Discourse 82

ܨܵܒܹ̇ܐ ܐ̄ܢܵܐ ܕܐܸܦܬܲܚ ܦܘܼܡܝ ܐܲܚܲܝ̈: ܠܲܡܡܲܠܵܠܘܼ ܥܲܠ ܫܲܪܒܵܗ̇ ܡܥܲܠܝܵܐ ܕܡܲܟܿܝܼܟܼܘܼܬܼܵܐ: ܩܸܢܛܵܐ ܡܸܬܼܡܠܸܐ ܐ̄ܢܵܐ. ܐܲܝܟܼ ܐ̄ܢܵܫ ܕܲܡܦܵܣ: ܕܥܲܠ ܐܲܠܵܗܵܐ ܥܬܼܝܼܕܼ ܕܢܸܫܬܲܥܸܐ ܒܬܲܫܥܝܼܬܼܵܐ ܕܡܲܡܠܠܹܗ. ܐܸܤܛܠܵܐ ܗ̣̄ܝ ܓܹܝܪ ܕܐܲܠܵܗܘܼܬܼܵܐ: ܡܸܛܠ ܕܡܸܠܬܼܵܐ ܕܐܸܬܼܒܲܪܢܲܫ: ܠܲܒܼܫܵܗ̇ ܘܡܲܠܸܠ̣ ܒܵܗ̇ ܥܲܡܲܢ ܒܝܲܕܼ ܦܲܓܼܪܲܢ. ܘܟܼܠ ܕܲܠܗܵܕܹܐ ܐܸܬܼܥܲܛܲܦ ܫܲܪܝܼܪܵܐܝܼܬܼ: ܠܗܵܘ̇ ܕܲܢܚܸܬܼ ܡ̣ܢ ܪܵܘܡܹܗ: ܘܟܲܤܝܼ ܙܝܼܘܵܐ ܕܪܲܒܘܼܬܹܗ: ܘܚܲܦܝܼ ܬܸܫܒܿܘܿܚܬܹܗ ܒܡܘܼܟܵܟܼܵܐ ܡܸܬܿܕܲܡܸܐ: ܕܠܵܐ ܬܤܘܼܦ ܗ̄ܘ̣ܵܬܼ ܒܪܝܼܬܼܵܐ ܒܲܚܙܵܬܹܗ. ܒܕܼܵܐܦܠܵܐ ܡܲܨܝܵܐ ܗܘ̣ܵܬܼ ܒܪܝܼܬܼܵܐ ܕܬܸܚܙܹܝܘܗܝ ܕܠܵܐ ܡܢܵܬܐ ܕܡܸܢܵܗ̇: ܕܢܸܤܒܼܝܼܗ̇ ܘܒܼܵܗ̇ ܢܡܲܠܸܠ ܥܲܡܵܗ̇: ܘܟܸܢ ܡܲܨܝܵܐ ܗ̄ܘ̣ܵܬܼ ܕܬܸܫܡܲܥ ܡܸܠܲܬܼ ܦܘܼܡܹܗ ܐܲܦܝܼ̈ܢ ܒܐܲܦܝܼ̈ܢ. ܠܵܐ ܡܵܘܦܹܝܢ ܗ̄ܘ̣ܵܘ ܒܢܲܝ̈ ܝܑܼܤܪܵܝܹܠ ܠܲܡܨܵܬܼ ܩܵܠܹܗ: ܟܲܕܼ ܡ̣ܢ ܓܵܘ ܥܢܵܢܵܐ ܡܡܲܠܸܠ ܗ̄ܘ̣ܵܐ ܥܲܡܗܘܿܢ: ܓܲܠܝܵܐܝܼܬܼ ܡܸܫܟܿܚܵܐ ܗ̄ܘ̣ܵܬܼ ܒܪܝܼܬܼܵܐ ܕܲܬܼܩܒܸܠ ܠܲܚܙܵܬܹܗ. ܕܗܵܟܲܢ ܐܸܬܼܐܠܸܨܘ: ܥܕܲܡܵܐ ܕܢܹܐܡܪܘܼܢ ܠܹܗ ܠܡܘܼܫܹܐ: ܢܡܲܠܸܠ ܥܲܡܵܟܼ: ܘܐܲܢ̄ܬܿ ܐܲܫܡܲܥ ܠܲܢ ܦܸܬܼܓܼܵܡܵܘ̈ܗܝ. ܘܠܵܐ ܢܡܲܠܸܠ ܥܲܡܲܢ pb. 575 ܗ̤ܘ: ܕܠܵܐ ܢܡܘܼܬܼ. ܗܵܟܲܢܵܐ ܠܲܡ ܕܚܝܼܠ ܗ̄ܘ̣ܵܐ ܚܸܙܘܵܐ: ܕܐܵܦ ܗ̤ܘ ܡܸܨܥܵܝܵܐ ܐܸܡ݂ܲܪ ܗ̄ܘ̣ܵܐ: ܕܕܲܚܝܼܠ ܐ̄ܢܵܐ ܘܪܲܬܿܝܼܬ ܐ̄ܢܵܐ܀ ܐܸܬܼܓܠܝܼ ܓܹܝܪ ܥܲܠ ܛܘܼܪܵܐ ܕܤܝܼܢܲܝ ܗ̤ܘ ܙܝܿܘܵܐ ܕܬܸܫܒܿܘܿܚܬܹܗ: ܘܛܘܼܪܵܐ ܟ̱ܠܹܗ ܬܵܐܹ̇ܢ ܗ̄ܘ̣ܵܐ ܘܙܵܐܥ ܒܕܸܚܠܵܐ ܕܓܸܠܝܵܢܹܗ ܕܲܥܠܵܘܗܝ. ܐܲܝܟܲܢܵܐ ܕܐܵܦ ܚܲܝ̈ܘܵܬܼܵܐ ܕܩܵܪܒܵܢ ܗ̣̄ܘܲܝ̈ ܠܲܫܦܘܿܠܵܘ̈ܗܝ ܕܛܘܼܪܵܐ: ܡܵܝ̈ܬܵܢ ܗ̣̄ܘܲܝ̈. ܘܐܸܬܼܥܲܬܲܕܼܘ ܘܐܸܬܿܛܲܝܲܒܼܘ ܟܠܗܘܿܢ ܒܢܲܝ̈ ܝܑܼܤܪܵܝܹܠ: ܒܦܘܼܩܕܵܢܵܐ ܕܡܘܼܫܹܐ. ܕܲܢܕܲܟܸܐ ܟܠܢܵܫ ܢܲܦܫܹܗ ܬܠܵܬܼܵܐ ܝܵܘܡ̈ܝܼܢ: ܐܲܝܟܼ ܕܢܸܫܬܿܘܸܐ ܠܫܸܡܥܵܐ ܕܩܵܠ ܡܲܡܠܠܹܗ ܕܐܲܠܵܗܵܐ: ܘܲܠܚܙܘܵܐ ܕܓܸܠܝܵܢܵܘ̈ܗܝ. ܘܟܲܕܼ ܡܲܛܝܼ ܙܲܒܼܢܵܐ: ܠܵܐ ܐܸܬܼܡܨܝܼܘ ܠܲܡܩܲܒܵܠܘܼ ܚܙܵܬܼܵܐ ܕܢܘܼܗܪܹܗ: ܘܥܲܙܝܼܙܘܼܬܼܵܐ ܕܩܵܠܵܐ ܕܪܲܥܡܹܗ. ܐܸܠܵܐ ܗܵܫܵܐ ܕܛܲܝܒܼܘܼܬܹܗ ܐܸܫܲܕܼ ܥܲܠ ܥܵܠܡܵܐ ܒܡܹܐܬܼܝܼܬܹܗ: ܕܠܵܐ ܗ̄ܘ̣ܵܐ ܒܙܵܘܥܵܐ ܘܠܵܐ ܗ̄ܘ̣ܵܐ ܒܢܘܼܪܵܐ: ܘܠܵܐ ܒܩܵܠܵܐ ܕܚܝܼܠܵܐ ܘܥܲܙܝܼܙܵܐ: ܐܸܠܵܐ ܢܚܸܬܼ ܐܲܝܟܼ ܡܸܛܪܵܐ ܥܲܠ ܓܸܙܬܼܵܐ ܕܐܸܡܪܵܐ: ܘܐܲܝܟܼ ܪ̈ܤܝܼܤܹܐ ܢܝܼܚܹ̈ܐ ܕܢܵܚ̇ܬܝܼܢ ܪܲܟܿܝܼܟܼܵܐܝܼܬܼ ܥܲܠ ܐܲܪܥܵܐ. ܒܢܝܼܫܵܐ ܐ̄ܚܪܹܢܵܐ ܐܸܬܼܚܲܙܝܲܬ̤ ܠܹܗ ܕܲܢܡܲܠܸܠ ܥܲܡܲܢ: ܗܵܢܵܘ ܕܹܝܢ: ܕܟܲܕܼ ܢܸܚܡܘܿܠ ܪܲܒܿܘܼܬܹܗ ܒܬܲܚܦܝܼܬܼܵܐ ܕܒܸܤܪܵܐ: ܒܲܢ ܢܡܲܠܸܠ ܥܲܡܲܢ: ܒܐܸܤܛܠܵܐ ܗܵܝ̇ ܕܲܙܩܲܪ ܠܹܗ ܠܵܗ̇ ܪܸܡܙܵܐ ܡ̣ܢ ܥܘܼܒܵܗ̇ ܕܲܒܼܬܼܘܼܠܬܼܵܐ. ܕܟܲܕ ܢܸܚܙܹܝܘܗܝ ܠܗܵܘ̇ ܕܲܡܡܲܠܸܠ ܥܲܡܲܢ ܕܒܲܪ ܓܸܢܤܲܢ ܗ̄ܘ̣: ܠܵܐ ܢܸܬܼܪܗܸܒܼ ܡ̣ܢ ܚܙܵܬܹܗ. ܡܸܛܠܗܵܢܵܐ ܟܠ ܕܲܠܗܵܕܹܐ ܥܛܵܦܬܼܵܐ ܕܒܼܵܗ̇ ܐܸܬܼܚܙܝܼ ܥܵܒܼܘܿܕܲܢ: ܒܝܲܕܼ ܗܵܘ̇ ܦܲܓܼܪܵܐ ܡܠܸܐ ܡ̣ܢ ܩܘܼ̈ܕܹܫܐ ܢܸܠܒܲܫ: ܠܹܗ ܠܲܡܫܝܼܚܵܐ ܠܒܼܫܹܗ. ܡܸܛܠ ܕܲܠܗܵܘ̇ ܕܘܼܡܝܵܐ ܕܒܹܗ ܐܸܬܼܚܙܝܼ ܠܲܒܼܪܝܼܬܹܗ ܘܐܸܬܼܗܲܦܲܟ ܒܹܗ ܥܲܡܗܘܿܢ: ܐܸܬܼܪܲܓܼܪܲܓܼ ܕܢܸܠܒܲܫ ܥܲܠ ܒܲܪܢܵܫܹܗ pb. 576 ܓܵܘܵܝܵܐ: ܘܒܹܗ ܢܸܬܼܚܙܸܐ ܠܲܟܼ̈ܢܵܘܵܬܹܗ. ܘܲܚܠܵܦ ܠܒܼܘܼܫܵܐ ܕܐܝܼܩܵܪܵܐ ܘܫܘܼܒܼܚܵܐ ܕܲܠܒܲܪ: ܒܹܗ ܢܸܨܛܲܒܲܬܼ. ܘܡܸܛܠܗܵܢܵܐ ܟܠ ܕܲܠܗܵܕܹܐ ܕܡܘܼܬܼܵܐ ܚܵܙ̈ܝܵܢ ܒܹܗ ܒܸܪ̈ܝܵܬܼܵܐ ܕܲܠܒܼܝܼܫ: