢܵܐ ܠܵܟܼ ܥܲܠ pb. 499 ܦܲܤܹ̈ܐ ܕܐܝܼ̈ܕܹܝܗ̇: ܕܠܵܐ ܬܸܬܿܙܝܼܥ. ܗܵܠܹܝܢ ܠܲܡ ܐܲܝܵܬܐ ܥܲܠ ܒܵܠܵܟܼ ܒܲܙܒܲܢ ܚܲܕܼܘܼܬܼܵܐ: ܟܲܕܼ ܡܸܬܿܬܿܪܝܼܡ ܚܘܼܫܵܒܼܵܟܼ: ܐܵܡܲ݁ܪ ܐܲܒܼܘܼܢ ܩܲܕܝܼܫܵܐ: ܘܲܒܼܟܼܝܼ ܘܕܲܡܲܥ. ܘܐܸܬܼܓܲܪܓܲܚ ܥܲܠ ܥܘܼ̈ܗܕܵܢܹܐ ܕܫܵܪ̈ܥܵܬܼܵܟܼ ܕܒܲܙܒܲܢ ܡܸܫܬܲܒܼܩܵܢܘܼܬܼܵܟܼ: ܕܲܟܼܒܲܪ ܡܸܫܬܵܘܙܲܒܼ ܐܲܢ̄ܬܿ ܒܗܵܕܹܐ ܕܬܸܩܢܸܐ ܡܸܢܗܹܝܢ ܡܲܟܿܝܼܟܼܘܼܬܼܵܐ. ܒܪܲܡ ܕܹܝܢ: ܠܵܐ ܢܸܦܤܘܿܩ ܤܲܒܼܪܵܐ ܕܢܲܦܫܵܟܼ: ܐܸܠܵܐ ܒܚܘܼ̈ܫܵܒܹܐ ܕܡܲܟܿܝܼܟܼܘܼܬܼܵܐ ܚܲܤܵܐ ܚܛܵܗܲܝ̈ܟ. ܡܲܟܿܝܼܟܼܘܼܬܼܵܐ: ܘܐܵܦ ܒܸܠܥܵܕܼ ܡ̣ܢ ܥܲܡ̈ܠܹܐ: ܚܛܵܗܹ̈ܐ ܤܲܓܝܼ̈ܐܹܐ ܡܚܲܤܝܵܐ. ܥܲܡܠܹ̈ܐ ܕܹܝܢ ܕܠܵܐ ܡܲܟܿܝܼܟܼܘܼܬܼܵܐ: ܕܲܠܩܘܼܒܼܠܵܐ: ܐܲܝܟܼ ܕܐܵܦ ܕܠܵܐ ܝܘܼܬܼܪܵܢ ܐܸܢܘܿܢ: ܐܸܠܵܐ ܘܲܠܒܼܝܼ̈ܫܵܬܼܵܐ ܤܲܓܝܼ̈ܐܵܬܼܵܐ ܡܥܲܬܕܹܝܢ ܠܲܢ. ܡܵܕܹܝܢ ܚܲܤܵܐ ܚܛܵܗܲܝ̈ܟ ܒܡܲܟܿܝܼܟܼܘܼܬܼܵܐ: ܐܲܝܟܼ ܕܐܸܡ̇ܪܹܬܼ. ܐܲܝܟܼ ܡܸܠܚܵܐ ܠܲܡ ܠܟܼܠ ܡܹܐܟܼ̈ܠܵܢ: ܗܵܟܲܢܵܐ ܡܲܟܿܝܼܟܼܘܼܬܼܵܐ ܠܟܼܠ ܡܝܲܬܿܪ̈ܵܢ. ܥܘܼܫܢܵܐ ܕܲܚܛܵܗܹ̈ܐ ܤܲܓܝܼ̈ܐܹܐ: ܡܸܫܟܿܚܵܐ ܬܵܒܼܒܵܐ ܗܵܕܹܐ. ܥܲܠ ܗܵܕܹܐ ܐܵܠ̇ܨܵܐ ܡܵܕܹܝܢ: ܕܪܸܥܝܵܢܵܐ ܢܸܚܲܫ ܐܲܡܝܼܢܵܐܝܼܬܼ: ܒܡܘܼܟܵܟܼܵܐ ܘܲܒܼܚܲܫܵܐ ܕܦܘܼܪܫܵܢܵܐ. ܘܗ̤ܝ ܗܵܕܹܐ ܐܸܢ ܢܸܩܘܸܐ: ܥܵܒܼ̇ܕܵܐ ܠܲܢ ܒܪܵܐ ܕܐܲܠܵܗܵܐ. ܘܲܕܼܸܠܵܐ ܦܘܼܠܚܵܢܵܐ: ܡܝܲܬܪܹ̈ܐ ܡܩܝܼܡܵܐ ܠܲܢ ܩܕܼܵܡ ܐܲܠܵܗܵܐ. ܐܲܝܟܼ ܕܐܵܦ ܒܸܠܥܵܕܹܝܗ̇: ܤܪܝܼܩ ܗ̄ܘ̣ ܟܠ ܦܘܼܠܚܵܢ ܘܟܼܠ ܡܝܲܬܪܘܼ ܘܥܲܡ̈ܠܝܼܢ. ܡܵܕܹܝܢ: ܫܘܼܠܵܦܵܐ ܗ̄ܘ̣ ܕܪܸܥܝܵܢܵܐ ܒܵܥܹ̇ܐ ܐܲܠܵܗܵܐ. ܒܪܸܥܝܵܢܵܐ ܗ̄ܘ̣ ܡܸܬܼܝܲܬܿܪܝܼܢܲܢ: ܘܲܒܪܸܥܝܵܢܵܐ ܗ̄ܘ̣ ܡܸܬܿܬܿܫܝܼܛܝܼܢܲܢ. ܒܲܠܚܘܿܕܼܵܝܘܼܬܼܵܗ̇ ܗܵܟܹܝܠ ܤܵܦ̇ܩܵܐ ܗܵܕܹܐ ܕܠܵܐ ܬܲܥܕܝܼܪܵܐ: ܕܲܬܼܩܘܼܡ ܩܕܼܵܡ ܐܲܠܵܗܵܐ ܘܲܬܼܡܲܠܸܠ ܚܠܵܦܲܝܢ. ܘܐܵܘܕܵܐ ܠܐܲܠܵܗܵܐ ܕܠܵܐ ܫܲܠܘܵܐ: ܕܟܲܕܼ ܐܲܝܢܵܐ ܟܝܵܢܵܐ ܬܵܚܘܿܒܼܵܐ ܘܲܕܼܠܝܼܠ ܠܡܸܨܛܲܠܝܵܢܘܼܬܼܵܐ ܩܢܸܐ ܐܲܢ̄ܬܿ: ܒܥܘܼܕܼܪܵܢܵܐ ܕܛܲܝܒܿܘܼܬܼܵܐ ܠܐܲܝܟܵܐ ܡܸܬܼܥܲܠܸܐ ܐܲܢ̄ܬܿ ܒܲܙܒܲܢ ܙܒܲܢ: ܘܠܲܐܝܠܹܝܢ ܡܵܘܗ̈ܒܼܵܬܼܵܐ: ܘܲܒܼܡܵܢܵܐ pb. 500 ܗܵܘܹ̇ܐ ܐܲܢ̄ܬܿ ܠܥܸܠ ܡ̣ܢ ܟܝܵܢܵܟܼ؟ ܘܐܸܡܬܼܝ ܕܡܸܫܬܿܒܸܩ ܐܲܢ̄ܬܿ: ܥܕܲܡܵܐ ܠܐܲܝܟܵܐ ܡܸܬܿܬܲܚܬܸܐ ܐܲܢ̄ܬܿ: ܘܩܵܢܹ̇ܐ ܐܲܢ̄ܬܿ ܗܵܘܢܵܐ ܕܲܒܼܥܝܼܪܵܐ؟ ܘܐܸܬܿܕܲܟܼܸܪ ܠܕܼܵܘܝܘܼܬܼ ܟܝܵܢܵܟܼ: ܘܠܲܕܼܠܝܼܠܘܼܬܼܫ ܫܘܼ̈ܚܠܵܦܹܐ ܕܢܲܩܝܼܦܵܐ ܠܵܟܼ: ܕܐܵܦ ܚܲܕܼ ܡ̣ܢ ܤܵܒܹ̈ܐ ܩܲܕܝܼ̈ܫܹܐ ܐܵܡܲ݁ܪ: ܡܵܐ ܠܲܡ ܕܐܵܬܹ̇ܐ ܠܵܟܼ ܚܘܼܫܵܒܼܵܐ ܕܪܵܡܘܼܬܼܵܐ: ܕܢܹܐܡܲܪ ܒܥܘܼܗܕܵܢܵܐ ܕܲܡܝܲܬܪ̈ܵܬܼܵܟܼ: ܐܸܡܲܪ: ܤܵܒܼܵܐ: ܚܙܝܼ ܙܵܢܝܘܼܬܼܵܟܼ! ܠܗܵܕܹܐ ܙܵܢܝܘܼܬܼܵܐ ܕܲܒܼܙܲܒܼܢܵܐ ܕܡܸܫܬܲܒܼܩܵܢܘܼܬܼܵܐ: ܐܵܡܲ݁ܪ: ܕܲܒܼܚܘܼܫܵܒܼܵܐ ܡܸܬܼܢܲܤܸܐ. ܗܵܝ̇ ܕܲܠܘܵܬܼ ܟܠܢܵܫ ܡܦܲܪܢܤܵܐ ܛܲܝܒܿܘܼܬܼܵܐ: ܐܸܢ ܩܪܵܒܼܵܐ ܘܐܸܢ ܥܘܼܕܼܪܵܢܵܐ: ܠܦܘܼܬܼ ܕܥܵܕܼܪܵܐ ܠܲܢ. ܚ̣ܙܲܝܬܿ ܠܗܵܢܵܐ ܤܵܒܼܵܐ ܬܡܝܼܗܵܐ: ܐܲܝܟܲܢ ܦܫܝܼܩܵܐܝܼܬܼ ܐܲܡ̣ܪܵܗ̇ ܠܲܨܒܼܘܼܬܼܵܐ؟ ܡܵܐ ܠܲܡ ܕܐܵܬܹ̇ܐ ܠܵܟܼ ܚܘܼܫܵܒܼܵܐ ܕܪܵܡܘܼܬܼܵܐ: ܡܸܛܠ ܡܥܲܠܝܘܼܬܼܵܐ ܕܕܼܘܼܒܵܪ̈ܲܝܟ: ܐܸܡܲܪ: ܤܵܒܼܵܐ: ܚܙܝܼ ܙܵܢܝܘܼܬܼܵܟܼ! ܓܲܠܝܵܐ ܗ̣̄ܝ ܓܹܝܪ: ܕܗܵܕܹܐ ܠܘܵܬܼ ܐ̄ܢܵܫ ܪܲܒܵܐ ܐܵܡܲ݁ܪ ܗ̄ܘ̣ܵܐ ܠܵܗ̇ ܤܵܒܼܵܐ ܗܵܢܵܐ: ܒܲܕܼܸܠܵܐ ܡܲܨܝܵܐ ܕܢܸܬܼܠܲܙܙܘܼܢ ܡ̣ܢ ܚܘܼ̈ܫܵܒܹܐ ܕܪܵܡܘܼܬܼܵܐ: ܐܸܠܵܐ ܐܲܝܠܹܝܢ ܕܲܒܼܛܲܟܼܤܵܐ ܡܥܲܠܝܵܐ ܘܲܒܼܕܼܘܼܒܵܪܵܐ ܕܫܵܘܹ̇ܐ ܠܩܘܼܠܵܤܵܐ ܩܵܝ̇ܡܝܼܢ. ܒܗܵܝ̇ ܕܗܵܢܵܐ ܚܲܫܵܐ: ܡ̣ܢ ܒܵܬܼܪ ܡܝܲܬܪܘܼܬܼܵܐ ܕܐܸܬܼܦܲܠܚܲܬ̤: ܤܵܥܹ̇ܐ ܥܲܠ ܢܲܦܫܵܐ: ܕܲܢܤܲܪܩܝܼܗ̇ ܡ̣ܢ ܦܘܼܠܚܵܢܵܗ̇. ܐܵܦ ܡ̣ܢ ܚܕܼܵܐ ܡ̣ܢ ܐܸܓܿܪ̈ܵܬܹܗ ܕܝܼܠܹܗ ܕܛܘܼܒܼܵܢܵܐ ܡܵܩܵܪܝܼܣ: ܡܸܫܟܲܚ ܐܲܢ̄ܬܿ ܕܬܹܐܠܲܦ ܐܸܢ ܬܸܨܒܸܐ. ܕܟܲܕܼ ܒܐܲܝܠܹܝܢ ܕܲܪ̈ܓܹܐ ܩܵܝ̇ܡܝܼܢ: ܐܲܝܠܹܝܢ ܡܸܫܬܲܒܼܩܝܼܢ ܥܠܲܝܗܘܿܢ ܠܡܸܬܼܢܲܤܵܝܘܼ ܒܗܹܝܢ ܩܲܕܝܼ̈ܫܹܐ. ܐܝܼܬܹܝܗ̇ ܕܹܝܢ ܐܸܓܲܪܬܵܐ ܗܵܝ̇: ܐܲܒܼܵܐ ܡܵܩܵܪܝܼܣ ܟܬܲܒܼ ܠܟܼܠܗܘܿܢ ܒܢܵܘ̈ܗܝ ܚܲܒܿܝܼ̈ܒܹܐ: ܟܲܕܼ ܡܵܘܕܲܥ ܬܲܡܵܢ ܢܲܗܝܼܪܵܐܝܼܬܼ: ܕܐܲܝܟܲܢ ܡܸܬܼܦܲܪܢܤܝܼܢ ܡ̣ܢ ܐܲܠܵܗܵܐ: ܩܪ̈ܵܒܹܐ ܘܥܘܼܕܼܪ̈ܵܢܹܐ ܕܛܲܝܒܿܘܼܬܼܵܐ. ܕܲܒܼܗܘܿܢ ܒܗܵܠܹܝܢ ܫܸܦܪܲܬ̤ ܠܚܸܟܼܡܬܹܗ ܕܐܲܠܵܗܵܐ ܕܢܸܬܿܕܲܪܫܘܼܢ: ܟܡܵܐ ܕܲܒܼܚܲܝܹ̈ܐ ܗܵܠܹܝܢ pb. 501 ܪܡܹܝܢ ܚܠܵܦ ܡܝܲܬܿܪܘܼܬܼܵܐ: ܒܐܵܓܼܘܿܢܵܐ ܕܠܘܼܩܒܲܠ ܚܛܝܼܬܼܵܐ. ܐܲܝܟܼ ܕܲܒܼܟܼܠܙܒܲܢ: ܠܘܵܬܹܗ ܢܸܗܘܸܐ ܬܠܸܐ ܚܝܵܪܗܘܿܢ. ܒܚܵܘܪܵܐ ܐܲܡܝܼܢܵܐ ܕܲܠܘܵܬܹܗ: ܢܸܬܼܪܲܒܸܐ ܒܗܘܿܢ ܚܘܼܒܹܗ ܩܲܕܝܼܫܵܐ. ܕܟܲܕܼ ܐܲܡܝܼܢܵܐܝܼܬܼ ܡ̣ܢ ܚܹܐܦܵܐ ܕܚܲܫܹ̈ܐ ܘܩܸܢܛܵܐ ܕܡܸܨܛܲܠܝܵܢܘܼܬܼܵܐ ܠܘܵܬܹܗ ܢܸܪܗܛܘܼܢ: ܢܸܫܬܲܪܪܘܼܢ ܒܗܲܝܡܵܢܘܼܬܼܵܐ ܘܤܲܒܼܪܵܐ ܘܚܘܼܒܵܐ. ܗܵܠܹܝܢ ܗܵܠܹܝܢ ܗܵܟܹܝܠ: ܠܵܘ ܠܐܲܝܠܹܝܢ ܕܐܲܡܝܼܢܝܼܢ ܨܹܝܕܼ ܒܢܲܝ̈ܢܵܫܵܐ ܘܦܵܗܹ̇ܝܢ ܒܟܼܠܕܘܼܟ: ܘܒܲܐܡܝܼܢܘܼ ܒܤܘܼܥܪ̈ܵܢܹܐ ܘܲܒܼܚܲܫܹ̈ܐ ܛܲܡ̈ܐܹܐ ܫܲܪܝܵܐܝܼܬܼ ܐܲܡܝܼܪ̈ܲܢ. ܘܐܵܦܠܵܐ ܠܐܲܝܠܹܝܢ ܕܙܲܕܝܼܩܘܼܬܼܵܐ ܒܲܥ̇ܒܼܵܕܹ̈ܐ ܕܲܠܒܲܪ ܡ̣ܢ ܫܸܠܝܵܐ ܦܵܠ̇ܚܝܼܢ: ܘܲܒܼܪܸ̈ܓܼܫܹܐ ܡܸܬܿܬܿܨܝܼܕܝܼܢ ܒܟܼܠܫܵܥ: ܘܲܒܼܟܼܠܙܒܲܢ ܒܩܹܘܲܢܕܹܝܢܘܿܣ ܕܡܲܦܘܼܠܬܼܵܐ ܡܩܝܼܡܵܐ ܠܗܘܿܢ ܐܵܢܲܢܩܹܐ ܕܐܲܝܠܹܝܢ ܕܲܒܼܗܘܿܢ ܦܵܓܼ̈ܥܵܢ ܠܒܲܪ ܡ̣ܢ ܨܒܼܝܵܢܗܘܿܢ: ܒܓܸܕܼܫܹ̈ܐ ܕܠܵܐ ܪܥܹܝܢ. ܗܵܝ̇ ܕܠܵܘ ܒܲܠܚܘܿܕܼ ܚܘܼܫܵܒܲܝ̈ܗܘܿܢ: ܐܸܠܵܐ ܐܵܦܠܵܐ ܠܪܸ̈ܓܼܫܲܝܗܘܿܢ ܡܨܹܝܢ ܠܡܸܛܲܪ ܓܡܝܼܪܵܐܝܼܬܼ. ܐܸܠܵܐ ܠܐܲܝܠܹܝܢ ܕܒܲܙܗܝܼܪܘܼܬܼܵܐ ܪܲܒܿܬܼܵܐ ܢܵܛܪܝܼܢ ܦܲܓܼܪ̈ܲܝܗܘܿܢ ܘܚܘܼܫܵܒܲܝ̈ܗܘܿܢ: ܘܡܲܪܚܩܝܼܢ ܠܲܓܼܡܵܐ ܡ̣ܢ ܫܓܼܘܼ̈ܫܝܹܐ ܘܥܸܢܝܵܢܹ̈ܐ ܕܲܒܼܢܲܝ̈ܢܵܫܵܐ: ܘܲܫܒܼܝܼܩܘܼܬܼܵܐ ܕܟܼܠܡܸܕܸܡ ܘܐܵܦ ܢܲܦܫܗܘܿܢ: ܐܸܤܬܲܦܸܩܘ ܠܡܸܛܲܪ ܗܵܘܢܗܘܿܢ ܒܲܨܠܘܿܬܼܵܐ: ܘܲܡܫܲܚܠܦܘܼܬܼ ܦܘܼܪ̈ܢܵܤܹܐ ܕܡ̣ܢ ܛܲܝܒܿܘܼܬܼܵܐ ܡܩܲܒܿܠܝܼܢ ܒܓܼܵܘ ܫܸܠܝܵܐ ܓܡܝܼܪܵܐ. ܘܲܬܼܚܹܝܬܼ ܕܪܵܥܵܐ ܕܝܼܕܲܥܬܹܗ ܕܡܵܪܝܵܐ ܡܸܬܼܪܲܒܹܝܢ: ܘܡܸܬܼܚܲܟܿܡܝܼܢ ܡ̣ܢ ܪܘܼܚܵܐ ܟܲܤܝܵܐܝܼܬܼ: ܒܫܸܠܝܵܐ ܕܡ̣ܢ ܤܘܼܥܪ̈ܵܢܹܐ ܘܲܚܙܵܬܼܵܐ ܕܨܸܒܼ̈ܘܵܬܼܵܐ: ܘܲܩܢܹܝܢ ܡܝܼܬܼܘܼܬܼ ܪܸܥܝܵܢܵܐ ܕܡ̣ܢ ܥܵܠܡܵܐ. ܚܲܫܹ̈ܐ: ܠܵܐ ܡܵܝ̇ܬܝܼܢ. ܥܸܢܝܵܢܵܐ ܕܹܝܢ: ܡܵܐܹ̇ܬܼ ܡܸܢܗܘܿܢ: ܒܪܲܚܝܼܩܘܼܬܼܵܐ ܕܡ̣ܢ ܨܸܒܼ̈ܘܵܬܼܵܐ ܘܥܘܼܕܼܪܵܢܵܐ ܕܛܲܝܒܿܘܼܬܼܵܐ.