ܫܲܬܼܝܼ̈ܩܵܬܼܵܐ ܘܡܲܠܵܠܵܬܼ̈ܐ: ܐܲܝܟܼ ܕܲܠܡܵܪܵܐ ܤܵܓܼ̈ܕܵܢ ܠܹܗ: ܡܸܛܠ ܐܝܼܩܵܪܵܐ ܕܡܵܪܗܹܝܢ ܕܲܚܙܲܝܵܝ̈ܗܝ ܟܲܕܼ ܠܲܒܼܪܵܗ̇ ܗܘ̤ܵܐ ܘܐܸܬܼܗܲܦܲܟܼ ܒܵܗ̇. ܐܲܝܕܵܐ ܡ̣ܢ ܒܸܪ̈ܝܵܬܼܵܐ ܕܠܵܐ ܡܸܬܼܟܲܚܕܼܵܐ ܡ̣ܢ ܚܙܵܬܹܗ ܕܡܲܟܿܝܼܟܼܵܐ؟ ܒܪܲܡ ܕܹܝܢ ܥܕܲܡܵܐ ܕܐܸܬܓܠܝܼ ܫܘܼܒܼܚܵܗ̇ ܕܡܲܟܿܝܼܟܼܘܼܬܼܵܐ ܠܟܼܠ: ܒܲܤܝܵܐ ܗ̄ܘܼܵܬܼ ܥܠܲܝܗܘܿܢ: ܗܵܝ̇ ܚܙܵܬܼܵܐ ܡܲܠܝܲܬܼ ܩܘܼ̈ܕܼܫܹܐ. ܗܵܫܵܐ ܕܹܝܢ ܕܐܲܕܼܢܲܚ ܪܲܒܘܼܬܼܵܗ̇ ܠܥܹܝܢ ܥܵܠܡܹ̈ܐ: ܟܠܢܵܫ ܡܝܲܩܲܪ ܠܹܗ ܠܗܵܢܵܐ ܕܘܼܡܝܵܐ: ܟܠ ܟܲܪ ܕܡܸܬܼܚܙܸܐ. ܕܲܒܼܗܵܢܵܐ ܡܸܨܥܵܝܵܐ: ܒܪܝܼܬܼܵܐ ܫܘ̤ܵܬܼ ܕܲܬܼܩܲܒܸܠ ܚܙܵܬܹܗ ܕܒܼܵܪܘܿܝܵܗ̇. ܘܡܸܛܠܗܵܢܵܐ: ܐܵܦܠܵܐ ܥܲܠ ܒܥܸܠܕܒܼܵܒܼܵܘ̈ܗܝ ܕܲܫܪܵܪܵܐ ܒܲܤܝܵܐ: ܘܐܵܦܸܢ ܨܪܝܼܟܼܵܐ ܢܸܗܘܸܐ ܡ̣ܢ ܟ̱ܠܵܗ̇ ܒܪܝܼܬܼܵܐ ܡܲܢ ܕܲܩܢ̣ܵܗ̇: ܐܲܝܟܼ ܕܲܒܼܬܼܵܓܼܵܐ ܘܐܲܪ̈ܓܘܵܢܹܐ ܡܸܬܼܝܲܩܲܪ ܒܵܗ̇ ܡܲܢ ܕܝܲܠܦ̣ܵܗ̇. ܠܡܲܟܿܝܼܟܼܵܐ ܡܸܡܬܼܘܿܡ ܐ̄ܢܵܫ ܠܵܐ ܤܵܢܹ̇ܐ: ܠܵܐ ܛܵܪܹܐ ܠܹܗ ܒܡܸܠܬܼܵܐ: ܠܵܐ ܫܵܐܹ̇ܛ. ܘܡܸܛܠ ܕܡܵܪܹܗ ܪܵܚܹ̇ܡ ܠܹܗ: ܥܲܠ ܟܠܢܵܫ ܪܚܝܼܡ. ܟܠܢܵܫ: ܡܲܚܸܒܼ ܠܹܗ. ܟܠܢܵܫ: ܡܚܲܒܸܒܼ ܠܹܗ. ܘܟܼܠ ܐܲܝܟܵܐ ܕܩܵܪܹܒܼ: ܐܲܝܟܼ ܕܲܒܼܡܲܠܲܐܟܼ ܢܘܼܗܪܵܐ ܚܵܝ̇ܪܝܼܢ ܒܹܗ: ܘܐܝܼܩܵܪܵܐ ܦܵܪܫܝܼܢ ܠܹܗ. ܡܡܲܠܸܠ ܚܲܟܝܼܡܵܐ ܘܲܤܦܝܼܪܵܐ ܘܲܡܫܲܠܹܝܢ ܠܹܗ: ܕܲܠܡܲܟܿܝܼܟܼܵܐ ܢܸܬܿܠܘܼܢ ܐܲܬܼܪܵܐ ܠܲܡܡܲܠܵܠܘܼ. ܥܲܝܢܵܘ̈ܗܝ ܕܟܼܠܢܵܫ ܠܦܘܼܡܹܗ ܚܵܝܪ̈ܵܢ: ܕܡܵܢܵܐ ܦܵܬܼܓܼܵܡܵܐ ܢܵܦܹ̇ܩ ܡܸܢܹܗ. ܘܟܼܠܢܵܫ ܠܦܸܬܼܓܼܵܡܵܘ̈ܗܝ ܡܤܲܟܸܐ: pb. 577 ܐܲܝܟܼ ܕܲܠܦܸܓܼܓܼܵܡܹ̈ܐ ܕܡ̣ܢ ܐܲܠܵܗܵܐ. ܒܨܝܼܘܼܬܼܵܐ ܕܦܸܬܼܓܼܵܡܵܘ̈ܗܝ: ܐܲܝܟܼ ܡܸܠܬܼܵܐ ܕܤܘܿܦܸܤܛܵܐ ܡܲܥܩܒܼܝܼܢ ܥܲܠ ܤܘܼܟܵܠܵܗ̇. ܚܲܠ̈ܝܵܢ ܡܸܠܵܘ̈ܗܝ ܠܡܲܫܡܲܥܬܼܵܐ ܕܚܲܟܿܝܼ̈ܡܹܐ: ܝܲܬܿܝܼܪ ܡ̣ܢ ܟܲܟܵܪܝܼܬܼܵܐ ܠܚܸܟܵܐ ܕܐܵܟܼܘܿܠܹܝ̈ܗ̇. ܘܥܲܠ ܐܲܝܟܼ ܐܲܠܵܗܵܐ ܚܫܝܼܒܼ: ܐܵܦܸܢ ܗܸܕܼܝܼܘܿܛܵܐ ܐܝܼܬܼܵܘܗܝ ܒܡܸܠܬܹܗ ܘܫܝܼܛܵܐ ܒܲܚܙܵܬܹܗ. ܐܲܝܢܵܐ ܕܥܲܠ ܡܲܟܿܝܼܟܼܵܐ ܡܡܲܠܸܠ ܒܲܤܝܵܐܝܼܬܼ: ܠܵܐ ܬܘܼܒܼ ܚܵܫ̇ܒܿܝܼܢ ܠܹܗ ܕܚܲܝ̈ܐ ܗ̄ܘ̣: ܐܸܠܵܐ ܐܲܝܟܼ ܐ̄ܢܵܫ ܕܦܵܬܲܚ ܦܘܼܡܹܗ ܥܲܠ ܐܲܠܵܗܵܐ. ܘܲܟܼܡܵܐ ܕܡܸܬܿܬܿܫܝܼܛ ܗ̤ܘ ܝܲܬܿܝܼܪ ܒܥܲܝ̈ܢܲܝ ܢܲܦܫܹܗ: ܡ̣ܢ ܟܠܗܹܝܢ ܒܸܪ̈ܝܵܬܼܵܐ ܐܝܼܩܵܪ̈ܵܘܗܝ ܬܵܟܼ̇ܒܿܝܼܢ. ܩܵܪܹܒܼ ܡܲܟܿܝܼܟܼܵܐ ܠܘܵܬܼ ܚܲܝ̈ܘܵܬܼܵܐ ܚܲܒ̈ܵܠܵܬܼܵܐ: ܘܡܸܚܕܼܵܐ ܕܫܸܟܼܢܲܬ̤ ܚܙܵܬܼܗܹܝܢ ܥܠܵܘܗܝ: ܡܸܫܬܲܝܢܵܐ ܒܲܥܪܝܼܪܵܝܘܼܬܼܗܹܝܢ: ܘܩܵܪ̈ܒܵܢ ܘܡܸܬܿܛܲܦ̈ܝܵܢ ܒܹܗ ܐܲܝܼܟܼ ܕܲܒܼܡܵܪܹܝܢ. ܘܲܡܚܲܪ̈ܟܿܫܵܢ ܒܕܼܘܼܢܒ̈ܝܵܬܼܗܹܝܢ: ܘܲܡܠܲܚ̈ܟܼܵܢ ܐܝܼܕܼܵܘ̈ܗܝ ܘܪܸ̈ܓܼܠܵܘܗܝ. ܡܸܛܠ ܕܗܵܘ̇ ܪܹܝܚܵܐ ܕܦܵܐܲܚ ܗ̄ܘ̣ܵܐ ܡ̣ܢ ܐܵܕܼܵܡ ܩܕܼܵܡ ܥܒܼܵܪ ܦܘܼܩܕܵܢܵܐ: ܟܲܕܼ ܐܸܬܼܟܲܢܲܫܹ̈ܝܢ ܨܹܐܕܼܵܘܗܝ ܘܤܵܡ̣ ܠܗܹܝܢ ܫܡܵܗܹ̈ܐ ܒܦܲܪܕܲܝܤܵܐ: ܡܪ̈ܝܼܚܵܢ ܡܸܢܹܗ. ܗܵܘ̇ ܕܲܫܩܝܼܠ ܗ̄ܘ̣ܵܐ ܡܸܢܲܢ: ܘܬܼܘܼܒܼ ܚܲܕܬܹܗ ܝܲܗ̣ܒܹܗ ܠܲܢ ܡܫܝܼܚܵܐ ܒܡܹܐܬܼܝܼܬܹܗ: ܗ̤ܘܝܘܼ ܕܐܲܒܼܤܸܡ̣ ܪܹܚܵܐ ܕܓܸܢܤܵܐ ܕܼܲܢܲܝ̈ܢܵܫܵܐ. ܘܐܸܢ ܩܵܪܹܒܼ ܠܘܵܬܼ ܪ̈ܲܚܡܵܠ ܩܵܛ̈ܘܿܠܹܐ: ܡܸܚܕܼܵܐ ܕܓܸܫܬܼܵܐ ܕܐܝܼܕܹܗ ܩܸܪܒܲܬ̤ ܠܓܼܘܼܫܡܲܝ̈ܗܘܿܢ: ܩܸܪܲܬ̤ ܠܵܗ̇ ܥܲܤܩܘܼܬܼ ܥܘܼܙܵܗ̇ ܕܡܸܪܲܬܼܗܘܿܢ ܩܵܛܘܿܠܬܼܵܐ: ܘܒܼܐܝܼܕܼܵܘ̈ܗܝ ܦܵܪܹܬܼ ܠܗܘܿܢ ܐܲܝܟܼ ܕܲܠܩܲܡ̈ܨܹܐ. ܘܐܸܢ ܩܵܪܹܒܼ ܨܹܝܕܼ ܒܢܲܝ̈ܢܵܫܵܐ: ܘܐܲܝܟܼ ܕܲܒܼܡܵܪܵܐ ܚܵܝ̇ܪܝܼܢ ܒܹܗ. ܘܡܵܢܵܐ ܐܵܡܲ݁ܪ ܐ̄ܢܵܐ ܒܢܲܝ̈ܢܵܫܵܐ؟ ܕܥܲܡ ܟ̱ܠܵܗ̇ pb. 578 ܒܝܼܫܘܼܬܼܗܘܿܢ ܘܡܲܪܝܼܪܘܼܬܼܗܘܿܢ ܕܫܹ̈ܐܕܹܐ: ܘܟܼܠܹܗ ܚܘܼܬܼܪܵܐ ܕܬܲܪܥܝܼܬܼܗܘܿܢ: ܡܵܐ ܕܲܡܛ̣ܵܘ ܠܲܡܲܟܿܝܼܟܼܵܐ: ܗܘ̤ܵܘ ܠܗܘܿܢ ܐܲܝܟܼ ܥܲܦܪܵܐ. ܦܸܟܼܗܲܬ̤ ܠܵܗ̇ ܩܲܫܝܘܼܬܼܗܘܿܢ ܟ̱ܠܵܗ̇: ܐܸܫܬܪܝܼܘ ܦܘܪ̈ܤܲܝܗܘܿܢ: ܒܛܸܠ̣ ܠܗܹܝܢ ܨܸܢ̈ܥܵܬܼܗܘܿܢ. ܗܵܫܵܐ ܕܹܝܢ ܕܚܵܘܝܼܢܵܗ̇ ܠܪܲܒܿܘܼܬܼ ܐܝܼܩܵܪܵܗ̇ ܕܡ̣ܢ ܐܲܠܵܗܵܐ: ܘܚܲܝܠܵܐ ܕܒܼܵܗ̇ ܟܤܸܐ: ܢܚܵܘܸܐ ܡܸܟܹܝܠ ܢܲܗܝܼܪܵܐܝܼܬܼ ܕܡܵܢܵܐ ܐܝܼܬܹܝܗ̇ ܗ̤ܝ ܡܲܟܿܝܼܟܼܘܼܬܼܵܐ: ܘܐܸܡܲܬܼܝ ܢܸܫܬܿܘܸܐ ܐ̄ܢܵܫ ܕܲܢܩܲܒܿܠܝܼܗ̇ ܡܲܠܝܵܐܝܼܬܼ ܐܲܝܟܼ ܕܐܝܼܬܹܝܗ̇. ܘܢܸܥܒܸܕܼ ܦܘܼܪܫܵܢܵܐ ܒܹܝܬܼ ܡܲܟܿܝܼܟܼܵܐ ܕܒܲܦܝܼ̈ܢ: ܠܐܲܝܢܵܐ ܕܠܵܗ̇ ܠܡܲܟܝܼܟܼܘܼܬܼܵܐ ܕܲܫܪܵܪܵܐ ܐܸܫܬܘܼܝܼ. ܡܲܟܿܝܼܟܼܘܼܬܼܵܐ ܐܝܼܬܹܝܗ̇: ܚܲܝܠܵܐ ܐ̄ܪܵܙܵܢܵܝܵܐ: ܕܒܼܵܬܲܪ ܟ̱ܠܹܗ ܫܘܼܡܠܵܝܵܐ ܕܕܘܼܒܵܪܹ̈ܐ ܡܩܲܒܿܠܝܼܢ ܠܵܗ̇ ܩܲܕܝܼ̈ܫܹܐ ܓܡܝܼܪܹ̈ܐ. ܘܠܵܐ ܡܸܬܼܝܼܗܸܒܼ ܗܵܢܵܐ ܚܲܝܠܵܐ: ܐܸܠܵܐ ܐܸܢ ܠܐܲܝܠܹܝܢ ܕܟܼܠܹܗ ܫܘܼܡܠܵܝܵܐ ܕܲܡܝܲܬܿܪܘܼܬܼܵܐ ܒܚܹܝܠ ܛܲܝܒܿܘܼܬܼܵܐ ܒܲܩܢܘܿܡܗܘܿܢ ܓܡܲܪܘ: ܟܡܵܐ ܕܤܵܦܹ̇ܩ ܟܝܵܢܵܐ ܒܲܬܼܚܘܼܡܵܐ. ܒܗܵܝ̇ ܕܲܡܝܲܬܿܪܘܼܬܼܵܐ ܗ̣̄ܝ ܚܵܒܼܫܲܬܼ ܠܟܼܠ. ܘܡܸܛܠ ܗܵܢܵܐ: ܠܵܐ ܡܸܫܟܿܚܝܼܢܲܢ ܕܲܠܟܼܠܢܵܫ ܐܲܝܟܼ ܕܐܵܬܼܝܵܐ ܢܸܚܫܒܝܼܘܗܝ ܡܲܟܿܝܼܟܼܵܐ: ܐܸܠܵܐ ܐܸܢ ܠܐܲܝܠܹܝܢ ܕܐܸܫܬܿܘܝܼܘ ܠܛܲܟܼܤܵܐ ܗܵܢܵܐ ܕܐܸܡܲܪܢܲܢ. ܠܵܘ ܟܠ ܕܒܲܟܼܝܵܢܹܗ ܡܫܲܝܲܢ ܐܵܘ ܫܠܸܐ: ܐܵܘ ܪܡܝܼܣ: ܐܵܘ ܬܲܡܝܲܡ: ܗܵܢܵܐ ܡܲܛܝܼ ܠܕܲܪܓܼܵܐ ܕܡܲܟܿܝܼܟܼܘܼܬܼܵܐ. ܐܸܠܵܐ ܡܲܟܿܝܼܟܼܵܐ ܐܝܼܬܼܵܘܗܝ ܒܲܫܪܵܪܵܐ: ܐܲܝܢܵܐ ܕܟܲܕܼ ܝܐܝܼܬܼ ܠܹܗ ܒܟܸܤܝܵܐ ܡܸܕܸܡ ܕܫܵܘܹ̇ܐ ܠܪܵܡܘܼܬܼܵܐ: ܠܵܐ ܡܸܬܿܬܿܪܝܼܡ. ܐܸܠܵܐ ܐܝܼܬܼܵܘܗܝ ܐܲܝܟܼ ܥܲܦܪܵܐ ܒܚܘܼܫܵܒܼܵܘ̈ܗܝ. ܐܵܦܠܵܐ ܠܐܲܝܢܵܐ ܕܲܒܼܥܘܼܗܕܵܢܵܐ ܕܡܵܟܵܬܹ̈ܗ ܐܵܘ ܕܫܵܪ̈ܥܵܬܹܗ ܡܸܬܼܡܲܟܲܟ: ܕܢܸܬܼܥܗܸܕܼ ܐܸܢܹܝܢ ܐܲܝܟܼ ܕܢܸܬܿܬܿܒܲܪ ܠܸܒܹܗ ܘܢܸܬܿܬܲܚܬܸܐ ܪܸܥܝܵܢܹܗ ܡ̣ܢ ܙܵܘ̈ܥܹܐ ܕܪܵܡܘܼܬܼܵܐ ܒܥܘܼܗܕܵܢܗܹܝܢ: ܩܵܪܹܝܢܲܢ ܡܲܟܝܼܟܼܵܐ ܐܵܦܸܢ ܡܩܲܠܤܵܐ pb. 579 ܗܵܕܹܐ. ܕܗܵܐ ܥܕܲܟܹܝܠ: ܐܝܼܬܼ ܠܹܗ ܚ̈ܘܼܫܵܒܹܐ ܕܪܵܡܘܼܬܼܵܐ. ܘܡܲܟܿܝܼܟܼܘܼܬܼܵܐ: ܠܵܐ ܩܲܢܝܵܐ ܠܹܗ. ܐܸܠܵܐ ܒܝܲܕܼ ܦܘܼܪ̈ܤܹܐ: ܡܩܲܪܸܒܼ ܠܵܗ̇ ܠܘܵܬܹܗ. ܘܐܵܦܸܢ ܡܩܲܠܤܵܐ ܗ̣̄ܝ ܗܵܕܹܐ ܐܲܝܟܼ ܕܐܸܡ̇ܪܹܬܼ: ܘܗܵܕܹܐ ܥܕܲܟܹܝܠ ܠܲܝܬܿ ܠܹܗ. ܐܸܠܵܐ ܡܸܒܼܥܵܐ ܗ̄ܘ̣ ܒܵܥܹ̇ܐ ܠܵܗ̇: ܘܠܵܘ ܕܝܼܠܹܗ ܗ̤ܝ. ܐܸܠܵܐ ܡܲܟܿܝܼܟܼܵܐ ܓܡܝܼܪܵܐ ܐܝܼܬܼܵܘܗܝ: ܐܲܝܢܵܐ ܕܠܵܐ ܤܢܝܼܩ ܕܗ̤ܘ ܢܸܬܼܦܲܪܲܣ ܥܸܠܬܼܵܐ ܠܬܲܪܥܝܼܬܹܗ ܕܬܸܬܼܡܲܟܲܟ. ܘܲܠܟܼܠܗܹܝܢ ܗܵܠܹܝܢ ܫܲܡܠܝܼ: ܘܐܲܝܟܼ ܟܝܵܢܵܝܬܼܵܐ ܩܲܢܝܵܐ ܠܹܗ ܕܠܵܐ ܥܲܡܠܵܐ. ܐܲܝܟܲܢܵܐ ܕܐܵܦ ܟܲܕܼ ܡܲܘܗܲܒܼܬܼܵܐ ܪܲܒܿܬܼܵܐ ܕܠܵܐ ܤܵܦ̇ܩܵܐ ܠܵܗ̇ ܒܪܝܼܬܼܵܐ ܟ̱ܠܵܗ̇: ܗܵܢܵܘ ܕܹܝܢ ܗ̤ܘ ܟܝܵܢܵܐ ܡܩܲܒܸܠ ܠܵܗ̇ ܠܓܼܵܘ ܡܸܢܹܗ: ܗ̤ܘ ܐܲܝܟܼ ܚܲܛܵܝܵܐ ܘܲܫܚܝܼܡܵܐ ܚܫܝܼܒܼ ܒܥܲܝ̈ܢܲܝ ܢܲܦܫܹܗ. ܘܟܲܕܼ ܥܲܠܝܼܠ ܒܐ̄ܪ̈ܵܙܹܐ ܕܟܼܠܗܘܿܢ ܟܝܵܢܹ̈ܐ ܪ̈ܘܼܚܵܢܹܐ: ܘܓܲܢܒܵܪ ܒܚܸܟܼܡܬܼܵܐ ܕܟܼܠܗܹܝܢ ܒܸܪ̈ܝܵܬܼܵܐ: ܒܟܼܠܵܗ̇ ܚܲܬܿܝܼܬܼܘܼܬܼܵܐ ܝܵܕܲܥ̇ ܕܡܸܕܸܡ ܠܵܐ ܝܵܕܲܥ̇. ܘܗܵܢܵܐ: ܠܵܘ ܒܦܘܼܪ̈ܤܹܐ. ܐܸܠܵܐ ܕܠܵܐ ܥܸܨܝܵܢ: ܗܵܟܲܢ ܐܝܼܬܼܵܘܗܝ ܒܠܸܒܹܗ܀ ܘܡܲܨܝܵܐ ܟܲܝ ܕܗܵܟܲܢ ܢܸܗܘܸܐ ܒܲܪܢܵܫܵܐ: ܐܝܼܬܼ ܠܹܗ ܠܲܟܼܝܵܢܵܐ ܕܲܢܫܲܚܠܸܦ ܗ̤ܘ ܠܹܗ ܗܵܟܲܢ؟ ܠܵܐ. ܡܵܕܹܝܢ: ܠܵܐ ܬܸܬܼܦܲܠܲܓܼ. ܕܚܲܝܠܵܐ ܗ̄ܘ̣ ܐ̄ܪܵܙܵܢܵܝܵܐ ܕܩܲܒܸܠ̣: ܘܗ̤ܘܝܘܼ ܕܓܼܵܡܲܪ ܠܹܗ ܒܟܼܠܵܗ̇ ܡܝܲܬܿܪܘܼܬܼܵܐ ܕܠܵܐ ܥܲܡܠܵܐ. ܗܵܢܵܘ ܚܲܝܠܵܐ ܗܵܘ̇ ܕܩܲܒܸܠ̣ܘ ܫܠܝܼܚܹ̈ܐ ܛܘܼ̈ܒܼܵܢܹܐ ܒܲܚܙܵܬܼܵܐ ܕܢܘܼܪܵܐ. ܘܡܸܛܠܵܬܹܗ ܗ̤ܘ ܕܦܲܩܸܕܼ ܐܸܢܘܿܢ ܦܵܪܘܿܩܲܢ: ܕܡ̣ܢ ܐܘܿ ܪܸܫܠܸܡ ܠܵܐ ܢܸܦܪܩܘܼܢ: ܥܕܲܡܵܐ ܕܲܢܩܲܒܿܠܘܼܢ ܚܲܝܠܵܐ ܡ̣ܢ ܪܵܘܡܵܐ: ܕܗ̤ܘܝܘܼ ܦܵܪܲܩܠܹܝܛܵܐ ܕܡܸܬܼܦܲܫܲܩ ܪܘܼܚܵܐ ܡܒܲܝܵܐܢܵܐ܀ ܘܗ̤ܘܝܘܼ ܪܘܼܚܵܐ ܕܚܸܙ̈ܘܵܢܹܐ. . ܘܗܵܕܲܐ ܗ̣̄ܝ ܕܐܲܡܝܼܪܵܐ ܒܲܟܼܬܼܵܒܼܵܐ ܥܠܲܝܗܘܿܢ: ܕܲܠܡܲܟܿܝܼ̈ܟܹܐ ܐ̄ܪ̈ܵܙܹܐ ܡܸܬܼܓܠܹܝܢ. ܗܵܢܵܘ ܕܹܝܢ: ܕܲܠܗܵܢܵܐ ܪܘܼܚܵܐ ܕܓܸܠܝܵܢܹ̈ܐ ܘܲܡܚܵܘܝܵܢܵܐ pb. 580 ܕܐ̄ܪ̈ܵܙܹܐ: ܡܸܫܬܿܘܹܝܢ ܡܲܟܿܝܼ̈ܟܹܐ ܕܲܢܩܲܒܿܠܘܼܢܵܝܗܝ ܠܓܼܵܘ ܡܸܢܗܘܿܢ. ܘܡܸܛܠܗܵܕܹܐ ܗ̄ܘ̣ ܕܐܲܡܝܼܪܵܐ ܡ̣ܢ ܐ̄ܢܵܫܵܐ ܩܲܕܝܼ̈ܫܹܐ: ܕܡܲܪܝܼܟܼܘܼܬܼܵܐ ܒܚܸܙ̈ܘܵܢܹܐ ܐܲܠܵܗܵܝܹ̈ܐ ܓܵܡܪܵܐ ܠܢܲܦܫܵܐ. ܡܵܕܹܝܢ ܠܵܐ ܢܲܡܪܲܚ ܐ̄ܢܵܫ ܠܡܸܪܢܵܐ ܥܲܠ ܢܲܦܫܹܗ: ܕܐܲܕܼܪܸܟܼ ܠܲܡܫܘܼܚܬܼܵܐ ܕܡܲܟܿܝܼܟܼܘܼܬܼܵܐ ܒܲܩܢܘܿܡܹܗ: ܡܸܛܠ ܚܲܕܼ ܚܘܼܫܵܒܼܵܐ ܕܲܬܼܘܵܬܼܵܐ ܕܲܤܠܸܩ̣ ܠܹܗ ܒܲܙܒܲܢ: ܐܵܘ ܒܩܲܠܝܼܠ ܕܸܡ̈ܥܹܐ ܕܲܢܦܲܩ̣ ܠܹܗ: ܐܵܘ ܡܸܛܠ ܚܕܼܵܐ ܫܲܦܝܼܪܬܵܐ ܕܐܝܼܬܼ ܠܹܗ ܒܲܟܼܝܵܢܹܗ: ܐܵܘ ܐܲܚܝܼܕܼ ܠܘܵܬܹܗ ܒܥܸܨܝܵܢܵܐ: ܕܲܠܗܵܘ̇ ܕܤܵܟܼܵܐ ܗ̄ܘ̣ ܕܟܼܠܗܘܿܢ ܐ̄ܪ̈ܵܙܹܐ ܘܚܵܒܼܘܿܫܵܐ ܕܟܼܠܵܗ̇ ܡܝܲܬܿܪܘܼܬܼܵܐ: ܒܲܬܼܚܘܼܡܵܐ ܕܲܒܼܥܲܡ̈ܠܹܐ ܙܥܘܿܪܹ̈ܐ ܩܢ̣ܵܐ: ܚܵܫܹ̇ܒܼ ܠܗܘܿܢ ܒܕܼܘܼܟܲܬܼ ܗܵܕܹܐ ܡܵܘܗܲܒܼܬܼܵܐ. ܐܸܠܵܐ ܐܸܢܗ̤ܘ ܕܒܲܪܢܵܫܵܐ ܙܟܼܵܐ ܠܟܼܠܗܹܝܢ ܪ̈ܘܼܚܹܐ ܕܲܠܩܘܼ̈ܒܼܠܵܝܵܬܼܵܐ: ܘܠܵܐ ܦܲܕܼ ܡܸܢܹܗ ܚܲܕܼ ܡ̣ܢ ܥ̇ܒܼܵܪܹ̈ܐ ܕܲܡܝܲܬܿܪ̈ܵܬܼܵܐ ܟܠܗܹܝܢ: ܕܥܲܠ ܐܲܦܵܘ̈ܗܝ ܠܵܐ ܥܡܲܠ̣ ܘܲܩܢ̣ܵܐ: ܘܲܙܟܼܵܐ ܘܡܲܟܸܟܼ ܠܟܼܠܗܘܿܢ ܚܸܤ̈ܢܹܐ ܡܪ̈ܝܼܕܹܐ. ܘܒܼܵܬܲܪ ܗܵܝܕܹܝܟ ܒܪܘܼܚܵܐ ܐܲܪܓܸܫ̣ ܒܢܲܦܫܹܗ ܕܩܲܒܿܠܵܗ̇ ܠܡܵܘܗܲܒܼܬܼܵܐ: ܟܲܕܼ ܗ̤ܝ ܪܘܼܚܵܐ ܤܵܗ̇ܕܵܐ ܠܪܘܼܚܹܗ: ܐܲܝܟܼ ܡܸܠܬܹܗ ܕܲܫܠܝܼܚܵܐ: ܗܵܢܵܘ ܤܵܟܼܵܗ̇ ܕܡܲܟܿܝܼܟܼܘܼܬܼܵܐ. ܛܘܼܒܼܵܘܗܝ ܠܡܲܢ ܕܲܩܢ̣ܵܗ̇: ܕܟܼܠܥܸܕܵܢ ܠܥܘܼܒܹܗ ܕܝܼܫܘܿܥ ܡܥܲܦܸܩ ܗܵܢܵܐ܀ ܐܸܠܵܐ ܡܫܲܐܸܠ ܐ̄ܢܵܫ: ܕܡܵܢܵܐ ܐܸܥܒܸܿܕܼ؟ ܐܲܝܟܲܢ ܐܸܩܢܹܝܗ̇؟ ܒܐܲܝܢܵܐ ܦܘܼܪܤܵܐ ܐܸܫܬܿܘܸܐ ܠܡܸܗܘܵܐ ܠܵܗ̇ ܡܩܲܒܿܠܵܢܵܐ؟ ܕܗܵܐ: ܥܵܨܹ̇ܐ ܐ̄ܢܵܐ ܢܲܦܫܝ. ܘܟܲܕܼܸ ܡܲܤܒܲܪ ܐ̄ܢܵܐ ܕܲܩܢܹ̇ܝܬܼܵܗ̇: ܚܵܙܹ̇ܐ ܐ̄ܢܵܐ ܕܟܲܕܼ ܠܵܐ ܪܓܼܝܼܫ ܐ̄ܢܵܐ: ܗܵܐ ܙܵܘ̈ܥܹܐ ܕܕܲܠܩܘܼܒܼܠܵܗ̇ ܦܵܤܹ̇ܝܢ ܒܓܼܵܘ ܪܸܥܝܵܢܝ. ܘܡܸܟܹܝܠ ܢܵܦܹ̇ܠ ܐ̄ܢܵܐ ܡܸܟܵܐ: ܠܲܦܤܵܩ ܤܲܒܼܪܵܐ. ܠܗܵܢܵܐ ܕܗܵܕܹܐ ܡܫܲܐܸܠ: pb. 581 ܡܸܬܼܦܲܢܸܐ ܠܹܗ: ܕܦܲܩܵܚ ܠܹܗ ܠܬܲܠܡܝܼܕܼܵܐ ܕܢܸܗܘܸܐ ܐܲܝܟܼ ܪܲܒܹܗ: ܘܲܠܥܲܒܼܕܵܐ ܐܲܝܟܼ ܡܵܪܹܗ. ܚܙܝܼ ܗܵܘ̇ ܦܵܩܘܿܕܼܵܗ̇ ܕܗܵܕܹܐ ܘܝܵܗܘܿܒܼܵܗ̇ ܕܡܵܘܗܲܒܼܬܼܵܐ: ܒܡܵܢܵܐ ܩܲܢܝܵܐ ܗ̄ܘ̣ܵܬܼ ܠܹܗ: ܘܐܸܬܿܕܲܡܵܐ ܒܹܗ ܘܐܵܦ ܐܲܢ̄ܬܿ: ܘܡܸܫܟܲܚ ܐܲܢ̄ܬܿ. ܗ̤ܘ ܓܹܝܪ ܐܸܡ݂ܲܪ: ܕܐܵܬܹ̇ܐ ܐܲܪܟܿܘܿܢܹܗ ܕܥܵܠܡܵܐ ܗܵܢܵܐ: ܘܒܼܝܼ ܠܲܝܬܿ ܠܹܗ ܡܸܕܸܡ. ܚܵܙܹ̇ܐ ܐܲܢ̄ܬܿ ܐܲܝܟܲܢ ܒܫܘܼܡܠܵܝܵܐ ܕܟܼܠ ܡܝܲܬܪܘܼ ܡܸܬܼܩܲܢܝܵܐ ܡܲܟܿܝܼܟܼܘܼܬܼܵܐ؟ ܐܲܝܟܲܢܵܐ ܕܗܵܘ̇ ܕܦܲܩܸܕܼ: ܒܹܗ ܢܡܲܪܸܐ. ܠܬܲܥ̈ܠܹܐ ܠܲܡ ܢܸܩ̈ܥܹܐ ܐܝܼܬܼ ܠܗܘܿܢ: ܘܲܠܥܵܘܦܵܐ ܕܲܫܡܲܝܵܐ ܡܲܛܠܠܵܐ: ܘܠܲܒܼܪܹܗ ܕܐ̄ܢܵܫܵܐ ܠܲܝܬܿ ܠܹܗ ܐܲܝܟܵܐ ܕܢܸܤܡܘܿܟܼ ܪܹܫܹܗ. ܕܠܹܗ ܬܸܫܒܿܘܿܚܬܼܵܐ ܡ̣ܢ ܟܠ ܕܐܸܬܼܓܡܲܪܘ ܘܐܸܬܼܩܲܕܲܫܘ ܘܐܸܫܬܲܡܠܝܼܘ ܒܟܼܠܗܘܿܢ ܕܵܪܹ̈ܐ: ܥܲܡ ܐܲܒܼܵܐ ܡܫܲܕܪܵܢܹܗ ܘܪܘܼܚܵܐ ܕܩܘܼܕܼܫܵܐ: ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܐܵܡܹܝܢ.